អំបិល - La Reine Media

ទឹកធ្លាក់ក្នុងជ្រោះធំជាងគេលើពិភពលោក ធ្លាក់យឺតជាងមនុស្សដើរទៅទៀត

ជ្រោះទឹកធ្លាក់មួយស្ថិតនៅក្រោមឈូងសមុទ្រដាណឺម៉ាក មានកម្ពស់រហូតដល់ 3,500 ម៉ែត្រ ខ្ពស់ជាង Angel ដែលជាជ្រោះទឹកធ្លាក់ធំបំផុតនៅលើដីគោក ដែលស្ថិតក្នុងប្រទេសវ៉េណេស៊ុយអេឡា។

Angel គឺជាជ្រោះទឹកធ្លាក់ខ្ពស់ជាងគេលើដីគោក ដោយមានកម្ពស់ 979 ម៉ែត្រ និងបាតមានទទឹងប្រវែង 150 ម៉ែត្រ ប្រហាក់ប្រហែលនឹងតួ Eiffel ចំនួនបីដាក់ត្រួតលើគ្នា។ ប៉ុន្តែ Angel មិនមែនជាជ្រោះទឹកធ្លាក់ដែលធំជាងគេលើពិភពលោក។ ចំណាត់ថ្នាក់នេះបានទៅលើជ្រោះទឹកធ្លាក់នៅឈូងសមុទ្រដាណឺម៉ាក ដោយមានទឹកធ្លាក់ចុះក្រោមឈូងសមុទ្រនៅចន្លោះ ហ្គ្រោអង់ឡង់ (ហ្គ្រីនលែនដ៍ – Greenland) និងអ៊ីស្លង់ ដែលនេះមានន័យថា ជ្រោះទឹកធ្លាក់ធំ និងខ្ពស់ជាងគេលើពិភពលោកនេះ គឺស្ថិតក្រោមសមុទ្រ។

ក៏ប៉ុន្តែ បើទោះជាទឹកនៅឯជ្រោះទឹកធ្លាក់នេះមានកម្ពស់ជាង 3,500 ម៉ែត្រនេះ ប៉ុន្តែទឹកដែលហូរច្រាលមានកម្ពស់ប្រហែល 2,000 ម៉ែត្រប៉ុណ្ណោះ ហើយធ្លាក់ក្នុងល្បឿនប្រហែលតែ 0.5 ម៉ែត្រ/វិនាទី យឺតជាងបើធៀបនឹងល្បឿននៃការដើរដោយថ្មើរជើង និងយឺតជាងឆ្ងាយបើធៀបនឹងល្បឿនទឹកធ្លាក់របស់ជ្រោះ Niagara (109 គីឡូម៉ែត្រ/ម៉ោង) ឬ 30.5 ម៉ែត្រ/វិនាទី។ មូលហេតុដែលទឹកជ្រោះនេះធ្លាក់ក្នុងល្បឿនមហាយឺតដូច្នេះ គឺដោយសារវាស្ថិតក្រោមទឹកសមុទ្រ និងធ្លាក់ទៅក្នុងបឹងជ្រៅមួយដែលមានទឹកត្រជាក់ខ្លាំង និងខាប់ព្រោះមានជាតិអំបិលកម្រិតខ្ពស់។

ជ្រោះទឹកធ្លាក់ធំ និងខ្ពស់ជាងគេលើពិភពលោកនេះ មានឈ្មោះថា Denmark Strait Cataract ។

April 23, 2024

កាត់បន្ថយកម្ដៅលើផែនដី ដោយការបាញ់អំបិលទៅកាន់អាកាស

កាលពីពេលថ្មីៗនេះ បច្ចេកវិទ្យាបង្កើនពន្លឺពពក ត្រូវបានធ្វើតេស្តជាលើកដំបូង ក្នុងបរិយាកាសខាងក្រៅ នៅសហរដ្ឋអាម៉េរិក។

ព្រឹកថ្ងៃទី 3 មេសា ឆ្នាំ 2024 ប្រព័ន្ធម៉ាស៊ីនបាញ់ភាគល្អិតអំបិល អមនឹងបច្ចេកវិទ្យាឆ្លាតវៃជាច្រើន ទៀត ត្រូវបានដំឡើងលើនាវា Hornet។ ផ្សែងភាគល្អិតអំបិលក៏ត្រូវបានបាញ់ឡើងទៅក្នុងអាកាសជាលើកដំបូង។ ការសាកល្បងនេះនឹងបើកផ្លូវសម្រាប់បច្ចេកវិទ្យាមួយដ៏មានសក្ដានុពល ជួយកាត់បន្ថយស្ថានភាពកើនឡើងកម្ដៅនៅទូទាំងសកលលោក។

វិធីសាស្ត្រនេះជួយឱ្យពពកមានពន្លឺជាងធម្មតា និងចាំងប្លាតវិទ្យុសកម្មព្រះអាទិត្យឱ្យត្រលប់ទៅកាន់ទីអវកាសបានច្រើនជាងមុន ដែលនេះនឹងជួយឱ្យផែនដីបានត្រជាក់ជាងមុន។ នេះបើតាមសារព័ត៌មាន New York Times។

