សឿន សំណាង - La Reine Media

រុស្ស៊ីផ្ដល់រង្វាន់លើកទឹកចិត្តដល់ពីឡុតពីររូបក្នុងហេតុការណ៍ធ្លាក់ UAV អាម៉េរិកនៅសមុទ្រខ្មៅ

ក្រសួងការពារជាតិរុស្ស៊ី Shoigu បានប្រគល់រង្វាន់ថ្នាក់ជាតិដល់ពីឡុតរបស់ Su-29 ព្រោះតែបាន «ទប់ស្កាត់សកម្មភាពបំពានរបស់ UAV អាម៉េរិក»។

«រដ្ឋមន្ត្រីក្រសួងការពារជាតិរុស្ស៊ី Sergei Shoigu បានប្រគល់រង្វាន់ថ្នាក់ជាតិដល់អ្នកបើកបរយន្តហោះចម្បាំង Su-29 ពីរនាក់ ជាមនុស្សដែលបានរារាំងយន្តហោះគ្មានមនុស្សបើកបរ (UAV) MQ-9 របស់អាម៉េរិកដែលបំពានចូលតំបន់បិទខ្ទប់នៅក្នុងយុទ្ធនាការនៅអ៊ុយក្រែន» ក្រសួងការពារជាតិរុស្ស៊ីប្រកាសនាថ្ងៃនេះដូច្នេះ។

សេចក្ដីប្រកាសនេះមិនបានឱ្យដឹងអំពីអត្តសញ្ញាណ ក៏ដូចជារង្វាន់ជាក់លាក់ដែលពីឡុតទាំងនេះទទួលបាននោះទេ។

កងទ័ពរុស្ស៊ីក៏បានអះអាងថា ព្រំដែននៃតំបន់ដែលត្រូវបានបិទខ្ទប់នេះត្រូវបានជូនដំណឹងដល់គ្រប់ប្រទេសតាំងពីមុនរួចហើយ និងគោរពតាមគោលការណ៍អន្តរជាតិ។

ទាក់ទិននឹងហេតុការណ៍ដែលបានកើតឡើងកាលពីថ្ងៃទី 14 មីនា បញ្ជាការដ្ឋានកងទ័ពប្រចាំអឺរ៉ុបរបស់អាម៉េរិក មុននោះបានឱ្យដឹងថា យន្តហោះចម្បាំង Su-27 ពីរគ្រឿងរបស់រុស្ស៊ី បានហោះមកក្បែរ ហោះកាត់មុខ និងបាញ់ប្រេងសាំងទៅលើ UAV MQ-9 Reaper នៅលើតំបន់សមុទ្រអន្តរជាតិកាលពីថ្ងៃទី 14 មីនា មុនពេលយន្តហោះ Su-27 មួយគ្រឿងផ្សេងទៀតប៉ះទង្គិចលើស្លាបកង្ហាររបស់ UAV បង្ខំឱ្យទ័ពអាកាសអាម៉េរិកទម្លាក់ UAV ចូលក្នុងសមុទ្រ។

វីដេអូបង្ហាញពីយន្តហោះចម្បាំងរបស់រុស្ស៊ី ហោះកៀកនឹង UAV របស់អាម៉េរិក

ចំណែកមន្ទីរបញ្ចកោណនិយាយថា MQ-9 ពេលនោះកំពុងឈ្លបយកការណ៍ដូចធម្មតា។ អាម៉េរិកប្រើប្រាស់ MQ-9 សម្រាប់សកម្មភាពឈ្លបយកការណ៍ និងវាយប្រហារគោលដៅលើដី។ យន្តហោះគ្មានមនុស្សបើកនេះតែងហោះលើសមុទ្រខ្មៅដើម្បីតាមដានកងទ័ពរុស្ស៊ី។

ក្រុមមន្ត្រីរុស្ស៊ីបានច្រានចោលការចោទប្រកាន់ពីអាម៉េរិក និងយល់ថា UAV របស់អាម៉េរិកផ្លាស់ប្ដូរទិសដៅរហ័ស និងធ្លាក់ដោយឯកឯងនៅពេលបាត់បង់ការគ្រប់គ្រង។ ឯកអគ្គរដ្ឋទូតរុស្ស៊ីប្រចាំអាម៉េរិក Anatoly Antonov អះអាងថា MQ-9 កំពុងប្រមូលទិន្នន័យដើម្បីបញ្ជូនទៅឱ្យអ៊ុយក្រែន មុនពេលត្រូវធ្លាក់។

វីដេអូបង្ហាញពីយន្តហោះចម្បាំងរបស់រុស្ស៊ី បាច់ប្រេងសំដៅយន្តហោះគ្មានមនុស្សបើករបស់អាម៉េរិក

នេះគឺជាការប៉ះទង្គិចផ្ទាល់ជាលើកដំបូងរវាងកងកម្លាំងរុស្ស៊ី និងអាម៉េរិក រាប់ចាប់តាំងពីសង្គ្រាមនៅអ៊ុយក្រែនបានផ្ទុះឡើងកាលពីខែកុម្ភៈឆ្នាំកន្លង។ ហេតុការណ៍នេះមិនបានធ្វើឱ្យមានការប្រឈមមុខដាក់គ្នានៅកន្លែងជាក់ស្ដែងបន្ទាប់ទៀតនោះទេ ប៉ុន្តែវាធ្វើឱ្យទ័ពអាកាសអាម៉េរិកខាតបង់អស់យ៉ាងតិច 30 លានដុល្លារអាម៉េរិក នៅពេល MQ-9 Reaper បានបាត់ខ្លួនទាំងស្រុងពីអាកាស៕

