រថភ្លើង - La Reine Media

បណ្ដាញផ្លូវដែកលើឋានព្រះចន្ទ នឹងបង្ហាញខ្លួននាពេលអនាគត

បណ្ដាញផ្លូវរថភ្លើងលើឋានព្រះចន្ទ អាចដឹកមនុស្ស ទំនិញ និងធនធានធម្មជាតិ សម្រាប់បម្រើដល់សកម្មភាពពាណិជ្ជកម្ម និងរួមចំណែកទៅក្នុងសេដ្ឋកិច្ចអវកាស។

ស្ថាប័នគ្រប់គ្រងបណ្ដាគម្រោងស្រាវជ្រាវការពារជាតិទំនើបអាម៉េរិក (DARPA) បានជ្រើសយកក្រុមហ៊ុនបច្ចេកវិទ្យាការពារជាតិ និងអវកាសចរណ៍ Northrop Grumman ដើម្បីអភិវឌ្ឍគំនិតស្ដីពីការស្ថាបនាផ្លូវដែកលើឋានព្រះចន្ទ។ នេះគឺជាផ្នែកមួយនៅក្នុងការស្រាវជ្រាវអំពីស្ថាបត្យកម្មព្រះចន្ទរយៈពេល 10 ឆ្នាំ (LunA-10) ដែល ADRPA ប្រកាសកាលពីឆ្នាំកន្លង ដោយមានការចូលរួមពីក្រុមហ៊ុនចំនួន 14 ផ្សេងទៀត។ នេះបើតាមការចុះផ្សាយរបស់ Interesting Engineering កាលពីថ្ងៃទី 20 មីនា។

ជាមួយនឹងគម្រោង LunA-10 ស្ថាប័ន DARPA សង្ឃឹមថា អាចរកឃើញដំណោះស្រាយសម្រាប់ការបង្កើតប្រព័ន្ធពហុមុខងារនៅលើឋានព្រះចន្ទ ដោយប្រព័ន្ធមួយអាចបំពេញភារកិច្ចច្រើន តាំងពីការផ្គត់ផ្គង់អគ្គិសនីគ្មានខ្សែ ស្ថានីយទំនាក់ទំនង រហូតដល់តួនាទីជាមជ្ឈមណ្ឌលកំណត់ទិសជាដើម។

Northrop Grumman គឺជាក្រុមហ៊ុនដំបូងដែលបង្ហើបឱ្យដឹងតួនាទីនៅក្នុងគម្រោង ដែលនឹងអភិវឌ្ឍបច្ចេកទេសស្ថាបនាផ្លូវដែកលើឋានព្រះចន្ទ។

ដូចទៅនឹងវត្តមានដំបូងរបស់ផ្លូវដែកកាលពីសតវត្សរ៍ទី 19 ដែលបានជួយបង្កើនសកម្មភាពសេដ្ឋកិច្ចនៅភាគខាងលិចសហរដ្ឋអាម៉េរិក បច្ចេកវិទ្យាថ្មីត្រូវបានរំពឹងថា នឹងចាប់ផ្ដើម ក៏ដូចជារក្សាកំណើនសេដ្ឋកិច្ចនៅលើផ្ទៃព្រះចន្ទ។

យោងតាមក្រុមហ៊ុនខាងលើ បណ្ដាញផ្លូវដែកឋានព្រះចន្ទ អាចដឹកមនុស្ស ទំនិញ និងធនធានធម្មជាតិ សម្រាប់បម្រើដល់សកម្មភាពពាណិជ្ជកម្ម និងរួមចំណែកទៅក្នុងសេដ្ឋកិច្ចអវកាសរបស់សហរដ្ឋអាម៉េរិក និងដៃគូសហការអន្តរជាតិ។

March 22, 2024

រថភ្លើង «ហោះលើផ្លូវដែក» របស់ចិន បង្កើតបានកំណត់ត្រាល្បឿនថ្មី

សាជីវកម្មឧស្សាហកម្ម និងវិទ្យាសាស្ត្រអវកាសចិន (CASIC) បង្កើតបានកំណត់ត្រាល្បឿនថ្មីរបស់រថភ្លើងអណ្ដែតដើរដោយកម្លាំងមេដែក ឬហៅថា Maglev Train (Maglev ជាពាក្យកាត់របស់ពាក្យ magnetic levitation) បើកផ្លូវសម្រាប់ប្រព័ន្ធរថភ្លើង Hyperloop ល្បឿនមហាលឿន នាពេលអនាគត។

