២០២០ - La Reine Media

អបអរសាទរខួប១ឆ្នាំ នៃការបើកដំណើរការជាផ្លូវការរោងចក្រដំឡើងរថយន្ត Ford និងពិធីប្រគល់-ទទួលអំណោយរថយន្តគិលានសង្គ្រោះ Ambulance ជូនដល់កាកបាទក្រហមកម្ពុជា សាខាខេត្តពោធិ៍សាត់

[ភ្នំពេញ – ថ្ងៃទី ១៣ ខែកក្កដា ឆ្នាំ២០២៣] ក្រុមហ៊ុន RMA (Cambodia) PLC ដែលជាក្រុមហ៊ុននាំចូល និងចែកចាយផ្តាច់មុខរថយន្ត Ford ក្នុងទីផ្សារប្រទេសកម្ពុជាបានប្រារព្ធពិធីប្រគល់-ទទួលអំណោយរថយន្តគិលានសង្គ្រោះចំនួន ២ គ្រឿង ជូនទៅដល់កាកបាទក្រហមកម្ពុជា សាខាខេត្តពោធិ៍សាត់ ដែលកម្មវិធីនេះត្រូវបានប្រារព្ធឡើង ក្រោមអធិបតីភាពរបស់ ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងអគ្គនាយកអគ្គីសនីកម្ពុជា និងលោកអភិបាលនៃគណៈអភិបាលខេត្តពោធិ៍សាត់ ព្រមទាំងថ្នាក់ដឹកនាំក្រុមហ៊ុន Ford Motor Company ថ្នាក់ដឹកនាំក្រុមហ៊ុន RMA Group និងក្រុមហ៊ុន RMA (Cambodia) PLC រួមទាំងភ្ញៀវកិត្តិយសជាតិ និងអន្តរជាតិប្រមាណជាង ២០០ នាក់។ កម្មវិធីនេះបានប្រារព្ធឡើងនៅក្នុងបរិវេនរោងចក្រដំឡើងរថយន្ត Ford ក្នុងភូមិសារវ័ន ឃុំស្នាអន្សារ ស្រុកក្រគរ ខេត្តពោធិ៍សាត់ នៅថ្ងៃទី ១១ ខែកក្កដា ឆ្នាំ ២០២៣ ។

ក្នុងឱកាសនៃពីធីអបអរសាទរខួប១ឆ្នាំ នៃការបើកដំណើរការជាផ្លូវការរោងចក្រដំឡើងរថយន្ត Ford និងពិធីប្រគល់-ទទួលអំណោយរថយន្តគិលានសង្គ្រោះ Ambulance ចំនួន ២ គ្រឿង ជូនដល់កាកបាទក្រហមកម្ពុជា សាខាខេត្តពោធិ៍សាត់ លោក ងន សាំង អគ្គនាយកក្រុមហ៊ុន RMA (Cambodia) PLC បានមានប្រសាសន៍ថា៖ “ យើងខ្ញុំមានមោទភាពជាពន់ពេកដែលទទួលបានសេចក្ដីទុកចិត្តពីក្រុមហ៊ុន FORD MOTOR COMPANY ក្នុងការដំឡើងរថយន្ត FORD RANGER និង FORD EVEREST ជំនាន់ថ្មីនៅ លើទឹកដីនៃព្រះរាជាណាចក្រកម្ពុជា ស្របតាមស្តង់ដាររបស់ក្រុមហ៊ុន FORD ។ យើងខ្ញុំជឿជាក់ថា ការបោះជំហានវិនិយោគក្នុងវិស័យយានយន្តរបស់ក្រុមហ៊ុនយើងខ្ញុំ ចូលរួមចំណែកយ៉ាងសំខាន់ ក្នុងការអភិវឌ្ឍវិស័យឧសហ្សាកម្មយានយន្តនៅកម្ពុជា និងជាសក្ខីភាពនៃទំនុកចិត្តលើកិច្ចខិតខំប្រឹង ប្រែងរបស់រដ្ឋាភិបាលក្នុងការធ្វើឱ្យប្រសើរឡើង នូវបរិយាកាសធុរកិច្ច និងវិនិយោគ។ វត្តមានរបស់ រោងចក្រយើងខ្ញុំក៏បានចូលរួមចំណែកការកាត់បន្ថយការធ្វើចំណាកស្រុកទៅធ្វើការនៅក្រៅប្រទេស របស់ប្រជាពលរដ្ឋ និងលើកកម្ពស់សេដ្ឋកិច្ចក្នុងតំបន់តាមរយៈការជំរុញសន្ទុះអាជីវកម្មសហគ្រាស ធុនតូច និងមធ្យម ការបង្កើតឱកាសការងារដោយផ្ទាល់និងដោយប្រយោល ក៏ដូចជាការអភិវឌ្ឍន៍ ធនធានមនុស្សនៅក្នុងទឹកដី ខេត្តពោធិ៍សាត់នេះផ្ទាល់ផងដែរ។ ”

មិនតែប៉ុណ្ណោះ លោកក៏បានបន្ថែមទៀតថា៖ “ ក្រុមហ៊ុនយើងខ្ញុំនឹងបន្តប្តេជ្ញាគាំទ្រ និង ជំរុញវិស័យឧស្សាហកម្មយានយន្តនៅកម្ពុជា ដើម្បីឱ្យកម្ពុជា ផ្លាស់ប្ដូរមុខមាត់ថ្មី ពីប្រទេសដែលដំឡើងរថយន្ត ទៅជាប្រទេសដែលផលិតរថយន្ត ក្នុងពេលអនាគត។ ក្រុមហ៊ុននឹងពង្រីកការវិនិយោគគម្រោងដំឡើងរថយន្ត Ford ដោយបង្កើនការនាំចូលនៃចំនួន គ្រឿងបង្គុំច្រើនជាងមុន បង្កើនចំនួនការងារក្នុងស្រុក ជំរុញការប្រើប្រាស់ធាតុផ្សំក្នុងស្រុក និងបង្កើន ដើមទុនវិនិយោគបន្ថែមទៀត។ យើងខ្ញុំជឿជាក់ថា ការវិនិយោគនេះនឹងបន្តផ្តល់អត្ថប្រយោជន៍ជាច្រើនបន្ថែមទៀតជូនប្រទេសកម្ពុជា ជាពិសេសការអភិវឌ្ឍន៍ខ្សែសង្វាក់ផ្គត់ផ្គង់ និងធ្វើឱ្យប្រសើរ ឡើងនូវខ្សែចង្វាក់ដែលគាំទ្រគោលនយោបាយអភិវឌ្ឍវិស័យឧស្សាហកម្មរបស់រាជរដ្ឋាភិបាលកម្ពុជា។ ការវិនិយោគនេះ នឹងនាំមកនូវផលិតផលថ្មី បច្ចេកវិទ្យាថ្មី ដើម្បីផ្គត់ ផ្គង់តម្រូវការប្រើប្រាស់រថយន្តថ្មីក្នុងស្រុក ជាមួយនឹងមោទភាពផលិតកម្មក្នុងស្រុក រោងចក្រ ដំឡើងរថយន្ត Ford នឹងបន្តទាក់ទាញវិនិយោគិនផ្សេងៗជាច្រើនទៀតមកវិនិយោគនៅកម្ពុជា ជា ពិសេស អ្នកវិនិយោគដែល ពាក់ព័ន្ធនឹងការផលិត និងដំឡើងរថយន្ត ដូចជា៖ សំបកកង់ កង់ឡាន ខ្សែភ្លើងឡាន អាគុយឡាន និងអាជីវកម្មផ្សេងៗទៀត។”

ឆ្លៀតក្នុងឱកាសនេះដែរ លោកស្រី Kay Hart ប្រធានគ្រប់គ្រងទីផ្សារអន្តរជាតិនៃក្រុមហ៊ុន Ford Motor Company បានមានប្រសាសន៍ថា៖ “ រថយន្តគិលានសង្គ្រោះ (The Next-Generation Ford Ranger-Converted Ambulances) នេះ បានបំពាក់មកជាមួយនូវបច្ចេកវិទ្យា និងប្រព័ន្ធសុវត្ថិភាពទំនើបជំនាន់ចុងក្រោយដែលធ្វើឱ្យរថយន្តនេះក្លាយជារថយន្តមួយដែលមានលក្ខណៈ ធន់ រឹងមាំ និងមានសមត្ថភាពក្នុងការចល័ត និងដឹកជញ្ជូនអ្នកជំងឺដោយសុវត្ថិភាព។ ”

