សឿន សំណាង - La Reine Media

តួកគីអនុញ្ញាតឱ្យហ្វាំងឡង់ចូលជាសមាជិកសម្ព័ន្ធយោធាណាតូ

សេចក្ដីព្រាងច្បាប់អញ្ជើញហ្វាំងឡង់ឱ្យចូលជាសមាជិកណាតូ (NATO) ត្រូវបានអនុម័តនៅសភាតួកគី បើកផ្លូវឱ្យប្រទេសអឺរ៉ុបខាងជើងមួយនេះចូលជាសមាជិកសម្ព័ន្ធមិត្តយោធា។

កាលពីថ្ងៃទី 30 មីនា តួកគីក្លាយជាប្រទេសចុងក្រោយគេក្នុងចំណោមសមាជិកទាំង 30 របស់ណាតូ ដែលយល់ព្រមឱ្យហ្វាំងឡង់ចូលជាសមាជិក មួយសប្ដាហ៍បន្ទាប់ពីគណៈកម្មការកិច្ចការបរទេសរបស់សភានៅទីក្រុងអង់ការ៉ា គាំទ្រឥរិយាបថនោះដោយសំឡេងឆ្នោតដាច់ខាត។

«នាមជាសមាជិកណាតូនឹងពង្រឹងសន្តិសុខសម្រាប់ហ្វាំងឡង់ ទន្ទឹមនឹងការស្ដារស្ថិរភាព និងសន្តិសុខក្នុងតំបន់សមុទ្របាល់ទិច និងអឺរ៉ុបខាងជើង» រដ្ឋាភិបាលហ្វាំងឡង់ប្រកាសដូច្នេះ ក្រោយពីបានទទួលព័ត៌មានស្ដីពីការសម្រេចចិត្តរបស់តួកគី។

សេចក្ដីសម្រេចរបស់សភាតួកគីខាងលើនេះនឹងត្រូវបានបញ្ជូនទៅកាន់ប្រធានាធិបតី Tayyip Erdogan ដើម្បីអនុម័តចុងក្រោយ។ ក្រោយមក តួកគីនឹងបញ្ជូនឯកសារនេះទៅកាន់សហរដ្ឋអាម៉េរិក ជាកន្លែងរក្សាឯកសារកិច្ចព្រមព្រៀងរបស់សម្ព័ន្ធយោធាណាតូ។

នៅពេលអគ្គលេខាធិការនៃអង្គការណាតូ Jens Stoltenberg អញ្ជើញហ្វាំងឡង់ឱ្យចូលជាសមាជិកសម្ព័ន្ធយោធា ហ្វាំងឡង់នឹងត្រូវផ្ញើទៅកាន់សហរដ្ឋអាម៉េរិកនូវឯកសារដែលចុះហត្ថលេខាដោយក្រសួងការបរទេសស្ដីពីការយល់ព្រមចូលជាសមាជិក និងអនុវត្តកិច្ចព្រមព្រៀង ទើបក្លាយជាសមាជិកណាតូជាផ្លូវការ។

កាលពីដើមខែមីនា លោក Erdogan បានអះអាងថា នឹងគាំទ្រហ្វាំងឡង់ចូលជាសមាជិកណាតូ បន្ទាប់ពីឃើញថា ប្រទេសអឺរ៉ុបខាងជើងមួយនេះបានធ្វើតាមការចង់បានរបស់ទីក្រុងអង់ការ៉ា ក្នុងនោះមានទាំងការដោះស្រាយបញ្ហាក្រុមផ្ដាច់ខ្លួនពីតួកគីដែលកំពុងរស់នៅលើទឹកដីហ្វាំងឡង់ ក៏ដូចជាការលុបចោលបម្រាមនាំចេញអាវុធ។

ក្រសួងការបរទេសអាម៉េរិក សាទរចំពោះការសម្រេចចិត្តរបស់តួកគី និងបន្តស្នើឱ្យសម្ព័ន្ធមិត្តនេះប្រញាប់គាំទ្រស៊ុយអែតចូលជាសមាជិកណាតូ។ លោក Erdogan នៅតែមិនទាន់គាំទ្រដល់សំណើសុំចូលជាសមាជិកណាតូរបស់ស៊ុយអែត ដោយយល់ថា ទីក្រុងស្តុកខុលមិនបានបញ្ចេញសកម្មភាពច្រើនក្នុងការដោះស្រាយកង្វល់របស់អង់ការ៉ា៕

March 31, 2023

Cristiano Ronaldo និងភរិយា Rodriguez លែងទិញកាដូជូនគ្នាក្នុងថ្ងៃខួប

តារាម៉ូដែល Georgina Rodriguez និយាយថា Ronaldo មិនជូនអំណាយសម្រាប់ថ្ងៃខួបកំណើតដល់នាង ហើយនាងក៏ឈប់ជូនកាដូជារយន្តស្ព័រដល់ Ronaldo។

យោងតាមទំព័រ BP កាលពីថ្ងៃទី 29 មីនា Rodriguez បានឱ្យដឹងថា ចាប់ពីឆ្នាំនេះនឹងឈប់ជូនកាដូរថយន្តដល់ Ronaldo នៅថ្ងៃបុណ្យទាន ឬថ្ងៃខួប។ «ខ្ញុំនឹងមិនទិញរថយន្តស្ព័រឱ្យគាត់ ព្រោះពួកវាមិនមានន័យពិសេស។ យើងមិនមែនជាមនុស្សដែលយកទ្រព្យជាធំ។ Ronaldo មានស្ទើរគ្រប់យ៉ាងដែលគាត់ចង់បាន មិនត្រូវការទិញបន្ថែមអ្វីទៀតទេ» តារាម៉ូដែល Rodriguez និយាយដូច្នេះ។

