សឿន សំណាង - La Reine Media

រកឃើញប្រហោងខ្មៅ (Black Hole) ដែលនៅក្បែរផែនដីបំផុត

ក្រុមអ្នកវិទ្យាសាស្ត្របានរកឃើញប្រហោងខ្មៅមួយដែលធំជាងព្រះអាទិត្យ ១២ ដង ស្ថិតនៅចម្ងាយ ១៥៥០ ឆ្នាំពន្លឺពីផែនដី ដែល ១ ឆ្នាំពន្លឺស្មើនឹង ៩៤៦១ ទ្រីលានគីឡូម៉ែត្រ។

ដើម្បីឱ្យដឹងថា មានប្រហោងខ្មៅប៉ុន្មានដែលកំពុងលាក់ខ្លួនក្នុងចក្រវាល អ្នកវិទ្យាសាស្ត្រមួយក្រុមបានពិនិត្យមើលទិន្នន័យប្រព័ន្ធផ្កាយភ្លោះជិត ២ សែន ដែលត្រូវបានរកឃើញដោយបេសកកម្ម Gaia។ ក្នុងចំណោមនោះ ពួកគេស្វែងយល់អំពីសញ្ញារបស់ផ្កាយដែលវិលជុំវិញវត្ថុខ្នាតយក្សដែលមិនអាចមើលឃើញ។

ប្រហោងខ្មៅ (Black Hole) គឺជាវត្ថុអវកាសដែលងងឹតសូន្យសុង សូម្បីតែពន្លឺក៏មិនអាចរត់គេចបាន។ ពួកវាត្រូវបានគេដឹងតាមរយៈពន្លឺខ្លះដែលបញ្ចេញនៅពេលស្រូបយកឧស្ម័ន ធូលី ឬលេបផ្កាយ ឬមួយការប៉ះទង្គិចនឹងគ្នាប៉ុណ្ណោះ។

យោងតាមបណ្ឌិត Sukanya Chakrabarti ប្រធានក្រុមស្រាវជ្រាវ បេក្ខភាពប្រហោងខ្មៅដែលមានសក្ដានុពលបំផុតត្រូវបានស្រាវជ្រាវស៊ីជម្រៅតាមរយៈការវាស់ស្ទង់វិសាលគមពន្លឺរបស់ផ្កាយ ដោយប្រើប្រាស់ឧបករណ៍វិទ្យាសាស្ត្រជាច្រើន។ បើសិនមានប្រហោងខ្មៅមួយនៅទីនោះ ក្រុមស្រាវជ្រាវអាចរកឃើញវាដោយមើលទៅលើកម្លាំងទំនាញរបស់ប្រហោងខ្មៅទៅលើវិសាលគមពន្លឺរបស់ផ្កាយដែលស្ថិតនៅលើគន្លងគោចរ។ ដោយប្រើវិធីសាស្ត្រនេះ ក្រុមខាងលើយកចិត្តទុកដាក់ជាពិសេសទៅលើផ្កាយមួយដួងដែលតូចជាងព្រះអាទិត្យ និងវិលជុំវិញវត្ថុអវកាសងងឹតមួយដែលធំជាង ១២ ដង ធៀបនឹងព្រះអាទិត្យ។ ផ្កាយនេះបញ្ចប់គន្លងគោចរមួយជុំរបស់វាដោយចំណាយពេល ១៨៥ ថ្ងៃ។

«កម្លាំងទំនាញរបស់ប្រហោងខ្មៅទៅលើផ្កាយដែលអាចមើលឃើញ អាចកំណត់បានពីលទ្ធផលវាស់ស្ទង់វិសាលគមពន្លឺ» Chakrabarti ឱ្យដឹងដូច្នេះ។ «តាមរយៈការវិភាគលើល្បឿនរបស់ផ្កាយ យើងអាចសន្និដ្ឋានបាននូវទំហំរបស់ប្រហោងខ្មៅដែលគោចរជាមួយគ្នា និងពេលវេលាវិលជុំវិញគន្លងគោចរ»។

ក្រុមស្រាវជ្រាវខាងលើបានគណនាឃើញថា ប្រហោងខ្មៅដែលទើបរកឃើញនេះមានចម្ងាយពីផែនដីប្រមាណ ១៥៥០ ឆ្នាំពន្លឺ ប៉ុន្តែ មិនទាន់ត្រូវបានបញ្ជាក់ថាជាប្រហោងខ្មៅនៅឡើយ។ Chakrabarti និងសហការី បានផ្ញើលទ្ធផលនៃការស្រាវជ្រាវនេះទៅឱ្យទស្សនាវដ្ដី Astrophysical Journal ដើម្បីចុះផ្សាយ៕

