កម្ពុជា រកឃើញអ្នកឆ្លងកូវីដ-១៩ ករណីថ្មី ចំនួន ២៥ នាក់ ក្នុងអំឡុង ២៤ ម៉ោង នៃថ្ងៃទី ០៨ ខែសីហា ២០២២ ក្នុងនោះមានករណីឆ្លងក្នុងសហគមន៍ចំនួន ២៥ នាក់។
ក្នុងអំឡុងពេលដដែល ក៏មានអ្នកជំងឺកូវីដ-១៩ ចំនួន ៥៤ នាក់បានជាសះស្បើយ និងមិនមានករណីស្លាប់ថ្មី ដោយសារជំងឺនេះនៅឡើយ។
កងកម្លាំងប្រដាប់អាវុធរបស់ កោះតៃវ៉ាន់ បានចាប់ផ្ដើមធ្វើលំហាត់សមយុទ្ធបាញ់គ្រាប់ពិតនៅថ្ងៃទី ០៩ សីហា ដោយប្រើសេណារីយោ «កោះតៃវ៉ាន់ត្រូវគេវាយប្រហារ» ដែលសកម្មភាពនេះកើតឡើងភ្លាមៗក្រោយពីសមយុទ្ធយោធាទ្រង់ទ្រាយធំរបស់ ទីក្រុងប៉េកាំង។
លោក Lou Woei-jye អ្នកនាំពាក្យរបស់ កងទ័ពតៃវ៉ាន់ បានបញ្ជាក់ថា សមយុទ្ធនេះបានចាប់ផ្ដើមនៅទីក្រុង Pingtung វេលាម៉ោង ០០ និង ៤០ នាទី (ម៉ោង GMT) និងបញ្ចប់នៅវេលាម៉ោង ០១ និង ៣០ នាទី។
ចិនដីគោក បានធ្វើសមយុទ្ធយោធាទ្រង់ទ្រាយធំមិនធ្លាប់មានពីមុនមក នៅជុំវិញ កោះតៃវ៉ាន់ កាលពីសប្ដាហ៍កន្លង ដើម្បីឆ្លើយតបនឹងដំណើរទស្សនកិច្ចនៅ កោះតៃវ៉ាន់ របស់ ប្រធានសភាជាន់ទាបអាម៉េរិក លោកស្រី Nancy Pelosi។
សមយុទ្ធយោធារបស់ តៃវ៉ាន់ ដែលធ្វើឡើងពីថ្ងៃទី ០៩ ដល់ ១១ សីហា នឹងរួមមាន ការដាក់ពង្រាយទាហានរាប់រយនាក់ និងប្រព័ន្ធកាំភ្លើងធំប្រហែល ៤០ គ្រឿង។
លោក Lou ឱ្យដឹងថា សមយុទ្ធនេះគឺជាកម្មវិធីទៀងទាត់ដែលត្រូវបានរៀបគម្រោងពីមុន និងមិនមែនដើម្បីប្រតិកម្មទៅនឹងសមយុទ្ធយោធាថ្មីៗនេះរបស់ ចិនដីគោក ឡើយ។
តាមរយៈសេចក្ដីជូនដំណឹងស្ដីពី ស្ថានភាពធាតុអាកាស ក្រសួងធនធានទឹក និងឧត្តុនិយម បានឱ្យដឹងថា នៅចន្លោះថ្ងៃទី ១០ និងទី ១៣ សីហា កម្ពុជា នឹងទទួលរងឥទ្ធិពលពីជ្រលងសម្ពាធាទាប ដែលអូសបន្លាយកាត់លើភាគខាងជើងនៃ ប្រទេសថៃ ឡាវ និង វៀតណាម រួមនឹងឥទ្ធិពលព្យុះទី ៧ ដែលមានឈ្មោះថា មូឡេន ដែលកំពុងឆ្ពោះទៅភាគខាងជើងនៃ ប្រទេសវៀតណាម នៅថ្ងៃទី ១១ សីហា។
នៅក្នុងអំឡុងពេលនោះដែរ កម្ពុជា ក៏នឹងបន្តទទួលរងឥទ្ធិពលពីខ្យល់មូសុងនិរតី ដែលបក់បោកលើតំបន់មាត់សមុទ្រ។
