អង់គ្លេស - La Reine Media

ស្ថានីយបញ្ចូលថាមពលរថយន្តអគ្គិសនី មានរាងដូចដើមឈើ និងស្លឹកប្រវែង 7 ម៉ែត្រ

ក្រុមហ៊ុនធុរកិច្ចថ្មីរបស់អង់គ្លេស SolarBotanic Trees អភិវឌ្ឍស្ថានីយបញ្ចូលថាមពលរថយន្តអគ្គិសនី ដែលអាចប្រមូលកម្ដៅពីព្រះអាទិត្យតាមរយៈដំបូល ឬស្លឹកដែលមានផ្ទាំងសូឡា និងរក្សាអគ្គិសនីនៅក្នុងបង្គោល ឬដើមរបស់វា។

SolarBotanic Trees ទើបតែផលិតបានដើមឈើលោហធាតុគំរូដំបូងសម្រាប់ការសាកល្បងដែលមានទំហំស្មើនឹង ½ នៃទំហំរបស់កំណែផ្លូវការ និងកំពុងប្រឹងប្រែងក្នុងការអភិវឌ្ឍ ធ្វើតេស្តកំណែពេញលេញនៅមុនពេលចាប់ផ្ដើមដំណើរការពាណិជ្ជកម្មនៅចុងឆ្នាំនេះ។ យោងតាម CNN ចុះផ្សាយកាលពីថ្ងៃទី 29 ឧសភា CEO Chris Shelley ឱ្យដឹងថា ក្រុមហ៊ុននេះបានទទួលការកក់ផលិតផលដំបូងចំនួន 200 ដើម ពី Raw Charging Group។

ដោយមានកម្ពស់ 4.5 ម៉ែត្រ និងស្លឹកប្រវែង 7 ម៉ែត្រ ដើមឈើថាមពលរបស់ SolarBotanic Trees អាចត្រូវបានដំឡើងដោយងាយនៅតាមទីសាធារណៈ។ Shelley ឱ្យដឹងថា ដំបូល ឬស្លឹករបស់ដើមឈើលោហធាតុនេះក៏ផ្ដល់ម្លប់ត្រជាក់ និងមានស្រស់ស្អាត។

ដើមឈើសិប្បនិម្មិតនេះមានកម្លាំងផលិតអគ្គិសនី 5 គីឡូវ៉ាត់ អាចបញ្ចូលថាមពលពី 20% ឡើងដល់ 80% ក្នុងរយៈពេលជិត 7 ម៉ោង សម្រាប់រថយន្តអគ្គិសនីដែលមានថ្ម 50 គីឡូវ៉ាត់។ ផលិតផលរបស់ SolarBotanic Trees មានតម្លៃប្រហែលពី 22,000 ទៅ 30,000 ដុល្លារអាម៉េរិក/ឈុត។ ប៉ុន្តែ ក្រុមហ៊ុននេះក៏មានគម្រោងផលិតកំណែដែលតូចជាងនេះ និងមានតម្លៃទាបជាងនេះផងដែរ។

SolarBotanic Trees បញ្ជាក់ថា ចាប់ពីឆ្នាំ 2025 ពួកគេអាចផលិតដើមឈើថាមពលនេះបានយ៉ាងតិច 1,000 ដើមជារៀងរាល់ឆ្នាំ ហើយដំឡើងនៅអង់គ្លេស មុននឹងពង្រីកទៅកាន់ទីផ្សារនានារបស់ទ្វីបអឺរ៉ុប និងអាម៉េរិកខាងជើង៕

May 31, 2023

ត្បូងពេជ្រមិនទាន់ច្នៃដែលធំជាងគេបង្អស់លើពិភពលោក

ពេជ្រមិនទាន់ច្នៃមានទំហំធំជាងគេបង្អស់លើពិភពលោក ដែលមានឈ្មោះថា Cullinan ត្រូវបានរកឃើញនៅប្រទេសអាហ្វ្រិកខាងត្បូង ក្នុងឆ្នាំ 1905។

យោងតាមទំពី IFL Science ត្បូង Cullinan គឺជាពេជ្រមិនទាន់ច្នៃមួយដុំដែលមានទម្ងន់ 3,106 ការ៉ាត និងមានទំហំ 10.1 x 6.35 x 5.9 សង់ទីម៉ែត្រ។ ទម្ងន់នេះស្មើនឹង 621 ក្រាម និងធំប៉ុនបាល់បោះមួយគ្រាប់ ឬសត្វឃ្មុំ 7,692 ក្បាល។

