Europa League - La Reine Media

គ្រូបង្វឹក Mourinho ត្រូវបានពិន័យធ្ងន់ធ្ងរ ព្រោះតែជេរអាជ្ញាកណ្ដាល បន្ទាប់ពីវគ្គផ្ដាច់ព្រ័ត្រ Europa League

គ្រូបង្វឹករបស់ក្រុមបាល់ទាត់ Roma (អ៊ីតាលី) លោក Jose Mourinho បានទទួលពិន័យជាផ្លូវការពីសហព័ន្ធកីឡាបាល់ទាត់អឺរ៉ុប (UEFA) ដោយសារតែបង្ហាញទង្វើជេរប្រមាថអាជ្ញាកណ្ដាល បន្ទាប់ពីការប្រកួតវគ្គផ្ដាច់ព្រ័ត្រនៅពានរង្វាន់ Europa League 2022-2023។

ក្លឹបបាល់ទាត់ AS Roma បានចាញ់ Sevilla (អេស្ប៉ាញ) នៅក្នុងការប្រកួតទាត់ប៉េណាំងទី ក្នុងវគ្គផ្ដាច់ព្រ័ត្រ Europa League 2022-2023 ធ្វើឱ្យគ្រូបង្វឹក Jose Mourinho ផ្ទុះការខឹងនៅក្រោយការប្រកួត។ គ្រូបង្វឹកជនជាតិព័រទុយហ្កាល់រូបនេះ បានរង់ចាំអាជ្ញាកណ្ដាលនៅចំណត់ឡាន ហើយបានជេរប្រមាថលោក Anthony Taylor។ លោក Mourinho ក៏និយាយបញ្ឆិតបញ្ឆៀងក្នុងន័យថា អាជ្ញាកណ្ដាល Anthony Taylor កាន់ជើងខាងអេស្ប៉ាញ។

ពេលនោះ អ្នកគាំទ្ររបស់ក្រុម Roma ក៏បានស្រែកចំអកឱ្យអាជ្ញាកណ្ដាល Taylor ហើយថែមទាំងគប់កៅអីសំដៅអាជ្ញាកណ្ដាល នៅពេលគាត់ និងគ្រួសារព្យាយាមចាកចេញពីហុងគ្រីត្រលប់ទៅផ្ទះ។

គ្រូបង្វឹក Mourinho ជេរប្រមាថគ្រូបង្វឹក Taylor នៅចំណត់ឡាន

ថ្មីៗនេះ សហព័ន្ធកីឡាបាល់ទាត់អឺរ៉ុប បានសម្រេចចិត្តពិន័យលើគ្រូបង្វឹក Mourinho ដោយមិនឱ្យដឹកនាំបួនប្រកួតនៅអឺរ៉ុប ខណៈដែល Roma ឈរលំដាប់ទី 6 នៅ Serie A កាលពីរដូវកាលមុន ហើយមានលក្ខខណ្ឌគ្រប់គ្រាន់ដើម្បីចូលប្រកួតនៅ Europa League។

ក្រៅពីនេះ ក្លឹប Roma ក៏ត្រូវ UEFA ពិន័យ។ ពួកគេត្រូវបានហាមលក់សំបុត្រនៅឯទីលានដទៃក្នុងការប្រកួតបន្ទាប់នៅអឺរ៉ុប និងពិន័យជាប្រាក់ 5,000 អឺរ៉ូផងដែរ ហើយពួកគេក៏ត្រូវបានតម្រូវឱ្យទាក់ទងទៅកាន់សហព័ន្ធបាល់ទាត់ហុងគ្រីដើម្បីដោះស្រាយការខូចខាតដែលអ្នកគាំទ្ររបស់ Roma បានធ្វើឡើង៕

June 22, 2023

គ្រូបង្វឹក Mourinho អាចរងការពិន័យធ្ងន់ធ្ងរ ក្រោយពីជេរ និងចោទអាជ្ញាកណ្ដាលនៅ Europa League

គ្រូបង្វឹករបស់ក្រុមបាល់ទាត់ Roma អាចនឹងត្រូវបានហាមការដឹកនាំពីបួនទៅប្រាំប្រកួតនៅ UEFA ព្រោះតែបានជេរប្រទេច និងចោទអាជ្ញាកណ្ដាល ក្រោយការប្រកួតវគ្គផ្ដាច់ព្រ័ត្រនៅពានរង្វាន់ Europa League កាលពីប៉ុន្មានថ្ងៃមុន។

គ្រូបង្វឹក Jose Mourinho របស់ក្រុមបាល់ទាត់អ៊ីតាលី Roma បានប្រើប្រាស់ពាក្យអសុរោះដើម្បីជេរប្រទេចអាជ្ញាកណ្ដាលជនជាតិអង់គ្លេស Anthony Taylor នៅឯចំណតរថយន្តបន្ទាប់ពីការប្រកួតវគ្គផ្ដាច់ព្រ័ត្រនៅពានរង្វាន់ Europa League បានបញ្ចប់។

