Paris - La Reine Media

បរិភោគក្រោយម៉ោងនេះ ហានិភ័យដាច់សរសៃឈាមខួរក្បាលនឹងកើនបន្ថែម 28 ភាគរយ

ក្រុមអ្នកវិទ្យាសាស្ត្របានធ្វើការសិក្សាស្រាវជ្រាវរយៈពេល 7 ឆ្នាំ និងបានរកឃើញថា ពេលវេលានៃការបរិភោគអាហារពេលល្ងាច អាចប៉ះពាល់ដល់សុខភាពបេះដូង និងបង្កើនហានិភ័យកើតជំងឺដាច់សរសៃឈាមខួរក្បាល ដែលនាំឱ្យស្លាប់មួយចំហៀងខ្លួនជាដើម។

ក្រុមអ្នកជំនាញមកពីសាកលវិទ្យាល័យ Sorbonne Paris Nord នៃប្រទេសបារាំង បានធ្វើការសិក្សាស្រាវជ្រាវ វាយតម្លៃស្ថានភាពសុខភាពរបស់មនុស្ស 103,389 នាក់ នៅក្នុងរង្វង់ 7 ឆ្នាំ ហើយបានរកឃើញថា ការបរិភោគអាហារពេលល្ងាចមុនម៉ោង 20 (ម៉ោង 8 យប់) នឹងល្អសម្រាប់សុខភាព។ ក្រុមស្រាវជ្រាវបានពិនិត្យមើលកាលវិភាគនៃការបរិភោគអាហាររបស់អ្នកស្ម័គ្រចិត្តដែលបានកត់ត្រាចាប់តាំងពីឆ្នាំ 2009 ដល់ 2022។

យោងតាមរបាយការណ៍របស់វិទ្យាស្ថានជាតិស្រាវជ្រាវផ្នែកសុខាភិបាល និងសុខភាពបារាំង ដែលបានប្រកាសកាលពីថ្ងៃទី 14 ធ្នូ 2023 ក្រុមអ្នកស្រាវជ្រាវរកឃើញថា 1/3 នៃអ្នកស្ម័គ្រចិត្តខាងលើ បរិភោគអាហារពេលល្ងាចមុនម៉ោង 8 យប់ ខណៈដែល 1/3 ផ្សេងទៀតបរិភោគនៅម៉ោង 9 យប់។ ក្នុងដំណាក់កាលនៃការសិក្សាស្រាវជ្រាវ មានប្រហែល 2,000 ករណី កើតជំងឺបេះដូង។

នៅពេលពិនិត្យទៅលើពេលវេលានៃការបរិភោគអាហារពេលល្ងាចរបស់អ្នកដែលកើតជំងឺបេះដូងទាំងនេះ អ្នកស្រាវជ្រាវបានរកឃើញថា អ្នកបរិភោគក្រោយម៉ោង 9 យប់ មានហានិភ័យកើតស្ត្រូក (ជំងឺដាច់សរសៃឈាមខួរក្បាល) ឬអាការខ្វះឈាមខួរក្បាលមួយរយៈពេលខ្លី ខ្ពស់ជាង 28% បើធៀបនឹងអ្នកដែលបរិភោគអាហារមុនម៉ោង 8 យប់៕

December 19, 2023

ទីក្រុងចំនួនដប់ដែល «ថ្លៃ» ជាងគេលើពិភពលោក

ក្នុងបញ្ជីចំណាត់ថ្នាក់នៃបណ្ដាទីក្រុងដែលការចំណាយក្នុងការរស់នៅរបស់ប្រជាជន មានកម្រិតខ្ពស់ជាងគេលើពិភពលោក សម្រាប់ឆ្នាំ 2023 ទីក្រុងសិង្ហបុរី និងហ្សូរិចកំពុងនាំមុខគេ។

ទីក្រុងសិង្ហបុរី (Singapore) ធ្លាប់បាននាំមុខគេ 9 លើក ក្នុងរយៈពេល 11 ឆ្នាំ នៅក្នុងបញ្ជីចំណាត់ថ្នាក់ប្រចាំឆ្នាំ ស្ដីពីបណ្ដាទីក្រុងដែលការចំណាយក្នុងការរស់នៅរបស់ប្រជាជន មានកម្រិតខ្ពស់ជាងគេលើពិភពលោក ខណៈដែលទីក្រុងហ្សូរិច បានលោតពីចំណាត់ថ្នាក់ទី 6 ឡើងមកកាន់លេខ 1 ជាមួយនឹងសិង្ហបុរី។ ការចំណាយខ្ពស់នៅទីក្រុងសិង្ហបុរី កើតមានដោយសារថ្លៃដឹកជញ្ជូន ថ្លៃសម្លៀកបំពាក់ ស្បៀងអាហារ និងភេសជ្ជៈជាដើម។ ចំណែកទីក្រុងហ្សូរិចរបស់ប្រទេសស្វ៊ីស កើនចំណាត់ថ្នាក់ដោយសារតែឥទ្ធិពលរបស់រូបិយប័ណ្ណហ្វ្រង់ស្វ៊ីស និងការឡើងថ្លៃរបស់ទំនិញ និងសេវាកម្មកម្សាន្ត។