លោកស្រីក៏បានបន្តទៀតថា៖ “ រថយន្តគិលានសង្គ្រោះ (The Next-Generation Ford Ranger-Converted Ambulances) នឹងចូលរួមចំណែកយ៉ាងសំខាន់សម្រាប់កាកបាទក្រហមកម្ពុជាក្នុងខេត្តពោធិ៍សាត់ ក្នុងការគាំពារ សង្គ្រោះបន្ទាន់ និងជាជំនួយការដ៏សំខាន់ក្នុងការជួយដល់សកម្មភាពសប្បុរសធម៌ផ្សេងៗដល់ប្រជាពលរដ្ឋ និងអ្នកជំងឺដើម្បីទទួលបាននូវសេវាកម្មសង្គ្រោះបន្ទាន់មួយដែលមាន គុណភាព សុវត្ថិភាព និងប្រសិទ្ធភាព។ ”

ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងអគ្គនាយកអគ្គីសនីកម្ពុជា បានមានប្រសាសន៍ថា៖ “ ការសាងសង់រោងចក្រដំឡើងរថយន្ត Ford ក្នុងខេត្តពោធិ៍សាត់ គឺជាសក្ខីភាពមួយដែលបានបង្ហាញពីទំនុកចិត្តរបស់ក្រុមហ៊ុន RMA Cambodia មកលើរាជរដ្ឋាភិបាលកម្ពុជា ហើយការផ្តល់ជូននូវរថយន្តគិលានសង្គ្រោះ ២ គ្រឿងក្នុងថ្ងៃនេះនឹងជាការចូលរួមចំណែកដ៏សំខាន់មួយក្នុងការពង្រឹងសមត្ថភាពមូលដ្ឋានសុខាភិបាលបន្ថែមទៀត ក្នុងការឆ្លើយតបទៅនឹងតម្រូវការសេវាថែទាំសុខភាពអោយកាន់តែមានគុណភាព ប្រសិទ្ធភាព និងសុវត្ថិភាព។ ភាពជាដៃគូរវាង RMA Cambodia និងវិទ្យាស្ថានបច្ចេកទេសក្នុងស្រុករបស់យើង បានដើរតួរនាទីយ៉ាងសំខាន់ក្នុងការលើកកម្ពស់ធនធានមនុស្ស តាមរយៈការបង្កើតកម្មវិធីបណ្តុះបណ្តាលដោយផ្ទាល់ពីអ្នកជំនាញដែលគ្រឹះមួយដ៏សំខាន់សម្រាប់យុវជន ក៏ដូចជាយុវនារីក្នុងការត្រៀមខ្លួនរួចជាស្រេចសម្រាប់ភាពជោគជ័យនាពេលខាងមុខ។ ”

គួរបញ្ជាក់ផងដែរថា ក្រុមហ៊ុន RMA (CAMBODIA) PLC ជាក្រុមហ៊ុនដំបូងគេបំផុត ដែលទទួលបានការទទួលស្គាល់ពី វិទ្យាស្ថានស្ដង់ដារកម្ពុជា នៃ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្នុងនាមជាអ្នក អនុវត្តស្តង់ដារសុវត្ថិភាពយានយន្ត និងស្តង់ដារសុវត្ថិភាពគ្រឿងបង្គុំយានយន្តបានខ្ពស់បំផុត។ ក្នុងឆ្នាំ ២០២០ ក្រុមហ៊ុន RMA (CAMBODIA) PLC បានចុះបញ្ជីលក់មូលបត្រ បំណុលចំនួន ៨០ ពាន់លានរៀល ដែលស្មើនឹង ២០ លានដុល្លារអាមេរិក ក្នុងផ្សារមូលបត្រកម្ពុជា ហើយក្លាយជាក្រុមហ៊ុនមិនមែនស្ថាប័នហិរញ្ញវត្ថុដែលបានបោះផ្សាយមូលបត្របំណុលដំបូងគេបង្អស់នៅប្រទេសកម្ពុជា។ ការបោះផ្សាយមូលបត្របំណុលនេះ បង្ហាញពីកិច្ចខិតខំប្រឹងប្រែងរបស់ក្រុមហ៊ុនយើងខ្ញុំក្នុងការលើកកម្ពស់ទីផ្សារមូលបត្រកម្ពុជា និងចូលរួមចំណែកអភិវឌ្ឍទីផ្សារហិរញ្ញវត្ថុនៅប្រទេសកម្ពុជា។

តាមរយៈកំណើនសេដ្ឋកិច្ច និងកំរិត GDP របស់ប្រជាជនកម្ពុជាកើនឡើងខ្ពស់ជាបន្តបន្ទាប់ បានធ្វើឱ្យប្រជាជនកម្ពុជាងាកមកប្រើប្រាស់រថយន្តថ្មីមានការកើនឡើងជាលំដាប់។ ក្នុងនោះការប្រើប្រាស់ រថយន្តថ្មីម៉ាក FORD មានកំណើនកាន់តែច្រើនឡើង និងបានក្លាយជាជម្រើសឈានមុខរបស់អតិថិជននៅកម្ពុជា។ ដូច្នេះ ក្រុមហ៊ុនបានសម្រេចចិត្តបង្កើតរោងចក្រដំឡើងរថយន្ត FORD ដែលទទួលបានសិទ្ធិពេញលេញក្នុងការផ្គុំ និងដំឡើងរថយន្តពីក្រុមហ៊ុនម្ចាស់ដើម FORD MOTOR COMPANY។ រោងចក្រនេះ ត្រូវបានសាងសង់ឡើងនៅលើផ្ទៃដីសរុបប្រមាណជាង ៥ ហិកតា ស្ថិតក្នុងភូមិសារវ័ន ឃុំស្នាអន្សា ស្រុកក្រគរ ខេត្តពោធិ៍សាត់ ជាមួយនឹងទុនវិនិយោគចំនួន ២១ លានដុល្លារសហរដ្ឋអាមេរិក ដែលអាចបង្កើតការងារជំនាញបានជាង ៥០០ កន្លែង និងមានសមត្ថភាពអាចដំឡើងរថយន្តបានចំនួនប្រមាណ ៩,០០០ គ្រឿងក្នុងមួយឆ្នាំ។

រហូតមកដល់ពេលនេះ ក្រុមហ៊ុនបានដំឡើងរថយន្ត Ford Ranger Wildtrak និងរថយន្ត Ford Everest បានចំនួន ៣,០០០ គ្រឿងដើម្បីបម្រើតម្រូវការទីផ្សារក្នុងស្រុក។ ក្រុមហ៊ុនបន្តសហការ ជាមួយនឹងវិទ្យាស្ថានពហុបច្ចេកទេសខេត្តពោធិ៍សាត់ក្នុងការបណ្តុះបណ្តាលអភិវឌ្ឍជំនាញបច្ចេកទេសដល់បុគ្គលិកក្រុមហ៊ុនដើម្បីធានាឱ្យបាននូវធនធានមនុស្សប្រកបដោយគុណភាព។ ថ្មីៗនេះ ក្រុមហ៊ុនបានបញ្ជូនបុគ្គលិកទៅប្រទេស Australia ដើម្បីសិក្សាអំពីបច្ចេកវិទ្យាដំឡើងរថយន្ត ក្នុងគោលបំណងបង្កើនកម្រិតបច្ចេកទេសបុគ្គលិកក៏ដូចជាពាំនាំចំណេះដឹងថ្មី និង បច្ចេកវិទ្យាថ្មីមកប្រទេសកម្ពុជា។ ដើម្បីបន្តចូលរួមលើកកម្ពស់វិស័យយានយន្ត ក្រុមហ៊ុននឹងបង្កើតមជ្ឈមណ្ឌលអប់រំបណ្ដុះបណ្ដាលបច្ចេកទេស និងវិជ្ជាជីវៈដើម្បីផ្ដល់ឱកាសឱ្យប្រជាពលរដ្ឋកម្ពុជាទទួលបានការបណ្តុះបណ្តាលជំនាញបច្ចេកទេសប្រកបដោយគុណភាពដើម្បីចូលរួមចំណែកអភិវឌ្ឍធនធាន មនុស្សនៅកម្ពុជាស្របតាមគោលនយោបាយអភិវឌ្ឍវិស័យឧស្សាហកម្មរបស់រាជរដ្ឋាភិបាលកម្ពុជា។

July 14, 2023

បរិយាកាសបុណ្យណូអែលនៅជុំវិញពិភពលោក ក្នុងសម័យ Covid-19

បណ្ដាប្រទេស និងតំបន់នានាក្នុងពិភពលោក បានត្រៀមរួចរាល់ហើយសម្រាប់ទទួលអំណរថ្ងៃបុណ្យណូអែល ឬបុណ្យគ្រីស្តម៉ាស ជាថ្ងៃដែលព្រះយេស៊ូគ្រិស្តប្រសូត្រ។

រដូវបុណ្យណូអែលឆ្នាំនេះ ប្រារព្ធឡើងក្នុងស្ថានភាពដែលករណីឆ្លង និងស្លាប់ដោយសារវីរុស Covid-19 មិនទាន់មានសញ្ញាថយចុះសោះឡើយ។