October 24, 2022

ស្ថានភាពជំងឺកូវីដ-១៩ នៅ កម្ពុជា ប្រកាសនៅក្នុងថ្ងៃទី ២៤ ខែតុលា ២០២២

កម្ពុជា រកឃើញអ្នកឆ្លងកូវីដ-១៩ ករណីថ្មី ចំនួន ០ នាក់ ក្នុងអំឡុង ២៤ ម៉ោង នៃថ្ងៃទី ២៣ ខែតុលា ឆ្នាំ ២០២២។

ក្នុងអំឡុងពេលដដែល ក៏មានអ្នកជំងឺកូវីដ-១៩ ចំនួន ០៩ នាក់បានជាសះស្បើយ និង មិនមានករណីស្លាប់ថ្មី ដោយសារជំងឺនេះនៅឡើយ។

គិតត្រឹមព្រឹក ថ្ងៃទី ២២ ខែតុលា ឆ្នាំ ២០២២ កម្ពុជា មាន អ្នកឆ្លងកូវីដ-១៩ សរុប ៖ ១៣៧,៩៧៩ នាក់, អ្នកជាសះស្បើយសរុប ៖ ១៣៤,៩០២ នាក់ និងអ្នកស្លាប់សរុប ៖ ៣,០៥៦ នាក់៕

October 24, 2022

ទីក្រុងបណ្ដោយត្រង់ប្រវែង ១៧០ គីឡូម៉ែត្រ និងកម្ពស់ ២០០ ម៉ែត្រ របស់ អារ៉ាប៊ីសាអូឌីត កំពុងត្រូវបានសាងសង់

វីដេអូថតពីទីខ្ពស់បង្ហាញអំពីភាពស្មុគស្មាញរបស់ The Line ដែលជាមហាគម្រោងទីក្រុងបណ្ដោយត្រង់ឆ្លងកាត់សមុទ្រខ្សាច់របស់ ប្រទេសអារ៉ាប៊ីសាអូឌីត។

វីដេអូថ្មីដែលត្រូវបានប្រកាសដោយក្រុមហ៊ុនផលិតយន្តហោះដ្រោន OT Sky បង្ហាញថា មហាទីក្រុង The Line របស់ អារ៉ាប៊ីសាអូឌីត កំពុងត្រូវបានសាងសង់ នេះបើតាម Arabian Business ចេញផ្សាយកាលពីថ្ងៃទី ២១ តុលាកន្លងទៅ។ ក្នុងវីដេអូនេះ គេឃើញមានគ្រឿងចក្រជាច្រើនកំពុងធ្វើការនៅកណ្ដាលសមុទ្រខ្សាច់។ គ្រឿងចក្រទាំងនេះកំពុងបង្កើតចង្អូរខ្នាតធំមួយ ជាទីដែលគ្រោងនឹងចាក់គ្រឹះរបស់មហាគម្រោងទីក្រុងបណ្ដោយត្រង់ The Line។

The Line ស្ថិតក្នុងគម្រោងធំដែលមានឈ្មោះថា NEOM តម្លៃ ៥០០ ពាន់លានដុល្លារអាម៉េរិក។ នៅពេលសាងសង់រួចរាល់ ទីក្រុងនេះនឹងមានទទឹង ២០០ ម៉ែត្រ និងបណ្ដោយ ១៧០ គីឡូម៉ែត្រ។ អ្នកនៅក្នុងទីក្រុង The Line អាចផ្លាស់ទីពីក្បាលម្ខាងរបស់ទីក្រុង ទៅកាន់ក្បាលម្ខាងទៀតដោយចំណាយពេលតែ ២០ នាទី ក្នុងការជិះរថភ្លើងល្បឿនលឿន។ ជញ្ជាំងខាងក្រៅរបស់ The Line ធ្វើអំពីកញ្ចក់ កម្ពស់ប្រហែល ៥០០ ម៉ែត្រ ខ្ពស់ជាងអគារ Empire State (៤៥០ ម៉ែត្រ) និងតួ Eiffel (៣៣០ ម៉ែត្រ) ទៅទៀត។

