សឿន សំណាង - La Reine Media

សហភាពអឺរ៉ុប ត្រៀមផ្ដល់ជំនួយជិត ១.៥ ពាន់លានដុល្លារ/ខែ ដល់ អ៊ុយក្រែន

សហភាពអឺរ៉ុប (EU) គ្រោងនឹងផ្ដល់ជំនួយប្រហែល ១៧.៧ ពាន់លានដុល្លារដល់ អ៊ុយក្រែន ក្នុងឆ្នាំ ២០២៣ ស្មើនឹងជិត ១.៥ ពាន់លានដុល្លារជារៀងរាល់ខែ។

ក្នុងសន្និសីទសារព័ត៌មានកាលពីថ្ងៃទី ២១ តុលា ប្រធានគណៈកម្មការអឺរ៉ុប Ursula von der Leyen បានឱ្យដឹងថា EU គ្រោងនឹង «ផ្ដល់ជំនួយ ១.៥ ពាន់លានអឺរ៉ូ (១.៤៦ ពាន់លានដុល្លារ) ជារៀងរាល់ខែដល់ អ៊ុយក្រែន។

«តួលេខសរុបគឺ ១៨ ពាន់លានអឺរ៉ូ (១៧.៧ ពាន់លានដុល្លារអាម៉េរិក) សម្រាប់ឆ្នាំក្រោយ ជាទឹកប្រាក់ដែល អ៊ុយក្រែន អាចជឿជាក់ ហើយក៏ជាប្រភពហិរញ្ញវត្ថុស្ថិរភាព ដែលគួរទុកចិត្ត និងព្យាករបាន» លោកស្រី von der Leyen ថ្លែងដូច្នេះ។

លោកស្រី Leyen ក៏បានឱ្យដឹងថា អ៊ុយក្រែន បានស្នើម្ចាស់ជំនួយអន្តរជាតិ ផ្ដល់ប្រភពម៉ាក្រូសេដ្ឋកិច្ច «ស្ថិរភាព គួរជាទីទុកចិត្ត និងអាចព្យាករដឹងបាន»។

សំណើរបស់ ទីក្រុងកៀវ ត្រូវបានធ្វើឡើងក្នុងស្ថានការណ៍ដែលសេដ្ឋកិច្ចរបស់ អ៊ុយក្រែន ត្រូវបំផ្លាញក្រោយរយៈពេល ៨ ខែដែលសង្គ្រាមបានផ្ទុះឡើង។ អ៊ុយក្រែន គណនាឃើញថា ពួកគេត្រូវការយ៉ាងតិច ៣.៩ ពាន់លានដុល្លារជារៀងរាល់ខែពីប្រភពឥណទាន ឬជំនួយដើម្បីធានាដំណើរការជាមូលដ្ឋានរបស់រដ្ឋាភិបាល។

លោកស្រី Leyen បញ្ជាក់ថា ទឹកប្រាក់ទាំងនេះនឹងត្រូវបានផ្ដល់ដោយ សហភាពអឺរ៉ុប អាម៉េរិក និងបណ្ដាអង្គការសេដ្ឋកិច្ចអន្តរជាតិ ហើយនឹងត្រូវបានផ្ទេរទៅឱ្យ អ៊ុយក្រែន ជាទម្រង់សាច់ប្រាក់។

ក្នុងប្រកាសរួមក្រោយកិច្ចប្រជុំកំពូលកាលពីថ្ងៃទី ២១ តុលា ក្រុមមេដឹកនាំរបស់ EU បានឱ្យដឹងថានឹងប្រញាប់ផ្ដល់ ៣ ពាន់លានអឺរ៉ូ (២.៩៣ ពាន់លានដុល្លារអាម៉េរិក) ដែលត្រូវបានសម្រេចបែងចែកឱ្យ អ៊ុយក្រែន នាពេលកន្លង។