កាលពីឆ្នាំ 1905 Frederick Wells អ្នកគ្រប់គ្រងអណ្ដូងរ៉ែ Premier នៅ Pretoria ប្រទេសអាហ្វ្រិកខាងត្បូង បានឃើញពន្លឺចាំងចេញពីវត្ថុអ្វីមួយនៅជាប់នឹងជញ្ជាំងផ្នែកខាងលើ នៅពេលស្ថិតក្នុងដីជម្រៅ 5.5 ម៉ែត្រ។ Wells យកបានត្បូងពេជ្រនេះ ហើយប្រគល់ជូនលោក Thomas Cullinan ដែលជាម្ចាស់អណ្ដូងរ៉ែ នៅក្នុងថ្ងៃដដែល។ ប៉ុន្តែ រហូតដល់ឆ្នាំ 1907 ទើបត្បូងនេះមានអ្នកទិញ។ អាជ្ញាធរខេត្ត Transvaal បានទិញត្បូងពេជ្រនេះដើម្បីធ្វើជាតង្វាយសម្រាប់ថ្វាយស្ដេច Edward ទី 7 របស់ចក្រភពអង់គ្លេស។ ដោយសារតែបារម្ភអំពីសុវត្ថិភាពតាមផ្លូវដឹកជញ្ជូនពីទ្វីបអាហ្វ្រិកទៅកាន់ទីក្រុងឡុងដ៍របស់អង់គ្លេស ស្ដេច Edward បានដាក់ត្បូងពេជ្រក្លែងក្លាយនៅលើកប៉ាល់ ដោយមានអ្នកយាមការពារច្រើននាក់ ក្នុងបំណងបង្វែរចំណាប់អារម្មណ៍ ខណៈដែលពេជ្រ Cullinan ពិតប្រាកដត្រូវបានផ្ញើទៅកាន់អង់គ្លេសដោយដាក់ក្នុងប្រអប់សាមញ្ញ។

ដោយសារតែ Cullinan មានទំហំធំពេក ស្ដេច Edward ក៏ប្រគល់ការងារកែច្នៃទៅឱ្យ Joseph Asscher ដែលជាប្រធានក្រុមហ៊ុន Asscher Diamond នៅ Amsterdam ។ Asscher និងក្រុមការងារបានចំណាយពេលពិនិត្យ និងកាត់ជាដុំអស់រយៈពេល 14 ខែ ក្នុងនោះពួកគេត្រូវធ្វើការជាងដប់ម៉ោង/ថ្ងៃ ហើយពេលខ្លះ Asscher ក៏ត្រូវដួលសន្លប់ព្រោះតែអស់កម្លាំង និងព្រួយបារម្ភ។ ចុងក្រោយ ពេជ្រ Cullinan ក៏ត្រូវបានកាត់ជា 9 ដុំធំៗ និងត្រូវបានដាក់ឈ្មោះពី Cullinan I ដល់ Cullinan IX និងដុំតូចៗជិត 100 ដែលមានតម្លៃរាប់លានដុល្លារអាម៉េរិក។

Cullinan គឺជាត្បូងពេជ្រធំជាងគេបង្អស់លើពិភពលោក

ត្បូងពេជ្រមួយគ្រាប់ធំជាងគេក្នុងចំណោមនោះ ដែលត្រូវបានដាក់ឈ្មោះឱ្យថា Cullinan I ឬហៅថា តារាទ្វីបអាហ្វ្រិក មានទម្ងន់ 530.2 ការ៉ាត។ ពេជ្រធំៗទាំង 9 គ្រាប់នេះសុទ្ធតែជាកម្មសិទ្ធិរបស់រាជវង្សអង់គ្លេស ហើយភាគច្រើនត្រូវបានប្រើប្រាស់ដើម្បីតុបតែងមកុដ និងគ្រឿងអលង្ការនានា។

គ្រាប់ពេជ្រដែលធំជាងគេលំដាប់ទីពីរលើពិភពលោកបន្ទាប់ពី Cullinan គឺ Excelsior។ Excelsior ត្រូវបានរកឃើញដោយកម្មករនៅអណ្ដូងរ៉ែ Jagersfontein ក្នុងប្រទេសអាហ្វ្រិកខាងត្បូង កាលពីឆ្នាំ 1893។ អណ្ដូងរ៉ែ Jagersfontein ជាកន្លែងដែលបានរកឃើញដុំពេជ្រចំនួនពីរក្នុងចំណោយដុំពេជ្រទាំងដប់ដែលមានទំហំធំជាងគេលើពិភពលោក៕

May 31, 2023

ខ្សែប្រយុទ្ធរបស់ Man Utd ប្ដេជ្ញារារាំង Man City លើកពានទាំងបីក្នុងរដូវកាលនេះ

(អង់គ្លេស) – ខ្សែប្រយុទ្ធ Marcus Rashford ចាត់ទុកថា ការរារាំង Man City បង្កើតឡើងវិញទិដ្ឋភាពលើកពានជើងឯកទាំងបីនៃរដូវកាល 1998-1999 របស់ Manchester United គឺជារឿងសំខាន់បំផុត នៅមុនវគ្គផ្ដាច់ព្រ័ត្រ FA Cup។

«ការធានាថា Man Utd នៅតែជាក្លឹបអង់គ្លេសតែមួយគត់ដែលដណ្ដើមបានពានជើងឯកទាំងបីក្នុងមួយរដូវកាល (Treble) គឺជារឿងសំខាន់បំផុត» Rashford ថ្លែងដូច្នេះនៅពេលត្រូវបានសួរអំពីការជំរុញទឹកចិត្តរបស់គាត់នៅមុនវគ្គផ្ដាច់ព្រ័ត្រ FA Cup (Football Association Challenge Cup)។

