សំណួរ - La Reine Media

ក្រសួងពាណិជ្ជកម្ម៖ មន្ត្រីជំនាញរាប់សិបនាក់នឹងចាំឆ្លើយសំណួររបស់សាធារណជនតាមទូរស័ព្ទ

ក្រសួងពាណិជ្ជកម្ម នឹងដាក់ឱ្យដំណើរការជាផ្លូវការប្រព័ន្ធទទួលទូរស័ព្ទសាធារណៈរបស់ក្រសួងពាណិជ្ជកម្ម ដែលមានលេខ 1266 ដោយមានមន្ត្រីជំនាញចំនួន 60 នាក់ ដើម្បីឆ្លើយតបនឹងចម្ងល់ ឬបញ្ហានានា ក្នុងពេលឆាប់ៗខាងមុខ។

កាលពីរសៀលថ្ងៃទី 04 ខែមីនា ឯកឧត្តម ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម បានបញ្ជាក់ថា ប្រព័ន្ធទូរស័ព្ទសាធារណៈ របស់ក្រសួងពាណិជ្ជកម្ម ដែលមានលេខ1266 នឹងក្លាយទៅជាភ្នាក់ងារ Call Center ក្នុងការឆ្លើយតបរាល់ចម្ងល់ ឬបញ្ហានានា ដោយបងប្អូនគ្រាន់តែចុចលេខ 1266 ភ្នាក់ងារស្វ័យប្រវត្តនឹងទទួលការហៅចូលដោយឥតគិតថ្លៃ និងស្នើជ្រើសរើសភាសា ក្នុងនោះ លេខ 1 គឺជាភាសាខ្មែរ និងលេខ 2 គឺជាភាសាអង់គ្លេស។

បន្ទាប់ពីនេះ ភ្នាក់ងារស្វ័យប្រវត្តិនឹងណែនាំបញ្ជីព័ត៌មាន និងលេខបណ្ដាញតភ្ជាប់ ដែលសាធារណៈជនអាចភ្ជាប់ និងធ្វើការសន្ទនាជាមួយភ្នាក់ងារទទួលព័ត៌មានរបស់ក្រសួងដោយផ្ទាល់។ បណ្ដាញតភ្ជាប់ទៅកាន់ព័ត៌មានសំខាន់ៗ មានដូចខាងក្រោម៖

– លេខ (1) សម្រាប់ព័ត៌មានទូទៅ

– លេខ (2) សម្រាប់ព័ត៌មានអំពីការចុះបញ្ជីពាណិជ្ជកម្ម

– លេខ (3) សម្រាប់ព័ត៌មានអំពីការចុះបញ្ជីម៉ាក

– លេខ (4) សម្រាប់ព័ត៌មានអំពីការនាំចេញ-នាំចូលទំនិញ ឬ CO

– លេខ (5) សម្រាប់ព័ត៌មានអំពីកិច្ចការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.)

– លេខ (6) សម្រាប់ព័ត៌មានអំពីសេវាពាណិជ្ជកម្មផ្សេងៗរបស់ក្រសួងពាណិជ្ជកម្ម ដូចជាប្រតិបត្តិការដែលមានកិច្ចធានា និងព័ត៌មានអំពីការតាំងពិព័រណ៌។

មន្ត្រីជំនាញរបស់ក្រសួងពាណិជ្ជកម្ម រង់ចាំទទួលទូរស័ព្ទ និងធ្វើការឆ្លើយតប នៅរៀងរាល់ម៉ោង និងថ្ងៃធ្វើការ ចាប់ពីថ្ងៃច័ន្ទ ដល់ថ្ងៃសុក្រ វេលាម៉ោង 8 ព្រឹក ដល់ម៉ោង 5 រសៀល។

March 5, 2024

របកគំហើញថ្មីស្ដីពី «បទពិសោធន៍ជិតស្លាប់»៖ ខួរក្បាលនៅតែដំណើរការបានរហូតដល់ 60 នាទី ក្រោយពីបេះដូងឈប់ដើរ

ក្រុមអ្នកវិទ្យាសាស្ត្របានរកឃើញថា ខួរក្បាលរបស់មនុស្សនៅតែអាចដំណើរការបានរហូតដល់មួយម៉ោង ក្រោយពីបេះដូងរបស់ពួកគេលែងដើរ។

រលកសញ្ញាខួរក្បាល រួមនឹងការស្រមៃអំពីជីវិតរបស់អ្នកជំងឺ អាចបកស្រាយបាននូវអ្វីដែលហៅថា «បទពិសោធន៍ជិតស្លាប់»។ លទ្ធផលនៃការសិក្សាស្រាវជ្រាវកាលពីពេលថ្មីៗនេះបង្ហាញថា ក្នុងចំណោម 10 នាក់ដែលបានចូលរួមពិសោធន៍ គឺមានមនុស្ស 4 នាក់អាចរៀបរាប់ឡើងវិញនូវអ្វីដែលកើតឡើងនៅក្នុងអារម្មណ៍ បន្ទាប់ពីពួកគេបានជួបនឹងស្ថានភាពជិតស្លាប់។

ក្រុមអ្នកស្រាវជ្រាវឱ្យដឹងថា ជារៀងរាល់ឆ្នាំ មានមនុស្សពី 350,000 នាក់ ដល់ 750,000 នាក់នៅ សហរដ្ឋអាម៉េរិក ជួបករណីបេះដូងឈប់ដើរ ពោលគឺប្រហែលពី 1,000 ទៅ 2,000 នាក់/ថ្ងៃ ហើយអត្រានៃការរួចពីការស្លាប់គឺ 10% ដែលប្រហែលនឹងពី 100 ទៅ 200 នាក់។

ការសិក្សាស្រាវជ្រាវត្រូវបានធ្វើឡើងតាំងពីឆ្នាំ 2015 និងប្រកាសកាលពីដើមឆ្នាំ 2023 នៅលើទស្សនាវដ្ដី Resuscitation។

ក្នុងរយៈពេលប្រហែល 3 ឆ្នាំនៃការស្រាវជ្រាវ ក្រុមអ្នកវិទ្យាសាស្ត្របានធ្វើការតាមដានអ្នកជំងឺដែលជួបបញ្ហាបេះដូងឈប់ដើរចំនួន 567 ករណី ក្នុងនោះមាន 53 ករណីត្រូវបានសង្គ្រោះ ហើយក្នុងចំណោមនេះមាន 28 នាក់អាចឆ្លើយសំណួរសម្រាប់ការសិក្សាស្រាវជ្រាវ។

ក្នុងចំណោមមនុស្ស 28 នាក់ខាងលើ មាន 11 នាក់ឱ្យដឹងថា ពួកគេទទួលបានបទពិសោធន៍ ឬអារម្មណ៍ដូចទៅនឹងអ្វីដែលបានកើតឡើងក្នុងពេលបេះដូងឈប់ដើរ, 6 នាក់ឱ្យដឹងថា បានឆ្លងកាត់បទពិសោធន៍ផុតពីការស្លាប់ និង 3 នាក់និយាយថា មានអារម្មណ៍ដូចជាសុបិន។