បើទោះជាល្បឿនពិតប្រាកដដែលខ្សែរថភ្លើងនេះសម្រេចបានគឺជាព័ត៌មានសម្ងាត់ ប៉ុន្តែ CASIC ឱ្យដឹងថា ពួកគេបានឈានដល់ជំហានដ៏សំខាន់នៅក្នុងការធ្វើតេស្តនាពេលថ្មីៗនេះ។ នេះបើតាម Sun ចុះផ្សាយកាលពីថ្ងៃទី 22 កុម្ភៈ 2024។

យោងតាម CASIC នេះគឺជាលើកដំបូងដែលរថភ្លើង Maglev ឈានដល់កម្រិតអណ្ដែតស្ថិរភាព នៅពេលផ្លាស់ទីក្នុងបំពង់សុញ្ញកាសកម្រិតទាប ដោយប្រើប្រាស់ផ្លូវរថភ្លើងសម្រាប់ការពិសោធ ប្រវែង 2 គីឡូម៉ែត្រ ដែលស្ថាបនារួចរាល់កាលពីខែវិច្ឆិកា 2023។ CASIC បង្ហើបឱ្យដឹងថា លទ្ធផលបានបំបែកកំណត់ត្រាមុននោះ (623 គីឡូម៉ែត្រ/ម៉ោង) របស់រថភ្លើង Maglev មួយខ្សែដែលធ្វើដំណើរក្នុងបរិស្ថានធម្មតាកាលពីខែតុលា 2023។

ទូរថភ្លើងដែលត្រូវបានធ្វើតេស្តលើផ្លូវដែកសុញ្ញកាសកម្រិតទាប

បច្ចេកវិទ្យា Maglev ជួយឱ្យរថភ្លើងអណ្ដែតពីលើផ្លូវដែក លុបបំបាត់ភាពកកិតនៅពេលធ្វើដំណើរតាមបំពង់សុញ្ញកាសកម្រិតទាប។ ស្ថានភាពក្បែរសុញ្ញកាស (ស្ទើរតែគ្មានខ្យល់ ឬម៉ូលេគុល) កាត់បន្ថយកម្លាំងកកិតរបស់ខ្យល់ បង្កើតបានជា «ជើងហោះហើរទាបក្បែរដី» ក្នុងល្បឿនលឿនខ្លាំង។

February 3, 2024

ខ្សែរថភ្លើងដែលតភ្ជាប់រាជធានីរបស់ថៃ និងរដ្ឋធានីរបស់ឡាវ នឹងដំណើរការសាកល្បងនៅក្នុងខែកុម្ភៈខាងមុខ

ក្រុមហ៊ុនផ្លូវដែករដ្ឋថៃ (SRT) មានគម្រោងពង្រីកខ្សែរថភ្លើង Bangkok-Nong Khai ទៅកាន់រដ្ឋធានីវៀងចន្ទន៍របស់ប្រទេសឡាវ ចាប់ពីខែមេសាឆ្នាំ 2024។ នេះបើតាមការចុះផ្សាយរបស់ Thaitrainguide។

ប្រធាននាយកដ្ឋានដឹកជញ្ជូនតាមផ្លូវដែកនៃក្រសួងដឹកជញ្ជូនថៃ លោក Pichet Kunadhamraks ឱ្យដឹងថា គិតមកដល់បច្ចុប្បន្ន SRT បានដំណើរការខ្សែរថភ្លើងពី Nong Khai នៅភាគពាយព្យប្រទេសថៃ ទៅកាន់ស្ថានីយ Thanaleng របស់ឡាវ។

ចាប់ពីខែកុម្ភៈខាងមុខ SRT នឹងដំណើរការសាកល្បងខ្សែរថភ្លើងពីស្ថានីយ Nong Khai ឆ្លងកាត់ Thanaleng ទៅកាន់ស្ថានីយ Khamasavath ថ្មី នៅវៀងចន្ទន៍ ដើម្បីត្រៀមដំណើរការជាផ្លូវការចាប់ពីខែមេសា ឆ្នាំ 2024។

ស្ថានីយ Nong Khai មានចម្ងាយពីស្ថានីយ Khamsavath ប្រហែល 13 គីឡូម៉ែត្រ។ សំបុត្រសម្រាប់ការធ្វើដំណើរតាមរថភ្លើងប្រហែល 20 នាទីនេះ នឹងមានតម្លៃប្រហែលពី 60 – 70 បាត (1.68 – 1.96 ដុល្លារអាម៉េរិក)។