ក្រោយពីដណ្ដើមបានពានរង្វាន់ជើងឯកលិគកំពូលអង់គ្លេសបន្តបន្ទាប់ជាលើកទីបី Man City នៅសល់ពីរប្រកួតទៀតដែលនឹងត្រូវប៉ះ Man Utd ក្នុងវគ្គផ្ដាច់ព្រ័ត្រ FA Cup នៅទីលាន Wembley របស់អង់គ្លេស ថ្ងៃទី 03 មិថុនា រួចប្រកួតជាមួយ Inter Milan ក្នុងវគ្គផ្ដាច់ព្រ័ត្រ Champions League នៅប្រទេសតួកគី ថ្ងៃទី 10 មិថុនា។ គ្រូបង្វឹក Pep Guardiola របស់ក្លឹប Man City ធ្លាប់បានសម្ដែងអំពីមហិច្ឆតាលើកពានទាំងបីនេះដើម្បីបង្កើតឡើងវិញទិដ្ឋភាពនៃជ័យជម្នះរបស់ Man Utd នៅរដូវកាល 1998-1999។

ខ្សែប្រយុទ្ធ Marcus Rashford របស់ Manchester United

សម្រាប់ Man Utd វិញ ការផ្ដួល Man City នៅលើទីលាន Wembley របស់ក្រុងឡុងដ៍នៅចុងសប្ដាហ៍នេះ មិនត្រឹមតែជួយឱ្យពួកគេលើកពានជើងឯកបានពីរបន្ទាប់ពី EFL Cup (League Cup) ក្នុងមួយរដូវកាលនោះទេ ប៉ុន្តែក៏រារាំងគូប្រកួតមកពីទីក្រុងជាមួយគ្នា បង្កើតឡើងជាថ្មីនូវជោគជ័យក្រោមការដឹកនាំរបស់ Sir Alex Ferguson កាលពី 24 ឆ្នាំមុនផងដែរ។

ក្នុងពិធីប្រគល់រង្វាន់ចុងរដូវកាលរបស់ Manchester United កាលពីព្រលប់ថ្ងៃទី 19 ឧសភា ខ្សែប្រយុទ្ធ Rashford ដណ្ដើមបានពានរង្វាន់ប្រចាំរដូវកាលចំនួនពីរសំខាន់ៗ គឺ ពានរង្វាន់កីឡាករឆ្នើមបំផុតដែលបោះឆ្នោតដោយអ្នកគាំទ្រ (Sir Matt Busby Player of the Year) និងពានរង្វាន់កីឡាករឆ្នើមបំផុតដែលបោះឆ្នោតដោយសមាជិកក្នុងក្រុម៕

May 31, 2023

នៅលិគកំពូលអង់គ្លេស (English Premier League) តើក្រុមបាល់ទាត់នីមួយៗទទួលបានប្រាក់ប៉ុន្មាន?

(អង់គ្លេស) – ក្លឹបបាល់ទាត់នីមួយៗដែលចូលរួមប្រកួតដណ្ដើមពានរង្វាន់លិគកំពូលអង់គ្លេស (English Premier League) រដូវកាល 2022/2023 ទទួលបានជិត 160 លានដុល្លារអាម៉េរិកពីគណៈកម្មការរៀបចំ ក្នុងនោះ ម្ចាស់ជើងឯក Man City ទទួលបានប្រាក់ច្រើនជាងគេ។

លិគកំពូលអង់គ្លេសចែកប្រាក់រង្វាន់ និងប្រាក់ចំណូលពីការលក់សិទ្ធិផ្សាយផ្ទាល់ជាង 3 ពាន់លានដុល្លារអាម៉េរិក ទៅឱ្យក្លឹបទាំង 20 ដែលចូលរួមការប្រកួត។ បើទោះជាគណៈកម្មការរៀបចំមិនប្រកាសតួលេខជាក់លាក់ជាសាធារណៈ ប៉ុន្តែប្រាក់ចំណូលដែលបានពីការផ្សាយផ្ទាល់ត្រូវបានបែងចែកស្ទើរតែស្មើគ្នា។ យ៉ាងនេះក៏ដោយ បណ្ដាក្លឹបដែលត្រូវបានផ្សាយផ្ទាល់នៅអង់គ្លេស តែងតែរកបានប្រាក់ចំណូលច្រើនជាង។

ក្លឹបទាំង 20 នៅលិគកំពូលអង់គ្លេស សុទ្ធតែទទួលបានការទូទាត់ប្រាក់ចំណូលគោលស្មើគ្នាពីការលក់សិទ្ធិផ្សាយផ្ទាល់ ដែលមានតម្លៃប្រហែល 100 លានដុល្លារអាម៉េរិក ក្នុងរដូវកាលមុន ខណៈដែលរដូវកាលឆ្នាំ 2022/2023 នេះ ត្រូវបានគេរំពឹងថា នឹងកើនឡើងខ្ពស់ជាងមុន។ ប៉ុន្តែ ចំនួនប្រាក់ដែលក្លឹបនីមួយៗទទួលបាននឹងខ្ពស់ជាងនេះ អាស្រ័យលើចំនួនលើកដែលពួកគេត្រូវបានជ្រើសរើសសម្រាប់ការផ្សាយផ្ទាល់តាមកញ្ចក់ទូរទស្សន៍ក្នុងប្រទេស។