ខួរក្បាលនៅតែដំណើរការបានរហូតដល់ 60 នាទី ក្រោយពីបេះដូងឈប់ដើរ

ពួកគេទាំងនេះ គ្មានអ្នកណាម្នាក់ពិតជាដឹងច្បាស់ថា បានឆ្លងកាត់បទពិសោធន៍ជាក់ស្ដែងឡើយ។ អ្នកជឺងឺម្នាក់ៗ សុទ្ធតែមានអារម្មណ៍ ឬបានឆ្លងកាត់បទពិសោធន៍ដោយឡែករបស់ខ្លួនក្នុងពេលបេះដូងឈប់ដើរ រួមមានដូចជា បានជួបសាច់ញាតិដែលបានស្លាប់ និងទទួលបានការណែនាំថា «ចូរត្រឡប់ទៅវិញ»។ អ្នកខ្លះក៏ស្រមៃឃើញថា ព្រលឹងរបស់ពួកគេចេញផុតពីរាងកាយ និងឈរមើលវេជ្ជបណ្ឌិតកំពុងជួយសង្គ្រោះ ឬនឹកឃើញដល់អតីតកាល។ល។

ជារួម លទ្ធផលនៃការសិក្សាស្រាវជ្រាវនេះបានបង្ហាញថា សកម្មភាពរបស់ខួរក្បាលអ្នកជំងឺនៅតែដំណើរការបានរហូតដល់ 60 នាទី ក្រោយពីបេះដូងបានចាប់ផ្ដើមឈប់ដើរ និងចាប់ផ្ដើមត្រូវបានជួយសង្គ្រោះពីវេជ្ជបណ្ឌិត៕

December 27, 2023

ហេតុអ្វីបានជាចិនទិញទុរេនពីវៀតណាមច្រើនជាងមុន 30 ដង?

ក្នុង 10 ខែដំបូងនៃឆ្នាំ 2023 ទុរេនរបស់វៀតណាម ដែលនាំចេញទៅកាន់ទីផ្សារចិន សម្រេចបានជាង 451,000 តោន កើនជាង 30 ដង បើធៀបនឹងដំណាក់កាលដូចគ្នានៅក្នុងឆ្នាំ 2022។

ទុរេនគឺជាប្រភេទផ្លែឈើដែលមានតម្លៃបំផុតសម្រាប់ការនាំចេញរបស់វិស័យបន្លែផ្លែឈើវៀតណាម នៅក្នុង 11 ខែដំបូងនៃឆ្នាំ 2023 ដោយមានតម្លៃជាង 2.1 ពាន់លានដុល្លារអាម៉េរិក។ ទុរេនភាគច្រើនរបស់វៀតណាម ត្រូវបាននាំចេញទៅកាន់ប្រទេសចិន។ នេះបើតាមសមាគមបន្លែផ្លែឈើវៀតណាម ដែលបានឱ្យដឹងកាលពីពេលថ្មីៗនេះ។

ក្នុង 10 ខែដំបូងនៃឆ្នាំ 2023 ប្រទេសចិនបាននាំចូលទុរេនជាង 1.3 លានតោន ដែលមានតម្លៃជិតស្មើនឹង 6.4 ពាន់លានដុល្លារ ក្នុងនោះ បរិមាណសរុបបានកើន 88% និងតម្លៃសរុបបានកើន 81% បើធៀបនឹង 10 ខែដំបូងនៃឆ្នាំ 2022។

ប្រទេសថៃ គឺជាប្រភពផ្គត់ផ្គង់ទុរេនធំបំផុតរបស់ប្រទេសចិន ដោយបាននាំចេញទៅកាន់ទីផ្សារនេះជិត 904,000 តោន ដែលមានតម្លៃសរុបជាង 4.4 ពាន់លានដុល្លារអាម៉េរិក ដោយកើន 28%។

វៀតណាម គឺជាអ្នកផ្គត់ផ្គង់ទុរេនធំជាងគេទីពីររបស់ទីផ្សារចិន ប៉ុន្តែជាប់លេខមួយស្ដីពីកំណើននៃការនាំចេញទៅកាន់ប្រទេសចិន។ ក្នុង 10 ខែដំបូងនៃឆ្នាំ 2023 បរិមាណទុរេនដែល វៀតណាម បាននាំចេញទៅកាន់ទីផ្សារមួយនេះ គឺជាង 451,600 តោន ដោយកើនជាង 30 ដង និងរកចំណូលបានជិត 1.9 ពាន់លានដុល្លារអាម៉េរិក កើនជាង 31 ដង បើធៀបនឹងដំណាក់កាលដូចគ្នានៅក្នុងឆ្នាំ 2022។

អ្នកផ្គត់ផ្គង់ទុរេនលំដាប់ទីបីសម្រាប់ទីផ្សារចិន គឺ ហ្វ៊ីលីពីន ដោយបាននាំចេញទៅកាន់ទីផ្សារនេះចំនួន 3,333 តោន រកចំណូលបានជិត 12 លានដុល្លារ។

ឆ្លើយតបនឹងសំណួរដែលសួរថា «ហេតុអ្វីទីផ្សារចិនទិញទុរេនពីវៀតណាមច្រើនជាងមុនឆ្ងាយម្ល៉េះ?» លោក ង្វៀន ឌិញទុង អនុប្រធានសមាគមបន្លែផ្លែឈើវៀតណាម បានឱ្យដឹងថា កំណើននេះគឺដោយសារប្រទេសចិន និងវៀតណាម បានចុះកិច្ចព្រមព្រៀងមួយកាលពីខែកក្កដា 2022។

កិច្ចព្រមព្រៀងខាងលើដែលបានជួយឱ្យការនាំចេញទុរេនរបស់វៀតណាម ទៅកាន់ទីផ្សារចិន មានកូតាកាន់តែធំ គ្រាដែលចម្ការទុរេន និងការវេចខ្ចប់ត្រូវបានធ្វើទៅតាមស្ដង់ដានៃទីផ្សារចិន បានរួមចំណែកធ្វើឱ្យបរិមាណនាំចេញមានការកើនឡើងខ្ពស់។

ទន្ទឹមនឹងនេះ កត្តាទឹកដីធំទូលាយ អាចប្រមូលផលទុរេនបានពេញមួយឆ្នាំ ក៏ដូចជាកត្តាព្រំដែនជាប់នឹងប្រទេសចិនជាដើម ក៏ជាមូលហេតុដែលបាន និងកំពុងជួយឱ្យប្រទេសវៀតណាម មានប្រៀបជាងប្រទេសនាំចេញទុរេនដទៃ។

ទុរេនស្រស់ដែលដាក់លក់នៅទីផ្សារប្រទេសចិន មានតម្លៃខ្ពស់ ពោលគឺចាប់ពី 10 ដុល្លារអាម៉េរិកក្នុងមួគីឡូក្រាម។ តម្លៃនេះ ខ្ពស់ជាងឆ្ងាយបើធៀបនឹងប្រហែល 6 ដុល្លារ/គីឡូក្រាម នៅក្នុងទីផ្សារអាស៊ាន៕

