ឥណ្ឌា - La Reine Media

រកឃើញរូបចម្លាក់ព្រះពុទ្ធអាយុកាល 1,900 ឆ្នាំនៅប្រទេសអេហ្ស៊ីបបុរាណ

រូបចម្លាក់ព្រះពុទ្ធសក្យមុនីដែលមានសំណាកឆព្វណ្ណរង្សីនៅពីក្រោយ អាចត្រូវបានជនជាតិឥណ្ឌាដែលរស់នៅក្នុងទីក្រុង Berenike ឆ្លាក់ឡើងកាលពីសតវត្សរ៍ទីមួយ។

រូបចម្លាក់ដែលមានអាយុកាល 1,900 ឆ្នាំ និងត្រូវបានរកឃើញនៅក្នុងទីក្រុងផែរបស់អេហ្ស៊ីបបុរាណ Berenike ក្បែរសមុទ្រក្រហមនេះ អាចជាកម្មសិទ្ធិរបស់ជនចំណាកស្រុកម្នាក់មកពីអាស៊ីខាងត្បូង។ នេះបើតាម Live Science ដែលបានចុះផ្សាយកាលពីថ្ងៃទី 02 ឧសភា។ រូបចម្លាក់ព្រះពុទ្ធនេះបរិយាយអំពីព្រះពុទ្ធសក្យមុនីដែលគង់នៅក្នុងតំបន់អាស៊ីខាងត្បូងកាលពី 2,550 ឆ្នាំមុន។ ព្រះពុទ្ធដើមឡើយគឺជារាជបុត្រាមួយអង្គ ប៉ុន្តែក្រោយមកបានបោះបង់គ្រប់យ៉ាងដើម្បីសាងព្រះផ្នួស។

យោងតាម Steven Sidebotham សាស្ត្រាចារ្យផ្នែកប្រវត្តិសាស្ត្រនៅសាកលវិទ្យាល័យ Delaware និងជាសហប្រធានរបស់គម្រោង Berenike រូបចម្លាក់ខាងលើត្រូវបានបង្កើតឡើងចន្លោះពីឆ្នាំ 90 ដល់ឆ្នាំ 140 ក្នុងសម័យចក្រភពរ៉ូមដែលគ្រប់គ្រងប្រទេសអេហ្ស៊ីប។ អេហ្ស៊ីប និងឥណ្ឌាមានទំនាក់ទំនងពាណិជ្ជកម្មជាច្រើនក្នុងសម័យនោះ។

ក្រៅពីរូបចម្លាក់នេះ ក្រុមបុរាណវិទូក៏បានរកឃើញចម្លាក់ជាអក្សរសំស្ក្រឹតនៅ Berenike ផងដែរ។ បើទោះអក្សរចម្លាក់នេះត្រូវបានបំផ្លាញ ប៉ុន្តែអ្នកស្រាវជ្រាវដឹងថា វាត្រូវបានបង្កើតឡើងក្នុងសម័យកាលដែលត្រួតត្រាដោយព្រះចៅអធិរាជរ៉ូម៉ាំង Marcus Julius Philippus ដែលគ្រងរាជពីឆ្នាំ 244 ដល់ឆ្នាំ 249។ សាស្ត្រាចារ្យ Sidebotham និងសហការីកំពុងរៀបចំ ត្រៀមសម្រាប់ការប្រកាសអំពីរបកគំហើញនេះនៅលើទស្សនាវដ្ដី។

យោងតាមអ្នកស្រាវជ្រាវ អក្សរចម្លាក់ជាភាសាសំស្ក្រឹតបង្ហាញថា មានសហគមន៍អ្នកជំនួញអេហ្ស៊ីបមួយរស់នៅក្នុងដែនដីអេហ្ស៊ីបបុរាណ ពោលគឺពួកគេមិនមែនគ្រាន់តែឆ្លងកាត់ទីនោះដើម្បីធ្វើជំនួញឡើយ។ ការកត់ត្រាក្នុងប្រវត្តិសាស្ត្រក៏បានបង្ហាញថា មានជនជាតិឥណ្ឌារស់នៅក្នុងតំបន់ Alexandria ផងដែរ៕

May 3, 2023

ស្ពានសម្រាប់ផ្លូវរថភ្លើងខ្ពស់ជាងគេបង្អស់លើពិភពលោក

(ឥណ្ឌា) – ស្ពាន Chenab ដែលមានកម្ពស់ 359 ម៉ែត្រធៀបនឹងផ្ទៃទឹកទន្លេ Chenab ក្នុងតំបន់ Jammu និង Kashmir គ្រោងនឹងត្រូវបានដាក់ឱ្យប្រើប្រាស់ចាប់ពីចុងខែធ្នូ 2023 ឬដើមខែមករា 2024។

ស្ពានដែលមានប្រវែង 1,315 ម៉ែត្រនេះ ស្ថិតក្នុងគម្រោងនាំយកបណ្ដាញផ្លូវដែកទៅកាន់តំបន់ជ្រលងភ្នំ Kashmir។ ក្រៅពីស្ពាន Chenab គម្រោងផ្លូវដែក Udhampur-Srinagar-Baramulla (USBRL) ក៏មានទាំងផ្លូវរូងក្រោមដីវែងជាងគេប្រចាំប្រទេស និងស្ពានខ្សែកាបដំបូងសម្រាប់ផ្លូវដែកឥណ្ឌាផងដែរ។ នេះបើតាមទីភ្នាក់ងារសារព័ត៌មាន CNN។

សម្រាប់នាយករដ្ឋមន្ត្រីឥណ្ឌា Narendra Modi ការវិនិយោគទៅលើហេដ្ឋារចនាសម្ព័ន្ធដូចស្ពាន Chenab និងគម្រោង USBRL ជាដើម គឺជាវិធីដែលមានប្រសិទ្ធភាពដើម្បីបង្កើនការតភ្ជាប់ក្នុងសង្គម ភ្ជាប់តំបន់ដាច់ស្រយាលជាមួយនឹងទីក្រុងធំៗ។ ការតភ្ជាប់ Kashmir និងតំបន់ដទៃទៀតនេះ នឹងពង្រឹងការអភិវឌ្ឍឧស្សាហកម្ម និងកសិកម្មក្នុងតំបន់។

មុននោះ ផ្លូវតែមួយខ្សែគត់ដែលតភ្ជាប់តំបន់ Kashmir ជាមួយនឹងតំបន់នានានៅឥណ្ឌា គឺផ្លូវជាតិ Sringar-Jammu ប្រវែង 300 គីឡូម៉ែត្រដែលបត់បែនខ្លាំង។ ផ្លូវនេះត្រូវបិទនៅរដូវរងា ហើយតែងតែកើតមានគ្រោះថ្នាក់ចរាចរណ៍។

ឥណ្ឌាបាន និងកំពុងតែវិនិយោគជាច្រើនទៅលើការស្ដារ និងធ្វើឱ្យប្រសើរឡើងហេដ្ឋារចនាសម្ព័ន្ធរបស់ខ្លួន។ កាលពីខែកុម្ភៈ 2023 លោក Modi បានសម្ពោធដាក់ឱ្យប្រើប្រាស់កំណាត់ផ្លូវដំបូងរបស់ផ្លូវល្បឿនលឿនប្រវែង 1,386 គីឡូម៉ែត្រ តភ្ជាប់រដ្ឋធានីញូវដែលី ជាមួយនឹងមជ្ឈមណ្ឌលហិរញ្ញវត្ថុមុមបៃ។ ដំណើរការសាងសង់ផ្លូវរបៀងដឹកជញ្ជូននៅភាគខាងលិចប្រទេសក៏កំពុងត្រូវបានធ្វើឡើង ដែលនេះនឹងជួយកាត់បន្ថយសម្ពាធនៃបណ្ដាញផ្លូវដែកនៅឥណ្ឌា៕

May 3, 2023

ឥណ្ឌា ចាត់ទុកការជួញដូររូបិយវត្ថុឌីជីថល ដូចទៅនឹងការលេងល្បែងស៊ីសងស្របច្បាប់

រដ្ឋាភិបាលឥណ្ឌា បានឱ្យដឹងថា ពួកគេមិនចាត់ទុកការជួញដូរប្រាក់ឌីជីថលជារៀងខុសច្បាប់នោះទេ ប៉ុន្តែបញ្ជាក់ថា នឹងយកពន្ធដូចទៅនឹងអ្វីដែលបានអនុវត្តចំពោះអ្នកឈ្នះល្បែងស៊ីសង។

«វាកំពុងស្ថិតក្នុងតំបន់ប្រផេះ។ ការទិញ និងលក់ប្រាក់ជីឌីជល មិនមែនជារឿងខុសច្បាប់។ បច្ចុប្បន្ន យើងបានលើកឡើងនូវប្រភេទពន្ធលើការជួញដូរប្រាក់ឌីជីថល ដូចទៅនឹងវិធីដែលយើងអនុវត្តចំពោះអ្នកដែលបានឈ្នះល្បែងភ្នាល់ប្រណាំងសេះ ឬរូបភាពនៃល្បែងស៊ីសងដទៃ» លោក T.V. Somanathan រដ្ឋមន្ត្រីក្រសួងហិរញ្ញវត្ថុឥណ្ឌា ឱ្យដឹងដូច្នេះ។

