ព្រឹត្តិការណ៍

BYD នឹងផលិតរថយន្តអគ្គិសនីនៅប្រទេសថៃចាប់ពីត្រីមាសទីបី

ក្រុមហ៊ុនចិន BYD បានប្រកាសថា នឹងចាប់ផ្ដើមផលិតរថយន្តអគ្គិសនីនៅឯរោងចក្ររបស់ខ្លួនក្នុងប្រទេសថៃ ចាប់ពីត្រីមាសទីបី ឆ្នាំ 2024។ ប្រកាសនេះត្រូវបានធ្វើឡើងក្នុងគ្រាដែល BYD ចូលរួមព្រឹត្តិការណ៍ពិព័រណ៍រថយន្តអន្តរជាតិបាងកកលើកទី 45 ដែលប្រារព្ធឡើងចាប់ពីថ្ងៃទី 27 ខែមីនា ដល់ថ្ងៃទី 7 ខែមេសា ឆ្នាំ 2024។

BYD មិនត្រឹមតែបង្កើតរោងចក្រផលិតរថយន្តអគ្គិសនីនៅប្រទេសថៃនោះទេ តែក៏កំពុងសង់រោងចក្រដំឡើងរថយន្តនៅប្រទេសហុងគ្រី និងប្រេស៊ីលផងដែរ។ ការផលិតរថយន្តអគ្គិសនីក៏បានចាប់ផ្ដើមនៅឯរោងចក្ររបស់ BYD ក្នុងប្រទេសអ៊ូសបេគីស្ថាន កាលពីដើមឆ្នាំនេះ។

ទោះជាយ៉ាងណាក៏ដោយ ទន្ទឹមនឹងបង្កើតរោងចក្រថ្មីនៅប្រទេសមួយចំនួន ក្រុមហ៊ុន BYD ក៏បានពន្យារពេលនៃការសង់រោងចក្ររបស់ខ្លួននៅក្នុងប្រទេសមួយចំនួន ក្នុងនោះមានដូចជា វៀតណាមជាដើម៕

April 1, 2024

ព្រះចន្ទចាប់ផ្ដើមគោចរលើគន្លងសូរ្យគ្រាសពេញលេញក្នុងឆ្នាំ 2024

ព្រះចន្ទត្រូវបានផែនដីបាំងបាត់នៅវេលាទៀបភ្លឺថ្ងៃទី 25 មីនា 2024។ ក្រោយមក ព្រះចន្ទនឹងបាំងព្រះអាទិត្យទាំងស្រុងពីភ្នែកមនុស្សនៅលើផែនដីនៅថ្ងៃទី 8 ខែមេសាខាងមុខ។

រូបភាពមួយសន្លឹកត្រូវបានថតនៅពេលផ្កាយរណបរបស់អង្គការអវកាសអាម៉េរិក ណាសា នៅឯស្ថានីយអវកាសអន្តរជាតិ (ISS) នៅពេលវាហោះឡើងដល់កម្ពស់ប្រហែល 435 គីឡូម៉ែត្រ ពីលើតំបន់ភាគខាងត្បូងនៃមហាសមុទ្រហ្វាស៊ីហ្វិក នៅក្នុងគន្លងតារាវិថីពិសេសរបស់ព្រះចន្ទ។

ថ្ងៃទី 25 ខែមីនា បានចាប់ផ្ដើម «រដូវសូរ្យគ្រាស» ដំបូងរបស់ឆ្នាំ 2024។ វេលាទៀបភ្លឺ ថ្ងៃទី 25 ខែមីនា ព្រះចន្ទពេញវង់ និងត្រូវបានស្រមោលផែនដីបាំងបាត់។ ប៉ុន្តែ នេះមិនមែនជាចន្ទគ្រាសពេញលេញនោះទេ ព្រោះព្រះចន្ទគោចរឆ្លងកាត់ស្រមោលខាងក្រៅរបស់ផែនដីប៉ុណ្ណោះ។

ដោយឡែក ព្រឹត្តិការណ៍សូរ្យគ្រាសពេញលេញ នឹងកើតឡើងចាប់ពីម៉ោង 12 និង 53 នាទី ដល់ម៉ោង 5 និង 32 នាទី ថ្ងៃទី 8 មេសា ឆ្នាំ 2024។ ព្រឹត្តិការណ៍នេះនឹងឡើងដល់ចំណុចកំពូលនៅវេលាម៉ោង 3 និង 12 នាទីព្រឹក ម៉ោង EDT។

នៅថ្ងៃទី 8 មេសា ព្រះចន្ទនឹងគោចរមកដល់ចំណុចត្រង់ជួរជាមួយព្រះអាទិត្យ និងផែនដី ហើយបាំងព្រះអាទិត្យទាំងស្រុងពីមនុស្សលើផែនដី។

នៅតំបន់អាម៉េរិកខាងជើងទាំងមូល ក្នុងថ្ងៃទី 8 មេសា នឹងបានឆ្លងកាត់បាតុភូតសូរ្យគ្រាសយ៉ាងហោចក៏មួយផ្នែក ស្របពេលតំបន់ដទៃដែលស្ថិតនៅក្នុងស្រមោលដែលមានទំហំ 185 គីឡូម៉ែត្រ របស់ព្រះចន្ទ នឹងបានឃើញព្រឹត្តិការណ៍សូរ្យគ្រាសពេញលេញ។

យោងតាមការស្រាវជ្រាវរបស់ណាសា ជាមធ្យម បាតុភូតសូរ្យគ្រាសពេញលេញ នឹងកើតឡើងនៅក្នុងតំបន់មួយចំនួនពីរលើក ក្នុងរង្វង់ 366 ឆ្នាំ។

