សឿន សំណាង - La Reine Media

Tom Cruise នៅតែចង់ថតឈុតផ្សងគ្រោះថ្នាក់ដល់អាយុ 100 ឆ្នាំ

កំពូលតារាសម្ដែង Tom Cruise និយាយថា នៅតែចង់សម្ដែងក្នុងឈុតឆាកផ្សងគ្រោះថ្នាក់ មានដូចជាការលោតចុះពីភ្នំជាដើម បើទោះមានអាយុ 80 ឬ 100 ឆ្នាំក៏ដោយ។

ក្នុងកម្មវិធី Jimmy Kimmel Live កាលពីថ្ងៃទី 26 កុម្ភៈ Tom Cruise ត្រូវបានគេសួរថា «តើនឹងបន្តសម្ដែងក្នុងឈុតផ្សងគ្រោះថ្នាក់ លោតពីភ្នំទៀតទេ នៅពេលមានអាយុ 80 ឬ 100 ឆ្នាំ?»។

លោក Tom Cruise ថ្លែងថា «នោះគឺជាអ្វីដែលខ្ញុំប៉ង។ ខ្ញុំបានធ្វើកិច្ចការនេះពេញមួយជីវិតហើយ… ខ្ញុំជាក្មេងដែលឡើងលើដំបូលផ្ទះពេលមានអាយុ 4 ឆ្នាំ ព្រោះតែចូលចិត្តមើលមេឃ ពពក និងដួងតារា»។

ក្នុងពេលថតរឿង Mission: Impossible 7 លោក Tom Cruise និយាយថា គាត់នៅតែសម្ដែងដោយផ្ទាល់ខ្លួននូវទិដ្ឋភាពផ្សងគ្រោះថ្នាក់ ដូចជាបើកម៉ូតូហោះធ្លាក់ទៅលើជ្រោះជ្រៅជាដើម។ គាត់ត្រូវសម្ដែងសកម្មភាពនេះរហូតដល់ 8 លើក។ «ខ្ញុំមានពេលតែ 6 វិនាទីប៉ុណ្ណោះដើម្បីបើកឆត្រ មុនពេលធ្លាក់ដល់ដី» Tom Cruise និយាយដូច្នេះ។ ដើម្បីធ្វើបានដូច្នេះ គាត់ត្រូវហាត់សមយ៉ាងលំបាក ក្នុងនោះគាត់បានលោកឆត្រយោង 13,000 លើក និងរៀនប្រណាំងម៉ូតូ។ល។

ឈុតឆាកផ្សងគ្រោះថ្នាក់ធំបំផុតរបស់ Tom Cruise ក្នុងពេលថតរឿង Mission: Impossible – Dead Reckoning Part One

ក្រុមអ្នកផលិតភាពយន្តក៏ត្រូវធ្វើកិច្ចការជាច្រើនដើម្បីធានាថា កំពូលតារាសម្ដែងរូបនេះមិនជួបគ្រោះថ្នាក់ក្នុងពេលថតរឿង។

ក្នុងអាជីព Tom Cruise តែងសម្ដែងក្នុងឈុតផ្សងគ្រោះថ្នាក់ដោយខ្លួនឯង មិនចាំបាច់មានអ្នកសម្ដែងជំនួស។ គាត់ធ្លាប់លោតពីយន្តហោះដែលមានកម្ពស់ 7,620 ម៉ែត្រ តោងឡើងកង្កេះភ្នំកម្ពស់ប្រហែល 610 ម៉ែត្រ និងឡើងអគារ Burj Khalifa កម្ពស់ជាង 518 ម៉ែត្រ។ កាលពីឆ្នាំ 2018 ពេលថតរឿង Mission Impossible – Fallout គាត់ត្រូវរងរបួសពេលលោតពីអគារមួយទៅអគារមួយ។

ក្នុងវ័យ 60 ឆ្នាំ Tom Cruise នៅតែហាត់ប្រាណ លើកដុំដែក និងធ្វើការហាត់ខ្លាំង។ បច្ចុប្បន្ន គាត់កំពុងថតរឿង Mission: Impossible 8។ Tom Cruise ក៏មានគម្រោងថតភាពយន្តដែលមានទិដ្ឋភាពអវកាសផងដែរ ដោយគាត់នឹងដើរក្នុងអវកាសដូចទៅនឹងអវកាសចរចេញជួសជុលស្ថានីយអវកាសអន្តរជាតិ។ នេះបើតាម Cinemablend៕

February 28, 2023

TikTok របស់ចិនជួបគ្រោះធំ! សេតវិមានចេញឱសានវាទស្ដីពីការលុបបណ្ដាញសង្គមនេះ

សេតវិមានបានចេញកាលបរិច្ឆេទ 30 ថ្ងៃដើម្បីឱ្យស្ថាប័នរដ្ឋស្វែងរក និងធានាថាមិនមានកម្មវិធី TikTok នៅលើឧបករណ៍ និងប្រព័ន្ធនានារបស់រដ្ឋាភិបាលសហព័ន្ធ។

