កូរ៉េខាងត្បូង - La Reine Media

ប្ដីប្រពន្ធមួយគូសម្លាប់កូនរបស់ខ្លួនដែលទើបចាប់កំណើត

ប្ដីប្រពន្ធមួយគូនៅប្រទេសកូរ៉េខាងត្បូង ត្រូវបានចាប់ខ្លួនក្រោមបទចោទថា បានសម្លាប់ និងលាក់សាកសពកូនទើបកើតរបស់ខ្លួននៅទីក្រុង Geoje ភាគខាងត្បូងប្រទេស។

ស្ត្រីម្នាក់អាយុជាង 30 ឆ្នាំ និងគូស្នេហ៍អាយុជាង 20 ឆ្នាំ កាលពីថ្ងៃទី 02 កក្កដា 2023 ត្រូវបានចោទថា បានច្របាច់កកូនអាយុ 5 ថ្ងៃរបស់ខ្លួនរហូតដល់ស្លាប់ និងកប់សាកសពទារកនេះនៅខាងក្រោយភ្នំនៅ Geoje ខេត្ត Gyeongnam កាលពីខែកញ្ញាឆ្នាំកន្លង។

ជនទាំងពីរនាក់ខាងលើ ដំបូងឡើយបានសារភាពថា ពួកគេបានឃើញកូនរបស់ខ្លួនស្លាប់កាលពីព្រឹកថ្ងៃទី 09 កញ្ញា 2022 ទើបយកសាកសពកូននៅកប់នៅលើកំពូលភ្នំមួយ។ ពួកគេ ក្រោយមកក៏បានទទួលស្គាល់ថា កំពុងជួបបញ្ហាប្រាក់កាស និងខ្លាចត្រូវបែកផ្លូវគ្នា បើសិនឪពុកម្ដាយទាំងសងខាងដឹងថាមានកូន។

សមត្ថកិច្ចកំពុងស្វែងរកសាកសពទារកដែលត្រូវបានឪពុកម្ដាយសម្លាប់ និងកប់លើភ្នំ

ប៉ូលិសនិយាយថា បុរសជាឪពុកបានច្របាច់កកូនខ្លួនឯងរហូតដល់ស្លាប់ ខណៈស្ត្រីជាម្ដាយក៏នៅកន្លែងកើតហេតុ។ សមត្ថកិច្ចកូរ៉េខាងត្បូងកំពុងស្វែងរកសាកសពទារកខាងលើ។

នៅកូរ៉េខាងត្បូង កាលពីចុងខែកន្លង ក៏មានស្ត្រីម្នាក់អាយុជាង 30 ឆ្នាំ ត្រូវបានសមត្ថកិច្ចចោទប្រកាន់ពីបទសម្លាប់កូនទើបកើតពីរនាក់របស់ខ្លួននៅក្នុងឆ្នាំ 2018, 2019 ហើយលាក់សាកសពកូនក្នុងទូទឹកកកក្នុងផ្ទះ ព្រោះតែបញ្ហាសេដ្ឋកិច្ចគ្រួសារ។ កាលពីចុងសប្ដាហ៍កន្លង ស្ត្រីវ័យជាង 20 ឆ្នាំមួយរូប នៅកូរ៉េខាងត្បូង ក៏បានរងការចោទពីបទបង្អត់អាហារទារកទើបកើតរហូតដល់ស្លាប់នៅ Daejeon កាលពីខែមេសា 2019។

យោងតាម Yonhap កូរ៉េខាងត្បូងកំពុងតែបើកការស៊ើបអង្កេតដើម្បីវាយតម្លៃអំពីស្ថានភាពសុខភាពរបស់ក្មេងតូចជាង 2,000 នាក់ដែលកើតចាប់ពីឆ្នាំ 2015 និងពុំមានលិខិតស្នាមស្របច្បាប់៕

July 3, 2023

មីស៊ីលកូរ៉េខាងជើងធ្វើឱ្យប្រទេសជិតខាងភ័យស្លន់ស្លោ មុនពេលធ្លាក់ចូលសមុទ្របាត់ស្រមោល

កូរ៉េខាងជើងបានបញ្ជាក់ថា រ៉ុក្កែតដឹកផ្កាយរណបយោធាបានធ្លាក់ចូលសមុទ្រ ដោយសារតែមានបញ្ហាក្នុងពេលបាញ់បង្ហោះនៅព្រឹកនេះ។

«រ៉ុក្កែតរុញច្រាន Cheollima-1 ដែលនាំយកផ្កាយរណបឈ្លបយកការណ៍ផ្នែកយោធា បានធ្លាក់ចូលតំបន់សមុទ្រភាគខាងលិច ព្រោះតែបាត់បង់ថាមពល ដោយសារមានបញ្ហាក្នុងការបញ្ឆេះម៉ាស៊ីននៅកំណាត់ទីពីរ» ទីភ្នាក់ងារសារព័ត៌មានមជ្ឈិមកូរ៉េខាងជើង (KCNA) ថ្ងៃទី 31 ឧសភានេះ បានរាយការណ៍ដូច្នេះ។

មុននោះ អគ្គសេនាធិការចម្រុះនៃសាធារណរដ្ឋកូរ៉េ (JSC) ឱ្យដឹងថា នៅវេលាម៉ោង 06:29 (ម៉ោងប្រហែល 4 កន្លះនៅកម្ពុជា) កូរ៉េខាងជើងបានបាញ់បង្ហោះរ៉ុក្កែតពីតំបន់ Tongchang-ri នៅឆ្នេរសមុទ្រភាគខាងលិចប្រទេស ឆ្ពោះទៅទិសខាងត្បូង។

រ៉ុក្កែតកូរ៉េខាងជើង ហោះលើលំហសមុទ្ររបស់កោះ Baengnyeong នៅភាគខាងលិចប្រទេសកូរ៉េខាងត្បូង និងមិនប៉ះពាល់ដល់រដ្ឋធានីសេអ៊ូល។ យោងតាម JSC ក្រុមប្រឹក្សាសន្តិសុខជាតិរបស់កូរ៉េខាងត្បូង ក៏បានប្រកាសបើកកិច្ចប្រជុំបន្ទាន់ផងដែរ។

កងទ័ពកូរ៉េខាងត្បូងក៏បានដឹងថា រ៉ុក្កែតនេះបានបាត់ខ្លួនពីរ៉ាដាមុនពេលហោះទៅដល់គោលដៅដែលបានគ្រោងទុក និងបានសន្និដ្ឋានថា វាបានផ្ទុះលើអាកាស ឬធ្លាក់ចូលសមុទ្រ។

