109 - La Reine Media

«មហាគម្រោងនាំទឹក» តម្លៃជាង 7 ពាន់លានដុល្លារអាម៉េរិក ត្រូវបានចិនសាងសង់រួចរាល់

ប្រទេសចិន ទើបតែបានសាងសង់រួចរាល់ជាស្ថាពរមហាគម្រោងនាំទឹក ដែលត្រូវចំណាយប្រាក់អស់ជាង 7 ពាន់លានដុល្លារអាម៉េរិក និងចំណាយពេលអស់ច្រើនឆ្នាំ។

មហាគម្រោងខាងលើនេះត្រូវបានអនុវត្តដើម្បីតភ្ជាប់ទន្លេចំនួនពីរដែលវែងជាងគេនៅប្រទេសចិន គឺទន្លេ Huang He និងទន្លេ Yangtze។ ហេដ្ឋារចនាសម្ព័ន្ធនេះ មិនត្រឹមតែជួយផ្គត់ផ្គង់ទឹកសម្រាប់តំបន់រាលរាបនៅប្រទេសចិនប៉ុណ្ណោះទេ តែក៏រួមចំណែកក្នុងការកាត់បន្ថយហានិភ័យខ្វះទឹកនៅក្នុងតំបន់ផងដែរ។

គម្រោងនេះមានបណ្ដោយប្រវែងជាង 800 គីឡូម៉ែត្រ ឆ្លងកាត់បីខេត្ត គឺ Hubei, Hebei និង Chongqing។

មហាគម្រោងតភ្ជាប់ទន្លេពីរវែងជាងគេនៅប្រទេសចិននេះ ត្រូវចំណាយថវិកាអស់ជាង 7.2 ពាន់លានដុល្លារអាម៉េរិក និងប្រើពេលអស់ជាងមួយទសវត្សរ៍ ក៏ដូចជាឆ្លងកាត់ឧបសគ្គធំៗរាប់មិនអស់៕

July 18, 2023

សំបុត្រចូលមើល Messi ទាត់ឱ្យក្លឹប Inter Miami ក្នុងការប្រកួតដំបូង កំពុងឡើងថ្លៃខ្ពស់ខ្លាំង

(សហរដ្ឋអាម៉េរិក) – សំបុត្រចូលទស្សនា Lionel Messi ទាត់ក្នុងការប្រកួតដំបូងនៅ Inter Miami ដែលនឹងត្រូវប៉ះក្រុម Cruz Azul ក្នុងក្របខណ្ឌ Leagues Cup នៅថ្ងៃទី 21 កក្កដាខាងមុខ បានឡើងថ្លៃលើសពី 100,000 ដុល្លារអាម៉េរិក។

កាលពីចុងសប្ដាហ៍កន្លង គេហទំព័ររបស់ក្លឹបបាល់ទាត់ Inter Miami បានបញ្ជាក់ថា Messi រួមនឹងកីឡាករថ្មី Sergio Busquets អាចទាត់នៅក្នុងការប្រកួតជាមួយនឹងក្រុម Cruz Azul ក្នុងក្របខណ្ឌ Leagues Cup នៅលើទីលាន DRV PNK ក្នុងថ្ងៃទី 21 កក្កដា 2023។ Leagues Cup គឺជាពានរង្វាន់ប្រចាំឆ្នាំ ដែលត្រូវបានបង្កើតឡើងកាលពីឆ្នាំ 2019 និងមានការចូលរួមពីបណ្ដាក្លឹបមកពីពានរង្វាន់បាល់ទាត់អាជីពអាម៉េរិក (MLS) និង Liga MX របស់ម៉ិចស៊ិច នៅអាម៉េរិកខាងជើង។

យោងតាម Goal សំបុត្រចូលទស្សនាការប្រកួតនៅក្នុងកីឡដ្ឋាន DRV PNK កាន់តែពិបាករកទិញ ហើយតម្លៃក៏កើនឡើងខ្ពស់ខ្លាំងក្នុងប៉ុន្មានថ្ងៃចុងក្រោយនេះ។ Vivid Seats ដែលជាគេហទំព័រជំនាញខាងទិញ-លក់សំបុត្រចូលមើលបាល់ទាត់ បច្ចុប្បន្នកំពុងដាក់លក់សំបុត្រចូលទស្សនា Messi ទាត់ក្នុងការប្រកួតដំបូងនៅ Inter Miami ក្នុងតម្លៃ 110,000 ដុល្លារអាម៉េរិក/សំបុត្រ។

តម្លៃមធ្យមសម្រាប់សំបុត្រចូលមើលការប្រកួតរវាង Inter Miami និង Cruz Azul គឺ 487 ដុល្លារ ពោលគឺខ្ពស់ជាងទ្វេដង បើធៀបនឹងសំបុត្រចូលមើលការប្រកួតមិត្តភាពរវាង Inter Miami និងម្ចាស់ជើងឯក La Liga Barca កាលពីរដូវក្ដៅឆ្នាំមុន។

