សឿន សំណាង - La Reine Media

តារាចម្រៀងនិម្មិត Hatsune Miku រកប្រាក់ចំណូលបានរាប់សិបលានដុល្លារអាម៉េរិក/ឆ្នាំ

Hatsune Miku ដែលជាតារាចម្រៀងនិម្មិតលំដាប់កំពូលរបស់ពិភពលោក ធ្លាប់បើកឆាកប្រគំតន្ត្រីរបស់ Lady Gaga និងធ្វើជាតារាម៉ូដែលឱ្យ Louis Vuitton រកប្រាក់ចំណូលបានជាង 35 លានដុល្លារអាម៉េរិកជារៀងរាល់ឆ្នាំ។

ទំព័របណ្ដាញសង្គមរបស់ Hatsune Miku កាលពីថ្ងៃទី 17 មីនា 2023 បានប្រកាសថា នាងនឹងប្រារព្ធកម្មវិធីប្រគំតន្ត្រីតាមអនឡាញនៅរដូវស្លឹកឈើជ្រុះឆ្នាំនេះ ក្នុងនោះក៏នឹងមានបទ Imaginary Love Story រួមនឹងផលិតករចម្រៀងជនជាតិអាម៉េរិក Synthion។

ទំព័រ Asagei អះអាងថា ក្នុងរយៈពេល 16 ឆ្នាំក្រោយការបង្ហាញខ្លួន Hatsune Miku «នៅតែជាក្មេងស្រីជំទង់ដដែល» និងនៅមានភាពទាក់ទាញដូចថ្ងៃដំបូង។ មិនមែនជាតារាចម្រៀងនិម្មិតដំបូងគេ ប៉ុន្តែ Miku គឺជាឈ្មោះដែលលេចធ្លោជាងគេ។ នាងគឺជាផលិតផលបច្ចេកវិទ្យារបស់ Crypton Future Media ដែលត្រូវបានបង្កើតឡើងកាលពីឆ្នាំ 2007។ Hatsune Miku ត្រូវបានប្រឌិតឡើងជាក្មេងស្រីជំទង់អាយុ 16 ឆ្នាំ មានកម្ពស់ 1.58 ម៉ែត្រ និងទម្ងន់ 42 គីឡូក្រាម ព្រមទាំងមានភ្នែកមូលៗ និងមានសក់ពណ៌ខៀវខ្ចីវែងអន្លាយ។ សំឡេងច្រៀងរបស់នាងត្រូវបានក្រុមហ៊ុនអភិវឌ្ឍឡើយដោយយោងទៅតាមសំឡេងរបស់តារាចម្រៀង Saki Fujita រួមផ្សំជាមួយនឹងកម្មវិធីសំឡេង Vocaldoid។

Hatsune Miku ទទួលបានការសាទរយ៉ាងខ្លាំង និងមានវត្តមាននៅក្នុងបណ្ដាភាពយន្តជីវចល និងជួយឱ្យក្រុមហ៊ុនផលិតរបស់លេងនានារកប្រាក់ចំណូលបានច្រើនជាងមុន។ យោងតាម Itmedia គិតត្រឹមថ្ងៃទី 12 កញ្ញា 2007 Miku រកចំណូលបាន 57.5 លានយេន (439,784 ដុល្លារអាម៉េរិក) និងបានក្លាយជាតារាចម្រៀងនិម្មិតដែលមានតម្លៃខ្លួនខ្ពស់ជាងគេលើលោកនាសម័យនោះ។ ចាប់ពីខែសីហា 2008 ដល់ខែមីនា 2012 Hatsune Miku រកបានជាង 10 ពាន់លាន (10,000,000,000) យេន (120 លានដុល្លារអាម៉េរិក ឆ្នាំ 2012) នេះបើតាមវិទ្យាស្ថានស្រាវជ្រាវ Nomura។

មកដល់បច្ចុប្បន្ន តារាចម្រៀងនិម្មិត Hatsune Miku មានចម្រៀងជាង 100,000 បទនៅក្នុងដៃ ក្នុងនោះមានតាំងពីចង្វាក់ ប៉ប់ និង EDM។ល។ Hatsune Miku ធ្វើសកម្មភាពជាច្រើនក្នុងវិស័យសិល្បៈ រួមមាន ច្រៀងលើឆាកតន្ត្រីអនឡាញ ច្រៀងលើឆាកផ្ទាល់ លក់ថាសចម្រៀង និងធ្វើជាតំណាងផលិតផលជាដើម។ នាងក៏ចូលរួមក្នុងវិស័យបង្ហាញម៉ូដសម្លៀកបំពាក់ផងដែរ។

យោងតាម Paper នាង Hatsune Miku មានអ្នកគាំទ្ររាប់សិបលាននាក់នៅទូទាំងពិភពលោក និងរកចំណូលបានប្រហែល 35.35 លានដុល្លារជារៀងរាល់ឆ្នាំ ស្មើនឹងប្រាក់ចំណូលរបស់កំពូលតារាចម្រៀងមួយចំនួននៅប្រទេសចិន៕

