រុស្ស៊ី - La Reine Media

ការរីកចម្រើនផ្នែកអវកាសរបស់សហរដ្ឋអាម៉េរិក ធៀបនឹងប្រទេសចិន

នៅក្នុងផ្នែកសំខាន់ៗ សហរដ្ឋអាម៉េរិកមិនត្រឹមតែមានប្រៀបលើសលុបលើប្រទេសចិននោះទេ ប៉ុន្តែក៏មានប្រៀបជាងបណ្ដាប្រទេសបូកចូលគ្នាផងដែរនៅក្នុងវិស័យអវកាស។

អំពីថវិកា៖ ឆ្នាំ 2021 ថវិកាសម្រាប់ផ្នែកអវកាសរបស់សហរដ្ឋអាម៉េរិកគឺប្រមាណ 59.8 ពាន់លានដុល្លារ ខណៈប្រទេសចិន មានប្រហែល 16.18 ពាន់លានដុល្លារប៉ុណ្ណោះ។ នេះបើតាម Svetla Ben-Itzhak សាស្ត្រាចារ្យរងផ្នែកអវកាស និងទំនាក់ទំនងអន្តរជាតិ ប្រចាំសាកលវិទ្យាល័យ Air (AU) របស់សហរដ្ឋអាម៉េរិក។

ផ្កាយរណប៖ គិតត្រឹមខែមេសា ឆ្នាំ 2023 នៅលើគន្លងតារាវិថីផែនដី មានផ្កាយរណបសរុប 5,465 គ្រឿងកំពុងដំណើរការ។ ក្នុងនោះ សហរដ្ឋអាម៉េរិកមាន 3,433 គ្រឿង ស្មើនឹង 63% ហើយឈរលំដាប់លេខមួយលើពិភពលោក។ ចំណែកប្រទេសចិនវិញ មានតែ 541 គ្រឿងប៉ុណ្ណោះ។

អវកាសយានដ្ឋាន៖ សហរដ្ឋអាម៉េរិកមានអវកាសយានដ្ឋានសម្រាប់បាញ់បង្ហោះយានអវកាសចំនួន 7 កំពុងដំណើរការក្នុង និងក្រៅប្រទេស គ្រាដែលយ៉ាងតិច 13 កន្លែងផ្សេងទៀតកំពុងស្ថាបនា។ ប្រទេសចិនមានអាកាសយានដ្ឋានកំពុងដំណើរការចំនួន 4 កន្លែង និង 2 កន្លែងទៀតកំពុងអភិវឌ្ឍទៅតាមផែនការ ហើយទាំងអស់សុទ្ធតែស្ថិតក្នុងទឹកដីប្រទេសនេះ។

ដៃគូសហការ៖ រដ្ឋាភិបាលអាម៉េរិកបានចុះហត្ថលេខាលើកិច្ចព្រមព្រៀងចំនួន 169 ជាមួយរដ្ឋ និងអង្គការអន្តររដ្ឋាភិបាលចំនួន នឹង 33, 129 ជាមួយនឹងដៃគូពាណិជ្ជកម្ម និង 7 ជាមួយនឹងស្ថាប័នស្រាវជ្រាវ។ ប្រទេសចិន មានកិច្ចសហការជាមួយប្រទេសរុស្ស៊ី អ៊ីរ៉ង់ ប៉ាគិស្ថាន ថៃ និងតួកគី។

បេសកកម្មឡើងទៅឋានព្រះចន្ទ៖ រុស្ស៊ី និងចិន សហការគ្នានៅក្នុងគម្រោងឡើងទៅកាន់ឋានព្រះចន្ទនៅឆ្នាំ 2028។ ស្ថានីយស្រាវជ្រាវព្រះចន្ទអន្តរជាតិរបស់ប្រទេសទាំងពីរនេះ បើកទ្វារទទួលយកដៃគូសហការអន្តរជាតិ ប៉ុន្តែមកដល់ពេលនេះមិនទាន់មានដៃគូថ្មីណាមួយឡើយ។ ចំណែកកម្មវិធីព្រះចន្ទ Artemis ដែលនឹងនាំអ្នកអវកាសឡើងទៅកាន់ឋានព្រះចន្ទនៅឆ្នាំ 2025 របស់សហរដ្ឋអាម៉េរិកវិញ គិតចាប់ពីឆ្នាំ 2020 មានប្រទេសចំនួន 24 បានចូលរួម។

ចំនួនលើកនៃការបាញ់បង្ហោះយានអវកាស៖ ឆ្នាំ 2021 ប្រទេសចិនបានបាញ់បង្ហោះយានអវកាសចំនួន 55 លើក ច្រើនជាងសហរដ្ឋអាម៉េរិកចំនួន 4 លើក។