March 17, 2023

ស្ដេចកម្ទេចសំណាញ់ទី AFF Cup 2022 ត្រូវបានដកពីក្រុមជម្រើសជាតិថៃ

គ្រូបង្វឹក Mano Polking ថ្មីៗនេះបានជ្រើសរើសកីឡាករសម្រាប់ក្រុមជម្រើសជាតិថៃដើម្បីត្រៀមសម្រាប់ការប្រកួតក្នុងរដូវ FIFA Days នៅខែមីនានេះ។ អ្វីដែលគួរឱ្យចាប់អារម្មណ៍គឺថា គ្រូបង្វឹកជនជាតិអាល្លឺម៉ង់ដើមកំណើតប្រេស៊ីលរូបនេះបានដកហូតកីឡាករជាច្រើននាក់ដែលធ្លាប់ជាជើងឯក AFF Cup 2022។

ក្រុមបាល់ទាត់ជម្រើសជាតិថៃ បានសម្រេចជ្រើសរើសកីឡាករចំនួន 25 នាក់ដើម្បីត្រៀមខ្លួនទៅចូលរួមការប្រកួតមិត្តភាពអន្តរជាតិដែលនឹងធ្វើឡើងនៅក្នុងខែមីនានេះ ក្នុងនោះ គ្រួបង្វឹក Mano Polking បានជ្រើសយកកីឡាករដែលធ្លាប់ចូលរួម AFF Cup 2022 ត្រឹមតែ 9 នាក់ប៉ុណ្ណោះ។

ចំណែកកីឡាករបង្គោលចំនួនពីររូបរបស់ក្រុមជម្រើសជាតិថៃ គឺខ្សែប្រយុទ្ធ Teerasil Dangda និងខ្សែបម្រើ Sarach Yuyen សុទ្ធតែមិនត្រូវបានជ្រើសរើស។ Teerasil Dangda គឺជាស្ដេចកម្ទេចសំណាញ់ទីរបស់ AFF Cup 2022។

ក្រៅពីនេះ បញ្ជីខាងលើក៏មានឈ្មោះ Chanathip Songkransin បើទោះ «Messi ថៃ» រូបនេះហាក់មិនមានសកម្មភាពលេចធ្លោនៅជប៉ុន។ Chanathip Songkransin បច្ចុប្បន្នទាត់ឱ្យក្លឹប Kawasaki Frontale របស់ជប៉ុន និងជាកីឡាកររបស់ក្រុមជម្រើសជាតិរបស់ថៃ។

Theerathon Bunmathan (លេខ 3) នៅតែជាប្រធានក្រុមរបស់ដំរីប្រយុទ្ធរបស់ថៃ

គ្រូបង្វឹក Poking ឱ្យដឹងថា «…ខ្ញុំតែងតែចង់ជ្រើសរើសកីឡាករល្អបំផុត មិនត្រឹមតែដោយសារកេរ្តិ៍ឈ្មោះ ឬសមត្ថភាពនោះទេ តែគឺយោងទៅលើស្ថានភាពកម្លាំងកាយរបស់ពួកគេ»។

យោងតាមកាលបរិច្ឆេទ ក្រុមជម្រើសជាតិថៃនឹងប៉ះក្រុមរបស់ស៊ីរី ដែលជាក្រុមជាប់ចំណាត់ថ្នាក់លេខ 90 លើពិភពលោក នៅថ្ងៃសៅរ៍ ទី 25 មីនាលើទីលានរបស់កីឡដ្ឋាន Shabab Al Ahli (ឌូបៃ, អេមីរ៉ាតអារ៉ាប់រួម-UAE)។ ក្រោយមកក្រុមថៃនឹងត្រូវប្រកួតជាមួយក្រុមម្ចាស់ផ្ទះរបស់ UAE ក្នុងកីឡដ្ឋាន Al Nahyan (អាប៊ុយដាប៊ី) នៅថ្ងៃទី 28 មីនា 2023៕

March 17, 2023

ប៉ូលិសអង់គ្លេសជិះសេះដេញតាមពិន័យអ្នកបំពានច្បាប់ចរាចរណ៍

មន្ត្រីប៉ូលិសជិះសេះដេញតាមរថយន្ត និងប្រាប់ឱ្យឈប់ បន្ទាប់ពីបានឃើញម្ចាស់រថយន្តបើកបរបណ្ដើរនិយាយទូរស័ព្ទបណ្ដើរ រួចក៏បានពិន័យ និងដកពិន្ទុប័ណ្ណបើកបរ។

