សឿន សំណាង - La Reine Media

អាចម៍ផ្កាយ 50 ម៉ែត្រអាចនឹងហោះមកបុកផែនដីនាពេលខាងមុខ

អាចម៍ផ្កាយដែលមានឈ្មោះថា 2023 DW អាចប៉ះទង្គិតនឹងផែនដីនៅក្នុងខែកុម្ភៈ ឆ្នាំ 2046 បើទោះជាមានហានិភ័យទាប។

អាចម៍ផ្កាយមួយដែលទើបតែត្រូវបានរកឃើញ និងដាក់ឈ្មោះឱ្យថា 2023 DW អាចហោះមកក្បែរផែនដីបំផុតនៅក្នុងរយៈពេលជាង 20 ឆ្នាំទៀត។ ហានិភ័យដែលអាចម៍ផ្កាយនេះអាចហោះមកបុកផែនដីគឺ 1/600 នេះបើតាមណាសា។ ថ្វីបើនោះគឺជាហានិភ័យខ្ពស់ជាងកម្រិតមធ្យម ប៉ុន្តែណាសាសង្កត់ធ្ងន់ថា នោះគឺជាកម្រិតទាប។

អាចម៍ផ្កាយ 2023 DW ដែលត្រូវបានរកឃើញកាលពីថ្ងៃទី 27 កុម្ភៈ 2023 មានអង្កត់ផ្ចិត 50 ម៉ែត្រ ស្មើនឹងប្រវែងបណ្ដោយរបស់អាងហែលទឹកអូឡាំពិក។ 2023 DW នឹងហោះកាត់ពីមុខផែនដីនៅថ្ងៃទី 14 កុម្ភៈ 2046។ គិតត្រឹមថ្ងៃទី 08 មីនា 2023 អ្នកវិទ្យាសាស្ត្រព្យាករថា ហានិភ័យនៃការប៉ះទង្គិចស្ថិតក្នុងកម្រិត 1/625។

អាចម៍ផ្កាយ 2023 DW នឹងមិនបង្កឱ្យមានមហន្តរាយធំធេងដូចទៅនឹងករណីធ្លាក់អាចម៍ផ្កាយដែលបានផ្ដាច់ពូជដាយណឺស័រកាលពី 66 លានឆ្នាំមុននោះទេ ប៉ុន្តែនឹងអាចបង្កគ្រោះថ្នាក់ធំបើសិនធ្លាក់ចំ ឬក្បែរទីក្រុង។

បើទោះជាករណីប៉ះទង្គិតជាមួយអាចម៍ផ្កាយ 2023 DW មានហានិភ័យទាប ប៉ុន្តែក្រុមអ្នកវិទ្យាសាស្ត្រក៏កំពុងតែ «ដុតដៃដុតជើង» អភិវឌ្ឍវិធីសាស្ត្រការពារផែនដីពីដុំថ្មអវកាស៕

March 28, 2023

ដណ្ដើមបានជើងឯកនៅ Merlion Cup ក្រុម U-22 ម៉ាឡេស៊ី «គំរាមផ្លូវចិត្ត» ដល់ក្រុមនានារបស់ SEA Games នៅកម្ពុជា

ក្រុមបាល់ទាត់ជម្រើសជាតិវ័យក្រោម 22 ឆ្នាំរបស់ម៉ាឡេស៊ី (U-22 ម៉ាឡេស៊ី) បានយកឈ្នះលើក្រុមហុងកុង និងដណ្ដើមបានពានរង្វាន់មិត្តភាពអន្តរជាតិ Merlion Cup នៅមុនពេល SEA Games 32 មកដល់។

នៅសល់តែជិតមួយខែទៀតប៉ុណ្ណោះ ព្រឹត្តិការណ៍កីឡាអាស៊ីអាគ្នេយ៍ SEA Games 32 នឹងចាប់ផ្ដើមធ្វើឡើង ជាផ្លូវការនៅកម្ពុជា។ បច្ចុប្បន្ន ក្រុមបាល់ទាត់ជម្រើសជាតិ U-22 នានានៅក្នុងតំបន់កំពុងតែញាប់ដៃញាប់ជើងត្រៀមខ្លួនដើម្បីអាចដណ្ដើមបានជ័យជន្នះនៅក្នុងវិញ្ញាសាបាល់ទាត់បុរសនៅ SEA Games 32។

ក្នុងគ្រាដែល U-23 ថៃ និង U-23 វៀតណាមកំពុងប្រជែងគ្នានៅឯពានរង្វាន់មិត្តភាពអន្តរជាតិ U-23 Doha Cup 2023 គេឃើញថា U-22 ម៉ាឡេស៊ីក៏ចូលរួមប្រកួតនៅឯពានរង្វាន់ Merlion Cup 2023។ ពានរង្វាន់ Merlion Cup 2023 មានបួនក្រុមចូលរួម រួមមាន U-22 កម្ពុជា, U-22 ហុងកុង, U-22 ម៉ាឡេស៊ី និងក្រុមម្ចាស់ផ្ទះ U-22 សិង្ហបុរី។

ខាងលើនេះគឺជាពានរង្វាន់ដែលត្រូវបានចាត់ទុកថាសំខាន់នៅមុនព្រឹត្តិការណ៍ SEA Games 32 ចូលមកដល់។ នៅឯពានរង្វាន់ Merlion ក្រុម U-22 ម៉ាឡេស៊ីបានបង្ហាញសមត្ថភាពដ៏លេចធ្លោរបស់ខ្លួន។ ក្រោយពីបានផ្ដួលកម្ពុជាដោយលទ្ធផល 4-2 ក្រុម U-22 ម៉ាឡេស៊ីក៏បានប៉ះនឹង U-22 ហុងកុង។

ក្នុងការប្រកួត U-22 ម៉ាឡេស៊ី រកបានពីរគ្រាប់នៅក្នុងតង់ទីពីរ ខណៈដែល U-22 ហុងកុងរកបានមួយគ្រាប់។ ចប់ការប្រកួត U-22 ម៉ាឡេស៊ីឈ្នះក្នុងលទ្ធផល 2-1 និងដណ្ដើមបានតំណែងជើងឯកនៃពានរង្វាន់មិត្តភាព អន្តរជាតិ Merlion Cup 2023។