October 22, 2022

អគ្គិភ័យកំពុងឆាបឆេះផ្ទះច្រើនខ្នងនៅ ខណ្ឌបឹងកេងកង រាជធានីភ្នំពេញ

ករណីអគ្គិភ័យកំពុងឆាបឆេះផ្ទះប្រជាពលរដ្ឋនៅផ្លូវលេខ ៦៣ កែងផ្លូវ ២៨២ សង្កាត់បឹងកេងកងទី ១ ខណ្ឌបឹងកេងកង រាជធានីភ្នំពេញ នាវេលាម៉ោង ៣ និង ៥០ នាទីរសៀល ថ្ងៃទី ២១ ខែតុលា ឆ្នាំ ២០២២ នេះបើតាម ការិយាល័យបង្ការពន្លត់អគ្គិភ័យ និងសង្គ្រោះ នៃស្នងការនគរបាលរាជធានីភ្នំពេញ។

កម្លាំងសមត្ថកិច្ចជំនាញបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានចេញរថយន្តពន្លត់អគ្គិភ័យទៅជួយអន្តរាគមន៍បន្ទាន់។

យោងតាម ការចែករំលែកតាមបណ្ដាញសង្គម និងទំព័របណ្ដាញសង្គមរបស់ ការិយាល័យបង្ការពន្លត់អគ្គិភ័យ និងសង្គ្រោះ នៃស្នងការនគរបាលរាជធានីភ្នំពេញ ករណីឆេះអគារ និងផ្ទះប្រមាណពី ២ ទៅ ៣ ខ្នងនេះ បណ្ដាលមកពីការឆេះរថយន្តមួយគ្រឿងដែលនៅក្បែរនោះ។

October 21, 2022

គម្រោងវិនិយោគថ្មីចំនួន ៣ តម្លៃជាង ១៤ លានដុល្លារ ទទួលបានការអនុម័តពី ក្រុមប្រឹក្សាអភិវឌ្ឍន៍កម្ពុជា

គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីគម្រោងវិនិយោគថ្មីចំនួន ៣ ទៀត ជូនដល់ក្រុមហ៊ុន CHENG ZHEN YONG INDUSTRY, ក្រុមហ៊ុន XIN JIN HUA GARMENT និងក្រុមហ៊ុន SUCCESS METAL TECHNOLOGY។

ការវិនិយោគលើគម្រោងថ្មីរបស់បណ្ដាក្រុមហ៊ុនទាំងនេះ រួមមានដូចខាងក្រោម ៖

១-ក្រុមហ៊ុន CHENG ZHEN YONG INDUSTRY CO., LTD ៖ គម្រោងបង្កើតរោងចក្រផលិតគ្រឿងបន្សំស្បែកជើង ដែលមានទីតាំងវិនិយោគស្ថិតនៅភូមិចក ឃុំបែកចាន ស្រុកអង្គស្នួល ខេត្តកណ្តាល ក្នុងទុនវិនិយោគប្រមាណ ៥.២ លានដុល្លារអាម៉េរិក និងអាចបង្កើតការងារបានចំនួន ៧២៣ កន្លែង។

២-ក្រុមហ៊ុន XIN JIN HUA GARMENT CO., LTD ៖ គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិត្រពាំងបារគូ ឃុំត្រពាំងវែង ស្រុកកណ្តាលស្ទឹង ខេត្តកណ្តាល ក្នុងទុនវិនិយោគប្រមាណ ៥ លានដុល្លារអាម៉េរិក និងអាចបង្កើតការងារបានចំនួន ១,០៤១ កន្លែង។

៣-ក្រុមហ៊ុន SUCCESS METAL TECHNOLOGY CO., LTD. ៖ គម្រោងរោងចក្រស្ល និងកែច្នៃលោហៈធាតុ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ខេមបូឌាន ស៊ីណូ មេធលលីក មេធៀរៀល, ខេត្តព្រះសីហនុ, ក្នុងទុនវិនិយោគប្រមាណ ៣.៩ លានដុល្លារអាម៉េរិក និងអាចបង្កើតការងារបានចំនួនប្រមាណ ៧៥០ កន្លែង។

ទំហំសរុបនៃទឹកប្រាក់វិនិយោគរបស់ក្រុមហ៊ុនទាំង ៣ ខាងលើ ស្មើនឹង ១៤.១ លានដុល្លារអាម៉េរិក ហើយគ្រោងនឹងបង្កើតការងារថ្មីនៅ កម្ពុជា បានជាង ២,៥០០ កន្លែង៕

October 21, 2022

ទ្រព្យសម្បត្តិសរុបរបស់អ្នកមានជាងគេ ១០០ នាក់នៅ ឥណ្ឌា ឡើងដល់ ៨០០ ពាន់លានដុល្លារអាម៉េរិក