តម្រូវការសំបុត្រចូលមើល Messi ទាត់ក្នុងប្រកួតដំបូងនៅពានរង្វាន់បាល់ទាត់អាជីពអាម៉េរិក (MLS) ដែល Inter Miami ត្រូវប៉ះនឹងក្រុម Charlotte FC ក្នុងថ្ងៃទី 21 សីហា ក៏កើនឡើងខ្ពស់ផងដែរ និងត្រូវបានដាក់លក់ក្នុងតម្លៃប្រហែល 288 ដុល្លារ/សំបុត្រ។ តួលេខនេះអាចនឹងកើនឡើងខ្ពស់ជាងនេះនាពេលខាងមុខ បើសិន Messi បង្ហាញថ្វីជើងបានល្អនៅ Leagues Cup។

មិនត្រឹមតែសំបុត្រនោះទេ សូម្បីតែអាវរបស់ Messi ក៏ត្រូវបានអ្នកគាំទ្រតាមរកទិញច្រើនផងដែរ។ ដោយសារតែមិនទាន់ត្រូវបានដាក់លក់លើគេហទំព័ររបស់ Inter Miami ដូច្នេះអ្នកគាំទ្រមានតែរកទិញអាវលេខ 10 របស់ Messi នៅឯហាងក្នុងកីឡដ្ឋាន DRV PNK ដែលដាក់លក់ក្នុងតម្លៃ 199 ដុល្លារអាម៉េរិក/អាវ។

ទំព័រ Goal បានឱ្យដឹងថា តម្លៃសំបុត្រចូលមើលការប្រកួតរបស់ក្រុមបាល់ទាត់ Inter Miami បានកើនឡើងជិត 900% ចាប់តាំងពីក្លឹបនេះបានបញ្ជាក់ថា ចុះហត្ថលេខាជាមួយនឹង Messi កាលពីថ្ងៃទី 07 មិថុនា 2023។ នៅក្លឹបថ្មីនេះ កំពូលតារាបាល់ទាត់អាហ្សង់ទីន នឹងទទួលបានប្រាក់បៀវត្សរ៍ពី 50 លាន ដល់ 60 លានដុល្លារ/ឆ្នាំ។ តម្លៃសរុបនៃកិច្ចព្រមព្រៀងរបស់ Messi ក្នុងរយៈពេលពីរឆ្នាំកន្លះ នឹងចាប់ពី 125 លាន ដល់ 150 លានដុល្លារ។

Messi ក៏នឹងទទួលបានប្រាក់ខ្លះពីបណ្ដាគណនីថ្មីដែលចុះឈ្មោះមើល MLS នៅលើ Apple TV ក៏ដូចជាប្រាក់ចំណេញមួយផ្នែករបស់ក្រុមហ៊ុន Adidas នៅសហរដ្ឋអាម៉េរិកផងដែរ។

កាលពីព្រលប់ថ្ងៃទី 16 កក្កដា Messi ត្រូវបាន Inter Miami បង្កើតព្រឹត្តិការណ៍បង្ហាញខ្លួនមួយដែលមានឈ្មោះថា «The Unveil» នៅក្នុងកីឡដ្ឋាន DRV PNK។ នៅទីនេះ ម្ចាស់បាល់មាស 7 គ្រាប់ បានថ្លែងអំណរគុណអ្នកគាំទ្រ មិត្តរួមក្រុមថ្មី និងគណៈគ្រប់គ្រងក្លឹប Inter Miami ចំពោះការទទួលស្វាគមន៍ដ៏អស្ចារ្យនេះ ព្រមទាំងបានសម្ដែងអំពីមហិច្ឆតាចង់យកឈ្នះ ដើម្បីជួយឱ្យក្លឹបនេះរីកចម្រើនបន្តទៀត៕

July 18, 2023

Tesla បង្អួតរថយន្តអគ្គិសនី Cybertruck ដំបូង ក្រោយការពន្យារពេលពីរឆ្នាំ

រថយន្តអគ្គិសនីប្រភេទទ្រុង Cybertruck មួយគ្រឿងដំបូងគេ ត្រូវបានផលិត និងដំឡើងរួចរាល់នៅឯរោងចក្រ Gigafactory របស់ក្រុមហ៊ុន Tesla នៅ Austin រដ្ឋ Texas សហរដ្ឋអាម៉េរិក។

ក្រុមហ៊ុនផលិតរថយន្តអគ្គិសនីអាម៉េរិក Tesla បានបង្ហោះរូបថតមួយសន្លឹកបង្ហាញថា រថយន្តអគ្កីសនីប្រភេទទ្រុងមួយគ្រឿងរបស់ពួកគេ ត្រូវបានផលិតរួចរាល់ អមជាមួយនឹងបុគ្គលិកខ្ទង់រយនាក់ស្ថិតនៅជុំវិញរថយន្ត។

ការផលិត Cybertruck ត្រូវបានពន្យារពេលអស់ពីរឆ្នាំ ដូច្នេះការមើលឃើញរថយន្តដែលត្រូវបានផលិតរួចរាល់នឹងមកនូវភាពធូរស្រាលក្នុងចិត្តសម្រាប់អ្នកដែលបានបញ្ជាទិញ និងកំពុងទន្ទឹងរង់ចាំទទួលទំនិញ។

