សឿន សំណាង - La Reine Media

ហានិភ័យកើត «ជំងឺដាច់សរសៃឈាមខួរក្បាល» កើនឡើងខ្ពស់ក្នុងរដូវរងា

ជំងឺដាច់សរសៃឈាមខួរក្បាល (Hemorrhagic stroke) គឺជាជំងឺកើតឡើងនៅពេលដែលចរន្តឈាមផ្នែកណាមួយរបស់ខួរក្បាល ត្រូវបានកាត់ផ្ដាច់ ឬត្រូវបានកាត់បន្ថយ អាចនាំឱ្យកោសិកាខួរក្បាលស្លាប់យ៉ាងលឿន បើមិនមានអុកស៊ីហ្សែនដឹកជញ្ជូនដោយឈាមទៅចិញ្ចឹម ធ្វើឱ្យខួរក្បាលខូចជារាងរហូត អ្នកជំងឺត្រូវពិការ ឬបាត់បង់ជីវិតក៏មាន។

ការស្រាវជ្រាវនៅសហរដ្ឋអាម៉េរិកកាលពីឆ្នាំ 2016 ទៅលើអ្នកជំងឺជាង 172,000 នាក់ដែលបានចូលពេទ្យដោយសារជំងឺដាច់សរសៃឈាមខួរក្បាល ខ្វះឈាមក្នុងខួរក្បាល បានបង្ហាញថា ជំងឺដាច់សរសៃឈាមខួរក្បាលកើនឡើងនៅពេលអាកាសធាតុចុះត្រជាក់ និងសីតុណ្ហភាពខុសគ្នាឆ្ងាយរវាងពេលថ្ងៃ និងពេលយប់។

ចំណែកការស្រាវជ្រាវនៅប្រទេសអាល្លឺម៉ង់វិញ បានបង្ហាញថា សីតុណ្ហភាពថយចុះ 2.9 អង្សាសេក្នុងរង្វង់ 24 ម៉ោង ហានិភ័យកើតជំងឺដាច់សរសៃឈាមខួរក្បាលកើន 11%។ ហានិភ័យនេះមានអត្រាខ្ពស់ជាងចំពោះមនុស្សដែលមានជំងឺលើសឈាម ជំងឺទឹកនោមផ្អែម និងជំងឺទាក់ទងនឹងបេះដូង។

ដោយឡែក ការស្រាវជ្រាវនៅប្រទេសប្រេស៊ីលដែលធ្វើឡើងលើមនុស្សចំនួន 56,000 នាក់ដែលបានស្លាប់ដោយសារជំងឺដាច់សរសៃឈាមខួរក្បាលក្នុងរយៈពេលជាង 10 ឆ្នាំ ក៏បានសន្មតថា សីតុណ្ហភាពធ្លាក់ចុះបណ្ដាលឱ្យករណីស្លាប់ដោយសារជំងឺដាច់សរសៃឈាមខួរក្បាលកើនឡើង ពិសេសចំពោះមនុស្សវ័យលើសពី 65 ឆ្នាំ។

ក្រុមអ្នកជំនាញយល់ថា ការខ្ជិលហាត់ប្រាណក្នុងរដូវរងាគឺជាកត្តារួមចំណែកមួយដែលនាំឱ្យកើតជំងឺដាច់សរសៃឈាមខួរក្បាល។

ដើម្បីទប់ស្កាត់ជំងឺនេះ វេជ្ជបណ្ឌិតណែនាំឱ្យជៀសវាងប៉ះពាល់អាកាសធាតុ ឬធាតុត្រជាក់ភ្លាមៗ ពិសេសធាតុត្រជាក់ក្រោម 15 អង្សា និងត្រូវស្លៀកពាក់ក្រាស់ៗនៅពេលចេញទៅខាងក្រៅដែលមានអាកាសធាតុត្រជាក់ ហើយត្រូវតាមដានសម្ពាធឈាមនៅពេលអាកាសធាតុប្រែប្រួល។

ក្នុងរដូវត្រជាក់ មនុស្សគួរតែធ្វើលំហាត់ប្រាណឱ្យបានញឹកញាប់ដើម្បីជួយដល់លំហូរឈាមក្នុងរាងកាយ។ អ្នកដែលលើសទម្ងន់គួរតែសម្រកឱ្យបានសមស្រប និងកាត់បន្ថយអាហារប្រៃ អាហារមានខ្លាញ់ច្រើន។ អ្នកមានហានិភ័យកើតជំងឺខាងលើ ល្អបំផុតគឺត្រូវឈប់ផឹកស្រា ឈប់ជក់បារី និងចៀសវាងអារម្មណ៍តានតឹង៕

January 31, 2023

Huawei នឹងអាចត្រូវសហរដ្ឋអាម៉េរិក «ហាមចូលស្រុក» ទាំងស្រុង

អាជ្ញាធរអាម៉េរិកត្រូវបានគេជឿថា កំពុងពិនិត្យលទ្ធភាពរាំងខ្ទប់ទាំងស្រុងនៅលើទឹកដីនេះចំពោះក្រុមហ៊ុនចិន Huawei ជំនួសឱ្យការហាមឃាត់តែមួយផ្នែកដូចបច្ចុប្បន្ន។