March 26, 2024

ក្រុមហ៊ុន RMA Cambodia បានប្រារព្ធពិធីសម្ពោធជាផ្លូវការទីតាំងប្រគល់រថយន្ត ហ្វដ លំដាប់អន្តរជាតិ

ក្រុមហ៊ុន អ អិម អេ (ខេមបូឌា) – RMA Cambodia ដែលជាក្រុមហ៊ុននាំចូល និងចែកចាយផ្តាច់មុខនូវរថយន្ត ហ្វដ មកកាន់ទីផ្សារព្រះរាជាណាចក្រកម្ពុជា បានប្រារព្ធពិធី “សម្ពោធជាផ្លូវការទីតាំងប្រគល់រថយន្ត ហ្វដ សាខាបឹងបៃតង” ក្រោមអធិបតីភាពរបស់ លោក ងន សាំង អគ្គនាយកនៃក្រុមហ៊ុន អ អិម អេ (ខេមបូឌា) និងលោក David Jeffrey នាយកគ្រប់គ្រងប្រចាំតំបន់ទីផ្សារអាស៊ីប៉ាស៊ីហ្វិក និងកូរ៉េខាងត្បូង នៃក្រុមហ៊ុន Ford Motor Company រួមទាំងគណៈគ្រប់គ្រង បុគ្គលិកនៃក្រុមហ៊ុន អ អិម អេ (ខេមបូឌា) ភ្ញៀវកិត្តិយស អតិថិជនហ្វដ និងមិត្តអ្នកសារព័ត៌មានប្រមាណជាង ២០០ នាក់។

លោក ងន សាំង អគ្គនាយកនៃក្រុមហ៊ុន អ អិម អេ (ខេមបូឌា) បានមានប្រសាសន៍ថា៖ “ក្រុមហ៊ុន អ អិម អេ ជាក្រុមហ៊ុនដែលមានចំណែកទីផ្សាររថយន្តថ្មីធំជាងគេនៅក្នុងប្រទេសកម្ពុជា ដែលទទួលបានចំណាត់ថ្នាក់លេខ១ អស់រយៈពេល៥ឆ្នាំជាប់ៗគ្នា គិតចាប់ពីឆ្នាំ ២០១៩ មកដល់ពេលបច្ចុប្បន្ន។ កត្តាដែលធ្វើអោយយើងទទួលបានចំណែកទីផ្សារលេខ១នេះ មិនមែនដោយសារតែការលក់រថយន្តថ្មី តែមួយមុខប៉ុណ្ណោះទេ ប៉ុន្តែគឺដោយសារគុណភាពនៃសេវាកម្មដែលផ្តល់ជូនទៅកាន់អតិថិជន ដូចជាមជ្ឈមណ្ឌលផ្តល់សេវាកម្មថែទាំ និងជួសជុលរថយន្តគ្រប់ខេត្តក្រុង សេវាជំនួយជួសជុលចល័តដល់កន្លែង ២៤ម៉ោង ទទួលបានអត្ថប្រយោជន៍ និងព័ត៌មានផ្សេងៗពីកម្មវិធី Ford Cambodia Mobile App ចំណេញពេលវេលា និងថវិការក្នុងការប្តូរប្រេងម៉ាស៊ីន (រៀងរាល់ 10,000km ម្តង) មាន‍ឱកាសចូលរួមដំណើរកម្សាន្តគ្រួសារ ហ្វដ ជារៀងរាល់ឆ្នាំ និងសេវាកម្មទទួលយករថយន្តចាស់ផ្លាស់ប្តូរយករថយន្តថ្មីជាដើម។ លើសពីនេះទៅទៀត យើងក៏មានបង្កើតនូវការិយាល័យទំនាក់ទំនងអតិថិជន (Call Center) ដែលមានតួនាទីផ្តល់ប្រឹក្សាយោបល់អំពីចម្ងល់ផ្សេងៗទៅកាន់អតិថិជន មិនអោយលើសពី ១៥នាទី។”

លោក ងន សាំង ក៏បានមានប្រសាសន៍បន្ថែមទៀតថា៖ “ទីតាំងប្រគល់រថយន្ត ហ្វដ នេះ គឺជាមជ្ឈមណ្ឌលប្រគល់រថយន្តធំជាងគេ និងដំបូងគេបង្អស់ក្នុងទីផ្សារប្រទេសកម្ពុជាយើង នៅពេលដែលអតិថិជនចូលមកក្នុងទីតាំងប្រគល់រថយន្តនេះ នោះអតិថិជននឹងមានអារម្មណ៍ហាក់ដូចជា កន្លែងតាំងបង្ហាញរថយន្ត ឬការិយាល័យ ឬក៏ជាហាងកាហ្វេដ៏ធំមួយ ដែលមានកន្លែងអង្គុយបំពាក់នូវគ្រឿងបរិក្ខារទំនើបៗ ផ្តល់នូវផាសុកភាព និងភាពងាយស្រួលដល់អតិថិជនដែលមកទទួលយករថយន្តនៅទីនេះ ដើម្បីទទួលបាននូវបទពិសោធន៍ថ្មី និងសេវាកម្មប្រកបដោយទំនុកចិត្ត ពីក្រុមហ៊ុន អ អិម អេ និងក្រុមហ៊ុន ហ្វដ។”