The Line ដែលសាងសង់លើផ្ទៃដីប្រមាណ ៣៤ គីឡូម៉ែទ្រក្រឡា នឹងក្លាយជាទីស្នាក់នៅរបស់មនុស្សចំនួន ៩ លាននាក់។ ទីក្រុងនេះនឹងមានអ្វីៗគ្រប់យ៉ាង មានដូចជា សួនសាធារណៈ តំបន់សម្រាប់អ្នកថ្មើរជើង សាលារៀន និងកន្លែងធ្វើការជាដើម។ ពលរដ្ឋនៅទីនេះអាចទៅប្រើប្រាស់គ្រប់សេវាកម្មដោយចំណាយពេលដើរតែ ៥ នាទីប៉ុណ្ណោះ។ The Line នឹងមិនមានផ្លូវសាធារណៈសម្រាប់រថយន្ត ហើយវាក៏នឹងមិនបញ្ចេញឧស្ម័នពុល ដោយសារថា នឹងដំណើរការ ១០០% ដោយថាមពលកកើតឡើងវិញ។

រាជទាយាទ Mohammed bin Salman របស់ អារ៉ាប៊ីសាអូឌីត បានប្រកាសផែនការសាងសង់ The Line ជាលើកដំបូងកាលពីខែមករា ២០២១។ គម្រោងនេះនឹងជួយធ្វើពិពិធកម្មសេដ្ឋកិច្ចរបស់ អារ៉ាប៊ីសាអូឌីត ដើម្បីកាត់បន្ថយការពឹងផ្អែកលើរ៉ែប្រេង។

The Line ស្ថិតនៅក្នុងខេត្ត Tabuk ភាគពាយព្យនៃ ប្រទេសអារ៉ាប៊ីសាអូឌីត។ ពីទីនេះ អ្នកដំណើរអាចទៅកាន់ ៤០% នៃទីតាំងទាំងឡាយនៅលើពិភពលោកដោយប្រើពេលតែ ៦ ម៉ោងក្នុងការជិះយន្តហោះ។ អាកាសធាតុក្នុងទីក្រុងនេះ នឹងត្រូវបានរក្សាឱ្យនៅត្រជាក់ល្មមពេញមួយឆ្នាំ។ ទន្ទឹមនឹងនេះ ទីតាំងលំហ និងបៃតងទាំងឡាយនៅក្នុងទីក្រុងនេះ នឹងជួយបង្កើនផាសុកភាពសម្រាប់អ្នករស់នៅ អ្នកធ្វើការ និងអ្នកមកលេងផងដែរ៕

October 24, 2022

ជះដំឡូងបារាំងកិនលើផ្ទាំងគំនូរតម្លៃ ១១១ លានដុល្លារ ដើម្បីប្រឆាំងនឹងឥន្ធនៈហ្វូស៊ីល

ក្រុមសកម្មជននាំគ្នាជះដំបូងបារាំងកិនទៅលើផ្ទាំងគំនូរដែលមានតម្លៃ ១១១ លានដុល្លារអាម៉េរិក របស់វិចិត្រករ Claude Monet ដែលដាក់តាំងនៅក្នុងសារមន្ទីរ ហើយស្រែកហ៊ោពាក្យប្រឆាំងនឹងឥន្ធនៈហ្វូស៊ីល។

«បើសិនជាត្រូវការរូបគំនូរដែលត្រូវជះដំឡូងបារាំងកិន ឬចាក់ទឹកប៉េងប៉ោះដើម្បីដាស់ឱ្យសង្គមដឹងថា ឥន្ធនៈហ្វូស៊ីលកំពុងតែសម្លាប់មនុស្សគ្រប់គ្នា នោះយើងខ្ញុំនឹងឱ្យគ្រប់គ្នាមើលឃើញថា គំនូរដែលត្រូវជះដំឡូងបារាំងកិនមានរូបរាងបែបណា» ក្រុមការពារបរិស្ថាន Last Generation (ជំនាន់ចុងក្រោយ) សរសេរនៅក្នុងវីដេអូបង្ហោះលើ Twitter កាលពីថ្ងៃទី ២៣ តុលាដូច្នេះ។

ស្លៀកពាក់ឈុតខ្មៅ និងអាវក្រៅពណ៌ទឹកក្រូច សកម្មជនបរិស្ថាន ២ រូប បានជះដំឡូងបារាំងកិនទៅលើផ្ទាំងគំនូរ Les Meules ដែលដាក់តាំងនៅក្នុងសារមន្ទីរ Barberini នៅ Postdam នៃ ប្រទេសអាល្លឺម៉ង់ មុនពេលអង្គុយចុះនៅខាងមុខផ្ទាំងគំនូរ និងច្រត់ដៃម្ខាងទៅលើជញ្ជាំង។

