មាន - La Reine Media

ទីក្រុងចំនួនដប់ដែល «ថ្លៃ» ជាងគេលើពិភពលោក

ក្នុងបញ្ជីចំណាត់ថ្នាក់នៃបណ្ដាទីក្រុងដែលការចំណាយក្នុងការរស់នៅរបស់ប្រជាជន មានកម្រិតខ្ពស់ជាងគេលើពិភពលោក សម្រាប់ឆ្នាំ 2023 ទីក្រុងសិង្ហបុរី និងហ្សូរិចកំពុងនាំមុខគេ។

ទីក្រុងសិង្ហបុរី (Singapore) ធ្លាប់បាននាំមុខគេ 9 លើក ក្នុងរយៈពេល 11 ឆ្នាំ នៅក្នុងបញ្ជីចំណាត់ថ្នាក់ប្រចាំឆ្នាំ ស្ដីពីបណ្ដាទីក្រុងដែលការចំណាយក្នុងការរស់នៅរបស់ប្រជាជន មានកម្រិតខ្ពស់ជាងគេលើពិភពលោក ខណៈដែលទីក្រុងហ្សូរិច បានលោតពីចំណាត់ថ្នាក់ទី 6 ឡើងមកកាន់លេខ 1 ជាមួយនឹងសិង្ហបុរី។ ការចំណាយខ្ពស់នៅទីក្រុងសិង្ហបុរី កើតមានដោយសារថ្លៃដឹកជញ្ជូន ថ្លៃសម្លៀកបំពាក់ ស្បៀងអាហារ និងភេសជ្ជៈជាដើម។ ចំណែកទីក្រុងហ្សូរិចរបស់ប្រទេសស្វ៊ីស កើនចំណាត់ថ្នាក់ដោយសារតែឥទ្ធិពលរបស់រូបិយប័ណ្ណហ្វ្រង់ស្វ៊ីស និងការឡើងថ្លៃរបស់ទំនិញ និងសេវាកម្មកម្សាន្ត។

បណ្ដាទីក្រុងដូចជា ហ្សឺណែវ (Geneva) របស់ប្រទេសស្វ៊ីស, ញូវយ៉ក (New York) របស់សហរដ្ឋអាម៉េរិក, ហុងកុង (Hong Kong) របស់ប្រទេសចិន, ឡូសអាន់ជឺឡេស (Los Angeles) របស់សហរដ្ឋអាម៉េរិក, ប៉ារីស (Paris) របស់ប្រទេសបារាំង, កូប៉ិនហាក (Copenhagen) របស់ដាណឺម៉ាក, តេលអាវីវ (Tel Aviv) របស់អ៊ីស្រាអែល និងសាន់ហ្វ្រាន់ស៊ីស្កូ (San Francisco) របស់សហរដ្ឋអាម៉េរិក ក៏ស្ថិតក្នុងបញ្ជីចំណាត់ថ្នាក់នេះ។

ទ្វីបអាស៊ីមានកំណើនអតិផរណាទាបជាង បើធៀបនឹងតំបន់ដទៃ។ ការប្រៀបធៀបតម្លៃទំនិញ និងសេវាកម្ម 200 មុខ ត្រូវបានធ្វើឡើងលើទីក្រុងចំនួន 173 ក្នុងពិភពលោក។ ដាម៉ាស (Damascus) របស់ប្រទេសស៊ីរី និង តេហេរ៉ង់ របស់ប្រទេសអ៊ីរ៉ង់ គឺជាទីក្រុងដែលមានថ្លៃទំនិញ និងសេវាកម្មទាបជាងគេលើពិភពលោក។ នេះបើតាមបញ្ជីចំណាត់ថ្នាក់របស់ The Economist៕

December 1, 2023

រូបភាពដំបូងបង្ហាញពីរចនាសម្ព័ន្ធពេញលេញរបស់ស្ថានីយអវកាសចិន

អាជ្ញាធរចិន បានបង្ហាញរូបភាពដំបូងស្ដីពីរចនាសម្ព័ន្ធពេញលេញរបស់ស្ថានីយអវកាសចិន ធានកុង (Tiangong) ដែលមានម៉ូឌុលចំនួនបី ប្រព័ន្ធសូឡា ដៃយន្ត និងអ្វីៗជាច្រើនទៀត។

រូបភាពដំបូងស្ដីពីរចនាសម្ព័ន្ធរបស់ ធានកុង នេះ ត្រូវបានថតដោយអ្នកអវកាសនៅលើយាន Shenzhou 16 ដែលស្ថិតនៅពីខាងលើ មុនពេលត្រលប់មកកាន់ផែនដីកាលពីខែកន្លង។ ក្នុងរូបថតនេះគឺជាស្ថានីយអវកាសធានកុង មានរាងជាអក្សរ T ទម្ងន់ 90 តោន ដែលមានប្រព័ន្ធថ្មសូឡា ដៃយន្ត រួមនឹងអ្វីៗជាច្រើនទៀត និងមានផែនដីជាទិដ្ឋភាពខាងក្រោយ។ នេះបើតាមសារព័ត៌មាន Space។

រូបថតថ្មីបំផុតស្ដីពីស្ថានីយអវកាសធានកុង ដែលជាគម្រោងត្រូវបានចាប់ផ្ដើមអនុវត្តកាលពីឆ្នាំ 1992 និងសម្រេចជោគជ័យកាលពីឆ្នាំ 2022 ត្រូវបានប្រកាសកាលពីថ្ងៃទី 28 វិច្ឆិកា 2023 នៅទីក្រុងហុងកុង ដោយតំណាងម្នាក់មកពីទីភ្នាក់ងារអវកាសមានមនុស្សបើកបរចិន (CMSA)។