ស្ថានីយអវកាស៖ ចាប់ពីឆ្នាំ 2022 ប្រទេសចិនមានស្ថានីយអវកាសពេញលេញផ្ទាល់ខ្លួន ឈ្មោះ ធានហ្គង់ (Tiangong) ដែលគ្រប់គ្រងតែឯង។ ចាប់ពីឆ្នាំ 1990 សហរដ្ឋអាម៉េរិកបានសហការជាមួយប្រទេសចំនួន 14 ក្នុងនោះមានរុស្ស៊ីផងដែរ ដើម្បីដំណើរការស្ថានីយអវកាសអន្តរជាតិ (ISS)។ ប្រទេសចិនអាចនឹងមានប្រៀបជាងសហរដ្ឋអាម៉េរិក យ៉ាងឆាប់ត្រឹមឆ្នាំ 2045 បើសិនវ៉ាស៊ីងតោនមិនធ្វើសកម្មភាព។ ប៉ុន្តែ យោងតាម Space លទ្ធភាពនេះប្រហែលជានឹងមិនអាចកើតឡើង ព្រោះថា សហរដ្ឋអាម៉េរិកកំពុងតែបង្កើនការវិនិយោគទៅលើវិស័យអវកាស៕

May 20, 2023

អាម៉េរិកប្រកាសកញ្ចប់ជំនួយថ្មីតម្លៃជាងមួយពាន់លានដុល្លារសម្រាប់អ៊ុយក្រែន

សហរដ្ឋអាម៉េរិកគ្រោងនឹងផ្ដល់ជំនួយផ្នែកយោធាបន្ថែមចំនួន 1.2 ពាន់លានដុល្លារដល់អ៊ុយក្រែន ដើម្បីបង្កើនសមត្ថភាពការពារដែនអាកាស។

មន្ត្រីអាម៉េរិក កាលពីថ្ងៃទី 08 ឧសភា បានឱ្យដឹងថា ប្រទេសនេះគ្រោងនឹងប្រកាសអំពីកញ្ចប់ជំនួយថ្មីនៅថ្ងៃទី 09 ឧសភា។ កញ្ចប់ជំនួយនេះគ្រោងនឹងត្រូវបានផ្ដល់ឱ្យក្នុងរយៈពេលច្រើនខែ និងច្រើនឆ្នាំទៀតដើម្បីធានាសន្តិសុខក្នុងអនាគតរបស់អ៊ុយក្រែន ខុសពីជំនួយជាអាវុធ និងសម្ភារយោធាដែលត្រូវបានយកពីឃ្លាំងរបស់កងទ័ពអាម៉េរិកដោយផ្ទាល់ដែលធ្លាប់បានធ្វើឡើងនាពេលកន្លង។

កញ្ចប់ជំនួយថ្មីដែលមានតម្លៃ 1.2 ពាន់លានដុល្លារនេះនឹងធ្វើឱ្យកញ្ចប់ជំនួយយោធាសរុបដែលអាម៉េរិកផ្ដល់ឱ្យអ៊ុយក្រែន កើនឡើងដល់ជិត 37 ពាន់លានដុល្លារ រាប់ចាប់តាំងពីរុស្ស៊ីចូលឈ្លានពានអ៊ុយក្រែនកាលពីខែកុម្ភៈ 2022 រហូតដល់បច្ចុប្បន្ន។

ព័ត៌មាននេះត្រូវបានលើកឡើងនៅក្នុងគ្រាដែលប្រព័ន្ធការពារដែនអាកាសរបស់អ៊ុយក្រែនប្រឈមនឹងសម្ពាធខ្លាំងពីការវាយប្រហារតាមផ្លូវអាកាសរបស់រុស្ស៊ី នៅមុនការវាយបកទ្រង់ទ្រាយធំរបស់ទីក្រុងកៀវ។

May 9, 2023

រុស្ស៊ី ប្រារព្ធពិធីដង្ហែព្យុហយាត្រាអបអរជ័យជម្នះនៅថ្ងៃនេះ

ព្រឹត្តិការណ៍ដង្ហែក្បួនព្យុហយាត្រាអបអរជ័យជម្នះរបស់រុស្ស៊ី គ្រោងនឹងធ្វើឡើងនៅល្ងាចនេះនៅឯទីលានក្រហម ដោយមានការចូលរួមរបស់ទាហានរុស្ស៊ីជាង 10,000 នាក់ រួមនឹងអាវុធនានារបស់ប្រទេសនេះ។

ពិធីដង្ហែក្បួនព្យុហយាត្រាអបអរជ័យជម្នះ 78 ឆ្នាំនៃថ្ងៃកងទ័ពក្រហមសូវៀត បានផ្ដួលរំលំរបបហ្វាស៊ីសអាល្លឺម៉ង់ បញ្ចប់សង្គ្រាមស្នេហាជាតិដ៏អស្ចារ្យ (Great Patriotic War) នេះ នឹងធ្វើឡើងនៅវេលាម៉ោង 10 ថ្ងៃទី 09 ឧសភា (ម៉ោងប្រហែល 14 នៅកម្ពុជា) នៅទីលានក្រហម (Red Square) ក្នុងរដ្ឋធានីមូស្គូ។ ទាហានរុស្ស៊ីជាង 10,000 នាក់ រួមនឹងអង្គភាពអាវុធចំនួន 125 នឹងចូលរួមពិធីខាងលើនេះ។