Ronaldo មានចំណូលចិត្តក្នុងការទិញរថយន្តប្រណិត ដូច្នេះ Rodriguez តែងតែទិញរថយន្តថ្លៃៗជូនដៃគូជីវិតនៅក្នុងពិធីខួបសំខាន់ៗ។ យោងតាមទំព័រ Marca កាដូដែលតារម៉ូដែលរូបនេះបានជូនដល់ Ronaldo កាលពីពេលថ្មីៗនេះ គឺរថយន្ត Rolls Royce Dawn ដែលមានតម្លៃជាង 300 លានដុល្លារអាម៉េរិក។

Rodriguez ក៏បានឱ្យដឹងថា Ronaldo លែងជូនកាដូជារបស់ថ្លៃដល់នាង។ «ខួបកំណើតខ្ញុំតែងជាន់គ្នានឹងកាលបរិច្ឆេទទាត់បាល់របស់គាត់ ដូច្នេះ យើងកម្របាននៅក្បែរគ្នា។ ឆ្នាំនេះ ខ្ញុំទទួលបានកាដូជាពេលវេលាពី Ronaldo។ ពួកយើងជប់លៀងជាមួយកូនៗ និងញាតិជិតស្និទ្ធ» តារាម៉ូដែលនេះបន្ថែមដូច្នេះ។

Rodriguez កើតឆ្នាំ 1995 ក្នុងគ្រួសារក្រីក្រ ដែលមានឪពុកធ្លាប់ជាជនល្មើសពាក់ព័ន្ធនឹងការជួញដូរគ្រឿងញៀន។ Rodriguez ធ្លាប់ប្រាប់ថា ម្ដាយនាងមិនមានប្រាក់គ្រប់គ្រាន់សម្រាប់ទិញសម្លៀកបំពាក់ និងបង់ថ្លៃសាលាឱ្យនាងទៀតផង។ Rodriguez បានជួប Ronaldo កាលពីឆ្នាំ 2016 ពេលនាងកំពុងធ្វើការនៅឯហាង Gucci និងបានទាក់ទងគ្នាតាំងពីពេលនោះ៕

March 30, 2023

U-22 ថៃ ឬម្ចាស់ជើងឯកវៀតណាម អាចនឹងត្រូវជម្រុះភ្លាមៗក្នុងវគ្គសន្សំពិន្ទុនៅ SEA Games លើកទី 32

ទំព័រសារព័ត៌មាន Thairath យល់ថា ម្ចាស់ផ្ទះកម្ពុជាកំពុងតែប្រើល្បិចនៅក្នុងការចាប់លេខសម្រាប់វិញ្ញាសាបាល់ទាត់បុរសដែលចូលរួមព្រឹត្តិការណ៍កីឡាអាស៊ីអាគ្នេយ៍ឆ្នាំ 2023 (2023 Southeast Asian Games – 32nd SEA Games – SEA Games លើកទី 32)។

ព្រឹកថ្ងៃទី 30 មីនានេះ ព័ត៌មានស្ដីពីពិធីចាប់លេខចែកពូលសម្រាប់វិញ្ញាសាបាល់ទាត់បុរស និងនារីរបស់ SEA Games លើកទី 32 ត្រូវបានប្រកាសជាផ្លូវការ។ ពិធីនេះនឹងចាប់ផ្ដើមនៅថ្ងៃទី 05 មេសាខាងមុខ នៅឯពហុកីឡដ្ឋានជាតិមរតកតេជោ។ បាល់ទាត់បុរសនឹងជាវិញ្ញាសាដែលចាប់ផ្ដើមមុនគេបង្អស់ ពោលគឺនៅថ្ងៃទី 29 មេសា ដល់ 16 ឧសភា 2023។

ទំព័រសារព័ត៌មាន Thairath របស់ថៃ យល់ថា ម្ចាស់ផ្ទះកម្ពុជាកំពុងប្រើប្រាស់ល្បិចកល នៅពេលមិនប្រកាសជាផ្លូវការនូវរូបមន្តចាប់លេខចែកពូលរបស់វិញ្ញាសាបាល់ទាត់បុរស។ Thairath ក៏បានសរសេរថា ទំនងជា U-22 ថៃ នឹងត្រូវទម្លាក់ចុះមកក្នុងក្រុមគ្រាប់ពូជទីពីរនៃវិញ្ញាសាបាល់ទាត់បុរសនៅ SEA Games លើកទី 32។

បច្ចុប្បន្នមានព័ត៌មានមួយចំនួននិយាយថា U-20 វៀតណាមក្នុងនាមជាក្រុមជើងឯក នឹងត្រូវបានដាក់ទៅក្នុងក្រុមគ្រាប់ពូជទីមួយដែលមាន U-20 កម្ពុជា។ ពេលនោះ U-22 ថៃនឹងត្រូវរុញចុះមកក្នុងក្រុមគ្រាប់ពូជទីពីរ បើទោះបានឡើងដល់វគ្គផ្ដាច់ព្រ័ត្រនៅ SEA Games លើកទី 31 ដែលបានធ្វើឡើងនៅវៀតណាម។

