មាន - La Reine Media

ប្រទេសស្វ៊ីស លុបចោលពន្ធនាំចូលទំនិញឧស្សាហកម្មជាផ្លូវការ

ចាប់ពីថ្ងៃទី 01 មករា 2024 ផលិតផលឧស្សាហកម្មនានាត្រូវបានលើកលែងពន្ធនាំចូលទៅកាន់ប្រទេសស្វ៊ីសជាផ្លូវការ បើទោះមានប្រភពមកពីប្រទេសណាក៏ដោយ។ នេះគឺជាគោលនយោបាយពាណិជ្ជកម្មសំខាន់ដែលត្រូវបានប្រទេសនេះអនុវត្ត បន្ទាប់ពីបានសិក្សា និងត្រៀមខ្លួនអស់ជាច្រើនឆ្នាំ។

នៅប្រទេសស្វ៊ីស ផលិតផលឧស្សាហកម្មនានាដែលរួមមាន បណ្ដាផលិតផលិតមិនទាន់សម្រេចដែលប្រើប្រាស់សម្រាប់ការផលិត មានដូចជា វត្ថុធាតុដើម ផលិតផលពាក់កណ្ដាលសម្រេច គ្រឿងម៉ាស៊ីន អំបិល និងអំបិលឧស្សាហកម្ម ក៏ដូចជាយានជំនិះ សម្ភារប្រើប្រាស់ក្នុងផ្ទះ សម្លៀកបំពាក់ជាដើម។

ក៏ប៉ុន្តែ ផលិតផលកសិកម្ម រួមមានដូចជា សត្វ និងរុក្ខជាតិរស់ អាហារ កសិផលកែច្នៃ គ្រាប់ពូជ ចំណីសត្វ និងត្រីជាដើម មិនត្រូវបានចាត់ទុកជាផលិតផលឧស្សាហកម្ម។ ដូច្នេះ ពន្ធនាំចូលនៅតែត្រូវបានអនុវត្តសម្រាប់ផលិតផលទាំងនេះ។

ការលើកលែងពន្ធនាំចូលទំនិញឧស្សាហកម្មនេះ មិនធ្វើឱ្យមានការប្រែប្រួលក្នុងដំណើរការត្រួតពិនិត្យរបស់គយ។ អ្នកនាំចូលនៅតែត្រូវបំពេញបែបបទ និងទូទាត់ការចំណាយនានា និងថ្លៃសេវាដែលកើតមាននៅពេលនាំចូល រួមទាំងអាករលើតម្លៃបន្ថែម (VAT) ផងដែរ។

ការសម្រេចលើកលែងពន្ធនាំចូលលើទំនិញឧស្សាហកម្ម ត្រូវបានសភាប្រទេសស្វ៊ីសលើកឡើងកាលពីឆ្នាំ 2021 តាមរយៈការធ្វើវិសោធនកម្មច្បាប់ស្ដីពីគយ។ នៅក្នុងកិច្ចប្រជុំរបស់រដ្ឋាភិបាលកាលពីខែកុម្ភៈ 2022 រដ្ឋាភិបាលស្វ៊ីសបានសម្រេចដាក់ឱ្យអនុវត្តច្បាប់នេះចាប់ពីថ្ងៃទី 01 មករា 2024។

បន្ទាប់ពីច្បាប់នេះចាប់ផ្ដើមមានសុពលភាព អាជ្ញាធរស្វ៊ីសនឹងតាមដានផលប៉ះពាល់របស់គោលនយោបាយនេះទៅលើតម្លៃទំនិញក្នុងស្រុក។

ក្នុងដំណាក់កាលត្រៀមខ្លួន រដ្ឋាភិបាលស្វ៊ីស បានធ្វើការសិក្សាស្វែងយល់អំពីផលប៉ះពាល់នៃការលុបបំបាត់ពន្ធនាំចូលទំនិញឧស្សាហកម្ម។ យោងទៅលើទិន្នន័យពាណិជ្ជកម្មរបស់ឆ្នាំ 2016 គោលនយោបាយថ្មីនេះនឹងនាំមកនូវផលចំណេញប្រហែលមួយពាន់លានដុល្លារអាម៉េរិក ដល់សេដ្ឋកិច្ចជាតិ៕

January 4, 2024

បច្ចេកវិទ្យាថ្មីមួយនេះត្រូវបានរំពឹងថា នឹងរួមចំណែកកាត់បន្ថយការឡើងកម្ដៅផែនដី

អ្នកវិទ្យាសាស្ត្រចិន បានអភិវឌ្ឍបច្ចេកវិទ្យាថ្មីមួយដែលជួយផលិតជីវឥន្ធនៈដែលមានបរិមាណជីវម៉ាស (បាយអូម៉ាស – Biomass) ក្នុងកម្រិតខ្ពស់ជាងមុន អាចលើសពី 40% ដែលខ្ពស់ជាងឆ្ងាយបើធៀបនឹងបរិមាណមធ្យមនៅទូទាំងសកលលោកនាបច្ចុប្បន្ន ដែលមានមិនដល់ 10%។

សាស្ត្រាចារ្យ Shen Jian មកពីមហាវិទ្យាល័យគីមីវិទ្យា និងវិទ្យាសាស្ត្រវត្ថុធាតុ នៃសាកលវិទ្យាល័យគរុកោសល្យណានជីង រួមនឹងសហការី បានអភិវឌ្ឍវិធីសាស្ត្រផលិត ដោយប្រើប្រាស់ជាតិខ្លាញ់ជីវសាស្ត្រ (triglycerides) និងសមាសធាតុនានារបស់ប្រេងឆៅដែលបានចម្រាញ់ ដើម្បីផលិតជីវឥន្ធនៈសម្រាប់រថយន្ត ដោយមិនត្រូវការដំណើរការបំប្លែង Este។

