Tag: ជម្លោះ

ម៉ិកស៊ិកចាត់បុគ្គលិកសន្តិសុខជាង 1,000 នាក់ ឱ្យតាមរកក្រុមប៉ូលិសដែលត្រូវចាប់ជំរិត
អាជ្ញាធរម៉ិកស៊ិកធ្វើយុទ្ធនាការស្វែងរកទ្រង់ទ្រាយធំ បន្ទាប់ពីប៉ូលិស 16 នាក់ត្រូវបានក្រុមប្រដាប់អាវុធខុសច្បាប់បញ្ឈប់រថយន្ត និងចាប់ជំរិតនៅលើផ្លូវល្បឿនលឿន។
ប្រធានាធិបតី Andres Manuel Lopez Obrador កាលពីថ្ងៃទី 28 មិថុនា បានឱ្យដឹងថា បានចេញបញ្ជាឱ្យមានការរំដោះក្រុមប៉ូលិសដែលត្រូវបានគេចាប់ជំរិតនៅក្នុងរដ្ឋ Chiapas ភាគខាងត្បូងប្រទេសម៉ិកស៊ិក កាលពីមុននោះមួយថ្ងៃ។
លោក Obrador ថ្លែងថា ក្រុមប៉ូលិសនោះធ្វើការនៅឯមន្ទីរឃុំខាំងមួយនៅមិនឆ្ងាយពីកន្លែងកើតហេតុ។ លោកយល់ថា ហេតុការណ៍នេះទំនងជាជាប់ទាក់ទិននឹងជម្លោះរវាងបណ្ដាក្រុមសង្គមងងឹត។ លោក Obrador សន្យាថា នឹងចាត់ការក្រុមជននៅពីក្រោយករណីនេះឱ្យខាងតែបាន។
មុននេះមួយថ្ងៃ ក្រុមមន្ត្រីម៉ិកស៊ិកប្រកាសថា ក្រុមប្រដាប់អាវុធខុសច្បាប់បានចាប់ជំរិតប៉ូលិស 14 នាក់ ប៉ុន្តែក្រោយមកក៏បន្ថែម 2 នាក់ទៀត។
ករណីប្រឈមមុខដាក់គ្នារវាងកងកម្លាំងអនុវត្តច្បាប់ និងក្រុមជនល្មើសនៅ Ocozocautla បានកើតឡើងញឹកញាប់ខ្លាំងក្នុងមួយរយៈពេលចុងក្រោយនេះ។ Ocozocautla គឺជាតំបន់ដែលកើតមានអំពើជួញដូរមនុស្ស និងគ្រឿងញៀនសកម្មជាងគេនៅប្រទេសម៉ិកស៊ិក។
June 29, 2023
កីឡាករថៃ៖ «អាជ្ញាកណ្ដាលគឺជាដើមហេតុនៃភាពច្របូកច្របល់ក្នុងវគ្គផ្ដាច់ព្រ័ត្រនៅស៊ីហ្គេម»
ខ្សែការពាររបស់ក្រុមបាល់ទាត់ជម្រើសជាតិថៃ Jonathan Khemdee យល់ថា អាជ្ញាកណ្ដាលបង្កឱ្យមានកំហុសឆ្គងធំជាច្រើន នាំទៅរកជម្លោះរវាងក្រុមជម្រើសជាតិថៃ និងឥណ្ឌូណេស៊ី នៅវគ្គផ្ដាច់ព្រ័ត្រនៃវិញ្ញាសាបាល់ទាត់បុរសនៅស៊ីហ្គេមលើកទី 32។
កាលពីព្រលប់ថ្ងៃទី 16 ឧសភា នៅលើទីលានបាល់ទាត់របស់ពហុកីឡដ្ឋានជាតិអូឡាំពិក សមាជិកក្រុមកីឡាថៃ និងឥណ្ឌូណេស៊ី បានប៉ះទង្គិចគ្នាពីរលើក។ ពិសេសគឺការប្រវាយប្រតប់គ្នានៅក្រោយការស៊ុតបញ្ចូលទីរបស់កីឡាករ Irfan Jauhari ជួយឱ្យឥណ្ឌូណេស៊ី នាំមុខ 3-2 នៅដើមនារីថែមម៉ោងលើកទីមួយ នាំឱ្យអាជ្ញាកណ្ដាលពិន័យកាត់ក្រហមដោយផ្ទាល់ចំនួនប្រាំចំពោះភាគីទាំងពីរ។
ក្រោយការប្រកួត Jonathan Khemdee បានប្រាប់អ្នកយកព័ត៌មានថា «អាជ្ញាកណ្ដាលបង្កកំហុសធំជាច្រើន ហើយនោះគឺជាមូលហេតុដែលនាំឱ្យមានករណីប្រវាយប្រតប់គ្នា។ អាជ្ញាកណ្ដាលមិនអាចគ្រប់គ្រងការប្រកួត ដូច្នេះគ្រប់គ្នាក៏រុលទៅរកគ្នា និងវាយគ្នា»។
យោងតាមខ្សែការពារកណ្ដាលដើមកំណើតដាណឺម៉ាកខាងលើ កំហុសធំបំផុតរបស់អាជ្ញាកណ្ដាលស្ថិតនៅត្រង់គ្រាប់បាល់ចាញ់ទីពីររបស់ថៃ។ នាទីទីប្រាំនៃការថែមម៉ោងក្នុងតង់ទីមួយ កីឡាករឥណ្ឌូណេស៊ីម្នាក់រងរបួសត្រង់ក្បាល ទើបអាជ្ញាកណ្ដាលផ្លុំកញ្ចែផ្អាកការប្រកួត គ្រាដែលគ្រាប់បាល់មិនបានទៅខាងណា។ បន្ទាប់ពីកីឡាករឥណ្ឌូណេស៊ីត្រូវគេសែងចេញ អាជ្ញាកណ្ដាលក៏ប្រគល់បាល់ឱ្យប្រធានក្រុម Rizky Ridho របស់ឥណ្ឌូណេស៊ី ពេលដែលកីឡាកររបស់ថៃ មិនត្រូវបានអនុញ្ញាតឱ្យដណ្ដើមបាល់ភ្លាម។ Rodho បញ្ជូនបាល់ឡើងដល់ក្បែរតំបន់គ្រោះថ្នាក់របស់ថៃ ហើយខ្សែប្រយុទ្ធ Ramadhan Sananta ក៏ទាត់បាល់រំលងក្បាលអ្នកចាំទី Soponwit Rakyart ធ្វើឱ្យបាល់ហោះចូលទី ជួយឱ្យឥណ្ឌូណេស៊ីនាំមុខ 2-0។