«តើត្រូវការជះដំឡូងបារាំងកិនទៅលើផ្ទាំងគំនូរទើបធ្វើឱ្យអស់លោកចេះស្ដាប់? គំនូរនេះនឹងមិនមានតម្លៃអ្វីទាំងអស់ បើសិនយើងគ្រប់គ្នាត្រូវប្រយុទ្ធគ្នាដើម្បីដណ្ដើមអាហារ» សកម្មជនម្នាក់និយាយដូច្នេះ។

សកម្មជនបរិស្ថាន ២ រូបខាងលើ បច្ចុប្បន្នត្រូវបានឃុំខ្លួនរង់ចាំការស៊ើបអង្កេតអំពីការខូចខាតទ្រព្យសម្បត្តិ និងសកម្មភាពបំពាន។ មន្ត្រីនៅសារមន្ទីរបានឱ្យដឹងថា ផ្ទាំងគំនូរនេះស្ថិតក្នុងកញ្ចក់ការពារ និងមិនមានការខូចខាតអ្វីឡើយ។ គំនូរនេះនឹងត្រូវបានដាក់តាំងឡើងវិញចាប់ពីថ្ងៃទី ២៧ តុលាខាងមុខ។

ផ្ទាំងគំនូរ Les Meules គឺជាកម្រងគំនូររបស់មហាសេដ្ឋី Hasso Plattner និងត្រូវបានឱ្យសារមន្ទីរខ្ចីជារៀងរហូត។ គំនូរនេះត្រូវបានទិញក្នុងតម្លៃ ១១១ លានដុល្លារអាម៉េរិក ក្នុងការលក់ដេញថ្លៃកាលពីឆ្នាំ ២០១៩។ ខ្ទង់ប្រាក់នេះគឺជាតម្លៃខ្ពស់បំផុតសម្រាប់គំនូររបស់ Claude Monet ដែលជាវិចិត្រករល្បីឈ្មោះជនជាតិបារាំង (១៤/១១/១៨៤០ – ០៥/១២/១៩២៦)៕

October 24, 2022

យន្តហោះរបស់ កូរ៉េខាងត្បូង ដឹកមនុស្ស ១៧៣ នាក់ ជួបគ្រោះថ្នាក់ពេលចុះចត

យន្តហោះ Airbus របស់ក្រុមហ៊ុន Korean Air បានជួបគ្រោះថ្នាក់ដោយសារតែជ្រុលចេញពីផ្លូវរត់ពេលចុះចតនៅ ហ្វ៊ីលីពីន ប៉ុន្តែសំណាងល្អ មនុស្សទាំង ១៧៣ មិនបានរងរបួស។

ក្រុមហ៊ុនអាកាសចរណ៍កូរ៉េខាងត្បូង Korean Air ថ្ងៃនេះបានឱ្យដឹងថា យន្តហោះ Airbus SE A330 នៃជើងហោះហើរលេខ KE361 បានបរជ្រុលចេញពីផ្លូវរត់ក្នុងការចុះចតទី ៣ នៅវេលាម៉ោង ២៣ និង ០៧ នាទី ថ្ងៃទី ២៣ តុលា នៅព្រលានយន្តហោះអន្តរជាតិ Mactan-Cebu លើកោះ Mactan នៃខេត្ត Cebu របស់ ប្រទេសហ្វ៊ីលីពីន។

នៅក្នុងហេតុការខាងលើ អ្នកដំណើរ និងបុគ្គលិកហោះហើរ ១៧៣ នាក់ មិនបានរងរបួសអ្វីឡើយ។ យន្តហោះនេះបានធ្វើដំណើរពី Incheon និងបានព្យាយាមចុះចត ២ លើក ប៉ុន្តែមិនបានសម្រេចដោយសារអាកាសធាតុមិនអំណោយផល មុនពេលជួបគ្រោះថ្នាក់នៅក្នុងការចុះចតលើទី ៣។

យន្តហោះ Airbus SE A330 ដែលបានជួបគ្រោះថ្នាក់

«អ្នកដំណើរត្រូវបាននាំទៅកាន់សណ្ឋាគារ ៣ នៅក្នុងតំបន់។ យើងខ្ញុំកំពុងតែស្រាវជ្រាវរកមូលហេតុនៃហេតុការណ៍នេះ ជើងយន្តហោះជំនួសកំពុងត្រូវបានរៀបចំ» ក្រុមហ៊ុន Korean Air ប្រកាសដូច្នេះ។