សារ៉ែនប្រកាសអាសន្នបានបន្លឺឡើងនៅរដ្ឋធានីសេអ៊ូល នៅម៉ោងប្រហែល 6 កន្លះ គ្រាដែលអាជ្ញាធរស្នើឱ្យប្រជាជនត្រៀមខ្លួនឱ្យបានរួចរាល់សម្រាប់ការជម្លៀស។ ក្រសួងមហាផ្ទៃកូរ៉េខាងត្បូង ក្រោយមកបានឱ្យដឹងថា ការប្រកាសអាសន្នពីអាជ្ញាធរសេអ៊ូល គឺ «មិនត្រឹមត្រូវ»។ ចំណែកការជូនដំណឹងអំពីការជម្លៀសនៅតំបន់ក្បែរព្រំដែនភាគខាងលិចរបស់កូរ៉េខាងត្បូង ក៏ត្រូវបានដកចេញនៅវេលាម៉ោងប្រហែល 8 ព្រឹក។

នៅប្រទេសជប៉ុនវិញ អាជ្ញាធរក៏បានចេញសេចក្ដីជូនដំណឹងទាក់ទងនឹងបញ្ហាខាងលើតាមរយៈប្រព័ន្ធ J-Alert។ ប៉ុន្តែក្រោយមក ប្រព័ន្ធនេះក៏បានប្រាប់ថា រ៉ុក្កែតនឹងមិនហោះរំលងទឹកដីជប៉ុន ហើយក៏បានដកចោលសេចក្ដីជូនដំណឹងនេះ។

ជប៉ុន មុននោះបានឱ្យដឹងថា កូរ៉េខាងជើងបានជូនដំណឹងមកតូក្យូអំពីគម្រោងបាញ់បង្ហោះផ្កាយរណបចាប់ពីថ្ងៃទី 31 ឧសភា ដល់ 11 មិថុនា។ ជប៉ុនក៏បានប្រកាសថា នឹងបាញ់ទម្លាក់រាល់រ៉ុក្កែតរបស់កូរ៉េខាងជើង បើសិនវាត្រូវបានបញ្ជាក់ថានឹងធ្លាក់ចូលទឹកដីប្រទេសនេះ។

សហរដ្ឋអាម៉េរិក កូរ៉េខាងត្បូង និងជប៉ុន សុទ្ធតែយល់ថា ការបាញ់បង្ហោះផ្កាយរណបរបស់កូរ៉េខាងជើងគឺគ្រាន់តែជា «សម្បក» ដើម្បីសាកល្បងមីស៊ីល ដោយសារតែពួកវាប្រើប្រាស់បច្ចេកវិទ្យាដូចគ្នា។ កូរ៉េខាងជើងធ្លាប់បានបាញ់បង្ហោះរ៉ុក្កែតរុញច្រានដែលមានផ្ទុកផ្កាយរណបកាលពីឆ្នាំ 2012 និង 2016 ហើយរ៉ុក្កែតទាំងនេះសុទ្ធតែបានហោះរំលងខេត្ត Okinawa នៅភាគខាងត្បូងរបស់ប្រទេសជប៉ុន៕

May 31, 2023

ស្នាមខ្មៅធំជាងផែនដីបួនដងនៅលើផ្ទៃព្រះអាទិត្យអាចមើលឃើញដោយភ្នែកធម្មតា

ស្នាមខ្មៅ AR3310 ជាដុំងងឹតនៅលើផ្ទៃព្រះអាទិត្យដែលបែរមករកផែនដី ធំដល់ថ្នាក់អាចមើលឃើញពីផែនដីដោយមិនបាច់ប្រើតេឡេស្កុប។

តារាវិទូកូរ៉េខាងត្បូង Bum-Suk Yeom ចែករំលែករូបភាពដែលប្រៀបធៀបរវាងស្នាមខ្មៅ AR3310 និងផែនដី។ «ស្នាមខ្មៅព្រះអាទិត្យមើលដោយភ្នែកធម្មតា និងវ៉ែនតាសម្រាប់មើលព្រះអាទិត្យ។ វាស្ថិតនៅខាងឆ្វេងធៀបនឹងចំណុចកណ្ដាលរបស់រង្វង់ព្រះអាទិត្យ» Yeom សរសេរក្នុងអត្ថបទបង្ហោះលើបណ្ដាញសង្គមកាលពីថ្ងៃទី 23 ឧសភាដូច្នេះ។

ស្នាមខ្មៅមើលទៅដូចងងឹត ព្រោះវាត្រជាក់ជាងតំបន់ដទៃរបស់ផ្ទៃព្រះអាទិត្យ នេះបើតាមណាសា។ ស្នាមខ្មៅត្រជាក់ជាងក៏ព្រោះតែពួកវាកើតឡើងនៅកន្លែងដែលដែនម៉ាញេទិកមានកម្លាំងខ្លាំងរារាំងកម្ដៅពីខាងក្នុងព្រះអាទិត្យជះមកក្រៅ។ ពេលខ្លះស្នាមខ្មៅលើព្រះអាទិត្យធំរហូតដល់ថ្នាក់អាចមើលឃើញដោយភ្នែកធម្មតា មិនចាំបាច់ប្រើតេឡេស្កុប ប៉ុន្តែត្រូវការវ៉ែនតាការពារភ្នែកពីពន្លឺព្រះអាទិត្យ។

ទិដ្ឋភាពផ្ទុះអណ្ដាតភ្លើងព្រះអាទិត្យ (Solar Flare)

ទំហំផ្ទៃផែនដីស្មើនឹង 169 ភាគលានធៀបនឹងផ្ទៃព្រះអាទិត្យ។ Bum-Suk គណនាឃើញថា AR3310 មានទំហំធំជាងផែនដីប្រហែលបួនដង។

ស្នាមខ្មៅលើផ្ទៃព្រះអាទិត្យអាចបង្កើតហេតុការណ៍ផ្ទុះអណ្តាតភ្លើងព្រះអាទិត្យ (Solar flare) ដែលអាចប៉ះពាល់ដល់ប្រព័ន្ធទូរគមនាគមន៍ ផ្កាយរណប និងបណ្ដាញអគ្គិសនីផងដែរ៕

May 24, 2023

កូរ៉េខាងត្បូងត្រៀមរួចរាល់ហើយសម្រាប់ការបាញ់បង្ហោះរ៉ុក្កែតអវកាស Nuri លើកទីបី

រ៉ុក្កែត Nuri ដែលមានប្រវែង 47.2 ម៉ែត្រ នឹងនាំយកផ្កាយរណបសរុប 8 គ្រឿង ឡើងទៅកាន់គន្លងតារាវិថី។