CMSA ឱ្យដឹងថា អ្នកអវកាសចិនកម្រនឹងមានឱកាសបានថតយករូបភាពពេញលេញរបស់ ធានកុង តាមបង្អួច រាប់ចាប់តាំងពីពេលដំឡើងស្ថានីយនេះកាលពីឆ្នាំ 2021។ ក៏ប៉ុន្តែ កាលពីថ្ងៃទី 30 តុលា 2023 ក្រោយពីបានផ្ដាច់ខ្លួនពីស្ថានីយធានកុង យានអវកាស Shenzhou 16 បានធ្វើការហោះហើរជាពិសេស អនុញ្ញាតឱ្យអ្នកអវកាសផ្ដិតយកទិដ្ឋភាពធានកុង ពីរយៈចម្ងាយត្រឹមតែប៉ុន្មានម៉ែត្រប៉ុណ្ណោះ។ រូបភាពនេះត្រូវបានបញ្ចេញដោយលោក Gui Haichao អ្នកស្រាវជ្រាវ និងជាអ្នកអវកាសស៊ីវិលចិនដំបូងដែលបានហោះទៅកាន់ទីអវកាស។

ស្ថានីយអវកាសចិនធានកុង មានទម្ងន់ស្មើនឹង 20% នៃទម្ងន់របស់ ISS ដែលជាស្ថានីយអវកាសអន្តរជាតិ ធ្វើសកម្មភាពនៅលើគន្លងតារាវិថីខ្ពស់ជាងបន្តិច បើធៀបនឹង ធានកុង។ អាជ្ញាធរចិនកំពុងរៀបចំផែនការពង្រីកស្ថានីយធានកុង ដែលបច្ចុប្បន្នមានបីម៉ូឌុល ឱ្យទៅជា 6 ម៉ូឌុលនៅពេលដ៏ខ្លីខាងមុខ៕

December 1, 2023

ភ្ញៀវទេសចរណ៍បរទេសមកទស្សនាកម្ពុជា កើនឡើងកាន់តែខ្ពស់

នៅក្នុងរយៈពេល 10 ខែដំបូងនៃឆ្នាំ 2023 នេះ កម្ពុជាបានទទួលភ្ញៀវបរទេសជាង 4 លាននាក់ កើនឡើងច្រើនបើធៀបនឹងដំណាក់កាលដូចគ្នាក្នុងឆ្នាំកន្លង។

យោងតាមទិន្នន័យពីក្រសួងទេសចរណ៍ ដែលបានចេញផ្សាយកាលពីចុងសប្ដាហ៍កន្លង ក្នុង 10 ខែដំបូងនៃឆ្នាំ 2023 មានទេសចរបរទេសជាង 4.4 លាននាក់មកទស្សនាកម្ពុជា ដែលតួលេខនេះកើន 179.7% បើធៀបនឹង 10 ខែដំបូងនៃឆ្នាំ 2022។ ក្រសួងឱ្យដឹងថា ទេសចរថៃរួមចំណែករហូតដល់ 1 លាននាក់ ស្មើនឹង 34.1% នៃចំនួនភ្ញៀវបរទេសសរុប ខណៈដែលវៀតណាមរួមចំណែកជាង 8 សែននាក់ ស្មើនឹង 18.7% ស្របពេលដែលចិនរួមចំណែកជាង 4 សែននាក់ ស្មើនឹង 10.3%។

ដោយឡែក ក្នុងខែតុលា កម្ពុជាបានទទួលភ្ញៀវទេសចរណ៍បរទេសចំនួនជាង 480,000 នាក់ កើន 54.9% បើធៀបនឹងខែតុលាឆ្នាំកន្លង។

ក្រៅពីភ្ញៀវមកពីប្រទេសថៃ វៀតណាម និងចិន ពលរដ្ឋនៃប្រទេសមួយចំនួនផ្សេងទៀតក៏រួមចំណែកច្រើននៅក្នុងកំណើនទេសចរបរទេសរបស់កម្ពុជា មានជាអាទិ៍ ឡាវ អាម៉េរិក កូរ៉េខាងត្បូង ឥណ្ឌូណេស៊ី បារាំង អង់គ្លេស និងអូស្ត្រាលី ជាដើម។

លោក ខៀវ ធី ប្រធានសមាគមមគ្គុទ្ទេសក៍ទេសចរខ្មែរអង្គរ (KATGA) យល់ថា យុទ្ធសាស្ត្រឃោសនា និងទាក់ទាញ់វិនិយោគពីបរទេសមកកាន់កម្ពុជា របស់រាជរដ្ឋាភិបាល បាន និងកំពុងដើរតួនាទីសំខាន់នៅក្នុងការជំរុញកំណើនវិស័យទេសចរណ៍។

«ការបើកដំណើរការព្រលានយន្តហោះអន្តរជាតិសៀមរាបអង្គរ និងការដាក់ចេញគោលនយោបាយជំរុញកំណើនវិស័យទេសចរណ៍ នឹងបន្តជួយអូសទាញភ្ញៀវបរទេសបន្ថែមទៀត» លោក ខៀវ ធី ថ្លែងដូច្នេះ។

