សឿន សំណាង - La Reine Media

នាយករដ្ឋមន្ត្រីដើមកំណើតឥណ្ឌាដំបូងគេ និងជានាយករដ្ឋមន្ត្រីដែលមានវ័យនៅក្មែងជាងគេបង្អស់ក្នុងរង្វង់ 200 ឆ្នាំមកនេះ របស់ ចក្រភពអង់គ្លេស

ក្នុងវ័យ 42 ឆ្នាំ អតីតរដ្ឋមន្ត្រីក្រសួងហិរញ្ញវត្ថុ Rishi Sunak ក្លាយជានាយករដ្ឋមន្ត្រីរបស់ អង់គ្លេស ដែលមានវ័យនៅក្មែងជាងគេបង្អស់ក្នុងរង្វង់ 200 ឆ្នាំមកនេះ។

រសៀលថ្ងៃទី 24 តុលា (ពេលវេលាក្នុងស្រុក) ក្រោយពី រដ្ឋមន្ត្រីទទួលបន្ទុកសភាជាន់ទាប Penny Mordaunt ដកខ្លួនពីការប្រជែងដណ្ដើមកៅអីប្រធានបក្សអភិរក្ស អតីតរដ្ឋមន្ត្រីក្រសួងហិរញ្ញវត្ថុ Rishi Sunak ក៏ក្លាយជា នាយករដ្ឋមន្ត្រីអង់គ្លេស (មិនទាន់ផ្លូវការ) បន្ទាប់ ដោយមានការគាំទ្ររបស់តំណាងរាស្ត្រ 150 រូបនៃ គណបក្សអភិរក្សនៅក្នុងសភា។

លោក Rishi Sunak នឹងក្លាយជា នាយករដ្ឋមន្ត្រីអង់គ្លេស ដំបូងគេដែលកាន់សាសនាហិណ្ឌូ ហើយក៏ជានាយករដ្ឋមន្ត្រីស្បែកខ្មៅដំបូងគេរបស់ ប្រទេសអង់គ្លេស។ ក្នុងវ័យ 42 ឆ្នាំ លោក Sunak គឺជាបុគ្គលវ័យក្មេងបំផុតដែលកាន់តំណែងនាយករដ្ឋមន្ត្រីអង់គ្លេស ក្នុងរង្វង់ 200 ឆ្នាំមកនេះ។

អាជីពនយោបាយរបស់លោក Rishi Sanak

អតីតរដ្ឋមន្ត្រីក្រសួងហិញ្ញវត្ថុ Rishi Sanak ត្រូវបានគេចាត់ទុកថាជាតំណាងរាស្ត្រមួយរូបក្នុងចំណោមតំណាងរាស្ត្រដែលមានទ្រព្យច្រើនជាងគេនៅ អង់គ្លេស ប៉ុន្តែ លោកមិនធ្លាប់បានបង្ហើបឱ្យដឹងអំពីសម្បត្តិផ្ទាល់ខ្លួនម្ដងណាឡើយ។

លោក Rishi Sanak ក្លាយជាតំណាងរាស្ត្របក្សអភិរក្ស កាលពីឆ្នាំ 2015។ ក្រោយការធ្វើប្រជាមតិស្ដីពីការចាកចេញពី សហភាពអឺរ៉ុប របស់ អង់គ្លេស លោក Rishi Sanak ក៏ត្រូវបានតែងតាំងជារដ្ឋមន្ត្រីជាន់ទាប (រដ្ឋមន្ត្រីមិនស្ថិតក្នុងគណៈរដ្ឋមន្ត្រី) នៅក្នុងរដ្ឋាភិបាលរបស់អតីតនាយករដ្ឋមន្ត្រី Theresa May ហើយក្រោយមកក៏បានក្លាយជា រដ្ឋមន្ត្រីក្រសួងហិរញ្ញវត្ថុ ក្នុងអាណត្តិរបស់លោក Boris Johnson។

ខែកក្កដា 2022 លោក Rishi Sanak បានលាលែងពីតំណែងរដ្ឋមន្ត្រីក្រសួងហិរញ្ញវត្ថុ ជាសកម្មភាពដែលត្រូវបានគេយល់ថា រួមចំណែកធ្វើឱ្យធ្លាក់ចុះនូវប្រជាប្រិយភាពរបស់លោក Boris Johnson ក្នុងនាមជាប្រធានបក្សអភិរក្ស និងជានាយករដ្ឋមន្ត្រី។

លោក Rishi Sunak គឺជារដ្ឋមន្ត្រីក្រសួងហិរញ្ញវត្ថុ ក្នុងអាណត្តិរបស់លោក Boris Johnson