នៅពេលដំណើរការជាផ្លូវការ ខ្សែរថភ្លើង Bangkok-Nong Khai ដែលចេញដំណើរពីស្ថានីយ Krung Thep Aphiwat (ប្រទេសថៃ) នឹងត្រូវបានប្ដូរឈ្មោះទៅជា Bangkok-Vientiane (Khamsavath)៕

January 26, 2024

អឺរ៉ុបខាងជើងរងអាកាសធាតុត្រជាក់បំផុតមិនធ្លាប់មានក្នុងរង្វង់ច្រើនទសវត្សរ៍មកនេះ

បណ្ដាប្រទេសនៅអឺរ៉ុបខាងជើង កំពុងស្ថិតក្នុងអាកាសធាតុត្រជាក់ជាងរដូវរងាមុនៗ ដោយសីតុណ្ហភាពធ្លាក់ចុះរហូតដល់រាប់សិបអង្សាសេក្រោមសូន្យ ធ្វើឱ្យព្រឹលធ្លាក់យ៉ាងក្រាស់ ប៉ះពាល់ដល់ចរាចរណ៍ និងការរស់នៅ។

ប្រទេសស៊ុយអែត កាលពីថ្ងៃទី 03 មករា 2024 បានឆ្លងកាត់រាត្រីត្រជាក់បំផុតរាប់ចាប់តាំងពីឆ្នាំ 1999 ស្របពេលស្ថានីយឧតុនិយមនៅតំបន់ខាងជើងរបស់ប្រទេស វាស់ឃើញ -43.6 អង្សាសេ។

«នេះក៏ជាកម្រិតទាបបំផុតដែលកើតមាននៅក្នុងទីតាំងជាក់ស្ដែងនេះ រាប់ពីពេលចាប់ផ្ដើមវាស់ស្ទង់កាលពីឆ្នាំ 1888» អ្នកជំនាញផ្នែកឧតុនិយមរបស់ប្រទេសស៊ុយអែត (SMHI) ឱ្យដឹងដូច្នេះ។ ស្ថានីយឧតុនិយមដទៃទៀតនៅតំបន់ភាគខាងជើងប្រទេសនេះក៏វាស់ឃើញ -40 អង្សាសេ។

អាកាសធាតុត្រជាក់ខ្លាំងបែបនេះធ្វើឱ្យដំណើរការរបស់រថភ្លើងអគ្គិសនីមានការរអាក់រអួល ខណៈរថយន្តក្រុងក្នុងតំបន់ក៏ត្រូវផ្អាកដំណើរការច្រើនថ្ងៃ។

កាលពីថ្ងៃទី 03-04 មករា 2024 រថយន្តរាប់រយគ្រឿងបានជាប់គាំងនៅតាមបណ្ដោយផ្លូវល្បឿនលឿន នៅភាគខាងត្បូងប្រទេសស៊ុយអែត និងដាណឺម៉ាក ដោយសារតែព្រឹល។ កងទ័ពស៊ុយអែតត្រូវបានបញ្ជូនទៅជួយដល់ពលរដ្ឋនៅតាមទីរួមស្រុកនានាដែលស្ថិតក្នុងតំបន់ភាគខាងត្បូងប្រទេស។

រថភ្លើងជាច្រើនខ្សែក៏ត្រូវអាក់ខានដំណើរការនៅហ្វាំងឡង់ ដែលជាប្រទេសជិតខាងរបស់ស៊ុយអែត។ វេលាទៀបភ្លឺនៃថ្ងៃទី 05 មករា សីតុណ្ហភាពនៅតំបន់ពាយព្យ Enontekio គឺ -42.1 អង្សាសេ ដែលជាកម្រិតទាបបំផុតនៅក្នុងរដូវរងានេះ។ អាជ្ញាធរហ្វាំងឡង់ឱ្យដឹងថា ប្រទេសនេះមានអាកាសធាតុ -42 អង្សាសេតែបីដងគត់នៅក្នុងសតវត្សរ៍នេះ។

