Tag: ក្រុមហ៊ុន

មហាសេដ្ឋីចិន Jack Ma បង្ហាញខ្លួនជាគ្រូបង្រៀនលើកដំបូងនៅប្រទេសជប៉ុន
មហាសេដ្ឋីបច្ចេកវិទ្យា Jack Ma បង្ហាញខ្លួនក្នុងតួនាទីជាសាស្ត្រាចារ្យបរទេសរបស់សាកលវិទ្យាល័យតូក្យូ ប្រទេសជប៉ុន កាលពីពេលថ្មីៗនេះ។
ការចែករំលែកចំណេះដឹងរបស់មហាសេដ្ឋីចិន Jack Ma បានចាប់ផ្ដើមពីថ្ងៃទី 12 មិថុនា 2023 ប៉ុន្តែ ទើបតែត្រូវបានប្រកាសក្រោយការបង្រៀនបានជិតមួយសប្ដាហ៍។ យោងតាម SCMP ស្ថាបនិកវ័យ 58 ឆ្នាំរបស់ Alibaba គឺជាវាគ្មិនមួយរូបដែលលេចធ្លោជាងគេនៅក្នុងសិក្ខាសាលាពិសេសស្ដីពី «នវានុវត្តន៍ និងសហគ្រិនភាព» ដែលត្រូវបានរៀបចំឡើងនៅឯសាកលវិទ្យាល័យតូក្យូ។
នេះក៏ជាសិក្ខាសាលាដំបូងដែលលោក Ma ចូលរួមក្នុងនាមជាសាស្ត្រាចារ្យបរទេស នៅក្នុងស្ថាប័នអប់រំដែលមានអាយុ 146 ឆ្នាំនៅប្រទេសជប៉ុន។ អ្នកដែលបានចូលរួមក្នុងសិក្ខាសាលាខាងលើរួមមាន និស្សិតមកពីតំបន់នានារបស់ប្រទេសជប៉ុន ចិន ឥណ្ឌា និងម៉ាឡេស៊ី។
ពិធីចែករំលែកចំណេះដឹង និងបទពិសោធន៍នេះ ផ្ដោតទៅលើទស្សនៈនៃការគ្រប់គ្រង និងរបៀបដែលយុវវ័យជំនាន់ថ្មីអាចសម្រេចបាននៅពេលអនាគត។ យោងតាមគេហទំព័ររបស់សាកលវិទ្យាល័យតូក្យូ នេះគឺជាប្រធានបទដែលយោងទៅលើ «បទពិសោធន៍សម្បូរបែប ចំណេះដឹងនាំមុខគេទាក់ទងនឹងស្មារតីជំនួញ និងភាពច្នៃប្រឌិត» របស់លោក Jack Ma។
ប៉ុន្មានថ្ងៃក្រោយពីចូលរួមសិក្ខាសាលានៅប្រទេសជប៉ុន លោក Ma ក៏បានបន្តបង្ហាញវត្តមាននៅប្រទេសចិនក្នុងកម្មវិធីមួយដែលរៀបចំដោយក្រុមហ៊ុន Alibaba។ នៅទីនេះ លោក Ma ស្លៀកពាក់យ៉ាងសាមញ្ញ។
លោក Jack Ma ធ្លាប់ជាគ្រូបង្រៀនភាសាអង់គ្លេស មុនពេលបង្កើតក្រុមហ៊ុន Alibaba។ គិតមកដល់ពេលនេះ លោក Ma កំពុងធ្វើជាសាស្ត្រាចារ្យនៅសាកលវិទ្យាល័យយ៉ាងតិចបួនដែលស្ថិតនៅខាងក្រៅចិនដីគោក ក្នុងនោះក៏មានសាកលវិទ្យាល័យហុងកុង សាកលវិទ្យាល័យនៅអាហ្វ្រិក និងសាកលវិទ្យាល័យនៅប្រទេសអ៊ីស្រាអែលផងដែរ។
ក្នុងព្រឹត្តិការណ៍មួយកាលពីថ្ងៃទី 15 មិថុនា លោក Michael Evans ដែលជាប្រធានក្រុមហ៊ុន Alibaba បានថ្លែងថា លោក Jack Ma នៅតែជាភាគហ៊ុនិកធំជាងគេរបស់ក្រុមហ៊ុន Alibaba។
