ពណ៌ - La Reine Media

រុក្ខជាតិដែលអាចប្រាប់អ្នកអំពីកន្លែងមានមាស

អណ្ដូងរ៉ែជាច្រើនត្រូវបានរកឃើញដោយសាររុក្ខជាតិមួយប្រភេទដែលដុះនៅលើសមុទ្រខ្សាច់ នោះគឺរុក្ខជាតិឈ្មោះ Desert Trumpet ដែលអ្នកវិទ្យាសាស្ត្រហៅថា Eriogonum inflatum។ រុក្ខជាតិនេះតែងតែដុះនៅតំបន់ដែលសម្បូររ៉ែ ក្នុងនោះ ស្លឹក និងមែករបស់ពួកវាអាចស្រូបយកមាស។

Desert Trumpet គឺជារុក្ខជាតិប្រភេទស្មៅដែលមានកម្ពស់រហូតដល់មួយម៉ែត្រ មានពណ៌បៃតងចាស់ ចំណែកផ្នែកខាងលើមានសភាពប៉ោង។ ផ្កាយរបស់វាមានពណ៌លឿង និងរីកជាកញ្ចុំ។ រុក្ខជាតិនេះក៏មានប្រសិទ្ធភាពក្នុងការព្យាបាលជំងឺច្រើនមុខ រួមមានដូចជា ផ្ដាសាយ របួសមានមេរោគ រាករូស ក្រពះ ឈឺសាច់ដុំ និងជំងឺស្វាយជាដើម។

យោងតាមអ្នកស្រាវជ្រាវអំពីសមុទ្រខ្សាច់ Desert Trumpet គឺជាសញ្ញាដែលបង្ហាញថា មានមាសនៅក្បែរនោះ។ ដោយសារតែសមត្ថភាពស្រូបយកសារធាតុមាស រុក្ខជាតិនេះអាចរីកលូតលាស់ខ្លាំងនៅតំបន់ដែលសម្បូររ៉ែមាស។

ដូច្នេះហើយ បើសិនអ្នកកំពុងស្វែងរកមាសនៅលើតំបន់សមុទ្រខ្សាច់ ឬវាលខ្សាច់ធំ សូមយកចិត្តទុកដាក់ទៅលើរុក្ខជាតិ Desert Trumpet។ ពួកវាអាចនាំអ្នកទៅកាន់កន្លែងមានមាស ឬរ៉ែមាស។

April 28, 2024

ហេតុអ្វីអគារខ្ពស់ជាងគេនៅតៃវ៉ាន់ មិនបាក់រលំក្នុងរញ្ជួយដីជាង 7 រិចទ័រ?

Taipei 101 ដែលជាអគារមានកម្ពស់ 508 ម៉ែត្រ នៅតែមានសុវត្ថិភាព គ្រាដែលរញ្ជួយដីកើតឡើង។ ភាពអស្ចារ្យនេះគឺដោយសារគ្រឹះដ៏រឹងមាំ និងប្រព័ន្ធកាត់បន្ថយភាពរញ្ជួយដែលមានប៉ោលទម្ងន់ 730 តោន ព្យួរនៅក្នុងអគារ។

រញ្ជួយដីមួយបានកើតឡើងកាលពីវេលាម៉ោង 7 និង 58 នាទី ថ្ងៃទី 3 មេសា នៅភាគខាងកើតកោះតៃវ៉ាន់ ក្នុងជម្រៅ 15.5 គីឡូម៉ែត្រក្រោមដី។

យោងតាមប្រធានមជ្ឈមណ្ឌលរញ្ជួយដីតៃវ៉ាន់ Wu Chien-fu នេះគឺជារញ្ជួយដីកម្លាំងខ្លាំងបំផុតនៅលើកោះនេះ ក្នុងរង្វង់ 25 ឆ្នាំកន្លង។

ក្នុងពេលរញ្ជួយដីកើតឡើង អគារ Taipei 101 ដែលមានកម្ពស់ 508 ម៉ែត្រ នៅតែឈរទ្រឹងដូចធម្មតា។ Taipei 101 ស្ថិតនៅក្នុងទីក្រុងតៃប៉ិ កោះតៃវ៉ាន់។ កោះតៃវ៉ាន់ ស្ថិតនៅក្បែរខ្សែក្រវាត់ភ្លើងរបស់មហាសមុទ្រប៉ាស៊ីហ្វិក ទើបវាទទួលរងគ្រោះរញ្ជួយដីជាញឹកញាប់។

កោះតៃវ៉ាន់ ស្ថិតនៅលើព្រំដែនផ្លាកទិចតូនិចចំនួន 42 ដែលកំពុងធ្វើសកម្មភាព ហើយឆ្នេរសមុទ្រភាគខាងកើតដែនដីនេះ បានកើតមានរញ្ជួយដីរាប់មិនអស់។

Taipei 101 ដែលធ្លាប់ជាប់ឈ្មោះជាអគារខ្ពស់ជាងគេលើពិភពលោកចាប់ពីឆ្នាំ 2004 ដល់ 2009 ត្រូវបានបំពាក់គ្រឿងទប់ទល់នឹងរញ្ជួយដីមួយចំនួន ជួយឱ្យវាមានភាពរឹងមាំខ្លាំង ដែលគេជឿថា អាចទប់ទល់នឹងរញ្ជួយដីកម្លាំងខ្លាំងជាងគេក្នុងវដ្ដ 2,500 ឆ្នាំ។