លោក Rishi Sanak មានប្រៀបនៅក្នុងការបោះឆ្នោតនៅជុំសមាជិកបក្សជាតំណាងរាស្ត្រ ប៉ុន្តែចាញ់លោកស្រី Truss នៅក្នុងជុំទីពីរដែលសមាជិកបក្សនៅមូលដ្ឋានជាអ្នកជ្រើសរើស។ យ៉ាងនេះក្ដី លោក Rishi Sanak បានបញ្ជាក់ឱ្យឃើញថា កញ្ចប់កាត់បន្ថយពន្ធរបស់នាយិការដ្ឋមន្ត្រី Liz Truss បង្កឱ្យមានភាពច្របូកច្របល់ក្នុងទីផ្សារកាលពីខែកញ្ញា។ ជាលទ្ធផល ក្រោយការកាន់កាន់អំណាច 44 ថ្ងៃ លោកស្រី Liz Truss ក៏បានសម្រេចចិត្តលាលែងពីតំណែងកាលពីថ្ងៃទី 20 តុលា។

ពេលនេះ ភារកិច្ចធ្វើឱ្យសេដ្ឋកិច្ចមានស្ថិរភាពដែលកំពុងស្មុគស្មាញរបស់ អង់គ្លេស នឹងត្រូវក្លាយជាអម្រែកដ៏ធ្ងន់សម្រាប់លោក លោក Rishi Sanak។

ដំណើរការនៃការប្រគល់អំណាចនឹងចាប់ផ្ដើមនៅពេល នាយិការដ្ឋមន្ត្រី Liz Truss ចូលគាល់មហាក្សត្រ Charles ទីបី ដើម្បីចាកចេញពីតំណែងជាផ្លូវការ។ ក្រោយមក លោក Rishi Sanak នឹងត្រូវចូលគាល់មហាក្សត្រអង់គ្លេស ដើម្បីទទួលការតែងតាំងជានាយករដ្ឋមន្ត្រី។ ព្រឹត្តិការណ៍នេះអាចនឹងត្រូវបានធ្វើឡើងនៅក្នុងថ្ងៃនេះ។

លោក Rishi Sanak គឺជាកូនប្រសារបស់មហាសេដ្ឋីបច្ចេកវិទ្យា

លោក Rishi Sanak និងភរិយា លោកស្រី Akshata Murthy រួមនឹងកូនៗ

គ្រួសាររបស់លោក Rishi Sanak បានទៅរស់នៅក្នុង ប្រទេសអង់គ្លេស ក្នុងអំឡុងទសវត្សរ៍ឆ្នាំ ១៩៦។ ក្រោយពីបានបញ្ចប់ការសិក្សានៅ Oxford លោក Rishi Sanak ក៏បន្តការសិក្សានៅ Stanford ហើយនៅទីនេះ លោកបានជួបនឹង Akshata Murthy ដែលជាកូនស្រីរបស់មហាសេដ្ឋីឥណ្ឌា N. R. Narayana Murthy ស្ថាបនិករបស់ក្រុមហ៊ុនបច្ចេកវិទ្យា Infosys។ បច្ចុប្បន្ន Akshata Murthy គឺជាភរិយារបស់ លោក Rishi Sanak។

លោក Rishi Sanak និងភរិយា មានទ្រព្យប្រមាណ 730 លានផោន ច្រើនជាងជិតទ្វេដង ធៀបនឹងទ្រព្យសម្បត្តិរបស់មហាក្សត្រ Charles ទីបី និងមហេសី Camila ដែលមានប្រហែលពី ៣០០ លាន ទៅ ៣៥០ លានផោន៕

October 25, 2022

ស្ថានភាពជំងឺកូវីដ-19 នៅ កម្ពុជា ប្រកាសនៅក្នុងថ្ងៃទី 25 ខែតុលា 2022

កម្ពុជា បានរកឃើញអ្នកឆ្លងកូវីដ-19 ករណីថ្មី ចំនួន 0 នាក់ ក្នុងអំឡុង 24 ម៉ោង នៃថ្ងៃទី 24 ខែតុលា ឆ្នាំ 2022។

ក្នុងអំឡុងពេលដដែល ក៏មានអ្នកជំងឺកូវីដ-19 ចំនួន 06 នាក់បានជាសះស្បើយ និង មិនមានករណីស្លាប់ថ្មី ដោយសារជំងឺនេះនៅឡើយ។

គិតត្រឹមព្រឹក ថ្ងៃទី 25 ខែតុលា ឆ្នាំ 2022 កម្ពុជា មាន អ្នកឆ្លងកូវីដ-១៩ សរុប ៖ 137,979 នាក់, អ្នកជាសះស្បើយសរុប ៖ 134,908 នាក់ និងអ្នកស្លាប់សរុប ៖ 3,056 នាក់។

October 25, 2022

បាតុភូតសូរ្យគ្រាសនឹងកើតឡើងនៅថ្ងៃនេះ ដែលជាលើកចុងក្រោយបង្អស់ក្នុងឆ្នាំ 2022

ព្រះចន្ទនឹងគោចរពីមុខព្រះអាទិត្យនៅថ្ងៃទី 25 តុលានេះ បង្កើតបានជាបាតុភូតសូរ្យគ្រាសមួយផ្នែកដែលអាចមើលឃើញនៅក្នុងតំបន់ជាច្រើនរបស់ពិភពលោក។