ការបង្ហាញវត្តមានរបស់លោក Jack Ma នេះ គឺចំពេលដែលទីក្រុងប៉េកាំងកំពុងរកវិធីស្ដារសេដ្ឋកិច្ចជាតិ និងទំនុកចិត្តរបស់អ្នកវិនិយោគ ក្រោយពីបានរឹតបន្តឹងវិស័យបច្ចេកវិទ្យាអស់ជាច្រើនឆ្នាំ៕
June 19, 2023
ចិនបង្កើតម៉ាស៊ីនរថភ្លើងដំណើរការដោយអ៊ីដ្រូសែន «ខ្លាំងបំផុតលើពិភពលោក»
ក្បាលម៉ាស៊ីនអ៊ីដ្រូសែនដំបូងរបស់ប្រទេសចិន Ningdong ដែលកែច្នៃពីម៉ាស៊ីនចំហេះក្នុង បានចាកចេញពីរោងចក្រ Datong ជាក្រុមហ៊ុនបុត្រសម្ព័ន្ធរបស់ CRRC កាលពីថ្ងៃទី 15 មិថុនា 2023។
សារព័ត៌មាន SCMP បានរាយការណ៍ថា Ningdong ត្រូវបានបង្ហាញថាជាក្បាលម៉ាស៊ីនដែលដំណើរការដោយអ៊ីដ្រូសែនកម្លាំងខ្លាំងបំផុតលើពិភពលោក ដែលមានសក្ដានុពលធំធេងក្នុងការជំនួសម៉ាស៊ីនរថភ្លើងទាំងអស់ដែលដំណើរការដោយប្រេងសាំងនៅប្រទេសចិន។ វាអាចផ្ទុកអ៊ីដ្រូសែនចំនួន 270 គីឡូក្រាម និងបើកបរបន្តបន្ទាប់រយៈពេល 190 ម៉ោង។
«អ៊ីដ្រូសែនគឺជាថាមពលស្អាត អាចកកើតឡើងវិញ។ ការចំណាយលើការប្រើប្រាស់ក្បាលម៉ាស៊ីនរថភ្លើងដំណើរការដោយអ៊ីដ្រូសែន គឺប្រហាក់ប្រហែលនឹង ½ នៃការចំណាយលើម៉ាស៊ីនចំហេះក្នុង» Liang Zhenzhong អគ្គនាយករងរបស់ CRRC Datong បញ្ជាក់ដូច្នេះ។
ម៉ាស៊ីនអ៊ីដ្រូសែនដំណើរការនៅពេលឧស្ម័នអ៊ីដ្រូសែនប្រតិកម្មជាមួយនឹងអុកស៊ីសែននៅក្នុងថ្មផ្ទុកថាមពល បង្កើតបានជាអគ្គិសនី និងចំហាយទឹក។ អនុផលរបស់ប្រតិកម្មនេះមិនប៉ះពាល់ដល់បរិស្ថាន ដោយសារបំភាយតែកម្ដៅ និងទឹក។
រថភ្លើងអ៊ីដ្រូសែនដឹកអ្នកដំណើរដំបូងគេលើពិភពលោកបានធ្វើសកម្មភាពពាណិជ្ជកម្មតាំងពីឆ្នាំ 2018 និងធ្វើដំណើរបានជាង 220,000 គីឡូម៉ែត្រ នៅ 8 ប្រទេសក្នុងដំតន់អឺរ៉ុប គិតត្រឹមខែមករា 2023។ នេះបើយោងតាមក្រុមផលិតរថភ្លើងបារាំង Alstom។
June 19, 2023
វគ្គបន្តបន្ទាប់របស់ខ្សែភាពយន្ត «Avatar» ត្រូវបានពន្យារពេលចាក់បញ្ចាំង
ក្រុមហ៊ុន Disney បានប្រកាសថា វគ្គចុងក្រោយរបស់ខ្សែភាពយន្ត «Avatar» នឹងត្រូវបានបញ្ចាំងនៅរោងកុនក្នុងឆ្នាំ 2031។
យោងតាមប្រភពព័ត៌មានពី Variety ក្រុមហ៊ុនផលិតភាពយន្ត Disney បានសម្រេចចិត្តពន្យារពេលចាក់បញ្ចាំងវគ្គបន្តបន្ទាប់របស់ខ្សែភាពយន្តល្បីឈ្មោះ Avatar។ ក្នុងនោះ វគ្គ 3 របស់ Avatar គ្រោងនឹងបញ្ចាំងនៅរោងកុនចាប់ពីថ្ងៃទី 19 ធ្នូ 2025, វគ្គ 4 នៅថ្ងៃទី 21 ធ្នូ 2028 និងវគ្គ 5 ដែលជាវគ្គចុងក្រោយនឹងចាប់បញ្ចាំងពីថ្ងៃទី 29 ធ្នូ 2031។