January 5, 2024

ឡាវ និងថៃ ពិភាក្សាអំពីការស្ថាបនាស្ពានសម្រាប់រថភ្លើងឆ្លងកាត់ទន្លេមេគង្គ

រដ្ឋមន្ត្រីការបរទេសឡាវ និងថៃ បានចាប់ផ្ដើមកិច្ចពិភាក្សាអំពីការស្ថាបនាស្ពានសម្រាប់ផ្លូវដែកមួយខ្សែដែលឆ្លងកាត់ទន្លេមេគង្គ។ ស្ពាននេះនឹងតភ្ជាប់រដ្ឋធានីវៀងចន្ទន៍របស់ប្រទេសឡាវ ជាមួយនឹងខេត្តណងខៃនៅតំបន់ឦសានប្រទេសថៃ។

សារព័ត៌មានឡាវ ដែលបានចុះផ្សាយកាលពីថ្ងៃទី 01 វិច្ឆិកា ឱ្យដឹងថា ក្នុងជំនួបរវាងឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសឡាវ លោក Saleumxay Kommasith និងរដ្ឋមន្ត្រីការបរទេសថៃ Parnpree Bahiddha-Nukara នៅវៀងចន្ទន៍កាលពីថ្ងៃទី 30 តុលា ភាគីទាំងពីរបានពិភាក្សាអំពីការពង្រីកផ្លូវដែកឆ្លងប្រទេស ពីខេត្តណងខៃប្រទេសថៃ ទៅកាន់ស្ថានីយរថភ្លើង Khamsavath ក្នុងរដ្ឋធានីវៀងចន្ទន៍ ដើម្បីជំរុញកំណើនវិស័យទេសចរណ៍ និងបង្កភាពងាយស្រួលបន្ថែមទៀតសម្រាប់ផ្លូវដែកឡាវ – ចិន។

រដ្ឋមន្ត្រីប្រទេសទាំងពីរក៏បានឯកភាពគ្នាលើការលើកទឹកចិត្តដល់វិស័យពាក់ព័ន្ធនៃប្រទេសទាំងពីរ នៅក្នុងការពិនិត្យលទ្ធភាព និងវិធានការនានាដើម្បីបង្កើនប្រាក់ចំណូលក្នុងវិស័យពាណិជ្ជកម្មទ្វេភាគី តាមរយៈការលុបបំបាត់ឧបសគ្គដែលមាននាបច្ចុប្បន្ន និងបង្កលក្ខណៈងាយស្រួលជាងនេះសម្រាប់សកម្មភាពជំនួញ។

ជំនួបខាងលើនេះក៏ត្រូវបានធ្វើឡើងក្នុងបំណងជំរុញវិស័យទេសចរណ៍រវាងប្រទេសឡាវ និងប្រទេសថៃផងដែរ តាមរយៈការប្រើប្រាស់ស្ថានីយរថភ្លើង Khamsavath នៅវៀងចន្ទន៍៕

November 2, 2023

រថភ្លើងដឹកជញ្ជូន Hyperloop ល្បឿនជាង 1,200 គីឡូម៉ែត្រ/ម៉ោង

(សហរដ្ឋអាម៉េរិក) – ប្រព័ន្ធ Hyperloop Express Freight អាចដឹកទំនិញដោយស្វ័យប្រវត្តក្នុងល្បឿន 1,223 គីឡូម៉ែត្រក្នុងមួយម៉ោង និងលើកដាក់ទំនិញក្នុងពេលតែមួយ។

ក្រុមហ៊ុន Hyperloop Transportation Technologies (HyperloopTT) កំពុងឆ្ពោះទៅរកការអភិវឌ្ឍប្រព័ន្ធទូរថភ្លើងល្បឿនលឿនដែលស្ទើរតែមិនមានកម្លាំងកកិត អាចជាបដិវត្តន៍ក្នុងវិស័យដឹកជញ្ជូន។ ប្រព័ន្ធថ្មីបំផុតដែលមានឈ្មោះថា Express Freight ប្រើប្រាស់បំពង់ផ្លូវទទេ ទូរថភ្លើងអណ្ដែត និងទ្វារអគ្គិសនីជាដើមដោយស្វ័យប្រវត្តទាំងស្រុង ដើម្បីលើកដាក់ទំនិញដំណាលគ្នានៅពេលចេញដំណើរ។ HyperloopTT ឱ្យដឹងថា ប្រព័ន្ធនេះនឹងអាចដឹកជញ្ជូនបានលឿន សន្សំសំចៃប្រាក់ និងមានស្ថិរភាពជាងបើធៀបនឹងការដឹកទំនិញតាមយន្តហោះ ឬរថយន្តដឹកទំនិញ។