យោងតាមក្រសួងទេសចរណ៍ កាលពីឆ្នាំ 2022 កម្ពុជាបានទទួលភ្ញៀវទេសចរណ៍បរទេសជិត 2.28 លាននាក់ កើន 1,059% បើធៀបនឹងឆ្នាំ 2021។ ក្នុងនោះ ទេសចរពីប្រទេសថៃ វៀតណាម ឡាវ និងចិន រួមចំណែក 1,516,855 នាក់ ស្មើនឹង 66.62% ធៀបនឹងភ្ញៀវបរទេសសរុប៕

November 30, 2023

តម្លៃមធ្យមភាគនៃស្រូវសើម នៅតាមបណ្ដាស្រុកនៃខេត្តមួយចំនួន

តម្លៃមធ្យមភាគស្រូវសើម នៅតាមបណ្ដាស្រុកនៃខេត្តមួយចំនួន ចាប់ពីថ្ងៃទី 29 ខែវិច្ឆិកា 2023 នឹងត្រូវបានទិញក្នុងតម្លៃចាប់ពី 1,250 រៀល/គីឡូក្រាម។

យោងតាម សហព័ន្ធស្រូវអង្ករកម្ពុជា ចាប់ពីថ្ងៃទី 29 ខែវិច្ឆិកា ឆ្នាំ 2023 ស្រូវសើមនឹងត្រូវបានទិញក្នុងតម្លៃមធ្យម ចាប់ពី 1,250 ដល់ 1,375 រៀល/គីឡូក្រាម អាស្រ័យទៅលើប្រភេទស្រូវ។

ស្រូវរំដួល/សុម៉ាលីសើមនៅក្នុងស្រុកបរសេដ្ឋ និងស្រុកភ្នំស្រួច ខេត្តកំពង់ស្ពឺ មានតម្លៃខ្ពស់ជាងគេ ពោលគឺ 1,375 រៀល/គីឡូក្រាម។ ចំណែកស្រូវរំដួល/សុម៉ាលីសើមដែលមានតម្លៃទាបជាងគេ (1,250 រៀល/គីឡូក្រាម) គឺនៅក្នុងស្រុកសំរោង និងស្រុកចុងកាល ខេត្តឧត្ដរមានជ័យ។

ដោយឡែក ស្រូវអូអឹមសើមវិញ មានតម្លៃខ្ពស់បំផុតត្រឹម 1,260 រៀលក្នុងមួយគីឡូក្រាម ខណៈស្រូវស្រងែមានតម្លៃ 1,250 រៀល/គីឡូក្រាម៕

November 30, 2023

Ford Territory ទទួលបានពានរង្វាន់ជារថយន្ត Compact SUV ដែលល្អបំផុតប្រចាំឆ្នាំ ២០២៣

[ភ្នំពេញ – ថ្ងៃទី ២៩ ខែវិច្ឆិកា ឆ្នាំ២០២៣] ថ្មីៗនេះរថយន្ត Next-Generation Ford Territory បានទទួលពានរង្វាន់ជារថយន្ត Compact SUV ដែលល្អបំផុតប្រចាំឆ្នាំ ២០២៣ បន្ទាប់ពីត្រូវបានឆ្លងកាត់ការវាយតម្លៃយ៉ាងម៉ត់ច៉ត់លើគ្រប់ផ្នែកនៃរថយន្តទាំងអស់ក្នុងទីផ្សារប្រទេសភីលីពីនដែលរួមមាន៖ ការវាយតម្លៃលើកម្លាំងនិងសមត្ថភាពរបស់រថយន្តជារួម ការរចនា/រូបរាង មុខងារ/ស្តង់ដាររបស់រថយន្ត ផាសុកភាព សុវត្ថិភាព ប្រសិទ្ធភាព គុណភាព កញ្ចប់សេវាធានា សេវាថែទាំយានយន្ត និងការគាំទ្រពីសំណាក់អតិថិជនជាដើម។

គួរបញ្ជាក់ផងដែរថា រថយន្ត Next-Generation Ford Territory បានត្រឡប់មកជាថ្មីម្តងទៀតក្នុងតំណែងជារថយន្ត Compact SUV ដែលលក់ដាច់បំផុត ជាពិសេសក្នុងទីផ្សារប្រទេស ភីលីពីន។ អ្វីដែលគួរអោយភ្ញាក់ផ្អើលបំផុតនោះគឺ ត្រឹមតែរយៈពេល ៥ ខែប៉ុណ្ណោះ បន្ទាប់ពីពិធីសម្ពោធជាផ្លូវការនៅឯពិព័រណ៍រថយន្តអន្តរជាតិ Manila International Auto Show (MIAS) ក្នុងខែមេសា រថយន្ត Ford Territory ត្រូវបានលក់ដាច់អស់ដល់ទៅ ៥០០០ គ្រឿងឯណោះ! ដែលនាំឱ្យចំនួនលក់សរុបកើនឡើងដល់ជាង 25,000 គ្រឿងគិតចាប់តាំងពីការចេញលក់ក្នុងខែសីហា ឆ្នាំ 2020 កន្លងមក។ ព្រឹត្តិការណ៍ដ៏សំខាន់នេះ គឺជាសក្ខីភាពមួយដែលសបង្ហាញពីប្រជាប្រិយភាពនៃរថយន្ត Next-Generation Ford Territory ក្នុងចំណោមអតិថិជនថ្មីៗ អ្នកជំនួញវ័យក្មេង និងគ្រួសារខ្នាតតូចដែលស្វែងរករថយន្ត SUV ដែលឆ្លាតវៃ សុវត្ថិភាព ទំនើប និងទាន់សម័យ។