យោងតាម New York Times ក្រុមអ្នកវិទ្យាសាស្ត្រនឹងត្រូវចំណាយពេលច្រើនខែដើម្បីវិភាគ។ ក៏ប៉ុន្តែ លទ្ធផលនៃការវិភាគនឹងជួយឱ្យអ្នកវិទ្យាសាស្ត្រដឹងថា តើបច្ចេកទេសបង្កើនពន្លឺពពកលើមហាសមុទ្រ មានប្រសិទ្ធភាព ឬអត់។ Robert Wood ប្រធានក្រុមស្រាវជ្រាវអំពីសមុទ្រប្រចាំសាកលវិទ្យាល័យ Washington ឱ្យដឹងដូច្នេះ។

Robert Wood យល់ថា អ្នកវិទ្យាសាស្ត្រអាចនឹងត្រូវចំណាយពេលមួយទសវត្សរ៍បន្ថែមទៀត ដើម្បីសាកល្បងបច្ចេកវិទ្យានេះ មុននឹងប្រើប្រាស់បច្ចេកវិទ្យាបង្កើនពន្លឺពពកទ្រង់ទ្រាយធំជាផ្លូវការ ដើម្បីបញ្ចុះកម្ដៅផែនដី៕

April 8, 2024

ប្រទេសស្វ៊ីស លុបចោលពន្ធនាំចូលទំនិញឧស្សាហកម្មជាផ្លូវការ

ចាប់ពីថ្ងៃទី 01 មករា 2024 ផលិតផលឧស្សាហកម្មនានាត្រូវបានលើកលែងពន្ធនាំចូលទៅកាន់ប្រទេសស្វ៊ីសជាផ្លូវការ បើទោះមានប្រភពមកពីប្រទេសណាក៏ដោយ។ នេះគឺជាគោលនយោបាយពាណិជ្ជកម្មសំខាន់ដែលត្រូវបានប្រទេសនេះអនុវត្ត បន្ទាប់ពីបានសិក្សា និងត្រៀមខ្លួនអស់ជាច្រើនឆ្នាំ។

នៅប្រទេសស្វ៊ីស ផលិតផលឧស្សាហកម្មនានាដែលរួមមាន បណ្ដាផលិតផលិតមិនទាន់សម្រេចដែលប្រើប្រាស់សម្រាប់ការផលិត មានដូចជា វត្ថុធាតុដើម ផលិតផលពាក់កណ្ដាលសម្រេច គ្រឿងម៉ាស៊ីន អំបិល និងអំបិលឧស្សាហកម្ម ក៏ដូចជាយានជំនិះ សម្ភារប្រើប្រាស់ក្នុងផ្ទះ សម្លៀកបំពាក់ជាដើម។

ក៏ប៉ុន្តែ ផលិតផលកសិកម្ម រួមមានដូចជា សត្វ និងរុក្ខជាតិរស់ អាហារ កសិផលកែច្នៃ គ្រាប់ពូជ ចំណីសត្វ និងត្រីជាដើម មិនត្រូវបានចាត់ទុកជាផលិតផលឧស្សាហកម្ម។ ដូច្នេះ ពន្ធនាំចូលនៅតែត្រូវបានអនុវត្តសម្រាប់ផលិតផលទាំងនេះ។

ការលើកលែងពន្ធនាំចូលទំនិញឧស្សាហកម្មនេះ មិនធ្វើឱ្យមានការប្រែប្រួលក្នុងដំណើរការត្រួតពិនិត្យរបស់គយ។ អ្នកនាំចូលនៅតែត្រូវបំពេញបែបបទ និងទូទាត់ការចំណាយនានា និងថ្លៃសេវាដែលកើតមាននៅពេលនាំចូល រួមទាំងអាករលើតម្លៃបន្ថែម (VAT) ផងដែរ។

ការសម្រេចលើកលែងពន្ធនាំចូលលើទំនិញឧស្សាហកម្ម ត្រូវបានសភាប្រទេសស្វ៊ីសលើកឡើងកាលពីឆ្នាំ 2021 តាមរយៈការធ្វើវិសោធនកម្មច្បាប់ស្ដីពីគយ។ នៅក្នុងកិច្ចប្រជុំរបស់រដ្ឋាភិបាលកាលពីខែកុម្ភៈ 2022 រដ្ឋាភិបាលស្វ៊ីសបានសម្រេចដាក់ឱ្យអនុវត្តច្បាប់នេះចាប់ពីថ្ងៃទី 01 មករា 2024។

បន្ទាប់ពីច្បាប់នេះចាប់ផ្ដើមមានសុពលភាព អាជ្ញាធរស្វ៊ីសនឹងតាមដានផលប៉ះពាល់របស់គោលនយោបាយនេះទៅលើតម្លៃទំនិញក្នុងស្រុក។

ក្នុងដំណាក់កាលត្រៀមខ្លួន រដ្ឋាភិបាលស្វ៊ីស បានធ្វើការសិក្សាស្វែងយល់អំពីផលប៉ះពាល់នៃការលុបបំបាត់ពន្ធនាំចូលទំនិញឧស្សាហកម្ម។ យោងទៅលើទិន្នន័យពាណិជ្ជកម្មរបស់ឆ្នាំ 2016 គោលនយោបាយថ្មីនេះនឹងនាំមកនូវផលចំណេញប្រហែលមួយពាន់លានដុល្លារអាម៉េរិក ដល់សេដ្ឋកិច្ចជាតិ៕