សមត្ថភាពទប់ទល់នឹងភាពញាប់ញ័រដោយសាររញ្ជួយដីបានយ៉ាងល្អរបស់ Taipei 101 គឺបានមកពីការរួមផ្សំរវាងភាពបត់បែនប្រកបដោយភាពទន់ភ្លន់ និងគ្រឹះដ៏រឹងមាំ។ ដើម្បីរក្សារចនាសម្ព័ន្ធពីការបែកបាក់ អគារនេះអាចយោលយោគទៅតាមភាពញាប់ញ័ររបស់រញ្ជួយដី និងព្យុះ។ បង្គោលសសរចំនួន 380 ដើម ក្នុងនោះមួយដើមៗត្រូវបានបោះជម្រៅ 80 ម៉ែត្រទៅក្នុងដី ជួយពង្រឹងគ្រឹះរបស់អគារឱ្យកាន់តែមាំ។

ក៏ប៉ុន្តែ អ្វីដែលពិសេសជាងគេ គឺ ប៉ោល។ នេះគឺជាមួយក្នុងចំណោមប្រព័ន្ធកាត់បន្ថយភាពញាប់ញ័រធំជាងគេលើពិភពលោក។ ប្រយោលទាំងនេះត្រូវបានដាក់ចាប់ពីជាន់ទី 92 ចុះមកដល់ជាន់ទី 88 របស់អគារ Taipei។ ដុំប្រយោលពណ៌លឿង មានទម្ងន់ប្រហែល 730 តោននេះ យោលយោគយ៉ាងថ្នមៗ ទប់ទល់នឹងកម្លាំងខ្យល់។

ប៉ោលនេះនឹងយោលយោគទៅមក អាស្រ័យទៅលើចលនារបស់អគារ ដើម្បីបំបាត់កម្លាំងដែលធ្វើឱ្យអគារយោលយោគ។ ប៉ោលនេះក៏ត្រូវបានបំពាក់អង្គញាណមួយចំនួន ដែលជួយឱ្យដឹងអំពីចលនារបស់អគារ និងកែតម្រូវចលនារបស់កូនប្រយោលទៅតាមចលនារបស់អគារ ដោយមិនបាច់ប្រើប្រាស់ថាមពល ឬការបញ្ជាពីខាងក្រៅ។ វាដំណើរការដោយយោងទៅតាមចលនារបស់អគារ និងកម្លាំងទំនាញ។

ប៉ោលដែលមានអង្កត់ផ្ចិតប្រហែល 6 ម៉ែត្រនេះ អាចផ្លាស់ទីបាន 1.5 ម៉ែត្រ ទៅតាមគ្រប់ទិស ដែលអាចកាត់បន្ថយភាពយោលយោគប្រហែលពី 30 ទៅ 40%។

កូនប្រយោលនេះត្រូវបានច្នៃឡើងពីបន្ទះដែកថែប និងដាក់ត្រួតលើគ្នា ហើយមានទម្ងន់ស្មើនឹង 0.24% បើធៀបនឹងទម្ងន់សរុបរបស់អគារ Taipei 101។ ប្រព័ន្ធប្រយោលនេះមានតម្លៃរហូតដល់ 4 លានដុល្លារអាម៉េរិក។

April 4, 2024

រថយន្ត Ford Ranger 2024 បានបង្ហាញខ្លួនក្នុងទីផ្សារប្រទេសកម្ពុជាហើយ!

កាលពីថ្ងៃទី ១៥ ខែមីនា ឆ្នាំ២០២៤ ផ្នែកលក់រថយន្ត ហ្វដ នៃក្រុមហ៊ុន អ អិម អេ (ខេមបូឌា) – RMA (Cambodia) PLC បានធ្វើពិធីដាក់បង្ហាញជាផ្លូវការរថយន្ត Ford Ranger ស៊េរីឆ្នាំ2024 ក្រោមអធិបតីភាពរបស់ លោក ងន សាំង អគ្គនាយកនៃក្រុមហ៊ុន អ អិម អេ (ខេមបូឌា) និងលោក David Jeffrey នាយកគ្រប់គ្រងប្រចាំតំបន់ទីផ្សារអាស៊ីប៉ាស៊ីហ្វិក និងកូរ៉េខាងត្បូង នៃក្រុមហ៊ុន Ford Motor Company រួមទាំងគណៈគ្រប់គ្រង បុគ្គលិកនៃក្រុមហ៊ុន អ អិម អេ (ខេមបូឌា) ភ្ញៀវកិត្តិយស អតិថិជនហ្វដ និងមិត្តអ្នកសារព័ត៌មានចូលរួមប្រមាណជាង 2,000 នាក់ នៅមជ្ឈមណ្ឌល ដឹ ព្រេមៀ សេនធ័រ សែនសុខ – The Premier Center Sen Sok ។

