Tag: ទឹក

កប៉ាល់ទេសចរណ៍ខ្នាតយក្សផលិតក្នុងស្រុកដំបូងរបស់ចិន ចាប់ផ្ដើមដំណើរការ
កប៉ាល់ទេសចរណ៍ខ្នាតយក្ស ប្រវែង 323.6 ម៉ែត្រ ដែលត្រូវបានប្រដូចទៅនឹងទីក្រុងអណ្ដែតចល័ត បានចាប់ផ្ដើមធ្វើដំណើរជើងដំបូងនៅលើសមុទ្រ ដែលនឹងចំណាយពេល 9 ថ្ងៃ។
កប៉ាល់ទេសចរណ៍ខ្នាតយក្សដំបូងដែលផលិតដោយវិស្វករក្នុងស្រុករបស់ប្រទេសចិន បានចាកចេញពីកំពង់ផែនៅសៀងហៃកាលពីថ្ងៃទី 17 កក្កដា ដើម្បីចាប់ផ្ដើមដំណើរការសាកល្បង។ កប៉ាល់ដែលមានឈ្មោះថា Adora Magic City (H1508) នេះ នឹងបរលើផ្ទៃសមុទ្រចំនួន 9 ថ្ងៃ។ នេះបើតាមទំព័រ CGTN ដកស្រង់ព័ត៌មានពីក្រុមហ៊ុនផលិតកប៉ាល់សៀងហៃ Waigaoqiao។
ដោយមានបណ្ដោយ 323.6 ម៉ែត្រ ទទឹង 37.2 ម៉ែត្រ និងទម្ងន់ 135,500 តោន កប៉ាល់ Adora Magic City អាចដាក់មនុស្សបានជាង 6,500 នាក់ នៅក្នុងកាប៊ីនចំនួន 2,826។ កប៉ាល់នេះត្រូវបានគេប្រដូចទៅនឹងទីក្រុងអណ្ដែតលើសមុទ្រ ព្រោះតែមានកន្លែងកម្សាន្តជាច្រើន។ Adora Magic City មានសាលមហោចស្រព ភោជនីយដ្ឋាន មជ្ឈមណ្ឌលពាណិជ្ជកម្ម សួនទឹក និងច្រករបៀងសិល្បៈ។ល។
ជោគជ័យក្នុងការសាងសង់កប៉ាល់ Adora Magic City នេះ បានជួយឱ្យចិនក្លាយជាប្រទេសទីប្រាំលើពិភពលោក ដែលមានសមត្ថភាពស្ថាបនាកប៉ាល់ទេសចរណ៍ខ្នាតយក្ស បន្ទាប់ពីប្រទេសអាល្លឺម៉ង់ បារាំង អ៊ីតាលី និងហ្វាំងឡង់៕
July 20, 2023
អាយុ 99 ឆ្នាំ តែសុខភាពមាំមួនដូចអាយុ 40 ដោយសារតែខ្ញី
(ប្រទេសចិន) – ដោយសារតែទម្លាប់ទទួលទានខ្ញីត្រាំទឹកខ្មេះបីចំណិតជារៀងរាល់ថ្ងៃ វេជ្ជបណ្ឌិត Lu Zhizheng មានសុខភាពមាំមួនដូចទៅនឹងបុរសវ័យកណ្ដាល បើទោះគាត់មានអាយុ 99 ឆ្នាំហើយក៏ដោយ។
ក្នុងវ័យជិត 100 ទៅហើយ ប៉ុន្តែវេជ្ជបណ្ឌិតផ្នែកឱសថបុរាណ Lu Zhizheng នៅមានរាងកាយមាំមួន សុខភាពល្អ ការចងចាំល្អជាងមនុស្សចាប់ពីវ័យ 60 ទៅ 70 ឆ្នាំទៅទៀត។ នៅពេលត្រូវបានសួរអំពីអាថ៌កំបាំងដែលបានជួយឱ្យគាត់មានសុខភាពល្អបែបនេះ វេជ្ជបណ្ឌិត Lu ប្រាប់ថា ដោយសារតែគ្រឿងទេសពីរប្រភេទដែលមានតម្លៃទាប និងតែងត្រូវបានប្រើប្រាស់ក្នុងគ្រួសារ នោះគឺខ្ញី និងទឹកខ្មេះ។
វេជ្ជបណ្ឌិត Lu ឱ្យដឹងថា ក្នុងរយៈពេលប្រហែលពី 20 ទៅ 30 ឆ្នាំកន្លង គាត់តែងតែបរិភោគខ្ញីត្រាំទឹកខ្មេះចំនួនបីចំណិតជារៀងរាល់ព្រឹក។ គាត់ប្រាប់ថា វិធីនេះជួយកាត់បន្ថយអាការទល់ខ្យល់ ពិបាករំលាយអាហារចំពោះមនុស្សដែលមានការងារមមាញឹក និងមានរបបអាហារមិនត្រឹមត្រូវ។ ក្រៅពីនេះ ខ្ញីក៏ជួយកម្ដៅក្រពះ និងកាត់បន្ថយបញ្ហាផ្ដាសាយផងដែរ។
ដើម្បីបញ្ជាក់អំពីប្រសិទ្ធភាពរបស់ខ្ញីត្រាំទឹកខ្មេះ លោក Lu ក៏បានប្រកាសបង្ហាញលទ្ធផលនៃការពិនិត្យសុខភាពជាទៀតទាត់របស់គាត់។ លទ្ធផលបង្ហាញថា សរសៃឈាមរបស់គាត់ល្អ ប្រហាក់ប្រហែលនឹងមនុស្សវ័យកណ្ដាល។ រាងកាយអាយុ 90 ឆ្នាំ ប៉ុន្តែបេះដូងនៅក្នុងវ័យ 40 ឆ្នាំ។
វិធីធ្វើខ្ញីត្រាំទឹកខ្មេះរបស់វេជ្ជបណ្ឌិត Lu មានដូចតទៅ៖ យកខ្ញីខ្ចី លាងឱ្យស្អាត ទុកឱ្យស្ងួត ចិតជាចំណិត រួចរោយអំបិលបន្តិច ហើយផ្អាប់ទុក 12 ម៉ោង។ បន្ទាប់មក យកចំណិតខ្ញីទាំងនេះទៅក្នុងក្រឡ ចាក់ទឹកខ្មេះពីលើបន្តិច រួចគ្របឱ្យជិត ទុកពី 4 ទៅ 5 ថ្ងៃ មុនពេលបរិភោគ។ គាត់ថា ល្អបំផុតគឺប្រើប្រាស់ទឹកខ្មេះធ្វើពីអង្ករ និងលាយជាមួយទឹក នៅក្នុងការត្រាំខ្ញីនេះ។
ការទទួលទានខ្ញីត្រាំទឹកខ្មេះ ឬហៅថាខ្ញីជ្រក់ទឹកខ្មេះ ក៏ជួយកាត់បន្ថយជាតិខ្លាញ់ក្នុងឈាម ជួយព្យាបាលជំងឺលើសខ្លាញ់អាក្រក់ទៀតផង៕
