សឿន សំណាង - La Reine Media

ទាហានពីររូបស្រលាញ់មនុស្សភេទដូចគ្នា ត្រូវតុលាការកាត់ទោសដាក់ពន្ធនាគារច្រើនខែ

ទាហានឥណ្ឌូណេស៊ី 2 រូប ត្រូវបានកាត់ទោសឱ្យជាប់ពន្ធនាគារ 7 ខែ ព្រោះតែមានទំនាក់ទំនងស្នេហាជាមួយមនុស្សភេទដូចគ្នា ជាប្រការដែលកងទ័ពរបស់ប្រទេសនេះចាត់ទុកថាជាសកម្មភាពមិនត្រឹមត្រូវ។

AFP កាលពីថ្ងៃទី 30 វិច្ឆិកា បានយោងតាមសេចក្ដីសម្រេចកាលពីថ្ងៃទី 09 វិច្ឆិកា 2022 របស់តុលាការយោធានៃ ប្រទេសឥណ្ឌណេស៊ី បានឱ្យដឹងថា ទាហាន 2 រូបដែលមានទំនាក់ទំនងស្នេហានឹងមនុស្សភេទដូចគ្នាត្រូវបានបណ្ដេញចេញពីជួរកងទ័ព។ ទាហានទាំង 2 នាក់នេះបានចូលបម្រើកងទ័ពកាលពីឆ្នាំកន្លង និងឈរជើងនៅលើកោះជ្វា (Java)។

«ការដែលជនជាប់ចោទប្រព្រឹត្តអំពើរួមភេទជាមួយនឹងមនុស្សភេទដូចគ្នាគឺជារឿងដែលមិនសមស្រប។ ក្នុងនាមជាទាហាន ជនជាប់ចោទត្រូវតែជាគំរូល្អសម្រាប់មនុស្សនៅជុំវិញ។ សកម្មភាពរបស់ជនជាប់ចោទបានដើរផ្ទុយទៅនឹងច្បាប់រដ្ឋ ឬគ្រប់បញ្ញត្តិផ្នែកសាសនា» សាលក្រមតុលាការកម្រាស់ 60 ទំព័រ មានឃ្លាសរសេរដូច្នេះ។

តុលាការកំពូលឥណ្ឌូណេស៊ី បានចុះផ្សាយអំពីសាលក្រមខាងលើកាលពីសប្ដាហ៍កន្លង ប៉ុន្តែរហូតដល់យប់ថ្ងៃទី 29 វិច្ឆិកា ទើបហេតុការណ៍នេះត្រូវបានគេដឹងច្រើន បន្ទាប់ពីការចុះផ្សាយរបស់សារព័ត៌មានក្នុងស្រុក Detik។

ប្រធានអង្គការលើកលែងទោសអន្តរជាតិឥណ្ឌូណេស៊ី Usman Hamid បានចោទប្រកាន់ក្រុមមន្ត្រីនៅ ឥណ្ឌូណេស៊ី ថា ចេញសាលក្រមដែលបង្ហាញអំពីការស្អប់ខ្ពើមក្រុមសំឡេងភាគតិច ក្នុងនោះមានទាំងសហគមន៍ភេទទីបី (LGBTQ) ផងដែរ៕

December 1, 2022

ក្រុមហ៊ុន ហ្វាន់ ហ៊្វូដ សម្ពោធជាផ្លូវការភោជនីយដ្ឋានបឺហ្គឺរ QB សាខា PPIU

នៅថ្ងៃទី 01 ខែធ្នូ ឆ្នាំ 2022នេះ ក្រុមហ៊ុន ហ្វាន់ ហ្វូដ បានសម្ពោធជាផ្លូវការភោជនីយដ្ឋាន បឺហ្គឺរ QB សាខាទី 2 នៅក្នុងសាកលវិទ្យាល័យភ្នំពេញអន្តរជាតិជាន់ផ្ទាល់ដី។

បើតាមប្រសាសន៍របស់ លោក ងន ដេវីដសំបូរ Managing Director របស់ក្រុមហ៊ុនហ្វាន់ ហ៊្វូដ បានប្រាប់ឱ្យដឹងថា “ភោជនីយដ្ឋាន QB-Quick Bites ជាភោជនីយដ្ឋានប៊ឺហ្គឺរដែលក្រុមហ៊ុន ហ្វាន់ ហ៊្វូដ ទើបតែបង្កើតថ្មី ដែលអតិថិជនអាចទទួលបាននូវប៊ឺហ្គឺររសជាតិថ្មី ដែលជាប្រភេទប៊ឺហ្គឺរធ្វើពីសាច់គោអូស្ត្រាលីសុទ្ធ100%។ នៅ QB អតិថិជន អាចជ្រើសរើសប៊ឺហ្គឺរជាច្រើនរសជាតិ ដូចជា ប៊ឺហ្គឺរសាច់ជ្រូក ប៊ឺហ្គឺរសាច់បង្គា ប៊ឺហ្គឺរសាច់ក្តាម ប៊ឺហ្គឺរសាច់ទា និងប៊ឺហ្គឺរសាច់មាន់ជាដើម។ មិនតែប៉ុណ្ណោះភោជនីយដ្ឋានក៏ផ្តល់ជូននូវមាន់បំពងជាច្រើនរសជាតិផងដែរ”។