នៅចន្លោះទីថ្ងៃទី ១០ ដល់ថ្ងៃទី ១២ សីហា តំបន់មួយចំនួនរបស់ ខេត្តកោះកុង និងខេត្តព្រះសីហនុ អាចប្រឈមនឹងជំនន់ទឹកភ្លើង ដោយសារតែភ្លៀងធ្លាក់ច្រើន។ ដូច្នេះ ប្រជាពលរដ្ឋដែលរស់នៅក្នុងតំបន់មាត់សមុទ្រ និងតំបន់ដែលមានហានិភ័យទទួលរងឥទ្ធិពលអាក្រក់ពីអាកាសធាតុខាងលើ សូមមេត្តាប្រុងប្រយ័ត្ន៕
[ភ្នំពេញ – ថ្ងៃទី ០៥ ខែសីហា ឆ្នាំ២០២២] ក្រុមហ៊ុន អ អិម អេ (ខេមបូឌា) ម.ក ដែលជាក្រុមហ៊ុននាំចូល និងចែកចាយផ្ដាច់មុខនូវរថយន្ត Ford គ្រប់ប្រភេទក្នុងទីផ្សារប្រទេសកម្ពុជាបានប្រារព្ធពិធីសម្ពោធជាផ្លូវការនៃរថយន្ត Ford Everest ស៊េរីថ្មីឆ្នាំ 2023 ដែលកម្មវិធីនេះបានប្រារព្ធធ្វើឡើងនៅ ដឹ ព្រេមៀ សេនធ័រ សែនសុខ។
កម្មវិធីនេះត្រូវបានបែងចែកជា 2 ផ្នែក ពេលព្រឹកជាកម្មវិធីបើកបរសាកល្បង ដែលអតិថិជនទាំងអស់អាចអញ្ជើញចូលរួមបើកបរសាកល្បងជាមួយរថយន្ត Ford Everest ស៊េរីថ្មីឆ្នាំ 2023 ជាមួយនឹងអ្នកជំនាញបច្ចេកទេស Ford និងទទួលបានការរៀនពីវគ្គបណ្តុះបណ្តាលស្តីពីការបើកបរដែលធ្វើឲ្យលោកអ្នកទទួលបានបទពិសោធន៏បើកបរដ៏ថ្មីស្រឡាងជាមួយនឹងបច្ចេកវិទ្យាយ៉ាងច្រើនលើសពីការរំពឹងទុក មិនតែប៉ុណ្ណោះអតិថិជនថែមទាំងមានឱកាសលេងហ្គេមដើម្បីទទួលបានរង្វាន់យ៉ាងច្រើនសន្ធឹកសន្ធាប់ផងដែរ។
សម្រាប់កម្មវិធីពេលល្ងាចគឺជាពិធីសម្ពោធជាផ្លូវការនៃរថយន្តនេះដែលបានអញ្ជើញចូលរួមពីសំណាក់ភ្ញៀវកិត្តិយស និងអតិថិជន Ford យ៉ាងច្រើនកុះកររហូតដល់ទៅជាង 2,000 នាក់ឯណោះ។
ឆ្លៀតក្នុងឱកាសនេះដែរ លោក ងន សាំង អគ្គនាយកនៃក្រុមហ៊ុន អ អិម អេ (ខេមបូឌា) ក៏បានថ្លែងសុន្ទរកថានៅក្នុងអង្គពិធីនេះដែរ ដែលលោកបានមានប្រសាសន៍ថា៖ “ដោយមើលឃើញពីការគាំទ្រ និងការនិយមប្រើប្រាស់ពីសំណាក់អតិថិជនមកកាន់រថយន្ត SUV ប៉ុន្មានឆ្នាំចុងក្រោយនេះគួរឲ្យកត់សម្គាល់ ទើបក្រុមហ៊ុនសម្រេចនាំចូលនូវរថយន្ត SUV ជាច្រើនម៉ូឌែលមកជាបន្តបន្ទាប់ ហើយក្នុងថ្ងៃនេះដែរយើងនឹងធ្វើការសម្ពោធដាក់លក់ជាផ្លូវការនៃរថយន្ត Ford