July 19, 2023
អាហ្វ្រិកខាងត្បូងថា «ចាប់លោក ពូទីន គឺស្មើនឹងប្រកាសសង្គ្រាមនឹងរុស្ស៊ី»
ប្រធានាធិបតី Ramaphosa និយាយថា អាហ្វ្រិកខាងត្បូងចាប់ខ្លួនលោក ពូទីន នឹងមានន័យថា ប្រកាសសង្គ្រាមជាមួយនឹងប្រទេសរុស្ស៊ី បន្ទាប់ពីបក្សប្រឆាំងចង់ឱ្យ រដ្ឋធានីព្រីតូរីយ៉ា អនុវត្តបទបញ្ជាតាមចាប់ខ្លួនរបស់តុលាការ ICC។
«រុស្ស៊ីបានប្រកាសហើយថា ការចាប់ខ្លួនប្រធានាធិបតី វ្ល៉ាឌីមៀ ពូទីន គឺស្មើនឹងការប្រកាសសង្គ្រាម» ប្រធានាធិបតីអាហ្វ្រិកខាងត្បូង Cyril Ramaphosa សរសេរលិខិតផ្ញើទៅកាន់តុលាការកំពូល Gauteng ដែលមានយុត្តាធិការលើ ព្រីតូរីយ៉ា ដូច្នេះ។
ការលើកឡើងរបស់ប្រធានាធិបតីអាហ្វ្រិកខាងត្បូងខាងលើ ត្រូវបានធ្វើឡើងបន្ទាប់ពីសម្ព័ន្ធភាពប្រជាធិបតេយ្យ (DA) របស់ក្រុមប្រឆាំង ចង់ឱ្យរដ្ឋធានីព្រីតូរីយ៉ា គោរពតាមបទបញ្ជាតាមចាប់ខ្លួនប្រធានាធិបតី ពូទីន ពីតុលាការព្រហ្មទណ្ឌអន្តរជាតិ (ICC)។ លោក Ramaphosa ពន្យល់ថា ការបង្កសង្គ្រាមជាមួយនឹងរុស្ស៊ី គឺមិនសមស្របនឹងរដ្ឋធម្មនុញ្ញរបស់អាហ្វ្រិកខាងត្បូង ហើយផ្ទុយពីការទទួលខុសត្រូវក្នុងការការពារជាតិរបស់រដ្ឋាភិបាល។
ឆ្លើយតបនឹងប្រធានាធិបតិ Ramaphosa មេដឹកនាំរបស់ DA លោក John Steenhuisen យល់ថា ការបកស្រាយរបស់លោក Ramaphosa គឺគួរឱ្យអស់សំណើច និងរាក់កំភែល ហើយថា «…ប្រការសំខាន់គឺត្រូវរក្សាកាតព្វកិច្ចអន្តរជាតិប្រកបដោយតម្លាភាព»។
អាហ្វ្រិកខាងត្បូង កំពុងតែមានការរារែក ចាប់តាំងពី ICC ចេញបទបញ្ជាតាមចាប់ខ្លួនប្រធានាធិបតី ពូទីន កាលពីខែមីនា ក្រោមបទចោទថា «បានផ្លាស់ទីកុមារអ៊ុយក្រែនដោយខុសច្បាប់»។ យោងតាមគោលការណ៍របស់តុលាការ ICC សមាជិកចំនួន 123 ប្រទេសរបស់តុលាការនេះ ក្នុងនោះមានអាហ្វ្រិកខាងត្បូង មានកាតព្វកិច្ចចាប់ខ្លួនមេដឹកនាំរុស្ស៊ី និងបញ្ជូនទៅកាន់ហូឡង់ ដើម្បីកាត់ទោស បើសិនជាលោក ពូទីន ឈានជើងចូលដល់ទឹកដីរបស់ពួកគេ។
ចំណែកភាគីខាងរុស្ស៊ីវិញ និយាយថា បទបញ្ជាតាមចាប់ខ្លួនរបស់ ICC គឺជារឿងគ្មានន័យ។ រុស្ស៊ីធ្លាប់បានចូលរួមជាសមាជិករបស់ ICC ប៉ុន្តែបានដកខ្លួន និងលែងទទួលស្គាល់ស្ថាប័ននេះ។
អាហ្វ្រិកខាងត្បូងកំពុងតែធ្វើជាប្រធាន BRICS ដែលជាក្រុមប្រទេសមានសេដ្ឋកិច្ចទើបតែលេចធ្លោ ដោយមានសមាជិកចំនួនប្រាំប្រទេស រួមមានទាំង ចិន រុស្ស៊ី ឥណ្ឌា និងប្រេស៊ីល។ អាហ្វ្រិកខាងត្បូងគ្រោងនឹងប្រារព្ធកិច្ចប្រជុំកំពូល BRICS លើកទី 15 ចាប់ពីថ្ងៃទី 22 ដល់ 24 សីហាខាងមុខ។
ដើម្បីដោះស្រាយបញ្ហាទាក់ទិននឹងតុលាការ ICC អាហ្វ្រិកខាងត្បូងបានស្នើឱ្យរុស្ស៊ី អនុញ្ញាតឱ្យរដ្ឋមន្ត្រីការបរទេស Sergei Lavrov មកចូលរួមកិច្ចប្រជុំជំនួសលោក ពូទីន ប៉ុន្តែ ទីក្រុងមូស្គូ បានបដិសេធសំណើនេះ៕
July 19, 2023
ទួរប៊ីនខ្យល់កម្លាំង 15 MW នៅលើសមុទ្រ ផ្លាស់ទីទៅរកខ្យល់ដោយស្វ័យប្រវត្ត
ទួរប៊ីនខ្យល់របស់ X1 Wind មានទម្រដែលមានរូបរាងដូចសជី ឬពីរ៉ាមីត តូចលើធំក្រោម អមនឹងប្រព័ន្ធពោងអណ្ដែតលើទឹក អនុញ្ញាតឱ្យវាផ្លាស់ទីទៅកាន់កន្លែងមានខ្យល់បក់ ដូច្នេះវាអាចផលិតអគ្គិសនីស្ទើរតែមិនឈប់ឈរ។