ប្រព័ន្ធនេះត្រូវបាន HyperloopTT សហការអភិវឌ្ឍជាមួយនឹងក្រុមហ៊ុន Tangerine របស់ប្រទេសអង់គ្លេស។

ផែនការរបស់ HyperloopTT គឺការបំពាក់ប្រព័ន្ធ Express Freight ខាងក្នុងហេដ្ឋារចនាសម្ព័ន្ធដឹកអ្នកដំណើរ។ ប្រព័ន្ធដឹកអ្នកដំណើរគឺជាទូដែលមានរូបរាងដូចដងខ្លួនយន្តហោះ ធ្វើដំណើរក្នុងល្បឿន 1,223 គីឡូម៉ែត្រ/ម៉ោង តាមរយៈប្រព័ន្ធម៉ាញេទិចដំណើរការនៅក្នុងប្រព័ន្ធបំពង់សម្ពាធទាប។

October 25, 2023

ឥណ្ឌូណេស៊ីសម្ពោធដាក់ឱ្យប្រើប្រាស់ផ្លូវដែកល្បឿនលឿនដំបូងអាស៊ីអាគ្នេយ៍

ផ្លូវដែកល្បឿនលឿនដំបូងរបស់ប្រទេសឥណ្ឌូណេស៊ី ជិតបើកទ្វារទទួលអ្នកដំណើរ ដែលនេះនឹងជួយកាត់បន្ថយពេលវេលានៃការធ្វើដំណើររវាងទីក្រុងពីរធំជាងគេបង្អស់របស់ប្រទេសនេះ។

គម្រោងផ្លូវដែកដែលមានតម្លៃ 7.3 ពាន់លានដុល្លារអាម៉េរិកនេះនឹងត្រូវបានសម្ពោធដាក់ឱ្យដំណើរការក្នុងថ្ងៃទី 02 តុលា 2023 ក្រោយពីបានពន្យារពេលច្រើនលើក។ នេះគឺជាមួយផ្នែកនៃគំនិតផ្ដួចផ្ដើមហេដ្ឋារចនាសម្ព័ន្ធខ្សែក្រវាត់ និងផ្លូវ ដែលទទួលបានជំនួយភាគច្រើនពីបណ្ដាក្រុមហ៊ុនរដ្ឋចិន។

«យើងនឹងសម្ពោធនៅថ្ងៃទី 02 តុលា ដោយសារប្រធានាធិបតីជាប់រវល់នៅក្នុងថ្ងៃទី 01 តុលា» រដ្ឋមន្ត្រីក្រសួងគមនាគមន៍ឥណ្ឌូណេស៊ី Budi Karya Sumadi កាលពីថ្ងៃទី 29 កញ្ញា ថ្លែងដូច្នេះ។

ផ្លូវដែកសម្រាប់រថភ្លើងល្បឿនលឿនប្រវែង 138 គីឡូម៉ែត្រ និងមានឈ្មោះថា WHOOSH នេះ តភ្ជាប់រវាងរដ្ឋធានីហ្សាការតា និង Bandung នៅខេត្តជ្វាខាងលិច ដែលជាទីក្រុងធំជាងគេលំដាប់ទីពីររបស់ឥណ្ឌូណេស៊ី និងជាមជ្ឈមណ្ឌលសិល្បៈ វប្បធម៌ដ៏ធំរបស់ឥណ្ឌូណេស៊ី។

រថភ្លើងដែលរត់លើផ្លូវដែក WHOOSH ដំណើរការដោយអគ្គិសនី និងមានល្បឿនប្រហែល 350 គីឡូម៉ែត្រ/ម៉ោង នឹងជួយកាត់បន្ថយពេលវេលាក្នុងការធ្វើដំណើររវាង ហ្សាការតា និង Bandung ពីបីម៉ោងមកនៅក្រោមមួយម៉ោង។ WHOOSH ក៏ជាផ្លូវដែកល្បឿនលឿនដំបូងនៅតំបន់អាស៊ីអាគ្នេយ៍ផងដែរ។

គម្រោងខាងលើនេះត្រូវបានគ្រប់គ្រងដោយក្រុមហ៊ុនបណ្ដាក់ទុនរួម PT Kereta Cepat ឥណ្ឌូណេស៊ី – ចិន (PT KCIC)។ តំណាងក្រុមហ៊ុននេះក៏បានឱ្យដឹងថា ស្ថាប័នពាក់ព័ន្ធកំពុងចរចាអំពីការពង្រីកផ្លូវដែកល្បឿនលឿនទៅកាន់ Surabaya ដែលជាទីក្រុងកំពង់ផែធំរបស់ខេត្តជ្វាខាងកើត។

