មាន - La Reine Media

ក្រុមបាល់ទាត់មួយរបស់អាស៊ីអាគ្នេយ៍ បង្កើតប្រវត្តិសាស្ត្រនៅ World Cup

ការដណ្ដើមបានជ័យជម្នះលើនូវែលសេឡង់ មិនត្រឹមតែជួយឱ្យក្រុមបាល់ទាត់នារីជម្រើសជាតិហ្វ៊ីលីពីនមានពិន្ទុជាលើកដំបូងនៅ World Cup នោះទេ តែក៏ជួយឱ្យក្រុមនេះគិតដល់ដំណាក់កាលឡើងដល់វគ្គជម្រុះផ្ទាល់ផងដែរ។

នៅក្នុងការប្រកួតជើងទីពីរនៃពូល A ដែលមានបួនក្រុមគឺ ហ្វ៊ីលីពីន ស្វ៊ីស នូវែលសេឡង់ និងន័រវែស នៅ World Cup នារី 2023 ដែលបានធ្វើឡើងកាលពីថ្ងៃទី 25 កក្កដា 2023 ហ្វ៊ីលីពីនទទួលបាន 3 ពិន្ទុ ឈរលំដាប់ទីបី បន្ទាប់ពីបានផ្ដួលនូវែលសេឡង់ 1-0។

ចំណែកន័រវែសឈរនៅបាតតារាង និងមានហានិភ័យត្រូវបានជម្រុះឆាប់ៗនេះ ព្រោះតែទទួលបាន 1 ពិន្ទុ ក្រោយពីបានទាត់ពីរប្រកួត។ រីឯស្វ៊ីសវិញ កំពុងតែត្រៀមដណ្ដើមសំបុត្រឡើងទៅវគ្គបន្ទាប់ នៅពេលមាន 4 ពិន្ទុក្នុងដៃ។

ការប្រកួតនៅពូល A នឹងធ្វើឡើងប្រកបដោយភាពតានតឹងនៅជើងចុងក្រោយ ពេលដែលក្រុមទាំង 4 សុទ្ធតែនៅមានឱកាស។ សម្រាប់ក្រុមហ្វ៊ីលីពីន ក្រោយជ័យជម្នះដំបូងនៅ World Cup ក្រុមនេះថែមទាំងអាចបង្កើតបានប្រវត្តិសាស្ត្រដ៏គួរឱ្យរំភើប ដោយការក្លាយជាក្រុមដំបូងគេរបស់អាស៊ីអាគ្នេយ៍ដែលឆ្លងផុតវគ្គចែកពូល។

បើសិនធ្វើបានដូច្នេះ ក្រុមកីឡាការិនីបាល់ទាត់ហ្វ៊ីលីពីន នឹងបានទទួលប្រាក់រង្វាន់យ៉ាងច្រើន។ ការកំណត់របស់ FIFA បានចែងថា បណ្ដាក្រុមបាល់ទាត់ដែលចូលរួមប្រកួតនឹងបានទទួលប្រាក់រង្វាន់ 1.56 លានដុល្លារអាម៉េរិក ខណៈដែលកីឡាការិនីម្នាក់ៗនឹងបានទទួលប្រាក់រង្វាន់ 30,000 ដុល្លារអាម៉េរិកបន្ថែមទៀត។

ខ្ទង់ប្រាក់រង្វាន់ខាងលើនឹងកើនឡើង នៅពេលឡើងដល់ដំណាក់កាលខ្ពស់ជាងនេះ។ សម្រាប់ហ្វ៊ីលីពីន បើសិនបានឡើងដល់វគ្គ 1/8 ក្រុមនេះនឹងបានទទួលប្រាក់រង្វាន់ 1.87 លានដុល្លារអាម៉េរិក គ្រាដែលកីឡាការិនីម្នាក់ៗនឹងបានទទួល 60,000 ដុល្លារ ខ្ពស់ជាងពីរដងធៀបនឹងវគ្គចែកពូល។ ប្រាក់រង្វាន់នេះកើនឡើងថែមទៀត បើសិនពួកគេបានឡើងដល់វគ្គខ្ពស់ជាងនេះ។

FIFA បានបង្កើនប្រាក់រង្វាន់របស់ World Cup នារីឆ្នាំ 2023 ឡើងដល់ 110 លានដុល្លារអាម៉េរិក ខ្ពស់ជាង 3 ដង បើធៀបនឹងឆ្នាំ 2019 ហើយស្មើនឹង 1/3 នៃ World Cup 2022 នៅកាតា។

បើសិនជាបានឈ្នះន័រវែស ហ្វ៊ីលីពីននឹងបានឡើងទៅវគ្គបន្ទាប់។ ក្នុងករណីស្មើ តំណាងរបស់អាស៊ីអាគ្នេយ៍មួយនេះនឹងមាន 4 ពិន្ទុ និងគ្រាប់បាល់ចំណេញស្មើនឹង -1។ ពេលនោះ ហ្វ៊ីលីពីននឹងត្រូវរង់ចាំលទ្ធផលនៃការប្រកួតរវាងក្រុមស្វ៊ីស និងនូវែលសេឡង់។

កាលពីអតីតកាល ក្រុមនារីថៃគឺជាក្រុមដំបូងគេរបស់អាស៊ីអាគ្នេយ៍ដែលបានឡើងទៅប្រកួតនៅ World Cup ហើយក៏បានឈ្នះមួយប្រកួត។ ក្រុមនេះបានឈ្នះកូតឌឺវ័រក្នុងលទ្ធផល 3-2 នៅ World Cup 2015។ ក៏ប៉ុន្តែ ក្រុមនារីថៃពេលនោះត្រូវឈរលំដាប់ទីបីនៅក្នុងពូលរបស់ខ្លួន និងមិនអាចឡើងទៅវគ្គជម្រុះផ្ទាល់៕

July 26, 2023

យានសម្រាប់បើកបរលើឋានព្រះចន្ទរបស់ Toyota និង Mitsubishi កំពុងត្រូវបានអភិវឌ្ឍ

Toyota Motor និង Mitsubishi Heavy Industries បានប្រកាសសេចក្ដីលំអិតអំពីគម្រោងអភិវឌ្ឍបណ្ដាយានដំណើរការដោយថាមពលព្រះអាទិត្យ សម្រាប់បើកបរលើឋានព្រះចន្ទ។

យានទាំងនេះអាចត្រូវបានប្រើប្រាស់សម្រាប់គម្រោង Artemis ដែលដឹកនាំដោយសហរដ្ឋអាម៉េរិក ក្នុងបំណងនាំមនុស្សឡើងទៅកាន់ឋានព្រះចន្ទជាថ្មីនៅឆ្នាំ 2025។ នេះនឹងជាលើកដំបូងដែលមនុស្សឡើងទៅដើរលើឋានព្រះចន្ទ រាប់ចាប់ពីឆ្នាំ 1972។

