សឿន សំណាង - La Reine Media

ស្ថានីយបញ្ចូលថាមពលសម្រាប់រថយន្តអគ្គិសនីមួយកន្លែង ចំណាយពេលបញ្ចូល ៨ នាទី រត់បាន ២០០ គីឡូម៉ែត្រ

(ប្រទេសចិន)-ស្ថានីយបញ្ចូលថាមពលសម្រាប់រថយន្តអគ្គិសនីរបស់ក្រុមហ៊ុន Nebula អាចជួយឱ្យរថយន្តរត់បានជាង ២០០ គីឡូម៉ែត្រ បន្ទាប់ពីបញ្ចូលថាមពលរយៈពេលតែ ៨ នាទី។

ស្ថានីយបញ្ចូលថាមពលមហាលឿនសម្រាប់រថយន្តអគ្គិសនីមួយកន្លែងដែលអាចបម្រើសេវាកម្មដល់រថយន្តអគ្គិសនី ២០ គ្រឿងក្នុងពេលតែមួយ និងអាចជួយឱ្យរថយន្តរត់បានជាង ២០០ គីឡូម៉ែត្រ បន្ទាប់ពីបញ្ចូលថាមពលរយៈពេល ៨ នាទី ត្រូវបានសម្ពោធដាក់ឱ្យដំណើរការចាប់ពីសប្ដាហ៍នេះ នៅក្នុងទីក្រុង Ningde ខេត្ត Fujian ប្រទេសចិន។

នេះគឺជាស្ថានីយបញ្ចូលថាមពលសម្រាប់រថយន្តអគ្គិសនីឆ្លាតវៃដំបូងគេនៅ ប្រទេសចិន ដែលបំពាក់ប្រព័ន្ធបញ្ចូលថាមពលមានបណ្ដាញរក្សាទុកថាមពល និងត្រូវបានដំណើរការដោយបណ្ដាញអគ្គិសនីចរន្តជាប់ (DC)។

ដោយមានទំហំ ២,១០០ ម៉ែត្រក្រឡា ស្ថានីយបញ្ចូលថាមពលអគ្គិសនីនេះត្រូវបានបំពាក់ប្រព័ន្ធផ្ទុកថាមពលអគ្គិសនីខ្នាត megawatt។ វាប្រើប្រាស់ផ្ទាំងសូឡារនៅលើដំបូលសម្រាប់ផលិតអគ្គិសនីដើម្បីរក្សាទុកថាមពល និងបញ្ចូលទៅឱ្យយានយន្តអគ្គិសនី

ក្រៅពីការបញ្ចូលថាមពល ស្ថានីយនេះក៏មានសេវាកម្មត្រួតពិនិត្យសុខភាពថ្មផ្ទុកអគ្គិសនី និងផ្ញើទិន្នន័យឱ្យអតិថិជន។

ក្រុមហ៊ុនអភិវឌ្ឍ Nebula មានគម្រោងសាងសង់ស្ថានីយបែបនេះចំនួន ១២ កន្លែង នៅមុនចុងឆ្នាំក្រោយ និង ៥០ កន្លែងនៅក្នុងទីក្រុង Ningde ក្នុងរង្វង់ ៥ ឆ្នាំខាងមុខ៕

October 21, 2022

ក្រោយនាយិការដ្ឋមន្ត្រី Liz Truss ចុះចេញពីតំណែង តើអង់គ្លេសជ្រើសរើសមេដឹកនាំថ្មីដោយរបៀបណា?

បេក្ខភាពដែលចូលរួមប្រកួតប្រជែងដើម្បីក្លាយជានាយករដ្ឋមន្ត្រីថ្មីរបស់ អង់គ្លេស នឹងត្រូវមានការគាំទ្រពីតំណាងរាស្ត្រគណបក្សអភិរក្សនិយម យ៉ាងតិច ១០០ រូប មុនពេលបានចូលទៅដល់ការបោះឆ្នោត។

នាយិការដ្ឋមន្ត្រីអង់គ្លេស លោកស្រី Liz Truss បានប្រកាសលាលែងពីតំណែងកាលពីថ្ងៃទី ២០ តុលា បន្ទាប់ពីឡើងកាន់អំណាចបាន ៤៤ ថ្ងៃ ក្នុងគ្រាដែលត្រូវរងសម្ពាធធ្ងន់។ លោកស្រីក្លាយជាមេដឹកនាំរបស់ អង់គ្លេស ដែលកាន់តំណែងនេះរយៈពេលខ្លីបំផុតក្នុងប្រវត្តិសាស្ត្ររបស់ អង់គ្លេស។