March 23, 2023

អាម៉េរិកអំពាវនាវដល់សមាជិកតុលាការ ICC អនុវត្តដីកាចាប់ខ្លួនលោក ពូទីន

រដ្ឋមន្ត្រីក្រសួងការបរទេសអាម៉េរិក លោក Antony Blinken បានអំពាវនាវសូមឱ្យគ្រប់សមាជិក ICC គោរពតាមដីកាដែលតុលាការព្រហ្មទណ្ឌអន្តរជាតិ (ICC) បានបញ្ជាឱ្យចាប់ខ្លួនប្រធានាធិបតីរុស្ស៊ី លោក វ្ល៉ាឌីមៀ ពូទីន។

ក្នុងសវនាការនៅសភាជាន់ខ្ពស់អាម៉េរិកកាលពីថ្ងៃទី 22 មីនា តំណាងរាស្ត្រ Lindsey Graham បានសួរលោក Blinken ថា តើវ៉ាស៊ីងតោននឹងចាប់ខ្លួនប្រធានាធិបតីរុស្ស៊ី ឬទេ បើសិនលោក ពូទីន មកកាន់ទឹកដីអាម៉េរិក។

«ដូចដែលអស់លោកបានដឹងហើយ យើងមិនមែនជាសមាជិករបស់តុលាការព្រហ្មទណ្ឌអន្តរជាតិ (ICC) ដូច្នេះខ្ញុំមិនចង់និយាយដល់សេណារីយោនោះ» លោក Blinken ឆ្លើយដូច្នេះ និងបន្តថា «ខ្ញុំក៏មិនគិតថា លោក ពូទីន មានគម្រោងមកកាន់សហរដ្ឋអាម៉េរិកឆាប់ៗនេះ»។

លោក Graham បន្តសួរថា លោក Blinken «លើកទឹកចិត្តឱ្យសម្ព័ន្ធមិត្តនៅអឺរ៉ុបបញ្ជូនខ្លួនប្រធានាធិបតីរុស្ស៊ី ទៅឱ្យតុលាការ ឬអត់»។ រដ្ឋមន្ត្រីការបរទេសអាម៉េរិកក៏សង្កត់ធ្ងន់ថា «ខ្ញុំគិតថា រាល់សមាជិក ICC សុទ្ធតែត្រូវអនុវត្តកាតព្វកិច្ចរបស់ខ្លួន»។

ប្រធានាធិបតីរុស្ស៊ី លោក វ្ល៉ាឌីមៀ ពូទីន និងស្នងសិទ្ធិកុមាររុស្ស៊ី លោកស្រី Maria Lvova-Belova ជួបពិភាក្សាគ្នាកាលពីថ្ងៃទី 16 កុម្ភៈ

កាលពីថ្ងៃទី 17 មីនា 2023 តុលាការឧក្រិដ្ឋកម្មអន្តរជាតិ (ICC) បានចេញដីកាចាប់ខ្លួនប្រធានាធិបតីរុស្ស៊ី លោក វ្ល៉ាឌីមៀ ពូទីន និងស្នងការរបស់ប្រធានាធិបតីរុស្ស៊ីទទួលបន្ទុកសិទ្ធិកុមារ Maria Lvova-Belova ក្រោមបទចោទថា «នាំកុមារអ៊ុយក្រែនទៅកាន់រុស្ស៊ីដោយមិនស្របច្បាប់»។ ICC យល់ថា សកម្មភាពខាងលើរបស់រុស្ស៊ីត្រូវបានធ្វើឡើងបន្ទាប់សង្គ្រាមនៅអ៊ុយក្រែនបានផ្ទុះឡើង។

យោងតាមការសម្រេចចិត្តរបស់ ICC លោក ពូទីន «ទទួលខុសត្រូវដោយផ្ទាល់នៅពេលធ្វើសកម្មភាព» ក៏ដូចជា «មិនបានគ្រប់គ្រង ឬអនុញ្ញាតឱ្យស្ថាប័នស៊ីវិល ឬយោធាក្រោមឱវាទប្រព្រឹត្តអំពើនេះ»៕

March 23, 2023

ក្រុមហ៊ុនរថយន្តអគ្គិសនីចិន Neta នាំចេញ 3,600 គ្រឿងទៅកាន់ទីផ្សារថៃ

ក្រុមហ៊ុនផលិតរថយន្តអគ្គិសនីចិន Neta Automobile កំពុងនាំចេញរថយន្តអគ្គិសនីរាប់ពាន់គ្រឿងទៅកាន់ទីផ្សារថៃ នៅក្នុងការប្រឹងប្រែងវាយលុកតំបន់អាស៊ីអាគ្នេយ៍។

