ពិភពលោក - La Reine Media

អត្រាអ្នកប្រើប្រាស់បញ្ញាសិប្បនិម្មិត ChatGPT ថយចុះគួរឱ្យកត់សម្គាល់

យោងតាមការស្រាវជ្រាវរបស់ Morgan Stanley បណ្ដា chatbot AI ដូចជា ChatGPT ឬ Google Bard ជាដើម កំពុងតែមានអត្រាអ្នកប្រើប្រាស់ទាបគួរឱ្យភ្ញាក់ផ្អើល។

ចាប់តាំងពីខែធ្នូ 2022 ChatGPT បានបង្ក «ព្យុះភ្លៀង» ទូទាំងសកលលោក ដោយមានអ្នកប្រើប្រាស់ជាងមួយលាននាក់ចុះឈ្មោះបន្ទាប់ពីបង្ហាញវត្តមានបានមួយសប្ដាហ៍ និងឡើងលើសពី 100 លាននាក់ក្រោយរយៈពេលពីរខែ ធ្វើឱ្យមានការរត់ប្រណាំងផ្នែក AI (បញ្ញាសិប្បនិម្មិត) ទូទាំងពិភពលោក។

ក៏ប៉ុន្តែ ការរំជើបរំជួលខាងលើបានកន្លងផុតយ៉ាងលឿននៅពេលអ្នកប្រើប្រាស់ជាក់ស្ដែងបច្ចុប្បន្នមានកម្រិតទាប។ យោងតាមការស្រាវជ្រាវរបស់ស្ថាប័នវិនិយោគផ្នែកធនាគារ Morgan Stanley ដែលបានធ្វើឡើងទៅលើមនុស្ស 2,000 នាក់នៅក្នុងខែមេសា បង្ហាញថា មានតែ 19% ក្នុងចំណោមអ្នកដែលត្រូវបានសួរ ឱ្យដឹងថា ធ្លាប់បានប្រើប្រាស់ ChatGPT ខណៈដែល Google Bard វិញ គឺ 9%។

ចំណែកមនុស្សភាគច្រើនដែលមិនទាន់បានប្រើ chatbot និយាយថា នឹងមិនមានតម្រូវការប្រើប្រាស់បច្ចេកវិទ្យាថ្មីនេះ យ៉ាងតិចក៏ត្រឹមពាក់កណ្ដាលឆ្នាំទៀត។

ភាគច្រើន អ្នកប្រើប្រាស់ ChatGPT គឺដើម្បីស្វែងយល់ប្រធានបទថ្មីៗ ដូច្នេះការដែលថាឧបករណ៍នេះអាចរកប្រាក់ចំណូលបានគឺពិបាកកើតឡើងនាបច្ចុប្បន្ន។ Chatbot AI អាចរកប្រាក់បានតាមរយៈការផ្សាយពាណិជ្ជកម្ម លុះណាតែអ្នកប្រើប្រាស់អាចចូលទៅប្រើ ChatGPT , Google Bard ជាដើម ដើម្បីស្វែងរកផលិតផល សេវាកម្ម ការប្រៀបធៀបតម្លៃ និងទិញទំនិញ។

បញ្ញាសិប្បន្មិតអាចជួយឱ្យបណ្ដាថ្នាលពាណិជ្ជកម្មឌីជីថល និងទេសចរណ៍រកប្រាក់ចំណូលបានពីការលើកជាការណែនាំ និងជំនួយរបស់បច្ចេកវិទ្យា chatbot។ បច្ចុប្បន្ន នៅពេលទិញទំនិញតាមអនឡាញ អ្នកប្រើប្រាស់រហូតដល់ 56% ស្វែងយល់ផលិតផលតាមរយៈ Google Search បន្ទាប់មកគឺ YouTube និង Bard។ ចំពោះសេវាកម្មទេសចរណ៍វិញ អ្នកប្រើប្រាស់ 37% ចូលទៅកាន់ Google និង 33% ចូលទៅកាន់បណ្ដាគេហទំព័រដែលជំនាញខាងទេសចរណ៍។

Morgan Stanley ឱ្យដឹងថា Google នៅតែអាចមានប្រៀបជាងគេនៅក្នុង «សង្គ្រាម» AI នៅពេលផ្ដល់សេវាកម្មស្វែងរកបែបបុគ្គល និងពេញលេញចំពោះវិស័យទេសចរណ៍ តាមរយៈការប្រើប្រាស់លទ្ធផលនៃការស្វែងរកដែលបានលើកឡើងដោយបញ្ញាសិប្បនិម្មិតដូចជា Bard នេះ៕

June 9, 2023

M10 នឹងក្លាយជាម្ចាស់មួយរូបរបស់ក្លឹប Inter Miami នៅសហរដ្ឋអាម៉េរិក?