ដើម្បីធានាសុវត្ថិភាពចំពោះទិន្នន័យរបស់សហរដ្ឋអាម៉េរិក ស្ថាប័នរដ្ឋទាំងអស់ត្រូវតែលុប TikTok ចេញពីទូរស័ព្ទ និងប្រព័ន្ធនានា ទប់ស្កាត់បណ្ដាញអ៊ីនធើណិតទៅកាន់បណ្ដាញសង្គមនេះ។ នេះបើតាម Shalanda Young ប្រធានការិយាល័យគ្រប់គ្រង និងថវិការបស់សហរដ្ឋអាម៉េរិក (OMB) ឱ្យដឹងកាលពីថ្ងៃទី 27 កុម្ភៈ។

បទបញ្ជានេះមិនអនុវត្តចំពោះសកម្មភាពស្រាវជ្រាវផ្នែកសន្តិសុខ ការអនុវត្តច្បាប់ សន្តិសុខជាតិ ប៉ុន្តែត្រូវការការអនុញ្ញាតពីប្រធានស្ថាប័ន។ ចំណែកស្ថាប័នដែលមិនពាក់ព័ន្ធនឹងរដ្ឋាភិបាលអាម៉េរិក និងប្រជាជនមិនរងឥទ្ធិពលពីបទបញ្ជាថ្មីនេះទេ។

ប្រធានអង្គភាពការពារទិន្នន័យសហព័ន្ធ Chris DeRusha បានថ្លែងថា បទបញ្ជានេះ «ស្ថិតក្នុងការសន្យារបស់វ៉ាស៊ីងតោនស្ដីពីការការពារហេដ្ឋារចនាសម្ព័ន្ធឌីជីថល ក៏ដូចជាឯកជនភាព សន្តិសុខសម្រាប់ប្រជាពលរដ្ឋអាម៉េរិក»។

ក្រុមហ៊ុន TikTok មិនទាន់មានប្រតិកម្មអ្វីនៅឡើយចំពោះអនុស្សរណៈរបស់ OMB។ ByteDance ដែលជាក្រុមហ៊ុនមេរបស់ TikTok កន្លងមកធ្លាប់បានបដិសេធច្រើនដងចំពោះការចោទថាប្រើប្រាស់បណ្ដាញសង្គមនេះដើម្បីតាមដានពលរដ្ឋអាម៉េរិក និងយល់ថា បណ្ដាព័ត៌មានមិនពិតបណ្ដាលឱ្យមានការព្រួយបារម្ភកើនឡើង។

កាលពីខែធ្នូ 2022 សភាអាម៉េរិកបានអនុម័តសេចក្ដីព្រាងច្បាប់ស្ដីពីការហាមបុគ្គលិករដ្ឋប្រើប្រាស់ TikTok នៅលើឧបករណ៍នានារបស់រដ្ឋាភិបាល។ ថ្ងៃនេះ គណៈកម្មការកិច្ចការបរទេសរបស់សភាជាន់ទាបអាម៉េរិកនឹងបោះឆ្នោតអនុម័តសេចក្ដីព្រាងច្បាប់មួយដែលអនុញ្ញាតិឱ្យប្រធានាធិបតី បៃដិន មានសិទ្ធិហាម TikTok នៅលើឧបករណ៍ទាំងអស់នៅសហរដ្ឋអាម៉េរិក៕

February 28, 2023

ការស្រាវជ្រាវបង្ហាញថា ទម្លាប់ដេកដែលត្រឹមត្រូវនឹងជួយឱ្យអាយុវែងថែម 5 ឆ្នាំ

(សហរដ្ឋអាម៉េរិក) – ការសិក្សាស្រាវជ្រាវថ្មីបានបង្ហាញឱ្យឃើញថា ការគោរពតាមទម្លាក់ដេក 8 ម៉ោង/ថ្ងៃ ងាយដេកលក់ អារម្មណ៍ល្អពេលក្រោកពីដេក និងមិនលេបថ្នាំជាដើម អាចជួយបង្កើនអាយុបាន 5 ឆ្នាំបន្ថែមទៀត។

លទ្ធផលនៃការសិក្សាស្រាវជ្រាវនេះត្រូវបានអធិប្បាយនៅក្នុងកិច្ចប្រជុំប្រចាំឆ្នាំរបស់សាកលវិទ្យាល័យបេះដូងអាម៉េរិក កាលពីថ្ងៃទី 23 កុម្ភៈ 2023។

វេជ្ជបណ្ឌិត Frank Qian មកពីមជ្ឈមណ្ឌលសុខាភិបាល Beth Israel Deaconess និងជាវេជ្ជបណ្ឌិតប្រចាំសាលាពេទ្យ Harvard បានឱ្យដឹងថា ទម្លាប់ដេកដ៏ល្អនឹងជួយឱ្យគ្រប់គ្នារស់បានយូរ។ «បើសិនអាចកែលំអដំណេកឱ្យបានគ្រប់ជ្រុងជ្រោយ និងដឹងច្បាស់អំពីស្ថានភាពពិបាកដេក យើងនឹងអាចទប់ស្កាត់បាននូវករណីឆាប់ស្លាប់» លោកវេជ្ជបណ្ឌិត Frank Qian ថ្លែងដូច្នេះ។