កិច្ចព្រមព្រៀងអភិវឌ្ឍផ្លូវរថភ្លើងល្បឿនលឿននៅឥណ្ឌូណេស៊ី ត្រូវបានចុះហត្ថលេខាកាលពីឆ្នាំ 2015 និងចាប់ផ្ដើមស្ថាបនាតាំងពីចុងឆ្នាំនោះ។ តាមផែនការដំបូង គម្រោងនេះគ្រោងនឹងត្រូវបានដាក់ឱ្យដំណើរការក្នុងឆ្នាំ 2019 ប៉ុន្តែត្រូវបានពន្យារពេលច្រើនលើកដោយសារតែបញ្ហាកូវីដ-19៕

October 2, 2023

ព្យុះកំណាចនៅប្រទេសចិន បង្កទឹកជំនន់គួរឱ្យភ័យខ្លាច

ភាគខាងជើងប្រទេសចិនបានប្រកាសអាសន្នកម្រិតខ្ពស់បំផុត នៅពេលភ្លៀងធំបង្អោរចុះ ធ្វើឱ្យលិចលង់ទីក្រុងប៉េកាំង និងតំបន់ក្បែរខាង បណ្ដាលឱ្យរថយន្តរាប់សិបគ្រឿងត្រូវហូរទៅតាមខ្សែទឹក។

ជើងរថយន្តក្រុងរាប់រយនៅរដ្ឋធានីប៉េកាំង ប្រទេសចិន ថ្ងៃនេះត្រូវបានផ្អាកដំណើរការ បន្ទាប់ពីអាជ្ញាធរបានប្រកាសអាសន្នកម្រិតខ្ពស់បំផុត គ្រាដែលមានភ្លៀងធ្លាក់ខ្លាំង ដោយសារតែព្យុះ Doksuri បន្តវាយប្រហារលើប្រទេសនេះ។

អ្នកលេងបណ្ដាញសង្គមនៅប្រទេសចិន បានចែករំលែកបន្តគ្នានូវវីដេអូបង្ហាញពីគ្រោះធម្មជាតិមួយនេះ។ ក្នុងវីដេអូ គេឃើញដងផ្លូវក្នុងទីក្រុងក្លាយជាជ្រោះ គួរឱ្យភ័យខ្លាច។

ទឹកជំនន់ក៏បានហូរចូលចំណតរថភ្លើងអគ្គិសនីក្រោមដីនៅទីក្រុងប៉េកាំង។ ក្រុមហ៊ុនផ្លូវដែកបានឱ្យបុគ្គលិកយកអាហារទៅជូនអ្នកដំណើរដែលកំពុងជាប់នៅក្នុងចំណត។

មនុស្សជាង 31,000 នាក់ត្រូវបានឈ្លៀងទៅកាន់ទីសុវត្ថិភាព ការដ្ឋានសំណង់ប្រហែល 4,000 កន្លែងត្រូវបានផ្អាក អគារជិត 20,000 រងការខូចខាត ខណៈទីតាំងសម្រាប់ទេសចរណ៍សំខាន់ៗក្នុងទីក្រុងត្រូវបានបានបិតជាបណ្ដោះអាសន្ន។ នៅទីក្រុងប៉េកាំង មានមនុស្សពីរនាក់បានស្លាប់ដោយសារជំនន់ទឹកភ្លៀង។

អាកាសយានដ្ឋានពីរកន្លែងនៅរដ្ឋធានីប្រទេសចិនក៏បានលុបចោលជើងហោះហើរជាង 180 ជើង និងពន្យារពេលរាប់រយជើង កាលពីព្រឹកថ្ងៃទី 31 កក្កដានេះ។ គិតមកដល់ថ្ងៃនេះ ដងផ្លូវចំនួន 358 នៅប៉េកាំងបានទទួលរងឥទ្ធិពលពីព្យុះ Doksuri។

ព្យុះ Doksuri ធ្វើដំណើរឆ្លងកាត់ភាគខាងជើងប្រទេសចិនតាំងពីថ្ងៃទី 28 កក្កដា នាំឱ្យអាជ្ញាធរប្រកាសឱ្យប្រជាជនរាប់លាននាក់ស្ថិតនៅក្នុងផ្ទះ។ ព្យុះនេះបានក្លាយជាសម្ពាធទាបទៅហើយ ប៉ុន្តែអាជ្ញាធរប៉េកាំង និងខេត្តក្បែរខាង ថ្ងៃនេះនៅតែបន្តប្រកាសអាសន្នកម្រិតក្រហម។