នាយកប្រតិបត្តិរបស់ Tesla លោក Elon Musk ថ្មីៗនេះបានសន្យាថា ព្រឹត្តិការណ៍ប្រគល់រថយន្តអគ្គិសនីដល់ដៃអតិថិជននឹងត្រូវបានធ្វើឡើងនៅក្នុងត្រីមាសទីបីឆ្នាំនេះ។ ប៉ុន្តែមិនបានលើកឡើងអំពីពេលវេលាជាក់លាក់នៅឡើយ។

Tesla បានបង្ហាញ Cybertruck កាលពីឆ្នាំ 2019 និងកំណត់គោលដៅផលិតក្នុងទ្រង់ទ្រាយធំនៅចុងឆ្នាំ 2021 ប៉ុន្តែកាលបរិច្ឆេទនេះត្រូវបានពន្យារពេលជាច្រើនលើកមកហើយ។

របាយការណ៍នានាបង្ហាញថា Cybertruck របស់ Tesla ត្រូវបានបញ្ជាទិញជាមុនជាងមួយលានគ្រឿង។ Cybertruck មានបីកំណែសម្រាប់ជ្រើសរើស និងមានតម្លៃចាប់ពី 39,900 ដល់ 69,900 ដុល្លារអាម៉េរិក អាស្រ័យទៅលើមុខងារនានារបស់កំណែនីមួយ។

ក៏ប៉ុន្តែ ទិន្នន័យស្ដីពីតម្លៃខាងលើនេះត្រូវបានលុបចេញពីគេហទំព័ររបស់ក្រុមហ៊ុននេះបាត់ទៅហើយ។ មនុស្សជាច្រើនយល់ថា តម្លៃរបស់ Cybertruck នឹងខ្ពស់ជាងតម្លៃដែលបានលុបខាងលើ៕

July 17, 2023

យន្តហោះធ្លាក់បាក់ស្លាបជាពីរ បន្ទាប់ពីអ្នកដំណើរជួយកាច់ចង្កូត ព្រោះពីឡុតជួបបញ្ហាសុខភាពភ្លាមៗ

(សហរដ្ឋអាម៉េរិក) – ពីឡុតយន្តហោះខ្នាតតូចមួយរូប ជួបបញ្ហាសុខភាពភ្លាមៗនៅពេលកំពុងហោះហើរ តែសំណាងល្អដែលបានស្ត្រីជាអ្នកដំណើរជួយបញ្ជាយន្តហោះទៅចុះចតលើកោះនៅ Massachusetts។

បុរសពីឡុតអាយុ 79 ឆ្នាំម្នាក់ កាលពីថ្ងៃទី 15 កក្កដា បើកបរយន្តហោះធុនស្រាល Piper Meridian ស៊េរីឆ្នាំ 2006 ចេញដំណើរពី Westchester រដ្ឋ New York។ ពីឡុតរូបនេះជួបបញ្ហាសុខភាពភ្លាមៗនៅពេលកំពុងបើកបរយន្តហោះចុះចតក្បែរព្រលានយន្តហោះ Martha’s Vineyard នៅទីរួមស្រុក West Tisbury លើកោះ Martha’s Vineyard រដ្ឋ Massachusetts។

នៅចំពោះមុខស្ថានការណ៍គ្រោះថ្នាក់ អ្នកដំណើរតែម្នាក់នៅលើយន្តហោះនេះក៏បានចូលជួយ។ មិនដឹងថា ស្ត្រីអ្នកដំណើរនេះមានបទពិសោធន៍បើកបរយន្តហោះ ឬអត់ ប៉ុន្តែប៉ូលិសនិយាយថា យន្តហោះបានចុះចតលើវាលស្មៅខាងក្រៅផ្លូវរត់របស់យន្តហោះ ធ្វើឱ្យស្លាប់របស់វាត្រូវបាក់ជាពីរ ព្រោះតែបុកទង្គិចនឹងដី។

យោងតាមសមត្ថកិច្ច អ្នកបើកបរយន្តហោះ និងអ្នកដំណើរគឺជាពលរដ្ឋក្នុងរដ្ឋ Connecticut។ សមត្ថកិច្ចមិនបានបង្ហើបឱ្យដឹងអំពីអត្តសញ្ញាណរបស់អ្នកទាំងពីរ ប៉ុន្តែថា ពួកគេត្រូវបានបញ្ជូនទៅកាន់មន្ទីរពេទ្យនៅក្បែរនោះ ហើយករណីនេះកំពុងត្រូវបានប៉ូលិសធ្វើការស៊ើបអង្កេត៕

July 17, 2023

ប្រទេសដែលប្រជាជនប្រើប្រាស់ផ្ទាំងសូឡាច្រើនជាងគេលើពិភពលោក

អត្រានៃការដំឡើងផ្ទាំងសូឡាលើដំបូលផ្ទះនៅប្រទេសអូស្ត្រាលី ជិតឈានដល់កម្រិតកំពូលបំផុត នៅពេលគ្រួសារនានាស្វែងរកវិធីដើម្បីដោះស្រាយបញ្ហាតម្លៃថាមពល។

