109 - La Reine Media

ផ្ទាំងឆត្រខ្នាតយក្សបាំងផែនដីពីព្រះអាទិត្យដើម្បីទប់ទល់នឹងការឡើងកម្ដៅជាសកល

អ្នកស្រាវជ្រាវអាម៉េរិកមួយរូបស្នើឱ្យមានការប្រើប្រាស់ផ្ទាំងឆត្រខ្នាតយក្សដែលភ្ជាប់ជាមួយនឹងអាចម៍ផ្កាយដើម្បីកាត់បន្ថយកម្ដៅពីព្រះអាទិត្យជះមកលើផែនដី ដែលអាចជួយទប់ទល់នឹងបញ្ហាឡើងកម្ដៅនៅទូទាំងសកលលោក។

ផែនដីកំពុងតែឡើងកម្ដៅយ៉ាងឆាប់រហ័ស ហើយអ្នកវិទ្យាសាស្ត្រក៏កំពុងតែអភិវឌ្ឍដំណោះស្រាយដើម្បីបន្ធូរបន្ថយផលប៉ះពាល់នៃការប្រែប្រួលអាកាសធាតុ។ Istvan Szapudi ដែលជាអ្នកស្រាវជ្រាវនៅវិទ្យាស្ថានតារាសាស្ត្រនៃសាកលវិទ្យាល័យ Hawaii បានលើកឡើងនូវដំណោះស្រាយថ្មីសម្រាប់បញ្ហាខាងលើ នោះគឺផ្ទាំងឆត្រខ្នាតយក្សបាំងពន្លឺព្រះអាទិត្យ ដែលភ្ជាប់ទៅនឹងអាចម៍ផ្កាយ។

បច្ចុប្បន្ន ការស្រាវជ្រាវរកបច្ចេកទេសសម្រាប់ប្រើប្រាស់ដំណោះស្រាយរបស់ Istvan Szapudi អាចចាប់ផ្ដើមបាន និងអាចមានប្រសិទ្ធភាពក្នុងរង្វង់តែប៉ុន្មានទសវត្សរ៍ខាងមុខ។ Szapudi បានបរិយាយអំពីដំណោះស្រាយរបស់ខ្លួននៅលើទស្សនាវដ្ដី Proceedings of the National Academy of Sciences, Phys.org កាលពីថ្ងៃទី 31 កក្កដា 2023។

គំនិតស្ដីពីឆត្របាំងព្រះអាទិត្យ កន្លងមកក៏ធ្លាប់ត្រូវបានលើកឡើង ប៉ុន្តែគេត្រូវការផ្ទាំងឆត្រដ៏ធ្ងន់ និងធំមហិមាដើម្បីអាចទប់ទល់នឹងកម្លាំងទំនាញ ក៏ដូចជាទប់ទល់នឹងកម្លាំងខ្យល់បក់បំប៉ើងពីព្រះអាទិត្យ។

ដំណោះស្រាយរបស់ Szapudi គឺ ការប្រើប្រាស់វត្ថុមានទម្ងន់ផ្ទុយដែលត្រូវចងភ្ជាប់ទៅនឹងផ្ទាំងឆត្រ ជួយឱ្យទម្ងន់របស់ផ្ទាំងឆត្រ និងវត្ថុផ្ទុយ ថយចុះប្រហែល 3.5 លានតោន ទាបជាងមួយរយដងបើធៀបនឹងការគណនាអំពីផ្ទាំងចត្រមិនមានវត្ថុសម្រាប់តោង។ គំនិតរបស់ Szapudi គឺការប្រើប្រាស់អាចម៍ផ្កាយដែលមនុស្ស «ចាប់បាន» ធ្វើជាវត្ថុមានទម្ងន់ផ្ទុយ ចៀសវាងការដែលត្រូវបាញ់បង្ហោះច្រើនលើកពីផែនដី។

រចនាសម្ព័ន្ធដូចខាងលើនឹងអាចត្រូវបានធ្វើឡើងយ៉ាងរហ័ស និងមានតម្លៃទាបជាង បើធៀបនឹងការផលិត និងដំឡើងផ្ទាំងឆត្រដទៃ។

Szapudi ចាប់ផ្ដើមជាមួយនឹងគោលដៅកាត់បន្ថយវិទ្យុសកម្មព្រះអាទិត្យឱ្យបាន 1.7%។ នេះគឺជាអត្រាចាំបាច់ដើម្បីទប់ស្កាត់ការឡើងកម្ដៅផែនដីខ្ពស់ដល់ថ្នាក់បង្កើតបានជាគ្រោះមហន្តរាយ៕

August 2, 2023

ត្រូវហូឡង់ផ្ដួលក្នុងលទ្ធផល 0-7 វៀតណាមទទួលស្គាល់ថា «កម្លាំងចិត្តមិនឈ្នះសមត្ថភាព»