យោងតាមអ្នកជំនាញ នេះអាចជាទឹកជំនន់អាក្រក់ជាងខែកក្កដាឆ្នាំ 2012 ទៅទៀត នៅពេលមានមនុស្ស 79 នាក់បានស្លាប់ និងរាប់ម៉ឺននាក់នៅទូទាំងប្រទេស ត្រូវឈ្លៀសទៅរកទីសុវត្ថិភាព៕

July 31, 2023

គ្រាន់តែកិនឆ្មាងាប់សោះ ក្រុមហ៊ុនបារាំងរងការពិន័យជាប្រាក់ 3,000 ដុល្លារអាម៉េរិក

ក្រុមហ៊ុនគ្រប់គ្រងផ្លូវដែកជាតិបារាំង ត្រូវបានពិន័យជាប្រាក់ជាង 1,000 ដុល្លារអាម៉េរិក ពីបទខ្វះការទទួលខុសត្រូវ ដោយសារតែបានកិនឆ្មាសំណព្វរបស់អ្នកដំណើរម្នាក់ រហូតដល់ងាប់។

តុលាការបារាំង កាលពីថ្ងៃទី 04 កក្កដា បានសម្រេចថា ក្រុមហ៊ុនផ្លូវដែកជាតិ (SNCF) បានធ្វើឱ្យមានកំហុសទាក់ទិននឹងបញ្ហាខ្វះការទទួលខុសត្រូវ បន្ទាប់ពីមានករណីរថភ្លើងមួយខ្សែបានកិនឆ្មាសំណព្វរបស់អ្នកដំណើររហូតដល់ងាប់ កាលពីខែមករា។

ការចោទប្រកាន់ខាងលើនេះអាចដាក់ពិន័យជាប្រាក់ឡើងដល់ 75,000 អឺរ៉ូប (ជាង 80,000 ដុល្លារអាម៉េរិក) និងដាក់ពន្ធនាគារ 5 ឆ្នាំ។ ក៏ប៉ុន្តែ តុលាការបានសម្រេចពិន័យជាប្រាក់ត្រឹមតែ 1,000 អឺរ៉ូ (ជាង 1,000 ដុល្លារអាម៉េរិក) ចំពោះ SNCF។

SNCF ក៏ត្រូវបានបញ្ជាឱ្យបង់ប្រាក់ជំងឺចិត្តបន្ថែមចំនួន 2,000 អឺរ៉ូ (ជិត 2,200 ដុល្លារអាម៉េរិក) ដល់ម្ចាស់ពីរនាក់របស់សត្វមួយក្បាលឈ្មោះ Neko ដែលត្រូវរថភ្លើងកិននោះផងដែរ។

រឿងរ៉ាវខាងលើបានកើតឡើងកាលពីខែមករា 2023។ កាលណោះ Georgia និងកូនស្រី Melaina អាយុ 15 ឆ្នាំ បានឃើញ Neko លោតចុះពីថង់ និងរត់ទៅកាន់ផ្លូវដែកនៅមុនពេលរថភ្លើងចេញដំណើរ។ Georgia បានចោទថា បុគ្គលិករបស់ក្រុមហ៊ុនរថភ្លើងមានចិត្តឃោរឃៅ ព្រោះបានបដិសេធការស្នើសុំពន្យារការចេញដំណើរពី Paris ទៅកាន់ Bordeaux ដើម្បីជួយស្វែងរកឆ្មា។

នៅពេលរថភ្លើងចេញដំណើរ ម្ចាស់ឆ្មាក៏បានឃើញ Neko ត្រូវរថភ្លើងកិន។ ពេលនោះ SNCF ស្នើសុំបង់ថ្លៃខូចខាតដោយសំបុត្ររថភ្លើងមួយទៅកាន់ Bordeaux។

ករណីខាងលើក៏បានធ្វើឱ្យមានបាតុកម្ម រួមនឹងញត្តិតវ៉ាដែលមានស្នាមមេដៃរបស់មនុស្ស 100,000 នាក់។ រដ្ឋមន្ត្រីក្រសួងមហាផ្ទៃបារាំង Gerald Darmanin និយាយថា លោកភ្ញាក់ផ្អើលខ្លាំងណាស់នៅចំពោះហេតុការណ៍នេះ។ អង្គការការពារសិទ្ធិសត្វមួយក៏បានដាក់ញត្តិតវ៉ាចំពោះ SNCF ព្រោះតែ «អំពើហិង្សាធ្ងន់ធ្ងរ និងឃោរឃៅដែលនាំឱ្យសត្វស្លាប់»។