ទំព័រ Mirror បានផ្សាយថា ម្ចាស់ជើងឯក Man City ទទួលប្រាក់រង្វាន់ 210 លានដុល្លារអាម៉េរិក ច្រើនជាងគេបង្អស់នៅលិគកំពូលអង់គ្លេសរដូវកាលនេះ។ ចំណែកនៅបាតតារាងវិញ Leicester, Leeds និង Southampton សុទ្ធតែរកបានជាង 150 លានដុល្លារ បើទោះជាត្រូវធ្លាក់ចំណាត់ថ្នាក់។

បើសិន Man City បានក្លាយជាជើងឯកនៅ FA Cup និង Champions League ដើម្បីលើកពានបីក្នុងមួយរដូវកាល (Treble) ចំនួនទឹកប្រាក់នេះនឹងកើនឡើងដល់ជាង 330 លានដុល្លារអាម៉េរិក ក្នុងនោះ តំណែងជើងឯក FA Cup នឹងនាំមកនូវប្រាក់រង្វាន់ 4 លានដុល្លារ គ្រាដែល Champions League នឹងជួយឱ្យ Man City រកបាន 116 លានដុល្លារ។

តារាងចំណាត់ថ្នាក់ចុងក្រោយរបស់បណ្ដាក្លឹបនៅលិគកំពូលអង់គ្លេស

យោងតាម Mirror ប្រាក់ចំណូលរបស់បណ្ដាក្លឹបដែលចូលរួមប្រកួតនៅលិគកំពូលអង់គ្លេសរដូវកាល 2022/2023 រួមមាន៖ Man City ទទួលបាន 210 លានដុល្លារអាម៉េរិក, Arsenal 207 លានដុល្លារ, Man Utd 204 លាន, Newcastle 202 លាន, Liverpool 200 លាន, Brighton 196 លាន, Aston Villa 194 លាន, Tottenham 191 លាន, Brentford 188 លាន, Fulham 185 លាន, Crystal Palace 182 លាន, Chelsea 179 លាន, Wolves 177 លាន, West Ham 174 លាន, Bournemouth 171 លាន, Nottingham Forest 169 លាន, Everton 165 លាន, Leicester 163 លាន, Leeds 160 លាន, Southampton 158 លាន៕

May 30, 2023

កង់កូនកាត់រថយន្តអគ្គិសនី អាចបើកបរក្នុងល្បឿន 48 គីឡូម៉ែត្រ/ម៉ោង

(អង់គ្លេស) – Iris eTrike គឺជាយានជំនិះផ្ទាល់ខ្លួនដែលមានរូបរាងដូចកង់បន្តិច ដូចរថយន្តបន្តិច អាចផ្ទុកអីវ៉ាន់បាន 100 គីឡូក្រាម និងអាចបើកបរក្នុងល្បឿន 48 គីឡូម៉ែត្រក្នុងមួយម៉ោង។

កង់កូនកាត់រថយនុ្តគំរូ Iris eTrike របស់អ្នករចនា និងជាអ្នកជំនួញផ្នែកបច្ចេកវិទ្យា ជនជាតិអង់គ្លេស Grant Sinclair មានកម្លាំងជាង ធៀបនឹងកង់ធម្មតា ធ្វើឱ្យវាមានល្បឿនលឿនជាង។ យាននេះផ្ដល់ផាសុកភាព និងការពារអ្នកបើកបរពីអាកាសធាតុអាក្រក់។ នេះបើតាម Yahoo ចុះផ្សាយកាលពីថ្ងៃទី 27 ឧសភា 2023។

កំណែសម្រាប់ការផលិតរបស់ Iris eTrike ប្រើប្រាស់គ្រោងឆ្អឹងធ្វើពីដែកថែប chromoly, ដងខ្លួនធ្វើពីជ័រកៅស៊ូទន់ polypropylene ដែលគ្របដណ្ដប់ដោយសម្បក polymer, ដំបូលធ្វើពីជ័រទន់ថ្លាមានស្រទាប់ការពារបញ្ហាជ្រាបទឹក, ប្រព័ន្ធជំរុញកម្លាំង 9 លេខ និងកៅអីខ្ពស់។

Iris eTrike ក៏មានប្រព័ន្ធភ្លើង LED គ្រប់គ្រាន់, ប្រព័ន្ធបន្សុទ្ធខ្យល់, កាមេរ៉ាមើលក្រោយ និងប្រព័ន្ធបញ្ចុះកម្ដៅ នាំខ្យល់ដែលបានបន្សុទ្ធចូលមកកាន់កាប៊ីន។

កម្លាំងឈ្នាន់សម្រាប់ធាក់របស់អ្នកបើកបរត្រូវបានផ្ដល់ដោយម៉ូទ័រកម្លាំង 250, 500 ឬ 750 វ៉ាត់ អាចជួយឱ្យបើកបរក្នុងល្បឿន 48 គីឡូម៉ែត្រ/ម៉ោង។ Iris eTrike ប្រើប្រាស់ថ្ម lithium-ion 48 វ៉ាត់ 20 អំពែរម៉ោង អាចធ្វើដំណើរបានជាង 48 គីឡូម៉ែត្រ។

ថ្វីបើមានរូបរាងតូច តែ Iris eTrike មានកន្លែងដាក់អីវ៉ាន់ដែលមានចំណុះ 100 លីត្រ។ អេក្រង់ LED នៅខាងមុខអ្នកបើកបរបង្ហាញទិន្នន័យស្ដីពីល្បឿន គម្លាត់នៃការបើកបរ និងថាមពលថ្ម។ល។