Graham Brady ប្រធានគណៈកម្មការ ១៩២២ បានឱ្យដឹងថា បក្សអភិរក្សនិយម នឹងបង្ហើយការបោះឆ្នោតជ្រើសរើសមេដឹកនាំថ្មី ហើយក៏ជានាយករដ្ឋមន្ត្រីថ្មីរបស់ អង់គ្លេស នៅក្នុងសប្ដាហ៍នេះ។ គណៈកម្មការ ១៩២២ គឺជាស្ថាប័នដែលគ្រប់គ្រងការបោះឆ្នោតជ្រើសរើសមេដឹកនាំរបស់ គណបក្សអភិរក្សនិយម។

ដំណើរការនៃការជ្រើសតាំងបេក្ខភាព ចាប់ផ្ដើមពីថ្ងៃទី ២០ តុលា ក្នុងនោះ បេក្ខភាពនីមួយៗត្រូវតែមានការគាំទ្រពីតំណាងរាស្ត្របក្សអភិរក្សនិយម យ៉ាងតិច ១០០ រូប។ ដោយសារគណបក្សនេះមានតំណាងរាស្ត្រ ៣៥៧ រូប ដូច្នេះ បេក្ខភាពយ៉ាងច្រើនបំផុតត្រឹម ៣ រូប នឹងត្រូវបានជ្រើសរើសឱ្យចូលដល់វគ្គបោះឆ្នោតសម្រាប់តំណែងប្រធានបក្ស។

(រាប់ពីឆ្វេង-អតីតរដ្ឋមន្ត្រីក្រសួងហិរញ្ញវត្ថុ Rishi Sunak, រដ្ឋមន្ត្រីមន្ត្រីក្រសួងហិរញ្ញវត្ថុ Jeremy Hunt, អតីតរដ្ឋមន្ត្រីក្រសួងការពារជាតិ Penny Mordaunt និង រដ្ឋមន្ត្រីក្រសួងការពារជាតិ Ben Wallance)

ក្នុងករណីមានបេក្ខភាព ៣ រូប ក្រុមតំណាងរាស្ត្របក្សអភិរក្សនិយម នឹងបោះឆ្នោតដើម្បីជ្រើសរើស ២ រូបដែលមានលទ្ធផលខ្ពស់បំផុតនៅថ្ងៃទី ២៤ តុលាខាងមុខ។ សមាជិកបក្សអភរក្សនិយម ចំនួន ១៧០,០០០ នាក់ ក្រោយមកនឹងបោះឆ្នោតដោយប្រយោលរហូតដល់ថ្ងៃទី ២៨ តុលា ដើម្បីជ្រើសរើសអ្នកជាប់ឆ្នោត ហើយលទ្ធផលចុងក្រោយនឹងត្រូវបានប្រកាសនៅក្នុងថ្ងៃដដែលនោះ។

គណៈកម្មការគ្រប់គ្រងការបោះឆ្នោតខាងលើ បានលើកឡើងនូវបុគ្គលមួយចំនួនដែលមានសក្ដានុពលសម្រាប់តំណែងនាយករដ្ឋមន្ត្រីថ្មីរបស់ អង់គ្លេស ក្នុងនោះក៏មាន អតីតរដ្ឋមន្ត្រីក្រសួងហិរញ្ញវត្ថុ Rishi Sunak, អតីតរដ្ឋមន្ត្រីក្រសួងការពារជាតិ Penny Mordaunt, រដ្ឋមន្ត្រីមន្ត្រីក្រសួងហិរញ្ញវត្ថុ Jeremy Hunt, រដ្ឋមន្ត្រីក្រសួងការពារជាតិ Ben Wallance និង អតីតនាយករដ្ឋមន្ត្រី Johnson ផងដែរ៕

October 21, 2022

កុមារឥណ្ឌូណេស៊ី ៩៩ នាក់ ស្លាប់ដោយសាររបួសតម្រងនោម ក្រោយពីផឹកថ្នាំស៊ីរ៉ូក្អក

ក្រសួងសុខាភិបាលឥណ្ឌូណេស៊ី កាលពីថ្ងៃទី ១៩ តុលា បានប្រកាសថា បានរកឃើញកុមារ ៩៩ នាក់ បានស្លាប់ដោយសាររបួសតម្រងនោម ទាក់ទិននឹងថ្នាំក្អកប្រភេទទឹកស៊ីរ៉ូ paracetamol ព្យាបាលអាការក្ដៅ ដែលនាំចូលពី ឥណ្ឌា។

អ្នកនាំពាក្យរបស់ ក្រសួងសុខាភិបាលឥណ្ឌូណេស៊ី បានឱ្យដឹងថា គិតត្រឹមថ្ងៃទី ១៨ តុលា ២០២២ ប្រទេសនេះបានរកឃើញករណីរបួសតម្រងនោមស្រួចស្រាវចំនួន ២០៦ នាក់ ក្នុងនោះមាន ៩៩ នាក់បានបាត់បង់ជីវិត។