Everest ស៊េរីថ្មីឆ្នាំ 2023 ដែលជារថយន្ត Luxury Off-Road ដែលត្រូវបានផ្លាស់ប្តូររូបរាងថ្មីទាំងស្រុង និងបច្ចេកវិទ្យាឆ្លាតលើសពីការរំពឹងទុក ពោលគឺការរចនារូបរាងផ្នែកខាងក្រៅយ៉ាងទាន់សម័យ និងការរចនាផ្នែកខាងក្នុងផ្តល់ជូននូវសុវត្ថិភាព ផាសុកភាព ប្រណិតភាពប្រៀបបានដូចជាជម្រកដ៏កក់ក្តៅមួយ ជាពិសេសស័ក្តិសមបំផុតសម្រាប់អតិថិជនដែលចូលចិត្តដំណើរកម្សាន្តបែបផ្សងព្រេង។”
រថយន្ត Ford Everest ស៊េរីថ្មីឆ្នាំ 2023 គឺជារថយន្ត Luxury Off-Road SUV ដែលមានទាំងភាពប្រណិត ទំនើបទាន់សម័យ និងធន់រឹងមាំអាចបើកបរបានគ្រប់ស្ថានភាពផ្លូវដោយសារតែរថយន្តនេះបានបំពាក់មកជាមួយនឹងប្រព័ន្ធសុវត្ថិភាព និងបច្ចេកវិទ្យាច្រើនលើសពីការរំពឹងទុកដូចជា៖
គួរបញ្ជាក់ផងដែរថាសម្រាប់ទីផ្សារប្រទេសកម្ពុជា Ford Cambodia ប្រកាសបើកទទួលការកក់ជាផ្លូវការជាមួយនឹងរថយន្ត Ford Everest Sport ស៊េរីថ្មីឆ្នាំ 2023 ជាមួយនឹងតម្លៃជាង 6 ម៉ឺនដុល្លា និងរថយន្ត Ford Everest Titanium ស៊េរីថ្មីឆ្នាំ 2023 ជាមួយនឹងតម្លៃជាង 7 ម៉ឺនដុល្លា សម្រាប់ព័ត៌មានបន្ថែមលោកអ្នកអាចអញ្ជើញទៅសាកសួរនៅតាមបណ្តាសាខាអគារតាំងបង្ហាញរថយន្ត Ford និងទំនាក់ទំនងទៅតាមលេខទូរស័ព្ទដូចខាងក្រោម៖
អាជ្ញាធរកោះតៃវ៉ាន់ កំពុងតែត្រៀមបន្ទប់ក្រោមដីសម្រាប់ប្រជាជនរស់នៅបណ្ដោះអាសន្ន ក្នុងករណី ចិនដីគោក វាយប្រហារតាមផ្លូវអាកាស សំដៅ ចិនតៃវ៉ាន់។
បណ្ដាបន្ទប់លាក់ខ្លួនក្រោមដីរបស់ កោះតៃវ៉ាន់ មួយចំនួនធំត្រូវបានកែប្រែពីសាល ឬទីលានដាក់រថយន្តក្រោមដី ស្ថានីយរថភ្លើងអគ្គិសនីក្រោមដី ឬមជ្ឈមណ្ឌលពាណិជ្ជកម្មក្រោមដី។ បន្ទប់ស្នាក់នៅក្រោមដីទាំងនេះត្រូវបានរៀបចំឡើងដើម្បីទប់ទល់នឹងការវាយប្រហារពីលើកអាកាសរបស់ កងទ័ពរំដោះប្រជាជនចិន ខណៈដែលភាពតានតឹងរវាង ចិនដីគោក ចិនតៃវ៉ាន់ និង សហរដ្ឋអាម៉េរិក កំពុងកើនឡើងខ្ពស់។
បច្ចុប្បន្ន កោះតៃវ៉ាន់ មានមូលដ្ឋានលាក់ខ្លួនក្រោមដីជាង ៤,៦០០ កន្លែង នៅទូទាំងកោះ ដែលនេះអាចដាក់មនុស្សបាន ១២ លាននាក់។