Iris eTrike មានបណ្ដោយ 260 សង់ទីម៉ែត្រ, ទទឹង 94 សង់ទីម៉ែត្រ, កម្ពស់ 128 សង់ទីម៉ែត្រ, ទម្ងន់ 50 គីឡូក្រាម និងមានពណ៌ខ្មៅ ឬប្រាក់។ ក្រុមហ៊ុននៅ Cardiff ប្រទេសអង់គ្លេសរបស់ Grant Sinclair កំពុងទទួលការកក់សម្រាប់ Iris eTrike ហើយគ្រោងនឹងប្រគល់ជូនអតិថិជននៅក្នុងត្រីមាសទីមួយឆ្នាំក្រោយ៕

May 29, 2023

បន្ទាប់ពីរួមនឹង PSG លើកពាន Ligue 1 កំពូលតារាបាល់ទាត់អាហ្សង់ទីនក៏បាន «បាត់ខ្លួន»

ក្រោយពីបានចូលរួមបញ្ចេញថ្វីជើងជាមួយនឹងក្លឹប PSG ដណ្ដើមបានពាន Ligue 1 កំពូលកីឡាករ Messi បែរជា «បាត់ខ្លួន» ប៉ុន្តែ ក្រោយមកទើបអ្នកគាំទ្រដឹងអំពីទីតាំងដែល M10 បានទៅ។

កាលពីចុងសប្ដាហ៍កន្លង Messi បានដើរតួជាវីរបុរស ដោយរកបានមួយគ្រាប់ក្នុងការប្រកួតដែលទទួលបានលទ្ធផលស្មើ 1-1 រវាងក្លឹប PSG និង Strasbourg ជួយឱ្យក្រុមនៅប៉ារីសមានពិន្ទុគ្រប់គ្រាន់ដើម្បីលើកពាន Ligue 1 បានលឿនជាងមួយជុំ។

រដូវកាលនេះ Messi គឺជាកីឡាករសំខាន់លំដាប់កំពូលរបស់ PSG ទន្ទឹមនឹង Mbappe។ ក្រោយពីចូលទាត់បាន 40 ប្រកួត M10 រកបាន 21 គ្រាប់ និងបង្កឱកាសបាន 20 គ្រាប់។

លទ្ធផលខាងលើជួយឱ្យ Messi មានវត្តមានក្នុងក្រុមលេចធ្លោរបស់ Ligue 1 រដូវកាល 2022/2023 សម្រាប់ខ្សែប្រយុទ្ធស្លាបស្ដាំ។ ប៉ុន្តែ ជំនួសឱ្យការរួមជាមួយ Mbappe តំណាងឱ្យ PSG នៅក្នុងពិធីប្រគល់រង្វាន់របស់សមាគមកីឡាករអាជីពបារាំង (UNFP) នាពេលកន្លែង Messi បែរជា «បាត់ខ្លួន» ជាថ្មី។

យ៉ាងណាក៏ដោយ ក្រោយមកអ្នកគាំទ្រក៏បានដឹងអំពីទីតាំងដែល M10 បានទៅ។ ជាក់ស្ដែង Messi ត្រូវគេឃើញថា បានទៅកាន់ Barcelona ដើម្បីទស្សនាការសម្ដែងរបស់ក្រុមតន្ត្រីអង់គ្លេស Coldplay ជំនួសឱ្យការចូលរួមពិធីប្រគល់រង្វាន់នៅប្រទេសបារាំង ក្នុងនាមជាកីឡាករ PSG។

Messi មិនចូលរួមពិធីប្រគល់រង្វាន់ជាមួយ PSG ដើម្បីទៅកាន់ Barcelona មើលការប្រគំតន្ត្រីជាមួយមិត្តចាស់ Fabregas

វត្តមានរបស់ Messi ធ្វើឱ្យអ្នកគាំទ្រជាច្រើនសប្បាយចិត្ត ពិសេសក្រុមអ្នកគាំទ្ររបស់ក្លឹប Barca នៅអេស្ប៉ាញ។ យោងតាមសារព័ត៌មានអេស្ប៉ាញ El Pulga អាចនឹងត្រលប់ទៅកាន់កីឡដ្ឋាន Camp Nou ក្នុងទម្រង់សេរីនៅរដូវក្ដៅនេះ។

ទំព័រ AS បានឱ្យដឹងថា ការចាកចេញរបស់ Sergio Busquets និង Jordi Alba បន្ទាប់ពីរដូវកាលនេះ អាចនឹងនាំឱ្យ Lionel Messi ក្លាយជាប្រធានក្រុមរបស់ Barca បើសិនជាគាត់ព្រមវិលវិញ។ ក្លឹបនៅកាតាឡូញ៉ា ក៏គ្រោងនឹងអនុញ្ញាតឱ្យ Messi ទទួលបានប្រាក់បៀវត្សរ៍ខ្ពស់ជាងគេនៅក្នុងក្រុម ពោលគឺខ្ពស់ជាងបន្តិចធៀបនឹង Lewandowski (20 លានអឺរ៉ូ/រដូវ មុនបង់ពន្ធ)៕