បណ្ដាទីក្រុងដូចជា ហ្សឺណែវ (Geneva) របស់ប្រទេសស្វ៊ីស, ញូវយ៉ក (New York) របស់សហរដ្ឋអាម៉េរិក, ហុងកុង (Hong Kong) របស់ប្រទេសចិន, ឡូសអាន់ជឺឡេស (Los Angeles) របស់សហរដ្ឋអាម៉េរិក, ប៉ារីស (Paris) របស់ប្រទេសបារាំង, កូប៉ិនហាក (Copenhagen) របស់ដាណឺម៉ាក, តេលអាវីវ (Tel Aviv) របស់អ៊ីស្រាអែល និងសាន់ហ្វ្រាន់ស៊ីស្កូ (San Francisco) របស់សហរដ្ឋអាម៉េរិក ក៏ស្ថិតក្នុងបញ្ជីចំណាត់ថ្នាក់នេះ។

ទ្វីបអាស៊ីមានកំណើនអតិផរណាទាបជាង បើធៀបនឹងតំបន់ដទៃ។ ការប្រៀបធៀបតម្លៃទំនិញ និងសេវាកម្ម 200 មុខ ត្រូវបានធ្វើឡើងលើទីក្រុងចំនួន 173 ក្នុងពិភពលោក។ ដាម៉ាស (Damascus) របស់ប្រទេសស៊ីរី និង តេហេរ៉ង់ របស់ប្រទេសអ៊ីរ៉ង់ គឺជាទីក្រុងដែលមានថ្លៃទំនិញ និងសេវាកម្មទាបជាងគេលើពិភពលោក។ នេះបើតាមបញ្ជីចំណាត់ថ្នាក់របស់ The Economist៕

December 1, 2023

ដំណើរក្លាយជាតារា Idol នៅ Kpop មិនមែនជារឿងធម្មតាឡើយ

ក្មេងជាច្រើននៅកូរ៉េខាងត្បូង ក្លាយជាអ្នកហាត់ការពេលមានវ័យទើបតែ 10 ឆ្នាំ និងចំណាយប្រហែល 10 ឆ្នាំក្នុងការហាត់ច្រៀង រាំ នៅមុនពេលបង្ហាញខ្លួនក្នុងក្រុមចម្រៀង។

«ដើម្បីក្លាយជា idol Kpop ដែលជោគជ័យ អ្នកត្រូវតែជាមនុស្សក្លាហាន មានចំណូលចិត្តខ្ពស់ មានវិន័យ និងសំណាង» Patti Sunio ឱ្យដឹងនៅលើ SCMP ដែលនិយាយអំពីដំណើរក្លាយជា idol ម្នាក់។

ជាដំបូង កុមារដែលមានទេពកោសល្យត្រូវតែចុះកិច្ចសន្យាធ្វើជាអ្នកហាត់ការរបស់ក្រុមហ៊ុនមួយ។ យោងតាម Koreaboo ក្មេងជាច្រើននៅកូរ៉េខាងត្បូងបានជាប់ក្នុងការជ្រើសរើសតាំងពីអាយុ 10 ឆ្នាំ ដោយពួកគេចូលរួមការសម្ដែងសាកល្បងជាមធ្យម 30 លើក មុនពេលចុះកិច្ចសន្យាហាត់ការ។ តាមនិន្នាការសកលរបស់វិស័យឧស្សាហកម្ម Kpop បណ្ដាក្រុមអ្នកវិនិយោគបានពង្រីកដំណើរការជ្រើសរើសអ្នកហាក់ការនៅក្នុងក្របខណ្ឌទូទាំងសកលលោក ផ្ដល់ឱកាសដល់ក្មេងនៅប្រទេសដទៃក្រៅពីកូរ៉េខាងត្បូង។

ក្មេងជាច្រើននៅកូរ៉េខាងត្បូងបានជាប់ក្នុងការជ្រើសរើសតាំងពីអាយុ 10 ឆ្នាំ

Lisa របស់ក្រុម Blackpink គឺជាឧទាហរណ៍មួយសម្រាប់ប្រការខាងលើ។ នាងគឺជាមនុស្សតែម្នាក់គត់ដែលឆ្លងផុតការជ្រើសរើសរបស់ក្រុមហ៊ុនកម្សាន្ត YG នៅប្រទេសថៃ ហើយជាអ្នកហាត់ការជនជាតិបរទេសដំបូងដែលបង្ហាញវត្តមាននៅ YG។ ក្រៅពីសម្ពាធនៃការហ្វឹកហាត់ ក្មេងបរទេសក៏ត្រូវតែឆ្លងកាត់រនាំងភាសា វប្បធម៌ ដើម្បីសម្របខ្លួន។ បណ្ដាក្រុមហ៊ុនគ្រប់គ្រងនឹងទទួលខុសត្រូវលើការចំណាយទាំងអស់របស់អ្នកហាត់ការ។ ខ្ទង់ប្រាក់ចំណាយជាមធ្យមសម្រាប់អ្នកហាត់ការម្នាក់នៅ Kpop គឺប្រហែល 50,000 ដុល្លារ/ឆ្នាំ។