អូស្ត្រាលីបច្ចុប្បន្នមានអត្រាប្រើប្រាស់ផ្ទាំងសូឡាខ្ពស់ជាងគេលើពិភពលោក ដោយគ្រួសារជិត 1/3 នៅទូទាំងប្រទេសនេះ ប្រើប្រាស់ថាមពលព្រះអាទិត្យ។ សូម្បីតែនៅក្នុងរដូវរងា អគ្គិសនីជាង 25% ដែលប្រើប្រាស់នៅក្នុងបណ្ដារដ្ឋភាគខាងកើត ក៏បានមកពីផ្ទាំងសូឡា។

យោងតាមស្ថិតិរបស់ Green Energy Market (GEM) គ្រួសារ និងក្រុមហ៊ុននានានៅអូស្ត្រាលី បានបន្ថែមផ្ទាំងសូឡាដែលផ្ទាល់ថាមពលអគ្គិសនី 1.46 ជីហ្គាវ៉ាត់នៅក្នុងពាក់កណ្ដាលដើមឆ្នាំនេះ ខ្ពស់ជាង 20% ធៀបនឹងដំណាក់កាលដូចគ្នាក្នុងឆ្នាំកន្លង។ គិតតែក្នុងខែមិថុនា 2023 អគ្គិសនីជិត 250 ម៉េហ្គាវ៉ាត់ ត្រូវបានបន្ថែមពីផ្ទាំងសូឡានៅលើដំបូលផ្ទះ ខ្ពស់ជាង 13.2% បើធៀបនឹងខែមិថុនាឆ្នាំ 2022។

មន្ត្រីនៅ GEM ឱ្យដឹងថា តម្លៃអគ្គិសនីកើនឡើងក្នុងឆ្នាំកន្លង បានជំរុញឱ្យប្រជាជននាំគ្នាសម្រុកទៅទិញផ្ទាំងសូឡា។ ការកើនឡើងនេះអាចជួយឱ្យវិស័យថាមពលបំបែកកំណត់ត្រាស្ដីពីការបន្ថែមអគ្គិសនី 3.2 ជីហ្គាវ៉ាត់ទៅក្នុងបណ្ដាញអគ្គិសនីរបស់អូស្ត្រាលី កាលពីឆ្នាំ 2021៕

July 17, 2023

Messi លេចមុខជាផ្លូវការក្នុងព្រឹត្តិការណ៍បង្ហាញខ្លួនរបស់ក្លឹប Inter Miami

(សហរដ្ឋអាម៉េរិក) – បើទោះជាមានភ្លៀងធំនាំឱ្យព្រឹត្តិការណ៍បង្ហាញវត្តមានជាផ្លូវការត្រូវបានពន្យារពេល ប៉ុន្តែអ្នកគាំទ្រនៅតែមកចូលរួមពេញទីលានដើម្បីទស្សនាទិដ្ឋភាព Lionel Messi បង្ហាញខ្លួននៅក្លឹបបាល់ទាត់ Inter Miami។

ក្លឹប Inter Miami ប្រារព្ធព្រឹត្តិការណ៍បង្ហាញវត្តមាន Messi កាលពីវេលាម៉ោង 18 ថ្ងៃទី 16 កក្កដា (ម៉ោងនៅភាគខាងត្បូងរបស់សហរដ្ឋអាម៉េរិក) នៅក្នុងកីឡដ្ឋាន DRV PNK។ មុនពេលព្រឹត្តិការណ៍ត្រូវបានធ្វើឡើង ភ្លៀងមួយមេធំបានបង្អុរចុះ បណ្ដាលឱ្យមានការកកស្ទះចរាចរណ៍។

ខ្លោងទ្វារទទួលសំបុត្រក៏ត្រូវបានបិទដើម្បីចៀសវាងបញ្ហា។ ដូច្នេះ ទស្សនិកជនស្ទើរតែទាំងអស់បានជាប់នៅខាងក្រៅកីឡាដ្ឋាន។ ក៏ប៉ុន្តែ ទោះជាភ្លៀងខ្លាំងយ៉ាងណាក៏មិនអាចកាត់បន្ថយភាពសប្បាយរីករាយរបស់អ្នកគាំទ្រ។ យោងតាម Daily Mail ជនជាតិអាហ្សង់ទីនប្រហែល 100,000 នាក់កំពុងរស់នៅក្នុងតំបន់ Miami។

ម៉ោងប្រហែលជិត 19 Messi នាំភរិយា Antonella និងកូនៗមកកាន់កីឡដ្ឋាន។ M10 កាន់ដៃកូនប្រុសច្បងអាយុ 10 ឆ្នាំ នៅក្នុងការការពាររបស់បុគ្គលិកសន្តិសុខ។ Mateo អាយុ 7 និង Ciro អាយុ 5 ឆ្នាំ ដើរពីក្រោយជាមួយម្ដាយ។

នៅក្នុងកីឡដ្ឋាន DRV PNK ដែលមាន 18,000 កៅអី ពុំនៅសល់កន្លែងឈរនោះទេ។ គណៈកម្មការរៀបចំត្រូវដំឡើងកន្លែងទស្សនាបន្ថែមដើម្បីឆ្លើយតបនឹងតម្រូវការរបស់អ្នកគាំទ្រ។