លោក ងន ដេវីដសំបូរ បានបញ្ជាក់បន្ថែមថា ក្រុមហ៊ុន ហ្វាន់ ហ៊្វូដ ក៏នៅមានភោជនីយដ្ឋានចំនួន4ទៀតដែលគ្រោងនឹងបើកក្នុងពេលឆាប់ៗខាងមុខនេះ ព្រមទាំងភោជនីយដ្ឋានជាច្រើនទៀតនៅក្នុងឆ្នាំ 2023។ លើសពីនេះទៅទៀត ក្រុមហ៊ុនក៏កំពុងសិក្សា ទៅលើការបង្កើតម៉ាកផ្សេងៗទៀត ដើម្បីផ្តល់ជូនមុខម្ហូបថ្មីដែលប្រកបដោយគុណភាព ប្រណីតភាព និងអនាម័យខ្ពស់ បង្កើតនូវបទពិសោធន៍ថ្មីៗក្នុងភោជនីយដ្ឋាន ជូនប្រជាជនកម្ពុជាយើងផងដែរ។

ក្រុមហ៊ុនក៏មានសេវាកម្មរៀបចំម្ហូបអាហារដល់ទីតាំងជូនអតិថិជន (Catering Service) ផងដែរ ដែលមានមុខម្ហូបជាច្រើនជម្រើស ដូចជា ម្ហូបខ្មែរ ម្ហូបអឺរ៉ុប ម្ហូបជប៉ុន និងជាពិសេសគឺម្ហូបជប៉ុនដែលចម្អិនដោយចុងភៅផ្ទាល់ ហៅថា “Teppanyaki at Home”។ ក្រុមហ៊ុន ហ្វាន់ ហ៊្វូដ មានបទពិសោធន៍ផ្តល់សេវា Catering Service សម្រាប់កម្មវិធីតូចធំ ដែលអាចទទួលភ្ញៀវបានរហូតដល់ជាង 6000 នាក់។

ក្រុមហ៊ុន ហ្វាន់ ហ៊្វូដ ឯ.ក គឺជាក្រុមហ៊ុនមួយដែលមានចក្ខុវិស័យ “ក្លាយខ្លួនជាក្រុមហ៊ុននាំមុខគេនៅក្នុងវិស័យម្ហូបអាហារនៅប្រទេសកម្ពុជា រួមជាមួយនឹងការផ្តល់ជូននូវម្ហូបអាហារប្លែកៗ ក៏ដូចជាសេវាកម្មដ៏ល្អឥតខ្ចោះ”។

ទីតាំងភោជនីយដ្ឋាន បឺហ្គឺរ QB សាខាទី 2 ៖ QB-Quick Bites សាខា PPIU ស្ថិតនៅជាន់ផ្ទាល់ដី ក្នុងសាកលវិទ្យាល័យភ្នំពេញអន្តរជាតិ លេខទូរស័ព្ទទំនាក់ទំនង៖ 085 333 128៕

December 1, 2022

គម្រោងផ្លូវល្បឿនលឿន 12 ខ្សែ ភ្ជាប់ពីភាគខាងជើងមកភាគខាងត្បូងរបស់ វៀតណាម កំពុងត្រៀមបើកការដ្ឋានសាងសង់

ខែធ្នូខាងមុខ វិស័យគមនាគមន៍នៅ វៀតណាម នឹងបើកការដ្ឋានអនុវត្តគម្រោងស្ថាបនាផ្លូវល្បឿនលឿនឧត្ដរ-ទក្សិណចំនួន 12 ខ្សែ សម្រាប់ដំណាក់កាល 2021-2025។

ក្រសួងដឹកជញ្ជូនវៀតណាម កំពុងតែបង្ហើយនីតិវិធីដើម្បីបើកការដ្ឋានសម្រាប់កញ្ចប់គម្រោងទាំង 12 ដែលជាផ្នែកនានានៅក្នុងគម្រោងស្ថាបនាផ្លូវល្បឿនលឿនដែលតភ្ជាប់ភាគខាងជើង ភាគកណ្ដាល និងភាគខាងត្បូង ដំណាក់កាល 2021-2025 ដែលមានទុនវិនិយោគសរុប 147,000,000,000,000 (147 ទ្រីលាន) ដុង ដែលប្រហែលនឹង 6 ពាន់លានដុល្លារអាម៉េរិក។