នៅថ្ងៃទី 21 មីនា រថយន្តអគ្គិសនី Neta V ចំនួន 3,600 គ្រឿង ត្រូវបានដឹកជញ្ជូនពីកំពង់ផែ Nansha របស់ប្រទេសចិន ទៅកាន់ប្រទេសថៃ។ នេះគឺជាទំនិញនាំចេញធំបំផុតសម្រាប់ក្រុមហ៊ុនផលិតរថយន្តមួយដែលបានបង្កើតឡើងនៅប្រទេសចិន។

ក្រុមហ៊ុន Neta ឱ្យដឹងថា រថយន្ត Neta V ជាង 2,000 គ្រឿងត្រូវបានលក់នៅប្រទេសថៃ និងឈរលំដាប់ទីពីរក្នុងចំណោមម៉ូដែលរថយន្តអគ្គិសនីដែលបានចុះឈ្មោះផ្លាកលេខក្នុងពីរខែជាប់ៗគ្នានៅប្រទេសនេះ។

Neta បានបង្ហាញរថយន្តអគ្គិសនី Neta V ចង្កូតស្ដាំនៅប្រទេសថៃ កាលពីថ្ងៃទី 24 សីហា 2022 ហើយនេះគឺជាម៉ូដែលដំបូងរបស់ពួកគេដែលត្រូវបានដាក់លក់ក្នុងទីផ្សារឡានចង្កូតស្ដាំមួយនេះ។

ក្រុមហ៊ុននេះបានឱ្យដឹងថា ពួកគេមានហាងលក់រថយន្តដែលទទួលបានសិទ្ធិចែកចាយចំនួន 30 នៅទូទាំងប្រទេសថៃ គិតត្រឹមចុងឆ្នាំ 2022។ រថយន្តអគ្គិសនីរបស់ Neta ពីរម៉ូដែលគឺ Neta U និង Neta V មានវត្តមានច្រើននៅអាស៊ីអាគ្នេយ៍ អាស៊ីខាងត្បូង និងមជ្ឈិមបូព៌ា។ ក្រុមហ៊ុន Neta ក៏មានការិយាល័យតំណាងមួយនៅអឺរ៉ុបផងដែរ។

នេះគឺជាទំនិញនាំចេញធំបំផុតសម្រាប់ក្រុមហ៊ុនផលិតរថយន្តមួយដែលបានបង្កើតឡើងនៅប្រទេសចិន

កាលពីថ្ងៃទី 10 មីនា Neta បានសម្ពោធបើកការដ្ឋានសាងសង់រោងចក្រមួយនៅប្រទេសថៃ ដើម្បីផលិតរថយន្តអគ្គិសនីសម្រាប់ការនាំចេញទៅកាន់បណ្ដាប្រទេសនៅអាស៊ីអាគ្នេយ៍។ តាមគម្រោង រោងចក្រនេះនឹងចាប់ផ្ដើមការផលិតនៅដើមឆ្នាំ 2024 ហើយគ្រោងនឹងផលិតបាន 20,000 គ្រឿងជារៀងរាល់ឆ្នាំ៕

March 23, 2023

Ronaldo ជិតមានឱកាសបំបែកកំណត់ត្រាស្ដីពីចំនួនប្រកួតលក្ខណៈអន្តរជាតិ

(ព័រទុយហ្កាល់) – Cristiano Ronaldo នឹងក្ដោបក្ដាប់តំណែងកីឡាករដែលប្រកួតលក្ខណៈអន្តរជាតិបានច្រើនជាងគេបំផុត បើសិនទាត់ឱ្យព័រទុយហ្កាល់ក្នុងប្រកួតដំបូងនៅវគ្គជម្រុះ Euro 2024 នាថ្ងៃនេះ។

Ronaldo លេងឱ្យក្រុមជម្រើសជាតិព័រទុយហ្កាល់បាន 196 ប្រកួត។ ខ្សែប្រយុទ្ធវ័យ 38 ឆ្នាំរូបនេះ និងកីឡាករជម្រើសជាតិកូវ៉ែត Badr Al-Mutawa គឺជាកីឡាករដែលបានប្រកួតលក្ខណៈអន្តរជាតិច្រើនជាងគេបំផុត។ បើសិនជាបានចូលរួមលេងក្នុងការប្រកួតរវាងព័រទុយហ្កាល់ និង លិចតិនស្តាញ (Liechtenstein) នៅថ្ងៃទី 23 មីនានេះ Ronaldo នឹងបំបែកកំណត់ត្រាស្ដីពី «កីឡាករប្រកួតលក្ខណៈអន្តរជាតិបានច្រើនជាងគេបំផុត»។

ការប៉ះនឹងលិចតិនស្តាញក៏ជាការប្រកួតដំបូងរបស់ព័រទុយហ្កាល់នៅវគ្គជម្រុះ Euro 2024។ បីថ្ងៃក្រោយមកទៀត ក្នុងជើងទីពីរ ព័រទុយហ្កាល់នឹងធ្វើជាភ្ញៀវនៅលើវាលស្មៅរបស់គូប្រកួតលំដាប់ «ល្អិត» មួយផ្សេងទៀត គឺ លុចសំបួ។