January 4, 2024

បឹងទឹកប្រៃធំបំផុតប្រចាំមជ្ឈិមបូព៌ា បានរីង និងក្លាយជាវាលស្រែអំបិល

រូបភាពពីផ្កាយរណបបង្ហាញថា បឹងទឹកប្រៃ Urmia ពេញដោយទឹកកាលពីខែកញ្ញា 2020 ប៉ុន្តែមកដល់ខែកញ្ញាឆ្នាំនេះ បឹងមួយនេះហាក់បានក្លាយជាវាលស្រែអំបិលដ៏ធំធេង។

ដោយមានផ្ទៃក្រឡាប្រហែល 5,200 គីឡូម៉ែត្រការ៉េ បឹង Urmia នៅភាគពាយព្យនៃប្រទេសអ៊ីរ៉ង់ គឺជាបឹងធំបំផុតប្រចាំតំបន់មជ្ឈិមបូព៌ា និងជាបឹងមួយក្នុងចំណោមបឹងទឹកប្រៃធំបំផុតលើពិភពលោក នៅក្នុងអំឡុងពេលមានភ្លៀងធ្លាក់ច្រើន។

ប៉ុន្តែ ពេលនេះ បឹង Urmia ហាក់បានក្លាយជាវាលស្រែអំបិលដ៏ធំធេង។ ភាពខុសគ្នានេះបានបង្ហាញច្បាស់នៅក្នុងរូបភាពពីផ្កាយរណប Landsat 8 កាលពីខែកញ្ញា 2020 និងរូបភាពពីផ្កាយរណប Landsat 9 កាលពីខែកញ្ញា 2023។

ឆ្នាំ 1995 បឹង Urmia មានទឹកក្នុងបរិមាណច្រើន ប៉ុន្តែក្នុងពីរទសវត្សរ៍បន្ទាប់ កម្រិតទឹកក្នុងបឹងនេះបានថយចុះជាង 7 ម៉ែត្រ ដោយបានបាត់បង់ទឹកអស់ប្រហែល 90% ធៀបនឹងផ្ទៃបឹងទាំងមូលនៅមុននោះ។

គ្រោះរាំងស្ងួតបន្តបន្ទាប់ ក៏ដូចជាការប្រើប្រាស់ទឹកសម្រាប់កសិកម្ម និងការសាងសង់ទំនប់នៅតាមដងទន្លេនានាដែលជាប្រភពទឹកសម្រាប់បឹង Urmia គឺជាកត្តាសំខាន់ដែលបានរួមចំណែកនាំឱ្យទឹកត្រូវអស់ពីបឹង៕

October 17, 2023

ឥន្ធនៈរាវប្រភេទថ្មីមានសមត្ថភាពទប់ស្កាត់ការឆាបឆេះ

(សហរដ្ឋអាម៉េរិក) – ក្រុមវិស្វករនៅសាកលវិទ្យាល័យ California Riverside អភិវឌ្ឍឥន្ធនៈរាវដែលឆេះតែនៅពេលមានអគ្គិសនីឆ្លងកាត់ ជួយកាត់បន្ថយហានិភ័យកើតមានអគ្គិភ័យ។

ភាពងាយឆាបឆេះរបស់ឥន្ធនៈធ្វើឱ្យអគ្គិភ័យក្លាយជាហានិភ័យដ៏ធំចំពោះវិស័យឧស្សាហកម្មនេះ។ ក្រុមវិស្វករនៅសាកលវិទ្យាល័យ California Riverside អភិវឌ្ឍឥន្ធនៈរាវប្រឆាំងអគ្គិភ័យ ជួយកាត់បន្ថយហានិភ័យកើតមានអគ្គិភ័យក្នុងពេលដឹកជញ្ជូន។ យោងតាម Interesting Engineering ដែលចុះផ្សាយកាលពីថ្ងៃទី 04 តុលា 2023 ឱ្យដឹងថា លទ្ធផលនៃការស្រាវជ្រាវនេះត្រូវបានប្រកាសលើទស្សនាវដ្ដី Journal of the American Chemical Society។

ឥន្ធនៈថ្មីនេះនឹងឆេះលុះណាតែមានចរន្តអគ្គិសនីឆ្លងកាត់ប៉ុណ្ណោះ។ «ប្រភេទឥន្ធនៈដែលយើងប្រើរាល់ថ្ងៃ មិនមានសុវត្ថិភាពប៉ុន្មាននោះទេ។ វាហួតជាចំហាយ អាចឆាបឆេះ ហើយអណ្ដាតភ្លើងនោះមិនងាយនឹងពន្លត់។ នឹងមានភាពសាមញ្ញជាងមុន បើសិនគ្រប់គ្រងបានលទ្ធភាពឆាបឆេះរបស់ឥន្ធនៈ និងទប់ស្កាត់ការឆេះតាមរយៈការលុបបំបាត់តង់ស្យុងអគ្គិសនី» Yujie Wang អ្នកស្រាវជ្រាវមួយរូបមកពីសាកលវិទ្យាល័យ California Riverside ឱ្យដឹងដូច្នេះ។