រថយន្ត Next-Generation Ford Territory ជារថយន្ត SUV ស៊េរីថ្មីឆ្នាំ ២០២៣ ឆ្លងកាត់នូវកំណែទម្រង់ថ្មីទាំងស្រុងទាំងផ្នែកខាងក្នុង និងផ្នែកខាងក្រៅ ផ្តល់នូវផាសុកភាព និងសុវត្ថិភាពក្នុងការធ្វើដំណើរគ្រប់ស្ថានភាពផ្លូវ។

ផ្នែកខាងក្នុងនៃរថយន្តនេះត្រូវបានបំពាក់មកជាមួយនូវ៖

កៅអីស្បែកប្រណិតផ្តល់ផាសុកភាពក្នុងពេលធ្វើដំណើរ និងមានមុខងារកៅអីត្រជាក់មិនធ្វើអោយអ្នកបើកបរមានអារម្មណ៍ថាហត់នឿយជាពិសេសពេលធ្វើដំណើរផ្លូវឆ្ងាយ
កុងទ័រឌីជីថលទំនើបទាន់សម័យទំហំ 3 អ៊ីញផ្តល់រូបភាពភ្លឺច្បាស់ត្រជាក់ភ្នែក
អេក្រង់កម្សាន្ត Touch Screen កណ្តាលទំហំ 12 អ៊ីញ អាចភ្ជាប់មុខងារ Apple CarPlay, Android Auto & Google Maps ដោយមិនចាំបាច់ប្រើខ្សែ
ប្រព័ន្ធសាកថ្មទូរស័ព្ទឥតខ្សែ Wireless Charge

មិនតែប៉ុណ្ណោះ រថយន្តនេះក៏បានបំពាក់ជាមួយនឹងប្រព័ន្ធសុវត្ថិភាព ក៏ដូចជាបច្ចេកវិទ្យាទំនើបជំនាន់ចុងក្រោយដូចជា៖

កាមេរ៉ាសុវត្ថិភាព ៣៦០ ដឺក្រេ កម្រិតខ្ពស់ជុំវិញរថយន្តផ្តល់រូបភាពច្បាស់ល្អ
ប្រព័ន្ធផ្តល់សញ្ញាគ្រោះថ្នាក់ពេលមានឧបសគ្គ ឬអ្នកថ្មើរជើងឆ្លងកាត់ និងប្រព័ន្ធចាប់ហ្វ្រាំងបន្ទាន់ដោយស្វ័យប្រវត្ត
ប្រព័ន្ធបន្ថយល្បឿន រក្សាគម្លាតសុវត្ថិភាព ឈប់ និងទៅមុខដោយស្វ័យប្រវត្តតាមរថយន្តខាងមុខ និងតម្រង់គន្លងផ្លូវ
ប្រព័ន្ធជំនួយចូលចតដោយស្វ័យប្រវត្តបែបអក្សរ (P) បែបអក្សរ (T) និងប្រព័ន្ធជំនួយចាកចេញពីចំណត
ប្រព័ន្ធបើក/បិទឃ្លុបក្រោយដោយស្វ័យប្រវត្តគ្រាន់តែគ្រវាសជើង។

November 30, 2023

ទុនវិនិយោគផ្ទាល់ពីបរទេសក្នុង 11 ខែដំបូងនៃឆ្នាំនេះ នៅវៀតណាម កើន 15 ភាគរយ

ក្នុងរយៈពេល 11 ខែដំបូងនៃឆ្នាំ 2023 វៀតណាមទាក់ទាញទុនវិនិយោគផ្ទាល់ពីបរទេស (FDI) បានជិត 28.85 ពាន់លានដុល្លារអាម៉េរិក កើនជិត 15% បើធៀបនឹងដំណាក់កាលដូចគ្នាក្នុងឆ្នាំ 2022។ នេះបើតាមក្រសួងសេដ្ឋកិច្ចនិងវិនិយោគវៀតណាម។

សារព័ត៌មានវៀតណាមបានចេញផ្សាយថា គោលនយោបាយគាំពារ កិច្ចសហប្រតិបត្តិការយ៉ាងជិតស្និទ្ធរវាងរដ្ឋាភិបាល ក្រសួង និងមូលដ្ឋាន ត្រូវបានគេជឿថា បានជួយឱ្យសហគ្រាសនានាទទួលបានស្ថិរភាពក្នុងការផលិត និងការធ្វើអាជីវកម្ម នាំឱ្យទុន FDI មានការកើនឡើង។

ដៃគូសហការលំដាប់កំពូលៗរបស់វៀតណាម នៅតែជា សិង្ហបុរី ហុងកុង និងកូរ៉េខាងត្បូង។ បើទោះជាការនាំចេញ នាំចូលដែលបានពីគម្រោង FDI មានការថយចុះ ប៉ុន្តែទុនវិនិយោគផ្ទាល់ពីបរទេសនៅតែរួមចំណែកធំធេងនៅក្នុងចំណូលសរុបទូទាំងប្រទេស។

គិតចាប់ពីដើមឆ្នាំមកដល់ថ្ងៃទី 20 វិច្ឆិកា 2023 វៀតណាមទាក់ទាញទុនវិនិយោគផ្ទាល់ពីបរទេស (FDI) ថ្មីបានជិត 28.85 ពាន់លានដុល្លារអាម៉េរិក កើន 14.8% បើធៀបនឹងដំណាក់កាលដូចគ្នាក្នុងឆ្នាំ 2022 និងកើន 0.1% បើធៀបនឹងខែតុលា 2023។

