Tag: Jack Ma

មហាសេដ្ឋីរូបណាដែលមានទ្រព្យច្រើនជាងគេនៅប្រទេសចិន ក្នុងឆ្នាំ 2023?
ក្នុងបញ្ជីចំណាត់ថ្នាក់មហាសេដ្ឋីកំពូលៗនៅប្រទេសចិន ដែលគិតត្រឹមថ្ងៃទី 11 ធ្នូ ឆ្នាំ 2023 របស់ទស្សនាវដ្ដី Forbes មានមហាសេដ្ឋីបច្ចេកវិទ្យាចំនួន 5 រូប និង 3 រូបក្នុងវិស័យរថយន្ត។
នៅក្នុងឆ្នាំ 2023 នេះ មហាសេដ្ឋីដែលធ្លាប់ជាអ្នកមានជាងគេនៅប្រទេសចិន គឺលោក Jack Ma បានស្ថិតក្នុងចំណាត់ថ្នាក់ទី 6 ដោយមានទ្រព្យសរុប 24.4 ពាន់លានដុល្លារអាម៉េរិក។
លោក Ma ដែលធ្លាប់ជាគ្រូបង្រៀនភាសាអង់គ្លេស បច្ចុប្បន្នមានអាយុ 58 ឆ្នាំ។ លោកគឺជាសហស្ថាបនិកនៃក្រុមហ៊ុន Alibaba ដែលបច្ចុប្បន្នគឺជាមួយក្នុងចំណោមក្រុមហ៊ុនគ្រប់គ្រងផ្សារអនឡាញធំជាងគេនៅប្រទេសចិន។
លោក Ma បានលាឈប់ពីតំណែងនាយកប្រតិបត្តិរបស់ Alibaba កាលពីឆ្នាំ 2019។ ក្រោយការរស់នៅឯបរទេសប្រហែលមួយឆ្នាំ លោកក៏ត្រលប់ទៅកាន់ប្រទេសចិន កាលពីខែមីនា 2023 ក្នុងពេល Alibaba បង្ហើបឱ្យដឹងអំពីគម្រោងបំបែកខ្លួនជា 6 ក្រុមហ៊ុន។ លោក Ma មានភាគហ៊ុនចំនួន 3.9% នៅក្នុង Alibaba និងភាគហ៊ុននៅក្នុងបណ្ដាក្រុមហ៊ុនកម្សាន្តមួយចំនួន មានដូចជា Beijing Enlight Media និង Huayi Brothers ជាដើម។
ក្រុមហ៊ុន Alibaba បានចាប់ផ្ដើមធ្លាក់ដុនដាប បន្ទាប់ពីលោក Ma បាននិយាយរិះគន់គោលនយោបាយខ្លះរបស់រដ្ឋាភិបាលចិន ដែលដឹកនាំដោយប្រធានាធិបតី Xi Jinping។
លោក Zhong Shanshan
ចំណែកមហាសេដ្ឋីដែលមានទ្រព្យច្រើនជាងគេនៅប្រទេសចិន ប្រចាំឆ្នាំ 2023 គឺលោក Zhong Shanshan។ លោកគឺជាស្ថាបនិកនៃក្រុមហ៊ុនផលិតទឹកសុទ្ធ Nongfu Spring។ លោក Shanshan កើតឆ្នាំ 1954 នៅទីក្រុង Hangzhou ខេត្ត Zhejiang ប្រទេសចិន និងបានឈប់រៀនពេលមានអាយុ 12 ឆ្នាំ ព្រោះតែបញ្ហាគ្រួសារ។ ពេញមួយទសវត្សរ៍ក្រោយមក លោកធ្វើជាកម្មករសំណង់ និងសិក្សារហូតដល់បានចូលរៀននៅមហាវិទ្យាល័យ ក្រោយពីប្រឡងធ្លាក់ពីរលើក។
ចំណាត់ថ្នាក់ទីពីរក្នុងបញ្ជីនេះ គឺមហាសេដ្ឋី Colin Huang អាយុ 43 ឆ្នាំ ដោយមានទ្រព្យ 49 ពាន់លានដុល្លារអាម៉េរិក។ លោកគឺជាស្ថាបនិករបស់ PDD Holdings ដែលនៅពីក្រោយផ្សារអនឡាញ Pinduoduo។
ចំណាត់ថ្នាក់ទីបី បានទៅលើ Zhang Yiming អាយុ 40 ឆ្នាំ ជាស្ថាបនិករបស់ ByteDance ដែលជាក្រុមហ៊ុនមេរបស់ TikTok។ លោក Yiming មានទ្រព្យ 43.4 ពាន់លានដុល្លារអាម៉េរិក។
ចំណាត់ថ្នាក់ទីបួន បានទៅលើ Ma Huateng (Pony Ma) អាយុ 51 ឆ្នាំ ជាប្រធានក្រុមហ៊ុនអ៊ីនធើណិតចិន Tencent Holdings។
ខាងក្រោមនេះគឺជាមហាសេដ្ឋីដែលមានឈ្មោះក្នុងបញ្ជីចំណាត់ថ្នាក់មហាសេដ្ឋី 10 រូបនៅប្រទេស របស់ Forbes ៖
5 – William Ding
- ទ្រព្យ៖ 33.1 ពាន់លានដុល្លារអាម៉េរិក
- វិស័យជំនួញ៖ បច្ចេកវិទ្យា
7 – Robin Zeng
- ទ្រព្យ៖ 24.1 ពាន់លានដុល្លារអាម៉េរិក
- វិស័យ៖ រថយន្ត
8 – He Xiangjian និងគ្រួសារ
- ទ្រព្យ៖ 21.2 ពាន់លានដុល្លារអាម៉េរិក