យោងតាមក្រុមអ្នកស្រាវជ្រាវខាងលើ ប្រេងម៉ាស៊ូតជីវសាស្ត្រដែលមានបរិមាណជីវម៉ាសកាន់តែខ្ពស់ គឺកាន់តែមានប្រសិទ្ធភាពនៅក្នុងការសន្សំសំច័យថាមពល និងកាត់បន្ថយការបំភាយឧស្ម័នកាបូន។

សាស្ត្រាចារ្យ Shen ឱ្យដឹងថា តាមរយៈការប្រើប្រាស់ខ្លាញ់ជីវសាស្ត្រជំនួសប្រេងមួយផ្នែក បច្ចេកវិទ្យានេះជួយបង្កើតឥន្ធនៈជាប្រេងម៉ាស៊ូតជីវសាស្ត្រដែលល្អជាងមុនសម្រាប់បរិស្ថាន និងបន្ទាន់សម័យបណ្ដាស្ដង់ដាស្ដីពីការបំភាយឧស្ម័ន ឆ្ពោះទៅជិតគោលដៅបង្កើតតុល្យភាពកាបូនទូទាំងសកលលោក។

លទ្ធផលស្រាវជ្រាវនៃក្រុមរបស់សាស្ត្រាចារ្យ Shen ដែលត្រូវបានត្រួតពិនិត្យដោយអាជ្ញាធរចិន បានបង្ហាញថា ឥន្ធនៈនេះឆ្លើយតបនឹងបទដ្ឋានជាតិស្ដីពីប្រេងម៉ាស៊ូតជីវសាស្ត្រសម្រាប់រថយន្ត និងលំនឹងផ្នែកអុកស៊ីសែន ទប់ទល់នឹងការសឹករេចរឹល និងការពារបរិស្ថានបានយ៉ាងប្រសើរ៕

January 4, 2024

អង្គការរបស់អង់គ្លេស ព្យាករថា វៀតណាមនឹងក្លាយជាប្រទេសមានចំណូលខ្ពស់នៅឆ្នាំ 2045

ដោយមានប្រជាជនច្រើន និងក្មេង វៀតណាមមានឱកាសយកឈ្នះលើប្រទេសស្ទើរតែទាំងអស់នៅក្នុងសមាគមប្រជាជាតិអាស៊ីអាគ្នេយ៍ (ASEAN) ស្ដីពីសេដ្ឋកិច្ច មានដូចជា សិង្ហបុរី ថៃ និងម៉ាឡេស៊ីជាដើម ហើយក្លាយជាប្រទេសមានចំណូលខ្ពស់ចាប់ពីឆ្នាំ 2045។

ថ្មីៗនេះ ជម្ឈមណ្ឌលព្យាករ វិភាគសេដ្ឋកិច្ចឯករាជ្យរបស់អង់គ្លេស (CEBR) បានប្រកាសរបាយការណ៍ទស្សនវិស័យសេដ្ឋកិច្ចពិភពលោកប្រចាំឆ្នាំលើកទី 14 និងបញ្ជីចំណាត់ថ្នាក់សម្ព័ន្ធសេដ្ឋកិច្ចពិភពលោក (World Economic League Table – WELT)។ ក្នុងរបាយការណ៍នេះ CEBR ព្យាករថា វៀតណាមនឹងបោះជំហានយ៉ាងធំនៅ 14 ឆ្នាំទៀត។

ក្នុងឆ្នាំ 2023 កំណើនសេដ្ឋកិច្ចរបស់វៀតណាមមានការកើនឡើង។ ក្នុងនោះ ផលិតផលក្នុងស្រុកសរុប (GDP) កើន 5.05% និងអតិផរណាកើនតែ 3.25%។ GDP របស់ប្រទេសនេះ សម្រេចបានប្រមាណ 430 ពាន់លានដុល្លារអាម៉េរិក ត្រូវជាប់ចំណាត់ថ្នាក់ទី 34 នៅក្នុងបញ្ជីចំណាត់ថ្នាក់របស់ CEBR ក្នុងឆ្នាំ 2023។

សម្រាប់ឆ្នាំ 2024 CEBR ព្យាករថា វៀតណាមអាចនឹងជាប់ចំណាត់ថ្នាក់ទី 33 ក្នុងបញ្ជីចំណាត់ថ្នាក់ WELT ដោយកើនឡើងមួយថ្នាក់ បើធៀបនឹងរបាយការណ៍ឆ្នាំ 2023។ GDP ឆ្នាំ 2024 របស់ប្រទេសនេះ នឹងសម្រេចបាន 462 ពាន់លានដុល្លារអាម៉េរិក (គិតក្នុងតម្លៃបច្ចុប្បន្ន)។

របាយការណ៍របស់ CEBR បានវាយតម្លៃថា ចំណាត់ថ្នាក់នៃទំហំសេដ្ឋកិច្ចរបស់វៀតណាម អាចកើនឡើងខ្ពស់យ៉ាងលឿនក្នុងអនាគត។ វៀតណាមនឹងជាប់ចំណាត់ថ្នាក់ទី 24 នៅក្នុងឆ្នាំ 2033 ដោយទំហំសេដ្ឋកិច្ចនឹងសម្រេចបាន 1,050 ពាន់លានដុល្លារ។

ដល់ឆ្នាំ 2038 GDP របស់ប្រទេសជិតខាងកម្ពុជាមួយនេះ គ្រោងនឹងសម្រេចបាន 1,559 ពាន់លានដុល្លារអាម៉េរិក ត្រូវជាប់ចំណាត់ថ្នាក់ទី 21 ដែលយកឈ្នះលើខឿនសេដ្ឋកិច្ចធំៗនៅអាស៊ាន មានដូចជា ថៃ (1,313 ពាន់លានដុល្លារ), សិង្ហបុរី (896 ពាន់លានដុល្លារ), ហ្វ៊ីលីពីន (1,536 ពាន់លានដុល្លារ) ហើយឡើងដល់ក្រុមប្រទេសទាំង 25 ដែលមានសេដ្ឋកិច្ចធំជាងគេលើពិភពលោក។