យោងតាម Bloomberg មន្ត្រីមួយចំនួននៅក្នុងក្រុមប្រឹក្សាសន្តិសុខជាតិ និងក្រសួងពាណិជ្ជកម្មអាម៉េរិក បានគាំទ្រចំពោះការហាមរាល់វត្តមានរបស់ផលិតផល សេវាកម្មរបស់ Huawei។ បញ្ហាថ្មីនានាកំពុងត្រូវបានលើកយកមកពិភាក្សាក្នុងដំណាក់កាលដំបូង ហើយអាចត្រូវបានប្រកាសនៅក្នុងខែមេសា ឬឧសភាខាងមុខ។

Huawei ត្រូវបានសហរដ្ឋអាម៉េរិកដាក់ចូលក្នុងបញ្ជីឈ្មោះក្រុមហ៊ុនដែលបង្កការគំរាមកំហែងដល់សន្តិសុខជាតិ ចាប់តាំងពីឆ្នាំ 2019។ ប៉ុន្តែ ក្រុមហ៊ុនចិននេះនៅតែត្រូវបានអនុញ្ញាតឱ្យទិញគ្រឿងបន្លាស់ និងបច្ចេកវិទ្យាពីបណ្ដាក្រុមហ៊ុនអាម៉េរិក បើសិនទទួលបានការអនុញ្ញាត។

Huawei ធ្លាប់ជាអ្នកទិញ និងផ្គត់ផ្គង់គ្រឿងបន្លាស់បច្ចេកវិទ្យាធំជាងគេមួយរបស់ពិភពលោក។ មកដល់ពេលនេះ ក្រុមហ៊ុនអាម៉េរិកមួយចំនួននៅតែបន្តធ្វើជាដៃគូសហការរបស់ Huawei មានដូចជា Intel និង AMD ជាដើម។

ការសម្រេចចិត្តថ្មីនាពេលខាងមុខរបស់អាជ្ញាធរអាម៉េរិក ត្រូវបានវាយតម្លៃថា នឹងបង្កផលប៉ះពាល់ធ្ងន់ធ្ងរដល់ Huawei ប៉ុន្តែមិនបង្កការខាតបង់ធំធេងដល់បណ្ដាដៃគូនៅសហរដ្ឋអាម៉េរិក។

ក្រុមប្រឹក្សាសន្តិសុខជាតិ និងក្រសួងពាណិជ្ជកម្មអាម៉េរិក មិនទាន់បញ្ចេញប្រតិកម្មចំពោះដំណឹងនេះ ខណៈដែលតំណាងរបស់ Intel, Qualcomm និង AMD បានបដិសេធការអធិប្បាយ។

សហរដ្ឋអាម៉េរិក កំពុងបន្តរឹងបន្តឹងការផ្គត់ផ្គង់បច្ចេកវិទ្យារបស់អាម៉េរិក ទៅឱ្យចិន។ កាលពីសប្ដាហ៍កន្លង អាម៉េរិកបានបញ្ចុះបញ្ចូលហូឡង់ និងជប៉ុន ឱ្យចូលរួមកាត់បន្ថយការនាំចូលគ្រឿងម៉ាស៊ីនផលិតបន្ទះអេឡិចត្រូនិក (semiconductor) ទំនើបទៅកាន់ប្រទេសចិន៕

January 31, 2023

យានរបស់ណាសានៅភពអង្គារ ថតបានរូបភាព «ផ្ទៃមុខខ្លាឃ្មុំកំពុងញញឹម»

សណ្ឋានដីចម្លែកនៅតំបន់មួយលើភពព្រះអង្គារបង្កើតបានជារូបរាងដូចទៅនឹងមុខមាត់របស់ខ្លាឃ្មុំ ពេលមើលពីលើយានអវកាសស្រាវជ្រាវ MRO របស់ណាសាដែលកំពុងហោះហើរជុំវិញភពក្រហមនេះ។

ក្នុងរូបថតមួយដែលត្រូវបានសាកលវិទ្យាល័យ Arizona (UA) ចែករំលែកកាលពីសប្ដាហ៍កន្លងបង្ហាញថា សណ្ឋានដីដែលមានរូបរាងដូចទៅនឹងផ្ទៃមុខរបស់ខ្លាឃ្មុំកំពុងញញឹម ត្រូវបានបង្កើតឡើងដោយស្នាមបំណាក់ដីរាងរង្វង់មូល (រូបដូចក្បាល) និងមាត់រណ្ដៅអាចម៍ផ្កាយ (ភ្នែក) បូករួមនឹងកូនភ្នំដែលដួលរលំរាងជាអក្សរ V (ច្រមុះ និងមាត់)។

ស្នាមដំណាក់ដីរាងរង្វង់មូលអាចកើតឡើងដោយសារបាតុភូតស្រុតរបស់ស្រទាប់ដីល្បាប់លើមាត់រណ្ដៅអាចម៍ផ្កាយដែលបានលប់ដោយកំអែភ្នំភ្លើង ឬភក់។ ចំណែកកន្លែងដែលដូចច្រមុះ ទំនងជារណ្ដៅដែលបញ្ចេញចំហាយឧស្ម័ន នេះបើតាមក្រុមអ្នកជំនាញមកពី UA។