រូបភាពខ្លះៗស្ដីពីការហាត់ស៊ាំ និងទិដ្ឋភាពនៃបន្ទប់ សាលសុវត្ថិភាពក្រោមដី នៅ កោះតៃវ៉ាន់ ៖
មេដឹកនាំតំបន់ Zaporizhzhia ដែលត្រូវបានលើកបន្តុបដោយ រុស្ស៊ី កាលពីថ្ងៃទី ០៨ សីហា បានចុះហត្ថលេខាលើបទបញ្ជាណែនាំពីការធ្វើប្រជាមតិស្ដីពីការបង្រួបបង្រួមទៅក្នុង សហព័ន្ធរុស្ស៊ី។
លោក Yevgeny Balitsky មេដឹកនាំអាជ្ញាធរដែលស្និទ្ធនឹង រុស្ស៊ី នៅតំបន់ Zaporizhzhia បានប្រកាសចាប់ផ្ដើមដំណើរការនេះនៅក្នុងវេទិកាគាំទ្រ រុស្ស៊ី ដែលមានឈ្មោះថា «យើងរួមដំណើរជាមួយប្រទេសរុស្ស៊ី» ដែលត្រូវបានធ្វើឡើងនៅតំបន់ Melitopol ជាទីក្រុងធំជាងគេដែល រុស្ស៊ី បានចូលកាន់កាប់នៅ Zaporizhzhia។
«ខ្ញុំបានចុះហត្ថលេខាលើបទបញ្ជាមួយសម្រាប់គណៈកម្មការជាតិរៀបចំការបោះឆ្នោត ដើម្បីត្រៀមសម្រាប់ការធ្វើប្រជាមតិស្ដីពីការបម្រួបបង្រួមតំបន់ Zaporizhzhia ទៅក្នុងទឹកដី រុស្ស៊ី» លោក Yevgeny និយាយដូច្នេះ។
សេចក្ដីសម្រេចស្ដីពីការធ្វើប្រជាមតិនេះក៏ធ្លាប់ត្រូវបានលោក Vladimir Rogov ដែលជាសមាជិកម្នាក់នៅក្នុងក្រុមប្រឹក្សាយោធា-ស៊ីវិល Zaporizhzhia ប្រកាសនាពេលកន្លង។ មុននោះ មន្ត្រីរូបនេះនិយាយថា ប្រជាជនតំបន់ Zaporizhzhia និង រុស្ស៊ី គឺជា «ប្រជាជាតិតែមួយ»។
បច្ចុប្បន្ន ផ្ទៃដីប្រមាណ ២/៣ នៅតំបន់ Zaporizhzhia របស់ អ៊ុយក្រែន កំពុងត្រូវបានគ្រប់គ្រងដោយ រុស្ស៊ី។ អ៊ុយក្រែន និងបណ្ដាប្រទេសលោកខាងលិច ប្រកាសថា ការធ្វើប្រជាមតិណាមួយនៅក្នុងតំបន់ដែល រុស្ស៊ី កំពុងកាន់កាប់នៅ អ៊ុយក្រែន គឺសុទ្ធតែជាអំពើខុសច្បាប់៕
ក្រសួងការពារជាតិអាម៉េរិក កាលពីថ្ងៃទី ០៨ សីហា បានប៉ាន់ប្រមាណឃើញថា ទាហានរុស្ស៊ី ប្រហែល ៨០,០០០ នាក់ បានស្លាប់ និងរបួសក្នុងសង្គ្រាមដែលអូសបន្លាយពេលជិត ៦ ខែកន្លងនៅ អ៊ុយក្រែន។
នេះគឺជាលើកដំបូងហើយដែល កងទ័ពអាម៉េរិក លើកឡើងនូវការប៉ាន់ស្មានស្ដីពីចំនួនទាហានរបស់ រុស្ស៊ី ដែលបានរងរបួស និងស្លាប់នៅ អ៊ុយក្រែន។