យោងតាម CEBR វៀតណាម ដែលមានប្រជាជនច្រើន និងក្មេង នឹងមានឱកាសយកឈ្នះលើប្រទេសស្ទើរតែទាំងអស់នៅក្នុងសមាគមប្រជាជាតិអាស៊ីអាគ្នេយ៍ ហៅកាត់ថា អាស៊ាន (ASEAN) ស្ដីពីទំហំសេដ្ឋកិច្ច មានដូចជា ប្រទេសសិង្ហបុរី ថៃ និងម៉ាឡេស៊ីជាដើម ហើយក្លាយជាប្រទេសមានចំណូលខ្ពស់ចាប់ពីឆ្នាំ 2045៕

January 3, 2024

គម្រោងវិនិយោគដែលមានទុនសរុបជិត 4.9 ពាន់លានដុល្លារអាម៉េរិក ត្រូវបានកម្ពុជាអនុម័តក្នុងឆ្នាំ 2023

ក្នុងឆ្នាំ 2023 ក្រុមប្រឹក្សាអភិវឌន៍កម្ពុជា (CDC) បានអនុម័តគម្រោងវិនិយោគសរុបចំនួន 268 ក្នុងនោះមានគម្រោងវិនិយោគថ្មីចំនួន 247 និងគម្រោងពង្រីកផលិតកម្មចំនួន 21 ដែលមានទុនសរុបប្រមាណជិត 4.9 ពាន់លានដុល្លារអាម៉េរិក និងអាចបង្កើតការងារបានប្រមាណ 307,000 កន្លែង។ នេះបើតាមសេចក្ដីប្រកាសព័ត៌មានរបស់ CDC ចុះផ្សាយនាថ្ងៃទី 03 មករា 2024។

យោងតាម CDC ចំនួនគម្រោងវិនិយោគក្នុងវិស័យឧស្សាហកម្មបានរួមចំណែករហូតដល់ 92% នៃចំនួនគម្រោងវិនិយោគសរុប គ្រាដែលទុនវិនិយោគបានមកពីវិស័យនេះរួមចំណែកប្រមាណ 46%។ ចំណែកវិស័យហេដ្ឋារចនាសម្ព័ន្ធ និងវិស័យផ្សេងៗទៀត ដែលមានតែ 2.6% នៃចំនួនគម្រោងវិនិយោគសរុប បានរួមចំណែកប្រមាណ 44% នៃទុនវិនិយោគសរុប។

ក្រុមប្រឹក្សាអភិវឌ្ឍន៍កម្ពុជា ឱ្យដឹងថា ការហូរចូលនៃទុនវិនិយោគឯកជននៅក្នុងឆ្នាំ 2023 មានការកើនឡើងក្នុងរង្វង់ប្រមាណ 22% បើធៀបនឹងឆ្នាំ 2022។

CDC បានបញ្ជាក់ថា រំហូរទុនវិនិយោគក្នុងឆ្នាំកន្លង ភាគច្រើនមានប្រភពមកពីប្រទេសចិន និងក្នុងស្រុក។ ក្នុងនោះ ប្រភពទុនពីចិនរួមមានរហូតដល់ 66% ខណៈក្នុងស្រុករួមចំណែក 24%។ គម្រោងវិនិយោគទាំងនេះ ភាគច្រើនមានទីតាំងនៅក្នុងខេត្តកំពង់ស្ពឺ ខណៈមួយចំនួនស្ថិតនៅក្នុងរាជធានីភ្នំពេញ និងបណ្ដាខេត្តនៅជុំវិញរាជធានី មានដូចជា ខេត្តកណ្ដាល និងខេត្តតាកែវ ហើយខ្លះទៀតក៏ស្ថិតនៅក្នុងបណ្ដាខេត្តដែលមានការអភិវឌ្ឍតំបន់សេដ្ឋកិច្ចពិសេស គឺ ខេត្តស្វាយរៀង និងខេត្តព្រះសីហនុ៕

January 3, 2024

ទិដ្ឋភាព «ដូចឋាននរក» ក្នុងយន្តហោះជប៉ុនដែលកំពុងឆាបឆេះ

អ្នកដំណើរឱ្យដឹងថា គ្រប់គ្នារន្ធត់ខ្លាំងណាស់ នៅពេលផ្សែងចូលដល់ខាងក្នុងយន្តហោះរបស់ Japan Airlines មុនពេលត្រូវបានណែនាំឱ្យរត់ចេញពីអគ្គិភ័យដោយទោងរំអិល។

យន្តហោះ Airbus A350-900 របស់ក្រុមហ៊ុនអាកាសចរណ៍ជប៉ុន Japan Airlines (JAL) កាលពីថ្ងៃទី 02 មករា 2024 បានឆាបឆេះយ៉ាងសន្ធោសន្ធៅ នៅពេលប៉ះទង្គិចនឹងយន្តហោះរបស់កងកម្លាំងល្បាតសមុទ្រជប៉ុន (JCG) នៅលើផ្លូវរត់ក្នុងព្រលានយន្តហោះ Haneda នៅរាជធានីតូក្យូ។

វីដេអូដែលអ្នកដំណើរថតបានពីក្នុងយន្តហោះបង្ហាញថា អណ្ដាតភ្លើងឆាបឆេះនៅចំហៀងខាងឆ្វេងរបស់យន្តហោះ នៅពេលវាត្រៀមចុះចត ហើយក៏ប៉ះទង្គិចជាមួយយន្តហោះរបស់ JCG ដែលកំពុងរត់លើផ្លូវដើម្បីត្រៀមហោះឡើង។ ហេតុការណ៍ប៉ះគ្នានេះទំនងជាបានបណ្ដាលឱ្យបំពង់ឥន្ធនៈរបស់យន្តហោះត្រូវដាច់ នាំឱ្យអគ្គិភ័យកើតឡើង។