ជ័យជម្នះខាងលើរបស់ U-22 ម៉ាឡេស៊ី គឺជាការព្រមានដល់បណ្ដាក្រុមជម្រើសជាតិដែលនឹងចូលរួមប្រកួត បាល់ទាត់នៅ SEA Games 32 ដែលនឹងត្រូវបានរៀបចំឡើងនៅកម្ពុជានាពេលខាងមុខ៕

March 28, 2023

សាលាអនុវិទ្យាល័យដែលមានសិស្សតែម្នាក់គត់នៅប្រទេសជប៉ុន

សាលាអនុវិទ្យាល័យ Oteshima នៅលើកោះ Oteshima ឆ្នាំនេះបានប្រារព្ធពិធីប្រគល់សញ្ញាបត្របញ្ចប់ការសិក្សាពិសេស ដោយសារតែសាលារៀននេះមានសិស្សតែម្នាក់គត់ដែលបានបញ្ចប់ការសិក្សា។

«គ្រប់យ៉ាងកើតឡើងយ៉ាងឆាប់រហ័ស។ ប្អូនសូមអរគុណនៅពេលដែលទទួលបានបទពិសោធន៍នៅសាលារៀនដោយមានការជួយជ្រោមជ្រែងរបស់លោកគ្រូអ្នកគ្រូ គ្រួសារ និងប្រជាជននៅលើកោះ» Mainichi កាលពីថ្ងៃទី 25 មីនា ដកស្រង់សម្ដីរបស់ Akino Imanaka អាយុ 15 ឆ្នាំ ឱ្យដឹងដូច្នេះនៅក្នុងពិធីប្រគល់សញ្ញាបត្របញ្ចប់ការសិក្សានៅសាលាអនុវិទ្យាល័យ Oteshima កោះ Oteshima ខេត្ត Kagawa។

កោះ Oteshima មានទំហំ 0.6 គីឡូម៉ែត្រក្រឡា និងមានចម្ងាយពីឆ្នេរសមុទ្រខេត្ត Kagawa 15 គីឡូម៉ែត្រទៅទិសខាងលិច គឺជាកន្លែងរស់នៅរបស់ប្រជាជនចំនួន 34 នាក់ ដែលភាគច្រើនគឺជាអ្នកនេសាទ។ ក្នុងរយៈពេល 9 ឆ្នាំកន្លង Imanaka គឺជាសិស្សតែម្នាក់គត់ដែលទៅរៀននៅសាលាបឋមសិក្សា និងអនុវិទ្យាល័យនៅលើកោះនេះ។

កោះ Oteshima កំពុងប្រឈមនឹងបញ្ហាប្រជាជនវ័យចាស់។ Imanaka ក៏ជាពលរដ្ឋតែមួយរូបគត់ដែលមានអាយុក្រោម 18 ឆ្នាំ។

ក្នុងការសិក្សា សាលា Oteshima បានរៀបចំឱ្យមានគ្រូបង្រៀនចំនួនប្រាំនាក់ដែលត្រូវប្ដូរវេនគ្នាដើរតួជាសិស្សដើម្បីឱ្យ Imanaka អាចពិភាក្សាជាមួយ «មិត្តរួមថ្នាក់»។ Imanaka ក៏ត្រូវបានអនុញ្ញាតឱ្យទៅសាលាអនុវិទ្យាល័យមួយផ្សេងទៀតនៅឯដីគោកមួយសប្ដាហ៍/ម្ដង ទៅតាមកម្មវិធីផ្លាស់ប្ដូរការសិក្សា។

Imanaka ក៏ទទួលបានឱកាសដើម្បីចូលរួមសកម្មភាពបណ្ដុះបណ្ដាលនានា។ កាលពីខែមិថុនា 2022 មនុស្សជាង 60 នាក់បានមកកាន់កោះដើម្បីចូលរួមព្រឹត្តិការណ៍កីឡា។ កូនសិស្សរូបនេះក៏បានចូលរួមប្រកួតកាយសម្ព័ន្ធ រត់ប្រណាំងបណ្ដាក់គ្នា រាំ និងទាញព្រ័ត្រ។

«ប្អូនតែងមានតែម្នាក់ឯង ដូច្នេះពេលខ្លះមានអារម្មណ៍ថា ឯកា។ ប៉ុន្តែ តួនាទីជាប្រធានសមាគមសិស្សបានជួយឱ្យប្អូនមានឱកាសទៅធ្វើទស្សនកិច្ចតំបន់ជាច្រើន ក្នុងនាមជាតំណាងសាលា។ ពេលវេលាកន្លងទៅគឺជាបទពិសោធន៍ដ៏គួរឱ្យពេញចិត្ត» Imanaka និយាយដូច្នេះ។

នាយកសាលា Oteshima អាយុ 58 ឆ្នាំ បានរៀបរាប់អំពីសិស្សរបស់ខ្លួនថា «ក្នុងបីឆ្នាំកន្លង Imanaka បានសិក្សារៀនសូត្រយ៉ាងយកចិត្តទុកដាក់ និងបានបង្ហាញពីការរីកចម្រើនដ៏គួរឱ្យភ្ញាក់ផ្អើល»។

សាលា Oteshima ត្រូវបានបង្កើតឡើងកាលពីឆ្នាំ 1914។ ឆ្នាំ 1964 សាលារៀននេះធ្លាប់មានសិស្សចំនួន 91 នាក់ដែលរៀនថ្នាក់បឋមសិក្សា និងអនុវិទ្យាល័យ ប៉ុន្តែក៏បានចាប់ផ្ដើមថយចុះជាបន្តបន្ទាប់។ ឆ្នាំ 2013 Oteshima ត្រូវបិទទ្វារសាលាអនុវិទ្យាល័យ នៅពេលបងស្រីរបស់ Imanaka បានបញ្ចប់ការសិក្សា ប៉ុន្តែក៏បានបើកឡើងវិញនៅ 7 ឆ្នាំក្រោយមក នៅពេល Imanaka រៀនដល់អនុវិទ្យាល័យ។