បច្ចុប្បន្ន FDI នៅវៀតណាម នៅមានគម្រោងចំនួន 38,844 ទៀតដែលនៅមានសុពលភាព និងមានតម្លៃសរុបជិត 462.4 ពាន់លានដុល្លារអាម៉េរិក។ ឧស្សាហកម្មកែច្នៃ និងផលិតកម្ម នៅតែជាវិស័យដែលទទួលបានទុនវិនិយោគច្រើនជាងគេ។ ទីក្រុងហូជីមិញ ខេត្តប៊ិញយឿង និងរដ្ឋធានីហាណូយ នៅតែជាតំបន់ដែលទាក់ទាញបានទុន FDI ច្រើនជាងគេ ខណៈខេត្តក្វាងនិញ និងបាក់និញ ក៏ជាតំបន់ដែលកំពុងលេខធ្លោផងដែរ៕

November 29, 2023

អាជ្ញាធរថៃអនុញ្ញាតឱ្យក្លឹបរាត្រី និងបារ បើកទ្វារដល់ម៉ោងបួនទៀបភ្លឺដើម្បីទាក់ទាញទេសចរ

គណៈរដ្ឋមន្ត្រីថៃ អនុម័តសេចក្ដីសម្រេចថ្មីដែលអនុញ្ញាតឱ្យទីតាំងកម្សាន្ត រួមមាន ក្លឹបរាត្រី និងបារជាដើម បើកទ្វារដល់ម៉ោង 4 ទៀបភ្លឺ ដើម្បីទាក់ទាញភ្ញៀវ និងជំរុញវិស័យទេសចរណ៍។

យោងតាមសារព័ត៌មាន Reuters សេចក្ដីសម្រេចថ្នាក់ក្រសួងនេះត្រូវបានអនុម័តកាលពីថ្ងៃទី 28 វិច្ឆិកា 2023 ។

អ្នកនាំពាក្យរបស់រាជរដ្ឋាភិបាលថៃ លោកស្រី Traisulee Traisaranakul ឱ្យដឹងថា ទីតាំងកម្សាន្តដូចជា ក្លឹបរាត្រី បារ ហាងការ៉ាអូខេជាដើម នៅរាជធានីបាងកក និងបណ្ដាទីក្រុង Phuket, Pattaya, Chiang Mai និង Samui ត្រូវបានអនុញ្ញាតឱ្យបើកទ្វារ 2 ម៉ោងទៀតបន្ថែមទៀត ពោលគឺរហូតដល់ម៉ោង 4 ទៀបភ្លឺ។ សេចក្ដីសម្រេចនេះគឺជាយុទ្ធសាស្ត្រមួយរបស់រាជរដ្ឋាភិបាលថៃ ដើម្បីទាក់ទាញភ្ញៀវបរទេសបន្ថែមទៀត។

មុននោះ កាលពីខែកញ្ញា 2023 អាជ្ញាធរថៃបានលើកលែងទិដ្ឋាការចំពោះភ្ញៀវទេសចរណ៍ចិន ដែលជាប្រភពទេសចរសំខាន់របស់ប្រទេសនេះ។

នៅមុនវិបត្តិកូវីដ-19 ប្រទេសថៃធ្លាប់ទទួលភ្ញៀវបរទេសបាន 39.9 លាននាក់/ឆ្នាំ ក្នុងនោះមាន 11 លាននាក់មកពីប្រទេសចិន។

ទេសចរណ៍គឺជាកត្តាជំរុញសំខាន់បំផុតរបស់សេដ្ឋកិច្ចថៃ។ ប៉ុន្តែ បច្ចុប្បន្ន ល្បឿននៃកំណើនរបស់វិស័យនេះ មានភាពយឺតយ៉ាវជាងវិស័យដទៃ។ ដូច្នេះ រដ្ឋាភិបាលរបស់លោកនាយករដ្ឋមន្ត្រី Srettha Thavisin កំពុងប្រឹងប្រែងចាត់វិធានការដើម្បីជំរុញកំណើនវិស័យទេសចរណ៍បន្ថែមទៀត។

រាប់ចាប់ពីដើមឆ្នាំ 2023 រហូតដល់បច្ចុប្បន្ន ប្រទេសថៃទទួលបានភ្ញៀវបរទេសប្រមាណ 24.5 លាននាក់ ហើយត្រូវបានព្យាករថា នឹងកើនដល់ 28 លាននាក់នៅដំណាច់ឆ្នាំនេះ៕

November 29, 2023

ចិនកំពុងដំណើរការសាកល្បងស្ថានីយអគ្គិសនីព្រះអាទិត្យអវកាស

(ប្រទេសចិន) – គំរូដំបូងរបស់ SSPS ដែលជាប្រព័ន្ធទាញយក និងប្រើប្រាស់អគ្គិសនីពីព្រះអាទិត្យនៅទីអវកាស ដើម្បីបាញ់បញ្ជូនមកកាន់ផែនដី និងបញ្ចូលថាមពលឱ្យផ្កាយរណប ត្រូវបានស្ថាបនារួចរាល់ និងកំពុងដាក់ឱ្យដំណើរការសាកល្បង។

ប្រទេសចិនកំពុងតែអភិវឌ្ឍស្ថានីយអគ្គិសនីព្រះអាទិត្យអវកាស (SSPS – Space Solar Power System) ដែលមានសមត្ថភាពបាញ់បញ្ជូនអគ្គិសនីចុះមកកាន់ផែនដី និងបញ្ចូលអគ្គិសនីឱ្យផ្កាយរណបនៅលើគន្លងតារាវិថីផែនដី។ ស្ថានីយគំរូរបស់ SSPS ត្រូវបានស្ថាបនារួចរាល់ និងកំពុងត្រូវបានដាក់ឱ្យដំណើរការសាកល្បងនៅទីក្រុងស៊ីអាន (Xi An) នៃខេត្តសានស៊ី (Shaanxi)។