ប្រធានាធិបតីរុស្ស៊ី លោក ពូទីន រួមនឹងមេដឹកនាំប្រទេសមួយចំនួន ក្នុងនោះមាន បេឡារុស អាមេនី កៀហ្ស៊ីស៊ីស្ថាន តាហ្ស៊ីគីស្ថាន អ៊ូសបេគីស្ថាន និងកាហ្សាក់ស្ថានជាដើម នឹងបង្ហាញវត្តមាននៅក្នុងព្រឹត្តិការណ៍នេះផងដែរ។

ពិធីដង្ហែព្យុហយាត្រាអបអរជ័យជម្នះនៅក្នុងឆ្នាំនេះរបស់រុស្ស៊ី ធ្វើឡើងក្នុងស្ថានការណ៍សន្តិសុខត្រូវបានរឹតបន្តឹងខ្លាំងនៅទូទាំងប្រទេស បន្ទាប់ពីមានការវាយប្រហារពីយន្តហោះគ្មានមនុស្សបើកបរ (UAV) ទៅលើហេដ្ឋារចនាសម្ព័ន្ធជាច្រើនករណី គ្រាដែលកងទ័ពប្រទេសនេះកំពុងឈ្លានពានទឹកដីអ៊ុយក្រែន។

សង្គ្រាមស្នេហាជាតិដ៏អស្ចារ្យ (1941-1945) គឺជាសង្គ្រាមធំបំផុត និងបង្កឱ្យមានមនុស្សស្លាប់ និងរបួសច្រើនបំផុតក្នុងប្រវត្តិសាស្ត្រមនុស្សជាតិ ក្នុងនោះមានទាហាន និងប្រជាជនសូវៀត ប្រហែល 27 លាននាក់បានបាត់បង់ជីវិតដើម្បីការពារប្រទេស និងមនុស្សជាតិពីពួកហ្វាស៊ីសនិយម។

សង្គ្រាមនេះបានបញ្ចប់នៅថ្ងៃទី 09 ឧសភា 1945 នៅពេលតំណាងហ្វាស៊ីសអាល្លឺម៉ង់ ចុះហត្ថលេខាទទួលស្គាល់ការចុះចាញ់ដោយគ្មានលក្ខខណ្ឌនៅចំពោះមុខតំណាងសម្ព័ន្ធមិត្តនៅបែរឡាំង។ កងទ័ពក្រហមសូវៀតបានប្រារព្ធពិធីដង្ហែក្បួនព្យុហយាត្រាអបអរជ័យជម្នះជាលើកដំបូងកាលពីថ្ងៃទី 24 មិថុនា 1945។ ក្រោយមក ព្រឹត្តិការណ៍នេះក៏ត្រូវបានធ្វើឡើងនៅថ្ងៃទី 09 ឧសភា ក្នុងឆ្នាំ 1965, 1985 និង 1990។

ក្រោយពីសូវៀតបានដួលរលំ រុស្ស៊ីក៏បានប្រារព្ធពិធីនេះឡើងវិញនៅមូស្គូចាប់ពីឆ្នាំ 1995។ ចាប់តាំងពីពេលនោះមក ព្រឹត្តិការណ៍នេះក៏ត្រូវបានធ្វើឡើងជារៀងរាល់ឆ្នាំនៅថ្ងៃទី 09 ឧសភា។ ក៏ប៉ុន្តែ កាលពីឆ្នាំ 2020 ព្រឹតត្តិការណ៍នេះត្រូវបានលើកទៅធ្វើនៅថ្ងៃទី 24 មិថុនា ដោយសារតែវិបត្តិកូវីដ-19៕

May 9, 2023

ចន្ទ្រគ្រាសនៅយប់ថ្ងៃទី 05 ឧសភានេះ នឹងងាយស្រួលគយគន់សម្រាប់កម្ពុជាទាំងមូល

នៅយប់នេះ ដែនដីកម្ពុជាទាំងមូលនឹងស្ថិតក្នុងតំបន់ដែលអាចមើលឃើញទាំងស្រុងនូវបាតុភូតរាហូចាប់ចន្ទ ដែលអូបន្លាយពេលជាងពីរម៉ោង ធ្វើឱ្យព្រះចន្ទប្រែជាងងឹតជាងមុន ប៉ុន្តែមិនមានពណ៌ក្រហមខ្លាំង។

ចន្ទ្រគ្រាសពាក់កណ្ដាលវង់នឹងកើតឡើងនៅវេលាម៉ោង 22 និង 15 នាទីយប់នៃថ្ងៃទី 05 ឧសភា (ម៉ោងនៅកម្ពុជា)។ ប្រជាជនស្ទើរតែទាំងអស់ដែលរស់នៅក្នុងតំបន់នានារបស់ទ្វីបអាស៊ី អឺរ៉ុប អង់តាក់ទិក រុស្ស៊ី អូសេអានី អាហ្វ្រិកខាងកើត និងអាហ្វ្រិកកណ្ដាល សុទ្ធតែអាចគយគន់បាតុភូតនេះ។