December 15, 2023

រកឃើញ «ភ្នែកអវកាស» ដ៏មហិមា កំពុងសម្លឹងមកផែនដី

តេឡេស្កុបវិទ្យុ ASKAP នៅអូស្ត្រាលីភាគខាងលិច ថតបានរូបភាពដ៏ស្រស់ស្អាតស្ដីពីរចនាសម្ព័ន្ធអវកាសមួយដែលមានរូបរាងដូចភ្នែកដ៏ធំ លាតសន្ធឹងរហូតដល់ 60,000 ឆ្នាំពន្លឺ។ យោងតាមទំព័រ SpacePlace របស់ណាសា មួយឆ្នាំពន្លឺមានចម្ងាយប្រមាណ 9 ទ្រីលាន (9,000,000,000,000) គីឡូម៉ែត្រ។

យោងតាមការប្រកាសនៅលើទំព័រ Monthly Notices of the Royal Astronomical Society រចនាសម្ព័ន្ធអវកាសចម្លែកនេះគឺជា កាឡាក់ស៊ីប្រភេទ Polar-ring (បកប្រែក្រៅផ្លូវការថា «កាឡាក់ស៊ីរង្វង់ចិញ្ចៀន») និងត្រូវបានដាក់ឈ្មោះឱ្យថា NCG 4632។

ខុសពីកាឡាក់ស៊ីដែលមានផែនដី Milky Way កាឡាក់ស៊ី NCG 4632 មានថាសពន្លឺមួយ និងពពកដ៏មហិមាព័ទ្ធជុំវិញស្នូលរបស់វា។ រង្វង់ពពកនេះភាគច្រើនគឺជាឧស្ម័នអ៊ីដ្រូសែន និងផ្អៀងប្រហែល 90 ឌឺក្រេ បើធៀបនឹងផ្ទៃរបស់កាឡាក់ស៊ី។

រចនាសម្ព័ន្ធដែលមានរូបរាងដូចភ្នែកនេះអាចមានផ្ទុកធូលី និងផ្កាយ។ រង្វង់របស់ NCG 4632 លាតសន្ធឹងរហូតដល់ 60,000 ឆ្នាំពន្លឺ។ រង្វង់ឧស្ម័ននៅខាងក្រៅ បូករួមនឹងថាសខាងក្នុងដែលនៅជុំវិញស្នូល NCG 4632 ហាក់ដូចជាកែវភ្នែកដ៏ធំមួយគ្រាប់កំពុងសម្លឹងមកកាន់ផែនដី។

ការស្វែងយល់អំពីកាឡាក់ស៊ីរង្វង់មូលដូច NCG 4632 នឹងរួមចំណែកជួយឱ្យអ្នកវិទ្យាសាស្ត្រយល់ដឹងអំពីអាថ៌កំបាំងដែលមនុស្សមិនទាន់ដឹង ទាក់ទងនឹងរបៀបកកើតរបស់បណ្ដាកាឡាក់ស៊ី និងការវិវត្តរបស់ពួកវានៅក្នុងចក្រវាល។ យោងតាម Science News មកដល់បច្ចុប្បន្ន អ្នកវិទ្យាសាស្ត្រនៅតែមិនទាន់អាចឆ្លើយនឹងសំណួរដែលថា «ហេតុអ្វីកាឡាក់ស៊ីមួយចំនួនមានរង្វង់មូល ខណៈកាឡាក់ស៊ីស្ទើរតែទាំងអស់បែរជាមិនរង្វង់បែបនេះទៅវិញ?»។

October 3, 2023

យានអវកាសអាម៉េរិកនាំយកសំណាកដីអាចម៍ផ្កាយមកកាន់ផែនដីដោយជោគជ័យ

យានអវកាស OSIRIS-REx បានហោះហើរក្នុងចម្ងាយផ្លូវ 6.2 ពាន់លានគីឡូម៉ែត្រ និងនាំយកកាប៊ីនផ្ទុកសំណាកដីរបស់អាចម៍ផ្កាយ Bennu មកចុះចតលើសមុទ្រខ្សាច់នៅសហរដ្ឋអាម៉េរិកប្រកបដោយភាពរលូន។

កាលពីថ្ងៃទី 24 កញ្ញា នៅតំបន់ពិសោធន៍ Dugway របស់កងទ័ពអាម៉េរិកលើសមុទ្រខ្សាច់ Utah ក្រុមបុគ្គលិករបស់ណាសា (NASA) និងទ័ពអាកាសអាម៉េរិក បានប្រមូលយកកាប៊ីនផ្ទុកសំណាកដីពីអាចម៍ផ្កាយ Bennu ដែលយានអវកាស OSIRIS-REx យកបានកាលពីឆ្នាំ 2020។

យោងតាម Space បេសកកម្មនេះគឺជាលើកដំបូងដែលណាសាបានយក និងបញ្ជូនសំណាកដីពីអាចម៍ផ្កាយមកកាន់ផែនដី។

បន្ទាប់ពីធ្វើដំណើរជាង 6.2 ពាន់លានគីឡូម៉ែត្រដើម្បីទៅកាន់ Bennu និងត្រលប់មកវិញ យានអវកាស OSIRIS-REx បានទម្លាក់កាប៊ីនផ្ទុកសំណាកដីអាចម៍ផ្កាយពីកម្ពស់ 101,000 គីឡូម៉ែត្រខាងលើផ្ទៃផែនដី។ កាប៊ីនអវកាសនេះផ្ទុកដី និងវត្ថុធាតុផ្សេងៗទម្ងន់ 250 ក្រាម ដែលយកបានពីអាចម៍ផ្កាយ Bennu។ សំណាកដីនេះអាចជួយបកស្រាយសំណួរសំខាន់ៗរបស់អ្នកវិទ្យាសាស្ត្រ ទាក់ទងនឹងប្រភពនៃជីវិតនៅលើផែនដី និងយុគសម័យដំបូងៗរបស់ប្រព័ន្ធព្រះអាទិត្យ។

បេសកកម្ម OSIRIS-REx មានតម្លៃមួយពាន់លានដុល្លារនេះត្រូវបានបាញ់បង្ហោះកាលពីឆ្នាំ 2016 ហើយហោះទៅដល់អាចម៍ផ្កាយ Bennu ក្នុងឆ្នាំ 2018 និងយកសំណាកដីពីអាចម៍ផ្កាយនេះកាលពីឆ្នាំ 2020។

សំណាកដីអាចម៍ផ្កាយនេះនឹងត្រូវបានចែករំលែកទៅឱ្យវិទ្យាស្ថាន និងស្ថាប័នអវកាសនានានៅលើពិភពលោក។ ណាសានឹងរក្សាទុកសំណាក់ដីនេះ 70% ដើម្បីវិភាគនាពេលខាងមុខ។ ក្រៅពីនេះ សំណាក់ដី 25% ផ្សេងទៀតនឹងត្រូវប្រគល់ឱ្យអ្នកវិទ្យាសាស្ត្រជាង 200 នាក់នៅស្ថាប័នស្រាវជ្រាវចំនួន 35 ខណៈសំណាកដី 4% ទៀតនឹងត្រូវប្រគល់ឱ្យស្ថាប័នអវកាសកាណាដា និង 0.5% សម្រាប់ស្ថាប័នអវកាសជប៉ុន៕