ឥន្ធនៈថ្មីនេះមានប្រភពពីធាតុរាវអ៊ីយ៉ុង ដែលជាអំបិលរាវមួយប្រភេទ។ «វាដូចទៅនឹងអំបិលដែលយើងប្រើប្រាស់សម្រាប់បង់ក្នុងអាហារ គឺ សូដ្យូមក្លរួ។ អំបិលដែលយើងប្រើប្រាស់ក្នុងគម្រោងនេះមានពិន្ទុក្ដៅរលាយទាបជាងអំបិលនៅផ្ទះបាយ សម្ពាធទាបបន្តិច និងជាសរីរាង្គទាំងស្រុង» Wang និយាយដូច្នេះ។

ដើម្បីអភិវឌ្ឍឥន្ធនៈនេះ ក្រុមស្រាវជ្រាវបានប្ដូររូបមន្តរបស់ធាតុរាវអ៊ីយ៉ុង ដោយការប្រើប្រាស់ perchlorate ជំនួសឱ្យ chlorine។ ក្រោយមកពួកគេពិសោធដើម្បីឱ្យដឹងថា ធាតុរាវថ្មីអាចឆេះឬអត់ នៅពេលប៉ះនឹងភ្លើង។

លទ្ធផលបង្ហាញថា ឥន្ធនៈនេះមិនឆាបឆេះ។ អ្នកស្រាវជ្រាវពន្យល់ថា ជាធម្មតា ភ្លើងនឹងឆេះឡើងនៅពេលឥន្ធនៈងាយឆាបឆេះបានក្លាយជាឧស្ម័ន និងមានអុកស៊ីសែនក្នុងសីតុណ្ហភាពខ្អស់។

បន្ទាប់មក ក្រុមស្រាវជ្រាវក៏បានវាយតម្លៃលើប្រសិទ្ធភាពរបស់ឥន្ធនៈថ្មី ដោយការពិសោធជាមួយនឹងតង់ស្យុងអគ្គិសនី។ ក្នុងករណីនេះ វាបានឆាបឆេះ។

អ្វីដែលពិសេសជាងនេះរបស់ធាតុរាវអ៊ីយ៉ុងកែច្នៃនេះគឺសមត្ថភាពលាយបញ្ចូលគ្នាជាមួយនឹងឥន្ធនៈធម្មតា តែនៅរក្សាបានលក្ខណៈដើម។

តាមទ្រឹស្ដី ឥន្ធនៈរាវអ៊ីយ៉ុងថ្មីនេះអាចប្រើប្រាស់សម្រាប់យានយន្តច្រើនប្រភេទ។ ក៏ប៉ុន្តែ បច្ចុប្បន្នវាកំពុងស្ថិតក្នុងដំណាក់កាលដំបូង និងត្រូវការពិសោធ សាកល្បងបន្ថែមទៀត មុននឹងអាចដាក់លក់ក្នុងទីផ្សារ៕

October 6, 2023

អាយុ 99 ឆ្នាំ តែសុខភាពមាំមួនដូចអាយុ 40 ដោយសារតែខ្ញី

(ប្រទេសចិន) – ដោយសារតែទម្លាប់ទទួលទានខ្ញីត្រាំទឹកខ្មេះបីចំណិតជារៀងរាល់ថ្ងៃ វេជ្ជបណ្ឌិត Lu Zhizheng មានសុខភាពមាំមួនដូចទៅនឹងបុរសវ័យកណ្ដាល បើទោះគាត់មានអាយុ 99 ឆ្នាំហើយក៏ដោយ។

ក្នុងវ័យជិត 100 ទៅហើយ ប៉ុន្តែវេជ្ជបណ្ឌិតផ្នែកឱសថបុរាណ Lu Zhizheng នៅមានរាងកាយមាំមួន សុខភាពល្អ ការចងចាំល្អជាងមនុស្សចាប់ពីវ័យ 60 ទៅ 70 ឆ្នាំទៅទៀត។ នៅពេលត្រូវបានសួរអំពីអាថ៌កំបាំងដែលបានជួយឱ្យគាត់មានសុខភាពល្អបែបនេះ វេជ្ជបណ្ឌិត Lu ប្រាប់ថា ដោយសារតែគ្រឿងទេសពីរប្រភេទដែលមានតម្លៃទាប និងតែងត្រូវបានប្រើប្រាស់ក្នុងគ្រួសារ នោះគឺខ្ញី និងទឹកខ្មេះ។

វេជ្ជបណ្ឌិត Lu ឱ្យដឹងថា ក្នុងរយៈពេលប្រហែលពី 20 ទៅ 30 ឆ្នាំកន្លង គាត់តែងតែបរិភោគខ្ញីត្រាំទឹកខ្មេះចំនួនបីចំណិតជារៀងរាល់ព្រឹក។ គាត់ប្រាប់ថា វិធីនេះជួយកាត់បន្ថយអាការទល់ខ្យល់ ពិបាករំលាយអាហារចំពោះមនុស្សដែលមានការងារមមាញឹក និងមានរបបអាហារមិនត្រឹមត្រូវ។ ក្រៅពីនេះ ខ្ញីក៏ជួយកម្ដៅក្រពះ និងកាត់បន្ថយបញ្ហាផ្ដាសាយផងដែរ។