កូរ៉េខាងត្បូងបានត្រៀមរួចរាល់សម្រាប់ការបាញ់បង្ហោះរ៉ុក្កែតអវកាសផលិតក្នុងស្រុក Nuri នៅក្នុងថ្ងៃនេះ។ ក្រសួងវិទ្យាសាស្ត្រ និងព័ត៌មានវិទ្យា ក៏ដូចជាវិទ្យាស្ថានស្រាវជ្រាវអវកាសកូរ៉េខាងត្បូង (KARI) បានអះអាងថា ការត្រួតពិនិត្យចុងក្រោយបង្ហាញថា បញ្ហាបច្ចេកទេសនានាត្រូវបានធានា ហើយការព្យាករអំពីអាកាសធាតុក៏មានអំណោយផលល្អដល់ការបាញ់បង្ហោះ។

រ៉ុក្កែតអវកាស Nuri ឬហៅថា KSlV-II នឹងនាំយកផ្កាយរណបសរុប 8 គ្រឿង ឡើងទៅកាន់គន្លងតារាវិថី ក្នុងនោះក៏មានផ្កាយរណបបួនគ្រឿងដែលមានឈ្មោះកូដថា SNIPE ដែលអភិវឌ្ឍ និងផលិតដោយវិទ្យាស្ថានវិទ្យាសាស្ត្រអវកាស និងតារាសាស្ត្រកូរ៉េខាងត្បូង។

រ៉ុក្កែត Nuri មានប្រវែង 47.2 ម៉ែត្រ មុខកាត់ 3.5 ម៉ែត្រ និងទម្ងន់ 17.5 តោន។ ខុសពីរការបាញ់បង្ហោះលើកទីមួយ និងទីពីរដែលមានតែផ្កាយរណបក្លែងក្លាយ ការបាញ់បង្ហោះលើកទីបីនេះមានផ្ទុកផ្កាយរណបដែលអាចបំពេញបេសកកម្មដូចផ្កាយរណបដទៃ។ ក្នុងនោះមានផ្កាយរណបមួយគ្រឿងបំពាក់ជាប់លើរ៉ុក្កែត Nuri ផងដែរ។

រ៉ុក្កែត Nuri ត្រូវបានដំឡើងទៅក្នុងប្រព័ន្ធទម្រនៅមជ្ឈមណ្ឌលអវកាស Naro ក្នុងតំបន់ Goheung នៃខេត្ត Jeolla ខាងត្បូង កាលពីថ្ងៃទី 23 ឧសភា។ តាមផែនការ រ៉ុក្កែតនេះនឹងត្រូវបានបាញ់បង្ហោះនៅវេលាម៉ោងប្រហែល 18:24 (ម៉ោងក្នុងស្រុក) ក្នុងថ្ងៃទី 24 ឧសភានេះ។

មុននេះ កូរ៉េខាងត្បូងបានបាញ់បង្ហោះសាកល្បងរ៉ុក្កែត Nuri លើកទីមួយកាលពីខែតុលា 2021 ប៉ុន្តែរ៉ុក្កែតហោះមិនដល់គោលដៅ។ ក្នុងការបាញ់បង្ហោះរ៉ុក្កែត Nuri លើកទីពីរកាលពីខែមិថុនា 2022 បានទទួលជោគជ័យ។

គិតត្រឹមបច្ចុប្បន្ន កូរ៉េខាងត្បូងបានក្លាយជាប្រទេសទី 7 លើពិភពលោក ដែលបានអភិវឌ្ឍយានបាញ់បង្ហោះទៅកាន់ទីអវកាសដែលអាចនាំយកផ្កាយរណបទម្ងន់ជាងមួយតោន បន្ទាប់ពីរុស្ស៊ី អាម៉េរិក បារាំង ចិន ជប៉ុន និងឥណ្ឌា៕

May 24, 2023

U-22 ឡាវមានការជឿជាក់ បន្ទាប់ពី U-22 វៀតណាមបង្ហាញភាពទន់ខ្សោយមុនស៊ីហ្គេមនៅកម្ពុជា

នៅក្នុងការប្រកួតបើកឆាករបស់ U-22 វៀតណាម ជាមួយនឹង U-22 ឡាវ នៅល្ងាចថ្ងៃទី 30 មេសានេះ ទស្សនិកជនប្រហែលជាបានទស្សនាថ្វីជើងល្អរបស់ក្រុមឡាវ ព្រោះតែពួកគេបានរីកចម្រើនជាងមុន ខណៈដែល U-22 វៀតណាម ហាក់បានថមថយកម្លាំងមុនការប្រកួតនៅស៊ីហ្គេមលើកនេះ។

ក្រោយរយៈពេលប្រាំឆ្នាំដែលលេចធ្លោក្រោមការដឹកនាំរបស់គ្រូបង្វឹកជនជាតិកូរ៉េខាងត្បូង Park Hang-seo ក្រុមបាល់ទាត់ជម្រើសជាតិវៀតណាមបច្ចុប្បន្ននឹងឈានចូលដល់ដំណាក់កាលថ្មីនៅស៊ីហ្គេមលើកទី 32 ដែលចាប់ផ្ដើមដោយការប្រកួតជាមួយ U-22 ឡាវនៅឯកីឡដ្ឋានព្រីនស៍ នារាជធានីភ្នំពេញ ដែលជាការប្រកួតផ្លូវការដំបូងរបស់ក្រុមវៀតណាមក្រោមការដឹកនាំរបស់គ្រូបង្វឹកបារាំង លោក Philippe Troussier ។

ប៉ុន្មានឆ្នាំកន្លងទៅ ក្រុមវៀតណាមបានបង្ហាញកម្លាំងដែលស្ទើរតែមិនមានគូប្រៀបនៅអាស៊ីអាគ្នេយ៍ ប៉ុន្តែថ្មីៗនេះ ពួកគេហាក់បានថមថយកម្លាំងទៅហើយ ពិសេសគឺនៅមុនការប្រកួតនៅស៊ីហ្កេមលើកទី 32 នេះ។ នៅ Doha Cup កាលពីពេលថ្មីៗនេះ ក្រុមជម្រើសជាតិវៀតណាមសុទ្ធតែបរាជ័យ។ ពេលត្រលប់មកប្រទេសទាត់មិត្តភាពជាមួយក្លឹប TP HCM និងក្លឹប Ba Ria – Vung Tau ក្រុមជម្រើសជាតិវៀតណាមក៏បន្តចាញ់បួនគ្រាប់ និងឈ្នះតែពីរគ្រាប់។

នៅស៊ីហ្គេមលើកទី 30 និង 31 ក្រុមជម្រើសជាតិវៀតណាមសុទ្ធតែដណ្ដើមបានមេដាយមាស។ ក៏ប៉ុន្តែ នៅស៊ីហ្គេមលើកនេះ ក្រុមជម្រើសជាតិវៀតណាមត្រូវបានអ្នកខ្លះយល់ថា «បានថមថយកម្លាំង» បើធៀបនឹងក្រុមកីឡាករជំនាន់មុនៗ ព្រោះថា ស៊ីហ្គេមលើកទី 32 មិនអនុញ្ញាតឱ្យប្រើប្រាស់កីឡាករលើសអាយុ ដូច្នេះ ក្រុមកីឡាករសំខាន់ៗមួយចំនួនរបស់វៀតណាមក៏ត្រូវអវត្តមាន ស្របពេលដែលក្រុមកីឡាករវ័យក្មេងបានបង្ហាញភាពទន់ខ្សោយនៅមុនការប្រកួតនៅស៊ីហ្គេមលើកនេះ។