September 25, 2023

យានអវកាសអឺរ៉ុបរកឃើញតម្រុយទាក់ទងនឹង «ភាពចម្លែកខុសគេ» នៃបរិយាកាសព្រះអាទិត្យ

យានអវកាសមួយគ្រឿងដែលកំពុងតែធ្វើសកម្មភាពជុំវិញព្រះអាទិត្យ បានរកឃើញចម្លើយសម្រាប់សំណួរដែលសួរថា «តើព្រះអាទិត្យគឺជាវត្ថុអវកាសដែលខុសគេក្នុងចំណោមតារានៅក្នុងចក្រវាល?»។

ច្រើនទសវត្សរ៍កន្លង ក្រុមអ្នកវិទ្យាសាស្ត្របានដឹងថា ព្រះអាទិត្យហាក់បីដូចជាខុសពីគេ ធៀបនឹងផ្កាយនានាដែលធ្លាប់ត្រូវបានសង្កេត។ ព្រះអាទិត្យបានបំបែករាល់ទម្រង់ស្ដីពីផ្កាយ ព្រោះវាមានបរិយាកាសដែលក្ដៅមិនសមហេតុផល។

សីតុណ្ហភាពក្នុងបរិយាកាសខាងលើរបស់ព្រះអាទិត្យ (ស្រទាប់កូរ៉ូណា – corona) អាចឡើងដល់ជាង 1.1 លានអង្សាសេ ស្របពេលដែលតំបន់ហ្វូតូសហ្វៀ (Photosphere) ដែលជាស្រទាប់លើបំផុតរបស់ព្រះអាទិត្យដែលនៅខាងក្រោម និងមានចម្ងាយ 1,600 គីឡូម៉ែត្រពីបរិយាកាសកូរ៉ូណា បែរជាមានកម្ដៅត្រឹមតែ 5,500 អង្សាសេទៅវិញ។

តាមធម្មតា បរិយាកាសរបស់ផ្កាយមួយដួងត្រូវបានដុតកម្ដៅដោយសារប្រតិកម្មនុយក្លេអែរនៅខាងក្នុងស្នូលរបស់វា។ ដូច្នេះ ស្រទាប់បរិយាកាសខាងលើរបស់ផ្កាយ មិនអាចមានកម្ដៅខ្ពស់ជាង 200 ដង ធៀបនឹងស្រទាប់ខាងក្រោមឡើយ។ ស្រទាប់បរិយាកាសកូរ៉ូណារបស់ផ្កាយ គួរណាស់តែត្រូវត្រជាក់ជាងស្រទាប់ហ្វូតូសហ្វៀ។

ប្រការនេះបង្ហាញថា នៅមានអ្វីមួយដែលមនុស្សមិនទាន់ដឹង កំពុងតែដុតកម្ដៅផ្កាយមេរបស់ផែនដី។ នោះជាសំណួរដែលមិនមានចម្លើយនៅក្នុងរយៈពេល 80 ឆ្នាំកន្លង។

ថ្មីៗនេះ យានអវកាសព្រះអាទិត្យ (SO) របស់ទីភ្នាក់ងារអវកាសអឺរ៉ុប (ESA) បានរកឃើញអ្វីមួយយ៉ាងចម្លែក៖ រលកម៉េញេទិចប្រេកង់ខ្ពស់ ដែលភាយពាសពេញស្រទាប់បរិយាកាសកូរ៉ូណា។

ពីតំបន់ដែលមានចម្ងាយ 42 គីឡូម៉ែត្រពីព្រះអាទិត្យ យាន SO បានប្រើប្រាស់តេឡេស្កុប EUI របស់បែលហ្ស៊ិក ដើម្បីថតយករូបភាពស្រទាប់បរិយាកាសខាងលើរបស់ព្រះអាទិត្យ ជាមួយនឹងកម្រិតភាពច្បាស់ខ្ពស់មិនធ្លាប់មាន។ ហើយពួកគេក៏បានឃើញរលកម៉ាញេទិចតូចៗដែលសាយភាយកាត់តាមពន្លឺប្លាស្មាក្នុងស្រទាប់បរិយាកាសដ៏ក្ដៅនេះ។

អ្នកវិទ្យាសាស្ត្រក៏បន្តវិភាគលើការស្រាវជ្រាវកន្លង និងបានដឹងថា ទម្រង់រលកម៉ាញេទិចប្រេកង់ខ្ពស់ដែលកើតឡើងដដែលៗក្នុងល្បឿនលឿន អាចដុតកម្ដៅស្រទាប់បរិយាកាសកូរ៉ូណារបស់ព្រះអាទិត្យក្នុងកម្រិតខ្ពស់គួរឱ្យកត់សម្គាល់។

ក៏ប៉ុន្តែ អ្វីដែលបានរកឃើញនេះមិនទាន់គ្រប់គ្រាន់នៅឡើយ។ អ្នកវិទ្យាសាស្ត្រកំពុងតែបន្តស្វែងរកចម្លើយដែល «ក្បោះក្បាយ» ជាងនេះ ដើម្បីយល់ច្បាស់អំពីរបៀបដែលស្រទាប់បរិយាកាសកូរ៉ូណារបស់ព្រះអាទិត្យត្រូវបានដុតកម្ដៅ និងបង្កើតបានជាបរិយាកាសព្រះអាទិត្យដែលមានលក្ខណៈខុសគេបែបនេះ៕

August 9, 2023

បើមានមនុស្សស្លាប់ក្នុងទីអវកាស តើនឹងមានរឿងអ្វីកើតឡើង ហើយត្រូវដោះស្រាយយ៉ាងណា?

វិធីចាត់ចែងសាកសពនៅពេលមានមនុស្សស្លាប់ក្នុងទីអវកាស គឺអាស្រ័យលើគម្លាតជាមួយនឹងផែនដី រួមនឹងកត្តាជាច្រើនផ្សេងទៀត។

ចាប់តាំងពីមនុស្សលោកបានចាប់ផ្ដើមស្រាវជ្រាវទីអវកាសកាលពីជាង 60 ឆ្នាំមុន មកដល់បច្ចុប្បន្នមានមនុស្សចំនួន 20 នាក់បានបាត់បង់ជីវិត រួមមាន 14 នាក់នៅក្នុងគ្រោះថ្នាក់យាន Space Shuttle របស់ណាសា ក្នុងឆ្នាំ 1986, 3 នាក់ក្នុងបេសកកម្ម Soyuz 11 កាលពីឆ្នាំ 1971 និង 3 នាក់ក្នុងហេតុការណ៍ឆេះប្រព័ន្ធបាញ់បង្ហោះរ៉ុក្កែត Apollo 1 ក្នុងឆ្នាំ 1967។

ក្នុងគ្រាដែលណាសាកំពុងមានគម្រោងនាំមនុស្សឡើងទៅកាន់ឋានព្រះចន្ទក្នុងឆ្នាំ 2025 និងភពអង្គារក្នុងទសវត្សរ៍ក្រោយ បូករួមនឹងការរីកចម្រើននៃវិស័យទេសចរណ៍អវកាស ដែលអាចនឹងមានមនុស្សកាន់តែច្រើនធ្វើដំណើរទៅកាន់ទីអវកាស ក៏មានសំណួរមួយត្រូវបានលើកឡើង នោះគឺថា «បើមានមនុស្សស្លាប់ក្នុងទីអវកាស តើនឹងមានរឿងអ្វីកើតឡើងចំពោះសាកសព?»។

