យានអវកាស - La Reine Media

យានចុះចតលើឋានព្រះចន្ទរបស់អាម៉េរិក ត្រូវបានបាញ់បង្ហោះ

(សហរដ្ឋអាម៉េរិក) – រ៉ុក្កែត Vulcan Centaur ហោះឡើងពីបន្ទាយកងកម្លាំងអវកាស Cape Canaveral នៅ Florida កាលពីវេលាម៉ោង 13 និង 18 នាទី ថ្ងៃទី 08 មករា 2024 (ពេលវេលានៅកម្ពុជា) នាំយកយានអវកាសពាណិជ្ជកម្ម Peregrine ឆ្ពោះទៅកាន់ឋានព្រះចន្ទ។

យោងតាម CNN វេលាម៉ោងប្រហែល 14 (ម៉ោងនៅភ្នំពេញ) យាន Peregrine បានផ្ដាច់ខ្លួនពីរ៉ុក្កែត និងចាប់ផ្ដើមដំណើរហោះហើរយឺតៗទៅកាន់ផ្ទៃព្រះចន្ទ។ បើសិនគ្រប់យ៉ាងដំណើរការរលូន យានចុះចតអាចទម្លាក់ខ្លួនថ្នមៗលើផ្ទៃព្រះចន្ទនៅថ្ងៃទី 23 កុម្ភៈ 2024។

ក្រុមហ៊ុន Astrobotic Technology នៅ Pittsburgh បានអភិវឌ្ឍយានចុះចត Peregrine ទៅតាមកិច្ចព្រមព្រៀងជាមួយនឹងទីភ្នាក់ងារអវកាសអាម៉េរិក (ណាសា)។ ណាសាបានចំណាយប្រាក់ 108 លានដុល្លារ ទៅឱ្យ Astrobotic ដើម្បីអភិវឌ្ឍយាន Peregrine និងដឹកឧបករណ៍ពិសោធន៍ផ្នែកវិទ្យាសាស្ត្ររបស់ស្ថាប័ននេះទៅកាន់ផ្ទៃព្រះចន្ទ។ ណាសាគ្រាន់តែជាអតិថិជនមួយប៉ុណ្ណោះក្នុងចំណោមដៃគូសហការរបស់ Astrobotic Technology។

Astrobotic Technology ក៏ដឹកធាតុមនុស្សឱ្យក្រុមហ៊ុនពាណិជ្ជកម្មចំនួនពីរគឺ Elysiym Space និង Celestic ដែលរកស៊ីក្នុងវិស័យបញ្ចុះធាតុក្នុងអវកាស។ ក្រុមហ៊ុន Celestic ផ្ដល់សេវាកម្មដឹកធាតុឡើងទៅកាន់ឋានព្រះចន្ទ ក្នុងតម្លៃចាប់ពីជាង 100,000 ដុល្លារអាម៉េរិក។

ក្នុងបេសកកម្មដែលមានឈ្មោះថា Enterprise Flight រ៉ុក្កែត Vulcan Centaur ដឹកប្រអប់ចំនួន 256 ដែលផ្ទុកធាតុ ក៏ដូចជា AND របស់អតីតប្រធានាធិបតីអាម៉េរិក។ ក្រៅពីនេះ Enterprise Flight ក៏នាំយកធាតុរបស់ Philip Chapman ដែលជាអ្នកត្រូវបានជ្រើសរើសឱ្យក្លាយជាអ្នកអវកាសកាលពីឆ្នាំ 1967 ប៉ុន្តែមិនដែលបានហោះទៅកាន់ទីអវកាស និងបានទទួលមរណភាពកាលពីឆ្នាំ 2021៕

January 8, 2024

រ៉ុក្កែតរបស់ SpaceX នាំយក «យានមហាសម្ងាត់» របស់អាម៉េរិក ឡើងទៅទីអវកាសខ្ពស់ជាងមុន

យន្តហោះអវកាសដ៏អាថ៌កំបាំង X-37B ត្រូវបានបាញ់បង្ហោះតាមរ៉ុក្កែត Falcon Heavy ពី Florida ចាប់ផ្ដើមបេសកកម្មទី 7 នៅលើគន្លងតារាវិថីខ្ពស់ជាង បើធៀបនឹងបេសកកម្មមុនៗ។