យានបើកបរលើដីគ្រោងនឹងត្រូវបាននាំឡើងទៅកាន់ឋានព្រះចន្ទនៅឆ្នាំ 2029។ កាលពីថ្ងៃទី 21 កក្កដា 2023 ក្រុមហ៊ុន Toyota Motor និង Mitsubishi Heavy Industries (MHI) បានធ្វើសន្និសីទសារព័ត៌មានមួយ ជាមួយនឹងទីភ្នាក់ងារអវកាសជប៉ុន (JAXA) នៅតូក្យូ។ ថ្ងៃទី 21 កក្កដា ក៏ជាថ្ងៃដែល Apollo 11 ចុះចតលើផ្ទៃព្រះចន្ទកាលពី 54 ឆ្នាំមុន។

Toyota ចាប់ផ្ដើមសហការជាមួយ JAXA កាលពីឆ្នាំ 2019 ដើម្បីអភិវឌ្ឍរថយន្តសម្រាប់បើកបរលើឋានព្រះចន្ទ ដែលមានឈ្មោះថា Lunar Cruiser។ យាននេះត្រូវបានអភិវឌ្ឍឡើងដើម្បីបើកបរលើភូមិសាស្ត្រដែលមានឧបសគ្គច្រើន មានដូចជាវាលខ្សាច់ និងផ្លូវនៅតំបន់ភ្នំជាដើម។ នេះគឺជារបាយការណ៍ស្ដីពីវឌ្ឍនភាពដំបូងរបស់ Toyota ទាក់ទងនឹងកម្មវិធីអវកាសរបស់ពួកគេនៅក្នុងរយៈពេលបួនឆ្នាំកន្លង។

Lunar Cruiser នឹងធ្វើដំណើរសរុបជាង 10,000 គីឡូម៉ែត្រនៅលើឋានព្រះចន្ទដើម្បីសិក្សាស្រាវជ្រាវ។ Toyota ឱ្យដឹងថាយាននេះនឹងត្រូវបានបំពាក់មុខងារសំខាន់ៗចំនួនបួន រួមមាន មុខងារប្រើប្រាស់ថ្មបង្កើតថាមពលឡើងវិញ (RCF), មុខងារសម្រាប់ការបើកបរលើភូមិសាស្ត្រលំបាក, មុខងារបើកបរស្វ័យប្រវត្ត, និងមុខងារបទពិសោធន៍អ្នកប្រើប្រាស់ (UX)។

ថ្នាក់ដឹកនាំរបស់ MHI បានឱ្យដឹងថា ក្រុមហ៊ុននេះកំពុងពិនិត្យលទ្ធភាពនៃការផលិតរថយន្តសម្រាប់បើកបរលើឋានព្រះចន្ទ ដែលមានទម្ងន់ប្រហែល 10 តោន ឱ្យបានមុនការបាញ់បង្ហោះពីពីរទៅបីឆ្នាំ។

ចំណែក Toyota វិញ ក្រៅពីកិច្ចសហការជាមួយ MHI ក្រុមហ៊ុននេះក៏កំពុងត្រៀមពង្រីកកិច្ចសហប្រតិបត្តិការជាមួយដៃគូដទៃទៀត គ្រាដែលបាន និងកំពុងសហការជាមួយ Bridgestone ដើម្បីអភិវឌ្ឍសម្បកកង់រថយន្តធ្វើពីលោហធាតុដែលអាចបើកបរលើដីនៅឋានព្រះចន្ទ៕

July 26, 2023

ចិនបាញ់រ៉ុក្កែត «ហៅទឹកភ្លៀង» បានជិត 40 ពាន់លានតោន និងសង្គ្រោះបានជាង 14 ពាន់លានយុន

សកម្មភាពបាញ់រ៉ុក្កែតទៅលើអាកាសដើម្បីហៅភ្លៀង គឺជាការងារស្មុគស្មាញ និងទាមទារឱ្យមានស្ដង់ដាប្រកបដោយភាពស៊ីចង្វាក់គ្នា រវាងស្ថាប័នដែលពាក់ព័ន្ធ។

វេលាម៉ោង 22 និង 23 នាទី ថ្ងៃទី 18 មីនា 2023 នៅមូលដ្ឋានគ្រប់គ្រងដំណើរការបង្កើនទឹកភ្លៀងសិប្បនិម្មិត ក្នុងស្រុក Fushun ខេត្ត Sichuan ប្រទេសចិន រ៉ុក្កែតហៅភ្លៀងសិប្បនិម្មិតចំនួនពីរគ្រាប់ត្រូវបានបាញ់ឡើងទៅកាន់អាកាស និងបានផ្ទុះ បង្កើតជាសំឡេងយ៉ាងកក្រើកមេឃ ហើយការបាញ់លើកទីមួយនេះក៏បានសម្រេចជាស្ថាពរ។

បួននាទីក្រោយការបាញ់រ៉ុក្កែត ទឹកភ្លៀងក៏ចាប់ផ្ដើមធ្លាក់នៅតំបន់ Fushun។ មកដល់ម៉ោង 23 និង 48 នាទី រ៉ុក្កែតហៅភ្លៀងពីរគ្រាប់ទៀតក៏ត្រូវបានបាញ់ឡើងទៅកាន់អាកាស ធ្វើឱ្យទឹកភ្លៀងបង្អោរចុះមកជាបន្តបន្ទាប់។

យោងតាមប្រព័ន្ធផ្សព្វផ្កាយនៅខេត្ត Sichuan សកម្មភាពបាញ់បង្ហោះរ៉ុក្កែតហៅភ្លៀង គឺជាការងារស្មុគស្មាញ និងទាមទារឱ្យមានស្ដង់ដាប្រកបដោយភាពស៊ីចង្វាក់គ្នា រវាងស្ថាប័នដែលពាក់ព័ន្ធ។

បច្ចេកទេស «ហៅភ្លៀង»

មន្ត្រីជំនាញនៅមជ្ឈមណ្ឌលសេវាកម្មកាត់បន្ថយគ្រោះធម្មជាតិនៃស្រុក Fushun និយាយថា ដើម្បីសម្រេចបានកិច្ចការបង្កើនទឹកភ្លៀងសិប្បនិម្មិត គេត្រូវបំពេញលក្ខខណ្ឌជាច្រើន មានដូចជា ការវិភាគនិន្នាការអាកាសធាតុ ការប្រឹក្សាយោបល់រួម ការត្រៀម ការកែតម្រូវឧបករណ៍ដំណើរការ ការតាមដានដោយផ្ទាល់ និងការស្នើសូមប្រើប្រាស់ដែនអាកាសជាដើម។