- វិស័យ៖ ផលិតសម្ភារៈប្រើប្រាស់ក្នុងផ្ទះ
9 – Wang Chuanfu
- ទ្រព្យ៖ 15.1 ពាន់លានដុល្លារអាម៉េរិក
- វិស័យ៖ រថយន្ត
10 – Eric Li
- ទ្រព្យ៖ 15.1 ពាន់លានដុល្លារអាម៉េរិក
- វិស័យ៖ រថយន្ត
December 13, 2023
មហាសេដ្ឋីចិន Jack Ma ខ្លាចក្រុមហ៊ុន Alibaba មានវាសនាដូច Nokia
លោក Jack Ma ដកស្រង់បទពិសោធន៍បរាជ័យរបស់ Nokia, Kodak ដើម្បីព្រមានដល់ Alibaba ថា ត្រូវតែផ្ដោតសំខាន់ទៅលើ Taobao និងត្រូវបន្តធ្វើជាក្រុមហ៊ុនអ៊ីនធើណិត។
ប្រភពព័ត៌មានពី SCMP ឱ្យដឹងថា កាលពីចុងខែឧសភា ស្ថាបនិករបស់ក្រុមហ៊ុន Alibaba លោក Jack Ma បានកោះប្រជុំពិភាក្សាជាមួយក្រុមអ្នកគ្រប់គ្រង រម្លឹកពួកគេឱ្យផ្ដោតការយកចិត្តទុកដាក់ឡើងវិញទៅលើផ្សារអនឡាញ Taobao និងអ្នកប្រើប្រាស់ ដើម្បីអាចរស់បាននៅក្នុងស្ថានភាពវិបត្តិសេដ្ឋកិច្ច និងការប្រកួតប្រជែងដ៏ខ្លាំងក្លា។
កិច្ចប្រជុំខាងលើត្រូវបានធ្វើឡើងតែប៉ុន្មានសប្ដាហ៍ប៉ុណ្ណោះមុនពេលសាជីវកម្មនេះប្រកាសថា មេដឹកនាំ Taobao លោក Eddie Wu Yongming នឹងចូលមកកាន់តំណែង CEO របស់ Alibaba ចាប់ពីថ្ងៃទី 10 កញ្ញា។ ចំណែក CEO បច្ចុប្បន្នគឺលោក Daniel Zhang Yong នឹងត្រូវលាលែងដើម្បីទៅគ្រប់គ្រង Alibaba Cloud។ លោក Yong ក៏នឹងត្រូវបោះបង់តំណែងប្រធាន ដោយប្រគល់ទៅឱ្យអនុប្រធាន Joe Tsai។
ទីស្នាក់ការកណ្ដាលមួយនៅប្រទេសចិនរបស់ក្រុមហ៊ុនចិន Alibaba
ក្រុមមេដឹកនាំសំខាន់ៗរបស់ Taobao និង Tmall របស់ Alibaba បាននិយាយថា បើទោះលោក Ma បានបោះបង់រាល់តួនាទីនៅក្នុងក្រុមហ៊ុន ប៉ុន្តែ លោកនៅតែជាមេដឹកនាំផ្នែកស្មារតីរបស់សាជីវកម្មដែលលោកបានបង្កើត។ ក្នុងព្រឹត្តិការណ៍មួយកាលពីថ្ងៃទី 15 មិថុនា លោក Michael Evans ដែលជាប្រធានក្រុមហ៊ុន Alibaba បានថ្លែងថា លោក Jack Ma នៅតែជាភាគហ៊ុនិកធំជាងគេរបស់ក្រុមហ៊ុន Alibaba។
លោក Jack Ma ធ្លាប់ជាគ្រូបង្រៀនភាសាអង់គ្លេស មុនពេលបង្កើតក្រុមហ៊ុន Alibaba។ គិតមកដល់ពេលនេះ លោក Ma កំពុងធ្វើជាសាស្ត្រាចារ្យនៅសាកលវិទ្យាល័យយ៉ាងតិចបួនដែលស្ថិតនៅខាងក្រៅចិនដីគោក ក្នុងនោះក៏មានសាកលវិទ្យាល័យហុងកុង សាកលវិទ្យាល័យនៅអាហ្វ្រិក និងសាកលវិទ្យាល័យនៅប្រទេសអ៊ីស្រាអែលផងដែរ៕
June 21, 2023
មហាសេដ្ឋីចិន Jack Ma បង្ហាញខ្លួនជាគ្រូបង្រៀនលើកដំបូងនៅប្រទេសជប៉ុន
មហាសេដ្ឋីបច្ចេកវិទ្យា Jack Ma បង្ហាញខ្លួនក្នុងតួនាទីជាសាស្ត្រាចារ្យបរទេសរបស់សាកលវិទ្យាល័យតូក្យូ ប្រទេសជប៉ុន កាលពីពេលថ្មីៗនេះ។
ការចែករំលែកចំណេះដឹងរបស់មហាសេដ្ឋីចិន Jack Ma បានចាប់ផ្ដើមពីថ្ងៃទី 12 មិថុនា 2023 ប៉ុន្តែ ទើបតែត្រូវបានប្រកាសក្រោយការបង្រៀនបានជិតមួយសប្ដាហ៍។ យោងតាម SCMP ស្ថាបនិកវ័យ 58 ឆ្នាំរបស់ Alibaba គឺជាវាគ្មិនមួយរូបដែលលេចធ្លោជាងគេនៅក្នុងសិក្ខាសាលាពិសេសស្ដីពី «នវានុវត្តន៍ និងសហគ្រិនភាព» ដែលត្រូវបានរៀបចំឡើងនៅឯសាកលវិទ្យាល័យតូក្យូ។