យានអវកាសស្វ័យប្រវត្ត X-37B របស់កងទ័ពអាម៉េរិក ហោះទៅកាន់ទីអវកាសតាមរយៈរ៉ុក្កែត Falcon Heavy របស់ក្រុមហ៊ុនអាម៉េរិក SpaceX ពីមជ្ឈមណ្ឌលអវកាស Kennedy (KSC) របស់ទីភ្នាក់ងារអវកាសអាម៉េរិក (ណាសា – NASA) កាលពីវេលាម៉ោង 20 និង 07 នាទី ថ្ងៃទី 28 ធ្នូកន្លងទៅ ដែលត្រូវនឹងម៉ោង 07 និង 07 នាទី ថ្ងៃទី 29 ធ្នូ នៅកម្ពុជា ក្រោយពីបានពន្យារពេលច្រើនសប្ដាហ៍ ដោយសារអាកាសធាតុមិនល្អ។

ការបាញ់បង្ហោះកាលពីថ្ងៃទី 28 ធ្នូ គឺជាជើងហោះហើរទី 7 របស់ X-37B និងជាជើងហោះហើរដំបូងដែលធ្វើឡើងជាមួយនឹងរ៉ុក្កែត Falcon Heavy ដែលជារ៉ុក្កែតកម្លាំងខ្លាំងជាងគេលំដាប់ទីពីរលើពិភពលោក បន្ទាប់ពីប្រព័ន្ធបាញ់បង្ហោះអវកាសរបស់ណាសា។ នេះក៏ជាការបាញ់បង្ហោះរ៉ុក្កែតលើកទី 95 របស់ SaceX នៅក្នុងឆ្នាំ 2023។

បេសកកម្មថ្មីរបស់ X-37B នេះ មានឈ្មោះថា OTV-7 (Orbital Test Vehicle-7) ឬហៅថា USSF-52។ គោលដៅសំខាន់របស់ជើងហោះហើរនេះគឺធ្វើឡើងដើម្បី «ដំណើរការយន្តហោះរអវកាសដែលអាចប្រើប្រាស់ឡើងវិញ នៅលើគន្លងតារាវិថីថ្មី»។

X-37B មានរូបរាងស្រដៀងនឹងយានអវកាស Shuttle ដែលបានចូលនិវត្តន៍របស់ណាសា ប៉ុន្តែតូចជាងឆ្ងាយ។ យានដែលគ្មានមនុស្សបើកបរ X-37B មានបណ្ដោយ 8.8 ម៉ែត្រ និងស្លាបប្រវែង 4.6 ម៉ែត្រ ខណៈដែល Shuttle មានបណ្ដោយ 37 ម៉ែត្រ និងស្លាបប្រវែងជាង 24 ម៉ែត្រ។ កងកម្លាំងអវកាសអាម៉េរិក មានយាន X-37B ចំនួនពីរគ្រឿងដែលសុទ្ធតែផលិតដោយក្រុមហ៊ុន Boeing។

ព័ត៌មានលម្អិតស្ដីពីបេសកកម្ម OTV-7 មិនត្រូវបានបង្ហើបឱ្យដឹងជាសាធារណៈនោះទេ ប៉ុន្តែបេសកកម្មចំនួន 6 នាពេលកន្លងរបស់ X-37B សុទ្ធតែអូសបន្លាយពេលជាង 7 ខែ និងហោះក្នុងគន្លងគោចរកម្រិតទាប ត្រឹមតែប៉ុន្មានរយគីឡូម៉ែត្រប៉ុណ្ណោះ។ យោងតាមទំព័រសារព័ត៌មាន Space រ៉ុក្កែត Falcon Heavy អាចនាំ X-37B ឡើងទៅកាន់កម្ពស់ 35,000 គីឡូម៉ែត្រ៕

December 29, 2023

យានអវកាសជប៉ុន ហោះចូលដល់គន្លងតារាវិថីព្រះចន្ទ

យានអវកាស SLIM នឹងត្រៀមខ្លួនចុះចតលើផ្ទៃរបស់ព្រះចន្ទនៅក្នុងខែមករា ឆ្នាំ 2024 ដែលអាចនាំឱ្យជប៉ុនក្លាយជាប្រទេសទីប្រាំធ្វើបានដូច្នេះ បន្ទាប់ពី សូវៀត សហរដ្ឋអាម៉េរិក ចិន និងឥណ្ឌា។