សារព័ត៌មានថៃយល់ថា U-22 ថៃ អាចនឹងប៉ះក្រុមជើងឯកវៀតណាមភ្លាមៗក្នុងវគ្គសន្សំពិន្ទុរបស់ SEA Games លើកទី 32។ លើកចុងក្រោយបំផុតដែលក្រុមថៃ និងវៀតណាមបានប៉ះគ្នាក្នុងវគ្គសន្សំពិន្ទុ គឺនៅ SEA Games លើកទី 30 ធ្វើឡើងនៅហ្វ៊ីលីពីន ដែលកាលណោះ ក្រុមជម្រើសជាតិថៃត្រូវហាលអាវតាំងពីវគ្គសន្សំពិន្ទុ បន្ទាប់ពីការប្រកួតដែលមានលទ្ធផល 2-2។

នៅ SEA Games លើកទី 31 ក្រុមជម្រើសជាតិ U-22 ថៃ និងវៀតណាម សុទ្ធតែត្រូវបានដាក់ចូលក្នុងក្រុមគ្រាប់ពូជទីមួយ។ ពួកគេក្រោយមកក៏បានប្រកួតយ៉ាងល្អ រហូតដល់បានជួបគ្នានៅក្នុងវគ្គផ្ដាច់ព្រ័ត្រ ជាទីដែលក្រុមវៀតណាមដណ្ដើមបានមេដាយមាស។

ក្រុមបាល់ទាត់ជម្រើសជាតិអាយុក្រោម 22 ឆ្នាំរបស់កម្ពុជា ត្រូវបានដាក់ចូលក្នុងក្រុមគ្រាប់ពូជទីមួយ។ ចំណែកអាយុវិញ ម្ចាស់ផ្ទះកម្ពុជាក៏បានកាត់បន្ថយឱ្យមកនៅត្រឹម U-22 និងកំណត់មិនឱ្យមានកីឡាករលើសអាយុ។ មុននោះ ការកំណត់អាយុកីឡាករបាល់ទាត់នៅ SEA Games លើកទី 31 គឺ U-23+3៕

March 30, 2023

ហេតុការណ៍ផ្ទុះកាំរស្មី Gamma កម្លាំងខ្លាំងបំផុតក្នុងចក្រវាល

អ្នកវិទ្យាសាស្ត្របានប្រកាសអំពីការរកឃើញហេតុការណ៍ផ្ទុះកាំរស្មី gamma ដែលភ្លឺខ្លាំងមិនធ្លាប់បានឃើញនៅក្នុងប្រវត្តិសាស្ត្រ ដែលនេះបង្ហើបឱ្យដឹងបន្ថែមអំពីការផ្ទុះខ្លាំងបំផុតបន្ទាប់ពីហេតុការណ៍ Big Bang។

ការផ្ទុះដែលត្រូវបានហៅថា GRB 221009A នេះ មានប្រភពពីកញ្ចុំផ្កាយ Sagittarius ដែលមានចម្ងាយពីផែនដីប្រហែល 2.4 ពាន់លានឆ្នាំពន្លឺ។ បើទោះជាឆ្ងាយយ៉ាងនេះក៏ដោយ វាក៏នៅតែបញ្ចេញពន្លឺរហូតដល់ថ្នាក់ធ្វើឱ្យឧបករណ៍សង្កេតតារាមួយចំនួនត្រូវ «ខ្វះ» បណ្ដោះអាសន្ន និងធ្វើឱ្យបរិយាកាសផែនដីច្របូកច្របល់។ ការរកឃើញនេះត្រូវបានចុះផ្សាយលើទស្សនាវដ្ដី Astrophysical Journal Letters កាលពីថ្ងៃទី 29 មីនា។

ព្រឹត្តិការណ៍ខាងលើនេះបានទាក់ទាញចំណាប់អារម្មណ៍ពីសហគមន៍អ្នកតារាសាស្ត្រអន្តរជាតិ។ ពួកគេគណនាឃើញថា ព្រឹត្តិការណ៍នេះអាចកើតមានតែម្ដងគត់ក្នុងមួយសហស្សវត្សរ៍ និងជួយឱ្យអ្នកវិទ្យាសាស្ត្រស្រាវជ្រាវរកប្រភព និងការរីកចម្រើនរបស់ហេតុការណ៍ផ្ទុះកាំរស្មី gamma (GRB) នានា។

GRB ត្រូវបានចាត់ទុកថាជាប្រភេទនៃការផ្ទុះដែលមានកម្លាំងខ្លាំងបំផុតក្នុងចក្រវាល បន្ទាប់ពីព្រឹត្តិការណ៍ផ្ទុះ Big Bang។ ពួកវាមានប្រភពពីហេតុការណ៍ផ្ទុះផ្កាយខ្នាតយក្ស ឬស៊ូពើណូវ៉ា (supernova) នៅពេលផ្កាយខ្នាតយក្សមួយដួងអស់ថាមពល និងបែកធ្លាយទៅជាផ្កាយណឺត្រុង (neutron star) ឬប្រហោងខ្មៅ (black hole)។