ថ្លែងនៅចំពោះមុខក្រុមអ្នកយកព័ត៌មានកាលពីថ្ងៃទី ០៨ សីហា អនុរដ្ឋមន្ត្រីក្រសួងការពារជាតិអាម៉េរិក Colin Kahl បានឱ្យដឹងថា យោងតាមការប៉ាន់ស្មានរបស់ សហរដ្ឋអាម៉េរិក ទាហានរុស្ស៊ី ចន្លោះពី ៧០,០០០ ទៅ ៨០,០០០ នាក់ បានស្លាប់ និងរងរបួសនៅ អ៊ុយក្រែន។ បណ្ដាប្រទេសលោកខាងលិច ជឿថា រុស្ស៊ី បានបញ្ជូនទាហានប្រហែល ១៥០,០០០ នាក់ ទៅកាន់តំបន់ក្បែរព្រំដែនជាមួយ អ៊ុយក្រែន មុនពេលបើកយុទ្ធនាការយោធាពិសេសកាលពីថ្ងៃទី ២៤ កុម្ភៈ។
យោងតាម លោក Colin Kahl បើទោះជាបានរងការខាតបង់ធ្ងន់ធ្ងរដូច្នេះ ប៉ុន្តែ រុស្ស៊ី នៅតែមិនអាចសម្រេចបានគោលដៅដែលបានដាក់ចេញក្នុងគ្រាដំបូង នោះគឺការប្ដូរផ្លាស់រដ្ឋាភិបាលទីក្រុងកៀវ និងការប្រែក្លាយ អ៊ុយក្រែន ទៅជាប្រទេសលែងមានឯករាជ្យភាព និងបូរណភាពទឹកដី។
កាលពីខែមុន ប្រធានទីភ្នាក់ងារស៊ើបការណ៍សម្ងាត់អាម៉េរិក William Burns ក៏ធ្លាប់បានលើកឡើងថា សហរដ្ឋអាម៉េរិក ប៉ាន់ប្រមាណឃើញថា ទាហានរុស្ស៊ី ១៥,០០០ នាក់បានស្លាប់ និងប្រហែល ៤៥,០០០ នាក់ផ្សេងទឿបានរងរបួស ក្នុងសង្គ្រាមនៅ អ៊ុយក្រែន។
ការប៉ាន់ស្មានរបស់ ក្រសួងការពារជាតិអាម៉េរិក ត្រូវបានប្រកាសដំណាលគ្នានឹងការផ្ដល់ជំនួយផ្នែកយោធាតម្លៃ ១ ពាន់លានដុល្លារ ដល់ អ៊ុយក្រែន។
អគ្គិភ័យនៅឯឃ្លាំងផ្ទុកឥន្ធនៈមួយនៅក្នុងខេត្ត Matanzas របស់ ប្រទេសគុយបា កាលពីថ្ងៃទី ០៨ សីហា បានបន្តឆេះរាលដាលដល់អាងផ្ទុកទីបី និងបន្តគំរាមកំហែងដល់អាងផ្ទុកដទៃទៀតដែលនៅក្បែរនោះ។
យោងតាមព័ត៌មានពីក្រុមមន្ត្រីនៅក្នុងខេត្ត Matanzas អណ្ដាតភ្លើងពីអាងផ្ទុកទីពីរបានឆេះរាលដាលដល់អាងផ្ទុកទីបី និងកំពុងគំរាមកំហែងដល់អាងផ្ទុកទីបួន។
មុននោះ អគ្គិភ័យនៅឯអាងផ្ទុកឥន្ធនៈទីមួយដែលកើតឡើងដោយសាររន្ទះបាញ់កាលពីថ្ងៃសៅរ៍សប្ដាហ៍កន្លង ត្រូវបានពន្លត់រួចរាល់។ គិតមកដល់បច្ចុប្បន្ន មានមនុស្សម្នាក់បានស្លាប់, ១២៥ នាក់រងរបួង និង ១៤ នាក់បាត់ខ្លួន។