នៅវេលាម៉ោង ៩ព្រឹក ដល់ ៤ល្ងាច គឺមានការបើកបរសាកល្បងសម្រាប់រថយន្ត Ford Ranger ស៊េរីឆ្នាំ2024 ដែលមានការបង្ហាញអំពីបច្ចេកវិទ្យាទំនើបៗដែលមានបំពាក់ក្នុងរថយន្ត រួមទាំងធ្វើការបង្ហាញនូវសមត្ថភាពជើងក្រោម និង កម្លាំងនៃម៉ាស៊ីនម៉ាស៊ូត 2.0L Bi-Turbo ដែលផ្តល់នូវផាសុកភាពក្នុងការបើកបរ និងបច្ចេក វិទ្យាទំនើបផ្សេងៗទៀតរបស់រថយន្ត Ford Ranger ស៊េរីឆ្នាំ2024។ ជាពិសេស អតិថិជនដែលបានចូលរួមក៏មានការលេងល្បែងកម្សាន្ត និងទទួលបានកាដូវត្ថុអនុសាវរីន៏ជាច្រើនទៀតពីក្រុមហ៊ុន ហ្វដ។ មិនតែប៉ុណ្ណោះ រថយន្ត Ford Ranger Wildtrak ស៊េរីឆ្នាំ2024 និងរថយន្ត Ford Ranger XLT ស៊េរីឆ្នាំ2024 ក៏មានបំពាក់នូវឈ្នាន់ជាន់ជើងផ្នែកចំហៀងខាងក្រោយ ដែលបង្កភាពងាយស្រួលក្នុងការឡើងចុះរថយន្ត ដោយពុំចាំបាច់ឡើងតាមកង់រថយន្តនោះទេ។

ជាកិច្ចចាប់ផ្តើមកម្មវិធី លោក ងន សាំង អគ្គនាយកនៃក្រុមហ៊ុន អ អិម អេ (ខេមបូឌា) បានមានប្រសាសន៍ ថា៖ “ក្រុមហ៊ុន អ អិម អេ (ខេមបូឌា) គឺជាក្រុមហ៊ុនមួយដែលឈានមុខគេក្នុងទីផ្សាររថយន្តថ្មី ហើយភាពពេញនិយម និងភាពល្បីល្បាញនេះ ដោយសារតែទទួលបានការគាំទ្រ ពីសំណាក់បងប្អូនប្រជាពលរដ្ឋកម្ពុជាមកលើរថយន្ត Ford Ranger និងភាពជឿជាក់ទៅលើគុណភាព និងសេវាកម្មផ្តល់ជូនអតិថិជន។”

លោក David Jeffrey នាយកគ្រប់គ្រងប្រចាំតំបន់ទីផ្សារអាស៊ីប៉ាស៊ីហ្វិក និងកូរ៉េខាងត្បូង នៃក្រុមហ៊ុន Ford Motor Company បានមានប្រសាសន៍ថា៖ “រថយន្ត Ford Ranger គឺជាដៃគូដ៏មានទំនុក ចិត្តសម្រាប់អតិថិជនដែលប្រើប្រាស់ជាលក្ខណៈគ្រួសារ ការងារ ប្រកបអាជីវកម្ម និងជាពិសេស សម្រាប់អ្នកចូលចិត្តធ្វើដំណើរកម្សាន្តបែបផ្សងព្រេងជាដើម។ ការលក់របស់រថយន្ត Ford Ranger ត្រូវបានគ្របដណ្តប់លើទីផ្សារជាង ១៨០ ប្រទេសជុំវិញពិភពលោក ហើយសម្រាប់រថយន្ត Ford Ranger ស៊េរីថ្មីនេះ គឺនៅតែបន្តផ្តល់នូវភាពរឹងមាំ បច្ចេកវិទ្យាទំនើប និងប្រព័ន្ធសុវត្ថិភាពខ្ពស់លើសគេ ដែលបង្កភាពងាយស្រួលដល់អតិថិជនទាំងអស់ ក្នុងការបំពេញកិច្ចការងារផ្សេងៗរបស់ខ្លួន។ ខ្ញុំសូមថ្លែងអំណរគុណចំពោះអតិថិជន ហ្វដ ទាំងអស់ដែលបន្តគាំទ្រ និងជឿជាក់ទៅលើគុណភាព ប្រព័ន្ធសុវត្ថិភាព និងបច្ចេកវិទ្យារបស់រថយន្ត ហ្វដ។”

Ford Ranger ស៊េរីឆ្នាំ 2024 ត្រូវបានរចនាឡើងដោយកំណត់យកបទដ្ឋាន «Built Ford Tough» ដែលផ្តោតសំខាន់លើ ភាពធន់ រឹងមាំ ហាប់ណែន ទំនើបទាន់សម័យ និងប្រកបដោយផាសុកភាព ដែលជាគំនិតមួយដែលទទួលបានការគាំទ្រយ៉ាងច្រើនពីសំណាក់អតិថិជន។ លើសពីនេះទៅទៀត រថយន្ត Ford Ranger ស៊េរីឆ្នាំ 2024 ក៏នៅតែបន្តបំពាក់ដោយបច្ចេកវិទ្យាឆ្លាតវៃជាច្រើន ដើម្បីបង្កនូវភាពងាយស្រួលដល់អតិថិជនដូចជា កុងទ័រឌីជីថល 8អ៊ីញដែលផ្តល់ទិន្នន័យផ្សេងៗ រួមទាំងជម្រើស Mode ទៅតាមស្ថានភាពផ្លូវចំនួន ៦ រួមមាន Normal, Eco, Tow/Hual, Slippery, Mud/Ruts, និង Sand, អេក្រង់ Multi-Touchscreen 12អ៊ីញ ដែលភ្ជាប់ជាមួយបច្ចេកវិទ្យា SYNC4A ដែលអាចភ្ជាប់ជាមួយនឹង Apple Carplay និង Android Auto តាមរយៈ Wireless និងកាមេរ៉ា 360^o រួមជាមួយប្រព័ន្ធសាកថ្មទូរស័ព្ទឥតខ្សែ និងប្រព័ន្ធចាប់ហ្វ្រាំងដោយស្វ័យប្រវត្តនៅពេលឈប់ស្តុប (Auto Hold) ។ល។