Jonathan Khemdee ក៏ទទួលបានកាតក្រហម
ក្រុមកីឡាករថៃ ភ្លាមនោះក៏បានតវ៉ាទៅកាន់អាជ្ញាកណ្ដាលជនជាតិអូម៉ង់ Kassem Matar Al-Hatmi ព្រោះពួកគេយល់ថា Ridho គួរតែប្រគល់បាល់មកឱ្យថៃ។ ប៉ុន្តែ លោក Al-Hatmi នៅតែទទួលស្គាល់គ្រាប់បាល់នេះបន្ទាប់ពីផ្លាស់ប្ដូរយោបល់ជាមួយអាជ្ញាកណ្ដាលខ្សែបន្ទាត់។
ក្នុងការថែមម៉ោងនៅតង់ទីពីរ សំឡេងកញ្ចែរបស់អាជ្ញាកណ្ដាលក៏បានធ្វើឱ្យក្រុមឥណ្ឌូណេស៊ីយល់ច្រលំថាអស់ម៉ោងប្រកួត ទើបនាំគ្នារត់ចូលទីលានអបអរសាទរ គ្រាដែលសំឡេងកញ្ចែនោះគឺជាការពិន័យចំពោះក្រុមឥណ្ឌូណេស៊ី។ ស្ថានការណ៍នេះបាននាំទៅរកគ្រាប់បាល់ស្មើ 2-2 ដោយកីឡាករថៃបានស៊ុតបញ្ចូលទីរបស់ឥណ្ឌូណេស៊ី។ បន្ទាប់ពីស៊ុតចូលភ្លាម កីឡាករថៃក៏រត់ទៅខាងមុខតំបន់អ្នកគាំទ្រឥណ្ឌូណេស៊ីដើម្បីសំដែងការអបអរ ឌឺដង ហើយក៏មានការប៉ះទង្គិចគ្នាមួយប្រាវ។
ចូលដល់តង់ទីពីរ បន្ទាប់ពីរកបានមួយគ្រាប់ទៀតដែលជួយឱ្យនាំមុខ 3-2 ឥណ្ឌូណេស៊ីក៏អបអរសងសឹក ហើយក៏មានការប្រវាយប្រតប់គ្នាជាថ្មី ធ្វើឱ្យការប្រកួតត្រូវអាក់ខានច្រើននាទី។ ពេលនោះ កាត់ក្រហមជាច្រើនក៏ត្រូវបានហូតចេញជាបន្តបន្ទាប់។
បន្ទាប់ពីស្ថានការណ៍ត្រូវបានគ្រប់គ្រង ថៃក៏ត្រូវបាត់បង់កីឡាករពីររូបដោយសារកាត់ក្រហម។ ដោយមានគ្នាតែ 9 នាក់ ក្រុមថៃក៏ត្រូវចាញ់ 2 គ្រាប់ទៀត នាំឱ្យឥណ្ឌូណេស៊ីឈ្នះ 5-2 ជាស្ថាពរ។
ភាពច្របូកច្របល់ក្នុងវគ្គផ្ដាច់ព្រ័ត្រនៅស៊ីហ្គេម
«គ្រប់ស្ថានការណ៍ អាជ្ញាកណ្ដាលត្រូវតែរក្សាឥរិយាបថយុត្តិធម៌ ប៉ុន្តែការប្រកួតនេះ អាជ្ញាកណ្ដាលមិនអាចធ្វើបាន» Khemdee អះអាងដូច្នេះ។
ទោះជាយ៉ាងណាក៏ដោយ នៅពេលចប់ការប្រកួត ក្រុមទាំងពីរក៏ពុំមានបញ្ហាអ្វីនឹងគ្នាទៀតនោះដែរ។ នេះគឺជាបទពិសោធន៍ដែលគួរយកជាមេរៀន ដែលយើងមិនគួរឱ្យមានករណីបែបនេះកើតឡើង ព្រោះវាប៉ះពាល់ដល់អ្នកគាំទ្រ និងកីឡាករផងដែរ។ ប៉ុន្តែ បរាជ័យលើកនេះ ធ្វើឱ្យថៃ ខកខានក្នុងការលើកមេដាយមាសនៅស៊ីហ្គេមចំនួនបីជំនាន់បន្តបន្ទាប់ ខណៈដែល U22 ឥណ្ឌូណេស៊ី ដណ្ដើមបានមេដាយមាសលើកទីបីនៅស៊ីហ្គេម៕
May 17, 2023
រុស្ស៊ី ផ្គុំកម្លាំង-អាវុធ ក្បែរព្រំដែនរបស់ បេឡារុស-អ៊ុយក្រែន ចម្ងាយ ៤០ គូឡូម៉ែត្រ
យោងតាមរូបភាពផ្កាយរណប យានប្រហែល ១០០ គ្រឿង និងតង់រាប់សិប ដែលសង្ស័យថាជារបស់ រុស្ស៊ី បានបង្ហាញខ្លួននៅក្នុងព្រលានយន្តហោះរបស់ បេឡារុស ដែលមានចម្ងាយប្រហែល ៤០ គីឡូម៉ែត្រ ពីព្រំដែនរបស់ អ៊ុយក្រែន។