ការធ្វើជាអ្នកហាត់ការគ្រាន់តែជាជំហានដំបូងនៅក្នុងការបើកផ្លូវសម្រាប់ដំណើរដ៏វែងឆ្ងាយ និងប្រកបដោយឧបសគ្គ មុននឹងអាចក្លាយជា idol ម្នាក់។ ក្នុងអំឡុងហាត់ការដែលមានរយៈពេលជាមធ្យម 7 ឆ្នាំ ក្រុមហ៊ុនគ្រប់គ្រងនឹងវាយតម្លៃលើជំនាញ សមត្ថភាពសម្របខ្លួននៅក្នុងក្រុម និងការស៊ូទ្រាំនឹងសម្ពាធរបស់អ្នកហាក់ការម្នាក់ៗ។ ក្រៅពីសំឡេងច្រៀង ក្បាច់រាំ ពួកគេក៏ត្រូវរៀនភាសាបរទេស វិធីសាស្ត្រគ្រប់គ្រងរូបភាព ការឆ្លើយក្នុងកិច្ចសម្ភាស ទំនាក់ទំនងជាមួយមិត្តរួមអាជីព និងការរក្សាទម្ងន់រាងកាយជាដើម។ ជាងនេះ ក្រុមហ៊ុនជាច្រើនក៏ស្នើឱ្យអ្នកហាត់ការសន្យាថាមិនប្រើប្រាស់គ្រឿងញៀន ផឹកគ្រឿងស្រវឹងនៅពេលបើកបរ និងចៀសវាងរឿងអាស្រូវស្នេហាផងដែរ។ Euny Hong អ្នកយកព័ត៌មានអាម៉េរិកដើមកំណើតកូរ៉េខាងត្បូង បានសរសេរលើ The Paris Review ថា «ការបណ្ដុះបណ្ដាលតារា Kpop គឺជាការអប់រំមនុស្សដ៏ពេញលេញ»។

កាលជ្រើសរើសបេក្ខភាពសម្រាប់តំណែងអ្នកហាត់ការរបស់ SM Entertainment នៅជប៉ុន កាលពីឆ្នាំ 2019

កំពូលតារា Kpop ជាច្រើន បានចំណាយស្ទើរពេញមួយយុវវ័យដើម្បីធ្វើជាអ្នកហាត់ការ និងរកឱកាសដើម្បីបង្ហាញខ្លួន។ G-Dragon របស់ Bigbang បានឆ្លងកាត់ការបណ្ដុះបណ្ដាល 11 ឆ្នាំ ក្នុងនោះ 5 ឆ្នាំនៅ SM Entertainment និង 6 ឆ្នាំនៅ YG។ Idol Kpop ជាច្រើនរូបផ្សេងទៀតក៏ធ្លាប់បានឆ្លងកាត់ប្រហាក់ប្រហែលនេះ ក្នុងនោះមានដូចជា Jihyo (TWICE, 10 ឆ្នាំ), Heo Chan Mi (10 ឆ្នាំ), Jennie (Blackpink, 6 ឆ្នាំ), Suho (EXO, 6 ឆ្នាំ)។

ពេលធ្វើជាគណៈកម្មការនៃកម្មវិធី Idol Producer តារាចម្រៀង Lay (EXO) បានបង្ហើបអំពីដំណើរការប្រកួតប្រជែងមុនពេលបានបង្ហាញខ្លួនជាមួយក្រុមថា ក្នុង 120 នាក់ ពួកគេរើសយកតែ 100 នាក់ ហើយបន្តជម្រុះរាប់សិបនាក់ទៀត ដើម្បីយក 24 នាក់។ ចាប់ពី 24 នាក់ ពួកគេក៏ជ្រើសរើស 12 នាក់ចុងក្រោយ។ រៀងរាល់សប្ដាហ៍សុទ្ធតែមានអ្នកហាត់ការម្នាក់ត្រូវចាកចេញ»។

បើទោះជាបង្ហាញខ្លួនក្នុងរូបភាពដ៏អស្ចារ្យ ប៉ុន្តែ idol ជាច្រើននៅ Kpop រកប្រាក់ចំណូលមិនបានច្រើនដូចទស្សនិកជនគិតនោះឡើយ។ ទំព័រ Seoulspace បានផ្សាយថា ក្រុមហ៊ុនកន្សាន្តជាច្រើនយកប្រាក់ចំណូលរហូតដល់ 90% ហើយទុកតែ 10% ប៉ុណ្ណោះសម្រាប់តារាម្នាក់ៗ។ សម្រាប់ក្រុមដែលមានសមាជិក 20 នាក់ដូច NCT ជាដើម នឹងទទួលបានប្រាក់ចំណូលកាន់តែទាប។ នេះមិនទាន់និយាយដល់រឿងបង់ពន្ធជូនរដ្ឋនៅឡើយ៕