សកម្មភាពបង្កើនទឹកភ្លៀងសិប្បនិម្មិតមិនមែនមានន័យថា ចង់ហៅភ្លៀងពេលណាក៏បាន។ ដើម្បីអាចធ្វើឱ្យទឹកភ្លៀងធ្លាក់ គេត្រូវបំពេញលក្ខខណ្ឌសំខាន់ៗចំនួនបី៖ កម្រាស់របស់ពពកដែលផ្ទុកទឹកភ្លៀងត្រូវតែធំជាង 2 គីឡូម៉ែត្រ, ពពកនោះត្រូវតែមានចំហាយទឹកគ្រប់គ្រាន់ និងត្រូវតែមានតំបន់ភាយចំហាយទឹក។

តំបន់ដែលត្រូវការទឹកភ្លៀងត្រូវតែជាទីដែលអនុញ្ញាតឱ្យរ៉ុក្កែតហោះឡើងដល់កម្ពស់ពី 4 ពាន់ ទៅ 8 ពាន់ម៉ែត្រ ដែលនេះក៏ត្រូវការកិច្ចសហការឱ្យបានម៉ត់ចត់ជាមួយនឹងស្ថាប័នគ្រប់គ្រងដែនអាកាស ដើម្បីធានាសុវត្ថិភាព។

ពេលវេលាដែលអាចឱ្យគេដំណើរការបាញ់រ៉ុក្កែតហៅភ្លៀង គឺជារឿងស្មុគស្មាញមួយផ្សេងទៀត។ ព្រោះថា គេត្រូវការជ្រើសរើសពេលវេលា និងការរង់ចាំ មុននឹងអាចបាញ់រ៉ុក្កែតហៅភ្លៀង បន្ទាប់ពីបានត្រៀមផែនការរួចរាល់។

បច្ចេកទេសហៅទឹកភ្លៀងសិប្បនិម្មិត កាត់បន្ថយការខាតបង់ប្រាក់បានជិត 2 ពាន់ដុល្លារអាម៉េរិក

ជាក់ស្ដែង សកម្មភាពកែសម្រួលអាកាសធាតុបែបសិប្បនិម្មិត មិនត្រឹមតែដើម្បីបង្កើនទឹកភ្លៀងនោះទេ តែនៅអាចទប់ស្កាត់បាតុភូតភ្លៀងទឹកកក ចុះអ័ព្ទ និងបាតុភូតត្រជាក់ដល់កកផងដែរ។

ក្រោយការអភិវឌ្ឍជាង 60 ឆ្នាំ បច្ចេកទេសកែប្រែអាកាសធាតុ និងបង្កើនទឹកភ្លៀងរបស់ប្រទេសចិន បានរីកចម្រើនយ៉ាងខ្លាំង បង្កើតជាប្រព័ន្ធមួយដែលមានបួនថ្នាក់ រួមមាន ថ្នាក់ស្រុក ថ្នាក់ក្រុង ថ្នាក់ខេត្ត និងថ្នាក់ជាតិ។

កាលពីឆ្នាំ 2022 ស្ទើរតែទាំងអស់នៃតំបន់ភាគខាងត្បូងប្រទេសចិន បានឆ្លងកាត់រលកកម្ដៅ និងគ្រោះរាំងស្ងួតជាច្រើនលើក ចាប់ពីខែមិថុនា ដល់ពាក់កណ្ដាលខែវិច្ឆិកា នាំឱ្យអាជ្ញាធរតំបន់ជាច្រើនត្រូវប្រើប្រាស់បច្ចេកទេសហៅទឹកភ្លៀង។ ក្នុងអំឡុងពេលនោះ ពួកគេបានធ្វើការហៅទឹកភ្លៀងសរុបជាង 15,000 លើក ក្នុងនោះ ការប្រើប្រាស់យន្តហោះមានចំនួន 241 លើក និងការបាញ់រ៉ុក្កែតចំនួន 15,000 លើក ហើយទាញយកទឹកភ្លៀងបានប្រហែល 8.56 ពាន់លានតោន។

យោងតាមស្ថាប័នឧតុនិយមចិន ពេញមួយឆ្នាំ 2022 ប្រទេសចិនបង្កើតទឹកភ្លៀងបានប្រហែល 39.8 ពាន់លានតោន ជួយការពារផ្ទៃដីបានប្រហែល 650,000 គីឡូម៉ែត្រការ៉េ និងកាត់បន្ថយការខាតបង់ផ្នែកសេដ្ឋកិច្ចបានប្រហែល 14.1 ពាន់លានយុន (ប្រហែល 1,972,900,000 ដុល្លារអាម៉េរិក)៕

July 26, 2023

រកឃើញ «ផែនដីខ្នាតយក្ស» មានសីតុណ្ហភាពអាចរស់នៅបាន

«ផែនដីខ្នាតយក្ស» នេះ ស្ថិតក្នុងចំណោមភពដែលអាចទ្រទ្រង់ជីវិត និងត្រូវបានសង្កេតមើលជាលើកដំបូងដោយតេឡេស្កុបអវកាស Kepler របស់ណាសា កាលពីឆ្នាំ 2009។

ដើមឡើយ ក្រុមអ្នកវិទ្យាសាស្ត្រជឿថា មិនមានភាវៈរស់ណាមួយនៅក្នុងភពដទៃក្រៅពីផែនដី។ ប៉ុន្តែ បន្ទាប់ពីផលិតបានឧបករណ៍ទំនើបៗ មនុស្សចាប់ផ្ដើមយល់ថា វត្តមានរបស់មនុស្សភពដទៃប្រាកដជាមាន ហើយអាចមានច្រើនលើសពីការនឹកគិតទៅទៀត។

គិតមកដល់បច្ចុប្បន្ន អ្នកវិទ្យាសាស្ត្របានរកឃើញ «ផែនដីខ្នាតយក្ស» ជាង 4,000 នៅក្នុងចក្រវាលដែលមនុស្សអាចសង្កេតឃើញ។ «ផែនដីខ្នាតយក្ស» ចង់សំដៅលើបណ្ដាភពដែលមានបរិស្ថានស្រដៀងនឹងផែនដី របស់មនុស្ស ប៉ុន្តែមានទំហំធំជាង។

«ផែនដីខ្នាតយក្ស» Kepler-22b

Kepler-22b គឺជាមួយក្នុងចំណោម «ផែនដីខ្នាតយក្ស» ដែលមនុស្សបានរកឃើញ។ Kepler-22b ត្រូវបានសង្កេតមើលជាលើកដំបូងកាលពីឆ្នាំ 2009 ដោយតេឡេស្កុបអវកាស Kepler របស់ទីភ្នាក់ងារអវកាសអាម៉េរិក (ណាសា)។ អ្នកវិទ្យាសាស្ត្រដែលបានរកឃើញ Kepler-22b មានឈ្មោះថា William Burrucci។