អ្នកវិទ្យាសាស្ត្រឱ្យដឹងថា ខុសពីចន្ទ្រគ្រាសទាំងស្រុង ឬមួយចំណិត ចន្ទ្រគ្រាសពាក់កណ្ដាលវង់ ឬពាក់កណ្ដាលងងឹតមិនប្រែពណ៌ជាក្រហមខ្លាំង និងងងឹតនោះទេ តែវាគ្រាន់តែមានពណ៌ក្រហមស្រាល និងងងឹតជាងបន្តិចបើធៀបនឹងចន្ទពេញវង់ធម្មតា។

បាតុភូតរាហូចាប់ចន្ទលើកនេះនឹងមានភាពងាយស្រួលសម្រាប់ការទស្សនារបស់ប្រជាជនកម្ពុជា ព្រោះថា វានឹងកើតឡើងនៅជិតពាក់កណ្ដាលយប់ ពេលដែលព្រះចន្ទរះឡើងខ្ពស់។

បាតុភូតចន្ទ្រគ្រាសលើកនេះនឹងគ្រាន់តែមានពណ៌ក្រហមស្រាល និងងងឹតជាងបន្តិចបើធៀបនឹងចន្ទពេញវង់ធម្មតា

ដូចទៅនឹងប្រភេទនៃបាតុភូតរាហូចាប់ចន្ទដទៃ ចន្ទគ្រាសមួយចំហៀងកើតឡើងដោយសារផែនដីគោចរឆ្លងកាត់តំបន់ចន្លោះរវាងព្រះចន្ទ និងព្រះអាទិត្យ។ ប្រការនេះធ្វើឱ្យពន្លឺដែលព្រះអាទិត្យជះទៅលើព្រះចន្ទត្រូវបាំងបិទដោយផែនដី គ្រាដែលស្រមោលរបស់ផែនដីជះទៅលើព្រះចន្ទ ហើយជាលទ្ធផល ព្រះចន្ទត្រូវងងឹតមួយផ្នែក មួយចំហៀង ឬងងឹតទាំងស្រុងទៅតាមទីតាំងរបស់ផែនដី ព្រះចន្ទ និងព្រះអាទិត្យ៕

May 5, 2023

បាតុភូត «រាហូចាប់ចន្ទ» ដំបូងគេក្នុងឆ្នាំនេះ ជិតកើតឡើងហើយ

ព្រះចន្ទនឹងគោចរចូលក្នុងតំបន់ងងឹតខាងក្រោយរបស់ផែនដីនៅថ្ងៃទី 05 ឧសភា ធ្វើឱ្យព្រះចន្ទអ័ព្ទរស្មីជាងមុន បង្កើតបានជាបាតុភូតរាហូចាប់ចន្ទ្រ (ចន្ទគ្រាស) មួយចំហៀង។

បាតុភូតចន្ទគ្រាសនេះនឹងចាប់ផ្ដើមពីម៉ោង 22 និង 15 នាទី នៃថ្ងៃទី 05 ឧសភា (នៅកម្ពុជា) ហើយអាចមើលឃើញពីគ្រប់ទិសដែលមានព្រះចន្ទស្ថិតនៅឯនាយជើងមេឃ រួមមានទ្វីបអង់តាក់ទិក ទ្វីបអាស៊ី រុស្ស៊ី ទ្វីបអូសេអានី តំបន់អាហ្វ្រិកខាងត្បូង និងអាហ្វ្រិកកណ្ដាល។

ព្រឹត្តិការណ៍នេះនឹងឈានដល់ចំណុចកំពូលនៅម៉ោង 00 និង 24 នាទី ថ្ងៃទី 06 ឧសភា ហើយបញ្ចប់នៅម៉ោង 02 និង 32 នាទីក្នុងថ្ងៃដដែល នៅពេលព្រះចន្ទគោចរចេញផុតពីស្រមោលផែនដី។

ដូចទៅនឹងប្រភេទនៃបាតុភូតរាហូចាប់ចន្ទដទៃ ចន្ទគ្រាសមួយចំហៀងកើតឡើងដោយសារផែនដីគោចរឆ្លងកាត់តំបន់ចន្លោះរវាងព្រះចន្ទ និងព្រះអាទិត្យ។ ប្រការនេះធ្វើឱ្យពន្លឺដែលព្រះអាទិត្យជះទៅលើព្រះចន្ទត្រូវបាំងបិទដោយផែនដី គ្រាដែលស្រមោលរបស់ផែនដីជះទៅលើព្រះចន្ទ ហើយជាលទ្ធផល ព្រះចន្ទត្រូវងងឹតមួយផ្នែក មួយចំហៀង ឬងងឹតទាំងស្រុងទៅតាមទីតាំងរបស់ផែនដី ព្រះចន្ទ និងព្រះអាទិត្យ។

