អ្នកស្លាប់

ទឹកជំនន់វាយប្រហារប្រទេសឥណ្ឌា ធ្វើឱ្យមនុស្ស 49 នាក់បាត់បង់ជីវិត

ភ្លៀងធំដែលបង្កជាទឹកជំនន់ និងបំណាក់ដី បានបំផ្លាញផ្ទះសំបែង បណ្ដាលឱ្យមនុស្សយ៉ាងតិច 41 នាក់បាត់បង់ជីវិតនៅភាគខាងជើង ខណៈ 9 នាក់ផ្សេងទៀតបានស្លាប់ដោយសារបាក់ស្រុតវិហារ។

រូបភាពពីបណ្ដាញសង្គមបង្ហាញថា ជំនន់ទឹកភ្លៀងហូរចុះពីភ្នំ កួចយកផ្ទាំងថ្មធំៗ និងបំផ្លាញផ្ទះ សំណង់នានានៅក្នុងរដ្ឋ Himachal Pradesh នៅភាគខាងជើងប្រទេសឥណ្ឌា។

បន្ទាប់ពីគ្រោះទឹកជំនន់ និងបំណាក់ដីកើតឡើង សាកសពមនុស្ស 49 នាក់ត្រូវបានរកឃើញ គ្រាដែលអាជ្ញាធរក្នុងតំបន់កំពុងប្រឹងប្រែងដោះស្រាយបញ្ហា។ ក្នុងចំណោមអ្នកស្លាប់សរុប មានយ៉ាងតិច 9 នាក់បានស្លាប់នៅពេលទឹកជំនន់ហូរកាត់ ធ្វើឱ្យវិហារមួយនៅ Shimla ត្រូវបាក់រលំ។

មនុស្ស 5 នាក់ត្រូវបានសង្គ្រោះនៅក្នុងហេតុការណ៍បាក់រលំវិហារខាងលើ ប៉ុន្តែនៅមានមនុស្សពី 20 ទៅ 25 នាក់ទៀតកំពុងជាប់ក្នុងគំនរបាក់បែក ស្របពេលដែលសមត្ថកិច្ចកំពុងញាប់ដៃញាប់ជើងជួយសង្គ្រោះ។

អ្នកវិទ្យាសាស្ត្របានឱ្យដឹងថា ការប្រែប្រួលអាកាសធាតុកំពុងតែធ្វើឱ្យរដូវភ្លៀងនៅប្រទេសឥណ្ឌាប្រែជាវឹកវរ និងខុសធម្មតា បង្កឱ្យមានផលប៉ះពាល់ធ្ងន់ធ្ងរជាងមុន៕

August 15, 2023

ចំនួនមនុស្សស្លាប់ក្នុងហេតុការណ៍ឆេះព្រៃនៅ Hawaii អាចកើនដល់ 200 នាក់

អភិបាលរដ្ឋហាវ៉ៃ (Hawaii) របស់សហរដ្ឋអាម៉េរិក ឱ្យដឹងថា តួលេខអ្នកស្លាប់ក្នុងករណីឆេះព្រៃនៅលើកោះ Maui រដ្ឋហាវ៉ៃ បានកើតដល់ 99 នាក់ ហើយអាចកើនឡើងទ្វេដងទៀតក្នុងរង្វង់ 10 ថ្ងៃខាងមុខ។

«កម្លាំងសង្គ្រោះទើបតែស្វែងរកនៅក្នុងតំបន់តូចមួយនៅក្បែរឆ្នេរសមុទ្រ Lahaina ក្នុងនោះមានសាកសពពី 10 ទៅ 20 នាក់ត្រូវបានរកឃើញជារៀងរាល់ថ្ងៃ។ ចំនួនមនុស្សស្លាប់ត្រូវបានបញ្ជាក់ថា 99 នាក់។ តួលេខនេះនឹងកើនឡើងច្រើន អាចទ្វេដងក្នុងរង្វង់ 10 ថ្ងៃទៀត» អភិបាលរដ្ឋហាវៃ លោក Josh Green កាលពីថ្ងៃទី 14 សីហា ឱ្យដឹងដូច្នេះ។