វិទ្យាស្ថានរូបវិទ្យាថាមពលខ្ពស់ (IHEP) របស់បណ្ឌិត្យសភាវិទ្យាសាស្ត្រចិន រួមនឹងអ្នកវិទ្យាសាស្ត្រនៃអង្គការជាង 30 មកពីសហរដ្ឋអាម៉េរិក អ៊ីតាលី បារាំង និងអាល្លឺម៉ង់ បានធ្វើការវាស់វែងយ៉ាងសុក្រឹតទៅលើការបញ្ចេញរស្មីរបស់ហេតុការណ៍ផ្ទុះធំមិនធ្លាប់បានឃើញនេះ ដោយប្រើប្រាស់តេឡេស្កុបអវកាស Insight-HXMT និង GECAM-C។

ក្រុមអ្នកវិទ្យាសាស្ត្ររកឃើញថា ក្នុងរយៈពេលមួយនាទី ការផ្ទុះ GRB 221009A បញ្ចេញថាមពលប្រហាក់ប្រហែលនឹងថាមពលរបស់ព្រះអាទិត្យចំនួន 10,000 ដួង ដែលបញ្ចេញក្នុងរយៈពេលរាប់ពាន់លានឆ្នាំ ដោយប្រើប្រាស់ប្រតិកម្មនុយក្លេអែរសរុប។

ប្រធានក្រុមស្រាវជ្រាវប្រចាំ IHEP នៃគម្រោង GECAM-C បានឱ្យដឹងថា GRB 221009A បានបំណែកកំណត់ត្រាស្ដីពីវិសាលភាពនៃពន្លឺរបស់ហេតុការណ៍ផ្ទុះកាំរស្មី gamma នាពេលកន្លង ដោយខ្លាំងជាង 50 ដង។

ចាប់តាំងពីបានស្គាល់ GRB កាលពីឆ្នាំ 1967 អ្នកវិទ្យាសាស្ត្របានរកឃើញព្រឹត្តិការណ៍បែបនេះជិត 10,000 ករណី ដែលពួកវាកើតឡើងដោយសារការបែកធ្លាយរបស់តារាខ្នាតធំ ឬការប៉ះគ្នារបស់វត្ថុអវកាសខ្នាតយក្ស មានដូចជាប្រហោងខ្មៅ និងតារាណឺត្រុងជាដើម៕

March 30, 2023

Nokia រៀបផែនការនាំអ៊ីនធើណិត 4G ឡើងទៅកាន់ឋានព្រះចន្ទ

ក្រុមហ៊ុនបច្ចេកវិទ្យា Nokia នឹងនាំយកបណ្ដាញអ៊ីនធើណិត 4G ឡើងទៅកាន់ឋានព្រះចន្ទតាមរយៈរ៉ុក្កែត SpaceX នៅចុងឆ្នាំ 2023 ក្នុងទិសដៅផ្គត់ផ្គង់សម្រាប់តម្រូវការទំនាក់ទំនងរបស់មនុស្សក្នុងទីអវកាស។

Luis Maestro Ruiz De Temino ប្រធានវិស្វកររបស់ Nokia បានឱ្យដឹងថា ក្រុមហ៊ុននេះនឹងចាប់ផ្ដើមរៀបគម្រោងនាំយកប្រព័ន្ធអ៊ីនធើណិត 4G ឡើងទៅដាក់លើឋានព្រះចន្ទក្នុងអំឡុងប៉ុន្មានខែខាងមុខ។ ផែនការនេះគ្រោងនឹងសម្រេចបាននៅចុងឆ្នាំ 2023។ នេះបើតាមទីភ្នាក់ងារសារព័ត៌មាន CNBC។

ប្រព័ន្ធអ៊ីនធើណិត 4G របស់ Nokia នឹងត្រូវបានផ្គត់ផ្គង់ដោយស្ថានីយមួយដែលមានអង់តែន។ ស្ថានីយនេះនឹងត្រូវបានដំឡើងក្នុងយានចុះចតលើព្រះចន្ទ Nova-C ដែលរចនាដោយក្រុមហ៊ុនអវកាសអាម៉េរិក Intuitive Machines។ យានបើកបរស្វ័យប្រវត្តលើដីព្រះចន្ទមួយគ្រឿងដែលដំណើរការដោយថាមពលព្រះអាទិត្យក៏នឹងត្រូវបានដាក់ឱ្យដំណើរការ។

យោងតាម Nokia ការតភ្ជាប់ប្រព័ន្ធ LTE នឹងត្រូវបានបង្កើតឡើងរវាងយានអវកាស និងយានចុះចត។ យានចុះចតនឹងត្រូវបានបញ្ចេញពីរ៉ុក្កែត SpaceX ហើយចុះចតលើមាត់ភ្នំភ្លើង Shackleton នៅភាគខាងត្បូងឋានព្រះចន្ទ។

ក្រុមហ៊ុន Nokia ឱ្យដឹងថា ប្រព័ន្ធអ៊ីនធើណិតនេះនឹងត្រូវបានប្រើប្រាស់ក្នុងបេសកកម្មឡើងទៅកាន់ឋានព្រះចន្ទ Artemis 1 របស់ណាសា។ ប្រព័ន្ធអ៊ីនធើណិតនេះមិនត្រឹមតែអនុញ្ញាតឱ្យអ្នកអវកាសទាក់ទងគ្នាបាននោះទេ តែក៏នឹងជួយគាំទ្រដល់ភារកិច្ចមួយចំនួនមានដូចជា ការបញ្ជាយានស្វ័យប្រវត្តពីចម្ងាយ ការបញ្ជូនវីដេអូផ្សាយផ្ទាល់ និងការផ្ញើទិន្នន័យពីព្រះចន្ទមកកាន់ផែនដីភ្លាមៗផងដែរ។