May 2, 2023

អេស្ប៉ាញ រឹបអូសនាវាទេសចរណ៍តម្លៃ ៩៩ លានដុល្លារអាម៉េរិក របស់ មហាសេដ្ឋីរុស្ស៊ី

សមត្ថកិច្ចរបស់ ប្រទេសអេស្ប៉ាញ ប្រកាសអំពីការរឹបអូសនាវាទេសចរណ៍ Tango របស់មហាសេដ្ឋី Viktor Vekselberg ដែលត្រូវបាន អាម៉េរិក បញ្ចូលទៅក្នុងបញ្ជីខ្មៅ។

ក្រុមប៉ូលិសអេស្ប៉ាញ កាលពីម្សិលមិញប្រកាសថា បានសហការជាមួយកម្លាំងពិសេសរបស់ សហរដ្ឋអាម៉េរិក រឹបអូសនាវាមួយគ្រឿងដែលមានបណ្ដោយ ៧៨ ម៉ែត្រ នៅ Palma de Mallorca ជាទីក្រុងកំពង់ផែនៅភាគខាងលិចនៃ សមុទ្រមេឌីទែរ៉ាណេ។

នាវាទេសចរណ៍ដែលមានតម្លៃ ៩៩ លានដុល្លារ គឺជាកម្មសិទ្ធិរបស់ មហាសេដ្ឋីរុស្ស៊ី Viktor Vekselberg ប្រធានក្រុមហ៊ុន Renova។ ក្រុមហ៊ុននេះ រួមនឹងក្រុមហ៊ុនជាច្រើនទៀតរបស់ រុស្ស៊ី ត្រូវ សហរដ្ឋអាម៉េរិក ដាក់ចូលទៅក្នុងបញ្ជីខ្មៅឆ្នាំ ២០១៨ ក្នុងកិច្ចប្រឹងប្រែងដើម្បីដាក់ទណ្ឌកម្មលើ ទីក្រុងមូស្គូ ក្រោមបទចោទថា ទាក់ទងទៅនឹងសកម្មភាពវាយប្រហារលើ «គ្រឹះប្រជាធិបតេយ្យរបស់លោកខាងលិច»។

មហាសេដ្ឋីរុស្ស៊ី Viktor Vekselberg (ស្ដាំ) និងមេដឹកនាំនៃ ប្រទេសរុស្ស៊ី

Vekselberg មិនស្ថិតក្នុងបញ្ជីដែលត្រូវ សហភាពអឺរ៉ុប ដាក់ទណ្ឌកម្ម ប៉ុន្តែ លោកកំពុងត្រូវបានស៊ើបអង្កេតនៅ សហរដ្ឋអាម៉េរិក ក្រោមបទចោទថា លាក់បាំងអំពីសិទ្ធិជាម្ចាស់នាវាទេសចរណ៍ដើម្បីគេចពីទណ្ឌកម្ម។

កម្លាំងពិសេសរបស់ អេស្ប៉ាញ និង សហរដ្ឋអាម៉េរិក បានរឹបអូសឯកសារ កុំព្យូទ័រនៅលើនាវាដែលមានសញ្ជាតិ ឃុក (Cook Islands) ដែលជាប្រទេសដីកោះមួយនៅ មហាសមុទ្រប៉ាស៊ីហ្វិកខាងត្បូង ដើម្បី «ស្វែងរកអត្តសញ្ញាណម្ចាស់កម្មសិទ្ធិពិតប្រាកដ»។ នេះគឺជានាវាទេសចរណ៍ទីពីរទាក់ទងនឹង មហាសេដ្ឋីរុស្ស៊ី ដែលត្រូវបានរឹបអូសនៅ អេស្ប៉ាញ ចាប់តាំងពី រុស្ស៊ី បានបើកការឈ្លានពានលើ ទឹកដីអ៊ុយក្រែន កាលពីថ្ងៃទី ២៤ កុម្ភៈ ២០២២។

អាជ្ញាធររបស់ បារាំង និង អ៊ីតាលី ក៏បានរឹបអូសនាវាទេសចរណ៍ជាច្រើនគ្រឿងដែលទាក់ទិននឹងក្រុមអ្នកមានអំណាចនៅ រុស្ស៊ី ក្នុងកិច្ចខិតខំដើម្បីបង្ខំឱ្យ ប្រធានាធិបតីរុស្ស៊ី វ្ល៉ាឌីមៀ ពូទីន ដកកងទ័ពចេញពី អ៊ុយក្រែន៕

April 5, 2022

តំបន់ផ្ដាច់ខ្លួននៅ ប្រទេសហ្សកហ្ស៊ី នឹងធ្វើប្រជាមតិស្ដីពីការបម្រួបបម្រួមចូលក្នុងសហព័ន្ធរុស្ស៊ី

មេដឹកនាំ អូសេទីខាងត្បូង (South Ossetia) ដែលជាតំបន់ផ្ដាច់ខ្លួននៅ ហ្សកហ្ស៊ី (Georgia) ប្រកាសថា នឹងធ្វើប្រជាមតិស្ដីពីការច្របាច់បញ្ចូលទៅក្នុង សហព័ន្ធរុស្ស៊ី។