សាលា Oteshima នឹងត្រូវបានបិទទ្វារជាថ្មីភ្លាមៗ បន្ទាប់ពី Imanaka រៀនចប់កម្រិតអនុវិទ្យាល័យ។ យោងតាមក្រសួងអប់រំជប៉ុន សាលាជាង 1,000 កន្លែងក្នុងចំណោមសាលាអនុវិទ្យាល័យទាំង 12,000 កន្លែងរបស់ប្រទេសនេះ សុទ្ធតែមានសិស្សតិចជាង 50 នាក់នៅឆ្នាំ 2022។

ខែក្រោយ Imanaka នឹងទៅរស់នៅជាមួយបងស្រី និងបងថ្លៃ ដើម្បីបានបន្តការសិក្សាថ្នាក់វិទ្យាល័យនៅឯដីគោកក្នុងខេត្ត Kagawa។ Imanaka ឱ្យដឹងថា អនាគតនាងចង់ធ្វើការក្នុងវិស័យអប់រំ ឬសុខមាលភាពសង្គម។

ពិធីប្រគល់សញ្ញាបត្របញ្ចប់ការសិក្សាខាងលើរបស់ Imanaka មានមនុស្សចូលរួមប្រហែល 50 នាក់។ ពេលអានសុន្ទរកថា Imanaka មិនអាចទប់ទឹកភ្នែកបាន។ «ប្អូនសប្បាយរីករាយខ្លាំងណាស់នៅពេលបានកើតនៅ Oteshima» Imanaka ថ្លែងដូច្នេះ និងបន្តថា «ដោយមានអនុស្សាវរីយ៍ជាមួយនឹងកោះក្នុងបេះដូងមួយនេះ ប្អូននឹងចាប់ផ្ដើមដំណើរថ្មីរួមជាមួយនឹងឆន្ទះមោះមុត និងមោទកភាព»៕

March 28, 2023

ដើមប្រេងខ្យល់អាច «ស្រូបមាស» ពីក្នុងដីឡើងមកលើស្លឹក

ក្រុមអ្នកវិទ្យាសាស្ត្រធ្លាប់បានប្រកាសថា បានរកឃើញថា ដើមប្រេងខ្យល់ ដែលដុះនៅលើតំបន់មានរ៉ែមាស ឫសរបស់វាចាក់ជ្រៅរាប់សិបម៉ែត្រទៅក្រោមដី និងអាចប៉ះនឹងភាគល្អិតរបស់មាស ហើយស្រូបយកធាតុដែលមានតម្លៃនេះឡើងមកកាន់ស្លឹករបស់វា។

អ្នកប្រមាញ់មាសអាចគ្រាន់តែត្រូវការ «ការផ្ដល់ដំណឹង» ពីដើមប្រេងខ្យល់ (Eucalyptus) បើសិនជាចង់រកឃើញមាសនៅក្រោមដី។ មូលហេតុគឺថា ឫសរបស់រុក្ខជាតិមួយប្រភេទនេះអាចចាក់ជ្រៅទៅដល់ទីដែលមានធាតុមាស និងអាចនាំធាតុនេះឡើងមកកាន់ស្លឹក។ នេះបើតាម Science ចុះផ្សាយកាលពីថ្ងៃទី 24 មីនា 2023។

ក្នុងលទ្ធផលនៃការស្រាវជ្រាវរបស់អង្គការស្រាវជ្រាវវិទ្យាសាស្ត្រ និងបច្ចេកវិទ្យាអូស្ត្រាលី (CSIRO) ដែលបានចុះផ្សាយលើទស្សនាវដ្ដី Nature Communications ឆ្នាំ 2013 ស្ដីពីការប្រើប្រាស់វិធីសាស្ត្រពិនិត្យសំណាករុក្ខជាតិដើម្បីស្វែងរករ៉ែក្រោមដី ក្រុមអ្នកវិទ្យាសាស្ត្របានរកឃើញបណ្ដារុក្ខជាតិដែលមានផ្ទុកធាតុមាសនៅប្រទេសអូស្ត្រាលី។ ការស្រាវជ្រាវនេះបានបញ្ជាក់ថា មាសអាចត្រូវបានឫសរបស់រុក្ខជាតិស្រូបឡើងមកកាន់ស្លឹក។

ជាក់ស្ដែង ក្រុមអ្នកវិទ្យាសាស្ត្រកាលណោះបានទៅកាន់អណ្ដូងរ៉ែមាស Freddo Gold Prospect នៅភាគខាងជើងតំបន់ Kalgoorlie នៃភាគខាងលិចរបស់ប្រទេសអូស្ត្រាលី ដើម្បីស្វែងរកភស្ដុសតាង។ នៅខាងលើអណ្ដូងរ៉ែមាសដែលនៅជ្រៅក្រោមដី គឺជាដើមប្រេងខ្យល់ជាច្រើនដើម។ ស្លឹក មែក និងសម្បករបស់រុក្ខជាតិនេះមានផ្ទុកបរិមាណនៃធាតុមាស (Au) យ៉ាងខ្ពស់។

ការរកឃើញខាងលើនេះ ក្រោយមកក៏ត្រូវបានបញ្ជាក់ជាថ្មីនៅក្នុងការពិសោធក្នុងផ្ទះកញ្ចក់។ អ្នកស្រាវជ្រាវដាំកូនឈើប្រេងខ្យល់ស្រុកក្នុងដីខ្សាច់លាយមាស។ បន្ទាប់មក អ្នកវិទ្យាសាស្ត្រប្រើប្រាស់មីក្រូទស្សន៍អេឡិចត្រុងដើម្បីពិនិត្យ។ លទ្ធផលបានបង្ហាញថា ស្លឹករបស់រុក្ខជាតិនេះក៏មានផ្ទុកធាតុមាសដូចទៅនឹងដើមប្រេងខ្យល់នៅក្នុងព្រៃ។