មួយក្នុងចំណោមការរំពឹងធំជាងគេរបស់ Nokia នៅក្នុងបេសកកម្មបង្កើតប្រព័ន្ធអ៊ីនធើណិតលើឋានព្រះចន្ទ គឺការស្វែងរកទឹកកកនៅលើផ្ទៃរបស់ពិភពរណបមួយនេះ៕

March 30, 2023

Tesla យកឈ្នះលើ VW, BMW និង Mercedes ក្លាយជាក្រុមហ៊ុនផលិតរថយន្តប្រណិតលេខមួយនៅអាម៉េរិក

ការសម្រេចចិត្តបញ្ចុះតម្លៃរាល់ម៉ូដែលរថយន្តអគ្គិសនីរបស់ Tesla នៅសហរដ្ឋអាម៉េរិក កាលពីខែមករាកន្លងទៅ បាននាំឱ្យមានការលក់ដាច់ខ្លាំងក្នុងត្រីមាសទីមួយឆ្នាំ 2023។

ការលក់រថយន្តរបស់ Tesla នៅទីផ្សារអាម៉េរិកក្នុងត្រីមាសទីមួយឆ្នាំនេះ គ្រោងនឹងសម្រេចបាន 180,000 គ្រឿង ដែលនេះនឹងជាត្រីមាសដែលបង្កើតបានកំណត់ត្រានៅទីផ្សារអាម៉េរិក ហើយក៏ជាកំណើនខ្ពស់ជិត 40% ធៀបនឹងត្រីមាសទីមួយឆ្នាំ 2022។

Tesla ក៏នឹងក្លាយជាក្រុមហ៊ុនផលិតរថយន្តប្រណិតលំដាប់លេខមួយនៅសហរដ្ឋអាម៉េរិកក្នុងត្រីមាសនេះ ដោយលក់រថយន្តបានច្រើនជាងទ្វេដង ធៀបនឹង BMW ឬ Mercedes-Benz។ ក្រុមហ៊ុនអាល្លឺម៉ង់ទាំងពីរនេះ លក់រថយន្តអគ្គិសនីលំដាប់ប្រណិតបានជាង 162,000 គ្រឿង ហើយនៅតែទាបជាងប្រហែល 18,000 គ្រឿង ធៀបនឹង Tesla ម្នាក់ឯង។

ការកាន់កាប់បាន 5.1% នៃទីផ្សារនៅសហរដ្ឋអាម៉េរិក ក៏នឹងជួយឱ្យ Tesla ឈរពីលើបណ្ដាក្រុមហ៊ុនផលិតរថយន្តធម្មតា មានដូចជា Mazda, Subaru រួមទាំងសាជីវកម្ម Volswagen ដែលមានក្រុមហ៊ុនបុត្រសម្ព័ន្ធ Audi, Bentley, Lamborghini, Porsche និង Volkswagen ផងដែរ។

March 30, 2023

កម្ពុជាបំបាក់មុខវៀតណាមនៅពានរង្វាន់ក្បាច់គុន Vovinam

នៅឯពានរង្វាន់ក្បាច់គុន Vovinam អាស៊ីអាគ្នេយ៍ 2023 ម្ចាស់ផ្ទះកម្ពុជាដណ្ដើមបានមេដាយចំនួន 28 គ្រឿង ក្នុងនោះមានមេដាយមាសចំនួន 10 គ្រឿង ហើយឈរលំដាប់លើគេបង្អស់។

នៅមុនព្រឹត្តិការណ៍កីឡាអាស៊ីអាគ្នេយ៍លើកទី 32 (2023 Southeast Asian Games ឬ SEA Games 32) ពានរង្វាន់មិត្តភាពអន្តរជាតិ និងពានរង្វាន់ផ្លូវការជាច្រើនក្នុងតំបន់អាស៊ីអាគ្នេយ៍ក៏ត្រូវបានបើកការប្រកួតក្នុងបំណងបង្កើន និងវាយតម្លៃឡើងវិញនូវគុណភាព សមត្ថភាពរបស់កីឡាករ អត្តពលិក ក៏ដូចជាស្ទាបស្ទង់សមត្ថភាពរបស់គូប្រកួតជាដើម ដើម្បីត្រៀមខ្លួនសម្រាប់ការប្រកួតនៅ SEA Games 32 ដែលនឹងធ្វើឡើងនៅខែឧសភា 2023 លើទឹកដីកម្ពុជា។

ថ្មីៗនេះ ពានរង្វាន់លំដាប់តំបន់ «Vovinam» ដែលជា «ក្បាច់គុនជាតិ» របស់ប្រទេសវៀតណាមក៏ទើបតែបានបញ្ចប់នៅក្នុងរាជធានីភ្នំពេញ។ យោងតាមប្រកាសរបស់គណៈកម្មការ ម្ចាស់ផ្ទះកម្ពុជាជាប់ចំណាត់ថ្នាក់លេខមួយ ដោយដណ្ដើមបានមេដាយសរុប 28 គ្រឿង ក្នុងនោះមានមេដាយមាសចំនួន 10 គ្រឿង, មេដាយប្រាក់ចំនួន 9 គ្រឿង និងមេដាយសំរឹទ្ធចំនួន 9 គ្រឿង។