«យើងមានមូលហេតុគ្រប់គ្រាន់ដើម្បីចូលរួមក្នុងសហព័ន្ធរុស្ស៊ី និងមិនជួបឧបសគ្គផ្លូវច្បាប់ណាមួយឡើយ» Alan Tadtaev អ្នកតាក់តែងច្បាប់កំពូលមួយរូបរបស់ អូសេទីខាងត្បូង កាលពីថ្ងៃទី ៣០ មីនា បានឱ្យដឹងដូច្នេះ។

«ខ្ញុំយល់ឃើញថា ការបម្រួបបម្រួមជាមួយ រុស្ស៊ី គឺជាគោលដៅយុទ្ធសាស្ត្រ និងជាជម្រើសរបស់យើង ជាបំណងប្រាថ្នារបស់ប្រជាជន» Anatoly Bibilov មេដឹកនាំរបស់ សាធារណរដ្ឋស្វ័យប្រកាស អូសេទីខាងត្បូង ថ្លែងដូច្នេះ។ «យើងនឹងអនុវត្តទៅតាមជំហាននៃផ្លូវច្បាប់នាពេលដ៏ខ្លីខាងមុខ។ អូសេទីខាងត្បូង នឹងក្លាយជាផ្នែកមួយរបស់ រុស្ស៊ី ជាទឹកដីកំណើតប្រវត្តិសាស្ត្រ»។

បែបបទផ្លូវច្បាប់ដែលចាំបាច់ដើម្បីឱ្យ អូសេទីខាងត្បូង អាចបម្រួបបម្រួមជាមួយ រុស្ស៊ី នឹងរួចរាល់នៅថ្ងៃទី ១០ មេសា ជាថ្ងៃបោះឆ្នោតជ្រើសរើសមេដឹកនាំរបស់តំបន់នេះ។

ហ្សកហ្ស៊ី គឺជាប្រទេសដែលធ្លាប់ចំណុះឱ្យ សហភាពសូវៀត នៅតំបន់ កៅកាស (Kavkaz) ជាប់ជាមួយរុស្ស៊ី នៅភាគខាងជើង។ ទំនាក់ទំនងរវាង រុស្ស៊ី និង ហ្សកហ្ស៊ី តែងតែមានភាពតានតឹងរាប់ចាប់តាំងពីជម្លោះប្រដាប់អាវុធបានកើតឡើងកាលពីខែសីហា ២០០៨ នៅពេល ហ្សកហ្ស៊ី វាយប្រហារទៅលើតំបន់ផ្ដាច់ខ្លួនចំនួន ២ គឺ អាបខាហ្ស៊ី (Abkhazia) និង អូសេទីខាងត្បូង។

រុស្ស៊ី បានបើកយុទ្ធនាការអន្តរគមន៍យោធានៅ ហ្សកហ្ស៊ី ចាប់ពីថ្ងៃទី ៨ សីហា ២០០៨ និងបញ្ចប់ក្រោយការប្រយុទ្ធគ្នា ៥ ថ្ងៃ។ ហ្សកហ្ស៊ី រងការខូចខាតធ្ងន់ធ្ងរក្នុងសង្គ្រាមភ្លើងចំបើងនោះ។ រុស្ស៊ី បានប្រកាសទទួលស្គាល់ឯករាជ្យរបស់ អាបខាហ្ស៊ី និង អូសេទីខាងត្បូង ប៉ុន្តែ អន្តរជាតិមិនបានទទួលស្គាល់ឡើយ។

រុស្ស៊ី រក្សាវត្តមានកងទ័ពរបស់ខ្លួននៅ អាបខាហ្ស៊ី និង អូសេទីខាងត្បូង ដោយអះអាងថា នេះគឺជាសកម្មភាពសមស្របទៅតាមបំណងប្រាថ្នារបស់ប្រជាជនក្នុងតំបន់។ ក៏ប៉ុន្តែ អាជ្ញាធរហ្សកហ្ស៊ី និងបស្ចិមលោក បានបដិសេធ ដោយចោទថា នេះគឺជាការ «រំលោភកាន់កាប់ដោយខុសច្បាប់»។ រុស្ស៊ី និង ហ្សកហ្ស៊ី បានកាត់ផ្ដាច់ទំនាក់ទំនងការទូតនឹងគ្នារហូតដល់បច្ចុប្បន្ន៕

March 31, 2022

ទ្រព្យសម្បត្តិរបស់ម្ចាស់ក្លឹប Chelsea និងមហាសេដ្ឋីរុស្ស៊ី ច្រើននាក់ទៀត ត្រូវបានបង្កកនៅ អឺរ៉ុប

មហាសេដ្ឋីរុស្ស៊ី Roman Abramovich ត្រូវបានរដ្ឋាភិបាលនៃ ប្រទេសអង់គ្លេស ដាក់ទណ្ឌកម្ម ដោយការបង្កកទ្រព្យ។