Ronaldo បង្ហាញខ្លួនក្នុងក្រុមជម្រើសជាតិកាលពីអាយុ 18 ឆ្នាំ នៅពេលចូលទាត់ជំនួស Luis Figo ក្នុងការប្រកួតមិត្តភាពជាមួយក្រុមរបស់កាហ្សាក់ស្ថាន។ ក្នុងការប្រកួតលើកទី 8 ដែលប៉ះនឹងក្រិក Ronaldo ស៊ុតបញ្ចូលទីជាលើកដំបូងសម្រាប់ការប្រកួតលក្ខណៈអន្តរជាតិ។

កាលពីខែកញ្ញា 2022 បន្ទាប់ពីស៊ុតបញ្ចូលទីរបស់អៀរឡង់បានពីរគ្រាប់ Ronaldo ក៏បានយកឈ្នះលើ Ali Daei ដើម្បីក្លាយជាកីឡាករដែលទាត់បញ្ចូលទីបានច្រើនជាងគេបំផុតលើឆាកអន្តរជាតិ។ CR7 កំពុងកាន់កាប់ 118 គ្រាប់សម្រាប់ក្រុមជម្រើសជាតិ ច្រើនជាងឆ្ងាយធៀបនឹង 109 គ្រាប់របស់ Ali Daei អតីតខ្សែប្រយុទ្ធរបស់អ៊ីរ៉ាក់។

Al-Mutawa បង្កើតបានកំណត់ត្រា 196 ប្រកួតលក្ខណៈអន្តរជាតិនៅក្នុងការប្រកួតដែលកូវ៉ែតចាញ់ហ្ស៊កដានី 0-3 នៅវគ្គជម្រុះ Asian Cup 2023 កាលពីខែមិថុនា 2022។ ខ្សែប្រយុទ្ធវ័យ 37 ឆ្នាំរូបនេះ រកបាន 56 គ្រាប់ជូនក្រុមជម្រើសជាតិកូវ៉ែត។

ត្រលប់មកកាន់រឿង Ronaldo វិញ គ្រូបង្វឹក Roberto Martinez របស់ព័រទុយហ្កាល់ នៅតែចាត់ទុក Ronaldo ថាជាផ្នែកមួយនៃគម្រោងឆ្ពោះទៅកាន់ Euro 2024 និង World Cup 2026។ ប្រការនេះមានន័យថា CR7 មានឱកាសបំបែកកំណត់ត្រាខាងលើ។ កាលពីថ្ងៃទី 20 មីនា 2023 Ronaldo ក៏បានត្រលប់ទៅកាន់ក្រុមជម្រើសជាតិព័រទុយហ្កាល់ហើយដែរ៕

March 23, 2023

បាតុភូត «សូរ្យគ្រាសកូនកាត់» ដ៏កម្រនឹងកើតឡើងឆាប់ៗនេះ

បាតុភូតសូរ្យគ្រាសមួយផ្នែក សូរ្យគ្រាសពេញលេញ និងសូរ្យគ្រាសរាងចិញ្ចៀនដ៏កម្រ នឹងកើតឡើងក្នុងថ្ងៃទី 20 មេសា 2023 ខាងមុខ។

នៅថ្ងៃទី 20 មេសា 2023 ប្រជាជនដែលស្ថិតនៅក្នុងតំបន់ភ្លឺក្នុងវីដេអូនេះ អាចមើលឃើញបាតុភូតសូរ្យគ្រាសកូនកាត់ដ៏កម្រកើតមាន អាស្រ័យលើអាកាសធាតុ។

បាតុភូតសូរ្យគ្រាសកូនកាត់គឺជាព្រឹត្តិការណ៍ដែលកើតឡើងពីការរួមផ្សំរវាងបាតុភូតសូរ្យគ្រាសមួយផ្នែក សូរ្យគ្រាសទាំងស្រុង និងសូរ្យគ្រាសរាងចិញ្ចៀន។ ក៏ប៉ុន្តែ គ្រប់គ្នាមិនអាចមើលឃើញបាតុភូតទាំងនេះក្នុងពេលតែមួយឡើង។

សូរ្យគ្រាសដែលមានរូបរាងដូចចិញ្ចៀនកើតឡើងនៅពេលព្រះចន្ទគោចរឆ្លងកាត់តំបន់កន្លោះផែនដី និងព្រះអាទិត្យ ប៉ុន្តែគម្លាតនេះមិនជិតគ្រប់គ្រាន់ ដូច្នេះក៏មិនបាំងព្រះអាទិត្យទាំងស្រុងបាន ដោយបន្សល់ទុករង្វង់មូលស្ដើងនៅលើព្រះអាទិត្យ ដែលអ្នកវិទ្យាសាស្ត្រហៅថា «រង្វង់ភ្លើង»។