ពិសេសជាងនេះទៅទៀត រថយន្ត Ford Ranger ស៊េរីឆ្នាំ 2024 ក៏នៅតែផ្តល់នូវប្រព័ន្ធសុវត្ថិភាពទំនើបៗចុងក្រោយ ដើម្បីសម្រួលដល់ការបើកបររបស់អតិថិជន ដូចជាប្រព័ន្ធចង្កៀងឆ្លាតវៃដែលអាចរេតាមចង្កូត និងបែងចែកពន្លឺដោយស្វ័យប្រវត្ត ប្រព័ន្ធផ្តល់សញ្ញាគ្រោះថ្នាក់ពេលមានឧបសគ្គ ឬអ្នកថ្មើរជើងឆ្លងកាត់ និងប្រព័ន្ធចាប់ហ្រ្វាំងជាបន្ទាន់ដោយស្វ័យប្រវត្ត ប្រព័ន្ធជំនួយលើដៃចង្កូតបញ្ចៀសចេញពីគ្រោះថា្នក់ ប្រព័ន្ធចាប់ហ្រ្វាំងបន្ទាន់ក្រោយពេលមានការប៉ះទង្គិច ប្រព័ន្ធផ្តល់សញ្ញាគ្រោះថ្នាក់ និងប្រព័ន្ធចាប់ហ្រ្វាំងជាបន្ទាន់ដោយស្វ័យប្រវត្ត នៅពេលថយក្រោយ និងប្រព័ន្ធឆ្លាតវៃជាច្រើនទៀត ដើម្បីផ្តល់នូវទំនុកចិត្តដល់អតិថិជន។

រថយន្ត Ford Ranger Wildtrak ស៊េរីឆ្នាំ 2024 មានជម្រើសពណ៌ចំនួន ៦ពណ៌ ដើម្បីជាជម្រើសដល់អតិថិជន រួមមានពណ៌លឿងទុំ ពណ៌ទឹកក្រូច ពណ៌ខ្មៅ ពណ៌ប្រផេះ ពណ៌ទឹកប្រាក់ និងពណ៌ស និងរថយន្ត Ford Ranger XLT ស៊េរីឆ្នាំ2024 មានជម្រើសពណ៌ចំនួន ៦ពណ៌ ដូចគ្នា សម្រាប់ជាជម្រើសដល់អតិថិជន រួមមានពណ៌ខៀវ ពណ៌ទឹកក្រូច ពណ៌ខ្មៅ ពណ៌ប្រផេះ ពណ៌ទឹកប្រាក់ និងពណ៌ស ។ សម្រាប់តម្លៃនៃរថយន្ត Ford Ranger Wildtrak ស៊េរីឆ្នាំ 2024 គឺ $55,900 និងរថយន្ត Ford Ranger XLT ស៊េរីឆ្នាំ 2024 គឺ $46,900។ សូមទំនាក់ទំនងផ្នែកលក់តាមសាខានីមួយៗ: សាខាព្រះមុនីវង្ស 078 999 773, សាខាទឹកថ្លា 095 939 939, សាខាទូលសង្កែ 078 935 935, សាខាជ្រោយចង្វារ 017 999 027, សាខាខេត្តសៀមរាប 077 666 357 ឬ 088 9 666 357, សាខាខេត្តកំពង់ចាម 078 999 883 ឬ 088 3 999 883, សាខាភ្នំពេញថ្មី 011 255 229 / 077 722 999 និងសាខាបឹងបៃតង 099 999 747។

March 18, 2024

ប្រព័ន្ធផ្កាយមានភព 6 នេះ ត្រូវបានសង្ស័យថា «មានជីវិតឆ្លាតវៃ»

អ្នកវិទ្យាសាស្ត្រជឿថា អាចរកឃើញបច្ចេកវិទ្យាពីភពផែនដី នៅក្នុងប្រព័ន្ធផ្កាយ HD 110067 ជាទីដែលមានភពរហូតដល់ 6 កំពុងវិលជុំវិញគ្នាយ៉ាងល្អឥតខ្ចោះ។

ត្រូវបានរកឃើញកាលពីឆ្នាំ 2023 ប្រព័ន្ធ HD 110067 ដែលមានផ្កាយក្រិនពណ៌ទឹកក្រូចនៅចំកណ្ដាល ហើយនៅជុំវិញគឺជាភពចំនួន 6 ដែលមានគន្លងគោចរប្រទាក់ក្រឡាគ្នាយ៉ាងល្អឥតខ្ចោះ ដែលហៅថា orbital resonance ត្រូវបានអ្នកវិទ្យាសាស្ត្រយល់ថា អាចមានវត្តមាននៃភាវៈរស់។