យោងតាមបញ្ជីកត់ត្រារបស់ទស្សនាវដ្ដី Forbes ទ្រព្យសម្បត្តិសរុបរបស់អ្នកមានជាងគេ ១០០ នាក់នៅ ប្រទេសឥណ្ឌា បានកើនឡើងដល់ ៨០០ ពាន់លានដុល្លារអាម៉េរិក។

នៅក្នុងប្រកាសថ្មីបំផុតរបស់ Forbes Asia កាលពីសប្ដាហ៍មុន រូបិយប័ណ្ណរូពីឥណ្ឌា ដែលធ្លាក់ថ្លៃនៅក្នុងប៉ុន្មានខែកន្លង បានបង្កផលប៉ះពាល់ដល់ទ្រព្យសម្បត្តិរបស់ក្រុមអ្នកមានជាងគេនៅ ប្រទេសឥណ្ឌា។ ក៏ប៉ុន្តែ ការធ្លាក់ចុះរបស់ទ្រព្យសម្បត្តិនៃក្រុមអ្នកមានមួយចំនួននេះត្រូវបានប៉ះប៉ូវដោយការកើនឡើងនៃទ្រព្យសរុបរបស់មហាសេដ្ឋី Gautam Adani នាពេលកន្លង ដែលបាននាំឱ្យលោកក្លាយជាអ្នកមានជាងគេលំដាប់ទី ១ នៅ ឥណ្ឌា។

Forbes Asia បានឱ្យដឹងថា ការកើនឡើងនៃទ្រព្យសម្បត្តិសរុបរបស់អ្នកមានជាងគេទាំង ១០០ នាក់នៅ ឥណ្ឌា ភាគច្រើនអាស្រ័យលើកំណើនដ៏ឆាប់រហ័សនៃទ្រព្យរបស់ មហាសេដ្ឋី Gautam Adani។ ប្រការនេះបានកែប្រែលំដាប់ចំណាត់ថ្នាក់អ្នកមានជាងគេនៅ ឥណ្ឌា ជាលើកដំបូងរាប់ចាប់ពីឆ្នាំ ២០០៨។

បន្ទាប់ពីទ្រព្យបានកើនឡើងច្រើនជាងមុន ៣ ដងក្នុងឆ្នាំ ២០២១ មហាសេដ្ឋី Adani ក៏បន្តធ្វើឱ្យទ្រព្យនេះកើនថែម ២ ដងទៀតចាប់ពីដើមឆ្នាំរហូតដល់បច្ចុប្បន្ន ដោយឡើងដល់ ១៥០ ពាន់លានដុល្លារអាម៉េរិក នាំឱ្យលោកក្លាយជាអ្នកមានជាងគេលំដាប់ទី ២ ក្នុងពិភពលោក។

មហាសេដ្ឋីលំដាប់ទី ២ នៅ ឥណ្ឌា លោក Mukesh Ambani បច្ចុប្បន្នមានទ្រព្យ ៨៨ ពាន់លានដុល្លារ ថយចុះ ៥% ធៀបនឹងឆ្នាំ ២០២១។ អ្នកជំនួញ ២ រូបខាងលើនេះ បច្ចុប្បន្នកាន់កាប់ ៣០% នៅក្នុងទំហំទ្រព្យសរុបរបស់អ្នកមានជាងគេទាំង ១០០ នាក់នៅ ប្រទេសឥណ្ឌា។

ក្នុងប្រកាសរបស់ខ្លួន Forbes Asia យល់ថា ការងើបឡើងនៃតម្រូវការទីផ្សារក្រោយវិបត្តិកូវីដ-១៩ របស់ ឥណ្ឌា បានជំរុញកំណើនសេដ្ឋកិច្ចរបស់ប្រទេសនេះ និងបង្កើនតម្លៃទ្រព្យសម្បត្តិរបស់ក្រុមមហាសេដ្ឋី ទន្ទឹមនឹងការជួយឱ្យ ឥណ្ឌា ក្លាយជាខឿនសេដ្ឋកិច្ចធំលំដាប់ទី ៥ ក្នុងពិភពលោក ដោយបានយកឈ្នះលើ ចក្រភពអង់គ្លេស៕