ផលិតករភាពយន្ត Jon Landau ឱ្យដឹងថា «គ្រប់វគ្គរបស់ភាពយន្ត Avatar គឺសុទ្ធតែជាការងារដ៏អស្ចារ្យ និងត្រូវការពេលវេលាដើម្បីឈានដល់គម្រិតគុណភាពនោះ។ ក្រុមការងារទាំងអស់កំពុងតែធ្វើការយ៉ាងញាប់ដៃញាប់ជើងដើម្បីនាំទស្សនិកជនត្រលប់មកកាន់ពិភព Pandora នៅខែធ្នូ ឆ្នាំ 2025 ខាងមុខ»។
ក្រោយការប្រកាសខាងលើ អ្នកគាំទ្រមួយចំនួនបានសម្ដែងការខកចិត្តនៅពេលត្រូវបន្តរង់ចាំភាពយន្តរបស់អ្នកដឹកនាំរឿង James Cameron។ បច្ចុប្បន្ន ទាំង Avatar និង Avatar: The Way of Water គឺជាពីរក្នុងចំណោមភាពយន្តបីរឿងដែលរកបានប្រាក់ចំណូលខ្ពស់ជាងគេនៅគ្រប់សម័យកាល។ ដូច្នេះ ការរំពឹងរបស់ទស្សនិកជនគឺមានខ្ពស់ខ្លាំងសម្រាប់វគ្គ 3 របស់ Avatar។
June 16, 2023
រថយន្ត Concept Nyobolt EV បញ្ចូលអគ្គិសនីមួយពេញក្នុងរយៈពេល 6 នាទី
ការចំណាយពេលយូរក្នុងការបញ្ចូលថាមពលថ្មគឺជារឿងដែលត្រូវបានរិះគន់បំផុតរបស់រថយន្តអគ្គិសនី មិនថាជាប្រភេទទំនើប ឬតម្លៃថ្លៃ ហើយវាមិនអាចយកឈ្នះលើរថយន្តប្រើម៉ាស៊ីនចំហេះក្នុង នាបច្ចុប្បន្ន។ ប៉ុន្តែ ពេលនេះមានក្រុមហ៊ុនមួយបានប្រកាសព័ត៌មានដ៏ប្រសើរសម្រាប់រថយន្តអគ្គិសនី។
ក្រុមហ៊ុន Nyobolt ដែលជាអ្នកអភិវឌ្ឍថ្មផ្ទុកអគ្គិសនី មានទីស្នាក់ការកណ្ដាលនៅចក្រភពអង់គ្លេស បានប្រកាសថា ពួកគេមានបច្ចេកវិទ្យាថ្មី អនុញ្ញាតឱ្យបញ្ចូលថាមពលអគ្គិសនីបានរហ័សបំផុត។ ក្រុមហ៊ុននេះកំពុងដាក់តាំងបង្ហាញរថយន្តប្រភេទកីឡាគំរូមួយគ្រឿងដែលដំណើរការដោយអគ្គិសនី បំពាក់ថ្មផ្ទុកថាមពលដែលអាចបញ្ចូលអគ្គិសនីមួយពេញក្នុងរយៈពេលមិនដល់ 6 នាទី។
រថយន្តគំរូនេះមានថ្ម 35 គីឡូវ៉ាតម៉ោង ដែលអាចឱ្យរត់បានចម្ងាយប្រហែល 250 គីឡូម៉ែត្រ ក្រោយពីបញ្ចូលអគ្គិសនីមួយពេញ នៅពេលត្រូវបានដំឡើងក្នុងរថយន្ត coupe កីឡា ដែលមានទម្ងន់ប្រហែលជាង 1,500 គីឡូក្រាម។
Nyobolt ប្រកាសថា ថ្មផ្ទុកថាមពលថ្មីរបស់ពួកគេត្រូវបានធ្វើតេស្តដោយការបញ្ចូលថាមពលអគ្គិសនីជាង 2,000 លើក និងទទួលបានលទ្ធផលល្អ។

June 16, 2023
ចំណេញភ្លាមៗពី Samsung Galaxy A ស៊េរី ជាមួយការផ្ដល់ជូនដ៏ពិសេស…!