លោក David Jeffrey នាយកគ្រប់គ្រងប្រចាំតំបន់ទីផ្សារអាស៊ីប៉ាស៊ីហ្វិក និងកូរ៉េខាងត្បូង នៃក្រុមហ៊ុន Ford Motor Company បានមានប្រសាសន៍ថា៖ “ការសម្ពោធជាផ្លូវការនូវទីតាំងប្រគល់រថយន្ត ហ្វដ នេះ គឺជាព្រឹត្តិការណ៍ដ៏សំខាន់មួយរបស់ក្រុមហ៊ុន អ អិម អេ ខេមបូឌា តាមរយៈការបង្តើតនូវស្តង់ដារគុណនៃការប្រគល់រថយន្តលំដាប់អន្តរជាតិដំបូងគេបំផុតសម្រាប់ទីផ្សារប្រទេសកម្ពុជា។ យើងចង់ឱ្យអតិថិជនរបស់យើងមានអារម្មណ៍ថាកក់ក្តៅ និងមានទំនុកចិត្តលើរថយន្តរបស់ពួកគាត់ ជាពិសេសទទួលបានការណែនាំ និងការពន្យល់អំពីរបៀបប្រើប្រាស់មុខងាររថយន្ត បច្ចេកវិទ្យា ក៏ដូចជាប្រព័ន្ធសុវត្ថិភាពផ្សេងៗនៅក្នុងរថយន្តថ្មីរបស់ពួកគាត់ មុនពេលពួកគាត់បើកបររថយន្តនៅលើដងផ្លូវ។”

គួរបញ្ជាក់ផងដែរថា ទីតាំងប្រគល់រថយន្តថ្មីនេះ លាតសន្ធឹងលើផ្ទៃដីទំហំ ៦,៥៧៥ ម៉ែត្រការ៉េ ដែលមានទីតាំងប្រគល់រថយន្តធំ ស្តង់ដារអន្តរជាតិ ចំនួន ១២កន្លែង ដែលមានសមត្ថភាពអាចប្រគល់រថយន្តបានចំនួនច្រើនគ្រឿងក្នុងពេលតែមួយ។ ទីតាំងប្រគល់រថយន្ត ហ្វដ សាខាបឹងបៃតងនេះ គឺមានអាស័យដ្ឋានស្ថិតនៅតាមបណ្តោយវិថីឧកញ៉ាម៉ុងរិទ្ធី (ក្បែរផ្សារបឹងបៃតង) ភូមិត្រពាំងស្វាយ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។ សម្រាប់ព័ត៌មានផ្នែកលក់ សូមទំនាក់ទំនងតាមលេខទួរស័ព្ទ 099 999 747 និងសម្រាប់ផ្នែកសេវាកម្ម សូមទំនាក់ទំនង 078 992 992។

March 16, 2024

ឱកាសគយគន់ «ផ្កាយដុះកន្ទុយបីសាច»! មួយជីវិតអាចបានឃើញតែម្ដងគត់

ផ្កាយដុះកន្ទុយ 12P/Pons-Brooks ដែលមានរហ័សនាមថា «ផ្កាយដុះកន្ទុយបីសាច» បច្ចុប្បន្ន កំពុងហោះឆ្ពោះមកកាន់តែជិតផែនដី។

អ្នកជំនាញឱ្យដឹងថា ដោយសារតែ ផ្កាយដុះកន្ទុយ 12P/Pons-Brooks មានពន្លឺភ្លឺខ្លាំង ដូច្នេះប្រជាជននៅប្រទេសជាច្រើននឹងមានឱកាសបានគយគន់វា។ យោងតាមក្រុមអ្នកវិទ្យាសាស្ត្រ ផ្កាយដុះកន្ទុយ 12P/Pons-Brooks នឹងហោះមកក្បែរព្រះអាទិត្យបំផុតនៅក្នុងថ្ងៃទី 21 មេសា 2024 និងស្ថិតនៅក្បែរផែនដីបំផុតក្នុងថ្ងៃទី 02 មិថុនា 2024។

សម្រាប់មនុស្សស្ទើរគ្រប់រូប នេះនឹងជាឱកាសតែមួយគត់ក្នុងជីវិត ដែលអាចបានឃើញផ្កាយដុះកន្ទុយនេះ ។ ព្រោះថា 71 ឆ្នាំទៀត ទើបវាហោះចូលមកដល់ខាងក្នុងប្រព័ន្ធព្រះអាទិត្យជាថ្មី ដែលព្រឹត្តិការណ៍នេះនឹងកើតឡើងនៅក្នុងខែសីហា ឆ្នាំ 2095។

សម្រាប់អ្នកដែលរស់នៅក្នុងអឌ្ឍគោលខាងជើង ពេលវេលាដែលអាចមើលឃើញ ផ្កាយដុះកន្ទុយ 12P/Pons-Brooks គឺនៅចុងខែមីនា 2024 ហើយវាក៏នឹងមិនបង្កគ្រោះថ្នាក់ដល់ភពផែនដី។ នេះបើតាមទីភ្នាក់ងារអវកាសអាម៉េរិក (ណាសា – NASA)។

ទំព័រ Live Science ឱ្យដឹងថា អ្នកវិទ្យាសាស្ត្រមួយចំនួនព្យាករថា ផ្កាយដុះកន្ទុយ 12P/Pons-Brooks អាចនឹងកញ្ជ្រោលខ្លាំងមួយលើកនៅក្នុងថ្ងៃទី 08 មេសា 2024។ នោះក៏ជាថ្ងៃដែលតំបន់មួយចំនួនលើពិភពលោក បានទស្សនាបាតុភូតសូរ្យគ្រាសពេញលេញផងដែរ។ អ្នកស្រឡាញ់វិស័យតារាសាស្ត្រប្រាកដជានឹងរំភើបចិត្តខ្លាំង នៅចំពោះមុខព្រឹត្តិការណ៍ «ពាន់ឆ្នាំមានម្ដង» មួយនេះ៕

March 15, 2024

Kia សង់រោងចក្រផលិត EV នៅប្រទេសថៃ ដើម្បីប្រជែងនឹង Toyota និង BYD?