យោងតាម Raj Dasgupta សាស្ត្រាចារ្យរងផ្នែកវេជ្ជសាស្ត្រប្រចាំមហាវិទ្យាល័យ Keck នៃសាកលវិទ្យាល័យ California ខាងត្បូង ក្រៅពីការដេកគ្រប់គ្រាន់ និងមានគុណភាព គ្រប់គ្នាក៏គួររក្សាទម្លាប់ដេក ពេលវេលាដេក និងរយៈពេលដេកឱ្យបានស៊ីចង្វាក់គ្នា។ នេះគឺជាទម្លាប់ដែលជួយកាត់បន្ថយការកើតជំងឺបេះដូង។

លទ្ធផលនៃការស្រាវជ្រាវនេះត្រូវបានធ្វើឡើងដោយការវិភាគទិន្នន័យពីតារាងចម្លើយដែលបានមកពីអ្នកស្ម័គ្រចិត្តជាង 172,000 នាក់ រាប់ចាប់ពីឆ្នាំ 2013 ដល់ 2018។ នេះក៏ជាផ្នែកមួយនៃការស្ទង់មតិថ្នាក់ជាតិស្ដីពីសុខភាពដែលអនុវត្តដោយមជ្ឈមណ្ឌលគ្រប់គ្រង និងទប់ស្កាត់ជំងឺឆ្លង (CDC) និងមជ្ឈមណ្ឌលជាតិស្ថិតិសុខាភិបាលរបស់សហរដ្ឋអាម៉េរិក។

ការសិក្សាស្រាវជ្រាវក៏បានបង្ហាញថា បុរសដែលបានគោរពអនុវត្តទម្លាប់ដេកត្រឹមត្រូវ មានអាយុវែងជាង 4.7 ឆ្នាំ ធៀបនឹងមនុស្សដែលមិនមានទម្លាប់ដេកល្អ។ ចំណែកស្ត្រីវិញ តួលេខនេះមានកម្រិតទាបជាងឆ្ងាយ (2.4 ឆ្នាំ)៕

February 28, 2023

កប៉ាល់បើកបរស្វ័យប្រវត្តដំណើរការដោយអ៊ីដ្រូសែនរាវដំបូងគេលើពិភពលោក

ក្រុមហ៊ុន HI-FIVED របស់អង់គ្លេស ទើបតែទទួលបានថវិកាឧបត្ថម្ភ 6.46 លានដុល្លារអាម៉េរិកពីរាជរដ្ឋាភិបាលដើម្បីអភិវឌ្ឍកប៉ាល់អ៊ីដ្រូសែន ក្នុងបំណងបន្សាបកាបូននៅក្នុងវិស័យដឹកជញ្ជូនតាមផ្លូវទឹក។

យោងតាមការពិពណ៌នានៅលើគេហទំព័ររបស់ HI-FIVED កប៉ាល់ដែលមានឈ្មោះថា H-USV នឹងអាចផ្ទុកទំនិញបាន 4.5 តោន ផ្លាស់ទីក្នុងល្បឿន 7.4 គីឡូម៉ែត្រ/ម៉ោង ហើយអាចធ្វើដំណើរជាបន្តបន្ទាប់ពី 40 ទៅ 60 ថ្ងៃ។ នេះគឺជាកប៉ាល់បើកបរស្វ័យប្រវត្តដំណើរការដោយអ៊ីដ្រូសែនរាវដំបូងគេលើពិភពលោក។ ការប្រើប្រាស់អ៊ីដ្រូសែនធ្វើជាឥន្ធនៈនឹងជួយកាត់បន្ថយបរិមាណឧស្ម័យកាបូនបានរហូតដល់ 99.1% នៅក្នុងវិស័យដឹកជញ្ជូន។ នេះបើតាម Interesting Engineering ចុះផ្សាយកាលពីថ្ងៃទី 27 កុម្ភៈ 2023។

H-USV ប្រើប្រាស់សេនសឺរបរិស្ថាន និងបញ្ញាសិប្បនិម្មិតដើម្បីវិភាគទិន្នន័យ ស្វែងរកការគំរាមកំហែង ឬឧបសគ្គ និងសម្រេចចិត្តក្នុងពេលវេលាជាក់ស្ដែង។

ក្រុមហ៊ុន Unitrove មានទីស្នាក់ការកណ្ដាលនៅ Leceister ដែលជាសមាជិកមួយរបស់ HI-FIVED នឹងផ្គត់ផ្គង់ហេដ្ឋារចនាសម្ព័ន្ធចាំបាច់សម្រាប់កប៉ាល់ H-USV ដើម្បីអភិវឌ្ឍផ្លូវគមនាគមន៍បៃតងរវាងទីក្រុង Aberdeen នៅស្កុតឡែន និងប្រជុំកោះ Orkney និង Shetland ដែលមានចម្ងាយពីដីគោករបស់ស្កុតឡែនប្រហែល 9.6 គីឡូម៉ែត្រ។

កប៉ាល់ H-USV ដំបូងៗត្រូវបានគេគ្រោងនឹងប្រគល់ឱ្យដៃគូសហការចាប់ពីឆ្នាំ 2024។ រាជរដ្ឋាភិបាលអង់គ្លេសកំពុងរកវិធីដើម្បីផលិតអ៊ីដ្រូសែនស្អាតជាងបច្ចុប្បន្ន តាមរយៈការស្រូបទាញយកកាបូនដែលបំភាយចេញពីការផលិតអ៊ីដ្រូសែន ឬប្រើប្រាស់ទឹកជាប្រភពសម្រាប់ចម្រាញ់ ជំនួសឱ្យឧស្ម័នធម្មជាតិ៕