(នូវែលសេឡង់) – បន្ទាប់ពីត្រូវក្រុមបាល់ទាត់នារីជម្រើសជាតិហូឡង់ផ្ដួលដោយលទ្ធផល 0-7 នៅជើងចុងក្រោយនៃពូល E នៅរសៀងថ្ងៃទី 01 សីហានេះ គ្រូបង្វឹករបស់វៀតណាមបានទទួលស្គាល់ថា ស្មារតីតែមួយមុខគឺមិនគ្រប់គ្រាន់សម្រាប់ក្រុមវៀតណាមបង្ហាញថ្វីជើងនៅ World Cup នារីឆ្នាំ 2023។

ក្រុមបាល់ទាត់នារីជម្រើសជាតិហូឡង់ គ្រប់គ្រងបាល់បាន 73% និងទាត់ផ្ដាច់បានច្រើនជាងក្រុមវៀតណាមដល់ទៅ 9 ដង ពេលប្រកួតលើទីលាន Forsyth Barr នាថ្ងៃនេះ។ សំណាញ់ទីរបស់វៀតណាមអាចត្រូវរងគ្រាប់បាល់ច្រើនជាងលទ្ធផលដែលបានធ្វើឡើង បើសិនក្រុមកីឡាការិនីហូឡង់ប្រើប្រាស់ឱកាសបានល្អជាងនេះ។

«សមត្ថភាពរបស់វៀតណាមមិនអាចយកទៅប្រៀបស្មើនឹងគេបាន ហើយយើងត្រូវនិយាយថា កម្លាំងមិនដូចចិត្ត។ ក្រុមកីឡាការិនីបានប្រកួតដោយស្មារតីខ្ពស់ ប៉ុន្តែមិនអាចប៉ះប៉ូវសមត្ថភាព ហើយការចាញ់គឺជារឿងស័ក្ដិសម» គ្រូបង្វឹករបស់វៀតណាម លោក Mai Duc Chung ទទួលស្គាល់បន្ទាប់ពីវៀតណាមចាញ់ហូឡង់ 0-7 នៅជើងចុងក្រោយរបស់ពូល E នៅ World Cup នារីឆ្នាំ 2023 នាថ្ងៃទី 01 សីហានេះ។

មុននោះ នៅក្នុងការប្រកួតជើងដំបូងនៅ World Cup នារីរដូវកាលនេះ ក្រុមវៀតណាមក៏បានចាញ់ក្រុមអាម៉េរិក 0-3 រួចហើយក៏បន្តចាញ់ព័រទុយហ្គាល់ 0-2 ទៀត។ ក្រោយបីប្រកួតនេះ វៀតណាមស្ថិតនៅបាតតារាងចំណាត់ថ្នាក់របស់ពូល E ដោយចាញ់ 12 គ្រាប់ និងមិនបានឈ្នះសូម្បីតែមួយគ្រាប់៕

August 1, 2023

ដាំឈូករ័ត្នជាងមួយលានដើមជូនភរិយាសម្រាប់ខួប 50 ឆ្នាំនៃថ្ងៃរៀបការ

លោក Lee Wilson ដាំផ្កាយឈូតរ័ត្នជាង 32 ហិកតា ដែលប្រហាក់ប្រហែលនឹង 1.2 លានដើម ដើម្បីជូនភរិយាសម្រាប់ខួប 50 ឆ្នាំនៃថ្ងៃអាពាហ៍ពិពាហ៍។

«ប្ដីប្រពន្ធខ្ញុំនឹងរម្លឹកខួរ 50 ឆ្នាំនៃថ្ងៃរៀបការនៅថ្ងៃទី 10 សីហា ហើយអ្នកដឹងថា ពេលរស់នៅជាមួយគូជីវិតរហូតដល់ 50 វាមានន័យយ៉ាងណាហើយមែនទេ? ខ្ញុំបានពិចារណាជាច្រើនអំពីរឿងនោះ។ ភរិយារបស់ខ្ញុំតែងចូលចិត្តផ្កាយឈូករ័ត្ន ហើយខ្ញុំគិតថា នេះគឺជាឆ្នាំដែលគួរដាំផ្កានេះ។ ខ្ញុំបានដាំផ្កាជាង 32 ហិកតាសម្រាប់គាត់» លោក Lee Wilson ប្រាប់ ABC News កាលពីថ្ងៃទី 01 សីហាដូច្នេះ។

«រឿងនោះធ្វើឱ្យខ្ញុំមានអារម្មណ៍ពិសេសខ្លាំងណាស់។ មិនអាចមានអំណាយអនុស្សាវរីយ៍ណាដែលល្អជាងចំការឈូករ័ត្នមួយនេះឡើយ» អ្នកស្រី Renee ភរិយារបស់លោក Wilson ថ្លែងដូច្នេះ។

លោក Wilson និងកូនប្រុស បានលួចដាំដើមឈូករ័ត្នតាំងពីខែឧសភា និងលាក់មិនឱ្យអ្នកស្រី Renee ដឹង។ ពេលនេះ ចំការឈូករ័ត្នបានក្លាយជាទន្លេផ្កាដ៏ធំធេង ស្ថិតនៅក្បែរផ្លូវល្បឿនលឿនលេខ 54 និងមានចម្ងាយពីផ្ទះរបស់ពួកគេនៅក្នុងទីក្រុង Pratt រដ្ឋ Kansas ប្រហែល 6.4 គីឡូម៉ែត្រ។

