សម្រាប់ឆ្នាំនេះ អ៊ុយក្រែន ឈរលើចំណាត់ថ្នាក់ទី ២២ ក្នុងចំណោមប្រទេសចំនួន ១៤០ ដែលត្រូវបានរាប់ចូលក្នុងតារាងចំណាត់ថ្នាក់ស្ដីពីអំណាចយោធា (Military Strength Ranking) របស់ Globalfirepower។ ចំណែក រុស្ស៊ី វិញ ឈរលំដាប់ថ្នាក់ទី ២ បន្ទាប់ពី សហរដ្ឋអាម៉េរិក។
រដ្ឋមន្ត្រីការបរទេសរបស់ អ៊ុយក្រែន Kuleba បានថ្លែងថា រុស្ស៊ី បានចាប់ផ្ដើមបញ្ឆេះសង្គ្រាមទូទៅ សំដៅលើប្រទេសរបស់លោក ប៉ុន្តែ ទីក្រុងមូស្គូ បញ្ជាក់ថា នេះគ្រាន់តែជាយុទ្ធនាការយោធា។
«ទីក្រុងដ៏សុខសាន្តរបស់ អ៊ុយក្រែន កំពុងរងការវាយប្រហារ។ នេះគឺជាសង្គ្រាមឈ្លានពាន។ អ៊ុយក្រែន នឹងការពារខ្លួន និងដណ្ដើមយកជ័យជំនះ។ ពិភពលោកត្រូវតែទប់ស្កាត់ ពូទីន។ នៅពេលនេះភ្លាម! រដ្ឋមន្ត្រីការបរទេសរបស់ អ៊ុយក្រែន Dmytro Kuleba បានបង្ហោះសារលើ Twitter ដូច្នេះ នៅថ្ងៃនេះ។
ប្រកាសរបស់លោក Kuleba ត្រូវបានលើកឡើងក្រោយពី ប្រធានាធិបតីរុស្ស៊ី លោក វ្លាឌីមៀ ពូទីន បានប្រកាសបើកយុទ្ធនាការយោធាពិសេសនៅតំបន់ Donbass ដែលជាទឹកដីរបស់ អ៊ុយក្រែន និងបានស្នើឱ្យទាហានអ៊ុយក្រែន ទម្លាក់អាវុធ។
មន្ត្រីរដ្ឋាភិបាលអ៊ុយក្រេន បានឱ្យដឹងថា មជ្ឈមណ្ឌលននានៃទីបញ្ជាការយោធានៅ រដ្ឋធានី Kiev និង Kharkov បានរងការវាយប្រហារដោយរ៉ុក្កែតបំពាក់ប្រព័ន្ធនាំផ្លូវ និងកាំជ្រួចងផ្លោង។
បច្ចុប្បន្ន ព័ត៌មានទាក់ទងនឹងការវាយប្រហារខាងលើ មិនទាន់ត្រូវបានគេឱ្យដឹងច្បាស់នៅឡើយ អំពីការខូចខាត និងប្រភេទអាវុធដែលត្រូវបានប្រើប្រាស់ក្នុងការវាយប្រហារនោះ។ នេះបើតាមសារព័ត៌មាន Ukrainska Pravda។
«សង្គ្រាមបានចាប់ផ្ដើមហើយ។ នៅពេលការវាយប្រហារពីអាកាស ពួកគេនឹងសំដៅលើហេដ្ឋារចនាសម្ព័ន្ធ គោលដៅយោធា។ ខ្ញុំបានឮសំឡេងផ្ទុះចំនួន ៣ នៅ ទីក្រុង Kiev» Andrey Buzarov អ្នកជំនាញផ្នែកនយោបាយ ធ្វើការក្នុងស្ថាប័នសភា និងក្រសួងការបរទេសអ៊ុយក្រែន ឱ្យដឹងដូច្នេះ។
ប្រធានាធិបតីរុស្ស៊ី បានបញ្ជាឱ្យលើកទ័ពចូលលុកលុយ អ៊ុយក្រែន ក្នុងគ្រាដែល ក្រុមប្រឹក្សាសន្តិសុខនៃអង្គការសហប្រជាជាតិ កំពុងបើកកិច្ចប្រជុំបន្ទាន់ នៅ ទីក្រុងនីវយ៉ក សហរដ្ឋអាម៉េរិក ស្ដីពីស្ថានការណ៍នៅ អ៊ុយក្រែន។