ក្នុងរូបភាពខាងលើដែលត្រូវបានថតកាលពីថ្ងៃទី 22 ខែធ្នូកន្លងទៅនេះ គឺជាផ្ទះមួយខ្នងដែលត្រូវបានតុបតែងដើម្បីទទួលអំណរថ្ងៃបុណ្យណូអែល នៅក្នុងតំបន់ Hastings Ranch នៃទីក្រុង Pasadena រដ្ឋ California សហរដ្ឋអាមេរិក។

ទីលាន Francisco Morazan ក្នុងរដ្ឋធានី San Salvador នៃប្រទេស El Salvador (អាមេរិកកណ្ដាល) ត្រូវបានតុបតែងលម្អ និងរង់ចាំអបអរបុណ្យណូអែល ដែលនឹងប្រារព្ធនៅថ្ងៃទី 25 ខែធ្នូនេះ។

ប្រជាជននាំគ្នាថតរូបសែលហ្វ៊ី នៅខាងមុខដើមណូអែលនៅទីក្រុង Kiev នៃប្រទេសអ៊ុយក្រែន។

នៅទីក្រុង Stansstad នៃប្រទេសស្វីស គេឃើញមានផ្ទះមួយខ្នង រួមនឹងដើមឈើនៅក្បែរនោះ ត្រូវបានតុបតែងយ៉ាងស្រស់ស្អាតដោយប្រើប្រាស់ប្រព័ន្ធអំពូលភ្លើងពណ៌គួរជាទីគយគន់។

ដើមណូអែលដែលត្រូវបានតុបតែងនៅលើទីលាន Palace កណ្ដាលទីក្រុង St. Petersburg នៃប្រទេសរុស្ស៊ី។

ទីងមោង ឬរូបត្លុកជាច្រើនមានការតុបតែងភ្លើងពណ៌យ៉ាងលេចធ្លោ ដែលគេហៅថា Magic Delivery ត្រូវបានដាក់លម្អភ្នែកនៅតាមចិញ្ចើមវិថិទី 5 (5th Avenue) ក្នុងទីក្រុង New York នៃរដ្ឋ New York សហរដ្ឋអាមេរិក។

វិមាន Hotel de Ville នៅទីក្រុងប៉ារីស ប្រទេសបារាំង នៅក្នុងរាត្រីនៃថ្ងៃទី 11 ខែធ្នូ 2020។

បុរសម្នាក់ស្លៀកពាក់ជាលោកតាណូអែល កំពុងហៅទូរស័ព្ទតាមអនឡាញទៅកាន់កុមារនានា នៅទីក្រុង Rome ប្រទេសអ៊ីតាលី។

«លោកតាណូអែល» បាញ់ទឹកអាល់កុលកម្ចាត់មេរោគឱ្យក្មេងៗ ដែលកំពុងរស់នៅក្នុងតំបន់សម្បុកកណ្ដុរ នាទីក្រុង Mumbai ប្រទេសឥណ្ឌា មុនពេលចែកកាដូ។

បុគ្គលិកសុខាភិបាលដែលថែទាំអ្នកជំងឺ Covid-19 នៅមណ្ឌលសុខភាពប្រចាំតំបន់ Trinitas ក្នុងទីក្រុង Elizabeth រដ្ឋ New Jersey សហរដ្ឋអាមេរិក។

ប្រភព៖ Reuters

December 25, 2020

ទិដ្ឋភាពប្លែកៗនៅខាងក្នុងនិងក្រៅការិយាល័យបោះឆ្នោតនៅសហរដ្ឋអាមរិក

ក្នុងថ្ងៃទី3វិច្ឆិកា2020 ពលរដ្ឋអាមេរិកាំងរាប់លាននាក់ បានទៅបោះឆ្នោតជ្រើសរើសប្រធានាធិបតី និងសភាជាតិសម្រាប់អាណត្តិ4ឆ្នាំខាងមុខ។ ការបោះឆ្នោតលើកនេះ មណ្ឌលបោះឆ្នោតមួយចំនួនត្រូវបានដាក់នៅក្នុងទីតាំងដ៏ចម្លែកៗ មានដូចជា បន្ទប់បោះឆ្នោតនៅក្នុងហាងបោកគក់ខោអាវ ហាងស្រា និងវិហារអ៊ីស្លាម។ល។

ខាងក្រោមនេះគឺជាទិដ្ឋភាពប្លែកៗ នៅជុំវិញ និងក្នុងការិយាល័យបោះឆ្នោតនៅសហរដ្ឋអាមេរិក៖

ទិដ្ឋភាពប្លែកៗនៅក្នុងនិងក្រៅការិយាល័យបោះឆ្នោតនៅសហរដ្ឋអាមរិក

នៅឯ Azusa, California បន្ទប់បោះឆ្នោតត្រូវបានដាក់ក្នុងវិហារអ៊ីស្លាម Masjid Al-Fatiha

មនុស្សភេទទីបីម្នាក់កំពុងសម្ដែងនៅចំពោះមុខម្ចាស់ឆ្នោតនៅក្នុងបារ Buddy’s Houston រដ្ឋ Texas។ នេះគឺជាមណ្ឌលបោះឆ្នោតប្រធានាធិបតីដំបូងគេក្នុងលោកដែលត្រូវបានដាក់នៅក្នុងបារសម្រាប់ក្រុមមនុស្សភេទទីបី។

ប្រភព៖ Reuters, AFP, EPA, Getty

November 4, 2020

ចាក់ភ្នាល់ជាង1លានដុល្លារអាមេរិកទៅលើការជាប់ឆ្នោតរបស់បេក្ខភាព Joe Biden

មនុស្សម្នាក់ដែលមិនទាន់ត្រូវបានគេបង្ហើបឱ្យដឹងអំពីអត្តសញ្ញាណ បានចាក់ភ្នាល់ប្រាក់យ៉ាងច្រើនសន្ធឹកកាលពីថ្ងៃទី29តុលា នៅលើគេហទំព័រចាក់ភ្នាល់ធំជាងគេបង្អស់ក្នុងពិភពលោក ដែលមានឈ្មោះថា Betfair Exchage។

សារព័ត៌មាន CNN បានចេញផ្សាយថា នៅលើទំព័រ Betfair Exchange មានមនុស្សម្នាក់បានចាក់ភ្នាល់1លានផោន (1.29លានដុល្លារអាមេរិក) ទៅលើបេក្ខភាពមកពីបក្សប្រជាធិបតី Joe Biden ក្លាយជាប្រធានាធិបតីអាមេរិក។ ការចាក់ភ្នាល់នេះត្រូវបានធ្វើឡើងកាលពីថ្ងៃទី29តុលា ប៉ុន្តែអត្តសញ្ញាណរបស់មនុស្សនេះនៅតែត្រូវបានគេរក្សាការសម្ងាត់។ បើសិនជាឈ្នះ អ្នកភ្នាល់រូបនេះនឹងទទួលបានប្រាក់ចំណេញ 540,000ផោន (697,626ដុល្លារអាមេរិក) ទន្ទឺមនឹងការទទួលបានសំណងជាប្រាក់ដើមរបស់ខ្លួនត្រលប់មកវិញ។

ក្រុមអ្នកលេងល្បែងភ្នាល់យល់ថា លោក Biden មានឱកាស65%ដើម្បីឈ្នះ ខណៈលោក Trump មានត្រឹមតែ35%។ ជាងនេះ សារព័ត៌មាន FiveThirtyEight ថែមទាំងយល់ថា លោក Trump មានឱកាសឈ្នះត្រឹមតែ10%ប៉ុណ្ណោះ។

ជនជាតិអាមេរិកាំងមិនត្រូវបានអនុញ្ញាតឱ្យលេងល្បែងភ្នាល់ជាមួយនឹងការបោះឆ្នោតប្រធានាធិបតីនោះទេ។ ប៉ុន្តែ នៅប្រទេសអង់គ្លេសវិញ ការបោះឆ្នោតប្រធានាធិបតីអាមេរិក កំពុងតែក្លាយជាព្រឹត្តិការណ៍ចាក់ភ្នាល់ធំជាងគេមិនធ្លាប់មានពីមុនមក។

នេះគឺជាទឹកប្រាក់ភ្នាល់ធំជាងគេទីបីក្នុងប្រវត្តិរបស់ Betfair ហើយវាស្ថិតនៅពីក្រោយការភ្នាល់1.1លានផោនសម្រាប់ Rafael Nadal នៅក្នុងការប្រកួតដណ្ដើមពានរង្វាន់វាយកូនបាល់ tennis ឆ្នាំ2010 និងជាង1លានផោនសម្រាប់ការប្រកួតប្រដាល់រវាង Floyd Mayweather Jr. និង Connor McGregor កាលពីឆ្នាំ2017។

