ស្រា - La Reine Media

រកឃើញវត្ថុចម្លែកក្រោមសមុទ្រ សង្ស័យថាជាបច្ចេកវិទ្យារបស់មនុស្សភពដទៃ

អ្នកវិទ្យាសាស្ត្រអាម៉េរិកដើមកំណើតអ៊ីស្រាអែលបានរកឃើញដុំមូលៗចំនួន 10 គ្រាប់ដែលមានរូបរាង និងល្បឿនខុសប្រក្រតី នៅតំបន់សមុទ្រដែលមានអាចម៍ផ្កាយធ្លាក់កាលពីឆ្នាំ 2014។

អ្នកវិទ្យាសាស្ត្រ Avi Loeb មកពីសាកលវិទ្យាល័យ Harvard យល់ថា លោកទំនងជាបានរកឃើញភស្ដុតាងស្ដីពីបច្ចេកវិទ្យារបស់មនុស្សក្រៅភពផែនដី នៅពេលបានរកឃើញអាចម៍ផ្កាយ IM1 ដែលបានធ្លាក់នៅលើតំបន់សមុទ្ររបស់ Papua New Guinea កាលពីឆ្នាំ 2014។ នេះបើតាម Business Insider ចុះផ្កាយកាលពីថ្ងៃទី 08 កក្កដា។

អង្គភាពអវកាសរបស់សហរដ្ឋអាម៉េរិក បានឱ្យដឹងថា បំណែកអាចម៍ផ្កាយទាំងនេះទំនងជាមានប្រភពពីប្រព័ន្ធផ្កាយដទៃ។

ដុំបាល់ទាំងនេះមានផ្ទុកសារធាតុដែក 84%, ស៊ីលីកុន 8%, ម៉ាញេស្យូម 4%, ទីតានីញ៉ូម 2% រួមនឹងសារធាតុដទៃមួយចំនួនទៀត

ការវិភាគបង្ហាញថា គ្រាប់បាល់ទាំងនេះរួមមាន សារធាតុដែក 84%, ស៊ីលីកុន 8%, ម៉ាញេស្យូម 4%, ទីតានីញ៉ូម 2% រួមនឹងសារធាតុដទៃមួយចំនួនទៀត។ ដុំបាល់ទាំងនេះមានទំហំមិនដល់ 1 មិល្លីម៉ែត្រ និងមានពណ៌លឿង ខៀវ ប្រផេះ ហើយមួយចំនួនទៀតមានរូបរាងដូចទៅនឹងផែនដី។ នេះបើតាម Loeb។

Loeb បានប្រៀបធៀបករណីនេះជាមួយនឹងយាន Voyager របស់ណាសាដែលត្រូវបានបាញ់បង្ហោះកាលពីឆ្នាំ 1977។ លោកគិតថា Voyager នឹងធ្លាក់ទៅលើភពដ៏សែនឆ្ងាយមួយនៅក្នុងរយៈពេលមួយពាន់លានឆ្នាំទៀត ហើយពួកវានឹងធ្លាក់ដូចអាចម៍ផ្កាយ។

«មនុស្សយើងនឹងត្រូវចំណាយពេលរាប់ម៉ឺនឆ្នាំដើម្បីហោះចេញផុតពីប្រព័ន្ធព្រះអាទិត្យ និងទៅដល់ប្រព័ន្ធផ្កាយមួយផ្សេងទៀត តាមរយៈបច្ចេកវិទ្យារបស់យានអវកាសទំនើប។ ដុំវត្ថុធាតុនេះប្រហែលជាបានចំណាយពេលប្រហាក់ប្រហែលនេះដើម្បីមកដល់ភពរបស់យើង» Loed និយាយដូច្នេះ។

លោក Loed គឺជាសមាជិករបស់ក្រុមប្រឹក្សាវិទ្យា និងបច្ចេកវិទ្យារបស់ប្រធានាធិបតី និងជាប្រធាន Galileo ដែលជាគម្រោងស្វែងរកភស្ដុតាំងស្ដីពីមនុស្សភពក្រៅ និងបច្ចេកវិទ្យារបស់ពួកគេ។ លោកធ្លាប់បាននិយាយច្រើនដងថា «Oumuamua (វត្ថុអវកាសអន្តរតារាដំបូងគេដែល «មកលេង» ប្រព័ន្ធព្រះអាទិត្យ) អាចជាឧទាហរណ៍អំពីបច្ចេកវិទ្យារបស់មនុស្សភពដទៃ៕