កាលពីឆ្នាំ 2019 ក្រុមហ៊ុន Marmota ក៏ធ្លាប់បានរកឃើញមាសនៅអូស្ត្រាលីខាងត្បូង ដោយប្រើប្រាស់វិធីសាស្ត្រពិនិត្យស្លឹកប្រេងខ្យល់។ Marmota រកឃើញសរសៃមាសកម្រាស 6 ម៉ែត្រ មានផ្ទុកមាស 3.4 ក្រាម/តោនដី ស្ថិតនៅជម្រៅ 44 ម៉ែត្រ។ នោះគឺជារបកគំហើញដ៏គួរឱ្យភ្ញាក់ផ្អើល៕

March 27, 2023

រកបានពីរគ្រាប់ឱ្យព័រទុយហ្កាល់ Ronaldo ធ្វើឱ្យកំណត់ត្រារបស់ខ្លួនកាន់តែឃើញច្បាស់

នៅពេលស៊ុតបញ្ចូលទីរបស់លុចសំបួបានពីរគ្រាប់ ជួយឱ្យព័រទុយហ្កាល់ឈ្នះ 6-0 Cristiano Ronaldo បានធ្វើឱ្យកំណត់ត្រារបស់ខ្លួនកាន់តែលេចធ្លោមិនធ្លាប់មាននាពេលកន្លងនៅក្នុងប្រវត្តិសាស្ត្របាល់ទាត់ពិភពលោក។

ក្នុងការប្រកួតជើងទីពីរនៃវគ្គជម្រុះនៅពានរង្វាន់ Euro 2024 ក្រុមបាល់ទាត់ជម្រើសជាតិព័រទុយហ្កាល់បន្តយកឈ្នះយ៉ាងធំធេងនៅពេលផ្ដួលលុចសំបួក្នុងលទ្ធផល 6-0 ក្នុងនោះ Ronaldo រួមចំណែកបានពីរគ្រាប់។ ការទាត់បញ្ចូលទីគូប្រជែងរបស់កំពូលតារាបាល់ទាត់វ័យ 38 ឆ្នាំរូបនេះ គឺជាចំណុចលេចធ្លោជាងគេនៅក្នុងការប្រកួតលើកនេះ។

ជាងនេះ ការស៊ុតបញ្ចូលទីពីរគ្រាប់ខាងលើក៏បានជួយឱ្យ CR7 បង្កើនភាពលេចធ្លោដល់កំណត់ត្រាដែលមិនធ្លាប់មានពីមុនមកនៅក្នុងប្រវត្តិសាស្ត្របាល់ទាត់។ ជាក់ស្ដែង Ronaldo បានក្លាយជាកីឡាករដំបូងគេដែលរកបានគ្រាប់បាល់ជូនក្រុមជម្រើសជាតិក្នុងរយៈពេល 20 ឆ្នាំបន្តបន្ទាប់។

សមិទ្ធផលនេះបានចាប់ផ្ដើមមានរូបរាងតាំងពីឆ្នាំ 2004 នៅពេល CR7 រួមចំណែក 7 លើកក្នុងការស៊ុតបញ្ចូលទីជូនក្រុមជម្រើសជាតិព័រទុយហ្កាល់។ ក្រោយមក ថ្វីជើងបែបនោះក៏ត្រូវ Ronaldo រក្សាបានរហូតដល់បច្ចុប្បន្ន។ រាប់ពីដើមឆ្នាំ 2023 CR7 រកបានបួនគ្រាប់ជូនក្រុមព័រទុយហ្កាល់ ក្រោយពីការប្រកួតពីរលើកជាមួយ លិចតិនស្តាញ (Liechtenstein) និងលុចសំបួ នៅវគ្គជម្រុះ Euro 2024។

https://www.youtube.com/watch?v=PnC-ayvCECQ

មុនពេលបង្កើតបានកំណត់ត្រាដ៏គួរឱ្យពេញចិត្តនេះ Ronaldo រួមនឹង Robbie Keane គឺជាកីឡាករដែលតែងតែរកបានគ្រាប់បាល់ជូនក្រុមជម្រើសជាតិព័រទុយហ្កាល់ នៅក្នុងរយៈពេល 19 បន្តបន្ទាប់។ តួលេខនេះចំពោះ Lionel Messi របស់អាហ្សង់ទីន គឺ 18 ឆ្នាំបន្តបន្ទាប់៕

March 27, 2023

OPPO Find N2 Flip តម្លៃ $899 ស្មាតហ្វូនអេក្រង់បត់ដែលមានអេក្រង់ខាងក្រៅធំបំផុត 3.26” ស្ទើរតែមើលមិនឃើញស្នាមផ្នត់ ថាមពលថ្មធំ 4300mAh និងសាកថ្មបានលឿនបំផុត 44W SUPERVOOC™

រំភើបដល់ហើយ! កាលពីរសៀលថ្ងៃទី25 មីនា 2023 OPPO ប្រចាំប្រទេសកម្ពុជាបានបើកបង្ហាញដាក់សម្ពោធជាផ្លូវការនូវស្មាតហ្វូនអេក្រង់បត់ OPPO Find N2 Flip យ៉ាងកក្រើកក្នុងផ្សារទំនើប ជីប ម៉ុង 271 មេហ្គាម៉ល (Chip Mong 271 Mega Mall)។ បើក្រឡេកទៅមើលតារាកិត្តិយសដែលអញ្ចើញចូលរួមសុទ្ធតែជាស្ត្រីៗពោរពេញដោយសមត្ថភាពពិសេសៗរួមមាន ពិធីការិនីពូកែវហោស័ព្ទ DJ Nana, កីឡាការិនីល្បុក្កតោ អ៊ុំ សំថារ័ត្ន និងបវរកញ្ញា 5^th Runner Up ក្នុងកម្មវិធី Miss Grand International 2022 ពិសេសជាទូតសុច្ឆន្ទៈប្រចាំក្រុមហ៊ុន OPPO គឺ ពេជ្រ វត្តីសារ៉ាវឌ្ឍី។