ប្រាក់ភ្នាល់កំពុងតែរត់ទៅរក Betfair ក្នុងល្បឿនលឿនបំផុតមិនធ្លាប់មានកន្លងមក។ គិតត្រឹមថ្ងៃចន្ទទី2តុលា ប្រាក់ភ្នាល់បានកើនឡើងដល់274លានផោន (ប្រមាណជា 351,396,000ដុល្លារអាមេរិក)។ ខ្ទង់ប្រាក់ភ្នាល់នីមួយៗតែងត្រូវការពេលច្រើនថ្ងៃទើបត្រូវបានគេកត់ត្រា ដូច្នេះ ខ្ទង់ប្រាក់ភ្នាល់ទៅលើការបោះឆ្នោតប្រធានាធីបតីអាមេរិក អាចមានច្រើនជាងពេលនេះ។ Betfair ប៉ាន់ប្រមាណឃើញថា ខ្ទង់ប្រាក់ភ្នាល់នេះអាចឡើងដល់400លានដុល្លារអាមេរិក ពោលគឺខ្ពស់ជាងទ្វេដងបើធៀបនឹងការភ្នាល់លើការបោះឆ្នោតប្រធានាធិបតីអាមេរិកកាលពីឆ្នាំ2016។

ខ្ទង់ប្រាក់ភ្នាល់ដែលធំជាងគេក្នុងវិស័យនយោបាយនៅលើ Betfair Exchange កន្លងមក គឺមានត្រឹម 555,000ផោន សម្រាប់លោក Trump កាលពីឆ្នាំ2016។ មួយខែមុនការបោះឆ្នោតឆ្នាំនោះ ក៏មានមនុស្សម្នាក់បានភ្នាល់550,000ផោនផងដែរសម្រាប់បេក្ខភាព Hillary Clonton៕

ប្រភព៖ CNN

November 3, 2020

ពលរដ្ឋអាមេរិកាំងនៅមូលដ្ឋាន មិនមែនជាអ្នកបោះឆ្នោតជ្រើសរើសប្រធានាធិបតីដោយផ្ទាល់នោះឡើយ

ពលរដ្ឋអាមេរិកាំង មិនបោះឆ្នោតជ្រើសរើសប្រធានាធិបតីដោយផ្ទាល់នោះទេ ប៉ុន្តែ ប្រតិភូតំណាងម្ចាស់ឆ្នោតឯណោះទេដែលមានតួនាទីបោះឆ្នោតជ្រើសរើសប្រធានាធិបតីដោយផ្ទាល់ ដោយយោងទៅលើលទ្ធផលនៃការបោះឆ្នោតនៅមូលដ្ឋានរបស់បណ្ដារដ្ឋ។

ពលរដ្ឋអាមេរិកាំងគ្រប់រូបដែលមានអាយុចាប់ពី18ឆ្នាំឡើងទៅ មានសិទ្ធិទៅបោះឆ្នោតជ្រើសរើសប្រធានាធិបតី ដែលនេះត្រូវបានគេហៅថា “សំឡេងឆ្នោតប្រជាប្រិយ (popular vote)។ ក៏ប៉ុន្តែ តាមច្បាប់ ប្រតិភូដែលជាតំណាងរបស់ម្ចាស់ឆ្នោតប្រជាប្រិយ (electoral vote/electoral college) ឯណោះទេ ទើបជាអ្នកបោះឆ្នោតជ្រើសរើសប្រធានាធិបតីដោយផ្ទាល់។

បេក្ខភាពនីមួយៗត្រូវការសំឡេងឆ្នោតពីប្រតិភូតំណាងម្ចាស់ឆ្នោតចំនួន270សំឡេង ទើបក្លាយជាប្រធានាធិបតី។ ក្រុមមេដឹកនាំប្រទេស បានបង្កើតប្រតិភូតំណាងម្ចាស់ឆ្នោតនេះឡើង ក៏ព្រោះតែពួកគេមានការព្រួយបារម្ភ ខ្លាចបណ្ដារដ្ឋដែលមានប្រជាជនតិចជាង អាចមិនមានអ្នកតំណាងប្រកបដោយយុត្តិធម៌។ ម្យ៉ាងទៀត ពួកគេក៏យល់ថា “មនុស្សធម្មតា” ទទួលព័ត៌មានមិនគ្រប់ជ្រុងជ្រោយដើម្បីធ្វើការសម្រេចចិត្តបោះឆ្នោតជ្រើសរើសប្រធានាធិបតីដែលស័ក្ដិសម។ ដូច្នេះ ពួកគេក៏បង្កើតប្រតិភូតំណាងម្ចាស់ឆ្នោតនេះឡើង ដែលបច្ចុប្បន្នមានចំនួន538រូប ដោយរួមទាំងតំណាងរាស្ត្រមកពីសភាជាន់ខ្ពស់ និងជាន់ទាបរបស់រដ្ឋចំនួន50នៃសហរដ្ឋអាមេរិកផងដែរ។ ដោយឡែក រដ្ឋធានីវ៉ាស៊ីងតោន មានប្រតិភូតំណាងម្ចាស់ឆ្នោតចំនួន3រូប។

ដើម្បីទទួលបានតំណែងប្រធានាធិបតី បេក្ខភាពត្រូវតែទទួលបានសន្លឹកឆ្នោតគាំទ្រយ៉ាងតិច270សំឡេងពីប្រតិភូតំណាងម្ចាស់ឆ្នោត។ ដើម្បីទទួលបានសំឡេងឆ្នោតពីប្រតិភូតំណាង ជាទូទៅ បេក្ខភាពត្រូវតែទទួលបានសន្លឹកឆ្នោតគាំទ្រច្រើនជាងគេពីពលរដ្ឋមូលដ្ឋាននៅក្នុងរដ្ឋនីមួយៗ។

បើសិនជាទទួលបានសំឡេងឆ្នោតគាំទ្រគ្រប់គ្រាន់ពីពលរដ្ឋនៅ California បេក្ខភាពនឹងទទួលបានសន្លឹកឆ្នោតគាំទ្រ55សំឡេងពីប្រតិភូតំណាងម្ចាស់ឆ្នោតរបស់រដ្ឋនេះ។ បើសិនជាទទួលបានសំឡេងឆ្នោតគាំទ្រគ្រប់គ្រាន់ពីពលរដ្ឋនៅ Texas បេក្ខភាពនឹងទទួលបានសន្លឹកឆ្នោតគាំទ្រ35សំឡេងពីប្រតិភូតំណាងម្ចាស់ឆ្នោតរបស់រដ្ឋនេះ។ នេះគឺជាប្រព័ន្ធ “អ្នកឈ្នះទទួលបានគ្រប់យ៉ាង”។

ក៏ប៉ុន្តែ ជួនកាល បេក្ខភាពដែលទទួលបានសំឡេងឆ្នោតគាំទ្រពីពលរដ្ឋច្រើនជាងគេនៅទូទាំងប្រទេស (popular vote) ប៉ុន្តែ មិនទទួលបានសំឡេងឆ្នោតគាំទ្រគ្រប់គ្រាន់ពីប្រតិភូតំណាងម្ចាស់ឆ្នោតផងដែរ។ ករណីនេះបានកើតឡើងកាលពីឆ្នាំ2016 នៅពេលបេក្ខភាពមកពីបក្សប្រជាធិបតេយ្យ លោកស្រី Hillary Clinton ទទួលបានសំឡេងឆ្នោតគាំទ្រពីពលរដ្ឋ (popular vote) ច្រើនជាងគេ ប៉ុន្តែ បេក្ខភាពមកពីបក្សសាធារណរដ្ឋ លោក Donald Trump មានប្រៀបជាងនៅក្នុងបណ្ដារដ្ឋដែលមានប្រជាជនតិចជាង ហើយក៏មានប្រៀបជាងនៅក្នុងការបោះឆ្នោតរបស់ប្រតិភូតំណាងម្ចាស់ឆ្នោត ដោយសារតែប្រព័ន្ធ “អ្នកឈ្នះទទួលបានគ្រប់យ៉ាង” នេះ។

លទ្ធផលនៃការបោះឆ្នោតប្រជាប្រិយ (popular vote) និងការបោះឆ្នោតពីប្រតិភូតំណាងម្ចាស់ឆ្នោត មានលទ្ធផលខុសគ្នាតែ5ដងប៉ុណ្ណោះ នៅក្នុងប្រវត្តិសាស្ត្រសហរដ្ឋអាមេរិក៕