នេះក៏ជាសិក្ខាសាលាដំបូងដែលលោក Ma ចូលរួមក្នុងនាមជាសាស្ត្រាចារ្យបរទេស នៅក្នុងស្ថាប័នអប់រំដែលមានអាយុ 146 ឆ្នាំនៅប្រទេសជប៉ុន។ អ្នកដែលបានចូលរួមក្នុងសិក្ខាសាលាខាងលើរួមមាន និស្សិតមកពីតំបន់នានារបស់ប្រទេសជប៉ុន ចិន ឥណ្ឌា និងម៉ាឡេស៊ី។
ពិធីចែករំលែកចំណេះដឹង និងបទពិសោធន៍នេះ ផ្ដោតទៅលើទស្សនៈនៃការគ្រប់គ្រង និងរបៀបដែលយុវវ័យជំនាន់ថ្មីអាចសម្រេចបាននៅពេលអនាគត។ យោងតាមគេហទំព័ររបស់សាកលវិទ្យាល័យតូក្យូ នេះគឺជាប្រធានបទដែលយោងទៅលើ «បទពិសោធន៍សម្បូរបែប ចំណេះដឹងនាំមុខគេទាក់ទងនឹងស្មារតីជំនួញ និងភាពច្នៃប្រឌិត» របស់លោក Jack Ma។
ប៉ុន្មានថ្ងៃក្រោយពីចូលរួមសិក្ខាសាលានៅប្រទេសជប៉ុន លោក Ma ក៏បានបន្តបង្ហាញវត្តមាននៅប្រទេសចិនក្នុងកម្មវិធីមួយដែលរៀបចំដោយក្រុមហ៊ុន Alibaba។ នៅទីនេះ លោក Ma ស្លៀកពាក់យ៉ាងសាមញ្ញ។
លោក Jack Ma ធ្លាប់ជាគ្រូបង្រៀនភាសាអង់គ្លេស មុនពេលបង្កើតក្រុមហ៊ុន Alibaba។ គិតមកដល់ពេលនេះ លោក Ma កំពុងធ្វើជាសាស្ត្រាចារ្យនៅសាកលវិទ្យាល័យយ៉ាងតិចបួនដែលស្ថិតនៅខាងក្រៅចិនដីគោក ក្នុងនោះក៏មានសាកលវិទ្យាល័យហុងកុង សាកលវិទ្យាល័យនៅអាហ្វ្រិក និងសាកលវិទ្យាល័យនៅប្រទេសអ៊ីស្រាអែលផងដែរ។
ក្នុងព្រឹត្តិការណ៍មួយកាលពីថ្ងៃទី 15 មិថុនា លោក Michael Evans ដែលជាប្រធានក្រុមហ៊ុន Alibaba បានថ្លែងថា លោក Jack Ma នៅតែជាភាគហ៊ុនិកធំជាងគេរបស់ក្រុមហ៊ុន Alibaba។
ការបង្ហាញវត្តមានរបស់លោក Jack Ma នេះ គឺចំពេលដែលទីក្រុងប៉េកាំងកំពុងរកវិធីស្ដារសេដ្ឋកិច្ចជាតិ និងទំនុកចិត្តរបស់អ្នកវិនិយោគ ក្រោយពីបានរឹតបន្តឹងវិស័យបច្ចេកវិទ្យាអស់ជាច្រើនឆ្នាំ៕
June 19, 2023
មហាសេដ្ឋីចិន Jack Ma «នៅមានជីវិត និងមានសេចក្ដីសុខធម្មតា»
ប្រធានបច្ចុប្បន្នរបស់ក្រុមហ៊ុន Alibaba បានបង្ហើបឱ្យដឹងថា ស្ថាបនិក លោក Jack Ma មិនមានបញ្ហាអ្វីទេ និងកំពុងចំណាយពេលវេលាច្រើនជាងមុននៅប្រទេសចិន។
«ជាដំបូង លោក Jack នៅមានជីវិត។ គាត់គ្មានបញ្ហាអ្វីទេ និងមានសេចក្ដីសុខ» ប្រធានក្រុមហ៊ុន Alibaba លោក Michael Evans និយាយនៅក្នុងកិច្ចប្រជុំ Viva Tech នៅប៉ារីស កាលពីថ្ងៃទី 15 មីថុនាដូច្នេះ។ លោក Evans ក៏បានឱ្យដឹងថា លោក Jack Ma «កំពុងបង្រៀននៅសាកលវិទ្យាល័យមួយនៅទីក្រុងតូក្យូ ប្រទេសជប៉ុន និងចំណាយពេលវេលានៅប្រទេសចិនច្រើនជាងមុន»។
ដំណឹងខាងលើត្រូវបានលើកឡើងបន្ទាប់ពីមានអ្នកសួរអំពីស្ថានភាពស្ថាបនិករបស់ Alibaba។ យោងតាម CNBC ប្រការនេះបង្ហាញថា សុខទុក្ខរបស់មហាសេដ្ឋីចិន Jack Ma នៅតែទទួលបានការចាប់អារម្មណ៍ ក្រោយពីក្រុមហ៊ុនរបស់លោកមានបញ្ហាខ្លះជាមួយទីក្រុងប៉េកាំង ដោយសារច្បាប់រឹតបន្តឹងលើក្រុមហ៊ុនបច្ចេកវិទ្យា នាពេលកន្លង។
លោក Evans ថ្លែងថា លោក Jack Ma នៅតែជាភាគហ៊ុនិកធំជាងគេរបស់ក្រុមហ៊ុន Alibaba។ ការបង្ហាញវត្តមានរបស់លោក Jack Ma នេះ គឺចំពេលដែលទីក្រុងប៉េកាំងកំពុងរកវិធីស្ដារសេដ្ឋកិច្ចជាតិ និងទំនុកចិត្តរបស់អ្នកវិនិយោគ ក្រោយពីបានរឹតបន្តឹងវិស័យបច្ចេកវិទ្យាអស់ជាច្រើនឆ្នាំ៕