«ប្រធានាធិបតី ពូទីន ចូរទប់ស្កាត់កងទ័ព កុំឱ្យវាយប្រហារលើ អ៊ុយក្រែន ចូរបង្កើតឱកាសសម្រាប់សន្តិភាព មានមនុស្សជាច្រើនបានបាត់បង់ជីវិតរួចទៅហើយ» អគ្គលេខាធិការនៃ អង្គការសហប្រជាជាតិ លោក Antonio Guterres បានថ្លែងដូច្នេះ។
ការថ្លែងរបស់ លោក Antonio Guterres នេះ ត្រូវបានធ្វើឡើងភ្លាមៗ បន្ទាប់ពី ប្រធានាធិបតីរុស្ស៊ី បានបញ្ជាឱ្យលើកទ័ពចូលលុកលុយ អ៊ុយក្រែន ក្រោមលេសថា មានការស្នើឱ្យជួយពីក្រុមមេដឹកនាំតំបន់ផ្ដាច់ខ្លួននៅ Donbass និងដើម្បីរក្សាសន្តិភាព។
តំណាងរបស់ សហរដ្ឋអាម៉េរិក នៅ អង្គការសហប្រជាជាតិ លោកស្រី Linda Thomas-Greenfield ព្រមានថា បើសិន រុស្ស៊ី ធ្វើសកម្មភាពយោធា នោះមនុស្ស ៥ លាននាក់ អាចនឹងត្រូវភៀសខ្លួន និងបង្កជាវិបត្តិជនភៀសខ្លួនថ្មីនៅ អឺរ៉ុប។
ប្រធានាធិបតីសហរដ្ឋអាម៉េរិក លោក ចូ បៃដិន ក៏បានថ្កោលទោសចំពោះទង្វើរបស់ រុស្ស៊ី ថា ជា «ការវាយប្រហារដោយគ្មានមូលដ្ឋាន និងមិនសមហេតុផល» សំដៅលើ អ៊ុយក្រែន។ លោកថា នឹង «បង្កទុក្ខសោកធ្ងន់ធ្ងរ ដល់មនុស្ស និងទ្រព្យសម្បត្តិ»។ «ពិភពលោក នឹងចាប់បង្ខំឱ្យ រុស្ស៊ី ទទួលខុសត្រូវ» លោក បៃដិន បញ្ជាក់ និងបន្ថែមថា លោកនឹងធ្វើសេចក្ដីថ្លែងការណ៍ស្ដីពី «ផលវិបាក» ចំពោះ ប្រទេសរុស្ស៊ី នៅពេលបន្តិចិទៀតនេះ។
ប្រធានាធិបតីរុស្ស៊ី បានប្រកាសបើកយុទ្ធនាការកងទ័ពពិសេសនៅតំបន់ Donbass ស្ថិតក្នុងភាគខាងកើតនៃ ប្រទេសអ៊ុយក្រែន និងស្នើឱ្យកងទ័ពរបស់ អ៊ុយក្រែន នៅក្នុងតំបន់នេះ ទម្លាក់អាវុធ។
«ស្ថានការណ៍បាននាំឱ្យយើងត្រូវសម្រេចចិត្តធ្វើសកម្មភាពដាច់ខាត និងជាបន្ទាន់នេះ។ សាធារណរដ្ឋប្រជាមានិត Donbass (DPR) បានស្នើឱ្យ រុស្ស៊ី ផ្ដល់ជំនួយ» ប្រធានាធិបតីរុស្ស៊ី លោក វ្លាឌីមៀ ពូទីន បានប្រកាសព័ត៌មានដ៏គួរឱ្យភ្ញាក់ផ្អើលនេះនៅលើកញ្ចក់ទូរទស្សន៍កាលបីវេលាម៉ោង ៦ ព្រឹក (ម៉ោង ១០ នៅ ភ្នំពេញ)។
តំបន់ Donbass ដែលរួមមានខេត្ត ចំនួន ២ គឺ Donetsk និង Luhansk បានក្លាយជាចំណុចក្ដៅនៃសង្គ្រាមដណ្ដើមទឹកដី រវាង អ៊ុយក្រែន និងក្រុមផ្ដាច់ខ្លួនដែលគាំទ្រដោយ រុស្ស៊ី ចាប់តាំងពីឆ្នាំ ២០១៤ បណ្ដាលឱ្យមនុស្សជាង ១៤ ម៉ឺននាក់ បានបាត់បង់ជីវិត។ លោក ពូទីន កាលពីថ្ងៃទី ២១ កុម្ភៈ បានទទួលស្គាល់ខេត្តទាំងនេះជាប្រទេសឯករាជ្យ។