ទម្រទួរប៊ីនខ្យល់ X1 Wind បំពាក់បច្ចេកវិទ្យា PivotBuoy ដែលក្នុងនោះ គ្រឹះរបស់វាតភ្ជាប់ជាមួយនឹងទីតាំងមួយដែលអនុញ្ញាតឱ្យទម្រផ្លាស់ទីទៅតាមទិសរបស់ខ្យល់។ ប្រព័ន្ធនេះដំណើរការបានល្អបំផុតនៅពេលវាបែរខ្នងដាក់ខ្យល់ដែលបក់មកពីខាងក្រោយ។ ប្រភេទទួរប៊ីនខ្យល់នេះជួយឱ្យវាមិនប្រឈមនឹងការប៉ះទង្គិចរវាងស្លាបកង្ហារ និងដងខ្លួន ព្រមទាំងកាត់បន្ថយការចំណាយក្នុងការផលិត និងដំឡើង ក៏ដូចជាមានប្រសិទ្ធភាពខ្ពស់ក្នុងការផលិតអគ្គិសនី។
កំណែដំបូងរបស់ X1 Wind មានឈ្មោះថា X30 ដែលត្រូវបានដាក់ពង្រាយ និងធ្វើតេស្តនៅប្រជុំកោះ Canary ប្រទេសអេស្ប៉ាញ។ គម្រោងខាងលើបានចាប់ផ្ដើមតាំងពីខែមេសាឆ្នាំ 2019 ហើយដំណើរការផលិតសម្រេចបានកាលពីខែវិច្ឆិកាឆ្នាំ 2020 ខណៈដែលការសាកល្បងប្រព័ន្ធអម និងការដំឡើងគ្រឹះ និងខ្សែកាប ត្រូវបានធ្វើឡើងរួចរាល់កាលពីពាក់កណ្ដាលឆ្នាំ 2022។
តាមផែនការ គម្រោងពាណិជ្ជកម្មរបស់ X1 Wind នឹងត្រូវបានធ្វើឡើងនៅលើតំបន់សមុទ្រមេឌីទែរ៉ាណេរបស់បារាំង នៅឆ្នាំ 2025។ នេះបើយោងតាមទំព័រ Design Boom។
July 18, 2023
«មហាគម្រោងនាំទឹក» តម្លៃជាង 7 ពាន់លានដុល្លារអាម៉េរិក ត្រូវបានចិនសាងសង់រួចរាល់
ប្រទេសចិន ទើបតែបានសាងសង់រួចរាល់ជាស្ថាពរមហាគម្រោងនាំទឹក ដែលត្រូវចំណាយប្រាក់អស់ជាង 7 ពាន់លានដុល្លារអាម៉េរិក និងចំណាយពេលអស់ច្រើនឆ្នាំ។
មហាគម្រោងខាងលើនេះត្រូវបានអនុវត្តដើម្បីតភ្ជាប់ទន្លេចំនួនពីរដែលវែងជាងគេនៅប្រទេសចិន គឺទន្លេ Huang He និងទន្លេ Yangtze។ ហេដ្ឋារចនាសម្ព័ន្ធនេះ មិនត្រឹមតែជួយផ្គត់ផ្គង់ទឹកសម្រាប់តំបន់រាលរាបនៅប្រទេសចិនប៉ុណ្ណោះទេ តែក៏រួមចំណែកក្នុងការកាត់បន្ថយហានិភ័យខ្វះទឹកនៅក្នុងតំបន់ផងដែរ។
គម្រោងនេះមានបណ្ដោយប្រវែងជាង 800 គីឡូម៉ែត្រ ឆ្លងកាត់បីខេត្ត គឺ Hubei, Hebei និង Chongqing។
មហាគម្រោងតភ្ជាប់ទន្លេពីរវែងជាងគេនៅប្រទេសចិននេះ ត្រូវចំណាយថវិកាអស់ជាង 7.2 ពាន់លានដុល្លារអាម៉េរិក និងប្រើពេលអស់ជាងមួយទសវត្សរ៍ ក៏ដូចជាឆ្លងកាត់ឧបសគ្គធំៗរាប់មិនអស់៕
July 18, 2023
រូបភាព Elon Musk កាន់ដៃម្ចាស់ Facebook រត់លើឆ្នេរសមុទ្រ ធ្វើឱ្យអ្នកគាំទ្រចូលចិត្ត
មហាសេដ្ឋីអាម៉េរិក លោក Elon Musk បង្ហាញការពេញចិត្តនឹងរូបថតដែលបង្ហាញពីទិដ្ឋភាពដែលលោកកាន់ដៃមហាសេដ្ឋី Mark Zuckerberg ដែលគូរដោយបច្ចេកវិទ្យាបញ្ញាសិប្បនិម្មិត នៅពេលដែលរឿងរ៉ាវបបួលគ្នាឡើងសង្វៀនប្រកួតកំពុងត្រូវបានសាធារណជនចាប់អារម្មណ៍ខ្លាំង។
កាលពីថ្ងៃទី 14 កក្កដា ជាងថតរូប Julian Van Dieken បានបង្ហោះកម្រងរូបភាពបង្ហាញពីទិដ្ឋភាពមហាសេដ្ឋី Elon Musk និង Mark Zuckerberg សប្បាយរីករាយជាមួយគ្នានៅលើឆ្នេរសមុទ្រ។ Julian Van Dieken ឱ្យដឹងថា រូបភាពនេះគឺជាការរួមផ្សំដោយការប្រើប្រាស់ឧបករណ៍ AI ឈ្មោះ Midjourney, Insight, Adobe Firefly, Photoshop, Dazz Cam និង FaceApp។ នៅក្នុងការស្រមៃរបស់ AI ជំនួសឱ្យការបញ្ចប់ការប្រកួតនៅលើសង្វៀនប្រដាល់ មហាសេដ្ឋីទាំងពីររូបនេះបែរជាសប្បាយរីករាយ ចាប់កាន់ដៃគ្នារត់លេងលើឆ្នេរសមុទ្រដូចគូសង្សារ។
មួយថ្ងៃក្រោយមក គណនី Sir Doge of the coin បានបង្ហោះរូបភាពទាំងនេះជាថ្មីនៅលើ Twitter ហើយក៏ទាក់ទាញអ្នកចូលចិត្តជាង 142 ពាន់លើក, មតិជាង 5 ពាន់លើក និងចែករំលែកបន្តជាង 17 ពាន់លើក។ បច្ចុប្បន្ន កម្រងរូបថតខាងលើរបស់គណនីនេះ មានអ្នកចូលមើលប្រមាណ 8 លានលើក។