ភពមួយដែលស្ថិតនៅក្បែរផ្កាយមេរបស់វាបំផុត បញ្ចប់ការវិលមួយជុំ (មួយឆ្នាំ) ក្នុងរយៈពេល 9.1 ថ្ងៃរបស់ផែនដី ខណៈបណ្ដាភពជាបន្តបន្ទាប់មានគន្លងគោចរដែលមានរយៈពេល 13.6 ថ្ងៃ, 20.5 ថ្ងៃ, 30.8 ថ្ងៃ, 41 ថ្ងៃ និង 54.7 ថ្ងៃ។ ដូច្នេះ សមាមាត្រនៃឥទ្ធិពលរវាងភពដែលនៅក្បែរគ្នាក្នុងប្រព័ន្ធផ្កាយនេះគឺ 3:2, 3:2, 3:2, 4:3 និង 4:3 ។

យោងតាមលទ្ធផលនៃការស្រាវជ្រាវដែលទើបត្រូវបានប្រកាសលើទស្សនាវដ្ដីវិទ្យាសាស្ត្រ Research Notes of the AAS ភាពប្រទាក់ក្រឡាគ្នាល្អឥតខ្ចោះនេះ ជួយឱ្យភពទាំង 6 ដែលមានទំហំជិតស្មើនឹងភពណិបទូន (Neptune) មានបរិស្ថាននឹងនរអស់រាប់ពាន់លានឆ្នាំមកហើយ។

ភពខ្លះនៅក្នុងប្រព័ន្ធផ្កាយ HD 110067 ថែមទាំងមានសញ្ញាណរបស់ទឹកនៅលើផ្ទៃរបស់ពួកវាទៀតផង។ ពួកវាក៏ស្ថិតក្នុងស្ថានភាពនឹងនរ មិនច្របូកប្របល់យ៉ាងតិចមួយពាន់លានឆ្នាំកន្លង បន្ទាប់ពីកកើតរូបរាងល្អឥតខ្ចោះ និងវិលជុំវិញផ្កាយមេដែលមានអាយុបួនពាន់លានឆ្នាំ។

ប្រព័ន្ធផ្កាយ HD 110067 – (រូបភាព៖ Thibaut Roger, NCCR Planets)

អ្នកវិទ្យាសាស្ត្រនៅវិទ្យាស្ថានស្វែងរកជីវិតឆ្លាតវៃក្រៅភពផែនដី (SETI) របស់សហរដ្ឋអាម៉េរិក គណនាឃើញថា ភាពនឹងនរ និងពេលវេលានោះ គឺគ្រប់គ្រាន់ដែលអាចនាំមកនូវឱកាសល្អសម្រាប់ការកកើតជីវិត ការវិវត្ត និងការរីកចម្រើន។ ជាងនេះ ភាវៈរស់នោះទំនងជាបានវិវឌ្ឍដល់កម្រិតមួយដែលក្លាយជាអរិយធម៌ធំៗ ជាជីវិតដែលមានបច្ចេកវិទ្យាដែលអាចត្រូវបានរកឃើញពីចម្ងាយ។

ទំព័រ Science Alert បានផ្សាយថា ក្រុម SETI ក៏បានព្យាយាមស្វែងរករលកសញ្ញាពីបច្ចេកវិទ្យារបស់មនុស្សពិភពផ្កាយដែលស្ថិតក្នុងប្រព័ន្ធ HD 110067 តាមរយៈស្ថានីយតារាសាស្ត្រ Green Bank នៅសហរដ្ឋអាម៉េរិក ប៉ុន្តែមិនទាន់ចាប់បានប្រការដែលកំពុងទន្ទឹងរង់ចាំ។

March 8, 2024

ផ្កាយមួយដួងនឹងផ្ទុះក្នុងឆ្នាំ 2024 ហើយអាចមើលឃើញដោយភ្នែកទទេ

នៅកណ្ដាលកញ្ចុំផ្កាយ Hercules នឹងមានវត្ថុអវកាសមួយដែលមើលទៅដូចផ្កាយថ្មីទើបបង្ហាញខ្លួននៅលើផ្ទៃមេឃ។

យោងតាម Science Alert ហេតុការណ៍ផ្ទុះផ្កាយជិតនឹងកើតឡើងរបស់ T Coronae Borealis ដែលជាផ្កាយមួយគូ រួមមាន «ផ្កាយខ្មោចឆៅ» មួយដួង និងជនរងគ្រោះរបស់វា នឹងបញ្ចេញពន្លឺរហូតដល់ថ្នាក់មនុស្សនៅលើផែនដីអាចមើលឃើញវាដោយភ្នែកទទេ។

T Coronae Borealis ធ្លាប់បានផ្ទុះម្ដងរួចហើយកាលពីឆ្នាំ 1946។ យោងតាមការគណនារបស់អ្នកវិទ្យាសាស្ត្រនៅអង្គការណាសា ផ្កាយភ្លោះ T Coronae Borealis នឹងត្រូវផ្ទុះម្ដងទៀត នៅចន្លោះពីខែកុម្ភៈ ដល់ខែកញ្ញា ឆ្នាំ 2024។

បច្ចុប្បន្ន វាមិនទាន់ផ្ទុះ ដូច្នេះ អ្នកដែលចូលចិត្តវិស័យតារាសាស្ត្រ អាចទន្ទឹមរង់ចាំមើលព្រឹត្តិការណ៍នេះ ចាប់ពីពេលនេះរហូតដល់ដាច់ខែកញ្ញា។