Lionel Messi ថ្មីៗនេះបានប្រកាសជាផ្លូវការអំពីក្លឹបបាល់ទាត់ដែលគាត់នឹងចូលជាសមាជិកនៅក្នុងរដូវកាលថ្មី នោះគឺក្លឹប Inter Miami ដែលប្រកួតនៅឯពានរង្វាន់អាជីពអាម៉េរិក MLS។

ប្រភពព័ត៌មានជាក់លាក់របស់ទំព័រ The Ahtletic បានប្រាប់ថា កិច្ចព្រមព្រៀងថ្មីរបស់ Messi ក៏មានទាំងលក្ខខណ្ឌទិញភាគហ៊ុនមួយចំនួនរបស់ក្លឹប Inter Miami ផងដែរ ដែលនេះមានន័យថា M10 គឺជាកីឡាករផង និងជាម្ចាស់ផង។

ចំណែកទំព័រ ESPN វិញ បានរាយការណ៍ថា រាល់កិច្ចព្រមព្រៀងស្ដីពីសិទ្ធិផ្សាយផ្ទាល់តាមទូរទស្សន៍ រូបភាព និងសម្លៀកបំពាក់ដែលជាការឧបត្ថម្ភរបស់ Apple និង Adidas គឺសុទ្ធតែក្លាយជាយីហោដែលត្រូវចុះហត្ថលេខាជាមួយកីឡាករ ពោលគឺមិនមែនគ្រាន់តែទាក់ទិននឹងគណៈកម្មការរៀបចំតែមួយដូចបច្ចុប្បន្នឡើយ។ នេះគឺដូចទៅនឹងវិធីដែលអឺរ៉ុប និងបណ្ដាតំបន់ដទៃកំពុងធ្វើ ក្នុងបំណងធ្វើឱ្យមានតុល្យភាពផ្នែកហិរញ្ញវត្ថុរវាងក្លឹបនឹងក្លឹប ក្នុងបំណងរក្សាភាពស្អាតស្អំក្នុងវិស័យបាល់ទាត់ ហើយការប្រកួតប្រជែងនឹងកើនឡើង ទំហំនៃការប្រកួតក៏ធំឡើងជាលំដាប់។

ជាងនេះ វត្តមានរបស់ Messi នៅឯពានរង្វាន់ MLS ក៏ជា «ដែកឆក់» ដ៏ធំ ដើម្បីឱ្យ MLS អាចស្រូបទាញកីឡាករលំដាប់កំពូលៗរបស់ពិភពលោកបន្ថែមទៀត។

ទន្ទឹមនឹងនេះ World Cup 2026 នឹងត្រូវបានធ្វើឡើងនៅសហរដ្ឋអាម៉េរិក ដូច្នេះ វត្តមានរបស់ Messi នឹងរួមចំណែកយ៉ាងសំខាន់នៅក្នុងការចាប់ផ្ដើមកម្ដៅទីផ្សារនៅទីនោះ ហើយវាគឺជារឿងសមហេតុផល។ Messi មិនមែនជាអ្នកបើកផ្លូវ ប៉ុន្តែជាអ្នកនាំផ្លូវដ៏អស្ចារ្យសម្រាប់ទីផ្សារបាល់ទាត់នៅសហរដ្ឋអាម៉េរិក បន្ទាប់ពី David Beckham និង Zlatan Ibrahimovic៕

June 8, 2023

ផ្ទាំងទឹកកកធំជាងគេបង្អស់លើពិភពលោកបែកបាក់រលាយខ្ទេចខ្ទី

រូបភាពពីផ្កាយរណបរបស់ណាសា កាលពីចុងខែឧសភាបានបង្ហាញថា A-76A ដែលជាផ្ទាំងទឹកកកធំជាងទីក្រុង Los Angeles ពីរដង បានបែកបាក់ខ្ទេចខ្ទីនៅក្បែរកោះ Georgia ខាងត្បូង របស់ចក្រភពអង់គ្លេស។

A-76A គឺជាផ្ទាំងធំជាងគេដែលនៅសល់របស់ A-76 ដែលជាផ្ទាំងទឹកកកមានទំហំប្រហែល 4,320 គីឡូម៉ែត្រការ៉េ និងមានបណ្ដោយ 170 គីឡូម៉ែត្រ ទទឹង 25 គូឡូម៉ែត្រ ដែលបានបែកចេញពីខឿននៃផ្ទាំងទឹកកក Ronne របស់ទ្វីបអង់តាកតិច កាលពីខែឧសភា 2021។

កាលពីថ្ងៃទី 24 ឧសភា 2023 ផ្កាយរណប Terra របស់ណាសាថតរូបភាពថ្មីបំផុតអំពីបំណែកទាំង 6 របស់ A-76A ដែលកំពុងអណ្ដែតចេញឆ្ងាយពីគ្នានៅក្បែរកោះ Georgia ខាងត្បូង ក្នុងសមុទ្រ Scotia ដែលនេះមានន័យថា ផ្ទាំងទឹកកកខ្នាតយក្សនេះបានបែកពីគ្នាកាលពីច្រើនថ្ងៃមុនមកហើយ។ បំណែកផ្ទាំងទឹកកកទាំងនេះមានចម្ងាយប្រហែល 2,415 គីឡូម៉ែត្រពីកន្លែងដែល A-76 បានបែកចេញពីទ្វីបអង់តាកតិចកាលពីឆ្នាំ 2021។

ផ្ទាំងទឹកកកអណ្ដែតធំជាងគេលើពិភពលោកនាពេលកន្លង គឺ A-68A ក៏បានបែកបាក់ខ្ទេចខ្ទីនៅក្បែរកោះ Georgia ខាងត្បូង កាលពីខែធ្នូ 2020 ក្រោយពីបានអណ្ដែតតាមឆកសមុទ្រ Drake។ A-76A មិនប៉ះទង្គិចផ្ទាល់ជាមួយនឹង Georgia ខាងត្បូង ប៉ុន្តែនៅតែអាចបង្កផលប៉ះពាល់ដល់ប្រព័ន្ធជីវចម្រុះក្នុងសមុទ្រនៅក្បែរនោះ។