គ្រាន់តែទិញស្មាតហ្វូន Galaxy A ស៊េរីណាមួយពីសាមសុងនឹងទទួលបានប្រាក់ត្រលប់មកវិញភ្លាមៗ…!
(ភ្នំពេញ) ថ្ងៃទី 16 ខែមិថុនា ឆ្នាំ 2023 ៖ បើអតិថិជនត្រូវទិញ…ទិញឱ្យហើយទៅ…កុំនៅឡើយបង្អង់យូរ… ប្រយ័ត្នប្រម៉ូសិនអស់ធ្វើមុខជូរ…ស្មាតហ្វូនល្អលក់ដាច់មិនយូរ…ទិញប្រើភ្លាមជាប់ចិត្តភ្លែត…! អតិថិជនទាំង អស់នឹងទទួលបានប្រាក់ត្រលប់មកវិញភ្លាមៗ ព្រមទាំងរង្វាន់ម៉ាគាប់ចិត្តតែម្ដង…ចាប់ពីថ្ងៃទី 16 រហូតដល់ ថ្ងៃទី 30 មិថុនា 2023 ដោយគ្រាន់តែទិញស្មាតហ្វូន Galaxy A ស៊េរីណាមួយដូចក្រោម៖
*Galaxy A34 | A54 5G
– បានប្រាក់ត្រលប់មកវិញចំនួន 81,000៛
– កៅអីបត់ពិចនិក
– កាបូបរក្សាសីតុណ្ហភាពដ៏ស្រស់ស្អាត
*Galaxy A24
– បានប្រាក់ត្រលប់មកវិញចំនួន 61,000៛
– ស្រោមទូរស័ព្ទថ្លា និងកញ្ចក់ការពារអេក្រង់
– ឆ្នាំងសាកល្បឿនលឿនរហូតដល់ 15W
*Galaxy A14 | A14 5G
– បានប្រាក់ត្រលប់មកវិញចំនួន 61,000៛
– ឆ្នាំងសាកល្បឿនលឿនរហូតដល់ 15W
*ចំណែក Galaxy A04s
– បានប្រាក់ត្រលប់មកវិញចំនួន 61,000៛
អ៊ែមណាស់…! ឡូយណាស់…! នៅចាំអីទៀត…ប្រញាប់រួសរាន់ឡើងណាហ្វេនៗ! ទិញទូរស័ព្ទបាន ទាំងរង្វាន់…បានទាំងប្រាក់ត្រលប់មកវិញ…រកឯណាទៀត! មានតែក្រុមហ៊ុន សាមសុង ប៉ុណ្ណោះ…!
សូមបញ្ជាក់ផងដែរថាក្នុងចំណោមស្មាតហ្វូនស៊េរី A ខាងលើដែលក្រុមហ៊ុន សាមសុង ផ្តល់ប្រូម៉ូសិនជូន អតិថិជននាពេលនេះគឺសុទ្ធសឹងជាស្មាតហ្វូនដែលអាចឆក់យកបេះដូងអ្នកប្រើប្រាស់លើទីផ្សារទាំងអស់ដែលមានតម្លៃប្រហាក់ប្រហែលគ្នា…និងទទួលបានការពេញនិយមគាំទ្រយ៉ាងខ្លាំងនឹកស្មានមិនដល់! តើមានអ្វីដែលពិសេសសម្រាប់ជោគជ័យដ៏អស្ចារ្យនេះ? ព្រោះថាស្មាតហ្វូន A34 5G, A54 5G, A24 , A14, A14 5G, ឬ A04s ត្រូវបានផលិតឡើងជាមួយនឹងគុណភាពខ្ពស់…បំពាក់បច្ចេកវិទ្យាចុងក្រោយនិងមានតម្លៃ សមរម្យបំផុតស្ទើរមិនគួរឱ្យជឿ…!