តាមរយៈភ្នែកទទេ អ្នកនឹងបានឃើញចំណុចដែលភ្លឺមួយដូចទៅនឹងផ្កាយថ្មីមួយដួងទើបរះនៅកណ្ដាលកញ្ចុំផ្កាយ Hercules ជាទីដែលផ្កាយមួយគូខាងលើកំពុងស្ថិតនៅ។ ក្នុងនោះ ពន្លឺរបស់វា ភ្លឺស្មើនឹងផ្កាយ North Star។

T Coronae Borealis គឺជាប្រព័ន្ធផ្កាយមួយដែលបានឈានចូលដល់ដំណាក់កាលស្លាប់។ បច្ចុប្បន្ន វារួមមាន ផ្កាយយក្សក្រហមមួយដួង និងកូនផ្កាយក្រិនពណ៌ស (White Dwarf) មួយដួង។ កូនផ្កាយក្រិនពណ៌សនេះ ដើរតួជាផ្កាយខ្មោចឆៅ ខណៈដែលផ្កាយយក្សក្រហមគឺជាជនរងគ្រោះរបស់វា។

កូនផ្កាយក្រិនពណ៌សនេះ ចេះតែជះកម្លាំងសម្ពាធ ហែកសាច់ផ្កាយយក្សក្រហមជាបន្តបន្ទាប់។ នៅពេលសម្ពាធធំគ្រប់គ្រាន់ ផ្កាយយក្សក្រហមនឹងផ្ទុះទៅតាមវដ្ដមួយនៅក្នុងព្រឹត្តិការណ៍ដែលត្រូវបានហៅថា ហេតុការណ៍ផ្ទុះណូវ៉ា ដោយបញ្ចេញវត្ថុធាតុមួយផ្នែករបស់វាទៅក្នុងបរិយាកាស។

វត្ថុធាតុពីផ្កាយយក្សក្រហមដែលត្រូវបានបំបែកចេញ ក៏ត្រូវបានកូនផ្កាយក្រិនពណ៌ស ស៊ីជាចំណី ក្នុងរយៈពេលខ្លី។ ដូច្នេះ អ្នកអាចតាមដានគយគន់ព្រឹត្តិការណ៍នេះជាច្រើនថ្ងៃផងដែរ។

រហូតដល់ថ្ងៃណាមួយនោះ ផ្កាយយក្សក្រហមនឹងត្រូវផ្កាយក្រិនពណ៌ស ហែកស៊ីវត្ថុធាតុរហូតដល់ឆ្អែត «បែកពោះ»។ ពេលនោះ ផ្កាយមួយគូនេះនឹងត្រូវផ្ទុះដំណាលគ្នា និងខ្លាំងក្លាជាងការផ្ទុះរបស់វានាពេលកន្លង នៅក្នុងព្រឹត្តិការណ៍មួយដែលហៅថា «ហេតុការណ៍ផ្ទុះស៊ុបពើណូវ៉ា»។

ផ្កាយយក្សក្រហមគឺជាបណ្ដាផ្កាយដែលកំពុងស្ថិតក្នុងដំណាក់កាល «ដង្ហើមចង្រិត» ពេលដែលជិតអស់ថាមពល។ ព្រះអាទិត្យរបស់មនុស្ស នៅសល់ 5 ពាន់លានឆ្នាំទៀត ក៏នឹងក្លាយជាផ្កាយយក្សក្រហម។

ក្រោយការផ្ទុះណូវ៉ា និងការផ្ទុះស៊ុបពើណូវ៉ា អ្វីដែលនៅសេសសល់ នឹងប្រមូលផ្ដុំគ្នា ក្លាយជាកូនផ្កាយក្រិនពណ៌ស ដែលមានទំហំប្រហាក់ប្រហែលនឹងភពផែនដី ប៉ុន្តែមានផ្ទុកថាមពលមហិមា។

តាមការគណនា ក្រោយរយៈពេលប្រហែល 10 ពាន់លានឆ្នាំទៀត ពោលគឺប្រហែល 5 ពាន់លានឆ្នាំដែលបានក្លាយជាផ្កាយយក្សក្រហម ព្រះអាទិត្យរបស់មនុស្សនឹងក្លាយទៅជាកូនផ្កាយក្រិនពណ៌ស៕

March 4, 2024

ក្រុមហ៊ុនទូរស័ព្ទចិន បង្ហាញរថយន្តអគ្គិសនី SU7 EV រត់បានឆ្ងាយជាងរាល់រថយន្តអគ្គិសនីបច្ចុប្បន្ន

ក្រុមហ៊ុនចិន Xiaomi បានធ្វើឱ្យមានចំណាប់អារម្មណ៍ខ្លាំងនៅក្នុងព្រឹត្តិការណ៍ Mobile World Congress នៅ Barcelona គ្រាដែលតាំងបង្ហាញ SU7 ដែលជារថយន្តអគ្គិសនីដំបូងរបស់ខ្លួន។ នេះគឺជាលើកដំបូងហើយដែល SU7 ត្រូវបានបង្ហាញដោយផ្ទាល់ បន្ទាប់ពីត្រូវបានប្រកាសព័ត៌មានជាលើកដំបូងនៅប្រទេសចិន កាលពីចុងឆ្នាំមុន។