July 11, 2023

ម៉ូតូអគ្គិសនីថ្មីរបស់ BMW មានតម្លៃប្រហែល 31 លានរៀល/គ្រឿង

កាលពីជិតពីរឆ្នាំមុន BMW បានបង្ហាញម៉ូតូអគ្គិសនីធុនស្រាលដែលមានឈ្មោះថា CE 02 ហើយពេលនេះ BMW 02 បានបង្ហាញខ្លួនជាផ្លូវការក្នុងនាមជាម៉ូតូអគ្គិសនីថ្មីបំផុតរបស់យីហោនេះ។

BMW និយាយថា «នេះគឺជាម៉ូតូសម្រាប់ជិះក្នុងទីក្រុងដែលមមាញឹក និងផ្ដោតលើអតិថិជនជាយុវវ័យ»។ ម៉ូតូនេះមានល្បឿនអតិបរមា 95 គីឡូម៉ែត្រ/ម៉ោង គ្រប់គ្រាន់សម្រាប់ការបើកបរក្នុងទីក្រុង ប៉ុន្តែមិនអាចបើកបរលើផ្លូវល្បឿនលឿន។

នៅសហរដ្ឋអាម៉េរិក BMW CE 02 មានតម្លៃចាប់ពី 7,599 ដុល្លារ ប្រហែលនឹង 31,000,000 រៀលក្នុងមួយគ្រឿង។ នេះក៏ជាម៉ូតូអគ្គីសនីតម្លៃទាបបំផុតដំបូងបង្អស់របស់ BMW គិតមកដល់បច្ចុប្បន្ន។

ថ្មប្រភេទ lithium-ion ចំនួនពីរគ្រាប់ កម្លាំង 1.97 គីឡូវ៉ាត់ម៉ោង ដែលអាចដោះចេញបាន អាចផ្គត់ផ្គង់ថាមពលសម្រាប់ម៉ូទ័រអគ្គិសនីកម្លាំង 15 សេះ និងកម្លាំងបង្វិលកង់ 55Nm។ ប្រព័ន្ធទាំងនេះអនុញ្ញាតឱ្យម៉ូតូទម្ងន់ 132 គីឡូក្រាមបង្កើនល្បឿនពី 0 ទៅ 48 គីឡូម៉ែត្រ/ម៉ោងដោយប្រើពេល 3 វិនាទី មុនពេលមានល្បឿនដល់ 95 គីឡូម៉ែត្រ/ម៉ោង។

BMW CE 02 អាចធ្វើដំណើរបាន 90 គីឡូម៉ែត្រ បន្ទាប់ពីបញ្ចូលថាមពលមួយពេញ ស្របទៅតាមស្ដង់ដា WMTC។ ម៉ូតូនេះផ្ដល់ជម្រើសពីរក្នុងការបញ្ចូលថាមពលអគ្គិសនី រួមមានប្រភេទ 0.9 ឬ 1.5 គីឡូវ៉ាត់។ ប្រភេទ 0.9 គីឡូវ៉ាត់អាចបញ្ចូលអគ្គិសនីពី 20% ឡើងដល់ 80% ក្នុងរយៈពេល 170 នាទី ប៉ុន្តែការបញ្ចូលពី 0 ឱ្យឡើងដល់ 100% នឹងត្រូវចំណាយពេល 5.5 ម៉ោង។

ជម្រើសប្រភេទ Highline អាចកាត់បន្ថយពេលវេលានៃការបញ្ចូលអគ្គិសនីពី 20 ដល់ 80% មកនៅត្រឹម 140 នាទី។ ចំណែកការបញ្ចូលពី 0 ឱ្យដល់ 100% គឺត្រូវចំណាយពេល 290 នាទី លឿនជាង 40 នាទី ធៀបនឹងប្រភេទស្ដង់ដា៕

July 10, 2023

អតីតភរិយារបស់ស្ថាបនិក Google និយាយពីរឿងសហាយស្មន់នឹងម្ចាស់ SpaceX

មួយឆ្នាំក្រោយពីមានពាក្យចចរាមអារ៉ាមដែលថា បានសហាយស្មន់នឹង Elon Musk អ្នកស្រី Nicole Shanahan អតីតភរិយារបស់ស្ថាបនិក Google បានចេញមុខបដិសេធ និងបកស្រាយ ហើយថា «បានធ្លាក់ទឹកចិត្តទាំងស្រុង»។