ក្រុមហ៊ុន Kia បានកែលម្អស្លាកយីហោ នៅពេលវិស័យឧស្សាហកម្មងាកទៅរករថយន្តអគ្គិសនី ដោយប្រើប្រាស់ឡូហ្គោ និងរចនាបថថ្មី។

ក្រុមហ៊ុនកូរ៉េខាងត្បូងមួយនេះ ក៏កំពុងឈានទៅរកការសម្រេចបានជោគជ័យជាមួយនឹងរថយន្តម៉ូដែល SUV អគ្គិសនីកៅអីបីជួរដំបូងរបស់ខ្លួន នោះគឺ EV9។

Kia បានបង្ហើបឱ្យដឹងអំពីរថយន្តអគ្គិសនីថ្មីនៅក្នុងព្រឹត្តិការណ៍ «ថ្ងៃ EV» កាលពីខែតុលា 2023។ ពួកគេបានបញ្ជាក់ថា SUV EV5 នេះ នឹងជាគូប្រជែងរបស់ Volvo EX30 និងមានតម្លៃចាប់ពី 35,000 ដុល្លារអាម៉េរិក។

ម៉ូដែល concept ថ្មីដែលត្រូវបានបង្ហាញនៅក្នុងព្រឹត្តិការណ៍នេះ គឺ EV3 និង EV4។ EV3 គឺជាម៉ូដែលរថយន្តអគ្គិសនីខ្នាតតូចរបស់ EV9 និងមានតម្លៃទាបជាង។

រថយន្តអគ្គិសនីគឺជាផ្នែកមួយនៃគម្រោងរបស់ Kia ដើម្បីធ្វើពិពិធកម្មរថយន្តអគ្គិសនីជាមួយនឹងតម្លៃទាប ចាប់ពី 30,000 ដល់ 80,000 ដុល្លារ។

Kia អាចនាំរថយន្តអគ្គិសនីដែលមានតម្លៃទាបទៅកាន់ទីផ្សារបរទេស មានដូចជា ថៃ ជាដើម ជាទីផ្សារដែលមានគូប្រជែងច្រើន ក្នុងនោះមាន Toyota ផងដែរ។

ក្រុមប្រឹក្សាវិនិយោគថៃ (BOI) ឱ្យដឹងថា Kia កំពុងពិនិត្យលើការវិនិយោគទៅមកកាន់ប្រទេសនេះ បន្ទាប់មានព័ត៌មានថា ក្រុមហ៊ុននេះបានប្ដូរទិសដៅចេញពីប្រទេសថៃ។

ថៃគឺជាប្រទេសផលិត និងនាំចេញរថយន្តធំបំផុតនៅអាស៊ី។ ប្រទេសនេះកំពុងទាក់ទាញការវិនិយោគក្នុងវិស័យរថយន្តអគ្គិសនី និងមានគោលដៅធ្វើឱ្យរថយន្តអគ្គិសនីគ្របដណ្ដប់ចំណែកទីផ្សារ 30% នៃរថយន្តសរុបដែលផលិតក្នុងស្រុក នៅឆ្នាំ 2030។

មន្ត្រីថៃមួយរូប កាលពីដើមសប្ដាហ៍នេះ ឱ្យដឹងថា Tesla ក៏កំពុងចរចាជាមួយអាជ្ញាធរថៃ អំពីរោងចក្រថ្មីដែលអាចទាក់ទងនឹងការផលិតរថយន្តអគ្គិសនី និងថ្មផ្ទុកថាមពល។

នៅប្រទេសថៃ បើទោះបណ្ដាក្រុមហ៊ុនដូចជា Toyota និង Honda ធ្លាប់បានគ្រប់គ្រងទីផ្សារនេះ ប៉ុន្តែបច្ចុប្បន្ន បណ្ដាក្រុមហ៊ុនផលិតរថយន្តចិន បានសន្យាថា នឹងវិនិយោគជាង 1.44 ពាន់លានដុល្លារអាម៉េរិក ដើម្បីផលិតរថយន្តអគ្គិសនីនៅប្រទេសនេះ៕

March 7, 2024

ផ្កាយមួយដួងនឹងផ្ទុះក្នុងឆ្នាំ 2024 ហើយអាចមើលឃើញដោយភ្នែកទទេ

នៅកណ្ដាលកញ្ចុំផ្កាយ Hercules នឹងមានវត្ថុអវកាសមួយដែលមើលទៅដូចផ្កាយថ្មីទើបបង្ហាញខ្លួននៅលើផ្ទៃមេឃ។

យោងតាម Science Alert ហេតុការណ៍ផ្ទុះផ្កាយជិតនឹងកើតឡើងរបស់ T Coronae Borealis ដែលជាផ្កាយមួយគូ រួមមាន «ផ្កាយខ្មោចឆៅ» មួយដួង និងជនរងគ្រោះរបស់វា នឹងបញ្ចេញពន្លឺរហូតដល់ថ្នាក់មនុស្សនៅលើផែនដីអាចមើលឃើញវាដោយភ្នែកទទេ។

T Coronae Borealis ធ្លាប់បានផ្ទុះម្ដងរួចហើយកាលពីឆ្នាំ 1946។ យោងតាមការគណនារបស់អ្នកវិទ្យាសាស្ត្រនៅអង្គការណាសា ផ្កាយភ្លោះ T Coronae Borealis នឹងត្រូវផ្ទុះម្ដងទៀត នៅចន្លោះពីខែកុម្ភៈ ដល់ខែកញ្ញា ឆ្នាំ 2024។