កាលពីថ្ងៃទី 16 មីនា ទំព័រ Guardian ដកស្រង់វីដេអូពីទំព័របណ្ដាញសង្គមរបស់ក្រុមប៉ូលិសចរាចរណ៍ Avon និង Somerset (RPU) បង្ហាញថា មន្ត្រីប៉ូលិសពីររូបជិះសេះដេញតាមរថយន្តមួយគ្រឿង ក្រោយពីមើលឃើញថា ម្ចាស់ឡាននិយាយទូរស័ព្ទពេលកំពុងបើកបរ។ RPU ឱ្យដឹងថា វីដេអូនេះត្រូវបានថតដោយកាម៉េរិកដែលបំពាក់លើខ្លួនប៉ូលិស និងកាម៉េរិកសុវត្ថិភាពចរាចរណ៍កាលពីថ្ងៃទី 07 មីនា។

«លោកដឹងហើយថា មិនត្រូវប្រើប្រាស់ទូរស័ព្ទក្នុងពេលបើកបរ» ស្ត្រីជាមន្ត្រីប៉ូលិសល្បាតនិយាយនៅពេលឡានឈប់លើដងផ្លូវមួយនៅក្នុងទីរួមស្រុក Tauton, Somerset។

អ្នកបើកបរត្រូវបានប៉ូលិសធ្វើកំណត់ហេតុ និងពិន័យជាប្រាក់ 200 ផោន (242 ដុល្លារអាម៉េរិក) ទន្ទឹមនឹងការដក 6 ពិន្ទុនៅលើប័ណ្ណបើកបរ។ RPU ឱ្យដឹងថា ចាប់ពីដើមឆ្នាំ 2021 មកដល់បច្ចុប្បន្ន តំបន់ Avon និង Somerset មានគ្រោះថ្នាក់ចរាចរណ៍ជាង 4,500 ករណី។

ចាប់ពីខែមីនា 2022 ការប្រើប្រាស់ទូរស័ព្ទចល័ត កុំព្យូទ័រ ឬឧបករណ៍ទាំងឡាយណាដែលអាចផ្ញើ និងទទួលទិន្នន័យ ពេលកំពុងបើកបររថយន្ត ឬម៉ូតូនៅប្រទេសអង់គ្លេស សុទ្ធតែត្រូវបានចាត់ទុកថាខុសច្បាប់។

អ្នកដែលល្មើសនឹងច្បាប់ខាងលើអាចត្រូវបានពិន័យជាប្រាក់ឡើងដល់ 1,000 ផោន ទន្ទឹមនឹងការដក 6 ពិន្ទុ ឬត្រូវដកហូតប័ណ្ណបើកបរ៕

March 17, 2023

ណាសា (NASA) បញ្ចេញផែនទីស្ដីពីទឹកនៅលើដីរបស់ឋានព្រះចន្ទ

ទិន្នន័យពីតេឡេស្កុប SOFIA ដែលបានឈប់ដំណើរការរបស់ណាសា បានជួយបង្កើតផែនទីលម្អិតដំបូងស្ដីពីវត្តមានទឹកនៅលើដីរបស់ព្រះចន្ទ។

ផែនទីដែលត្រូវបានប្រកាសលើទស្សនាវដ្ដីវិទ្យាសាស្ត្រភព កាលពីថ្ងៃទី 15 មីនា នាំមកនូវការយល់ដឹងស៊ីជម្រៅអំពីការចល័តរបស់ទឹកលើផ្ទៃដីឋានព្រះចន្ទ និងផ្ដល់ទិន្នន័យសំខាន់សម្រាប់បេសកកម្ម Artemis នាពេលខាងមុខរបស់ណាសា។

ផែនទីថ្មីនេះគ្របដណ្ដប់ប្រហែល ¼ នៃផ្នែកដែលបែរមករកផែនដីរបស់ព្រះចន្ទ បូករួមទាំងប៉ូលខាងត្បូងរបស់វាផងដែរ។

តេឡេស្កុប SOFIA របស់ណាសា បានឈប់ដំណើរការតាំងពីឆ្នាំ 2022 ដោយសារកង្វះហិរញ្ញវត្ថុ។ ឧបករណ៍នេះត្រូវបានបំពាក់លើយន្តហោះ Boeing 747 និងហោះដល់កម្ពស់ 12,800 ម៉ែត្រ ដើម្បីគេចពីចំហាយទឹកនៅលើផែនដី ដែលជាវត្ថុរារាំងពន្លឺអ៊ីនហ្វ្រារ៉េដដែលតេឡេស្កុបត្រូវការស្រូបយក។

វីដេអូបង្ហាញផែនទីស្ដីពីទឹកនៅលើដីរបស់ឋានព្រះចន្ទ

ផែនទីថ្មីខាងលើនេះនឹងជួយក្រុមអ្នកវិទ្យាសាស្ត្រកំណត់តំបន់ដែលសមស្របសម្រាប់ការស្ថាបនាមូលដ្ឋាន ជាទីដែលអាចចម្រាញ់ទឹកទៅជាអុកស៊ីសែនសម្រាប់ការដកដង្ហើម និងការប្រើប្រាស់របស់ម៉ាស៊ីនរ៉ុក្កែតនៅលើឋានព្រះចន្ទ៕

March 17, 2023

រំលងចោល Mbappe ក្លឹប Real Madrid នឹងទិញខ្សែប្រយុទ្ធដទៃដ៏គួរឱ្យភ្ញាក់ផ្អើល?