ឆ្លើយតបនឹងសំណួររបស់ People កាលពីថ្ងៃទី 05 កក្កដា អ្នកស្រី Nicole Shanahan និយាយថា មិនមានរឿងសហាយស្មន់ជាមួយនឹងមហាសេដ្ឋី Elon Musk ទាល់តែសោះ។ អ្នកស្រីឱ្យដឹងថា គ្រាន់តែជជែកជាមួយ CEO របស់ SpaceX និង Tesla ដូចទៅនឹងមិត្តរួមការងារ។

«ខ្ញុំជជែកជាមួយ Musk អំពីកូនស្រីដែលមានជំងឺអូទីស្សឹម ព្រោះគាត់គ្រប់គ្រង Neuralink ជាក្រុមហ៊ុនជំនាញខាងស្រាវជ្រាវប្រព័ន្ធប្រសាទ» អ្នកស្រី Shanahan រៀបរាប់ដូច្នេះ។ មុននោះ លោក Musk ធ្លាប់បាននិយាយថា ឈីបខួរក្បាលរបស់ Neuralink នៅថ្ងៃណាមួយប្រាកដជាអាចព្យាបាលជំងឺអូទីស្សឹម និងជំងឺវិកលចរិតមិនខាន។

អ្នកស្រី Shanahan បញ្ជាក់ថា «នោះគឺជាការជជែកប្រកបដោយអត្ថន័យ។ ក៏ប៉ុន្តែ វាបែរជាត្រូវបានលាបពណ៌ដោយវិធីមិនសមស្រប។ រឿងនោះមិនយុត្តិធម៌»។

កាលពីខែកក្កដាឆ្នាំមុន WSJ បានរាយការណ៍ថា លោក Musk មានទំនាក់ទំនងរយៈពេលខ្លីជាមួយនឹង Shanahan នៅក្នុងពិធីបុណ្យ Art Basel នៅ Miami កាលពីខែធ្នូ 2021។ ពេលនោះ Sergey Brin ដែលជាសហស្ថាបនិករបស់ Google និងភរិយា កំពុងតែស្ថិតក្នុងដំណាក់កាលមុនបែកគ្នា ប៉ុន្តែនៅតែរស់ជាមួយគ្នា។

ក្នុងពិធីជប់លៀងមួយកាលពីដើមឆ្នាំ 2022 Musk ត្រូវបានគេជឿថា បានលុតជង្គង់សូមទោសនៅចំពោះមុខ Brin អំពីទង្វើរបស់ខ្លួន។ Brin ទទួលយកការសូមអភ័យទោសនេះ ប៉ុន្តែទំនាក់ទំនងរបស់ពួកគេមិនបានល្អដូចមុន។ យោងតាមឯកសារដែលបានដាក់ឡើងតុលាការនៅខណ្ឌ Santa Clara កាលពីខែមករា 2022 លោក Brin បានដាក់ពាក្យសូមលែងលះ ដោយលើកមូលហេតុថា «មានបញ្ហាមិនចុះសម្រុងគ្នាដែលមិនអាចផ្សះផ្សារបាន»។

Shanahan ឱ្យដឹងថា អ្នកស្រី និង Brin ទើបតែបានលែងលះជាផ្លូវការកាលពីពេលថ្មីៗនេះ បន្ទាប់ពីបានដោះស្រាយបញ្ហាផ្លូវច្បាប់ដែលបានស៊ីពេលអស់ 17 ខែ។

Shanahan បច្ចុប្បន្នគឺជាមេធាវីធ្វើការនៅ California ហើយក៏ជាស្ថាបនិករបស់ក្រុមហ៊ុនច្បាប់ ClearAccessIP និងមូលនិធិ Bia-Echo។ Brin និង Shanahan បានស្គាល់គ្នាកាលពីឆ្នាំ 2015 ហើយបានរៀបការកាលពីឆ្នាំ 2019 និងមានកូនស្រីម្នាក់។ មុនការចាប់ដៃគ្នា ពួកគេសុទ្ធតែជាមនុស្សដែលធ្លាប់បានលែងលះប្ដីប្រពន្ធម្ដងរួចហើយ។