ស្វាមីភរិយាលោក Wilson បាននៅក្បែរគ្នាតាំងពីរៀននៅមធ្យមសិក្សា ហើយការណាត់ជួបគ្នាដំបូងរបស់ពួកគេគឺនៅពេលជិះស្គីជាមួយគ្នា។ លោក Wilson ឱ្យដឹងថា តាំងពីពេលនោះមក លោកជឿថា Renee នឹងក្លាយជាចំណែកមួយនៅក្នុងជីវិតរបស់គាត់៕

August 1, 2023

រកឃើញគ្រាប់ល្អិតយ៉ាងច្រើនដូចវីរុសខ្នាតធំនៅក្នុងព្រៃអាម៉េរិក

ក្រុមអ្នកជំនាញបានរកឃើញគ្រាប់ល្អិតយ៉ាងច្រើនដែលអាចជាប្រភេទវីរុសថ្មីក្នុងដីនៅឯព្រៃ Harvard រដ្ឋ Massachusetts ដោយពួកវាមានលក្ខណៈពិសេសមិនធ្លាប់បានឃើញពីមុនមក។

យោងតាមការសិក្សាស្រាវជ្រាវថ្មីដែលទើបត្រូវបានចុះផ្សាយលើទំព័រ bioRxiv គ្រាប់ល្អិតខ្លះដូចទៅនឹងវីរុស និងមានសម្បកក្រៅដូចរូបផ្កាយ ចំណែកផ្សេងទៀតមានរូបចម្លែកៗមិនធ្លាប់បានឃើញ។

ទោះយ៉ាងណាក៏ដោយ ដោយសារតែក្រុមអ្នកវិទ្យាសាស្ត្រខាងលើមិនបានវិភាគហ្សែន ទើបមិនអាចហៅដោយប្រាកដថា គ្រាប់ល្អិតថ្មីទាំងនេះជាវីរុស បើទោះមានលទ្ធភាពខ្ពស់។ ជំនួសមកវិញ ពួកគេហៅវាថា «គ្រាប់ល្អិតដូចវីរុស» នៅក្នុងលទ្ធផលនៃការសិក្សាស្រាវជ្រាវថ្មី៕

August 1, 2023

PSG ត្រូវផ្ដល់ប្រាក់រង្វាន់នៃភាពស្មោះត្រង់ជាង 40 លានដុល្លារដល់ Mbappe

(បារាំង) – កិច្ចសន្យាបច្ចុប្បន្នរវាងក្លឹបបាល់ទាត់ PSG និង Kylian Mbappe មានលក្ខខណ្ឌមួយចែងថា PSG ត្រូវផ្ដល់ប្រាក់រង្វាន់ពាក់កណ្ដាលក្នុងចំណោម 88 លានដុល្លារអាម៉េរិកសម្រាប់ភាពស្មោះត្រង់របស់ Mbappe បន្ទាប់ពីថ្ងៃទី 31 កក្កដា 2023។

លក្ខខណ្ឌនេះស្ថិតក្នុងកិច្ចព្រមព្រៀងដែលត្រូវបានចុះហត្ថលេខាកាលពីខែឧសភាឆ្នាំ 2022។ កិច្ចព្រមព្រៀងរវាងក្លឹង PSG និង Kylian Mbappe មានសុពលភាពរហូតដល់ខែមិថុនាឆ្នាំ 2024 ហើយប្រាក់ចំណូលសរុបរបស់ Mbappe ឡើងដល់ 220 លានដុល្លារអាម៉េរិក ក្នុងនោះមានជិត 90 លានដុល្លារជាប្រាក់រង្វាន់សម្រាប់ភាពស្មោះត្រង់ និងប្រាក់រង្វាន់ដទៃទៀត។

ប៉ុន្តែ ដើមខែមិថុនា Mbappe បានផ្ញើលិខិតបញ្ជាក់ថា មិនពន្យារសុពលភាពនៃកិច្ចសន្យាឱ្យដល់ខែមិថុនាឆ្នាំ 2024 ដូចគម្រោងដំបូង។ ប្រការនេះធ្វើឱ្យប្រធានក្លឹប លោក Al Khelaifi ខឹង និងសម្រេចចិត្តលក់ Mbappe ក្នុងរដូវក្ដៅនេះ មិនដូច្នោះទេនឹងត្រូវបាត់បង់កីឡាកររូបនេះទទេនៅឆ្នាំក្រោយ។

PSG ក៏បានចាប់ផ្ដើមដាក់សម្ពាធលើ Mbappe ដើម្បីឱ្យកីឡាករបារាំងរូបនេះប្រកាសចាកចេញដោយខ្លួនឯង ក្នុងបំណងរកលេសដើម្បីចៀសវាងកាតព្វកិច្ចត្រូវផ្ដល់ប្រាក់រង្វាន់ទៅតាមកិច្ចព្រមព្រៀង។ ប៉ុន្តែ Mbappe នៅតែបញ្ចេញស្នាមញញឹម និងហាត់ជាមួយក្រុមវ័យក្មេងនៅបារីសដោយការរីករាយ និងមិនបញ្ចេញសញ្ញាណាមួយទាក់ទងនឹងអនាគត។