ក្រោយការតាមដាន និងពិចារណាអស់ច្រើនឆ្នាំ រដ្ឋាភិបាលឥណ្ឌា បានដាក់សំណើយកពន្ធ ៣០% លើប្រាក់ចំណូលចំពោះការជួញដូរប្រាក់ឌីជីថល។ ការសម្រេចនេះ បានធ្វើឱ្យរូបិយវត្ថុឌីជីថលវិមជ្ឈការ មាន Bitcoin ជាដើម ក្លាយជាប្រាក់ស្របច្បាប់។

ក៏ប៉ុន្តែ កម្រិតនៃការយកពន្ធ ៣០% ខាងលើនេះនឹងក្លាយជាឧបសគ្គធំចំពោះការជួញដូរប្រាក់ឌីជីថលវិមជ្ឈការ ដែលកំពុងតែមានការកើនឡើងនៅ ឥណ្ឌា។ រដ្ឋាភិបាលក៏កំពុងប្រឹងប្រែងក្នុងការធ្វើសេចក្ដីព្រាងច្បាប់ទាក់ទងនឹងប្រាក់ឌីជីថលនេះដែរ តែវាត្រូវការការអនុម័តពីគណៈរដ្ឋមន្ត្រី មុននឹងត្រូវបានបញ្ជូនទៅដល់សភា។

បច្ចុប្បន្ន ធនាគារជាតិរបស់ ឥណ្ឌា ក៏កំពុងតែរៀបផែនការដើម្បីអាចដាក់ឱ្យប្រើប្រាស់រូបិយវត្ថុឌីជីលផ្ទាល់ខ្លួននៅថ្ងៃទី ១ មេសាខាងមុខ។ ឥរិយាបថនេះត្រូវបានគេជឿថា នឹងបើកផ្លូវឱ្យមានយុគសម័យគ្រប់គ្រងរូបិយវត្ថុប្រកបដោយប្រសិទ្ធភាព និងការចំណាយទាប៕

February 3, 2022

ឥណ្ឌា៖ អ្នកជំងឺCovid-19 ជាច្រើននាក់ ធ្វើចត្តាឡីស័កលើដើមឈើ ដូចក្នុងរឿង Tarzan

ដោយសារតែផ្ទះចង្អៀតពេក ទើបពលរដ្ឋជាច្រើននៅប្រទេស ឥណ្ឌា ត្រូវនឹករកវិធីសាស្ត្រធ្វើចត្តាឡីស័កចម្លែកជាងគេ ដើម្បីបង្ការការឆ្លងរាលដាលនៃ Covid-19។

ថ្មីៗនេះ សារព័ត៌មាន ឥណ្ឌា បានរាយការណ៍ថា កំលោះវ័យ 18ឆ្នាំម្នាក់ មានឈ្មោះថា Shiva រស់នៅក្នុងភូមិ Telangana បានឆ្លងកាត់ការរស់នៅរយៈពេល 11ថ្ងៃ នៅលើដើមឈើ ដើម្បីចៀសវាងការចម្លងវីរុសCovid-19 ដល់គ្រួសារ បន្ទាប់ពីខ្លួនវិជ្ជមាននឹងវីរុសនេះ។

នៅពេលប្រទេសឥណ្ឌា ដាក់បម្រាមគោចរទូទាំងប្រទេសកាលពីឆ្នាំទៅ ពលករចំណាកស្រុកជាច្រើន បានត្រលប់ទៅស្រុកកំណើត ព្រោះតែកន្លែងធ្វើការត្រូវគេបិទទ្វារ។ ពេលនោះ មានមនុស្សជាច្រើនត្រូវបង្ខំចិត្តធ្វើចត្តាឡីស័កតាមវិធីផ្សេងៗ ដែលអាចធ្វើទៅបាន។

Shiva គឹជានិស្សិតម្នាក់ កំពុងសិក្សានៅទីក្រុង Hyderabad នៃរដ្ឋ Telangana។ នៅពេល Covid-19 ឆ្លងរាលដាលខ្លាំងនៅទីក្រុង កំលោះ Shiva ក៏ត្រលប់មកស្រុកវិញ។ Shiva ត្រូវបានគេធ្វើតេស្តឃើញថា វិជ្ជមាននឹង Covid-19 កាលពីថ្ងៃទី04 ខែឧសភា ឆ្នាំ2021 ហើយក៏ត្រូវក្រុមគ្រូពេទ្យស្នើឱ្យនៅដាច់ដោយឡែកពីគ្រួសារ។

ក៏ប៉ុន្តែ ដោយសារផ្ទះចង្អៀតពេក Shiva ក៏នឹកឃើញវិធីចម្លែកមួយ៖ Shiva យកដើមឫស្សី ចងភ្ជាប់នឹងមែកឈើ ដើម្បីបង្កើតជាកន្លែងស្នាក់នៅប្រចាំថ្ងៃរបស់ខ្លួន។ កំលោះនេះក៏បង្កើតប្រព័ន្ធខ្សែរូត និងឧបករណ៍ចាំបាច់សម្រាប់ប្រើប្រាស់ ក៏ដូចជាសម្រាប់ទទួលអាហារពីគ្រួសារ។

Shiva និយាយថា៖ «ពុំមានអ្នកណាម្នាក់នៅក្នុងភូមិ ហ៊ានមកជួបខ្ញុំទេ ព្រោះខ្លាច Covid-19។ ប៉ុន្តែ ខ្ញុំគិតថា មិនចាំបាច់ភ័យខ្លាចពេកទេ អ្នកអាចយកឈ្នះលើវា ដោយការគិតប្រកបដោយវិជ្ជមាន»។ Shiva ឱ្យដឹងថា ក្នុងពេលសម្រាកលើដើមឈើ គាត់អានសៀវភៅ ស្ដាប់ចម្រៀង និងនិយាយគ្នាលេងជាមួយមិត្តភ័ក្ដិ។

រហូតដល់ពេលអ្នកយកព័ត៌មានបានដឹងអំពីហេតុការណ៍នេះ Shiva ពេលនោះក៏ធ្វើចត្តាឡីស័កបាន 11ថ្ងៃរួចហើយ។ ភូមិដែល Shiva រស់នៅ មានគ្រួសារប្រមាណ 350គ្រួ ប៉ុន្តែ មណ្ឌលសុខភាពនៅឆ្ងាយពីនោះ 5គម ខណៈមន្ទីរពេទ្យដែលនៅក្បែរបំផុត ក៏មានចម្ងាយរហូតដល់ 30គម។

បើទោះជាមណ្ឌលធ្វើចត្តាឡីស័កថ្មី ត្រូវបានបង្កើតឡើងនៅក្នុងទីរួមស្រុក កាលពីថ្ងៃទី13 ខែឧសភា ប៉ុន្តែ មនុស្សតិចតួចណាស់ដែលបានដឹង ដូច្នេះ ពួកគេត្រូវរកវិធីធ្វើចត្តាឡីស័កផ្ទាល់ខ្លួន។ ក្រៅពី Shiva ពលរដ្ឋជាច្រើនក្នុងភូមិ ក៏ត្រូវធ្វើចត្តាឡីស័កដោយឡែកនៅក្នុងបន្ទប់ទឹក ខ្ទម ឬតង់។ល។

ប្រភព៖ Indiatoday
ប្រែសម្រួល៖ បុត្រា

June 11, 2021

អ្នកមានជាងគេបង្អស់ក្នុងពិភពលោក “ធ្វើសង្គ្រាមដណ្ដើមទឹកដី” ជាមួយអ្នកមានជាងគេនៅទ្វីបអាស៊ី

មហាសេដ្ឋី2រូបដែលមានភាពលេចធ្លោជាងគេក្នុងពិភពលោក កំពុងតែប្រឹងប្រែងដណ្ដើមទីផ្សារឱសថអនឡាញដែលមានតម្លៃរាប់ពាន់លានដុល្លារនៅក្នុងប្រទេសឥណ្ឌា។

“សង្គ្រាម” ដណ្ដើមទីផ្សារឱសថអនឡាញនៅលើទឹកដីឥណ្ឌា កំពុងតែទទួលបានចំណាប់អារម្មណ៍ជាងពេលណាៗទាំងអស់ នៅពេលដែលក្រុមហ៊ុន Amazon របស់កំពូលមហាសេដ្ឋី Jeff Bezos និងក្រុមហ៊ុន Reliance Industries របស់មហាសេដ្ឋី Mukesh Ambani ដែលជាអ្នកមានជាងគេបង្អស់នៅអាស៊ី ចាប់ផ្ដើមចូលលេង “ល្បែងពាណិជ្ជកម្ម”។