បាតុភូតសូរ្យគ្រាសនេះនឹងចាប់ផ្ដើមកើតឡើងបន្តិចម្ដងៗនៅក្នុងពេលវេលាផ្សេងៗគ្នាអាស្រ័យលើតំបន់នីមួយៗ ដោយចាប់ផ្ដើមដំបូងនៅវេលាម៉ោង 8 និង 58 នាទី ថ្ងៃទី 25 តុលា ហើយក្រោយមកនឹងឡើងដល់កម្រិតកំពូលនៅវេលាម៉ោង 11 និងបញ្ចប់នៅម៉ោង 13 ម៉ោង UTC ពោលគឺម៉ោង 15 និង 58 នាទី ដល់ម៉ោង 18 និង 20 នាទីនៅ កម្ពុជា។

គន្លងដើររបស់ស្រមោលព្រះចន្ទនឹងចាប់ផ្ដើមពីភាគខាងកើតរបស់ Greenland ហើយគ្របដណ្ដប់លើ អ៊ីស្លង់ ទាំងមូល មុនពេលឆ្លងកាត់បណ្ដាប្រទេសស្ទើរតែទាំងអស់នៅ អឺរ៉ុប (លើកលែងតែ ព័រទុយហ្គាល និងភាគខាងលិច/ត្បូង របស់ អេស្ប៉ាញ), ភាគឦសានទ្វីបអាហ្វ្រិក និងភាគច្រើននៃតំបន់អាស៊ីខាងលិច/អាស៊ីកណ្ដាល។

ចំណែកទឹកដីរបស់ កម្ពុជា វិញ ពិតជាគួរឱ្យស្ដាយ ព្រោះថានឹងមិនបានឃើញបាតុភូតសូរ្យគ្រាសលើកនេះឡើយ។

October 25, 2022

គម្រោងសាងសង់ផ្លូវល្បឿនលឿនភ្នំពេញ-បាវិត កំពុងត្រូវបានពន្លឿនដំណើរការអនុវត្ត

គណៈកម្មការអន្តរក្រសួង និងក្រុមហ៊ុន CRBC ជួបពិភាក្សាគ្នាអំពីការជំរុញដំណើរការអនុវត្តគម្រោងសាងសង់ផ្លូវល្បឿនលឿនភ្នំពេញ-បាវិត ក្រោមការដឹកនាំរបស់ រដ្ឋមន្ត្រីក្រសួងសាធារណការ និងដឹកជញ្ជូន។

កាលពីថ្ងៃទី 24 តុលាកន្លងទៅ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានដឹកនាំគណៈកម្មការចូលរួមពិភាក្សាជាមួយក្រុមហ៊ុនសាជីវកម្មស្ពាន និងថ្នល់ចិន (CRBC) អំពី គម្រោងសាងសង់ផ្លូវល្បឿនលឿនភ្នំពេញ-បាវិត។

យោងតាម ក្រសួងសាធារណការ និងដឹកជញ្ជូន កិច្ចប្រជុំនេះបានពិនិត្យ និងពិភាក្សាលើកិច្ចព្រមព្រៀងក្របខណ្ឌ និងកំពុងពិនិត្យជំរុញការចរចា កិច្ចសន្យាភាពជាដៃគូរវាងរដ្ឋ និងឯកជន (PPP) សម្រាប់គម្រោងផ្លូវល្បឿនលឿនភ្នំពេញ-ក្រុងបាវិត។ កិច្ចពិភាក្សានេះនឹងជួយជំរុញដំណើរការនានាដើម្បីឈានទៅបើកការដ្ឋានសាងសង់នាពេលឆាប់ៗខាងមុខ៕

ផែនទី គម្រោងសាងសង់ផ្លូវល្បឿនលឿនភ្នំពេញ-បាវិត

October 25, 2022

ឆេះនាវាទេសចរណ៍ឥណ្ឌូណេស៊ី ធ្វើឱ្យមនុស្សជាង 10 នាក់បាត់បង់ជីវិត

នាវាទេសចរណ៍មួយគ្រឿងដែលដឹកភ្ញៀវ និងក្រុមនាវិក 254 នាក់ បានឆាបឆេះនៅលើសមុទ្ររបស់ ឥណ្ឌូណេស៊ី បណ្ដាលឱ្យមានមនុស្សស្លាប់យ៉ាងតិច 14 នាក់។

នាវា KM Express Cantika 77 កាលពីថ្ងៃទី 24 តុលា បានកើតមានអគ្គិភ័យនៅពេលធ្វើដំណើរពីទីក្រុង Kupang ខេត្ត Nusa Tengara ខាងកើត ឆ្ពោះទៅកាន់ទីរួមស្រុក Kalabahi នៅលើកោះ Alor។ អណ្ដាតភ្លើងបានឆាបឆេះចេញពីជាន់ខាងលើបង្អស់របស់នាវា បណ្ដាលឱ្យភ្ញៀវជាច្រើននាក់ត្រូវលោតចូលទៅក្នុងសមុទ្រ។