ថ្ងៃទី 16 កក្កដា លោក Elon Musk ក៏បានបញ្ចេញមតិជារូបសើចចេញទឹកភ្នែក ទាក់ទាញអ្នកចូលចិត្តបានជិត 13 ពាន់លើក។ អ្នកលេងបណ្ដាញសង្គមជាច្រើនយល់ថា នេះនឹងជាការបញ្ចប់ដ៏សមហេតុផលសម្រាប់ការប្រកួតរបស់មហាសេដ្ឋីទាំងពីររូបនេះ។
ការភ្នាល់ប្រកួតវាយគ្នាលើសង្វៀងប្រដាល់រវាងម្ចាស់ Twitter និងម្ចាស់ Facebook កើតឡើងដោយវិធីចម្លែកខុសគេ។ រឿងរ៉ាវចាប់ផ្ដើមពីពេលលោក Musk និយាយលេងកាលពីថ្ងៃទី 21 មិថុនាថា លោកនឹងទទួលការប្រកួតក្នុងទ្រុងជាមួយម្ចាស់ Facebook។ មួយថ្ងៃក្រោយមក CEO របស់ Meta ដែលជាក្រុមហ៊ុនមេរបស់ Facebook ក៏បានបង្ហោះសារលើ Instagram ថា «បញ្ជូនទីតាំងមកឱ្យខ្ញុំ» ដែលនេះជាសញ្ញាបញ្ជាក់ថា Zuckerberg បានទទួលយកការបបួលប្រកួត។
ក្នុងរយៈពេលច្រើនថ្ងៃក្រោយមកទៀត ព័ត៌មានស្ដីពីការប្រកួតលើសង្វៀនរវាងមហាសេដ្ឋីអាម៉េរិកដើមកំណើតអាហ្វ្រិកខាងត្បូង និងមហាសេដ្ឋីអាម៉េរិកដើមកំណើតជ្វីប ក៏ចាប់ផ្ដើមលេចឡើងជាបន្តបន្ទាប់ ហើយនេះក៏ជាព្រឹត្តិការណ៍ដែលមនុស្សជាច្រើនកំពុងទន្ទឹងរង់ចាំ៕

July 17, 2023
វីដេអូបកស្រាយអំពីហេតុការណ៍គ្រោះថ្នាក់នាវា Titan ទាក់ទាញអ្នកមើលជាង 14 លានលើក
វីដេអូជាង 6 នាទី បកស្រាយអំពីករណីនាវាមុជទឹក Titan ត្រូវសម្ពាធទឹកគាបរហូតដល់បែកបាក់ខ្ទេចខ្ទី ទាក់ទាញអ្នកចូលមើលបានជាង 14 លាននាក់ បន្ទាប់ពីបានបង្ហោះលើបណ្ដាញសង្គម YouTube កាលពីថ្ងៃទី 01 កក្កដា 2023។
កាលពីថ្ងៃទី 01 កក្កដា គណនី AiTelly បានបង្ហោះវីដេអូដែលមានថេរវេលាជាង 6 នាទី បកស្រាយអំពីហេតុការណ៍គ្រោះថ្នាក់របស់នាវាមុជទឹក Titan ដែលត្រូវបានសម្ពាធទឹកមហាសមុទ្រអាត្លង់ទិកគាបបែកបាក់ខ្ទេចខ្ទីកាលពីខែមិថុនា 2023។ វីដេអូនេះ មានអ្នកចូលមើលជាង 14,148,000 លើក, អ្នកបញ្ចេញមតិជាង 5 ពាន់លើក និងចូលចិត្តជាង 66,000 លើក គិតត្រឹមព្រឹកថ្ងៃទី 17 កក្កដានេះ។
ក្រុមការងាររបស់គណនី AiTelly យកទិន្នន័យពី Google និងគេហទំព័ររបស់ OceanGate ដែលជាក្រុមហ៊ុនគ្រប់គ្រងនាវាមុជទឹក Titan ដើម្បីបង្កើតជាវីដេអូ។ ក្រុមការងារនេះបានចំណាយពេល 12 ម៉ោង នៅក្នុងការធ្វើត្រាប់បែប 3D បង្ហាញអំពីហេតុការណ៍ដែលនាវា Titan ត្រូវរងសម្ពាធទឹកក្នុងជម្រៅ 3,800 ម៉ែត្រ ដែលមានកម្លាំងខ្លាំងជាងប្រហែល 400 ដង ធៀបនឹងសម្ពាធខ្យល់ក្នុងបរិយាកាសរបស់ផែនដី។
វីដេអូនេះផ្ដោតសំខាន់ទៅលើរចនារូបរាងនៃសម្បកខាងក្រៅរបស់ Titan ធ្វើពីសរសៃកាបូន ដែលត្រូវបានចាត់ទុកថាជាមូលហេតុនាំឱ្យនាវានេះត្រូវជួបគ្រោះថ្នាក់។ Titan ត្រូវបានផលិតពីសរសៃកាបូនជំនួសឱ្យដែក និងអាលុយមីញ៉ូម។
សរសៃកាបូនធុនជាងដែកប្រាំដង ប៉ុន្តែនោះមិនមែនជាភាពធុននឹងសម្ពាធនោះឡើយ ដោយវាគ្រាន់តែជួយរក្សាគ្រោងឆ្អឹងមិនឱ្យទាញដាច់ពីគ្នាប៉ុណ្ណោះ។ បញ្ហាប្រេះ រហែកនៃសរសៃកាបូនដែលប្រើសម្រាប់ការផលិតនាវា Titan កើតឡើងយឺតជាង បើធៀបនឹងសរសៃកាបូនសុទ្ធ ព្រោះថា សរសៃកាបូនលើនាវានេះត្រូវបានលាយជាមួយកៅ resin ជាស្រទាប់ៗ។ ដូច្នេះ រចនាសម្ព័ន្ធសរសៃកាបូននៅលើនាវា Titan មិនមែនជាទម្រង់បន្ទះកាបូនសុទ្ធ និងតែមួយស្រទាប់នោះទេ ប៉ុន្តែវាគឺជាទម្រង់ផ្សំរវាងសរសៃកាបូន និងកាវ resin ដែលក្រុមហ៊ុន OceanGate ហៅថា «carbon fiber composite»។
ដោយសារតែជាទម្រង់ល្បាយ ដូច្នេះ ក្នុងរចនាសម្ព័ន្ធសរសៃកាបូននេះក៏មានចន្លោះប្រហោងល្អិតៗដែលកាវ resin មិនអាចលុបបំពេញ និងមិនអាចមើលឃើញពីខាងក្រៅ ថ្វីបើ OceanGate ថា អត្រានៃចន្លោះប្រហោងនេះគឺក្រោម 1% ប៉ុន្តែតួលេខនេះមិនត្រូវបានបញ្ជាក់ច្បាស់លាស់។