February 28, 2023

មេដឹកនាំគាំទ្ររុស្ស៊ីបំផុតនៅ EU បារម្ភពីលទ្ធភាពដែលអឺរ៉ុបបញ្ជូនទ័ពទៅកាន់អ៊ុយក្រែន

នាយករដ្ឋមន្ត្រី Orban ឱ្យដឹងថា ហុងគ្រីប្ដេជ្ញាដោះស្រាយជម្លោះនៅអ៊ុយក្រែនដោយសន្តិវិធី និងសម្ដែងការព្រួយបារម្ភចំពោះប្រទេសមួយចំនួននៅក្នុងសហភាពអឺរ៉ុប ដែលអាចនឹងបញ្ជូនទ័ពទៅកាន់សមរភូមិ។

«អឺរ៉ុបទាំងមូលកំពុងធ្លាក់ជាបណ្ដើរៗទៅក្នុងសង្គ្រាម នៅពេលបណ្ដាលប្រទេសរបស់សហភាពអឺរ៉ុប (EU) កំពុងបញ្ជូនរថក្រោះ និងពិនិត្យលទ្ធភាពផ្គត់ផ្គង់យន្តហោះចម្បាំងទៅឱ្យអ៊ុយក្រែន» នាយករដ្ឋមន្ត្រីហុងគ្រី Viktor Orban ថ្លែងនៅចំពោះមុខសភាកាលពីថ្ងៃទី 27 កុម្ភៈដូច្នេះ។ លោកបន្តថា បើសិនស្ថានការណ៍នៅតែបន្តវិវត្តបែបនេះ នឹងមានប្រទេសខ្លះចង់បញ្ជូនទ័ពទៅកាន់អ៊ុយក្រែន។

លោក Orban អះអាងថា រដ្ឋាភិបាលរបស់លោកប្ដេជ្ញាចិត្តដោះស្រាយជម្លោះនៅអ៊ុយក្រែនដោយសន្តិវិធី និងអំពាវនាវដល់សមាជិកសភា ចូលរួមគាំទ្រនិន្នាការនេះ។

«ពួកគេចង់អូសពួកយើងទៅក្នុងសង្គ្រាមនេះ…។ យើងត្រូវការបទបញ្ជាឈប់បាញ់ និងការចរចារកសន្តិភាព។ នេះគឺជាមូលហេតុដែលហុងគ្រីប្ដេជ្ញាអំពាវនាវរកសន្តិភាពនៅលើឆាកអន្តរជាតិ» លោក Orban បន្ថែមដូច្នេះ។

លោក Orban ចង់ឱ្យហុងគ្រីឈរនៅក្រៅសង្គ្រាម និងមិនផ្ដល់អាវុធឱ្យអ៊ុយក្រែន ហើយលោកក៏សម្ដែងការគាំទ្រចំពោះផែនការសន្តិភាពសម្រាប់អ៊ុយក្រែនដែលស្នើឡើងដោយប្រទេសចិន។

កាលពីថ្ងៃទី 24 កុម្ភៈ ប្រទេសចិនបានប្រកាសឯកសារ 12 ចំណុចស្ដីពីសង្គ្រាមរវាងរុស្ស៊ី-អ៊ុយក្រែន ក្នុងនោះក៏បានអំពាវនាវដល់ភាគីជម្លោះចូលតុចរចាឡើងវិញ។ រុស្ស៊ីបានសាទរចំពោះសំណើនេះ ខណៈដែលអាម៉េរិកយល់ថា ចិនមិនមានអព្យាក្រឹតភាពគ្រប់គ្រាន់ក្នុងការធ្វើជាអ្នកផ្សះផ្សា។

លោក Orban ត្រូវបានគេមើលឃើញថាជាមេដឹកនាំដែលគាំទ្ររុស្ស៊ីបំផុតនៅក្នុងចំណោមប្រទេសចំនួន 27 ដែលជាសមាជិករបស់ EU។ កន្លងមក លោក Orban ធ្លាប់បានប្រកាសថា សហភាពអឺរ៉ុបនឹងបំផ្លាញខ្លួនឯងព្រោះតែការដាក់ទណ្ឌកម្មលើរុស្ស៊ី៕

February 28, 2023

Cristiano Ronaldo មិនបោះឆ្នោតជ្រើសរើសបេក្ខភាព The Best FIFA 2022

Ronaldo គឺជាប្រធានក្រុមកីឡាករជម្រើសជាតិព័រទុយហ្កាល់ ប៉ុន្តែមិនបានបោះឆ្នោតជ្រើសរើសបេក្ខភាពសម្រាប់ The Best FIFA 2022 ដោយទុកតួនាទីនេះឱ្យអនុប្រធានក្រុម Pepe ទៅវិញ។

