តំណាងរាស្ត្រច្រើនរូបនៅសភាបូលីវី វាយតប់ បោចសក់គ្នានៅក្នុងសភានៅពេលតំណាងរដ្ឋាភិបាលវាយការណ៍អំពីការដាក់ពន្ធនាគារចំពោះអតីតអភិបាលមួយរូប។
រដ្ឋមន្ត្រី Eduardo del Castillo កាលពីថ្ងៃទី 23 ឧសភា ត្រូវបានសភាបូលីវីកោះហៅឱ្យចូលមករាយការណ៍អំពីករណីលោក Luis Fernando Camacho អតីតអភិបាលតំបន់ Santa Cruz និងជាអ្នកនយោបាយដ៏ល្បីឈ្មោះរបស់បក្សប្រឆាំង ដែលត្រូវបានកាត់ទោសឱ្យជាប់ពន្ធនាគារ 12 ឆ្នាំ ក្រោមការចោទប្រកាន់ថា មានផែនការធ្វើរដ្ឋប្រហារ។
លោក Castillo ការពារសេចក្ដីសម្រេចចំពោះការកាត់ទោសអតីតអភិបាល Camacho ព្រមទាំងបានរិះគន់ថា ក្រុមតំណាងរាស្ត្របក្សរបស់លោក Camacho ជា «ក្រុមជ្រុលនិយម លួចប្លន់ ហិង្សា ចូលចិត្តរឹបអូបទ្រព្យរបស់ប្រជាជនបូលីវី»។
ពេលលោក Castillo កំពុងនិយាយ តំណាងរាស្ត្រមួយក្រុមរបស់បក្សប្រឆាំង នាំគ្នាលើកបដាប្រឆាំងនឹងការដាក់ទោសលើលោក Camacho អមនឹងអក្សរមួយឃ្លា «រដ្ឋមន្ត្រីភេរវកម្ម»។ ក្នុងពេលតំណាងរាស្ត្រមួយក្រុមដែលគាំទ្ររដ្ឋាភិបាលព្យាយាមដណ្ដើមយកបដា ភ្លាមនោះ តំណាងរាស្ត្រប្រហែល 20 នាក់ ភាគច្រើនជាស្ត្រី ក៏ចូលទៅវាយតប់ និងបោចសក់គ្នាក្នុងសភា។
ប៉ុន្មាននាទីក្រោយមក ហេតុការណ៍វាយតប់គ្នាក៏បានបញ្ចប់នៅពេលក្រុមតំណាងរាស្ត្រជាបុរសចូលធ្វើអន្តរាគមន៍។ ក្នុងហេតុការណ៍នេះពុំមានអ្នករងរបួសធ្ងន់ធ្ងរនោះទេ។
នេះគឺជាហេតុការណ៍ថ្មីបំផុតដែលបង្ហាញអំពីស្ថានការណ៍ប្រកាន់បក្សពួកក្នុងរឿងនយោបាយនៅ បូលីវី ជាប្រទេសដែលបក្សប្រឆាំងប្រកាសថា សកម្មជនបក្សប្រឆាំងប្រហែល 180 នាក់កំពុងត្រូវបានឃុំខ្លួន។
រដ្ឋាភិបាលរបស់ប្រធានាធិបតី Luis Arce បានចោទប្រកាន់សកម្មជនទាំងនោះថា បានគាំទ្ររដ្ឋប្រហារប្រឆាំងអតីតប្រធានាធិបតី Evo Morales កាលពីឆ្នាំ 2019 និងជួយឱ្យលោកស្រី Jeanine Anez អ្នកនយោបាយស្ដាំនិយមឡើងកាន់អំណាច។
យោងតាម AFP លោក Arce ធ្លាប់ជារដ្ឋមន្ត្រីសេដ្ឋកិច្ចក្នុងសម័យប្រធានាធិបតី Morales និងត្រូវសុំសិទ្ធិជ្រកកោននៅប្រទេសម៉ិកស៊ិក នៅពេលលោក Morales ត្រូវបានផ្ដួលរំលំ។ ក្រោយមក លោក Arce ក៏បានត្រលប់មកប្រទេស និងត្រូវបានបោះឆ្នោតជាប្រធានាធិបតីបូលីវីកាលពីឆ្នាំ 2020 គ្រាដែលលោកស្រី Anez ត្រូវបានកាត់ទោសឱ្យជាប់ពន្ធនាគារ៕