គម្រោងអភិវឌ្ឍ SSPS ត្រូវបានដាក់ឈ្មោះឱ្យថា Zhu Ri ដែលមានន័យថា «ដេញតាមព្រះអាទិត្យ» ចាប់ផ្ដើមដំណើរការតាំងពី 6 ឆ្នាំមុន។ ស្ថានីយគំរូដំបូងនេះរួមមាន គ្រោងដែកកម្ពស់ 75 ម៉ែត្រ និងមានចានដែកបំពាក់ផ្ទាំសូឡាដ៏ធំមួយនៅខាងលើ ដែលត្រូវបានរចនាឡើងដើម្បីធ្វើតេស្តប្រព័ន្ធផលិតអគ្គិសនីពេញលេញមួយនៅទីអវកាស និងបាញ់បញ្ជូនមកកាន់ផែនដី ដើម្បីបំប្លែង និងផ្គត់ផ្គង់តាមតម្រូវការ។

SSPS នឹងបញ្ជាក់អំពីលទ្ធភាព និងសក្ដានុពលនៃដំណើរការទាំងស្រុង តាំងពីការបំប្លែងពន្លឺឱ្យទៅជាអគ្គិសនី ការបំប្លែងអគ្គិសនីឱ្យទៅជារលកកម្ដៅមីក្រូវ៉េវ ការបាញ់បញ្ជូនរលកមីក្រូវ៉េវ និងការបំប្លែងរលកកម្ដៅមីក្រូវ៉េវឱ្យទៅជាអគ្គិសនីចរន្តជាប់។ នេះគឺជាប្រព័ន្ធដំបូងដែលស្ថិតក្នុងប្រភេទនេះនៅលើពិភពលោក ដែលបានឆ្លងកាត់ការសាកល្បងបែបនេះ។

«យើងសម្រេចបានការសាកល្បងគំរូដំបូងនៅលើផែនដី» លោក Duan Baoyan ប្រធានគម្រោង Zhu Ri មកពីបណ្ឌិត្យសភាបច្ចេកទេសចិន ឱ្យដឹងដូច្នេះ។ លោក Baoyan បន្តថា កាលពីថ្ងៃទី 05 មិថុនា 2022 ប្រព័ន្ធនេះបានឆ្លងផុតការត្រួតពិនិត្យរបស់ក្រុមប្រឹក្សាជំនាញមួយរួចទៅហើយ៕

November 29, 2023

ជប៉ុនជិតបាញ់បង្ហោះផ្កាយរណបធ្វើពីឈើ ឡើងទៅកាន់ទីអវកាស

ទីភ្នាក់ងារអវកាសអាម៉េរិក (ណាសា) និងទីភ្នាក់ងារអវកាសជប៉ុន (ចាសា) កំពុងរៀបផែនការបាញ់បង្ហោះផ្កាយរណបធ្វើពីឈើដំបូងគេលើពិភពលោក ឡើងទៅកាន់ទីអវកាស។

យោងតាមព័ត៌មានពីណាសា (NASA) របស់អាម៉េរិក និងចាសា (JAXA) របស់ជប៉ុន ផ្កាយរណបប៉ុនពែងកាហ្វេដែលធ្វើពីឈើ Magnolia គ្រោងនឹងត្រូវបានបាញ់បង្ហោះឡើងទៅកាន់គន្លងតារាវិថីផែនដីនៅក្នុងរដូវក្ដៅឆ្នាំ 2024។

ឈើគឺជាវត្ថុធាតុដែលនឹងមិនឆេះ ឬរលួយនៅក្នុងបរិស្ថានសុញ្ញកាសរបស់អវកាស ប៉ុន្តែនឹងត្រូវបានដុតឆេះម៉ត់ជាធូលី នៅពេលវិលត្រលប់ចូលក្នុងបរិយាកាសផែនដី។ ចំណុចពិសេសនេះធ្វើឱ្យឈើក្លាយជាវត្ថុធាតុមានប្រយោជន៍សម្រាប់ផ្កាយរណបនាពេលអនាគត។

ក្រោយពីបានធ្វើការពិសោធដោយជោគជ័យនៅលើស្ថានីយអវកាសអន្តរជាតិ (ISS) កាលពីដើមឆ្នាំ ក្រុមអ្នកវិទ្យាសាស្ត្រជឿថា ផ្កាយរណបធ្វើពីឈើ ពិតជាសមស្របសម្រាប់ការបាញ់បង្ហោះសាកល្បង។ ប្រភេទឈើដែលត្រូវបានអ្នកវិទ្យាសាស្ត្រជ្រើសរើសយកមកផលិតផ្កាយរណប គឺឈើ Magnolia។

បច្ចុប្បន្ន នៅជុំវិញគន្លងតារាវិថីផែនដី មានវត្ថុអវកាសជាង 8,440 តោន រួមទាំងសំរាមអវកាស ដែលមានដូចជា ផ្កាយរណបដែលខូច និងបំណែករ៉ុក្កែតដែលលែងប្រើប្រាស់ជាដើម។ ទាំងនេះបានធ្វើឱ្យពន្លឺពេលរាត្រីកើនខ្ពស់ជាងមុន 10% បង្កការរំខានដល់ការសង្កេតមើលទៅកាន់ទីអវកាស។