ស្ថាប័នគ្រប់គ្រងអាហារ និងឱសថជាតិឥណ្ឌូណេស៊ី កំពុងស្រាវជ្រាវដើម្បីឱ្យដឹងថា សមាសធាតុ diethylene glycol និង ethylene glycol ក្នុងស៊ីរ៉ូក្អក ធ្វើឱ្យមានជាតិពុលនៅក្នុងបណ្ដាធាតុដទៃដែលត្រូវបានប្រើប្រាស់ជាធាតុផ្សំក្នុងថ្នាំនេះដែរ ឬយ៉ាងណា។

ក្រសួងសុខាភិបាលឥណ្ឌូណេស៊ី បានស្នើឱ្យមន្ទីរពេទ្យ និងមជ្ឈមណ្ឌលសុខាភិបាលក្នុងប្រទេស ប្រមូលយកថ្នាំប្រភេទខាងលើ ទៅពិនិត្យរកសារធាតុពុល និងផ្អាកការលក់ថ្នាំស៊ីរ៉ូក្អកដែលមានផ្ទុក paracetamol នេះរហូតដល់មានប្រកាសថ្មី៕

October 20, 2022

គណៈកម្មការគ្រប់គ្រងល្បែងពាណិជ្ជកម្មកម្ពុជា ចេញសេចក្ដីណែនាំ ស្ដីពីការធ្វើអាជីវកម្មល្បែងផ្សងសំណាងនៅកម្ពុជា

គណៈកម្មការគ្រប់គ្រងល្បែងពាណិជ្ជកម្មកម្ពុជា ចេញសេចក្ដីណែនាំ ស្ដីពីការធ្វើអាជីវកម្មល្បែងផ្សងសំណាងនៅកម្ពុជា ក្នុងបំណងបង្ក្រាបរាល់សកម្មភាព និងទីតាំងល្បែងស៊ីសងខុសច្បាប់ និងដើម្បីលើកកម្ពស់វិស័យល្បែងពាណិជ្ជកម្មស្របច្បាប់។

នាថ្ងៃទី ២០ តុលានេះ គណៈកម្មការគ្រប់គ្រងល្បែងពាណិជ្ជកម្មកម្ពុជា បានចេញសេចក្ដីណែនាំមួយទាក់ទិននឹងអាជីវកម្មល្បែងផ្សងសំណាងនៅកម្ពុជា ក្នុងនោះ គណៈកម្មការនេះបានលើកឡើងនូវមូលហេតុ និងលក្ខខណ្ឌមួយចំនួនសម្រាប់ប្រតិបត្តិករល្បែងផ្សងសំណងអនុវត្ត។

យោងតាមសេចក្ដីណែនាំនេះ ប្រតិបត្តិករល្បែងផ្សងសំណងត្រូវអនុវត្តនូវលក្ខខណ្ឌមួយចំនួនដើម្បីចៀសវាងការបំពានច្បាប់។ លក្ខខណ្ឌទាំងនេះ រួមមានដូចជា «ត្រូវធ្វើប្រតិបត្តិការអាជីវកម្មល្បែងតែនៅក្នុងទីតាំងដែលទទួលបានការអនុញ្ញាត», «ត្រូវដាក់តាំងបង្ហាញអាជ្ញាបណ្ណល្បែងផ្សងសំណង», «ដំណើរការតែប្រភេទល្បែងដែលរដ្ឋបានអនុញ្ញាត», «ត្រូវបង់មូលនិធិសង្គមដែលអាជ្ញាធរបានកំណត់» និង «មិនត្រូវលួចលាក់កត់កន្ទុយលេខខុសច្បាប់»។

ព័ត៌មានលម្អិត សូមអានសេចក្ដីណែនាំរបស់ គណៈកម្មការគ្រប់គ្រងល្បែងពាណិជ្ជកម្មកម្ពុជា ខាងក្រោម ៖

October 20, 2022

ស្ថានីយផលិតអគ្គិសនីពីពន្លឺព្រះអាទិត្យកម្លាំង ៨០០ MW លើសមុទ្រខ្សាច់ដំបូងនៅ កាតា

រោងចក្រអគ្គិសនី Al-Kharsaah ជាគម្រោងប្រើប្រាស់ថាមពលព្រះអាទិត្យនៅលើសមុទ្រខ្សាច់ដំបូងរបស់ ប្រទេសកាតា ដែលស្ថិតនៅភាគខាងលិចនៃ រដ្ឋធានីដូហា បានចាប់ផ្ដើមដំណើរការផ្គត់ផ្គង់អគ្គិសនី។