អ្នកដំណើរឱ្យដឹងថា សំឡេងផ្ទុះបានលាន់ឡើងក្នុងពេលយន្តហោះចុះចត។ «ក្នុងកាប៊ីនយន្តហោះពេញដោយផ្សែង…ដូចទៅនឹងឋាននរក» Anton Deibe អ្នកដំណើរជនជាតិស៊ុយអែត វ័យ 17 ឆ្នាំ រៀបរាប់ដូច្នេះក្រោយពីបានឆ្លងកាត់ហេតុការណ៍ខាងលើ។

ពេលនោះ ស្ថានភាពច្របូកច្របល់នាំឱ្យអ្នកដំណើរភ័យរន្ធត់ខ្លាំង។ អ្នកខ្លះចាប់យកម៉ាសមកពាក់ អ្នកខ្លះយកក្រណាត់បិទច្រមុះដើម្បីទប់ទល់នឹងផ្សែង គ្រាដែលអ្នកខ្លះស្រែកឡើងក្នុងភាពភ័យខ្លាច។ អ្នកបម្រើលើយន្តនៅតែមានស្មារតីនឹងនរ និងណែនាំឱ្យអ្នកដំណើរឱនចុះ បិទច្រមុះ និងមាត់ ក្នុងពេលរង់ចាំដល់ពេលយន្តហោះឈប់នៅមួយកន្លែង។

ខាងក្រៅយន្តហោះ កងកម្លាំងពន្លត់អគ្គិភ័យក៏បានមកដល់កន្លែងកើតហេតុ និងចាប់ផ្ដើមការសង្គ្រោះ។

អ្នកដំណើរម្នាក់ឈ្មោះ Satoshi Yamake អាយុ 59 ឆ្នាំ បានឱ្យដឹងថា ពេលយន្តហោះឈប់នៅមួយកន្លែងភ្លាម អ្នកបម្រើលើយន្តហោះក៏ប្រញាប់ទម្លាក់ទោងរំអិលដើម្បីឱ្យអ្នកដំណើរទម្លាក់ខ្លួនមកក្រៅ ក្នុងគ្រាអណ្ដាតភ្លើងកំពុងឆាបឆេះនៅចំហៀងខាងឆ្វេងរបស់យន្តហោះ។

អ្នកដំណើរ 367 នាក់ និងសមាជិកក្រុមហោះហើរចំនួន 12 នាក់ បានជម្លៀសខ្លួនដោយជោគជ័យ មុនពេលអណ្ដាតភ្លើងលេបត្របាក់យន្តហោះទាំងមូល ប៉ុន្តែមានមនុស្ស 17 នាក់បានរងរបួស។

សាស្ត្រាចារ្យ Graham Braithwaite អ្នកជំនាញផ្នែកស៊ើបអង្កេតគ្រោះថ្នាក់ នៅសាកលវិទ្យាល័យ Cranfield របស់អង់គ្លេស ឱ្យដឹងថា ករណីឆេះយន្តហោះនេះកើតឡើងដោយសារការលេចធ្លាយឥន្ធនៈ។

ក្រុមមន្ត្រីជប៉ុន និងអ្នកជំនាញនៅប្រទេសអង់គ្លេស បញ្ជាក់ថា ក្រុមហោះហើរបំពេញភារកិច្ចបានល្អ និងត្រូវតាមវិធីសាស្ត្រ។

ចំណែក JCG វិញ ឱ្យដឹងថា មនុស្ស 5 នាក់ក្នុងចំណោម 6 នាក់ ដែលនៅលើយន្តហោះរបស់ពួកគេ បានបាត់បង់ជីវិត នៅក្នុងហេតុការណ៍ប៉ះគ្នានេះ ខណៈប្រធានក្រុមនៅមានជីវិត ប៉ុន្តែរងរបួសធ្ងន់ធ្ងរ។

សារព័ត៌មានជប៉ុនបានផ្សាយថា JCG បានជួបគ្រោះថ្នាក់នៅពេលត្រៀមហោះឡើងដើម្បីទៅជួយជនរងគ្រោះក្នុងហេតុការណ៍រញ្ជួយដីកម្លាំង 7.6 រិចទ័រ ដែលកើតឡើងនៅភាគកណ្ដាលប្រទេសជប៉ុន កាលពីថ្ងៃទី 01 មករា ឆ្នាំ 2024៕

January 3, 2024

ការនាំចេញកាហ្វេក្នុងឆ្នាំ 2023 របស់វៀតណាម សម្រេចបាន 1.61 លានតោន

យោងតាមអគ្គនាយកដ្ឋានស្ថិតិរបស់វៀតណាម ឆ្នាំ 2023 ប្រទេសនេះបាននាំចេញកាហ្វេប្រមាណ 1.61 លានតោន កើន 3.1% និងមានតម្លៃសរុប 4.18 ពាន់លានដុល្លារអាម៉េរិក។

ក្នុងខែធ្នូ 2023 ការនាំចេញកាហ្វេរបស់វៀតណាម សម្រេចបានខ្ពស់បំផុតក្នុងអំឡុង 9 ខែកន្លង ពោលគឺ 190,000 តោន កើន 59.3% ធៀបនឹងខែវិច្ឆិកា 2023។ ក្នុងខែធ្នូកន្លង តម្លៃនាំចេញសម្រេចបាន 538 លានដុល្លារ កើន 51% ធៀបនឹងខែវិច្ឆិកា 2023 និងកើន 26.4% ធៀបនឹងដំណាក់កាលដូចគ្នាក្នុងឆ្នាំ 2022។