យានចុះចតលើឋានព្រះចន្ទដោយស្វ័យប្រវត្ត SLIM របស់ជប៉ុន បានហោះដល់គន្លងតារាវិថីព្រះចន្ទកាលពីថ្ងៃទី 25 ធ្នូ 2023 ដូចការគ្រោងទុក។ នេះបើតាមទីភ្នាក់ងារស្រាវជ្រាវអវកាសជប៉ុន (ចាសា – JAXA)។ SLIM ឆ្ពោះចូលដល់គន្លងតារាវិថីព្រះចន្ទ នៅវេលាម៉ោង 13 និង 51 នាទី ថ្ងៃទី 25 ធ្នូ ម៉ោងនៅកម្ពុជា។

យោងតាមចាសា យាន SLIM កំពុងហោះហើរទៅតាមគន្លងគោចររាងពងក្រពើ និងចំណាយពេល 6.4 ម៉ោង ដើម្បីហោះបានមួយជុំព្រះចន្ទ ពីកម្ពស់ 600 គីឡូម៉ែត្រនៅតំបន់ដែលជិតបំផុត និង 4,000 គីឡូម៉ែត្រ នៅតំបន់ដែលឆ្ងាយបំផុត។ នេះគឺជាជំហានថ្មីដែលបញ្ជាក់ថា SLIM កំពុងឆ្ពោះជិតដល់គោលដៅចុះចតលើឋានព្រះចន្ទនៅថ្ងៃទី 19 មករា ឆ្នាំ 2024។

នេះនឹងជាជោគជ័យក្នុងប្រវត្តិសាស្ត្រ ព្រោះថា មកដល់បច្ចុប្បន្ន មានតែប្រទេសចំនួនបួនប៉ុណ្ណោះ រួមមាន សូវៀត សហរដ្ឋអាម៉េរិក ចិន និងឥណ្ឌា ដែលបានបញ្ជូនយានអវកាសទៅចុះចតលើផ្ទៃព្រះចន្ទដោយជោគជ័យ។

យាន SLIM ដែលមានប្រវែង 2.7 ម៉ែត្រ ត្រូវបានបាញ់បង្ហោះកាលពីថ្ងៃទី 06 កញ្ញា 2023 រួមជាមួយនឹង XRISM ជាតេឡេស្កុបអវកាសប្រើកាំរស្មី X កម្លាំងខ្លាំង។

ចាសាឱ្យដឹងថា SLIM មានបេសកកម្មស្វែងរកវិធីចុះចតប្រកបដោយសុវត្ថិភាព ដែលជារឿងចាំបាច់សម្រាប់យានចុះចតនាពេលអនាគត៕

December 26, 2023

យានអវកាសគ្មានមនុស្សបើកបរ Cygnus ត្រឡប់មកកាន់ផែនដី

យានអវកាស Cygnus បានចាកចេញពីស្ថានីយអវកាសអន្តរជាតិ (ISS) ដោយជោគជ័យ បន្ទាប់ពីបានបញ្ចប់បេសកកម្មដឹកទំនិញឱ្យណាសា និងដៃគូសហការអន្តរជាតិរបស់ណាសា។

យានអវកាសគ្មានមនុស្សបើកបរ Cygnus របស់ក្រុមហ៊ុន Northrop Grumman កាលពីវេលាម៉ោង 8 និង 6 នាទីព្រឹក ថ្ងៃទី 22 ធ្នូ ត្រូវនឹងម៉ោងប្រហែល 20 ថ្ងៃទី 23 ធ្នូ ម៉ោងនៅ កម្ពុជា បានចាកចេញផុតពីដៃរ៉ូបូតរបស់ ISS បន្ទាប់ពីបានបំពេញបេសកកម្មរយៈពេល 4 ខែ។ នេះបើតាមយោងតាមទីភ្នាក់ងារអវកាសអាម៉េរិក (ណាសា – NASA)។