ក្នុងគ្រាដែល COVID-19 នៅតែបន្តធ្វើឱ្យពលរដ្ឋឥណ្ឌាប្រមាណជា1.3ពាន់លាននាក់ត្រូវនៅក្នុងផ្ទះ តម្រូវការនៃការទិញទំនិញតាមអនឡាញចាប់ផ្ដើមកើនឡើងខ្ពស់។ ពេល Amazon បានចាប់ផ្ដើមដំណើរការផ្ដល់សេវាកម្មលក់និងប្រគល់ទំនិញជាឱសថនៅក្នុងតំបន់មួយចំនួននៃប្រទេសឥណ្ឌាកាលពីពាក់កណ្ដាលខែសីហា Reliance Industries ដែលជាក្រុមហ៊ុនធំជាងគេបង្អស់របស់ប្រទេសឥណ្ឌាក៏បានបង្កើតសេវាកម្មដូចគ្នានេះដែរ។ ក្រុម “អ្នកលេង” ទាំងនេះ ថ្មីនេះបានបង្កឱ្យមានការភ្ញាក់ផ្អើលជាខ្លាំងនៅក្នុងទីផ្សារឱសថនៅប្រទេសឥណ្ឌា ក៏ដូចជានៅក្នុងពិភពលោក។

បច្ចុប្បន្ន Amazon មានលក់ថ្នាំពេទ្យទៅតាមវេជ្ជបញ្ជា និងថ្នាំដែលមិនចាំបាច់មានវេជ្ជបញ្ជា នៅក្នុងតំបន់មួយចំនួនរបស់ប្រទេសឥណ្ឌា ក្នុងនោះមានដូចជា ទីក្រុង Bengaluru នៅភាគខាងត្បូងប្រទេស ដែលត្រូវបានគេចាត់ទុកថាជា “ជ្រលងភ្នំ Silicon” របស់ឥណ្ឌា។ អតិថិជនគ្រាន់តែចូលទៅកាន់គេហទំព័ររបស់ក្រុមហ៊ុន រួចធ្វើការបញ្ជាទិញដោយមានភ្ជាប់ជាមួយរូបថតវេជ្ជបញ្ជា និងជ្រើសរើសកូដបញ្ចុះតម្លៃ (បើមាន) ហើយចុចយល់ព្រមជាការស្រេច។

អ្នកមានជាងគេបង្អស់ក្នុងពិភពលោក “ធ្វើសង្គ្រាមដណ្ដើមទឹកដី” ជាមួយអ្នកមានជាងគេនៅទ្វីបអាស៊ី ក្នុងវិស័យលក់ឱសថ — លោក Mukesh Ambani អ្នកមានជាងគេនៅទ្វីបអាស៊ី

ក្នុងគ្រានោះដែរ Reliance Industries របស់លោក Mukesh ដែលផ្ដោតទៅលើការបង្កើត “អាណាចក្រ” ឌីជីថលនៅលើថ្នាលបច្ចេកវិទ្យារបស់ក្រុមហ៊ុនដែលបាននិងកំពុងរកស៊ីក្នុងវិស័យជាច្រើន រាប់ចាប់ពីថាមពល លក់រាយ រហូតដល់វិស័យទូរគមនាគមន៍ បានប្រកាសកាលពីថ្ងៃទី18សីហាថា ក្រុមហ៊ុននេះសម្រេចចូលប្រលូកក្នុងវិស័យលក់ឱសថតាមអនឡាញនេះដែរ ដោយការទិញយកស្ថាប័នគ្រប់គ្រង Netmeds.com។ នេះគឺជាស្ថាប័នដែលទទួលបានការគាំពារដោយក្រុមហ៊ុនផលិត និងលក់រាយឱសថដែលមានអាយុកាល100ឆ្នាំ នោះគឺក្រុមហ៊ុន Dadha Pharma។

Isha Ambani ដែលជាអគ្គនាយកក្រុមហ៊ុន Reliance Retail Ventures និងជាកូនស្រីរបស់មហាសេដ្ឋី Mukesh Ambani បានអះអាងថា The Netmeds នឹងពង្រីកសកម្មភាពទៅក្នុងពាណិជ្ជកម្មអនឡាញសម្រាប់ក្រុមហ៊ុនមេ Reliance Industries។

នៅចំពោះមុខគូប្រជែងនានាដែលមានអំណាចខ្លាំងក្លា បណ្ដាក្រុមហ៊ុនតូចៗដូចជា PharmEasy និង Medlife ជាដើម ត្រូវបង្ខំចិត្តស្វែងរកវិធីច្របាច់បញ្ចូលគ្នា។ ក្រុមហ៊ុនលក់រាយលើអនឡាញផ្សេងមួយទៀតក៏បានចូលរួម “ល្បែងពាណិជ្ជកម្ម” នេះដែរ រួមមានទាំង MedPlusMart និងបណ្ដាញមន្ទីរពេទ្យផងដែរ។

ទីផ្សារលក់រាយឱសថតាមអនឡាញរបស់ប្រទេសឥណ្ឌា ត្រូវបានព្យាករថានឹងកើនឡើងខ្ពស់ជាងមុន7ដង និងមានតម្លៃប្រមាណជា3.6ពាន់លានដុល្លារក្នុងឆ្នាំ2022 បើធៀបនឹង500លានដុល្លារកាលពីឆ្នាំ2018។ នេះបើតាម Frost & Sullivan។

វត្តមានរបស់ Amazon នៅក្នុងវិស័យលក់រាយឱសថតាមអនឡាញ គឺជាការប្រមាន និងជាការដាស់ស្មារតីរបស់ក្រុមហ៊ុនឱសថផ្សេងៗនាបច្ចុប្បន្ន។

លោក Jeff Bezos អ្នកមានជាងគេបង្អស់ក្នុងពិភពលោក

ចំណែកសមាគមមួយដែលតំណាងឱ្យឱសថស្ថានលក់រាយ និងបោះដុំចំនួន850,000កន្លងនៅក្នុងប្រទេសឥណ្ឌាវិញ បានអះអាងថា ការពង្រីក “ទឹកដី” របស់ Amazon ទៅក្នុងវិស័យលក់ឱសថអនឡាញគឺជារឿងខុសច្បាប់ ព្រោះថា ក្រុមហ៊ុននេះមិនមានអាជ្ញាប័ណ្ណអាជីវកម្មលើឱសថនៅក្នុងប្រទេសនេះ។ សមាគមនេះក៏បានផ្ញើលិខិតតវ៉ាមួយទៅកាន់ Jeff Bezos ដែលជា CEO របស់ Amazon ផងដែរ ដើម្បីជំទាស់លើបញ្ហានេះ។

ខណៈនោះ មហាសេដ្ឋី Ambani របស់ប្រទេសឥណ្ឌា កំពុងតែស្វែងរកវិធីពង្រីកលទ្ធភាពរបស់ Reliance Industries ដើម្បីផ្គត់ផ្គង់ទីផ្សារអនឡាញរបស់ប្រទេសជាតិ រួមទាំងវិស័យលក់រាយឱសថផងដែរ។ សាខាឌីជីថល Jio Platform របស់ក្រុមហ៊ុន Reliance Industries កាលពីខែមិថុនាក៏ទទួលបានខ្ទង់វិនិយោគទំហំទឹកប្រាក់ 4.5ពាន់លានដុល្លារពី Google ដែលក្រុមហ៊ុននេះក៏ជាអ្នកវិនិយោគថ្មីបំផុតរបស់ Reliance Industries បន្ទាប់ពី Facebook, Intel និង Qualcomm៕

ប្រភព៖ SCMP

August 28, 2020

ឥណ្ឌាបញ្ជូនអាវក្រោះទៅឱ្យទាហាននៅព្រំដែន ក្រោយហេតុការណ៍វាយតប់គ្នានឹងទាហានចិន

កងទ័ពនៃប្រទេសឥណ្ឌាបានបញ្ជូនអាវក្រោះប្រឆាំងកុបកម្មរាប់រយឈុតទៅឱ្យទាហានរបស់ខ្លួននៅក្នុងតំបន់ Ladakh ដើម្បីការពារពួកគេពីអាវុធមុតស្រួច និងដុំថ្មរបស់សត្រូវ។

ក្នុងដំណាក់កាលដំបូង ឈុបការពារខ្លួនចំនួន500ត្រូវបានដឹកជញ្ជូនតាមយន្តហោះពីទីក្រុង Mumbai ទៅកាន់ទីរួមស្រុក Leh ក្នុងតំបន់ Ladakh កាលពីម្សិលមិញដើម្បីបំពាក់ជូនទាហានដែលកំពុងបំពេញភារកិច្ចការពារព្រំដែននៅតាមបន្ទាត់គ្រប់គ្រងជាក់ស្ដែង LAC (Line of Actual Control)។ ក្នុងចំណោមឈុតការពារខ្លួននោះក៏មានបន្ទះpolycarbonate ដែលអាចការពារដែកស្រួច និងដុំថ្មផងដែរ។ នេះបើតាមប្រភពព័ត៌មានពីរដ្ឋាភិបាលឥណ្ឌា។

ឈុតការពារខ្លួនខាងលើ ត្រូវបានបំពាក់ជូនទាហានឥណ្ឌានៅតាមព្រំដែន ក្រោយពីមានហេតុការណ៍វាយតប់គ្នាជាមួយទាហានចិនកាលពីថ្ងៃទី15មិថុនាកន្លងទៅនៅត្រង់ចំណុចត្រួតពិនិត្យទី14 (PP-14) នៅតំបន់ជ្រលងភ្នំ Galwan។ ប្រភពព័ត៌មានបានឱ្យដឹងថា ក្នុងហេតុការណ៍វាយតប់គ្នា ទាហានចិនបានប្រើប្រាស់ដំបងដែកដែលមានផ្សារភ្ជាប់ដែកគោល និងដំបូងរុំខ្សែលួស ខណៈដែលទាហានឥណ្ឌាមានតែដៃទទេ។