គម្រោងខាងលើដែលមានទុនវិនិយោគប្រហែល ៤៦៧ លានដុល្លារអាម៉េរិក ចំណាយទៅលើផ្ទាំងសូឡា ១.៨ លានផ្ទាំងដែលគ្របដណ្ដប់ផ្ទៃដីទំហំជាង ១០ គីឡូម៉ែត្រក្រឡា ត្រូវបានសម្ពោធដាក់ឱ្យដំណើរការកាលពីថ្ងៃទី ១៨ តុលាកន្លងទៅ។ នេះគឺជា «ស្ថានីយផលិតអគ្គិសនីពីថាមពលព្រះអាទិត្យធំបំផុតមួយនៅ មជ្ឈិមបូព៌ា» Saad Sherida al-Kaabi ប្រធានក្រុមហ៊ុន QatarEnergy និងជា រដ្ឋមន្ត្រីក្រសួងថាមពល របស់ ប្រទេសកាតា សង្កត់ធ្ងន់ដូច្នេះ។

រោងចក្រនេះមានកម្លាំងដំបូង ៨០០ megawatt ហើយនឹងពង្រីកបន្ថែមទៀតនាពេលខាងមុខ។ គម្រោងនេះគឺជាផ្នែកមួយនៅក្នុង «បណ្ដាគំនិតផ្ដួចផ្ដើមយុទ្ធសាស្ត្រ» ដើម្បីកាត់បន្ថយការបំភាយឧស្ម័ន និងកម្ដៅក្នុងបរិយាកាសនៅ កាតា។ វាត្រូវបានចាប់ផ្ដើមស្ថាបនាកាលពីឆ្នាំ ២០១៦ ក្រោមកិច្ចសហការរវាងសាជីវកម្ម TotalEnergies (បារាំង) និង Marubeni (ជប៉ុន)។

នៅពេលថ្ងៃ បច្ចេកវិទ្យាកំណត់ទិសទៅរកពន្លឺរបស់ រោងចក្រអគ្គិសនី Al-Kharsaah នឹងបង្វែរផ្ទាំងសូឡារទៅតាមព្រះអាទិត្យ ដើម្បីទទួលបានកម្ដៅពេញលេញ ខណៈដែលនៅពេលយប់ ដៃយន្តនឹងសម្អាតធូលីនៅលើផ្ទៃរបស់ផ្ទាំងសូឡារ។

ប្រទេសកាតា បើទោះជាមិនជឿនលឿនដូចទៅនឹងបណ្ដាប្រទេសដទៃទៀតនៅតំបន់ឈូងសមុទ្រពែរ្ស ទាក់ទងនឹងការរត់ប្រណាំងផ្នែកអគ្គិសនីកកើតឡើងវិញ ប៉ុន្តែប្រទេសនេះបានប្រកាសគោលដៅផលិតអគ្គិសនីស្អាតឱ្យបាន ៥ gigawatt នៅឆ្នាំ ២០៣៥។

ក្រៅពី Al-Kharsaah ប្រទេសកាតា ក៏ថែមទាំងមានគម្រោងផលិតអគ្គិសនីពីផ្ទាំងសូឡារខ្នាតយក្សចំនួន ២ ផ្សេងទៀត ដើម្បីបង្កើនបរិមាណអគ្គិសនីកកើតឡើងវិញឱ្យបានទ្វេដងនៅក្នុងរយៈពេល ២ ឆ្នាំខាងមុខ៕

October 20, 2022

មហាសេដ្ឋី ប៊ីល ហ្គេត (Bill Gates) ៖ វិបត្តិថាមពលនៅអឺរ៉ុប គឺជាដំណឹង «ល្អ»

មហាសេដ្ឋីអាម៉េរិក លោក ប៊ីល ហ្គេត បានថ្លែងថា ស្ថានភាពខ្វះឧស្ម័ន និងប្រភពផ្គត់ផ្គង់នឹងធ្វើឱ្យបណ្ដាប្រទេសនៅ អឺរ៉ុប ងាកទៅរកការប្រើប្រាស់ថាមពលកកើតឡើងវិញ។

ឆ្លើយនៅក្នុងកិច្ចសម្ភាសជាមួយ CNBC កាលពីម្សិលមិញ សហស្ថាបនិករបស់ Microsoft លោក ប៊ីល ហ្គេត យល់ថា វិបត្តិប្រភពផ្គត់ផ្គង់ឧស្ម័នរបស់ អឺរ៉ុប គឺពិតជាប្រការ «ល្អ បើគិតវែងឆ្ងាយ»។