កាលពីថ្ងៃទី 08 សីហា ភ្លើងព្រៃចំនួន 3 ករណី បានកើតឡើង និងឆាបឆេះពេញទីរួមស្រុកទេសចរណ៍ Lahaina និងតំបន់មួយចំនួនផ្សេងទៀត ធ្វើឱ្យគ្រប់យ៉ាងនៅទីនេះស្ថិតក្នុងអណ្ដាតភ្លើង។ ដោយសារតែរុក្ខជាតិស្ងួតក្រាស់ បូករួមនឹងខ្យល់ខ្លាំង នាំឱ្យអណ្ដាតភ្លើងធ្វើដំណើរយ៉ាងលឿន ធ្វើឱ្យប្រជាជនជាច្រើនរត់គេចមិនទាន់ពេល។

គិតមកដល់ថ្ងៃនេះ អ្នកដែលកំពុងបាត់ខ្លួនមានចំនួនប្រហែល 1,300 នាក់ ស្របពេលដែលប្រជាជនរងគ្រោះជាច្រើនបានទាក់ទងមកកាន់សមត្ថកិច្ច។

August 15, 2023

ព្រះពុទ្ធរូបកម្ពស់ 35 ម៉ែត្រ នៅតែរក្សាស្ថានភាពដើម ក្រោយពីភ្លើងឆេះវិហារ

(ប្រទេសចិន) – មហាព្រះពុទ្ធរូប Shandan (Shandan Great Buddha) នៅមានទ្រង់ទ្រាយដើម ក្រោយពីវិហារនិងកុដិជាច្រើននៅក្នុងវត្តមួយនៅស្រុក Shandan ខេត្ត Gansu បានរងគ្រោះអគ្គិភ័យ។

អគ្គិភ័យមួយដ៏ធំបានកើតឡើងកាលពីវេលាម៉ោង 3 ថ្ងៃទី 24 កក្កដា 2023 នៅក្នុងវត្តមហាពុទ្ធរូប Shandan ជាទីដែលមានទេសភាពល្អ និងត្រូវបានចាត់ចូលជាតំបន់ទេសចរណ៍ថ្នាក់ជាតិរបស់ប្រទេសចិន ដែលស្ថិតក្នុងស្រុក Shandan ទីក្រុង Zhangye នៃខេត្ត Gansu។ អណ្ដាតភ្លើងបានចាប់ផ្ដើមឆេះចេញពីវិហារដែលសាងសង់ពីឈើ មានបណ្ដោយ 30 ម៉ែត្រ ទទឹង 27 ម៉ែត្រ និងកម្ពស់ 39 ម៉ែត្រ។

វិហារខាងលើគឺជាកន្លែងមានព្រះពុទ្ធរូបសាងសង់ពីដីឥដ្ឋដែលដុតកម្ដៅក្រោម 1,200 អង្សាសេ កាលពីឆ្នាំ 1998 ក្រោយពីព្រះពុទ្ធរូបដើមត្រូវបានបំផ្លាញកាលពីឆ្នាំ 1971។ ព្រះពុទ្ធរូបថ្មីត្រូវបានសាងសង់កាលពីឆ្នាំ 1992 ដោយចំណាយប្រាក់អស់ 17 លានយុន (ប្រហែល 2.37 លានដុល្លារអាម៉េរិក)។

អគ្គិភ័យកាលពីថ្ងៃទី 24 កក្កដា 2023 បានបំផ្លាញរាល់រចនាសម្ព័ន្ធរបស់វិហារនេះ ប៉ុន្តែព្រះពុទ្ធរូបនៅតែរក្សាបានទ្រង់ទ្រាយដើម។ អគ្គិភ័យត្រូវបានពន្លត់រួចរាល់កាលពីម៉ោង 10 ថ្ងៃទី 24 កក្កដា។ អាជ្ញាធរឱ្យដឹងថា ហេតុការណ៍នេះមិនបានធ្វើឱ្យមានអ្នកស្លាប់ និងរងរបួសនោះទេ ហើយមូលហេតុនៃគ្រោះអគ្គិភ័យនេះកំពុងត្រូវបានស៊ើបអង្កេត៕

July 26, 2023

តួកគីប្រកាសព័ត៌មានលម្អិតថ្មីបំផុតស្ដីពីយុទ្ធនាការកម្ចាត់មេដឹកនាំកំពូលរបស់ «រដ្ឋអ៊ីស្លាម (IS)»