កាមេរ៉ា HiRISE របស់ MRO ថតបានរូបភាពចម្លែកនេះនៅពេលហោះក្នុងរយៈកម្ពស់ប្រហែល 251 គីឡូម៉ែត្រ ធៀបនឹងផ្ទៃដីភពអង្គារ។ យានអវកាស MRO បានហោះទៅដល់ពិភពអង្គារកាលពីឆ្នាំ 2006 និងហោះមួយជុំភពនេះដោយចំណាយពេលតែ 112 នាទីប៉ុណ្ណោះ។

ភារកិច្ចរបស់ MRO គឺស្រាវជ្រាវអំពីអាកាសធាតុ ភូគព្ភសាស្ត្រ និងស្វែងរកទីតាំងល្អសម្រាប់ការចុះចតក្នុងអនាគត ក៏ដូចជាប្រមូលទិន្នន័យពីបេសកកម្មនានានៅលើដីរបស់ភពអង្គារដើម្បីបញ្ជូនបន្តមកកាន់ផែនដី។

មកដល់ពេលនេះ យាន MRO បានបំពេញបេសកកម្មបានជិត 17 ឆ្នាំហើយ ពោលគឺយូរជាងការរំពឹងទុក។ ណាសាក៏មានបំណងបន្តប្រើប្រាស់យាននេះឱ្យបានយូរតាមដែលអាចធ្វើទៅបាន៕

January 31, 2023

ក្លឹប PSG របស់បារាំង ស្វែងរកទិញ «មេធ្មប់អាហ្វ្រិក» ដើម្បីបន្ថែមចំនួនកីឡាករឆ្នើម

យោងតាមប្រភពព័ត៌មានមួយចំនួន ក្លឹបបាល់ទាត់នៅបារីស PSG កំពុងចរចាដើម្បីចុះកិច្ចព្រមព្រៀងជាមួយកីឡាករម្នាក់ក្នុងចំណោមកីឡាករឆ្នើមជាងគេនៅអាហ្វ្រិក នោះគឺ Hakim Ziyech។

កីឡាករខ្សែបម្រើរូបនេះ កំពុងថមថយកម្លាំងក្នុងគ្រាទាត់ឱ្យក្លឹប Chelsea ហើយអាចត្រូវបានអនុញ្ញាតឱ្យចាកចេញនៅថ្ងៃចុងក្រោយនៃរដូវកាលទិញដូរកីឡាករនារដូវរងាឆ្នាំនេះ។

វត្តមានរបស់កីឡាករឆ្នើមដូចជា Mykhailo Mudryk, Joao Felix និង Noni Madueke ជាដើម ក៏អាចធ្វើឱ្យពេលវេលានៃការប្រកួតរបស់ Ziyech ត្រូវបានកាត់បន្ថយបន្ថែមទៀត។ កីឡាករដែលធ្លាប់ត្រូវបានគេហៅថា «មេធ្មប់អាហ្វ្រិក» រូបនេះ ទើបតែទាត់បាន 4 ប្រកួតប៉ុណ្ណោះក្នុងនាមជាកីឡាករជម្រើសដំបូងនៅ លីគកំពូលអង់គ្លេស (English Premier League) ក្នុងរដូវកាលនេះ។

Hakim Ziyech ហាក់កំពុងថមថយកម្លាំងក្នុងគ្រាទាត់ឱ្យក្លឹប Chelsea

ព័ត៌មានពី The Athletic ឱ្យដឹងថា PSG ចង់ចុះកិច្ចសន្យាជាមួយកីឡាករម៉ារ៉ុក Hakim Ziyech ក្នុងទម្រង់ឱ្យខ្ចី ប៉ុន្តែអាចអមជាមួយនឹងលក្ខខណ្ឌទិញដាច់។ កីឡាករវ័យ 29 ឆ្នាំរូបនេះក៏ត្រូវបានគេជឿថា បានយល់ព្រមរួចហើយក្នុងការផ្លាស់ទីទៅទាត់ឱ្យ PSG សម្រាប់ពេលវេលាដែលនៅសល់ក្នុងរដូវកាលនេះ។

បច្ចុប្បន្ន PSG (Paris Saint-Germain) មានកីឡាករឆ្នើមលំដាប់កំពូលលើពិភពលោកមួយចំនួន រួមមានជាអាទិ៍ Lionel Andres Messi, Neymar da Silva Santos Junior, Kylian Mbappe និង Achraf Hakimi Mouh ជាដើម៕

January 31, 2023

ទ័ពអាកាសអាម៉េរិកធ្វើតេស្តជោគជ័យលើ «អាវុធល្បឿនជាងសំឡេង»

ទ័ពអាកាសអាម៉េរិកបានធ្វើតេស្តរួចរាល់ដោយជោគជ័យនូវអាវុធល្បឿនជាងសំឡេង HAWC ដើម្បីបម្រើដល់កម្មវិធីអភិវឌ្ឍអាវុធដទៃទៀត។

អង្គភាពស្រាវជ្រាវគម្រោងការពារទំនើប (DARPA) របស់អាម៉េរិក កាលពីថ្ងៃទី 30 មករា ប្រកាសថា បានសហការជាមួយទ័ពអាកាសអាម៉េរិក បញ្ចប់ដំណាក់កាលសាកល្បងចុងក្រោយស្ដីពីកម្មវិធីអាវុធល្បឿនលឿនជាងសំឡេងដែលប្រើប្រាស់ម៉ាស៊ីនស្រូបឧស្ម័នធម្មជាតិ (HAWC)។