បច្ចុប្បន្ន វាមិនទាន់ផ្ទុះ ដូច្នេះ អ្នកដែលចូលចិត្តវិស័យតារាសាស្ត្រ អាចទន្ទឹមរង់ចាំមើលព្រឹត្តិការណ៍នេះ ចាប់ពីពេលនេះរហូតដល់ដាច់ខែកញ្ញា។

តាមរយៈភ្នែកទទេ អ្នកនឹងបានឃើញចំណុចដែលភ្លឺមួយដូចទៅនឹងផ្កាយថ្មីមួយដួងទើបរះនៅកណ្ដាលកញ្ចុំផ្កាយ Hercules ជាទីដែលផ្កាយមួយគូខាងលើកំពុងស្ថិតនៅ។ ក្នុងនោះ ពន្លឺរបស់វា ភ្លឺស្មើនឹងផ្កាយ North Star។

T Coronae Borealis គឺជាប្រព័ន្ធផ្កាយមួយដែលបានឈានចូលដល់ដំណាក់កាលស្លាប់។ បច្ចុប្បន្ន វារួមមាន ផ្កាយយក្សក្រហមមួយដួង និងកូនផ្កាយក្រិនពណ៌ស (White Dwarf) មួយដួង។ កូនផ្កាយក្រិនពណ៌សនេះ ដើរតួជាផ្កាយខ្មោចឆៅ ខណៈដែលផ្កាយយក្សក្រហមគឺជាជនរងគ្រោះរបស់វា។

កូនផ្កាយក្រិនពណ៌សនេះ ចេះតែជះកម្លាំងសម្ពាធ ហែកសាច់ផ្កាយយក្សក្រហមជាបន្តបន្ទាប់។ នៅពេលសម្ពាធធំគ្រប់គ្រាន់ ផ្កាយយក្សក្រហមនឹងផ្ទុះទៅតាមវដ្ដមួយនៅក្នុងព្រឹត្តិការណ៍ដែលត្រូវបានហៅថា ហេតុការណ៍ផ្ទុះណូវ៉ា ដោយបញ្ចេញវត្ថុធាតុមួយផ្នែករបស់វាទៅក្នុងបរិយាកាស។

វត្ថុធាតុពីផ្កាយយក្សក្រហមដែលត្រូវបានបំបែកចេញ ក៏ត្រូវបានកូនផ្កាយក្រិនពណ៌ស ស៊ីជាចំណី ក្នុងរយៈពេលខ្លី។ ដូច្នេះ អ្នកអាចតាមដានគយគន់ព្រឹត្តិការណ៍នេះជាច្រើនថ្ងៃផងដែរ។

រហូតដល់ថ្ងៃណាមួយនោះ ផ្កាយយក្សក្រហមនឹងត្រូវផ្កាយក្រិនពណ៌ស ហែកស៊ីវត្ថុធាតុរហូតដល់ឆ្អែត «បែកពោះ»។ ពេលនោះ ផ្កាយមួយគូនេះនឹងត្រូវផ្ទុះដំណាលគ្នា និងខ្លាំងក្លាជាងការផ្ទុះរបស់វានាពេលកន្លង នៅក្នុងព្រឹត្តិការណ៍មួយដែលហៅថា «ហេតុការណ៍ផ្ទុះស៊ុបពើណូវ៉ា»។

ផ្កាយយក្សក្រហមគឺជាបណ្ដាផ្កាយដែលកំពុងស្ថិតក្នុងដំណាក់កាល «ដង្ហើមចង្រិត» ពេលដែលជិតអស់ថាមពល។ ព្រះអាទិត្យរបស់មនុស្ស នៅសល់ 5 ពាន់លានឆ្នាំទៀត ក៏នឹងក្លាយជាផ្កាយយក្សក្រហម។

ក្រោយការផ្ទុះណូវ៉ា និងការផ្ទុះស៊ុបពើណូវ៉ា អ្វីដែលនៅសេសសល់ នឹងប្រមូលផ្ដុំគ្នា ក្លាយជាកូនផ្កាយក្រិនពណ៌ស ដែលមានទំហំប្រហាក់ប្រហែលនឹងភពផែនដី ប៉ុន្តែមានផ្ទុកថាមពលមហិមា។

តាមការគណនា ក្រោយរយៈពេលប្រហែល 10 ពាន់លានឆ្នាំទៀត ពោលគឺប្រហែល 5 ពាន់លានឆ្នាំដែលបានក្លាយជាផ្កាយយក្សក្រហម ព្រះអាទិត្យរបស់មនុស្សនឹងក្លាយទៅជាកូនផ្កាយក្រិនពណ៌ស៕

March 4, 2024

ក្រុមហ៊ុនទូរស័ព្ទចិន បង្ហាញរថយន្តអគ្គិសនី SU7 EV រត់បានឆ្ងាយជាងរាល់រថយន្តអគ្គិសនីបច្ចុប្បន្ន

ក្រុមហ៊ុនចិន Xiaomi បានធ្វើឱ្យមានចំណាប់អារម្មណ៍ខ្លាំងនៅក្នុងព្រឹត្តិការណ៍ Mobile World Congress នៅ Barcelona គ្រាដែលតាំងបង្ហាញ SU7 ដែលជារថយន្តអគ្គិសនីដំបូងរបស់ខ្លួន។ នេះគឺជាលើកដំបូងហើយដែល SU7 ត្រូវបានបង្ហាញដោយផ្ទាល់ បន្ទាប់ពីត្រូវបានប្រកាសព័ត៌មានជាលើកដំបូងនៅប្រទេសចិន កាលពីចុងឆ្នាំមុន។