ជារួម ក្នុងឆ្នាំ 2023 ការនាំចេញកាហ្វេរបស់វៀតណាម សម្រេចបានប្រមាណ 1.61 លានតោន ថយចុះ 9.6% ធៀបនឹងឆ្នាំ 2022។ ក៏ប៉ុន្តែ ដោយសារកាហ្វេឡើងថ្លៃខ្ពស់ ទើបតម្លៃនៃការនាំចេញសរុបនៅតែកើន 3.1% ដោយសម្រេចបាន 4.18 ពាន់លានដុល្លារ ដែលជាកំណត់ត្រាថ្មី។

កាហ្វេនាំចេញ ជាមធ្យម មានតម្លៃ 2,834 ដុល្លារ/តោន នៅក្នុងខែធ្នូ 2023 ធ្លាក់ថ្លៃ 5.2% ធៀបនឹងខែមុន និងកើន 31.1% ធៀបនឹងដំណាក់កាលដូចគ្នាក្នុងឆ្នាំ 2022។ នៅក្នុងឆ្នាំ 2023 កាហ្វេនាំចេញ ជាមធ្យមមានតម្លៃ 2,604 ដុល្លារ/តោន កើន 14.1% ធៀបនឹងឆ្នាំ 2022៕

January 2, 2024

ថៃ និងចិន លើកលែងទិដ្ឋាការជារៀងរហូតដល់ពលរដ្ឋរបស់គ្នា

នាយករដ្ឋមន្ត្រីថៃ Srettha Thavisin នាថ្ងៃទី 02 មករា 2024 នេះ បានឱ្យដឹងថា ប្រទសថៃ និងប្រទេសចិន នឹងអនុវត្តគោលនយោបាយលើកលែងទិដ្ឋាការជារៀងរហូតដល់ពលរដ្ឋរបស់គ្នា ចាប់ពីថ្ងៃទី 01 មីនា 2024។

នេះគឺជាជំហានថ្មីមួយ បន្ទាប់ពីរាជរដ្ឋាភិបាលថៃ បានចាប់ផ្ដើមអនុវត្តគោលនយោបាយលើកលែងទិដ្ឋាការជាឯកតោភាគី ដល់ពលរដ្ឋចិន ចាប់ពីថ្ងៃទី 25 កញ្ញា 2023 និងបញ្ចប់ត្រឹមថ្ងៃទី 29 កុម្ភៈ 2024។

លទ្ធផលខាងលើស្ថិតក្នុងគោលនយោបាយរបស់ថៃ ក្នុងបំណងពង្រឹង «អំណាច» របស់លិខិតឆ្លងដែនថៃនៅលើឆាកអន្តរជាតិ។

ក្រសួងទេសចរណ៍និងកីឡាថៃ កាលពីម្សិលមិញបានប្រកាសថា ប្រទេសនេះបានទទួលភ្ញៀវអន្តរជាតិចំនួន 28.04 លាននាក់ នៅក្នុងឆ្នាំ 2023។ ក្នុងនោះ ប្រទេសចិនឈរលំដាប់ទីពីរ (3.52 លាននាក់) ក្នុងចំណោមប្រទេស និងដែនដីដែលមានពលរដ្ឋមកលេងប្រទេសនេះច្រើនជាងគេនៅក្នុងឆ្នាំ 2023។

ប្រទេសថៃដាក់គោលដៅទទួលភ្ញៀវអន្តរជាតិឱ្យបានយ៉ាងតិច 35 លាននាក់នៅក្នុងឆ្នាំ 2024 ក្នុងនោះ ពលរដ្ឋចិនត្រូវបានរំពឹងថា នឹងរួមចំណែកប្រហែល 8 លាននាក់៕

January 2, 2024

តាក់ស៊ីហោះស្វ័យប្រវត្តរបស់ចិន ចាប់ផ្ដើមជើងហោះហើរពាណិជ្ជកម្ម

(ប្រទេសចិន) – EH216-S ដែលជាតាក់ស៊ីហោះអគ្គិសនីពីរកៅអី ដែលទទួលបានវិញ្ញាបនបត្រសុវត្ថិភាព ទើបតែសម្រេចបានជើងហោះហើរពាណិជ្ជកម្មដំបូងនៅក្នុងខេត្ត Anhui កាលពីថ្ងៃទី 28 ធ្នូ 2023។

យន្តហោះដ្រូនដំបូងគេលើពិភពលោកដែលទទួលបានវិញ្ញាបនបត្រស្ដីពីយានជំនិះអគ្គិសនីគ្មានមនុស្សបើកបរ ដែលហោះឡើង-ចុះចតត្រង់ បានទទួលជោគជ័យក្នុងជើងហោះហើរពាណិជ្ជកម្មដំបូងនៅក្នុងខេត្ត Anhui ភាគខាងកើតប្រទេសចិន កាលពីថ្ងៃទី 28 ធ្នូ 2023។

ត្រូវបានអភិវឌ្ឍដោយ EHang Holdings ដែលជាក្រុមហ៊ុនបច្ចេកវិទ្យាអាកាសចរណ៍ទីក្រុងរបស់ចិន យន្តហោះគ្មានមនុស្សបើកបរ (UAV) សម្រាប់ដឹកអ្នកដំណើរ EH216-S ត្រូវបាននាយកដ្ឋានអាកាសចរណ៍ស៊ីវិលចិន (CAAC) ទទួលស្គាល់ថាមានសុវត្ថិភាពក្នុងការហោះហើរ កាលពីខែតុលា 2023។

តាក់ស៊ីហោះដែលមានកៅអីចំនួនពីរ មានស្លាបកង្ហារចំនួន 16 បញ្ចប់ការហោះហើរបែបពាណិជ្ជកម្មមួយជើងៗចំណាយពេលពី 3 ទៅ 5 នាទី និងហោះលើកម្ពស់ប្រហែល 50 ម៉ែត្រ ក្នុងល្បឿន 36 គីឡូម៉ែត្រក្នុងមួយម៉ោង។