ប្រទេសតួកគីបានប្រកាសអំពីយុទ្ធនាការបួនម៉ោងនៅប្រទេសស៊ីរី ដើម្បីកំណត់ទីតាំង និងកម្ចាត់មេបញ្ជាការកំពូលបច្ចុប្បន្នរបស់ក្រុមភេរវកម្មរដ្ឋអ៊ីស្លាម (Islamic State)។

បណ្ដាផ្សព្វផ្សាយរបស់រដ្ឋតួកគី កាលពីថ្ងៃទី 01 ឧសភា បានបញ្ចេញរូបថតថ្មីបំផុតស្ដីពីផ្ទះដ៏រឹងមាំស្ថិតនៅកណ្ដាលវាលស្រែនៃខេត្ត Afrin ប្រទេសស៊ីរី ជាទីដែលកម្លាំងពិសេសរបស់តួកគីបានធ្វើការវាយប្រហារកម្ចាត់មេបញ្ជាការកំពូលរបស់ក្រុមភេរវកររដ្ឋអ៊ីស្លាម (Islamic State) Abu al-Hussein al-Husseini al-Qurashi។

ទីភ្នាក់ងារសារព័ត៌មាន Anadolu បានឱ្យដឹងថា ក្រោយពីបានកំណត់ទីតាំងផ្ទះនេះ ដែលជាកន្លែងស្នាក់នៅរបស់ Qurashi ស្ថាប័នស៊ើបការណ៍សម្ងាត់របស់តួកគី (MIT) ក៏បានធ្វើយុទ្ធនាការរយៈពេលបួនម៉ោងក្នុងថ្ងៃទី 29 មេសា ដើម្បីឡោមព័ទ្ធមេភេរវករ។

MIT បានបំផ្ទុះជញ្ជាំងជុំវិញផ្ទះ មុននឹងសម្រុកចូលតាមច្រកទ្វារខាងក្រោយ និងតាមបង្អួច។ រូបភាពដែលត្រូវបានបញ្ចេញបង្ហាញថា មួយផ្នែករបស់ផ្ទះពីរជាន់នេះបានខូចខាតច្រើន។

មេបញ្ជាការកំពូលរបស់ក្រុមភេរវកម្មរដ្ឋអ៊ីស្លាម (Islamic State) Abu al-Hussein al-Husseini al-Qurashi

Qurashi បានចុចបំផ្ទុះគ្រាប់បែកអត្តឃាតនៅពេលដឹងថា ខ្លួនជិតត្រូវបានគេចាប់។ ក្នុងការវាយលុកនេះ ភាគីខាងតួកគីពុំមានអ្នកស្លាប់ ឬរងរបួសនោះទេ។

ប្រធានាធិបតីតួកគី Recep Tayyip Erdogan កាលពីថ្ងៃទី 30 មេសា បានប្រកាសថា កម្លាំងស៊ើបការណ៍សម្ងាត់របស់ប្រទេសនេះបានកម្ចាត់ Qurashi នៅក្នុងយុទ្ធនាការមួយនៅប្រទេសស៊ីរី។

Qurashi គឺជាមេបញ្ជាការកំពូលទីបួនរបស់ IS ដែលត្រូវបានតែងតាំងកាលពីខែវិច្ឆិកា 2022 បន្ទាប់ពីការស្លាប់របស់មេដឹកនាំកំពូល Abu al-Hassan al-Hashemi al-Quraishi។ Qurashi បានចូលក្រុម IS ក្នុងឆ្នាំ 2013 និងបានទទួលការតែងតាំងជាបន្តបន្ទាប់យ៉ាងឆាប់រហ័សនៅក្នុងក្រុមភេរវករ។

ផ្ទះរបស់មេភេរវករ រដ្ឋអ៊ីស្លាម (Islamic State) Abu al-Hussein al-Husseini al-Qurashi

តួកគីបានបញ្ជូនទ័ពទៅកាន់ភាគខាងជើងប្រទេសស៊ីរីតាំងពីឆ្នាំ 2020 និងគ្រប់គ្រងតំបន់ដ៏ធំមួយដោយមានការជួយគាំទ្រពីបណ្ដាក្រុមបះបោរនៅប្រទេសស៊ីរី៕

May 2, 2023

អ្នកស្លាប់ដោយសារវីរុសកូរ៉ូណា កើនដល់ 638នាក់ ក្នុងនោះក៏មានវេជ្ជបណ្ឌិតដែលបានបញ្ចេញព័ត៌មានមុនគេអំពីមេរោគនេះ