ប្រការខាងលើនេះកំពុងតែជួយឱ្យ U-22 ឡាវមានសង្ឃឹមនៅក្នុងការប៉ះជាមួយ U-22 វៀតណាម នៅល្ងាចថ្ងៃទី 30 មេសានេះ ថ្វីបើពួកគេមិនធ្លាប់បានឈ្នះលើវៀតណាម និងទើបតែឆ្លងផុតវគ្គចែកពូលបានមួយលើកនៅស៊ីហ្គេម (2009)។

«មុននោះ យើងមានគម្លាតឆ្ងាយពីវៀតណាម ប៉ុន្តែចាប់ពីប្រហែលមួយឆ្នាំកន្លង ឡាវចាប់ផ្ដើមរីកចម្រើន ហើយយើងសង្ឃឹមថានឹងធ្វើឱ្យវៀតណាមភ្ញាក់ផ្អើល» គ្រូបង្វឹក Michael Weiss និយាយនៅក្នុងសន្និសិទសារព័ត៌មានកាលពីថ្ងៃទី 29 មេសាដូច្នេះ។

U-22 ឡាវនៅតែមានវត្តមានរបស់ក្រុមកីឡាករច្រើនរូបដែលបានទាត់នៅស៊ីហ្កេមលើកទី 31 ក្នុងនោះមានកីឡាករដើមកំណើតវៀតណាមពីររូបផងដែរ។ ជាងនេះ ពួកគេថែមទាំងមានកីឡាករឡាវដើមកំណើតបរទេសបីរូបផ្សេងទៀតដែលកំពុងទាត់ឱ្យអាល្លឺម៉ង់ អាម៉េរិក និងបារាំង។ ទាំងនេះគឺជាក្ដីសង្ឃឹមមួយផ្សេងទៀតសម្រាប់ឡាវ។

April 30, 2023

ក្រុមមហាសេដ្ឋីដែលរកស៊ីពីបាតដៃទទេ កំពុងមានប្រៀបជាងអ្នកមានក្នុងក្រុម Chaebol នៅ កូរ៉េខាងត្បូង

ស្រទាប់អ្នកជំនួញដែលទើបតែរកស៊ីមានបានក្នុងជំនាន់ថ្មី កំពុងតែគ្រប់គ្រងតារាងចំណាត់ថ្នាក់អ្នកមាននៅប្រទេសកូរ៉េខាងត្បូង ដោយមានប្រៀបជាងសមាជិកនៃក្រុមត្រកូលអ្នកមានៗដែលឈរនៅពីក្រោយបណ្ដាក្រុមហ៊ុនចាស់វស្សា។

Brian Kim ស្ថាបនិកនៃក្រុមហ៊ុនគ្រប់គ្រងកម្មវិធីផ្ញើសារ Kakao គឺជាឧទាហរណ៍លេចធ្លោបំផុត នៅពេល «យកឈ្នះ» លើ «អ្នកស្នងមរតក» របស់ Samsung លោក Jay Y. Lee (Lee Jae-yong) ហើយក្លាយជាអ្នកមានជាងគេបង្អស់នៅប្រទេសកូរ៉េខាងត្បូង ដោយមានទ្រព្យចំនួន 12.9 ពាន់លានដុល្លារអាមេរិក។

ក្រៅពី Brian កូរ៉េខាងត្បូង ក៏នៅមានមហាសេដ្ឋីដែលបានរកស៊ីពីបាតដៃទទេ ជាច្រើនទៀត ដែលកំពុងបង្ហាញឥទ្ធិពលរបស់ខ្លួន ក្នុងនោះមាន Seo Jung-jin ស្ថាបនិកនៃក្រុមហ៊ុនបច្ចេកវិទ្យាជីវសាស្ត្រ Celltrion មានទ្រព្យប្រមាណ 10 ពាន់លានដុល្លារ, Bom Kim (ពលរដ្ឋអាមេរិក ដើមកំណើត កូរ៉េខាងត្បូង) ស្ថាបនិកនៃផ្សារពាណិជ្ជកម្មអនឡាញ Coupang ឬ Chang Byung-gyu ដែលជាម្ចាស់ក្រុមហ៊ុនហ្គេម Krafton។ល។

ការប្រែប្រួលនេះគឺជាសញ្ញាមួយបង្ហាញថា ខឿនសេដ្ឋកិច្ចដែលមានតម្លៃ 1.6 លានលាន (1.6 ទ្រីលាន) ដុល្លារ របស់ កូរ៉េខាងត្បូង កំពុងឈានចូលដល់យុគសម័យរីកចម្រើនថ្មី និងកាត់បន្ថយការពឹងផ្អែកទៅលើតែក្រុម chaebol (ក្រុមត្រកូលអ្នកមានដែលគ្រប់គ្រងបណ្ដាក្រុមហ៊ុនធំៗនៅ កូរ៉េខាងត្បូង) ដែលធ្លាប់បានក្ដោបក្ដាប់អំណាចធំនៅក្នុងសង្គម ដោយនៅពីក្រោយបណ្ដាក្រុមហ៊ុនខ្នាតយក្ស ដូចជា Huyndai, Samsung, LG និង Hanjin។ល។

Brian Kim ស្ថាបនិកនៃក្រុមហ៊ុនគ្រប់គ្រងកម្មវិធីផ្ញើសារ Kakao និងជាអ្នកមានជាងគេនៅ កូរ៉េខាងត្បូង

សាស្ត្រាចារ្យ Kyong-hwan មកពីសាកលវិទ្យាល័យ Sungkyunkwan បានអធិប្បាយថា៖ «នេះគឺជាការប្រែប្រួលវិជ្ជមាន ចំពោះ កូរ៉េខាងត្បូង»។ ក្រុម chaebol កំពុងតែទុកឱកាសឱ្យបណ្ដាក្រុមហ៊ុនថ្មីៗ ដែលចាប់ផ្ដើមលេចធ្លោបន្តិចម្ដង។ នេះបើតាមសារព័ត៌មាន Bloomberg។