ចំណែកសូរ្យគ្រាសពេញលេញ (ទាំងស្រុង) វិញ កើតឡើងនៅពេលព្រះអាទិត្យទាំងមូលត្រូវបានបិទបាំងដោយព្រះចន្ទ។ សូរ្យគ្រាសពេញលេញអាចមើលឃើញពីតំបន់ Exmouth របស់អូស្ត្រាលី (1នាទី), ទីម័រខាងកើត (1នាទី និង 14 វិនាទី), Papua ខាងលិចរបស់ឥណ្ឌូណេស៊ី (1នាទីនិង 9 វិនាទី)។

បាតុភូត «សូរ្យគ្រាសកូនកាត់» ដ៏កម្រនឹងកើតឡើងក្នុងថ្ងៃទី 20 មេសា 2023 ខាងមុខ

បាតុភូតសូរ្យគ្រាសនឹងប្រែពីរូបរាងចិញ្ចៀនទៅជាសូរ្យគ្រាសពេញលេញ ហើយវិលទៅរកពីរចំណុចជាក់លាក់ ប៉ុន្តែ សុទ្ធតែស្ថិតនៅតំបន់ឆ្ងាយៗលើសមុទ្រ។

សូរ្យគ្រាសកូនកាត់គឺជាប្រភេទសូរ្យគ្រាសដែលកម្រនឹងកើតឡើង ដោយវាបង្ហាញខ្លួនតែប៉ុន្មានដងប៉ុណ្ណោះនៅក្នុងមួយសតវត្សរ៍ និងត្រូវបានចាត់ទុកថាជាបាតុភូតធម្មជាតិដ៏អស្ចារ្យបំផុត៕

March 23, 2023

អ្នកវិទ្យាសាស្ត្ររកឃើញ RNA និងវីតាមីន B3 លើអាចម៍ផ្កាយក្បែរផែនដី

បណ្ដាម៉ូលេគុលសរីរាង្គត្រូវបានរកឃើញក្នុងសំណាកដីដែលយកពីអាចម៍ផ្កាយ Ryugu ដោយយានអវកាស របស់ប្រទេសជប៉ុន។

ក្រុមអ្នកស្រាវជ្រាវបានវិភាគទៅលើសំណាកដីរបស់អាចម៍ផ្កាយ Ryugu ដែលយាន Hayabusa2 របស់ទីភ្នាក់ងារអវកាសជប៉ុនប្រមូលបាន និងរកឃើញ uracil ដែលជាឯកតាមួយក្នុងចំណោមឯកតាព័ត៌មានដែលបង្កើតបានជា RNA ជាម៉ូលេគុលផ្ទុកការបញ្ជាក់អំពីវិធីកកើត និងសកម្មភាពរបស់សត្វមានជីវិត។

ក្រៅពីរបកគំហើញខាងលើ នៅក្នុងសំណាកដដែលនោះ អ្នកវិទ្យាសាស្ត្រក៏រកឃើញអាស៊ីត nicotinic ឬហៅថា niacin ឬវីតាមីន B3 ដែលជាកត្តាសំខាន់ចំពោះការរំលាយអាហាររបស់សត្វមានជីវិត។

ការរកឃើញរបស់ក្រុមអ្នកវិទ្យាសាស្ត្រអន្តរជាតិ ដែលដឹកនាំដោយសាស្ត្រាចារ្យ Yasuhiro Oba នៅសាកលវិទ្យាល័យ Hokkaido បានផ្ដល់ភស្ដុតាងបន្ថែមស្ដីពីរចនាសម្ព័ន្ធជីវិតនៅក្នុងទីអវកាស ដែលពួកវាអាចជាប់នៅលើអាចម៍ផ្កាយ និងធ្លាក់មកកាន់ផែនដី។ របកគំហើញនេះត្រូវបានប្រកាសកាលពីថ្ងៃទី 13 មីនា នៅលើទស្សនាវដ្ដី Nature Communications។

Ryugu គឺជាអាចម៍ផ្កាយដែលសម្បូរកាបូន និងមានរូបរាងស្រដៀងត្បូងពេជ្រ មានទទឹងមួយគីឡូម៉ែត្រ។ Hayabusa2 គឺជាបេសកកម្មដំបូងដែលបាននាំសំណាក់ដីពីខាងក្រោមស្រទាបលើរបស់អាចម៍ផ្កាយ ត្រលប់មកកាន់ផែនដី៕

March 22, 2023

Ronaldo ទទួលបានពានរង្វាន់បន្ថែមទៀតនៅ Saudi League

(អារ៉ាប៊ីសាអូឌីត) – ការស៊ុតបាល់ពិន័យរបស់ Cristiano Rolando ពីចំណុច 30 ម៉ែត្រ ចូលទី Abaha ត្រូវបានជ្រើសរើសជាគ្រាប់បាល់ស្អាតបំផុតនៅវគ្គ 21 របស់ពានរង្វាន់បាល់ទាត់ Saudi League កាលពីថ្ងៃទី 21 មីនា 2023។