រដ្ឋមន្ត្រីការបរទេសអង់គ្លេស Liz Truss នាថ្ងៃទី ១០ មីនានេះ បានប្រកាសបទបញ្ជាដាក់ទណ្ឌកម្ម បង្កកទ្រព្យសម្បត្តិ និងហាមធ្វើដំណើរចំពោះអ្នកមានកំពូលៗចំនួន ៧ រូបរបស់ រុស្ស៊ី។ ក្នុងចំណោមនោះមានប្រធានក្លឹបបាល់ទាត់អង់គ្លេស Chelsea លោក Roman Abramovich ផងដែរ។

បទបញ្ជាដាក់ទណ្ឌកម្មនេះបានលើកឡើងច្បាស់ថា ទ្រព្យសម្បត្តិទាំងអស់របស់បុគ្គលទាំង ៧ រូបនេះ នៅ អង់គ្លេស នឹងត្រូវបានបង្កក។ ពួកគេក៏ត្រូវហាមធ្វើដំណើរ ចូលមកទឹកដីអង់គ្លេស ព្រមទាំងមិនអនុញ្ញាតឱ្យក្រុមហ៊ុនណាមួយរបស់ អង់គ្លេស ធ្វើជំនួញជាមួយបុគ្គលទាំងនេះ។

កាលពីសប្ដាហ៍មុន មហាសេដ្ឋី Abramovich ប្រកាសលក់ក្លឹបបាល់ទាត់ Chelsea ហើយប្រាក់ដែលលក់បាននឹងត្រូវយកទៅជួយដល់ក្រុមអ្នករងគ្រោះដោយសារសង្គ្រាមនៅ អ៊ុយក្រែន។

ការសម្រេចរបស់អាជ្ញាធរអង់គ្លេស នឹងមានសុពលភាពមុនពេលដំណើរការលក់ក្លឹប Chelsea ដែលមានតម្លៃប្រហែល ៣ ពាន់លានផោន ស្មើនឹងជាង ៣.៩ ពាន់លានដុល្លារអាម៉េរិក ត្រូវបានធ្វើឡើងចប់សព្វគ្រប់។

មកដល់ពេលនេះ អង់គ្លេស បានដាក់ទណ្ឌកម្មចំពោះបុគ្គល និងក្រុមហ៊ុនរុស្ស៊ី ចំនួនជាង ២០០ បុគ្គល និងស្ថាប័ន។ ក្រៅពីលោក Abramovich បុគ្គលដែលស្ថិតក្នុងបញ្ជីទណ្ឌកម្មថ្មីរបស់ អង់គ្លេស ក៏មាន មហាសេដ្ឋី Oleg Deripaska ដែលមានភាគហ៊ុនច្រើននៅ En+ Group, Igor Sechin នាយកប្រតិបត្តិរបស់ Rosneft, Andrey Kostin ប្រធានធនាគារ VTB, Alexei Miller នាយកប្រតិបត្តិរបស់ Gazprom, Nikolai Tokarev ប្រធានក្រុមហ៊ុន Transneft និង Dmitri Lebedev ប្រធានក្រុមប្រឹក្សាភិបាលធនាគារ Rossiya ផងដែរ៕

March 10, 2022

ផ្អាកអាជីវកម្មនៅ រុស្ស៊ី McDonald’s បាត់បង់ចំណូល ៥០លានដុល្លារ ក្នុង ១ខែ

បើទោះជាបានផ្អាកសកម្មភាពពាណិជ្ជកម្មនៅ ប្រទេសរុស្ស៊ី ប៉ុន្តែ ក្រុមហ៊ុន McDonald’s នៅតែបើកប្រាក់ខែជូនបុគ្គលិក ៦២,០០០ នាក់ រួមទាំងថ្លៃជួលទីតាំង។ល។

ទំព័រ CNBC បានរាយការណ៍ថា McDonald’s គណនាឃើញថា ការបិទទ្វារហាងនៅ រុស្ស៊ី នឹងធ្វើឱ្យក្រុមហ៊ុនអាហាររហ័សមួយនេះ បាត់បង់ប្រាក់ប្រហែល ៥០ លានដុល្លារ ជារៀងរាល់ខែ រហូតដល់ពេលបើកទ្វារទទួលភ្ញៀវឡើងវិញ។

ក្រុមហ៊ុនដែលមានទីស្នាក់ការកណ្ដាលនៅ Chicago សហរដ្ឋអាម៉េរិក កាលពីថ្ងៃទី ៨ មីនា បានប្រកាសថា ពួកគេនឹងផ្អាកដំណើរការបណ្ដោះអាសន្នចំពោះហាង McDonald’s នៅ រុស្ស៊ី។ ក្រុមហ៊ុននេះ មានហាងប្រហែល ៨៥០ កន្លែងនៅ រុស្ស៊ី ដែលភាគច្រើនគឺជាកម្មសិទ្ធិរបស់ McDonald’s មិនមែនជាហាងលក់សិទ្ធិអាជីវកម្មបន្ត (franchise)។

បណ្ដាយីហោអាហារ និងភេសជ្ជៈដទៃទៀតរបស់ អាម៉េរិក ដូចជា Starbucks, Yum Brands, Coca Cola និង Papa John’s ក៏តាមពីក្រោយសកម្មភាពរបស់ McDonald’s។