យោងតាម Business Insider មហាសេដ្ឋី Brin និង Larry Page បានបង្កើតក្រុមហ៊ុន Google កាលពីឆ្នាំ 1998 និងបានរួមចំណែកជួយឱ្យក្រុមហ៊ុនអ៊ីនធើណិតនេះក្លាយជាក្រុមហ៊ុនដែលមានតម្លៃមូលធនទីផ្សារខ្ពស់ជាងគេមួយនៅក្នុងពិភពលក៕

July 6, 2023

ពេលវេលារបស់ចក្រវាលកាលពីទើបកើត ដើរយឺតជាងបច្ចុប្បន្នប្រាំដង

ជាលើកដំបូងហើយដែលក្រុមអ្នកវិទ្យាសាស្ត្រប្រើប្រាស់វត្ថុអវកាសខ្វាសា (quasar) ធ្វើជា «នាឡិកា» សម្រាប់វាស់សភាពរីកមាឌនៃពេលវេលាក្នុងចក្រវាល និងបានបញ្ជាក់ថា Eistein ពិតជាបានគិតត្រូវ។

យោងតាម AFP ចុះផ្សាយកាលពីថ្ងៃទី 03 កក្កដា ក្រុមអ្នកវិទ្យាសាស្ត្រឱ្យដឹងថា ពេលវេលាក្នុងចក្រវាលសម័យដំបូងហាក់ដើរយឺតជាងប្រាំដង ធៀបនឹងបច្ចុប្បន្ន។ នេះគឺជាលើកដំបូងដែលពួកគេប្រើប្រាស់ខ្វាសា (quasar) ដែលជាបាតុភូតកញ្ជ្រោលនៃពន្លឺ និងឧស្ម័ននៅចំកណ្ដាលកាឡាក់ស៊ី ធ្វើជា «នាឡិកា» សម្រាប់វាស់ល្បឿនរបស់ពេលវេលា។

ទ្រឹស្ដីទំនាក់ទំនង (Relativity) របស់លោក Einstein បានព្យាករថា ដោយសារតែចក្រវាលកំពុងរីកមាឌ ទើបមនុស្សនឹងមើលឃើញចក្រវាលដ៏សែនឆ្ងាយ ផ្លាស់ទីក្នុងល្បឿនយឺត។

ចក្រវាលត្រូវបានចាត់ទុកថា មានអាយុប្រហែល 13.8 ពាន់លានឆ្នាំ។ ក្រុមអ្នកវិទ្យាសាស្ត្រ កន្លងមកបានប្រើប្រាស់បាតុភូតផ្ទុះផ្កាយ ធ្វើជា «នាឡិកាចក្រវាល» ដើម្បីបញ្ជាក់ថា ពេលវេលាកាលពីមានអាយុស្មើនឹងពាក់កណ្ដាលបច្ចុប្បន្ន ដើរយឺតជាងទ្វេដង។

លទ្ធផលនៃការសិក្សាស្រាវជ្រាវថ្មីបំផុតបង្ហាញថា ជាងមួយពាក់លានឆ្នាំក្រោយហេតុការណ៍ផ្ទុះ Big Bang (ព្រឹត្តិការណ៍ផ្ទុះកកើតចក្រវាល) ពេលវេលាហាក់ដើរទៅមុខក្នុងល្បឿនស្មើនឹង 1/5 ដង នៃពេលវេលាបច្ចុប្បន្ន។ បាតុភូតនេះត្រូវបានហៅថា ការរីកមាឌរបស់ពេលវេលានៃចក្រវាល៕

July 5, 2023

ចង់ធ្វើកិច្ចការច្រើនមុខប៉ុន្តែមិនមានពេលគ្រប់គ្រាន់ គួរធ្វើយ៉ាងណា?