លោក ហ្គេត បកស្រាយថា សាធារណជន «ជឿជាក់ថា ការងាកទៅរកថាមពលកកើតឡើងវិញអាចអនុវត្តបានឆាប់»។ ប៉ុន្តែ លោកក៏បានសង្កត់ធ្ងន់ថា ដំណើរការនេះត្រូវការពេល និងផែនការដើម្បីពន្លឿនដំណើរការផ្លាស់ប្ដូរ។

សហភាពអឺរ៉ុប (EU) ថ្មីៗនេះបានឯកភាពគ្នាក្នុងការកាត់បន្ថយ ១៥% នៃតម្រូវការឧស្ម័ននៅក្នុងរដូវរងានេះ «ដើម្បីត្រៀមសម្រាប់លទ្ធភាពដែលប្រភពផ្គត់ផ្គង់ឧស្ម័នពី រុស្ស៊ី ត្រូវបានផ្អាកទាំងស្រុង»។

រុស្ស៊ី បានផ្គត់ផ្គង់ឧស្ម័នប្រហែល ៤០% ទៅឱ្យ អឺរ៉ុប មុនពេល មូស្គូ ចូលឈ្លានពាន អ៊ុយក្រែន កាលពីខែកុម្ភៈ។ ប៉ុន្តែ រុស្ស៊ី ក៏បានកាត់បន្ថយការផ្គត់ផ្គង់ឧស្ម័នយ៉ាងច្រើនដល់ អឺរ៉ុប ដោយសារទណ្ឌកម្មពីសហភាពនេះ។

អាជ្ញាធរអឺរ៉ុប ទើបតែបានប្រកាសអំពីកញ្ចប់វិធានការបន្ទាន់ថ្មីដែលអនុញ្ញាតឱ្យ អឺរ៉ុប ចរចាទិញឧស្ម័នក្នុងតម្លៃទាប។

កាលពីពេលថ្មីៗនេះ Karen Young ដែលជាអ្នកស្រាវជ្រាវជាន់ខ្ពស់ប្រចាំមជ្ឈមណ្ឌល Columbia ស្ដីពីគោលនយោបាយថាមពលសកល បានឱ្យដឹងថា បណ្ដាប្រទេសលោកខាងលិចកំពុងតែងាកទៅរកថាមពលកកើតឡើងវិញ។ ប្រការនេះកាន់តែចាំបាច់ដោយសារតែយុទ្ធនាការយោធារបស់ រុស្ស៊ី នៅ អ៊ុយក្រែន បាន និងកំពុងបង្កការរាំងស្ទះដល់ការផ្គត់ផ្គង់ប្រេង និងឧស្ម័នសម្រាប់អឺរ៉ុប»។ លោកបន្តថា «នេះប្រាកដជាដំណាក់កាលចាប់ផ្ដើមសម្រាប់ការបញ្ចប់ការរកស៊ីមានបានដោយសារប្រេងរ៉ែ»។

យោងតាម Young «តម្លៃប្រេងឡើងខ្ពស់ក្នុងឆ្នាំនេះមិនប្រក្រតី។ វាមិនត្រឹមតែជាវិបត្តិប្រេង ប៉ុន្តែគឺជាការប្ដូរផ្លាស់យ៉ាងធំស្ដីពីរចនាសម្ព័ន្ធថាមពលសកល»។

មូលនិធិរូបិយវត្ថុអន្តរជាតិ (IMF) ក៏បានឱ្យដឹងដែរថា បណ្ដាប្រទេសនាំចេញប្រេងនៅ មជ្ឈិមបូព៌ា ត្រូវបានព្យាករថា រកបាន ១.៣ ទ្រីលានដុល្លារពីឥន្ធនៈហ្វូស៊ីលក្នុងរយៈពេល ៤ ឆ្នាំ ដោយសារការឡើងថ្លៃប្រេងនាបច្ចុប្បន្ន។ ប៉ុន្តែ ក្រុមអ្នកជំនាញព្រមានថា ពួកគេមិនគួរប្រើប្រាស់ខ្ជះខ្ជាយប្រាក់ទាំងនេះ។ បណ្ដាប្រទេសនៅមជ្ឈិមបូព៌ា គួរតែការពារខ្លួនពីការប្រែប្រួលរបស់តម្លៃប្រេង តាមរយៈការប្រើប្រាស់ប្រាក់ទាំងនេះវិនិយោគទៅលើវិស័យផ្សេងៗដើម្បីធ្វើពិពិធកម្មប្រភពចំណូល ចៀសវាងការពឹងផ្អែកទៅលើតែរ៉ែប្រេង៕