ដើម្បីបញ្ជាក់អំពីប្រសិទ្ធភាពរបស់ខ្ញីត្រាំទឹកខ្មេះ លោក Lu ក៏បានប្រកាសបង្ហាញលទ្ធផលនៃការពិនិត្យសុខភាពជាទៀតទាត់របស់គាត់។ លទ្ធផលបង្ហាញថា សរសៃឈាមរបស់គាត់ល្អ ប្រហាក់ប្រហែលនឹងមនុស្សវ័យកណ្ដាល។ រាងកាយអាយុ 90 ឆ្នាំ ប៉ុន្តែបេះដូងនៅក្នុងវ័យ 40 ឆ្នាំ។

វិធីធ្វើខ្ញីត្រាំទឹកខ្មេះរបស់វេជ្ជបណ្ឌិត Lu មានដូចតទៅ៖ យកខ្ញីខ្ចី លាងឱ្យស្អាត ទុកឱ្យស្ងួត ចិតជាចំណិត រួចរោយអំបិលបន្តិច ហើយផ្អាប់ទុក 12 ម៉ោង។ បន្ទាប់មក យកចំណិតខ្ញីទាំងនេះទៅក្នុងក្រឡ ចាក់ទឹកខ្មេះពីលើបន្តិច រួចគ្របឱ្យជិត ទុកពី 4 ទៅ 5 ថ្ងៃ មុនពេលបរិភោគ។ គាត់ថា ល្អបំផុតគឺប្រើប្រាស់ទឹកខ្មេះធ្វើពីអង្ករ និងលាយជាមួយទឹក នៅក្នុងការត្រាំខ្ញីនេះ។

ការទទួលទានខ្ញីត្រាំទឹកខ្មេះ ឬហៅថាខ្ញីជ្រក់ទឹកខ្មេះ ក៏ជួយកាត់បន្ថយជាតិខ្លាញ់ក្នុងឈាម ជួយព្យាបាលជំងឺលើសខ្លាញ់អាក្រក់ទៀតផង៕

July 19, 2023

រោងចក្រផលិតអគ្គិសនីដោយកម្ដៅថ្ងៃ 1,000 ម៉េហ្គាវ៉ាត់ តភ្ជាប់នឹងបណ្ដាញអគ្គិសនីនៅប្រទេសចិន

រោងចក្រផលិតអគ្គិសនីពីថាមពលព្រះអាទិត្យថ្មីនៅ Tianjin មានកម្លាំង 1,000 ម៉េហ្គាវ៉ាត់ អាចផ្គត់ផ្គង់អគ្គិសនីដល់ពលរដ្ឋ 1.5 លានគ្រួសារ។

យោងតាមសារព័ត៌មានចិន រោងចក្រផលិតអគ្គិសនីដោយផ្ទាំងសូឡា Huadian Tianjin Haijing ត្រូវបានតភ្ជាប់ជាមួយនឹងបណ្ដាញអគ្គិសនីនៅ Tianjin កាលពីថ្ងៃទី 08 កក្កដា 2023។ សកម្មភាពរបស់រោងចក្រដែលមានកម្លាំង 1,000 ម៉េហ្គាវ៉ាត់ (MW) នេះ រួមមាន រូបមន្តឧស្សាហកម្មរួមផ្សំនឹងការផលិតអគ្គិសនីពីផ្ទាំងសូឡា ការផលិត halogen លើផ្ទៃទឹក និងក្នុងទឹក ទន្ទឹមនឹងការកែលំអសមត្ថភាពផ្គត់ផ្គង់អគ្គិសនីនៅភាគខាងជើងប្រទេសចិន។

ស្ថិតនៅតំបន់ស្រែអំបិល Changlu រោងចក្រ Huadian Tianjin Haijing គ្រប់ដណ្ដប់លើផ្ទៃដីប្រហែល 1,333 ហិកតា និងអាចផ្គង់ផ្គង់អគ្គិសនីស្អាត 1.5 ពាន់លានគីឡូវ៉ាត់ម៉ោងជារៀងរាល់ឆ្នាំ អាចឆ្លើយតបនឹងតម្រូវការប្រើប្រាស់របស់មនុស្ស 1.5 លានគ្រួសារ និងកាត់បន្ថយឧស្ម័នកាបូនឌីអុកស៊ីដបានប្រហែល 1.25 លានតោន ធៀបនឹងការប្រើប្រាស់ធ្យូងថ្ម។

យោងតាម Yang Fan ប្រធានគម្រោងខាងលើ រោងចក្រនេះនឹងជួយជំរុញការកែប្រែរចនាសម្ព័ន្ធថាមពលស្អាតនៅភាគខាងជើងប្រទេសចិន។ រោងចក្រនេះក៏ផ្សារភ្ជាប់ការផលិតអគ្គិសនីជាមួយនឹងការផលិតអំបិល និងនេសាទផងដែរ៕