ប្រធានផ្នែកហិរញ្ញវត្ថុរបស់ McDonald’s លោក Devin Ozan ឱ្យដឹងថា បច្ចុប្បន្ន McDonald’s បានគណនាឃើញថា ពួកគេនឹងត្រូវបាត់បង់ ៥០ លានដុល្លារ ជារៀងរាល់ខែ។

ក្រុមហ៊ុននេះក៏បានសន្យាបើកប្រាក់ខែជូនបុគ្គលិកជា ជនជាតិរុស្ស៊ី ប្រហែល ៦២,០០០ នាក់ របស់ខ្លួន នៅក្នុងអំឡុងពេលផ្អាកដំណើរការ។ លោក Ozan បានឱ្យដឹងថា McDonald’s ក៏នឹងបង់ថ្លៃជួលទីតាំង ក៏ដូចជាការចំណាយលើបណ្ដាញផ្គត់ផ្គង់ និងខ្ទង់ចំណាយដទៃទៀតផងដែរ៕

March 10, 2022

ប្រាក់រូប្ល (ruble) របស់ រុស្ស៊ី ធ្លាក់ថ្លៃមិនធ្លាប់មាន រដ្ឋាភិបាលដំឡើងការប្រាក់ឡើងដល់ ២០%

រូបិយវត្ថុក្នុងស្រុករបស់ រុស្ស៊ី មានពេលខ្លះធ្លាក់ថ្លៃ ៤០% ធៀបនឹងប្រាក់ដុល្លារអាម៉េរិក កាលពីព្រឹកនេះ ក្រោយពី អាម៉េរិក និង អឺរ៉ុប កាតផ្ដាច់ធនាគារធំៗរបស់ រុស្ស៊ី ចេញពីបណ្ដាញ SWIFT។

ក្នុងការជួញដូរព្រឹកមិញ ប្រាក់រូប្លរុស្ស៊ី មានពេលខ្លះត្រូវបានជួញដូរក្នុងតម្លៃ ១១៧.៧៥ រូប្ល សម្រាប់ប្ដូរយក ១ ដុល្លារអាម៉េរិក ថយចុះ ៤០% ពី ៨៣.៧៥ រូប្លរុស្ស៊ី កាលពីថ្ងៃសុក្រសប្ដាហ៍មុន នេះបើតាមទិន្នន័យរបស់ Bloomberg។

មូលហេតុនៃការធ្លាក់ថ្លៃនេះគឺដោយសារ សហរដ្ឋអាម៉េរិក និងសម្ព័ន្ធមិត្តអឺរ៉ុប រួមនឹង កាណាដា កាលពីសប្ដាហ៍កន្លង បានយល់ស្របគ្នាក្នុងការកាត់ធនាគារធំៗមួយចំនួនរបស់ រុស្ស៊ី ចេញពី SWIFT (Society of Worldwide Interbank Financial Telecommunication) ដែលជាបណ្ដាញទូរគមនាគមន៍ហិរញ្ញវត្ថុ នៃធនាគារទូទាំងពិភពលោក។ ប្រព័ន្ធ SWIFT នេះមានស្ដង់ដារតែមួយ ដែលមានសុវត្ថិភាពខ្ពស់បំផុតនៅក្នុងការផ្ទេរ និងទទួលប្រាក់ពីធនាគារ និងស្ថាប័នហិរញ្ញវត្ថុជាង ១១,០០០ ក្រុមហ៊ុន នៅក្នុងប្រទេស និងដែនដីជាង ២០០ របស់ពិភពលោក។

ដើម្បីប៉ះប៉ូវ និងកាត់បន្ថយហានិភ័យនៃការធ្លាក់ថ្លៃរបស់ ប្រាក់រូប្លរុស្ស៊ី ធៀបនឹងប្រាក់ដុល្លារអាម៉េរិក រួមនឹងបញ្ហាអតិផរណា ធនាគារជាតិរុស្ស៊ី បានដំឡើងការប្រាក់មូលដ្ឋានពី ៩.៥% ឡើងដល់ ២០% ក្នុងគ្រាតម្លៃប្រាក់រូប្លរុស្ស៊ី ធ្លាក់ថ្លៃដល់កម្រិតទាបបំផុតមិនធ្លាប់មានពីមុនមក។

ចំណែកតម្លៃប្រេងបានកើនឡើងកាលពីព្រឹកនេះ ក្នុងគ្រាដែលអ្នកវិនិយោគមានការបារម្ភអំពីប្រភពផ្គត់ផ្គង់ ព្រោះតែវិបត្តិនៅ អ៊ុយក្រែន។ តម្លៃប្រេង Brent ឡើងដល់ ១០៥ ដុល្លារអាម៉េរិក/ធុងបារ៉ែល នៅពេលចាប់ផ្ដើមការជួញដូរ ដែលតួលេខនេះខ្ពស់ជាងប្រហែល ៧ ដុល្លារ បើធៀបនឹងសប្ដាហ៍កន្លង៕

February 28, 2022

Tag: រុស្ស៊ី