SU7 គឺជាម៉ូដែលសេដានកីឡា ដែលមានពណ៌ខៀវខ្ចីដ៏ទាក់ទាញ។ រថយន្តនេះបើប្រាស់ម៉ូទ័រអគ្គិសនីរបស់ Xiaomi និងអាចបង្កើនល្បឿនពី 0 ទៅ 100 គីឡូម៉ែត្រ/ម៉ោង ដោយប្រើពេលតែ 2.78 វិនាទី។

Xiaomi SU7 នឹងបំពាក់ថ្មផ្ទុកថាមពល 101 kWh ដែលអាចធ្វើដំណើរបានជាង 800 គីឡូម៉ែត្រ ឆ្ងាយជាងច្រើនបើធៀបនឹងបណ្ដារថយន្តអគ្គិសនីនាបច្ចុប្បន្ន។ រថយន្តនេះក៏មានបំពាក់មុខងារបញ្ចូលថាមពលលឿន ដែលអាចធ្វើដំណើរបាន 500 គីឡូម៉ែត្រ ក្រោយពីសាកថ្មបាន 15 នាទី។

អំពីបច្ចេកវិទ្យាវិញ SU7 ត្រូវបានបំពាក់ប្រព័ន្ធអង្គញាណដែលអនុញ្ញាតឱ្យវាបើកបរដោយស្វ័យប្រវត្ត រួមនឹងអេក្រង់កម្សាន្ត 16 អ៊ិញ និងអេក្រង់បង្ហាញព័ត៌មានសម្រាប់អ្នកបើកបរ ក៏ដូចជាប្រព័ន្ធបញ្ជាដែលអាចបង្វិលបានផងដែរ។

យោងតាម Absolute Geeks បើទោះ Xiaomi មិនទាន់បង្ហើបឱ្យដឹងអំពីតម្លៃ ឬថ្ងៃដាក់លក់ជាផ្លូវការ ប៉ុន្តែពួកគេកំពុងឆ្ពោះទៅរកគោលដៅក្លាយជាអ្នកផលិតរថយន្តនៅក្នុង top 5 របស់ពិភពលោក។ ប្រការនេះមានន័យថា Xiaomi SU7 អាចត្រូវបាននាំចេញទៅលក់ក្នុងទីផ្សារបរទេស បើទោះតម្លៃរបស់វាទំនងជាខ្ពស់៕

February 27, 2024

ព្រឹត្តិការណ៍ពិសេសៗពីការសម្ពោធជាផ្លូវការនូវស្មាតហ្វូន OPPO Reno11 Series 5G

កម្មវិធីសម្ពោធស្មាតហ្វូនស៊េរីថ្មី OPPO Reno11 Series 5G បានសម្ពោធជាផ្លូវការហើយ ជាមួយនឹងបរិយាកាសដ៏អធិកអធម ក្រោមការយាងចូលរួមពីភ្ញៀវកិត្តិយសពិសេស ព្រះនាងតូច ជេនណា ជាមួយនឹងវត្តមានទូតសុច្ឆន្ទៈប្រចាំក្រុមហ៊ុន OPPO ទាំង 3 រូបគឺ ពេជ្រ វត្តីសារ៉ាវឌ្ឍី, ថេណា និងរ៉េត ស៊ូហ្សាណា ព្រមទាំងតារាប្រុសស្រីល្បីៗជាច្រើនរូប ដែលបានអញ្ជើញចូលរួមនៅក្នុងកម្មវិធីនេះ។

OPPO បានដាក់បង្ហាញស្មាតហ្វូន OPPO Reno11 Series 5G ជំនាន់ថ្មីរបស់ខ្លួនរហូតទៅដល់ 3 ម៉ូដែល ដែលរួមមាន Reno11 5G, Reno11 F និង Reno11 Pro 5G ទាំងការឌីហ្សាញ ប្រព័ន្ធកាមេរ៉ា កម្លាំងម៉ាស៊ីន និងបច្ចេកវិទ្យា AI គឺសុទ្ធសឹងតែជាបច្ចេកវិទ្យាចុងក្រោយ។

សម្រាប់ការរចនាឌីហ្សាញដ៏ថ្មីស្រឡាងដែលមិនធ្លាប់មានពីមុនមក បានបំផុសគំនិតពីធម្មជាតិពិតៗ ដែលផ្តល់ជូននូវភាពស្រស់ស្រាយរាល់ពេលដែលយើងសម្លឹងមើល។ រីឯ គុណភាពប្រព័ន្ធកាមេរ៉ាថតរូប Portrait បានអាប់ដេតកាន់តែប្រសើរជាងមុន ដែលធ្វើឲ្យអ្នកទទួលបានរូបភាពហាក់ដូចជាថតរូបក្នុងស្ទីឌីយោ ទាំងគុណភាព ការចាប់ប្លង់ និងពន្លឺនោះទេ។ បន្ថែមពីនេះជាមួយមុខងារ 2x optical zoom អាចទាញផ្ទៃខាងក្រោយមកកាន់តែកៀករូបមនុស្ស និងធ្វើឲ្យព្រាលផ្ទៃខាងក្រោយ ធ្វើឲ្យរូបភាព Portrait កាន់តែលេចធ្លោ និងនៅតែអាចរក្សាទម្រង់មុខមនុស្សបានស្អាតធម្មជាតិ មិនធ្វើឲ្យខូចទ្រង់ទ្រាយនោះទេ។ លើសពីនេះ OPPO Reno11 Series 5G ទាំងនៅលើកាមេរ៉ាមុខ និងក្រោយអាចថតវីដេអូបានកម្រិត 4K ។ ចំពោះអេក្រង់វិញ OPPO Reno11 Series 5G បំពាក់ជាមួយអេក្រង់ប្រភេទ 3D គាំទ្រដោយកញ្ចក់ AMOLED Display មានគែមកោង និងមានទំហំ 6.7Inch ព្រមទាំងមានសមត្ថភាពខ្ពស់អាចបង្ហាញរូបភាព និងវីដេអូចេញបានក្នុងកម្រិត FHD+ ថែមទៀតផង។ ចំណែកថាមពលថ្មវិញ Reno11 និង Reno11 F មានកម្លាំង 5000mAh និងគាំទ្របច្ចេកវិទ្យា 67W SUPERVOOC ដោយឡែក Reno11 Pro មានកម្លាំងថ្ម 4600mAh និងគាំទ្របច្ចេកវិទ្យា 80W SUPERVOOC ។