SU7 គឺជាម៉ូដែលសេដានកីឡា ដែលមានពណ៌ខៀវខ្ចីដ៏ទាក់ទាញ។ រថយន្តនេះបើប្រាស់ម៉ូទ័រអគ្គិសនីរបស់ Xiaomi និងអាចបង្កើនល្បឿនពី 0 ទៅ 100 គីឡូម៉ែត្រ/ម៉ោង ដោយប្រើពេលតែ 2.78 វិនាទី។

Xiaomi SU7 នឹងបំពាក់ថ្មផ្ទុកថាមពល 101 kWh ដែលអាចធ្វើដំណើរបានជាង 800 គីឡូម៉ែត្រ ឆ្ងាយជាងច្រើនបើធៀបនឹងបណ្ដារថយន្តអគ្គិសនីនាបច្ចុប្បន្ន។ រថយន្តនេះក៏មានបំពាក់មុខងារបញ្ចូលថាមពលលឿន ដែលអាចធ្វើដំណើរបាន 500 គីឡូម៉ែត្រ ក្រោយពីសាកថ្មបាន 15 នាទី។

អំពីបច្ចេកវិទ្យាវិញ SU7 ត្រូវបានបំពាក់ប្រព័ន្ធអង្គញាណដែលអនុញ្ញាតឱ្យវាបើកបរដោយស្វ័យប្រវត្ត រួមនឹងអេក្រង់កម្សាន្ត 16 អ៊ិញ និងអេក្រង់បង្ហាញព័ត៌មានសម្រាប់អ្នកបើកបរ ក៏ដូចជាប្រព័ន្ធបញ្ជាដែលអាចបង្វិលបានផងដែរ។

យោងតាម Absolute Geeks បើទោះ Xiaomi មិនទាន់បង្ហើបឱ្យដឹងអំពីតម្លៃ ឬថ្ងៃដាក់លក់ជាផ្លូវការ ប៉ុន្តែពួកគេកំពុងឆ្ពោះទៅរកគោលដៅក្លាយជាអ្នកផលិតរថយន្តនៅក្នុង top 5 របស់ពិភពលោក។ ប្រការនេះមានន័យថា Xiaomi SU7 អាចត្រូវបាននាំចេញទៅលក់ក្នុងទីផ្សារបរទេស បើទោះតម្លៃរបស់វាទំនងជាខ្ពស់៕

February 27, 2024

ព្រឹត្តិការណ៍ពិសេសៗពីការសម្ពោធជាផ្លូវការនូវស្មាតហ្វូន OPPO Reno11 Series 5G

កម្មវិធីសម្ពោធស្មាតហ្វូនស៊េរីថ្មី OPPO Reno11 Series 5G បានសម្ពោធជាផ្លូវការហើយ ជាមួយនឹងបរិយាកាសដ៏អធិកអធម ក្រោមការយាងចូលរួមពីភ្ញៀវកិត្តិយសពិសេស ព្រះនាងតូច ជេនណា ជាមួយនឹងវត្តមានទូតសុច្ឆន្ទៈប្រចាំក្រុមហ៊ុន OPPO ទាំង 3 រូបគឺ ពេជ្រ វត្តីសារ៉ាវឌ្ឍី, ថេណា និងរ៉េត ស៊ូហ្សាណា ព្រមទាំងតារាប្រុសស្រីល្បីៗជាច្រើនរូប ដែលបានអញ្ជើញចូលរួមនៅក្នុងកម្មវិធីនេះ។

OPPO បានដាក់បង្ហាញស្មាតហ្វូន OPPO Reno11 Series 5G ជំនាន់ថ្មីរបស់ខ្លួនរហូតទៅដល់ 3 ម៉ូដែល ដែលរួមមាន Reno11 5G, Reno11 F និង Reno11 Pro 5G ទាំងការឌីហ្សាញ ប្រព័ន្ធកាមេរ៉ា កម្លាំងម៉ាស៊ីន និងបច្ចេកវិទ្យា AI គឺសុទ្ធសឹងតែជាបច្ចេកវិទ្យាចុងក្រោយ។

សម្រាប់ការរចនាឌីហ្សាញដ៏ថ្មីស្រឡាងដែលមិនធ្លាប់មានពីមុនមក បានបំផុសគំនិតពីធម្មជាតិពិតៗ ដែលផ្តល់ជូននូវភាពស្រស់ស្រាយរាល់ពេលដែលយើងសម្លឹងមើល។ រីឯ គុណភាពប្រព័ន្ធកាមេរ៉ាថតរូប Portrait បានអាប់ដេតកាន់តែប្រសើរជាងមុន ដែលធ្វើឲ្យអ្នកទទួលបានរូបភាពហាក់ដូចជាថតរូបក្នុងស្ទីឌីយោ ទាំងគុណភាព ការចាប់ប្លង់ និងពន្លឺនោះទេ។ បន្ថែមពីនេះជាមួយមុខងារ 2x optical zoom អាចទាញផ្ទៃខាងក្រោយមកកាន់តែកៀករូបមនុស្ស និងធ្វើឲ្យព្រាលផ្ទៃខាងក្រោយ ធ្វើឲ្យរូបភាព Portrait កាន់តែលេចធ្លោ និងនៅតែអាចរក្សាទម្រង់មុខមនុស្សបានស្អាតធម្មជាតិ មិនធ្វើឲ្យខូចទ្រង់ទ្រាយនោះទេ។ លើសពីនេះ OPPO Reno11 Series 5G ទាំងនៅលើកាមេរ៉ាមុខ និងក្រោយអាចថតវីដេអូបានកម្រិត 4K ។ ចំពោះអេក្រង់វិញ OPPO Reno11 Series 5G បំពាក់ជាមួយអេក្រង់ប្រភេទ 3D គាំទ្រដោយកញ្ចក់ AMOLED Display មានគែមកោង និងមានទំហំ 6.7Inch ព្រមទាំងមានសមត្ថភាពខ្ពស់អាចបង្ហាញរូបភាព និងវីដេអូចេញបានក្នុងកម្រិត FHD+ ថែមទៀតផង។ ចំណែកថាមពលថ្មវិញ Reno11 និង Reno11 F មានកម្លាំង 5000mAh និងគាំទ្របច្ចេកវិទ្យា 67W SUPERVOOC ដោយឡែក Reno11 Pro មានកម្លាំងថ្ម 4600mAh និងគាំទ្របច្ចេកវិទ្យា 80W SUPERVOOC ។