ការទិញយកតារាបាល់ទាត់ Kylian Mbappe គឺមិនមែនជារឿងងាយស្រួលឡើយសម្រាប់ Real Madrid ហើយពួកគេក៏គិតដល់គោលដៅផ្សេងដែលមានប្រសិទ្ធភាពជាងនេះ។

ក្នុងបណ្ដារដូវកាលទិញដូរកីឡាករបាល់ទាត់កន្លងទៅ Kylian Mbappe តែងតែជាគោលដៅសំខាន់ និងលេចធ្លោរបស់ Real Madrid ហើយមានពេលខ្លះ ក្លឹបនេះវិះនឹងទទួលបានហត្ថលេខារបស់កំពូលខ្សែប្រយុទ្ធបារាំង ។ ប៉ុន្តែ ចុងក្រោយ Mbappe ក៏ជ្រើសរើស PSG កាលពីឆ្នាំ 2022។

ទោះជាបានបរាជ័យ Real Madrid ក៏មិនដែលបោះបង់គោលដៅមួយនេះឡើយ ពិសេសគឺនៅពេលមានដំណឹងថា Mbappe មិនសប្បាយចិត្ត និងចង់ចាកចេញពី PSG។ ក៏ប៉ុន្តែ តម្លៃខ្លួនខ្ពស់របស់ Mbappe បូករួមនឹងការប្រឹងប្រែងចងជើងកីឡាកររបស់ក្លឹប PSG ធ្វើឱ្យ Real ត្រូវងាកទៅរកគោលដៅផ្សេង ក្នុងគ្រាដែលក្លឹបនេះត្រូវការខ្សែប្រយុទ្ធមកជំនួស Karim Benzema ដែលមានអាយុកាន់តែច្រើន។

យោងតាមប្រភពព័ត៌មានរបស់ទំព័រ Fichajes ក្លឹប Real Madrid កំពុងយកចិត្តទុកដាក់លើ Romelu Lukaku។ គ្រូបង្វឹក Carlo Ancelotti ត្រូវបានគេជឿថា កំពុងពិនិត្យលទ្ធភាពទិញកំពូលថ្វីជើងជនជាតិបែលហ្ស៊ិករូបនេះ ដើម្បីបន្ថែមកម្លាំងឱ្យ Benzema។

បច្ចុប្បន្ន កីឡាករ Lukaku កំពុងទាត់ឱ្យ Inter Milan ក្នុងទម្រុងឱ្យខ្ចីពី Chelsea។ មុននោះ ខ្សែប្រយុទ្ធវ័យ 29 ឆ្នាំរូបនេះ បានចាកចេញពី Inter Milan ទៅកាន់ Chelsea ក្នុងតម្លៃខ្លួន 115 លានអឺរ៉ូ។ ក៏ប៉ុន្តែ ឆ្លងកាត់ការប្រកូនមួយរដូវកាល Chelsea ក៏បន្តលក់ Lukaku ឱ្យ Inter Milan ក្នុងទម្រង់ឱ្យខ្ចី។

ថ្មីៗនេះទៀត ប្រធានក្លឹប Inter Milan ក៏បានប្រកាសថា នឹងសងកីឡាករ Lukaku ទៅឱ្យក្លឹប Chelsea វិញ ក្រោយរដូវកាល 2022/2023 បានបញ្ចប់។

ដោយសារតែបញ្ហាខាងលើនេះហើយ ទើបលទ្ធភាពនៃការទិញយក Lukaku ពី Inter Milan ឬពី Chelsea របស់ Real Madrid អាចកើតឡើង៕

March 17, 2023

ប្រទេសចិនបង្ហាញ «រថយន្តអគ្គិសនីឆ្លាតវៃដឹកទំនិញធុនធ្ងន់» ជាលើកដំបូង

ប្រទេសចិនមានផែនការធ្វើឱ្យផ្លូវគោកលែងមានការបំភាយឧស្ម័នកាបូន ដោយការជំរុញការប្រើប្រាស់យានយន្តអគ្គិសនី។

រថយន្តឆ្លាតវៃដឹកទំនិញធុនធ្ងន់ដំណើរការដោយអគ្គិសនីដំបូងគេរបស់ប្រទេសចិន ដែលអភិវឌ្ឍដោយក្រុមហ៊ុនរថភ្លើង CRRC ត្រូវបានបើកបរចេញពីរោងចក្រនៅទីក្រុង Datong ខេត្ត Shanxi។ នេះបើតាមសារព័ត៌មានចិន Xinhua ចុះផ្សាយកាលពីថ្ងៃទី 16 មីនា 2023។

រថយន្តដឹកទំនិញឆ្លាតវៃនេះប្រើប្រាស់ថាមពលអគ្គិសនីពីថ្ម ឬដោយការភ្ជាប់ជាមួយនឹងបណ្ដាញអគ្គិសនីតាមរយៈខ្សែភ្លើងនៅពីលើ។ គុណសម្បត្តិធំបំផុតរបស់រថយន្តនេះគឺអាចបញ្ចូលថាមពលអគ្គិសនីក្នុងពេលធ្វើដំណើរ។ ជាងនេះ វាក៏អាចផលិតថាមពលអគ្គិសនីតាមរយៈការចាប់ហ្វ្រាំងក្នុងពេលបើកបរផងដែរ។