សម័យ COVID-19 បានធ្វើឱ្យតម្រូវការនៅក្នុងវិស័យពាណិជ្ជកម្មអនឡាញ កំសាន្ត និងបច្ចេកវិទ្យាជីវសាស្ត្រ កើនឡើងយ៉ាងឆាប់រហ័ស នាំឱ្យក្រុមអ្នកវិនិយោគទម្លាក់លុយរាប់ពាន់លានដុល្លារទៅក្នុងបណ្ដាក្រុមហ៊ុនបច្ចេកវិទ្យាថ្មី។ ខ្ទង់វិនិយោគហានិភ័យ (Risky Investment) ដែលត្រូវបានទម្លាក់មកកាន់ប្រទេសនេះ បានកើនឡើងដល់ 2.7 ពាន់លានដុល្លារអាមេរិក នៅក្នុងពាក់កណ្ដាលដើមឆ្នាំ 2021 ខ្ពស់បំផុតមិនធ្លាប់មានក្នុងអំឡុង ខែ។ នេះបើតាមទិន្នន័យរបស់រដ្ឋាភិបាលកូរ៉េខាងត្បូង។

សាស្ត្រាចារ្យ Kyong-hwan ថ្លែងថា៖ «នេះគឺជាឱកាសល្អសម្រាប់ការរីកចម្រើន និងការប្រមូលទុនរបស់បណ្ដាក្រុមហ៊ុនបច្ចេកវិទ្យាថ្មី»។ លោកបានព្យាករថា កូរ៉េខាងត្បូងនឹងមានមហាសេដ្ឋីថ្មីជាច្រើនទៀតដែលមានប្រៀបជាងបណ្ដាមហាសេដ្ឋី «បុរាណ»។ លោក Kyong-hwan សង្កត់ធ្ងន់ថា៖ «ក្រុមមហាសេដ្ឋីថ្មីគឺជាគំរូដែលជួយឱ្យក្រុមយុវវ័យយល់ថា ពួកគេអាចក្លាយជាអ្នកមានប្រកបដោយភាពឯករាជ្យ ជំនួសឱ្យការទទួលមរតក»៕

August 13, 2021

ថ្នាំព្យាបាលជំងឺ COVID-19 របស់ កូរ៉េខាងត្បូង មានប្រសិទ្ធភាព នៅក្នុងការពិសោធលើមនុស្ស ដំណាក់កាលទីបី

ប្រភពព័ត៌មានពីរដ្ឋធានី សេអ៊ូល បានឱ្យដឹងថា Celltrion Inc. ដែលជាក្រុមហ៊ុនផលិតឱសថធំមួយរបស់ កូរ៉េខាងត្បូង នាថ្ងៃទី14 ខែមិថុនានេះ បានប្រកាសលទ្ធផលនៃការពិសោធលើមនុស្ស ដំណាក់កាលទីបីនៅទូទាំងពិភពលោក ចំពោះ Rekirona ដែលជាថ្នាំព្យាបាលជំងឺ COVID-19 ដោយប្រើប្រាស់អង្គបដិប្រាណ ដែលអភិវឌ្ឍដោយក្រុមហ៊ុននេះផ្ទាល់។

ការពិសោធនេះ គឺជា ផ្នែកដ៏សំខាន់មួយ នៅក្នុងការស្រាវជ្រាវដើម្បីបញ្ជាក់អំពីសុវត្ថិភាព និងប្រសិទ្ធភាពទាំងស្រុងរបស់ថ្នាំ Rekirona។ លទ្ធផលនៃការពិសោធ បានបង្ហាញថា ថ្នាំ Rekirona នេះ បានកាត់បន្ថយពេលវេលានៃការព្យាបាល និងហានិភ័យនៃការធ្លាក់ខ្លួនឈឺធ្ងន់ របស់អ្នកជំងឺ Covid-19។

ជាក់ស្ដែង ថ្នាំ Rekirona កាត់បន្ថយហានិភ័យនៃការធ្លាក់ខ្លួនឈឺធ្ងន់រហូតដល់ 54% បើធៀបអ្នកជំងឺដែលមិនបានប្រើថ្នាំនេះ។ ចំណែករយៈពេលនៃការព្យាបាលជាសះស្បើយ ក៏ត្រូវបានកាត់បន្ថយជាមធ្យម 4.9ថ្ងៃ ចំពោះអ្នកជំងឺ Covid-19 ទាំងអស់ និង 4.7 ចំពោះអ្នកជំងឺ Covid-19 ធ្ងន់ធ្ងរ។

ថ្នាំ Rekirona ត្រូវបាននាយកដ្ឋានគ្រប់គ្រងឱសថរបស់ កូរ៉េខាងត្បូង ផ្ដល់ការអនុញ្ញាតឱ្យធ្វើចរាចរណ៍ កាលពីខែកុម្ភៈ ឆ្នាំ2021។ ប្រការនេះ នាំឱ្យ Rekirona ក្លាយជាថ្នាំព្យាបាលជំងឺ Covid-19 ដំបូង ដែលត្រូវបានផលិតនៅប្រទេស កូរ៉េខាងត្បូង។

Rekirona គឺជាអង្គបដិប្រាណម៉ូណូក្លូន (monoclonal antibodies) ដែលមានសារធាតុប្រឆាំងនឹងវីរុស Covid-19។ អង្គបដិប្រាណម៉ូណូក្លូន គឺជា ប្រូតេអ៊ីន មួយប្រភេទ ដែលត្រូវបានរាងកាយផលិតឡើង ដើម្បីជ្រៀតចូលកោសិកាដែលបានឆ្លងវីរុស។ ថ្នាំនេះ កន្លងមក ត្រូវបានអនុញ្ញាតឱ្យប្រើប្រាស់បន្ទាន់រួចហើយ នៅក្នុងប្រទេសជាច្រើនក្នុងពិភពលោក។

ក្រុមហ៊ុន Celltrion មានគម្រោងដាក់ពាក្យសុំច្បាប់ធ្វើចរាចរណ៍ថ្នាំនេះ ទៅកាន់ស្ថាប័នគ្រប់គ្រងអាហារ និងឱសថ សហរដ្ឋអាមេរិក (FDA) និងស្ថាប័នគ្រប់គ្រងឱសថ អឺរ៉ុប (EMA) នៅក្នុងឆ្នាំនេះ៕

ប្រភព៖ Reuters
ប្រែសម្រួល៖ បុត្រា

June 14, 2021

អតីតកម្មកររោងចក្ររបស់ Samsung ក្លាយជាអ្នកមានជាងគេលំដាប់ទី2នៅកូរ៉េខាងត្បូង

មហាសេដ្ឋី Seo Jung-jin ដែលជាសហស្ថាបនិកក្រុមហ៊ុនឱសថ Celltrion បានក្លាយជាមហាសេដ្ឋីមួយរូបក្នុងចំណោមមហាសេដ្ឋីតិចតួចបំផុតដែលទ្រព្យបានកើនឡើងយ៉ាងឆាប់រហ័សនៅក្នុង “សម័យ COVID-19 ដោយសារតម្លៃមូលបត្ររបស់ក្រុមហ៊ុននេះ ស្ថិតក្នុងលំដាប់ “មហាលោតផ្លោះ”។