May 29, 2023

ដើម្បីត្រៀមសម្រាប់ការប្រកួតជាមួយជើងឯក World Cup ឥណ្ឌូណេស៊ីផ្ដល់សញ្ជាតិដល់កីឡាករបរទេសច្រើននាក់

ឥណ្ឌូណេស៊ីបន្តអនុវត្តគោលនយោបាយដែលមានតាំងពីឆ្នាំ 2021 ដោយការផ្ដល់សញ្ជាតិដល់កីឡាករបាល់ទាត់វ័យក្មេងពីររូបដែលកំពុងទាត់នៅប្រទេសហូឡង់ ហើយពួកគេនឹងបង្ហាញខ្លួនក្នុងការប្រកួតមិត្តភាពក្របខណ្ឌ FIFA Days នៅខែមិថុនា 2023។

កីឡាករពីររូបដែលទើបតែទទួលបានសញ្ជាតិឥណ្ឌូណេស៊ី រួមមាន Ivar Jenner អាយុ 19 ឆ្នាំ កំពុងលេងជាខ្សែបម្រើរបស់ក្លឹប FC Utrecht និង Rafael Struick អាយុ 20 ឆ្នាំ កំពុងលេងជាខ្សែប្រយុទ្ធឱ្យក្លឹប ADO Den Haag។ អ្នកទាំងពីរសុទ្ធតែមានជីដូនជីតាជាជនជាតិឥណ្ឌូណេស៊ី និងបានស្បថចូលក្រុមជម្រើសជាតិក្នុងនាមជាពលរដ្ឋឥណ្ឌូណេស៊ី ចាប់ពីថ្ងៃទី 22 ឧសភា។

សហព័ន្ធបាល់ទាត់ឥណ្ឌូណេស៊ី (PSSI) បានត្រៀមផ្ដល់សញ្ជាតិដល់ Jenner និង Struick កាលពីខែមុនដើម្បីឱ្យពួកគេចូលរួមក្នុងក្រុម U20 ទៅទាត់នៅ U20 World Cup លើទីលានដែលឥណ្ឌូណេស៊ីធ្វើជាម្ចាស់ផ្ទះ។ ប៉ុន្តែ ឥណ្ឌូណេស៊ីត្រូវបាន FIFA ដកហូតសិទ្ធរៀបចំការប្រកួត ធ្វើឱ្យក្រុម U20 របស់ពួកគេខកខានមិនបានទាត់នៅពានរង្វាន់នេះ និងបានពន្យារពេលលើការផ្ដល់សញ្ជាតិដល់កីឡាករពីររូបខាងលើ។

ក្រុមបាល់ទាត់ជម្រើសជាតិឥណ្ឌូណេស៊ី គ្រោងនឹងប្រកួតជាមួយប៉ាឡេស្ទីន និងអាហ្សង់ទីន នៅថ្ងៃទី 14 និង 19 មិថុនាខាងមុខ នៅហ្សាការតា។ គ្រូបង្វឹក Shin Tae-yong មិនទាន់បង្ហាញបញ្ជីឈ្មោះកីឡាករចុងក្រោយ ប៉ុន្តែនឹងប្រមូលកម្លាំងចាប់ពីថ្ងៃទី 05 មិថុនា។

ក្រៅពី Jenner និង Struick PSSI ក៏មានគម្រោងផ្ដល់សញ្ជាតិដល់ Justin Hubner អាយុ 19 ឆ្នាំ សញ្ជាតិហូឡង់ ជាខ្សែការពាររបស់ Wolves លេងនៅពានរង្វាន់លីគកំពូលអង់គ្លេសផងដែរ។

ប្រធាន PSSI លោក Erick Thohir (ឆ្វេង), Rafael Struick (កណ្ដាល) និង Ivar Jenner នៅហ្សាការតា កាលពីថ្ងៃទី 24 ឧសភា 2023

PSSI បានជំរុញគោលនយោបាយផ្ដល់សញ្ជាតិដល់កីឡាករមានឈាមជ័រជាជនជាតិឥណ្ឌូណេស៊ី តាំងពីឆ្នាំ 2021។ កីឡាករជាច្រើនរូបដែលត្រូវបានផ្ដល់សញ្ជាតិទៅតាមគោលនយោបាយនេះ មានជាអាទិ៍ Jordi Amat (ធ្លាប់លេងនៅពានរង្វាន់ La Liga), Elkan Baggott លេងឱ្យ Ipswich Town នៅពានរង្វាន់ League One (អង់គ្លេស) ឬ Marc Klok និង Sandy Walsh ។ល។ PSSI ក៏ផ្ដល់សញ្ជាតិដល់កីឡាករដែលមិនមានឈាមជ័រជាជនជាតិឥណ្ឌូណេស៊ីផងដែរ ក្នុងនោះមានដូចជា ខ្សែប្រយុទ្ធ Ilija Spasojevic ជាដើម។

ថ្មីៗនេះ បាល់ទាត់ឥណ្ឌូណេស៊ីទទួលបានជោគជ័យមួយចំនួន រួមមាន មេដាយមាសស៊ីហ្គេមលើកទី 32 និងដណ្ដើមបានជើងឯក U16 អាស៊ីអាគ្នេយ៍ 2022។ បាល់ទាត់ឥណ្ឌូណេស៊ីក៏កំពុងឆ្ពោះទៅរកជោគជ័យធំជាងនេះនៅវគ្គជម្រុះ World Cup 2026, Asian Cup 2023 និង AFF Cup ផងដែរ។