ទាក់ទងនឹងសំណួរខាងលើ Emmanuel Urquieta សាស្ត្រាចារ្យវេជ្ជសាស្ត្រអវកាស និងវេជ្ជសាស្ត្របន្ទាន់នៅសាកលវិទ្យាល័យ Baylor ជាអ្នកជំនាញក្នុងការសិក្សាស្រាវជ្រាវរកវិធីសាស្ត្រថែទាំសុខភាពសម្រាប់អ្នកអវកាស បានបង្ហើបឱ្យដឹងអំពីវិធីដោះស្រាយករណីបែបនេះ។

បើសិនមានមនុស្សស្លាប់ក្នុងបេសកកម្មនៅលើគន្លងតារាវិថីកម្រិតទាបរបស់ផែនដី ដូចនៅក្នុងស្ថានីយអវកាសអន្តរជាតិ (ISS) ជាដើម ក្រុមអវកាសចរអាចដាក់សាកសពក្នុងកាប៊ីនយានអវកាស និងនាំត្រលប់មកកាន់ផែនដីក្នុងរយៈពេលតែប៉ុន្មានម៉ោងប៉ុណ្ណោះ។ ដូច្នេះ ករណីបែបនេះនឹងមិនចោទជាបញ្ហាធំឡើងសម្រាប់សាកសព។

ស្ថានការណ៍នឹងខុសគ្នា បើសិនមានអវកាសចរស្លាប់ក្នុងដំណើរទៅកាន់ភពអង្គារដែលមានចម្ងាយជិត 483 លានគីឡូម៉ែត្រពីផែនដី។ ក្នុងករណីនេះ ក្រុមហោះហើរនឹងមិនអាចត្រលប់មកកាន់ផែនដី រួចក៏បន្តធ្វើដំណើរទៅកាន់ភពអង្គារទៀតបានទេ។ ជំនួសមកវិញ សាកសពទំនងជានឹងត្រូវត្រលប់មកកាន់ផែនដីជាមួយនឹងក្រុមហោះហើរនៅចុងបញ្ចប់នៃបេសកកម្ម ពោលគឺប្រហែលពីរឆ្នាំក្រោយ។ ក្រុមហោះហើរនឹងរក្សាសាកសពក្នុងកាប៊ីនដោយឡែក ឬក្នុងថង់សម្រាប់ដាក់សាកសព។ តាមទ្រឹស្ដី សីតុណ្ហភាព និងសំណើមក្នុងយានអវកាស នឹងជួយរក្សាសាកសពមិនឱ្យរលួយ។

ក៏ប៉ុន្តែ វិធីសាស្ត្រខាងលើអនុវត្តបានសម្រាប់តែមនុស្សដែលបានស្លាប់ក្នុងបរិស្ថានដែលមានសម្ពាធបរិយាកាសល្អដូចនៅក្នុងស្ថានីយអវកាសប៉ុណ្ណោះ។ បើសិនមានមនុស្សស្លាប់លើដីភពអង្គារ ការបូជាសពដោយការដុតគឺជារឿងពិបាក ដោយសារក្រុមហោះហើរត្រូវការថាមពលដើម្បីធ្វើកិច្ចការចាំបាច់ដទៃ។ ចំណែកការបញ្ចុះសពវិញក៏មិនមែនជាគំនិតល្អ ព្រោះថា បាក់តេរី និងមេរោគជាច្រើនក្នុងរាងកាយសាកសព អាចបំពុលបរិស្ថានរបស់ដីនៅភពអង្គារ។ ជំនួសមកវិញ ក្រុមអវកាសចរប្រហែលជាត្រូវរក្សាសាកសពក្នុងថង់ មុននឹងនាំយកមកកាន់ផែនដី៕

August 8, 2023

យុគសម័យនៃស្មាតហ្វូនត្រកូល Reno Series នឹងមកដល់ឆាប់ៗនេះ….

ថ្មីៗនេះនៅតាមបណ្តាប្រទេសមួយចំនួនដូចជា ចិន ម៉ាឡេស៊ី ថៃ បានប្រកាសចេញលក់ជាផ្លូវការហើយនូវស្មាតហ្វូន OPPO ជំនាន់ចុងក្រោយ Reno10 Series 5G យ៉ាងជោគជ័យជាមួយសន្ទុះគាំទ្រខ្លាំងក្លាពីអ្នកប្រើប្រាស់ជុំវិញពិភពលោក។ អ្វីដែលចាប់អារម្មណ៍គឺស្មាតហ្វូននេះ នៅតែបន្តឈរឈ្មោះជា «អ្នកជំនាញ Portrait» ដើម្បីផ្តល់នូវបទពិសោធថតរូប និងវីដេអូល្អបំផុតប្រកបដោយបច្ចេកវិទ្យាច្នៃប្រឌិត ទំនើប និងឈានមុខគេក្នុងវិស័យស្មាតហ្វូន។

ចម្ងល់ជាច្រើនទៅលើ OPPO Reno10 Series តើពេលណានឹងបង្ហាញខ្លួននៅប្រទេសកម្ពុជា? គួររម្លឹកថាសម្រាប់ត្រកូល Reno Series បានបង្ហាញខ្លួននៅកម្ពុជា ជាមួយការច្នៃប្រឌិតអស់រយៈពេល 4 ឆ្នាំនិងចេញលក់នូវម៉ូដែលចំនួន 9 ជំនាន់មកហើយតាំងពី OPPO Reno រហូតដល់ OPPO Reno8 T Series ដែលបានចេញលក់កាលពីអំឡុងដើមឆ្នាំ 2023។ ដូចនេះតើនៅត្រីមាសទី 3 ក្នុងឆ្នាំ 2023 នេះ OPPO នឹងបង្ហាញតួឯកថ្មីក្នុងត្រកូល Reno នេះ?

ទន្ទឹមគ្នានេះបើយោងតាមផុសមួយនៅលើ Facebook ផេគរបស់ OPPO ប្រចាំប្រទេសកម្ពុជាថ្មីៗនេះ ត្រៀមបញ្ចេញនូវស្មាតហ្វូនបច្ចេកវិទ្យាឈានមុខ OPPO Reno10 Series ជំនាន់ថ្មីនេះហើយ ប៉ុន្តែសម្រាប់ព័ត៌មានជាក់លាក់នោះគឺនៅមិនទាន់ច្បាស់នៅឡើយទេ។

អ្វីដែលកាន់តែពិសេសនៅលើ Facebook ផេគ OPPO ក៏បើកឲ្យអតិថិជននិងហ្វេនៗចូលលេងហ្គេមងាយៗដោយគ្រាន់តែឆ្លើយនូវសំណួរ តើមួយណាជារូប Portrait? ដោយគ្រាន់តែជ្រើសរើសរូបមួយក្នុងចំណោមរូបទាំងបី រួចអនុវត្តតាមលក្ខខណ្ឌងាយៗដើម្បីមានឱកាសឈ្នះរង្វាន់កាសឥតខ្សែ Enco Buds2 ចំនួនមួយរង្វាន់ ។