EH216-S ដំណើរការទាំងស្រុងដោយអគ្គិសនី និងភ្ជាប់ទំនាក់ទំនងជាមួយនឹងស្ថានីយគ្រប់គ្រងនៅលើដី ក៏ដូចជាដំណើរការប្រព័ន្ធតាមរយៈបណ្ដាញអ៊ីនធើណិតល្បឿនលឿន ដូច្នេះអាចដោះស្រាយបញ្ហាអាក្រក់បានទាន់ពេល។

តាក់ស៊ីហោះ EH216-S របស់ក្រុមហ៊ុនចិន EHang Holdings មានតម្លៃប្រហែល 283,500 ដុល្លារអាម៉េរិកក្នុងមួយគ្រឿង។

January 2, 2024

កត្តាជាច្រើនដែលនាំឱ្យគេសង្ឃឹមថា សេដ្ឋកិច្ចពិភពលោកក្នុងឆ្នាំ 2024 នឹងល្អប្រសើរជាងបច្ចុប្បន្ន

សន្ទស្សន៍ភ្ញាក់ផ្អើលសេដ្ឋកិច្ចសកលរបស់ Citigroup បង្ហាញថា ទិន្នន័យជាក់ស្ដែងនានាក្នុងឆ្នាំ 2023 សុទ្ធតែខ្ពស់ជាងការព្យាករ ហើយនេះគឺជាមូលហេតុដែលគ្រប់គ្នាមានសុទិដ្ឋិនិយមចំពោះសេដ្ឋកិច្ចរបស់ឆ្នាំ 2024។

ទំព័រ Financial Times ថ្មីៗនេះបានចេញផ្សាយថា 2023 គឺជាឆ្នាំដ៏ប្រសើរមួយចំពោះសេដ្ឋកិច្ចពិភពលោក នៅពេលសន្ទស្សន៍ភ្ញាក់ផ្អើលសេដ្ឋកិច្ចសកលរបស់ Citigroup (Global’s Global Citigroup Economic Surprise Index) បង្ហាញថា ទិន្នន័យជាក់ស្ដែងនានាក្នុងឆ្នាំ 2023 សុទ្ធតែខ្ពស់ជាងការព្យាករ។

និន្នាការសេដ្ឋកិច្ចខាងលើនេះក៏ស្ដែងឱ្យឃើញនូវមូលហេតុជាច្រើនដែលគ្រប់គ្នាអាចជឿជាក់បានចំពោះសេដ្ឋកិច្ចក្នុងឆ្នាំ 2024។ ខាងក្រោមនេះគឺជាកត្តាមួយចំនួនដែលអាចជំរុញឱ្យសេដ្ឋកិច្ចក្នុងឆ្នាំ 2024 ល្អប្រសើរជាងឆ្នាំ 2023៖

ទីមួយ៖ សេដ្ឋកិច្ចពិភពលោកបានបង្ហាញនូវលទ្ធភាពងើបឡើងវិញដ៏គួរឱ្យចាប់អារម្មណ៍។ យោងតាមសន្ទស្សន៍សកលរបស់ Fitch Ratings នៅក្នុងត្រីមាសទីបីនៃឆ្នាំ 2023 ផលិតផលក្នុងស្រុកសរុប (GDP) របស់ពិភពលោក គឺខ្ពស់ជាង 9% បើធៀបនឹងដំណាក់កាលមុនវិបត្តិសុខភាពសកល។

ទីពីរ៖ អតិផរណាកំពុងថយចុះលឿន។ អតិផរណារបស់ពិភពលោកស្ថិតនៅក្នុងកម្រិត 8.9% កាលពីឆ្នាំ 2022 ហើយគ្រោងនឹងថយចុះ 5.1% នៅចុងឆ្នាំ 2024។

ទីបី៖ ការព្រួយបារម្ភអំពីវដ្ដនៃគោលនយោបាយរូបិយវត្ថុបែប «ភ្នំតុ (Table Mountain)» ដែលការប្រាក់ត្រូវបានដំឡើងខ្ពស់ខ្លាំង និងរក្សាកម្រិតកំពូលក្នុងរយៈពេលយូរ បានថយចុះ។

ទីបួន៖ ការផ្ទុះឡើងរបស់ទីផ្សារហិរញ្ញវត្ថុ។ សន្ទស្សន៍លំដាប់កំពូលនានារបស់ Wall Street ភាគច្រើនជិតស្មើ ឬលើសពីកម្រិតខ្ពស់បំផុតក្នុងខែធ្នូ ឆ្នាំ 2023។ ទីផ្សារមូលបត្របំណុលក៏បញ្ចប់ឆ្នាំចាស់ប្រកបដោយភាពខ្លាំងក្លា។

ចុងក្រោយ៖ ឆ្នាំ 2023 គឺជាឆ្នាំល្អចំពោះវិស័យបច្ចេកវិទ្យា ដូចទៅនឹងអ្វីដែលមនុស្សមួយចំនួនបានរំពឹងទុក៕

December 30, 2023

នាយករដ្ឋមន្ត្រីថៃ ប្រកាសទ្រព្យសម្បត្តិជាសាធារណៈ

នាយករដ្ឋមន្ត្រីថៃ លោក Srettha ប្រកាសថា លោកមានទ្រព្យជិត 19 លានដុល្លារអាម៉េរិក ក្នុងនោះមានរថយន្តទំនើបមួយគ្រឿងដែលមានតម្លៃជាង 1.4 លានដុល្លារអាម៉េរិក និងនាឡិកាចំនួន 38 គ្រឿងផងដែរ។