ក៏ប៉ុន្តែ ការបញ្ចេញមតិដែលធ្ងន់ធ្ងរជាងការជេរប្រទេចខាងលើរបស់គ្រូបង្វឹកក្រុម Roma នោះគឺការចោទដោយប្រយោលថា ក្រុមអាជ្ញាកណ្ដាលបានរួមគំនិតគ្នាធ្វើការលំអៀងទៅរកក្រុម Sevilla របស់អេស្ប៉ាញ។ ពេលប្រធានក្រុមអាជ្ញាកណ្ដាលរបស់ UEFA លោក Roberto Rosetti ចូលមកណែនាំឱ្យស្ងប់ចិត្ត គ្រូបង្វឹកជនជាតិព័រទុយហ្កាល់ លោក Mourinho ក៏និយាយថា «លោកឯងរួមគំនិតជាមួយពួកគេ»។

សម្ដីរបស់លោក Mourinho ក៏បាននាំឱ្យមានភាពច្របូកច្របល់នៅពេលអ្នកគាំទ្រធ្វើការវាយប្រហារទៅលើអាជ្ញាកណ្ដាល Taylor និងក្រុមគ្រួសារ មុនពេលឡើងយន្តហោះត្រលប់ទៅអង់គ្លេស។

យោងតាម Sun Sport សម្ដីចោទប្រកាន់ដោយប្រយោលខាងលើ អាចនាំឱ្យលោក Mourinho ប្រឈមនឹងហានិភ័យត្រូវបានហាមការដឹកនាំរហូតដល់ប្រាំប្រកួត។ ប្រការនេះអាចប៉ះពាល់ដល់ឱកាសរបស់លោក Mourinho បើសិនជាទៅដឹកនាំក្លឹបថ្មី។ ឧទាហរណ៍ថា បើសិនចូលធ្វើការឱ្យក្លឹបបារាំង PSG លោក Mourinho

អាចនឹងមិនបានដឹកនាំក្រុមនេះនៅក្នុងការប្រកួតភាគច្រើននៅវគ្គវិលជុំរបស់ Champions League 2023-2024។

ការប្រកួតបាល់ទាត់រវាងក្រុម Roma របស់អ៊ីតាលី និងក្រុម Sevilla របស់អែស្ប៉ាញក្នុងវគ្គផ្ដាច់ព្រ័ត្រនៅពានរង្វាន់ Europa League ដែលធ្វើឡើងនៅទីលាន Puskas Arena របស់ប្រទេសហុងគ្រី កាលពីព្រលប់ថ្ងៃទី 31 ឧសភា 2023 ក្រុមទាំងពីរទទួលបានលទ្ធផល 1-1 ក្នុង 120 នាទីដំបូង។ ប៉ុន្តែ Roma បានចាញ់ Sevilla 1-4 ក្នុងការទាត់ប៉េណាំងទីម្ដងម្នាក់។ លទ្ធផលនេះជួយឱ្យ Sevilla លើកពានជើងឯកនៅ Europa League៕

June 2, 2023

អ្នកគាំទ្រក្រុមបាល់ទាត់ Roma វាយប្រហារអាជ្ញាកណ្ដាលនៅ Europa League

(ហុងគ្រី) – អ្នកគាំទ្រក្រុមបាល់ទាត់អ៊ីតាលី Roma នាំគ្នាជេរប្រមាថ គប់ដបទឹក និងកៅអីជាដើម សំដៅលើ Anthony Taylor គ្រាដែលអាជ្ញាកណ្ដាលរូបនេះត្រូវបានប៉ូលិសអមដំណើរចូលបន្ទប់ដោយឡែកនៅព្រលានយន្តហោះ Budapest បន្ទាប់ពីការប្រកួតវគ្គផ្ដាច់ព្រ័ត្រ Europa League។

ពេលបង្ហាញវត្តមាននៅអាកាសយានដ្ឋានដើម្បីត្រៀមចាកចេញពីប្រទេសហុងគ្រីកាលពីថ្ងៃទី 01 មិថុនា 2023 អាជ្ញាកណ្ដាលជនជាតិអង់គ្លេស លោក Taylor ត្រូវបានអ្នកគាំទ្ររបស់ក្រុមបាល់ទាត់អ៊ីតាលី Roma ឡោមព័ន្ធ និងជេរប្រមាថ។ លើសពីនេះក៏មានអ្នកខ្លះស្រែកថា «សម្លាប់វាទៅ» ខណៈដែលអ្នកខ្លះគប់ដបទឹកសុទ្ធសំដៅអាជ្ញាកណ្ដាល និងក្រុមគ្រួសារ។