ការប្រឹងប្រែងលក់ Mbappe របស់ PSG កំពុងប្រឈមនឹងបញ្ហាធំ ដោយសារតែការកំណត់តម្លៃទាបបំផុតត្រឹម 200 លានដុល្លារអាម៉េរិក ខណៈក្លឹប Real មិនចង់ចំណាយប្រាក់ច្រើន។

ក្លឹប Al Hilal សុខចិត្តចំណាយ 330 លានដុល្លារដើម្បីទិញ Mbappe ពី PSG និងប្រាក់បៀវត្សរ៍ 775 លានដុល្លារសម្រាប់ Mbappe ក្នុងរដូវកាល 2023-2024 ព្រមទាំងអនុញ្ញាតឱ្យកីឡាកររូបនេះទៅទាត់ឱ្យ Real នៅរដូវក្ដៅឆ្នាំ 2024។ ក៏ប៉ុន្តែ Mbappe មិនចង់ទៅរស់នៅអារ៉ាប៊ីសាអូឌីត។ Liverpool គឺជាជម្រើសទីបីរបស់ PSG។ PSG ត្រៀមខ្លួនរួចហើយសម្រាប់ការលក់ Mbappe ទៅឱ្យ Liverpool ក្នុងតម្លៃទាបជាងការទាមទារដំបូង។ ប៉ុន្តែ Mbappe នៅតែមិនព្រម ដោយសារតែមិនចង់ទាត់ឱ្យក្លឹបដែលមិនមានសំបុត្រចូលរួមប្រកួតនៅ Champions League នៅរដូវកាលក្រោយ។

បើមិនព្រមចាកចេញនៅរដូវក្ដៅនេះទេ Mbappe អាចនឹងត្រូវ PSG បង្ខំឱ្យធ្វើជាកីឡាករបម្រុងពេញមួយរដូវកាល 2023-2024។ បើសិនជារឿងនេះកើតឡើងមែន វាអាចជារឿងអាក្រក់សម្រាប់ Mbappe។ Mbappe ត្រូវការការប្រកួតបន្តដើម្បីរក្សាឥទ្ធិពលសម្រាប់ទាត់នៅ Euro 2024។ កីឡាករខ្សែប្រយុទ្ធរូបនេះកំពុងកាន់កាប់គ្រាប់បាល់ឈ្នះចំនួន 40 ក្រោយពីបានចូលរួមទាត់ 70 ប្រកួត សម្រាប់ក្រុមជម្រើសជាតិបារាំង ទន្ទឹមនឹងកំណត់ត្រា 212 គ្រាប់ក្នុង 260 ប្រកួត សម្រាប់ក្លឹប PSG។

Mbappe ចូលរួមជាមួយ PSG កាលពីឆ្នាំ 2017 ទៅតាមកិច្ចព្រមព្រៀងខ្ចីពីក្លឹប AS Monaco នៅប្រទេសម៉ូណាកូ៕

August 1, 2023

អាយុរបស់មនុស្សនឹងកើនឡើងដល់ 120 ដោយសារតែបច្ចេកវិទ្យា និងការយល់ដឹង

(ស៊ុយអែត) – អាយុរបស់មនុស្សគ្រោងនឹងកើនឡើងដល់ 120 ក្នុងរយៈពេលប៉ុន្មានទសវត្សរ៍ខាងមុខ ដោយសារតែបច្ចេកវិទ្យា និងចំណេះដឹងដែលបានពីវិបត្តិសុខភាពកូវីដ-19។ល។

បណ្ឌិត Ignat Kulkov នៅសាកលវិទ្យាល័យ Malardalen (MDU) ឱ្យដឹងថា អាយុរបស់មនុស្សអាចឡើងដល់ពី 100 ទៅ 120 នៅក្នុងអំឡុងឆ្នាំ 2070 យ៉ាងហោចណាស់នៅក្នុងបណ្ដាប្រទេសអភិវឌ្ឍ។ នេះគឺជាលទ្ធផលនៃការសិក្សាស្រាវជ្រាវរបស់លោក Kulkov និងសហការីនៅប្រទេសហ្វាំងឡង់ បារាំង និងអង់គ្លេស ហើយត្រូវបានប្រកាសលើទស្សនាវដ្ដីវិទ្យាសាស្ត្រ Futures កាលពីថ្ងៃទី 30 កក្កដា 2023។