នាវា Titan និងជនរងគ្រោះទាំង 5 នាក់
ចំណុចប្រេះដ៏ល្អិតនៅក្នុងស្រទាប់សរសៃកាបូនរបស់ Titan ចាប់ផ្ដើមធំឡើងក្នុងល្បឿនយឺតៗ ទៅតាមស្រទាប់សរសៃកាបូននីមួយៗ ហើយវាចេះតែលឿនឡើងៗពីស្រទាប់មួយទៅស្រទាប់មួយទៀត។ ដូច្នេះស្នាមប្រេះនឹងធំឡើងរហូតដល់ធ្វើឱ្យរចនាសម្ព័ន្ធខាងក្នុងបង្អស់ ប្រែជាខ្សោយរហូតដល់ទីបំផុត។
នៅពេលលក្ខខណ្ឌអាក្រក់ទាំងអស់បានប្រមូលផ្ដុំគ្នាពេញលេញ នាវា Titan ក៏ត្រូវសម្ពាធទឹកគាបឱ្យក្រពឹត រួញ បែកបាក់ខ្ទេចខ្ទី បន្ទាប់ពីបានប៉ះទង្គិចនឹងអ្វីមួយនៅបាតសមុទ្រ បណ្ដាលឱ្យមនុស្សទាំង 5 នាក់នៅក្នុងនាវា ត្រូវបាត់បង់ជីវិត៕
July 17, 2023
Messi នាំភរិយា និងកូនៗ ដើរផ្សារនៅសហរដ្ឋអាម៉េរិក
(សហរដ្ឋអាម៉េរិក) – Lionel Messi ចាប់ផ្ដើមផ្ស៊ាំនឹងជីវភាពថ្មីនៅ Miami នៅពេលជូនភរិយា Antonella Roccuzzo និងកូនៗដើរផ្សារ។
Messi បានទៅដល់សហរដ្ឋអាម៉េរិកកាលពីថ្ងៃទី 11 កក្កដា 2023 ដើម្បីត្រៀមខ្លួនសម្រាប់ការពិនិត្យសុខភាព និងចុះហត្ថលេខាលើកិច្ចព្រមព្រៀងជាផ្លូវការជាមួយនឹងក្លឹបបាល់ទាត់ Inter Miami។ M10 ហាក់ស៊ាំនឹងជីវភាពថ្មីបានលឿនជាង បើធៀបនឹងពេលទាត់ឱ្យក្លឹប PSG និងការរស់នៅក្នុងទឹកដីបារាំង។
កាលពីថ្ងៃទី 14 កន្លងទៅ Messi បានបង្ហាញខ្លួនពេលកំពុងដើរទិញទំនិញក្នុងផ្សារទំនើប Publix។ កំពូលតារាបាល់ទាត់អាហ្សង់ទីនរូបនេះ បានដើរផ្សារជាមួយនឹងភរិយា Antonella និងកូនប្រុសទាំងបីនាក់រួមមាន Thiago, Mateo និង Ciro។
គ្រួសាររបស់ Messi បានបង្ហាញភាពសប្បាយរីករាយនៅពេលដើរឆ្លងកាត់ហាងមួយចំនួនក្នុងផ្សារទំនើប Publix។ ពួកគេក៏បានថតរូបជាមួយនឹងអ្នកគាំទ្រមួយចំនួនដែលបានស្គាល់ផងដែរ។
ក្រោយពីចប់កិច្ចសន្យាជាមួយ PSG លោក Messi ក៏សម្រេចចិត្តមកទាត់ឱ្យ Inter Miami ដោយមានកិច្ចព្រមព្រៀងរយៈពេលពីរឆ្នាំ អមនឹងជម្រើសពន្យារកិច្ចសន្យាថែមពីរឆ្នាំ ដែលនេះមានន័យថា M10 មានសិទ្ធិចាកចេញពីក្លឹបនេះនៅរដូវក្ដៅឆ្នាំ 2024 ឬ 2025 បើសិនគាត់ចង់។
កំពូលតារាបាល់ទាត់អាហ្សង់ទីនរូបនេះនឹងបង្ហាញខ្លួនជាផ្លូវការនៅក្នុងមហាព្រឹត្តិការណ៍មួយដែលមានឈ្មោះថា «The Unveil» នៅឯកីឡដ្ឋានរបស់ Inter Miami នាថ្ងៃទី 16 កក្កដាខាងមុខ៕
July 15, 2023
តំណាងរាស្ត្របក្សប្រឆាំង និងបក្សកាន់អំណាច វាយតប់គ្នាពេលប្រជុំក្នុងសភានៅកូសូវ៉ូ
តំណាងរាស្ត្រនៅកូសូវ៉ូ សាចទឹកទៅលើមេដឹកនាំស្ថាប័នអនុវត្តច្បាប់ នាំឱ្យមានហេតុការណ៍វាយតប់គ្នានៅក្នុងសភា ក្នុងកិច្ចប្រជុំស្ដីពីសំឡេងជជែកគ្នាដែលកំពុងមានភាពចម្រូងចម្រាស។
វីដេអូដែលថតបាននៅក្នុងកិច្ចប្រជុំសភាកូសូវ៉ូ កាលពីថ្ងៃទី 13 កក្កដា បង្ហាញថា តំណាងរាស្ត្រមួយរូបរបស់បក្សប្រឆាំង កាន់ដបទឹកសុទ្ធ និងជះទឹកទៅលើលោក Albin Kurti ដែលជាប្រធានស្ថាប័នអនុវត្តច្បាប់ និងអនុប្រធាន។
សកម្មភាពនេះ ភ្លាមៗនោះក៏បានធ្វើឱ្យមានអំពើហិង្សា នៅពេលក្រុមតំណាងរាស្ត្របក្សប្រឆាំង និងបក្សកាន់អំណាចសម្រុកទៅកាន់វេទិកា រុញច្រាន និងវាយតប់គ្នា។ អំពើហិង្សានេះបានបន្តរហូតដល់ក្រុមប៉ូលិស និងក្រុមអង្គរក្សរបស់លោក Kurti ចូលមកធ្វើអន្តរាគមន៍។