ដើម្បីការពារសុវត្ថិភាព ក្រុមប៉ូលិសក៏បានអមដំណើរលោក Taylor និងគ្រួសារ ចូលទៅក្នុងបន្ទប់ដោយឡែក។ ពេលនោះ មនុស្សម្នាក់ថែមទាំងបានគប់កៅអីសំដៅប៉ូលិសដែលកំពុងឈរការពារអាជ្ញាកណ្ដាល និងសមាជិកគ្រួសាររបស់គាត់។

ក្រោយមក ស្ថានប័នគ្រប់គ្រងអាជ្ញាកណ្ដាលអាជីពអង់គ្លេស (PGMOL) បានប្រកាសថា ស្ថាប័ននេះមានការភ័យខ្លាចនៅចំពោះមុនទង្វើមិនសមហេតុផល និងអាក្រក់ដែលអ្នកគាំទ្របានប្រព្រឹត្តចំពោះ Taylor និងគ្រួសារ នៅពេលពួកគេព្យាយាមត្រលប់ទៅផ្ទះ ក្រោយពីវគ្គផ្ដាច់ព្រ័ត្រ Europa League។

សារព័ត៌មានអ៊ីតាលីបានហៅហេតុការណ៍នេះថាជា «ករណីវឹកវរ Taylor» និងយល់ថា គ្រូបង្វឹក Jose Mourinho ត្រូវទទួលខុសត្រូវចំពោះការបង្កឱ្យមានបរិយាកាសតានតឹងនេះ។ ព្រោះថា ក្រោយវគ្គផ្ដាច់ព្រ័ត្រនៅ Europa League លោក Mourinho បានជេរប្រទេចអាជ្ញាកណ្ដាលនៅឯចំណតរថយន្ត ដោយសារយល់ថា លោក Taylor កាត់ក្ដីលំអៀងទៅរកក្រុមអេស្ប៉ាញ Sevilla។

https://www.youtube.com/shorts/WoKey4yHvyo

ការប្រកួតបាល់ទាត់រវាងក្រុម Roma របស់អ៊ីតាលី និងក្រុម Sevilla របស់អែស្ប៉ាញក្នុងវគ្គផ្ដាច់ព្រ័ត្រនៅពានរង្វាន់ Europa League ដែលធ្វើឡើងនៅទីលាន Puskas Arena របស់ប្រទេសហុងគ្រី កាលពីព្រលប់ថ្ងៃទី 31 ឧសភា 2023 ក្រុមទាំងពីរទទួលបានលទ្ធផល 1-1 ក្នុង 120 នាទីដំបូង។ ប៉ុន្តែ Roma បានចាញ់ Sevilla 1-4 ក្នុងការទាត់ប៉េណាំងទីម្ដងម្នាក់។ លទ្ធផលនេះជួយឱ្យ Sevilla លើកពានជើងឯកនៅ Europa League។

June 2, 2023

គ្រូបង្វឹក Mourinho «ជេរធ្ងន់ៗ» លើអាជ្ញាកណ្ដាល បន្ទាប់ពីក្រុមអេស្ប៉ាញឈ្នះក្រុមអ៊ីតាលីនៅ Europa League

(ហុងគ្រី) – គ្រូបង្វឹក Jose Mourinho ស្ដីបន្ទោសអាជ្ញាកណ្ដាល Anthony Taylor យ៉ាងចាស់ដៃ ពេលជួបគ្នានៅចំណតឡាន ក្រោយពីការប្រកួតបាល់ទាត់រវាងក្រុម Roma របស់អ៊ីតាលី និងក្រុម Sevilla របស់អែស្ប៉ាញក្នុងវគ្គផ្ដាច់ព្រ័ត្រនៅពានរង្វាន់ Europa League។

«អ…ចង្រៃ អ…ថោកទាប» លោក Mourinho និយាយជាភាសាអង់គ្លេស ជេរទៅលើអាជ្ញាកណ្ដាល Taylor ដូច្នេះ។ បន្ទាប់មក គ្រូបង្វឹកក្រុម Roma របស់អ៊ីតាលីរូបនេះក៏ជេរបន្តជាភាសាអ៊ីតាលីថា «អ…ងា.ប់»។ ជាងនេះ មុនពេលឡើងឡានរបស់ក្រុម Roma លោក Mourinho ក៏បន្តថា «សូមអបអរ អ…ថោក»។