Celltrion គឺជាក្រុមហ៊ុនឱសថបច្ចេកវិទ្យាជីវសាស្ត្រ ប៉ុន្តែ នៅពេល COVID-19 បានកើតឡើង តម្រូវការផ្នែកសម្ភារសុខាភិបាលក៏បានកើនឡើងខ្ពស់ ដូច្នេះ ក្រុមហ៊ុននេះក៏បានងាកទៅផលិតសម្ភារសុខាភិបាល និងអភិវឌ្ឍថ្នាំព្យាបាល COVID-19។

ក្ដីសង្ឃឹមរបស់ទីផ្សារទាក់ទិននឹងឈុតឧបករណ៍ធ្វើតេស្តថ្មី និងថ្នាំព្យាបាល COVID-19 ដែលផលិតដោយក្រុមហ៊ុនកូរ៉េខាងត្បូង Celltrion បានជួយឱ្យទ្រព្យរបស់ស្ថាបនិក Seo Jung-jin កើនឡើងយ៉ាងឆាប់រហ័សដែលនឹកស្មានមិនដល់។

ចាប់តាំងពី Forbes បានចេញផ្សាយបញ្ជីរាយនាមនៃបណ្ដាអ្នកមានបំផុតនៅក្នុងពិភពលោកកាលពីថ្ងៃទី18មីនា ទ្រព្យរបស់អ្នកជំនួញ Seo Jung-jin អាយុ62ឆ្នាំ ក៏បានកើនបន្ថែម2.2ពាន់លានដុល្លារ ធ្វើឱ្យទ្រព្យសរុបរបស់លោកកើនឡើងដល់8.3ពាន់លានដុល្លារ ខណៈដែលតម្លៃមូលបត្ររបស់ Celltrion បានឡើង37.6%។

ភាគហ៊ុនិកនានាដែលកំពុងវិនិយោគទៅលើ Celltrion សង្ឃឹម និងជឿជាក់ថា ក្រុមហ៊ុននេះនឹងទទួលបានជោគជ័យក្នុងការអភិវឌ្ឍ និងផលិតថ្នាំព្យាបាល COVID-19 នាពេលឆាប់ៗខាងមុខ។

លោក Kwon Ki-sung ដែលជានាយកផ្នែកស្រាវជ្រាវ និងអភិវឌ្ឍន៍របស់ក្រុមហ៊់ុន Celltrion បានឱ្យដឹងថា “ជាមួយនឹងដំណាក់កាលនៃការអភិវឌ្ឍអង្គបដិប្រាណប្រឆាំងនឹងវីរុស COVID-19 យ៉ាងឆាប់រហ័ស យើងនឹងចាប់ផ្ដើមធ្វើតេស្តថ្នាំនៅលើមនុស្សក្នុងខែកក្កដាខាងមុខ”។

អតីតកម្មកររោងចក្ររបស់ Samsung ក្លាយជាអ្នកមានលំដាប់ទី2នៅកូរ៉េខាងត្បូង — ឧបករណ៍សម្រាប់ធ្វើតេស្តរកវីរុសCOVID-19

លោក Kwon Ki-sung បន្តថា “យើងខ្ញុំក៏កំពុងតែស្ថិតក្នុងដំណាក់កាលអភិវឌ្ឍអង្គបដិប្រាណដ៏អស្ចារ្យមួយ ដែលត្រូវបានហៅថា cocktail អង្គបដិប្រាណ ហើយតាមគម្រោង យើងនឹងបញ្ចេញឧបករណ៍ធ្វើតេស្តលឿនដោយស្វ័យប្រវត្ត នៅក្នុងរដូវក្ដៅនេះ”។ លោកបញ្ជាក់ថា ឧបករណ៍ធ្វើតេស្តរកមេរោគ COVID-19 របស់ Celltrion អាចឱ្យដឹងលទ្ធផលដោយប្រើពេលត្រឹមតែពី15-20នាទីប៉ុណ្ណោះ។

ពីកម្មកររោងចក្រ ក្លាយជាមហាសេដ្ឋីពិភពលោក

មហាសេដ្ឋី Seo ធ្លាប់ជាកម្មករធ្វើការនៅក្នុងរោងចក្រផលិតគ្រឿងបន្លាស់អេឡិចត្រូនិចរបស់ក្រុមហ៊ុន Samsung ក្នុងអំឡុងទសវត្សរ៍ឆ្នាំ1980។ ក្រោយមក លោកក៏បានក្លាយជានាយកប្រតិបត្តិជាន់ខ្ពស់នៃរោងចក្រផលិតរថយន្តកូរ៉េខាងត្បូង Daewoo Motor ប៉ុន្តែ លោកបានចាកចេញពីក្រុមហ៊ុននេះ ក្នុងវិបត្តិហិរញ្ញវត្ថុអាស៊ីកាលពីឆ្នាំ1999។

លោក Seo បានរៀបរាប់អំពីអតីតកាលរបស់លោកថា “ម្ដាយក្មេករបស់ខ្ញុំបានហៅទូរស័ព្ទមកខ្ញុំ ដោយសួរខ្ញុំថា តើខ្ញុំនឹងធ្វើអ្វីដើម្បីរកប្រាក់? ពេលនោះ ខ្ញុំមានអារម្មណ៍ថា ហត់នឿយ ធុញទ្រាន់ជាមួយនឹងសម្ដីរអ៊ូរទាំរបស់គាត់ខ្លាំងណាស់ ដូច្នេះ ខ្ញុំក៏បានសម្រេចចិត្តបើកក្រុមហ៊ុនផ្ទាល់ខ្លួនមួយ”។

ជាមួយនឹងមិត្តភក្ដិមួយចំនួននៅឯក្រុមហ៊ុន Daewoo លោក Seo បានបង្កើត Celltrion កាលពីឆ្នាំ2020 ហើយបច្ចុប្បន្ន លោកបានក្លាយជាអ្នកមានបំផុតលំដាប់ទី2នៅប្រទេសកូរ៉េខាងត្បូង។

Celltrion ដែលមានទីស្នាក់ការធំនៅទីក្រុង Incheon បានចូលទីផ្សារភាគហ៊ុនកាលពីឆ្នាំ2008។ ក្រោយរកស៊ីរយៈពេល10ឆ្នាំ តម្លៃទីផ្សាររបស់ក្រុមហ៊ុននេះ បានកើនដល់ 27.7លានលានវ៉ុន(ប្រមាណជា 22.8ពាន់លានដុល្លារអាមេរិក)។