ក្រៅពីនេះ OPPO ក៏មានសម្ពោធប្រព័ន្ធប្រតិបត្តិការថ្មី ColorOS 14 ដែលមានមុខងារពិសេសៗជាច្រើនដូចជា Smart Image Matting, File Dock, Smart Touch និងមុខងារ LinkBoost ។ លើសពីនេះទៅទៀត ក៏មានការប្រកាសផលិតផល IOT ដូចជា OPPO Pad Neo, OPPO Watch X និងកាសឥតខ្សែ OPPO Enco Bud2 ពណ៌ថ្មីផងដែរ។

សម្រាប់ថេប្លេតជំនាន់ថ្មី OPPO Pad Neo រចនាមកជាមួយអេក្រង់ ReadFit កម្រិត 2.4K ទំហំ 14” និងអាចប្រើប្រាស់ស៊ីមកាតដោយគាំទ្រសេវា 4G LTE និង Wifi ជាមួយថាមពលថ្មធំ 8000mAh ដែលមានបច្ចេកវិទ្យាសាកថ្មរហ័ស 33W SUPERVOOC ព្រមទាំង RAM 16GB ((8+8GB) និង ROM 128GB ផ្តល់ជូនលោកអ្នកនូវភាពរីករាយគ្មានដែនកំណត់គ្រប់ទីកន្លែង។
សម្រាប់ OPPO Enco Buds2 ជាកាសឥតខ្សែជំនាន់ថ្មីនឹងផ្តល់ឲ្យអ្នកនូវបទពិសោធសំឡេងដ៏អស្ចារ្យឥតដែនកំណត់ និងអាចឲ្យអ្នកប៉ះបញ្ជាផ្ទាល់លើកាស រាល់ពេលចង់ផ្លាស់ប្តូរបទចម្រៀង បន្ថយឬបន្ថែមសំឡេង និងទទួលការហៅចូលបានយ៉ាងងាយស្រួលដោយមិនចាំបាច់ចុចផ្ទាល់លើទូរស័ព្ទ។
សម្រាប់ OPPO Watch X នាឡិកាវៃឆ្លាតជំនាន់ថ្មី ដែលមានរចនាបថរូបរាងកាលីបស្រស់ស្អាត ទាន់សម័យ កម្រាស់ស្តើង ស័ក្កសមជាមួយជីវិតប្រចាំថ្ងៃ ដោយភ្ជាប់មកនូវមុខងារប្រើប្រាស់ទំនើបៗជាច្រើន។

តោះ! កក់ទុកមុនចាប់ពីថ្ងៃនេះរហូតដល់ថ្ងៃទី02 មីនា 2024 លើស្មាតហ្វូនស៊េរីថ្មី OPPO Reno11 Series 5G ទាំង 3 ម៉ូដែល Reno11 Pro 5G $599 | Reno11 5G $449 | Reno11 F 5G $339 នឹងទទួលបានកាដូរួមមានដូចជា ៖

រាល់ការកក់ទុកមុន Reno11 Pro 5G | Reno11 5G ថែមជូន ៖
បណ្ណប្តូរអេក្រង់ 1ឆ្នាំ តម្លៃ $89
កាតាបស្ពាយដ៏ស្រស់ស្អាត តម្លៃ $39
ស៊ីមស្មាតលេខពិសេស Bronze តម្លៃ $54
រាល់ការកក់ទុកមុន Reno11 F 5G ថែមជូន ៖
បណ្ណប្តូរអេក្រង់ 1ឆ្នាំ តម្លៃ $69
កាតាបស្ពាយដ៏ស្រស់ស្អាត តម្លៃ $39
ស៊ីមស្មាតលេខពិសេស Bronze តម្លៃ $54

សម្រាប់ផលិតផល IoT រួមមាន OPPO Pad Neo តម្លៃ $299 | OPPO Watch X | OPPO Enco Buds2 អាចរកទិញបានចាប់ពីថ្ងៃទី03 ខែមីនា 2024 នេះតទៅ៕

February 24, 2024

យានអវកាសឯកជនអាម៉េរិក ចុះចតដោយជោគជ័យលើឋានព្រះចន្ទ

យាន Odysseus របស់ក្រុមហ៊ុន Intuitive Machines ត្រូវបានចារក្នុងប្រវត្តិសាស្ត្របន្ទាប់ពីបានក្លាយជាយានអវកាសឯកជនដំបូងគេដែលបានទទួលជោគជ័យក្នុងការចុះចតលើផ្ទៃព្រះចន្ទ កាលពីវេលាទៀបភ្លឺថ្ងៃទី 23 កុម្ភៈ ឆ្នាំ 2024 ម៉ោងនៅកម្ពុជា។

នេះគឺជាព្រឹត្តិការណ៍ដ៏អស្ចារ្យនៅក្នុងការស្រាវជ្រាវទីអវកាស។ កន្លងមកពុំដែលមានយានអវកាសឯកជនណាមួយធ្លាប់បានទទួលជោគជ័យក្នុងការចុះចតលើផ្ទៃព្រះចន្ទ និងមិនទាន់មានយានអវកាសណាមួយរបស់អាម៉េរិក ចុះចតលើផ្ទៃឋានរណបនេះនៅឡើយ រាប់ចាប់ពីក្រោយការចុះចតរបស់យានមានមនុស្ស Apollo 17 កាលពីខែធ្នូ ឆ្នាំ 1972។