ពលរដ្ឋឥណ្ឌាសម្ដែងការខឹងសម្បានឹងប្រទេសចិនដោយការដុតទង់ជីតចិន

ក្នុងហេតុការណ៍នោះ មានទាហានឥណ្ឌាយ៉ាងតិច20នាក់បានស្លាប់ ក្នុងនោះមាន3នាក់ស្លាប់នៅនឹងកន្លែងកើតហេតុ និង17នាក់ផ្សេងទៀតបានស្លាប់បន្ទាប់ពីហេតុការណ៍បានស្ងប់ស្ងាត់។

សារព័ត៌មានឥណ្ឌាបានចេញផ្សារដែរថា ទាហានចិនជាង40នាក់បានស្លាប់និងរងរបួសក្នុងហេតុការណ៍វាយតប់គ្នាខាងលើ។ ទីក្រុងប៉េកាំងបានទទួលស្គាល់ថា ទាហានមួយចំនួនរបស់ខ្លួនបានស្លាប់និងរងរបួស ប៉ុន្តែមិនបានបញ្ជាក់អំពីតួលេខច្បាស់លាស់នោះឡើយ។

សារព័ត៌មានឥណ្ឌារាយការណ៍ថា ទាហានឥណ្ឌាត្រូវបានទាហានចិនវាយប្រហារ និងសម្លាប់នៅនឹងកន្លែង នៅតំបន់ក្បែរចំណុចត្រួតពិនិត្យ PP-14។ ប៉ុន្តែ បញ្ជាការដ្ឋានភូមិភាគខាងលិចរបស់កងទ័ពរំដោះប្រជាជនចិន (PLA) និយាយថា ទាហានឥណ្ឌាបានឆ្លងកាត់បន្ទាត់ព្រំដែន LAC និង “មានចេតនាបញ្ឆេះកំហឹង” នាំឱ្យមានហេតុការណ៍វាយតប់គ្នាកើតឡើង។

ហេតុការណ៍ខាងលើនេះ គឺជាការប៉ះទង្គិចគ្នានាំឱ្យមានមនុស្សស្លាប់ដំបូងគេបង្អស់នៅតាមបន្ទាត់ព្រំដែនប្រវែង3,488គីឡូម៉ែត្ររវាងប្រទេសទាំងពីរ រាប់ចាប់តាំងពីការផ្ទុះអាវុធដាក់គ្នាដែលបានបណ្ដាលឱ្យទាហានឥណ្ឌា4នាក់ស្លាប់នៅ Tulung La ក្នុងតំបន់ Arunachal Pradesh កាលពីឆ្នាំ1975។

ចិននិងឥណ្ឌាកាលពីថ្ងៃទី17មិថុនាកន្លងទៅ បានព្យាយានបន្ធូរបន្ថយភាពតានតឹងនៅតំបន់ព្រំដែន។ រដ្ឋមន្ត្រីការបរទេសនៃប្រទេសទាំងពីរបានពិភាក្សាគ្នាតាមទូរស័ព្ទ និងបានយល់ព្រម “បន្ថយកម្ដៅស្ថានការណ៍” បើទោះជាប្រទេសទាំងពីរនៅតែចោទដាក់គ្នាលើហេតុការណ៍ដែលបានកើតឡើងក៏ដោយ៕

ប្រភព៖ សារព័ត៌មានបរទេស

June 19, 2020

ចិនដោះលែងទាហានឥណ្ឌាដែលត្រូវចាប់ខ្លួនក្នុងហេតុការណ៍វាយតប់គ្នានៅព្រំដែន ប៉ុន្តែនៅតែចោទប្រកាន់ ទម្លាក់កំហុស និងគំរាមដាក់គ្នាដដែល

ទាហានឥណ្ឌាចំនួន10នាក់ដែលត្រូវបានចិនចាប់ខ្លួននៅក្នុងហេតុការណ៍វាយតប់គ្នាទ្រង់ទ្រាយធំនៅព្រំដែនប្រទេសទាំងពីរ បន្ទាប់ពីមានកិច្ចចរចាថ្នាក់មេបញ្ជាការយោធារបស់ចិននិងឥណ្ឌា។

សារព័ត៌មាន Press Trust រួមនឹងសារព័ត៌មានរបស់ឥណ្ឌាជាច្រើនទៀតបានរាយការណ៍ថា ទាហានឥណ្ឌាចំនួន10នាក់ត្រូវបានប្រទេសចិនដោះលែងកាលពីយប់ថ្ងៃទៅ18មិថុនាកន្លងទៅ។ រដ្ឋាភិបាលឥណ្ឌាមិនបានបញ្ចេញមតិអ្វីនៅឡើយទាក់ទិននឹងបញ្ហានេះ ប៉ុន្តែភាគីកងទ័ពឥណ្ឌាបានចេញមកអះអាងថា “មិនមានទាហានឥណ្ឌាណាម្នាក់បានបាត់ខ្លួនក្នុងពេលបំពេញភារកិច្ច” នៅក្នុងហេតុការណ៍វាយតប់គ្នានៅជ្រលងភ្នំ Galwan នោះទេ។

សារព័ត៌មានឥណ្ឌាបានចេញផ្សាយថា កិច្ចព្រមព្រៀងដោះលែងទាហានខាងលើត្រូវបានធ្វើឡើងដោយជោគជ័យក្រោយពីមានកិច្ចប្រជុំថ្នាក់ឧត្តមសេនីយ៍រវាងប្រទេសចិននិងឥណ្ឌា។

សូមរំឭកថា ទាហានឥណ្ឌា និងទាហានចិន បានវាយតប់គ្នាជាក្រុមកាលពីយប់ថ្ងៃទី15មិថុនា2020 នៅជ្រលងភ្នំ Galwan នៃតំបន់ Ladakh។ កងទ័ពជើងគោកឥណ្ឌាបញ្ជាក់ថា ទាហានឥណ្ឌាចំនួន20នាក់បានបាត់បង់ជីវិត ក្នុងនោះមាននាយទាហាន Santosh Babu ដែលជាមេបញ្ជាការកងវរសេនាតូច Bihar 16 ខណៈទាហានចំនួន18នាក់ផ្សេងទៀតកំពុងទទួលការព្យាបាលដោយសារតែរងរបួសធ្ងន់។

សារព័ត៌មានឥណ្ឌាបានចេញផ្សារដែរថា ទាហានចិនជាង40នាក់បានស្លាប់និងរងរបួសក្នុងហេតុការណ៍វាយតប់គ្នាខាងលើ។ ទីក្រុងប៉េកាំងបានទទួលស្គាល់ថា ទាហានមួយចំនួនរបស់ខ្លួនបានស្លាប់និងរងរបួស ប៉ុន្តែមិនបានបញ្ជាក់អំពីតួលេខច្បាស់លាស់នោះឡើយ។

ប្រជាជនឥណ្ឌារាប់ពាន់នាក់ចូលរួមពិធីបុណ្យសពរបស់ទាហានដែលបានបាត់បង់ជីវិតនៅក្នុងហេតុការណ៍វាយតប់គ្នាជាមួយទាហានចិននៅព្រំដែន

ក្នុងពេលមានការអំពាវនាវឱ្យឈប់ប្រើប្រាស់ទំនិញចិន កាលពីម្សិលមិញ ជនជាតិឥណ្ឌារាប់ពាន់នាក់បានចូលរួមពិធីបុណ្យសពរបស់ទាហានឥណ្ឌាដែលបានស្លាប់នៅក្នុងហេតុការណ៍ការពារទឹកដីខាងលើ។ នៅក្នុងទីក្រុងមួយចំនួន គេឃើញប្រជាជនឥណ្ឌាជាច្រើនបាននាំគ្នាលើកបដាដែលមានសរសេរថា “ឈប់ប្រើផលិតផលចិន” ព្រមទាំងធ្វើការប្រឆាំងនឹងប្រធានាធិបតីចិន លោក ស៊ី ជីនភីងផងដែរ។

ក្រុមមន្ត្រីចិននិងឥណ្ឌាកំពុងប្រឹងប្រែងស្វែងរកវិធីដោះស្រាយភាពតានតឹងតាមរយៈការចរចាដើម្បីចៀសវាងការកើនឡើងកម្ដៅដែលអាចនាំឱ្យមានការផ្ទុះអាវុធតាមព្រំដែន ប៉ុន្តែពួកគេបានទម្លាក់កំហុសដាក់គ្នាអំពីហេតុការណ៍វាយតប់គ្នា និងបានធ្វើការព្រមានដាក់គ្នានៅក្នុងសេចក្ដីប្រកាសរៀងៗគ្នា។