យោងតាមលទ្ធផលនៃការបោះឆ្នោតជ្រើសរើសដែលត្រូវបាន FIFA ប្រកាសកាលពីព្រលប់ថ្ងៃទី 27 កុម្ភៈ 2023 Ronaldo ជាលើកដំបូងដែលមិនចូលរួមបោះឆ្នោតជ្រើសរើស The Best។ តាមច្បាប់ ក្រុមបាល់ទាត់ជម្រើសជាតិនៃប្រទេសនីមួយៗត្រូវមានគ្រូបង្វឹក ប្រធានក្រុម និងអ្នកយកព័ត៌មាន បោះឆ្នោតជ្រើសរើស The Best។ Ronaldo គឺជាប្រធានក្រុមជម្រើសជាតិព័រទុយហ្កាល់ដែលចូលរួមប្រកួតនៅ World Cup 2022 ប៉ុន្តែអ្នកដែលទទួលបានសិទ្ធិបោះឆ្នោតគឺ Pepe (Kepler Laveran de Lima Ferreira ComM) ដែលជាអនុប្រធាន។

មេប្រយោគម្នាក់ៗត្រូវតែជ្រើសរើសកីឡាករ 3 រូបពីតារាងបេក្ខភាព 14 រូបដែលត្រូវបានប្រកាសមុននោះ ដោយតម្រូវឱ្យដាក់ពិន្ទុ 5, 3 និង 1 ពិន្ទុ។ Ronaldo ក៏មិនមានឈ្មោះនៅក្នុងក្រុមបេក្ខភាពនេះដែរ។

កីឡាករដែល Pepe ជ្រើសរើសគឺ Kylain Mbappe, Luka Modric និង Karim Benzema។ ប្រធានគ្រូបង្វឹកថ្មីរបស់ព័រទុយហ្កាល់ Roberto Martinez បានជ្រើសរើស Lionel Messi, Kevin de Bruyne និង Mbappe។

Messi ជាលើកទីពីរដែលដណ្ដើមបានពាន់រង្វាន់កីឡាករឆ្នើមបំផុត The Best របស់ FIFA ដោយទទួលបានពិន្ទុច្រើនលើសលុបជាងគេ។ ចំណែក Mbappe ឈរលំដាប់លេខ 2 និង Benzema ឈរលំដាប់លេខ 3។

ពានរង្វាន់ The Best ត្រូវបានប្រគល់ចាប់ពីឆ្នាំ 2016 ក្នុងនោះ Ronaldo ដណ្ដើមបាន 2 លើកដំបូងគេ។ រីឯកីឡាករ 2 រូបទៀតដែលទទួលបាន The Best ចំនួន 2 លើកដូចគ្នា គឺ Lewandowsky និង Messi៕

February 28, 2023

Lionel Messi ទទួលបានពានរង្វាន់ The Best FIFA 2022

(បារាំង) – យកឈ្នះលើ Kylian Mbappe និង Karim Benzema កំពូលតារាបាល់ទាត់វ័យ 36 ឆ្នាំ Lionel Messi ដណ្ដើមបានពានរង្វាន់ The Best របស់ FIFA ជាលើកទីពីរកាលពីព្រលប់ថ្ងៃទី 27 កុម្ភៈ 2023។

«ពាន់រង្វាន់នេះ ខ្ញុំទុកសម្រាប់មិត្តរួមក្រុម ជំនួសឱ្យពាក្យអរគុណចំពោះអ្វីដែលពួកគេធ្វើបាន» Messi ថ្លែងដូច្នេះបន្ទាប់ពីបានទទួលពានរង្វាន់ពីប្រធាន FIFA លោក Gianni Infantino។ «តំណែងជើងឯក World Cup គឺជាប្រកាសអស្ចារ្យបំផុតចំពោះខ្ញុំនៅក្នុងអាជីពជាកីឡាករបាល់ទាត់»។

ចុងបញ្ចប់នៃការថ្លែងការណ៍កាលពីវេលាម៉ោងជាង 22 (ម៉ោងនៅបារីស) Messi ថែមទាំងនិយាយប្រាប់កូនប្រុសទាំង 3 ដែលអង្គុយលើកៅអីសម្រាប់ភ្ញៀវនៅខាងមុខថា «Thiago, Mateo, Ciro ដល់ពេលទៅគេងហើយ»។

ពានរង្វាន់ថ្មីនេះបានជួយឱ្យ Messi មានពាន The Best ចំនួន 2 ដែលស្មើនឹង Cristiano Rolando និង Robert Lewandowski។ បើគិតទាំងពានរង្វាន់នានាដែលផ្ដល់ដោយ FIFA ចាប់ពីឆ្នាំ 1991 កំពូលកីឡាករអាហ្សង់ទីនរូបនេះមានពានសរុបឡើងដល់ 7 ក្នុងគ្រាដែល Ronaldo ទទួលបានតែ 5 ប៉ុណ្ណោះ។

FIFA ជ្រើសរើសបេក្ខភាព The Best 2022 ដោយយោងទៅលើសមិទ្ធផលចាប់ពីថ្ងៃទី 08 សីហា 2021 ដល់ 18 ធ្នូ 2022។ ក្នុងអំឡុងពេលនោះ Messi ស៊ុតបញ្ចូលទីបាន 45 គ្រាប់ និងបង្កឱកាសរកបានគ្រាប់បាល់ចំនួន 34 លើក នៅក្នុង 74 ប្រកួត រួមនឹងការដណ្ដើមបានជើងឯក World Cup 2022, ពានរង្វាន់បាល់ទាត់អន្តរទ្វីប (CONMEBOL–UEFA Cup of Champions) ដែលអាហ្សង់ទីនដណ្ដើមបាន, Ligue 1 និងពានរង្វាន់បាល់ទាត់បារាំង (Trophée des Champions) ដែល PSG ដណ្ដើមបាន ក៏ដូចជាពានរង្វាន់បាល់មាស World Cup 2022៕