សូមរំលឹកថា ក្រុមហ៊ុន សាមសុង គឺជាសមាជិកសកម្មក្នុងវិស័យឯកជនដែលធ្វើសកម្មភាពគាំទ្រដល់ទីក្រុង ប៊ូសាន នៃប្រទេសកូរ៉េ ក្លាយជាម្ចាស់ផ្ទះនៃព្រឹត្តិការណ៍ពិព័រណ៍ពិភពលោក World Expo 2030 នាពេលខាង មុខផងដែរ។
សម្រាប់ព័ត៌មានលម្អិតបន្ថែមសូមអញ្ជើញមកទស្សនាផលិតផលដោយផ្ទាល់ ឬតេស្តដោយផ្ទាល់ដៃនៅតាម ហាងទំនើបចែកចាយផលិតផល សាមសុង ទាំងអស់ដែលនៅជិតលោកអ្នកបំផុតទូទាំងប្រទេស ឬក៏អាច ចូលទៅកាន់ Facebook: SamsungCambodia, IG: samsungcambodia, TikTok: samsungcambodia ឬ ក៏អាចធ្វើការទំនាក់ទំនងទៅកាន់ផ្នែកសេវាបម្រើ អតិថិជន 24/7 ឥតគិតថ្លៃតាម រយៈទូរស័ព្ទលេខ៖ 1800-20 32 32!
*លក្ខខណ្ឌផ្សេងៗត្រូវបានអនុវត្ត…!!

June 16, 2023
វិស្វករអាយុ 14 ឆ្នាំរបស់ SpaceX ថា បណ្ដាញសង្គមរបស់ Microsoft រើសអើងវ័យ
Kairan Quazi ដែលជាវិស្វករផ្នែកទន់ទើបតែបានចូលធ្វើការឱ្យក្រុមហ៊ុន SpaceX មិនអាចចូលប្រើប្រាស់បណ្ដាញសង្គមការងារ LinkedIn ដោយសារតែមានអាយុទើបតែ 14 ឆ្នាំ។
កាលពីថ្ងៃទី 14 មិថុនា Kairan Quazi បានបង្ហោះរូបថតអេក្រង់ស្ដីពីប្រកាសរបស់ LinkedIn នៅលើ Instagram។ ប្រកាសនោះប្រាប់ថា គណនីរបស់ Kairan ត្រូវបានរារាំងព្រោះតែមានអាយុតិចជាងលក្ខខណ្ឌរបស់ LinkedIn។ បណ្ដាញសង្គមរបស់ Microsoft នេះ ទាមទារឱ្យអ្នកប្រើប្រាស់ត្រូវមានអាយុចាប់ពី 16 ឆ្នាំឡើងទៅ។
LinkedIn ឱ្យដឹងថា វិស្វករវ័យក្មេងខាងលើនឹងបានចូលប្រើប្រាស់ឡើងវិញ បន្ទាប់ពីមានអាយុគ្រប់ 16 ឆ្នាំ។ Kairan ប្រើប្រាស់បណ្ដាញសង្គមនេះដោយមានការបង់ប្រាក់ ប៉ុន្តែ LinkedIn ថា នឹងសងប្រាក់នោះត្រឡប់មកវិញ។
Kairan Quazi បានសម្ដែងការមិនពេញចិត្តចំពោះគោលការណ៍របស់ LinkedIn។ កុមាររូបនេះចោទថា បណ្ដាញសង្គមរបស់ Microsoft រើសអើងវ័យចំពោះកុមារ។
Kairan Quazi
Kairan Quazi កើតឆ្នាំ 2009 នៅ California សហរដ្ឋអាម៉េរិក។ វ័យ 11 ឆ្នាំ Kairan បានចូលសាកលវិទ្យាល័យ Santa Clara រៀនជំនាញវិទ្យាសាស្ត្រ និងបច្ចេកទេសកុំព្យូទ័រ។
LinkedIn គឺជាបណ្ដាញសង្គមផ្នែកទិន្នន័យអាជីព ការងារ និងផ្សារភ្ជាប់ជាមួយនឹងមុខរបរ ធំជាងគេលើពិភពលោក ហើយក៏ជាកម្មសិទ្ធិរបស់ក្រុមហ៊ុន Microsoft។ គិតត្រឹមខែមីនា 2023 បណ្ដាញសង្គមនេះមានសមាជិកចូលរួមប្រើប្រាស់ជាង 900 លាននាក់ មកពីប្រទេស និងដែនដីជាង 200 ក្នុងនោះក៏មានកម្ពុជាផងដែរ៕