October 21, 2022

អាម៉េរិក ចំណាយរាប់ពាន់លានដុល្លារសម្រាប់វិស័យផលិតថ្មរថយន្តអគ្គិសនី

ដើម្បីធានាដល់សមត្ថភាពប្រកួតប្រជែងក្នុងវិស័យឧស្សាហកម្ម រដ្ឋាភិបាលអាម៉េរិក ថ្មីៗនេះបានបញ្ចេញសកម្មភាពគួរឱ្យចាប់អារម្មណ៍ នៅពេលប្រកាសកញ្ចប់ជំនួយតម្លៃរាប់ពាន់លានដុល្លារសម្រាប់បណ្ដាគម្រោងផលិតថ្មរថយន្តអគ្គិសនីក្នុងស្រុក។

ប្រធានាធិបតី ចូ បៃដិន កាលពីថ្ងៃទី ១៩ តុលា បានថ្លែងថា នឹងផ្ដល់កញ្ចប់ថវិកាជំនួយតម្លៃ ២.៨ ពាន់លានដុល្លារដើម្បីជំរុញសកម្មភាពផលិតថ្មផ្ទុកថាមពលសម្រាប់រថយន្តអគ្គិសនីនៅក្នុង ១២ រដ្ឋរបស់ប្រទេសនេះ។ ក្រុមហ៊ុនចំនួន ២០ ដែលត្រូវបានជ្រើសរើសនឹងទទួលបានជំនួយសម្រាប់បណ្ដាគម្រោងចម្រាញ់ កែច្នៃ lithium, graphite និងវត្ថុធាតុសំខាន់ៗសម្រាប់ការផលិតថ្មរថយន្តអគ្គិសនី។

បណ្ដាគម្រោងផលិតគ្រឿងបន្លាស់ និងបណ្ដាញផ្គត់ផ្គង់រ៉ែសំខាន់ៗសម្រាប់គម្រោងផលិតថ្មផ្ទុកអគ្គិសនី ក៏នឹងទទួលបានជំនួយខាងលើ។ យោងតាម ក្រសួងថាមពលអាម៉េរិក គម្រោងនានានឹងជួយផ្គត់ផ្គង់បរិមាណវត្ថុធាតុដើមនៅក្នុងការផលិតថ្មសម្រាប់រថយន្តអគ្គិសនីរាប់សែន រហូតដល់រាប់លានគ្រឿងជារៀងរាល់ឆ្នាំ។

ប្រធានាធិបតីអាម៉េរិក សង្កត់ធ្ងន់ថា «ប្រការនេះពិតជាសំខាន់ខ្លាំងណាស់ ព្រោះថា អនាគតរបស់វិស័យឧស្សាហកម្មរថយន្តគឺរថយន្តអគ្គិសនី និងថ្មផ្ទុកថាមពល ដែលជាផ្នែកដ៏សំខាន់នៅក្នុងរថយន្តអគ្គិសនីនោះ»។

លោក Ryan Melsert នាយកប្រតិបត្តិរបស់ក្រុមហ៊ុន American Battery Technology និយាយថា «សហរដ្ឋអាម៉េរិក ហាក់មិនមានវត្តមាននៅក្នុងការប្រកួតប្រជែងផ្នែក lithium ដោយសារតែមានចំណែកតែ ១% នៅក្នុងបរិមាណសរុបទូទាំងពិភពលោក។ ក្រុមអ្នកផលិតរថយន្តពិតជាត្រូវការចាំបាចនូវវត្ថុធាតុដើមនេះ»។

គេហទំព័រផ្នែករថយន្ត Autoblog បានផ្សាយថា ទីផ្សារថ្មរថយន្តអគ្គិសនីអាចមានទំហំ ៣៤០ ពាន់លានដុល្លារក្នុងឆ្នាំ ២០៣០។ បណ្ដាក្រុមហ៊ុនផលិតថ្មផ្ទុកអគ្គិសនីកំពុងតែប្រកួតប្រជែងផ្នែកបច្ចេកវិទ្យាដើម្បីផលិតប្រភេទថ្មអគ្គិសនីដែលមានកម្លាំងខ្លាំង តម្លៃសមស្រប និងអាចកែច្នៃឡើងវិញបានល្អ។