ក្រុមមន្ត្រីក្នុងតំបន់បានបញ្ជូនកប៉ាល់សង្គ្រោះជាច្រើនគ្រឿងទៅកាន់កន្លែងកើតហេតុ ខណៈកប៉ាល់របស់ប្រជានេសាទក៏ចេញទៅជួយ។

បេសកកម្មសង្គ្រោះបានជួយជីវិតមនុស្ស 241 នាក់ ក្នុងចំណោមភ្ញៀវ និងក្រុមនាវិក 254 នាក់ ដែលស្ថិតនៅលើនាវា ខណៈដែល «មនុស្ស 13 នាក់បានស្លាប់» នេះបើតាម AFP ដកស្រង់សម្ដីរបស់ Isyak Nuka ប្រធានមន្ទីរដឹកជញ្ជូនខេត្ត Nusa Tenggara ខាងកើត។ ទំព័រ Nusadaily បានឱ្យដឹងថា តួលេខអ្នកស្លាប់ក្នុងហេតុការណ៍នេះមានចំនួន 14 នាក់។

សមត្ថកិច្ចរបស់ ឥណ្ឌូណេស៊ី កំពុងស្រាវជ្រាវរកមូលហេតុនៃគ្រោះថ្នាក់នេះ។ ព័ត៌មានដំបូងបានឱ្យដឹងថា នាវា KM Express Cantika 77 មានសមត្ថភាពផ្ទុកមនុស្ស 250 នាក់។

October 25, 2022

រុស្ស៊ី «កាក់កប» ក្នុងការលក់ប្រេងឧស្ម័ន បើទោះរងទណ្ឌកម្មពីបស្ចិមលោក

វិធានការទណ្ឌកម្មដែលបណ្ដាប្រទេសលោកខាងលិច ដាក់ទៅលើ រុស្ស៊ី ហាក់មិនទាន់មានប្រសិទ្ធភាព ដោយសារតែប្រេងឧស្ម័នបាននាំមកនូវប្រាក់ចំណូល 155 ពាន់លានដុល្លារអាម៉េរិក ដល់ ទីក្រុងមូស្គូ។

បន្ទាប់ពី រុស្ស៊ី បានចូលឈ្លានពានលើ អ៊ុយក្រែន កាលពីថ្ងៃទី 24 កុម្ភៈ សហរដ្ឋអាម៉េរិក និងសម្ព័ន្ធមិត្ត ក៏ចាប់ផ្ដើមដាក់ទណ្ឌកម្មលើវិស័យថាមពលរបស់ រុស្ស៊ី ដោយសង្ឃឹមថា នឹងអាចកាត់ផ្ដាច់ប្រភពចំណូលដ៏ធំធេងពីប្រេងឧស្ម័នរបស់ប្រទេសនេះ។

ប្រធានាធិបតីអាម៉េរិក ចូ បៃដិន បានចេញបទបញ្ជាហាមការនាំចូលផលិតផលប្រេងសាំង ឧស្ម័នធម្មជាតិរាវ (LNG) និងបណ្ដាផលិតផលធ្យូងថ្មរបស់ រុស្ស៊ី ចាប់តាំងពីថ្ងៃទី 08 មីនា។ សហភាពអឺរ៉ុប (EU) ដែលជាទីផ្សារធំនៃថាមពលរបស់ ទីក្រុងមូស្គូ បានប្រកាសផ្អាកនាំចូលប្រេងឆៅមួយភាគរបស់ រុស្ស៊ី ចាប់ពីខែធ្នូ និងបណ្ដាផលិតផលប្រេងកែច្នៃនៅពីរខែបន្ទាប់នោះ។

ការនាំចេញប្រេងឆៅរបស់ រុស្ស៊ី ដោយកប៉ាល់ មានទំនោរថយចុះក្នុងដំណាក់កាលពីខែឧសភាដល់ខែកក្កដា នេះបើតាមទិន្នន័យរបស់ក្រុមហ៊ុន KPLER។ ចំណែក S&P Global Insights វិញ បានឱ្យដឹងថា ក្នុងពាក់កណ្ដាលដើមខែកញ្ញា ការនាំចេញប្រេងរបស់ រុស្ស៊ី តាមរយៈកប៉ាល់ ស្ថិតនៅក្នុងបរិមាណ 3.03 លានធុង/ថ្ងៃ ថយចុះប្រហែល 314,000 ធុង ធៀបនឹងខែសីហា និងជាបរិមាណទាបបំផុតរាប់ចាប់ពីសង្គ្រាមនៅ អ៊ុយក្រែន ផ្ទុះឡើង។