Celltrion មិនមែនជាក្រុមហ៊ុនបច្ចេកវិទ្យាជីវសាស្ត្រតែមួយគត់នៅកូរ៉េខាងត្បូងនោះទេ ដែលកំពុងចូលរួមប្រកួតក្នុងការអភិវឌ្ឍ និងផលិតថ្នាំព្យាបាល COVID-19។ គូប្រជែងដ៏សំខាន់របស់ពួកគេនោះគឺ Samsung BioLogics ដែលជាក្រុមហ៊ុនបុត្រសម្ព័ន្ធរបស់ Samsung ដែលបានប្រកាសកាលពីថ្ងៃទី10មេសាថា ខ្លួនកំពុងសហការជាមួយ Vir Technology របស់សហរដ្ឋអាមេរិក តាមរយៈកិច្ចព្រមព្រៀងដែលមានតម្លៃ 362លានដុល្លារដើម្បីផលិតថ្នាំប្រឆាំងនឹងវីរុស COVID-19៕

ប្រភព៖ Forbes

April 21, 2020

កូរ៉េខាងត្បូងវឹលវល់! អ្នកជំងឺកូវីដ-19 ជាហើយ ឈឺឡើងវិញម្ដងទៀត(មេរោគអាចគ្រាន់តែសន្លប់ រួចហើយងើបឡើងវិញ…)

វេបសាយ ដេលី មែល បានរាយការណ៍ថា កាលពីថ្ងៃទី6 មេសា មជ្ឈមណ្ឌលគ្រប់គ្រង និងការពារជំងឺនៃប្រទេសកូរ៉េខាងត្បូង ឬ KCDC បានថ្លែងថា ប្រទេសកូរ៉េខាងត្បូង បានរកឃើញអ្នកជំងឺដែលជាសះស្បើយពីកូវីដ-19 ហើយ បែរជាត្រឡប់មកឈឺឡើងវិញម្ដងទៀតយ៉ាងតិច 51នាក់ហើយ ដែលការរកឃើញនេះ បានធ្វើឱ្យកើតមានការភ័យខ្លាចក្រែងថា មេរោគវីរុសអាចនឹងមានសមត្ថភាពត្រឡប់មកបញ្ចេញឫទ្ធិឡើងវិញបានម្ដងទៀត បើទោះបីជាអ្នកជំងឺម្នាក់នោះ មានលទ្ធផលអវិជ្ជមាននៃមេរោគវីរុសនោះហើយក៏ដោយ ក៏អាចនឹងត្រឡប់មកវិជ្ជមានបានម្ដងទៀតដែរ។

KCDC បានបញ្ជាក់ថា អ្នកជំងឺមកពីទីក្រុង ធែគូ ជាទីក្រុងដែលមានការឆ្លងរាលដាលខ្លាំងក្លាបំផុតនៅក្នុងប្រទេសកូរ៉េខាងត្បូង ត្រូវបានបង្ខាំងឱ្យនៅដោយឡែក ក្រោយពីបានរកឃើញថា មានឆ្លងមេរោគ ហើយនៅពេលរកឃើញថា លែងមានមេរោគហើយ និងត្រូវបានអនុញ្ញាតឱ្យចេញពីមន្ទីរពេទ្យ តែបែរជារកឃើញថា ឈាមមានលទ្ធផលវិជ្ជមានជាថ្មីម្ដងទៀត ដោយ KCDC បានបញ្ជាក់ថា មើលទៅហាក់ដូចជា វីរុសអាចវិលត្រឡប់មកមានឫទ្ធិជាថ្មីឡើងវិញបានម្ដងទៀត និងមិនមែនជាការត្រឡប់ទៅឆ្លងមេរោគម្ដងទៀតនោះទេ។

អ្នកវិទ្យាសាស្ត្ររបស់ KCDC ជឿថា មេរោគវីរុសអាចនឹងគ្រាន់តែឈប់សម្រាកបណ្ដោះអាសន្ន ក្នុងកម្រិតមួយដែលមិនអាចពិនិត្យរកឃើញនៅក្នុងកោសិកាមនុស្ស តែក៏នៅតែមិនទាន់ដឹងពីមូលហេតុពិតប្រាកដនៃការត្រឡប់មកមានឫទ្ធិម្ដងទៀតរបស់វីរុសនោះថា តើហេតុអី ទើបវាងើបឡើងវិញបាននៅឡើយ?។

យ៉ាងណាក៏ដោយ ជាបឋម បណ្ដាអ្នកជំនាញការទាំងអស់បានបញ្ជាក់ថា នៅមិនទាន់មានភ័ស្តុតាងដែលអាចពិសោធបានថា វីរុសអាចនឹងសម្រាក ហើយត្រឡប់មកបញ្ចេញឫទ្ធិម្ដងទៀតនៅឡើយ តែលទ្ធផលពីការស្រាវជ្រាវនៅលើសត្វស្វា បានរកឃើញថា មានលទ្ធផលផ្ទុយពីគ្នា និងបានបញ្ជាក់ទៀតថា ក្នុងករណីដែលអ្នកជំងឺរកឃើញលទ្ធផលវិជ្ជមាន 2ដង គឺជារឿងប្រក្រតី ព្រោះលទ្ធផលនៃការពិនិត្យដែលខុសឆ្គង អាចកើតឡើងបានរៀងរាល់អត្រា 1ភាគ5(5នាក់ អាចពិនិត្យខុស 1នាក់) ។

លោក ផូល ហាន់ធើរ៍ សាស្ត្រាចារ្យអ្នកជំនាញការផ្នែកជំងឺឆ្លង របស់មហាវិទ្យាល័យ អ៊ីស អ៊ែងហ្គ្លៀ បានបង្ហើបប្រាប់ ដេលី មែល អនឡាញថា លោកឯកភាពចំពោះរឿងដែលថា មិនគួរអាចនឹងមានការត្រឡប់មកកើតម្ដងទៀតបានឡើយ តែក៏មិនគិតថា វាជាការដែលមេរោគវីរុសរស់ឡើងវិញ និងត្រឡប់មកមានឫទ្ធិម្ដងទៀតបានដែរ។ តាមការយល់ឃើញផ្ទាល់ខ្លួន ដែលអាចនឹងអធិប្បាយអំពីរឿងនេះបាននោះគឺ ជា “លទ្ធផលអវិជ្ជមានក្លែងក្លាយ” ឬ “លទ្ធផលអវិជ្ជមានបណ្ដោះអាសន្ន” ដែលលោកបានថ្លែងថា លទ្ធផលនៃការពិនិត្យរកមេរោគវីរុសកូរ៉ូណានេះ អាចនឹងទទួលបានលទ្ធផលដែលខុសឆ្គងបានដល់ទៅ 20-30ភាគរយ ហើយលោកជឿថា លទ្ធផលនៃការពិនិត្យលើអ្នកជំងឺជនជាតិកូរ៉េខាងត្បូង មុននឹងបានទទួលការអនុញ្ញាតឱ្យចាកចេញពីការបង្ខាំងខ្លួននោះ ទទួលបានលទ្ធផលដែលខុសឆ្គង ដែលបង្ហាញឱ្យឃើញថា អ្នកទាំងនោះជាហើយ តែការពិតទៅ គឺនៅមានមេរោគនៅឡើយ។