ក្រុមអ្នកជំនាញនិយាយថា ផ្កាយរណបដែលធ្វើពីឈើ មានដូចជា LignoSat ជាដើម នឹងបង្កផលប៉ះពាល់តិចជាង បើធៀបនឹងសំរាមអវកាសនាបច្ចុប្បន្ន ព្រមទាំងកាត់បន្ថយការចំណាយបានច្រើនផងដែរ៕

November 25, 2023

ទីផ្សាររថយន្តអគ្គិសនីនៅអាស៊ាន នឹងសម្រេចបាន 2.7 ពាន់លានដុល្លារ នៅបួនឆ្នាំទៀត

យោងតាមរដ្ឋមន្ត្រីក្រសួងវិនិយោគ ពាណិជ្ជកម្ម និងឧស្សាហកម្មម៉ាឡេស៊ី Tengku Zafrul Abdul Aziz ទីផ្សាររថយន្តអគ្គិសនីរបស់អាស៊ាន គ្រោងនឹងសម្រេចបាន 2.7 ពាន់លានដុល្លារអាម៉េរិក នៅឆ្នាំ 2027 កើនជាង 5 ដង បើធៀបនឹង 500 លានដុល្លាររបស់ឆ្នាំ 2021។

ថ្លែងក្នុងពិធីបើកសន្និបាត និងពិព័រណ៍រថយន្តអគ្គិសនីអាស៊ី 2023 នៅរដ្ឋធានីកូឡាឡាំពួ រដ្ឋមន្ត្រី Tengku Zafrul Abdul Aziz យល់ថា ម៉ាឡេស៊ី មានប្រៀបជាងគេក្នុងការប្រកួតប្រជែងដើម្បីទាក់ទាញការវិនិយោគដែលមានតម្លៃខ្ពស់ជាង ដោយសារបានអភិវឌ្ឍបណ្ដាញពេញលេញសម្រាប់វិស័យឧស្សាហកម្ម EV និងរថយន្តជំនាន់ថ្មី។

គោលដៅរបស់ម៉ាឡេស៊ី គឺថា ដល់ឆ្នាំ 2030 ប្រទេសនេះនឹងធ្វើឱ្យរថយន្តអគ្គិសនី និងរថយន្តកូនកាត់សាំង – អគ្គិសនី រួមចំណែក 20% ក្នុងចំណោមរថយន្តថ្មី និង 50% នៅឆ្នាំ 2040 ខណៈឆ្នាំ 2050 នឹងមាន 80%។

លោករដ្ឋមន្ត្រីក៏ឱ្យដឹងថា លោកសង្ឃឹមថា រថយន្តអគ្គិសនីផលិតក្នុងស្រុកនឹងបង្ហាញខ្លួនជាលើកដំបូងនៅក្នុងឆ្នាំ 2025 ហើយក៏ជឿជាក់ថា ម៉ាឡេស៊ី នឹងអាចផ្គត់ផ្គង់ស្ថានីយបញ្ចូលថាមពលសម្រាប់រថយន្តអគ្គិសនីចំនួន 10,000 កន្លែង នៅទូទាំងប្រទេសក្នុងដំណាក់កាលនេះ។

បច្ចុប្បន្ន បណ្ដាក្រុមហ៊ុនធំៗក្នុងវិស័យ EV ដូចជា Tesla (អាម៉េរិក), Geely, Chery, BYD (ចិន), Hyundai (កូរ៉េខាងត្បូង), Mercedes Benz, BMW (អឺរ៉ុប) សុទ្ធតែមានវត្តមាននៅម៉ាឡេស៊ីរួចហើយ។

សន្និសីទ និងពិព័រណ៍ EV អាស៊ី 2023 ត្រូវបានធ្វើឡើងពីថ្ងៃទី 22 ដល់ 24 វិច្ឆិកា 2023 ដោយមានបញ្ជរប្រហែលមួយរយដែលដាក់បង្ហាញរថយន្តអគ្គិសនី រួមនឹងសន្និសីទជាច្រើនដែលទាក់ទងនឹងបណ្ដាញ EV មានដូចជា គោលនយោបាយ ទំនោរ និងឱកាសក្នុងវិស័យឧស្សាហកម្ម EV, ទីផ្សារ EV ទោចក្រយាននៅអាស៊ាន។ល។

November 24, 2023

កំណើនសេដ្ឋកិច្ចអាស៊ីអាគ្នេយ៍នៅឆ្នាំ 2024 ត្រូវបានព្យាករថា នឹងប្រសើរឡើង

វាយតម្លៃអំពីសក្ដានុពលនៃកំណើនសេដ្ឋកិច្ចរបស់តំបន់អាស៊ីអាគ្នេយ៍ ក្រុមអ្នកវិភាគអន្តរជាតិព្យាករថា កំណើនសេដ្ឋកិច្ចរបស់តំបន់នេះ នឹងប្រសើរឡើងវិញនៅឆ្នាំក្រោយ ប៉ុន្តែម៉ាក្រូសេដ្ឋកិច្ចមិនល្អនឹងបង្កផលប៉ះពាល់ផ្សេងទៀតដល់បណ្ដាប្រទេស។

ឆ្នាំ 2024 សេដ្ឋកិច្ចអាម៉េរិក និងអឺរ៉ុប ត្រូវបានព្យាករថា អាចនឹងនៅទ្រឹង ស្របពេលដែលកំណើនសេដ្ឋកិច្ចចិនអាចនឹងបន្ថយល្បឿន ដោយសារតែឱនភាពនៃវិស័យអចលនទ្រព្យ និងតម្រូវការប្រើប្រាស់លក្ខណៈបុគ្គល។