យោងតាមបណ្ឌិត Kulkov ពីមួយថ្ងៃទៅមួយថ្ងៃ មានមនុស្សកាន់តែច្រើនដែលពាក់ឧបករណ៍តាមដានសុខភាព។ ឧបករណ៍ទាំងនេះតែងត្រូវបានភ្ជាប់ជាមួយនឹងមន្ទីរពេទ្យ ជួយឱ្យវេជ្ជបណ្ឌិតអាចធ្វើរោគវិនិច្ឆ័យ និងណែនាំប្រកបដោយភាពសុក្រឹតសម្រាប់អ្នកប្រើប្រាស់ និងអ្នកជំងឺ ដែលនាំឱ្យពួកគេកែលំអការរស់នៅ ប្ដូរទម្លាប់មិនល្អសម្រាប់សុខភាពតាំងពីក្មេង ដូច្នេះពួកគេនឹងមានអាយុវែងជាងធម្មតា។

ក្រៅពីនេះ ការរីកចម្រើនរបស់វិស័យដទៃក៏អាចជួយឱ្យមនុស្សរស់បានយូរជាងមុន។ ឧទាហរណ៍ដូចជា វិបត្តិសុខភាពសកលកូវីដ-19 បានជួយឱ្យមនុស្សជាតិយល់ដឹងបន្ថែមអំពីការតាមដានវីរុសប្រកបដោយប្រសិទ្ធភាព។ បច្ចេកវិទ្យា រួមនឹងវិធីសាស្ត្រព្យាបាលបែបទំនើបនានាក៏ត្រូវបានបង្កើតឡើងក្នុងសម័យកូវីដផងដែរ។

តាមជាក់ស្ដែង អាយុរបស់មនុស្សបាន និងកំពុងកើនឡើងនៅក្នុងរយៈពេល 200 ឆ្នាំកន្លង។ កាលពីខែវិច្ឆិកា 2022 មូលនិធិប្រជាជននៃអង្គការសហប្រជាជាតិ បានព្យាករថា អាយុជាមធ្យមរបស់មនុស្សនៅទូទាំងសកលលោកកើតដល់ 77.2 ឆ្នាំនៅឆ្នាំ 2050 ដោយសារតែការរីកចម្រើននៃវិស័យវេជ្ជសាស្ត្រ ដែលក្នុងនោះមានទាំងវ៉ាក់សាំង និងថ្នាំរម្ងាប់មេរោគ ខណៈដែលអនាម័យ ការរស់នៅ ក៏ដូចជាអាហារ និងជីវជាតិក៏ត្រូវបានកែលំអ៕

August 1, 2023

យានអវកាសនៅក្រៅប្រព័ន្ធព្រះអាទិត្យដាច់ទំនាក់ទំនងជាមួយណាសា

បន្ទាប់ពីបានធ្វើឱ្យអង់តែនរបស់យានអវកាស Voyager 2 បែរទិសចេញពីផែនដីដោយអចេតនា ណាសាក៏ត្រូវដាច់ទំនាក់ទំនងជាមួយនឹងយានដែលកំពុងស្ថិតក្នុងតំបន់អន្តរតារាមួយគ្រឿងនេះ យ៉ាងតិចក៏រហូតដល់ថ្ងៃទី 15 តុលា។

ទីភ្នាក់ងារអវកាសអាម៉េរិក (ណាសា) បានដាច់ទំនាក់ទំនងជាបណ្ដោះអាសន្នជាមួយនឹងយានអវកាស Voyager 2 ជាយានដែលហោះឆ្ងាយពីផែនដីបំផុតលំដាប់ទីពីរ ដោយបច្ចុប្បន្នកំពុងផ្លាស់ទីឆ្លងកាត់លំហអវកាសក្នុងតំបន់អន្តរតារា និងមានចម្ងាយពីផែនដីចំនួន 19.9 ពាន់លានគីឡូម៉ែត្រ។ ណាសាឱ្យដឹងថា ពួកគេបានដាច់ទំនាក់ទំនងជាមួយនឹងយាននេះតាំងពីថ្ងៃទី 21 កក្កដា 2023 បន្ទាប់ពីកូដបញ្ជាយានមួយចំនួនបានធ្វើឱ្យអង់តែនរបស់ Voyager 2 ត្រូវបែរល្អៀងពីមុខព្រួញមកកាន់ផែនដីប្រហែល 2 ឌឺក្រេ។

កំហុសខាងលើនេះធ្វើឱ្យណាសាមិនអាចទទួលទិន្នន័យដែលបញ្ជូនមកពី Voyager 2។ យានអវកាសនេះ បច្ចុប្បន្នកំពុងគោចរតែលតោលនៅក្នុងលំហអវកាសងងឹត ក្រោយពីបានហោះផុតពីតំបន់ព្រំដែនខាងក្រៅរបស់ប្រព័ន្ធព្រះអាទិត្យកាលពីខែវិច្ឆិកាឆ្នាំ 2018។

យោងតាមណាសា បញ្ហាដាច់ទំនាក់ទំនងនេះគ្រាន់តែជារឿងបណ្ដោះអាសន្ន។ Voyager 2 ត្រូវបានកំណត់ឱ្យកែតម្រូវទិសរបស់អង់តែនច្រើនដងក្នុងមួយឆ្នាំ ដើម្បីរក្សាទំនាក់ទំនងជាមួយនឹងផែនដី ក្នុងគ្រាដែលវាហោះកាន់តែឆ្ងាយ។ តាមការគ្រោងទុក Voyager 2 នឹងធ្វើការកែតម្រង់ទិសរបស់អង់តែនម្ដងទៀត នៅថ្ងៃទី 15 តុលាឆ្នាំ 2023 ពេលនោះទំនាក់ទំនងរវាងមនុស្សជាមួយនឹងយាននេះនឹងត្រូវបានភ្ជាប់ឡើងវិញ។