មនុស្សជាង ៥,០០០ នាក់ ត្រូវបានជម្លៀសទៅកាន់តំបន់សុវត្ថិភាព ហើយប្រជាជនត្រូវបានណែនាំឱ្យពាក់ម៉ាស ឬនៅក្នុងផ្ទះដើម្បីចៀសវាងផ្សែងពុល។
Matanzas គឺជាកំពង់ផែធំបំផុតនៅ គុយបា ស្ដីពីការទទួលប្រេងឆៅ និងឥន្ធនៈដែលនាំចូលពីបរទេស។ ប្រេងឆៅធន់ធ្ងន់ ក៏ដូចជាប្រេងឥន្ធនៈ និងប្រេងម៉ាស៊ូត របស់ គុយបា ភាគច្រើនត្រូវបានប្រើប្រាស់ដើម្បីផលិតអគ្គិសនីសម្រាប់តម្រូវការនៅក្នុងស្រុក៕
សហរដ្ឋអាម៉េរិក នឹងបន្តផ្ដល់ជំនួយជាថវិកា និងយោធា ៥.៥ ពាន់លានដុល្លារ ដល់ អ៊ុយក្រែន ដើម្បីទប់ទល់នឹងវិបត្តិនាបច្ចុប្បន្ន។
យោងតាម ទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ ខ្ទង់ថវិកា ៤.៥ ពាន់លានដុល្លារ នឹងត្រូវបានប្រើប្រាស់សម្រាប់តម្រូវការបន្ទាន់របស់ រដ្ឋាភិបាលអ៊ុយក្រែន រួមមាន ការទូទាត់ប្រាក់ខែចូលនិវត្តន៍ របបសន្តិសុខសង្គម និងការថែទាំសុខភាព។ ចំណែក ១ ពាន់លានដុល្លារទៀតគឺជាជំនួយយោធាសម្រាប់ អ៊ុយក្រែន។
ដូច្នេះ ជំនួយដែល សហរដ្ឋអាម៉េរិក បានផ្ដល់ឱ្យ អ៊ុយក្រែន គិតចាប់តាំងពី រុស្ស៊ី បើកការឈ្លានពាន បានកើនឡើងដល់ ៨.៥ ពាន់លានដុល្លារអាម៉េរិក។
ខ្ទង់ជំនួយនេះនឹងត្រូវបានប្រគល់ឱ្យ អ៊ុយក្រែន ទៅតាមដំណាក់កាល ក្នុងនោះ ដំណាក់កាលដំបូងគឺ ៣ ពាន់លានដុល្លារ នៅក្នុងខែនេះ។
ខ្ទង់ជំនួយថ្មីនេះស្ថិតក្នុងកញ្ចប់ជំនួយ ៤០ ពាន់លានដុល្លារ សម្រាប់ អ៊ុយក្រែន ដែល សភាអាម៉េរិក បានអនុម័តរួចហើយកាលពីខែឧសភាកន្លងទៅ៕
ថ្ងៃនេះ (០៨ សីហា) នៅឯទីស្នាក់ការកណ្ដាលនៃ លេខាធិការដ្ឋានអាស៊ាន (ASEAN) នៅ រដ្ឋធានីហ្សាការតា ប្រទេសឥណ្ឌូណេស៊ី ព្រឹត្តិការណ៍អបអរសាទរទិវាអាស៊ាន ០៨/សីហា ១៩៦៧ – ០៨ សីហា ២០២២ ត្រូវបានរៀបចំធ្វើឡើងយ៉ាងអធិកអធម។
ក្រោយរយៈពេល ២ ឆ្នាំ ដែលព្រឹត្តិការណ៍អបអរសាទរទិវាអាស៊ាន ត្រូវបានប្រារព្ធឡើងក្រោមរូបភាពប្រយោល តាមប្រព័ន្ធវីដេអូ ព្រោះតែ កូវីដ-១៩ ឆ្នាំនេះ ព្រឹត្តិការណ៍នេះត្រូវបានធ្វើឡើងក្រោមរូបភាពធម្មតាឡើងវិញ។