ដូច្នេះ Cygnus បានចាកចេញពី ISS ដោយជោគជ័យ ក្រោយពីបញ្ចប់បេសកកម្មប្រគល់ទំនិញទម្ងន់ជាង 3,700 គីឡូក្រាម ដែលរួមមាន ឧបករណ៍ស្រាវជ្រាវផ្នែកវិទ្យាសាស្ត្រ គ្រឿងសំណង់អវកាស ផលិតផលពាណិជ្ជកម្ម ឧបករណ៍បច្ចេកវិទ្យា និងទំនិញជាច្រើនមុខផ្សេងទៀត ឱ្យណាសា និងដៃគូសហការអន្តរជាតិរបស់ណាសា។

យានអវកាស Cygnus បានភ្ជាប់ខ្លួនទៅនឹង ISS កាលពីថ្ងៃទី 04 សីហា ឆ្នាំ 2023។ នេះគឺជាបេសកកម្មដឹកទំនិញទៅតាមសេវាពាណិជ្ជកម្មលើកទី 19 របស់ក្រុមហ៊ុន Northrop Grumman ដែលធ្វើឡើងសម្រាប់ណាសា៕

December 23, 2023

ណាសាបញ្ជូនវីដេអូមកកាន់ផែនដី ពីចម្ងាយជាង 30 លានគីឡូម៉ែត្រ

នេះជាលើកដំបូងហើយដែល ទីភ្នាក់ងារអវកាសអាម៉េរិក (ណាសា-NASA) បញ្ជូនវីដេអូដែលមានភាពច្បាស់ខ្ពស់ ពីទីអវកាសដ៏ឆ្ងាយ មកកាន់ផែនដី ដោយប្រើប្រាស់ពន្លឺឡាស៊ែរ នៅក្នុងការពិសោធនៅលើយាន Psyche។

កាលពីថ្ងៃទី 11 ធ្នូ 2023 កម្មវិធីពិសោធផ្នែកទំនាក់ទំនងដោយពន្លឺក្នុងអវកាសឆ្ងាយ (DSOC) នៃបន្ទប់ពិសោធន៍កម្លាំងរុញច្រានល្បឿនលឿន (JPL) របស់ណាសា បានបញ្ជូនវីដេអូដែលមានភាពច្បាស់កម្រិតខ្ពស់ខ្លាំង ស្ដីពីសត្វឆ្មាមួយក្បាលដែលមានឈ្មោះថា Taters កំពុងដេញតាមព្រួញពន្លឺឡាស៊ែរ ពីចម្ងាយប្រហែល 31 លានគីឡូម៉ែត្រ។ ការធ្វើតេស្តនេះ ត្រូវបានធ្វើឡើងនៅលើយានអវកាស Psyche របស់ណាសា ដែលបច្ចុប្បន្នកំពុងហោះហើរទៅកាន់ 16 Psyche ដែលជាអាចម៍ផ្កាយលោហធាតុស្ថិតក្នុងតំបន់ខ្សែក្រវាត់អាចម៍ផ្កាយចម្បងគេ នៅចន្លោះភពអង្គារ និងភពព្រហស្បតិ៍ ក្រោយពីត្រូវបានបាញ់បង្ហោះតាមរយៈរ៉ុក្កែត Falcon Heavy របស់ SpaceX កាលពីថ្ងៃទី 13 តុលា។

«ការបង្កើនកម្រិតបញ្ជូនគឺជារឿងចាំបាច់ដើម្បីសម្រេចបានគោលដៅវិទ្យាសាស្ត្រ និងការស្រាវជ្រាវក្នុងអនាគត។ យើងឆ្ពោះទៅកាន់ជោគជ័យនៃបច្ចេកវិទ្យាគន្លឹះនេះ ហើយផ្លាស់ប្ដូរវិធីទាក់ទងនៅក្នុងបេសកកម្មអន្តរភព» Pam Melroy អនុប្រធានរបស់ណាសា ឱ្យដឹងដូច្នេះ។