July 10, 2023

សត្វត្រសក់សមុទ្រជួយទប់ស្កាត់ជំងឺទឹកនោមផ្អែមកម្រិតពីរ និងផលវិបាករបស់ជំងឺនេះ

យោងតាមការសិក្សាស្រាវជ្រាវមួយរបស់ក្រុមអ្នកវិទ្យាសាស្ត្រអូស្ត្រាលី សត្វត្រសក់សមុទ្រ (sea cucumber) ដែលមានឈ្មោះបច្ចេកទេសថា Holothuroidea មានផ្ទុកសារជាតិដែលជួយពន្យារការវិវត្តទៅរកជំងឺទឹកនោមផ្អែមកម្រិតពីរ និងកាត់បន្ថយផលវិបាកនានារបស់ជំងឺទឹកនោមផ្អែម។

ការសិក្សាស្រាវជ្រាវកន្លងមកធ្លាប់បានបញ្ជាក់ថា សត្វសមុទ្រខាងលើនេះអាចធ្វើឱ្យឈាមរាវ បញ្ចុះសម្ពាធឈាម និងអាចទប់ទល់នឹងបញ្ហារលាក ប្រឆាំងអុកស៊ីតកម្ម ប្រឆាំងជំងឺមហារីក និងព្យាបាលរបួស។ ពេលនេះ ក្រុមអ្នកវិទ្យាសាស្ត្រនៅសាកលវិទ្យាល័យអូស្ត្រាលីខាងត្បូង បានរកឃើញថា សារជាតិនានានៅក្នុងសត្វត្រសក់សមុទ្រ ក៏មានសមត្ថភាពទប់ស្កាត់ជំងឺទឹកនោមផ្អែមកម្រិតពីរផងដែរ។

ក្រុមអ្នកវិទ្យាសាស្ត្រខាងលើយកសត្វត្រសក់សមុទ្រប្រភេទ Holothuria scabra ទៅស្ងោរឱ្យឆ្អិន រួចកែច្នៃទៅតាមវិធីផ្សេងៗ រួមមាន ប្រឡាក់អំបិលរួចហាលថ្ងៃ, ហាលថ្ងៃមិនបាច់ប្រឡាក់អំបិល និងហាលថ្ងៃរួចឆ្អើរ។ បន្ទាប់មក ពួកគេយកអាហារកែច្នៃទាំងនេះទៅកិនជាម្សៅ។ អ្នកវិទ្យាសាស្ត្រចម្រាញ់យកខូឡាជែន (collagen) ពីសត្វត្រសក់សមុទ្រ រួចបន្ថែមទៅលើអាហារកែច្នៃទាំងនេះ។

សត្វត្រសក់សមុទ្រ (sea cucumber) ដែលមានឈ្មោះបច្ចេកទេសថា Holothuroidea

ជាលទ្ធផល ត្រសក់សមុទ្រប្រឡាក់អំបិលនិងហាលស្ងួត (ងៀត) មានសមត្ថភាពខ្ពស់ជាងគេក្នុងការទប់ស្កាត់ការផលិត AGE នៅក្នុងរាងកាយរបស់អ្នកជំងឺទឹកនោមផ្អែម។ AGE គឺជាផលិតផលស្ករចុងក្រោយ (ស្ករអាក្រក់) បន្ទាប់ពីប្រូតេអ៊ីន និង/ឬជាតិខ្លាញ់រួមផ្សំជាមួយជាតិស្ករក្នុងឈាមនៅក្នុងដំណើរការមួយដែលហៅថា glycation៕

June 14, 2023

វិធីថែបំប៉នកូនសម្លាញ់ឱ្យធំធាត់មាំមួន មានឆ្អឹងរឹងមាំ

កូនមានរាងកាយធំធាត់មាំមួន មានសុខភាពរឹងប៉ឹង គឺជារឿងមួយដែលឪពុកម្តាយគ្រប់គ្នាចង់បានជាទីបំផុត រឹតតែកូនកំពុងតែស្ថិតក្នុងវ័យរៀនដើរតេះតះផងនោះ យើងមិនគួរមើលរំលងអាហារដែលមានប្រយោជន៍ ក្នុងការបំប៉នឆ្អឹងរបស់កូនឡើយ។ ថ្ងៃនេះឡា រ៉ែន មានអត្ថបទល្អៗពាក់ព័ន្ធនឹងសារធាតុអាហារដែលបំប៉នឆ្អឹងដល់កូនសម្លាញ់មកជម្រាបជូន។

តើឆ្អឹងត្រូវការអ្វីខ្លះ?

ការដែលឆ្អឹងរបស់កូនតូចអាចរឹងមាំល្មមនឹងធ្វើឱ្យរាងកាយរបស់កូនធំធាត់ឡើង ឬមានកម្ពស់ដែលកើនឡើងបាននោះ ចាំបាច់ត្រូវអាស្រ័យសារធាតុអាហារសំខាន់ 4យ៉ាងដូចតទៅ៖

1.សារធាតុរ៉ែ ៈ ដែលមានដូចជា កាលស្យូម ផូសស្វ័រ ម៉ាញេស្យូម ភ្លូអ័ររ៉ាយ ទង់ដែង ស័ង្កសី និងម៉ង់ហ្កាណេស។ សារធាតុរ៉ែទាំងអស់នេះ នឹងជួយក្នុងការបង្កើន និងបំប៉នឆ្អឹងរបស់ក្មេងតូច។