គិតមកត្រឹមព្រឹកនេះ (7កុម្ភៈ) មានអ្នកស្លាប់បន្ថែមដល់ទៅ 73នាក់ កើន 12,9% ធៀបនឹងម្សិលមិញ ធ្វើឱ្យចំនួនអ្នកស្លាប់សរុបទូទាំងពិភពលោក ឡើងដល់ 638នាក់។

គណៈកម្មការសុខាភិបាលខេត្ត Hubei ព្រឹកនេះបានបញ្ជាក់ថា មានករណីស្លាប់បន្ថែមដោយសារមេរោគកូរ៉ូណាចំនួន 69នាក់ ធ្វើឱ្យចំនួនអ្នកស្លាប់សរុបនៅក្នុងខេត្តនេះកើនដល់ 618នាក់។

ផែនទីបង្ហាញពីការរីករាលដាលនៃមេរោគរលាកសួតថ្មី Coronavirus 2019-nCoV

ខេត្ត Hubei ក៏មានអ្នកឆ្លងមេរោគកូរ៉ូណា 2,447នាក់បន្ថែមទៀត នាំឱ្យចំនួនអ្នកឆ្លងរោគសរុបកើនដល់ 22,112នាក់។

នៅទូទាំងប្រទេសចិន គិតមកត្រឹមព្រឹកនេះ អ្នកស្លាប់សរុប ឡើងដល់ 637នាក់។ អ្នកឆ្លងសរុបនៅប្រទេសនេះ ឡើងដល់ 31,161នាក់។

ដូច្នេះ នៅទូទាំងពិភពលោក ចំនួនអ្នកស្លាប់បានកើនដល់ 638នាក់ រួមនិងករណីស្លាប់ម្នាក់នៅហ្វីលីពីន។ អ្នកដែលកំពុងផ្ទុកមេរោគនេះ មានចំនួន 31.481នាក់ ក្នុងនោះ 4,824នាក់ កំពុងប្រឈមនិងហានិភ័យបាត់បង់ជីវិត។ ចំណែកអ្នកដែលបានជាសះស្បើយ មានចំនួន 1,563នាក់។

លោកវេជ្ជបណ្ឌិត Li Wenliang ដែលបានបញ្ចេញព័ត៌មានដំបូង ទាក់ទិននឹងវីរុសកូរ៉ូណា ប៉ុន្តែត្រូវអាជ្ញាធរហៅទៅព្រមាន

នៅក្នុងចំណោមករណីស្លាប់ថ្មី ក៏មានឈ្មោះលោកវេជ្ជបណ្ឌិត Li Wenliang ដែលជាអ្នកធ្លាប់ត្រូវអាជ្ញាធរហៅទៅព្រមាននិងផ្ដិតមេដៃ ដោយចោទថា បានបញ្ចេញព័ត៌មានមិនពិតស្ដីអំពីមេរោគកូរ៉ូណាដែលកាលណោះមិនទាន់មានអ្នកណាដឹងនៅឡើយ៕

ប្រភព៖ សារព័ត៌មានបរទេស

February 7, 2020

Tag: អ្នកស្លាប់

ទឹកជំនន់​វាយប្រហារ​ប្រទេស​ឥណ្ឌា ធ្វើឱ្យ​មនុស្ស 49 នាក់​បាត់​បង់ជីវិត

ចំនួន​មនុស្ស​ស្លាប់​ក្នុង​ហេតុការណ៍​ឆេះ​ព្រៃ​នៅ​ Hawaii អាច​កើន​ដល់​ 200 នាក់

ព្រះ​ពុទ្ធរូប​កម្ពស់ 35 ម៉ែត្រ នៅតែ​រក្សា​ស្ថានភាព​ដើម ក្រោយពីភ្លើង​ឆេះ​វិហារ

ទឹកជំនន់វាយប្រហារប្រទេសឥណ្ឌា ធ្វើឱ្យមនុស្ស 49 នាក់បាត់បង់ជីវិត

ចំនួនមនុស្សស្លាប់ក្នុងហេតុការណ៍ឆេះព្រៃនៅ Hawaii អាចកើនដល់ 200 នាក់

ព្រះពុទ្ធរូបកម្ពស់ 35 ម៉ែត្រ នៅតែរក្សាស្ថានភាពដើម ក្រោយពីភ្លើងឆេះវិហារ