មុននោះ លោក Mourinho និងក្រុមកីឡាកររបស់ក្លឹប Roma យល់ថា អាជ្ញាកណ្ដាល Taylor លំអៀងទៅរក Sevilla។ ពួកគេចោទថា អាជ្ញាកណ្ដាលជនជាតិអង់គ្លេស មិនពិន័យកាតលឿងទីពីរចំពោះ Erik Lamela ពេលមានករណីប៉ះទង្គិចគ្នានៅចុងម៉ោង។ ក្រោយមក Lamela ក៏ចូលរួមទាត់មួយគ្រាប់នៅក្នុងការប្រកួតទាត់ប៉េណាំងទីម្ដងម្នាក់ឱ្យ Sevilla។ ខាងក្រុម Roma ក៏ក្ដៅចិត្តខ្លាំងនៅពេលអាជ្ញាកណ្ដាលមិនផ្លុំកញ្ចែពិន័យប៉េណាំងទី បន្ទាប់ពីដៃរបស់ Fernando ប៉ះបាល់ក្នុងតំបន់គ្រោះថ្នាក់ផងដែរ។

ក្រោយការប្រកួត លោក Mourinho ក៏បាននិយាយថា «អាជ្ញាកណ្ដាលទំនងជាជនជាតិអេស្ប៉ាញ។ ភាពអយុត្តិធម៌បានបង្ហាញតាមរយៈ Lamela ដែលគួរណាស់តែត្រូវបានពិន័យកាតលឿងទីពីរ»។

អាជ្ញាកណ្ដាល Taylor បានពិន័យកាតលឿងចំនួន 14 ដែលនេះគឺជាកំណត់ត្រាថ្មីក្នុងការប្រកួតផ្ដាច់ព្រ័ត្រមួយប្រកួតនៅទ្វីបអឺរ៉ុប។

នេះមិនមែនជាលើកដំបូងឡើយដែលលោក Mourinho បានទៅរកអាជ្ញាកណ្ដាលដើម្បីស្ដីបន្ទោស បន្ទាប់ពីការប្រកួត។ កាលពីឆ្នាំ 2012 ក្រោយការប្រកួតចាញ់ Barca នៅពានរង្វាន់ Copa del Rey របស់អេស្ប៉ាញ គ្រូបង្វឹករូបនេះក៏ត្រូវរងការចោទប្រកាន់ដូចគ្នានេះដែរ។

ការប្រកួតបាល់ទាត់រវាងក្រុម Roma របស់អ៊ីតាលី និងក្រុម Sevilla របស់អែស្ប៉ាញក្នុងវគ្គផ្ដាច់ព្រ័ត្រនៅពានរង្វាន់ Europa League ដែលធ្វើឡើងនៅទីលាន Puskas Arena របស់ប្រទេសហុងគ្រី កាលពីព្រលប់ថ្ងៃទី 31 ឧសភា 2023 ក្រុមទាំងពីរទទួលបានលទ្ធផល 1-1 ក្នុង 120 នាទីដំបូង។ ប៉ុន្តែ Roma បានចាញ់ Sevilla 1-4 ក្នុងការទាត់ប៉េណាំងទីម្ដងម្នាក់។ លទ្ធផលនេះជួយឱ្យ Sevilla លើកពានជើងឯកនៅ Europa League។

June 1, 2023

គ្រូបង្វឹកក្រុមបាល់ទាត់ Roma របស់អ៊ីតាលី បោះមេដាយចោល ក្រោយចាញ់អេស្ប៉ាញនៅវគ្គផ្ដាច់ព្រ័ត្រ Europa League

(ហុងគ្រី) – គ្រូបង្វឹក Jose Mourinho បោះមេដាយប្រាក់ទៅឱ្យអ្នកគាំទ្ររបស់ Roma បន្ទាប់ពីចាញ់ Sevilla ក្នុងការទាត់ប៉េណាំងទីម្ដងម្នាក់នៅវគ្គផ្ដាច់ព្រ័ត្រ Europa League។

គ្រូបង្វឹករបស់ក្រុមបាល់ទាត់ Roma របស់ប្រទេសអ៊ីតាលី បោះមេដាយរបស់ខ្លួនទៅកាន់អ្នកគាំទ្រនៅលើវិទិកាទស្សនិកជ ក្នុងទីលាន Puskas Arena របស់ប្រទេសហុងគ្រី ក្រោយពីការប្រកួតវគ្គផ្ដាច់ព្រ័ត្រកាលពីព្រលប់ថ្ងៃទី 31 ឧសភា 2023។ ក្រុម Roma បានចាញ់ក្រុម Sevilla របស់អេស្ប៉ាញ់ 1-4 ក្នុងការទាត់ប៉េណាំងទីម្ដងម្នាក់ បន្ទាប់ពីមានលទ្ធផលស្មើគ្នា 1-1 ក្នុង 120 នាទីកន្លង។

នេះគឺជាលើកដំបូងហើយដែលលោក Mourinho បានចាញ់នៅវគ្គផ្ដាច់ព្រ័ត្រក្នុងការប្រកួតនៅទ្វីបអឺរ៉ុប ក្រោយពីដណ្ដើមបានតំណែងជើងឯក Champions League ពីរលើក, Europa League ឬ UEFA Cup ពីរលើក និង Conference League មួយលើក។