ប្រភព : សារធាតុរ៉ែទាំងអស់នេះបានមកពីសាច់សត្វ និងគ្រឿងក្នុងសត្វ ដូចជា ទឹកដោះម្តាយ សាច់ត្រី សាច់ជ្រូក សាច់គោ សាច់មាន់ ស៊ុតក្រហម ថ្លើមមាន់ បេះដូងជ្រូក និងអណ្តាតជ្រូក។

2.ប្រូតេអុីន ៈ សារធាតុសំខាន់ដែលមានតួនាទីជាច្រើនក្នុងការរីកចម្រើនធំធាត់របស់កូន តែសម្រាប់តួនាទីរបស់ប្រូតេអុីនចំពោះឆ្អឹងវិញនោះ គឺការពង្រីកខ្លួន និងបំបែកខ្លួនរបស់កោសិកាឆ្អឹង។

ប្រភព : សាច់សត្វប្រភេទផ្សេងៗ និងទឹកដោះម្តាយ។

3.វិតាមីន ៈ មានដូចជា វិតាមីនD វិតាមីនK វិតាមីនC ការពាររោគឆ្អឹងទន់ ជួយក្នុងការបង្កើន និងបំប៉នឆ្អឹង និងធ្មេញ ហើយវិតាមីនថែមទាំងជួយឱ្យរាងកាយបឺតជ្រាបជាតិកាល់ស្យូមបានល្អឡើងទៀតផង។

ប្រភព : វិតាមីនD មាននៅក្នុងសាច់សត្វផ្សេងៗ ប្រេងធញ្ញជាតិ ប៊័រ ចំណែកវិតាមីនK និងវិតាមីនC បានមកពីបន្លែស្លឹកបៃតង និងផ្លែឈើគ្រប់ប្រភេទ។

4.ខាបូហាយដ្រេត ៈ ជាសារធាតុអាហារដែលផ្តល់នូវថាមពលដ៏គ្រប់គ្រាន់សម្រាប់កុមារ ដើម្បីឱ្យមានទម្ងន់ខ្លួនស័ក្តិសម នឹងវ័យ និងជាបច្ច័យក្នុងការប្រមូលសន្សំសម្ព័ន្ធឆ្អឹង។

ប្រភព : សម្រាប់កូនវ័យចាប់ផ្តើមទទួលអាហារបំប៉ននោះ អាចទទួលខាបូហាយដ្រេតបានពីម្សៅ ដំឡូងបារាំង នំប៉័ង និងម៉ាក់ការ៉ូនីជាដើម។

ក្រៅពីសារធាតុអាហារដែលជួយបង្កើន និងបំប៉នឆ្អឹងទាំង 4ប្រភេទដែលបានរៀបរាប់មកខាងលើនេះហើយ នៅមានប្រភេទអាហារដែលគួរហាមឃាត់ និងប្រុងប្រយ័ត្នមួយទៀតដែលអ្នកម្តាយគ្រប់រូបគួរតែដឹងដែរនោះគឺ អាហារដែលមានសូដ្យូមខ្ពស់ ដូចជាអាហាររសជាតិប្រៃ អាហារដែលមានអំបិលច្រើន-ល- ព្រោះអាហារទាំងនោះនឹងធ្វើឱ្យរាងកាយរបស់កូនបាត់បង់កាល់ស្យូមតាមទឹកនោមកាន់តែច្រើនឡើង បើសិនជាអាចទៅរួច គួរចៀសវាង និងកុំប្រថុយប្រថាននឹងការបាត់បង់កាល់ស្យូម និងកុំឱ្យកូនញៀនអាហារដែលមានជាតិប្រៃខ្លាំងផងដែរ៕

December 15, 2020

កាល់ស្យូមគឺជាអ្វី ហេតុម៉េចបានសំខាន់សម្រាប់កូនតូច?

កុមារនៅក្នុងអាយុ 1 – 3 ឆ្នាំ គឺជាវ័យមួយដែលមានការប្រែប្រួល និងការវិវឌ្ឍខាងរាងកាយខ្លាំងណាស់ អ្វីដែលយើងច្រើនសង្កេតឃើញបានយ៉ាងច្បាស់នោះគឺ ការវិវឌ្ឍខាងផ្នែកការធ្វើចលនា តាំងពីការវារ ឈរ ដើរ រហូតទៅដល់អាចរត់បានយ៉ាងស្ទាត់ជំនាញ ហើយនិងការប្រែប្រួលខាងការញ៉ាំ ដែលការវិវឌ្ឍខាងការទំពាលេប ក៏ជាអ្វីមួយដែលកូនតូចត្រូវធ្វើជាប្រចាំក្នុងមួយថ្ងៃៗដែរ។ គ្រោងសាងរាងកាយដែលមានចំណែកសំខាន់ក្នុងការបង្កើនដល់ការធ្វើចលនា និងការទំពាលេបរបស់កូនឱ្យធ្វើការបានយ៉ាងមានប្រសិទ្ធភាពនោះគឺ អវយវៈដែលមានឈ្មោះថា “ឆ្អឹង” និង “ធ្មេញ” ដូច្នេះដើម្បីជួយឱ្យកូនតូចមានគ្រោងសាងរបស់ឆ្អឹង និងធ្មេញដែលរឹងមាំនោះ ទើបសារជាតិអាហារចាំបាច់ដូចជា “កាល់ស្យូម” មានតួនាទីយ៉ាងសំខាន់ចំពោះរាងកាយកូនតូចខ្លាំងសម្បើមណាស់។