June 15, 2023
តម្លៃរថយន្តអគ្គិសនីថយចុះជាង 10% ធៀបនឹងឆ្នាំកន្លង
យោងតាមទិន្នន័យស្ដីពីតម្លៃ និងចំនួនរថយន្តដែលបានលក់ចេញថ្មីបំផុត ដែលស្រាវជ្រាវដោយ Kelley Blue Book ជាមធ្យម រថយន្តអគ្គិសនីបានធ្លាក់ថ្លៃ 14% នៅក្នុងខែឧសភាឆ្នាំ 2023 បើធៀបនឹងដំណាក់ដូចគ្នាក្នុងឆ្នាំ 2022។
ការគណនារបស់ Kelley Blue Book បង្ហាញថា តម្លៃជាមធ្យមរបស់រថយន្តអគ្គិសនីថ្មីមួយគ្រឿងនៅក្នុងខែឧសភា 2023 គឺ 55,488 ដុល្លារ ខ្ពស់ជាងប្រហែល 158 ធៀបនឹងខែមេសា 2023 ប៉ុន្តែទាបជាង 9,370 ដុល្លារ បើធៀបនឹងខែឧសភា 2022។ តម្លៃរថយន្តអគ្គិសនីថ្មីបានឡើងដល់កម្រិតខ្ពស់បំផុតនៅក្នុងខែមិថុនា 2022 ប៉ុន្តែ បច្ចុប្បន្ន តម្លៃនោះបានបាត់បង់ប្រហែល 5,800 ដុល្លារ។
Michelle Krebs អ្នកវិភាគទីផ្សាររបស់ក្រុមហ៊ុន Cox Automotive ឱ្យដឹងថា ចំនួនរថយន្តអគ្គិសនីដែលបានលក់ចេញក្នុងខែឧសភា 2023 កើនប្រហែល 4.7% ធៀបនឹងខែមេសា 2023 និងកើន 44% ធៀបនឹងដំណាក់កាលដូចគ្នាក្នុងឆ្នាំ 2022។
ការធ្លាក់ថ្លៃរបស់រថយន្តអគ្គិសនីអាចបណ្ដាលមកពីកត្តាជាច្រើន ក្នុងនោះមានជាអាទិ៍ អត្រាពន្ធអាករថយចុះ អ្នកទិញមានលក្ខខណ្ឌគ្រប់គ្រាន់ក្នុងការទទួលបានប្រាក់ឧបត្ថម្ភ និងប្រាក់កម្ចីអត្រាការប្រាក់ទាប រាប់ពាន់ដុល្លារពីរដ្ឋជាដើម។ ក្រៅពីនេះ ការបញ្ចុះតម្លៃរថយន្តរបស់ Tesla ក៏បានធ្វើឱ្យក្រុមហ៊ុនដទៃត្រូវកាត់បន្ថយប្រាក់ចំណេញដើម្បីអាចលក់រថយន្តអគ្គិសនីក្នុងតម្លៃដែលអាចប្រកួតប្រជែងបាន៕
June 15, 2023
យន្តហោះល្បឿនលឿនជាងសំឡេង 7 ដង អាចហោះហើរចាប់ពីឆ្នាំក្រោយ
យន្តហោះល្បឿនលឿនជាងសំឡេងដែលត្រូវបានអភិវឌ្ឍដោយក្រុមហ៊ុន Hypersonix Launch Systems កំពុងឆ្ពោះទៅជិតដល់ដំណាក់កាលហោះហើរសាកល្បងដោយស្វ័យប្រវត្ត ទៅតាមកម្មវិធីរបស់ស្ថាប័នគំនិតផ្ដួចផ្ដើមការពារជាតិអាម៉េរិក (DIU)។