វីដេអូស្ដីពី Taters ត្រូវបានបញ្ជូនដោយឧបករណ៍ថ្មីដែលអភិវឌ្ឍដោយ JPL និងត្រូវបានហៅថា ប្រព័ន្ធបញ្ជូន និងទទួលឡាស៊ែរក្នុងជើងហោះហើរ។ ឧបករណ៍នេះបញ្ជូនពន្លឺឡាស៊ែរក្បែរអ៊ីហ្វ្រារ៉េដ ទៅកាន់តេឡេស្កុប Hale នៅឯស្ថានីយ Palomar របស់វិទ្យាស្ថានបច្ចេកវិទ្យា California។ រលកសញ្ញានេះចំណាយពេល 101 វិនាទី ដើម្បីធ្វើដំណើរមកដល់ផែនដី ក្នុងល្បឿន 267 មេហ្គាប៊ិត/វិនាទី (Mbps)។

Ryan Rogalin អ្នកវិទ្យាសាស្ត្រដែលទទួលខុសត្រូវលើឧបករណ៍អេឡិចត្រូនិចទទួលរលកសញ្ញារបស់គម្រោងនេះ និយាយថា «បើទោះបញ្ជូនពីចម្ងាយរាប់សិបលានគីឡូម៉ែត្រ ប្រព័ន្ធនេះនៅតែអាចបញ្ជូនវីដេអូបានលឿនជាងអ៊ីនធើណិតស្ទើរតែទាំងអស់នៅលើផែនដី»។

ប្រព័ន្ធបញ្ជូន និងទទួលឡាស៊ែរក្នុងជើងហោះហើរ បានធ្វើការពិសោធដំបូងកាលពីខែវិច្ឆិកា ដោយការបញ្ជូនរលកសញ្ញាមកកាន់ផែនដី ពីចម្ងាយ 16 លានគីឡូម៉ែត្រ។

យានអវកាស Psyche នឹងហោះកាត់ភពអង្គារនៅក្នុងឆ្នាំ 2026 និងថតរូបរបស់ភពក្រហមនេះ មុននឹងហោះឆ្ពោះទៅកាន់គោលដៅចុងក្រោយ គឺ អាចម៍ផ្កាយ 16 Psyche ដែលគ្រោងនឹងទៅដល់នៅក្នុងឆ្នាំ 2029៕

December 21, 2023

ចិនបាញ់បង្ហោះ «យានអវកាសមហាសម្ងាត់» ឡើងទៅកាន់គន្លងតារាវិថី

រ៉ុក្កែត Long March 2F ដឹកយន្តហោះអវកាសសម្រាប់ការពិសោធរបស់ប្រទេសចិន ពីមជ្ឈមណ្ឌលបាញ់បង្ហោះផ្កាយរណប Jiuquan កាលពីថ្ងៃទី 14 ធ្នូ ដើម្បីធ្វើការពិសោធវិទ្យាសាស្ត្រ។

យោងតាម SpaceNews ក្រៅពីបេសកកម្មពិសោធន៍ផ្នែកវិទ្យាសាស្ត្រ យន្តហោះអវកាសថ្មីរបស់ចិន ក៏ផ្ដល់ការគាំទ្រផ្នែកបច្ចេកទេសដើម្បីប្រើប្រាស់លម្ហក្នុងយាន សម្រាប់គោលដៅសន្តិភាពផងដែរ។

មកដល់ពេលនេះ ព័ត៌មានដែលទាក់ទងនឹងយន្តហោះអវកាសអាចប្រើប្រាស់ឡើងវិញរបស់ចិន ដែលមានរហ័សនាមថា នាគទេព ត្រូវបានគេផ្សាយយ៉ាងតិចតួចបំផុត។ យានអវកាសនេះទំនងជាត្រូវបានប្រើប្រាស់ដើម្បីធ្វើការសាកល្បងឧបករណ៍ថ្មី និងដំណើរការនៅលើគន្លងតារាវិថី។ យាននេះត្រូវបានបាញ់ឡើងទៅតាមរ៉ុក្កែត ហើយចុះចតដូចយន្តហោះធម្មតា បន្ទាប់ពីបានបំពេញបេសកកម្ម។ យោងតាមអ្នកវិទ្យាសាស្ត្រនៅសាកលវិទ្យាល័យ Harvard យាននេះមានទម្ងន់ប្រហែលពី 5 ដល់ 8 តោន និងប្រវែង 10 ម៉ែត្រ។