រូបភាពផ្កាយរណបដែលត្រូវបានក្រុមហ៊ុន Maxar Technologies នៅ សហរដ្ឋអាម៉េរិក ប្រកាសកាលពីថ្ងៃទី ២២ កុម្ភៈ បង្ហាញថា មានការដាក់ពង្រាយទ័ពថ្មី អាចជារបស់ រុស្ស៊ី នៅឯព្រលានយន្តហោះក្បែរទីក្រុង Mazyr នៃ ប្រទេសបេឡារុស។ ទីតាំងនៃការផ្គុំកម្លាំងនេះស្ថិតនៅចម្ងាយ ៤០ គីឡូម៉ែត្រ ពីព្រំដែនរបស់ បេឡារុស-អ៊ុយក្រែន និងប្រហែល ១៧៧ គីឡូម៉ែត្រ ពី រដ្ឋធានីកៀវ។
និពន្ធនាយក Christoph Koettl របស់ NY Times ឱ្យដឹងថា កម្លាំងប្រដាប់អាវុធបង្ហាញខ្លួននៅតំបន់ខាងលើចាប់ពីពាក់កណ្ដាលខែកុម្ភៈ។ វីដេអូមួយដែលបង្ហោះកាលពីថ្ងៃទី ១៤ កុម្ភៈ បង្ហាញថា ក្រុមទាហានជញ្ជូនធុងប្រេងជាច្រើនទៅកាន់ព្រលានយន្តហោះ។ រូបភាពផ្កាយរណបដែលទើបតែបានបញ្ចេញកាលពីពេលថ្មីៗនេះ ក៏បញ្ជាក់ថា យានយន្តជាង ១០០ គ្រឿង និងតង់រាប់សិប បង្ហាញវត្តមាននៅទីតាំងនេះផងដែរ។
Maxar រាយការណ៍ថា ផ្កាយរណបថតបានមន្ទីរពេទ្យបណ្ដោះអាសន្នមួយ បង្ហាញខ្លួននៅទីតាំងបោះទ័ពរបស់អង្គភាពយោធាមួយរបស់ រុស្ស៊ី នៅតំបន់ភាគខាងលិច ជិតព្រំដែនជាមួយ អ៊ុយក្រែន។
រថភ្លើងដឹកសព្វាវុធធុនធ្ងន់ដូចជា រថក្រោះ និងកាំភ្លើងធំជាដើម ក៏បង្ហាញខ្លួននៅតំបន់ព្រំដែនភាគខាងលិចរបស់ រុស្ស៊ី ជាប់ជាមួយ អ៊ុយក្រែន និងតំបន់មួយចំនួនផ្សេងទៀត។
ព័ត៌មានខាងលើត្រូវបានលើកឡើងបន្ទាប់ពី ប្រធានាធិបតីប្រធានាធិបតីរុស្ស៊ី លោក វ្លាឌីមៀ ពូទីន កាលពីថ្ងៃទី ២១ កុម្ភៈ បានប្រកាសទទួលស្គាល់ឯករាជ្យរបស់តំបន់ Donetsk និង Luhansk នៅភាគខាងកើតរបស់ ប្រទេសអ៊ុយក្រែន និងបានចុះកិច្ចព្រមព្រៀងសហការគ្នាជាមួយមេដឹកនាំរបស់តំបន់ទាំងពីរនេះ។ កិច្ចព្រមព្រៀងនេះ អនុញ្ញាតឱ្យ រុស្ស៊ី មានសិទ្ធិកសាងមូលដ្ឋានទ័ពនៅ Donetsk និង Luhansk។ លោក ពូទីន ក៏បានបញ្ជាឱ្យក្រសួងការពារជាតិ បញ្ជូនទ័ពទៅតំបន់ទាំងនេះដើម្បី «រក្សាសន្តិភាព»។
នៅក្នុងកិច្ចប្រជុំបន្ទាន់របស់ ក្រុមប្រឹក្សាសន្តិសុខនៃ អង្គការសហប្រជាជាតិ កាលពីម្សិលមិញ សហរដ្ឋអាម៉េរិក និងបណ្ដាប្រទេសលោកខាងលិច បានថ្កោលទោសចំពោះសកម្មភាពរបស់ រុស្ស៊ី។ ចំណែក ទីក្រុងមូស្គូ វិញ ក៏បានចោទថា អ៊ុយក្រែន បំផ្លាញកិច្ចព្រមព្រៀង Minsk និងថា លោកខាងលិច រុញច្រាន អ៊ុយក្រែន ឱ្យធ្លាក់ទៅក្នុងទម្លោះប្រដាប់អាវុធ៕
February 23, 2022
បង្រៀនកូនឱ្យចេះ “តស៊ូ”
ពាក្យថា “តស៊ូ” នៅក្នុងអត្ថបទនេះ មិនមែនជាការវាយតប់ ឬធ្វើបាបគ្នាខាងរាងកាយ មិនមែនជាការកែបញ្ហាដោយប្រើកម្លាំងកាយនោះទេ តែជាការបង្រៀនឱ្យកូនដែលស្ថិតក្នុងវ័យមតេ្តយ្យ ចេះគិត ចេះកែបញ្ហា និងសម្របសម្រួលខ្លួនឱ្យរស់នៅក្នុងសង្គមបានយ៉ាងស័ក្តិសម។
“តស៊ូ” ដែលត្រឹមត្រូវ
ការតស៊ូក្នុងកុមារវ័យនេះ គឺការសម្តែងចេញដើម្បីរក្សាការពារសិទ្ធិរបស់ខ្លួនឯង តាំងពីសិទ្ធិលើរាងកាយ វត្ថុរបស់របរ រួមទៅដល់សិទ្ធិដែលមាននៅក្នុងសង្គមរបស់ខ្លួនឯង ដូចជាសិទ្ធិក្នុងការមិនត្រូវគេមកឈរកាត់មុខ ពេលតម្រង់ជួរធ្វើអ្វីមួយ គៃប្រវ័ញ្ចយកប្រៀប ខ្សែលើ មិនថាតែនៅក្នុងសង្គមសាលារៀន ឬសង្គមក្រៅផ្ទះនោះឡើយ។
“តស៊ូ” ខាងកាយ