យន្តហោះមួយគ្រឿងរបស់ Korean Air នៅ Incheon របស់ កូរ៉េខាងត្បូង

ក្រុមហ៊ុន Korean Air មិនធ្លាប់ជួបគ្រោះថ្នាក់ដែលបណ្ដាលឱ្យមានមនុស្សស្លាប់ឡើយ រាប់ចាប់ពីឆ្នាំ ១៩៩៧ នេះបើតាមបណ្ដាញសុវត្ថិភាពអាកាសចរណ៍ (ASN)។ កាលពីឆ្នាំ ១៩៩៧ ក្រុមហ៊ុន Korean Air ត្រូវបានគេចាត់ទុកថា មានគុណភាពសុវត្ថិភាពមិនមានស្ថិរភាព ប៉ុន្តែបានកែលំអឡើងវិញ បន្ទាប់ពីមានជំនួយរបស់ Boeing និង Delta Air Lines៕

October 24, 2022

កូរ៉េខាងជើង និងកូរ៉េខាងត្បូង បាញ់ព្រមានគ្នានៅលើសមុទ្រ

កូរ៉េខាងត្បូង ថ្ងៃនេះបានបាញ់ព្រមានកប៉ាល់របស់ កូរ៉េខាងជើង ដែលឆ្លងកាត់ដែនទឹករបស់ប្រទេសទាំងពីរ ធ្វើឱ្យ ព្យុងយ៉ាង បាញ់កាំជ្រួចហ្វូង ១០ គ្រាប់ដើម្បីជាការឆ្លើយតប។

ទីភ្នាក់ងារសារព័ត៌មាន KCNA ដកស្រង់សម្ដីអ្នកនាំពាក្យរបស់ អគ្គបញ្ជាការដ្ឋានកងទ័ពកូរ៉េខាងជើង បានឱ្យដឹងថា ប្រទេសនេះបានបាញ់កាំជ្រួចហ្វូង ១០ គ្រាប់ទៅកាន់សមុទ្រភាគខាងលិចកាលពីវេលាម៉ោងប្រហែល ៥ និង ១៥ នាទី ថ្ងៃទី ២៤ តុលា។

ទីក្រុងព្យុងយ៉ាង បានឱ្យដឹងថា នេះគឺជាសកម្មភាពឆ្លើយតបក្រោយពី កងទ័ពកូរ៉េខាងត្បូង កាលពីវេលាម៉ោងប្រហែល ៣ និង ៥០ នាទីក្នុងថ្ងៃដដែល បានបាញ់ព្រមានកប៉ាល់របស់ កូរ៉េខាងជើង ដែលឆ្លងកាត់ព្រំដែនសមុទ្ររបស់ប្រទេសទាំងពីរ។

អគ្គសេនាធិការចម្រុះនៃសាធារណរដ្ឋកូរ៉េ (JSC) ក្នុងពេលនោះបានប្រកាសថា បានបង្ខំឱ្យកប៉ាល់ជំនួញពី កូរ៉េខាងជើង វិលត្រលប់ទៅវិញ ក្រោយពីកប៉ាល់នេះឆ្លងកាត់ដែនទឹកភាគខាងជើង (NLL) ក្បែរកោះ Baengnyeong។

NLL ត្រូវបានចាត់ទុកថាជាបន្ទាត់ព្រំដែនសមុទ្ររវាង កូរ៉េខាងជើង និង កូរ៉េខាងត្បូង។ នេះក៏ជាកន្លែងដែលធ្លាប់កើតមានការផ្ទុះអាវុធដាក់គ្នារវាង កម្លាំងរបស់ ទីក្រុងព្យុងយ៉ាង និង សេអ៊ូល កាលពីប៉ុន្មានឆ្នាំកន្លងផងដែរ។

ភាពតានតឹងនៅ ឧបទ្វីបកូរ៉េ ថ្មីៗនេះបានកើនឡើងខ្ពស់នៅពេល ទីក្រុងព្យុងយ៉ាង បាញ់សាកល្បងមីស៊ីលជាបន្តបន្ទាប់ ដោយលើកហេតុផលថា ជាការឆ្លើយតបទៅនឹងសមយុទ្ធយោធារវាង វ៉ាស៊ីងតោន សេអ៊ូល និង តូក្យូ។ កូរ៉េខាងជើង ឱ្យដឹងថា ការសាកល្បងមីស៊ីលរបស់ខ្លួនគឺជាសមយុទ្ធ «វាយប្រហារដោយអាវុធនុយក្លេអែរយុទ្ធសាស្ត្រ»៕