គ្រប់គ្នាសុទ្ធតែចង់ធ្វើកិច្ចការជាច្រើនក្នុងអំឡុងពេលតែមួយ តែគិតចុះគិតឡើងឃើញថា មិនមានពេលគ្រប់គ្រាន់ដើម្បីធ្វើកិច្ចការទាំងនោះ។ ដំណោះស្រាយសម្រាប់បញ្ហានេះប្រាកដជាមាន នោះគឺ «រៀបផែនការ…»។

ការមិនបានរៀបផែនការសម្រាប់ការអនុវត្តគឺជាកំហុសដ៏ធំ ហើយការដាក់គោលដៅខ្ពស់ពេកក៏រឹតតែធ្វើឱ្យអ្នកច្របូកច្របល់ និងឆាប់អស់សង្ឃឹម។ ចុងក្រោយ មិនដឹងត្រូវចាប់ផ្ដើមដោយរបៀបណា។

ដើម្បីដោះស្រាយបញ្ហានេះ អ្នកអាចសាកល្បងបែងចែកគោលដៅនីមួយៗឱ្យដាច់ដោយឡែកពីគ្នា និងអនុវត្តទៅតាមកាលវេលាជាក់លាក់ និងទៀងទាត់។ ឧទាហរណ៍ថា អ្នកមានគោលដៅធំៗចំនួនបីដែលត្រូវតែធ្វើឱ្យបានរៀងរាល់សប្ដាហ៍ រួមមាន សម្រកទម្ងន់ រៀនជំនាញថ្មី និងអានសៀវភៅ។ ដូច្នេះអ្នកគួរកំណត់ថា ថ្ងៃចន្ទ ពុធ សុក្រ ត្រូវហាត់ប្រាណ ខណៈដែលថ្ងៃអង្គារ ព្រហស្បតិ៍ សៅរ៍រៀនជំនាញ និងចុងសប្ដាហ៍អានសៀវភៅ។

បន្ទាប់ពីចេញពីធ្វើការ អ្នកណាក៏អស់កម្លាំងខ្លាំង ដូច្នេះការរៀប និងអនុវត្តតាមផែនការ តាមកាលវិភាគឱ្យបានច្បាស់លាស់ និងម៉ឺងម៉ាត់ គឺជារឿងសំខាន់។ ធ្វើបានដូច្នេះ អ្នកប្រាកដជាសម្រេចបានគោលដៅដោយមិនមានការលំបាកខ្លាំង៕

July 4, 2023

អ៊ីស្រាអែលទិញយន្តហោះចម្បាំងអាម៉េរិក តម្លៃ 3 ពាន់លានដុល្លារ

ក្រសួងការពារជាតិអ៊ីស្រាអែល ប្រកាសថា ប្រទេសនេះនឹងទិញយន្តហោះចម្បាំង F-35 របស់សហរដ្ឋអាម៉េរិកចំនួន 25 គ្រឿងថែមទៀត ទៅតាមកិច្ចព្រមព្រៀងតម្លៃ 3 ពាន់លានដុល្លារ។

«កិច្ចព្រមព្រៀងនឹងរួមចំណែកក្នុងការរក្សាទំនាក់ទំនងរវាងបណ្ដាក្រុមហ៊ុនអាម៉េរិក និងវិស័យឧស្សាហកម្មការពារជាតិរបស់អ៊ីស្រាអែល» ក្រសួងការពារជាតិអ៊ីស្រាអែលប្រកាសកាលពីថ្ងៃទី 02 កក្កដា រម្លឹកដល់ការទិញយន្តហោះចម្បាំង F-35 ចំនួន 25 គ្រឿងបន្ថែមពីសហរដ្ឋអាម៉េរិកក្នុងតម្លៃ 3 ពាន់លានដុល្លារ។ កិច្ចព្រមព្រៀងនេះនឹងត្រូវបានអនុវត្តពេញលេញក្នុងរយៈពេលប៉ុន្មានខែខាងមុខ។

យោងតាមក្រសួងការពារជាតិអ៊ីស្រាអែល ការទិញដូរអាវុធនេះទទួលបានការឧបត្ថម្ភតាមរយៈកញ្ចប់ជំនួយផ្នែកការពារជាតិដែលប្រទេសនេះទទួលពីសហរដ្ឋអាម៉េរិក។ ក្រុមហ៊ុន Lockheed Martin និង Pratt & Whitney របស់សហរដ្ឋអាម៉េរិក បានយល់ព្រមឱ្យបណ្ដាក្រុមហ៊ុនការពារជាតិអ៊ីស្រាអែល ចូលរួមក្នុងដំណើរការផលិតគ្រឿងបន្លាស់យន្តហោះ។