យានអវកាស Voyager 1 និង Voyager 2 ត្រូវបានបាញ់បង្ហោះកាលពីខីសីហា និងកញ្ញា ឆ្នាំ 1977 ក្នុងនោះ Voyager 2 ត្រូវបានបាញ់បង្ហោះមុន។

ថាសដែលផ្ទុកសារពីមនុស្សលោកនៅលើយានអវកាស Voyager

យានទាំងពីរនេះសុទ្ធតែបានហោះកាត់ពីមុខបណ្ដាភពដែលនៅជាយប្រព័ន្ធព្រះអាទិត្យ មុនពេលឆ្លងកាត់ព្រំដែនឆ្ងាយបំផុតរបស់តំបន់ហេលីអូស្ពែរ (Heliosphere) ជាស្រទាប់ក្រៅបង្អស់នៃបរិយាកាសព្រះអាទិត្យដែលបែងចែកប្រព័ន្ធព្រះអាទិត្យពីតំបន់អន្តរតារា។

យាន Voyager 1 បានទៅដល់តំបន់អន្តរតារាមុន ដោយបានឆ្លងកាត់ហេលីអូស្ពែរកាលពីខែសីហា 2012។ បច្ចុប្បន្ន យាននេះកំពុងស្ថិតឆ្ងាយពីផែនដី 23.8 ពាន់លានគីឡូម៉ែត្រ។ យោងតាមណាសា យាន Voyager 1 និង Voyager 2 នៅសល់ថាមពលដែលអាចឱ្យប្រើប្រាស់បានរហូតដល់យ៉ាងតិចត្រឹមឆ្នាំ 2025។

បើទោះអស់ថាមពលក៏ដោយ ពួកវានៅតែអាចបន្តបំពេញបេសកកម្មផ្ញើសារទៅកាន់ភាវៈរស់នៅក្នុងប្រព័ន្ធផ្កាយនានា។ ព្រោះថា នៅលើយានទាំងនេះមានបំពាក់ថាសដែលផ្ទុកសារពីមនុស្សលោក ក្នុងនោះមានទាំងសំឡេងនានា និងផែនទីផ្កាយរបស់ផែនដីផងដែរ៕

August 1, 2023

YouTube លុបវីដេអូរាប់ពាន់របស់ឆានែលនៅវៀតណាម ដោយជឿថា បានរំលោភគោលការណ៍

YouTube បានលុបវីដេអូចំនួនរាប់ពាន់ដែលនិយាយអំពីតួអង្គ Wolfoo ដោយសារមានការតវ៉ាថា បានរំលោភកម្មសិទ្ធិបញ្ញារបស់ Peppa Pig ប៉ុន្តែខាងក្រុមហ៊ុនវៀតណាមថា មិនបានធ្វើខុសគោលការណ៍។

Sconnect ជាក្រុមហ៊ុនផលិតវីដេអូរបស់វៀតណាម ដែលនៅពីក្រោយតួអង្គភាពយន្តគំនូរជីវចល Wolfoo យល់ថា YouTube បានលុបវីដេអូទាំងនេះដោយខុសច្បាប់ បណ្ដាលឱ្យឆានែលនានារបស់ក្រុមហ៊ុននេះ ត្រូវបាត់បង់វីដេអូជាង 3,000 និងចំនួនអ្នកចូលមើលរាប់ពាន់លានលើក។

ក្នុងរបាយការណ៍ដែលបានផ្ញើលទៅកាន់អាជ្ញាធរវៀតណាមកាលពីចុងខែកក្កដា Sconnect ឱ្យដឹងថា បណ្ដាវីដេអូរបស់ពួកគេត្រូវបានបណ្ដាញសង្គមរបស់ Google លុបចោលដោយលើកហេតុផលថា បានរំលោភលើគោលការណ៍កម្មសិទ្ធិបញ្ញាស្ដីពីរូបភាព និងសំឡេង។ ភាគីដែលបានរាយការណ៍ទៅ YouTube គឺ Entertainment One (EO) ដែលជាក្រុមហ៊ុននៅពីក្រោយតួអង្គគំនូរជីវចលជ្រូក Peppa។

យោងតាម Sconnect ទាំង EO ទាំង YouTube សុទ្ធតែមិនបានលើកឡើងភ័ស្ដុតាងច្បាស់លាស់ដែលបង្ហាញថា បណ្ដាវីដេអូ Wolfoo បានរំលោភលើគោលការណ៍កម្មសិទ្ធិរូបភាព និងសំឡេងនៅក្នុងវីដេអូរបស់ Peppa Pig។ ក្រៅពីនេះ សំឡេង និងរូបភាពទាំងនេះក៏សុទ្ធតែមាននៅក្នុងជីវភាពប្រចាំថ្ងៃ។