អង្គការស្រាវជ្រាវ AMRO បានព្យាករថា អតិផរណាក្នុងតំបន់អាស៊ីអាគ្នេយ៍ អាចនឹងថយចុះក្នុងឆ្នាំ 2024 ប៉ុន្តែបានព្រមានថា តម្លៃស្បៀងអាហារ និងថាមពលកើនឡើង អាចបង្កហានិភ័យអតិផរណាដែលឃើញច្បាស់ជាងមុន។ ការថយចុះនៃសេដ្ឋកិច្ចចិន កំពុងបង្កផលប៉ះពាល់ដល់វិស័យផលិតសកល ពិសេសគឺបណ្ដាប្រទេសដែលពឹងផ្អែកលើទីផ្សារចិន។

ប្រទេសមួយចំនួនក្នុងតំបន់អាស៊ីអាគ្នេយ៍ មានជាអាទិ៍ សិង្ហបុរី ថៃ និងឥណ្ឌូណេស៊ី បាន និងកំពុងទទួលបទពិសោធន៍ពីកំណើនសេដ្ឋកិច្ចយឺត ដោយសារតែតម្រូវការពីខាងក្រៅធ្លាក់ចុះ។ ក៏ប៉ុន្តែ ម៉ាឡេស៊ី ហ្វ៊ីលីពីន និងវៀតណាម មានកំណើនសេដ្ឋកិច្ចល្អជាងការរំពឹងទុក ព្រោះតែការនាំចេញទំនិញមានការកើនឡើង ខណៈវដ្ដនៃពាណិជ្ជកម្មសកលក៏កំពុងងើបឡើងបណ្ដើរៗ។

November 24, 2023

អាជ្ញាធរថៃ ចាប់ខ្លួនអ្នកសុំទានច្រើននាក់នៅសណ្ឋាគារ ដែលរកចំណូលបានរាប់លានរៀល/ថ្ងៃ

ប៉ូលិសថៃ បានប្រកាសឱ្យត្រួតពិនិត្យម៉ត់ចត់ចំពោះទេសចរចិនទាំងឡាយណាដែលមានមុខមាត់ខុសប្រក្រតី និងរាងកាយមានសភាពប្រែប្រួល ដោយសង្ស័យថា ពួកគេមកដើម្បីប្រកបរបរសុំទាន។

យោងតាមទំព័រ Bangkok Post កាលពីថ្ងៃទី 22 វិច្ឆិកា 2023 អាជ្ញាធរថៃ បានឱ្យដឹងថា ចាប់ពីថ្ងៃទី 10 ដល់ 20 វិច្ឆិកា សមត្ថកិច្ចបានចាប់ខ្លួនអ្នកសុំទានចំនួន 6 នាក់ ដែលជាពលរដ្ឋចិន។ អ្នកសុំទានទាំងនេះសុទ្ធតែមានមុខមាត់ខុសធម្មតា។

ក្រោយពីត្រូវបានចាប់ខ្លួន បីនាក់ក្នុងចំណោមនេះត្រូវបានពិន័យពី 100 ដល់ 500 បាត។ ក្រៅពីនេះ អាជ្ញាធរថៃ ក៏បានដាក់ពលរដ្ឋចិន 6 នាក់នេះចូលក្នុងបញ្ជីខ្មៅ ដោយហាមមិនឱ្យចូលទឹកដីថៃក្នុងរយៈពេល 10 ឆ្នាំ។

ប៉ូលិសនិយាយថា អ្នកសុំទានខ្លះជួលអ្នកបកប្រែថៃរួមគ្នា។ ពីរនាក់ក្នុងចំណោមអ្នកសុំទានចិន 6 នាក់ ស្នាក់នៅជាមួយគ្នាក្នុងបន្ទប់សណ្ឋាគារមួយក្នុងខណ្ឌ Wang Thonglang នៅទីក្រុងបាងកក ខណៈ 4 នាក់ផ្សេងទៀត ស្នាក់នៅក្នុងសណ្ឋាគារផ្សេងៗក្នុងរាជធានី។

ប៉ូលិសថៃ សង្ស័យថា អ្នកសុំទានជនជាតិចិនទាំង 6 នាក់នេះ គឺជាសមាជិករបស់ក្រុមមួយដែលគ្រប់គ្រងដោយជនជាតិថៃ។ ពួកគេសុំទាននៅទីប្រជុំជន និងតំបន់ទេសចរណ៍។ ពួកគេម្នាក់ៗរកបានប្រាក់ប្រហែល 10,000 បាត (ប្រមាណជាង 1,000,000 រៀល) ក្នុងមួយថ្ងៃ។

យោងតាមក្រសួងអភិវឌ្ឍសង្គម និងសន្តិសុខមនុស្សជាតិថៃ បច្ចុប្បន្នប្រទេសនេះមានអ្នកសុំទានជាង 7,000 នាក់ ក្នុងនោះមានជិត 4,700 នាក់ជាជនជាតិថៃ និងជិត 2,500 នាក់ជាជនបរទេស ក្នុងនោះភាគច្រើនជាពលរដ្ឋកម្ពុជា និងមីយ៉ាន់ម៉ា។ ពួកគេគឺជាសមាជិករបស់បណ្ដាក្រុមដែលមានអង្គការចាត់តាំង៕

November 24, 2023

Tag: មាន​

Tag: មាន