ហេតុការណ៍ខាងលើបានកើតឡើងនៅពេលដែលក្រុមតំណាងរាស្ត្រកូសូវ៉ូ បើកកិច្ចប្រជុំស្ដីពីសំឡេងដែលត្រូវបានសារព័ត៌មានចុះផ្សាយកាលពីពេលថ្មីៗនេះ ទាក់ទិននឹងការជជែកគ្នាកាលពីខែមិថុនា 2022 រវាងលោកស្រី Mimoza Kusari-Lila ប្រធានបក្សកាន់អំណាច Alternativa និងតំណាងរាស្ត្រជនជាតិសែប៊ី Slavko Simic។
ក្នុងសំឡេងដែលថតបានខាងលើ លោកស្រី Kursari-Lila ឱ្យដឹងថា ធ្លាប់បានជជែកជាមួយ Milan Radojcic ដែលជាមន្ត្រីជនជាតិសែប៊ីមួយរូបត្រូវបានសហរដ្ឋអាម៉េរិកដាក់ទណ្ឌកម្មព្រោះតែប្រព្រឹត្តអំពើពុករលួយ និងបទល្មើសដែលមានអង្គការចាត់តាំង។ Radojcic ក៏ត្រូវបានអាជ្ញាធរកូសូវ៉ូតាមចាប់ខ្លួនផងដែរ។
កូសូវ៉ូគឺជាតំបន់ផ្ដាច់ខ្លួនដែលស្ថិតនៅភាគនិរតីនៃប្រទេសសែប៊ី និងមានផ្ទៃក្រឡាប្រហែល 10,800 គីឡូម៉ែត្រការ៉េ។ តំបន់នេះមានប្រជាជនចំនួន 1.8 លាននាក់ ដែលភាគច្រើនគឺជាជនជាតិអាល់បានី។ កូសូវ៉ូបានប្រកាសឯករាជ្យកាលពីឆ្នាំ 2008 ប៉ុន្តែសែប៊ីមិនទទួលស្គាល់។
ជនជាតិសែប៊ីប្រហែល 120,000 នាក់ដែលរស់នៅក្នុងតំបន់ភាគខាងជើងកូសូវ៉ូ មិនទទួលស្គាល់អាជ្ញាធរនៅ Pristina ដោយពួកគេនៅតែស្មោះស្ម័គ្រផ្នែកនយោបាយជាមួយនឹងសែប៊ី។ ភាគច្រើននៃបណ្ដាប្រទេសលោកខាងលិច បានទទួលស្គាល់ឯករាជ្យរបស់កូសូវ៉ូ ប៉ុន្តែតំបន់នេះមិនទាន់ទទួលបានកៅអីនៅអង្គការសហប្រជាជាតិ ដោយសារតែមានការជំទាស់ពីរុស្ស៊ី និងចិន។

July 14, 2023
អបអរសាទរខួប១ឆ្នាំ នៃការបើកដំណើរការជាផ្លូវការរោងចក្រដំឡើងរថយន្ត Ford និងពិធីប្រគល់-ទទួលអំណោយរថយន្តគិលានសង្គ្រោះ Ambulance ជូនដល់កាកបាទក្រហមកម្ពុជា សាខាខេត្តពោធិ៍សាត់
[ភ្នំពេញ – ថ្ងៃទី ១៣ ខែកក្កដា ឆ្នាំ២០២៣] ក្រុមហ៊ុន RMA (Cambodia) PLC ដែលជាក្រុមហ៊ុននាំចូល និងចែកចាយផ្តាច់មុខរថយន្ត Ford ក្នុងទីផ្សារប្រទេសកម្ពុជាបានប្រារព្ធពិធីប្រគល់-ទទួលអំណោយរថយន្តគិលានសង្គ្រោះចំនួន ២ គ្រឿង ជូនទៅដល់កាកបាទក្រហមកម្ពុជា សាខាខេត្តពោធិ៍សាត់ ដែលកម្មវិធីនេះត្រូវបានប្រារព្ធឡើង ក្រោមអធិបតីភាពរបស់ ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងអគ្គនាយកអគ្គីសនីកម្ពុជា និងលោកអភិបាលនៃគណៈអភិបាលខេត្តពោធិ៍សាត់ ព្រមទាំងថ្នាក់ដឹកនាំក្រុមហ៊ុន Ford Motor Company ថ្នាក់ដឹកនាំក្រុមហ៊ុន RMA Group និងក្រុមហ៊ុន RMA (Cambodia) PLC រួមទាំងភ្ញៀវកិត្តិយសជាតិ និងអន្តរជាតិប្រមាណជាង ២០០ នាក់។ កម្មវិធីនេះបានប្រារព្ធឡើងនៅក្នុងបរិវេនរោងចក្រដំឡើងរថយន្ត Ford ក្នុងភូមិសារវ័ន ឃុំស្នាអន្សារ ស្រុកក្រគរ ខេត្តពោធិ៍សាត់ នៅថ្ងៃទី ១១ ខែកក្កដា ឆ្នាំ ២០២៣ ។
ក្នុងឱកាសនៃពីធីអបអរសាទរខួប១ឆ្នាំ នៃការបើកដំណើរការជាផ្លូវការរោងចក្រដំឡើងរថយន្ត Ford និងពិធីប្រគល់-ទទួលអំណោយរថយន្តគិលានសង្គ្រោះ Ambulance ចំនួន ២ គ្រឿង ជូនដល់កាកបាទក្រហមកម្ពុជា សាខាខេត្តពោធិ៍សាត់ លោក ងន សាំង អគ្គនាយកក្រុមហ៊ុន RMA (Cambodia) PLC បានមានប្រសាសន៍ថា៖ “ យើងខ្ញុំមានមោទភាពជាពន់ពេកដែលទទួលបានសេចក្ដីទុកចិត្តពីក្រុមហ៊ុន FORD MOTOR COMPANY ក្នុងការដំឡើងរថយន្ត FORD RANGER និង FORD EVEREST ជំនាន់ថ្មីនៅ លើទឹកដីនៃព្រះរាជាណាចក្រកម្ពុជា ស្របតាមស្តង់ដាររបស់ក្រុមហ៊ុន FORD ។ យើងខ្ញុំជឿជាក់ថា ការបោះជំហានវិនិយោគក្នុងវិស័យយានយន្តរបស់ក្រុមហ៊ុនយើងខ្ញុំ ចូលរួមចំណែកយ៉ាងសំខាន់ ក្នុងការអភិវឌ្ឍវិស័យឧសហ្សាកម្មយានយន្តនៅកម្ពុជា និងជាសក្ខីភាពនៃទំនុកចិត្តលើកិច្ចខិតខំប្រឹង ប្រែងរបស់រដ្ឋាភិបាលក្នុងការធ្វើឱ្យប្រសើរឡើង នូវបរិយាកាសធុរកិច្ច និងវិនិយោគ។ វត្តមានរបស់ រោងចក្រយើងខ្ញុំក៏បានចូលរួមចំណែកការកាត់បន្ថយការធ្វើចំណាកស្រុកទៅធ្វើការនៅក្រៅប្រទេស របស់ប្រជាពលរដ្ឋ និងលើកកម្ពស់សេដ្ឋកិច្ចក្នុងតំបន់តាមរយៈការជំរុញសន្ទុះអាជីវកម្មសហគ្រាស ធុនតូច និងមធ្យម ការបង្កើតឱកាសការងារដោយផ្ទាល់និងដោយប្រយោល ក៏ដូចជាការអភិវឌ្ឍន៍ ធនធានមនុស្សនៅក្នុងទឹកដី ខេត្តពោធិ៍សាត់នេះផ្ទាល់ផងដែរ។ ”