October 24, 2022

សំណង់ស្ថាបត្យកម្មពិសេសៗនៅ ប្រទេសកូរ៉េខាងជើង

សំណង់ស្ថាបត្យជាច្រើនដែលមានរចនាបថប្លែកភ្នែក និងច្នៃប្រឌិត ត្រូវបានសាងសង់ដើម្បីបម្រើដល់គោលដៅខុសៗគ្នានៅ សាធារណរដ្ឋប្រជាមានិតប្រជាធិបតេយ្យកូរ៉េ (កូរ៉េខាងជើង)។ រូបភាពខាងលើនេះគឺជា ទិដ្ឋភាពជើងមេឃដែលមានអគារខ្ពស់ៗនៅ រដ្ឋធានីព្យុងយ៉ាង របស់ កូរ៉េខាងជើង។ ចំណុចសំខាន់របស់ទិដ្ឋភាពឯនាយជើងមេឃនេះគឺជាសណ្ឋាគារ Ryugyong កម្ពស់ ១០៥ ជាន់។

ខាងលើគឺជា សណ្ឋាគារ Ryugyong លេចធ្លោងនៅពេលរាត្រី។

ខាងលើជាអគារខ្ពស់នានាត្រូវបានសាងសង់តាមមាត់ទន្លេនៅ ព្យុងយ៉ាង ក្នុងនោះមានអគារ Mirae Unha ពណ៌ផ្ទៃមេឃ កម្ពស់ ៥៣ ជាន់ ដែលជាទីស្នាក់ការកណ្ដាលរបស់ វិទ្យាស្ថានស្រាវជ្រាវវិទ្យាសាស្ត្រ នៃ សាកលវិទ្យាល័យបច្ចេកវិទ្យា Kim Chaek។

បណ្ដាអគារស្នាក់នៅដែលមានពណ៌ចម្រុះក៏ត្រូវបានចាត់ទុកថាជាចំណុចលេចធ្លោនៅក្នុងស្ថាបត្យកម្មនៅ រដ្ឋធានីរបស់ កូរ៉េខាងជើង។

តំបន់ចម្រុះវិទ្យាសាស្ត្រ-បច្ចេកវិទ្យានៅ ព្យុងយ៉ាង ត្រូវបានស្ថាបនាទៅតាមរូបរាងរបស់អាតូម (រូបខាងលើ)។

ខាងលើជាទិដ្ឋភាពទាំងមូលរបស់តំបន់ចម្រុះវិទ្យាសាស្ត្រ-បច្ចេកវិទ្យានៅ ព្យុងយ៉ាង មើលពីទីខ្ពស់។

និមិត្តរូបនៃមីស៊ីលត្រូវបានដាក់នៅក្នុងចំណុចកណ្ដាលរបស់តំបន់ចម្រុះវិទ្យាសាស្ត្រ-បច្ចេកវិទ្យា នៅ ព្យុងយ៉ាង។

កសិដ្ឋាន Ryonpho គឺជាប្រព័ន្ធផ្ទះកញ្ចក់ទំហំ ២៨០ ហិកតា ត្រូវបានស្ថាបនានៅលើមូលដ្ឋានទ័ពអាកាសរបស់ កូរ៉េខាងជើង។ កសិដ្ឋាននេះត្រូវបានសម្ពោធកាលពីថ្ងៃទី ១០ តុលា (រូបខាងលើ)។

កសិដ្ឋានសត្វអូទ្រីសនៅ ព្យុងយ៉ាង។ សាច់អូទ្រីសដែលត្រូវបាននិយមចូលចិត្តនៅ កូរ៉េខាងជើង ក៏ព្រោះតែបញ្ហាកង្វះអាហារដែលប្រទេសនេះជួបប្រទះ។

ចំណតរថយន្តអគ្គិសនីក្រោមដីនៅ រដ្ឋធានីព្យុងយ៉ាង។ វាក៏ត្រូវបានចាត់ទុកថាជាជម្រកសុវត្ថិភាពសម្រាប់ប្រជាជន នៅពេលកើតមានសង្គ្រាម។