ក៏ប៉ុន្តែ ប្រេងរ៉ែ មិនមែនជាប្រភពថាមពលតែមួយគត់ដែល រុស្ស៊ី មាន ហើយ សហរដ្ឋអាម៉េរិក និង សហភាពអឺរ៉ុប ក៏មិនមែនជាទីផ្សារធំតែមួយសម្រាប់ផលិតផលិតនេះ។ ផលិតផលប្រេងសាំងនាំចេញនៅតែមានស្ថិរភាព ហើយ រុស្ស៊ី ក៏នៅមាន LNG ធ្យូងថ្ម និងថាមពលនុយក្លេអែរ។

មជ្ឈមណ្ឌលស្រាវជ្រាវថាមពល និងបរិយាកាសស្អាត បានឱ្យដឹងថា បើទោះជារងទណ្ឌកម្មទ្រង់ទ្រាយធំមិនធ្លាប់មានពីមុនពី លោកខាងលិច ប៉ុន្តែ រុស្ស៊ី នៅតែរកចំណូលបានជាង 155 ពាន់លានដុល្លារ ពីការនាំចេញឥន្ធនៈហ្វូស៊ីល ចាប់ពីខែកុម្ភៈដល់ខែកញ្ញា។ ជាង 80 ពាន់លានដុល្លារនៅក្នុងនោះគឺបានមកពីអតិថិជននៅ អឺរ៉ុប។ មកដល់ចុងខែកញ្ញា ប្រាក់ចំណូលបានពី អឺរ៉ុប របស់ រុស្ស៊ី បានកើនឡើងដល់ 98 ពាន់លានដុល្លារ ប្រហែល 255 លានដុល្លារ/ថ្ងៃ។

រុស្ស៊ី បានបញ្ចុះតម្លៃប្រេងប្រហែល 30 ដុល្លារ/ធុង ធៀបនឹងប្រេង Brent ដើម្បីទាក់ទាញអតិថិជន ធ្វើឱ្យប្រេងរបស់ រុស្ស៊ី កាន់តែទទួលបានចំណាប់អារម្មណ៍ពីបណ្ដាប្រទេសក្រីក្រ និងបណ្ដាប្រទេសមួយចំនួនទៀត មានដូចជា ចិន ឥណ្ឌា តួកគី ស្រីលង្កា ប៉ាគីស្ថាន ឬ បង់ក្លាដែស។ល។

October 25, 2022

ខ្មាន់កាំភ្លើងម្នាក់បាញ់រះក្នុងសាលារៀននៅ សហរដ្ឋអាម៉េរិក ធ្វើឱ្យមនុស្សច្រើននាក់បាត់បង់ជីវិត

ជនដៃដល់បានបាញ់សម្លាប់មនុស្សពីរនាក់ និងបង្ករបួសស្នាមដល់មនុស្សច្រើននាក់នៅឯសាលារៀនមួយក្នុងរដ្ឋ Missouri សហរដ្ឋអាម៉េរិក មុនពេលប្រយុទ្ធជាមួយក្រុមប៉ូលិស និងត្រូវបានកម្ចាត់។

ករណីបាញ់រះនេះកើតឡើងនៅឯវិទ្យាល័យសិល្បៈទស្សនីយភាព និងសម្ដែង (CVPA) ក្នុងទីក្រុង St. Louis នៃរដ្ឋ Missouri សហរដ្ឋអាម៉េរិក កាលពីព្រឹកថ្ងៃទី ២៤ តុលា នៅពេលជនដៃដល់ប្រើប្រាស់កាំភ្លើងវែងបាញ់ប្រហារទៅលើមនុស្សម្នា។

ស្នងការប៉ូលិសក្រុង St. Louis លោក Michael Sack បានឱ្យដឹងថា សមត្ថកិច្ចបានទៅដល់កន្លែងកើតហេតុ និងបានប្រយុទ្ធជាមួយខ្មាន់កាំភ្លើង។ ជនសង្ស័យត្រូវគ្រាប់ និងបានស្លាប់ក្នុងមន្ទីរពេទ្យ។

ជនរងគ្រោះ ៨ នាក់ ត្រូវបានបញ្ជូនទៅកាន់មន្ទីរពេទ្យសង្គ្រោះបន្ទាន់ ក្នុងនោះមាននារីពេញវ័យម្នាក់ និងសិស្សស្រីម្នាក់ត្រូវបានបញ្ជាក់ថាបានស្លាប់បន្ទាប់ពីទៅដល់មន្ទីរពេទ្យ។ លោក Sack ឱ្យដឹងថា ពួកគេបានស្លាប់ដោយសារត្រូវខ្មាន់កាំភ្លើងបាញ់ប្រហារ។

អត្តសញ្ញាណជនសង្ស័យមិនទាន់ត្រូវបានបង្ហើបឱ្យដឹងនៅឡើយ ប៉ុន្តែ ក្រុមមន្ត្រីនិយាយថា ខ្មាន់កាំភ្លើងមានអាយុជាង ២០ ឆ្នាំ និងមិនទាន់ដឹងច្បាស់អំពីមូលហេតុនៅពីក្រោយអំពើបាញ់ប្រហារនេះ៕