“ឥណ្ឌាមិនគួរវាយតម្លៃទាបចំពោះការអត់ធ្មត់របស់ចិនក្នុងកិច្ចការពារបូរណភាពទឹកដីរបស់ខ្លួននោះទេ” ក្រសួងការបរទេសចិនចេញសេចក្ដីប្រកាសបែបនេះ ក្រោយពីកិច្ចពិភាក្សារវាងរដ្ឋមន្ត្រីការបរទេសចិន លោក Wang Yi និងសមភាគីឥណ្ឌា Subrahmanyam Jaishankar។

ចំណែករដ្ឋមន្ត្រីក្រសួងការបរទេសឥណ្ឌាវិញ ថ្លែងថា ចិនបានធ្វើការវាយប្រហារដោយមាន “ផែនការមុន” ហើយថាបញ្ហានេះនឹងជះឥទ្ធិពលធ្ងន់ធ្ងរដល់ទំនាក់ទំនងរវាងប្រទេសទាំងពីរ៕

ប្រភព៖ សារព័ត៌មានបរទេស

June 19, 2020

Apple នឹងរើរោងចក្រពីប្រទេសចិនទៅកាន់ប្រទេសឥណ្ឌា

ក្រុមហ៊ុន Apple ត្រូវបានគេជឿថា កំពុងរៀបចំផែនការដើម្បីរើរោងចក្រផលិតឧបករណ៍បច្ចេកវិទ្យារបស់ខ្លួនចំនួន20% ចេញពីប្រទេសចិន ទៅកាន់ប្រទេសឥណ្ឌា ដែលក្នុងនោះក៏មាន iPhone ផងដែរ។

យោងតាម Economic Times នាយកប្រតិបត្តិមួយចំនួនរបស់ក្រុមហ៊ុន Apple បានពិភាក្សាជាមួយបណ្ដាមន្ត្រីជាន់ខ្ពស់ឥណ្ឌាកាលពីប៉ុន្មានថ្ងៃកន្លងទៅនេះ ទាក់ទងទៅនឹងក្រុមហ៊ុនអាមេរិកាំងនេះ ចង់បានការ “បើកផ្លូវ” ដើម្បីអាចបង្កើនចង្វាក់ផលិតកម្មរបស់ខ្លួននៅក្នុងប្រទេសឥណ្ឌា រួមទាំងការរើកម្លាំងផលិតកម្មចំនួន1/5ពីប្រទេសចិន មកកាន់ឥណ្ឌា។

បើសិនជាការផ្លាស់ទីនេះក្លាយជាការពិត Apple ក៏នឹងអាចក្លាយជាក្រុមហ៊ុននាំចេញធំជាងគេនៅឥណ្ឌា។

មន្ត្រីរដ្ឋាភិបាលមួយរូបបានបង្ហើបឱ្យដឹងថាឥណ្ឌាសង្ឃឹមថានឹងផលិតស្មាតហ្វូនដែលមានទំហំទឹកប្រាក់ដល់ទៅ40ពាន់លានដុល្លារអាមេរិកនៅក្នុងប្រទេសនេះក្នុងរយៈពេល5ឆ្នាំខាងមុខ ដែលភាគច្រើនគឺដើម្បីនាំចេញ។ ការផលិតនេះ ភាគច្រើនត្រូវបានធ្វើឡើងដោយក្រុមហ៊ុន Wistron និងក្រុមហ៊ុន Foxconn ដោយយោងទៅលើផលប្រយោជន៍ពីកម្មវិធីលើកទឹកចិត្តទាក់ទាញការផលិត PLI។

PLI (Production Linked Incentive Scheme) គឺជាកម្មវិធីដែលត្រូវបានឥណ្ឌាបង្កើតឡើងក្នុងបំណងលើកទឹកចិត្តដល់ការផលិតក្នុងស្រុក ទាក់ទាញការវិនិយោគ និងការផលិតពីបណ្ដាក្រុមហ៊ុនបរទេស។ Apple នឹងក្លាយជាក្រុមហ៊ុនមួយក្នុងចំណោមបណ្ដាក្រុមហ៊ុនដំបូងគេដែលទទួលបានផលប្រយោជន៍ពីគោលនយោបាយនេះ បន្ទាប់ពីមាត្រាមួយចំនួនត្រូវបានផ្ដើមអនុវត្តចាប់ពីសប្ដាហ៍ក្រោយ មុនពេលអនុវត្តពេញលេញចាប់ពីថ្ងៃទី1សីហា។

ទាក់ទិននឹងរឿងរ៉ាវខាងលើ ភាគីក្រុមហ៊ុន Apple មិនទាន់មានការបញ្ចេញមតិអ្វីនៅឡើយ។

ប្រទេសឥណ្ឌាមិនមែនជាទីផ្សារធំរបស់ Apple នោះទេ ព្រោះថាក្រុមហ៊ុននេះរកបានចំណូលត្រឹមតែ1.5ពាន់លានដុល្លារប៉ុណ្ណោះពីការលក់ iPhone នៅក្នុងប្រទេសនេះ រាប់ចាប់ពីឆ្នាំ2018ដល់2019 ពោលគឺកាន់កាប់ចំណែកទីផ្សារប្រមាណពី2ទៅ3%ប៉ុណ្ណោះ គឺមិនដល់0.5ពាន់លានដុល្លារនៃតម្លៃឧបករណ៍ដែលត្រូវបានផលិតក្នុងប្រទេសនេះ។ ផ្ទុយទៅវិញ Apple កំពុងតែពឹងផ្អែកច្រើនទៅលើប្រទេសចិន ទាំងការផលិត ទាំងទីផ្សារ។ នៅក្នុងអំឡុងពេលដូចគ្នា បើធៀបជាមួយប្រទេសឥណ្ឌា ក្រុមហ៊ុន Apple នៅប្រទេសចិនបានផលិតឧបករណ៍ដែលមានទំហំទឹកប្រាក់ដល់ដល់220ពាន់លានដុល្លារ ក្នុងនោះមាន185ពាន់លានដុល្លារបានមកពីការនាំចេញ។ ក្រៅពីនេះ Apple ក៏ប្រើប្រាស់កម្មករប្រមាណជា4.8លាននាក់នៅប្រទេសចិន ទាំងការផលិតផ្ទាល់ និងទាំងប្រយោល៕

ប្រភព៖ សារព័ត៌មានបរទេស

May 13, 2020

ប្រវត្តិសាស្ត្រ ដែលមនុស្សគួរតែដឹង…តើកូវីដ-19 និងការឆ្លងរាលដាលរបស់ជំងឺគ្រុនផ្ដាសាយធំអេស្ប៉ាញកាលពីអតីតកាល ផ្លាស់ប្ដូរពិភពលោកយ៉ាងណា?(ត…)

ចរន្តតតាំងលទ្ធិប្រមាញ់អាណានិគម និងភាពរួមដៃគ្នារវាងប្រទេសនីមួយៗ

ឆ្នាំ1918 ប្រទេសឥណ្ឌា បានស្ថិតនៅក្រោមការគ្រប់គ្រងរបស់អង់គ្លេសយូរជាង 1សតវត្សរ៍

ជំងឺគ្រុនផ្ដាសាយធំអេស្ប៉ាញ បានឆ្លងរាលដាលទៅដល់ប្រទេសឥណ្ឌានៅខែឧសភា ក្នុងឆ្នាំនោះ(1918) ហើយវាបានធ្វើឱ្យកើតមានផលប៉ះពាល់ដល់ប្រជាជនឥណ្ឌាធ្ងន់ធ្ងរជាងជនជាតិអង់គ្លេសដែលរស់នៅក្នុងប្រទេសឥណ្ឌាទៅទៀត។

មានស្ថិតិដែលបានបង្ហាញច្បាស់ថា អត្រាការស្លាប់របស់ជនជាតិហិណ្ឌូវណ្ណៈទាប ស្ថិតក្នុងចំនួន 61.6នាក់ សម្រាប់ចំនួនប្រជាជន 1,000នាក់ ខណៈដែលអត្រាការស្លាប់ក្នុងក្រុមមនុស្សជនជាតិអឺរ៉ុប ស្ថិតក្នុងចំនួន 9នាក់ សម្រាប់ចំនួនប្រជាជន 1,000នាក់ដូចគ្នា។

ជនជាតិឥណ្ឌាដែលមានផ្នត់គំនិតជាតិនិយមខ្លាំង ក៏ឆ្លៀតឱកាសក្នុងអំឡុងពេលដែលសង្គមកំពុងមើលឃើញថា អាណានិគមជនជាតិអង់គ្លេសបានគ្រប់គ្រងចាត់ការលើវិបត្តិរោគរាតត្បាតដែលកំពុងកើតឡើងយ៉ាងខុសឆ្គងនោះ នៅឆ្នាំ1919 សារព័ត៌មាន Young India របស់លោក ម៉ាហាត្មះ ហ្គាន់ធី បានបោះពុម្ពផ្សាយបទវិចារណកឋា រិះគន់អ្នកគ្រប់គ្រងអាណានិគមអង់គ្លេសយ៉ាងពុះកញ្ជ្រោល។