យន្តហោះសាកល្បងល្បឿនលឿន Dart AE កំពុងត្រូវបានអភិវឌ្ឍដោយក្រុមហ៊ុនអូស្ត្រាលី Hypersonix Launch Systems បន្ទាប់ពីបានសហការជាមួយ DIU។ នេះគឺជាយន្តហោះគំរូសម្រាប់បង្ហាញបច្ចេកវិទ្យា។ Dart AE ដែលមានប្រវែង 3 ម៉ែត្រ និងទម្ងន់ 300 គីឡូក្រាម អាចហោះក្នុងល្បឿន Mach 7 (8,643 គីឡូម៉ែត្រ/ម៉ោង)។ នេះបើតាម Space ចុះផ្សាយកាលពីថ្ងៃទី 11 មិថុនា។ យន្តហោះនេះអាចហោះបានចម្ងាយ 1,000 គីឡូម៉ែត្របន្ទាប់ពីចាក់ឥន្ធនៈមួយពេញ។
DART AE ប្រើប្រាស់ម៉ាស៊ីនប្រតិកម្មប្រភេទត្រង់ជំនាន់ទីប្រាំ Spartan របស់ Hypersonix និងអាចត្រូវបានបាញ់បង្ហោះឡើងទៅលើអាកាសដោយរ៉ុក្កែតគ្មានមនុស្សបើក។
Dart AE ស្ថិតក្នុងកម្មវិធីអភិវឌ្ឍបច្ចេកវិទ្យាល្បឿនលឿនជាងសំឡេងរបស់សហរដ្ឋអាម៉េរិក។ យន្តហោះនេះ អាចត្រៀមខ្លួនរួចរាល់សម្រាប់ការហោះហើរសាកល្បងលើកដំបូងនៅដើមរដូវក្ដៅឆ្នាំក្រោយ៕
June 13, 2023
ទីក្រុងអណ្ដែតលើសមុទ្រដែលអាចដាក់មនុស្សបានបួនម៉ឺននាក់
(ជប៉ុន) – ទីក្រុងអណ្ដែត Dogen មានបរិវេណប្រវែង 4 គីឡូម៉ែត្រ អាចផ្ដល់កន្លែងស្នាក់នៅដល់មនុស្ស 10,000 នាក់ និងទទួលទេសចរបាន 30,000 នាក់ក្នុងមួយថ្ងៃ។
ក្រុមហ៊ុន N-Ark របស់ជប៉ុន ថ្មីៗនេះបានប្រកាសគម្រោងអភិវឌ្ឍទីក្រុងអណ្ដែតដែលផ្ដោតសំខាន់លើវេជ្ជសាស្ត្រ ឈ្មោះ Dogen។ គំនិតនេះនឹងរួមផ្សំរវាងសកម្មភាពផលិតស្បៀង ស្ថាបត្យកម្ម ទិន្នន័យ ថាមពល ជាមួយនឹងសមុទ្រ នៅក្នុងប្រព័ន្ធចម្រុះដែលប្រើប្រាស់ទឹកសមុទ្រដូចទៅនឹងតំបន់សេដ្ឋកិច្ចថ្មីហៅថា «New Ocean»។ នេះបើតាម Design Boom ចុះផ្សាយកាលពីសប្ដាហ៍កន្លង។
ដោយមានអង្កត់ផ្ចិតប្រហែល 1.58 គីឡូម៉ែត្រ និងបរិវេណប្រវែង 4 គីឡូម៉ែត្រ ទីក្រុងអណ្ដែត Dogen អាចឱ្យមនុស្សរស់នៅជាអចិន្ត្រៃយ៍ប្រហែល 10,000 នាក់ និងទទួលភ្ញៀវទេសចរណ៍បាន 30,000 នាក់/ថ្ងៃ។ ពួកគេអាចទទួលបទពិសោធន៍ជាច្រើនតាំងពីបន្ទប់ពិសោធន៍អភិវឌ្ឍ សាលារៀន ឃ្លាំង មជ្ឈមណ្ឌលសន្តិសុខ ការិយាល័យ សេវាម្ហូបអាហារ មន្ទីរពេទ្យ សួន ទីលានកីឡា រហូតដល់ស្ថានីយទូរគមនាគមន៍ និងសណ្ឋាគារ។ល។
ទីក្រុងនេះមានបីតំបន់ ក្នុងនោះមានទាំង តំបន់ខ្សែក្រវាត់សម្រាប់សហគមន៍ និងតំបន់មជ្ឈមណ្ឌលទិន្នន័យក្រោមសមុទ្រ។ អ្វីដែលអស្ចារ្យនោះគឺថា ទីក្រុងខាងលើអាចផ្លាស់ទីបាននៅក្នុងឈូងសមុទ្រ។ Dogen នឹងមានប្រព័ន្ធសុខាភិបាលទំនើបបំផុតផងដែរ៕
June 12, 2023
វិស្វកររបស់ក្រុមហ៊ុន Apple, Google ជាដើម មានប្រាក់បៀវត្សរ៍ប៉ុន្មានក្នុងមួយឆ្នាំ?