October 25, 2022

ឈុតហោះហើរសង្គ្រោះបន្ទាន់ ល្បឿន ១៣៦ គីឡូម៉ែត្រ/ម៉ោង (វីដេអូ)

(អង់គ្លេស)-ឈុតហោះហើររបស់ក្រុមហ៊ុន Gravity Industries បំពាក់ម៉ាស៊ីនយន្តហោះខ្នាតតូច ជួយឱ្យបុគ្គលិកសង្គ្រោះហោះទៅកាន់កន្លែងកើតហេតុក្នុងរយៈពេលខ្លីបំផុត។

ឈុតហោះហើរនេះជួយធ្វើឱ្យគំនិតស្ដីពី «Iron Man» ក្លាយជាការពិត។ នៅក្នុងវីដេអូនេះ ក្រុមបុគ្គលិកសង្គ្រោះផ្នែកសុខាភិបាលរបស់ Gravity Industries កំពុងតែហ្វឹកហាត់ដើម្បីអាចចូលរួមបេសកកម្មជួយសង្គ្រោះនៅលើផ្ទៃសមុទ្រ ឬលើភ្នំ មិនថាមានភ្លៀង ឬខ្យល់ខ្លាំង។

«មកដល់ពេលនេះ នៅពេលពួកយើងពិតជាអាចទៅដល់ទីតាំងជនរងគ្រោះនៅលើចង្កេះភ្នំនៅ Cumbria គឺពិតជារឿងអស្ចារ្យ» Jamie Walsh បុគ្គលិកសង្គ្រោះដែលបានប្រើប្រាស់ឈុតហោះហើរនេះនិយាយដូច្នេះ និងបន្ថែមថា «ថ្ងៃនេះ (០៥ តុលា ២០២២) ពិតជាថ្ងៃសំខាន់ ពេលដែលអាចធ្វើបានកិច្ចការនោះនៅក្នុងពេលមានភ្លៀងខ្យល់ពិបាកខ្លាំង ព្រោះថា នៅ Cumbria មេឃមានភ្លៀងខ្យល់ច្រើនណាស់។ គ្រប់យ៉ាងពិតជាល្អណាស់»។

ឈុតហោះហើររបស់ Gravity Industries បំពាក់ម៉ាស៊ីនយន្តហោះខ្នាតតូចចំនួន ២ គ្រឿងនៅស្លាបទាំងសងខាង និងម៉ាស៊ីនចំនួន ៣ ទៀតនៅក្នុងកាបូបស្ពាយពីក្រោយខ្នង។ វាអនុញ្ញាតឱ្យបុគ្គលិកសង្គ្រោះអាចហោះហើរបានជាង ១៣៦ គីឡូម៉ែត្រ/ម៉ោង។ ឈុតនេះអាចហោះកម្ពស់ ៧៥០ ម៉ែត្រ ដោយប្រើពេលតែ ៣ នាទី និង ៤០ វិនាទីប៉ុណ្ណោះ៕

October 24, 2022

កម្មវិធីការបើកបរសាកល្បងរថយន្ត Ford ស៊េរីថ្មីឆ្នាំ 2023

[ភ្នំពេញ – ថ្ងៃទី ២២ ខែតុលា ឆ្នាំ២០២២] ក្រុមហ៊ុន អ អិម អេ (ខេមបូឌា) – RMA Cambodia ដែលជាក្រុមហ៊ុននាំចូល និងចែកចាយផ្តាច់មុខនូវរថយន្ត Ford មកកាន់ទីផ្សារព្រះរាជាណាចក្រកម្ពុជា បានរៀបចំកម្មវិធីការបើកបរសាកល្បងដ៏ពិសេសខ្នាតធំជាមួយរថយន្ត Ford ស៊េរីឆ្នាំ 2023 ដែលប្រព្រឹត្តឡើងនៅថ្ងៃទី22 និងថ្ងៃទី23 ខែ តុលា ឆ្នាំ 2022 វេលាម៉ោង 9:00 ព្រឹក រហូតដល់ម៉ោង 4:00 ល្ងាច នៅបរិវេណសណ្ឋាគារ ហ្គាឌិនស៊ីធី (ផ្លូវលីយ៉ុងផាត់) ដោយមានអតិថិជន និងភ្ញៀវកិត្តិយសចូលរួមប្រមាណជាង 500 នាក់។