Jennie (Blackpink) កាលនៅជាអ្នកហាត់ការ

August 7, 2023

ភ្នំភ្លើងធំជាងគេក្នុងប្រព័ន្ធព្រះអាទិត្យធ្លាប់ជាកោះនៅកណ្ដាលសមុទ្រ

ភ្នំភ្លើង Olympus Mons ដែលមានកម្ពស់ 25 គីឡូម៉ែត្រ នៅលើផ្ទៃភពអង្គារ ទំនងជាធ្លាប់ស្ថិតនៅកណ្ដាលមហាសាគរ។

ពេលភពអង្គារនៅក្មេង និងពេញដោយទឹកកាលពីរាប់ពាន់លានឆ្នាំមុន ភ្នំភ្លើងខ្នាតធំ Olympus Mons ទំនងជាមានរូបរាងដូចទៅនឹងភ្នំភ្លើង Stromboli ឬ Savai’l នៅលើផែនដី ប៉ុន្តែធំជាងឆ្ងាយ។ ការវិភាគថ្មីត្រូវបានប្រកាសលើទស្សនាវដ្ដី Earth and Planetary Science Letters ដែលបង្ហាញអំពីចំណុចប្រហាក់ប្រហែលគ្នារវាងភ្នំភ្លើង Olympus Mons និងបណ្ដាកោះភ្នំភ្លើងសកម្មនៅលើផែនដី ផ្ដល់អំណះអំណាងថ្មីស្ដីពីអតីតកាលដែលពេញដោយទឹករាវរបស់ភពអង្គារ។ នេះបើតាម Science Alert ចុះផ្សាយកាលពីថ្ងៃទី 27 កក្កដា 2023។

ក្រុមអ្នកវិទ្យាសាស្ត្រមកពីសាកលវិទ្យាល័យ Paris-Saclay នៅប្រទេសបារាំង បានឱ្យដឹងថា ផ្នែកខាងលើនៃចង្កេះភ្នំដែលមានកម្ពស់ 6 គីឡូម៉ែត្រ ព័ទ្ធជុំវិញភ្នំភ្លើង Olympus Mons ទំនងជាបានកើតឡើងដោយសារកំអែភ្នំភ្លើងហូរចូលទៅក្នុងទឹករាវ នៅពេលរចនាសម្ព័ន្ធនេះគឺជាកោះភ្នំភ្លើងដែលធ្វើសកម្មភាពអំឡុងពេលប្រហែលនៅចុងយុគសម័យ Noachian និងដើមយុគសម័យ Hesperian។

Olympus Mons គឺជាភ្នំភ្លើងដែលមានរូបរាងដូចខែលបុរាណ កម្ពស់ 25 គីឡូម៉ែត្រ និងលាតសន្ធឹងលើផ្ទៃដីដែលធំប៉ុនប្រទេសប៉ូឡូញ។ នេះមិនត្រឹមតែជាភ្នំភ្លើងធំបំផុត ប៉ុន្តែក៏ជាភ្នំភ្លើងខ្ពស់បំផុតផងដែរ នៅក្នុងប្រព័ន្ធព្រះអាទិត្យ។ ជើងភ្នំភ្លើងនេះមិនដូចទៅនឹងជើងភ្នំធម្មតានៅលើដីគោក ព្រោះថា នៅក្នុងរយៈកម្ពស់ប្រហែល 6 គីឡូម៉ែត្រ មានជញ្ជាំងថ្មឈរត្រង់ ព័ទ្ធស្ទើរតែជុំភ្នំ និងចាក់ចុះត្រង់ទៅក្រោម។ ប្រភពនៃជញ្ជាំងថ្មភ្នំចាក់ចុះត្រង់នេះ នៅតែជារឿងអាថ៌កំបាំងនៅឡើយ។

បច្ចុប្បន្ន ភពអង្គារគឺជាទីឋានដ៏សែនសោះកក្រោះ គ្មានទឹក និងពេញដោយខ្សាច់ ធូលី។ ទឹកនៅលើផ្ទៃរបស់ភពនេះ នៅមានខ្លះដែរ តែនៅក្នុងទម្រង់ទឹកកក។ ក៏ប៉ុន្តែ អ្នកវិទ្យាសាស្ត្រ បានរកឃើញភ័ស្ដុតាងជាបន្តបន្ទាប់ដែលបង្ហាញថា ទឹករាវធ្លាប់គ្របដណ្ដប់ពាសពេញផ្ទៃភពអង្គារ៕

July 29, 2023

គ្រាន់តែកិនឆ្មាងាប់សោះ ក្រុមហ៊ុនបារាំងរងការពិន័យជាប្រាក់ 3,000 ដុល្លារអាម៉េរិក

ក្រុមហ៊ុនគ្រប់គ្រងផ្លូវដែកជាតិបារាំង ត្រូវបានពិន័យជាប្រាក់ជាង 1,000 ដុល្លារអាម៉េរិក ពីបទខ្វះការទទួលខុសត្រូវ ដោយសារតែបានកិនឆ្មាសំណព្វរបស់អ្នកដំណើរម្នាក់ រហូតដល់ងាប់។