June 17, 2023
Jack Ma បាត់ខ្លួន
មហាសេដ្ឋីដែលនៅពីក្រោយក្រុមហ៊ុន Alibaba និង Ant Group មិនបានបង្ហាញខ្លួននៅលើទំព័រសារព័ត៌មានណាមួយនោះទេ បន្ទាប់ពីបានធ្វើការអត្ថាធិប្បាយលើកចុងក្រោយកាលពីខែតុលា ឆ្នាំ 2020។
បើទោះបីខ្លួនជាសមាជិកម្នាក់នៃបក្សកុម្មុយនិស្តចិន លោក Jack Ma ក៏តែងតែរិះគន់យ៉ាងខ្លាំងក្លាទៅលើការកំណត់ទាក់ទងនឹងបច្ចេកវិទ្យា និងហិរញ្ញវត្ថុរបស់ប្រទេសនេះ។ ថ្មីៗនេះ លោកបានហៅប្រព័ន្ធធនាគារដែលហួសសម័យរបស់ចិនថាជា «ហាងទទួលបញ្ចាំទ្រព្យ»។ ជាងនេះ លោកថែមទាំងបានប្រកាសថា កិច្ចព្រមព្រៀងធនាគារសកល Basel ថាជា «ក្លឹបសម្រាប់មនុស្សចាស់» ទៀតផង។
យោងតាមសារព័ត៌មានអង់គ្លេស Dailymail ការយល់ឃើញរបស់មហាសេដ្ឋីរូបនេះ បានធ្វើឱ្យអាជ្ញាធរចិនមានការខឹងសម្បា។ សកម្មភាពដែលត្រូវបានគេចាត់ទុកថាជាការបង្កបញ្ហាដល់អាជ្ញាធរចិននេះ បាននាំឱ្យមានការស៊ើបអង្កេតខុសធម្មតាទៅលើសកម្មភាពជំនួញរបស់ក្រុមហ៊ុន Alibaba។
កាលពីខែវិច្ឆិកា ឆ្នាំ 2020 រដ្ឋាភិបាលចិនបានចាប់ផ្ដើមធ្វើសកម្មភាពរឹតបន្តឹងលើលោក Jack Ma ដោយការផ្អាកការបោះផ្សាយមូលបត្រ (IPO) ដែលមានតម្លៃ 37 ពាន់លានដុល្លារអាមេរិករបស់ក្រុមហ៊ុន Ant Group ទៅតាមបញ្ជាផ្ទាល់របស់ប្រធានាធិបតីចិន លោក Xi Jinping នេះបើតាមសារព័ត៌មាន Wall Street Journal។
ក្រោយមក ការស៊ើបអង្កេតលើការរកស៊ីផ្ដាច់មុខទៅលើក្រុមហ៊ុន Alibaba ក៏ត្រូវបានប្រកាសកាលពីយប់ថ្ងៃបុណ្យណូអែល នេះបើតាមសារព័ត៌មាន Bloomberg។ ក្រុមមន្ត្រីរដ្ឋាភិបាលក៏បានស្នើឱ្យក្រុមហ៊ុនបច្ចេកវិទ្យា Ant Group របស់លោក Jack Ma កាត់បន្ថយទំហំនៃសកម្មភាពពាណិជ្ជកម្មរបស់ខ្លួន។
លោក Jack Ma ក៏បាត់ខ្លួនយ៉ាងអាថ៌កំបាំង ពីកម្មវិធីទូរទស្សន៍ស្វែងរកជំនាញដែលមានឈ្មោះថា «អ្នកក្លាហានក្នុងវិស័យជំនួញនៅអាហ្វ្រិក» ដែលលោកជាអ្នកបង្កើតឡើង។ ជាក់ស្ដែង លោក Ma គួរតែមានវត្តមានក្នុងនាមជាគណកម្មការនៅក្នុងវគ្គផ្ដាច់ព្រ័ត្រ ប៉ុន្តែលោកបែរជាត្រូវបានជំនួសដោយនាយកប្រតិបត្តិម្នាក់ផ្សេងទៀតរបស់ Alibaba ដោយលើកមូលហេតុថា «កាលបរិច្ឆេទត្រូវបានរំខាន»។
អាជ្ញាធរចិនត្រូវបានគេមើលឃើញថា តែងតែធ្វើការពិន័យយ៉ាងធ្ងន់ធ្ងរចំពោះអ្នកដែលបានរិះគន់បញ្ហាផ្ទៃក្នុង។ កាលពីខែមីនា ឆ្នាំ 2020 មហាសេដ្ឋីផ្នែកអចលនទ្រព្យ Ren Zhiqiang ក៏បានបាត់ខ្លួន ក្រោយពីបានហៅប្រធានាធិបតីចិនថាជា «មេត្លុក» ក្នុងការដោះស្រាយវិបត្តិ Covid-19។ មិត្តភក្ដិរបស់លោក Ren Zhiqiang បានឱ្យដឹងថា ពួកគេមិនអាចទាក់ទងទៅលោក Zhiqiang បាន ហើយ 6 ខែក្រោយ ស្រាប់តែលោក Zhiqiang ត្រូវបានកាត់ទោសឱ្យជាប់ពន្ធនាគាររយៈពេល 18 ឆ្នាំ «ក្រោយពីបានសារភាពដោយស្ម័គ្រចិត្ត និងស្មោះត្រង់» អំពីទោសកំហុសជាច្រើនទាក់ទងនឹងបញ្ហាពុករលួយ។