កិច្ចព្រមព្រៀងនេះនឹងជួយបង្កើនចំនួនយន្តហោះចម្បាំង F-35 របស់ប្រទេសអ៊ីស្រាអែល ពី 50 ឡើងដល់ 75 គ្រឿង។

អ៊ីស្រាអែលគឺជាប្រទេសដំបូងគេក្រៅពីសហរដ្ឋអាម៉េរិក ដែលមានយន្តហោះចម្បាំង F-35។ ប្រទេសនេះទទួលបាន F-35 ដំបូងកាលពីឆ្នាំ 2016 និងបានប្រើប្រាស់ក្នុងការប្រយុទ្ធកាលពីឆ្នាំ 2018៕

July 3, 2023

សាកសពកប៉ាល់ Titanic នឹងទៅជាយ៉ាង បើសិនបូមទឹកអស់ពីជុំវិញ?

ថ្មីៗនេះ គម្រោងមួយបានប្រើប្រាស់បច្ចេកវិទ្យាស្កេន 3D ដ៏ទំនើប ដើម្បីបង្ហាញឡើងវិញនូវរូបភាពសាកសពកប៉ាល់ដែលបានលិចកាលពីប្រហែល 111 ឆ្នាំមុន យ៉ាងលំអិតបំផុត។

បច្ចេកវិទ្យាខាងលើ មិនត្រឹមតែបង្ហាញរូបភាពដ៏ស្រស់ស្អាត និងភាពអស្ចារ្យរបស់កប៉ាល់មួយកាលពីអតីតកាល ប៉ុន្តែក៏ជួយឱ្យអ្នកស្រាវជ្រាវដឹងអំពីអាថ៌កំបាំងស្ដីពីគ្រោះថ្នាក់កាលពីឆ្នាំ 1912 ផងដែរ។

គម្រោងខាងលើនេះត្រូវបានអនុវត្តកាលពីរដូវក្ដៅឆ្នាំ 2022 ដោយក្រុមហ៊ុនបង្កើតផែនទីបាតសមុទ្រ Magellan Ltd. និងផលិតកម្មភាពយន្តឯកសារ Atlantic Production។ ពួកគេប្រើប្រាស់កាមេរ៉ាបញ្ជាពីចម្ងាយដើម្បីស្វែងយល់ពីគំនរបាក់បែករបស់សាកសពកប៉ាល់ Titanic ក្នុងជម្រៅប្រហែល 4,000 ម៉ែត្រ នៅបាតមហាសមុទ្រអាត្លង់ទិក ដែលមានចម្ងាយប្រហែល 450 គីឡូម៉ែត្រពីឆ្នេរសមុទ្រ Newfoundland និង Labrador របស់ប្រទេសកាណាដា។

ក្រោយការថតនៅបាតសមុទ្រជាង 200 ម៉ោង ពួកគេក៏ប្រមូលបានរូបភាពចំនួន 700,000 រូប និងបានកាត់តចូលគ្នាដើម្បីបង្កើតបានជារូបភាព 3D ដ៏លំអិតដំបូងស្ដីពីសាកសពកប៉ាល់ Titanic។

Titanic នៅតែជានិមិត្តរូបរបស់មហាគ្រោះថ្នាក់នៅលើសមុទ្ររបស់មនុស្សជាតិ។ ដោយសារមានបច្ចេកវិទ្យាស្កេន 3D យើងអាចមើលឃើញសាកសពកប៉ាល់នេះបានយ៉ាងច្បាស់ និងប្រកបដោយភាពរស់រវើកជាងពេលណាៗទាំងអស់៕

July 1, 2023

ក្រុមហ៊ុនមួយចំណាយ 138 លានដុល្លារអាម៉េរិក ដើម្បីលើកទឹកចិត្តបុគ្គលិកឱ្យបង្កើតកូន

ក្រុមហ៊ុនទេសចរណ៍ធំមួយនៅប្រទេសចិន បញ្ចេញកញ្ចប់ជំនួយសម្រាប់ការថែទាំក្មេងតម្លៃ 138 លានដុល្លារអាម៉េរិក ដើម្បីលើកទឹកចិត្តដល់បុគ្គលិក 32,000 នាក់ ក្នុងការបង្កើតកូន។