គឺការចេះកែបញ្ហា ក្នុងករណីដែលកូនមានអារម្មណ៍ថា ខ្លួនឯងត្រូវបានល្មើសសិទ្ធិ ត្រូវបានរំលោភបំពាន ឬមានអារម្មណ៍ថាគ្មានសុវត្ថិភាព។
-គូជម្លោះជាមនុស្សធំ ឬក្មេងដែលធំជាង ៈ ចំពោះក្មេងតូច ឡារ៉ែនសូមណែនាំឱ្យអាណាព្យាបាលបង្រៀនកូនរឿងការសុំការជួយយកអាសាពីមនុស្សម្នាដែលនៅជុំវិញខ្លួន ដូចជា ឱ្យរត់ទៅរកមនុស្សចាស់ណាម្នាក់ ដែលមើលទៅគួរឱ្យទុកចិត្ត ស្រែកដើម្បីឱ្យមនុស្សចូលមកជួយ ជាដើម។
-គូជម្លោះជាក្មេងវ័យស្របាលគ្នា ៈ ទុកឱកាសឱ្យក្មេងចរចា កែបញ្ហាដោយខ្លួនឯងជាមុនសិន។ បង្រៀនឱ្យកូនប្រើពាក្យសម្តី និងជំនាញការចរចាតវ៉ា តែត្រូវមិនប្រើអំពើហិង្សាទាំងខាងរាងកាយ និងវាចាឡើយ។ បើចរចាហើយ មិនបានលទ្ធផល ឬមិត្តភ័ក្តិចាប់ផ្តើមប្រើអំពើហិង្សាតបមកវិញនោះ ចូរបង្រៀនឱ្យកូនចេះដើរចេញទៅសុំការជួយយកអាសាពីមនុស្សចាស់។
“តស៊ូ” ខាងផ្លូវចិត្ត
មានន័យពីផ្លូវចិត្តដែលរឹងប៉ឹង ព្យាយាមក្នុងអ្វីដែលខ្លួនតាំងចិត្តចង់ធ្វើ ទទួលស្គាល់លទ្ធផលរបស់ទង្វើរបស់ខ្លួនឯង ចេះចាត់ការជាមួយអារម្មណ៍ខកបំណង សោកស្តាយ ឬខឹងសម្បាបានយ៉ាងសមរម្យ។ ចេះសម្របសម្រួលខ្លួនជាមួយស្ថានការណ៍ និងមានភាពព្យាយាមកែខៃចំណុចខុសឆ្គងដែលកើតឡើង រួមទៅដល់ការចេះអភ័យទោសឱ្យខ្លួនឯង និងអ្នកដទៃទៀតផង។
OLYMPUS DIGITAL CAMERA
5ចំណុច ជួយឱ្យកូនក្លាយជាអ្នកតស៊ូ
ចំពោះក្មេងតូច រឿងដែលបានទទួលលទ្ធផលច្រើនជាងការអប់រំប្រៀនប្រដៅដោយវាចានោះ គឺការដែលឪពុកម្តាយមានទង្វើជាគំរូដ៏ល្អត្រឹមត្រូវ ឱ្យកូនបានឃើញជាប្រចាំជាប់ជានិច្ច និងជួយក្នុងការសាងឬសគល់ដើម្បីបង្រៀនឱ្យកូនចេះ “តស៊ូ”។
- សាងកូនឱ្យមានមោទនភាព និងជឿជាក់លើខ្លួនឯង ៈ បង្រៀនឱ្យកូនចេះមើលថែទាំខ្លួនឯងបានទៅតាមវ័យ ដូចជា ស្លៀកពាក់ ញ៉ាំបាយខ្លួនឯងបាន ជាមូលដ្ឋានគ្រឹះឱ្យកូនមានអារម្មណ៍ថា អាចធ្វើអ្វីផ្សេងៗបានដោយខ្លួនឯង បង្ហាត់ឱ្យមានភាពទទួលខុសត្រូវខ្លួនឯង។
- សាងទស្សនៈចំពោះខ្លួនឯងដែលស័ក្តិសម និងត្រឹមត្រូវ ៈ នឹងជួយឱ្យកូនស្គាល់ពីខ្លួនឯង ដឹងថាត្រូវ ត្រូវការអ្វី វាយតម្លៃសមត្ថភាពថា ធ្វើអ្វីបានប៉ុនណា? និងពេលណាដែលត្រូវសុំជំនួយពីអ្នកដទៃ?។
- សម្លឹងមើលជុំវិញខ្លួនក្នុងន័យវិជ្ជមាន តាមស្ថានភាពពិត ៈ ជួយឱ្យក្មេងមានអារម្មណ៍ថា ខ្លួនឯងស្ថិតក្នុងបរិស្ថានដែលមានសុវត្ថិភាព មានអ្នកមានចេតនាល្អច្រើនជាងមនុស្សមិនល្អ មានអ្នកចាំជួយយកអាសាគាំទ្រ ការពារ និងជួយលើកទឹកចិត្ត តែក៏ត្រូវឱ្យចេះប្រយ័ត្នប្រយែងផងដែរ ដោយឪពុកម្តាយអាចប្រតិបត្តិធ្វើជាគំរូ ឱ្យកូនបានឃើញ រៀនយល់ដឹង ដោយការមានទស្សនៈចំពោះរឿងផ្សេងៗ ជុំវិញខ្លួនដែលសម្បូរបែប ដូចជា ឃើញគេបើកឡានជ្រែពីមុខលឿនឆ្វេចឆ្វាច អាចនិយាយឱ្យកូនបានឮថា បើកឡានបែបនេះមានគ្រោះថ្នាក់ណាស់ មិនគួរឱ្យចូលចិត្តសោះ សង្ស័យគេប្រហែលជារឿងចាំបាច់ប្រញាប់ហើយទើបភ្លេចខ្លួនបើកឡានលឿនបែបនេះ…។