គ្រាប់បាល់ខាងលើរបស់ CR7 ទទួលបានសំឡេងឆ្នោតគាំទ្រ 54.6% នៅលើគេហទំព័ររបស់ Saudi League ខ្ពស់ជាងគេបង្អស់នៅក្នុងតារាងជ្រើសរើស។ ខ្សែបម្រើ Igor Coronado (Al Ittihad) ឈរលំដាប់លេខពីរដោយទទួលបានសំឡេងគាំទ្រ 30% ខណៈដែលគ្រាប់បាល់របស់ Salem Al-Dawsari (Al Hilal) ទទួលបាន 15.4% ត្រូវជាប់លេខបី។

នេះគឺជាគ្រាប់បាល់ទី 9 របស់ Ronaldo ក្រោយ 8 ប្រកួតនៅ Saudi League និងជាគ្រាប់បាល់ទីពីរដែលជួយឱ្យ CR7 ទទួលបានពានរង្វាន់គ្រាប់បាល់ស្អាតបំផុតនៅវគ្គដំបូង។ លើកដំបូងដែល CR7 ធ្វើបានដូច្នេះគឺនៅគ្រាប់បាល់ដែលជួយឱ្យ Al Nassr នាំមុខ Damac 2-0 នៅវគ្គ 18 កាលពីព្រលប់ថ្ងៃទី 25 កុម្ភៈ ដោយទទួលបានសំឡេងគាំទ្រ 78% នៅក្នុងការបោះឆ្នោតជ្រើសរើស។

គ្រាប់បាល់ទី 9 របស់ Ronaldo កាលពីព្រលប់ថ្ងៃទី 18 មីនា បានជួយឱ្យ Al Nassr ស្មើ Abha 1-1 មុនពេលខ្សែប្រយុទ្ធ Anderson Talisca ស៊ុតចូលមួយគ្រាប់ ជួយឱ្យ Al Nassr ឈ្នះ 2-1។

ចាប់តាំងពីបានមកលេងឱ្យ Al Nassr កំពូលតារាបាល់ទាត់ព័រទុយហ្កាល់បានទទួលពានរង្វាន់បុគ្គលជាច្រើន មានដូចជា «កីឡាករឆ្នើមបំផុត» នៅវគ្គ 16 និង 18 រួមនឹងប្រចាំខែកុម្ភៈ នៅ Saudi League។ Ronaldo ក៏ត្រូវបានសហព័ន្ធបាល់ទាត់អាស៊ី (AFC) ជ្រើសរើសជាកីឡាករឆ្នើមបំផុតក្នុងខែកុម្ភៈប្រចាំតំបន់អាស៊ីខាងលិច កាលពីថ្ងៃទី 06 មីនា។ សហព័ន្ធបាល់ទាត់ពិភពលោក (FIFA) ក៏ធ្លាប់បានសរសើរ Ronaldo ថា «អាយុគ្រាន់តែជាតួលេខ» បន្ទាប់ពីកីឡាករវ័យ 38 ឆ្នាំរូបនេះស៊ុតបញ្ចូលទីជាបន្តបន្ទាប់ឱ្យក្លឹប Al Nassr។

បច្ចុប្បន្ន CR7 កំពុងឈរលំដាប់ទី 6 ក្នុងបញ្ជីចំណាត់ថ្នាក់កីឡាករដែលរកបានគ្រាប់បាល់ច្រើនជាងគេនៅ Saudi League តិចជាងលំដាប់លេខមួយរបស់ Hamdallah (ក្លឹប Al-Ittihad) ចំនួន 6 គ្រាប់។ រដូវកាលនេះនៅសល់ 9 វគ្គទៀត ដូច្នេះ Ronaldo នៅមានឱកាសនាំមុខគេនាពេលខាងមុខ។ CR7 ធ្លាប់បានក្លាយជាស្ដេចកម្ទេចទីនៅ លីគកំពូលអង់គ្លេស (English Premier League) រដូវកាល 2007-2008, La Liga 2010-2011, 2013-2014, 2014-2015, និង Serie A 2020-2021។ ក្រៅពីនេះ គាត់ក៏កាន់កាប់កំណត់ត្រាស្ដេចកម្ទេច ទី Champions League ចំនួន 7 លើកផងដែរ។

https://www.youtube.com/watch?v=C7ZCBNdoh1M

គ្រាប់បាល់ទី 9 របស់ Ronaldo កាលពីព្រលប់ថ្ងៃទី 18 មីនា បានជួយឱ្យ Al Nassr ស្មើ Abha 1-1 មុនពេលខ្សែប្រយុទ្ធ Anderson Talisca ស៊ុតចូលមួយគ្រាប់ ជួយឱ្យ Al Nassr ឈ្នះ 2-1