ចំណែកវៀតណាម បើទោះជាម្ចាស់ និងឈរលំដាប់លេខមួយក្នុងវិញ្ញាសាក្បាច់គុន Vovinam នៅ SEA Games 31 ត្រូវឈរលំដាប់ទីពីរក្នុងការប្រកួតនេះ។ ក៏ប៉ុន្តែ នេះគ្រាន់តែជាការប្រកួតមុន SEA Games 32 ដូច្នេះមិនទាន់អាចវាយតម្លៃជាផ្លូវការ។ ក្រុមរបស់វៀតណាម រកបានមេដាយសរុប 19 គ្រឿង ក្នុងនោះមានមេដាយមាស 8 គ្រឿង, មេដាយប្រាក់ 11 គ្រឿង នៅក្នុងការប្រកួតរយៈពេលបីថ្ងៃ។

ចំណាត់ថ្នាក់បន្ទាប់គឺ មីយ៉ាន់ម៉ា ដោយដណ្ដើមបានមេដាយមាស 5 គ្រឿង ប្រាក់ 4 គ្រឿង និងសំរឹទ្ធ 21 គ្រឿង, ថៃរកបានមេដាយមាស 3 គ្រឿង ប្រាក់ 5 គ្រឿង និងសំរឹទ្ធ 4 គ្រឿង ខណៈឥណ្ឌូណេស៊ីដណ្ដើមបានមេដាយមាស 3 គ្រឿង និងសំរឹទ្ធ 15 គ្រឿង។

នៅ SEA Games 32 ដែលនឹងធ្វើឡើងនៅខែឧសភាខាងមុខ វិញ្ញាសា Vovinam ក៏នឹងមានមេដាយសរុបចំនួន 30 ឈុត ជាមួយនឹងវិញ្ញាសាចំនួនពីរគឺ ការសម្ដែង និងការប្រកួត៕

March 30, 2023

ព្រះចន្ទអាចមានលាក់ទឹករហូតដល់ 270 ទ្រីលានគីឡូក្រាម

គ្រាប់កែវល្អិតៗនៅក្នុងដីព្រះចន្ទផ្ទុកទឹកយ៉ាងច្រើន ដែលអាចក្លាយជាប្រភពធនធានមានផលប្រយោជន៍សម្រាប់ការទាញយកមកប្រើប្រាស់របស់ក្រុមអវកាសចរនាពេលអនាគត។

ផ្ទៃព្រះចន្ទពោរពេញដោយគ្រាប់កែវល្អិត។ ពួកវាកើតឡើងដោយការឆ្លងកាត់ពេលវេលារាប់ពាន់លានឆ្នាំ នៅពេលដីជះចេញពីការប៉ះទង្គិចជាមួយអាចម៍ផ្កាយបានចុះត្រជាក់ ហើយធ្លាក់ត្រលប់មកលើព្រះចន្ទ។ ការវិភាគសំណាកដីព្រះចន្ទដែលយាន Chang’e 5 របស់ប្រទេសចិនបានយកមកពីឋានព្រះចន្ទ បង្ហាញថា គ្រាប់កែវល្អិតៗខាងលើនេះមានទឹកច្រើនគួរសម។ ការរកឃើញនេះត្រូវបានចុះផ្សាយលើទស្សនាវដ្ដី Nature Geoscience កាលពីថ្ងៃទី 27 មីនា 2023។

អ្នកវិទ្យាសាស្ត្របានរកឃើញភស្ដុតាងជាច្រើនដងមកហើយស្ដីពីទឹកនៅលើឋានព្រះចន្ទ។ ក៏ប៉ុន្តែ ប្រភព និងលក្ខណៈពិសេសរបស់ទឹកនៅឋានរណបមួយនេះ នៅមានអាថ៌កំបាំងនៅឡើយ។ បណ្ដាគ្រាប់កែវល្អិតដែលបានរកឃើញក្នុងដីព្រះចន្ទ 1,731 ក្រាម ដែលយានរបស់ចិននាំយកមកកាន់ផែនដីកាលពីខែធ្នូ 2020 អាចជាចម្លើយបំពេញបន្ថែមសម្រាប់សំណួរខាងលើនេះ។

អ្នកវិទ្យាសាស្ត្រយល់ថា កាលពីរាប់ពាន់លានឆ្នាំមុន ព្រះចន្ទទំនងជាស្ងួតទាំងស្រុង។ ប៉ុន្តែ ក្រោយពីទទួលរងឥទ្ធិពលពីខ្យល់ព្រះអាទិត្យ (ជំនោរភាគល្អិតផ្ទុកអគ្គិសនីដែលជះចេញពីព្រះអាទិត្យ) ក្នុងរយៈពេលយូរ ទឹកក៏ចាប់ផ្ដើមកកើតនៅក្នុងបណ្ដាស្រទាប់លើរបស់ព្រះចន្ទ។ ប្រតិកម្មនេះនៅកើតមានរហូតដល់សព្វថ្ងៃ នៅពេលដែលអាតូមអ៊ីដ្រូសែនក្នុងខ្យល់ព្រះអាទិត្យភ្ជាប់ជាមួយម៉ូលីគុលអុកស៊ីសែនក្នុងដីព្រះចន្ទ និងបង្កើតបានម៉ូលីគុលទឹក។ នេះគឺជាការចាប់ផ្ដើមសម្រាប់វដ្ដរបស់ទឹកនៅលើឋានព្រះចន្ទ។