“កាល់ស្យូម” គឺជាសារជាតិអាហារប្រភេទអំបិលរ៉ែមួយប្រភេទដែលមាននៅក្នុងរាងកាយច្រើនបំផុត ជាពិសេសឆ្អឹង និងធ្មេញ អាចនិយាយបានថា ជាកន្លែងប្រមូលសន្សំជាតិកាល់ស្យូមដែលធំជាងគេបំផុតនៅក្នុងរាងកាយ។ មុខនាទីសំខាន់របស់កាល់ស្យូម គឺនាំយកមកប្រើប្រាស់ក្នុងការសាង និងជួសជុលចំណែកដែលសឹករេចរឹលរបស់ឆ្អឹង និងធ្មេញ ក្រចកដៃ-ជើង និងសរសៃសក់ឱ្យរឹងមាំ ក្រៅពីនេះនៅមានចំណែកជួយគ្រប់គ្រងការធ្វើការងាររបស់សាច់ដុំ ប្រព័ន្ធប្រសាទ ការបង្កកខ្លួនរបស់ឈាម ចង្វាក់របស់បេះដូង ការធ្វើការងាររបស់ប្រព័ន្ធទឹករំលាយអាហារ ការបឺតជញ្ជក់យកវីតាមីន និងជំរុញការបញ្ចេញរបស់អ័រម៉ូន ។

តើនឹងទៅជាយ៉ាងណា…នៅពេលកូនតូចខ្វះជាតិកាល់ស្យូម?

កុមារដែលទទួលបានជាតិកាល់ស្យូមមិនគ្រប់គ្រាន់តាមតម្រូវការរបស់រាងកាយ នឹងមានផលប៉ះពាល់ដល់ភាពរឹង-ក្រាស់របស់ឆ្អឹងទាំងមូល ធ្វើឱ្យកើតជំងឺទន់ឆ្អឹង ឬឆ្អឹងកោង-ង ហើយការវិវឌ្ឍខាងផ្នែករាងកាយ ដូចជាការអង្គុយ វារ ដើរ នឹងដំណើរទៅមុខយ៉ាងយឺត។ ក្រៅពីនេះ គ្រោងសាងឆ្អឹងដែលទន់ខ្សោយ នឹងបង្កឱ្យកើតភាពខុសប្រក្រតីរបស់រាងកាយបាន ដូចជា ក្លាយជាកុមារជើងកោង-ង និងខ្លួនទាបតឿខុសប្រក្រតីជាដើម។

កាល់ស្យូមនៅឯណា…តើរកញ៉ាំបានពីអាហារអ្វី?

ទឹកដោះ និងផលិតផលដែលធ្វើអំពីទឹកដោះ ដូចជា ឈីស ប៊័ររឹង ប៊័រស្រស់ យ៉ាអួ អៃស្រ្គីម-ល- ព្រោះទឹកដោះស្រស់ គឺជាប្រភពអាហារដ៏កំពូលដែលមានជាតិកាល់ស្យូមច្រើនបំផុត ទើបចាំបាច់ខ្លាំងណាស់ដែលកុមារត្រូវតែញ៉ាំទឹកដោះគោស្រស់ឱ្យបានយ៉ាងហោចណាស់ 1ថ្ងៃ 2កែវ។
គ្រាប់ធញ្ញជាតិ ដូចជាគ្រាប់សណ្តែកស្ងួត និងផលិតផលដែលធ្វើពីគ្រាប់សណ្តែក ដូចជាតៅហ៊ូ ទឹកសណ្តែកលឿង សៀង គ្រាប់ល្ងស-ខ្មៅ គ្រាប់សណ្តែកក្រហម-ខៀវ គ្រាប់អាល់ម៉ុន គ្រាប់ឈូក និងគ្រាប់ផ្កាឈូករត្នជាដើម។
សាច់សត្វដែលញ៉ាំទាំងមូល ឬទាំងឆ្អឹង ដូចជា ត្រីតូចៗ កម្ពឹស បង្គា បង្គាក្រៀម ត្រីខកំប៉ុង។ល។
បន្លែស្លឹកបៃតង ដូចជាខាត់ណា ស្ពៃចង្កឹះ ប្រូខូលី ស្លឹកបាស ផ្លែពពាយ សណ្តែកហោឡាន់តាវ ត្រប់ពុតលំញង។ល។

នៅពេលបានដឹងបែបនេះហើយ សមាជិកនៅក្នុងគ្រួសារទាំងអស់សូមកុំភ្លេចបន្ថែមជាតិកាល់ស្យូមឱ្យបានគ្រប់គ្រាន់តាមតម្រូវការរបស់រាងកាយឱ្យបានជាប់ជានិច្ច ព្រោះមិនថាស្ថិតក្នុងវ័យណាក៏ដោយ ក៏កាល់ស្យូមនៅតែជាសារជាតិរ៉ែដ៏សំខាន់មួយដែលទាំងកុមារ និងមនុស្សចាស់នៅតែចាំបាច់ត្រូវតែទទួលបានជារៀងរាល់ថ្ងៃ៕

December 3, 2020

Tag: អំបិល