ជើងហោះហើរដំបូងរបស់យានអវកាសនាគទេពរបស់ចិន អូសបន្លាយពេលពីរថ្ងៃ។ ជើងហោះហើរទីពីររបស់វានឹងអូសបន្លាយពេលប្រហែល 9 ខែ ក្នុងនោះ វានឹងបញ្ចេញឧបករណ៍មួយដែលមិនទាន់ស្គាល់អត្តសញ្ញាណ ទៅក្នុងគន្លងគោចរ។ ឧបករណ៍នេះអាចជាផ្កាយរណបខ្នាតតូចដែលត្រូវបានផលិតឡើងដើម្បីតាមដាននាគទេព ឬម៉ូឌុលសេវាកម្មដែលលែងមានភាពចាំបាច់៕

December 16, 2023

យានអវកាស Voyager 1 ជួបបញ្ហា ពេលស្ថិតនៅចម្ងាយ 24 ពាន់លានគីឡូម៉ែត្រពីផែនដី

បច្ចុប្បន្ន ទិន្នន័យតែមួយគត់ដែលយានអវកាស Voyager 1 បញ្ជូនមកកាន់ផែនដី គឺលេខ 1 និងលេខ 0 ហើយក្រុមការងាររបស់ណាសា អាចនឹងត្រូវចំណាយពេលច្រើនសប្ដាហ៍ដើម្បីដោះស្រាយបញ្ហានេះ។

យោងតាមទំព័រ Space ដែលបានចុះផ្សាយកាលពីថ្ងៃទី 12 ធ្នូ យាន Voyager 1 របស់ណាសា បច្ចុប្បន្នមិនអាចបញ្ជូនទិន្នន័យវិទ្យាសាស្ត្រ ឬទិន្នន័យទាក់ទងនឹងប្រព័ន្ធរបស់យាននេះ មកកាន់ផែនដី។ យានដែលមានអាយុ 46 ឆ្នាំមួយគ្រឿងនេះ អាចទទួលបញ្ជា ប៉ុន្តែ បញ្ហាខាងលើទំនងជាកើតចេញពីកុំព្យូទ័ររបស់យាន។

ណាសាឱ្យដឹងថា ប្រព័ន្ធទិន្នន័យហោះហើរ (FDS) របស់ Voyager 1 ដែលមានតួនាទីប្រមូលព័ត៌មាន និងទិន្នន័យបច្ចេកទេសពីឧបករណ៍វិទ្យាសាស្ត្រនៅលើយាន មិនអាចភ្ជាប់ទំនាក់ទំនងដូចមុន ជាមួយនឹងប្រព័ន្ធបញ្ជាពីចម្ងាយនៅលើផែនដី។

ពេលដំណើរការធម្មតា FDS រៀបចំដាក់ព័ត៌មានរបស់យានទៅក្នុងកញ្ចប់ទិន្នន័យ រួចបញ្ជូនមកកាន់ផែនដីតាមរយៈ TMU (telecommunications unit) ។ ថ្មីៗនេះ កញ្ចប់ទិន្នន័យនេះបានជាប់គាំង និងបញ្ជូនតែលេខ 1 និងលេខ 0 ម្ដងហើយម្ដងទៀត។ ក្រុមបច្ចេកទេសរបស់ Voyager គិតថា បញ្ហាកើតចេញពី FDS ប៉ុន្តែ ពួកគេប្រហែលជាត្រូវចំណាយពេលច្រើនសប្ដាហ៍ ទើបរកឃើញដំណោះស្រាយ។

នេះមិនមែនជាបញ្ហាដំបូងដែលយាន Voyager 1 បានជួបប្រទះនាប៉ុន្មានឆ្នាំចុងក្រោយនេះ។ យានអវកាសនេះធ្លាប់ជួបបញ្ហាប្រព័ន្ធបញ្ជា និងកំណត់ទិស (AACS) កាលពីខែឧសភា ឆ្នាំ 2022 និងបញ្ជូនទិន្នន័យដែលគ្មានន័យក្នុងរយៈពេលច្រើនខែ មុននឹងត្រូវបានដោះស្រាយ៕