“គ្មានប្រទេសស្លូតត្រង់ណា ដែលរដ្ឋបាលនឹងបណ្ដោយឱ្យស្ថានការណ៍ធ្លាក់ចុះដុនដាបយ៉ាងអាក្រក់ ដោយមិនបានធ្វើអ្វីឱ្យបានច្រើនគ្រប់គ្រាន់ស្មើនឹងរដ្ឋបាលឥណ្ឌាក្នុងអំឡុងពេលដែលកើតរោគរាតត្បាតដ៏អាក្រក់ និងសាងភាពហាយនៈដូច្នេះឡើយ”

ជំងឺគ្រុនផ្ដាសាយធំអេស្ប៉ាញ បាននាំឆ្ពោះទៅរកការបង្កើតអង្គការផ្នែកសាធារណៈសុខាភិបាលអន្តរជាតិមួយឡើង យ៉ាងណាក៏ដោយ រោគរាតត្បាតដែលកើតឡើង នៅបានបង្ហាញឱ្យឃើញពីភាពសំខាន់នៃការរួមសហការរវាង — ជំងឺគ្រុនផ្ដាសាយធំអេស្ប៉ាញ បាននាំឆ្ពោះទៅរកការបង្កើតអង្គការផ្នែកសាធារណៈសុខាភិបាលអន្តរជាតិមួយឡើងយ៉ាងណាក៏ដោយ រោគរាតត្បាតដែលកើតឡើង នៅបានបង្ហាញឱ្យឃើញពីភាពសំខាន់នៃការរួមសហការរវាង

ប្រទេស ដែលទោះជាសង្គ្រាមលោកលើកទី1 បានធ្វើឱ្យពិភពលោកកើតការបែងចែកបក្សពួកខាងនយោបាយក៏ដោយ។

ក្នុងឆ្នាំ1923 សន្ធិកបាតប្រជាជាតិ (League of Nation) អង្គការអន្តរជាតិ ដែលនៅពេលក្រោយមក ត្រូវបានជំនួសដោយអង្គការសហប្រជាជាតិ(UN) និងបានបង្កើតអង្គការសុខភាព(Health Organisation) ដែលក្រោយមកបានក្លាយជា អង្គការសុខភាពពិភពលោក(WHO)។

អង្គការនេះ បានសាងប្រព័ន្ធថ្មីមួយឡើង ក្នុងការគ្រប់គ្រងរោគរាតត្បាតរវាងប្រទេស ដែលដំណើរការដោយក្រុមអ្នកប្រកបវិជ្ជាជីវៈជាពេទ្យ ច្រើនជាងជាអ្នកការទូត។

ភាពរីកចម្រើនផ្នែកសាធារណៈសុខាភិបាល

ប្រទេសជាច្រើនបានបង្កើត ឬលើកកម្ពស់ក្រសួងសាធារណៈសុខាភិបាលឡើង ក្នុងអំឡុងទសវត្សរ៍ទី1920

ភាពខូចខាតដែលកើតឡើងបណ្ដាលមកពីរោគរាតត្បាត បាននាំឆ្ពោះទៅរកការអភិវឌ្ឍ និងរីកចម្រើនទៅមុខខាងផ្នែកសាធារណៈសុខាភិបាលរបស់ពិភពលោក។

ក្នុងឆ្នាំ1920 រុស្ស៊ី ជាប្រទេសដំបូងគេ លើពិភពលោកដែលមានប្រព័ន្ធសាធារណៈសុខាភិបាល ដែលផ្ដល់សេវាកម្មដល់ប្រជាជនយ៉ាងពេញលេញ និងគ្រប់គ្នា និងគ្រប់គ្រងចាត់ការដោយរដ្ឋបាលកណ្ដាល មុននឹងប្រទេសដទៃទៀតចាប់ដំណើរការតាមក្រោយ បន្ទាប់ពីនោះមិនយូរប៉ុន្មាន។

អ្នកស្រី ឡូរ៉ា ស្ពីននីយ៍ បានសរសេរនៅក្នុងសៀវភៅបែបវិទ្យាសាស្ត្ររបស់អ្នកស្រីថា “ប្រទេសជាច្រើនបានបង្កើត ឬលើកកម្ពស់ក្រសួងសាធារណៈសុខាភិបាលក្នុងអំឡុងទសវត្សរ៍ទី1920…នេះជាលទ្ធផលដោយផ្ទាល់ដែលកើតចេញពីរោគរាតត្បាត”

អ្នកស្រីអធិប្បាយថា “ការចាត់ចែងធ្វើប្រព័ន្ធសុវត្ថិភាពសង្គមដោយរដ្ឋ បានចាប់កំណើតឡើងពីស្ថានការណ៍មួយនេះ ដោយសារតែមានស្ត្រីមេម៉ាយ ក្មេងកំព្រា និងអ្នកទុព្វលភាព បានកើតឡើងក្នុងចំនួនដ៏ច្រើន”

ការបិទទីក្រុង និងការរក្សាគម្លាតខាងសង្គម ទទួលបានលទ្ធផលល្អនៅពេលនោះ

ការរក្សាគម្លាតឆ្ងាយពីគ្នាខាងសង្គម បានបង្ហាញឱ្យឃើញថា អាចជួយទប់ស្កាត់កាតឆ្លងរាលដាលរបស់ជំងឺគ្រុនផ្ដាសាយធំអេស្ប៉ាញក្នុងឆ្នាំ1918បានយ៉ាងល្អប្រសើរ

ថយត្រឡប់ទៅក្នុងអំឡុងខែកញ្ញា ឆ្នាំ1918 វិញ ទីក្រុងជាច្រើននៅក្នុងសហរដ្ឋអាមេរិក កំពុងត្រៀមរៀបចំការដើរជាក្រុមដើម្បីឃោសនាលក់ “រូបិយប័ណ្ណសេរីភាព” ដើម្បីយកប្រាក់ទៅធ្វើសង្គ្រាមនៅអឺរ៉ុប។

អ្នកគ្រប់គ្រងរបស់ទីក្រុងហ្វ៊ីឡាដែលហ្វៀ រដ្ឋផេនស៊ីលវេនៀខ្លួនឯង ក៏សម្រេចចិត្តដំណើរការរៀបចំពិធីនេះដែរ បើទោះជាមានទាហានចំនួនជាង 600នាក់នៅក្នុងទីក្រុង បានកើតជំងឺគ្រុនផ្ដាសាយធំអេស្ប៉ាញហើយក៏ដោយ។

ចំណែកនៅទីក្រុងសេនត៍ល្វីស ក្នុងរដ្ឋមីស៊ូរី អាជ្ញាធរបានលុបចោលពិធីទាំងនោះ ហើយបានដាក់បញ្ជាឱ្យប្រើវិធានការផ្សេងៗ ដើម្បីកម្រិតការជួបជុំរួមក្រុមរបស់មនុស្សចំនួនដ៏ច្រើនជំនួសវិញ។

ពេលវេលាកន្លងទៅ 1ខែ ទីក្រុងហ្វ៊ីឡាដែលហ្វៀ មានអ្នកស្លាប់ដោយសារជំងឺគ្រុនផ្ដាសាយធំអេស្ប៉ាញ ជាង 10,000នាក់ ចំណែកទីក្រុងសេនត៍ល្វីសវិញ ស្លាប់មិនដល់ 700នាក់ផង។

ហេតុការណ៍ទាំងនេះ បានក្លាយជាករណីសម្រាប់សិក្សាស្រាវជ្រាវដ៏ល្បីល្បាញបំផុត ដែលបង្ហាញឱ្យឃើញអំពីប្រយោជន៍ល្អពីការប្រើវិធានការរក្សាគម្លាតឆ្ងាយពីគ្នាខាងសង្គម ដើម្បីតស៊ូនឹងរោគរាតត្បាត។

ក្រៅពីនេះ ក្រុមអ្នកសេដ្ឋសាស្ត្រ ពីមហាវិទ្យាល័យ ព្រីនស្តុន ថែមទាំងបានធ្វើការសិក្សាវិភាគ ពីការប្រើវិធានការបិទទីក្រុងក្នុងឆ្នាំ1918 និងបានរកឃើញភ័ស្តុតាងបញ្ជាក់ថា ទីក្រុងដែលប្រើវិធានការបិទទីក្រុងដែលម៉ឺងម៉ាត់ជាង អាចស្ដារខ្លួន និងស្រង់សេដ្ឋកិច្ចឡើងវិញបានយ៉ាងឆាប់រហ័សជាង ក្រោយវិបត្តិរោគរាតត្បាតបានបញ្ចប់។

សូមរង់ចាំអានបន្តនៅថ្ងៃស្អែក…

ប្រភព៖ សារព័ត៌មានបរទេស

>ប្រវត្តិសាស្ត្រ ដែលមនុស្សគួរតែដឹង…តើកូវីដ-19 និងការឆ្លងរាលដាលរបស់ជំងឺគ្រុនផ្ដាសាយធំអេស្ប៉ាញកាលពីអតីតកាល ផ្លាស់ប្ដូរពិភពលោកយ៉ាងណា?
>ប្រវត្តិសាស្ត្រ ដែលមនុស្សគួរតែដឹង…តើកូវីដ-19 និងការឆ្លងរាលដាលរបស់ជំងឺគ្រុនផ្ដាសាយធំអេស្ប៉ាញកាលពីអតីតកាល ផ្លាស់ប្ដូរពិភពលោកយ៉ាងណា?(ត…)