ទីភ្នាក់ងារអវកាសអាម៉េរិក (ណាសា) មានផែនការកសាងមូលដ្ឋានមានមនុស្សសម្រាប់កម្មវិធី Artemis នៅតំបន់ប៉ូលខាងត្បូងរបស់ព្រះចន្ទ ជាទីដែលត្រូវបានគេជឿថា មានផ្ទុកទឹកកកយ៉ាងច្រើន។ ក៏ប៉ុន្តែ មុននឹងនាំមនុស្សឡើងទៅកាន់ទីនោះ ណាសាចង់ប្រមូលទិន្នន័យបន្ថែមទៀត ទាក់ទងនឹងតំបន់ដែលមិនសូវមានការស្រាវជ្រាវច្រើនមួយនេះ ក្នុងនោះរួមមានទាំងប្រភពទឹកជាដើម។

ដើម្បីឆ្លើយតបនឹងតម្រូវការខាងលើ ណាសាក៏បានបង្កើតកម្មវិធីដោយឡែកមួយដែលមានឈ្មោះថា CLPS (Commercial Lunar Payload Services) អនុញ្ញាតឱ្យបណ្ដាក្រុមហ៊ុនអាម៉េរិក អភិវឌ្ឍយានចុះចតលើផ្ទៃព្រះចន្ទបែបស្វ័យប្រវត្តិ ដើម្បីដឹកឧបករណ៍វិទ្យាសាស្ត្រ ហើយយាន Odysseus របស់ក្រុមហ៊ុន Intuitive Machines ក៏ស្ថិតក្នុងកម្មវិធីនេះផងដែរ៕

February 23, 2024

យន្តហោះអវកាសអាម៉េរិកលេចមុខមុនជើងហោះហើរដំបូង

យន្តហោះអវកាស Dream Chaser ដែលអាចប្រើប្រាស់ឡើងវិញបានច្រើនដង និងអាចផ្ទុកទំនិញបាន 5,215 គីឡូក្រាម ត្រូវបានបង្ហាញនៅមុនបេសកកម្មហោះទៅកាន់ស្ថានីយអវកាសអន្តរជាតិ (ISS) ជាលើកដំបូង នៅចុងឆ្នាំនេះ។

ទីភ្នាក់ងារអវកាសអាម៉េរិក (ណាសា) និងក្រុមហ៊ុន Sierra Space នៅ Colorado កាលពីថ្ងៃទី 01 កុម្ភៈ 2024 បានអញ្ជើញក្រុមអ្នកយកព័ត៌មានទៅទស្សនា Dream Chaser ដោយផ្ទាល់។ នេះបើតាមទំព័រសារព័ត៌មាន Space។

ព្រឹត្តិការណ៍នេះកើតឡើងនៅក្នុងមូលដ្ឋានធ្វើតេស្ត Neil Armstrong របស់ណាសា នៅ Sandusky។ យន្តហោះអវកាស Dream Chaser និងម៉ូឌុលដឹកទំនិញដែលមានរហ័សនាមថា «Tenacity» និង «Shooting Star» ត្រូវបានដំឡើងបញ្ឈរត្រង់ដូចពេលត្រៀមបាញ់បង្ហោះ។ យានមួយគូនេះមានកម្ពស់ 16.8 ម៉ែត្រ ដែលប្រហាក់ប្រហែលនឹងរថយន្តដឹកសិស្សសាលាខ្នាតធំ។

ជើងហោះហើរដំបូងរបស់ Tenacity នឹងដឹកទំនិញរបស់ណាសា ឡើងទៅកាន់ ISS។ ក៏ប៉ុន្តែ មុនពេលហោះហើរជើងដំបូង Tenacity និង Shooting Star នឹងត្រូវឆ្លងកាត់ការធ្វើតេស្តជាច្រើនទៀតនៅ Sandusky។

តាមផែនការ Shooting Star នឹងឆេះខ្ទេចនៅក្នុងបរិយាកាសផែនដី បន្ទាប់ពីបានបំពេញភារកិច្ចតែមួយលើកគត់។ ចំណែក Tenacity នឹងចុះចតលើផែនដី ហើយត្រៀមសម្រាប់បេសកកម្មបន្ទាប់។ យន្តហោះអវកាស Tenacity ត្រូវបានអភិវឌ្ឍឡើងដើម្បីអាចហោះហើរបាន 15 ជើង។ យាននេះនឹងដឹកទំនិញជាង 3,540 គីឡូក្រាម នៅក្នុងជើងហោះហើរដំបូង បើទោះជាវាអាចដឹកបានរហូតដល់ 5,215 គីឡូក្រាម។ សំរាមជាង 3,950 គីឡូក្រាម អាចនឹងត្រូវបានទម្លាក់ចោលពីម៉ូឌុលដឹកទំនិញរបស់វា នៅក្នុងពេលហោះត្រឡប់មកកាន់ផែនដី។

តាមគម្រោង Tenacity និង Shooting Star នឹងត្រូវបានបាញ់បង្ហោះនៅពាក់កណ្ដាលដើមឆ្នាំនេះ។ ក្រោយពីបេសកកម្មនេះបានបញ្ចប់ សំណើសុំអាជ្ញាបណ្ណសម្រាប់ប្រព័ន្ធដឹកជញ្ជូននេះក៏នឹងត្រូវបានធ្វើឡើងផងដែរ៕

February 5, 2024

Tag: ព្រឹត្តិការណ៍