CRRC បានឱ្យដឹងថា រថយន្តអគ្គិសនីដឹកទំនិញធុនធ្ងន់ឆ្លាតវៃនេះអាចត្រូវបានប្រើប្រាស់ក្នុងការដឹកជញ្ជូនផ្លូវឆ្ងាយ ហើយក្នុងអនាគត វាក៏អាចនឹងមានមុខងារបើកបរស្វ័យប្រវត្តទៀតផង។

វីដេអូបង្ហាញអំពី «រថយន្តអគ្គិសនីឆ្លាតវៃដឹកទំនិញធុនធ្ងន់» របស់ចិន

ដើម្បីចូលរួមកាត់បន្ថយការបំភាយឧស្ម័នកាបូន ដែលជាឧស្ម័នធ្វើឱ្យផែនដីឡើងកម្ដៅ ប្រទេចចិនកំពុងផ្ដោតលើការរកដំណោះស្រាយក្នុងវិស័យដឹកជញ្ជូនតាមផ្លូវគោក។

អង្គការថាមពលអន្តរជាតិ (IEA) ឱ្យដឹងថា ការដឹកជញ្ជូនបំភាយឧស្ម័ន 26% នៅទូទាំងសកលលោក និងពន្យាករថា អគ្គិសនីភាវូបនីយកម្មនឹងក្លាយជានិន្នាការអភិវឌ្ឍក្នុងពេលអនាគត ហើយថា ដល់ឆ្នាំ 2050 រថយន្តដឹកទំនិញធុនធ្ងន់ប្រមាណ 36% នឹងដំណើរការដោយអគ្គិសនី។

យោងតាមការពិសោធ រថយន្តដឹកទំនិញដើរដោយអគ្គិសនី សន្សំសំចៃថាមពលបានច្រើនជាងពីរដងធៀបនឹងរថយន្តប្រើម៉ាស៊ីនម៉ាស៊ូត៕

March 17, 2023

ខេត្តមួយរបស់វៀតណាម ចង់បង្កើត «មជ្ឈមណ្ឌលស្រាវជ្រាវបច្ចេកវិទ្យាអវកាស»

មេដឹកនាំខេត្តប៊ិញឌិញ (Binh Dinh) ស្នើដល់ក្រសួងវិទ្យាសាស្ត្រនិងបច្ចេកវិទ្យាវៀតណាម គាំទ្រដល់ការអភិវឌ្ឍមជ្ឈមណ្ឌលស្រាវជ្រាវវិទ្យាសាស្ត្ររបស់ខេត្តនេះ ឱ្យទៅជាកន្លែងស្រាវជ្រាវបច្ចេកវិទ្យាអវកាស។

នេះគឺជាសំណើមួយរបស់ក្រុមប្រឹក្សាខេត្តប៊ិញឌិញ ដែលបានស្នើដល់ក្រសួងវិទ្យាសាស្ត្រនិងបច្ចេកវិទ្យា នៅក្នុងកិច្ចប្រជុំស្ដីពីការរកដំណោះស្រាយ និងគោលនយោបាយគាំទ្រការអភិវឌ្ឍវិទ្យាសាស្ត្រ និងបច្ចេកវិទ្យាក្នុងតំបន់ ដែលធ្វើឡើងកាលពីថ្ងៃទី 13 មីនា 2023។

នៅក្នុងមជ្ឈមណ្ឌលស្រាវជ្រាវវិទ្យាសាស្ត្រ និងនវានុវត្តន៍របស់ខេត្តប៊ិញឌិញ ដែលត្រូវបានបង្កើតឡើងកាលពីឆ្នាំ 2015 នេះ មានទីតាំងស្រាវជ្រាវវិទ្យាសាស្ត្រ ស្ថានីយសង្កេតតារា អគារចក្រវាល និងសារមន្ទីរវិទ្យាសាស្ត្រជាដើម។ល។ នេះគឺជាកន្លែងប្រារព្ធកម្មវិធីទេសចរណ៍វិទ្យាសាស្ត្រដំបូងគេនៅប្រទេសវៀតណាម។

យោងតាមមេដឹកនាំខេត្តប៊ិញឌិញ ក្រោយពីមានសេចក្ដីសម្រេចចិត្តស្ដីពីយុទ្ធសាស្ត្រអភិវឌ្ឍ និងអនុវត្តវិទ្យាសាស្ត្រ បច្ចេកវិទ្យាអវកាសត្រឹមឆ្នាំ 2023 ដែលមេដឹកនាំវៀតណាមចុះហត្ថលេខាកាលពីឆ្នាំ 2021 ក្រុមប្រឹក្សាខេត្តប៊ិញឌិញក៏បានរៀបផែនការបង្កើតកិច្ចសហប្រិបត្តិការជាមួយស្ថាប័នអវកាសអន្តរជាតិមួយចំនួន រួមមានជាអាទិ៍ ទីភ្នាក់ងារអវកាសជប៉ុន (JAXA), អាម៉េរិក (NASA), បារាំង (ONERA និង CNES) ជាដើម ដើម្បីជួយដល់មជ្ឈមណ្ឌលស្រាវជ្រាវវិទ្យាសាស្ត្រ និងនវានុវត្តន៍របស់ខេត្តនេះ រៀបចំកម្មវិធីពិព័រណ៍ទាក់ទងនឹងវិស័យអវកាស និងវិទ្យាសាស្ត្រអវកាស ក្នុងបំណងផ្សព្វផ្សាយចំណេះដឹងនេះដល់សាធារណជន និងកុមារដែលស្រលាញ់វិទ្យាសាស្ត្រ។