បុគ្គលិកធ្វើការនៅ Trip.com ដែលជាក្រុមហ៊ុនទេសចរណ៍ធំជាងគេមួយរបស់ពិភពលោក នឹងទទួលបានប្រាក់ឧបត្ថម្ភ 1,376 ដុល្លារអាម៉េរិកក្នុងមួយឆ្នាំ រយៈពេលប្រាំឆ្នាំ សម្រាប់ទារកម្នាក់។ គោលការណ៍នេះមានសុពលភាពចាប់ពីថ្ងៃនេះ (01) កក្កដា 2023។

«តាមរយៈកញ្ចប់អត្ថប្រយោជន៍ស្ដីពីការថែទាំក្មេងថ្មីនេះ យើងមានបំណងគាំទ្រផ្នែកហិរញ្ញវត្ថុដើម្បីលើកទឹកចិត្តដល់បុគ្គលិកឱ្យចាប់ផ្ដើម ឬពង្រីកទំហំគ្រួសារដោយមិនបង្កផលប៉ះពាល់ដល់គោលដៅ និងសមិទ្ធផលការងារ» លោក James Liang ប្រធានក្រុមហ៊ុន Trip.com កាលពីថ្ងៃទី 30 កក្កដា 2023 ឱ្យដឹងដូច្នេះ។

គោលការណ៍ខាងលើនេះអនុវត្តចំពោះបុគ្គលិកពេញសិទ្ធិដែលធ្វើការយ៉ាងតិចបីឆ្នាំ មិនកំណត់ភេទ តំណែង ឬទីតាំងធ្វើការ។ ក្រុមហ៊ុន Trip.com បច្ចុប្បន្នមានបុគ្គលិកសរុបប្រហែល 32,000 នាក់។

គោលការណ៍របស់ Trip.com ត្រូវបានធ្វើឡើងបន្ទាប់ពីទីក្រុងប៉េកាំង បានលុបចោលគោលនយោបាយកូនមួយដែលអូសបន្លាយពេលរាប់ទសវត្សរ៍ កាលពីឆ្នាំ 2015 ដោយអនុញ្ញាតឱ្យប្ដីប្រពន្ធមួយគូមានកូនពីរនាក់។ ការអនុញ្ញាតរបស់រដ្ឋាភិបាលចិន ក៏ធ្វើឡើងដើម្បីដោះស្រាយវិបត្តិដែលទាក់ទងនឹងបញ្ហាធ្លាក់ចុះនៃចំនួនប្រជាជន ដែលប៉ះពាល់ដល់សេដ្ឋកិច្ចប្រទេសនេះ៕

July 1, 2023

ក្រុមហ៊ុនថ្មីមួយរបស់វៀតនាម គ្រោងនឹងផលិតរថយន្តអគ្គិសនីខ្នាតតូច ប្រជែងនឹង VinFast, Wuling

ម៉ូដែលរថយន្តអគ្គិសនីដំបូងរបស់ក្រុមហ៊ុនវៀតណាម Thai Binh Hung Thinh (Thai Hung) នឹងបង្ហាញវត្តមានក្នុងទីផ្សារនៅឆ្នាំក្រោយ។

កាលពីថ្ងៃទី 28 មិថុនា 2023 ក្រុមហ៊ុន Thai Hung របស់វៀតណាម និងក្រុមហ៊ុន Roding Mobility របស់អាល្លឺម៉ង់ បានចុះកិច្ចព្រមព្រៀងស្រាវជ្រាវ អភិវឌ្ឍ និងផលិតម៉ូតូអគ្គិសនី រថយន្តអគ្គិសនីខ្នាតតូចនៅប្រទេសវៀតណាម។

យោងតាមកិច្ចព្រមព្រៀងខាងលើ Roding នឹងទទួលខុសត្រូវក្នុងផ្នែកព្រឹក្សាយោបល់លើបញ្ហាបច្ចេកទេស គ្រប់គ្រងដំណាក់កាលស្រាវជ្រាវ និងអភិវឌ្ឍផលិតផល រហូតដល់ផលិតបានជាស្ថាពរ។ ក្រោយមក បច្ចេកវិទ្យាទាំងមូលរបស់ពួកគេនឹងត្រូវផ្ទេរទៅឱ្យក្រុមហ៊ុនវៀតណាម Thai Hung។