- ស្គាល់សិទ្ធិតួនាទី មិនល្មើសសិទ្ធិអ្នកដទៃ ៈ បង្រៀនឱ្យក្មេងបានដឹងថា ខ្លួនឯងមានសិទ្ធិក្នុងរឿងណា ដូចជាសិទ្ធិលើរាងកាយរបស់ខ្លួនឯង អ្នកដទៃក្រៅពីឪពុកម្តាយគ្មានសិទ្ធិមកប៉ះពាល់រាងកាយរបស់ខ្ញុំក្នុងលក្ខណៈមិនសមរម្យ ខណៈពេលជាមួយគ្នា ខ្ញុំក៏ត្រូវស្គាល់ពីតួនាទីដែលត្រូវទទួលខុសត្រូវមើលថែទាំរាងកាយរបស់ខ្លួនឱ្យស្អាតបាត និងមានសុខភាពល្អផងដែរ។
- ឱ្យមានចិត្តចេះជួយយកអាសា ៈ បង្រៀនឱ្យកូនយល់ដឹងថា ការជួយកអាសាអ្នកដទៃដោយមិនសង្ឃឹមសំណងមកវិញនោះ ធ្វើឱ្យកើតអារម្មណ៍ល្អចំពោះខ្លួនឯង និងមានអារម្មណ៍ថា ខ្លួនឯងមានប្រយោជន៍ មានតម្លៃ បើមានអ្នកណាត្រូវការជំនួយ ហើយយើងអាចជួយបានដោយខ្លួនឯងមិនមានបញ្ហានោះ ក៏គួរតែជួយ។
ការបង្រៀនបែបនេះនឹងជួយឱ្យកូនបានសម្តែងនូវចេតនាល្អ និងរៀនយល់ដឹងពីការគោរពសិទ្ធិរបស់អ្នកដទៃផងដែរ៕
December 10, 2020
កូនៗឈ្លោះគ្នា ឪពុកម្ដាយត្រូវធ្វើម៉េច?
“ម៉ាក់អ៊ើយ អាបងចូលមកក្នុងបន្ទប់កូនទៀតហើយ!”
“ម៉ាក់!! អាអូនមិនព្រមឱ្យកូនលេងរបស់លេងដែរទេ”
“ឱ្យប្អូនលេងសិនទៅ”
“អត់ទេ! កូនលេងមុន!”
“ដណ្ដើមហ្អេ៎? នេះនែ!!(ផាច់ៗ…វាយគ្នា)”
ស្ថានការណ៍បែបហ្នឹង ធ្លាប់ជួបទេ? បើសិនជាផ្ទះរបស់អ្នកមានអាល្អិតយ៉ាងតិច 2នាក់រស់នៅក្រោមដំបូលតែមួយ ប្រាកដណាស់ថា ហេតុការណ៍ស្រដៀងៗដែលអ្នកគ្រូ ឆវី លើកជាឧទាហរណ៍ខាងលើនេះ ប្រហែលជាធ្លាប់កើតឡើងចំពោះអ្នកខ្លះមិនខាន។ ការឈ្លោះទាស់ទែងគ្នារវាងបង-ប្អូន គឺជារឿងប្រក្រតីដែលកើតឡើងគ្រប់ផ្ទះ ហើយបើសិនជាលោកឪពុកអ្នកម្ដាយចេះទប់ទល់យ៉ាងត្រូវវិធី វានឹងជួយកាត់បន្ថយបញ្ហាដែលអាចនឹងកើតឡើងក្នុងរយៈពេលវែងបាន។ ខាងក្រោមនេះគឺ វិធី និងគន្លឹះល្អៗដើម្បីឱ្យឪពុកម្ដាយអាចដោះស្រាយបញ្ហាកូនៗឈ្លោះគ្នាបានយ៉ាងត្រឹមត្រូវ និងល្អប្រសើរ…។
- បំបែកជើងខ្លាំងទាំងពីរចេញពីគ្នា ទុករហូតទាល់តែស្ងប់អារម្មណ៍ ៈ ក្នុងករណីខ្លះអាចត្រឹមតែឱ្យកូនទាំងពីរឈប់និយាយ និងឈប់ធ្វើអ្វីគ្រប់យ៉ាងសិន មុននឹងលោកអ្នកចូលទៅកែបញ្ហាជម្លោះទាស់ទែងនោះ តែបើលោកអ្នកត្រូវការឱ្យរឿងហ្នឹងក្លាយជាបទពិសោធដែលកូនៗនឹងបានរៀនយល់ដឹង គួរតែរង់ចាំរហូតទាល់តែអារម្មណ៍របស់ពួកគេស្ងប់ទៅវិញសិន សឹមអប់រំពួកគេ។
- កុំដាក់សម្ពាធ ឬព្យាយាមរកអ្នកខុស ៈ នៅពេលកូនទាំង 2នាក់ឈ្លោះគ្នា រឿងដែលកើតឡើងក្មេងទាំងពីរត្រូវតែទទួលខុសត្រូវរួមគ្នា។
- ព្យាយាមសាងស្ថានការណ៍ដែលគ្រប់គ្នាទទួលបានប្រយោជន៍ ៈ ដូចជាហៅថា ស្ថានការណ៍ឈ្នះ-ឈ្នះ(win-win situation)ដើម្បីឱ្យគ្រប់គ្នាបានរៀនយល់ដឹងពីអ្វីម្យ៉ាង ដូចជា នៅពេលដែលកូន 2នាក់ត្រូវការលេងរបស់លេងតែមួយដូចគ្នា អ្នកអាចនឹងប្ដូរទៅជាឱ្យកូនៗបានលេងហ្គេមណាដែលអាចលេងដំណាលគ្នាបានទាំងពីរនាក់ជំនួសវិញ ជាដើម។
កែសម្រួលនិស្ស័យ បង-ប្អូនត្រូវតែមិនឈ្លោះគ្នា
តទៅនេះ គឺជារឿងងាយៗដែលលោកអ្នកអាចធ្វើបាននៅក្នុងជីវិតប្រចាំថ្ងៃ ដើម្បីកាត់បន្ថយជម្លោះរវាងបង-ប្អូន។