Messi បង្ហាញខ្លួននៅក្នុងសំឡេងហ៊ោរបស់អ្នកគាំទ្រ។ គាត់លើកដៃរាគោរពអ្នកគាំទ្រ និងឈានជើងដើរទៅកាន់កន្លែងដែលក្រុមម្ចាស់ក្លឹបកំពុងឈររង់ចាំ។ ប្រធានក្រុមជម្រើសជាតិអាហ្សង់ទីន ងាកមើលទៅកាន់ទស្សនិកជនជាញឹកញាប់ ហាក់ពេញចិត្តនឹងការគាំទ្រដ៏អស្ចារ្យនេះជាខ្លាំង។

Messi ចុះកិច្ចព្រមព្រៀងពីរឆ្នាំកន្លះជាមួយនឹងក្លឹបអាម៉េរិក Inter Miami។ កំពូលតារាបាល់ទាត់វ័យ 36 ឆ្នាំរូបនេះ អាចនឹងបានទាត់លើទីលានម្ចាស់ផ្ទះក្នុងការប្រកួតដំបូងរបស់ខ្លួន យ៉ាងឆាប់ត្រឹមថ្ងៃទី 21 កក្កដាខាងមុខ ដោយត្រូវប៉ះក្រុម Cruz Azul ក្នុងក្របខណ្ឌ Leagues Cup។ តាមគម្រោង នៅថ្ងៃទី 17 កក្កដា 2023 នេះ ក្លឹប Inter Miami នឹងធ្វើសន្និសីទសារព័ត៌មានមួយសម្រាប់ Messi៕

July 17, 2023

រូបភាព Elon Musk កាន់ដៃម្ចាស់ Facebook រត់លើឆ្នេរសមុទ្រ ធ្វើឱ្យអ្នកគាំទ្រចូលចិត្ត

មហាសេដ្ឋីអាម៉េរិក លោក Elon Musk បង្ហាញការពេញចិត្តនឹងរូបថតដែលបង្ហាញពីទិដ្ឋភាពដែលលោកកាន់ដៃមហាសេដ្ឋី Mark Zuckerberg ដែលគូរដោយបច្ចេកវិទ្យាបញ្ញាសិប្បនិម្មិត នៅពេលដែលរឿងរ៉ាវបបួលគ្នាឡើងសង្វៀនប្រកួតកំពុងត្រូវបានសាធារណជនចាប់អារម្មណ៍ខ្លាំង។

កាលពីថ្ងៃទី 14 កក្កដា ជាងថតរូប Julian Van Dieken បានបង្ហោះកម្រងរូបភាពបង្ហាញពីទិដ្ឋភាពមហាសេដ្ឋី Elon Musk និង Mark Zuckerberg សប្បាយរីករាយជាមួយគ្នានៅលើឆ្នេរសមុទ្រ។ Julian Van Dieken ឱ្យដឹងថា រូបភាពនេះគឺជាការរួមផ្សំដោយការប្រើប្រាស់ឧបករណ៍ AI ឈ្មោះ Midjourney, Insight, Adobe Firefly, Photoshop, Dazz Cam និង FaceApp។ នៅក្នុងការស្រមៃរបស់ AI ជំនួសឱ្យការបញ្ចប់ការប្រកួតនៅលើសង្វៀនប្រដាល់ មហាសេដ្ឋីទាំងពីររូបនេះបែរជាសប្បាយរីករាយ ចាប់កាន់ដៃគ្នារត់លេងលើឆ្នេរសមុទ្រដូចគូសង្សារ។

មួយថ្ងៃក្រោយមក គណនី Sir Doge of the coin បានបង្ហោះរូបភាពទាំងនេះជាថ្មីនៅលើ Twitter ហើយក៏ទាក់ទាញអ្នកចូលចិត្តជាង 142 ពាន់លើក, មតិជាង 5 ពាន់លើក និងចែករំលែកបន្តជាង 17 ពាន់លើក។ បច្ចុប្បន្ន កម្រងរូបថតខាងលើរបស់គណនីនេះ មានអ្នកចូលមើលប្រមាណ 8 លានលើក។

ថ្ងៃទី 16 កក្កដា លោក Elon Musk ក៏បានបញ្ចេញមតិជារូបសើចចេញទឹកភ្នែក ទាក់ទាញអ្នកចូលចិត្តបានជិត 13 ពាន់លើក។ អ្នកលេងបណ្ដាញសង្គមជាច្រើនយល់ថា នេះនឹងជាការបញ្ចប់ដ៏សមហេតុផលសម្រាប់ការប្រកួតរបស់មហាសេដ្ឋីទាំងពីររូបនេះ។

ការភ្នាល់ប្រកួតវាយគ្នាលើសង្វៀងប្រដាល់រវាងម្ចាស់ Twitter និងម្ចាស់ Facebook កើតឡើងដោយវិធីចម្លែកខុសគេ។ រឿងរ៉ាវចាប់ផ្ដើមពីពេលលោក Musk និយាយលេងកាលពីថ្ងៃទី 21 មិថុនាថា លោកនឹងទទួលការប្រកួតក្នុងទ្រុងជាមួយម្ចាស់ Facebook។ មួយថ្ងៃក្រោយមក CEO របស់ Meta ដែលជាក្រុមហ៊ុនមេរបស់ Facebook ក៏បានបង្ហោះសារលើ Instagram ថា «បញ្ជូនទីតាំងមកឱ្យខ្ញុំ» ដែលនេះជាសញ្ញាបញ្ជាក់ថា Zuckerberg បានទទួលយកការបបួលប្រកួត។