នេះក៏ជាលើកទីពីរផងដែរ ដែលគ្រូបង្វឹក Mourinho បោះមេដាយចោល។ ក្នុងនោះ លើកទីមួយគឺពេលដែល Chelsea ចាញ់ Arsenal នៅ FA Community Shield ឆ្នាំ 2015 និង Man Utd ចាញ់ Real Madrid នៅ UEFA Super Cup ឆ្នាំ 2017៕

ក្រុម Sevilla របស់អេស្ប៉ាញ់ អបអរជ័យជម្នះ

គ្រូបង្វឹក Jose (Jose Luis Mendilibar) របស់ក្លឹបអេស្ប៉ាញ Sevilla លើកពាន គ្រាដែលគ្រូបង្វឹក Jose (Jose Mourinho) របស់ក្លឹបអ៊ីតាលី Roma កំពុងខឹងខ្លាំង

អ្នកគាំទ្រម្នាក់ទទួលបានមេដាយដែលគ្រូបង្វឹករបស់ Roma បោះឱ្យ

June 1, 2023

ក្លឹបបាល់ទាត់អេស្បាញ ក្លាយជាជើងឯក Europa League ពេលបានឈ្នះក្លឹបអ៊ីតាលី

(ហុងគ្រី) – គ្រូបង្វឹក Jose Mourinho បានបរាជ័យជាលើកដំបូងនៅវគ្គផ្ដាច់ព្រ័ត្រនៃការប្រកួតដណ្ដើមពានរង្វាន់បាល់ទាត់ Europa League នៅពេល Roma ដែលជាក្រុមបាល់ទាត់របស់ក្លឹបអ៊ីតាលី បានចាញ់ក្រុមរបស់ក្លឹបអេស្បាញ Sevilla 1-4 ក្នុងការទាត់ប៉េណាំងទីម្ដងម្នាក់នៅចុងការប្រកួត។

កីឡាករខ្សែបម្រើពីររូបគឺ Gianluca Mancini និង Roger Ibanez សុទ្ធតែទាត់បាល់មិនបានល្អ ធ្វើឱ្យ Roma ចាញ់ 1-4 នៅក្នុងការទាត់ប៉េណាំងទីម្ដងម្នាក់ ហើយក៏បាត់បង់តំណែងជើងឯក Europa League និងមិនអាចចូលរួមប្រកួតនៅ Champions League រដូវកាលក្រោយ។

កូនសិស្ស និងគ្រូបង្វឹក Mourinho ប្រាកដជាស្ដាយក្រោយខ្លាំងណាស់ នៅពេលធ្វើឱ្យរបូតឱកាសល្អជាច្រើននៅក្នុងតង់ទីមួយ ទីពីរ ក៏ដូចជានៅក្នុងម៉ោងបន្ថែមដែលទទួលបានលទ្ធផល 1-1 មុននឹងចាញ់ 1-4 នៅក្នុងការទាត់ប៉េណាំងទី។

ចំណែក Sevilla វិញ បានបង្ហាញភាពខ្លាំង និងភាពជាអ្នកសម្បូរសមិទ្ធផលជាងគេនៅក្នុងប្រវត្តិ Europa League ដោយការទាត់ប៉េណាំងទីម្ដងម្នាក់បានសម្រេច។ ក្រុមនេះក៏សុទ្ធតែបានឈ្នះនៅក្នុងការប្រកួតផ្ដាច់ព្រ័ត្រទាំង 7 លើកនៅ Europa League បើរាប់ទាំងជ័យជម្នះលើ Roma នៅលើកនេះ។

ជាថ្មីម្ដងទៀត បណ្ដាក្លឹបតំណាងរបស់អេស្ប៉ាញបានបង្ហាញ «អំណាច» របស់ខ្លួននៅទ្វីបអារ៉ុប ដោយសារបានឈ្នះការប្រកួតវគ្គផ្ដាច់ព្រ័ត្រចំនួន 18 លើកជាប់ៗគ្នានៅចំពោះមុខគូប្រកួតមកពីប្រទេសផ្សេងក្នុងទ្វីបនេះ។ បណ្ដាក្រុមបាល់ទាត់របស់អេស្ប៉ាញ ក៏មិនបានចាញ់នៅក្នុងវគ្គផ្ដាច់ព្រ័ត្រចំនួន 23 លើកនៅ Champions League និង Europa League រាប់ចាប់តាំងពីឆ្នាំ 2001។ សមិទ្ធផលនេះនឹងអូសបន្លាយពេលយូរ យ៉ាងហោចក៏ដល់ឆ្នាំ 2024៕

June 1, 2023

បណ្ដាក្លឹបបាល់ទាត់នៅអ៊ីតាលី ឡើងដល់វគ្គផ្ដាច់ព្រ័ត្រនៃពានរង្វាន់ធំៗទាំងបីនៅទ្វីបអឺរ៉ុប