ប្រភព៖ Next

November 3, 2020

កូរ៉េខាងជើងឆ្នាំ2020៖ ករណីប្រហារជីវិតព្រោះតែមើលភាពយន្តកូរ៉េខាងត្បូង មានការកើនឡើង

ជីវភាពរស់នៅរបស់ប្រជាជនកូរ៉េខាងជើងក្រោមការគ្រប់គ្រងរបស់គ្រួសារត្រកូល Kim នៅតែជាអាថ៌កំបាំងដែលពិភពលោកចាប់អារម្មណ៍។ ក្នុងសៀវភៅ “សៀវភៅសស្ដីអំពីសិទ្ធិមនុស្សរបស់កូរ៉េខាងជើងឆ្នាំ2020” របស់វិទ្យាស្ថានបង្រួបបង្រួមកូរ៉េខាងត្បូង (Korea Institute for National) ដែលត្រូវបានចេញផ្សាយកាលពីថ្ងៃទី12ឧសភាកន្លងទៅ បានបង្ហាញថា ក្នុងរយៈពេលច្រើនឆ្នាំចុងក្រោយនេះ ករណីកាត់ទោសប្រហារជីវិតនៅកូរ៉េខាងជើងមានការកើនឡើងខ្ពស់ ពិសេសគឺពាក់ព័ន្ធនឹងការប្រើប្រាស់គ្រឿងញៀន ការរក្សាទុក និងចែករំលែកខ្សែភាពយន្តកូរ៉េខាងត្បូង ទន្ទឹមនឹងនេះ ការផ្សព្វផ្សាយសាសនាគ្រិស្ត និងរក្សាទុកគម្ពីរគ្រិស្តសាសនាក៏ត្រូវបានកាត់ទោសប្រហារជីវិតផងដែរ។

រូបភាព៖ យោងតាម “សៀវភៅសស្ដីអំពីសិទ្ធិមនុស្សរបស់កូរ៉េខាងជើងឆ្នាំ2020” ស្ថានភាពនៃការណីប្រហារជីវិតនៅកូរ៉េខាងជើងបង្ហាញថា ការចែកចាយ និងប្រើប្រាស់គ្រឿងញៀន ការមើលនិងចែករំលែកភាពយន្តទូរទស្សន៍កូរ៉េខាងត្បូង ការផ្សព្វផ្សាយសាសនាគ្រិស្តនិងរក្សាគម្ពីរគ្រិស្តសាសនានៅក្នុងប្រទេសនេះមានការកើនឡើង

យោងតាមសារព័ត៌មាន JoongAng Ilbo របស់រដ្ឋាភិបាលកូរ៉េខាងត្បូង ខ្លឹមសាររបស់សៀវភៅសបានឱ្យដឹងថា ស្ថានភាពប្រជាជននៅកូរ៉េខាងជើងដែលទស្សនានិងចែករំលែកខ្សែភាពយន្តទូរទស្សន៍របស់កូរ៉េខាងត្បូងមានការកើនឡើងច្រើន ធ្វើឱ្យរដ្ឋាភិបាលទីក្រុងព្យុងយ៉ាងរឹតបន្តឹងការហាម និងការដាក់ទណ្ឌកម្ម។ ពលរដ្ឋម្នាក់ដែលបានរត់ចេញពីប្រទេសកូរ៉េខាងជើងបានសម្រេច បាននិយាយថា កាលពីឆ្នាំ2014 នៅទីលានមួយក្នុងខេត្ត North Hamgyong រដ្ឋអំណាចបានប្រហារជីវិតពលរដ្ឋដែលបានរត់ពន្ធថាសភាពយន្តទូរទស្សន៍កូរ៉េខាងត្បូង និងអ្នកជួញដូរថ្នាំញៀន។ ក្នុងឆ្នាំដដែល រដ្ឋអំណាចខេត្ត Ryanggang ក៏បានប្រហារជីវិតបុរស2នាក់ដោយចោទប្រកាន់ថាបានចែកចាយខ្សែភាពយន្តកូរ៉េខាងត្បូង និងផ្ដល់អាសយដ្ឋានទីតាំងអ្នករកស៊ីផ្លូវភេទ។

អ្នករត់គេចខ្លួនពីកូរ៉េខាងជើងក៏បាននិយាយថា រដ្ឋាភិបាលប្រទេសនេះបានហាមការផ្សព្វផ្សាយសាសនាគ្រិស្តផងដែរ ហើយអ្នកដែលរក្សាទុកគម្ពីរគ្រិស្តសាសនាក៏នឹងត្រូវប្រហារជីវិតជាសាធារណៈ។ ស្ថានភាពសិទ្ធិមនុស្សនៅក្នុងបណ្ដាពន្ធនាគាររបស់កូរ៉េខាងជើង មានលក្ខណៈអាក្រក់ជាងការស្មានទៅទៀត ដោយរដ្ឋអំណាចតែងតែធ្វើការហួសពីច្បាប់ដែលបានកំណត់ ពួកគេប្រហារជីវិតមនុស្សដោយមិនបាច់មានការកាត់ទោស។ ជនជាតិកូរ៉េខាងជើងដែលបានរត់ចោលប្រទេសបានថ្លែងថា កន្លងមក នៅក្នុងជំរំអ្នកទោស Chongori នៅខេត្ត North Hamgyong មានករណីអ្នកទោសវាយតប់គ្នាដែលធ្វើឱ្យអ្នកទោសម្នាក់ស្លាប់ ក្រោយមកអ្នកទោសម្នាក់ដែលបានចូលរួមក្នុងការវាយគ្នានោះក៏ត្រូវបានប្រហារជីវិតដោយការបាញ់សម្លាប់នៅនឹងមុខអ្នកទោសផ្សេងទៀត។

“សៀវភៅសស្ដីអំពីសិទ្ធិមនុស្សរបស់កូរ៉េខាងជើងឆ្នាំ2020” ក៏បានឱ្យដឹងថា បើទោះជាអាជ្ញាធរកូរ៉េខាងជើងតែងតែប្រហារជីវិតជាសាធារណៈ ប៉ុន្តែក្នុងមួយរយៈពេលចុងក្រោយនេះ ក្រុមមេដឹកនាំបានកាត់បន្ថយការបង្ខិតបង្ខំឱ្យពលរដ្ឋមូលដ្ឋានទៅមើលការប្រហារជីវិតរបស់រដ្ឋអំណាច ដូច្នេះ តួលេខនៃអ្នកទៅមើលការប្រហារជីវិតនៅកូរ៉េខាងជើងមានការថយចុះច្រើនជាបន្តបន្ទាប់។

សោកនាដកម្មនៅក្នុងជំរំអ្នកទោស

យោងតាមសារព័ត៌មាន The Asahi Shimbun របស់ជប៉ុន កាលពីឆ្នាំ2018 បានចេញផ្សាយថា ស្ថាប័ននេះបានសម្ភាសជាមួយស្ត្រីជនជាតិកូរ៉េខាងជើងម្នាក់ដែលមានឈ្មោះសម្គាល់ថា Eun-sook ដែលធ្លាប់ត្រូវបានឃុំខ្លួននៅក្នុងជំរំអ្នកទោស Chongori (ឬហៅថាជំរំ Kyo-hwa-so No.12) ក្នុងទីក្រុង Hoeryong ខែត្ត North Hamgyong។

Eun-sook បានឱ្យដឹងថា ជំរំអ្នកទោសខាងលើនេះមានអ្នកទោសភេទប្រុសសរុបប្រហែល2,000នាក់ និងស្រី600នាក់ ដែលភាគច្រើន (60%) ជាអ្នករត់គេចខ្លួនពីប្រទេសកូរ៉េខាងជើង ប៉ុន្តែត្រូវចិនបញ្ជូនត្រឡប់មកស្រុកវិញ ហើយក្រៅពីនេះគឺជាអ្នកទោសគ្រឿងញៀន និងអ្នកទោសលួចមើលខ្សែភាពយន្តកូរ៉េខាងត្បូង។ នៅក្នុងបន្ទប់ឃុំខ្លួន អ្នកទោសមានចំនួនច្រើន គឺច្រើនរហូតដល់ពេលគេង ពួកគេស្ទើរតែមិនអាចរើខ្លួនរួច។

Eun-sook បន្តថា អ្នកទោសក្នុងជំរំនេះបានធ្លាក់ខ្លួនឈឺជាបន្តបន្ទាប់ និងស្លាប់ដោយសារតែកង្វះអាហារូបត្ថម្ភ ឬកង្វះអនាម័យ។ នៅទីនេះ អ្នកទោសម្នាក់នឹងទទួលបានអាហារជាម្សៅពោធត្រឹមតែ150ក្រាម និងសម្លប្រៃមួយកូនចានប៉ុណ្ណោះសម្រាប់អាហារមួយពេល។

ឆ្នាំ2012 របាយការណ៍របស់គណៈកម្មធិការសិទ្ធិមនុស្សកូរ៉េខាងជើង (Committee for Human Rights in North Korea) ដែលជាអង្គការសិទ្ធិមនុស្សមួយរបស់សហរដ្ឋអាមេរិកក៏បានដកស្រង់សម្ដីពលរដ្ឋម្នាក់ដែលបានរត់រួចពីទឹកដីកូរ៉េខាងជើង ដែលធ្លាប់ត្រូវឃុំខ្លួននៅជំរំអ្នកទោស Kyo-hwa-so No.12 បានឱ្យដឹងថា អ្នកទោសប្រហែល800នាក់បានស្លាប់នៅក្នុងជំរំ ក្នុងអំឡូង8ខែដែលគាត់ត្រូវជាប់ឃុំនៅទីនោះ។