តុលាការបារាំង កាលពីថ្ងៃទី 04 កក្កដា បានសម្រេចថា ក្រុមហ៊ុនផ្លូវដែកជាតិ (SNCF) បានធ្វើឱ្យមានកំហុសទាក់ទិននឹងបញ្ហាខ្វះការទទួលខុសត្រូវ បន្ទាប់ពីមានករណីរថភ្លើងមួយខ្សែបានកិនឆ្មាសំណព្វរបស់អ្នកដំណើររហូតដល់ងាប់ កាលពីខែមករា។

ការចោទប្រកាន់ខាងលើនេះអាចដាក់ពិន័យជាប្រាក់ឡើងដល់ 75,000 អឺរ៉ូប (ជាង 80,000 ដុល្លារអាម៉េរិក) និងដាក់ពន្ធនាគារ 5 ឆ្នាំ។ ក៏ប៉ុន្តែ តុលាការបានសម្រេចពិន័យជាប្រាក់ត្រឹមតែ 1,000 អឺរ៉ូ (ជាង 1,000 ដុល្លារអាម៉េរិក) ចំពោះ SNCF។

SNCF ក៏ត្រូវបានបញ្ជាឱ្យបង់ប្រាក់ជំងឺចិត្តបន្ថែមចំនួន 2,000 អឺរ៉ូ (ជិត 2,200 ដុល្លារអាម៉េរិក) ដល់ម្ចាស់ពីរនាក់របស់សត្វមួយក្បាលឈ្មោះ Neko ដែលត្រូវរថភ្លើងកិននោះផងដែរ។

រឿងរ៉ាវខាងលើបានកើតឡើងកាលពីខែមករា 2023។ កាលណោះ Georgia និងកូនស្រី Melaina អាយុ 15 ឆ្នាំ បានឃើញ Neko លោតចុះពីថង់ និងរត់ទៅកាន់ផ្លូវដែកនៅមុនពេលរថភ្លើងចេញដំណើរ។ Georgia បានចោទថា បុគ្គលិករបស់ក្រុមហ៊ុនរថភ្លើងមានចិត្តឃោរឃៅ ព្រោះបានបដិសេធការស្នើសុំពន្យារការចេញដំណើរពី Paris ទៅកាន់ Bordeaux ដើម្បីជួយស្វែងរកឆ្មា។

នៅពេលរថភ្លើងចេញដំណើរ ម្ចាស់ឆ្មាក៏បានឃើញ Neko ត្រូវរថភ្លើងកិន។ ពេលនោះ SNCF ស្នើសុំបង់ថ្លៃខូចខាតដោយសំបុត្ររថភ្លើងមួយទៅកាន់ Bordeaux។

ករណីខាងលើក៏បានធ្វើឱ្យមានបាតុកម្ម រួមនឹងញត្តិតវ៉ាដែលមានស្នាមមេដៃរបស់មនុស្ស 100,000 នាក់។ រដ្ឋមន្ត្រីក្រសួងមហាផ្ទៃបារាំង Gerald Darmanin និយាយថា លោកភ្ញាក់ផ្អើលខ្លាំងណាស់នៅចំពោះហេតុការណ៍នេះ។ អង្គការការពារសិទ្ធិសត្វមួយក៏បានដាក់ញត្តិតវ៉ាចំពោះ SNCF ព្រោះតែ «អំពើហិង្សាធ្ងន់ធ្ងរ និងឃោរឃៅដែលនាំឱ្យសត្វស្លាប់»។

ចៅក្រមតុលាការបារាំង កាលពីថ្ងៃទី 04 កក្កដា 2023 យល់ថា បុគ្គលិកនៅលើរថភ្លើង «មិនបានប្រឹងប្រែងក្នុងការសង្គ្រោះសត្វឆ្មា»។ សាលក្រមរបស់តុលាការនេះក៏ដើរផ្ទុយពីអនុសាសន៍របស់ក្រុមរដ្ឋអាជ្ញា ជាក្រុមដែលអំពាវនាវឱ្យទម្លាក់ចោលរាល់ការចោទប្រកាន់ទៅលើ SNCF ដោយយល់ថា បុគ្គលិករបស់ស្ថាប័ននេះមិនបានបញ្ចេញភាពគ្មានមនុស្សធម៌។

នៅលើបណ្ដាញសង្គម មនុស្សមួយចំនួនបានរិះគន់សាលក្រមតុលាការខាងលើ។ អ្នកខ្លះថា លើកក្រោយបើមានករណីនេះកើតឡើង ពួកគេគិតថា ម្ចាស់សត្វត្រូវតែបង់ថ្លៃខាតបង់ពេលវេលាដល់អ្នកដំណើរដទៃ នៅពេលរថភ្លើងត្រូវបានពន្យារពេលចេញដំណើរ៕