ក្លឹបបាល់ទាត់នានាដែលជាតំណាងរបស់ប្រទេសអ៊ីតាលី បានឡើងដល់វគ្គផ្ដាច់ព្រ័ត្រនៃពានរង្វាន់ Champions League, Europa League និង Conference League នៅរដូវកាលនេះ។

នៅឯ Champions League ក្លឹប Inter Milan បានផ្ដួលក្លឹបរួមស្រុក A.C. Milan 3-0 នៅវគ្គពាក់កណ្ដាលផ្ដាច់ព្រ័ត្រ។ នៅថ្ងៃទី 10 មិថុនាខាងមុខ Inter Milan នឹងប៉ះជាមួយ Man City ក្នុងវគ្គផ្ដាច់ព្រ័ត្រ ដែលធ្វើឡើងនៅទីក្រុងអ៊ីស្តង់ប៊ុល ប្រទេសតួកគី។

នៅឯពានរង្វាន់ Europa League ក្លឹប Roma បានឈ្នះ Leverkusen ដោយលទ្ធផល 1-0 នៅវគ្គពាក់កណ្ដាលផ្ដាច់ព្រ័ត្រ។ ក្នុងវគ្គផ្ដាច់ព្រ័ត្រ កូនសិស្ស និងគ្រូបង្វឹក Jose Mourinho នឹងប៉ះក្លឹប Sevilla នៅថ្ងៃទី 31 ឧសភា នៅប៊ុយដាប៉ែស ប្រទេសហុងគ្រី។

តំណាងទីបីរបស់អ៊ីតាលី គឺ Fiorentina នឹងត្រូវប្រកួតជាមួយក្លឹប West Ham ក្នុងវគ្គផ្ដាច់ព្រ័ត្ររបស់ពានរង្វាន់ Conference League នាថ្ងៃទី 07 មិថុនា នៅរដ្ឋធានីប្រាក ប្រទេសឆែក។ នៅវគ្គពាក់កណ្ដាលផ្ដាច់ព្រ័ត្រ Fiorentina បានផ្ដួល Basel ដោយលទ្ធផល 4-3។

បើសិនជា Roma, Inter និង Fiorentina សុទ្ធតែដណ្ដើមបានជ័យជម្នះ នោះបាល់ទាត់អ៊ីតាលីនឹងមាន hat-trick ទីពីរ បន្ទាប់ពី hat-trick ដំបូងត្រូវបានបង្កើតឡើងចន្លោះពីឆ្នាំ 1989 ដល់ 1990 ដោយក្លឹប AC Milan ដណ្ដើមបានពាន Champions League, Sampdoria ដណ្ដើមបានពាន Europa League និង Juventus ដណ្ដើមបានពាន UEFA Cup។ នោះក៏ជារដូវកាលតែមួយគត់ដែលបណ្ដាក្លឹបរបស់ប្រទេសមួយដណ្ដើមបានពានរង្វាន់ទាំងបីនៅទ្វីបអឺរ៉ុប៕

May 19, 2023

Barcelona ប្រកាសតែងតាំងលោក Valverde ជាអ្នកចាត់ការទូទៅថ្មីរបស់ខ្លួន

ក្លិប Barcelona បានប្រកាសថា លោក Ernesto Valverde នឹងក្លាយជាអ្នកចាត់ការទូទៅថ្មីរបស់ខ្លួន ក្រោយពីការចាកចេញរបស់លោក Luis Enrique។ លោក Valverde វ័យ៥៣ឆ្នាំ បានលាលែងពីតំណែងរបស់លោកក្នុងនាមជាគ្រូបង្វឹករបស់ក្លិប Athletic Bilbao កាលពីសប្តាហ៍មុន ក្រោយពីបានដឹកនាំឲ្យ Athletic Bilbao បញ្ចប់ក្នុងចំណាត់ថ្នាក់លេខ៧ នៅលើតារាងក្របខ័ណ្ឌ La Liga និងឈ្នះកៅអីទៅលេងក្នុងក្របខ័ណ្ឌ Europa League។

គ្រូបង្វឹករូបនេះក៏ធ្លាប់បានដឹកនាំក្លិប Villarreal, Valencia និងក្លិប Espanyol ផងដែរក្នុងអាជីពគ្រូបង្វឹករបស់លោក ខណៈដែលលោកបានចំណាយរយៈពេល២ឆ្នាំក្នុងការដឹកនាំក្លិប Olympiakos ក្នុងប្រទេសក្រិក និងលោកក៏ធ្លាប់បានចំណាយពេល២ឆ្នាំផងដែរ ក្នុងនាមជាកីឡាកររបស់ក្លិប Barcelona មួយនេះកាលពីចុងឆ្នាំ១៩៨០ ហើយបច្ចុប្បន្នត្រូវវិលទៅកាន់កីឡដ្ឋាន Camp Nou វិញជាថ្មី ក្រោយពីអវត្តមានអស់រយៈពេល២៧ឆ្នាំក្នុងនាមជាគ្រូបង្វឹកម្តង។