បណ្ដាគម្រោងផ្លូវល្បឿនលឿនខាងលើមានប្រវែងសរុបប្រមាណ 729 គីឡូម៉ែត្រ ដែលអូសបន្លាយពីភាគខាងជើង មកភាគខាងត្បូង។ បច្ចុប្បន្ន ការងារវាយតម្លៃ និងអនុម័តលើឯកសារស្ដីពីបច្ចេកទេស ការប៉ាន់ប្រមាណតម្លៃសម្រាប់កញ្ចប់ដេញថ្លៃគម្រោងទាំងនេះត្រូវបានធ្វើឡើងរួចរាល់ហើយ ដោយរង់ចាំតែការកំណត់ថ្ងៃសម្រាប់ការដេញថ្លៃការសាងសង់ និងការងារមួយចំនួនតូចទៀតប៉ុណ្ណោះ។

ខែធ្នូខាងមុខនេះ វិស័យគមនាគមន៍វៀតណាម ក៏នឹងជំរុញដំណើរការត្រៀមសម្រាប់ការបើកឱ្យប្រើប្រាស់ ក៏ដូចជាការដាក់ឱ្យប្រើប្រាស់សាកល្បងផ្លូវល្បឿនលឿនជើង-ត្បូងចំនួន 3 ខ្សែនៅភាគខាងជើង ភាគកណ្ដាល ភាគខាងត្បូងផងដែរ៕

December 1, 2022

កិច្ចសន្យាសាងសង់ហេដ្ឋារចនាសម្ព័ន្ធលើឋានព្រះចន្ទ ត្រូវបានប្រគល់ទៅឱ្យក្រុមហ៊ុនអាម៉េរិក

ណាសា (NASA) បានប្រគល់កិច្ចសន្យាតម្លៃជិត 60 លានដុល្លារទៅឱ្យក្រុមហ៊ុន ICON ដើម្បីអភិវឌ្ឍបច្ចេកវិទ្យាស្ថាបនាហេដ្ឋារចនាសម្ព័ន្ធសម្រាប់ឋានព្រះចន្ទ។

ក្នុងកិច្ចប្រឹងប្រែងស្វែងរកដំណោះស្រាយជាក់ស្ដែងដើម្បីស្ថាបនាហេដ្ឋារចនាសម្ព័ន្ធនានាដែលមានភាពរឹងមាំនៅលើដីឋានព្រះចន្ទ ទីភ្នាក់ងារអវកាសអាម៉េរិក (NASA) បានបង្កើនកិច្ចសហការជាមួយនឹង ICON ដែលជាក្រុមហ៊ុនបច្ចេកវិទ្យាសំណង់មួយនៅរដ្ឋ Texas ដែលមានឈ្មោះល្បីក្នុងការសាងសង់ផ្ទះបោះពុម្ព 3D អាចស្នាក់នៅបានដំបូងគេ នៅ សហរដ្ឋអាម៉េរិក កាលពីឆ្នាំ 2018។

យោងតាមប្រកាសកាលពីថ្ងៃទី 29 វិច្ឆិកា ណាសា បានប្រគល់កិច្ចសន្យាតម្លៃ 57.2 លានដុល្លារ ដែលមានសុពលភាពដល់ឆ្នាំ 2028 ទៅឱ្យ ICON ដើម្បីអភិវឌ្ឍបច្ចេកវិទ្យាដែលអាចជួយដល់សកម្មភាពស្ថាបនាសេដ្ឋារចនាសម្ព័ន្ធនៅលើឋានព្រះចន្ទ មានដូចជា ទីលានចុះចត បរិយាកាសសម្រាប់ការរស់នៅ និងផ្លូវចរាចរណ៍ជាដើម។

កិច្ចសន្យាថ្មីនេះគឺជាការបន្តកិច្ចប្រឹងប្រែងរបស់ ICON ទៅតាមកិច្ចសន្យាផ្ទួនដែលទទួលបានការឧបត្ថម្ភពី ណាសា និងទ័ពអាកាសរបស់ អាម៉េរិក ដែលមានឈ្មោះថា ការស្រាវជ្រាវប្ដូរផ្លាស់សហគ្រាសធុនតូច (SBIR)។ ក្នុងដំណាក់កាលមុននោះ SBIR បានពិនិត្យលទ្ធភាពប្រើប្រាស់បច្ចេកវិទ្យាបោះពុម្ព 3D ក្នុងបេសកកម្មអវកាស និងរុករកចំណុចប្រហាក់ប្រហែលគ្នារវាងកម្មវិធី ទម្រង់នៅលើផែនដី និងក្រៅផែនដី។

ដំណាក់កាលទី 3 របស់ SBIR នឹងផ្ដោតទៅលើការអភិវឌ្ឍប្រព័ន្ធស្ថាបនាគម្រោង Olympus របស់ ICON ក្នុងការប្រើប្រាស់ធនធានដែលមានស្រាប់នៅលើឋានព្រះចន្ទ និងភពព្រះអង្គារ ធ្វើជាវត្ថុធាតុសម្រាប់ការសាងសង់ហេដ្ឋារចនាសម្ព័ន្ធបម្រើដល់បេសកកម្មយូរអង្វែង។