យោងតាមការស្រាវជ្រាវថ្មីរបស់ចិន បរិមាណទឹកក្នុងគ្រាប់កែវល្អិតៗគឺមានច្រើនជាងការសន្និដ្ឋានកន្លងមក។ ក្រុមអ្នកវិទ្យាសាស្ត្រគណនាឃើញថា ទឹកប្រហែល 270 ទ្រីលានគីឡូក្រាមទំនងកំពុងជាប់នៅក្នុងដីស្រទាប់លើបង្អស់ដែលមានកម្រាស់ 12 ម៉ែត្ររបស់ព្រះចន្ទ។

អ្នកវិទ្យាសាស្ត្រយល់ថា គ្រាប់កែវល្អិតៗនៅលើឋានព្រះចន្ទអាចជាប្រភពធនធានដែលអាចត្រូវបានក្រុមអ្នកអវកាសទាញយកមកប្រើនាពេលអនាគត និងអាចជួយដល់ការផលិតឥន្ធនៈសម្រាប់រ៉ុក្កែតនៅលើឋានព្រះចន្ទ បម្រើដល់បេសកកម្មហោះហើរផ្លូវឆ្ងាយក្នុងទឹកអវកាស៕

March 30, 2023

ក្រុមហ៊ុនអូស្ត្រាលីផលិតសាច់បណ្ដុះដែលមានផ្ទុក DNA របស់ដំរីដែលបានផុតពូជ

ក្រុមហ៊ុន Vow ផលិតសាច់ដំរីមេមម៉តដែលបានផុតពូជតាំងពីយូរ ដើម្បីបញ្ជាក់អំពីសក្ដានុពលរបស់សាច់ដែលបណ្ដុះពីកោសិកា។

Vow សហការជាមួយសាស្ត្រាចារ្យ Ernst Wolvetang មកពីវិទ្យាស្ថានបច្ចេកទេសជីវសាស្ត្រអូស្ត្រាលី នៃសាកលវិទ្យាល័យ Queensland ដើម្បីបង្កើតប្រូតេអ៊ីនសាច់ដុំដំរីមេមម៉ត (Mammoth)។ ក្រុមស្រាវជ្រាវបានរៀបលំដាប់ DNA សម្រាប់ប្រូតេអ៊ីន myoglobin របស់ដំរីមេមម៉ត ដែលជាប្រូតេអ៊ីនសាច់ដុំសំខាន់ជាងគេបង្អស់ផ្ដល់រសជាតិជាសាច់ និងប្រើប្រាស់ DNA ដើម្បីបន្ថែមទៅកន្លែងដែលមិនពេញលេញ។ លំដាប់ DNA នេះ ក្រោយមកត្រូវបានបញ្ចូលទៅក្នុងកោសិកាដើម fibroblast ដែលយកពីសត្វចៀម ហើយបណ្ដុះឱ្យបានច្រើនជាងមុន 20 ពាន់លានកោសិកាដែលក្រុមហ៊ុនប្រើប្រាស់ក្នុងការបណ្ដុះសាច់ដំរីមេមម៉ត។

យោងតាមលោក Wolvetang វិធីសាស្ត្រនេះផ្ដល់លទ្ធផលយ៉ាងឆាប់រហ័ស និងងាយស្រួល ដោយចំណាយពេលតែពីរសប្ដាហ៍ប៉ុណ្ណោះ។ លោកបន្តថា គ្រប់គ្នានឹងរារែកក្នុងការបរិភោគសាច់ដំរីមេមម៉ត ព្រោះតែវាចម្លែក និងនៅថ្មីថ្មោង។ ក៏ប៉ុន្តែ បើគិតអំពីបរិស្ថាន និងមនុស្សធម៌ លោក Wolvetang យល់ថា សាច់បណ្ដុះក្នុងបន្ទប់ពិសោធន៍ពិតជាមានន័យ។

រូបរាងរបស់ដំរីមេមម៉តដែលបានផុតពូជាអស់កាលជាយូរមកហើយ

គម្រោងខាងលើនេះត្រូវបានធ្វើឡើងក្នុងបំណងបញ្ជាក់អំពីសក្ដានុពលរបស់សាច់បណ្ដុះពីកោសិកាដោយមិនចាំបាច់សម្លាប់សត្វ ទន្ទឹមនឹងការបង្ហាញអំពីទំនាក់ទំនងរវាងការផុតពូជរបស់សត្វព្រៃ និងវិបត្តិអាកាសធាតុ។ ប្រហិតសាច់ដំរីមេមម៉តត្រូវបានបង្ហាញកាលពីថ្ងៃទី 28 មីនានៅ Nemo ដែលជាសារមន្ទីរវិទ្យាសាស្ត្ររបស់ប្រទេសហូឡង់៕

March 29, 2023

Ford Ranger Wildtrak ជំនួយការដ៏ឆ្លាតវៃសម្រាប់អ្នកចូលចិត្តដំណើរកម្សាន្តបែបផ្សងព្រេង