- ដាក់ច្បាប់ ជាពិសេសក្នុងរឿងទង្វើ ៈ ប្រាប់កូនៗថា ក្មេងៗមិនគួរនិយាយពាក្យអាក្រក់ស្ដាប់ ស្រែកគំហកដាក់មុខគ្នា ឬធ្វើមុខមាំកាចដាក់គ្នាទេ និងអធិប្បាយឱ្យស្ដាប់ថា នឹងមានអ្វីកើតឡើងបើសិនជាកូនល្មើសច្បាប់ដោយការបញ្ចេញទង្វើដែលមិនគួរឱ្យប្រាថ្នាផ្សេងៗចេញមក ដើម្បីឱ្យក្មេងៗបានដឹងថា គេត្រូវតែទទួលខុសត្រូវចំពោះទង្វើរបស់គេ។
- កុំបណ្ដោយឱ្យកូនៗធ្វើឱ្យអ្នកគិតថា អ្នកត្រូវតែបង្ហាញពីភាពយុត្តិធម៌គ្រប់ពេលឱ្យសោះ ព្រោះក្នុងករណីខ្លះ អាល្អិតម្នាក់ក៏នឹងចាំបាច់ត្រូវទទួលខុសត្រូវលើទង្វើរបស់ខ្លួនច្រើនជាងអាល្អិតម្នាក់ទៀតដែរ។
- ផ្ដល់នូវការចាប់អារម្មណ៍ចំពោះកូនៗយ៉ាងស្មើភាពគ្នាជាប់ជានិច្ច ជាពិសេសក្រោយការឈ្លោះទាស់ទែងគ្នា។ បើកូនបងចង់ចេញទៅដើរលេង ក៏គួរតែនាំគេទៅ តែពេលត្រឡប់មកវិញ បើកូនប្អូនត្រូវការឱ្យអ្នកនិយាយរឿងនិទានឱ្យស្ដាប់ អ្នកក៏ត្រូវតែធ្វើដែរ។
- ប្រាកដក្នុងចិត្តថា កូនម្នាក់ៗមានទីកន្លែងផ្ទាល់ខ្លួន និងមានពេលវេលាផ្ទាល់ខ្លួនដែលគេអាចនឹងបានលេងដូចដែលគេត្រូវការដោយមិនចាំបាច់មានបង ឬប្អូនតាមជាប់ទៅជាមួយផង។
- សម្ដែងឱ្យកូនឃើញ និងអធិប្បាយឱ្យកូនយល់ថា សម្រាប់រូបអ្នក សេចក្ដីស្រឡាញ់ជារឿងដែលត្រូវមានព្រំដែន។
- ធ្វើឱ្យកូនដឹងថា ពួកគេមានភាពសំខាន់ និងនឹងបានទទួលការមើលថែទាំឱ្យមានសុវត្ថិភាព រួមទាំងតម្រូវការទាំងឡាយដែលស្ថិតលើហេតុផលរបស់កូនដែលនឹងបានទទួលការតបស្នង។
- ធ្វើកិច្ចការងាររួមគ្នាទាំងគ្រួសារ ព្រោះវានឹងជួយកាត់បន្ថយភាពតានតឹងរវាងបងប្អូនដែលឈ្លោះគ្នាបាន ព្រោះក្នុងកិច្ចការងារទាំងនោះ គ្រប់គ្នានឹងបានទទួលការយកចិត្តទុកដាក់យ៉ាងស្មើៗគ្នា។
- បើកូនឈ្លោះគ្នាដដែលៗ ក្នុងរឿងដដែលៗ ដូចជាដណ្ដើមគ្នាប្រើកុំព្យូទ័រ ជាដើម អាណាព្យាបាលគួរតែធ្វើតារាងកាលវិភាគការប្រើការរឿងអ្វីមួយនោះសម្រាប់កូនម្នាក់ៗ តែបើនៅតែឈ្លោះគ្នាទៀត ពួកគេទាំងពីរនឹងលែងទទួលបានឱកាសនោះទៀត។
- បើកូនៗនៅតែឈ្លោះគ្នាញឹកញាប់ លោកអ្នកគួរណាត់ថ្ងៃនិយាយគ្នាក្នុងក្រុមគ្រួសារ ដើម្បីរំឭកអំពីច្បាប់ដែលប្រើក្នុងគ្រួសារ និងរំឭកឡើងវិញនូវភាពជោគជ័យក្នុងការកែបញ្ហាឈ្លោះទាស់ទែងដែលទាំងអស់គ្នាអាចធ្វើបានកាលពីពេលកន្លងៗមក។ លោកអ្នកអាចសាកល្បងប្រើវិធីឱ្យរង្វាន់នៅពេលកូនអាចលេង ឬធ្វើការអ្វីមួយរួមគ្នាបានដោយមិនមានជម្លោះ ដូចជាបើកូនមិនមានឈ្លោះគ្នាសោះក្នុងមួយថ្ងៃ កូនៗនឹងបានជ្រើសទិញនំដែលខ្លួនឯងចូលចិត្តញ៉ាំ ឬមិនមានឈ្លោះគ្នាមួយសប្ដាហ៍ ប៉ាម៉ាក់នឹងនាំទៅដើរលេង ជាដើម។
- កុំភ្លេចថា ក្មេងៗម្នាក់ៗត្រូវការពេលវេលានៅឆ្ងាយពីបងប្អូន និងក្រុមគ្រួសារខ្លះដែរ ដូច្នេះលោកអ្នកអាចនឹងរៀបចំឱ្យកូនៗបានទៅលេងផ្ទះមិត្តភក្តិជិតដិត ឬឱ្យកូនម្នាក់ៗទៅដើរលេងតែម្នាក់ឯងជាមួយអ្នកក៏បាន។
*** ខណៈដែលកូនៗរៀនយល់ដឹងក្នុងការចេះរម្ងាប់អារម្មណ៍ គេក៏ថែមទាំងបានរៀនយល់ដឹងពីជំនាញសំខាន់ដែលនឹងប្រើប្រាស់ក្នុងការរស់នៅ ដូចជារឿងការទទួលយកគំនិតយោបល់របស់អ្នកដទៃ ការសម្រុះសម្រួល ការតវ៉ា និងការគ្រប់គ្រងទង្វើច្រងេងច្រងាងរបស់ខ្លួនឯង ជាដើម។
ប៉ាម៉ាក់មិននៅ កូនៗមិនឈ្លោះគ្នា