ICON ក៏ចូលរួមការប្រកួត «សាកល្បងបរិស្ថានរស់នៅបែប 3D» របស់ ណាសា ផងដែរ។ ក្រុមហ៊ុននេះបានសហការជាមួយសាលាអណ្ដូងរ៉ែ Colorado នៅ សហរដ្ឋអាម៉េរិក ហើយទទួលបានពានរង្វាន់សម្រាប់គំរូរចនាសម្ព័ន្ធបោះពុម្ព 3D ដែលត្រូវបានបញ្ជាក់អំពីកម្រិតនៃភាពរឹងមាំ ប្រាកដប្រជាជាដើម នៅក្នុងស្ថានភាពអាកាសធាតុអាក្រក់៕

December 1, 2022

World Cup 2022 – នៅសល់ 6 ក្រុមទៀតដែលត្រូវឡើងទៅកាន់វគ្គ 1/8

មកដល់បច្ចុប្បន្ន មាន 10 ក្រុមហើយដែលដណ្ដើមបានសំបុត្រឡើងទៅកាន់វគ្គ 1/8 របស់ World Cup 2022 នៅ ប្រទេសកាតា ក្រោយពីការប្រកួតមួយចំនួនកាលពីយប់ថ្ងៃទី 30 វិច្ឆិកា ក្នុងនោះសាខាចំនួន 2 នៅវគ្គ 8 ក្រុមនេះត្រូវបានកំណត់រួចហើយ។

4 ពូលដំបូងបានបញ្ចប់ដោយមិនបានបង្កការភ្ញាក់ផ្អើលច្រើន។ ក្រុមខ្លាំងដូចជា ហូឡង់ អង់គ្លេស អាហ្សង់ទីន និង បារាំង សុទ្ធតែឈរកំពូលតារាង។ សេណេហ្កាល់ សហរដ្ឋអាម៉េរិក ប៉ូឡូញ និង អូស្ត្រាលី ឈរលើចំណាត់ថ្នាក់លេខ 2 ក្នុងពូលនីមួយ។

4 គូដំបូងនៅវគ្គ 1/8 ត្រូវបានកំណត់រួចហើយ ក្នុងនោះ ហូឡង់ នឹងប៉ះ សហរដ្ឋអាម៉េរិក, អាហ្សង់ទីន ប៉ះ អូស្ត្រាលី, អង់គ្លេស ប៉ះ សេណេហ្កាល់ និង បារាំង ត្រូវទាត់នឹង ប៉ូឡូញ។ បើសិនបណ្ដាក្រុមដែលត្រូវបានវាយតម្លៃថាខ្លាំងជាង សុទ្ធតែឈ្នះ នោះ World Cup 2022 អាចនឹងបានឃើញ ហូឡង់ ប៉ះ អាហ្សង់ទីន និង អង់គ្លេស ប៉ះ បារាំង ក្នុងវគ្គ 8 ក្រុមបន្ទាប់នេះ។

4 ពូលចុងក្រោយនឹងត្រូវប្រកួតជាបន្តបន្ទាប់នៅយប់ថ្ងៃទី 01 ធ្នូ និង 02 ធ្នូ ដើម្បីរក 4 គូទៀតឡើងទៅកាន់វគ្គ 1/8។ ក្នុងនោះ ប្រេស៊ីល និង ព័រទុយហ្កាល់ បានប្រាកដថាឆ្លងផុតវគ្គចែកពូល បើទោះមិនទាន់ដឹងច្បាស់ថា នឹងត្រូវឡើងទៅកាន់សាខាណាមួយនៅវគ្គ 8 ក្រុម ព្រោះថា ពួកគេសុទ្ធតែត្រូវការតែលទ្ធផលស្មើនៅជុំចុងក្រោយ ដើម្បីនាំមុខគេនៅពូល G និង H។ ពេលនោះ ប្រេស៊ីល នឹងធ្លាក់ទៅក្នុងសាខាក្នុងវគ្គពាក់កណ្ដាលផ្ដាច់ព្រ័ត្រដែលមាន អាហ្សង់ទីន ចំណែក ព័រទុយហ្កាល់ នឹងស្ថិតក្នុងសាខាដែលមាន អង់គ្លេស និងបារាំង។

មកដល់ពេលនេះ មាន 9 ក្រុមត្រូវបានជម្រុះពី World Cup 2022 និង 10 ក្រុមបានបន្តដំណើរ។ នៅមាន 13 ក្រុមទៀតដែលត្រូវដណ្ដើមសំបុត្រចំនួន 6 ដែលនៅសល់ ដើម្បីឡើងទៅកាន់វគ្គ 8 ក្រុម ជាវគ្គជម្រុះផ្ទាល់ (knock-out) ដែលមានអត្រាជិតស្មើនឹង មួយទល់នឹងមួយ។ អេស្ប៉ាញ ក្រូអាត និង ម៉ារ៉ុក សុទ្ធតែត្រូវការតែលទ្ធផលស្មើនៅជុំចុងក្រោយដើម្បីបន្តដំណើរ ចំណែកបណ្ដាក្រុមក្រៅពីនេះគឺត្រូវតែឈ្នះ ឬឈ្នះច្រើនទើបអាចឡើងទៅវគ្គបន្ទាប់។