កាលពីពាក់កណ្ដាលឆ្នាំ 2021 នៅពេល A-68A បានរលាយទាំងស្រុង ក្រុមអ្នកវិទ្យាសាស្ត្រគណនាឃើញថា វាបានបន្ថែមទឹកសាបប្រហែល 900 លានតោនចូលក្នុងសមុទ្រ ដែលភាគច្រើននៅតំបន់ក្បែរកោះ Georgia ខាងត្បូង។ ចំណែក A-76A វិញ ក៏នឹងបន្ថែមទឹកសាបយ៉ាងច្រើនទៅក្នុងតំបន់សមុទ្រក្បែរខាង និងប៉ះពាល់ដល់ប្រព័ន្ធអាហារនៅក្នុងសមុទ្រ បើសិនជាវាបានរលាយអស់។ នេះបើយោងតាមការចុះផ្សាយរបស់ទំព័រ Live Science ៕

June 8, 2023

ថាសហោះ (UFO) អគ្គិសនីនេះ អាចហើរក្នុងល្បឿន 50 គីឡូម៉ែត្រ/ម៉ោង

(ប្រទេសចិន) – ក្រុមអ្នកវិទ្យាសាស្ត្រមកពីសាកលវិទ្យាល័យពហុបច្ចេកទេសតំបន់ភាគពាយព្យ បង្កើតបានយានដែលមានរូបរាងដូចថាសហោះ អាចហើរបាន 15 នាទី និងមានល្បឿន 50 គីឡូម៉ែត្រ/ម៉ោង។

យានហោះឡើង ចុះចតដោយបញ្ឈរត្រង់ និងប្រើប្រាស់អគ្គិសនី (eVTOL) អាចជាបដិវត្តន៍ក្នុងវិស័យគមនាគមន៍ស្ថិរភាព និងមិនបំភាយឧស្ម័នពុលរបស់ពិភពលោក។ គម្រោង eVTOL រាងដូចថាសហោះ (UFO) គឺជាលទ្ធផលនៃការអភិវឌ្ឍរយៈពេលបីឆ្នាំរបស់ក្រុមអ្នកជំនាញនៅសាកលវិទ្យាល័យពហុបច្ចេកទេសតំបន់ពាយព្យ (Northwestern Polytechnical University) នៅប្រទេសចិន។

យាន eVTOL គំរូរបស់ក្រុមអ្នកស្រាវជ្រាវខាងលើ សម្រេចបានជើងហោះហើរសាកល្បងដំបូងនៅក្នុងព្រឹត្តិការណ៍ពិព័រណ៍មួយនៅខេត្ត Shenzhen ភាគអាគ្នេយ៍ប្រទេសចិន។ នេះបើតាមការចុះផ្សាយកាលពីថ្ងៃទី 07 មិថុនា របស់ទំព័រ Interesting Engineering។

យានដូចទៅនឹង UFO ដែលត្រូវបានផលិតឡើងដោយក្រុមហ៊ុនបច្ចេកវិទ្យាថាសហោះ Shenzhen UFO Power Technology អាចហោះហើរបាន 15 នាទី ឡើងដល់កម្ពស់ 200 ម៉ែត្រ និងល្បឿន 50 គីឡូម៉ែត្រ/ម៉ោង ព្រមទាំងបំពាក់មុខងារហោះហើរស្វ័យប្រវត្តផងដែរ។

June 8, 2023

ក្រោយសម្រេចជ្រើសយកក្លឹប Inter Miami កំពូលតារាបាល់ទាត់អាហ្សង់ទីន បង្ហើបពីការពិតស្ដីពី PSG

ក្រោយពីបានបញ្ជាក់ថានឹងទៅលេងឱ្យក្លឹបអាម៉េរិក Inter Miami តារាបាល់ទាត់ពិភពលោក Lionel Messi ក៏បានទទួលស្គាល់ថា ខ្លួនមិនទទួលបានសុភមង្គលក្នុងរង្វង់ពីរឆ្នាំដែលលេងឱ្យ Paris Saint-Germain។

Messi ចាកចេញពី PSG ក្នុងនាមជាកីឡាករសេរីក្នុងស្ថានភាពភាគីទាំងពីរសុទ្ធតែមិនចង់បន្តកិច្ចព្រមព្រៀងជាមួយគ្នា ក្រោយរយៈពេលពីរឆ្នាំកន្លងទៅ។ ពេលវេលានៅជាមួយគ្នារវាង M10 និង PSG បានបញ្ចប់ក្នុងរយៈពេលពីរម៉ោង នៅពេល Messi ត្រូវបាន «ព្យួរជើងក្នុងក្រុម» ព្រោះតែបានធ្វើដំណើរចាកចេញពីប្រទេសបារាំងដោយមិនមានការអនុញ្ញាតពីក្លឹប។ ចាប់ពីពេលនោះមក Messi បានយល់ព្រមទៅលេងឱ្យក្លឹបអាម៉េរិក Inter Miami បើទោះចិត្តចង់ទាត់ឱ្យ Barcelona នៅអេស្ប៉ាញ។

«ពីរឆ្នាំកន្លងនៅ PSG គឺជាពេលវេលាដែលខ្ញុំមានអារម្មណ៍ថា មិនមានសុភមង្គល។ ខ្ញុំមិនអាចទទួលបានជីវភាពជារបស់ខ្លួនឯង។ ហើយបញ្ហានេះបានប៉ះពាល់ដល់ការរស់នៅរបស់គ្រួសារខ្ញុំ។ ពីរឆ្នាំកន្លង ខ្ញុំពិតជាបានបាត់បង់ពេលវេលាជាច្រើនដែលអាចនៅជាមួយកូនៗ…» Messi បានថ្លែងដូច្នេះ នៅក្នុងកិច្ចសម្ភាសជាមួយបណ្ដាញសារព័ត៌មានអេស្ប៉ាញ និងត្រូវបានចុះផ្សាយដោយទំព័រ Mundo Deportivo និង Sport កាលពីពេលថ្មីៗនេះ។