ក៏ប៉ុន្តែ លោក ឡាំ ហាយហ្សាង (Lam Hai Giang) អភិបាលរងខេត្តប៊ិញឌិញបានស្នើឱ្យក្រសួងវិទ្យាសាស្ត្រនិងបច្ចេកវិទ្យាវៀតណាម យកចិត្តទុកដាក់បន្ថែមទៀតដើម្បីជួយគាំទ្រដល់ការអភិវឌ្ឍមជ្ឈមណ្ឌលខាងលើឱ្យទៅជាមូលដ្ឋានសម្រាប់ការសិក្សាស្រាវជ្រាវ អភិវឌ្ឍ និងប្រើប្រាស់បច្ចេកវិទ្យាអវកាស។

មជ្ឈមណ្ឌលស្រាវជ្រាវវិទ្យាសាស្ត្រ និងនវានុវត្តន៍របស់ខេត្តប៊ិញឌិញ

នៅខាងក្នុងមជ្ឈមណ្ឌលស្រាវជ្រាវវិទ្យាសាស្ត្រ និងនវានុវត្តន៍របស់ខេត្តប៊ិញឌិញ

តេឡេស្កុបទំនើបខាងក្នុងមជ្ឈមណ្ឌលស្រាវជ្រាវវិទ្យាសាស្ត្រ និងនវានុវត្តន៍របស់ខេត្តប៊ិញឌិញ

March 17, 2023

10 គ្រូសារដែលមានទ្រព្យសម្បត្តិច្រើនជាងគេបង្អស់នៅទ្វីបអាស៊ី

គ្រួសារ Ambani នៅប្រទេសឥណ្ឌា បានក្លាយជាអ្នកមានជាងគេនៅទ្វីបអាស៊ីជាលើកទីបួន ដោយមានទ្រព្យសរុបច្រើនជាង 79 ពាន់លានដុល្លារអាម៉េរិក។

យោងតាមស្ថិតិរបស់ទំព័រ Bloomberg Billionaires Index ទ្រព្យសម្បត្តិរបស់ 20 គ្រួសារដែលមានជាងគេនៅអាស៊ីក្នុងឆ្នាំនេះបានថយចុះ 17.7 ពាន់លានដុល្លារ ធៀបនឹងឆ្នាំកន្លង មកនៅត្រឹម 478.1 ពាន់លានដុល្លារ។ មូលហេតុសំខាន់ដែលនាំឱ្យមានការថយចុះនេះគឺដោយសារទ្រព្យរបស់ 5 គ្រួសារនៅឥណ្ឌា បានថយចុះសរុប 17.1 ពាន់លានដុល្លារអាម៉េរិក។

ឆ្នាំនេះ គ្រូសារលោក Mukesh Ambani ឈរលើកំពូលតារាងចំណាត់ថ្នាក់ជាលើកទីបួន។ បន្ទាប់មកគឺគ្រួសារ Hartono និងគ្រួសារ Kwok។

ខាងក្រោមនេះគឺជាគ្រួសារទាំង 10 មានជាងគេបង្អស់នៅទ្វីបអាស៊ីក្នុងឆ្នាំ 2023 ៖

10- Lee

លោក Jay Y. Lee ប្រធានក្រុមហ៊ុន Samsung Electronics

ក្រុមហ៊ុន៖ Samsung
ទីស្នាក់ការកណ្ដាល៖ កូរ៉េខាងត្បូង
ជំនាន់អ្នកគ្រប់គ្រងក្រុមហ៊ុន៖ 3
ទ្រព្យ៖ 18.5 ពាន់លានដុល្លារអាម៉េរិក

9- Tsai

លោក Daniel Tsai កូនប្រុសរបស់ Tsai Wan-tsai គ្រប់គ្រងក្រុមហ៊ុន Fubon Financial

ក្រុមហ៊ុន៖ Cathay Financial, Fubon Financial
ទីស្នាក់ការកណ្ដាល៖ កោះតៃវ៉ាន់
ជំនាន់អ្នកគ្រប់គ្រងក្រុមហ៊ុន៖ 3
ទ្រព្យ៖ 21.4 ពាន់លានដុល្លារអាម៉េរិក

8- Pao/Woo

ក្រុមហ៊ុន៖ BW Group, Wheelock
ទីស្នាក់ការកណ្ដាល៖ ហុងកុង (ប្រទេសចិន)
ជំនាន់អ្នកគ្រប់គ្រងក្រុមហ៊ុន៖ 3
ទ្រព្យ៖ 22.6 ពាន់លានដុល្លារអាម៉េរិក

7- Cheng

លោក Henry Cheng ប្រធានក្រុមហ៊ុន New World Development

ក្រុមហ៊ុន៖ New World Development, Chow Tai Fook
ទីស្នាក់ការកណ្ដាល៖ ហុងកុង (ប្រទេសចិន)
ជំនាន់អ្នកគ្រប់គ្រងក្រុមហ៊ុន៖ 4
ទ្រព្យ៖ 25.9 ពាន់លានដុល្លារអាម៉េរិក