យោងតាម Reuters កាលពីខែឧសភា ២០២២ រដ្ឋាភិបាលរបស់លោក បៃដិន បានបែងចែកថវិកាជំនួយជាង ៣ ពាន់លានដុល្លារសម្រាប់ការផលិតថ្មរថយន្តអគ្គិសនី។ សហរដ្ឋអាម៉េរិក បានអនុម័តកញ្ចប់ថវិកាធំៗមួយចំនួនដូចជា ច្បាប់វិនិយោគលើហេដ្ឋារចនាសម្ព័ន្ធដែលមានតម្លៃខ្ទង់ទ្រីលានដុល្លារ ឬច្បាប់ស្ដីពីការកាត់បន្ថយអតិផរណាជាដើម។ គោលដៅនៃការចំណាយប្រាក់រាប់ពាន់លានដុល្លារទៅលើវិស័យផលិតថ្មរថយន្តអគ្គិសនីរបស់ សហរដ្ឋអាម៉េរិក នោះគឺ នៅឆ្នាំ ២០៣០ សហរដ្ឋអាម៉េរិក នឹងមានរថយន្តអគ្គិសនីចំនួនពាក់កណ្ដាលនៅក្នុងចំណោមរថយន្តសរុបនៅប្រទេសនេះ៕

October 21, 2022

រក្សាទុកមេជីវិតរបស់កូនប្រុសទោលដែលបានស្លាប់ ដើម្បីមានចៅបន្តពូជនឹងគេ

(អ៊ីស្រាអែល)-លោក Baruch រក្សាទុកមេជីវិតរបស់កូនប្រុសទោល Amit Ben Ygal ដែលជាទាហានម្នាក់បានស្លាប់នៅក្នុងតំបន់ West Bank កាលពី ២ ឆ្នាំមុន ដោយសង្ឃឹមថា នឹងមានចៅនឹងគេ។

«Amit គឺជាអ្វីៗគ្រប់យ៉ាងរបស់ខ្ញុំ» លោក Baruch អាយុ ៥៣ ឆ្នាំ និយាយអំពីកូនប្រុសតែមួយគត់របស់លោក។ «ខ្ញុំចង់មានភាពសប្បាយរីករាយក្នុងឆាកជីវិតឡើងវិញ។ កងទ័ពអ៊ីស្រាអែល គួរតែជួយខ្ញុំឱ្យបានក្លាយជាជីតានឹងគេ»។

Amit អាយុ ២១ ឆ្នាំ បានបាត់បង់ជីវិតបន្ទាប់ពីត្រូវ ជនជាតិប៉ាលេស្ទីន គប់ដុំថ្មចំក្បាលក្នុងពេលចូលរួមយុទ្ធនាការរបស់ កងទ័ពអ៊ីស្រាអែល នៅ West Bank កាលពីខែឧសភា ២០២០។ លោក Baruch បានយកមេជីវិតរបស់កូនប្រុសគាត់ក្នុងរង្វង់ ៧២ ម៉ោង ក្រោយពី Amit បានស្លាប់ ជាពេលវេលាគ្រប់គ្រាន់ល្មមសម្រាប់បង្កក និងអាចបង្កកំណើតក្នុងបំពង់ពិសោធន៍។

លោក Baruch ចង់ប្រើប្រាស់មេជីវិតរបស់កូនដើម្បីមានចៅនឹងគេ តាមរយៈការពពោះស្ម័គ្រចិត្តរបស់ស្ត្រីម្នាក់ ប៉ុន្តែមិនអាចធ្វើបាន ដោយសារថា ច្បាប់របស់ អ៊ីស្រាអែល មិនទាន់អនុញ្ញាតឱ្យធ្វើបែបនេះ។ ច្បាប់របស់ អ៊ីស្រាអែល បច្ចុប្បន្នកំណត់ថា មានតែភរិយារបស់ទាហានដែលបានស្លាប់នៅពេលកំពុងបំពេញបេសកកម្មតែប៉ុណ្ណោះ ទើបមានសិទ្ធិប្រើប្រាស់មេជីវិតដើម្បីបង្កកំណើតក្នុងបំពង់ពិសោធន៍ (IVF)។