វគ្គ 8 ក្រុមចុងក្រោយ (ពាក្យ TBD ឬ To Be Declared មានន័យថា មិនទាន់ដឹង)

2 ក្រុមដែលត្រូវបានវាយតម្លៃខ្ពស់ កំពុងតែមានហានិភ័យត្រូវជម្រុះ នោះគឺ អាល្លឺម៉ង់ និង បែលហ្ស៊ិក។ អាល្លឺម៉ង់ ត្រូវការឈ្នះ ក្រូអាត នៅជុំចុងក្រោយ ហើយសង្ឃឹមថា ជប៉ុន នឹងមិនឈ្នះ អេស្ប៉ាញ។ ចំណែក បែលហ្ស៊ិក វិញ ត្រូវតែឈ្នះ ក្រូអាត ដើម្បីបានចូលវគ្គ 1/8។

ពិន្ទុរបស់បណ្ដាក្រុមនៅពូល G និង H កំពុងតែដូចគ្នា ហើយគូប្រកួត ស៊ែប៊ី – ស្វ៊ីស និង ហ្កាណា – អ៊ុយរូហ្កាយ នៅពូលនីមួយៗនឹងមានអំណាចច្រើនក្នុងការកំណត់ទៅលើដំណើរបន្ទាប់របស់ពួកគេ។ ក្រុមដែលឈ្នះក្នុង 2 គូនេះ នឹងមានឱកាសច្រើនក្នុងការឡើងទៅកាន់វគ្គជម្រុះផ្ទាល់។ ព្រោះថា គូប្រកួតក្រៅពីនេះ គឺ ប្រេស៊ីល និង ព័រទុយហ្កាល់ សុទ្ធតែពីបាកចាញ់៕

December 1, 2022

ក្រសួងពាណិជ្ជកម្មប្រកាសពីតម្លៃថ្មីសម្រាប់ការលក់រាយប្រេងឥន្ធនៈ តាមស្ថានីយទូទាំងប្រទេស

នាព្រឹកថ្ងៃទី 01 តុលា 2022 នេះ ក្រសួងពាណិជ្ជកម្មប្រកាសពីតម្លៃលក់រាយប្រេងឥន្ធនៈ តាមស្ថានីយនានាទូទាំងប្រទេស ចាប់ពីថ្ងៃទី 01 ដល់ 10 ធ្នូ 2022។

យោងតាមសេចក្ដីប្រកាសថ្មីនេះ ប្រេងសាំងធម្មតាត្រូវលក់តម្លៃ 4,200 រៀល/លីត្រ (ចុះ 150 រៀល) និងប្រេងម៉ាស៊ូតត្រូវលក់តម្លៃ 4,650 រៀល/លីត្រ (ចុះ 350 រៀល)។

December 1, 2022

សហរដ្ឋអាម៉េរិក ចំណាយជាង 1 ពាន់លានដុល្លារដើម្បីទិញមីស៊ីល NASAMS ឱ្យ អ៊ុយក្រែន

កងទ័ពជើងគោកអាម៉េរិក ប្រគល់កិច្ចព្រមព្រៀងតម្លៃជាង 1 ពាន់លានដុល្លារឱ្យក្រុមហ៊ុន Raytheon ដើម្បីផលិតប្រព័ន្ធការពារដែនអាកាស NASAMS ចំនួន 6 គ្រឿង សម្រាប់ផ្គត់ផ្គង់ឱ្យ ទីក្រុងកៀវ។

មន្ទីរបញ្ចកោណ កាលពីថ្ងៃទី 30 វិច្ឆិកា បានប្រកាសថា កងទ័ពជើងគោកអាម៉េរិក បានប្រគល់កិច្ចព្រមព្រៀងតម្លៃ 1.2 ពាន់លានដុល្លារទៅឱ្យក្រុមហ៊ុនការពារជាតិ Raytheon ដើម្បីផលិត និងផ្គត់ផ្គង់ប្រព័ន្ធមីស៊ីលការពារដែនអាកាសរយៈចម្ងាយមធ្យម NASAMS អមជាមួយនឹងការហ្វឹកហ្វឺន និងជួយដល់ផ្នែកដឹកជញ្ជូនសម្រាប់កងទ័ពរបស់ ប្រទេសអ៊ុយក្រែន។