February 28, 2023

សហរដ្ឋអាម៉េរិកផ្ដល់ជំនួយបន្ថែមជាង 1.2 ពាន់លានដុល្លារដល់អ៊ុយក្រែន

រដ្ឋមន្ត្រីក្រសួងហិរញ្ញវត្ថុអាម៉េរិកប្រកាសថា ប្រទេសនេះផ្ដល់ថវិកាជាង 1.2 ពាន់លានដុល្លារបន្ថែមទៀតដើម្បីជួយឱ្យរដ្ឋាភិបាលអ៊ុយក្រែនអាចបន្តធ្វើសកម្មភាព។

«ជំនួយសេដ្ឋកិច្ចពីយើងកំពុងជួយឱ្យរដ្ឋាភិបាលអ៊ុយក្រែន និងស្ថាប័នសំខាន់ៗរក្សាសកម្មភាពនៅក្នុងស្ថានការណ៍ពិសេស» រដ្ឋមន្ត្រីក្រសួងហិរញ្ញវត្ថុអាម៉េរិក Janet Yellen កាលពីថ្ងៃទី 27 កុម្ភៈ ប្រកាសដូច្នេះនៅក្នុងដំណើរទស្សនកិច្ចនៅរដ្ឋធានីកៀវ។ ក្រៅពីនេះ ខ្ទង់ជំនួយនេះក៏ជួយឱ្យអ៊ុយក្រែនបើកប្រាក់ខែជូនមន្ត្រីរដ្ឋការ គ្រូបង្រៀន និងបុគ្គលិកពន្លត់អគ្គិភ័យផងដែរ។

លោកស្រី Yellen ឱ្យដឹងថា ជំនួយសម្រាប់អ៊ុយក្រែនតម្លៃ 1.25 ពាន់លានដុល្លារនេះ គឺជាខ្ទង់ដំបូងក្នុងកញ្ចប់ជំនួយតម្លៃ 10 ពាន់លានដុល្លារដែលអាម៉េរិកនឹងផ្ដល់ឱ្យទីក្រុងកៀវនាប៉ុន្មានខែខាងមុខ។ សហរដ្ឋអាម៉េរិកគឺជាប្រទេសផ្ដល់ជំនួយផ្នែកហិរញ្ញវត្ថុ និងយោធាច្រើនជាងគេដល់អ៊ុយក្រែន នៅក្នុងរយៈពេលជាងមួយឆ្នាំកន្លង ដោយវាបានឡើងដល់ជិត 50 ពាន់លានដុល្លារ។

លោកស្រី Yellen បញ្ជាក់ថា សហរដ្ឋអាម៉េរិកនៅក្នុងឆ្នាំនេះនឹងផ្ដោតទៅលើការទប់ស្កាត់អំពើគេចទណ្ឌកម្មពីលោកខាងលិចរបស់រុស្ស៊ី។

អនុរដ្ឋមន្ត្រីក្រសួងការបរទេសអ៊ុយក្រែន Emine Dzheppar កាលពីថ្ងៃទី 25 កុម្ភៈ 2023 បានឱ្យដឹងថា ប្រទេសនេះបានខាតបង់សរុបគិតជាទឹកប្រាក់គឺឡើងជិតដល់ 138 ពាន់លានដុល្លារ ក្នុងនោះការខូចខាតហេដ្ឋារចនាសម្ព័ន្ធគឺ 35.6 ពាន់លានដុល្លារ និងផ្ទះសំបែង 54 ពាន់លានដុល្លារ ដោយសារសង្គ្រាមបច្ចុប្បន្ន៕

February 28, 2023

ភាពយន្តរឿង «Missing» ប្រាប់ថា ព័ត៌មានសម្ងាត់របស់អ្នក «អាចត្រូវគេលួចបានដោយងាយ»

និស្សិតស្រីម្នាក់ឈ្មោះ June ប្រើប្រាស់ទូរស័ព្ទឆ្លាតវៃ និងកុំព្យូទ័រយួរដៃភ្ជាប់អ៊ីនធើណិតដើម្បីស្វែងរកម្ដាយដែលបានបាត់ខ្លួននៅពេលដើរទេសចរណ៍នៅបរទេសក្នុងភាពយន្តថ្មីមួយដែលមានចំណងជើងថា «Missing»។