October 20, 2022

គ្រាន់តែ លោក អ៊ីនឡុន ម៉ាស ថា «សប្បាយចិត្តចំពោះស្ថានភាព Twitter» ភាគហ៊ុននេះក៏ឡើងថ្លៃមួយរំពេច

នៅតែជាងមួយសប្ដាហ៍ទៀតប៉ុណ្ណោះ មហាសេដ្ឋីអាម៉េរិកដើមកំណើតអាហ្វ្រិកខាងត្បូង លោក អ៊ីឡុន ម៉ាស នឹងត្រូវប្រគល់ប្រាក់ ៤៤ ពាន់លានដុល្លារ ថ្លៃទិញ Twitter ទៅតាមពេលវេលាដែលបានកំណត់នៅតុលាការ។

ថ្មីៗនេះ នាយកប្រតិបត្តិរបស់ក្រុមហ៊ុនផលិតរថយន្តអគ្គិសនី Tesla លោក អ៊ីឡុន ម៉ាស បានឱ្យដឹងថា លោក និងក្រុមអ្នកវិនិយោគដទៃទៀត «ជាក់ច្បាស់ណាស់ បានឱ្យថ្លៃខ្ពស់ហួស» ចំពោះការទិញបណ្ដាញសង្គម Twitter។

ក៏ប៉ុន្តែ មហាសេដ្ឋីរូបនេះទើបតែបាននិយាយថា «សប្បាយចិត្តអំពីស្ថានភាព Twitter» និងប្រៀបធៀបក្រុមហ៊ុនបណ្ដាញសង្គមនេះថាដូចជាទ្រព្យមួយដែលបាន «រេចរឹលក្នុងមួយរយៈពេលយូរ» ប៉ុន្តែមាន «សក្ដានុពលគួរឱ្យភ្ញាក់ផ្អើល»។

ក្រោយការអធិប្បាយខាងលើរបស់ម្ចាស់ SpaceX ភាគហ៊ុន Twitter ក៏ឡើងថ្លៃនៅក្នុងការជួញដូរបន្ទាប់នោះ។

រឿងរ៉ាវទិញដូររវាង អ៊ីនឡុន ម៉ាស និង Twitter បានអូសបន្លាយពេលអស់ជាច្រើនខែមកហើយ ប៉ុន្តែមិនទាន់បានសម្រេច។ កាលពីថ្ងៃទី ៦ តុលា ចៅក្រមតុលាការរដ្ឋ Delaware បានផ្អាករឿងក្ដីនេះទៅតាមសំណើរបស់លោក ម៉ាស ដោយសហស្ថាបនិករបស់ Tesla រូបនេះ ព្រមបន្តដំណើរការទិញ Twitter។

«បើសិនការទិញដូរមិនបានបញ្ចប់ជាស្ថាពរមុនម៉ោង ៥ រសៀលថ្ងៃទី ២៨ តុលា ២០២២ ភាគីទាំងពីរនឹងត្រូវបានណែនាំឱ្យទាក់ទងមកខ្ញុំតាមអ៊ីមេលនៅព្រលប់ថ្ងៃនោះដើម្បីដឹងអំពីថ្ងៃកាត់ក្ដីករណីជម្លោះនៅតុលាការក្នុងខែវិច្ឆិកា ២០២២» ចៅក្រម Kathaleen St. McCormick នៅតុលាការ Delaware ប្រកាសដូច្នេះ។

ភាគីលោក អ៊ីឡុន ម៉ាស បានឱ្យដឹងថា នឹងបន្តដំណើរការទិញ Twitter ទៅតាមតម្លៃ ៥៤.២០ ដុល្លារ/ភាគហ៊ុន ដូចដែលបានស្នើទិញដំបូង ហើយភាគីអ្នកផ្ដល់ឥណទានកំពុងតែញាប់ដៃញាប់ជើងដើម្បីបង្ហើយកិច្ចព្រមព្រៀងទិញដូរនេះនៅ ឬប្រហែលថ្ងៃទី ២៨ តុលា ក្រោយមួយរយៈពេលយូរដែលលោក ម៉ាស បានព្យាយាមគេចពីការទិញដូរនេះ។

មកដល់ពេលនេះ នៅសល់ ៨ ថ្ងៃទៀតប៉ុណ្ណោះគឺដល់ថ្ងៃកំណត់ ២៨ តុលា។ ប៉ុន្តែ ភាគីទាំងឡាយក្នុងកិច្ចព្រមព្រៀងទិញដូរ Twitter នេះ មិនទាន់មានការសម្រេចចិត្តណាមួយនៅឡើយ។ ជាងនេះ ខាង Twitter ក៏នៅមានការមន្ទិលចំពោះលោក ម៉ាស ទាក់ទិននឹងកាលបរិច្ឆេទចុងក្រោយ និងកញ្ចប់ឥណទានសម្រាប់ការទិញដូរនេះ៕