ជាមួយបរិយាកាសដ៏រំភើបនិងសប្បាយរីករាយនេះគឺធ្វើឡើងក្នុងផ្សារទំនើប Chip Mong 271 Mega Mall ដោយឃើញមានការចូលរួមពីហ្វេនៗនិងអតិថិជនរបស់ OPPO ជាច្រើន។ រឹតតែពិសេសក្នុងកម្មវិធីនេះលើវេទិកាតារាកិត្តិយសទាំង 3 របស់ OPPO បានចែករំលែកពីភាពជោគជ័យក្នុងវិស័យរៀងៗខ្លួន រួមជាមួយនឹងបទពិសោធន៍ពីការប្រើប្រាស់ស្មាតហ្វូនអេក្រង់បត់ OPPO Find N2 Flip នាំឲ្យម្នាក់ៗផ្ចង់អារម្មណ៍ស្តាប់គ្រប់ៗគ្នាតែម្តង។

យ៉ាងណាមិញ បើយោងតាមបទបង្ហាញរបស់លោក ឡៅ ខេងប៊ុង ជា Product Manager ប្រចាំក្រុមហ៊ុន OPPO បានឲ្យដឹងថាចំពោះស្មាតហ្វូនអេក្រង់បត់ OPPO Find N2 Flip មានលក្ខណៈសម្បត្តិល្អឥតខ្ចោះជាច្រើនដូចជា៖

អេក្រង់ខាងធំទូលាយ ៖ OPPO Find N2 Flip មានអេក្រង់ខាងក្រៅធំបំផុត 3.26Inch ជាប្រភេទ AMOLED ធំទូលាយឆ្លើយតបសាររហ័ស ងាយស្រួលប្រើប្រាស់ទាំងពេលអូសបញ្ជា ពេលសម្លឹងមើល ព្រមទាំងបំពាក់មកនូវមុខងារដ៏សម្បូរបែប ជាមួយនឹងរូបរាងតូចស្រស់ស្អាតងាយស្រួលកាន់ និងទុកដាក់ក្នុងហោប៉ៅ។
អេក្រង់បត់ស្ទើរតែគ្មានស្នាមផ្នត់៖ នៅលើអេក្រង់ខាងមុខ OPPO Find N2 Flip មានភាពល្អឥតខ្ចោះទៅលើស្នាមផ្នត់នៃអេក្រង់គឺមានលក្ខណៈស្មើធេង ដែលមើលសឹងមិនឃើញនឹងភ្នែកទទេ ជាមួយអេក្រង់ទំហំ 8 Inch ជាប្រភេទ Foldable LTPO AMOLED 120Hz, HDR10+ ដែលបង្ហាញរូបភាពក្នុងកម្រិត 1080 x 2520 pixels គុណភាពច្បាស់ល្អខ្លាំងជាមួយកម្រិតពណ៌បែបធម្មជាតិភ្លឺដិតស្អាតក្នុងការទស្សនាវីដេអូ។
សមត្ថភាពកម្រិតកំពូល៖ OPPO Find N2 Flip ជាស្មាតហ្វូនអេក្រង់បត់ឈានដាច់គេបើធៀបជាមួយអេក្រង់បត់ដទៃ ដែលមានទំហំថ្ម 4300mAh និងគាំទ្របច្ចេកវិទ្យាសាកល្បឿនលឿនកម្លាំង 44W អាចសាកពី 0% ទៅ 50% ចាយពេលត្រឹមតែ 23 នាទីប៉ុណ្ណោះ។
កាមេរ៉ា៖ OPPO Find N2 Flip មានទំហំកាមេរ៉ាទំហំ 50MP ដែលជាសេន Sony IMX 890 មានសមត្ថភាពផលិតរូបភាពបានយ៉ាងល្អឥតខ្ចោះ ពណ៌ស្រស់បែបធម្មជាតិនិងផ្តល់ព័ត៌មានលម្អិតច្បាស់តែម្តង។ ហើយយើងក៏អាចបត់បញ្ឈរពី 45° ទៅ 110° សម្រាប់ការថតរូបដែលត្រូវការលំនឹងខ្លាំងដូចជា Long Exposer ឬ Timelape ជាដើម។ ចំណែកមួយទៀតជា Len Ultra-Wide ដែលមានទំហំ 8MP អាចផលិតរូបភាពប្លង់ទូលាយបានក្នុងកម្រិតមុំ 112°។ មួយវិញទៀតសម្រាប់ការថតរូបនេះដែរ វាក៏មានមុខងារ Dual View អាចឲ្យមនុស្សជាទីស្រលាញ់របស់អ្នកអាចមើលឃើញរូបតាម Cover Screen ទំហំ 26 Inch ខាងក្រោយផងដែរ។ ដោយឡែកជាមួយនឹង NPU Marisilicon X ដែលបំពាក់នេះគឺវាជំនួយដល់ការថតវីដេអូនាពេលយប់បានល្អខ្លាំង ដែលវាបំពាក់មកជាមួយនឹងមុខងារ AI Noice Reduction ជួយកាត់គ្រាប់ Noice រាល់ពេលថតរូបនៅពេលយប់។

បន្ថែមពីនេះ ក្រៅពីសមត្ថភាពអស្ចារ្យទាំងនេះហើយ OPPO Find N2 Flip ក៏នៅមានមុខងារ និងលក្ខណៈពិសេសៗជាច្រើនទៀតដែលលោកអ្នកនឹងស្មានមិនដល់ផងដែរ។

ស្របពេលជាមួយគ្នានេះ OPPO ដាក់បង្ហាញនូវកាសឥតខ្សែជំនាន់ថ្មី Enco Air3 តម្លៃ $39 កាសឥតខ្សែជំនាន់ថ្មីតូចស្រាលស្រួលពាក់ ពណ៌ស្អាតប្លែកទាក់ទាញ ជាមួយគម្របថ្លាដ៏ស៊ីវិល័យ និងអាចតភ្ជាប់បានរហ័សគ្រប់ទូរស័ព្ទ ជាមួយនឹងសំឡេងបាសពីរោះរណ្តំចិត្ត ជាពិសេសគឺថាមពលប្រើប្រាស់បានយូររហូតដល់ 25 ម៉ោងឯណ្ណោះ។