នៅក្នុងការប្រកួតបន្ទាប់ ក្លឹប Al Nassr របស់ Ronaldo នឹងធ្វើជាភ្ញៀវនៅឯកីឡដ្ឋានរបស់ក្រុមបាតពូល Al Adalah នាព្រលប់ថ្ងៃទី 04 មេសា ក្នុងវគ្គ 21 របស់ Saudi League៕

March 22, 2023

ប្រទេសចិនដាក់បណ្ដែតទឹកកប៉ាល់ដើរដោយអ៊ីដ្រូសែន-លីចូម

កប៉ាល់សេវាកម្មដំបូងរបស់ប្រទេសចិនដែលដំណើរការដោយថ្មផ្ទុកថាមពលអ៊ីដ្រសែន-លីចូម 500 kW កាលពីថ្ងៃទី 20 មីនា ត្រូវបានដាក់ឱ្យដំណើរការនៅទីក្រុង Zhongshan ខេត្ត Guangdong។

ជលយានដែលត្រូវបានហៅថា កប៉ាល់ Three Gorges hydrogen ship No.1 នេះ ប្រើប្រាស់ប្រព័ន្ធថ្មផ្ទុកឥន្ធនៈអ៊ីដ្រូសែន និងថ្មផ្ទុកអគ្គិសនីលីចូមផលិតក្នុងស្រុក។ វាគឺជាជំហានថ្មី និងសំខាន់មួយទៀតសម្រាប់វិស័យសាងសង់កប៉ាល់ដើរដោយថាមពលថ្មីរបស់ប្រទេសចិន ជាការបើកផ្លូវឱ្យមានការប្រើប្រាស់បច្ចេកវិទ្យាអ៊ីដ្រូសែនសម្រាប់កប៉ាល់ក្នុងស្រុក។

ដោយមានកម្លាំង 500 kW កប៉ាល់នេះអាចធ្វើដំណើរបាន 200 គីឡូម៉ែត្រ និងល្បឿន 28 គីឡូម៉ែត្រ/ម៉ោង។ កប៉ាល់នេះសមស្របសម្រាប់ការរក្សាភាពស្អាតនៃបរិស្ថាន ដោយវាប្រើប្រាស់ថាមពលតិច និងមិនសូវមានសំឡេងរំខានដូចកប៉ាល់ដំណើរការដោយប្រេងម៉ាស៊ូត និងប្រេងសាំង។

កប៉ាល់ Three Gorges hydrogen ship No.1 នឹងត្រូវបានប្រើប្រាស់ដើម្បីដឹកជញ្ជូន ល្បាត និងបំពេញភារកិច្ចបន្ទាន់នៅក្នុងតំបន់បឹងស្តុកទឹក Three Gorges (Sanxia)។

ក្រុមហ៊ុនសាងសង់កប៉ាល់រដ្ឋចិន (CSSC) និងក្រុមហ៊ុនអគ្គិសនីចិន Yangtze Power គឺជាអ្នកសាងសង់កប៉ាល់នេះ នៅក្រោមការគ្រប់គ្រងរបស់ក្រុមហ៊ុន Chana Three Gorges (CTG) និងបានចាប់ផ្ដើមការសាងសង់កាលពីខែឧសភា 2022។

ប្រទេសចិនកំពុងមានវឌ្ឍនភាពយ៉ាងខ្លាំងក្លា និងឆាប់រហ័ស ទាក់ទងនឹងការសាងសង់កប៉ាល់ដែលប្រើប្រាស់ថាមពលអ៊ីដ្រូសែន។ ទីផ្សារថ្មផ្ទុកថាមពលអ៊ីដ្រូសែនក្នុងស្រុកត្រូវបានព្យាករថាអាចសម្រេចបានជាង 10 ពាន់លានយុន ប្រហែលនឹង 1.45 ពាន់លានដុល្លារអាម៉េរិក។ នេះក៏ព្រោះតែប្រទេសចិនមានគោលនយោបាយជំរុញ លើកទឹកចិត្តដល់ការផលិត និងប្រើប្រាស់កប៉ាល់ដើរដោយថាមពលកកើតឡើងវិញ ក្នុងបំណងកាត់បន្ថយការបំភាយកាបូនដែលជាឧស្ម័នធ្វើឱ្យផែនដីឡើងកម្ដៅ៕

March 22, 2023

គ្រូបង្វឹកក្រុមអាហ្សង់ទីនបង្ហើបពីរឿងអនាគតរបស់ Lionel Messi

គ្រូបង្វឹក Lionel Scaloni បានបង្ហើបព័ត៌មានខ្លះៗស្ដីពីអនាគតរបស់ Lionel Messi នៅក្នុងសន្និសីទសារព័ត៌មានមុនការប្រកួតមិត្តភាពអន្តរជាតិរវាងប៉ាណាម៉ា និង គូរ៉ាកាវ (Curacao)។