កុំភ្លេចណា៎ថា ការដែលអាល្អិតៗរបស់លោកអ្នកឈ្លោះគ្នា ពេលខ្លះក៏ដើម្បីទាមទារការចាប់អារម្មណ៍អំពីលោកឪពុកអ្នកម្ដាយដែរ ដូច្នេះ នៅពេលដែលវាអ៊ីចឹង លោកអ្នកក៏គួរតែរកមើលពេលវេលាទំនេរខ្លះដើម្បីឱ្យខ្លួនឯងបានធ្វើអ្វីម្យ៉ាងដែលជាការងារផ្ទាល់ខ្លួនដោយគ្មានកូនៗនៅក្បែរខ្លះផង ព្រោះ…ជឿអ្នកគ្រូ ឆវី ចុះថា នៅពេលដែលលោកអ្នកមិននៅ កូនៗនឹងរស់នៅជាមួយគ្នាបានយ៉ាងល្អប្រសើរ៕
October 14, 2020
នេប៉ាល់ខឹងនឹងចិន ស្ទើរ “ដាច់ក្បាល ដាច់កន្ទុយ” ព្រោះតែរឿងកំពូលភ្នំអេវ៉ឺរ៉េស
សំណេរនៅលើ Twitter របស់បណ្ដាញទូរទស្សន៍សកលចិន CGTN(China Global Television Network) កាលពីសប្ដាហ៍កន្លងទៅបានប្រកាសថា កំពូលភ្នំអេវ៉ឺរ៉េស (Everest) ទាំងមូលគឺជារបស់ខ្លួន បណ្ដាលឱ្យប្រទេសនេប៉ាល់ “ខឹងដាច់ក្បាលដាច់កន្ទុយ”។
អ្នកប្រើប្រាស់បណ្ដាញសង្គម Twitter នៅប្រទេសនេប៉ាល់ កំពុងតែខឹងយ៉ាងខ្លាំង និងបានបង្កើតនិន្នាការ #backoffchina (ចិនចេញឱ្យឆ្ងាយ) នៅលើបណ្ដាញសង្គម ព្រោះយល់ថា CGTN បានរំលោភយកកំពូលភ្នំអេវ៉ឺរ៉េសទាំងមូលទុកជាកម្មសិទ្ធិរបស់ខ្លួន។ ពលរដ្ឋនេប៉ាល់ជាច្រើនបានស្នើឱ្យឯកអគ្គរដ្ឋទូតចិនប្រចាំនៅនេប៉ាល់ បកស្រាយឱ្យបានច្បាស់អំពីសាររបស់ CGTN។
ប្រតិកម្មខាងលើនេះ គឺទាក់ទិននឹងសារដែលត្រូវបានបង្ហោះនៅលើ Twitter ដោយបណ្ដាញទូរទស្សន៍ CGTN កាលពីសប្ដាហ៍មុន។ កាលពីថ្ងៃទី2ឧសភា ទូរទស្សន៍ CGTN របស់ចិន បានបង្ហោះរូបភាពមួយសន្លឹក ជាមួយនឹងសារមួយឃ្លានៅលើ Twittere ដោយសរសេរថា “ក្នុងរូបថត៖ រស្មីដ៏ស្រស់ស្អាតខុសពីធម្មតា ត្រូវបានថតកាលពីថ្ងៃសុក្រនៅលើកំពូលភ្នំ Qomolangma ដែលត្រូវគេស្គាល់ឈ្មោះមួយទៀត នោះគឺអេវឺរ៉េស ជាកំពូលភ្នំខ្ពស់បំផុតក្នុងពិភពលោក ដែលស្ថិតក្នុងតំបន់ស្វយ័តទីបេត៍របស់ប្រទេសចិន”។
អ្នកប្រើប្រាស់ Twitter ម្នាក់សរសេរថា “ឯកអគ្គរដ្ឋទូតចិនប្រចាំនេប៉ាល់ជាទីរាប់អាន តើលោកយល់ថា ប្រការនេះ វាយុត្តិធម៌ដែរ ឬទេ? យើងខ្ញុំចង់ធ្វើឱ្យបញ្ហានេះបានច្បាស់លាស់។ #BackoffChina”។ ចំណែកអតីតនិពន្ធនាយករបស់សារព័ត៌មាន Kathmandu Post របស់ Nepal មានប្រតិកម្មថា “ជាការពិតនោះគឺថា យើងខ្ញុំត្រូវបានបង្រៀនថា ជួរភ្នំអេវឺរ៉េស គឺស្ថិតក្នុងដែនដីរបស់នេប៉ាល់”។
ជម្លោះដណ្ដើមទឹកដីរវាងនេប៉ាល់ និងចិន ទាក់ទងនឹងកំពូលភ្នំអេវឺវ៉េស បានចាប់ផ្ដើមកើតមានពីទសវត្សរ៍ឆ្នាំ1960។ នេប៉ាល់បានប្រកាសថា ជាកម្មសិទ្ធិរបស់ខ្លួនកាលពីពេលនាយករដ្ឋមន្ត្រី Bishweshwar Prasad Koirala កំពុងធ្វើទស្សនកិច្ចនៅប្រទេសចិន។
ឯកសារមួយដែលត្រូវបានចេញផ្សាយដោយប្រទេសចិនកាលពីឆ្នាំ1998 បានបង្ហាញថា ទីក្រុងប៉េកាំងធ្លាប់បានស្នើឱ្យបែងចែកកំពូលភ្នំនេះជា2ចំណែក ប៉ុន្តែការដណ្ដើមគ្នានៅតែមិនទាន់បានបញ្ចប់។ មហាក្សត្រ Mahendra របស់ប្រទេសនេប៉ាក់ កាលពីឆ្នាំ1961បានប្រកាសថា កំពូលភ្នំអេវឺរ៉េសទាំងមូលគឺជារបស់ប្រទេសនេះ។