ប្រព័ន្ធ NASAMS ចំនួន 6 គ្រឿងនេះ ស្ថិតក្នុងកញ្ចប់ជំនួយទី 5 ដែលមានតម្លៃសរុប 2.98 ពាន់លានដុល្លារអាម៉េរិក ដែលស្ថិតក្នុងគំនិតផ្ដួចផ្ដើមជំនួយយោធាសម្រាប់ អ៊ុយក្រែន (USAI)។ មូលនិធិ USAI ដែលត្រូវបានបង្កើតឡើងដោយ សភាអាម៉េរិក នេះ អនុញ្ញាតឱ្យ ប្រធានាធិបតី ចូ បៃដិន ទិញអាវុធពីបណ្ដាក្រុមហ៊ុនការពារជាតិ ជំនួសឱ្យការយកពីឃ្លាំងរបស់ សហរដ្ឋអាម៉េរិក ដើម្បីផ្ដល់ឱ្យ អ៊ុយក្រែន។

ប្រព័ន្ធមីស៊ីលការពារដែនអាកាសរយៈចម្ងាយមធ្យម NASAMS

មកដល់ពេលនេះ មិនទាន់ដឹងច្បាស់ថា ប្រព័ន្ធទាំងនេះនឹងត្រូវបញ្ចេញ និងប្រគល់ឱ្យ អ៊ុយក្រែន នៅពេលណានៅឡើយ។

សហរដ្ឋអាម៉េរិក គឺជាភាគីដែលផ្ដល់ជំនួយយោធាច្រើនជាងគេបង្អស់សម្រាប់ អ៊ុយក្រែន ក្នុងនោះមានទាំងអាវុធធុនធ្ងន់ដូចជា ប្រព័ន្ធរ៉ុក្កែត HIMARS, កាំភ្លើងធំ M777 និងមីស៊ីលការពារដែនអាកាស NASAMS ជាដើម។ ក្រសួងការបរទេសអាម៉េរិក ឱ្យដឹងថា ជំនួយសរុបរបស់ អាម៉េរិក សម្រាប់ អ៊ុយក្រែន រាប់ចាប់ពីខែមករា 2021 គឺប្រហែល 19.7 ពាន់លានដុល្លារ៕

December 1, 2022

អាម៉េរិក ថា មេដឹកនាំភេរវកម្ម IS ត្រូវក្រុមបះបោរនៅប្រទេសស៊ីរី សម្លាប់

កងទ័ពអាម៉េរិក ឱ្យដឹងថា មេដឹកនាំ IS ឈ្មោះ Abu al-Hassan al-Hashemi al-Quraishi ត្រូវបានសម្លាប់ដោយក្រុមបះបោរនៅ ប្រទេសស៊ីរី កាលពីពាក់កណ្ដាលខែតុលា 2022។

អ្នកនាំពាក្យរបស់ កងទ័ពអាម៉េរិក កាលពីថ្ងៃទី 30 វិច្ឆិកា បានឱ្យដឹងថា មេដឹកនាំក្រុមភេរវកររដ្ឋអ៊ីស្លាម (IS) ឈ្មោះ Abu al-Hassan al-Hashemi al-Quraishi ត្រូវបានសម្លាប់នៅក្នុងយុទ្ធនាការយោធារបស់ កងទ័ពសេរីស៊ីរី (FSA) តាំងពីខែតុលា នៅឯខេត្ត Daraa។ អ្នកនាំពាក្យរូបនេះបន្ថែមថា ពុំមានទាហានរបស់ សហរដ្ឋអាម៉េរិក ចូលរួមក្នុងយុទ្ធនាការនេះទេ។

មុននោះ អ្នកនាំពាក្យរបស់ ក្រុមប្រឹក្សាសន្តិសុខជាតិអាម៉េរិក John Kirby និយាយថា ទីក្រុងវ៉ាស៊ីងតោន សាទរចំពោះព័ត៌មានដែលថា មេដឹកនាំម្នាក់ទៀតរបស់ IS ត្រូវបានកម្ចាត់ ប៉ុន្តែ នឹងនៅតែតាមដានព័ត៌មានជាបន្ត។

IS មុននោះក៏បានប្រកាសថា មេដឹកនាំកំពូល Abu al-Hassan ត្រូវបានសម្លាប់នៅក្នុងការប្រយុទ្ធជាមួយ «សត្រូវរបស់ព្រះអម្ចាស់» ប៉ុន្តែ មិនបានលើកឡើងអំពីពេលវេលា និងស្ថានភាពស្ដីពីការស្លាប់របស់មេដឹកនាំនេះ។

ក្រុម IS បន្ថែមថា ពួកគេបានជ្រើសរើស Abu al-Husayn al-Husayni al-Qurashi ជាមេដឹកនាំថ្មីទី 4 និងអំពាវនាវដល់សមាជិកទាំងអស់ មានភក្ដីភាពចំពោះមេដឹកនាំថ្មី។ បច្ចុប្បន្នមិនទាន់មានព័ត៌មានស្ដីពី Abu al-Husayn នៅឡើយ។