ថ្មីៗនេះ គ្រូបង្វឹក Lionel Scaloni បន្តរម្លឹកដល់អនាគតរបស់ Messi នៅក្នុងក្រុមជម្រើសជាតិអាហ្សង់ទីន បន្ទាប់ពីដណ្ដើមបានជើងឯក World Cup 2022 នៅកាតា។ ក្នុងសន្និសីទសារព័ត៌មានមុនការប្រកួតរវាង ប៉ាណាម៉ា និងគូរ៉ាកាវ គ្រូបង្វឹកវ័យ 44 ឆ្នាំបានឱ្យដឹងថា «Messi ប្រាកដជាតែងតែនៅទីនេះ និងរហូតដល់គាត់ចង់ចាកចេញដោយខ្លួនឯង។ ប្រាកដណាស់ Messi នឹងបន្តនៅជាមួយពួកយើង»។

«គាត់មានក្ដីសុខពេលបាននៅលើវាលស្មៅ និងក្នុងពណ៌អាវរបស់ប្រទេសជាតិ។ ប្រការនោះនឹងល្អបំផុតសម្រាប់ពួកយើង ហើយបើផ្ទុយពីនេះ ខ្ញុំនឹងព្យាយាមបញ្ចុះបញ្ចូលគាត់»។

Messi និងក្រុមជម្រើសជាតិអាហ្សង់ទីន បានជួបជុំគ្នាជាផ្លូវការនៅដើមសប្ដាហ៍នេះដើម្បីត្រៀមខ្លួនសម្រាប់ការប្រកួតមិត្តភាពអន្តរជាតិពីរប្រកួត។

Messi ទទួលបានការអបអរស្វាគមន៍យ៉ាងកក់ក្ដៅពីអ្នកគាំទ្រនៅពេលគាត់ត្រលប់ទៅដល់ប្រទេសអាហ្សង់ទីន

ក្រុមអាហ្សង់ទីននឹងប៉ះក្រុមប៉ាណាម៉ានៅម៉ោង 07 ព្រឹក ថ្ងៃទី 24 មីនា (ម៉ោងនៅកម្ពុជា)។ បួនថ្ងៃក្រោយមក ពួកគេនឹងប្រកួតជាមួយគូរ៉ាកាវនៅកីឡដ្ឋាន Madre de Ciudades របស់អាហ្សង់ទីន៕

March 22, 2023

ក្រុមហ៊ុនផលិតរថយន្ត Ford បញ្ចេញរថយន្ត Explorer កំណែអគ្គិសនី

ក្រុមហ៊ុន Ford បានបង្ហើបឱ្យដឹងអំពី Ford Explorer ដែលដំណើរដោយអគ្គិសនីទាំងស្រុង ហើយវាគឺជាម៉ូដែលរថយន្តអគ្គិសនីទីបីរបស់ក្រុមហ៊ុននេះ។

រថយន្តដែលត្រូវបានផលិតនៅប្រទេសអាល្លឺម៉ង់នេះត្រូវបានអធិប្បាយថាជារថយន្តដែលមានការរួមផ្សំរវាង «បច្ចេកទេសអាល្លឺម៉ង់ និងស្ទីលអាម៉េរិក»។

Ford ប្រកាសថា Explorer បញ្ចូលថាមពលថ្មក្នុងល្បឿនពី 10 ដល់ 80% ក្នុងរយៈពេល 25 នាទី នៅពេលប្រើឆ្នាំងសាករហ័ស DC។ រថយន្តនេះនឹងអាចប្រើប្រាស់ស្ថានីយបញ្ចូលថាមពលអគ្គិសនីចំនួន 500,000 កន្លែងនៅអឺរ៉ុប ចាប់ពីឆ្នាំក្រោយ។

ចំណែកចម្ងាយផ្លូវដែល Explorer អាចបរបាន នឹងត្រូវបានប្រកាសនាពេលខាងមុខ ហើយអតិថិជនអាចបញ្ជាទិញជាមុនចាប់ពីចុងឆ្នាំនេះ (សម្រាប់តំបន់អឺរ៉ុប)។ Ford Explorer មានពីរកំណែគឺ Explorer និង Explorer Premium។ តាមការគ្រោងទុក វានឹងមានតម្លៃក្រោម 73,000 ដុល្លារអាម៉េរិក។

ក្រុមហ៊ុន Ford កន្លងមកបានសន្យាថា នឹងលក់តែរថយន្តអគ្គិសនីប៉ុណ្ណោះនៅតំបន់អឺរ៉ុប ចាប់ពីឆ្នាំ 2030 ដើម្បីចូលរួមកាត់បន្ថយការបំភាយឧស្ម័នផ្ទះកញ្ចក់នៅទូទាំងសកលលោក៕

March 22, 2023

Author: សឿន សំណាង