Messi និង PSG ទំនងជាពិបាករក្សាទំនាក់ទំនងល្អនឹងគ្នា បន្ទាប់ពី M10 ចាកចេញ និងក្រោយពីកិច្ចសម្ភាសខាងលើ។ ចំណែកអ្នកគាំទ្ររបស់ Barcelona វិញក៏កំពុងអន់ចិត្តព្រោះតែស្ថានភាពហិរញ្ញវត្ថុរបស់ក្លឹបនេះមិនអនុញ្ញាតឱ្យនាំយក Messi មកចូលជាសមាជិកជាថ្មី។

រឿងរ៉ាវម្ចាស់ជើងឯក World Cup 2022 សម្រេចចិត្តទាត់ឱ្យក្លឹប Inter Miami ត្រូវបានបញ្ជាក់រួចហើយ។ បើតាមគម្រោង M10 នឹងទៅចូលរួមជាមួយក្រុមនេះចាប់ពីខែកក្កដាខាងមុខ៕

June 8, 2023

បច្ចេកវិទ្យានៅពីក្រោយរថភ្លើងពាណិជ្ជកម្មល្បឿនលឿនជាងគេលើលោក

ប្រព័ន្ធបណ្ដែតអេឡិចត្រូម៉ាញ៉េទិចជួយឱ្យរថភ្លើងអណ្ដែតសៀងហៃ (Shanghai Maglev train or Shanghai Transrapid) បំបាត់ចោលភាពកកិត និងមានល្បឿនឡើងដល់ 480 គីឡូម៉ែត្រ/ម៉ោង លឿនជាងគេបង្អស់ក្នុងចំណោមរថភ្លើងពាណិជ្ជកម្មនាបច្ចុប្បន្ន។

ដោយមានល្បឿនធម្មតាប្រហែល 435 គីឡូម៉ែត្រ/ម៉ោង រថភ្លើងអណ្ដែងប្រើកម្លាំងអេឡិចត្រូម៉ាញ៉េទិចសៀងហៃ ធ្វើដំណើរលើផ្លូវដែកប្រវែង 30 គីឡូម៉ែត្រដែលតភ្ជាប់ទីក្រុងសៀងហៃជាមួយនឹងអាកាសយានដ្ឋានអន្តរជាតិ Pudong ដោយចំណាយពេលតែ 7 នាទី និង 30 វិនាទីប៉ុណ្ណោះ។

ក៏ប៉ុន្តែ ក្រុមអ្នកជំនាញមិនទាន់ចាប់ផ្ដើមពិនិត្យទៅលើល្បឿនអតិបរមាដែលរថភ្លើងនេះអាចរត់បាននៅឡើយ ព្រោះថា រថភ្លើងអេឡិចត្រូម៉ាញ៉េទិចគំរូមួយរបស់ជប៉ុន អាចធ្វើដំណើរក្នុងល្បឿន 600 គីឡូម៉ែត្រ/ម៉ោង។

កត្តាដែលធ្វើឱ្យទាំងពីរខាងលើមានភាពខុសគ្នា ធៀបនឹងបណ្ដារថភ្លើងល្បឿនលឿនក្នុងប្រពៃណីបច្ចុប្បន្ន គឺមេដែក។ រថភ្លើងដែលប្រើប្រាស់បច្ចេកវិទ្យាដែលហៅថា Maglev ប្រើប្រាស់មេដែកដើម្បីបណ្ដែត រុញ និងនាំរថភ្លើងឱ្យធ្វើដំណើរតាមបណ្ដោយផ្លូវដែក។

ផ្លូវដែកបែបប្រពៃណីតែងតែមានការកកិត ប៉ុន្តែបណ្ដាញផ្លូវដែក និងរថភ្លើងប្រើកម្លាំងមេដែក (Maglev Train) វិញ បានលុបបំបាត់បញ្ហាកកិតនេះ តាមរយៈការបណ្ដែតរថភ្លើងឱ្យមានគម្លាត និងនៅពីលើផ្លូវដែក។ ដោយសារតែមិនមានកម្លាំងកកិត កម្លាំងទប់របស់បរិយាកាសជុំវិញគឺជាឧបសគ្គតែមួយគត់ដែលធ្វើឱ្យរថភ្លើង Maglev រត់យឺត។

មេដែកដែលប្រើប្រាស់ក្នុងបណ្ដាញផ្លូវរថភ្លើងអណ្ដែតនេះមិនមែនជាប្រភេទដែលយើងអាចរកទិញបាននៅគ្រប់ទីផ្សារនោះទេ។ ប៉ុន្តែ វាគឺជាមេដែកអគ្គិសនីកម្លាំងខ្លាំង ជួយឱ្យរថភ្លើងបរក្នុងល្បឿនលឿនខ្លាំង។

បច្ចេកវិទ្យានៅពីក្រោយរថភ្លើងអណ្ដែតសៀងហៃ (Shanghai Maglev train)