ឥឡូវនេះ OPPO Find N2 Flip មានលក់ហើយក្នុងតម្លៃ $899 នៅតាមបណ្តាហាងលក់ទូរស័ព្ទនានា ជាមួយនឹងការថែមជូនកាដូមានតម្លៃសរុបស្មើ $371 រួមមាន៖ បណ្ណធានាអេក្រង់រយៈពេល 6ខែ តម្លៃ $298, កាសឥតខ្សែ Enco Buds2 (Limited Edition) និងស៊ីមស្មាតលេខពិសេស Bronze តម្លៃ $54 ភ្ជាប់គម្រោង SurfLikeCrazy រយៈពេល 4ខែ។ គួរបញ្ជាក់ថា ការផ្តល់ជូនប័ណ្ណធានាអេក្រង់រយៈពេល 6ខែ និងស៊ីមស្មាតលេខពិសេសគិតចាប់ពីថ្ងៃទី 26 មីនា ដល់ 16 មេសា 2023 តែប៉ុណ្ណោះ។ សម្រាប់ព័ត៌មានលម្អិតអាចសាកសួរទៅកាន់ម្ចាស់ហាង ឬបុគ្គលិករបស់ OPPO ៕

March 27, 2023

សង្គ្រាមតម្លៃរថយន្តអគ្គិសនីនៅប្រទេសថៃ ឡើងកម្ដៅខ្លាំងពេលពិព័រណ៍ Bangkok Motor Show ចាប់ផ្ដើម

សង្គ្រាមតម្លៃរថយន្តអគ្គិសនីបានរីករាលដាលដល់ប្រទេសថៃ ក្នុងនោះបណ្ដាក្រុមហ៊ុនផលិតរថយន្តរបស់ចិន ជប៉ុន និងកូរ៉េខាងត្បូង បញ្ចុះតម្លៃខ្លាំងសម្រាប់បណ្ដាម៉ូដែលថ្មីដែលពួកគេបង្ហាញនៅក្នុងពិព័រណ៍រថយន្តអន្តរជាតិប្រចាំឆ្នាំរបស់ប្រទេសថៃដែលបានសម្ពោធបើកកាលពីថ្ងៃទី 22 មីនា 2023។

នៅក្នុងពិព័រណ៍ខាងលើ BYD បានបង្ហាញរថយន្តអគ្គិសនីប្រភេទ hatchback ថ្មីតម្លៃ 23,457 ដុល្លារអាម៉េរិក ស្មើនឹងពាក់កណ្ដាលនៃតម្លៃមធ្យមនៅទូទាំងពិភពលោក របស់រថយន្តអគ្គិសនីមួយគ្រឿង។ BYD ក៏បានប្រកាសចាប់ផ្ដើមទទួលការបញ្ជាទិញសម្រាប់រថយន្ត BYD Dolphin នៅប្រទេសថៃ។

គូប្រជែងនានានឹងត្រូវធ្វើសង្គ្រាមតម្លៃ ក៏ដូចជារយៈពេលនៃការប្រគល់ទំនិញ ដើម្បីប្រកួតជាមួយនឹង BYD។ កាលពីខែកុម្ភៈ BYD បានប្រគល់ SUV Atto 3 គ្រឿងទី 10,000 នៅប្រទេសថៃ។

Tesla ចាប់ផ្ដើមប្រគល់ទំនិញនៅប្រទេសថៃក្នុងពេលដំណាលគ្នានោះ ហើយក៏បានបង្កើតឱ្យមានការចាប់ផ្ដើមនៃសង្គ្រាមបញ្ចុះតម្លៃនៅតាមបណ្ដាទីផ្សារ ដែលនេះបាននាំមកនូវជោគជ័យច្រើនដល់ក្រុមហ៊ុនអាម៉េរិកមួយនេះ។ ភ្លាមនោះ BYD ក៏បញ្ចុះតម្លៃជាមធ្យម 1,299 ដុល្លារ។ Nissan និង Toyota របស់ជប៉ុន តាមពីក្រោយដោយការបញ្ចុះតម្លៃរថយន្តអគ្គិសនីនៅប្រទេសចិន។

ពិព័រណ៍រថយន្តអន្តរជាតិបាងកក 2023 (2023 Bangkok International Motor Show) បានចាប់ផ្ដើមជាផ្លូវការតាំងពីថ្ងៃទី 22 មីនា និងអូសបន្លាយរហូតដល់ថ្ងៃទី 02 មេសា 2023។ នេះគឺជាព្រឹត្តិការណ៍ពិព័រណ៍រថយន្តធំ និងគួរទុកចិត្តបំផុតក្នុងតំបន់អាស៊ីអាគ្នេយ៍។ ពិព័រណ៍នេះមានអាយុកាល 44 ឆ្នាំមកហើយ៕

March 25, 2023

ប្រធានក្លឹបបញ្ជាក់ជាផ្លូវការ៖ អនាគតរបស់ Messi នៅ PSG ត្រូវបានលាតត្រដាង

ប្រធានក្លឹប PSG Nasser Al Khelaifi ថ្មីៗនេះបាននិយាយដល់រឿងអនាគតរបស់ Lionel Messi ក្នុងគ្រាដែលព័ត៌មាននេះទទួលបានចំណាប់អារម្មណ៍ច្រើនពីអ្នកគាំទ្រ។

កិច្ចព្រមព្រៀងរវាង Messi នឹងក្លឹប PSG នឹងអស់សុពលភាពនៅត្រឹមខែមិថុនាខាងមុខ។ ការណ៍ដែលមិនទាន់សម្រេចលើការពន្យារសុពលភាពនៅប៉ារីស បាន និងកំពុងធ្វើឱ្យមានដំណឹងចចាមអារ៉ាមជាច្រើនទាក់ទងនឹងអនាគតរបស់ Messi ក្នុងនោះមានព័ត៌មានខ្លះថា M10 បានគិតដល់ការចាកចេញទៅរក Barcelona។