October 22, 2022

ស្ថានភាពជំងឺកូវីដ-១៩ នៅ កម្ពុជា ប្រកាសនៅក្នុងថ្ងៃទី ២២ ខែតុលា ២០២២

កម្ពុជា រកឃើញអ្នកឆ្លងកូវីដ-១៩ ករណីថ្មី ចំនួន ០ នាក់ ក្នុងអំឡុង ២៤ ម៉ោង នៃថ្ងៃទី ២១ ខែតុលា ឆ្នាំ ២០២២។

ក្នុងអំឡុងពេលដដែល ក៏មានអ្នកជំងឺកូវីដ-១៩ ចំនួន ១៣ នាក់បានជាសះស្បើយ និង មិនមានករណីស្លាប់ថ្មី ដោយសារជំងឺនេះនៅឡើយ។

គិតត្រឹមព្រឹក ថ្ងៃទី ២២ ខែតុលា ឆ្នាំ ២០២២ កម្ពុជា មាន អ្នកឆ្លងកូវីដ-១៩ សរុប ៖ ១៣៧,៩៧៩ នាក់, អ្នកជាសះស្បើយសរុប ៖ ១៣៤,៨៨៣ នាក់ និងអ្នកស្លាប់សរុប ៖ ៣,០៥៦ នាក់៕

October 22, 2022

យានអេឡិចត្រូម៉ាញ៉េទិចល្បឿនលឿនជាងគេបំផុតក្នុងពិភពលោក អាចអភិវឌ្ឍរួមនឹងរថភ្លើងអណ្ដែតលើផ្លូវដែក

ប្រទេសចិន បានធ្វើការសាកល្បងដោយជោគជ័យនូវយានប្រើប្រាស់បច្ចេកវិទ្យាអេឡិចត្រូម៉ាញ៉េទិច ដែលអាចរុញទូរថភ្លើងឱ្យធ្វើដំណើរក្នុងល្បឿន ១,០៣០ គីឡូម៉ែត្រក្នុង ១ ម៉ោង ជិតស្មើនឹងល្បឿនរបស់សំឡេង។

យានរុញអេឡិចត្រូម៉ាញេទិចខាងលើ ត្រូវបានបង្កើតឡើងនៅទីក្រុង Jinan នៃខេត្ត Shandong ដោយវិទ្យាស្ថានបច្ចេកទេសអគ្គិសនីនៃ បណ្ឌិត្យសភាវិទ្យាសាស្ត្រចិន នេះបើតាម SCMP ចេញផ្សាយកាលពីម្សិលមិញ។

យានរុញអេឡិចត្រូម៉ាញេទិចរបស់ វិទ្យាស្ថានបច្ចេកទេសអគ្គិសនីចិន មិនមានផ្ទុកឥន្ធនៈ និងមានល្បឿនប្រតិកម្មរហ័ស ហើយងាយស្រួលបញ្ជា។

យោងតាម CCTV ជោគជ័យនៃការសាកល្បងនេះនឹងរួមចំណែកក្នុងការអភិវឌ្ឍបច្ចេកវិទ្យាថ្មីសម្រាប់ចរាចរណ៍ ឬបណ្ដាញគមនាគមន៍ ក្នុងនោះមានទាំងកប៉ាល់ និងយន្តហោះផងដែរ។ មូលដ្ឋាននៅ Jinan គឺជាទីតាំងសាកល្បងយានយន្តល្បឿនលឿននៅលើដីដំបូងគេក្នុងពិភពលោកដែលប្រើប្រាស់បច្ចេកវិទ្យាអេឡិចត្រូម៉ាញេទិច។

ក្រុមអ្នកស្រាវជ្រាវនៃគម្រោងខាងលើបានឱ្យដឹងថា ប្រភពផ្គត់ផ្គង់អគ្គិសនីសម្រាប់ប្រព័ន្ធសាកល្បងនេះរួមមាន ២ ផ្នែកសំខាន់គឺ ខ្សែភ្លើងដែលដាក់ខាងក្នុងទូរបស់យាន និងផ្លូវចង្អូរសម្រាប់អេឡិចត្រូម៉ាញេទិចកម្លាំងខ្លាំង។ នៅពេលបើកចរន្តអគ្គិសនីនៅលើខ្សែភ្លើង ដែនម៉ាញេទិច នឹងបង្កើតកម្លាំងអេឡិចត្រូម៉ាញេទិច រុញទូរថភ្លើងឆ្ពោះទៅមុខ។