រថភ្លើងប្រភេទខាងលើរបស់ជប៉ុន និងចិន ប្រើប្រាស់ប្រព័ន្ធព្យួរអេឡិចត្រូម៉ាញ៉េទិច EMS (Electromagnetic suspension)។ ដោយការប្រើប្រាស់បច្ចេកវិទ្យា EMS រថភ្លើងត្រូវបានមេដែកអគ្គិសនីរុញឡើងផុតពីផ្លូវដែកម៉ាញ៉េទិច ធ្វើឱ្យវាអណ្ដែតក្នុងបរិយាកាស ប្រៀបដូចកំពុងហោះ។

រថភ្លើងនេះអណ្ដែតពីលើផ្លូវដែកប្រហែល 10 មិល្លីម៉ែត្រ គ្រប់គ្រាន់អាចលុបបំបាត់ភាពកកិត។ មេដែកអគ្គិសនីលើរថភ្លើងនេះបង្កើតអគ្គិសនីប្រភេទចរន្តឆ្លាស់ (AC) ហើយកម្លាំងទាញ និងរុញកើតឡើងដំណាលគ្នា រុញរថភ្លើងឆ្ពោះទៅមុខ។ បច្ចេកវិទ្យានេះជួយឱ្យរថភ្លើងអណ្ដែតសៀងហៃរបស់ចិន អាចធ្វើដំណើរក្នុងល្បឿន 480 គីឡូម៉ែត្រ/ម៉ោង និងបង្កើតបានកំណត់ត្រាស្ដីពីរថភ្លើងពាណិជ្ជកម្មដែលមានល្បឿនលឿនបំផុតលើពិភពលោក។

ក៏ប៉ុន្តែ ផ្លូវដែកសម្រាប់រថភ្លើងអណ្ដែតសៀងហៃរបស់ចិនខាងលើ មានតម្លៃរហូតដល់ 1.3 ពាន់លានដុល្លារអាម៉េរិក និងត្រូវចំណាយពេលបីឆ្នាំក្នុងការស្ថាបនា៕

June 8, 2023

ហេតុអ្វី Lionel Messi ជ្រើសរើសក្លឹប Inter Miami របស់ David Beckham ?

កំពូលតារាបាល់ទាត់ពិភពលោក Lionel Messi នឹងចូលជាសមាជិករបស់ក្លឹបបាល់ទាត់អាម៉េរិក Inter Miami ក្រោយពីកិច្ចព្រមព្រៀងជាមួយ PSG អស់សុពលភាព។

យោងតាម BBC កំពូលកីឡាកររបស់អាហ្សង់ទីន នឹងបដិសេធប្រាក់បៀវត្សរ៍ 430 លានដុល្លារអាម៉េរិក/ឆ្នាំ នៅអារ៉ាប៊ីសាអូឌីត ដើម្បីជ្រើសយកការអញ្ជើញពីក្លឹប Inter Miami នៅសហរដ្ឋអាម៉េរិក។ ដើម្បីទាក់ទាញ Messi មកលេងនៅពានរង្វាន់បាល់ទាត់អាជីពអាម៉េរិក (MLS) ក្លឹប Miami បានសហការជាមួយក្រុមហ៊ុនធំៗជាច្រើន មានដូចជា Adidas និង Apple ជាដើម។

នេះគឺជាលើកដំបូងដែល Messi លេងបាល់នៅខាងក្រៅទ្វីបអឺរ៉ុប។ M10 ចង់ទាត់នៅអឺរ៉ុបមួយរដូវកាលទៀត ដោយផ្ដល់អាទិភាពឱ្យ Barca ប៉ុន្តែមិនទទួលបានសំណើទាល់តែសោះ ដោយសារតែក្លឹបនេះកំពុងជួបបញ្ហាហិរញ្ញវត្ថុ។ Messi អាចជ្រើសរើសតែ Inter Miami ឬ Al Hilal។

មនុស្សជាច្រើនចង់ឃើញ Messi លេងឱ្យ Al Hilal ដើម្បីបានប៉ះជាមួយ Ronaldo និង Karim Benzema នៅអារ៉ាប៊ីសាអូឌីត។ ពានរង្វាន់ Saudi League ប្រទេសនេះ អាចមានលក្ខខណ្ឌល្អជាង MLS ប៉ុន្តែ M10 ចង់លេងនៅសហរដ្ឋអាម៉េរិកជាង ព្រោះតែកត្តាមួយចំនួន រួមមាន ការរស់នៅ និងកិច្ចសហការជាមួយបណ្ដាយីហោធំៗ លើសពីវិស័យបាល់ទាត់។ Messi ក៏មានផ្ទះមួយខ្នងនៅ Miami រដ្ឋ Florida ដែលកំពុងជួលឱ្យគេ។

ក្លឹប Inter Miami ជាកម្មសិទ្ធិរបស់មហាសេដ្ឋី Jorge Mas, Jose Mas និងអតីតកំពូលកីឡាករបាល់ទាត់អង់គ្លេស David Beckham។ Beckham ក៏កាន់តំណែងប្រធាននៅក្លឹបនេះផងដែរ៕

June 8, 2023

ត្បូងពេជ្រពណ៌ខ្មៅធំជាងគេបង្អស់លើពិភពលោក អាចមានប្រភពពីទីអវកាស

Enigma ស្ថិតក្នុងប្រភេទត្បូងពេជ្រខ្មៅ (carbonado) និងជាត្បូងពេជ្រកាត់រួច ធំជាងគេបង្អស់លើពិភពលោក។