ក្នុងការធ្វើតេស្ត កំណែមីស៊ីលរបស់ក្រុមហ៊ុន Lockheed Martin បំពាក់ម៉ាស៊ីន Sramjet Aerojet Rockedtdyne ដែលមានតួនាទីបង្ហាប់ឧស្ម័នជាបន្តបន្ទាប់ដើម្បីផ្លាស់ទីក្នុងល្បឿនលឿនជាងសំឡេង បានទទួលជោគជ័យគ្រប់គោលដៅដំបូងរបស់កម្មវិធី។

«ការសាកល្បងនេះរបស់ HAWC នឹងផ្ដល់ទិន្នន័យសំខាន់សម្រាប់ការប្រឹងប្រែងអភិវឌ្ឍបច្ចេកវិទ្យាល្បឿនលឿនជាងសំឡេងរបស់មជ្ឈមណ្ឌលស្រាវជ្រាវទ័ពអាកាស (AFRL)» DARPA ឱ្យដឹងដូច្នេះ។

កំណែគំរូនៃមីស៊ីលល្បឿនលឿនជាងសំឡេង HAWC ដែលផលិតដោយ Lockheed Martin អាចហោះហើរក្នុងល្បឿន Mach 5 (លឿនជាងសំឡេង 5 ដង), កម្ពស់ជាង 18,000 ម៉ែត្រ និងរយៈចម្ងាយជាង 555 គីឡូម៉ែត្រ នៅក្នុងការធ្វើតេស្តចុងក្រោយ។ យោងតាម DARPA ការសាកល្បងនេះបានបង្ហាញថា សមត្ថភាព និងប្រសិទ្ធភាពរបស់មីស៊ីលគំរូ HAWC បានសម្រេចជាស្ថាពរ។

កម្មវិធី HAWC កំពុងឈានចូលដល់ដំណាក់កាលចុងក្រោយ ហើយគ្រប់ភាគីដែលចូលរួមកំពុងវិភាគទិន្នន័យដែលបានពីការសាកល្បង និងនៅតែមានឱកាសក្នុងការកែលំអបច្ចេកវិទ្យាបន្ថែមទៀត។ ក្រោយពីកម្មវិធី HAWC បានបញ្ចប់ សហរដ្ឋអាម៉េរិកមានមីស៊ីលល្បឿនលឿនជាងសំឡេងពីរប្រភេទដែលត្រូវអភិវឌ្ឍឱ្យបានពេញលេញ និងកែលំអបន្ថែមទៀតនាពេលអនាគត ក្នុងនោះ មួយប្រភេទគឺជារបស់ Lockheed Martin និងមួយទៀតគឺជារបស់ Raytheon។

DARPA បានរៀបគម្រោងអភិវឌ្ឍពេញលេញនូវអាវុធគំរូដែលមានល្បឿនលឿនជាងសំឡេងក្នុងកម្មវិធី «បន្ថែមឱកាសជាមួយនឹង HAWC (MOHAWC)» ដែលក្នុងនោះមានទាំងការច្នៃ និងសាកល្បងមធ្យោបាយដែលមានល្បឿនលឿនជាងសំឡេងដោយយោងទៅតាមបច្ចេកវិទ្យារបស់ HAWC។ មធ្យោបាយ ឬមីស៊ីលទាំងនេះនឹងក្លាយជាគ្រឹះសម្រាប់ការអភិវឌ្ឍអាវុធទំនើបៗនាពេលអនាគត។

កាលពីឆ្នាំ 2021 អតីតឧត្ដមសេនីយ៍យោធាអាម៉េរិកមួយរូបបានទទួលស្គាល់ថា អាម៉េរិកដើរមិនទាន់សភាពការណ៍បច្ចុប្បន្ន បើធៀបនឹងរុស្ស៊ី និងចិន ទាក់ទិននឹងអាវុធល្បឿនលឿនជាងសំឡេង។ អតីតមន្ត្រីយោធារូបនេះអះអាងថា អាម៉េរិកនឹងត្រូវការពេលច្រើនឆ្នាំ ហើយត្រូវចំណាយធនធានច្រើនដើម្បីដណ្ដើមបានតួនាទីនាំមុខគេនៅក្នុងវិស័យនេះ៕

January 31, 2023

ក្មួយបង្កើតរបស់ «ស្ដេចចម្រៀងប៉ប់» សម្ដែងជាតួអង្គឯកក្នុងភាពយន្តស្ដីពី Michael Jackson

Jaafar Jackson ដែលជាក្មួយប្រុសរបស់ Michael Jackson សម្ដែងជាតួអង្គឯកក្នុងភាពយន្តស្ដីពីជីវប្រវត្តិរបស់អតីតស្ដេចចម្រៀងប៉ប់។

កាលពីថ្ងៃទី 31 មករា ប្រភពព័ត៌មានរបស់ទំព័រ Variety បានឱ្យដឹងថា ក្រុមបុគ្គលិកធ្វើការក្នុងគម្រោងថតភាពយន្តរឿង Michael របស់អ្នកដឹកនាំរឿង Antoine Fuqua បានជ្រើសរើសអ្នកសម្ដែងសម្រាប់តួអង្គម្ចាស់បទចម្រៀង Thriller រួចហើយ។ Jaafar Jackson ជាកូនប្រុសរបស់ Jermaine Jackson ដែលជាបងប្រុសរបស់សពលោក Michael Jackson នឹងសម្ដែងជាតួអង្គឯកក្នុងរឿងនេះ។