ទន្ទឹមនឹងការប្រកាសចល័តទ័ពទៅកាន់តំបន់ Donbass លោក ពូទីន ក៏បានស្នើឱ្យកងទ័ពរបស់ រដ្ឋាភិបាលអ៊ុយក្រែន នៅតំបន់នេះ ទម្លាក់អាវុធផងដែរ។
ប្រកាសរបស់លោក ពូទីន ត្រូវបានធ្វើឡើងបន្ទាប់ពី វិមានក្រឹមឡាំង បានឱ្យដឹងថា ក្រុមមេដឹកនាំតំបន់ផ្ដាច់ខ្លួននៅភាគខាងកើតរបស់ អ៊ុយក្រែន បានស្នើឱ្យ រុស្ស៊ី ចូលជួយ ដើម្បីទប់ទល់នឹងកងទ័ពរដ្ឋាភិបាលរបស់ អ៊ុយក្រែន។
ជាការឆ្លើយតប ប្រធានាធិបតីអ៊ុយក្រែន លោក Vododymyr Zelensky បានអំពាវនាវដល់ ជនជាតិរុស្ស៊ី កុំឱ្យគាំទ្រ «សង្គ្រាមធំនៅ អឺរ៉ុប»។ លោក Vododymyr Zelensky ថ្លែងការណ៍ជា ភាសារុស្ស៊ី ថា «អ្នកណាខ្លះដែលអាចទប់ស្កាត់សង្គ្រាម? នោះគឺមនុស្សលោក។ ខ្ញុំប្រាកដថា មនុស្សទាំងនោះស្ថិតក្នុងចំណោមអស់លោក»។ ប្រធានាធិបតីរូបនេះបន្តថា ប្រជាជនរុស្ស៊ី កំពុងត្រូវបានគេបោកបញ្ឆោតអំពីបញ្ហានៅ អ៊ុយក្រែន។
លោក Vododymyr Zelensky បញ្ជាក់ថា លោកបានហៅទូរស័ព្ទទៅលោក ពូទីន ប៉ុន្តែ មិនមានការឆ្លើយតប និងថា បច្ចុប្បន្ន រុស្ស៊ី កំពុងពង្រាយទ័ពប្រហែល ២ សែននាក់ នៅក្បែរព្រំដែនជាមួយ អ៊ុយក្រែន។
ប្រភពព័ត៌មានពី រដ្ឋធានីវៀងចន្ទន៍ នាថ្ងៃទី ២៤ កុម្ភៈនេះ ឱ្យដឹងថា ប្រទេសឡាវ និង ប្រទេសថៃ បានយល់ព្រមបើកច្រកទ្វារព្រំដែននានាឡើងវិញ ឱ្យបានកាន់តែឆាប់ កាន់តែល្អ។
ការសម្រេចខាងលើនេះត្រូវបានលើកឡើងនៅពេល ឯកអគ្គរដ្ឋទូតឡាវ ប្រចាំ ប្រទេសថៃ Seng Soukhathivong បានចូលសម្ដែងការគួរសម និងពិភាក្សាការងារជាមួយ នាយករដ្ឋមន្ត្រីថៃ លោក Prayut Chan-o-cha។ ក្នុងជំនួបនេះ ភាគីប្រទេសទាំងពីរ បានផ្លាស់ប្ដូរយោបល់គ្នាអំពីសារសំខាន់ និងផលប្រយោជន៍នៃការបើកច្រកព្រំដែនឡើងវិញ ចំពោះវិស័យសេដ្ឋកិច្ច។
នាយករដ្ឋមន្ត្រីថៃ ស្នើឱ្យ ឡាវ ពិចារណាអំពីការអភិវឌ្ឍផ្លូវ R១២ ដែលតភ្ជាប់ប្រទេសចំនួន ៣ គឺ ឡាវ ថៃ និង វៀតណាម ដើម្បីសម្រួលដល់សហគមន៍ក្នុងតំបន់មូលដ្ឋានរបស់ប្រទេសទាំងនេះ។
តាមគម្រោង នាយករដ្ឋមន្ត្រីឡាវ Phankham Viphavanh នឹងធ្វើទស្សនកិច្ច ប្រទេសថៃ នៅពាក់កណ្ដាលឆ្នាំនេះ។ នាយករដ្ឋមន្ត្រីថៃ លោក Prayut បានសម្ដែងការសាទរចំពោះដំណើរទស្សនកិច្ចនោះ និងថា នោះគឺជាឱកាសល្អដើម្បីលើកកម្ពស់ទំនាក់ទំនងរវាងប្រទេសទាំងពីរ ក្នុងគោលដៅរីកចម្រើនយូរអង្វែង៕