យោងតាមអង្គការកំណត់ត្រាពិភពលោក Guinness (Guinness World Records) ត្បូងពេជ្រខ្មៅ Enigma មានទម្ងន់ 555.55 ការ៉ាត់ (111 ក្រាម) និងមានមុខចំនួន។

ក្រៅពីពណ៌ដ៏ចម្លែក និងរូបរាងខុសធម្មតា Enigma ក៏អាចមានប្រភពពីទីអវកាស។ ក្រុមហ៊ុនរៀបចំការលក់ដេញថ្លៃ Sotheby’s បានឱ្យដឹងថា ត្បូង Enigma ត្រូវបានបង្កើតឡើងដោយហេតុការណ៍ប៉ះទង្គិចគ្នារវាងអាចម៍ផ្កាយ ឬកើតឡើងដោយសារអាចម៍ផ្កាយបុកជាមួយនឹងផែនដី ឬមួយពីព្រឹត្តិការណ៍ផ្ទុះផ្កាយខ្នាតធំ ខណៈអ្នកខ្លះថា វាមានប្រភពពីផែនដី។ ក៏ប៉ុន្តែ ក្រុមអ្នកជំនាញអំពីត្បូងពេជ្រខ្មៅមិនទាន់ប្រាកដចំពោះរឿងទាំងនេះនៅឡើយ។

ត្បូងពេជ្រពណ៌ខ្មៅដ៏កម្រ និងធំបំផុតរបស់ពិភពលោកនេះ ធ្លាប់ត្រូវបានលក់ក្នុងតម្លៃ 4.28 លានដុល្លារអាមេរិក នៅក្នុងព្រឹត្តិការណ៍ដេញថ្លៃឯប្រទេសអង់គ្លេស កាលពីដើមឆ្នាំ 2022។

រាល់ត្បូងពេជ្រប្រភេទ carbonado ដែលគេស្គាល់ សុទ្ធតែត្រូវបានរកឃើញនៅប្រេស៊ីល ឬសាធារណរដ្ឋអាហ្វ្រិកកណ្ដាល និងមានអាយុកាលពី 2.6 ទៅ 3.8 ពាន់លានឆ្នាំ។ ក្នុងអំឡុងពេលនោះ ប្រទេសទាំងពីរនេះសុទ្ធតែស្ថិតក្នុងមហាទ្វីប Rodinia។ ក្រុមអ្នកវិទ្យាសាស្ត្រធ្លាប់បានរកឃើញត្បូងពេជ្រខ្មៅដែលកើតឡើងពីការប៉ះទង្គិចអាចម៍ផ្កាយក្នុងអតីតកាល ប៉ុន្តែភាគច្រើនពួកវាមានទំហំតូចខ្លាំង៕

June 7, 2023

ករណីធ្លាក់យន្តហោះសម្លាប់មនុស្ស 229 នាក់ព្រោះតែឆេះខ្សែភ្លើង បានកែប្រែវិស័យអាកាសចរណ៍ទាំងមូល

គ្រោះថ្នាក់ធ្លាក់យន្តហោះដឹកមនុស្ស 229 នាក់កាលពីឆ្នាំ 1998 បានធ្វើឱ្យមានការកែប្រែជាច្រើននៅក្នុងស្ដង់ដាសុវត្ថិភាពរបស់វិស័យអាកាសចរណ៍ពិភពលោក។

កាលពីថ្ងៃទី 02 កញ្ញា 1998 ជើងហោះហើរលេខ 111 របស់យន្តហោះពាណិជ្ជកម្ម MD-11 បានចេញដំណើរពីទីក្រុង New York សហរដ្ឋអាម៉េរិក ទៅកាន់ប្រទេសស្វ៊ីស។ យន្តហោះនេះ ហោះឡើងដោយរលូតនៅវេលាម៉ោង 20 និង 18 នាទី។ ប៉ុន្តែ ពេលហោះឡើងដល់កម្ពស់ 10,100 ម៉ែត្រ ក្លិនអាក្រក់ក៏ចាប់ផ្ដើមភាយក្នុងកាប៊ីនអ្នកបើកបរ។ ពីឡុតក៏ដឹងថា ក្លិននេះភាយចេញពីប្រព័ន្ធម៉ាស៊ីនត្រជាក់ក្នុងកាប៊ីនពីឡុត ខណៈដែលកាប៊ីនអ្នកដំណើរមិនមានបញ្ហា។

បួននាទីក្រោយមក ក្លិនចម្លែកនេះក៏ភាយកាន់តែខ្លាំងនៅក្នុងកាប៊ីនពីឡុត អមនឹងផ្សែងពណ៌ស។ ពេលនេះទើបក្រុមអ្នកបើកបរដឹកថា មានអគ្គិភ័យក្នុងកាប៊ីន រួចក៏រាយការណ៍ដល់ស្ថាប័នគ្រប់គ្រងអាកាសចរណ៍។ ភ្លាមនោះ អណ្ដាតភ្លើងក៏ចាប់ផ្ដើមឆាបឆេះ ធ្វើឱ្យក្រុមពីឡុតមានពេលតិចតួចសម្រាប់ការចុះចតបន្ទាន់។ MD-11 ត្រូវបានបញ្ជាឱ្យចុះចតលើព្រលានយន្តហោះ Halifax Stanfield (កាណាដា) ដែលមានចម្ងាយជាង 100 គីឡូម៉ែត្រពីយន្តហោះ។