6- Yoovidhya

លោក Saravoot Yoovidhya នាយកប្រតិបត្តិរបស់ TCP Group

ក្រុមហ៊ុន៖ TCP Group
ទីស្នាក់ការកណ្ដាល៖ ប្រទេសថៃ
ជំនាន់អ្នកគ្រប់គ្រងក្រុមហ៊ុន៖ 2
ទ្រព្យ៖ 27.4 ពាន់លានដុល្លារអាម៉េរិក

5- Chearavanont

ក្រុមហ៊ុន៖ Charoen Pokphand Group
ទីស្នាក់ការកណ្ដាល៖ ប្រទេសថៃ
ជំនាន់អ្នកគ្រប់គ្រងក្រុមហ៊ុន៖ 4
ទ្រព្យ៖ 28.2 ពាន់លានដុល្លារអាម៉េរិក

4- Mistry

ក្រុមហ៊ុន៖ Shapoorji Pallonji Group
ទីស្នាក់ការកណ្ដាល៖ ឥណ្ឌា
ជំនាន់អ្នកគ្រប់គ្រងក្រុមហ៊ុន៖ 5
ទ្រព្យ៖ 28.4 ពាន់លានដុល្លារអាម៉េរិក

3- Kwok

ក្រុមហ៊ុន៖ Sun Hung Kai Properties
ទីស្នាក់ការកណ្ដាល៖ ហុងកុង (ប្រទេសចិន)
ជំនាន់អ្នកគ្រប់គ្រងក្រុមហ៊ុន៖ 3
ទ្រព្យ៖ 34.8 ពាន់លានដុល្លារអាម៉េរិក

2- Hartono

ក្រុមហ៊ុន៖ Djarum, Bank Central Asia
ទីស្នាក់ការកណ្ដាល៖ ឥណ្ឌូណេស៊ី
ជំនាន់អ្នកគ្រប់គ្រងក្រុមហ៊ុន៖ 3
ទ្រព្យ៖ 38.8 ពាន់លានដុល្លារអាម៉េរិក

1-Ambani

លោក Mukesh Ambani (ឆ្វេង) និងលោក Anil Ambani

ក្រុមហ៊ុន៖ Reliance Industries
ទីស្នាក់ការកណ្ដាល៖ ឥណ្ឌា
ជំនាន់អ្នកគ្រប់គ្រងក្រុមហ៊ុន៖ 3
ទ្រព្យ៖ 79.3 ពាន់លានដុល្លារអាម៉េរិក

March 17, 2023

បាល់ទាត់នៅ Europa League ៖ 8 ក្រុមចុងក្រោយដែលឡើងដល់វគ្គ ¼

ក្រោយការប៉ះគ្នាប្រកបដោយភាពទាក់ទាញនៅក្នុងការប្រកួតនានានៅជើងទីពីរវគ្គ 1/8 ក្នុងរដូវកាលនេះ Europa League ក៏កំណត់បាន 8 ក្រុមចុងក្រោយដែលនឹងត្រូវប្រកួតនៅវគ្គ ¼ ក្នុងនោះក៏មាន Man United។

វេលាទៀបភ្លឺថ្ងៃទី 17 មីនា (វេលានៅកម្ពុជា) ការប្រកួតចុងក្រោយនានាក្នុងក្របខណ្ឌជើងទីពីរនៅ Europa League 2022/2023 ត្រូវបានធ្វើឡើងជាមួយនឹងការរំភើបរីករាយ និងទុក្ខសោកលាយឡំគ្នាសម្រាប់តំណាងពីរក្រុមរបស់អង់គ្លេស។

ក្នុងការប្រកួតរវាង Real Betis (អេស្ប៉ាញ) និង Man United (អង់គ្លេស) គេឃើញថា រហូតដល់នាទីទី 50 របស់តង់ទីពីរ ទើប Man United រកបានមួយគ្រាប់ ហើយក៏ជាគ្រាប់បាល់ដែលបញ្ចប់ក្ដីសង្ឃឹមរបស់ក្រុមតំណាងអេស្ប៉ាញ ដោយលទ្ធផល 1-0។

ជារួម ក្រុមរបស់គ្រូបង្វឹក Erik ten Hag បានយកឈ្នះលើគូប្រជែងសរុប 5-1 បន្ទាប់ពីការប្រកួតពីរលើក ដូច្នេះ Man United ក៏បានឡើងទៅវគ្គ ¼ នៅ Europa League។

ចំណែកការប្រកួតរវាង Arsenal (អង់គ្លេស) និង Sporting Lisbon (ព័រទុយហ្កាល់) វិញ Arsenal អស់ឱកាសបន្តដំណើរនៅ Europa League ក្នុងរដូវកាលនេះ ដោយបានទទួលបរាជ័យក្នុងលទ្ធផលសរុប 3-3 (ចាញ់ 3-5 ក្នុងការប្រកួតស៊ុតប៉េណាំងទី)។

ក្រោយការប្រកួតនានាក្នុងវគ្គ 1/8 ពានរង្វាន់ Europa League បានរកឃើញ 8 ក្រុមចុងក្រោយដែលត្រូវឡើងទៅវគ្គ ¼។ 8 ក្រុមចុងក្រោយនេះរួមមាន Man United, Sporting Lisbon, Sevilla, Feyenoord, Juventus, Leverkusen, Roma, Union St.Gilloise។