ក្រុមហ៊ុនវៀតណាមខាងលើឱ្យដឹងថា បានផ្ញើការតវ៉ានេះទៅកាន់តំណាង YouTube តាំងពីខែមិថុនា ប៉ុន្តែក្រោយរយៈពេលជាងមួយខែ នៅតែមិនទាន់ទទួលបានចម្លើយ។ ចំណែកចំនួនវីដេអូដែលត្រូវបានលុប និងមិនអាចស្ដារឡើងវិញបាន នៅតែបន្តកើនឡើង គ្រាដែលឆានែលជាច្រើនមិនអាចបង្ហោះវីដេអូថ្មី បង្កឱ្យមានការខាតបង់យ៉ាងធ្ងន់ធ្ងរ។

យោងតាមការគណនានៅលើទំព័រ SocialBlade ឆានែល Wolfoo Family របស់ Sconnect បានបត់បង់ចំនួនអ្នកចូលមើលអស់ប្រហែល 2.4 ពាន់លានលើក ក្រោយពីវីដេអូនានារបស់ឆានែលនេះត្រូវបានលុបកាលពីខែឧសភា 2023។

ក្នុងពេលដែលអាជ្ញាធរវៀតណាមកំពុងរកដំណោះស្រាយ ភាគីខាង YouTube និង EO មិនទាន់បញ្ចេញប្រតិកម្មអ្វីនៅឡើយ ទាក់ទងនឹងការតវ៉ារបស់ Sconnect៕

August 1, 2023

ភ្ញាក់ផ្អើលខ្លាំងពេលអាវធ្លាប់ពាក់លេងពីក្មេង បែរជាមានតម្លៃខ្ពស់បែបនេះ

កាលពីថ្ងៃអាទិត្យ (30 កក្កដា) ភ្ញៀវដែលចូលរួមកម្មវិធី Antiques Roadshow (កម្មវិធីវាយតម្លៃវត្ថុបុរាណរបស់ BBC 1 នៅប្រទេសអង់គ្លេស) បានមានឱកាសទស្សនាវត្ថុនានាដែលភ្ញៀវទាំងឡាយបាននាំយកមកទីនេះ។

យោងតាម Daily Mail ព្រឹត្តិការណ៍វាយតម្លៃវត្ថុបុរាណត្រូវបានធ្វើឡើងនៅឯវិមាន Ham House ក្នុងតំបន់ Richmond ក្បែរទន្លេ Thames នៃទីក្រុងឡុងដ៍ ដែលសាងសង់តាំងពីសតវត្សរ៍ទី 17 ដោយមានការចូលរួមរបស់អ្នកជំនាញខាងវត្ថុបុរាណ Lee Young។

គូស្វាមីភរិយាវ័យចំណាស់មួយគូ បាននាំយកអាវសម្រាប់រាជវង្សានុវង្សនៅប្រទេសចិនតាំងពីបុរាណ មកឱ្យអ្នកជំនាញ Lee Young ធ្វើការពិនិត្យ និងវាយតម្លៃ។

យោងតាមបុរសជាស្វាមី ភូសា (អាវ) នេះគឺជាវត្ថុដែលត្រូវបានជីតារបស់ភរិយាគាត់ (ជាអ្នកដែលធ្លាប់កាន់តំណែងនាយកប្រតិបត្តិរបស់ធនាគារ Standard នៅប្រទេសឥណ្ឌា) នាំយកមកកាន់ប្រទេសអង់គ្លេស កាលពីដើមទសវត្សរ៍ឆ្នាំ 1930 នៃសហស្សវត្សរ៍មុន។

អ្នកស្រី Sara ភរិយារបស់បុរសខាងលើ ឱ្យដឹងថា អ្នកស្រីបានរក្សាទុកអាវក្រៅនេះនៅក្នុងប្រអប់ដាក់សម្លៀកបំពាក់ ហើយកាលពីនៅក្មេង គាត់តែងតែយកវាមកពាក់លេង។

«អាវនេះត្រូវបានផលិតឡើងក្នុងអំឡុងទសវត្សរ៍ឆ្នាំ 1750 ដែលពិតជាភូសាសម្រាប់រាជវង្សានុវង្ស។ វាជាអាវក្រៅសម្រាប់ស្ត្រី ហើយអាវធំដែលត្រូវបានផលិតឡើងកាលពីអំឡុងទសវត្សរ៍ឆ្នាំ 1750 គឺជាវត្ថុដ៏កម្រ។ អាវបែបនេះមាននៅសល់តែប៉ុន្មានឈុតប៉ុណ្ណោះ។ បើតាមខ្ញុំដឹង ដើម្បីបានមើលភូសាប៉ុន្មានឈុតនោះ អ្នកត្រូវធ្វើដំណើរទៅកាន់រដ្ឋធានីប៉េកាំង និងសារមន្ទីរវាំងចាស់។ វាពិតជាវត្ថុដែលមានតែនៅក្នុងសារមន្ទីរ» អ្នកជំនាញ Lee បន្ថែមដូច្នេះ។