អេវឺរ៉េស ដែលជាកំពូលភ្នំខ្ពស់បំផុតក្នុងពិភពលោក ដោយមានកម្ពស់ដល់ទៅ8,848ម៉ែត្រ គឺជាប្រភពចំណូលចម្បងបំផុតរបស់ប្រទេសនេប៉ាល់។ មនុស្ស2នាក់ដែលបានឈានជើងឡើងដល់កំពូលភ្នំអេវឺរ៉េសដំបូងគេក្នុងពិភពលោក គឺ Edmund Hillary ជាជនជាតិអាមេរិកាំង និង Tenzing Norgay Sherpa ជាពលរដ្ឋនេប៉ាល់។ ផ្លូវឡើងទៅកាន់កំពូលភ្នំនេះ មានចំនួន2 ប៉ុន្តែ ផ្លូវដែលត្រូវបានគ្រប់គ្រងដោយប្រទេសនេប៉ាល់ គឺជាផ្លូវសំខាន់បំផុតដែលនាំទៅកាន់កំពូលភ្នំនេះ។
សូមបញ្ជាក់ថា CGTN គឺជាបណ្ដាញទូរទស្សអន្តរជាតិរបស់ទូរទស្សន៍ជាតិចិន ដែលគេស្គាល់ថា CCTV៕
ប្រភព៖ សារព័ត៌មានបរទេស
ព័ត៌មានទាក់ទង>អ្នកវិទ្យាសាស្ត្រចិនវាស់វែងកម្ពស់នៃកំពូលភ្នំអេវឺរ៉េសឡើងវិញ
May 11, 2020
ដឹងអត់?? តារាថៃណាខ្លះដែលមានជម្លោះជាមួយអ្នកសារព័ត៌មាន
1.Ekky Ekkachai
Ekky Ekkachai ជាតារាសម្ដែង និងពិធីករភេទទី3 ហើយតារារូបនេះមានជម្លោះជាមួយអ្នកសារព័ត៌មាន TV Pool បន្ទាប់ពីលោកមានការរិះគន់ និងត្រូវបានទិតៀនពីពិធីការិនីល្បីឈ្មោះម្នាក់នៃគេហទំព័រ Maya Channel។
2.Katreeya English
តារាស្រីរូបនេះ ធ្លាប់បានបង្ហោះ និងអះអាងពីការរិះគន់សារព័ត៌មានមួយដែលធ្លាប់បានប្រើពាក្យសម្ដីមិនល្អ និងចេញផ្សាយរូបអាក្រក់របស់នាងកាលពីពេលកន្លងទៅ ព្រមទាំងសរសេរចំណងជើងអាក្រក់ៗអំពីនាង ដើម្បីទាក់ទាញចំណាប់អារម្មណ៍អ្នកអានទៀតផង។
3.May pitchanart
នាង May pitchanart ធ្លាប់មានជម្លោះជាមួយបណ្ដាអ្នកសារព័ត៌មានដែលបានសរសេរអាក្រក់ៗពីនាង និងអំពីទំនាក់ទំនងជាមួយមិត្តប្រុសរបស់នាងទៀតផង និងថែមទាំងមិនបានសុំទោសនាងទៀត ទើបបង្កជាជម្លោះនឹងគ្នាឡើងតែម្ដង។
4.Pok Patsonkorn
តារាសម្ដែងប្រុសរូបនេះ ធ្លាប់បានបង្ហោះនៅលើបណ្ដាញទំនាក់ទំនងអ៊ីនស្តាក្រាមផ្ទាល់ខ្លួនអំពីការឈ្លោះជាមួយអ្នកសារព័ត៌មាន ដោយសារតែការសរសេរអាក្រក់ៗអំពីលោក ជាមួយនឹងតារាសម្ដែង Margie Rasri។ សារព័ត៌មាននោះបានចេញផ្សាយថា តារាសម្ដែង Pok Patsonkorn និង Margie Rasri ចូលចិត្តបើកបរលឿន និងមិនគោរពពេលវេលាការងារ។
5.Boon Panadda
តារាសម្ដែងស្រីរូបនេះ មិនសូវមានព័ត៌មានថ្មីៗចេញមកទៀតទេ ព្រោះថា នាងតែងតែបញ្ចេញប្រតិកម្មជាមួយសារព័ត៌មានណាដែលសរសេរជ្រុងមិនល្អអំពីនាង ព្រមទាំងបង្ហោះនៅលើអ៊ីនស្ដាក្រាមដៀលត្មះអ្នកសារព័ត៌មានទៀតផង។
6.PLoy Chermarn
ជាម្ដងម្កាល តារាស្រី PLoy Chermarn ធ្លាប់មានការមិនពេញចិត្ត និងរិះគន់អ្នកសារព័ត៌មាន តែមិនសូវចេញមុខខ្លាំង និងចំៗឡើយ នាងបានត្រឹមតែនិយាយបញ្ឆិតបញ្ឆៀង ហើយជាពិសេសនាងតែងតែនិយាយ និងមានសំណូមពរនានានៅចំពោះមុខសារព័ត៌មានផ្ទាល់ៗ ខណៈដែលនាងកំពុងតែសម្ភាសតែម្ដង ជាប្រការមួយក្នុងការការពារខ្លួន ខ្លាចអ្នកសារព័ត៌មានសរសេរចំណងជើង និងនិយាយអាក្រក់ៗពីនាង៕

July 25, 2017