October 20, 2022

រោងចក្រផលិត iPhone ចង់ផលិតរថយន្តអគ្គិសនីតម្លៃទាប និងក្ដោបក្ដាប់ទីផ្សារផលិតយានយន្តអគ្គិសនី ៥% នៅឆ្នាំ ២០២៥

ជោគជ័យដ៏ត្រចះត្រចង់ក្នុងនាមជាអ្នកផលិតទូរស័ព្ទ ថេប្លេត និងលេបថបលំដាប់កំពូលពិភពលោក Foxconn ដែលជាអ្នកផលិត iPhone កំពុងតែមានមហិច្ឆតាខ្ពស់នៅពេលនិយាយដល់ឱកាស «រយឆ្នាំមានម្ដង» ក្នុងការផលិតរថយន្តអគ្គិសនី។

ក្រោយពីដណ្ដើមបានចំណែកទីផ្សារជិតពាក់កណ្ដាលក្នុងវិស័យអេឡិចត្រូនិច (ទូរស័ព្ទ ថេប្លេត និងលេបថប) Foxconn មានបំណងធ្វើសកម្មភាពដូចគ្នានេះចំពោះរថយន្តអគ្គិសនី ដោយការចាប់ផ្ដើមពីទ្រង់ទ្រាយតូច ដែលកាន់កាប់ ៥% នៃចំណែកទីផ្សាររថយន្តអគ្គិសនីក្នុងឆ្នាំ ២០២៥។

ប្រធានក្រុមហ៊ុន Foxconn បានឱ្យដឹងថា «ខ្ញុំសង្ឃឹមថា ថ្ងៃណាមួយយើងខ្ញុំអាចផលិតរថយន្តអគ្គិសនី Tesla សម្រាប់ Tesla»។ ប្រធានក្រុមហ៊ុន Foxconn បានថ្លែងអំពីម៉ូដែលរថយន្តអគ្គិសនីថ្មីរបស់ក្រុមហ៊ុននេះ នៅក្នុងព្រឹត្តិការណ៍ «ទិវាបច្ចេកវិទ្យា ២០២២» ដែលត្រូវបានធ្វើឡើងកាលពីថ្ងៃទី ១៨ តុលានៅ តៃវ៉ាន់។ លោកបន្ថែមថា «ក្ដីសង្ឃឹមដ៏ស្មោះត្រង់របស់យើងខ្ញុំ នោះគឺថា តៃវ៉ាន់ អាចក្ដាប់បានឱកាសធ្វើជំនួញជាមួយនឹងរថយន្តអគ្គិសនីដ៏កម្រ រយឆ្នាំមានម្ដងនេះ» ដូចទៅនឹងអ្នកផលិតតាមកិច្ចសន្យា ជំនួសឱ្យការអភិវឌ្ឍយីហោផ្ទាល់ខ្លួន។

បច្ចុប្បន្ន Foxconn គឺជាដៃគូសំខាន់ក្នុងក្រុមហ៊ុនបណ្ដាក់ទុនរួមនៃថ្នាល EV MIH (Mobility in Harmoney) និងបណ្ដាម៉ូដែលរថយន្ត មានដូចជា Luxgen N7 ជាដើម ដែលទទួលបានការបញ្ជាទិញជាមុនរាប់ពាន់គ្រឿងនៅមុនពេលបង្ហាញខ្លួនជាផ្លូវការ។

Foxconn បានចូលរួមដោយផ្ទាល់ក្នុងទីផ្សាររថយន្តអគ្គិសនីនៅ សហរដ្ឋអាម៉េរិក ដោយការសហការជាមួយ Fisker ដើម្បីផលិតរថយន្តអគ្គិសនីទីពីរ PEAR នៅក្នុងរដ្ឋ Ohio។ នៅឆ្នាំ ២០២៤ Fisker PEAR អាចក្លាយជាម៉ូដែលរថយន្តអគ្គិសនីដំបូងដែលត្រូវបានផលិតដោយក្រុមហ៊ុន Foxconn និងមានតម្លៃក្រោម ៣០,០០០ ដុល្លារអាម៉េរិក។

Foxconn កំពុងតែចង់បង្ហាញថា ខ្លួនមានសមត្ថភាពអាចផលិតរថយន្តអគ្គិសនីតម្លៃទាបជាង និងបានលឿនជាង ធៀបនឹងបណ្ដាក្រុមហ៊ុនធម្មតាដទៃ៕