ក្នុងរយៈពេលច្រើនថ្ងៃក្រោយមកទៀត ព័ត៌មានស្ដីពីការប្រកួតលើសង្វៀនរវាងមហាសេដ្ឋីអាម៉េរិកដើមកំណើតអាហ្វ្រិកខាងត្បូង និងមហាសេដ្ឋីអាម៉េរិកដើមកំណើតជ្វីប ក៏ចាប់ផ្ដើមលេចឡើងជាបន្តបន្ទាប់ ហើយនេះក៏ជាព្រឹត្តិការណ៍ដែលមនុស្សជាច្រើនកំពុងទន្ទឹងរង់ចាំ៕

July 17, 2023

យានអវកាសបីគ្រឿងរបស់អាម៉េរិកដែលនឹងត្រូវដឹកមនុស្សឡើងទៅកាន់ឋានព្រះចន្ទ

ក្រុមហ៊ុនការពារជាតិសហរដ្ឋអាម៉េរិក Lockheed Martin កាលពីថ្ងៃទី 14 កក្កដា បានបង្ហាញរូបថតយានអវកាស Orion 3 គ្រឿងដែលនឹងត្រូវប្រើប្រាស់ក្នុងបេសកកម្មឋានព្រះចន្ទ Artemis II, III និង IV។

«អនាគតរបស់យាន Orion ទំនងជាល្អខ្លាំងណាស់។ ម៉ូឌុលទាំងឡាយដែលនឹងដឹកមនុស្សក្នុងបេសកកម្ម Artemis II, Artemis III និង Artemis IV កំពុងឆ្លងកាត់ដំណាក់កាលផលិតខុសៗគ្នានៅក្នុងមជ្ឈមណ្ឌលអវកាស Kennedy របស់អង្គការណាសា ដើម្បីត្រៀមសម្រាប់ការនាំអវកាសចរត្រលប់ទៅកាន់ឋានព្រះចន្ទ» Lockheed Martin សរសេរនៅលើ Twitter កាលពីថ្ងៃទី 14 កក្កដាដូច្នេះ អមនឹងរូបថតរបស់យានអវកាស Orion។ យានទាំងនេះកំពុងត្រូវបានអភិវឌ្ឍក្រោមការគ្រប់គ្រងរបស់ Lockheed Martin។

ក្នុងបេសកកម្ម Artemis II យានអវកាស Orion គ្រោងនឹងត្រូវបានបាញ់បង្ហោះនៅថ្ងៃទី 11 កុម្ភៈ ឆ្នាំ 2024 នាំយកអ្នកអវកាស 4 នាក់ទៅជាមួយ រួមមាន 3 នាក់មកពីណាសារបស់សហរដ្ឋអាម៉េរិក និងម្នាក់មកពីអង្គការអវកាសកាណាដា។ ចំណែកក្រុមអវកាសចរដែលនឹងចូលរួមក្នុងបេសកកម្ម Artemis III និង Artemis IV មិនទាន់ត្រូវបានបង្ហើបឱ្យដឹងនៅឡើយ។ តាមផែនការ Artemis II នឹងត្រូវបានបាញ់បង្ហោះក្នុងឆ្នាំ 2025 ឬ 2026 អាស្រ័យទៅលើយាន Starship របស់ SpaceX។ Artemis IV គ្រោងនឹងបាញ់បង្ហោះនៅចុងទសវត្សរ៍នេះ។

នៅក្នុងរូបថតខាងលើ ពុំមានយានអវកាស Orion របស់ Artemis I ជាយានដែលបានបំពេញបេសកកម្មឡើងទៅកាន់គន្លងតារាវិថីព្រះចន្ទកាលពីចុងឆ្នាំមុន។ ក្នុងរូបថតនេះក៏មិនមានយាន Orion ដែលត្រូវបានផលិតដំបូង និងជាយានដែលបានហោះជុំវិញផែនដីកាលពីឆ្នាំ 2014 នៅក្នុងជើងហោះហើរសាកល្បង។

ណាសាបានចុះកិច្ចព្រមព្រៀងជាមួយនឹងប្រទេសចំនួន 26 ដើម្បីបង្កើតគោលការណ៍សម្រាប់ការធ្វើដំណើរទៅកាន់ឋានព្រះចន្ទប្រកបដោយសន្តិភាព។ អង្គការអវកាសអឺរ៉ុប និងកាណាដាសុទ្ធតែបានសន្យាផ្គត់ផ្គង់ផ្នែករឹងសម្រាប់ Artemis និង Gateway ជាស្ថានីយអវកាសហោះជុំវិញឋានព្រះចន្ទដែលគ្រោងនឹងត្រូវបាញ់បង្ហោះក្នុងទសវត្សរ៍នេះ៕