Kepler-22b ស្ថិតក្នុងកញ្ចុំផ្កាយ Cygnus ដែលមានចម្ងាយពីផែនដីប្រមាណ 638 ឆ្នាំពន្លឺ និងមានអង្កត់ផ្ចិតធំជាងផែនដី 2.4 ដង ហើយមួយឆ្នាំរបស់វាស្មើនឹង 290 ថ្ងៃនៅលើផែនដី។

Kepler-22b វិលជុំវិញផ្កាយមេដែលមានឈ្មោះថា Kepler-22។ Kepler-22 តូចជាងព្រះអាទិត្យរបស់មនុស្សបន្តិច ប៉ុន្តែមានកម្ដៅប្រហាក់ប្រហែលនឹងព្រះអាទិត្យ។ ភព Kepler-22b ត្រូវបានគណនាឃើញថា មានអាយុប្រហែល 4 ពាន់លានឆ្នាំ។

ក្រុមអ្នកវិទ្យាសាស្ត្រទើបតែបានរកឃើញថា ភព Kepler-22b ស្ថិតនៅចម្ងាយពីផ្កាយមេប្រហែលនឹង 85% នៃចម្ងាយពីផែនដីរបស់មនុស្ស ទៅព្រះអាទិត្យ។ នេះមានន័យថា សីតុណ្ហភាពនៅលើភព Kepler-22b អាចស្មើនឹង 22 អង្សាសេ ប្រហាក់ប្រហែលនឹងផែនដី ដែលអនុញ្ញាតឱ្យមានវត្តមានទឹករាវហូរនៅលើផ្ទៃ។ Kepler-22b អាចជា «ផ្ទះទីពីរ» ដ៏សមស្របសម្រាប់មនុស្សជាតិ។ ព្រោះថា ថ្មីៗនេះ ក្រុមអ្នកវិទ្យាសាស្ត្របានរកឃើញថា Kepler-22b មានបរិយាកាសក្រាស់។

ធ្វើយ៉ាងណាដើម្បីអាចទៅដល់ Kepler-22b?

បើសិនគិតទៅតាមល្បឿនរបស់មីស៊ីលទំនើបនាបច្ចុប្បន្នរបស់មនុស្ស (10 គីឡូម៉ែត្រ/វិនាទី) យើងនឹងត្រូវចំណាយពេលហោះហើរជាង 18 លានឆ្នាំ ទើបទៅដល់ភព Kepler-22b ហើយនេះគឺជារយៈពេលដ៏សែនយូរសម្រាប់ជីវិតមនុស្ស។

យានអវកាសដែលមានល្បឿនលឿនបំផុតនាបច្ចុប្បន្នគឺយានព្រះអាទិត្យ Parker របស់ណាសា ព្រោះថា នៅពេលទៅកាន់តែជិតព្រះអាទិត្យ ល្បឿនរបស់វាអាចកើនដល់ 692,000 គីឡូម៉ែត្រ/ម៉ោង ប្រហែលនឹង 192 គីឡូម៉ែត្រ/វិនាទី។ ក្នុងល្បឿននេះ វានឹងចំណាយពេលប្រហែលមួយលានឆ្នាំ ទើបទៅដល់ភព Kepler-22b។

នៅពេលប្រើប្រាស់បច្ចេកវិទ្យា និងយានបច្ចុប្បន្ន មនុស្សនឹងមិនអាចធ្វើដំណើរទៅដល់ភព Kepler-22b ឡើយ។ ដូច្នេះ មនុស្សត្រូវការបច្ចេកវិទ្យា និងយានអវកាសទំនើបជាងនេះរាប់លានដង ទើបអាចមានឱកាសទៅជាន់ដីរបស់ភព Kepler-22b នាពេលអនាគត៕

July 25, 2023

ទីក្រុងរបស់អង់គ្លេសជិតសាងសង់ប្រព័ន្ធថ្មផ្ទុកអគ្គិសនីធំជាងគេលើលោក

អាជ្ញាធរបានអនុម័តលើគម្រោងសាងសង់ប្រព័ន្ធថ្មផ្ទុកថាមពលអគ្គិសនីធំជាងគេលើពិភពលោក នៅឯរោងចក្រផលិតអគ្គិសនីចាស់មួយ ក្នុងទីក្រុង Manchester ប្រទេសអង់គ្លេស ដើម្បីរក្សាថាមពលអគ្គិសនីសម្រាប់ការផ្គត់ផ្គង់ដល់គ្រួសារចំនួន 36,000 គ្រួ នៅក្នុងរយៈពេលមួយសប្ដាហ៍។

ក្រុមហ៊ុនថាមពល Carlton Power នឹងត្រូវការស្វែងរកទុន 963 លានដុល្លារអាម៉េរិក ដើម្បីអនុវត្តគម្រោង និងជ្រើសរើសអ្នកផ្គត់ផ្គង់។ រោងចក្រថ្មផ្ទុកអគ្គិសនីគឺជាវិធីដែលឆ្លើយតបនឹងតម្រូវការប្រើប្រាស់អគ្គិសនីជាបន្តបន្ទាប់ ដោយសារតែអគ្គិសនីពីប្រភពនានាដែលងាយនឹងរអាក់រអួលកាន់តែមានច្រើនឡើងៗ ក្នុងនោះមានដូចជារោងចក្រផលិតអគ្គិសនីពីកម្លាំងខ្យល់ និងកម្ដៅព្រះអាទិត្យជាដើម។

ប្រព័ន្ធថ្មផ្ទុកអគ្គិសនីអាចទាញយកអគ្គិសនីមករក្សាទុកនៅក្នុងថ្ងៃដែលសម្បូរពន្លឺព្រះអាទិត្យ ឬខ្យល់ ដោយការចំណាយទាប ហើយក្រោយមកក៏ផ្គត់ផ្គង់នៅពេលចាំបាច់។ តាមគម្រោង មូលដ្ឋាននេះនឹងផ្គត់ផ្គង់អគ្គិសនី 2,080 ម៉េហ្គាវ៉ាត់ ដែលប្រហាក់ប្រហែលនឹងរោងចក្រអគ្គិសនីខ្នាតមធ្យម នៅក្នុងមួយម៉ោង។ បច្ចុប្បន្ន គម្រោងនេះទទួលបានការអនុញ្ញាតពីអាជ្ញាធររួចហើយ។

តាមផែនការ ដំណើរការសាងសង់ប្រព័ន្ធថ្មផ្ទុកអគ្គិសនីនេះនឹងចាប់ផ្ដើមនៅត្រីមាសទីមួយរបស់ឆ្នាំក្រោយ។ ប្រព័ន្ធនេះក៏នឹងដំណើរការពាណិជ្ជកម្មចាប់ពីត្រីមាសទីបួនឆ្នាំ 2025។

បច្ចុប្បន្ន ប្រទេសអង់គ្លេសចង់អភិវឌ្ឍបណ្ដាញផលិតអគ្គិសនីពីកម្លាំងខ្យល់លើសមុទ្រដែលមានថាមពល 50 ជីហ្គាវ៉ាត់នៅឆ្នាំ 2030។ ក៏ប៉ុន្តែ ពួកគេត្រូវការបច្ចេកវិទ្យាដែលមានស្ថិរភាព ដើម្បីរក្សាទុកអគ្គិសនីសម្រាប់ផ្គត់ផ្គង់ក្នុងពេលមិនមានខ្យល់។ ដូច្នេះ គម្រោងខាងលើពិតជាសមស្រប និងអាចឆ្លើយតបតាមតម្រូវការ៕

July 25, 2023

ព្រះចន្ទអាចរៀបចំព្រឹត្តិការណ៍បាល់ទាត់ដំបូងនៅឆ្នាំ 2035?