យោងតាមសហព័ន្ធបាល់ទាត់អឺរ៉ុប (UEFA) ក្រោយចប់វគ្គ 1/8 នៅ Europa League ពិធីចាប់ឆ្នោតសម្រាប់វគ្គ ¼ នឹងត្រូវបានធ្វើនៅថ្ងៃទី 17 មីនា 2023 នេះ៕

March 17, 2023

អាម៉េរិកមានប្រតិកម្មចំពោះករណី «ប៉ូឡូញផ្ដល់យន្តហោះចម្បាំងឱ្យអ៊ុយក្រែន»

មន្ត្រីសេតវិមាននិយាយថា ករណីប៉ូឡូញផ្ដល់ជំនួយជាយន្តហោះ MiG-20 ទៅឱ្យអ៊ុយក្រែន មិនប៉ះពាល់ដល់ការគណនារបស់អាម៉េរិក ទាក់ទិននឹងជំនួយផ្នែកយោធា។

លេខាសារព័ត៌មានប្រចាំសេតវិមាន Karine Jean-Pierre កាលពីថ្ងៃទី 16 មីនា បានឱ្យដឹងថា ប្រទេសប៉ូឡូញបានជូនដំណឹងដល់សហរដ្ឋអាម៉េរិកស្ដីពីការសម្រេចចិត្តផ្ដល់ជំនួយជាយន្តហោះចម្បាំងទៅឱ្យអ៊ុយក្រែន។ លោកស្រីថ្លែងថា វ៉ាស៊ីងតោននឹងបន្តសហការយ៉ាងជិតស្និទ្ធជាមួយនឹងសម្ព័ន្ធមិត្ត និងដៃគូសហការនានានៅក្នុងកិច្ចប្រឹងប្រែងជួយគាំទ្រដល់អ៊ុយក្រែន។

ចំណែកអ្នកនាំពាក្យរបស់ក្រុមប្រឹក្សាសន្តិសុខជាតិ John Kirby បានអះអាងថា ការវិវត្តថ្មីនេះ «មិនបានកែប្រែការគន់គូររបស់អាម៉េរិក» ស្ដីពីបញ្ហាផ្ដល់ជំនួយជាយន្តហោះចម្បាំង F-16 ដល់អ៊ុយក្រែន។

ថ្នាក់ដឹកនាំអាម៉េរិក រហូតមកដល់ពេលនេះនៅតែមិនទាន់យល់ព្រមផ្ដល់យន្តហោះចម្បាំងទៅឱ្យអ៊ុយក្រែន បើទោះបានផ្ដល់ជំនួយជាអាវុធធុនធ្ងន់ច្រើនប្រភេទដល់ទីក្រុងកៀវរួចហើយក៏ដោយ។

ទាក់ទងនឹងករណីប៉ូឡូញផ្ដល់ជំនួយ MiG-29 ដល់អ៊ុយក្រែន រដ្ឋមន្ត្រីការបរទេសអាម៉េរិក Antony Blinken ក៏បានសង្កត់ធ្ងន់ថា នេះគឺជាគោលនយោបាយដោយឡែករបស់ប្រទេសនីមួយៗ។

ប្រធានាធិបតីប៉ូឡូញ លោក Andrzej Duda បានឱ្យដឹងថា ប្រទេសនេះមានយន្តហោះចម្បាំង MiG-29 ពី 10 ទៅ 20 គ្រឿង។ ប៉ូឡូញនឹងផ្ទេរទៅឱ្យអ៊ុយក្រែនចំនួនបួនគ្រឿងដំបូង។ យន្តហោះ MiG-29 ក្រៅពីនេះ កំពុងត្រូវបានត្រៀម ថែទាំ ហើយអាចនឹងត្រូវបានផ្ដល់ឱ្យអ៊ុយក្រែនជាបន្តបន្ទាប់ ដោយប្រើពេលពី 4-6 សប្ដាហ៍។

រដ្ឋមន្ត្រីការពារជាតិ Mariusz Blaszczak ថ្លែងថា ប៉ូឡូញចង់ផ្ទេរយន្តហោះចម្បាំងទៅឱ្យអ៊ុយក្រែនតាមរយៈយន្តការសម្ព័ន្ធមិត្ត ក្នុងនោះមានស្លូវ៉ាគីរួចទៅហើយ។ ចំនួនសមាជិកនៃសម្ព័ន្ធមិត្តដែលផ្ដល់ជំនួយជាយន្តហោះចម្បាំងនេះអាចកើនឡើងនៅពេលអនាគត។

ក្រោយពីផ្ដល់ MiG-29 ទៅឱ្យអ៊ុយក្រែន ទ័ពអាកាសប៉ូឡូញនឹងធ្វើទំនើបកម្មឡើងវិញ ដោយប្រើប្រាស់យន្តហោះចម្បាំង FA-50 របស់កូរ៉េខាងត្បូង និងក្រោយមកគឺ F-35 ទិញពីសហរដ្ឋអាម៉េរិក៕

March 17, 2023

Author: សឿន សំណាង