យោងតាមលោក Lee ពណ៌លឿងរបស់ភូសានេះគឺជាពណ៌សម្រាប់តែមហេសីស្ដេច ឬស្នំដែលមានឋានៈខ្ពស់។ រូបភាពនាគមានក្រញ៉ាំជើងប្រាំនៅលើភូសា ក៏ជានិមិត្តរូបបង្ហាញថា វាជាវត្ថុសម្រាប់រាជវង្សានុវង្ស។

ប្រការដែលអ្នកជំនាញ Lee Young ត្រៀមនឹងប្រកាស ធ្វើឱ្យម្ចាស់អាវនេះមិនភ្ញាក់ផ្អើលមិនបាន។ «បើសិនយកទៅលក់ដេញថ្លៃក្នុងទីផ្សារនាបច្ចុប្បន្ន ភូសានេះនឹងអាចលក់បានក្នុងតម្លៃ 200,000 ផោន (ប្រហែល 256.000 ដុល្លារអាម៉េរិក)» លោក Lee បញ្ជាក់ដូច្នេះ។

ស្ដាប់ដល់ត្រឹមនេះ អ្នកស្រី Sara មានការភ្ញាក់ផ្អើលខ្លាំង និងនិយាយថា «ពិតជាភ្ញាក់ផ្អើលណាស់។ ព្រះអឺយ! សូមអរគុណលោកច្រើនណាស់។ ពួកយើងប្រាកដជាលែងដាក់វាទៅក្នុងប្រអប់សម្លៀកបំពាក់ទៀតហើយ»៕

August 1, 2023

ប្រហោងខ្មៅខ្នាតយក្សបាញ់ចង្កោមថាមពលកម្រិតខ្ពស់សំដៅចំផែនដី

បេសកកម្មមួយរបស់ណាសា ធ្វើការសង្កេតមើលប្រហោងខ្មៅ (Black Hole) ខ្នាតយក្សមួយដែលបាញ់ចង្កោមរលកថាមពលកម្រិតខ្ពស់សំដៅចំផែនដីពីចម្ងាយ 400 លានឆ្នាំពន្លឺ។

បណ្ដាប្រហោងខ្មៅធំៗដែលកំពុងធ្វើសកម្មភាព ហើយមានថាសវត្ថុធាតុវិលជុំវិញ គេហៅថា Accretion disk (ថាសបន្ថែមថាមពល) ដែលជាប្រភព «ចំណី» សម្រាប់ការពង្រីកមាឌរបស់ប្រហោងខ្មៅ។ វត្ថុធាតុខ្លះដែលប្រហោងខ្មៅមិនអាចលេបបានទាំងអស់ ក៏ត្រូវបានបញ្ជូនទៅកាន់ប៉ូលនានា ហើយក្រោយមកក៏បាញ់ចេញទៅក្រៅក្នុងល្បឿនជិតស្មើនឹងល្បឿនពន្លឺ។

ដំណើរការខាងលើនេះ បង្កើតបានជាវិទ្យុសកម្មអេឡិចត្រូម៉ាញ៉េទិចដែលមានពន្លឺភ្លឺខ្លាំង និងមានថាមពលខ្ពស់។ នៅក្នុងករណីដែលណាសាទើបតែបានរកឃើញនាពេលថ្មីៗនេះ ចង្កោមពន្លឺកំពុងជះមកកាន់ផែនដីនៅក្នុងព្រឹត្តិការណ៍ដែលអ្នកវិទ្យាសាស្ត្រហៅថា blazar។ នេះបើតាម Live Science ចុះផ្សាយកាលពីថ្ងៃទី 30 កក្កដា 2023។

រូបភាពបង្ហាញពីចង្កោមពន្លឺដែលជះពី blazar Markarian 421

Blazar ដែលមានឈ្មោះថា Markarian 421 ស្ថិតនៅក្នុងកញ្ចុំផ្កាយ Ursa Major ត្រូវបានសង្កេតដោយបេសកកម្ម Imaging X-ray Polarimetry Explorer (IXPE) របស់ណាសា ដែលត្រូវបានបាញ់បង្ហោះកាលពីឆ្នាំ 2021។

ចង្កោមពន្លឺ blazar ខាងលើ អូសបន្លាយយ៉ាងវែងនៅក្នុងទីអវកាសក្នុងរយៈចម្ងាយរាប់លានឆ្នាំពន្លឺ ប៉ុន្តែដើមហេតុដែលបង្កើតវាឡើង មិនទាន់ត្រូវបានដឹងច្បាស់នៅឡើយ។

អ្នកវិទ្យាសាស្ត្រក៏គ្រោងនឹងបន្តសង្កេតមើល Markarian 421 ក៏ដូចជាកំណត់អត្តសញ្ញាណរបស់ balzar ដទៃទៀតដែលមានចំណុចពិសេសដូចគ្នា Markarian 421 ដើម្បីស្វែងយល់អំពីយន្តការនៅពីក្រោយបាតុភូតនេះ៕

July 31, 2023

Tag: 109