អ្នកស្រី Katherine ដែលជាម្ដាយរបស់ Michael Jackson ឱ្យដឹងថា «ចៅ Jaafar ដូចកូនប្រុសរបស់ខ្ញុំ។ ពិតជាអស្ចារ្យនៅពេលបានឃើញចៅបន្តប្រពៃណីរបស់គ្រួសារនៅក្នុងវិស័យសិល្បៈ»។

គម្រោងផលិតភាពយន្តខាងលើត្រូវបានអនុវត្តដោយផលិតកម្ម Liongates និងអង្គការគ្រប់គ្រងកេរដំណែល Michael Jackson។ នេះគឺជាភាពយន្តខ្នាតធំដំបូងដែល Jaafar Jackson សម្ដែងជាតួអង្គឯក។ មុននោះ គាត់ធ្លាប់បានចូលរួមថត MV និងកម្មវិធីទូរទស្សន៍មួយចំនួន។

ផលិតករភាពយន្ត Graham King ដែលល្បីឈ្មោះដោយសារបទចម្រៀង Bohemian Rhapsody បានឱ្យដឹងថា «ខ្ញុំបានជួប Jaafar កាលពីជាងពីរឆ្នាំមុន និងភ្ញាក់ផ្អើលណាស់នៅពេលបានឃើញគាត់មានបុគ្គលិកលក្ខណៈ អាកប្បកិរិយាល្អដូច Michael។ យើងឃើញថា បើទោះស្វែងរកជុំវិញពិភពលោកក៏នៅតែរកមិនឃើញមនុស្សដែលសមស្របជាង Jaafar សម្រាប់ការសម្ដែងជាតួអង្គមួយនេះ»។

អ្នកដឹកនាំរឿង Antoine Fuqua ពេញចិត្តជាមួយនឹងការជ្រើសរើសអ្នកសម្ដែងជាតួអង្គឯកខាងលើ ៖ «ពិតជារំភើបណាស់ពេលបានឃើញ Jaafar សម្ដែងជា Michael នៅលើអេក្រង់។ មានការភ្ជាប់ទំនាក់ទំនងពិសេសស្ដីពីអារម្មណ៍រវាងគាត់ និងឪពុកមារបស់គាត់»។

លោក Michael Jackson កើតឆ្នាំ 1958 និងទទួលមរណភាពក្នុងឆ្នាំ 2009

ភាពយន្តរឿង Michael និយាយអំពីជីវភាពរស់នៅរបស់អតីតស្ដេចចម្រៀងប៉ប់ លោក Michael Jackson។ ក្រុមផលិតករបានឱ្យដឹងថា នឹងផ្ដោតសំខាន់ទៅលើការសម្ដែងនានាដែលជាឈុតឆាកពិសេស និងជានិមិត្តរូប ដើម្បីបង្ហាញអំពីផ្លូវឆ្ពោះទៅរកដំណាក់កាលក្លាយជាតារាចម្រៀង និងសម្ដែងអស្ចារ្យបំផុតមួយរូបនៅគ្រប់សម័យកាលរបស់ Michael Jackson។

បទ They Don’t Care About Us (Brazil Version) របស់ Michael Jackson មានអ្នកមាន 978 លានលើក

លោក Michael Jackson កើតឆ្នាំ 1958 និងទទួលមរណភាពក្នុងឆ្នាំ 2009 គឺជាសិល្បករមួយរូបក្នុងចំណោមសិល្បករដែលជោគជ័យបំផុតក្នុងប្រវត្តិសាស្ត្រតន្ត្រី ដោយមានចម្រៀងចំនួន 350 លានថាសត្រូវបានលក់ និងមាន 13 ថាសឈរលើកំពូលតារាងចំណាត់ថ្នាក់របស់ Billboard។ អតីតស្ដេចចម្រៀងប៉ប់ Michael Jackson ធ្លាប់ទទួលបានពានរង្វាន់ Grammy ចំនួន 13 លើក និងពាន AMAs សម្រាប់សិល្បករឆ្នើមប្រចាំសតវត្សរ៍ និងពានរង្វាន់ Bambi សម្រាប់តារាចម្រៀងប៉ប់ឆ្នើមប្រចាំសហស្សវត្សរ៍៕

January 31, 2023

អារ៉ាប៊ីសាអូឌីត វិនិយោគប្រាក់ជាង 266 ពាន់លានដុល្លារសម្រាប់វិស័យថាមពលស្អាត

អាជ្ញាធរអារ៉ាប៊ីសាអូឌីត ប្ដេជ្ញាចិត្តជំរុញការផលិតឥន្ធនៈអ៊ីដ្រូសែន និងពង្រីកបណ្ដាញអគ្គិសនីបៃតងដើម្បីចូលរួមកាត់បន្ថយការបំភាយឧស្ម័នកាបូន។