ដូច្នេះ តើអ្នកត្រៀមខ្លួនរួចហើយឬនៅ? ដើម្បីស្វាគមន៍ OPPO Reno10 Series ដែលនឹងមកឆាប់ៗនេះ ដែលមានការ upgrade មុខងារពិសេសៗជាច្រើន និងមុខងារថតរូបស្អាតៗប្លែកៗយល់ចិត្តអ្នកចូលចិត្តថតរូបជាពិសេស។ សម្រាប់ព័ត៌មានលម្អិតអំពីស្មាតហ្វូននេះ សូមរង់ចាំតាមដាននៅលើផេគ Facebook ផ្លូវរបស់ក្រុមហ៊ុន OPPO ៕

July 27, 2023

អតីតភរិយារបស់ស្ថាបនិក Google និយាយពីរឿងសហាយស្មន់នឹងម្ចាស់ SpaceX

មួយឆ្នាំក្រោយពីមានពាក្យចចរាមអារ៉ាមដែលថា បានសហាយស្មន់នឹង Elon Musk អ្នកស្រី Nicole Shanahan អតីតភរិយារបស់ស្ថាបនិក Google បានចេញមុខបដិសេធ និងបកស្រាយ ហើយថា «បានធ្លាក់ទឹកចិត្តទាំងស្រុង»។

ឆ្លើយតបនឹងសំណួររបស់ People កាលពីថ្ងៃទី 05 កក្កដា អ្នកស្រី Nicole Shanahan និយាយថា មិនមានរឿងសហាយស្មន់ជាមួយនឹងមហាសេដ្ឋី Elon Musk ទាល់តែសោះ។ អ្នកស្រីឱ្យដឹងថា គ្រាន់តែជជែកជាមួយ CEO របស់ SpaceX និង Tesla ដូចទៅនឹងមិត្តរួមការងារ។

«ខ្ញុំជជែកជាមួយ Musk អំពីកូនស្រីដែលមានជំងឺអូទីស្សឹម ព្រោះគាត់គ្រប់គ្រង Neuralink ជាក្រុមហ៊ុនជំនាញខាងស្រាវជ្រាវប្រព័ន្ធប្រសាទ» អ្នកស្រី Shanahan រៀបរាប់ដូច្នេះ។ មុននោះ លោក Musk ធ្លាប់បាននិយាយថា ឈីបខួរក្បាលរបស់ Neuralink នៅថ្ងៃណាមួយប្រាកដជាអាចព្យាបាលជំងឺអូទីស្សឹម និងជំងឺវិកលចរិតមិនខាន។

អ្នកស្រី Shanahan បញ្ជាក់ថា «នោះគឺជាការជជែកប្រកបដោយអត្ថន័យ។ ក៏ប៉ុន្តែ វាបែរជាត្រូវបានលាបពណ៌ដោយវិធីមិនសមស្រប។ រឿងនោះមិនយុត្តិធម៌»។

កាលពីខែកក្កដាឆ្នាំមុន WSJ បានរាយការណ៍ថា លោក Musk មានទំនាក់ទំនងរយៈពេលខ្លីជាមួយនឹង Shanahan នៅក្នុងពិធីបុណ្យ Art Basel នៅ Miami កាលពីខែធ្នូ 2021។ ពេលនោះ Sergey Brin ដែលជាសហស្ថាបនិករបស់ Google និងភរិយា កំពុងតែស្ថិតក្នុងដំណាក់កាលមុនបែកគ្នា ប៉ុន្តែនៅតែរស់ជាមួយគ្នា។

ក្នុងពិធីជប់លៀងមួយកាលពីដើមឆ្នាំ 2022 Musk ត្រូវបានគេជឿថា បានលុតជង្គង់សូមទោសនៅចំពោះមុខ Brin អំពីទង្វើរបស់ខ្លួន។ Brin ទទួលយកការសូមអភ័យទោសនេះ ប៉ុន្តែទំនាក់ទំនងរបស់ពួកគេមិនបានល្អដូចមុន។ យោងតាមឯកសារដែលបានដាក់ឡើងតុលាការនៅខណ្ឌ Santa Clara កាលពីខែមករា 2022 លោក Brin បានដាក់ពាក្យសូមលែងលះ ដោយលើកមូលហេតុថា «មានបញ្ហាមិនចុះសម្រុងគ្នាដែលមិនអាចផ្សះផ្សារបាន»។

Shanahan ឱ្យដឹងថា អ្នកស្រី និង Brin ទើបតែបានលែងលះជាផ្លូវការកាលពីពេលថ្មីៗនេះ បន្ទាប់ពីបានដោះស្រាយបញ្ហាផ្លូវច្បាប់ដែលបានស៊ីពេលអស់ 17 ខែ។

Shanahan បច្ចុប្បន្នគឺជាមេធាវីធ្វើការនៅ California ហើយក៏ជាស្ថាបនិករបស់ក្រុមហ៊ុនច្បាប់ ClearAccessIP និងមូលនិធិ Bia-Echo។ Brin និង Shanahan បានស្គាល់គ្នាកាលពីឆ្នាំ 2015 ហើយបានរៀបការកាលពីឆ្នាំ 2019 និងមានកូនស្រីម្នាក់។ មុនការចាប់ដៃគ្នា ពួកគេសុទ្ធតែជាមនុស្សដែលធ្លាប់បានលែងលះប្ដីប្រពន្ធម្ដងរួចហើយ។

យោងតាម Business Insider មហាសេដ្ឋី Brin និង Larry Page បានបង្កើតក្រុមហ៊ុន Google កាលពីឆ្នាំ 1998 និងបានរួមចំណែកជួយឱ្យក្រុមហ៊ុនអ៊ីនធើណិតនេះក្លាយជាក្រុមហ៊ុនដែលមានតម្លៃមូលធនទីផ្សារខ្ពស់ជាងគេមួយនៅក្នុងពិភពលក៕

July 6, 2023

AI នឹង «លុបបំបាត់» ការងាររបស់អ្នកសរសេរកម្មវិធីនៅប្រាំឆ្នាំខាងមុខ?

Emad Mostaque ដែលជា CEO របស់ក្រុមហ៊ុនបច្ចេកវិទ្យា Stability AI យល់ថា នៅប្រាំឆ្នាំខាងមុខ AI (បញ្ញាសិប្បនិម្មិត) នឹងដណ្ដើមការងារទាំងអស់របស់អ្នកសរសេរកូដកម្មវិធី ហើយបង្កើតបានជាបដិវត្តន៍ផ្នែកទំនាក់ទំនង។

នៅក្នុងកិច្ចសម្ភាសលើទំព័រ Mindsets Podcast លោក Emad Mostaque សហស្ថាបនិក និងជានាយកប្រតិបត្តិរបស់ក្រុមហ៊ុន Stability AI បានវាយតម្លៃប្រកបដោយភាពអវិជ្ជមានទាក់ទិននឹងអនាគតរបស់អ្នកសរសេរកម្មវិធី ដោយសារតែឥទ្ធិពលរបស់ AI។

ដើម្បីបន្ថែមពីលើការអះអាងដែលថា «ប្រាំឆ្នាំទៀតនឹងមិនមានអ្នកសរសេរកូដណាម្នាក់ជាមនុស្ស» លោក Mostaque បានលើកយករបាយការណ៍របស់ GitHub ដែលបញ្ជាក់ថា ក្នុងចំណោមកូដដែលត្រូវបានក្រុមអ្នកសរសេរកម្មវិធីដាក់ចូលក្នុងថ្នាលបច្ចេកវិទ្យាមួយនេះ គឺមាន 41% ជាកូដដែលត្រូវបានសរសេរដោយបញ្ញាសិប្បនិម្មិត។