July 17, 2023

វីដេអូបកស្រាយអំពីហេតុការណ៍គ្រោះថ្នាក់នាវា Titan ទាក់ទាញអ្នកមើលជាង 14 លានលើក

វីដេអូជាង 6 នាទី បកស្រាយអំពីករណីនាវាមុជទឹក Titan ត្រូវសម្ពាធទឹកគាបរហូតដល់បែកបាក់ខ្ទេចខ្ទី ទាក់ទាញអ្នកចូលមើលបានជាង 14 លាននាក់ បន្ទាប់ពីបានបង្ហោះលើបណ្ដាញសង្គម YouTube កាលពីថ្ងៃទី 01 កក្កដា 2023។

កាលពីថ្ងៃទី 01 កក្កដា គណនី AiTelly បានបង្ហោះវីដេអូដែលមានថេរវេលាជាង 6 នាទី បកស្រាយអំពីហេតុការណ៍គ្រោះថ្នាក់របស់នាវាមុជទឹក Titan ដែលត្រូវបានសម្ពាធទឹកមហាសមុទ្រអាត្លង់ទិកគាបបែកបាក់ខ្ទេចខ្ទីកាលពីខែមិថុនា 2023។ វីដេអូនេះ មានអ្នកចូលមើលជាង 14,148,000 លើក, អ្នកបញ្ចេញមតិជាង 5 ពាន់លើក និងចូលចិត្តជាង 66,000 លើក គិតត្រឹមព្រឹកថ្ងៃទី 17 កក្កដានេះ។

ក្រុមការងាររបស់គណនី AiTelly យកទិន្នន័យពី Google និងគេហទំព័ររបស់ OceanGate ដែលជាក្រុមហ៊ុនគ្រប់គ្រងនាវាមុជទឹក Titan ដើម្បីបង្កើតជាវីដេអូ។ ក្រុមការងារនេះបានចំណាយពេល 12 ម៉ោង នៅក្នុងការធ្វើត្រាប់បែប 3D បង្ហាញអំពីហេតុការណ៍ដែលនាវា Titan ត្រូវរងសម្ពាធទឹកក្នុងជម្រៅ 3,800 ម៉ែត្រ ដែលមានកម្លាំងខ្លាំងជាងប្រហែល 400 ដង ធៀបនឹងសម្ពាធខ្យល់ក្នុងបរិយាកាសរបស់ផែនដី។

វីដេអូនេះផ្ដោតសំខាន់ទៅលើរចនារូបរាងនៃសម្បកខាងក្រៅរបស់ Titan ធ្វើពីសរសៃកាបូន ដែលត្រូវបានចាត់ទុកថាជាមូលហេតុនាំឱ្យនាវានេះត្រូវជួបគ្រោះថ្នាក់។ Titan ត្រូវបានផលិតពីសរសៃកាបូនជំនួសឱ្យដែក និងអាលុយមីញ៉ូម។

សរសៃកាបូនធុនជាងដែកប្រាំដង ប៉ុន្តែនោះមិនមែនជាភាពធុននឹងសម្ពាធនោះឡើយ ដោយវាគ្រាន់តែជួយរក្សាគ្រោងឆ្អឹងមិនឱ្យទាញដាច់ពីគ្នាប៉ុណ្ណោះ។ បញ្ហាប្រេះ រហែកនៃសរសៃកាបូនដែលប្រើសម្រាប់ការផលិតនាវា Titan កើតឡើងយឺតជាង បើធៀបនឹងសរសៃកាបូនសុទ្ធ ព្រោះថា សរសៃកាបូនលើនាវានេះត្រូវបានលាយជាមួយកៅ resin ជាស្រទាប់ៗ។ ដូច្នេះ រចនាសម្ព័ន្ធសរសៃកាបូននៅលើនាវា Titan មិនមែនជាទម្រង់បន្ទះកាបូនសុទ្ធ និងតែមួយស្រទាប់នោះទេ ប៉ុន្តែវាគឺជាទម្រង់ផ្សំរវាងសរសៃកាបូន និងកាវ resin ដែលក្រុមហ៊ុន OceanGate ហៅថា «carbon fiber composite»។

ដោយសារតែជាទម្រង់ល្បាយ ដូច្នេះ ក្នុងរចនាសម្ព័ន្ធសរសៃកាបូននេះក៏មានចន្លោះប្រហោងល្អិតៗដែលកាវ resin មិនអាចលុបបំពេញ និងមិនអាចមើលឃើញពីខាងក្រៅ ថ្វីបើ OceanGate ថា អត្រានៃចន្លោះប្រហោងនេះគឺក្រោម 1% ប៉ុន្តែតួលេខនេះមិនត្រូវបានបញ្ជាក់ច្បាស់លាស់។

ចំណុចប្រេះដ៏ល្អិតនៅក្នុងស្រទាប់សរសៃកាបូនរបស់ Titan ចាប់ផ្ដើមធំឡើងក្នុងល្បឿនយឺតៗ ទៅតាមស្រទាប់សរសៃកាបូននីមួយៗ ហើយវាចេះតែលឿនឡើងៗពីស្រទាប់មួយទៅស្រទាប់មួយទៀត។ ដូច្នេះស្នាមប្រេះនឹងធំឡើងរហូតដល់ធ្វើឱ្យរចនាសម្ព័ន្ធខាងក្នុងបង្អស់ ប្រែជាខ្សោយរហូតដល់ទីបំផុត។