មិនតែប៉ុណ្ណោះ លោកក៏បានបន្ថែមទៀតថា៖ “ ក្រុមហ៊ុនយើងខ្ញុំនឹងបន្តប្តេជ្ញាគាំទ្រ និង ជំរុញវិស័យឧស្សាហកម្មយានយន្តនៅកម្ពុជា ដើម្បីឱ្យកម្ពុជា ផ្លាស់ប្ដូរមុខមាត់ថ្មី ពីប្រទេសដែលដំឡើងរថយន្ត ទៅជាប្រទេសដែលផលិតរថយន្ត ក្នុងពេលអនាគត។ ក្រុមហ៊ុននឹងពង្រីកការវិនិយោគគម្រោងដំឡើងរថយន្ត Ford ដោយបង្កើនការនាំចូលនៃចំនួន គ្រឿងបង្គុំច្រើនជាងមុន បង្កើនចំនួនការងារក្នុងស្រុក ជំរុញការប្រើប្រាស់ធាតុផ្សំក្នុងស្រុក និងបង្កើន ដើមទុនវិនិយោគបន្ថែមទៀត។ យើងខ្ញុំជឿជាក់ថា ការវិនិយោគនេះនឹងបន្តផ្តល់អត្ថប្រយោជន៍ជាច្រើនបន្ថែមទៀតជូនប្រទេសកម្ពុជា ជាពិសេសការអភិវឌ្ឍន៍ខ្សែសង្វាក់ផ្គត់ផ្គង់ និងធ្វើឱ្យប្រសើរ ឡើងនូវខ្សែចង្វាក់ដែលគាំទ្រគោលនយោបាយអភិវឌ្ឍវិស័យឧស្សាហកម្មរបស់រាជរដ្ឋាភិបាលកម្ពុជា។ ការវិនិយោគនេះ នឹងនាំមកនូវផលិតផលថ្មី បច្ចេកវិទ្យាថ្មី ដើម្បីផ្គត់ ផ្គង់តម្រូវការប្រើប្រាស់រថយន្តថ្មីក្នុងស្រុក ជាមួយនឹងមោទភាពផលិតកម្មក្នុងស្រុក រោងចក្រ ដំឡើងរថយន្ត Ford នឹងបន្តទាក់ទាញវិនិយោគិនផ្សេងៗជាច្រើនទៀតមកវិនិយោគនៅកម្ពុជា ជា ពិសេស អ្នកវិនិយោគដែល ពាក់ព័ន្ធនឹងការផលិត និងដំឡើងរថយន្ត ដូចជា៖ សំបកកង់ កង់ឡាន ខ្សែភ្លើងឡាន អាគុយឡាន និងអាជីវកម្មផ្សេងៗទៀត។”

ឆ្លៀតក្នុងឱកាសនេះដែរ លោកស្រី Kay Hart ប្រធានគ្រប់គ្រងទីផ្សារអន្តរជាតិនៃក្រុមហ៊ុន Ford Motor Company បានមានប្រសាសន៍ថា៖ “ រថយន្តគិលានសង្គ្រោះ (The Next-Generation Ford Ranger-Converted Ambulances) នេះ បានបំពាក់មកជាមួយនូវបច្ចេកវិទ្យា និងប្រព័ន្ធសុវត្ថិភាពទំនើបជំនាន់ចុងក្រោយដែលធ្វើឱ្យរថយន្តនេះក្លាយជារថយន្តមួយដែលមានលក្ខណៈ ធន់ រឹងមាំ និងមានសមត្ថភាពក្នុងការចល័ត និងដឹកជញ្ជូនអ្នកជំងឺដោយសុវត្ថិភាព។ ”
លោកស្រីក៏បានបន្តទៀតថា៖ “ រថយន្តគិលានសង្គ្រោះ (The Next-Generation Ford Ranger-Converted Ambulances) នឹងចូលរួមចំណែកយ៉ាងសំខាន់សម្រាប់កាកបាទក្រហមកម្ពុជាក្នុងខេត្តពោធិ៍សាត់ ក្នុងការគាំពារ សង្គ្រោះបន្ទាន់ និងជាជំនួយការដ៏សំខាន់ក្នុងការជួយដល់សកម្មភាពសប្បុរសធម៌ផ្សេងៗដល់ប្រជាពលរដ្ឋ និងអ្នកជំងឺដើម្បីទទួលបាននូវសេវាកម្មសង្គ្រោះបន្ទាន់មួយដែលមាន គុណភាព សុវត្ថិភាព និងប្រសិទ្ធភាព។ ”
ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងអគ្គនាយកអគ្គីសនីកម្ពុជា បានមានប្រសាសន៍ថា៖ “ ការសាងសង់រោងចក្រដំឡើងរថយន្ត Ford ក្នុងខេត្តពោធិ៍សាត់ គឺជាសក្ខីភាពមួយដែលបានបង្ហាញពីទំនុកចិត្តរបស់ក្រុមហ៊ុន RMA Cambodia មកលើរាជរដ្ឋាភិបាលកម្ពុជា ហើយការផ្តល់ជូននូវរថយន្តគិលានសង្គ្រោះ ២ គ្រឿងក្នុងថ្ងៃនេះនឹងជាការចូលរួមចំណែកដ៏សំខាន់មួយក្នុងការពង្រឹងសមត្ថភាពមូលដ្ឋានសុខាភិបាលបន្ថែមទៀត ក្នុងការឆ្លើយតបទៅនឹងតម្រូវការសេវាថែទាំសុខភាពអោយកាន់តែមានគុណភាព ប្រសិទ្ធភាព និងសុវត្ថិភាព។ ភាពជាដៃគូរវាង RMA Cambodia និងវិទ្យាស្ថានបច្ចេកទេសក្នុងស្រុករបស់យើង បានដើរតួរនាទីយ៉ាងសំខាន់ក្នុងការលើកកម្ពស់ធនធានមនុស្ស តាមរយៈការបង្កើតកម្មវិធីបណ្តុះបណ្តាលដោយផ្ទាល់ពីអ្នកជំនាញដែលគ្រឹះមួយដ៏សំខាន់សម្រាប់យុវជន ក៏ដូចជាយុវនារីក្នុងការត្រៀមខ្លួនរួចជាស្រេចសម្រាប់ភាពជោគជ័យនាពេលខាងមុខ។ ”