October 20, 2022

ស្ថានភាពជំងឺកូវីដ-១៩ នៅ កម្ពុជា ប្រកាសនៅក្នុងថ្ងៃទី ២០ ខែតុលា ២០២២

កម្ពុជា រកឃើញអ្នកឆ្លងកូវីដ-១៩ ករណីថ្មី ចំនួន ០៣ នាក់ ក្នុងអំឡុង ២៤ ម៉ោង នៃថ្ងៃទី ១៩ ខែតុលា ឆ្នាំ ២០២២។

ក្នុងអំឡុងពេលដដែល ក៏មានអ្នកជំងឺកូវីដ-១៩ ចំនួន ០១ នាក់បានជាសះស្បើយ និង មិនមានករណីស្លាប់ថ្មី ដោយសារជំងឺនេះនៅឡើយ។

គិតត្រឹមព្រឹក ថ្ងៃទី ២០ ខែតុលា ឆ្នាំ ២០២២ កម្ពុជា មាន អ្នកឆ្លងកូវីដ-១៩ សរុប ៖ ១៣៧,៩៧៩ នាក់, អ្នកជាសះស្បើយសរុប ៖ ១៣៤,៨៦១ នាក់ និងអ្នកស្លាប់សរុប ៖ ៣,០៥៦ នាក់៕

October 20, 2022

យន្តហោះចម្បាំង F-35 ធ្លាក់នៅឯមូលដ្ឋានទ័ពអាកាសអាម៉េរិក

យន្តហោះចម្បាំង F-35 មួយគ្រឿងបានជួបគ្រោះថ្នាក់ និងឆាបឆេះនៅឯមូលដ្ឋានទ័ពអាកាសក្នុងរដ្ឋ Utah ប៉ុន្តែ អ្នកបើកបរគេចខ្លួនទាន់ពេល។

នៅវេលាម៉ោងប្រហែលជាង ១៨ ថ្ងៃទី ១៩ តុលា យន្តហោះចម្បាំង F-35A Lightning II មួយគ្រឿងបានធ្លាក់ដាំក្បាលចុះនៅខាងចុងផ្លូវរត់ នៅក្នុងមូលដ្ឋានទ័ពអាកាស Hill ក្នុងរដ្ឋ Utah សហរដ្ឋអាម៉េរិក និងបានឆាបឆេះ។ ភ្លាមៗនោះ កម្លាំងសង្គ្រោះបានចេញមកជួយទប់ទល់នឹងហេតុការណ៍ នេះបើតាមក្រុមហោះហើរយន្តហោះចម្បាំង (FW) លេខ ៣៨៨ ប្រកាសនៅលើ Twitter។

រូបភាពដែលត្រូវបានចែករំលែកលើបណ្ដាញសង្គមបង្ហាញថា មានភ្លើងឆាបឆេះយ៉ាងសន្ធោសន្ធៅ និងផ្សែងខ្មៅបាញ់ទៅលើយ៉ាងខ្ពស់នៅកន្លែងកើតហេតុ។

អ្នកបើកបរបានគេចផុតពីយន្តហោះ និងត្រូវបានសង្គ្រោះ ហើយនាំទៅកាន់មន្ទីរពេទ្យ។ បច្ចុប្បន្ន មិនទាន់ដឹងច្បាស់ថា ហេតុការណ៍គ្រោះថ្នាក់យន្តហោះនេះបណ្ដាលមកពីបញ្ហាអ្វីនៅឡើយ។

«ខ្ញុំកំពុងកាត់ស្មៅនៅក្បែរផ្ទះ មើល F-35 ចុះចតនៅមូលដ្ឋានដូចរាល់ល្ងាច។ មួយគ្រឿងហាក់ដូចជួបបញ្ហា និងហោះចុះយ៉ាងទាប ក្រោមមែកឈើ។ បន្ទាប់មកមានភ្លើងឆេះយ៉ាងសន្ធោសន្ធៅ» Scott Phillips ដែលជាពលរដ្ឋម្នាក់រស់នៅក្បែរមូលដ្ឋានទ័ពអាកាស Hill រៀបរាប់អំពីហេតុការណ៍ធ្លាក់យន្តហោះនេះ។

F-35A គឺជាកំណែយន្តហោះចម្បាំងបំបាំងកាយដែលត្រូវបានអភិវឌ្ឍសម្រាប់ទ័ពអាកាសអាម៉េរិក និងសម្ព័ន្ធមិត្ត។ នេះគឺជាកំណែតូច និងស្រាលបំផុតក្នុងក្រុម F-35 ហើយវាមានសមត្ថភាពផ្លាស់ទីខ្ពស់ជាងធៀបនឹង F-35B របស់កងម៉ារីន និង F-35C របស់ទ័ពជើងទឹក៕

October 20, 2022

Author: សឿន សំណាង