ក៏ប៉ុន្តែ ក្រុមមន្ត្រីរបស់ អ៊ីស្រាអែល កំពុងតែដាក់សេចក្ដីព្រាងច្បាប់មួយដែលពង្រីកសិទ្ធិនេះសម្រាប់ឪពុកម្ដាយរបស់ទាហាន។ សកម្មជនម្នាក់និយាយថា អ៊ីស្រាអែល គួរតែ «អនុវត្តកាតព្វកិច្ចមនុស្សធម៌» ចំពោះគ្រួសារដែលមានកូនស្លាប់នៅក្នុងជួរកងទ័ព។

លោក Baruch និងភរិយាបានលែងលះគ្នាតាំងពីយូរ ហើយ Amit គឺជាកូនប្រុសតែមួយគត់របស់គាត់។ ឪពុក និងកូនបានរស់នៅជុំគ្នានៅ Ramat Gan ជាយក្រុង Tel Aviv។ លោក Baruch នៅតែមិនអាចជឿបានសោះថា កូនប្រុសរបស់គាត់បានបាត់បង់ជីវិត។ គាត់និយាយថា «បើសិនជាមានចៅមុនពេលស្លាប់ ខ្ញុំអាចស្លាប់ដោយសប្បាយចិត្តហើយ»។

លោក Baruch និងកូនប្រុសទោស Amit Ben Ygal កាលពីនៅរស់

តំណាងរាស្ត្រ Zvi Hauser បានបង្កើតសេចក្ដីព្រាងច្បាប់ «បន្តវេន» ដើម្បីជួយឱ្យបំណងរបស់លោក Baruch បានក្លាយជារឿងស្របច្បាប់។ លោក Hauser យល់ថា ប្រទេសអ៊ីស្រាអែល ជំពាក់បំណុលគ្រួសារទាហាន។

សេចក្ដីព្រាងច្បាប់ «បន្តវេន» របស់លោក Hauser ត្រូវបានអនុម័តនៅក្នុងការបោះឆ្នោតដំបូងកាលពីខែមុន ប៉ុន្តែ នឹងត្រូវឆ្លងកាត់ការបោះឆ្នោតពីរជុំទៀត បន្ទាប់ពីសភាថ្មីរបស់ អ៊ីស្រាអែល ត្រូវបានបង្កើតឡើងនៅខែក្រោយ៕

October 21, 2022

ស្ថានភាពជំងឺកូវីដ-១៩ នៅ កម្ពុជា ប្រកាសនៅក្នុងថ្ងៃទី ២១ ខែតុលា ២០២២

កម្ពុជា រកឃើញអ្នកឆ្លងកូវីដ-១៩ ករណីថ្មី ចំនួន ០ នាក់ ក្នុងអំឡុង ២៤ ម៉ោង នៃថ្ងៃទី ២០ ខែតុលា ឆ្នាំ ២០២២។

ក្នុងអំឡុងពេលដដែល ក៏មានអ្នកជំងឺកូវីដ-១៩ ចំនួន ០៩ នាក់បានជាសះស្បើយ និង មិនមានករណីស្លាប់ថ្មី ដោយសារជំងឺនេះនៅឡើយ។

គិតត្រឹមព្រឹក ថ្ងៃទី ២១ ខែតុលា ឆ្នាំ ២០២២ កម្ពុជា មាន អ្នកឆ្លងកូវីដ-១៩ សរុប ៖ ១៣៧,៩៧៩ នាក់, អ្នកជាសះស្បើយសរុប ៖ ១៣៤,៨៧០ នាក់ និងអ្នកស្លាប់សរុប ៖ ៣,០៥៦ នាក់៕

October 21, 2022

តម្លៃលក់រាយប្រេងឥន្ធនៈថ្មី ដែលត្រូវអនុវត្ត ចាប់ពីថ្ងៃទី ២១ ដល់ថ្ងៃទី ៣១ ខែតុលា ឆ្នាំ ២០២២

ក្រសួងពាណិជ្ជកម្មកម្ពុជា នាព្រឹកថ្ងៃទី ២១ តុលា ២០២២ នេះ បានចេញសេចក្តីជូនដំណឹងស្ដីពី៖ តម្លៃលក់រាយប្រេងឥន្ធនៈថ្មី ដែលត្រូវអនុវត្ត ចាប់ពីថ្ងៃទី ២១ ដល់ថ្ងៃទី ៣១ ខែតុលា ឆ្នាំ ២០២២។