ចៅក្រមតុលាការបារាំង កាលពីថ្ងៃទី 04 កក្កដា 2023 យល់ថា បុគ្គលិកនៅលើរថភ្លើង «មិនបានប្រឹងប្រែងក្នុងការសង្គ្រោះសត្វឆ្មា»។ សាលក្រមរបស់តុលាការនេះក៏ដើរផ្ទុយពីអនុសាសន៍របស់ក្រុមរដ្ឋអាជ្ញា ជាក្រុមដែលអំពាវនាវឱ្យទម្លាក់ចោលរាល់ការចោទប្រកាន់ទៅលើ SNCF ដោយយល់ថា បុគ្គលិករបស់ស្ថាប័ននេះមិនបានបញ្ចេញភាពគ្មានមនុស្សធម៌។

នៅលើបណ្ដាញសង្គម មនុស្សមួយចំនួនបានរិះគន់សាលក្រមតុលាការខាងលើ។ អ្នកខ្លះថា លើកក្រោយបើមានករណីនេះកើតឡើង ពួកគេគិតថា ម្ចាស់សត្វត្រូវតែបង់ថ្លៃខាតបង់ពេលវេលាដល់អ្នកដំណើរដទៃ នៅពេលរថភ្លើងត្រូវបានពន្យារពេលចេញដំណើរ៕

July 6, 2023

បណ្ដារថភ្លើងដែលមានល្បឿនលឿនជាងគេលើពិភពលោក

រថភ្លើងបណ្ដែតខ្លួនសៀងហៃរបស់ប្រទេសចិន ឈរលើកំពូលតារាងចំណាត់ថ្នាក់ស្ដីពីបណ្ដារថភ្លើងល្បឿនលឿនជាងគេបំផុតនៅលើពិភពលោកនាបច្ចុប្បន្ន។

រថភ្លើងសាធារណៈដែលមានល្បឿនលឿនជាងគេបង្អស់លើពិភពលោក គឺរថភ្លើងបណ្ដែតខ្លួន (Maglev Train) សៀងហៃ (Shanghai maglev train) របស់ប្រទេសចិន ដែលផលិតឡើងដោយយោងតាមបច្ចេកវិទ្យារបស់អាល្លឺម៉ង់។ វាធ្វើដំណើរទៅមុខដោយកម្លាំងមេដែកអគ្គិសនីដែលអនុញ្ញាតឱ្យវាបណ្ដែតខ្លួនផុតពីផ្លូវដែក។ រថភ្លើងនេះធ្វើដំណើរនៅក្នុងទីក្រុងសៀងហៃ និងចំណាយពេល 7.5 នាទីក្នុងការធ្វើដំណើរ 30 គីឡូម៉ែត្រ ដោយមានល្បឿន 460 គីឡូម៉ែត្រ/ម៉ោង។

លំដាប់ទីពីរគឺរថភ្លើង CR400 Fuxing របស់ប្រទេសចិន ដែលធ្វើដំណើរក្នុងល្បឿន 350 គីឡូម៉ែត្រក្នុងមួយម៉ោង។ ចំណែកលំដាប់ទីបីវិញ គឺរថភ្លើង ICE3 នៅប្រទេសអាល្លឺម៉ង់ ដោយវាអាចធ្វើដំណើរក្នុងល្បឿន 330 គីឡូម៉ែត្រ/ម៉ោង។ រីឯទីបួនវិញ បានទៅលើរថភ្លើង TGV នៅប្រទេសបារាំង ដែលធ្វើដំណើរក្នុងល្បឿន 320 គីឡូម៉ែត្រ/ម៉ោង ស្មើនឹងរថភ្លើង E5 របស់ប្រទេសជប៉ុន និង Al Boraq របស់ម៉ារ៉ុក។ និងបន្ទាប់មកគឺ AVE របស់អេស្ប៉ាញ ដែលមានល្បឿន 310 គីឡូម៉ែត្រ/ម៉ោង។

AVE របស់អេស្ប៉ាញ ដែលមានល្បឿន 310 គីឡូម៉ែត្រ/ម៉ោង

June 28, 2023

Tag: រថភ្លើង