នៅក្នុងកម្មវិធីបើកបរសាកល្បងនេះ ក៏មានការដាក់តាំងបង្ហាញរថយន្តFord ស៊េរីឆ្នាំ 2023គ្រប់ម៉ូដែលទាំងអស់ដូចជារថយន្ត Ford Ranger XL, រថយន្តFord Ranger XLT, រថយន្តFord Ranger Wildtrak, រថយន្តFord Everest, និងរថយន្តFord Ranger Raptor ដែលមានការតុបតែងលំអ និងរៀបចំសកម្មភាពផ្សេងៗជាច្រើនសម្រាប់អតិថិជនធ្វើការកម្សាន្តនៅក្នុងកម្មវិធីនេះ។ ហើយអ្វីដែលពិសេសនោះគឺ ការបើកបរសាកល្បងរថយន្តFord ស៊េរីឆ្នាំ 2023 ទៅលើគ្រប់ស្ថានភាពផ្លូវទាំងអស់ដែលមានដូចជា៖ ការបើកបរលើផ្លូវធម្មតា(On-Road Highway) ការបើកបរលើឧបសគ្គល្បឿនយឺត (Low-Speed Off-Road) ដែលមានឧបសគ្គដូចជា ផ្លូវរអិល ផ្លូវភក់ ផ្លូវថ្មគ្រួស ផ្លូវគ្រលុកផុង ផ្លូវចុះចំណោតខ្លាំង ផ្លូវខ្សាច់ និងផ្លូវចុះទឹករហូតដល់ជម្រៅ 800mm ដោយធ្វើការបង្ហាញ និងពន្យល់លម្អិតអំពីរបៀបប្រើប្រាស់ប្រព័ន្ធសុវត្ថិភាព និងមុខងារបច្ចេកវិទ្យាទំនើបៗចុងក្រោយនីមួយៗដែលបំពាក់ក្នុងរថយន្ត Next-Generation Ford ស៊េរីឆ្នាំ 2023នេះ ផងដែរ។

អ្វីដែលកាន់តែអស្ចារ្យនោះគឺ ការបើកបរសាកល្បងលើផ្លូវឧបសគ្គល្បឿនលឿន (High-Speed Off-Road Performance) ដោយប្រើប្រាស់មុខងារ Baja Mode របស់រថយន្តFord Ranger Raptor ស៊េរីថ្មីឆ្នាំ 2023 ដែលមិនធ្លាប់មានពីមុនមក និងមិនមានរថយន្តដទៃអាចធ្វើបាននោះឡើយ ដោយអតិថិជនទទួលបានបទពិសោធន៍ថ្មីដ៏អស្ចារ្យក្នុងរថយន្ត Ford Ranger Raptor ស៊េរីឆ្នាំ 2023 ដែលបើកបរជាមួយអ្នកជំនាញបរទេសសញ្ជាតិអូស្ត្រាលី កាណាដា និងថៃ ជាដើម ដែលជាអ្នកឯកទេស និងមានបទពិសោធន៍បើកបរយូរឆ្នាំ ដើម្បីអោយអតិថិជនទទួលបាននូវបទពិសោធន៍មួយដ៏ថ្មីភ្លែក និងអស្ចារ្យមិនធ្លាប់មានពីមុនមក។

លើសពីនេះទៅទៀត អាហារសម្រន់ និងភេសជ្ជៈជាច្រើនមុខបានរៀបចំសម្រាប់អតិថិជនដែលបានចូលរួមក្នុងកម្មវិធីនេះនៅក្រោមតង់ដ៏ធំទូលាយងាយស្រួលក្នុងការជួបជុំគ្នា ទំនាក់ទំនងគ្នា និងថែមទាំងមានកន្លែងកម្បាន្តរបស់កុមារតូចៗដែលបង្កើននូវបរិយាកាសសប្បាយរីករាយសម្រាប់ក្រុមគ្រួសារអតិថិជន និងភ្ញៀវកិត្តិយសជាច្រើនទៀតដែលបានចូលរួមក្នុងកម្មវិធីនេះ។

រាល់អតិថិជនដែលបានចូលរួមកម្មវិធីបើកបរសាកល្បងរថយន្ត Ford ទាំងអស់នឹងទទួលបានសំបុត្រចូលទស្សនាសួនសត្វភ្នំពេញសាហ្វារី ឬ សួនទឹកហ្គាឌិនស៊ីធី និងវត្ថុអនុស្សាវរីយផ្សេងៗជាច្រើនទៀត។ សម្រាប់ការចុះឈ្មោះបើកបរសាកល្បង និង ទទួលយកនូវបទពិសោធន៍ដ៏អស្ចារ្យពីរថយន្ត Ford ស៊េរីឆ្នាំ 2023 សូមទំនាក់ទំនងទៅកាន់លេខទូរស័ព្ទ 078 333 748 និង 016 333 785

October 24, 2022

កាន់តំណែងនាយករដ្ឋមន្ត្រីអង់គ្លេស ៤៤ ថ្ងៃ តែលោកស្រី Truss ទទួលប្រាក់ឧបត្ថម្ភ ១២៩ ០០០ ដុល្លារ/ឆ្នាំ ពេញមួយជីវិត ៖ បក្សប្រឆាំងជំទាស់