«Missing» គឺជាខ្សែភាពយន្តរបស់ផលិតករភាពយន្តមួយក្រុមដែលធ្លាប់បានទទួលជោគជ័យជាមួយនឹងគម្រោងភាពយន្ត «Searching (2018)» នោះគឺ Aneesh Chaganty, Will Merrick និង Nick Johnson។ សាច់រឿងរបស់ «Missing» និយាយពីសិស្សស្រីម្នាក់ឈ្មោះ June Allen (សម្ដែងដោយ Storm Reid) រើទៅរស់នៅក្នុងទីក្រុង Los Angeles ជាមួយម្ដាយ Grace Allen (Nia Long) បន្ទាប់ពីឪពុកនាងបានស្លាប់។ នៅពេលជិតពេញវ័យ June ប្រែជាមិនស្និទ្ធស្នាលជាមួយញាតិសន្ដាន ហើយពេលវេលាភាគច្រើនរបស់នាងគឺការនៅជាមួយមិត្តភ័ក្ដិ និងឧបករណ៍បច្ចេកវិទ្យា។

ថ្ងៃមួយ Grace Allen មានមិត្តប្រុសថ្មីឈ្មោះ Kevin (Ken Leung) តាមរយៈអែបណាត់គ្នា។ អ្នកទាំងពីរសម្រេចចិត្តធ្វើដំណើរទេសចរណ៍នៅ Colombia ហើយក៏បានបាត់ខ្លួន។ នៅផ្ទះម្នាក់ឯង June ចាប់ផ្ដើមតាមដាន ស្រាវជ្រាវលើអ៊ីនធើណិតដោយការលួចចូលគណនីបណ្ដាញសង្គមរបស់ម្ដាយ និង Kevin ដើម្បីស្វែងរកទីតាំងដែលពួកគេបានទៅ។ June ក៏បានរកឃើញអាថ៌កំបាំងដ៏គួរឱ្យភ្ញាក់ផ្អើលទាក់ទងនឹងអតីតកាលរបស់គ្រួសារនាង។

ភាពយន្តនេះបង្ហាញពីបច្ចេកវិទ្យាដែលមនុស្សកំពុងប្រើប្រាស់ប្រចាំថ្ងៃ

ដូចទៅនឹង «Searching» ភាគយន្តរឿង «Missing» បន្តនាំមកនូវរឿងរ៉ាវគួរភ្ញាក់ផ្អើលជាច្រើនទាក់ទងនឹងបច្ចេកវិទ្យា ក៏ដូចជាបញ្ហាពិបាកដោះស្រាយជាច្រើន។ ក្រុមអ្នកផលិតរឿងបានបញ្ចូលកត្តាបច្ចេកវិទ្យាទៅក្នុងសាច់រឿងប្រកបដោយភាពប្រទាក់ក្រឡា។ ទស្សនិកជននឹងបានឃើញសបវ៉ែរ និងកម្មវិធីដែលគេប្រើរាល់ថ្ងៃ ក្នុងនោះមានទាំង Facebook, Instagram ឬជំនួយការនិម្មិត Siri ជាដើមនៅក្នុងខ្សែភាពយន្តនេះ។ June អាចតាមដានម្ដាយនាងដោយការប្រើប្រាស់ប្រព័ន្ធកាមេរ៉ាសន្តិសុខ ឬតារាងស្ថិតិនៃទីតាំងដែលបានដើរឆ្លងកាត់របស់ Google Maps។

ក្រៅពីរឿងរ៉ាវបំបែកសំណុំរឿងរបស់ June សាច់រឿងក៏ទាក់ទាញចំណាប់អារម្មណ៍ផងដែរដោយមានខ្លឹមសារស្ដីពីការការពារទិន្នន័យ និងសុវត្ថិភាពលើអ៊ីនធើណិត។ ដោយគ្រាន់តែប្រើប្រាស់កុំព្យូទ័រ និងទូរស័ព្ទឆ្លាតវៃ June អាចចូលគណនីអ៊ីមេល បណ្ដាញសង្គមរបស់ម្ដាយនាង និង Kevin បានដោយងាយ។ ទស្សនិកជននឹងភ្ញាក់ផ្អើលនៅពេលដឹងថា ព័ត៌មានសម្ងាត់ផ្ទាល់ខ្លួនងាយនឹងត្រូវគេលួចបាន បើសិនមិនយកចិត្តទុកដាក់លើការការពារ។

រឿង «Missing» ទទួលបានការវាយតម្លៃខ្ពស់ពីក្រុមអ្នកវាយតម្លៃអន្តជាតិ

ក្រុមអ្នកផលិតបានទទួលជោគជ័យក្នុងការអូសបន្លាយការចង់ដឹងរបស់ទស្សនិកជនដោយការបង្កើតបញ្ហាពិបាកដោះស្រាយ។ June អាចតាមរកដានម្ដាយនាងដោយការប្រើប្រាស់អ៊ីនធើណិតតែប៉ុណ្ណោះ។ ដូច្នេះ ចំណុចដ៏តូចមួយក៏ត្រូវបានក្រុមអ្នកដឹកនាំរឿងធ្វើឱ្យទៅជាតម្រុយសំខាន់ដើម្បីស្វែងរក។