July 6, 2023

យន្តហោះដឹកអ្នកដំណើរល្បឿនលឿនជាងសំឡេង Overture អាចហោះបានជាង 2,000 គីឡូម៉ែត្រ/ម៉ោង

យន្តហោះ Overture របស់ក្រុមហ៊ុនអាម៉េរិក Boom Supersonic បំពាក់ម៉ាស៊ីនដែលមានកម្លាំងរុញច្រាន 16 តោន គ្រោងនឹងអាចដឹកអ្នកដំណើរបានពី 65 ទៅ 80 នាក់។

នៅក្នុងព្រឹត្តិការណ៍ពិព័រណ៍អាកាសចរណ៍ Paris Air Show ចាប់ពីថ្ងៃទី 19 ដល់ 25 មិថុនា នៅទីក្រុងប៉ារីស ក្រុមហ៊ុន Boom Supersonic បានប្រកាសកិច្ចព្រមព្រៀងជាបន្តបន្ទាប់ជាមួយនឹងអ្នកផ្គត់ផ្គង់ថ្មីៗ និងបង្ហើបឱ្យដឹងខ្លះៗអំពីគម្រោងយន្តហោះល្បឿនលឿនជាងសំឡេង Overture និងម៉ាស៊ីន Symphony។ នេះបើតាមទំព័រ New Atlas។

បណ្ដាដៃគូថ្មីៗរបស់ Boom Supersonic រួមមានដូចជា ក្រុមហ៊ុនអ៊ីតាលី Leonardo, ក្រុមហ៊ុនអេស្ប៉ាញ Aernnova និង Aciturri ជាដើម។ ក្រៅពីនេះ Boom Supersonic ក៏ប្រកាសព័ត៌មានស្ដីពីប្រព័ន្ធហោះហើរ បច្ចេកវិទ្យាអេឡិចត្រូនិច ឧបករណ៍ចុះចត ក៏ដូចជាម៉ាស៊ីនសម្រាប់យន្តហោះនេះផងដែរ។

ក្នុងនោះ ឥន្ធនៈ SAF (SAF-Sustainable aviation fuels) ក៏នឹងត្រូវបានប្រើប្រាស់សម្រាប់យន្តហោះ Overture។ SAF គឺជាឥន្ធនៈអាកាសចរណ៍ដែលត្រូវបានកំណត់ថា អាចកកើតឡើងវិញបាន។

តាមគម្រោង Overture នឹងអាចដឹកអ្នកដំណើរបានចាប់ពី 65 ដល់ 80 នាក់ និងអាចហោះក្នុងល្បឿនកម្រិត Mach 1.7 (លឿនជាងសំឡេង 1.7 ដង) ឬប្រហែលនឹង 2,100 គីឡូម៉ែត្រ/ម៉ោង ពេលហោះលើសមុទ្រ។ Overture អាចត្រូវបានដាក់ឱ្យដំណើរការចាប់ពីឆ្នាំ 2029៕

June 28, 2023

ប្រធានាធិបតីបារាំងថ្លែងអំពីរឿងអនាគតរបស់ Kylian Mbappe

ប្រធានាធិបតីបារាំងលោក Emmanuel Macron បានថ្លែងថា លោកនឹងព្យាយាមបញ្ចុះបញ្ចូល Kylian Mbappe ឱ្យនៅជាមួយក្លឹប Paris Saint-Germain ម្ដងទៀត នៅរដូវក្ដៅឆ្នាំនេះ។

លោក Emmanuel Macron បញ្ជាក់ថា លោកបានត្រៀមខ្លួនរួចហើយសម្រាប់ការជជែកគ្នាម្ដងទៀតជាមួយនឹង Mbappe ក្នុងបំណងបញ្ចុះបញ្ចូលឱ្យកីឡាករបារាំងរូបនេះលេងបាល់ឱ្យក្លឹបក្នុងស្រុក។ ប្រសាសន៍របស់លោក Emmanuel Macron ត្រូវបានធ្វើឡើងបន្ទាប់ពី Mbappe កាលពីពេលថ្មីៗនេះ បានប្រកាសជាផ្លូវការថា មិនមានបំណងពន្យារកិច្ចព្រមព្រៀងជាមួយក្លឹប PSG និងត្រូវចាកចេញក្រោយពីចប់កិច្ចសន្យា។ ចំណែក PSG ក៏បានប្រកាសអំពីតម្លៃខ្លួន 200 លានអឺរ៉ូរបស់ Mbappe។

លោក Emmanuel Macron ថ្លែងថា «Mbappe គឺជាកីឡាករឆ្នើម និងស្ថិតក្នុងលំដាប់កំពូល ដូចដែលគ្រប់គ្នាបានដឹង។ ដូច្នេះ គាត់មានទំនោរទៅរកការធ្វើចំណាកស្រុកដើម្បីអភិវឌ្ឍសមត្ថភាព និងយកឈ្នះលើឧបសគ្គថ្មីក្នុងអាជីព»។ លោកបន្ថែមថា «ក៏ប៉ុន្តែ បច្ចុប្បន្ន ខ្ញុំមិនមានដំណឹងល្អណាមួយសម្រាប់គ្រប់គ្នា តែយ៉ាងណាក៏ដោយ ខ្ញុំនឹងប្រឹងប្រែងឱ្យអស់ពីលទ្ធភាព (ក្នុងការបញ្ចុះបញ្ចូល Mbappe) ដូចអ្វីដែលខ្ញុំបានធ្វើកន្លងមក»។