«យើងប្ដេជ្ញាក្លាយជាអ្នកនាំចេញអ៊ីដ្រូសែនធំជាងគេមួយ ក៏ដូចជាផ្គត់ផ្គង់អ៊ីដ្រូសែនស្អាតក្នុងស្រុកនៅក្នុងវិស័យឧស្សាហកម្មធុនធ្ងន់ដើម្បីបង្កើតផលិតផលបៃតង មានជាអាទិ៍ ដែកថែបបៃតង អាលុយមីញូមបៃតង ជីសម្រាប់ដំណាំ និងបណ្ដាផលិតផលដទៃទៀតក្នុងតម្លៃសមរម្យ» ព្រះអង្គម្ចាស់ Abdulaziz bin Salman រដ្ឋមន្ត្រីក្រសួងថាមពលអារ៉ាប៊ីសាអូឌីត ថ្លែងកាលពីថ្ងៃទី 30 មករា នៅក្នុងវេទិកា IKTVA នៅ Dhahran ដែលរៀបចំដោយក្រុមហ៊ុនប្រេង Aramco។

ព្រះអង្គម្ចាស់ Salman ក៏បានឱ្យដឹងថា ខ្ទង់ប្រាក់វិនិយោគតម្លៃជាង 1 ទ្រីលានរីយ៉ាល់ (266.4 ពាន់លានដុល្លារអាម៉េរិក) ក៏ត្រូវបានចំណាយក្នុងបំណងពង្រីក និងធ្វើទំនើបកម្មបណ្ដាញចែកចាយអគ្គិសនី ហើយចុងក្រោយអាចនាំចេញទៅបរទេស។

អារ៉ាប៊ីសាអូឌីតក៏បានកំណត់គោលដៅបង្កើនឱ្យបានទ្វេដងនូវដំណោះស្រាយប្រមូលយកកាបូនផងដែរ។ «យើងនឹងមិនសាងសង់រោងចក្រអគ្គិសនីថ្មីដែលមិនមានប្រព័ន្ធប្រមូលយកកាបូននៅអនាគត»។

បើទោះជាបានកំណត់គោលដៅបំភាយឧស្ម័នកាបូនស្មើនឹងសូន្យនៅឆ្នាំ 2060 ប៉ុន្តែ អារ៉ាប៊ីសាអូឌីត នៅតែពឹងផ្អែកច្រើនទៅលើការនាំចេញប្រេងឆៅ ដែលបានជួយឱ្យប្រទេសនេះរីកចម្រើនអស់ជាច្រើនទសវត្សរ៍ ធ្វើឱ្យមានការមន្ទិលសង្ស័យទាក់ទងនឹងសក្ដានុពលក្នុងការស្ថាបនាឡើងវិញនូវខឿនសេដ្ឋកិច្ចរបស់ប្រទេសនេះក្នុងពេលខាងមុខ។

តម្លៃប្រេងឆៅដែលកើនឡើងខ្ពស់ខ្លាំងដោយសារតែសង្គ្រាមរវាងរុស្ស៊ី និងអ៊ុយក្រែន បានអនុញ្ញាតឱ្យអារ៉ាប៊ីសាអូឌីត សម្រេចបានអតិរេកថវិកាជាតិជាលើកដំបូងក្នុងអំឡុង 9 ឆ្នាំ កាលពីឆ្នាំ 2022 និងបាននាំមកនូវអំណាចផ្នែកហិរញ្ញវត្ថុដល់ប្រទេសនេះដើម្បីអភិវឌ្ឍសេដ្ឋកិច្ចជាតិ៕

January 31, 2023

កីឡាករប្រេស៊ីល Dani Alves បញ្ចេញមតិលើកដំបូង ពេលជាប់ពន្ធនាគារ

ខ្សែការពារ Dani Alves បានបញ្ចេញមតិជាលើកដំបូង បន្ទាប់ពីត្រូវជាប់ពន្ធនាគារព្រោះតែការចោទប្រកាន់ពីបទបំពានផ្លូវភេទ។

មុននេះមិនយូរប៉ុន្មាន អតីតខ្សែការពាររបស់ Barcelona កីឡាករ Dani Alves ត្រូវបានចាប់ខ្លួនក្រោមហេតុផលរំលោភបំពានផ្លូវភេទលើស្ត្រីម្នាក់នៅក្នុងបន្ទប់ទឹកនៅក្លឹបរាត្រី។ តុលាការជាន់ខ្ពស់នៅទីក្រុង Barcelona ក៏បានចេញបញ្ជាឱ្យឃុំខ្លួនដោយមិនមានការធានាចំពោះកីឡាករប្រេស៊ីលរូបនេះផងដែរ។

ថ្មីៗនេះ កាលពីថ្ងៃទី 29 មករា កីឡាករជម្រើសជាតិប្រេស៊ីល Alves បានបញ្ចេញមតិជាលើកដំបូង រាប់ចាប់តាំងពីបានចូល «រាប់ថ្ងៃខែ» នៅមន្ទីរឃុំខាំង។ គាត់អះអាងថា «ក្នុងដំណាក់កាលនេះ Dani Alves គឺជាមនុស្សម្នាក់ផ្សេងទៀត។ ខ្ញុំទទួលយកគ្រប់បញ្ហាដែលនឹងកើតឡើង»។