បាល់ទាត់គឺជាកីឡាដែលទទួលបានការនិយមចូលចិត្តបំផុតនៅលើពិភពលោក ដូច្នេះតើវាអាចត្រូវបានរៀបចំការប្រកួតនៅលើភព ឬទីឋានដទៃក្រៅពីផែនដី ឬអត់?

នេះគឺជាអ្វីដែលក្រុមអ្នកវិទ្យាសាស្ត្រកំពុងគិតដល់។ ពួកគេជឿថា បាល់ទាត់អាចលេងនៅលើឋានព្រះចន្ទយ៉ាងឆាប់នៅឆ្នាំ 2035។

ក្រុមអ្នកជំនាញមកពីវិទ្យាស្ថានបច្ចេកទេស និងបច្ចេកវិទ្យា (IET) ដែលមានទីស្នាក់ការកណ្ដាលនៅប្រទេសអង់គ្លេស បានរៀបគម្រោងពិសេសមួយស្ដីពីការរៀបចំព្រឹត្តិការណ៍ប្រកួតកីឡាបាល់ទាត់នៅលើឋានព្រះចន្ទ។ ពួកគេថា ការប្រកួតនេះនឹងមានថេរវេលា 90 នាទី ប៉ុន្តែមិនប្រើប្រាស់ឈុតសម្លៀកបំពាក់ធម្មតាដូចនៅលើផែនដី។

ការប្រកួតនៅខាងក្រៅភពផែនដីនឹងត្រូវបានចែកចេញជាបួនតង់ ហើយក្នុងមួយតង់មាន 10 នាទី និងសម្រាក 20 នាទីនៅចន្លោះតង់នីមួយៗ។ ក្រុមបាល់ទាត់នីមួយៗនឹងមានកីឡាករ 5 នាក់។

សម្លៀកបំពាក់កីឡាដូចនៅលើផែនដីនឹងត្រូវបានជំនួសដោយឈុតអ្នកអវកាស ដែលបំពាក់មុខងារទំនើបៗជាច្រើន ក្នុងនោះមានទាំងឧបករណ៍បញ្ចុះកម្ដៅផងដែរ។

ចំណែកអាជ្ញាកណ្ដាលវិញ នឹងមានលក្ខណៈស្រដៀងទៅនឹងបច្ចេកវិទ្យា VAR។ ព្រោះថា ពួកគេនឹងបង្ហាញខ្លួនលើទីលានប្រកួតក្នុងទម្រង់ជារូបភាព 3D។

យោងតាម IET ការប្រកួតបាល់ទាត់លើឋានព្រះចន្ទនឹងធ្វើឡើងនៅពេលថ្ងៃត្រង់ ដើម្បីងាយស្រួលមើល គ្រាដែលទំហំរបស់ទីលានក៏នឹងត្រូវបានបន្ថយមកនៅត្រឹម 1/8 នៃទីលាននៅលើផែនដី។

ខ្សែបន្ទាត់ជុំវិញទីលានអាចត្រូវបានគូសសញ្ញាដោយធាតុ polymer ពណ៌ខ្មៅ-ស។ ទីលានបាល់ទាត់ក៏នឹងត្រូវការបាំងដោយសំណាញ់ និងប្រក់ដំបូល ដើម្បីជៀសវាងបាល់ខ្ទាត់ចេញទៅបាត់។ រីឯគ្រាប់បាល់វិញ នឹងត្រូវមានទំហំធំជាងជិតទ្វេដង ធៀបនឹងបាល់ធម្មតា ដើម្បីងាយស្រួលមើល។

ដើម្បីគាំទ្រដល់គម្រោងខាងលើ IET កំពុងតែអំពាវនាវសូមឱ្យក្មេងនៅប្រទេសអង់គ្លេសដែលមានអាយុពី 4 ទៅ 13 ឆ្នាំ ចូលរួមការរចនាឈុតសម្លៀកបំពាក់ផ្លូវការដំបូងគេសម្រាប់ព្រឹត្តិការណ៍បាល់ទាត់នៅលើឋានព្រះចន្ទ៕

July 25, 2023

Mbappe មិនសូវអើពើដល់សំណើផ្ដល់បៀវត្សរ៍ជិត 800 លានដុល្លារពីក្លឹបនៅអារ៉ាប់

ខ្សែប្រយុទ្ធជនជាតិបារាំង Mbappe ទំនងជានឹងបដិសេធសំណើបង្កើតកិច្ចព្រមព្រៀងមួយឆ្នាំ និងប្រាក់បៀវត្សរ៍ 775 លានដុល្លារអាម៉េរិក ពីក្លឹប Al Hilal របស់ប្រទេសអារ៉ាប៊ីសាអូឌីត។

យោងតាមទំព័រ Relevo នៅប្រទេសអេស្ប៉ាញ Mbappe មិនមានចេតនាទាត់ឱ្យក្លឹប Al Hilal។ ខ្សែប្រយុទ្ធវ័យ 24 ឆ្នាំរូបនេះ ប្ដេជ្ញាចិត្តទាត់ឱ្យ PSG ក្នុងឆ្នាំចុងក្រោយនៃកិច្ចព្រមព្រៀង មុននឹងទៅចូលរួមជាមួយនឹងក្លឹប Real Madrid ទៅតាមទម្រង់សេរី។

មុននោះ កាលពីថ្ងៃទី 24 កក្កដា ក្លឹប Al Hilal បានស្នើទិញ Mbappe ក្នុងតម្លៃ 330 លានដុល្លារអាម៉េរិក។ Al Hilal ក៏បានត្រៀមខ្លួនរួចហើយសម្រាប់ការផ្ដល់ប្រាក់បៀវត្សរ៍ 775 លានដុល្លារអាម៉េរិក និងសិទ្ធិទៅចូលរួមជាមួយក្លឹប Real Madrid នៅឆ្នាំ 2024 ដល់ Mbappe។

បន្ទាប់ពីព័ត៌មានស្ដីពីសំណើរបស់ Al Hilal កំពូលតារាបាល់បោះនៅពានរង្វាន់ NBA លោក Giannis Antetokounmpo បានសរសេរលើ Twitter ថា «Al Hilal អ្នកអាចទិញខ្ញុំបាន។ ខ្ញុំមានមុខមាត់ដូច Mbappe។