ការអញ្ជើញក្រុមជម្រើសជាតិអាហ្សង់ទីនមកប្រកួតមិត្តភាពនៅថ្ងៃទី 19 មិថុនា គឺជាសកម្មភាពលើកកម្ពស់មុខមាត់របស់វិស័យបាល់ទាត់ឥណ្ឌូណេស៊ី។ PSSI ក៏បានឱ្យដឹងថា រៀងរាល់ឆ្នាំ ប្រទេសនេះនឹងអញ្ជើញក្រុមជម្រើសជាតិល្បីៗមកប្រកួតមិត្តភាព ក្នុងនោះមាន ព័រទុយហ្កាល់ ប្រស៊ីល ឬម៉ារ៉ុក។ល។

May 29, 2023

ធ្វើជាម្ចាស់ថ្មីរបស់ MU អ្នកវិនិយោគមកពីកាតាសម្រេចចិត្តលុបបំបាត់ «គោលការណ៍ Ronaldo»

Sheikh Jassim bin Hamad al-Thani ចង់លុបបំបាត់គោលការណ៍ដែលរារាំងកីឡាករទទួលបានប្រាក់បៀវត្សខ្ពស់ជាង បើធៀបនឹងមិត្តរួមក្រុមដទៃដែល Manchester United កំពុងអនុវត្ត។

ទំព័រ Sun Sport ថ្មីៗនេះបានរាយការណ៍ថា ម្ចាស់ថ្មីដ៏មានសក្ដានុពលរបស់ Man United នឹងលុបចោលការកំណត់ស្ដីពីប្រាក់បៀវត្សក្នុងសម័យរបស់គ្រូបង្វឹក Erik ten Hag ដែលបង្កើតឡើងដើម្បីកាត់បន្ថយការចំណាយរបស់ក្លឹប បន្ទាប់ពីការចាក់ចេញរបស់ Cristiano Ronaldo កាលពីចុងឆ្នាំមុន។

យោងតាមអ្វីដែលគេហៅថា «គោលការណ៍ Ronaldo» ក្លឹប Man United បានកំណត់ប្រាក់បៀវត្សអតិបរមាប្រចាំសប្ដាហ៍ត្រឹម 200,000 ផោនអង់គ្លេស ហើយនឹងមិនផ្ដល់ប្រាក់បៀវត្សលើសពីនេះដល់កីឡាករណាទាំងអស់។ គោលការណ៍នេះត្រូវបានដាក់ឈ្មោះមិនផ្លូវការទៅតាមឈ្មោះរបស់ Ronaldo ព្រោះតែកំពូលតារាបាល់ទាត់ព័រទុយហ្កាល់រូបនេះ ធ្លាប់ទទួលបានប្រាក់បៀវត្ស 385,000 ផោន/សប្ដាហ៍ នៅក្នុងការធ្វើការឱ្យក្លឹបនេះលើកទីពីរ មុនពេលទំនាក់ទំនងរវៀង CR7 និង Man United ត្រូវបញ្ចប់ក្នុងភាពចម្រូងចម្រាស។

ការសម្រេចចិត្តរបស់ម្ចាស់ថ្មី ជំរុញឱ្យបីសាចក្រហមអាចទាក់ទាញបណ្ដាកីឡាករលំដាប់ពិភពលោក មកចូលរួមជាមួយគ្រួសារ Old Trafford ក្នុងនោះមាន Neymar របស់ក្លឹប PSG ជាដើម។ ការលុបចោល «គោលការណ៍ Ronaldo» ក៏អាចជួយឱ្យ Man United រក្សាកំពូលកីឡាករដែលមានបច្ចុប្បន្ន មានដូចជា Marcus Rashford ជាដើម ដែលកំពុងរារែកក្នុងការចុះកិច្ចព្រមព្រៀងថ្មី ព្រោះតែប្រាក់បៀវត្សដែលត្រូវបានលើកឡើងដោយភាគីក្លឹប។

Sheikh Jassim អ្នកវិនិយោគមកពីកាតា បានធ្វើការប្រឹងប្រែងដើម្បីដណ្ដើមបានសិទ្ធិធ្វើជាម្ចាស់របស់ Man United ពីគ្រួសារ Glazer។ មុនពេលម្ចាស់ថ្មីមកកាន់ Old Trafford ក្រុម Man United នឹងត្រូវបញ្ចប់រដូវកាល Premier League 2022/2023 ដោយការប្រកួតនៅលើទីលានរបស់ខ្លួន ជាមួយនឹង Fulham និងប៉ះ Manchester City ក្នុងវគ្គផ្ដាច់ព្រ័ត្រ FA Cup នៅសប្ដាហ៍ក្រោយ៕

May 27, 2023

ដាវដែលមានតម្លៃថ្លៃជាងគេលើពិភពលោករបស់ស្ដេចឥណ្ឌា

ដាវដែលមានអាយុកាលជាង 200 ឆ្នាំ របស់ស្ដេច Tipu Sultan ត្រូវបានលក់ក្នុងតម្លៃរហូតដល់ 17.5 លានដុល្លារអាម៉េរិក ខ្ពស់ជាង 2.5 ដងធៀបនឹងកំណត់ត្រាមុននោះ នៅក្នុងការលក់ដេញថ្លៃ កាលពីថ្ងៃទី 23 ឧសភា។