រឿង «Missing» ទទួលបានការវាយតម្លៃខ្ពស់ពីក្រុមអ្នកវាយតម្លៃអន្តជាតិ ដោយទទួលបានពិន្ទុ 86% ក្នុងចំណោមការវាយតម្លៃសរុបចំនួន 110 លើក នេះបើតាម Rotten Tomatoes។ ភាគច្រើនយល់ថា ក្រុមអ្នកផលិតជោគជ័យក្នុងការធ្វើឱ្យទស្សនិកជនត្រូវផ្ដោតអារម្មណ៍តាមដាន និងរង់ចាំការស្រាយអាថ៌កំបាំង។ ក៏ប៉ុន្តែ អ្នកវាយតម្លៃខ្លះយល់ថា ចង្វាក់ប្រទាក់ក្រឡាគ្នានៅក្នុងភាពយន្តនេះ «លឿនពេក» ហើយសាច់រឿងនៅមានចន្លោះប្រហោងមួយចំនួន៕

February 28, 2023

មន្ត្រីនៅវិទ្យាស្ថានប៉ាស្ទ័រថា ករណីស្លាប់របស់កុមារីឆ្លងជំងឺផ្ដាសាយ H5N1 មិនមែនជាការកំរាមកំហែងតិចតូច

អម្បូររវីរុសផ្តាសាយបក្សី H5N1 ដែលបានបណ្តាលឱ្យកុមារីម្នាក់នៅខេត្តព្រៃវែងបាត់បង់ជីវិតកាលពីថ្ងៃពុធសប្ដាហ៍កន្លង រួមនឹងការឆ្លងរាលដាលនាពេលកន្លង មិនមែនជាការកំរាមកំហែងតិចតួចឡើយ នេះបើតាម មន្ត្រីជាន់ខ្ពស់នៅវិទ្យាស្ថានប៉ាស្ទ័រ។

អម្បូរវីរុសផ្តាសាយបក្សី H5N1 (clade 2.3.2.1c) នេះ គឺជាវីរុសដែលបានសិក្សារកឃើញនៅក្នុងចំណោមបក្សីស្រុក និង បក្សីព្រៃក្នុងប្រទេសកម្ពុជា ក្នុងអំឡុងប៉ុន្មានឆ្នាំចុងក្រោយនេះ ហើយការតាមដាន ស្រាវជ្រាវលើករណីជំងឺនេះគឺនៅតែបន្ត នេះបើតាមមន្ត្រីរបស់នាយកដ្ឋានប្រយុទ្ធនឹងជំងឺឆ្លង (CDC)។

លោកស្រី យក់ សម្បត្តិ រដ្ឋលេខាធិការក្រសួងសុខាភិបាលកម្ពុជា បានថ្លែអថា លទ្ធផលតេស្តពីវិទ្យាស្ថានប៉ាស្ទ័រ និងវិទ្យាស្ថានសុខភាពសាធារណៈ ទៅលើសំណាក់សរុបចំនួន 29 ដែលជាអ្នកប៉ះពាល់នឹងអ្នកស្លាប់ដោយសារវីរុស H5H1 កាលពីយប់ថ្ងៃទី 25 កុម្ភៈ បង្ហាញថា អវិជ្ជមានទាំងអស់។

CDC កំពុងស្រាវជ្រាវរកប្រភពរបស់វីរុស ហើយមិនទាន់រកឃើញសញ្ញាឆ្លងពីមនុស្សទៅមនុស្ស ខណៈដែលអង្គការសុខភាពពិភពលោកក៏កំពុងសហការជាមួយអាជ្ញាធរកម្ពុជា ដើម្បីតាមដានករណីឆ្លងវីរុសនេះ។

លោក Erik Karlsson អនុប្រធានផ្នែកវីរុសសាស្ត្រនៅវិទ្យាស្ថានប៉ាស្ទ័រ បានថ្លែងកាលពីម្សិលមិញថា «បើទោះវា (វីរុស H5N1) ធ្លាប់បានឆ្លងទៅមនុស្សក្នុងអតីតកាល ក្រុមមន្ត្រីជំនាញក៏មិនធ្លាប់រកឃើញករណីឆ្លងពីមនុស្សទៅមនុស្ស»។ ប៉ុន្តែលោកថា ប្រការនេះមិនមែនមានន័យថា ការកំរាមកំហែងរបស់វីរុសនេះគឺមានតិចតួចនោះទេ»។

ជំងឺផ្ដាសាយបក្សីគឺជាជំងឺឆ្លងនៅក្នុងចំណោមសត្វស្លាប បង្កឡើងដោយវីរុសផ្ដាសាយប្រភេទ A។ ជំងឺនេះត្រូវបានរកឃើញដំបូងនៅអ៊ីតាលី កាលពីជាង 100 ឆ្នាំមុន ហើយក៏បានឆ្លងរាលដាលពាសពេញពិភពលោក។

ក្រសួងសុខាភិបាលកម្ពុជា កាលពីថ្ងៃទី 23 កុម្ភៈ បានប្រកាសថា បានរកឃើញជំងឺផ្តាសាយបក្សី H5N1 ចំនួនមួយករណី ដែលបានឆ្លងទៅលើកុមារីម្នាក់អាយុជាង 11 ឆ្នាំ រស់នៅក្នុងភូមិរលាំង ឃុំរំលេច ស្រុកស៊ីធរកណ្តាល ខេត្តព្រៃវែង ក្រោយពីបានធ្វើតេស្តលើវត្ថុសំណាក។ កុមារីរូបនេះក្រោយមកក៏បានបាត់បង់ជីវិតកាលពីថ្ងៃទី 22 កុម្ភៈ៕

February 27, 2023

Author: សឿន សំណាង