ក្នុងសេចក្ដីជូនដំណឹងនេះ តម្លៃសាំងធម្មតាត្រូវបានអនុញ្ញាតឱ្យលក់ ៤ ២៥០ រៀល/លីត្រ និងម៉ាស៊ូតត្រូវលក់ ៥ ២០០ រៀល ក្នុង ១ លីត្រ។

ដូច្នេះ ប្រេងសាំងដែលលក់ចាប់ពីថ្ងៃទី ២១-៣១ ខែតុលា ឆ្នាំ ២០២២ នឹងស្ថិតនៅក្នុងតម្លៃដដែល ខណៈដែលប្រេងម៉ាស៊ូត ឡើងថ្លៃ ៥០ រៀល ធៀបនឹងការកំណត់កន្លងមករបស់ ក្រសួងពាណិជ្ជកម្ម។

October 21, 2022

រថយន្តដឹកប្រេងសាំងបុកស្ពានអាកាស បណ្ដាលឱ្យផ្ទុះឆេះផ្ទះប្រជាជននៅ ម៉ិកស៊ិក (វីដេអូ)

អគ្គិភ័យធំមួយបានកើតឡើងបង្កឱ្យមានសំឡេងផ្ទុះជាច្រើនគួរឱ្យភ័យខ្លាច នៅពេលរថយន្តដឹកប្រេងសាំងមួយគ្រឿងបានបុកទៅនឹងស្ពានឆ្លងផ្លូវនៅទីក្រុង Aguascalientes ប្រទេសម៉ិកស៊ិក នាំឱ្យអាជ្ញាធរឈ្លៀសប្រជាជនក្នុងតំបន់។

ក្រុមមន្ត្រីនៅ ទីក្រុង Aguascalientes ភាគកណ្ដាលនៃ ប្រទេសម៉ិកស៊ិក បានឱ្យដឹងថា ករណីគ្រោះថ្នាក់ខាងលើនេះកើតឡើងក្នុងថ្ងៃទី ២១ តុលា នៅពេលរថយន្តដឹកប្រេងសាំងមួយគ្រឿងបានបុកស្ពានអាកាសឆ្លងផ្លូវដែក បណ្ដាលឱ្យមានអណ្ដាតភ្លើងសន្ធោសន្ធៅ ឆេះរាលដាលដល់ផ្ទះជាច្រើនខ្នងដែលនៅក្បែរនោះ។

ប្រធានអាជ្ញាធរគ្រប់គ្រងអគ្គិភ័យរបស់ទីក្រុង Aguascalientes លោក Miguel Murillo បាននិយាយថា មនុស្សប្រហែលពី ៨០០ ទៅ ១,០០០ នាក់ ត្រូវបានឈ្លៀសទៅរកកន្លែងសុវត្ថិភាព។ ជនរងគ្រោះ ១២ នាក់ត្រូវបានសង្គ្រោះពីផ្ទះដែលកំពុងឆាបឆេះ ប៉ុន្តែ ពុំមានអ្នកណាម្នាក់បាត់បង់ជីវិត។

សមត្ថកិច្ចនៅ Aguascalientes បានឱ្យដឹងថា អ្នកបើកបររថយន្តដែលបានបង្កគ្រោះថ្នាក់ខាងលើត្រូវបានប៉ូលិសចាប់ខ្លួន ក្រោយពីហេតុការណ៍នេះបានកើតឡើង។

https://www.youtube.com/watch?v=RsbdEPJJ7NE

October 21, 2022

ឥណ្ឌូណេស៊ី រកឃើញថ្នាំមានសារធាតុបង្ករបួសតម្រងនោមស្រួចស្រាវ ដែលបណ្ដាលឱ្យកុមាររាប់សិបនាក់បាត់បង់ជីវិត

ឥណ្ឌូណេស៊ី បានផ្អាកបណ្ដោះអាសន្នការលក់រាល់ឱសថប្រភេទស៊ីរ៉ូ និងកំពុងតាមដានយ៉ាងយកចិត្តទុកដាក់ទៅលើថ្នាំស៊ីរ៉ូ paracetamol ដែលប្រើប្រាស់ក្នុងប្រទេស។