ក្លឹប Al Hilal ឆ្លើយតបវិញថា «ស្វាគមន៍មកកាន់យើងខ្ញុំក្នុងនាមជាអ្នកគាំទ្រ, Giannis»។ ក្រោយមក Mbappe ក៏បានចូលបញ្ចេញមតិក្រោមសាររបស់ Giannis ដោយការដាក់រូបសើចចេញទឹកភ្នែក។

កិច្ចព្រមព្រៀងរវាង Mbappe និងក្លឹប PSG នៅមានសុពលភាពមួយឆ្នាំទៀត។ ការដែល Mbappe បដិសេធការពន្យារសុពលភាពដល់ឆ្នាំ 2025 ដែលផ្ទុយពីគម្រោងដំបូងរបស់ភាគីទាំងពីរ បានក្លាយជារឿង «ទុំជោរ» និងអាចបង្កការខាតបង់ប្រាក់ច្រើនដល់ PSG។ បើសិនមិនលក់នៅក្នុងរដូវក្ដៅនេះ PSG នឹងបាត់បង់កីឡាករជនជាតិបារាំងរូបនេះដោយទទេៗ ចាប់ពីខែកក្កដាឆ្នាំ 2024។

បន្ទាប់ពីមិនទទួលបានចម្លើយបកស្រាយពី Mbappe កាលពីថ្ងៃទី 22 កក្កដា PSG ក៏សម្រេចចិត្តប្រកាសលក់។ PSG ក៏ដាក់សម្ពោធលើ Mbappe ដោយការមិនបញ្ចូលឈ្មោះកីឡាករនេះទៅក្នុងក្រុមដែលត្រូវទៅទាន់នៅប្រទេសជប៉ុន។ ពេលនោះ Mbappe ត្រូវបានគេជឿថា ទំនងជាបានយល់ព្រមធ្វើជាកីឡាករបម្រុងពេញមួយរដូវកាល 2023-2024។

បច្ចុប្បន្ន Mbappe កំពុងកាន់កាប់កំណត់ត្រាទាត់ចូលទីបាន 212 គ្រាប់នៅក្នុង 260 ប្រកួតសម្រាប់ PSG។ សម្រាប់ក្រុមជម្រើសជាតិបារាំង Mbappe រកបាន 40 គ្រាប់ ជាប់ចំណាត់ថ្នាក់លេខ 5 នៅក្នុងបញ្ជីឈ្មោះកីឡាករដែលរកបានគ្រាប់បាល់ ដែលនេះគឺនៅទាបជាង 14 គ្រាប់បើធៀបនឹង Olivier Giroud ដែលជាកីឡាករនាំមុខគេក្នុងបញ្ជីចំណាត់ថ្នាក់៕

July 25, 2023

រង្វង់មូលបៃតងកំពុងកែប្រែសមុទ្រខ្សាច់នៅប្រទេសចិនទៅជាដីមានជីជាតិ

បណ្ដារង្វង់មូលពណ៌បៃតងដែលត្រូវបានបង្កើតឡើងដោយការស្រោចស្រព អនុញ្ញាតឱ្យកសិករដាំរុក្ខជាតិដែលមានតម្លៃខ្ពស់នៅលើសមុទ្រខ្សាច់ទំហំមួយលានហិកតា។

សមុទ្រខ្សាច់ Ulan Buh ដែលមានផ្ទៃក្រឡាមួយលានហិកតា គឺជាសមុទ្រខ្សាច់ធំជាងគេលំដាប់ទី 8 នៅប្រទេសចិន។ Ulan Buh ធ្លាប់ល្បីឈ្មោះថាជាប្រភពនៃព្យុះខ្សាច់ប្រចាំឆ្នាំដែលតែងតែវាយលុកភាគខាងជើងប្រទេសចិន។

បច្ចុប្បន្ន វិធានការជាច្រើនត្រូវបានអនុញ្ញាតដើម្បីទប់ទល់នឹងបញ្ហាខាងលើ ក្នុងនោះមានដូចជា ការរារាំងខ្យល់ និងការកែលំអបរិស្ថានធម្មជាតិជាដើម ហើយបណ្ដារង្វង់មូលពណ៌បៃតងនេះគឺជាលទ្ធផលនៃកិច្ចខិតខំប្រឹងប្រែងខាងលើ ក៏ដូចជាសកម្មភាពស្រោចស្រពដំណាំរបស់ពលរដ្ឋក្នុងតំបន់។ ចំពោះការដាំដុះ ការស្រោចស្រពតាមបែបបាញ់ទឹកជារង្វង់មូលនេះគឺជាវិធីដែលមានប្រសិទ្ធភាពនៅក្នុងការរក្សាទឹក។

ដោយការប្រឹងប្រែងដើម្បីកែលំអលក្ខខណ្ឌធម្មជាតិ ដីជាង 30,000 ហិកតានៅតំបន់សមុទ្រខ្សាច់ Ulan Buh នេះ ត្រូវបានប្រើប្រាស់ដើម្បីដាំរុក្ខជាតិដែលមានគុណភាពខ្ពស់ ដែលភាគច្រើនគឺជាស្រូវសាលី, ស្មៅ leymus chineensis និងស្មៅ alfalfa ជាដើម។ បរិមាណនៃដំណាំខាងលើ រកប្រាក់ចំណូលប្រចាំឆ្នាំបានលើសពី 97.7 លានដុល្លារអាម៉េរិក។

បច្ចុប្បន្ន បណ្ដាញឧស្សាហកម្មមួយដែលរួមមានទាំងការដាំដុះ ការបណ្ដុះពូជ ការទិញ និងលក់ផលិតផលកសិកម្មនៅតំបន់ខាងលើត្រូវបានបង្កើតឡើងដើម្បីសម្រេចបានគោលដៅរួមចំណែកក្នុងការគ្រប់គ្រងសមុទ្រខ្សាច់ និងកសិកម្ម។

បណ្ដារង្វង់មូលពណ៌បៃតងខាងលើ មានទីតាំងស្ថិតនៅក្នុងស្រុក Dengkou របស់ទីក្រុង Bayannur ក្នុងតំបន់ស្វយ័តម៉ុងហ្គោលីខាងក្នុង នៅភាគខាងជើងប្រទេសចិន៕

July 25, 2023

ម៉ិកស៊ិកបង្កើតភ្លៀងសិប្បនិម្មិតដើម្បីទប់ទល់នឹងអាកាសធាតុក្ដៅខ្លាំង

រដ្ឋាភិបាលម៉ិកស៊ិកប្រកាសថា ការបង្កើតភ្លៀងសិប្បនិម្មិតទទួលបានជោគជ័យ 98% ស្របពេលដែលអាកាសធាតុក្ដៅខ្លាំង បង្កឱ្យមានគ្រោះរាំងស្ងួតទ្រង់ទ្រាយធំ។