វិស្វាករបច្ចេកវិទ្យារបស់បណ្ដាក្រុមហ៊ុនធំៗដូចជា Apple, Meta, Google ជាដើម មានប្រាក់បៀវត្សរ៍ប្រចាំឆ្នាំរាប់សែនដុល្លារអាម៉េរិក ពិសេសគឺវិស្វករផ្នែក AI (បញ្ញាសិប្បនិម្មិត)។
ក្រោយពីបានរីកចម្រើនខ្លាំង បណ្ដាក្រុមហ៊ុនបច្ចេកវិទ្យាធំៗកំពុងប្រឈមនឹងវិបត្តិ តម្រូវឱ្យមានការកាត់បន្ថយបុគ្គលិក។ ក៏ប៉ុន្តែ សម្រាប់មុខតំណែងជាវិស្វករវិញ គឺនៅតែទទួលបានប្រាក់ខែខ្ពស់ដដែល។ នេះបើយោងតាមទិន្នន័យស្ដីពីប្រាក់បៀវត្សរ៍ដែល Levels.fyi និង Business Insider ប្រមូលបាន។
Google
វិស្វករកម្រិតទីបី នៅក្រុមនេះអាចទទួលបានប្រាក់ 130,000 ដល់ 280,000 ដុល្លារអាម៉េរិកក្នុងមួយឆ្នាំ ខណៈដែលវិស្វករជាន់ខ្ពស់គឺពី 300,000 ដល់ 700,000 ដុល្លារ ឬច្រើនជាងនេះ។ ចំណែកវិស្វករផ្នែក AI វិញ ជាមធ្យមទទួលបានពី 254,700 ដល់ 535,000 ដុល្លារ/ឆ្នាំ។
Microsoft
ក្រុមហ៊ុននេះផ្ដល់ប្រាក់បៀវត្សរ៍ដល់វិស្វករជាន់ខ្ពស់ (បទពិសោធន៍ច្រើនជាង 8 ឆ្នាំ) ចំនួន 400,000 ដុល្លារ/ឆ្នាំ។ វិស្វករថ្មី ទទួលបានពី 130,000 ដល់ 250,000 ដុល្លារ អមនឹងប្រាក់រង្វាន់ប្រហែល 200,000 ដុល្លារ អាស្រ័យលើគោលដៅដែលសម្រេចបាន។
Apple
វិស្វករកម្រិតបីនៅក្រុមហ៊ុន Apple ទទួលបានប្រាក់បៀវត្សរ៍ប្រហែល 160,000 ជារៀងរាល់ឆ្នាំ ប៉ុន្តែក៏អាចទទួលបានប្រាក់រង្វាន់ចាប់ពី 200,000 ដល់ 250,000 ដុល្លារ បើសិនសម្រេចគោលដៅដែលបានកំណត់។ ចំណែកអ្នកដែលមានបទពិសោធន៍ច្រើនជាងនេះ អាចទទួលបានពី 330,000 ដល់ 500,000 ដុល្លារ/ឆ្នាំ។ ពួកគេនឹងទទួលបានប្រាក់ខែគោល 200,000 ដុល្លារ អមនឹងប្រាក់ឧបត្ថម្ភជាភាគហ៊ុន តម្លៃចាប់ពី 100,000 ដុល្លារ។ វិស្វករ AI អាចទទួលបាន 505,000 ដុល្លារ។
Meta
វិស្វករដែលទើបចូលធ្វើការនឹងទទួលបានប្រាក់បៀវត្សរ៍ប្រហែល 170,000 ដុល្លារក្នុងមួយឆ្នាំ។ សម្រាប់វិស្វករកម្រិតមធ្យម អាចទទួលបានប្រាក់បៀវត្សរ៍គោលដូចខាងលើ បូកនឹងភាគហ៊ុនតម្លៃ 80,000 និងប្រាក់រង្វាន់គោលដៅប្រចាំឆ្នាំ 15,000 ដុល្លារ។ ចំណែកវិស្វាករជាន់ខ្ពស់អាចទទួលបានរហូតដល់ពី 1.5 ដល់ 2 លានដុល្លារ។
Amazon
ប្រាក់ចំណូលរបស់បុគ្គលិក Amazon អាស្រ័យលើរង្វាន់ជាភាគហ៊ុន។ វិស្វករ AI អាចទទួលបានប្រហែល 300,000 ដុល្លារក្នុងមួយឆ្នាំ ក្នុងនោះមានសាច់ប្រាក់សុទ្ធ 200,000 ដុល្លារ និងភាគហ៊ុនតម្លៃ 120,000 ដុល្លារ។ អ្នកដែលមានសញ្ញាបត្របណ្ឌិត ទទួលបានពី 250,000 ដល់ 300,000 ដុល្លារ គ្រាដែលវិស្វករជាន់ខ្ពស់ទទួលបានពី 350,000 ដល់ 500,000 ដុល្លារ៕
June 10, 2023