លោក Emmanuel Macron លើកទឹកចិត្ត Kylian Mbappe នៅ World Cup 2022

កាលពីឆ្នាំមុន ប្រធានាធិបតីបារាំង ក៏បានជជែកគ្នាជាមួយ Mbappe ទាក់ទងនឹងអនាគតរបស់កីឡាករនេះ ហើយ PSG ក៏រក្សាបាន Mbappe មួយឆ្នាំទៀត។ ក៏ប៉ុន្តែ លើកនេះ ស្ថានភាពនៅក្លឹប PSG ហាក់មិនល្អប្រសើរ គ្រាដែលកីឡាករកំពូលៗរបស់ក្លឹបនេះ មានដូចជា Messi ជាដើម ត្រូវបានអ្នកគាំទ្ររបស់ PSG ធ្វើបាបផ្លូវចិត្ត ហើយជើងខ្លាំងខ្លះក៏ចាកចេញ ឬមានបំណងចាកចេញជាបន្តបន្ទាប់ ស្របពេលដែលទីផ្សារក្រៅប្រទេសកំពុងមានភាពទាក់ទាញខ្លាំង៕

June 15, 2023

Mbappe មិនព្រមពន្យារសុពលភាពកិច្ចសន្យាជាមួយក្លឹបបារាំង PSG

ក្លឹប PSG កំពុងពិចារណាលើការលក់ Kylian Mbappe នៅក្នុងឆ្នាំនេះ បន្ទាប់ពីខ្សែប្រយុទ្ធជនជាតិបារាំងរូបនេះបានប្រកាសថា នឹងមិនពន្យារសុពលភាពនៃកិច្ចព្រមព្រៀងដល់ខែមិថុនា 2025។

មុនពេលរដូវកាលទិញដូរកីឡាករនៅរដូវក្ដៅឆ្នាំ 2022 ត្រូវបានធ្វើឡើង PSG បានប្រកាសថា បន្តសុពលភាពកិច្ចព្រមព្រៀងបីឆ្នាំជាមួយនឹង Mbappe។ ក៏ប៉ុន្តែ យោងតាមសារព័ត៌មានបារាំង L’Équipe កិច្ចសន្យានេះមានរយៈពេលតែពីរឆ្នាំប៉ុណ្ណោះ ក្នុងនោះមានការកំណត់ថា ឆ្នាំចុងក្រោយត្រូវការការយល់ព្រមពី Mabppe ហើយមានសុពលភាពត្រឹមតែថ្ងៃទី 31 កក្កដា 2023។

ក៏ប៉ុន្តែ សារព័ត៌មានបារាំងមួយផ្សេងទៀត គឺ Le Parisien បានផ្សាយថា ថ្ងៃទី 12 មិថុនា (ម៉ោងនៅប៉ារីស) Mbappe ផ្ញើសំបុត្រទៅកាន់គណៈគ្រប់គ្រងក្លឹប PSG ដើម្បីប្រកាសអំពីការសម្រេចចិត្តមិនបន្តកិច្ចសន្យាមួយឆ្នាំទៀតដែលអូសបន្លាយដល់ឆ្នាំ 2025 នោះឡើយ។

ប្រការខាងលើនេះមានន័យថា ម្ចាស់ជើងឯក World Cup 2018 អាចនឹងចាកចេញពី PSG ទៅតាមទម្រង់សេរី នៅក្នុងរដូវក្ដៅឆ្នាំ 2024។ ដើម្បីចៀសវាងហានិភ័យត្រូវបាត់បង់ទទេៗ ពេលនោះ PSG នឹងត្រូវលក់ Mbappe នៅក្នុងឆ្នាំនេះ។

June 13, 2023

ក្រោយសម្រេចជ្រើសយកក្លឹប Inter Miami កំពូលតារាបាល់ទាត់អាហ្សង់ទីន បង្ហើបពីការពិតស្ដីពី PSG

ក្រោយពីបានបញ្ជាក់ថានឹងទៅលេងឱ្យក្លឹបអាម៉េរិក Inter Miami តារាបាល់ទាត់ពិភពលោក Lionel Messi ក៏បានទទួលស្គាល់ថា ខ្លួនមិនទទួលបានសុភមង្គលក្នុងរង្វង់ពីរឆ្នាំដែលលេងឱ្យ Paris Saint-Germain។