ក្រុម Barcelona បានឈ្នះពាន Copa del Rey ក្រោយពីបានយកឈ្នះក្នុងលទ្ធផល ៣-១ នៅពេលប្រកួតជាមួយនឹងក្រុម Alaves ក្នុងការប្រកួតលើកចុងក្រោយរបស់លោក Enrique ក្នុងនាមជាគ្រូបង្វឹកកាលពីថ្ងៃសៅរ៍ ដើម្បីធ្វើឲ្យលោកឈ្នះពានរង្វាន់សរុបចំនួន៩ក្នុងរយៈពេល៣ឆ្នាំ។ លោក Josep Maria Bartomeu ប្រធានក្លិប Barcelona បានឲ្យដឹងថា៖ «លោក Valverde មានសមត្ថភាព មានចំណេះដឹង សមត្ថភាពកាត់សេចក្តី និងបទពិសោធ។ លោកជាមនុស្សមានការតាំងចិត្តខ្ពស់ ហើយលោកគឺជាអ្នកដែលចូលចិត្តបច្ចេកវិទ្យាក្នុងការហ្វឹកហាត់ និងគ្រប់គ្រងការប្រកួតផ្សេងៗ»៕
ប្រភពពី៖ The Guardian

May 30, 2017

Pogba និង Mkhitaryan ជួយឲ្យ Man United ផ្តួល Ajax ដើម្បីឈ្នះពាន Europa League

ក្រុមបិសាចក្រហម Manchester United នឹងវិលទៅកាន់ក្របខ័ណ្ឌកំពូលអឺរ៉ុបវិញនៅរដូវកាលក្រោយ បន្ទាប់ពីបានផ្តួលក្រុម Ajax Amsterdam របស់ហូឡង់ ក្នុងលទ្ធផល ២-០ ដើម្បីឈ្នះពាន Europa League កាលពីថ្ងៃពុធ។

ខ្សែបម្រើដ៏មានឥទ្ធិពល Paul Pogba បានរកគ្រាប់បាល់បើកឆាកយ៉ាងល្អ មុនពេលខ្សែបម្រើ Henrikh Mkhitaryan បានស៊ុតបាល់បកថយក្រោយដើម្បីជួយឲ្យក្រុមខ្លួនទទួលជ័យជម្នះក្នុងការប្រកួតវគ្គផ្តាច់ព្រ័ត្រ ក៏ដូចជាឈ្នះកៅអីទៅលេងក្នុងក្របខ័ណ្ឌ Champions League ដែរ។ ក្រោយពីបានបញ្ចប់ក្នុងចំណាត់ថ្នាក់លេខ៦ នៅលើតារាងនៃក្របខ័ណ្ឌ Premier League លោក Jose Mourinho បានឱ្យដឹងថា ការទទួលជ័យជម្នះនេះនឹងក្លាយជាមធ្យោបាយតែមួយគត់សម្រាប់ឱ្យក្រុមរបស់លោកឈានទៅប្រកួតក្នុងក្របខ័ណ្ឌកំពូលរបស់អឺរ៉ុប នារដូវកាលក្រោយ។

ក្រោយពីបានធ្វើការស្មឹងស្មាធិ៍រយៈពេល១នាទីនៅមុនពេលការប្រកួតចាប់ផ្តើមដើម្បីរំឭកដល់វិញ្ញាណក្ខន្ធរបស់ជនរងគ្រោះក្នុងការវាយប្រហារភេរវកម្មនៅទីក្រុង Manchester រួចមក ខ្សែបម្រើ Pogba បានតបស្នងចំពោះការផ្ទេរមកក្នុងតម្លៃខ្លួនជាកំណត់ត្រាពិភពលោករបស់គេ ដោយបានស៊ុតបាល់បំប៉ោងសំណាញ់ទីនៅនាទីទី១៨។ Man United បានរក្សាការនាំមុខរបស់ខ្លួនរហូតដល់បញ្ចប់ការប្រកួតតង់ទី១ មុនពេល Mkhitaryan បានបន្ថែមការនាំមុខរបស់ក្រុមខ្លួនភ្លាមៗ ក្រោយពីលេងបានត្រឹមតែប៉ុន្មាននាទីនៃតង់ទី២ ដើម្បីបំពេញការទទួលជ័យជម្នះយ៉ាងកក់ក្តៅសម្រាប់ក្រុមខ្លួនតែម្តង។ Pogba បានប្រាប់ទូរទស្សន៍ BT Sport ថា៖ «ទីបំផុត យើងធ្វើបានសម្រេចហើយ យើងពិតជាមានមោទនភាពណាស់ គ្មាននរណាអាចរិះគន់បានឡើយ។ ពួកគេបាននិយាយថា យើងបានជួបរដូវកាលដ៏អន់មួយ ប៉ុន្តែយើងបានឈ្នះពាន៣ ក្នុងនោះរាប់បញ្ចូលទាំងពាន Community Shield ផងដែរ»។