May 5, 2020

កុមារអច្ឆរិយពិភពលោកនៅឥណ្ឌា ដែលធ្លាប់បានព្យាករយ៉ាងឆុតអំពី COVID-19 តាំងពីខែសីហា2019 យល់ដឹងច្បាស់ពីគម្ពីរត្រៃវេទ សំស្រ្កឹត និងប្រព័ន្ធវេជ្ជសាស្ត្រហិណ្ឌូបុរាណ…

ថ្ងៃទី22សីហាឆ្នាំ2019 កុមារាជាអ្នកជំនាញខាងហោរាសាស្ត្រម្នាក់ឈ្មោះ Abhigya Anand អាយុ14ឆ្នាំ នៅប្រទេសឥណ្ឌា បានបង្ហោះឃ្លីបវីដេអូមួយនៅលើ Youtube ដោយបានធ្វើការព្យាករយ៉ាងឆុតអំពីសោកនាដកម្មបង្កឡើងដោយវីរុស COVID-19 នាបច្ចុប្បន្ន។

នៅក្នុងវីដេអូដែលបានបង្ហោះនៅថ្ងៃទី22សីហាឆ្នាំ2019នោះ Abhigya Anand បានធ្វើការព្យាករថានឹងមានសោកនាដកម្មមួយកើតឡើងនៅលើផែនដីចាប់ពីដើមខែវិច្ឆិកា ឆ្នាំ2019 ដល់ចុងខែមេសាឆ្នាំ2020។ កុមារាដែលធ្លាប់ទទយលបានពានរង្វាន់ “អច្ឆរិយកុមារពិភពលោក” រូបនេះបានឱ្យដឹងថា ពិភពលោកនឹងបានឃើញសង្គ្រាមជីវសាស្ត្រមួយនៅឆ្នាំ2020 ដែលប្រការនេះត្រូវបានគេជឿថាជារោគរាតត្បាតCOVID-19។

Abhigya Anand ព្យាករថា សោកនាដកម្មបែបរោគរាតត្បាតនឹងកើតឡើង និងគ្របដណ្ដប់ទូទាំងសកលលោក ចាប់ពីអាស៊ីដល់អឺរ៉ុប រហូតដល់ទ្វីបអាមេរិក ឥណ្ឌា រួមនឹងបណ្ដាប្រទេសនៅភាគពាយព្យប្រទេសឥណ្ឌា។ល។

កុមារារូបនេះក៏បានព្យាករថា ប្រទេសចិនគឺជាប្រទេសមួយក្នុងចំណោមប្រទេសដែលរងគ្រោះធ្ងន់ធ្ងរបំផុតដោយសារសោកនាដកម្មនេះ។ ទន្ទឹមនឹងនេះ បណ្ដាប្រទេសអ្នកមាន ឬក៏ប្រទេសដែលមានអណ្ដូងប្រេងច្រើនដូចជា សហរដ្ឋអាមេរិក អង់គ្លេស ប៉ាគីស្ថាន អ៊ីស្រាអែលជាដើម ក៏នឹងត្រូវរងឥទ្ធិពលយ៉ាងធ្ងន់ធ្ងរដោយសារសោកនាដកម្មនេះផងដែរ។

គ្រោះមហន្តរាយនេះក៏នឹងបង្កឱ្យមានវិបត្តិសេដ្ឋកិច្ចទ្រង់ទ្រាយធំទូទាំងពិភពលោកដោយសារតែរោគរាតត្បាតឆ្លងរាលដាល។ ក្នុងនោះ វិស័យសេដ្ឋកិច្ច ដឹកជញ្ជូន និងទេសចរណ៍ក៏ទទួលរងផលប៉ះពាល់ធ្ងន់ធ្ងរបំផុត។ នេះបើតាមសម្ដីកុមារាអច្ឆរិយ Abhigya។

អ្នកជំនាញខាងហោរាសាស្ត្រនេះក៏បាននិយាយបន្ថែមថា សង្គ្រាមជីវសាស្ត្រ ដែលតាមការយល់ឃើញរបស់កុមារនេះនោះគឺសង្គ្រាមរបស់មនុស្ស ប្រឆាំងទៅនឹងវីរុសដ៏គ្រោះថ្នាក់។ កុមារានេះក៏បានស្នើឱ្យអ្នករាល់គ្នានៅក្នុងផ្ទះក្នុងអំឡុងពេលសង្គ្រាមជីវសាស្ត្រនេះកំពុងកើតឡើង ព្រោះថាការចេញក្រៅផ្ទះនឹងធ្វើឱ្យមានហានិភ័យខ្ពស់ក្នុងការផ្ទុះជារោគរាតត្បាត។

កុមារ Abhigya Anand មានបញ្ញាខ្ពស់គួរឱ្យកោតសរសើរ

Abhigya Anand ទទួលបានសមត្ថិផលយ៉ាងច្រើនគួរឱ្យគោរពកោតសរសើរ។ កុមារនេះបច្ចុប្បន្នមានអាយុ14ឆ្នាំ ប៉ុន្តែបានក្លាយជាអ្នកព្យាករវ័យក្មេងបំផុតក្នុងពិភពលោក ដែលមានការយល់ដឹងច្រើនអំពីគម្ពីរត្រៃវេទ(The Vedas) និងប្រព័ន្ធវេជ្ជសាស្ត្រហិណ្ឌូបុរាណ(Ayurveda)។

Abhigya ទទួលបានសញ្ញាប័ត្របញ្ចប់ការសិក្សាផ្នែកមីក្រូជីវសាស្រ្ត Ayurveda (Post Graduate Diploma in Ayurvedic Microbiology(PGDAM) ហើយក៏ជាសិស្សក្មេងបំផុតដែលបានទទួលសញ្ញាបត្រកម្រិតនេះនៅក្នុងប្រទេសឥណ្ឌា។ បច្ចុប្បន្ន កុមាររូបនេះកំពុងតែសិក្សាលើមុខវិជ្ជាព្យាករផ្នែកហិរញ្ញវត្ថុជាន់ខ្ពស់នៅសាកលវិទ្យាល័យ Divya Jyothi ប្រទេសឥណ្ឌា។

Abhigya Anand ក៏បានស្រាវជ្រាវ និងយល់ដឹងស៊ីជម្រៅអំពីភាសាសំស្ក្រឹត រហូតដល់ថ្នាក់ដែលអាចបង្រៀនសិស្សដូចទៅនឹងសាស្ត្រាយ៉ាងដូច្នោះដែរ។ កុមាររូបនេះ រួមនឹងប្អូនស្រីរបស់គាត់ មានប៉ុស្តិ៍ Youtube មួយដែលមានវីដេអូជាង700ឃ្លីប ក្នុងនោះមាន300ឃ្លីបនិយាយអំពីការព្យាករនានា។

ដោយសារតែសមិទ្ធិផលដ៏ល្អបំផុតរបស់ខ្លួន Abhigya Anand ក៏ទទួលបានពានរង្វាន់ “អច្ឆរិយកុមារពិភពលោក” (Global Child Prodigy) ដែលពានរង្វាន់ប្រភេទនេះបានប្រគល់ជូនកុមារតែប៉ុន្មានរយនាក់ប៉ុណ្ណោះនៅក្នុងពិភពលោកនាបច្ចុប្បន្ន៕

ប្រភព៖ សារព័ត៌មានបរទេស

April 29, 2020

COVID-19! ឥណ្ឌាដាក់ទណ្ឌកម្មអ្នករំលោភបទបញ្ជាបម្រាមគោចរ ដោយវាយនឹងដំបង

អាជ្ញាធរឥណ្ឌា ធ្វើការពិន័យយ៉ាងធ្ងន់ធ្ងរចំពោះអ្នកទាំងឡាយណាដែលបានរំលោភលើបទបញ្ជាបម្រាមគោចរ ខណៈដែលប្រជាជនប្រមាណជា1.3ពាន់លាននាក់ ត្រូវបានស្នើឱ្យនៅក្នុងផ្ទះ ដើម្បីទប់ទល់នឹងការឆ្លងរាលដាលវីរុសCOVID-19។

យោងតាមបទបញ្ជារបស់លោក Narendra Modi នាយករដ្ឋមន្ត្រីនៃប្រទេសឥណ្ឌា ប្រទេសដែលមានប្រជាជនប្រមាណជា1.3ពាន់លាននាក់នេះ នឹងត្រូវបានបិទការដើរហើរទាំងស្រុងក្នុងរយៈពេល21ថ្ងៃ ដើម្បីរារាំងពលរដ្ឋមិនឱ្យចេញក្រៅផ្ទះ។

នាយករដ្ឋមន្ត្រីឥណ្ឌា មានប្រសាសន៍ថា ការដាក់បម្រាមគោចរគឺជាវិធីតែមួយគត់ដែលអាចជួយទប់ស្កាត់ការឆ្លងCOVID-19បន្ថែមទៀត និងកាត់បន្ថយទំហំនៃការរីករាលដាលរបស់មេរោគនេះ។