បួននាទីបន្ទាប់មកទៀត យន្តហោះក៏ហោះបានប្រហែល 50 គីឡូម៉ែត្រ។ ក្រុមហោះហើរក៏បានស្នើឱ្យអូសបន្លាយពេលវេលាហោះហើរដើម្បីបន្ទាបខ្លួន និងបញ្ចេញចោលឥន្ធនៈ។

នៅក្នុងអំឡុងពេលនោះ ក្រុមពីឡុតបានបិទចរន្តអគ្គិសនីក្នុងកាប៊ីន និងកង្ហារនៅលើពិតានយន្តហោះ ដែលនេះបានប្រែក្លាយលំហនៅពិតានទៅជាឧបករណ៍ស្រូបខ្យល់។ ភ្លាមនោះ ស្រាប់តែអណ្ដាតភ្លើងឆេះរាលដាលពេញកាប៊ីនពីឡុង ហើយផ្នែកជាច្រើនក៏លែងដំណើរការ ក្នុងនោះមានទាំងមុខងារបើបរស្វ័យប្រវត្ត និងអេក្រង់សម្រាប់មើលរបស់ពីឡុតផងដែរ។

MD-11 ក៏បាត់បង់ការគ្រប់គ្រងទាំងស្រុង។ ក្រុមហោះហើរបានផ្ដល់សញ្ញា «Mayday» ដែលរាយការណ៍អំពីគ្រោះអាសន្នកម្រិតខ្ពស់បំផុត ហើយក៏បាត់ទំនាក់ទំនង។ យន្តហោះនេះបានធ្លាក់ចុះមហាសមុទ្រនៅម៉ោង 22 និង 31 នាទី ក្នុងល្បឿន 555 គីឡូម៉ែត្រ/ម៉ោង ធ្វើឱ្យដងខ្លួនយន្តហោះខ្ទេចជារាប់លានបំណែកក្នុងរយៈពេលមិនដល់មួយវិនាទី។

ហេតុការណ៍ធ្លាក់យន្តហោះរបស់ក្រុមហ៊ុន Swissari នេះ បានសម្លាប់មនុស្ស 229 នាក់។ ក្រោយ MD-11 បានធ្លាក់ គណៈកម្មការសុវត្ថិភាពចរាចរណ៍កាណាដា (TSB) ក៏បានចាប់ផ្ដើមស៊ើបអង្កេតរកមូលហេតុ។ លទ្ធផលនៃការស្រាវជ្រាវបង្ហាញថា អណ្ដាតភ្លើងបានចាប់ផ្ដើមឆេះចេញពីបណ្ដាញខ្សែភ្លើងខាងលើកាប៊ីនអ្នកបើកបរ ហើយរាលដាលយ៉ាងលឿន ធ្វើឱ្យផ្នែកជាច្រើនរបស់យន្តហោះត្រូវខូចខាត។ អេក្រង់នានានៅក្នុងកាប៊ីនអ្នកបើកបរបានខូច នាំឱ្យពីឡុតត្រូវរាវដើម្បីបញ្ជាយន្តហោះព្រោះមើលមិនឃើញ ហើយក៏ហោះខុសទិសដៅ និងធ្លាក់ចូលមហាសមុទ្រអាត្លង់ទិក។

យន្តហោះនេះមិនមានប្រព័ន្ធស្វែងរកប្រភពអណ្ដាតភ្លើង និងប្រព័ន្ធពន្លត់ភ្លើង ទើបក្រុមហោះហើរត្រូវប្រើច្រមុះដើម្បីហិតក្លិន ពេលនោះ ហេតុការណ៍បានប្រែជាអាក្រក់ណាស់ទៅហើយ។

TSB សន្និដ្ឋានថា មូលហេតុនៃគ្រោះថ្នាក់នេះគឺដោយសារ «ស្ដង់ដាគ្រប់គ្រងអគ្គិភ័យសម្រាប់វត្ថុធាតុក្នុងយន្តហោះ មិនសមស្រប»។

ក្រោយហេតុការណ៍ខាងលើ សំណើជាច្រើនត្រូវបានលើកឡើងដើម្បីកែលំអស្តង់ដានានានៅក្នុងយន្តហោះ។ សំណើទាំងនេះក៏បាននាំឱ្យមានការកែប្រែច្រើននៅក្នុងស្ដង់ដាសុវត្ថិភាពអាកាសចរណ៍របស់ស្ថាប័នគ្រប់គ្រងអាកាសចរណ៍ នៅក្នុងការផលិតយន្តហោះ និងវិស័យអាកាចរណ៍ទាំងមូលរបស់ពិភពលោក៕

June 7, 2023

កីឡាករបាល់ទាត់ពិភពលោក 13 រូប ដែលអាចទៅទាត់នៅ Saudi Pro League

ប្រទេសអារ៉ាប៊ីសាអូឌីត បានត្រៀមខ្លួនរួចហើយដើម្បីបញ្ចេញទឹកប្រាក់ក្នុងរដូវទិញដូរកីឡាករនារដូវក្ដៅ នៅក្នុងការប្រឹងប្រែងនាំយកកំពូលតារាបាល់ទាត់នានារបស់ពិភពលោក និងលើកពានរង្វាន់ Pro League របស់ខ្លួនឡើងទៅកាន់ផែនទីពិភពបាល់ ក្នុងគ្រាដែលប្រទេសនេះកំពុងខិតខំសម្រាប់ការទទួលធ្វើជាម្ចាស់ផ្ទះ World Cup 2030។