អង្គភាពជាតិប្រឆាំងអំពើពុករលួយថៃ (NACC) កាលពីថ្ងៃទី 28 ធ្នូ បានឱ្យដឹងថា នាយករដ្ឋមន្ត្រី Srettha Thavisin និងជាអតីតអ្នកជំនួញផ្នែកអចលនទ្រព្យ មានទ្រព្យសម្បត្តិតម្លៃជិត 660 លានបាត (ជាង 18.9 លានដុល្លារអាម៉េរិក)។ ច្បាប់ប្រឆាំងអំពើពុករលួយរបស់ប្រទេសថៃ តម្រូវឱ្យមន្ត្រីរាជការប្រកាសទ្រព្យសម្បត្តិ និងបំណុលរបស់ខ្លួន និងភរិយា/ស្វាមី ក្នុងរង្វង់ 60 ថ្ងៃ រាប់ចាប់ពីថ្ងៃចូលកាន់តំណែង។

យោងតាម NACC នាយករដ្ឋមន្ត្រីថៃមានសាច់ប្រាក់សុទ្ធមួយលានបាត (ជាង 28,700 ដុល្លារអាម៉េរិក), ជិត 69 លានបាត (ជាង 1.9 លានដុល្លារ) ក្នុងធនាគារចំនួន 47 ស្ថាប័ន និងជាង 1.3 លានបាត (ជាង 37,300 ដុល្លារ) កំពុងវិនិយោគ។ លោកក៏មានដីដែលមានតម្លៃជាង 158 លានបាត (ជាង 4.5 លានដុល្លារ) នៅបាងកក។

នាយករដ្ឋមន្ត្រីថ្មីរបស់ថៃ ក៏ជាម្ចាស់អគារមួយចំនួនដែលមានតម្លៃសរុបជាង 156 លានបាត (ជាង 4.4 លានដុល្លារ) ក្នុងនោះក៏មានខុនដូនៅតំបន់លម្ហែកាយ Hua Hin និងផ្ទះបីជាន់មួយកន្លែងនៅក្នុងខណ្ឌ Khlong Toei នៅរាជធានីបាងកកផងដែរ។

អំពីយានជំនិះ លោក Srettha មានរថយន្តទំនើប Aston Martin DB5 តម្លៃ 50 លានបាត (ជាង 1.4 លានដុល្លារ)។ លោកក៏នៅមាននាឡិកា 38 គ្រឿង ដែលមានតម្លៃជិត 122 លានបាត (ជាង 3.5 លានដុល្លារ)។ ចំណែកបំណុលវិញ នាយករដ្ឋមន្ត្រីថៃកំពុងជំពាក់ជាង 10 លានបាត (ជាង 287,000 ដុល្លារ)។

នាយករដ្ឋមន្ត្រីថ្មីរបស់ថៃ ក៏ជាម្ចាស់អគារមួយចំនួនដែលមានតម្លៃសរុបជាង 156 លានបាត (ជាង 4.4 លានដុល្លារ) ក្នុងនោះក៏មានខុនដូនៅតំបន់លម្ហែកាយ Hua Hin និងផ្ទះបីជាន់មួយកន្លែងនៅក្នុងខណ្ឌ Khlong Toei នៅរាជធានីបាងកកផងដែរ។

អំពីយានជំនិះ លោក Srettha មានរថយន្តទំនើប Aston Martin DB5 តម្លៃ 50 លានបាត (ជាង 1.4 លានដុល្លារ)។ លោកក៏នៅមាននាឡិកា 38 គ្រឿង ដែលមានតម្លៃជិត 122 លានបាត (ជាង 3.5 លានដុល្លារ)។ ចំណែកបំណុលវិញ នាយករដ្ឋមន្ត្រីថៃកំពុងជំពាក់ជាង 10 លានបាត (ជាង 287,000 ដុល្លារ)។

NACC ឱ្យដឹងថា ប្រាក់ចំណូលប្រចាំឆ្នាំរបស់លោក Srettha រួមមានប្រាក់បៀវត្សរ៍ ប្រាក់រង្វាន់ជាង 153 លានបាត (4.3 លានដុល្លារ) រួមនឹងប្រាក់ឧបត្ថម្ភជាច្រើនផ្សេងទៀត។ ជារៀងរាល់ឆ្នាំ លោកចំណាយប្រហែល 36.5 លានបាត (ជាងមួយលានដុល្លារ) សម្រាប់ខ្ទង់ចំណាយផ្ទាល់ខ្លួន គ្រួសារ ពន្ធអាករ និងសប្បុរសធម៌។

លោក Srettha អាយុ 61 ឆ្នាំ កាលពីខែសីហា 2023 បានក្លាយជាមេដឹកនាំថ្មីរបស់ប្រទេសថៃ បញ្ចប់ស្ថានភាពជាប់គាំងដែលបានអូសបន្លាយអស់ច្រើនខែ ក្រោយពីការបោះឆ្នោតកាលពីខែឧសភា៕

December 30, 2023

ស្ត្រីដំបូងគេលើពិភពលោកដែលមានទ្រព្យ 100 ពាន់លានដុល្លារអាម៉េរិក

Francoise Bettencourt Meyers ដែលជាស្ត្រីមានទ្រព្យសម្បត្តិច្រើនជាងគេលើពិភពលោក ទើបតែបានក្លាយជាស្ត្រីដំបូងគេបង្អស់ដែលមានទ្រព្យ 100 ពាន់លានដុល្លារអាម៉េរិក។

យោងតាមបញ្ជីចំណាត់ថ្នាក់មហាសេដ្ឋី Bloomberg Billionaire’s Index គិតត្រឹមថ្ងៃទី 28 ធ្នូ 2023 អ្នកស្រី Francoise Bettencourt Meyers ដែលជាអ្នកស្នងមរតកក្រុមហ៊ុន L’Oreal បានក្លាយជាមហាសេដ្ឋិនីដំបូងគេលើពិភពលោក ដែលមានទ្រព្យ 100 ពាន់លានដុល្លារអាម៉េរិក។