ចំណែកលោក ចង យុន ខយ៉ុង អគ្គលេខាធិការ KCDC បានថ្លែងថា KCDC បានបញ្ជូនក្រុមមន្ត្រីស៊ើបអង្កេត ចុះទៅដល់ទីតាំងក្នុងទីក្រុងធែគូ រួចហើយ ដើម្បីពិនិត្យមើលរឿងដែលកើតឡើងនេះ៕

ប្រភព៖ សារព័ត៌មានបរទេស

April 8, 2020

121ប្រទេស ស្រែកសុំ “កូរ៉េខាងត្បូង” ឱ្យជួយចាត់ចែងរកឈុតពិនិត្យមេរោគវីរុសឱ្យផង…

កាលពីថ្ងៃទី1 ខែមេសា ម្សិលមិញ ទីភ្នាក់ងារសាររព័ត៌មានរ៉យទ័រ បានរាយការណ៍ព័ត៌មាន ដោយយោងតាមការបង្ហើបឱ្យដឹងពីមន្ត្រីក្រសួងការបរទេសនៃប្រទេសកូរ៉េខាងត្បូងដែលបានបញ្ជាក់ថា កូរ៉េខាងត្បូងបានទទួលការសំណូមពរពីប្រទេសចំនួន121 ទូទាំងពិភពលោក ឱ្យជួយចាត់ចែងរកឈុតពិនិត្យមេរោគវីរុសឱ្យប្រទេសរបស់ពួកគេទាំងនោះ ដែលម្នាក់ៗសុទ្ធតែកំពុងតស៊ូទប់ទល់យ៉ាងខ្លាំងក្លានឹងការឆ្លងរាលដាលរបស់វីរុសកូវីដ-19 និងថា កូរ៉េខាងត្បូង បានតែងតាំងគណៈកម្មការពិសេសមួយឡើង ដើម្បីពិចារណាចំពោះរឿងនេះថា តើនឹងត្រូវផ្ដល់ការជួយសង្គ្រោះយ៉ាងណា ដែលអាចជាការនាំចេញឈុតពិនិត្យមេរោគវីរុស(បែបពាណិជ្ជកម្ម) ឬក៏ផ្ដល់ការជួយសង្គ្រោះផ្នែកមនុស្សធម៌?។

យ៉ាងណាក៏ដោយ មន្ត្រីក្រសួងការបរទេសកូរ៉េខាងត្បូង មិនបានបង្ហើបឱ្យដឹងថា មានប្រទេសណាខ្លះដែលសំណូមពរសុំការជួយសង្គ្រោះនេះទេ តែក្រុមហ៊ុនផលិតឈុតពិនិត្យមេរោគវីរុសរបស់កូរ៉េខាងត្បូងជាច្រើន មានការធ្វើកិច្ចសន្យារៀបចំចាត់ចែងរកឧបករណ៍ខាងផ្នែកវេជ្ជសាស្ត្រទាំងនេះជាមួយប្រទេសអាមេរិក និងប្រទេសជាច្រើនទៀត រួមទាំងប្រទេសអ៊ីតាលីដែលកំពុងមានការឆ្លងរាលដាលយ៉ាងធ្ងន់ធ្ងររបស់វីរុសកូវីដ-19នេះរួចហើយផងដែរ។ ខណៈដែលកាលពីសប្ដាហ៍មុន លោកប្រធានាធិបតី ដូណាល់ ត្រាំ បានចេញមកសុំអង្វរឱ្យកូរ៉េខាងត្បូងជួយចាត់ចែងបញ្ជូនឧបករណ៍ខាងវេជ្ជសាស្ត្រឱ្យទៅសហរដ្ឋអាមេរិកផង ព្រមទាំងបានសន្យាថា នឹង ជួយ សម្រួល និងបើកផ្លូវឱ្យក្រុមហ៊ុនអ្នកផលិតឧបករណ៍ទាំងនោះរបស់កូរ៉េខាងត្បូង បានទទួលការអនុញ្ញាតពីអ្នកគ្រប់គ្រងច្បាប់របស់សហរដ្ឋអាមេរិកក្នុងការចាត់ចែងបញ្ជូនឧបករណ៍ខាងវេជ្ជសាស្ត្រទាំងនោះចូលទៅប្រទេសអាមេរិកទៀតផង។

ទាំងអស់នេះ ក្រុមហ៊ុនអ្នកផលិតតិចណូឡូជីសរីរាង្គរបស់កូរ៉េខាងត្បូង បានបង្កើនកម្លាំងការផលិតឧបករណ៍ខាងវេជ្ជសាស្ត្រទាំងនោះយ៉ាងពេញទំហឹង ដើម្បីធានាដល់តម្រូវការក្នុងទីផ្សារពិភពលោកដែលកំពុងហក់ឡើងខ្ពស់ក្រោយកើតមានជំងឺឆ្លងរាលដាលនេះ ដែលថែមទាំងធ្វើឱ្យតម្លៃភាគហ៊ុនរបស់បណ្ដាក្រុមហ៊ុនក្នុងផ្នែកការផលិតនេះ ស្ទុះឡើងខ្លាំងជិត 3ដង តាំងពីពេលចាប់ផ្ដើមឆ្នាំថ្មីកន្លងមកទៀតផង ខណៈដែលយុទ្ធនាការតម្រង់ទៅរកការពិនិត្យរកមេរោគវីរុសយ៉ាងទំលំទូលាយចំនួនដ៏ច្រើន និងការតាមដានស្វែងរកអ្នកប៉ះពាល់ និងទាក់ទងនឹងអ្នកឆ្លងជំងឺរបស់កូរ៉េខាងត្បូង បានក្លាយជាយុទ្ធសាស្ត្រសំខាន់ ដែលជួយឱ្យកូរ៉េខាងត្បូងអាចពន្យឺតការឆ្លង រាលដាលរបស់មេរោគមរណៈនេះនៅក្នុងប្រទេសបាន ដែលខុសពីពេលមុននេះ កូរ៉េខាងត្បូង គឺជាប្រទេសមួយដែលមានការឆ្លងរាលដាលរបស់មេរោគកូវីដ-19 ធ្ងន់ធ្ងរខ្លាំងបំផុត បន្ទាប់ពីចិន៕

ប្រភព៖ សាព័ត៌មានបរទេស

April 2, 2020

Tag: កូរ៉េខាងត្បូង