ខ្សែបម្រើអន្តរជាតិបារាំងរូបនេះបានបន្ថែមទៀតថា៖ «ការចាប់ផ្តើមពិតជាសំខាន់ណាស់ ហើយក្រោយពីគ្រាប់បាល់ជោគជ័យទាំង២គ្រាប់នោះ យើងបានគ្រប់គ្រងការប្រកួតនេះទាំងស្រុង។ គ្រប់គ្នាក្នុងក្រុមនេះបានបង្ហាញពីទម្រង់លេងយ៉ាងល្អ»៕
ប្រភពពី៖ The Sun

May 25, 2017

គ្រាប់បាល់ដ៏អស្ចារ្យរបស់ Rashford ជួយឲ្យ Man Utd ខិតកាន់តែកៀកទៅវគ្គផ្តាច់ព្រ័ត្រ

គ្រាប់បាល់ស៊ុតបញ្ចូលទីយ៉ាងល្អក្នុងតង់ទី២របស់ខ្សែប្រយុទ្ធវ័យក្មេង Marcus Rashford មានន័យថា ក្រុមបិសាចក្រហម Manchester United នឹងនាំយកការនាំមុខក្នុងលទ្ធផល ១-០ ទៅកាន់ការប្រកួតក្របខ័ណ្ឌ Europa League វគ្គពាក់កណ្តាលផ្តាច់ព្រ័ត្រ ជើងទី២ ពេលជួបក្រុម Celta Vigo នៅសប្តាហ៍ក្រោយ។

ការស៊ុតបាល់ពិន័យ Free-kick បញ្ចូលទីយ៉ាងល្អនៅនាទី ទី៦៧របស់ខ្សែប្រយុទ្ធវ័យ១៩ឆ្នាំរូបនេះ បានកើតឡើង ក្រោយពីក្រុម Man United បានខ្ជះខ្ជាយឱកាសជាច្រើនក្នុងការប្រកួតនាកីឡដ្ឋាន Estadio de Balaidos កាលពីថ្ងៃព្រហស្បតិ៍។ កីឡាករ Rashford, Henrikh Mkhitaryan និង Jesse Lingard សុទ្ធសឹងទទួលបានឱកាសដ៏ល្អក្នុងការរកគ្រាប់បាល់នៅមុនពេលបញ្ចប់តង់ទី១ ប៉ុន្តែ អ្នកចាំទី Sergio Alvarez បានសង្គ្រោះបាល់ដ៏ល្អជាច្រើនដើម្បីជួយដល់ក្រុមម្ចាស់ផ្ទះ។ ក្រុមស្ថិតក្នុងក្របខ័ណ្ឌ La Liga មួយនេះ គួរតែមានគ្រាប់បាល់នាំមុខមុន ក្នុងតង់ទី១ ប៉ុន្តែ កីឡាករ Daniel Wass បានតែតបាល់មិនផុតដៃរបស់អ្នកចាំទី Sergio Romero។

ការស៊ុតបាល់ពិន័យ Free-kick បញ្ចូលទីយ៉ាងល្អរបស់ Rashford គ្រប់គ្រាន់ក្នុងការជួយឲ្យក្រុមបិសាចក្រហម ធ្វើដំណើរទៅកាន់កីឡដ្ឋាន Old Trafford ជាមួយនឹងគ្រាប់បាល់នាំមុខក្រៅដីដ៏សំខាន់មួយគ្រាប់។ លោក Jose Mourinho ដែលជាអ្នកចាត់ការទូទៅរបស់ Man United បានកោតសរសើរកីឡាករវ័យក្មេងរបស់លោក ដែលបានបំពេញតួនាទីយ៉ាងល្អក្នុងពេលអវត្តមានខ្សែប្រយុទ្ធដែលរកគ្រាប់បាល់បានច្រើនជាងគេគឺ Zlatan Ibrahimovic ដោយសារតែបញ្ហារបួសជង្គង់។ លោក Mourinho បានឲ្យដឹងថា៖ «រូបគេជាក្មេងវ័យ១៩ឆ្នាំម្នាក់ដែលស្រឡាញ់កីឡាបាល់ទាត់។ រូបគេខិតខំធ្វើការ មានភាពចាស់ទុំ ហើយមិនថា រូបគេមានវ័យក្មេងក៏ដោយ ប៉ុន្តែ គេមានកម្រិតលេងដ៏អស្ចារ្យ»៕

ប្រភពពី៖ Mirror

May 5, 2017

Tag: Europa League