បញ្ហាខាងលើប្រហែលជាបានឮដល់ប្រធានក្លឹប PSG លោក Nasser Al Khelaifi ដែលនាំឱ្យលោកបញ្ចេញប្រតិកម្ម។ អ្នកមាននៅកាតារូបនេះអះអាងថា Messi បច្ចុប្បន្ននៅតែជាទ្រព្យដ៏សំខាន់បំផុតមួយរបស់ PGS ហើយអនាគតរបស់ Messi នៅក្នុងក្លឹប ប្រាកដជានឹងត្រូវបានធានា។

«គ្រប់គ្នាចង់ដឹងថា មានអ្វីកំពុងកើតឡើង។ យើងកំពុងធ្វើការដើម្បីរក្សា Lionel Messi រួមនឹង Kylian Mbappe និង Sergio Ramos» ប្រធានក្លឹប PSG លោក Nasser Al Khelaifi ថ្លែងដូច្នេះ និងបន្តថា «ក្លឹបនឹងវិភាគនូវអ្វីដែលកំពុងធ្វើដើម្បីធានាថា អាចរួមរស់ជាមួយពួកគេបានយូរអង្វែង។ …ប៉ុន្តែខ្ញុំយល់ថា ប្រការសំខាន់គឺថា យើងត្រូវតែផ្ដោតទៅលើផ្នែកដែលនៅសល់ក្នុងរដូវកាលនេះ»។

ប្រធានក្លឹប PSG លោក Nasser Al Khelaifi (ឆ្វេង) និង Lionel Messi កាលពីឆ្នាំ 2021

យោងតាមសារព័ត៌មានបារាំង Messi និង PSG បានព្រមព្រៀងគ្នាដោយពាក្យសម្ដីស្ដីពីការពន្យារសុពលភាពនៃកិច្ចសន្យា តាំងពីខែធ្នូ 2022។ ប៉ុន្តែ ពួកគេមិនទាន់បានចុះហត្ថលេខាជាផ្លូវការ។

Messi ទំនងជាចង់ឱ្យ PSG ក្លាយជាក្រុមបាល់ទាត់ដែលប្រកបដោយភាពប្រកួតប្រជែង។ ដូច្នេះ រហូតដល់ពេលក្រុមប្រឹក្សាភិបាលក្លឹបនេះលើកឡើងនូវគម្រោងដែលប្រកប់ដោយការទាក់ទាញ ទើប M10 យល់ព្រមចុះហត្ថលេខាលើកិច្ចព្រមព្រៀងថ្មី៕

March 25, 2023

ជើងហោះហើរដឹកអ្នកដំណើរដំបូងគេលើពិភពលោក

ក្រុមហ៊ុនអាកាសចរណ៍មួយនៅសហរដ្ឋអាម៉េរិក បើកការហោះហើរដឹកអ្នកដំណើរដំបូងគេ និងហោះឆ្លងកាត់ឈូងសមុទ្រ Tampa ដោយកប៉ាល់ហោះកាលពីឆ្នាំ 1913 និងដំណើរបានយ៉ាងជោគជ័យ។

ជិតមួយទសវត្សរ៍បន្ទាប់ពីជើងហោះហើរនាំមុខគេរបស់បងប្អូនត្រកូល Wright នៅ Kitty Hawk រដ្ឋ Carolina ខាងជើង សេវាកម្មហោះហើរដឹកអ្នកដំណើរទៅតាមកាលបរិច្ឆេទដំបូងគេលើពិភពលោកក៏ចាប់ផ្ដើមកាលពីឆ្នាំ 1914 ដោយហោះហើរទៅមករវាង St. Petersburg (រដ្ឋ Florida) និង Tampa ដោយឆ្លងកាត់ឈូងសមុទ្រ Tampa។

ក្រុមហ៊ុនអាកាសចរណ៍ដែលមានឈ្មោះថា St. Petersburg-Tampa Airboat Line គឺជាអ្នកគ្រប់គ្រងជើងហោះហើរខាងលើ។ សេវាកម្មនេះមានវត្តមានត្រឹមតែរយៈពេលខ្លី ហើយកប៉ាល់ហោះរបស់ក្រុមហ៊ុននេះក៏ដឹកអ្នកដំណើរបានតែម្នាក់គត់ក្នុងមួយជើង។ ក៏ប៉ុន្តែ តម្លៃដែលក្រុមហ៊ុននេះបាននាំមកគឺបានបើកផ្លូវឱ្យមានជើងហោះហើរពាណិជ្ជកម្មបែបទំនើប។ នេះបើតាម Amusing Planet។

គំនិតស្ដីពីក្រុមហ៊ុនអាកាសចរណ៍បានចាប់ផ្ដើមពីវិស្វករអគ្គិសនី Percival Elliot Fansler នៅ Florida ដែលកាលណោះធ្វើការដូចទៅនឹងបុគ្គលិកផ្នែកលក់របស់ក្រុមហ៊ុនផលិតម៉ាស៊ីនម៉ាស៊ូតសម្រាប់កប៉ាល់ហោះ។ Fansler ជក់ចិត្តជាមួយនឹងយន្តហោះនៅពេលសាកល្បងប្រណាំងទូកល្បឿនលឿន។ លោកយល់ថា វិធីតែមួយគត់ដើម្បីបង្កើនល្បឿនលឿនជាងនេះគឺការធ្វើឱ្យទូកហោះឡើងលើអាកាស។ ឆ្នាំ 1912 ពីឡុត Antony H. Jannus បានហោះហើរផ្លូវឆ្ងាយក្នុងរយៈពេល 40 ថ្ងៃ ពី Omaha ទៅកាន់ New Orleans។

បន្ទាប់ពីជើងហោះហើរប្រវត្តិសាស្ត្រខាងលើនេះ Fansler បានទាក់ទងទៅនឹង Thomas W. Benoist ម្ចាស់ក្រុមហ៊ុនផលិតម៉ាស៊ីនដែល Jannus បើកបរ ដោយប្រាប់ថា ចង់ទិញយន្តហោះ។ ការចរចាជាមួយ Benoist ធ្វើឱ្យ Fansler គិតដល់ការចាប់ផ្ដើមផ្ដល់សេវាកម្មអាកាសចរណ៍ពាណិជ្ជកម្ម។ Benoist ក៏ចាប់អារម្មណ៍លើគំនិតនេះហើយក៏យល់ព្រមផលិត និងផ្គត់ផ្គង់កប៉ាល់ហោះពីរគ្រឿង ខណៈដែល Fansler ចាត់ចែងដំណើរការ និងយុទ្ធសាស្ត្រលំអិតសម្រាប់ទីផ្សារ។