«ខ្ញុំចាកចោលផ្ទះតាំងពីអាយុ 15 ឆ្នាំ ហើយបានឆ្លងកាត់រឿងរ៉ាវអាក្រក់ជាច្រើនក្នុងជីវិត។ នេះគឺជាឧបសគ្គមួយផ្សេងទៀតដែលខ្ញុំត្រូវឆ្លងកាត់។ ខ្ញុំមិនខ្លាចអ្វីទាំងអស់» Alves រៀបរាប់។

បើទោះជាត្រូវជាប់ពន្ធនាគារ ប៉ុន្តែកីឡាករវ័យ 39 ឆ្នាំនេះនៅតែអាចលេងបាល់ ហើយគាត់ទើបតែបានចូលរួមប្រកួតដំបូងនៅមន្ទីរឃុំឃាំង Brians 2។ នៅទីនេះ មនុស្សជាច្រើនចង់ឃើញ និងចង់លេងបាល់ជាមួយ Dani Alves ព្រោះថា ភាពល្បីល្បាញរបស់គាត់គឺជាប្រការដែលមិនអាចបដិសេធបាន។

ក្នុងរឿងក្ដីនេះ មេធាវីរបស់ Alves កំពុងប្រឹងប្រែងដើម្បីឱ្យកូនក្ដីឆាប់បាននៅក្រៅឃុំ។ ប៉ុន្តែ បើសិនជាបាននៅក្រៅឃុំ Alves ក៏នឹងត្រូវពាក់ខ្សែដៃអេឡិចត្រូនិចរបស់ប៉ូលិស ដើម្បីឱ្យប្រាកដថា គាត់មិនអាចចាកចេញពីប្រទេសអេស្ប៉ាញ។

មុននោះ Dani Alves បានបដិសេធការចោទប្រកាន់ ប៉ុន្តែក្រោយមកក៏បានសារភាពនូវអំពើដែលគាត់បានធ្វើ ដោយសារតែសមត្ថកិច្ចមានភស្ដុតាងគ្រប់គ្រាន់។ ក្នុងករណីអាក្រក់បំផុត បើសិនជាត្រូវបានកាត់ទោសពីបទរំលោភសេពសន្ថវៈ Dani Alves អាចនឹងត្រូវដេករាប់ថ្ងៃខែរហូតដល់ 18 ឆ្នាំ៕

January 31, 2023

អាជ្ញាធរខេត្តរុស្ស៊ី ប្រកាសផ្ដល់រង្វាន់ដល់ទាហានដែលចាប់បានរថក្រោះលោកខាងលិច

ទាហានរុស្ស៊ីអាចទទួលបានប្រាក់ឡើងដល់ 43,000 ដុល្លារអាម៉េរិក បើសិនដណ្ដើមបានរថក្រោះ Leopard មួយគ្រឿងដែលនៅដំណើរការបាន ពីសត្រូវនៅលើទឹកដីអ៊ុយក្រែន។

លោក Alexander Osipov អភិបាលខេត្ត Zabaikalsky នៅភាគខាងកើតប្រទេសរុស្ស៊ី បានសន្យាផ្ដល់រង្វាន់ដល់បណ្ដាទាហានរបស់ខេត្តនេះ បើសិនពួកគេដណ្ដើមបាន ឬកម្ទេចបានរថក្រោះរបស់ណាតូនៅអ៊ុយក្រែន។ ប្រកាសនេះត្រូវបានធ្វើឡើងបន្ទាប់ពីក្រុមហ៊ុនឯកជនមួយរបស់រុស្ស៊ី ក៏បានសន្យាផ្ដល់ប្រាក់រង្វាន់ដូចគ្នានេះដល់អ្នកទាំងឡាយណាដែលដណ្ដើមបានរថក្រោះដែលផលិតដោយលោកខាងលិច។

អភិបាលខេត្តខាងលើប្រកាសថា អ្នកទាំងឡាយណាដែលដណ្ដើមបានរថក្រោះ Leopard មួយគ្រឿងដែលនៅដំណើរការបាន អាចទទួលបានប្រាក់រង្វាន់ 3 លានរូប្លរុស្ស៊ី (42,909 ដុល្លារអាម៉េរិក)។ ប្រាក់រង្វាន់ 14,303 ដុល្លារអាម៉េរិក នឹងត្រូវបានប្រគល់ឱ្យអ្នកដែលបានកម្ទេចរថក្រោះមួយគ្រឿងរបស់អាល្លឺម៉ង់នៅអ៊ុយក្រែន។ ចំណែកអ្នកដែលជួយដណ្ដើមបានជោគជ័យនឹងទទួលបាន 7,150 ដុល្លារអាម៉េរិក ហើយអ្នកជួយកម្ទេចរថក្រោះ Leopard បានមួយគ្រឿងនឹងទទួលបាន 2,240 ដុល្លារអាម៉េរិក។

ប្រាក់រង្វាន់ 21,450 ដុល្លារអាម៉េរិក នឹងត្រូវបានប្រគល់ឱ្យអ្នកណាដែលដណ្ដើមបានរថក្រោះអាម៉េរិក M1 Abrams មួយគ្រឿង បើសិនកម្ទេចបានរថក្រោះនេះនឹងទទួលបាន 7,150 ដុល្លារ។