រដ្ឋាភិបាលម៉ិកស៊ិក អនុវត្តដំណាក់កាលថ្មីបំផុតរបស់គម្រោងបង្កើតភ្លៀងសិប្បនិម្មិត ដោយសង្ឃឹមថា អាចកែលំអបរិមាណទឹកភ្លៀងនៅក្នុងរដូវក្ដៅដែលមានសីតុណ្ហភាពខ្ពស់បំផុតក្នុងប្រវត្តិសាស្ត្រ និងគ្រោះរាំងស្ងួតដែលបានអូសបន្លាយអស់ជាច្រើនខែ។ នេះបើតាម Guardian ចុះផ្សាយកាលពីថ្ងៃទី 23 កក្កដា 2023។

គម្រោងខាងលើដែលបានចាប់ផ្ដើមក្នុងខែកក្កដា រួមមាន ការពង្រាយយន្តហោះទៅកាន់បណ្ដាពពកដើម្បីបាចគ្រាប់អ៊ីយ៉ូដប្រាក់ (Silver Iodide) ជួយបន្ថែមទំហំតំណក់ទឹកក្នុងពពក និងបង្កើនបរិមាណទឹកភ្លៀង។

យោងតាមរដ្ឋមន្ត្រីក្រសួងកសិកម្មម៉ុកស៊ិក ការបង្កើតភ្លៀងសិប្បនិម្មិតនេះគឺដើម្បីទប់ទល់នឹងផលប៉ះពាល់ពីគ្រោះរាំងស្ងួតនៅតំបន់ជនបទ។ សកម្មភាពនេះត្រូវបានធ្វើឡើងយ៉ាងតិចមួយឆ្នាំម្ដង រាប់ចាប់ពីឆ្នាំ 2020។ រដ្ឋាភិបាលប្រទេសនេះក៏បានប្រកាសថា ទទួលបានជោគជ័យ 98% នៅក្នុងការបង្កើតភ្លៀងសិប្បនិម្មិត។

July 25, 2023

អ្នកអវកាសដែល «ឯកាបំផុត» ក្នុងប្រវត្តិសាស្ត្រ

ជាង 50 ឆ្នាំបន្ទាប់ពីបេសកកម្ម Apollo 11 អ្នកអវកាស Michael Collins នៅតែត្រូវបានគេរម្លឹកថាជាអ្នកក្លាហានស្ងាត់ស្ងៀម ដែលមានរហ័សនាមថា «មនុស្សឯកាបំផុត»។

កាលពីឆ្នាំ 1969 ក្នុងពេល Neil Armstrong និង Buzz Aldrin ចុះដើរលើឋានព្រះចន្ទជាលើកដំបូងរបស់មនុស្សជាតិ លោក Michael Collins អង្គុយម្នាក់ឯងនៅក្នុងបន្ទប់បញ្ចាការ Columbia របស់យានអវកាស Apollo 11 និងហោះពីក្រោយតំបន់ងងឹតរបស់ព្រះចន្ទ។

លោក Collins ទទួលខុសត្រូវក្នុងការបញ្ជាម៉ូឌុល Eagle នាំមិត្តរួមក្រុមពីរនាក់ចុះចតលើឋានព្រះចន្ទ។ នៅពេលនោះ រាល់ទំនាក់ទំនងជាមួយផែនដីត្រូវបានកាត់ផ្ដាច់ ដោយសារតែមានការរារាំងពីព្រះចន្ទ ធ្វើឱ្យ Collins ត្រូវដាច់ទំនាក់ទំនងទាំងស្រុងជាមួយនឹងមនុស្សនៅលើផែនដី ហើយក៏ឆ្ងាយពីផ្ទះរាប់សែនគីឡូម៉ែត្រ។

លោក Collins និយាយថា «នៅខាងក្រៅកញ្ចក់យាន ខ្ញុំអាចមើលឃើញតែដួងតារា គឺមានតែប៉ុណ្ណឹង»។ លោកបន្តថា អារម្មណ៍ពេលនោះ គឺដូចទៅនឹងលោកកំពុងអង្គុយលើកូនទូកតូចមួយដែលកំពុងអណ្ដែតលើផ្ទៃទឹកមហាសមុទ្រប៉ាស៊ីហ្វិក ក្នុងរាត្រីងងឹតសូន្យសុង។

អ្នកអវកាស Michael Collins ថតរូបម៉ូឌុល Eagle របស់យានអវកាស Apollo 11 រួមនឹងព្រះចន្ទ និងផែនដី

លោក Collins បានស្ថិតនៅលើយាន Columbia អស់រយៈពេល 21 ម៉ោង គ្រាដែល Buzz Aldrin និង Neil Armstrong ចុះចត និងដើរលើឋានព្រះចន្ទ។ ទោះជាយ៉ាងណាក៏ដោយ លោក Collins ធ្លាប់បាននិយាយថា លោកនៅតែពេញចិត្តនឹងអារម្មណ៍ឯកានោះ៕

July 21, 2023

ឃ្លាំងពេជ្រអាយុកាលជិត 13 ពាន់លានឆ្នាំ បង្ហើបពីភាវៈរស់ក្រៅផែនដី

តេឡេស្កុបអវកាសទំនើបបំផុតលើពិភពលោកបានរកឃើញឃ្លាំងពេជ្រមួយ នេះបើនិយាយទៅតាមទាំងន័យត្រង់ និងន័យធៀប។

យោងតាមទំព័រ Space តេឡេស្កុប James Webb របស់ណាសា បានរកឃើញធូលីកាបូនដូចពេជ្រនៅក្នុងបណ្ដាកាឡាក់ស៊ីដែលទំនងជាបានកកើតឡើងតែប៉ុន្មានរយឆ្នាំប៉ុណ្ណោះបន្ទាប់ពី Big Bang ដែលជាហេតុការណ៍ចាប់កំណើតរបស់ចក្រវាល។

ការរកឃើញនេះអាចជះឥទ្ធិពលដល់ទ្រឹស្ដីដែលទាក់ទងនឹងការវិវត្តរបស់គីមីនៅក្នុងចក្រវាល។ កន្លងមក អ្នកវិទ្យាសាស្ត្រជឿថា ដំណើរការនៃការកកើត និងបែងចែកធាតុរឹងដូចជាកាបូនជាដើម ស៊ីពេលវេលាច្រើន មិនអាចមាននៅក្នុងបណ្ដាកាឡាក់ស៊ីវ័យក្មេង។