សេវាកម្មហោះហើរដឹកអ្នកដំណើរចាប់ផ្ដើមដំណើរការពីថ្ងៃទី 01 មករា 1913។ មនុស្សប្រហែល 3,000 នាក់បានប្រមូលផ្ដុំគ្នានៅកំពង់ផែដើម្បីជូនដំណើរអតីតអភិបាលក្រុង Abraham C. Pheil ដែលជាអតិថិជនដំបូងរបស់ក្រុមហ៊ុនអាកាសចរណ៍ខាងលើ។ សំបុត្រសម្រាប់ជើងហោះហើរដឹកអ្នកដំណើរដំបូងនេះមានតម្លៃ 400 ដុល្លារអាម៉េរិក ដែលបានមកពីការដេញថ្លៃ។ ម៉ោង 10 ព្រឹក Jannus បញ្ជាកប៉ាល់ហោះហោះឡើងពីកំពង់ផែ និងឆ្ពោះទៅកាន់ Tampa។ មិនដល់កន្លះម៉ោងក្រោយមក កប៉ាល់ហោះក៏បានចុះចតលើទន្លេ Hillsborough នៅ Tampa។ ពេលនោះមានមនុស្សប្រហែល 3,500 នាក់បានរង់ចាំជាស្រេចដើម្បីទទួល Jannus។ បន្ទាប់ពីបានជំរាបសួរអភិបាលក្រុង Tampa និងថតរូប Jannus និង Pheil ក៏បានត្រលប់ទៅកាន់ St. Petersburg។

ក្រោយជើងហោះហើរដឹកអ្នកដំណើរដំបូងគេនេះ ក្រុមហ៊ុនអាកាចរណ៍ St. Petersburg-Tampa Airboat Line ក៏មានជើងហោះហើរជាបន្តបន្ទាប់ និងបើកផ្លូវឱ្យមានវត្តមានក្រុមហ៊ុនអាកាសចរណ៍ជាហូរហែរហូតដល់បច្ចុប្បន្ន៕

March 25, 2023

ពិធីដង្ហែភ្លើងគប់ SEA Gamers 32 ចាប់ផ្ដើមចេញដំណើរពីវៀតណាម

ពិធីដង្ហែភ្លើងគប់ស៊ីហ្កេម 32 (SEA Games 32) ត្រូវបានសម្ពោធបើកជាផ្លូវការដោយចាប់ផ្ដើមដង្ហែចេញពីរដ្ឋធានីហាណូយប្រទេសវៀតណាម។

ព្រឹកថ្ងៃទី 24 មីនា ពិធីដង្ហែភ្លើងគប់ SEA Games 32 ត្រូវបានប្រារព្ធឡើងនៅឯស្ថានទូតកម្ពុជាប្រចាំប្រទេសវៀតណាម។ នេះគឺជាព្រឹត្តិការណ៍ចាប់ផ្ដើមសម្រាប់ការធ្វើដំណើរឆ្លងកាត់ 11 ប្រទេសនៅអាស៊ីអាគ្នេយ៍របស់ភ្លើងគប់ SEA Games 32 មុននឹងត្រលប់ចូលមកកាន់ទឹកដីកម្ពុជា។

នៅក្នុងព្រឹត្តិការណ៍នេះក៏មានវត្តមានរបស់លោកជំទាវ ជា គឹមថា ឯកអគ្គរាជទូតកម្ពុជាប្រចាំប្រទេសវៀតណាម រួមនឹងឯកអគ្គរដ្ឋទូត មន្ត្រីការទូតនៃបណ្ដាប្រទេសអាស៊ាន ក៏ដូចជាក្រុមមន្ត្រីវៀតណាម កីឡាករ និងនិស្សិតប្រមាណ 300 នាក់។

លោកជំទាវ ជា គឹមថា គឺជាអ្នកប្រកាសកម្មវិធីសម្ពោធបើកព្រឹត្តិការណ៍ដង្ហែភ្លើងគប់។ ភ្លើងគប់ផ្លូវការរបស់ SEA Games 32 ត្រូវបានអត្តពលិកវៀតណាម ប្រតិភូតំណាងនានា កីឡាករ និងនិស្សិតរាប់រយនាក់ ដង្ហែពីស្ថានទូតកម្ពុជា ទៅកាន់ ហូ ហ្វាង គាម និងត្រលប់មកកាន់កន្លែងដើម។

ដល់ថ្ងៃទី 25 មីនា ភ្លើងគប់ SEA Games 32 នឹងចាកចេញពីវៀតណាម ដើម្បីធ្វើដំណើរឆ្លងកាត់បណ្ដាប្រទេសអាស៊ីអាគ្នេយ៍ជាបន្តបន្ទាប់រួមមាន ហ្វ៊ីលីពីន ព្រុយណេ ឥណ្ឌូណេស៊ី ទីម័រខាងកើត ម៉ាឡេស៊ី សិង្ហបុរី ថៃ មីយ៉ាន់ម៉ា និងឡាវ។

ពីប្រទេសឡាវ ភ្លើងគប់ SEA Games 32 នឹងត្រលប់មកកាន់កម្ពុជានៅថ្ងៃទី 27 មេសា 2023។ នៅទីនេះ ភ្លើងគប់នឹងត្រូវបានដង្ហែកាត់តាមទីតាំងមួយចំនួនរហូតដល់ថ្ងៃសម្ពោធបើកព្រឹត្តិការណ៍ប្រកួតកីឡាស៊ីហ្កេម 32 នៅថ្ងៃទី 05 ឧសភា 2023 នៅឯកីឡដ្ឋានជាតិមរតកតេជោ៕

March 24, 2023

Author: សឿន សំណាង