ការស៊ើបអង្កេតប្រឆាំងនឹងភាពផ្ដាច់មុខ រួមជាមួយនឹងការអធិប្បាយកាលពីខែតុលា ឆ្នាំ 2020 បានធ្វើឱ្យតម្លៃមូលបត្ររបស់ Alibaba ធ្លាក់ចុះ 25% បើធៀបនឹងតម្លៃខ្ពស់បំផុត ដែលប្រការនេះក៏បាននាំឱ្យប្រាក់ជាង 10 ពាន់លានដុល្លារអាមេរិក «បាត់ខ្លួន» ពីទ្រព្យសម្បត្តិសុទ្ធរបស់លោក Jack Ma។ យោងតាម Bloomberg បច្ចុប្បន្ន លោក Ma មានទ្រព្យសុទ្ធប្រមាណ 63.1 ពាន់លានដុល្លារអាមេរិក ឈរលំដាប់ទីបីនៅក្នុងបញ្ជីឈ្មោះអ្នកមានជាងគេនៅប្រទេសចិន៕
ប្រភព៖ DailyMail
January 5, 2021
លទ្ឋផល Survey បង្ហាញថា ឆ្នាំ2019 លោក ជែក ម៉ា មានជាងគេបំផុតនៅក្នុងប្រទេស ដោយប្រាក់ចំណូល 9.13លានយន់/1ម៉ោង
លោក ជែក ម៉ា មានប្រាក់ចំណូលកើនឡើង 8ម៉ឺនលានយន់កាលពីឆ្នាំកន្លងទៅ ដែលមានន័យថា លោកបានសាងប្រាប់ចំណូលជាមធ្យម ក្នុង1ម៉ោង 9.13លានយន់។
ទីភ្នាក់ងារព័ត៌មាន ឆាយណា ដេលី បានរាយការណ៍កាលពីថ្ងៃទី12 ឧសភា ថា លោក ជែក ម៉ា ស្ថាបនិកបណ្ដាញក្រុមហ៊ុនអាលីបាបា បានឈរលើលំដាប់ថ្នាក់លេខ1 ក្នុងចំណោមមហាសេដ្ឋីទាំង 500នាក់នៅក្នុងប្រទេសចិន ដោយមានទ្រព្យសម្បត្តិច្រើនបំផុតសរុបជាង 3សែនលានយន់។
ទស្សនាវដ្តី New Fortune បានបង្ហាញពីលទ្ធផលស្ទាបស្ទង់ចំណាត់ថ្នាក់មហាសេដ្ឋីទាំង 500នាក់នៅក្នុងប្រទេសចិន ឆ្នាំ2019 ថា លំដាប់លេខ1 នៃអ្នកដែលមានទ្រព្យសម្បត្តិច្រើនបំផុតនៅក្នុងប្រទេសចិនឆ្នាំ2019 គឺលោក ជែក ម៉ា ដោយប្រាក់ចំណូលបានកើនឡើង 8ម៉ឺនលានយន់ក្នុងឆ្នាំកន្លងទៅ ដែលមានន័យថា លោកបានសាងប្រាក់ចំណូលបានជាមធ្យមក្នុង 1ម៉ោង 9.13លានយន់(ប្រមាណជាជាង 1.2លានដុល្លារអាមេរិក ក្នុងអត្រាប្ដូរប្រាក់ 1ដុល្លារ=7.11យន់) ច្រើនជាងអ្នកគ្រប់គ្រង់លំដាប់កំពូលរបស់ក្រុមហ៊ុនចុះបញ្ជីជាច្រើន។
លោក ហួង ជឹង ប្រធាន និងជា CEO របស់ក្រុមហ៊ុន Pinduoduo Inc បានជាប់ក្នុងបញ្ជីឈ្មោះ 10នាក់លើគេបំផុត ជាលើកដំបូង ដោយបានស្ថិតក្នុងលំដាប់ថ្នាក់លេខ8។
លោក ចាង យង់ និងភរិយា ឈូ ពីង ម្ចាស់មុខជំនួញឆ្នាំងភ្លើង ហៃទីឡៅ(Haidilao) បានឡើងមកឈរលើលំដាប់លេខ10 ដោយទ្រព្យសម្បត្តិ 1.172សែនលានយន់ កើនឡើងមកពីលំដាប់លេខ20 កាលពីឆ្នាំ2018។
លោក ស៊ុន ភៀវ យ៉ាង ប្រធានក្រុមហ៊ុន ចៀងស៊ូ ហេងរុយ(Jiangsu Hengrui Medicine Co Ltd) និងភរិយារបស់លោក គឺលោកស្រី ចុង ហ៊ុយ ចួន(Zhong Huijuan) ប្រធានក្រុមហ៊ុន Hansoh Pharmaceutical Group Company Limited ឬ “Hansoh Pharma” ក្រុមហ៊ុនជីវឱសថលំដាប់ជួរមុខនៅក្នុងប្រទេសចិន នៅតែជាប់ក្នុងបញ្ជីឈ្មោះមហាសេដ្ឋីទាំង 10 ដោយទ្រព្យសម្បត្តិដែលកើនឡើងលឿនបំផុត 1.10សែនលានយន់។
មហាសេដ្ឋីអ្នកមានបំផុតរបស់ចិនទាំង 500នាក់ មានទ្រព្យសម្បត្តិសរុបទាំងអស់ 10លានលានយន់ ដែលទាំងអស់នេះ បានបង្ហាញឱ្យឃើញអំពីសក្ដានុពលការអភិវឌ្ឍខាងសេដ្ឋកិច្ច ដ៏រឹងមាំនៅក្នុងប្រទេសចិន។
ក្នុងចំណោមមហាសេដ្ឋីទាំង 500នាក់នោះ មាន 96នាក់ មកពីឧស្សាហកម្មទូរគមនាគមន៍ ព័ត៌មាន និងតិចណូឡូជី ដែលមានចំនួនច្រើនជាងឧស្សាហកម្មអចលនទ្រព្យ 50%។