កាលពីថ្ងៃទី ២០ តុលា រដ្ឋមន្ត្រីក្រសួងសុខាភិបាលឥណ្ឌូណេស៊ី លោក Budi Guandi Sadikin ឱ្យដឹងថា ថ្នាំប្រភេទស៊ីរ៉ូមួយចំនួននៅ ឥណ្ឌូណេស៊ី មានផ្ទុកសមាសធាតុដែលទាក់ទងនឹងជំងឺតម្រងនោមស្រួចស្រាវ ធ្វើឱ្យកុមារជាច្រើនសិបនាក់បាត់បង់ជីវិត។ ការសន្និដ្ឋាននេះត្រូវបានលើកឡើងបន្ទាប់ពី ក្រុមមន្ត្រីឥណ្ឌូណេស៊ី បើកការស្រាវជ្រាវអំពីការកើនឡើងខ្ពស់នៃករណីជំងឺដែលទាក់ទិននឹងរបួសតម្រងនោមភ្លាមៗបណ្ដាលឱ្យកុមារ ៩៩ នាក់ស្លាប់នៅក្នុងឆ្នាំនេះ។

ឥណ្ឌូណេស៊ី បានផ្អាកបណ្ដោះអាសន្នការលក់រាល់ឱសថប្រភេទស៊ីរ៉ូ និងកំពុងតាមដានយ៉ាងយកចិត្តទុកដាក់ទៅលើថ្នាំស៊ីរ៉ូ paracetamol ដែលប្រើប្រាស់ក្នុងប្រទេសសម្រាប់ព្យាបាលអាការក្ដៅខ្លួននៅលើកុមារ ដែលមានផ្ទុកសារធាតុ diethylene glycol និង ethylene glycol។

ចំណែក រដ្ឋាភិបាលនៃ ប្រទេសហ្កំប៊ី វិញ ក៏កំពុងតែស្រាវជ្រាវលើករណីស្លាប់ដោយសាររបួសតម្រងនោមស្រួចស្រាវនៅលើកុមារ ដែលបានប្រើប្រាស់ថ្នាំស៊ីរ៉ូ paracetamol ក្រៅពីមានករណីស្លាប់ ៧០ នាក់នៅប្រទេសនេះ។ ថ្នាំស៊ីរ៉ូនេះត្រូវបានផលិតដោយក្រុមហ៊ុន Maiden Pharmaceuticals Ltd ដែលមានទីស្នាក់ការកណ្ដាលនៅ ញូវដែលី ប្រទេសឥណ្ឌា។

ការិយាល័យក្រុមហ៊ុន Maiden Pharmaceuticals Ltd នៅ ញូវដែលី ប្រទេសឥណ្ដា កាលពីថ្ងៃទី ០៦ តុលា ២០២២

អាជ្ញាធរឥណ្ឌា បានឱ្យដឹងថា ក្រសួងសុខាភិបាលប្រទេសនេះកំពុងស្រាវជ្រាវលើផលិតផលឱសថរបស់ក្រុមហ៊ុន Maiden Pharmaceuticals ដើម្បីស្វែងរកការពិត។

យោងតាម រដ្ឋមន្ត្រី Sadikin សារធាតុ ethylene glycol និង diethylene glycol ត្រូវបានរកឃើញនៅក្នុងផលិតផលដែលរកឃើញនៅក្នុងផ្ទះរបស់អ្នកជំងឺមួយចំនួន។ លោក Sadikin ថ្លែងថា «ប្រភេទស៊ីរ៉ូមួយចំនួនដែលអ្នកជំងឺអាយុក្រោម ៥ ឆ្នាំ ដែលមានរបួសតម្រងនោមស្រួចស្រាវប្រើប្រាស់ ត្រូវបានបញ្ជាក់ថា មានផ្ទុក ethylene glycol និង diethylene glycol។

គិតត្រឹមថ្ងៃទី ២០ តុលា ឥណ្ឌូណេស៊ី បានរកឃើញករណីរបួសតម្រងនោមភ្លាមៗចំនួន ២០៦ នាក់ ក្នុងនោះមាន ៩៩ នាក់បានស្លាប់ នៅក្នុងឆ្នាំនេះ។ លោក Sadikin បញ្ជាក់ថា តួលេខពិតប្រាកដអាចខ្ពស់ជាង ធៀបនឹងរបាយការណ៍នេះ៕

October 21, 2022

Author: សឿន សំណាង