Messi ចាកចេញពី PSG ក្នុងនាមជាកីឡាករសេរីក្នុងស្ថានភាពភាគីទាំងពីរសុទ្ធតែមិនចង់បន្តកិច្ចព្រមព្រៀងជាមួយគ្នា ក្រោយរយៈពេលពីរឆ្នាំកន្លងទៅ។ ពេលវេលានៅជាមួយគ្នារវាង M10 និង PSG បានបញ្ចប់ក្នុងរយៈពេលពីរម៉ោង នៅពេល Messi ត្រូវបាន «ព្យួរជើងក្នុងក្រុម» ព្រោះតែបានធ្វើដំណើរចាកចេញពីប្រទេសបារាំងដោយមិនមានការអនុញ្ញាតពីក្លឹប។ ចាប់ពីពេលនោះមក Messi បានយល់ព្រមទៅលេងឱ្យក្លឹបអាម៉េរិក Inter Miami បើទោះចិត្តចង់ទាត់ឱ្យ Barcelona នៅអេស្ប៉ាញ។

«ពីរឆ្នាំកន្លងនៅ PSG គឺជាពេលវេលាដែលខ្ញុំមានអារម្មណ៍ថា មិនមានសុភមង្គល។ ខ្ញុំមិនអាចទទួលបានជីវភាពជារបស់ខ្លួនឯង។ ហើយបញ្ហានេះបានប៉ះពាល់ដល់ការរស់នៅរបស់គ្រួសារខ្ញុំ។ ពីរឆ្នាំកន្លង ខ្ញុំពិតជាបានបាត់បង់ពេលវេលាជាច្រើនដែលអាចនៅជាមួយកូនៗ…» Messi បានថ្លែងដូច្នេះ នៅក្នុងកិច្ចសម្ភាសជាមួយបណ្ដាញសារព័ត៌មានអេស្ប៉ាញ និងត្រូវបានចុះផ្សាយដោយទំព័រ Mundo Deportivo និង Sport កាលពីពេលថ្មីៗនេះ។

Messi និង PSG ទំនងជាពិបាករក្សាទំនាក់ទំនងល្អនឹងគ្នា បន្ទាប់ពី M10 ចាកចេញ និងក្រោយពីកិច្ចសម្ភាសខាងលើ។ ចំណែកអ្នកគាំទ្ររបស់ Barcelona វិញក៏កំពុងអន់ចិត្តព្រោះតែស្ថានភាពហិរញ្ញវត្ថុរបស់ក្លឹបនេះមិនអនុញ្ញាតឱ្យនាំយក Messi មកចូលជាសមាជិកជាថ្មី។

រឿងរ៉ាវម្ចាស់ជើងឯក World Cup 2022 សម្រេចចិត្តទាត់ឱ្យក្លឹប Inter Miami ត្រូវបានបញ្ជាក់រួចហើយ។ បើតាមគម្រោង M10 នឹងទៅចូលរួមជាមួយក្រុមនេះចាប់ពីខែកក្កដាខាងមុខ៕

June 8, 2023

Top 3 កីឡាករដណ្ដើមបានងារ «ឆ្នើមបំផុត» ច្រើនជាងគេក្នុងរដូវកាល 2022-2023

កីឡាករឆ្នើមបំផុតប្រចាំការប្រកួតគឺជាភស្ដុតាងបង្ហាញអំពីការចូលរួមប្រកួតដ៏អស្ចារ្យរបស់កីឡាករម្នាក់។ ខាងក្រោមនេះគឺជាកីឡាករ 3 រូបដែលទទួលបានពានរង្វាន់កីឡាករឆ្នើមបំផុតច្រើនជាងគេក្នុងរដូវកាល 2022-2023។

ទីបី ៖ Randal Kolo Muani (Eintracht Frankfurt)

Randal Kolo Muani គឺជាកីឡាករខ្សែប្រយុទ្ធដែលមានកម្លាំងស្វាហាប់ រត់លឿន និងមានបច្ចេកទេសទាត់ផ្ដាច់ល្អ។ កីឡាកររូបនេះទទួលបានពានរង្វាន់កីឡាករឆ្នើមជាងគេចំនួន 10 ប្រកួត។

ទីពីរ៖ Antoine Griezmann (Atletico Madrid)

ក្នុង 9 ប្រកួតចុងក្រោយបំផុតដែលបានចូលរួម Antoine Griezmann រកបាន 6 គ្រាប់ និងបង្កឱកាសបាន 6 គ្រាប់។ ជាសរុប កីឡាករនេះដណ្ដើមបានពានរង្វាន់កីឡាករឆ្នើមបំផុតចំនួន 13 លើក ក្នុងរដូវកាល 2022-2023។

ទីមួយ៖ Lionel Messi (Paris Saint-Germain)

រដូវកាល 2022-2023 ប្រាកដជាពេលវេលាដ៏ល្អរបស់ Messi។ M10 បានជួយឱ្យអាហ្សង់ទីនលើកពាន World Cup។ ក្នុង 31 លើកដែលបានចូលប្រកួតនៅ Ligue 1 Messi ទាត់ចូលទីបាន 16 គ្រាប់ និងបង្កើតឱកាសបាន 16 គ្រាប់ជូនមិត្តរួមក្រុម។ M10 ទទួលបានពានរង្វាន់កីឡាករឆ្នើមជាងគេចំនួន 14 លើក នៅ Ligue 1 រដូវកាលនេះ៕

June 7, 2023

Tag: Paris