ការរកឃើញថ្មីនេះបានចាប់ផ្ដើមពីការពិនិត្យមើលឆ្លងកាត់ពេលវេលា និងលំហអវកាសនៃកាឡាក់ស៊ីបុរាណចំនួន 10។ អំពីទ្រឹស្ដី រូបភាពដែលមនុស្សមើលឃើញវត្ថុអវកាសមួយ គឺមានអត្រាយឺតដូចទៅនឹងពេលវេលាដែលពន្លឺពីវត្ថុអវកាសនោះធ្វើដំណើរដល់ភ្នែករបស់មនុស្ស។

ដោយការមើលទៅទីតាំងដែលមានចម្ងាយរាប់ពាន់លានឆ្នាំពន្លឺ James Webb បាននាំមកនូវរូបភាពកាលពី 12.8 ពាន់លានឆ្នាំមុន ជាពេលដែលកាឡាក់ស៊ីទាំងនេះនៅក្មេង និងស្ថិតក្នុងចក្រវាលក្មេងខ្ចី។ ធូលីកាបូនដែលអ្នកវិទ្យាសាស្ត្របានមើលឃើញ បានរីកចម្រើនទៅជាម៉ូលេគុលអ៊ីដ្រូកាបូនក្រអូប (PAH) ដែលជាប្រការមិនអាចជឿបានថា មាននៅក្នុងអំឡុងពេលជិត 13 ពាន់លានឆ្នាំមុន។

ការសិក្សាស្រាវជ្រាវកន្លងមកបានបញ្ជាក់ថា ចក្រវាលក្រោយពី Big Bang ភ្លាមៗ នៅមានភាព «ឯកា» ខ្លាំងណាស់ ដោយវាភាគច្រើនមានតែអ៊ីដ្រូសែន និងអេល្យូម។

យោងតាមទ្រឹស្ដីនានាដែលត្រូវបានទទួលស្គាល់ទូលំទូលាយ បណ្ដាធាតុដែលរឹងជាងអ៊ីដ្រូសែន និងអេល្យូម សុទ្ធតែកកើតឡើងក្នុងដំណាក់កាលក្រោយៗមកទៀត បន្ទាប់ពីការកកើតផ្កាយរាប់លានជំនាន់។ ស្នូលរបស់ផ្កាយនានាគឺជា «ឡ» ប្រតិកម្ម បង្កើតធាតុធ្ងន់ៗជាងមុន នៅពេលពួកវាផ្ទុះស្លាប់។

កាបូនក៏ជា «ឆ្អឹងខ្នងរបស់ភាវៈរស់»។ វាអាចកកើតនៅក្នុងកាឡាក់ស៊ីចាស់ៗទាំង 10 ដែលអ្នកវិទ្យាសាស្ត្រទើបតែរកឃើញ។ នេះបើតាមការស្រាវជ្រាវរបស់ក្រុមអ្នកវិទ្យាសាស្ត្រមកពីសាកលវិទ្យាល័យ Cambridge (អង់គ្លេស) ដែលបាននិយាយខាងលើ។

ប្រការនេះអាចឱ្យយើងចាប់ផ្ដើមងាកទៅជឿថា ភាវៈរស់ក្នុងយុគសម័យដំបូងៗទំនងជាបានចាប់ផ្ដើមត្រូវបាន «ភ្ញាស់» ក្នុងចក្រវាលតាំងពីយូរឡុង ជាងអ្វីដែលមនុស្សបានគិត។ ចំណែកជីវិតនៅលើផែនដីក៏ប្រហែលជាស្ថិតក្នុងដំណាក់កាលវ័យក្មេងនៅឡើយ បើធៀបនឹងជីវិតនៅតាមបណ្ដាភពក្នុងប្រព័ន្ធផ្កាយនានារបស់កាឡាក់ស៊ីបុរាណៗ៕

July 21, 2023

ព្រោះតែរៀបការគគ្រឹកគគ្រេងឱ្យសុនក ស្ត្រីពីរនាក់ត្រូវគេជេរពេញបណ្ដាញសង្គម

(ឥណ្ឌូណេស៊ី) – ស្ត្រីពីរនាក់នៅរដ្ឋធានីហ្សាការតា ត្រូវសាធារណជនរិះគន់យ៉ាងចាស់ដៃ ហើយត្រូវធ្វើការសូមអភ័យទោស បន្ទាប់ពីបានធ្វើពិធីរៀបការយ៉ាងគគ្រឹកគគ្រេងឱ្យសុនកសំណព្វនៅក្នុងមជ្ឈមណ្ឌលពាណិជ្ជកម្ម។

សុនកពីរក្បាលដែលជាពូជ Alaska Malamute ត្រូវបានម្ចាស់ធ្វើពិធីរៀបការឱ្យនៅមជ្ឈមណ្ឌលពាណិជ្ជកម្មមួយក្នុងរដ្ឋធានីហ្សាការតា កាលពីថ្ងៃទី 17 កក្កដា 2023។ ពួកវាស្លៀកពាក់ឈុតប្រពៃណីរបស់ជនជាតិជ្វា ដែលភាគច្រើនរស់នៅលើកោះជ្វារបស់ឥណ្ឌូណេស៊ី។ ពិធីចម្លែកនេះបានចំណាយប្រាក់អស់ 200 លានរូពៀឥណ្ឌូណេស៊ី ដែលប្រហែលនឹង 13,300 ដុល្លារអាម៉េរិក។

រូបភាពស្ដីពីពិធីរៀបការសុនកនេះត្រូវបានចែករំលែកលើបណ្ដាញសង្គម ហើយក៏ក្លាយជាប្រធានបទជជែកគ្នា និងនាំឱ្យមានការរិះគន់ធ្ងន់ៗ។ ម្ចាស់របស់សុនកខាងលើ កាលពីថ្ងៃទី 19 កក្កដា បានធ្វើសន្និសីទសារព័ត៌មាន ដើម្បីសូមការអភ័យទោស។

Indira Ratnasari ដែលជាម្ចាស់របស់សុនកញី ឈ្មោះ Luna បកស្រាយថា «ពួកយើងមិនមានចេតនាប្រមាថមើលងាយវប្បធម៌ឥណ្ឌូណេស៊ី និងជ្វានោះទេ»។ យោងតាមសារព័ត៌មានក្នុងស្រុក Indira Ratnasari គឺជាបុគ្គលិកការិយាល័យប្រធានាធិបតីឥណ្ឌូណេស៊ី។

ចំណែក Valentine Cahandra ដែលជាម្ចាស់របស់សុនកឈ្មោល Jojo បានអះអាងថា ពិធីរៀបការនេះធ្វើឡើងដើម្បីផ្សព្វផ្សាយវប្បធម៌ជ្វា។ ក៏ប៉ុន្តែ ជនជាតិឥណ្ឌូណេស៊ីជាច្រើនមិនពេញចិត្ត ក្នុងនោះអ្នកខ្លះក៏សរសេរថា ការរៀបការឱ្យសុនកគឺជារឿងខ្ជះខ្ជាយ៕

July 21, 2023

Tag: មាន​

Tag: មាន