សេវាកម្មចាំបាច់មួយចំនួនដូចជា អគ្គិសនី ទឹក ការថែទាំសុខភាព ពន្លត់អគ្គិភ័យ និងហាងលក់គ្រឿងទេសជាដើម ត្រូវបានអនុញ្ញាតឱ្យបន្តសកម្មភាព។ ក្រៅពីនេះ សុទ្ធតែត្រូវបានបិទ សូម្បីតែរថយន្តក្រុង និងរថភ្លើងក្រោមដីក៏ត្រូវបានផ្អាកដំណើរការទាំងស្រុង។

បម្រាមគោចរនៅប្រទេសឥណ្ឌា ត្រូវបានគេមើលឃើញថា មានទ្រង់ទ្រាយធំជាងប្រទេសចិនដែលមនុស្សប្រមាណជា750លាននាក់ប៉ុណ្ណោះ ត្រូវបានហាមមិនឱ្យធ្វើដំណើរ។

នៅប្រទេសឥណ្ឌា មានការព្រួយបារម្ភខ្លាំងចំពោះបទបញ្ជាបម្រាមគោចរនេះ។ មនុស្សជាច្រើនយល់ថា បទបញ្ជានេះអាចធ្វើឱ្យវីរុសCOVID-19 ឆ្លងរាលដាលដល់ជនបទ ខណៈដែលពលរដ្ឋជាច្រើនប្រញាប់ធ្វើដំណើរទៅស្រុកកំណើត ព្រោះខ្លាចជាប់នៅក្នុងទីក្រុង។

សមត្ថកិច្ចឥណ្ឌា កំពុងប្រើប្រាស់វិធានការពិន័យច្រើនរូបភាព ចំពោះអ្នកដែលបានរំលោភលើបទបញ្ជាបម្រាមគោចររបស់រដ្ឋាភិបាល ក្នុងនោះមានដូចជា ការពិន័យដោយការវាយនឹងដំបង ឬចាប់ឱ្យអង្គុយតាមកាយវិការពិបាកទ្រាំជាច្រើនរបៀប។ល។

ប្រទេសឥណ្ឌា គិតត្រឹមល្ងាចនេះ បានរកឃើញអ្នកឆ្លងមេរោគCOVID-19 តែ665នាក់ និងស្លាប់ចំនួន13នាក់ប៉ុណ្ណោះ ដែលតួលេខនេះ នៅទាបជាងប្រទេសចិន សហរដ្ឋអាមេរិក និងបណ្ដាប្រទេសនៅអឺរ៉ុបនៅឡើយ។ ក៏ប៉ុន្តែ កត្តាជីវភាពរស់នៅ អនាម័យនៅមានកម្រិត រួមនឹងប្រព័ន្ធសុខាភិបាលនៅខ្សោយ របស់ប្រទេសឥណ្ឌា អាចធ្វើឱ្យការឆ្លងរាលដាលនៃវីរុសCOVID-19 កើនឡើងខ្លាំង មិនអាចគ្រប់គ្រងបាន។

នាយករដ្ឋមន្ត្រី Modi បានប្រកាសចំណាយថវិកាចំនួន150ពាន់លាន rupee (ជិត2ពាន់លានដុល្លារអាមេរិក) ដើម្បីជួយដល់ការធ្វើតេស្តរកមេរោគ ការបន្ថែមគ្រែក្នុងមន្ទីរពេទ្យ ម៉ាស៊ីនជំនួយការដកដង្ហើម។ល។ លោក Modi ក៏បានបង្កើតក្រុមការងារពិសេសមួយដែលស្ថិតក្រោមការដឹកនាំរបស់រដ្ឋមន្ត្រីក្រសួងហិរញ្ញវត្ថុ ដើម្បីដោះស្រាយបញ្ហាសេដ្ឋកិច្ចដែលកើតឡើងដោយសារវិបត្តិសុខភាពនេះ៕

ប្រភព៖ Reuters, AFP, PTI,indiatimes

March 26, 2020

Jack Ma ដណ្ដើមបានតំណែងអ្នកមានបំផុតនៅអាស៊ីវិញហើយ ខណៈអ្នកមានបំផុតទាំង500នាក់របស់ពិភពលោក បានបាត់បង់ប្រាក់ 238.5ពាន់លានដុល្លារអាមេរិក កាលពីម្សិលម៉្ងៃ

ក្រោយពីបានលក់មូលបត្រទូទាំងពិភពលោកកាលពីថ្ងៃទី9មីនាកន្លងទៅ ទ្រព្យសម្បត្តិរបស់មហាសេដ្ឋីឥណ្ឌា លោក Mukesh Ambani បានថយចុះមកនៅក្រោមស្ថានិក Alibaba គឺមហាសេដ្ឋីចិន លោក Jack Ma។

យោងតាម Bloomberg Billionaires Index លោក Mukesh Ambani បានបាត់បង់5.8ពាន់លានដុល្លារអាមេរិកកាលពីម្សិលម៉្ងៃ (9មីនា) ធ្វើឱ្យគាត់បាត់បង់តំណែងជាអ្នកមានបំផុតប្រចាំទ្វីបអាស៊ី ដោយធ្លាក់ទៅលើដៃមហាសេដ្ឋីចិន លោក Jack Ma ដែលជាស្ថានិកនៃក្រុមហ៊ុន Alibaba។ មហាសេដ្ឋីចិន Jack Ma បច្ចុប្បន្ន មានទ្រព្យ 44.5ពាន់លានដុល្លារអាមេរិក ច្រើនជាងមហាសេដ្ឋីឥណ្ឌា លោក Mukesk Ambani ប្រមាណជា 2.6ពាន់លានដុល្លារអាមេរិក។

មូលបត្រ Alibaba កាលពីថ្ងៃទី9មីនា បានធ្លាក់ថ្លៃ3.41% នៅលើផ្សារហ៊ុន New York បណ្ដាលឱ្យមហាសេដ្ឋី Jack Ma បាត់បង់ 1.06ពាន់លានដុល្លារអាមេរិក។ ក៏ប៉ុន្តែ តម្លៃមូលបត្រពហុវិស័យ Reliance Industries របស់មហាសេដ្ឋី Ambani បានដាំក្បាលចុះខ្លាំងជាងនេះទៅទៀត ពោលគឺធ្លាក់ថ្លៃដល់ទៅ12% (ទាបបំផុតរាប់ចាប់ពីឆ្នាំ2009មកនេះ)។ ចាប់ពីដើមឆ្នាំ តម្លៃមូលបត្រ Reliance Industries បានថយចុះសរុបចំនួន 26%។

ចំណែក Alibaba វិញ ថ្វីបើរោគរាតត្បាត COVID-19 កំពុងតែ “ធ្វើទុក្ខ” ទៅលើវិស័យជំនួញមួយចំនួនរបស់ក្រុមហ៊ុននេះ ប៉ុន្តែ COVID-19 ក៏បានជួយជំរុញឱ្យតម្រូវការដែលទាក់ទិននឹងបច្ចេកវិទ្យាចល័ត មានកំណើនខ្ពស់ ដែលបាន និងកំពុងហុចផលប្រយោជន៍ខ្លះដល់មហាសេដ្ឋីចិន លោក Jack Ma។

តម្លៃមូលបត្រទូទាំងពិភពលោក កាលពីម្សិលម៉្ងៃ(9មីនា) បានធ្លាក់ចុះខ្លាំង ដោយសារតម្លៃប្រេងបានដាំក្បាលចុះ ហើយអ្នកវិនិយោគមានការព្រួយបារម្ភអំពីរោគរាតត្បាត COVID-19។ កត្តានេះ ក៏បានធ្វើឱ្យមានការសង្ស័យថា Reliance Industries មិនអាចសងអស់បំណុលនៅមុនដំណាច់ឆ្នាំ2021 ដូចដែលមហាសេដ្ឋីឥណ្ឌា Ambani បានសន្យា។

ភាពច្របូកច្របល់នៅលើផ្សារហ៊ុនកាលពីម្សិលម៉្ងៃ ក៏បានធ្វើឱ្យអ្នកមានមួយចំនួនក្នុងពិភពលោក ត្រូវខាតបង់រាប់ពាន់លានដុល្លារអាមេរិក។ ទ្រព្យរបស់មហាសេដ្ឋីប្រេង Harold Hamm បានថយចុះរហូតដល់ពាក់កណ្ដាល នៅសល់ត្រឹមតែ 2.4ពាន់លានដុល្លារ។ ចំណែក Jeff Hildebrand ក៏បាត់បង់ 3ពាន់លានដុល្លារអាមេរិក។ សរុបមក អ្នកមានបំផុតទាំង500នាក់របស់ពិភពលោក បានបាត់បង់ប្រាក់ 238.5ពាន់លានដុល្លារអាមេរិក នៅលើផ្សារហ៊ុន កាលពីម្សិលម៉្ងៃ ដែលការខាតបង់នេះ ខ្ពស់ជាងពេលណាៗទាំងអស់ រាប់ចាប់ពីឆ្នាំ2016៕

ប្រភព៖ សារព័ត៌មានបរទេស

March 11, 2020

Tag: ឥណ្ឌា