FSA គឺជាក្រុមបះបោរប្រដាប់អាវុធនៅ ស៊ីរី ដែលគាំទ្រដោយ តួកគី ដើម្បីទប់ស្កាត់ការគ្រប់គ្រងទឹកដីពីសំណាក់កងជីវពលជនជាតិឃឺដ និងរារាំងជនភៀសខ្លួនពី ស៊ីរី ចូលទឹកដីតួកគី។ ក្រុម FSA ត្រូវបាន រដ្ឋាភិបាលស៊ីរី និង រុស្ស៊ី ចាត់ទុកជាក្រុមភេរវកម្ម។

IS បានរងការវាយប្រហារខ្លាំងក្លាចាប់តាំងពី Abu Bakr al-Baghdadi ដែលជាស្ថាបនិករបស់ក្រុមនេះត្រូវបានកម្ចាត់នៅក្នុងការវាយឆ្មក់របស់ អាម៉េរិក នៅ Idlib កាលពីឆ្នាំ 2019។ តាំងពីពេលបាត់បង់មូលដ្ឋានចុងក្រោយនៅតំបន់សមុទ្រខ្សាច់នៅភាគខាងកើតរបស់ ប្រទេសស៊ីរី កាលពីខែ មីនា 2019 ទាហានរបស់ IS ក៏បានដកថយទៅលាក់ខ្លួនក្នុងសមុទ្រខ្សាច់ ហើយពេលខ្លះក៏ចេញមកវាយឆ្មក់លើកងកម្លាំងរបស់ ជនជាតិឃឺដ និង រដ្ឋាភិបាលស៊ីរី៕

December 1, 2022

រោងចក្រផលិតបាល់មួយលានគ្រាប់សម្រាប់ជាវត្ថុអនុស្សាវរីយ៍ World Cup 2022

បើទោះជាក្រុមបាល់ទាត់ជម្រើសជាតិមិនបានចូលរួមទាត់នៅ World Cup 2022 ប៉ុន្តែ ឥណ្ឌូណេស៊ី នៅតែធ្វើឱ្យគេចាប់អារម្មណ៍នៅពេលផលិតបាល់ Al Rihla (ដែលជាបាល់ផ្លូវការសម្រាប់ការប្រកួតនៅ World Cup 2022) ចំនួន 1 លានគ្រាប់សម្រាប់ជាអនុស្សាវរីយ៍។

កំណែចម្លងជាអនុស្សាវរីយ៍របស់បាល់ Al Rihla កំពុងតែត្រូវបានផលិតដោយក្រុមហ៊ុន PT Global Way នៅ Madiun ខេត្តជ្វាខាងកើត នៃ ប្រទេសឥណ្ឌូណេស៊ី។

ខេត្តខាងលើគឺជាមជ្ឈមណ្ឌលពាណិជ្ជកម្ម ដែលរួមចំណែកជាង 15% ទៅក្នុង GDP របស់ ឥណ្ឌូណេស៊ី ដោយមានភាពល្បីល្បាញក្នុងវិស័យឧស្សាហកម្មធុនធ្ងន់ដូចជា ការសាងសង់កប៉ាល់ ផលិតស៊ីម៉ង់ និងក្រដាស់ជាដើម។ល។

កាលពីឆ្នាំ 2019 PT Global Way បានចាប់ផ្ដើមបើករោងចក្រផលិតបាល់ Al Rihla នៅ ខេត្តជ្វាខាងកើត និងរើសកម្មករ 2,000 នាក់។ គម្រោងនេះបានរួមចំណែកជួយឱ្យកំណើនសេដ្ឋកិច្ចក្នុងតំបន់កើនឡើង 3.34% ក្នុងដំណាក់កាល 2020-2021 នេះបើតាម Ahmad Dawami ដែលជាមន្ត្រីមួយរូបនៅ Madiun។

Dawami ឱ្យដឹងថា បាល់អនុស្សាវរីយ៍ប្រហែល 1 លានគ្រាប់ត្រូវបានរោងចក្ររបស់ PT Global Way ផលិត និងនាំចេញទៅកាន់ ប្រេស៊ីល, សហរដ្ឋអាម៉េរិក, អាល្លឺម៉ង់, អារ៉ាប់រួម ក្នុងព្រឹត្តិការណ៍ World Cup 2022 នៅ ប្រទេសកាតា។

រោងចក្រនេះបានផ្ដល់ការងាររាប់ពាន់កន្លែងសម្រាប់កម្មករវ័យក្មេង នៅពេលសេដ្ឋកិច្ចរបស់ ឥណ្ឌូណេស៊ី ក៏ដូចជាពិភពលោក កំពុងរងផលប៉ះពាល់ដោយសារជំងឺរាតត្បាតសកល និងសង្គ្រាមនៅ អ៊ុយក្រែន។