ព្រឹត្តិការណ៍នេះត្រូវបានចាប់ផ្ដើមដោយកម្មវិធីតន្ត្រី វប្បធម៌ សម្ដែងដោយសិល្បករ សិល្បការិនីល្បីឈ្មោះរបស់បណ្ដាប្រទេសជាសមាជិកអាស៊ាន ក្នុងនោះក៏មានការសម្ដែងរបស់វិចិត្រករគំនូរខ្សាច់ ជនជាតិឥណ្ឌូណេស៊ី Vina Candrawati ផងដែរ។
ថ្លែងក្នុងព្រឹត្តិការណ៍នេះ អគ្គលេខាធិការអាស៊ាន Lim Jock Hoi សង្កត់ធ្ងន់ថា ព្រឹត្តិការណ៍អបអរសាទរដែលប្រារព្ធឡើងដោយផ្ទាល់ ក្រោយរយៈពេល ២ ឆ្នាំដោយសារជំងឺរាតត្បាតសកល បានបង្ហាញនូវការប្រឹងប្រែងរបស់បណ្ដាប្រទេសជាសមាជិកអាស៊ាន ក្នុងការយកឈ្នះលើជំងឺរាតត្បាត ដើម្បីនាំជីវភាពត្រលប់មកធម្មតាវិញ។
ក្នុងរយៈពេល ៥៥ ឆ្នាំនៃការរីកចម្រើន អាស៊ាន ត្រូវបានបង្ហាញថាជារូបមន្តសហប្រតិបត្តិការក្នុងតំបន់មួយដែលទទួលបានជោគជ័យនៅលើពិភពលោក កសាងសហគមន៍មួយដែលនាំមកនូវឱកាសដល់ប្រជាជនគ្រប់រូប។ អាស៊ាន កំពុងក្លាយជាខឿនសេដ្ឋកិច្ចសកម្ម ដោយមានការព្យាករថានឹងមានកំណើនសេដ្ឋកិច្ចវិជ្ជមានក្នុងឆ្នាំនេះ និងឆ្នាំបន្ទាប់។ ប្រទេសមហាអំណាចជាច្រើនដែលនៅខាងក្រៅតំបន់នេះ កំពុងតែផ្ដល់តម្លៃសំខាន់ដល់តួនាទីរបស់ អាស៊ាន។
អគ្គលេខាធិការ Lim Jock Hoi ក៏បានអះអាងអំពីវិស័យអាទិភាពសម្រាប់ពេលខាងមុខរបស់ អាស៊ាន៖ «បណ្ដាប្រទេសជាសមាជិករបស់ អាស៊ាន ត្រូវការជំរុញសមាហរណកម្ម និងកិច្ចសហប្រតិបត្តិការក្នុងតំបន់ ធានានូវតួនាទីជាស្នូល និងសាមគ្គីភាពរបស់ អាស៊ាន នៅក្នុងរចនាសម្ព័ន្ធតំបន់ និងសកលលោក ជំរុញទំនាក់ទំនងជាមួយដៃគូ រួមគ្នារីកចម្រើន។ អាស៊ាន ក៏ត្រូវការជំរុញលើការអនុវត្តឱ្យមានប្រសិទ្ធភាពចំពោះសេដ្ឋកិច្ចឌីជីថល ការកែលម្អសមត្ថភាពប្រកួតប្រជែង និងប្រភពទុនក្នុងតំបន់ បើកឱកាសឱ្យមានការចូលរួមពីមនុស្សជំនាន់ថ្មី នៅក្នុងការកំណត់គោលនយោបាយ ការកសាងសហគមន៍អាស៊ានបៃតង និងទូលំទូលាយ។
ជាមួយនឹងប្រធានបទ «រួមគ្នាកាន់តែរឹងមាំ» របស់ឆ្នាំនេះ អាស៊ាន ជាថ្មីម្ដងទៀត បានបញ្ជូនសារយ៉ាងខ្លាំងក្លាស្ដីពីស្មារតីសាមគ្គី បញ្ចេញកម្លាំងជាក្រុម ដើម្បីដោះស្រាយបញ្ហាដែលមាននាបច្ចុប្បន្ន៕