លោកស្រី Truss មានសិទ្ធិទទួលបានប្រាក់ឧបត្ថម្ភពេញមួយជីវិត ១២៩ ០០០ ដុល្លារ/ឆ្នាំ បើទោះជាកាន់តំណែងនាយករដ្ឋមន្ត្រីអង់គ្លេស បានតែ ៤៤ ថ្ងៃ ដែលប្រការនេះធ្វើឱ្យសាធារណមតិមានភាពចម្រូងចម្រាស។

នាយិការដ្ឋមន្ត្រីអង់គ្លេស លោកស្រី Liz Truss ប្រកាសលាលែងពីតំណែងកាលពីថ្ងៃទី ២០ តុលា ក្រោយការកាន់តំណែងនេះបាន ៤៤ ថ្ងៃ ក្នុងស្ថានភាពដែលលោកស្រីត្រូវរងសម្ពាធខ្លាំង។ បើទោះជាកាន់តំណែងក្នុងរយៈពេលខ្លី លោកស្រី Truss នៅតែមានលក្ខខណ្ឌគ្រប់គ្រាន់ដើម្បីទទួលបានប្រាក់ឧបត្ថម្ភ PDCA ១១៥ ០០០ ផោន (ជាង ១២៩ ០០០ ដុល្លារអាម៉េរិក) ជារៀងរាល់ឆ្នាំ ពេញមួយជីវិត។

ព័ត៌មានខាងលើបានធ្វើឱ្យមានភាពចម្រូងចម្រាសក្នុងសាធារណមតិ ពិសេសគឺពីគណបក្សប្រឆាំង។ ពួកគេយល់ថា ខ្ទង់ប្រាក់ឧបត្ថម្ភនេះច្រើនជាងប្រាក់បៀវត្សរ៍ដែលលោកស្រី Truss ទទួលបានក្នុងពេលកាន់តំណែងនេះទៅទៀត។ មតិផ្សេងទៀតលើកជាសំណួរថា ខ្ទង់ប្រាក់នេះអាចត្រូវបានប្រើប្រាស់ក្នុងគោលដៅល្អជាងនេះបានដែរ ឬទេ។

«លោកស្រីមិនគួរទទួលយកប្រាក់នោះ។ កាន់តំណែងបានតែ ៤៤ ថ្ងៃ លោកស្រីមិនទាន់មានសិទ្ធិគ្រប់គ្រាន់ដើម្បីទទួល ហើយគួរតែបដិសេធ» Keir Starmer មេបក្សសាធារណរដ្ឋ បានប្រាប់ BBC កាលពីថ្ងសទី ២១ តុលាដូច្នេះ។

Ed Davey ដែលជាប្រធានគណបក្សប្រជាធិបតេយ្យសេរី ក៏យល់ឃើញដូចទៅនឹងការលើកឡើងរបស់ Keir Starmer ផងដែរ។

«បច្ចុប្បន្ន ក្នុងចំណោមមន្ត្រី ៥ រូបគឺមាន ១ រូបត្រូវទៅរកកន្លែងឧបត្ថម្ភអាហារ, ៣៥% ហូបមិនគ្រប់គ្រាន់។ ពិតជាចម្លែកណាស់ បើសិនលោកស្រី Truss អាចទទួលបានអត្ថប្រយោជន៍នេះ» Mark Serwotka អគ្គលេខានៃសម្ព័ន្ធសេវាកម្មពាណិជ្ជកម្ម និងសាធារណៈ ដែលជាអង្គការតំណាងមន្ត្រីរាជការថ្លែងបែបនេះ និងបានអំពាវនាវឱ្យ នាយករដ្ឋមន្ត្រីបន្ទាប់របស់ អង់គ្លេស ដំឡើងប្រាក់ខែជូនមន្ត្រីរាជការដើម្បីទប់ទល់នឹងអតិផរណា។

លោកស្រី Truss បច្ចុប្បន្នមិនទាន់មានការអធិប្បាយអ្វីទាក់ទងនឹងខ្ទង់ប្រាក់ឧបត្ថម្ភ និងភាពចម្រូងចម្រាសខាងលើនៅឡើយ។

PDCA គឺជាកម្មវិធីរបស់ រាជរដ្ឋាភិបាលអង់គ្លេស ត្រូវបានអនុវត្តតាំងពីឆ្នាំ ១៩៩១ ក្នុងបំណង «ជួយឱ្យអតីតនាយករដ្ឋមន្ត្រីអាចបន្តសកម្មភាពសាធារណ»។ ខ្ទង់ប្រាក់ PDCA នេះត្រូវបានផ្ដល់ដោយយោងទៅតាមការចំណាយផ្លូវការជាក់ស្ដែង ដូចជា ថ្លៃជួលការិយាល័យ ប្រាក់ខែសម្រាប់បុគ្គលិកជំនួយការ ឬថ្លៃធ្វើដំណើរទៅចូលរួមព្រឹត្តិការណ៍ក្នុងនាមជាអតីតនាយករដ្ឋមន្ត្រី៕

October 24, 2022

Author: សឿន សំណាង