នៅពេលយុគសម័យ 5G ជិតចូលមកដល់ គេរំពឹងថា នឹងមានបុគ្គលដែលនឹងមានទ្រព្យសម្បត្តិច្រើនឡើងក្នុងការអភិវឌ្ឍអ៊ីនធើណិត ហើយនឹងក្លាយជាឱកាសមាស របស់ឧស្សាហកម្មថ្មីៗក្នុងផ្នែកបញ្ញាសិប្បនិម្មិត (AI) កុំព្យូទ័រ ខ្លោដ៍ មនុស្សយន្ត(Robot) និងBlockChain។
គួរបញ្ជាក់ដែរថា ការចាត់លំដាប់ថ្នាក់ 500 មហាសេដ្ឋីចិនលើកនេះ គឺជាឆ្នាំទី18ហើយ ដោយទស្សនាវដ្តី New Fortune ដែលបានចាប់ផ្ដើមរៀបចំធ្វើឡើងតាំងពីឆ្នាំ2003៕
ប្រភព៖ សាព័ត៌មានបរទេស
May 18, 2020
Manny Pacquiao ចាប់ដៃជាមួយ Jack Ma ចែកឈុតពិនិត្យរកវីរុសកូវីដ-19 ដល់ប្រជាជនហ្វីលីពីន
មែននី ប៉ាកគីអាវ កំពូលអ្នកប្រដាល់ វីរបុរសជនជាតិហ្វីលីពីន បានសហការជាមួយអ្នកជំនួញល្បីឈ្មោះលំដាប់ពិភពលោក ជែក ម៉ា ចែកឈុតពិនិត្យរកមេរោគវីរុសកូវីដ-19 ដល់ប្រជាជននៅក្នុងប្រទេសកំណើតរបស់ខ្លួន ក្រោយកើតការឆ្លងរាលដាលយ៉ាងធ្ងន់ធ្ងរនៅក្នុងប្រទេស។
ហ្វីលីពីន ក៏ជាប្រទេសមួយ ដែលគេចមិនផុតពីការឆ្លងរាលដាលរបស់មេរោគវីរុសកូរ៉ូណាប្រភេទថ្មី ឬកូវីដ-19 មកពីប្រទេសចិនដែរ និងយ៉ាងណាក្ដី ក្នុងនាមជាវីរបុរសនៃប្រទេសហ្វីលីពីន មែននី ប៉ាកគីអាវ ដែលមានមុខតំណែងជាតំណាងរាស្ត្រនៅក្នុងសភា ក៏មិនអាចបោះបង់ចោលប្រជាជនបានដែរ។
កំពូលអ្នកប្រដាល់ជនជាតិតាកាឡុក បានថ្លែងប្រាប់តាមរយៈសារព័ត៌មានថា ខ្លួនបានប្រើថវិកាក្នុងមូលនិធិផ្ទាល់ខ្លួន មែននី ប៉ាកគីអាវ ហ្វោនដេស្សិន និងអាស្រ័យភាពជិតស្និទ្ធស្អិតល្មួតជាមួយ ជែក ម៉ា បានរួមគ្នាចែកឈុតពិនិត្យរកមេរោគកូវីដ-19 ហ្វ្រ៊ី ជូនប្រជាជនហ្វីលីពីន ដើម្បីពិនិត្យរកមេរោគរយៈដំបូង មុននឹងទៅជួបគ្រូពេទ្យ។
“យើងមានអារម្មណ៍រំភើបចិត្តខ្លាំងណាស់ ដែលបានប្រកាសថា មូលនិធិរបស់ ជែក ម៉ា បានសហការជាមួយមូលនិធិរបស់ មែននី ប៉ាកគីអាវ ចែកឈុតពិនិត្យមេរោគវីរុសកូវីដ-19 នៅក្នុងប្រទេសហ្វីលីពីន ចំនួន 50,000ឈុត ដោយរឿងរ៉ាវដែលកើតឡើងនៅលើពិភពលោកថ្ងៃនេះ គ្មានអ្វីប្រសើរជាងការជួយសង្គ្រោះរវាងគ្នានឹងគ្នាឡើយ”
សម្រាប់ ប៉ាកគីអាវ អាយុ 41ឆ្នាំ ម្ចាស់ខ្សែក្រវាត់ជើងឯកពិភពលោកទម្ងន់ វែលធើរវេធ របស់សមាគមប្រដាល់ពិភពលោក(WBA) កាលពីពេលមុននេះ មានប្រូក្រាមវិលត្រឡប់ទៅកាន់សង្វៀនវិញនៅក្នុងឆ្នាំនេះ តែក៏ត្រូវបត់គម្រោងការនេះទុកបណ្ដោះអាសន្នសិន ក្រោយកើតការឆ្លងរាលដាលរបស់មេរោគវីរុសដ៏កំណាចនេះ។
ប្រភព៖ ព័ត៌មានបរទេស
March 19, 2020
Jack Ma ដណ្ដើមបានតំណែងអ្នកមានបំផុតនៅអាស៊ីវិញហើយ ខណៈអ្នកមានបំផុតទាំង500នាក់របស់ពិភពលោក បានបាត់បង់ប្រាក់ 238.5ពាន់លានដុល្លារអាមេរិក កាលពីម្សិលម៉្ងៃ
ក្រោយពីបានលក់មូលបត្រទូទាំងពិភពលោកកាលពីថ្ងៃទី9មីនាកន្លងទៅ ទ្រព្យសម្បត្តិរបស់មហាសេដ្ឋីឥណ្ឌា លោក Mukesh Ambani បានថយចុះមកនៅក្រោមស្ថានិក Alibaba គឺមហាសេដ្ឋីចិន លោក Jack Ma។