ពន្ធនាគារគួរឱ្យខ្លាចនៅកូរ៉េខាងជើង

យោងតាម BBC កាលពីឆ្នាំ2012 អ្នកផ្សព្វផ្សាយសាសនាម្នាក់ឈ្មោះ Kenneth Bae ត្រូវបានអាជ្ញាធរកូរ៉េខាងជើងចាប់ខ្លួន ព្រោះតែត្រូវបានគេចាត់ទុកថាជាសត្រូវរបស់ប្រទេសជាតិ។ Kenneth Bae គឺជាជនជាតិកូរ៉េខាងត្បូង ប៉ុន្តែមានសញ្ជាតិអាមេរិកាំង។ គាត់បានទៅកាន់កូរ៉េខាងជើងជាច្រើនលើក ហើយនៅពេលត្រូវបានចាប់ខ្លួន គេរកឃើញឧបករណ៍មួយដែលមានផ្ទុកព័ត៌មានស្ដីអំពីសាសនាគ្រិស្ត។ ដោយសារតែភ័ស្តុតាងនេះហើយ ទើបលោកត្រូវបានកាត់ទោសឱ្យជាប់ពន្ធនាគាររយៈពេល15ឆ្នាំ។

Kenneth Bae បានសរសេរនៅក្នុងសៀវភៅកំណត់ហេតុរបស់លោកថា ក្នុងខែដំបូងនៃការជាប់ពន្ធនាគារ លោកក៏ត្រូវមន្ត្រីពន្ធនាគារហៅទៅសួរនាំតាំងពីម៉ោង8ព្រឹកដល់ម៉ោង10 ឬ11យប់ ហើយក្រោយមកក៏បានបង្ខំឱ្យលោកសរសេរពាក្យសុំទោសរាប់សិបទំព័រ។ ចុងក្រោយក៏បានបញ្ជូនលោកទៅកាន់ជំរំពលកម្ម ដែលនៅក្នុងជំរំនេះ អ្នកទោសត្រូវក្រោកពីម៉ោង6ព្រឹក បន្ទាប់មកត្រូវធ្វើការងារធ្ងន់ធ្ងរគ្រប់យ៉ាង។ ក្នុង1សប្ដាហ៍ អ្នកទោសត្រូវជញ្ជូនថ្ម និងរករ៉ែធ្យូងថ្មចាប់ពីម៉ោង8ព្រឹកដល់ម៉ោង6ល្ងាច។ លោក Kenneth Bae បន្តថា ក្នុងរយៈពេល735ថ្ងៃនៃការទទួលទោសដោយពលកម្ម រាងកាយរបស់លោកត្រូវស្រកទម្ងន់ប្រហែល27គីឡូក្រាម ហើយសុខភាពក៏ទ្រុឌទ្រោម ដែលសព្វថ្ងៃលោកត្រូវទៅពេទ្យជាញឹកញាប់។ ក្រៅពីរងផលវិបាកផ្នែករាងកាយ លោក Kenneth Bae ក៏បានរងផលវិបាកផ្នែកសតិអារម្មណ៍ផងដែរ៕

ប្រភព៖ សារព័ត៌មានបរទេស

May 18, 2020

ត្រៀមខ្លួនគយគន់ព្រះចន្ទពេញវង់ធំបំផុតលើកចុងក្រោយបង្អស់ក្នុងឆ្នាំ2020 នាសប្ដាហ៍នេះ រួមនឹងទេពច្យុតដ៏ស្រស់ស្អាត

នេះគឺជាឱកាសល្អចុងក្រោយសម្រាប់អ្នកដែលចូលចិត្តសង្កេតមេឃា ព្រោះថាពួកគេនឹងអាចគយគន់ព្រះចន្ទដែលមានទំហំធំជាងគេ និងភ្លឺជាងគេក្នុងឆ្នាំ2020។

យោងតាមទីភ្នាក់ងារអវកាសសហរដ្ឋអាមេរិក NASA មហាព្រះចន្ទ ឬព្រះចន្ទពេញវង់ធំជាងគេសម្រាប់ឆ្នាំ2020 នឹងកើតឡើងនៅក្នុងថ្ងៃទី7ឧសភាខាងមុខ។ នៅក្នុងយប់នៃថ្ងៃនោះ ព្រះចន្ទនឹងពេញវង់ ហើយមានទំហំធំជាងធម្មតានៅវេលាម៉ោង17និង45នាទី ថ្ងៃទី7 ខែឧសភា។ នេះគឺជាមហាព្រះចន្ទលើកទី3 ហើយក៏ជាព្រះចន្ទធំជាងគេលើកចុងក្រោយបង្អស់សម្រាប់ឆ្នាំ2020។ ព្រះចន្ទពេញវង់លើកនេះ ត្រូវបានគេហៅថា “បុប្ផាចន្ទ”។

ទីភ្នាក់ងារអវកាស NASA បានបកស្រាយថា មូលហេតុដែលត្រូវគេហៅថា “បុប្ផាចន្ទ” គឺហៅទៅតាមក្រុមកុលសម្ព័ន្ធជនជាតិដើមភាគតិចនៅក្នុងតំបន់ភាគឦសាននៃសហរដ្ឋអាមេរិក ព្រោះថា “នេះក៏ជាពេលដែលដើមផ្កាយទាំងឡាយនៅក្នុងតំបន់នោះចេញផ្កាយគ្រប់ទីកន្លែង។ ក្រៅពីនេះ ព្រះចន្ទពេញវង់នាថ្ងៃទី7ឧសភាខាងមុខក៏ត្រូវបានគេហៅថា ព្រះចន្ទដាំពោត ឬព្រះចន្ទទឹកដោះផងដែរ”។

បាតុភូត “មហាព្រះចន្ទ” នេះ កើតឡើងដោយសារតែការផ្លាស់ទីរបស់ព្រះចន្ទដែលគោចរជុំវិញផែនដី។ នៅពេលគោចរមកជិតផែនដី ក្នុងរយៈចម្ងាយប្រមាណជា360,000គម មនុស្សនៅលើផែនដីក៏មើលឃើញព្រះចន្ទធំជាង និងភ្លឺជាងធម្មតា។

ព្រះចន្ទពេញវង់ តែងតែកើតឡើងរៀងរាល់មួយខែម្ដង ប៉ុន្តែបាតុភូត “មហាព្រះចន្ទ” វិញ គឺកើតឡើងតែប៉ុន្មានដងប៉ុណ្ណោះក្នុងមួយឆ្នាំ។

ត្រៀមខ្លួនគយគន់ព្រះចន្ទពេញវង់ធំបំផុតលើកចុងក្រោយបង្អស់ក្នុងឆ្នាំ2020 នាសប្ដាហ៍នេះ — ទេពច្យុតគឺជាស្នាមពន្លឺដ៏ស្រស់ស្អាតដែលកើតឡើងពីចំហេះនៃអាចម៍ផ្កាយ ឬធូលីរបស់ផ្កាយដុះកន្ទុយ ខណៈពេលដែលវាធ្លាក់ចូលក្នុងបរិយាកាសនៃភពផែនដី

ក្នុងអំឡុងពេលដែលមានបាតុភូតមហាព្រះចន្ទ អ្នកស្នេហាវិស័យតារាសាស្ត្រក៏អាចទស្សនាទេពច្យុត (ទេពច្យុតគឺជាស្នាមពន្លឺដ៏ស្រស់ស្អាតដែលកើតឡើងពីចំហេះនៃអាចម៍ផ្កាយ ឬធូលីរបស់ផ្កាយដុះកន្ទុយ ខណៈពេលដែលវាធ្លាក់ចូលក្នុងបរិយាកាសនៃភពផែនដី) 2ក្រុមផងដែរ គឺក្រុមទេពច្យុត Eta-Aquariids និងក្រុមទេពច្យុត Eta-Lyrids។ ប៉ុន្តែ NASA បានឱ្យដឹងថា ពន្លឺរបស់មហាព្រះចន្ទ អាចឧបសគ្គនៃការគយគន់សម្រស់ទេពច្យុតក្នុងខែនេះ។

មុននេះ ប្រជាជនក្នុងតំបន់ជាច្រើនក្នុងពិភពលោក បានមានឱកាសទស្សនាបាតុភូតព្រះចន្ទធំបំផុតក្នុងឆ្នាំ2020 ដែលត្រូវបានគេដាក់ឈ្មោះថា “ព្រះចន្ទផ្កាឈូក” ដែលកើតឡើងកាលពីថ្ងៃទី8មេសាកន្លងទៅ។

មូលហេតុដែលព្រះចន្ទពេញវង់ក្នុងខែមេសាត្រូវបានគេហៅថា “ព្រះចន្ទផ្កាឈូក” គឺហៅទៅតាមឈ្មោះរបស់ផ្កាមួយប្រភេទដែលមានពណ៌ផ្កាឈូក និងមានឈ្មោះថា phlox ដែលភាគច្រើនដុះនៅអាមេរិកខាងជើងនារដូវផ្ការីក៕