https://www.youtube.com/watch?v=ionqhO-IOOc

គម្រោងដែលមានតម្លៃជាង ៤៥៦ លានដុល្លារនេះ អាចដើរតួនាទីសំខាន់ក្នុងការសាងសង់ប្រព័ន្ធរថភ្លើងអណ្ដែតល្បឿនលឿននៅ ប្រទេសចិន។ រថភ្លើងអណ្ដែត (maglev train or magnetic levitation train) គឺជារថភ្លើងដែលអណ្ដែតពីលើផ្លូវដែក ហើយនៅពេលធ្វើដំណើរ វានឹងមានភាពកកិតកម្រិតទាប ល្បឿនលឿនខ្លាំង មិនសូវប៉ះពាល់បរិស្ថាន សំឡេងរំខានតិច ការញាប់ញ័រកម្រិតទាប ប៉ុន្តែ ផ្ដល់ផាសុកភាពខ្ពស់ដល់អ្នកដំណើរ៕

October 22, 2022

Pfizer គ្រោងនឹងដំឡើងថ្លៃវ៉ាក់សាំងបង្ការកូវីដ-១៩ ខ្ពស់ជាងបច្ចុប្បន្ន ៤ ដង

ក្រុមហ៊ុនផលិតឱសថអាម៉េរិក Pfizer គ្រោងនឹងដំឡើងថ្លៃវ៉ាក់សាំងបង្ការជំងឺកូវីដ-១៩ ចាប់ពី ១១០ ដល់ ១៣០ ដុល្លារអាម៉េរិក ខ្ពស់ជាង ៤ ដង ធៀបនឹងតម្លៃបច្ចុប្បន្ន។ នេះបើតាមប្រកាសរបស់នាយកប្រតិបត្តិរបស់ Pfizer Angela Lukin កាលពីថ្ងៃទី ២០ តុលា។

បច្ចុប្បន្ន រដ្ឋាភិបាលអាម៉េរិក កំពុងផ្ដល់វ៉ាក់សាំងបង្ការជំងឺកូវីដ-១៩ ដោយមិនគិតថ្លៃ ដល់ពលរដ្ឋគ្រប់រូប ប៉ុន្តែ ត្រូវបង់ថ្លៃប្រហែល ៣០ ដុល្លារសម្រាប់វ៉ាក់សាំង ១ ដូស ទៅឱ្យ Pfizer និងដៃគូ អាល្លឺម៉ង់ BioNTech។

ការសម្រេចខាងលើត្រូវបាន Pfizer លើកឡើងក្រោយពីកម្មវិធីទិញវ៉ាក់សាំងរបស់ រដ្ឋាភិបាលអាម៉េរិក ដល់កាលកំណត់ ហើយចាប់ពីឆ្នាំ ២០២៣ ទីផ្សារវ៉ាក់សាំងនឹងត្រូវបានងាកទៅរកបណ្ដាក្រុមហ៊ុនធានារ៉ាប់រងឯកជន បើសិនជាស្ថានភាពអាសន្នស្ដីពីសុខភាពសាធារណៈត្រូវបានប្រកាសបញ្ចប់។

លោកស្រី Pfizer Angela Lukin សង្ឃឹមថា វ៉ាក់សាំងបង្ការកូវីដ-១៩ របស់ក្រុមហ៊ុន Pfizer នឹងត្រូវបានបន្តផ្ដល់ដោយមិនគិតថ្លៃដល់ប្រជាជនដែលមានធានារ៉ាប់រងឯកជន ឬធានារ៉ាប់រងដែលចេញថ្លៃដោយ រដ្ឋាភិបាលអាម៉េរិក ហើយទីផ្សារវ៉ាក់សាំងកូវីដ-១៩ នឹងមានទំហំប្រហាក់ប្រហែលនឹងទីផ្សារវ៉ាក់សាំងសម្រាប់ជំងឺផ្ដាសាយលើមនុស្សធំនាបច្ចុប្បន្ន។

ពេលនេះមិនទាន់ដឹងច្បាស់ថា អ្នកដែលមិនមានធានារ៉ាប់រងផ្នែកសុខភាពនឹងទទួលការចាក់វ៉ាក់សាំងកូវីដ-១៩ តាមរបៀបណានៅឡើយ។ Pfizer ក៏មិនទាន់ប្រកាសជាផ្លូវការអំពីតម្លៃរបស់វ៉ាក់សាំងបង្ការកូវីដ-១៩ នៅតាមបណ្ដាប្រទេសក្រៅពី សហរដ្ឋអាម៉េរិក នៅឡើយ៕

October 22, 2022

Author: សឿន សំណាង