យោងតាម Bloomberg Billionaires Index លោក Mukesh Ambani បានបាត់បង់5.8ពាន់លានដុល្លារអាមេរិកកាលពីម្សិលម៉្ងៃ (9មីនា) ធ្វើឱ្យគាត់បាត់បង់តំណែងជាអ្នកមានបំផុតប្រចាំទ្វីបអាស៊ី ដោយធ្លាក់ទៅលើដៃមហាសេដ្ឋីចិន លោក Jack Ma ដែលជាស្ថានិកនៃក្រុមហ៊ុន Alibaba។ មហាសេដ្ឋីចិន Jack Ma បច្ចុប្បន្ន មានទ្រព្យ 44.5ពាន់លានដុល្លារអាមេរិក ច្រើនជាងមហាសេដ្ឋីឥណ្ឌា លោក Mukesk Ambani ប្រមាណជា 2.6ពាន់លានដុល្លារអាមេរិក។
មូលបត្រ Alibaba កាលពីថ្ងៃទី9មីនា បានធ្លាក់ថ្លៃ3.41% នៅលើផ្សារហ៊ុន New York បណ្ដាលឱ្យមហាសេដ្ឋី Jack Ma បាត់បង់ 1.06ពាន់លានដុល្លារអាមេរិក។ ក៏ប៉ុន្តែ តម្លៃមូលបត្រពហុវិស័យ Reliance Industries របស់មហាសេដ្ឋី Ambani បានដាំក្បាលចុះខ្លាំងជាងនេះទៅទៀត ពោលគឺធ្លាក់ថ្លៃដល់ទៅ12% (ទាបបំផុតរាប់ចាប់ពីឆ្នាំ2009មកនេះ)។ ចាប់ពីដើមឆ្នាំ តម្លៃមូលបត្រ Reliance Industries បានថយចុះសរុបចំនួន 26%។
ចំណែក Alibaba វិញ ថ្វីបើរោគរាតត្បាត COVID-19 កំពុងតែ “ធ្វើទុក្ខ” ទៅលើវិស័យជំនួញមួយចំនួនរបស់ក្រុមហ៊ុននេះ ប៉ុន្តែ COVID-19 ក៏បានជួយជំរុញឱ្យតម្រូវការដែលទាក់ទិននឹងបច្ចេកវិទ្យាចល័ត មានកំណើនខ្ពស់ ដែលបាន និងកំពុងហុចផលប្រយោជន៍ខ្លះដល់មហាសេដ្ឋីចិន លោក Jack Ma។
តម្លៃមូលបត្រទូទាំងពិភពលោក កាលពីម្សិលម៉្ងៃ(9មីនា) បានធ្លាក់ចុះខ្លាំង ដោយសារតម្លៃប្រេងបានដាំក្បាលចុះ ហើយអ្នកវិនិយោគមានការព្រួយបារម្ភអំពីរោគរាតត្បាត COVID-19។ កត្តានេះ ក៏បានធ្វើឱ្យមានការសង្ស័យថា Reliance Industries មិនអាចសងអស់បំណុលនៅមុនដំណាច់ឆ្នាំ2021 ដូចដែលមហាសេដ្ឋីឥណ្ឌា Ambani បានសន្យា។
ភាពច្របូកច្របល់នៅលើផ្សារហ៊ុនកាលពីម្សិលម៉្ងៃ ក៏បានធ្វើឱ្យអ្នកមានមួយចំនួនក្នុងពិភពលោក ត្រូវខាតបង់រាប់ពាន់លានដុល្លារអាមេរិក។ ទ្រព្យរបស់មហាសេដ្ឋីប្រេង Harold Hamm បានថយចុះរហូតដល់ពាក់កណ្ដាល នៅសល់ត្រឹមតែ 2.4ពាន់លានដុល្លារ។ ចំណែក Jeff Hildebrand ក៏បាត់បង់ 3ពាន់លានដុល្លារអាមេរិក។ សរុបមក អ្នកមានបំផុតទាំង500នាក់របស់ពិភពលោក បានបាត់បង់ប្រាក់ 238.5ពាន់លានដុល្លារអាមេរិក នៅលើផ្សារហ៊ុន កាលពីម្សិលម៉្ងៃ ដែលការខាតបង់នេះ ខ្ពស់ជាងពេលណាៗទាំងអស់ រាប់ចាប់ពីឆ្នាំ2016៕
ប្រភព៖ សារព័ត៌មានបរទេស
March 11, 2020
Jack Ma សម្លឹងឃើញអាហ្វ្រិក ជាតំបន់វិនិយោគសេដ្ឋកិច្ចឌីជីថល
ប្រធានាធីបតីអាហ្វ្រិកខាងត្បូង លោក Cyril Ramaphosa បាននិយាយថា រដ្ឋាភិបាលរបស់លោក នឹងធ្វើការជាមួយក្រុមហ៊ុនលក់ទំនិញតាមអនឡាញដ៏ធំរបស់ចិន Alibaba ជាពិសេសគឺលោក Jack Ma ក្នុងការរុញច្រានវិស័យបច្ចេកវិទ្យាតាម-រយៈការអភិវឌ្ឍលើសេដ្ឋកិច្ចឌីជីថលនៅក្នុងតំបន់អាហ្រ្វិក។
ថ្មីៗនេះ ប្រធានាធីបតីអាហ្វ្រិកខាងត្បូង លោក Cyril Ramaphosa បានដឹកនាំគណៈប្រតិភូរដ្ឋមន្ត្រី និងមន្ត្រីជាច្រើនរូបទៅធ្វើទស្សនកិច្ចនៅក្រុមហ៊ុនបច្ចេកវិទ្យាយក្សរបស់ចិន Alibaba នេះ។ នៅក្នុងដំណើរទស្សនកិច្ចនោះ លោកប្រធានាធិបតី បានស្នើសុំឱ្យស្ថាបនិករបស់ក្រុមហ៊ុន Alibaba គឺលោកមហាសេដ្ឋី Jack Ma ចូលរួមជួយអភិវឌ្ឍវិស័យបច្ចេកវិទ្យាតាមរយៈការអភិវឌ្ឍលើសេដ្ឋកិច្ចឌីជីថលនៅក្នុងតំបន់អាហ្រ្វិក។