យោងតាមការរំពឹងដំបូង ដាវរបស់ស្ដេច Tipu Sultan មានតម្លៃ 2.5 លានដុល្លារ។ ប៉ុន្តែ កាលពីថ្ងៃទី 23 ឧសភា អាវុធបុរាណនេះត្រូវបានលក់ដេញថ្លៃនៅប្រទេសអង់គ្លេសក្នុងតម្លៃ 17.5 លានដុល្លារអាម៉េរិក។ ប្រការនេះមិនត្រឹមតែបំបែកកំណត់ត្រាសម្រាប់តម្លៃដាវនោះទេ ប៉ុន្តែក៏បង្កើតបានកំណត់ត្រាថ្មីសម្រាប់វត្ថុបុរាណមកពីឥណ្ឌា/អ៊ីស្លាមផងដែរ។

មុននោះ ដាវដែលត្រូវបានលក់ក្នុងតម្លៃខ្ពស់ជាងគេលើពិភពលោក គឺដាវ Boateng Saber ផលិតឡើងតាំងពីសតវត្សរ៍ទី 18 របស់ស្ដេចចិន Qianlong នៃរាជវង្ស Qing។ ឆ្លងកាត់ការលក់ដេញថ្លៃ នៅឆ្នាំ 2006 ក្នុងតម្លៃ 5.93 លានដុល្លារអាម៉េរិក ដាវ Boateng Saber ក៏ត្រូវបានលក់ក្នុងតម្លៃ 7.7 លានដុល្លារនៅឆ្នាំ 2008។

ក៏ប៉ុន្តែ បច្ចុប្បន្ន នាមជាដាវបុរាណដែលមានតម្លៃខ្ពស់ជាងគេលើពិភពលោកបានទៅលើដាវរបស់អតីតមហាក្សត្រឥណ្ឌា Tipu Sultan ដោយសារតែដាវនេះបានបង្ហាញពីសមត្ថភាពផលិតដោយដៃប្រកបដោយភាពល្អឯក៕

May 25, 2023

បន្ទប់ពិសោធន៍ភពអង្គារ/ព្រះចន្ទ ជម្រៅជាងមួយគីឡូម៉ែត្រក្រោមដី

(អង់គ្លេស) – ផ្លូវរូងជ្រៅក្រោមដីនៅតំបន់ Yorkshire ខាងជើង ផ្ដល់ឱកាសដ៏ពិសេសដើម្បីស្រាវជ្រាវអំពីរបៀបដែលមនុស្សអាចរស់នៅ និងធ្វើសកម្មភាពនៅលើឋានព្រះចន្ទ និងភពព្រះអង្គារ។

ក្រុមអ្នកស្រាវជ្រាវនៅសាកលវិទ្យាល័យ Birmingham អនុវត្តកម្រោង Bio-SPHERE នៅក្នុងមូលដ្ឋានស្រាវជ្រាវជម្រៅ 1.1 គីឡូម៉ែត្រ ដែលស្ថិតក្នុងរូងក្រោមដីជ្រៅបំផុតមួយនៅប្រទេសអង់គ្លេស។ នេះបើតាម Phys.org ចុះផ្សាយកាលពីថ្ងៃទី 23 ឧសភា 2023។

គម្រោងនេះត្រូវបានធ្វើឡើងក្នុងបំណងស្វែងយល់អំពីវិទ្យាសាស្ត្រ និងវេជ្ជសាស្ត្រដែលអាចនឹងប្រព្រឹត្តទៅដោយរបៀបណានៅក្នុងបរិស្ថានពោរពេញដោយការលំបាកនៅលើឋានព្រះចន្ទ និងភពអង្គារ។ នេះគឺជាមូលដ្ឋានដំបូងក្នុងចំណោមមូលដ្ឋានពិសោធន៍ថ្មីដែលស្រាវជ្រាវរកវិធីជួយឱ្យមនុស្សធ្វើការ និងរស់នៅដោយមានសុខភាពល្អក្នុងបេសកកម្មអវកាសយូរអង្វែងរបស់មនុស្ស នៅលើភពដទៃ។

ក្រុមស្រាវជ្រាវខាងលើបានសហការជាមួយបន្ទប់ពិសោធន៍ក្រោមដី Boulby របស់ក្រុមប្រឹក្សាមូលដ្ឋានវិទ្យាសាស្ត្រ និងបច្ចេកវិទ្យា ដោយមានការជួយគាំទ្ររបស់ក្រុមហ៊ុនរុករករ៉ែ Boulby, ICL-UK។

គម្រោង Bio-SPHERE ប្រើប្រាស់បណ្ដាញផ្លូវរូងក្រោមដីទំហំ 3,000 ម៉ែត្រការ៉េ នៅក្បែរបន្ទប់ពិសោធន៍ Boulby ឆ្លងកាត់សិលាកម្ទេចកំណក្រោមដីអាយុកាល 205 លានឆ្នាំ៕

May 25, 2023

Tag: អង់គ្លេស