[ភ្នំពេញ: ថ្ងៃទី២៩ ខែមិនា ឆ្នាំ២០២៣] មនុស្សជាច្រើនតែងគិតថា រថយន្ត Pickup ជារថយន្តដែលប្រើសម្រាប់តែការដឹកទំនិញ លើកដាក់ឥវ៉ាន់តែប៉ុណ្ណោះ តែធាតុពិតទៅ រថយន្ត Pickup អាចប្រើប្រាស់ក្នុងគោលបំណងច្រើនយ៉ាង ជាពិសេសសម្រាប់អ្នកដែលចង់សម្រាកពីការងារ បំបាត់ភាពស្មុគស្មាញ និងបរិយាកាសដ៏អាប់អួរនៅក្នុងទីក្រុង មកផ្លាស់ប្តូររសជាតិជីវិតជាមួយនឹងការរស់នៅជាមួយធម្មជាតិ ព្រៃព្រឹក្សាដោយការទៅបោះតង់ក្នុងព្រៃ ឬរមណីយដ្ឋានធម្មជាតិនានា។ យ៉ាងណាមិញ ដើម្បីអោយដំណើរកម្សាន្តនេះប្រព្រឹត្តទៅបានរលូន ទាមទារអោយលោកអ្នកជ្រើសរើសជំនួយការដែលស័ក្តិសមមួយ។

ថ្ងៃនេះយើងសូមណែនាំនូវ រថយន្ត Pickup មួយប្រភេទដែលកំពុងទទួលបានការពេញនិយម ពីសំណាក់បងប្អូន ប្រជាពលរដ្ឋកម្ពុជាទូទាំងប្រទេស នោះគឺរថយន្ត Ford Ranger Wildtrak ស៊េរីឆ្នាំ 2023 ដែលត្រូវបានផ្លាស់ប្តូររូបរាងថ្មីទាំងស្រុង និងបានបំពាក់នូវបច្ចេកវិទ្យា និងប្រព័ន្ធសុវត្ថិភាពថ្មីៗជំនាន់ចុងក្រោយ ហើយជារថយន្តដែលអាចប្រើបានគ្រប់គោលបំណងជាពិសេសសម្រាប់ដំណើរកម្សាន្តបែបផ្សងព្រេង។

រថយន្ត Ford Ranger Wildtrak ស៊េរីឆ្នាំ ២០២៣ នេះ ត្រូវបានរចនាម៉ូដថ្មីស្រឡាង ធំជាងមុន ទូលាយជាងមុន។ មិនតែប៉ុណ្ណោះ ឃ្លុបខាងក្រោយនៃរថយន្តនេះក៏មានទំហំធំ ហើយធូរងាយស្រួលបិទ/បើកជាងមុនផងដែរ ជាមួយនឹងតែមអក្សរផុស Ranger ធ្វើអោយរថយន្តមួយនេះកាន់តែមានអំណាច។ បន្ថែមលើនេះទៅទៀត ឃ្លុបខាងក្រោយនៃរថយន្តនេះក៏បានប្រើប្រាស់នូវជ័រក្រាលបាតស៊េរីថ្មី (Bedliner) ទំហំធំជាងមុនអាចដាក់ប៉ាឡែតឈើ ស្តង់ដារអឺរ៉ុប (Full-sized Euro Pallet) និងមានទម្ពក់សម្រាប់ថ្ពក់ខ្សែចងរឹតឥវ៉ាន់ថែមទៀតផង។

ជាងនេះទៅទៀត ឃ្លុបខាងក្រោយនៃរថយន្តនេះក៏មានបន្ទាត់ម៉ែត្រក្រិត និងអាចភ្ជាប់ជាមួយឧបករណ៍គ្រីបឈើប្រៀបបានដូចជារោងជាងចល័តមួយនៅក្បែរលោកអ្នក។ រថយន្តនេះក៏បានបំពាក់មកជាមួយនូវឈ្នាន់ជាន់ផ្នែកចំហៀងខាងក្រោយ ដែលកាន់តែផ្តល់ភាពងាយស្រួលខ្លាំងជាងមុន សម្រាប់ការឡើង និងចុះរថយន្ត ដោយមិនចាំបាច់ឡើងតាមកង់រថយន្តទៀតទេ។

គួរបញ្ជាក់ផងដែរថា ឃ្លុបក្រោយរបស់រថយន្តនេះក៏បានបំពាក់មកជាមួយនូវ រន្ធសម្រាប់សាកថ្មដែលមានកម្លាំង 12V/180W និងរន្ធព្រីភ្លើងកម្លាំង ដល់ទៅ 220V/400W អាចភ្ជាប់ជាមួយនឹងឧបករណ៍អេឡិចត្រូនិចផ្សេងៗ ជាពិសេសងាយស្រួលក្នុងការងារ និងដំណើរកម្សាន្តបែបផ្សងព្រេងជាដើម។

ចំណុចដែលកាន់តែពិសេសលើសរថយន្ត Pickup ដទៃនោះគឺ ឃ្លុបខាងក្រោយនៃរថយន្តនេះ ក៏មានទំហំធំទូលាយ អាចដាក់សម្ភារបានកាន់តែច្រើនជាងមុន និងមានកន្លែងសម្រាប់ភ្ជាប់ជាមួយរបាឈើសម្រាប់បែងចែកសម្ភារផ្នែកខាងក្រោយ និងជួយមិនអោយសម្ភាររមៀលចុះឡើងពេលរថយន្តជាន់ហ្វ្រាំងថែមទៀតផង។

ដំណើរកម្សាន្តដ៏អស្ចា្យ តែងតែមានជំនួយការដ៏ឆ្លាតវៃនោះគឺ រថយន្ត Ford Ranger Wildtrak ស៊េរីឆ្នាំ ២០២៣។

March 29, 2023

Author: សឿន សំណាង