បច្ចុប្បន្ន អ្នកស្រីគឺជាអ្នកមានជាងគេលំដាប់ទី 12 លើពិភពលោក និងនៅពីលើមហាសេដ្ឋីឥណ្ឌា លោក Mukesh Ambani ទៀតផង។ ចាប់ពីដើមឆ្នាំ ទ្រព្យសម្បត្តិរបស់អ្នកស្រីបានកើនបន្ថែម 28.6 ពាន់លានដុល្លារ ដោយសារតែភាគហ៊ុន L’Oreal កើនឡើង 35%។

ចំណែកបញ្ជីចំណាត់ថ្នាក់មហាសេដ្ឋីរបស់ Forbes ក៏បានឱ្យដឹងថា ទ្រព្យសម្បត្តិរបស់អ្នកស្រី Bettencourt Meyers កើនជិតដល់ 100 ពាន់លានដុល្លារ ពោលគឺ 99.6 ពាន់លានដុល្លារអាម៉េរិក។

L’Oreal Group គឺជាក្រុមហ៊ុនផលិតគ្រឿងសម្អាងធំបំផុតលើពិភពលោក ដោយមានយីហោជាច្រើន មានដូចជា Lancome និង Maybelline ជាដើម។ កាលពីឆ្នាំ 2022 ក្រុមហ៊ុននេះរកបានប្រាក់ចំណូលជាង 38 ពាន់លានអឺរ៉ូ ដែលស្មើនឹង 42 ពាន់លានដុល្លារអាម៉េរិក៕

December 29, 2023

រ៉ុក្កែតរបស់ SpaceX នាំយក «យានមហាសម្ងាត់» របស់អាម៉េរិក ឡើងទៅទីអវកាសខ្ពស់ជាងមុន

យន្តហោះអវកាសដ៏អាថ៌កំបាំង X-37B ត្រូវបានបាញ់បង្ហោះតាមរ៉ុក្កែត Falcon Heavy ពី Florida ចាប់ផ្ដើមបេសកកម្មទី 7 នៅលើគន្លងតារាវិថីខ្ពស់ជាង បើធៀបនឹងបេសកកម្មមុនៗ។

យានអវកាសស្វ័យប្រវត្ត X-37B របស់កងទ័ពអាម៉េរិក ហោះទៅកាន់ទីអវកាសតាមរយៈរ៉ុក្កែត Falcon Heavy របស់ក្រុមហ៊ុនអាម៉េរិក SpaceX ពីមជ្ឈមណ្ឌលអវកាស Kennedy (KSC) របស់ទីភ្នាក់ងារអវកាសអាម៉េរិក (ណាសា – NASA) កាលពីវេលាម៉ោង 20 និង 07 នាទី ថ្ងៃទី 28 ធ្នូកន្លងទៅ ដែលត្រូវនឹងម៉ោង 07 និង 07 នាទី ថ្ងៃទី 29 ធ្នូ នៅកម្ពុជា ក្រោយពីបានពន្យារពេលច្រើនសប្ដាហ៍ ដោយសារអាកាសធាតុមិនល្អ។

ការបាញ់បង្ហោះកាលពីថ្ងៃទី 28 ធ្នូ គឺជាជើងហោះហើរទី 7 របស់ X-37B និងជាជើងហោះហើរដំបូងដែលធ្វើឡើងជាមួយនឹងរ៉ុក្កែត Falcon Heavy ដែលជារ៉ុក្កែតកម្លាំងខ្លាំងជាងគេលំដាប់ទីពីរលើពិភពលោក បន្ទាប់ពីប្រព័ន្ធបាញ់បង្ហោះអវកាសរបស់ណាសា។ នេះក៏ជាការបាញ់បង្ហោះរ៉ុក្កែតលើកទី 95 របស់ SaceX នៅក្នុងឆ្នាំ 2023។

បេសកកម្មថ្មីរបស់ X-37B នេះ មានឈ្មោះថា OTV-7 (Orbital Test Vehicle-7) ឬហៅថា USSF-52។ គោលដៅសំខាន់របស់ជើងហោះហើរនេះគឺធ្វើឡើងដើម្បី «ដំណើរការយន្តហោះរអវកាសដែលអាចប្រើប្រាស់ឡើងវិញ នៅលើគន្លងតារាវិថីថ្មី»។

X-37B មានរូបរាងស្រដៀងនឹងយានអវកាស Shuttle ដែលបានចូលនិវត្តន៍របស់ណាសា ប៉ុន្តែតូចជាងឆ្ងាយ។ យានដែលគ្មានមនុស្សបើកបរ X-37B មានបណ្ដោយ 8.8 ម៉ែត្រ និងស្លាបប្រវែង 4.6 ម៉ែត្រ ខណៈដែល Shuttle មានបណ្ដោយ 37 ម៉ែត្រ និងស្លាបប្រវែងជាង 24 ម៉ែត្រ។ កងកម្លាំងអវកាសអាម៉េរិក មានយាន X-37B ចំនួនពីរគ្រឿងដែលសុទ្ធតែផលិតដោយក្រុមហ៊ុន Boeing។

ព័ត៌មានលម្អិតស្ដីពីបេសកកម្ម OTV-7 មិនត្រូវបានបង្ហើបឱ្យដឹងជាសាធារណៈនោះទេ ប៉ុន្តែបេសកកម្មចំនួន 6 នាពេលកន្លងរបស់ X-37B សុទ្ធតែអូសបន្លាយពេលជាង 7 ខែ និងហោះក្នុងគន្លងគោចរកម្រិតទាប ត្រឹមតែប៉ុន្មានរយគីឡូម៉ែត្រប៉ុណ្ណោះ។ យោងតាមទំព័រសារព័ត៌មាន Space រ៉ុក្កែត Falcon Heavy អាចនាំ X-37B ឡើងទៅកាន់កម្ពស់ 35,000 គីឡូម៉ែត្រ៕

December 29, 2023

Tag: មាន​

Tag: មាន