«ក្នុងបីខែកន្លង Stability AI បានយកឈ្នះលើ Bitcoin និង Ethereum នៅលើ GitHub ដោយក្លាយជា Open Source ដែលពេញនិយមជាងគេលើពិភពលោក។ ប្រការនេះបានបង្ហាញអំពីភាពទាក់ទាញដ៏ខ្លាំងក្លារបស់ AI…» លោក Mostaque ថ្លែងដូច្នេះ។

នៅលើបណ្ដាញសង្គមអន្តរជាតិ មានមនុស្សជាច្រើនបានដាក់ជាសំណួរថា «តើ AI អាចដណ្ដើមការងារពីអ្នកសរសេរកូដកម្មវិធី ឬអត់?»។ ចំណែកមនុស្សជាច្រើនផ្សេងទៀតក៏និយាយថា «ដំណាក់កាលដ៏អស្ចារ្យរបស់អ្នកសរសេរកូដកម្មវិធីត្រូវបានបញ្ចប់ហើយ»។

Emad Mostaque ជា CEO របស់ក្រុមហ៊ុនបច្ចេកវិទ្យា Stability AI

អ្នកសរសេរកូដកម្មវិធីមួយរូបរបស់ក្រុមហ៊ុន Microsoft សរសេរថា «ការងារជាវិស្វករផ្នែកទន់កំពុងតែស្លាប់បន្តិចម្ដងៗ។ ChatGPT ឆ្លាតខ្លាំងណាស់ ហើយគ្រប់គ្នាកំពុងតែស្ថិតក្នុងស្ថានភាពលំបាក»។

មនុស្សម្នាក់ក៏បានបង្កើតបញ្ជីស្រង់មតិនៅលើ Blind ដោយដាក់ជាសំណួរថា «តើវិស្វករផ្នែកទន់វ័យក្មេងជិតបាត់បង់ការងារមែន ឬទេ?» ហើយក៏ទទួលបានការជ្រើសរើសចំនួន 12,000 លើក។ ក្នុងនោះមាន 41.3% យល់ស្រប ខណៈ 37% យល់ថា «ការងារនៅតែមិនផ្លាស់ប្ដូរ» និង 21.7% អះអាងថា «បច្ចុប្បន្នមានការងារដែលមានសក្ដានុពលច្រើនជាងមុន»៕

July 5, 2023

មហាសេដ្ឋី Elon Musk ព្រមហាត់គុនជាមួយគ្រូល្បីៗ មុនការប្រកួតជាមួយ Zuckerberg

លោក Musk បានយល់ព្រមហាត់ក្បាច់គុនជាមួយនឹង Gerges St-Pierre ដែលជាកំពូលអ្នកគុននិយមម្នាក់របស់ពិភពលោក ដើម្បីត្រៀមខ្លួនឡើងសង្វៀនប្រកួតប្រដាល់ជាមួយនឹងមហាសេដ្ឋី Zuckergerg។

«លោក Musk ខ្ញុំគឺជាអ្នកគាំទ្ររបស់លោក។ នឹងជាកិត្តិយសបំផុតបើសិនខ្ញុំអាចជួយក្នុងការប្រកួតជាមួយ Zuckerberg។ សូមទុកឱ្យខ្ញុំធ្វើជាគ្រូបង្វឹករបស់លោក» Georges St-Pierre (GSP) បង្ហោះសារលើ Twitter កាលពីថ្ងៃទី 25 មិថុនាដូច្នេះ។

កាលពីថ្ងៃទី 27 មិថុនា 2023 មហាសេដ្ឋីអាម៉េរិកដើមកំណើតអាហ្វ្រិកខាងត្បូង លោក Elon Musk បានឆ្លើយតបលើ Twitter ថា «បាន តោះយើងចាប់ផ្ដើម»។ សាររបស់លោក Musk ទាក់ទាញអ្នកអានបានជាងកន្លះលាននាក់ និងការចុចចូលចិត្តជាង 14.4 k ក្រោយការបង្ហោះមិនដល់មួយថ្ងៃ។ អ្នកចូលមើលស្ទើរតែទាំងអស់គាំទ្រដល់ការសម្រេចចិត្តរបស់លោក Musk ដោយពួកគេសរសេរប្រហាក់់ប្រហែលគ្នាថា ទន្ទឹងរង់ចាំការប្រកួតនេះ។

ឆ្លើយតបនឹងការពេញចិត្តរបស់អ្នកលេងបណ្ដាញសង្គម លោក Musk ក៏បានឱ្យដឹងថា លោកក៏ទើបតែ «លេងមួយទឹក» ជាមួយនឹង Lex Fridman អ្នកស្រាវជ្រាវផ្នែកបញ្ញាសិប្បនិម្មិត (AI) និងជាម្ចាស់ឆានែល podcast ដ៏ល្បីឈ្មោះ ដែលជំនាញខាងសម្ពាសក្រុមមេដឹកនាំបច្ចេកវិទ្យា។

Gerges St-Pierre គឺជាអ្នកគុននិយមជនជាតិកាណាដាដើមកំណើតបារាំង។ បុរសនេះធ្លាប់ដណ្ដើមបានតំណែងជើងឯកពានរង្វាន់ MMA ពីរទម្ងន់ផ្សេងគ្នា។

កាលពីថ្ងៃទី 21 មិថុនា ចាប់ផ្ដើមពីរឿងរ៉ាវសរសេរលេងនៅលើ Twitter មហាសេដ្ឋី Elon Musk បានបបួលមហាសេដ្ឋី Mark Zuckerberg ណាត់ទីតាំងវាយគ្នានៅលើសង្វៀនក្នុងទ្រុងដែកនៅ Las Vegas ហើយម្ចាស់ Facebook ក៏យល់ព្រម។

សំណួរដែលសួរថា «អ្នកជ្រើសរើស Team Musk ឬ Team Zuck?» បានក្លាយជាពាក្យពេញនិយមនៅលើបណ្ដាញសង្គម Twitter និង Reddit។

មហាសេដ្ឋី Elon Musk (ស្ដាំ) និងមហាសេដ្ឋី Mark Zuckerberg

បើនិយាយអំពីន័យចំ Zuckerberg អាយុ 39 ឆ្នាំ ប្រាកដជាមានប្រៀបជាង ដោយសារតែនៅក្មេង ជាអ្នកគុននិយម MMA និងធ្លាប់ឈ្នះក្នុងការប្រកួតគុនជឺជិតស៊ូប្រេងស៊ីល។ ចំណែកលោក Musk អាយុ 51 ឆ្នាំ មានប្រៀបជាងខាងកម្ពស់ និងទម្ងន់ ហើយធ្លាប់និយាយថា បានចូលរួមវាយគ្នានៅតាមដងផ្លូវពេលធំឡើងនៅអាហ្វ្រិកខាងត្បូង។

ចំណែកឪពុកម្ដាយរបស់លោក Musk សុទ្ធតែមានការបារម្ភចំពោះកូនប្រុស និងណែនាំថា មិនគួរប្រកួតឡើយ។ លោក Errol Musk ដែលជាឪពុករបស់លោក Elon Musk និយាយថា ទោះជាឈ្នះ ឬចាញ់ កូនរបស់គាត់នៅតែត្រូវទទួលការខាតបង់។