គួរបញ្ជាក់ផងដែរថា ក្រុមហ៊ុន RMA (CAMBODIA) PLC ជាក្រុមហ៊ុនដំបូងគេបំផុត ដែលទទួលបានការទទួលស្គាល់ពី វិទ្យាស្ថានស្ដង់ដារកម្ពុជា នៃ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្នុងនាមជាអ្នក អនុវត្តស្តង់ដារសុវត្ថិភាពយានយន្ត និងស្តង់ដារសុវត្ថិភាពគ្រឿងបង្គុំយានយន្តបានខ្ពស់បំផុត។ ក្នុងឆ្នាំ ២០២០ ក្រុមហ៊ុន RMA (CAMBODIA) PLC បានចុះបញ្ជីលក់មូលបត្រ បំណុលចំនួន ៨០ ពាន់លានរៀល ដែលស្មើនឹង ២០ លានដុល្លារអាមេរិក ក្នុងផ្សារមូលបត្រកម្ពុជា ហើយក្លាយជាក្រុមហ៊ុនមិនមែនស្ថាប័នហិរញ្ញវត្ថុដែលបានបោះផ្សាយមូលបត្របំណុលដំបូងគេបង្អស់នៅប្រទេសកម្ពុជា។ ការបោះផ្សាយមូលបត្របំណុលនេះ បង្ហាញពីកិច្ចខិតខំប្រឹងប្រែងរបស់ក្រុមហ៊ុនយើងខ្ញុំក្នុងការលើកកម្ពស់ទីផ្សារមូលបត្រកម្ពុជា និងចូលរួមចំណែកអភិវឌ្ឍទីផ្សារហិរញ្ញវត្ថុនៅប្រទេសកម្ពុជា។
តាមរយៈកំណើនសេដ្ឋកិច្ច និងកំរិត GDP របស់ប្រជាជនកម្ពុជាកើនឡើងខ្ពស់ជាបន្តបន្ទាប់ បានធ្វើឱ្យប្រជាជនកម្ពុជាងាកមកប្រើប្រាស់រថយន្តថ្មីមានការកើនឡើងជាលំដាប់។ ក្នុងនោះការប្រើប្រាស់ រថយន្តថ្មីម៉ាក FORD មានកំណើនកាន់តែច្រើនឡើង និងបានក្លាយជាជម្រើសឈានមុខរបស់អតិថិជននៅកម្ពុជា។ ដូច្នេះ ក្រុមហ៊ុនបានសម្រេចចិត្តបង្កើតរោងចក្រដំឡើងរថយន្ត FORD ដែលទទួលបានសិទ្ធិពេញលេញក្នុងការផ្គុំ និងដំឡើងរថយន្តពីក្រុមហ៊ុនម្ចាស់ដើម FORD MOTOR COMPANY។ រោងចក្រនេះ ត្រូវបានសាងសង់ឡើងនៅលើផ្ទៃដីសរុបប្រមាណជាង ៥ ហិកតា ស្ថិតក្នុងភូមិសារវ័ន ឃុំស្នាអន្សា ស្រុកក្រគរ ខេត្តពោធិ៍សាត់ ជាមួយនឹងទុនវិនិយោគចំនួន ២១ លានដុល្លារសហរដ្ឋអាមេរិក ដែលអាចបង្កើតការងារជំនាញបានជាង ៥០០ កន្លែង និងមានសមត្ថភាពអាចដំឡើងរថយន្តបានចំនួនប្រមាណ ៩,០០០ គ្រឿងក្នុងមួយឆ្នាំ។
រហូតមកដល់ពេលនេះ ក្រុមហ៊ុនបានដំឡើងរថយន្ត Ford Ranger Wildtrak និងរថយន្ត Ford Everest បានចំនួន ៣,០០០ គ្រឿងដើម្បីបម្រើតម្រូវការទីផ្សារក្នុងស្រុក។ ក្រុមហ៊ុនបន្តសហការ ជាមួយនឹងវិទ្យាស្ថានពហុបច្ចេកទេសខេត្តពោធិ៍សាត់ក្នុងការបណ្តុះបណ្តាលអភិវឌ្ឍជំនាញបច្ចេកទេសដល់បុគ្គលិកក្រុមហ៊ុនដើម្បីធានាឱ្យបាននូវធនធានមនុស្សប្រកបដោយគុណភាព។ ថ្មីៗនេះ ក្រុមហ៊ុនបានបញ្ជូនបុគ្គលិកទៅប្រទេស Australia ដើម្បីសិក្សាអំពីបច្ចេកវិទ្យាដំឡើងរថយន្ត ក្នុងគោលបំណងបង្កើនកម្រិតបច្ចេកទេសបុគ្គលិកក៏ដូចជាពាំនាំចំណេះដឹងថ្មី និង បច្ចេកវិទ្យាថ្មីមកប្រទេសកម្ពុជា។ ដើម្បីបន្តចូលរួមលើកកម្ពស់វិស័យយានយន្ត ក្រុមហ៊ុននឹងបង្កើតមជ្ឈមណ្ឌលអប់រំបណ្ដុះបណ្ដាលបច្ចេកទេស និងវិជ្ជាជីវៈដើម្បីផ្ដល់ឱកាសឱ្យប្រជាពលរដ្ឋកម្ពុជាទទួលបានការបណ្តុះបណ្តាលជំនាញបច្ចេកទេសប្រកបដោយគុណភាពដើម្បីចូលរួមចំណែកអភិវឌ្ឍធនធាន មនុស្សនៅកម្ពុជាស្របតាមគោលនយោបាយអភិវឌ្ឍវិស័យឧស្សាហកម្មរបស់រាជរដ្ឋាភិបាលកម្ពុជា។

July 14, 2023