លោក Osipov បញ្ជាក់ថា ទាហានដែលកំពុងរកវិធីដើម្បីកម្ទេច ឬដណ្ដើមរថក្រោះរបស់បស្ចិមលោកនៅអ៊ុយក្រែន ដំបូងបង្អស់ត្រូវតែធ្វើសកម្មភាពដើម្បី «ការពារអាយុជីវិត និងសុខភាពផ្ទាល់ខ្លួន»។

កាលពីសប្ដាហ៍កន្លងទៅ អាល្លឺម៉ង់ បានប្រកាសថា នឹងផ្ដល់ឱ្យទីក្រុងកៀវនូវរថក្រោះ Leopard 2 ចំនួន 14 គ្រឿង និងអនុញ្ញាតឱ្យបណ្ដាប្រទេសនៅអឺរ៉ុប នាំចេញរថក្រោះនេះទៅកាន់អ៊ុយក្រែន។ នាយករដ្ឋមន្ត្រី Olaf Scholz ប្រកាសថា អាល្លឺម៉ង់ និងដៃគូសហការកំពុងរកវិធីដើម្បីផ្គត់ផ្គង់រថក្រោះ Leopard 112 គ្រឿងទៅឱ្យអ៊ុយក្រែន។

ចំណែកសហរដ្ឋអាម៉េរិកវិញ ក៏បានសន្យាផ្ដល់រថក្រោះ Abrams ចំនួន 31 គ្រឿងដល់ទីក្រុងកៀវ ប៉ុន្តែរថក្រោះទាំងនេះត្រូវបានគេជឿថា នឹងមិនអាចបញ្ជូនទៅកាន់សមរភូមិបានឡើយ រហូតដល់ចុងឆ្នាំនេះ។

រុស្ស៊ីអះអាងថា ការផ្ដល់អាវុធទៅឱ្យអ៊ុយក្រែន បង្ហាញថា ណាតូ កំពុងចូលរួមប្រយុទ្ធ ហើយថា ប្រការនេះនឹងធ្វើឱ្យសង្គ្រាមនៅអ៊ុយក្រែនអូសបន្លាយកាន់តែយូរ៕

January 31, 2023

Kylian Mbappe លេងធំ «សួរនាំទិញយន្តហោះផ្ទាល់ខ្លួន» របស់ Cristiano Ronaldo

ក្រោយការប្រើប្រាស់អស់មួយរយៈពេល Ronaldo សម្រេចចិត្តពពាយនាយលក់យន្តហោះល្បឿនលឿន Gulfstream G200 ហើយ Mbappe ទំនងជានឹងបានក្លាយជាម្ចាស់ថ្មីរបស់យន្តហោះនេះ។

ឆ្នាំ 2015 Ronaldo បានទិញយន្តហោះ Gulfstream G200 ក្នុងតម្លៃ 20 លានអឺរ៉ូ។ នេះគឺជាយន្តហោះខ្នាតតូចអាចដឹកមនុស្សបានពី 8 ដល់ 10 នាក់ និងមានល្បឿន 901 គីឡូម៉ែត្រ/ម៉ោង រួមនឹងមានសម្ភារៈជាច្រើនផ្សេងទៀត មានដូចជា wifi ចង្ក្រានដោយឡែក និងគ្រែសម្រាប់សម្រាកជាដើម។

ក៏ប៉ុន្តែ ដោយសារតែពេលនេះគ្រួសាររបស់ Ronaldo មានសមាជិកច្រើនជាងមុន ដូច្នេះ Gulfstream G200 លែងសមស្របទៀតហើយ។ ហេតុនេះកំពូលតារាបាល់ទាត់របស់ព័រទុយហ្កាល់ ក៏បានសម្រេចចិត្តពពាយនាយលក់យន្តហោះនេះ។

តម្លៃលក់របស់យន្តហោះប្រណីត Gulfstream G200 នេះ មិនទាន់ត្រូវបានបង្ហើបឱ្យដឹងនៅឡើយ ប៉ុន្តែ វាអាចមានតម្លៃពី 12 លាន ទៅ 16 លានអឺរ៉ូ។ ម្ចាស់បន្ទាប់របស់ Gulfstream G200 អាចជា Mbappe ដែលជាកីឡាករបារាំងរបស់ក្លឹប PSG។ Mabappe គឺជាអ្នកគាំទ្រតាំងពីតូចរបស់ Cristiano Ronaldo ដូច្នេះ នៅពេល CR7 ពពាយនាយលក់យន្តហោះនេះ Mbappe ក៏ប្រញាប់សួរនាំរកទិញភ្លាម។

តាមគម្រោង បន្ទាប់ពីលក់យន្តហោះ Gulfstream G200 Ronaldo នឹងងាកទៅទិញ Gulfstream G650 ដែលមានតម្លៃប្រហែល 65 លានដុល្លារអាម៉េរិក ជាយន្តហោះដែលមានកៅអីចំនួន 18 និងធំទូលាយ។

Ronaldo បច្ចុប្បន្នលេងឱ្យក្លឹប Al Nassr របស់អារ៉ាប៊ីសាអូឌីត បន្ទាប់ពីបានចាកចេញពី Man United ក្រោយការប្រកួតនៅ World Cup 2022។ នៅឯក្លឹប Al Nassr CR7 ទទួលបានប្រាក់បៀវត្សរ៍ 200 លានដុល្លារអាម៉េរិក៕

January 30, 2023

Author: សឿន សំណាង