ប្រភព៖ សារព័ត៌មានបរទេស

May 4, 2020

អាមេរិកាំងបញ្ចេញផែនទីភូមិសាស្ត្រពេញលេញនៃឋានព្រះចន្ទ

ជាលើកដំបូងហើយដែលផ្ទៃដីទាំងមូលរបស់ព្រះចន្ទត្រូវបានគូរឡើងវិញដោយមជ្ឈមណ្ឌលតារាសាស្ត្រនៃទីភ្នាក់ងារអង្កេតភូមិសាស្ត្រសហរដ្ឋអាមេរិក USGS (United States Geological Survey)។

ផែនទីថ្មីនេះ ត្រូវបានបង្កើតឡើងដោយការបូកផ្សំគ្នារវាងផែនទីភូមិសាស្ត្រចំនួន6ផ្សេងទៀតនៃកម្មវិធី Apollo និងទិន្នន័យដែលបានមកពីផ្កាយរណបនានាក្នុងពេលថ្មីៗនេះ បានបង្ហាញអំពីរចនាសម្ព័ន្ធផ្ទៃខាងលើយ៉ាងច្បាស់របស់ឋានព្រះចន្ទ ជាមួយនឹងភាពលម្អិតដែលមិនធ្លាប់មានពីមុនមក។

ចំពោះសហគមន៍អ្នកវិទ្យាសាស្ត្រ ផែនទីនេះគឺជាឯកសារដែលកាត់ថ្លៃមិនបាន សម្រាប់បេសកកម្មនៅលើព្រះចន្ទនាពេលអនាគត ដែលជួយដល់ការសិក្សាស្រាវជ្រាវប្រវត្តិ4.5ពាន់លានឆ្នាំរបស់ភពរណបធម្មជាតិតែមួយគត់ដែលគោចរជុំវិញភពផែនដីមួយនេះ។

Corey Fortezzo មកពី USGS ដែលជាប្រធាននៃការសិក្សាស្រាវជ្រាវនេះបានឱ្យដឹងថា “ផែនទីនេះគឺជាចំណុចកំពូលនៃគម្រោងដែលអូសបន្លាយរាប់ទសវត្សរ៍។ វាផ្ដល់ព័ត៌មានសំខាន់ៗសម្រាប់ការស្រាវជ្រាវផ្នែកវិទ្យាសាស្ត្រថ្មីៗផ្សេងទៀត”។

ដើម្បីអាចបង្កើតបានផែនទីភូមិសាស្ត្រទូទាំងឋានព្រះចន្ទ ទីភ្នាក់ងារ USGS បានសហការជាមួយ NASA និងវិទ្យាស្ថានស្រាវជ្រាវភព និងព្រះចន្ទ(LPI) របស់សហរដ្ឋអាមេរិក រួមនឹងទីភ្នាក់ងាររុករកអវកាសជប៉ុន(JAXA)។ អ្នកវិទ្យាសាស្ត្របានប្រើប្រាស់កាមេរ៉ាភូមិសាស្ត្រពីយានអវកាស SELENE របស់ជប៉ុន ដើម្បីប្រមូលទិន្នន័យនៅតំបន់អេក្វាទ័រ និងប្រើប្រាស់ម៉ាស៊ីនឡាហ្សែរវាស់កម្ពស់នៅលើយានអវកាស Lunar Reconnaissance Orbiter របស់ NASA ដើម្បីបន្ថែមផែនទីភូមិសាស្ត្រនៅប៉ូលខាងជើង និងខាងត្បូង។

“ព្រះចន្ទតែងមានកម្លាំងទាក់ទាញយ៉ាងខ្លាំងសម្រាប់មនុស្ស ហើយយើងក៏តែងតែរង់ចាំថ្ងៃមួយដែលអាចវិលត្រឡប់ទៅកាន់ទីនោះ។ ពិតជាអស្ចារ្យណាស់នៅពេលបានឃើញ USGS បង្កើតបានប្រភពធនធានដែលអាចជួយឱ្យ NASA រៀបគម្រោងសម្រាប់បេសកកម្មនាពេលអនាគត” នេះបើតាមសម្ដីរបស់ Jim Reilly ដែលជាប្រធានទីភ្នាក់ងារ USGS និងជាអតីតអវកាសចររបស់ NASA៕

https://www.youtube.com/watch?v=lTKbXpIqGtY

ប្រភព៖ សារព័ត៌មានបរទេស

April 25, 2020

អាមេរិកាំង-ចិនឈ្លោះគ្នា! កិច្ចប្រជុំG20 ក្នុងថ្ងៃទី24មេសា ត្រូវបានលុបចោល

កិច្ចប្រជុំតាមរយៈវីដេអូរវាងបណ្ដាមេដឹកនាំប្រទេស G20 ត្រូវបានលុបចោលនៅនាទីចុងក្រោយ ព្រោះតែជម្លោះរវាងសហរដ្ឋអាមេរិក និងប្រទេសចិន ទាក់ទិននឹងតួនាទីរបស់អង្គការសុខភាពពិភពលោក(WHO) នៅក្នុងការដោះស្រាយបញ្ហា COVID-19។

ប្រភពព័ត៌មានមួយសុំមិនបញ្ចេញឈ្មោះ ដែលមានការយល់ដឹងស៊ីជម្រៅអំពីបញ្ហាខាងលើ បានឱ្យដឹងថា កិច្ចប្រជុំនេះ តាមគម្រោងនឹងត្រូវធ្វើឡើងនៅក្នុងថ្ងៃទី24មេសា ប៉ុន្តែត្រូវបានលុបចោលទៅវិញ ព្រោះតែសហរដ្ឋអាមេរិកអះអាងថា អង្គការសុខភាពពិភពលោក ជាអ្នកទទួលខុសត្រូវចំពោះសកម្មភាពទប់ទល់នឹងវីរុសCOVID-19 ក្នុងដំណាក់កាលដំបូង ខណៈដែលប្រទេសចិន ប្ដេជ្ញាបដិសេធមិនជជែកអំពីសំណើរស៊ើបអង្កេតលើ WHO។

ប្រភពព័ត៌មានបានឱ្យដឹងថា កិច្ចប្រជុំកំពូលរបស់ក្រុមប្រទេស G20 នៅតែអាចត្រូវបានធ្វើឡើងនាពេលខាងមុខ បើសិនជាភាគីអាមេរិកាំង និងចិនយល់ព្រមលើការសម្របសម្រួលមួយជាមួយ WHO។

តាមគម្រោង កិច្ចប្រជុំកំពូលនឹងមានវត្តមានរបស់ប្រធានាធិបតីអាមេរិកាំង លោក Donald Trump និងប្រធានាធិបតីចិន លោក Xi Jinping។ ប៉ុន្តែ ចុងក្រោយ កិច្ចប្រជុំនេះមិនបានកើតឡើងនៅក្នុងរបៀបវារៈផ្លូវការដែលត្រូវបាន អារ៉ាប៊ីសាអ៊ូឌីត ដែលជាប្រធានបន្តវេនឆ្នាំនេះ ប្រកាសនោះទេ។

មកដល់ពេលនេះ គណៈកម្មធិការ G20 មិនទាន់បានចេញប្រតិកម្មជុំវិញព័ត៌មានខាងលើនេះនៅឡើយ។

Shen Dingli សាស្ត្រាចារ្យផ្នែកទំនាក់ទំនងកិច្ចការបរទេស មកពីសាកលវិទ្យាល័យ Fudan University នៅទីក្រុងសៀងហៃ ប្រទេសចិន បានឱ្យដឹងថា “ប្រទេសចិនយល់ថា អាមេរិកាំងផ្អាកផ្ដល់ជំនួយដល់ WHO គឺដើម្បីបង្វែរចំណាប់អារម្មណ៍លើការដឹកនាំទន់ខ្យោយក្នុងការទប់ស្កាត់ COVID-19 និងព្យាយាមទម្លាក់កំហុសទៅលើប្រទេសចិន ប៉ុន្តែ អាមេរិកាំងវិញ និយាយថា WHO គឺជាផ្នែកមួយនៃប្រទេសចិន ហើយប្រទេសចិនត្រូវតែទទួលខុសត្រូវទៅលើការខូចខាតធ្ងន់ធ្ងរនៅសហរដ្ឋអាមេរិក”។ លោក Shen Dingli បន្តថា “ទំនាក់ទំនងរវាងចិនជាមួយនឹងសហរដ្ឋអាមេរិក បានប្រែជាអាក្រក់ជាងមុន ដែលវាជាបញ្ហាគួរឱ្យព្រួយបារម្ភ។ អនាគតនឹងកាន់តែអាក្រក់ជាងនេះ”។