រីឯអ្នកគាំទ្រវិញ កំពុងតែទន្ទឹងរង់ចាំ និងនាំគ្នាភ្នាល់ ចែកជាក្រុម «Team Musk» និង «Team Zuck»។ Dana White ប្រធាន UFC (Ultimate Fighting Championship) ព្យាករថា គូប្រកួត Musk – Zuckerberg អាចក្លាយជាការប្រកួតក្បាច់គុនមួយទល់នឹងមួយធំបំផុតក្នុងប្រវត្តិសាស្ត្រ និងបំបែករាល់កំណត់ត្រាស្ដីពីការលក់សំបុត្រចូលទស្សនា។ លោកនិយាយថា គ្រប់គ្នានឹងត្រូវចំណាយប្រហែល 100 ដុល្លារ សម្រាប់ការទស្សនាមួយលើកនៅតាមទូរទស្សន៍៕

June 28, 2023

ក្រោយពីម្ចាស់ Twitter និង Facebook ណាត់គ្នាប្រដាល់ក្នុងទ្រុង អ្នកលេងអ៊ីនធើណិតក៏ចាប់ផ្ដើមភ្នាល់

ពាក្យគន្លឹះ «Team Musk» និង «Team Zuck» កំពុងពេញនិយមលើបណ្ដាញសង្គម Twitter ខណៈដែលអ្នកនាំពាក្យរបស់ក្រុមហ៊ុន Meta ឱ្យដឹងថា Mark Zuckerberg ពិតជាទន្ទឹងរង់ចាំការប្រកួតជាមួយ Elon Musk នៅលើសង្វៀន។

កាលពីថ្ងៃទី 21 មិថុនា ចាប់ផ្ដើមពីរឿងរ៉ាវសរសេរលេងនៅលើ Twitter មហាសេដ្ឋី Elon Musk បានបបួលមហាសេដ្ឋី Mark Zuckerberg ណាត់ទីតាំងវាយគ្នានៅលើសង្វៀនក្នុងទ្រុងដែកនៅ Las Vegas ហើយម្ចាស់ Facebook ក៏យល់ព្រម។

សំណួរដែលសួរថា «អ្នកជ្រើសរើស Team Musk ឬ Team Zuck?» បានក្លាយជាពាក្យពេញនិយមនៅលើបណ្ដាញសង្គម Twitter និង Reddit។

«ខ្ញុំនឹងទស្សនាការប្រកួតឱ្យខាងតែបាន សូម្បីតែត្រូវចំណាយប្រាក់ច្រើន។ ខ្ញុំភ្នាល់ថា Zuckerberg នឹងឈ្នះ។ គាត់ចេះក្បាច់គុន ចំណែក Musk គ្រាន់តែមានមាឌធំប៉ុណ្ណោះ» គណនីឈ្មោះ Stefan សរសេរដូច្នេះ។

គណនីឈ្មោះ lkHouVanWiskunde សរសេរថា «មិនមែន Zuckerberg ទើបតែក្លាយជាជើងឯកគុនជឺជិតស៊ូប្រេស៊ីល (Jiu-jitsu) ទេអី? គាត់នៅក្មេង។ នេះនឹងជាការប្រកួតតែម្ខាង»។

អ្នកខ្លះថា លោក Musk ត្រូវប្រើប្រាស់មនុស្សយន្តទើបឈ្នោះ Zuckerberg។ ក៏ប៉ុន្តែ ក៏នៅមានអ្នកខ្លះជ្រើសរើសខាង Team Musk។ «ប្រាក់របស់ខ្ញុំទុកសម្រាប់អ្នកតែអង្គុយដោយមិនចាំបាច់កល់កៅអីប៉ុណ្ណោះ» អ្នកលេង Twitter ម្នាក់សរសេរដូច្នេះ និងបង្ហោះរូបថត Zuckerberg ត្រូវបន្ថែមពូកកៅអីនៅក្នុងសវនាការនៅសភាអាម៉េរិក។

បើនិយាយអំពីន័យចំ Zuckerberg អាយុ 39 ឆ្នាំ ប្រាកដជាមានប្រៀបជាង ដោយសារតែនៅក្មេង ជាអ្នកគុននិយម MMA និងធ្លាប់ឈ្នះក្នុងការប្រកួតគុនជឺជិតស៊ូប្រេងស៊ីល។ ចំណែកលោក Musk អាយុ 51 ឆ្នាំ មានប្រៀបជាងខាងកម្ពស់ និងទម្ងន់ ហើយធ្លាប់និយាយថា បានចូលរួមវាយគ្នានៅតាមដងផ្លូវពេលធំឡើងនៅអាហ្វ្រិកខាងត្បូង។

Business Insider បានវាយតម្លៃថា Zuckerberg នឹងឈ្នះ ដោយសារតែក្បាច់គុនជឺជិតស៊ូ ដែលប្រើក្បាច់ចាប់កាច់ដៃជើងដើម្បីគ្រប់គ្រងគូប្រកួត។

ក៏ប៉ុន្តែ លោក Musk បានបង្ហើបឱ្យដឹងថា «ខ្ញុំមានក្បាច់ពិសេសដែលហៅថា «The Walrus» ក្នុងនោះ ខ្ញុំគ្រាន់តែស្ថិតនៅពីលើគូប្រកួត និងមិនបាច់ធ្វើអ្វីទាំងអស់»។

ចំណែកទំព័រ Guardian វិញ ចុះផ្សាយថា ក្នុងចំណោមមិត្តរបស់លោក Musk ក៏មាន Lex Fridman ដែលជាអ្នកគុននិយមជឺជិតស៊ូ។ «គាត់អាចរៀនក្បាច់គុនការពារខ្លួនពីមិត្តរបស់គាត់ បើសិនការប្រកួតកើតឡើង» ទំព័រនេះសរសេរដូច្នេះ។

លោក Musk ក៏ធ្លាប់ជាអ្នកលេងម្នាក់កាលធំឡើងនៅប្រទេសអាហ្វ្រិកខាងត្បូង

Elena Cresci អតីតអ្នកសារព័ត៌មាន និងជាជើងឯកក្បាច់គុនបុរាណខ្មែរ (នៅថៃ គេហៅមួយថៃ) យល់ថា បើសិនមានយុទ្ធសាស្ត្រគេច លោក Musk ពិតជាអាចផ្ដួលគូប្រកួត។

ដោយឡែក ទំព័រ The Verge អះអាងថា ទោះជាអ្នកណាឈ្នះក៏ដោយ ការប្រកួតរវាងម្ចាស់ Twitter និង CEO របស់ Meta នឹងជាការប្រកួតមួយដ៏អស្ចារ្យបំផុត។

ក៏ប៉ុន្តែ បើទោះនេះគឺជាការភ្នាល់ពិតប្រាកដក៏ដោយ ការប្រកួតរវាងមហាសេដ្ឋីពីររូបនេះ ទំនងជាពិបាកនឹងរៀងចំការប្រកួតលើសង្វៀនជាក់ស្ដែង៕

June 23, 2023

Tag: សំណួរ