ប្រធានាធិបតីលោក Ramaphosa បានបង្ហាញជំហរ និងឆន្ទៈរបស់លោកថា លោកចង់អញ្ជើញ Jack Ma ទៅកាន់អាហ្វ្រិកខាងត្បូងដើម្បីជួយជ្រោមជ្រែងប្រទេសរបស់លោកក្នុងការបង្កើតមជ្ឈមណ្ឌលហ្វឹកហាត់លើវិស័យពាណិជ្ជកម្មអេឡិចត្រូនិក ដែលនេះគឺជាការគិតទុករបស់លោកជាយូរណាស់មកហើយ ដោយសារតែនៅពេលដែលលោកបានប្រកាសរឿងនេះទៅកាន់ទីសាធារណៈ អ្នកគ្រប់គ្នាពិតជាមានភាពសប្បាយរីករាយ និងរំភើបចិត្តក្នុងការបង្កើតមជ្ឈមណ្ឌលបណ្ដុះបណ្ដាលយុវវ័យ ពិសេសសម្រាប់យុវនារីនៅអាហ្វ្រិកតែម្ដង។
លោក Jack Ma ដែលជាស្ថាបនិកដ៏មហិមានៃក្រុមហ៊ុន Alibaba បាននិយាយថា ហេដ្ឋារចនាសម្ព័ន្ធអាហ្វ្រិកសព្វថ្ងៃនេះ មិនទាន់ល្អឥតខ្ចោះ នៅឡើយទេ ហើយក៏មិនទាន់អាចនិយាយបានថា ល្អនោះដែរ ប៉ុន្តែនេះគឺជាឱកាសដ៏ល្អមួយ។ ដូច្នេះ នេះគឺជាអ្វីដែលពួកគេជឿជាក់ ពីព្រោះនោះគឺអ្នកមានឱកាសដើម្បីចូលទៅជួយស្ដារហេដ្ឋារចនាសម្ព័ន្ធលើវិស័យសេដ្ឋកិច្ចឌីជីថល។ ពួកគេមានទំនុកចិត្តចំពោះទ្វីបអាហ្វ្រិក ពួកគេគិតថា សហគ្រិនមជ្ឈិមវ័យ និងអ្វីៗទាំងអស់ សុទ្ធតែត្រូវធ្វើ ពួកគេគួរតែចាប់ផ្តើមធ្វើឥឡូវនេះតែម្ដង។
គួរបញ្ជាក់ផងដែរថា កំពូលមហាសេដ្ឋីចិន លោក Ma បានទៅលេងប្រទេសអាហ្រ្វិកកាលពីខែមុនកន្លងទៅ។ អ្នកបង្កើតក្រុមហ៊ុន Alibaba រូបនេះ បានលើកឡើងថា ទ្វីបអាហ្រ្វិក គឺជាទឹកដីដែលសម្បូរទៅដោយឱកាស និងក្ដីសង្ឃឹម៕
September 17, 2018
ដំបូន្មានដ៏មានតម្លៃបំផុតរបស់ Jack Ma សម្រាប់អ្នកចាប់ផ្ដើមអាជីវកម្មដំបូង
ការចាប់ផ្ដើមអាជីវកម្មមួយ និងជាលើកដំបូង វាពិតជាពិបាក ដោយសារតែមានកត្តាជាច្រើនរួមផ្សំ។ កត្តាទាំងនោះរួមមាន ដើមទុន បទពិសោធន៏ និងធនធានមនុស្ស ដើម្បីចូលរួមចំណែកក្នុងការធ្វើឱ្យអាជីវកម្មមួយទទួលបានជោគជ័យ។
លោក Jack Ma ដែលជាស្ថាបនិករបស់ក្រុមហ៊ុនលក់ទំនិញអនឡាញយក្សរបស់ចិន Alibaba ហើយក៏ជាមហាសេដ្ឋីដ៏មានប្រជាប្រិយភាពផងនោះ បាននិយាយថា អ្នកមិនអាចបង្រួបបង្រួមគំនិតរបស់មនុស្សគ្រប់គ្នា ឱ្យរួមចូលគ្នាតែមួយបាននោះទេ ប៉ុន្តែអ្នកអាចបង្រួបបង្រួមមនុស្សគ្រប់គ្នាបានតាមរយៈគោលដៅរួមតែមួយ។
មហាសេដ្ឋីរូបនេះ បានបញ្ជាក់បន្ថែមទៀតថា កុំជឿជាក់ថា អ្នកអាចបង្រួបបង្រួមនៅអ្វីដែលមនុស្សគ្រប់គ្នាកំពុងតែគិត វាមិនអាចទៅរួចនោះទេ។ 30ភាពរយនៃមនុស្សទាំងអស់ នឹងមិនជឿជាក់លើអ្នកនោះទេ។ កុំអនុញ្ញាតឱ្យសហការរីរបស់អ្នក និងបុគ្គលិករបស់អ្នក គិតថាកំពុងតែធ្វើការសម្រាប់តែខ្លួនអ្នក។ ផ្ទុយទៅវិញ ចូរឱ្យពួកគេគិតថា ពួកគេកំពុងតែធ្វើការសម្រាប់គោលដៅរួមតែមួយវិញ ហើយធ្វើដើម្បីឱ្យក្រុមហ៊ុនទទួលភាពជោគជ័យ។ វាមានភាពងាយស្រួលច្រើនជាងក្នុងការបង្រួបបង្រួមក្រុមហ៊ុនមួយឱ្យស្ថិតនៅក្នុងគោលដៅរួមតែមួយ ជាជាងបង្រួបបង្រួមក្រុមហ៊ុនមួយឱ្យនៅជុំវិញតែមនុស្សណាម្នាក់៕
April 28, 2017