ថ្វីបើរដូវកាលដោះដូរកីឡាករឆ្នាំ 2023 មិនទាន់មកដល់ ប៉ុន្តែមួយក្នុងចំណោមប្រធានបទដែលត្រូវបានគេលើកឡើងញឹកញាប់ជាងគេក្នុងមួយរយៈពេលខ្លីចុងក្រោយនេះ គឺពានរង្វាន់ Saudi Pro League។

ប្រទេសអារ៉ាប៊ីសាអូឌីត មិនធ្លាប់ជាទីសំចតសំខាន់របស់កីឡាករបាល់ទាត់ពិភពលោក ប៉ុន្តែអារ៉ាប៊ីសាអូឌីតកំពុងតែប្ដេជ្ញាចិត្តកែប្រែប្រការនេះ។ ព្រឹត្តិការណ៍ប្រកួតបាល់ទាត់ដណ្ដើមពានរង្វាន់ Saudi Pro League កំពុងតែដើរតួនាទីជាអ្នកទាក់ទាញកីឡាករល្បីៗរបស់ពិភពលោក ក្នុងនោះ ពានរង្វាន់នេះក៏ធ្លាប់ទាក់ទាញបាន Cristiano Ronaldo ដែលចូលរួមប្រកួតតាំងពីខែធ្នូ 2022 ហើយថ្មីៗនេះ Karim Benzema ក៏បានសម្រេចចិត្តមកចូលរួម បន្ទាប់ពីចាកចេញពី Real Madrid។

អារ៉ាប៊ីសាអូឌីត កំពុងតែធ្វើសកម្មភាពសម្រាប់ការរៀបចំ World Cup 2023 ក្នុងនោះ ប្រទេសនេះក៏បានត្រៀមរួចរាល់សម្រាប់ការចំណាយប្រាក់ដ៏ច្រើនដើម្បីអាចក្លាយជាប្រទេសបាល់ទាត់។ Ronaldo កំពុងទទួលបាន 177 លានផោន/ឆ្នាំ ពីក្លឹបបាល់ទាត់ Al-Nassr ហើយនេះគឺជាប្រាក់បៀវត្សរ៍ដែលកំពុងទាក់ទាញចំណាប់អារម្មណ៍របស់កីឡាករល្បីៗរបស់ពិភពលោក ក្នុងនោះមានទាំង Lionel Messi ព្រោះថា M10 បច្ចុប្បន្នគឺជាទូតទេសចរណ៍របស់អារ៉ាប៊ីសាអូឌីតស្រាប់ ខណៈទំនាក់ទំនងរវាងកីឡាកររូបនេះជាមួយនឹងក្លឹប PSG ក៏ជិតដាច់ជាផ្លូវការហើយដែរ។ ពេលនេះ Messi អាចយកតម្រាប់តាម Ronaldo។

ក៏ប៉ុន្តែ Messi មិនមែនជាកីឡាករតែម្នាក់គត់ដែលកំពុងពិចារណាលើការមកទាត់ឱ្យបណ្ដាក្លឹបនៅអារ៉ាប៊ីសាអូឌីត។ ប្រភពព័ត៌មាននៅប្រទេសបារាំងឱ្យដឹងថា ក្លឹប Al-Hilal ក៏បានលើកសំណើជាកិច្ចព្រមព្រៀងជាមួយនឹង Sergio Busquets, Jordi Alba និង Marco Verratti នៅក្នុងការប្រឹងប្រែងដើម្បីបញ្ចុះបញ្ចូល Messi ឱ្យមកចូលរួមគម្រោងរបស់ក្លឹបនេះ។

M10 បច្ចុប្បន្នគឺជាទូតទេសចរណ៍របស់អារ៉ាប៊ីសាអូឌីត

ក្រៅពីនេះនៅមានកីឡាករជាច្រើនទៀត រួមមានដូចជា Hugo Lloris, Roberto Firmino, Luka Modric, Sergio Ramos, N’Golo Kante, Pierre-Emerick Aubameyang, Wilfried Zaha, Iago Aspas ជាដើម ក៏ទទួលបានការស្នើ ឬការបញ្ចុះបញ្ចូលឱ្យមកទាត់នៅអារ៉ាប៊ីសាអូឌីតផងដែរ។

ចលនាខាងលើនេះ មួយផ្នែកត្រូវបានចាប់ផ្ដើមពីករណី មូលនិធិវិនិយោគសាធារណៈ (PIF) របស់អារ៉ាប៊ីសាអូឌីត ទិញក្លឹបបាល់ទាត់ចំនួនបួននៅប្រទេសនេះ ដែលរួមមាន ក្លឹប Al-Ittihad, Al-Ahli, Al-Nassr និង Al-Hilal។ PIF ដែលជាម្ចាស់កម្មសិទ្ធិរបស់ Newcastle ដែរនោះ ហាក់កំពុងប្ដេជ្ញាចិត្តខ្ពស់ដើម្បីបង្កការភ្ញាក់ផ្អើលក្នុងវិស័យបាល់ទាត់ ដោយការចំណាយប្រាក់យ៉ាងច្រើនសន្ធឹកសម្រាប់ទាក់ទាញកីឡាករ។

ទោះជាយ៉ាងណាក៏ដោយ គេនៅតែត្រូវរង់ចាំមើលថា តើមានកីឡាករប៉ុន្មាននាក់ក្នុងចំណោមកីឡាករដែលបានរៀបរាប់ខាងលើ ព្រមទទួលយកសំណើរបស់បណ្ដាក្លឹបនៅអារ៉ាប៊ីសាអូឌីត៕

June 7, 2023

Tag: ពិភពលោក