គ្រាប់បាល់ Al Rihla ដែលមានន័យថា «ការធ្វើដំណើរ» នៅក្នុងភាសាអារ៉ាប់ គឺជាសមិទ្ធផលបច្ចេកវិទ្យារបស់ Adidas។ ក្រុមហ៊ុនអាល្លឺម៉ង់នេះ បានផ្គត់ផ្គង់បាល់សម្រាប់ World Cup ចាប់តាំងពីឆ្នាំ 1970។ Al Rihla គឺជាបាល់ផ្លូវការទី 14 របស់ World Cup៕

December 1, 2022

Messi ក្ដៅក្រហាយចិត្តព្រោះតែទាត់បាល់ពិន័យប៉េណាំងទីមិនបានជោគជ័យ

Lionel Messi មិនពេញចិត្តជាមួយនឹងខ្លួនឯងនៅពេលបរាជ័យក្នុងការទាត់បាល់ពិន័យប៉េណាំងទី ក្នុងការប្រកួតដែល អាហ្សង់ទីន ឈ្នះ ប៉ូឡូញ 2-0 នៅពូល C របស់ World Cup 2022 កាលពីថ្ងៃទី 30 វិច្ឆិកា។

«ខ្ញុំក្ដៅចិត្តណាស់ព្រោះតែទាត់ឱ្យខូចបាល់ប៉េណាំងទី» Messi ថ្លែងដូច្នេះនៅក្នុងការសម្ភាសក្រោយការប្រកួត។ «ប៉ុន្តែ ក្រុមទាំងមូលបានបញ្ចេញប្រតិកម្មខ្លាំងក្លាបន្ទាប់ពីកំហុសរបស់ខ្ញុំ។ ពួកយើងដឹងថា នៅពេលរកបានគ្រាប់បាល់ដំបូង ការប្រកួតនឹងផ្លាស់ប្ដូរ ហើយ ប៉ូឡូញ នឹងត្រូវលេងបើកចំហជាង»។

Messi គឺជាកីឡាករដំបូងក្នុងប្រវត្តិសាស្ត្រ World Cup ដែលត្រូវបានអ្នកចាំទីរារាំងបានសម្រេចរហូតដល់ទៅ 2 ដង នៅក្នុងការទាត់បាល់ពិន័យ។ ម្ចាស់គ្រាប់បាល់មាសចំនួន 7 នេះ បានបំបែកឯកទគ្គកម្មដ៏ក្រៀមក្រំនេះនៅនាទីទី 37 ក្នុងការប្រកួតជាមួយ ប៉ូឡូញ។ នេះគឺជាការទាត់ខូចបាល់ពិន័យប៉េណាំងទីទីពីរក្នុងចំណោមបាល់ពិន័យចំនួន 3 ដែល Messi បានទាត់នៅរដូវកាលនានារបស់ World Cup។

ការប្រកួតជុំចុងក្រោយនៃពូល C កាលពីថ្ងៃទី 30 វិច្ឆិកា គឺជាការប្រកួតទី 22 របស់ Messi នៅ World Cup ហើយនេះនាំឱ្យគាត់ក្លាយជាកីឡាករដែលបានចូលរួមច្រើនប្រកួតបំផុតក្នុងប្រវត្តិសាស្ត្រ World Cup។

ថ្វីបើ Messi ទាត់បាល់ពិន័យប៉េណាំងទីមិនបានសម្រេច ប៉ុន្តែ បាល់ 2 គ្រាប់ដែលរកបានដោយ Alexis MacAllister និង Julian Alvarez បានជួយឱ្យ អាហ្សង់ទីន ឈ្នះ ប៉ូឡូញ 2-0 កាលពីយប់ម្សិលមិញ ដូច្នេះ ក្រុមនេះក៏បានឡើងទៅកាន់វគ្គ 1/8 ក្នុងនាមជាក្រុមគ្រប់គ្រងពូល C។

https://www.youtube.com/watch?v=_u4iHItlxM0

នៅជុំជម្រុះដំបូងនៃវគ្គ 1/8 អាហ្សង់ទីន នឹងត្រូវជួប អូស្ត្រាលី ដែលជាក្រុមឈរចំណាត់ថ្នាក់ទី 2 នៅក្នុងពូល D។ Messi យល់ថា នេះនឹងជាការប្រកួតលំបាកសម្រាប់គាត់ និងក្រុមរបស់គាត់។

បើសិនជាឈ្នះ អូស្ត្រាលី នៅវគ្គ 1/8 អាហ្សង់ទីន នឹងត្រូវប៉ះជាមួយក្រុម ហូឡង់ ឬ សហរដ្ឋអាម៉េរិក នៅវគ្គ 8 ក្រុម។ អាម៉េរិក មិនទាន់ត្រូវបានចាត់ទុកថាជាគូប្រជែងស្មើមុខស្មើមាត់ជាមួយនឹង អាហ្សង់ទីន ខណៈដែល ហូឡង់ បានបង្ហាញរបៀបលេងដែលមិនគួរឱ្យចាប់អារម្មណ៍នៅ World Cup 2022៕

December 1, 2022

Author: សឿន សំណាង