December 13, 2023

ប្រទេសចំនួន 7 រួមដៃគ្នាបាញ់បង្ហោះយានទៅចុះចតលើផ្ទៃព្រះចន្ទនាពេលឆាប់ៗនេះ

នៅរាត្រីបុណ្យណូអែល ថ្ងៃទី 24 ធ្នូ 2023 យានអវកាសមួយគ្រឿងនឹងត្រូវបានបាញ់បង្ហោះឡើងទៅកាន់ឋានព្រះចន្ទ ដើម្បីបំពេញបេសកកម្មពាណិជ្ជកម្មមួយដែលមិនធ្លាប់មានក្នុងប្រវត្តិសាស្ត្រនាពេលកន្លង។ នេះបើតាម Space.com ដែលបានចុះផ្សាយកាលពីដើមខែនេះ។

យានអវកាសនេះមានឈ្មោះថា យានចុះចតឋានព្រះចន្ទ Peregrine (ឬហៅថា ស្ទាំងទេព របស់ផែនដី) ដែលដាក់ឈ្មោះទៅតាមឈ្មោះសត្វស្ទាំង Peregrine ដែលហោះលឿនជាងគេលើពិភពលោក។

បើសិនគ្រប់យ៉ាងដំណើរការរលូនទៅតាមផែនការ «ស្ទាំងទេព» របស់ផែនដី នឹងចុះចតលើផ្ទៃព្រះចន្ទ ត្រង់តំបន់ដែលមានជ្រលងកម្អែភ្នំភ្លើងបុរាណនៅលើឋានព្រះចន្ទ ដែលត្រូវបានហៅថា Sinus Viscositatis។

បេសកកម្មនេះនឹងត្រូវបានកត់ត្រាក្នុងប្រវត្តិសាស្ត្រ ព្រោះវាជាបេសកកម្មដំបូងដែលបាញ់បង្ហោះទៅតាមគំនិតផ្ដួចផ្ដើម សេវាកម្មដឹកជញ្ជូនបែបពាណិជ្ជកម្មឡើងទៅកាន់ឋានព្រះចន្ទ (CLPS) របស់ទីភ្នាក់ងារអវកាសអាម៉េរិក (NASA)។ នេះក៏ជាលើកដំបូងដែលបច្ចេកវិទ្យារបស់ប្រទេសចំនួន 7 ត្រូវបានបាញ់បង្ហោះរួមគ្នាឡើងទៅកាន់ផ្ទៃព្រះចន្ទ។

ទំនិញចំនួន 20 ចំណែក មកពី 7 ប្រទេស នឹងត្រូវបាន «ស្ទាំងទេព» Peregrine នាំឡើងទៅកាន់ទីឋានរណបរបស់ផែនដី។ ក្នុងនោះ ទំនិញ 5 ចំណែកមកពី សហរដ្ឋអាម៉េរិក។ ក្រៅពីនេះ គឺជាទំនិញរបស់ អង់គ្លេស ម៉ិចស៊ិច អាល្លឺម៉ង់ ហុងគ្រី ជប៉ុន និងប្រទេសសីស្ហែល (Seychelles) នៅទ្វីបអាហ្វ្រិក។

ដោយការប្រើប្រាស់បច្ចេកវិទ្យាទំនើបចុងក្រោយ បេសកកម្មស្រាវជ្រាវឋានព្រះចន្ទរបស់ប្រទេសចំនួន 7 នេះ ត្រូវបានរំពឹងថា នឹងនាំមកនូវព័ត៌មាន/ទិន្នន័យសំខាន់ៗសម្រាប់អ្នកវិទ្យាសាស្ត្រ។

តាមគម្រោង យានចុះចត Peregrine នឹងធ្វើដំណើរតាមរយៈជើងហោះហើរដំបូងរបស់រ៉ុក្កែត Vulcan Centaur ដែលផលិតដោយក្រុមហ៊ុនអាម៉េរិក United Launch Alliance៕

December 11, 2023

ជប៉ុនគ្រោងនឹងបញ្ជូនយានឡើងទៅកាន់ឋានព្រះចន្ទនៅដើមឆ្នាំក្រោយ

កាលពីថ្ងៃទី 05 ធ្នូ ទីភ្នាក់ងារស្រាវជ្រាវអវកាសជប៉ុន ចាសា (JAXA) បានប្រកាសថា នឹងបញ្ជូនយានអវកាស SLIM (Smart Lander for Investigating Moon) ឡើងទៅកាន់ឋានព្រះចន្ទនៅថ្ងៃទី 20 មករា ឆ្នាំ 2024។