ក្រុមហ៊ុនវៀតណាមនឹងទទួលបច្ចេកវិទ្យាពី Roding ដើម្បីផលិតម៉ូតូអគ្គិសនី និងរថយន្តអគ្គិសនីខ្នាតតូចនៅវៀតណាម ដើម្បីលក់ក្នុងស្រុក។

រោងចក្ររបស់ពួកគេនឹងអាចផលិតម៉ូតូអគ្គិសនី និងរថយន្តអគ្គិសនីសរុបបាន 15,000 គ្រឿង/ឆ្នាំ ក្នុងនោះរថយន្តអគ្គិសនីនឹងមានប្រហែល 5,000 គ្រឿង/ឆ្នាំ។ តាមគម្រោង រោងចក្រខាងលើនឹងដំណើរការចាប់ពីត្រីមាសទីបួន ឆ្នាំ 2023។ ផលិតផលដំបូងរបស់ក្រុមហ៊ុនខាងលើនឹងបង្ហាញខ្លួននៅឆ្នាំ 2024។

ដូច្នេះ Thai Hung នឹងក្លាយជាក្រុមហ៊ុនផលិតរថយន្តអគ្គិសនីទីបីដែលមានរោងចក្រដំឡើងនៅវៀតណាម បន្ទាប់ពី VinFast របស់មហាសេដ្ឋីវៀតណាម និង Wuling របស់ចិន៕

June 30, 2023

ដំណេកពេលថ្ងៃត្រង់ជួយឱ្យខួរក្បាលមានសុខភាពល្អ និងក្មេងជាងវ័យ

យោងតាមការសិក្សាស្រាវជ្រាវថ្មីបំផុតរបស់ក្រុមអ្នកវិទ្យាសាស្ត្រ ការដេកនៅពេលថ្ងៃត្រង់នឹងជួយឱ្យខួរក្បាលរីកចម្រើន សុខភាពល្អ ហើយមនុស្សមានកម្លាំងដូចនៅក្មេងជាងវ័យពី 3 ទៅ 7 ឆ្នាំ។

ក្រុមអ្នកស្រាវជ្រាវនៃសាកលវិទ្យាល័យ College London (ចក្រភពអង់គ្លេស) និង សាកលវិទ្យាល័យសាធារណរដ្ឋ នៃប្រទេសអ៊ុយរូហ្គាយ ថ្មីៗនេះបានបញ្ចប់ការវិភាគទិន្នន័យដែលបានពីមនុស្ស 35,080 នាក់ដែលបានចូលរួមនៅឯធនាគារជីវសាស្ត្ររបស់អង់គ្លេស។

លទ្ធផលនៃការវិភាគទិន្នន័យខាងលើ បាននាំទៅរកការសន្និដ្ឋានថា ដំណេកនៅពេលថ្ងៃត្រង់គឺជាគន្លឹះដើម្បីរក្សាទម្ងន់របស់ខួរក្បាល នៅពេលចាស់។ វានឹងជួយឱ្យខួរក្បាលរីកចម្រើន សុខភាពល្អ ហើយមនុស្សមានកម្លាំងដូចនៅក្មេងជាងវ័យពី 3 ទៅ 7 ឆ្នាំ។

ទោះជាយ៉ាងណាក៏ដោយ សាស្ត្រាចារ្យ Simon Smith អ្នកជំនាញខាងដំណេក និងសុខភាពរបស់សាកលវិទ្យាល័យ Queensland (អូស្ត្រាលី) បានឱ្យដឹងថា លទ្ធផលនៃការសិក្សាស្រាវជ្រាវនេះមិនមែនមានន័យថា ដំណេករយៈពេលខ្លីនៅថ្ងៃត្រង់ សុទ្ធតែមានប្រយោជន៍ពេញលេញដូចបានរៀបរាប់ខាងលើនោះឡើយ។

សាស្ត្រាចារ្យ Simon Smith បញ្ជាក់ថា បញ្ហា «ស្វិតខួរក្បាលនៅតែអាចកើតឡើងទៅតាមស្ថានភាពសុខភាពជាក់ស្ដែង មានដូចជា មនុស្សញៀននឹងស្រា ជំងឺដាច់សរសៃឈាមខួរក្បាល និងជំងឺភ្លេចភ្លាំង (Alzheimer) ក៏ដូចជាការចាស់ទៅតាមអាយុជាដើម៕

June 30, 2023

Tag: ស្រា