សូមរំឭកថា កិច្ចប្រជុំកំពូលដែលធ្វើឡើងតាមរយៈវីដេអូរវាងមេដឹកនាំនៃបណ្ដាក្រុមប្រទេស G20 ដែលពិភាក្សាអំពីវិធីទប់ទល់នឹង COVID-19 ត្រូវបានធ្វើឡើងជាលើកដំបូងនៅក្នុងថ្ងៃទី26មីនាកន្លងទៅ។ ក្រុមមេដឹកនាំបានមូលមតិគ្នាថានឹងធ្វើអ្វីៗគ្រប់យ៉ាងដើម្បីឆ្លងផុតពីវិបត្តិសុខភាពនេះ និងបានព្រមព្រៀងគ្នាក្នុងការទម្លាក់កញ្ចប់ថវិកា 5លានលានដុល្លារដើម្បីជួយសង្គ្រោះសេដ្ឋកិច្ចនៅទូទាំងពិភពលោក។

ក្រោយកិច្ចប្រជុំដំបូងរបស់ G20 សហរដ្ឋអាមេរិក និងប្រទេសចិន បាន និងកំពុងឈ្លោះប្រកែកគ្នាអំពីតួនាទីរបស់អង្គការសុខភាពពិភពលោក(WHO) ដែលជាលទ្ធផល សហរដ្ឋអាមេរិក បានផ្អាកជំនួយដល់អង្គការនេះ។ ចំណែកប្រទេសចិនវិញ កាលពីថ្ងៃទី23មេសា ប្រកាសថានឹងផ្ដល់ជំនួយ30លានដុល្លារបន្ថែមទៀតទៅឱ្យអង្គការអន្តរជាតិមួយនេះ ដើម្បីទប់ទល់នឹងវីរុសCOVID-19។

Jia Qingguo សាស្ត្រាចារ្យមួយរូបមកពីមហាវិទ្យាល័យស្រាវជ្រាវអន្តរជាតិនៃសាកលវិទ្យាល័យប៉េកាំង បានឱ្យដឹងថា ទំនាក់ទំនងរវាងចិននិងអាមេរិកាំង បានធ្លាក់ទៅក្នុងស្ថានភាពអាក្រក់អស់រយៈពេលច្រើនឆ្នាំមកហើយ ប៉ុន្តែវាកាន់តែអាក្រក់ជាងមុន ដោយសារតែ COVID-19។ “នេះគួរណស់តែជាឱកាសល្អដើម្បីឱ្យប្រទេសទាំង2 សហការគ្នាក្នុងការទប់ទល់នឹង COVID-19 ប៉ុន្តែ សហរដ្ឋអាមេរិកបានទម្លាក់កំហុសទៅលើចិន ហើយការប្រឆាំងតបតរបស់ចិន បានធ្វើឱ្យភាគីទាំងសងខាងបង្កើនការប្រឈមមុខដាក់គ្នា”។

លោក Jia Qingguo បន្តថា បើសិនជាលោក Trump ជាប់ឆ្នោតម្ដងទៀតនៅខែវិច្ឆកាឆ្នាំនេះ នោះទំនាក់ទំនងរវាងអាមេរិកាំងជាមួយចិន អាចនឹងបន្តកើនកម្ដៅ ហើយក្លាយជាការប្រឈមមុខដាក់គ្នាលើគ្រប់បញ្ហា។

ប្រទេសG20 (Group of 20) គឺជាក្រុមប្រទេសដែលមានការអភិវឌ្ឍខ្លាំងជាងគេទាំង20 នៅក្នុងពិភពលោក ដែលត្រូវបានបង្កើតឡើងក្នុងឆ្នាំ1999 នៅទីក្រុងវ៉ាស៊ីងតោននៃសហរដ្ឋអាមេរិក។ ជាទូទៅ G20 គឺជាជំនួបរវាងរដ្ឋមន្ត្រីហិរញ្ញវត្ថុ និងថ្នាក់ដឹកនាំធនាគារមកពីបណ្ដាលប្រទេសទាំង19 ដែលមានសេដ្ឋកិច្ចរីកចម្រើនខ្លាំងក្នុងពិភពលោក បូករួមទាំងប្រទេសអភិវឌ្ឃន៍ក្នុងសហភាពអឺរ៉ុបផងដែរ។ កាលពីដំបូងឡើយ សមាជិកនៃក្រុមប្រទេសG7 ដែលបានបង្កើតឡើងនៅឆ្នាំ1975 គឺមានដូចជា សហរដ្ឋអាមេរិក អាល្លឺម៉ង់ បារាំង រុស្ស៊ី កាណាដា អ៊ីតាលី ចក្រភពអង់គ្លេស និងជប៉ុន។ ហើយក្រុមប្រទេសG20ត្រូវបានផ្សំឡើងដោយសមាជិក12ផ្សេងទៀត ដូចជា ប្រទេសអាហ្សង់ទីន ប្រេស៊ីល ចិន ឥណ្ឌា ឥណ្ឌូនេស៊ី ម៉ិកស៊ិក ប្រទេសរុស្ស៉ី អារ៉ាប៊ីសាអ៊ូឌីត អាហ្វ្រិកខាងត្បូង កូរ៉េខាងត្បូង និងតួរគី។

គោលបំណងសំខាន់នៃការបង្កើតក្រុមប្រទេសG20នេះឡើង គឺជួយជំរុញកំណើនសេដ្ឋកិច្ចពិភពលោក កំណើនពាណិជ្ជកម្មអន្តរជាតិ និងការត្រួតពិនិត្យទីផ្សារហិរញ្ញវត្ថុសកល៕

ប្រភព៖ សារព័ត៌មានបរទេស

April 25, 2020

បាញ់រះនៅអាល្លឺម៉ង់ សម្លាប់មនុស្សយ៉ាងតិច8នាក់

ក្រុមខ្មាន់កាំភ្លើងជាច្រើននាក់ បានបាញ់រះទៅលើបារ2កន្លែងនៅក្នុងទីរួមស្រុក Hanau នាព្រឹកនេះ បណ្ដាលឱ្យមានអ្នកស្លាប់យ៉ាងតិច8នាក់។ សមត្ថកិច្ចកំពុងតាមចាប់ជនដៃដល់ទាំងនោះ។

ករណីបាញ់រះទៅលើបារ2កន្លែងខាងលើនេះ បានកើតឡើងនៅឯទីរួមស្រុក Hanau ភាគខាងលិចប្រទេសអាល្លឺម៉ង់ កាលពីវេលាម៉ោង22 ថ្ងៃទី19កុម្ភៈ (ម៉ោង4ភ្លឺ ថ្ងៃទី 20កុម្ភៈ ម៉ោងនៅភ្នំពេញ) ក្រោយមកពួកគេបានបើកឡានគេចខ្លួនបាត់ពីកន្លែងកើតហេតុ។

សារព័ត៌មានក្នុងស្រុកបានរាយការណ៍ថា មានអ្នកស្លាប់នៅក្នុងបារទីមួយចំនួន3នាក់ ហើយជនរងគ្រោះក្រៅពីនេះ បានស្លាប់នៅក្នុងបារមួយផ្សេងទៀត។

សមត្ថកិច្ច និងកងកម្លាំងពិសេសកំពុងឡោមព័ទ្ធតំបន់កើតហេតុ និងតំបន់ក្បែរខាងកន្លែងកើតហេតុ ខណៈឧទ្ធម្ភាគចក្រកំពុងហោះឆ្វែលនៅពីលើតំបន់កើតហេតុនោះដែរ។ មូលហេតុនៃការបាញ់ប្រហារនេះ មិនទាន់ត្រូវបានគេដឹងនៅឡើយ។

Hanau គឺជាទីរួមស្រុកធំមួយដែលមានប្រជាជនជិត100,000នាក់ ស្ថិតនៅក្នុងរដ្ឋ Hesse ភាគខាងលិចប្រទេសអាល្លឺម៉ង់ និងមានចម្ងាយពីទីក្រុង Frankfurt ទៅទិសខាងត្បូង ប្រហែល25គីឡូម៉ែត្រ ។

ពលរដ្ឋអាល្លឺម៉ង់ អាចប្រើប្រាស់កាំភ្លើងបានគ្រប់គ្នា ប៉ុន្តែប្រទេសអាល្លឺម៉ង់ កន្លងមកមានការគ្រប់គ្រងអាវុធបានយ៉ាងល្អ។ អ្នកដែលមានសិទ្ធិកាន់កាប់កាំភ្លើង ត្រូវតែមានលិខិតអនុញ្ញាតត្រឹមត្រូវ។ អាល្លឺម៉ង់ កន្លងមកក៏ធ្លាប់មានអំពើបាញ់ប្រហារជាច្រើនករណីផងដែរ ក្នុងនោះក៏មានករណីវាយប្រហារទៅលើផ្សារណូអែលមួយនៅកណ្ដាលទីក្រុង Berlin កាលពីខែធ្នូ ឆ្នាំ2016 បណ្ដាលឱ្យមានអ្នកសា្លប់12នាក់៕

ប្រភព៖ សារព័ត៌មានបរទេស

February 20, 2020

Tag: ២០២០