នេះគឺជាការប្រឹងប្រែងដើម្បីចុះចតដោយ «ថ្នមៗ» លើផ្ទៃព្រះចន្ទជាលើកដំបូងរបស់យានអវកាសជប៉ុន ដែលគ្រោងនឹងធ្វើឡើងនៅវេលាម៉ោង 12 ថ្ងៃត្រង់ នៃថ្ងៃទី 20 ខែមករា ឆ្នាំ 2024 (ម៉ោងក្នុងស្រុក)។ ដំណើរការចុះចតនឹងធ្វើឡើងក្នុងរយៈពេល 20 នាទី និងត្រូវបានផ្សាយផ្ទាល់តាមកញ្ចក់ទូរទស្សន៍។

យោងតាម ចាសា យានចុះចត SLIM ដែលមានបណ្ដោយ 2.7 ម៉ែត្រ នឹងហោះចូលដល់គន្លងតារាវិថីព្រះចន្ទនៅថ្ងៃទី 25 ធ្នូ ឆ្នាំ 2023 ហើយប្រហែលមួយខែក្រោយមក វានឹងធ្វើការចុះចត។ បើសិនជោគជ័យ ជប៉ុននឹងក្លាយជាប្រទេសទីប្រាំដែលមានយានចុះចតលើឋានព្រះចន្ទ បន្ទាប់ពី សូវៀត អាម៉េរិក ចិន និងឥណ្ឌា។

ចាសាឱ្យដឹងថា យានចុះចត SLIM នឹងនាំយករ៉ូបូតស្រាវជ្រាវពីរគ្រឿងទៅតាមខ្លួន។ រ៉ូបូតទាំងនេះនឹងត្រូវបានដាក់ពង្រាយលើផ្ទៃព្រះចន្ទ បន្ទាប់ពីបានចុះចត។

បេសកកម្ម SLIM មិនមែនជាការសាកល្បងចុះចតលើឋានព្រះចន្ទជាលើកដំបូងរបស់ ប្រទេសជប៉ុននោះទេ។ មុននោះ កាលពីដើមឆ្នាំនេះ យានចុះចតរបស់ជប៉ុន Hakuto-R ក៏បានទទួលជោគជ័យក្នុងការហោះចូលដល់គន្លងតារាវិថីព្រះចន្ទ បើទោះជាក្រោយមកវាបានបរាជ័យក្នុងការចុះចតលើឋានរណបមួយនេះ៕

December 7, 2023

យានអវកាសរបស់រុស្ស៊ី នាំយកក្រូចឃ្វិច និងស៊ុតក្រួចឡើងទៅកាន់អវកាស

យានអវកាស Progress MS-25 របស់រុស្ស៊ី ដែលត្រូវបានបាញ់បង្ហោះកាលពីថ្ងៃទី 01 ខែធ្នូ និងនាំយកទំនិញពិសេសៗមួយចំនួនឡើងទៅកាន់ស្ថានីយអវកាសអន្តរជាតិ (ISS) បានហោះដល់គោលដៅកាលពីថ្ងៃទី 03 ធ្នូ 2023។

ទំនិញដែលយានអវកាសនេះនាំយកទៅកាន់ ISS រួមមានដូចជា ក្រូចពោធិ៍សាត់ ក្រូចឃ្វិច និងអាហារសម្រាប់ឆ្នាំថ្មី និងស្បៀងអាហារដទៃទៀត រួមនឹង ស៊ុតសត្វក្រួចជប៉ុន 48 គ្រាប់សម្រាប់ការពិសោធនៅទីអវកាសផងដែរ។

យានអវកាសនេះក៏ដឹកជញ្ជូនទំនិញរាប់តោនផ្សេងទៀត រួមមាន ឥន្ធនៈ ទឹក ឧបករណ៍វេជ្ជសាស្ត្រ និងសម្លៀកបំពាក់ជាដើម។ យាន Progress MS-25 របស់រុស្ស៊ី នឹងស្ថិតនៅ ISS ចំនួន 179 ថ្ងៃ។

December 4, 2023

Tag: យានអវកាស