នៅពេលលក្ខខណ្ឌអាក្រក់ទាំងអស់បានប្រមូលផ្ដុំគ្នាពេញលេញ នាវា Titan ក៏ត្រូវសម្ពាធទឹកគាបឱ្យក្រពឹត រួញ បែកបាក់ខ្ទេចខ្ទី បន្ទាប់ពីបានប៉ះទង្គិចនឹងអ្វីមួយនៅបាតសមុទ្រ បណ្ដាលឱ្យមនុស្សទាំង 5 នាក់នៅក្នុងនាវា ត្រូវបាត់បង់ជីវិត៕

July 17, 2023

ប្រព័ន្ធ Li-Fi លឿនជាង Wi-Fi 100 ដង

Li-Fi ដែលជាស្ដង់ដាបញ្ជូនទិន្នន័យដោយមិនប្រើប្រាស់ខ្សែ 802.11bb មានល្បឿន 224 Gb/វិនាទី លឿនជាង 100 ដង បើធៀបនឹង Wi-Fi បច្ចុប្បន្ន។

យោងតាមប្រកាសកាលពីថ្ងៃទី 13 កក្កដា 2023 របស់សមាគមវិស្វករអគ្គិសនី និងអេឡិចត្រូនិច (IEEE) ប្រព័ន្ធ 802.11bb ត្រូវបានដាក់ចូលទៅក្នុងបញ្ជីស្ដង់ដានៃការបញ្ជូនទិន្នន័យតាមអ៊ីនធើណិតដោយមិនប្រើខ្សែប្រភេទថ្មី។ ប្រការនេះនឹងជួយបង្កើនល្បឿននៃការដាក់ពង្រាយ និងការបញ្ចូលស្ដង់ដាបច្ចេកវិទ្យាបញ្ជូនទិន្នន័យថ្មីនេះទៅក្នុងជីវភាពប្រចាំថ្ងៃ។

បច្ចុប្បន្ន ស្ដង់ដាថ្មីបំផុតរបស់ Wi-Fi បានវិវត្តឡើងដល់កម្រិត 802.11be ដែលត្រូវបានហៅថា Wi-Fi 7 ដោយមានល្បឿនខ្ពស់បំផុតត្រឹម 30 Gb/វិនាទី លឿនជាងបីដងធៀបនឹងកម្រិត 9.7 Gb/វិនាទីនៅលើ Wi-Fi 6។ ចំណែកស្ដង់ដា Wi-Fi ដែលពេញនិយមនាបច្ចុប្បន្នគឺ 2.4 GHz និង 5 GHz ដែលមានល្បឿនប្រហែលពី 200 Mb/វិនាទី ទៅ 1.3 Gb/វិនាទី។

ក្នុងគ្រាដែល Wi-Fi ប្រើប្រាស់រលកវិទ្យុ (RF) ដើម្បីបញ្ជូនទិន្នន័យ Li-Fi ឯណោះវិញប្រើប្រាស់បច្ចេកវិទ្យារលកពន្លឺតាមរយៈអំពូលភ្លើង LED។ Li-Fi មិនត្រឹមតែបញ្ជូនទិន្នន័យបានលឿនខ្លាំង (224 Gb/វិនាទី) នោះទេ តែក៏មិនបង្កការរំខានដល់ឧបករណ៍វេជ្ជសាស្ត្រ និងមិនប៉ះពាល់ដល់រលកវិទ្យុដែលមាននាបច្ចុប្បន្ន។

https://www.youtube.com/watch?v=ty1Q_2ORLLk

ទោះជាយ៉ាងណាក៏ដោយ Li-Fi ក៏នៅតែមានចំណុចខ្សោយ។ នៅពេលមានឧបសគ្គដូចជាជញ្ជាំង ឬកន្លែងពុំមានពន្លឺជាដើម ការបញ្ជូនទិន្នន័យក៏ត្រូវជួបបញ្ហា។

មកដល់ពេលនេះ មានក្រុមហ៊ុនមួយចំនួនបានចាប់ផ្ដើមផលិតម៉ូឌុល Li-Fi សម្រាប់បណ្ដាឧបករណ៍បញ្ចេញរលកសញ្ញា និងឧបករណ៍តភ្ជាប់។ ក្នុងនោះ ក្រុមហ៊ុន pureLiFi ផ្គត់ផ្គង់ម៉ូឌុល Light Antenna ONE សម្រាប់បណ្ដា OEM (original equipment manufacturer) ធ្វើការប្រើប្រាស់សាកល្បង និងវាយតម្លៃ។ បណ្ដាឧបករណ៍ Li-Fi ពាណិជ្ជកម្មអាចនឹងបង្ហាញខ្លួនជាលើកដំបូងនៅក្នុងព្រឹត្តិការណ៍តាំងពិព័រណ៍បច្ចេកវិទ្យា MWC 2024 នៅប្រទេសអេស្ប៉ាញនាពេលខាងមុខ៕

July 15, 2023

Tag: 109