ក្រៅពីនេះ OPPO ក៏មានសម្ពោធប្រព័ន្ធប្រតិបត្តិការថ្មី ColorOS 14 ដែលមានមុខងារពិសេសៗជាច្រើនដូចជា Smart Image Matting, File Dock, Smart Touch និងមុខងារ LinkBoost ។ លើសពីនេះទៅទៀត ក៏មានការប្រកាសផលិតផល IOT ដូចជា OPPO Pad Neo, OPPO Watch X និងកាសឥតខ្សែ OPPO Enco Bud2 ពណ៌ថ្មីផងដែរ។

សម្រាប់ថេប្លេតជំនាន់ថ្មី OPPO Pad Neo រចនាមកជាមួយអេក្រង់ ReadFit កម្រិត 2.4K ទំហំ 14” និងអាចប្រើប្រាស់ស៊ីមកាតដោយគាំទ្រសេវា 4G LTE និង Wifi ជាមួយថាមពលថ្មធំ 8000mAh ដែលមានបច្ចេកវិទ្យាសាកថ្មរហ័ស 33W SUPERVOOC ព្រមទាំង RAM 16GB ((8+8GB) និង ROM 128GB ផ្តល់ជូនលោកអ្នកនូវភាពរីករាយគ្មានដែនកំណត់គ្រប់ទីកន្លែង។
សម្រាប់ OPPO Enco Buds2 ជាកាសឥតខ្សែជំនាន់ថ្មីនឹងផ្តល់ឲ្យអ្នកនូវបទពិសោធសំឡេងដ៏អស្ចារ្យឥតដែនកំណត់ និងអាចឲ្យអ្នកប៉ះបញ្ជាផ្ទាល់លើកាស រាល់ពេលចង់ផ្លាស់ប្តូរបទចម្រៀង បន្ថយឬបន្ថែមសំឡេង និងទទួលការហៅចូលបានយ៉ាងងាយស្រួលដោយមិនចាំបាច់ចុចផ្ទាល់លើទូរស័ព្ទ។
សម្រាប់ OPPO Watch X នាឡិកាវៃឆ្លាតជំនាន់ថ្មី ដែលមានរចនាបថរូបរាងកាលីបស្រស់ស្អាត ទាន់សម័យ កម្រាស់ស្តើង ស័ក្កសមជាមួយជីវិតប្រចាំថ្ងៃ ដោយភ្ជាប់មកនូវមុខងារប្រើប្រាស់ទំនើបៗជាច្រើន។

តោះ! កក់ទុកមុនចាប់ពីថ្ងៃនេះរហូតដល់ថ្ងៃទី02 មីនា 2024 លើស្មាតហ្វូនស៊េរីថ្មី OPPO Reno11 Series 5G ទាំង 3 ម៉ូដែល Reno11 Pro 5G $599 | Reno11 5G $449 | Reno11 F 5G $339 នឹងទទួលបានកាដូរួមមានដូចជា ៖

រាល់ការកក់ទុកមុន Reno11 Pro 5G | Reno11 5G ថែមជូន ៖
បណ្ណប្តូរអេក្រង់ 1ឆ្នាំ តម្លៃ $89
កាតាបស្ពាយដ៏ស្រស់ស្អាត តម្លៃ $39
ស៊ីមស្មាតលេខពិសេស Bronze តម្លៃ $54
រាល់ការកក់ទុកមុន Reno11 F 5G ថែមជូន ៖
បណ្ណប្តូរអេក្រង់ 1ឆ្នាំ តម្លៃ $69
កាតាបស្ពាយដ៏ស្រស់ស្អាត តម្លៃ $39
ស៊ីមស្មាតលេខពិសេស Bronze តម្លៃ $54

សម្រាប់ផលិតផល IoT រួមមាន OPPO Pad Neo តម្លៃ $299 | OPPO Watch X | OPPO Enco Buds2 អាចរកទិញបានចាប់ពីថ្ងៃទី03 ខែមីនា 2024 នេះតទៅ៕

February 24, 2024

គម្រោងព្រះពុទ្ធប្បដិមាខ្ពស់ជាងគេនៅកម្ពុជា ទទួលបានការនិមន្តមកទតពីព្រះប្រធានកិត្តិយសនៃសម្ព័ន្ធពុទ្ធសាសនិកពិភពលោក

ព្រះប្រធានកិត្តិយសសម្ព័ន្ធពុទ្ធសាសនិកពិភពលោក World Alliance of Buddhists – WAB កាលពីពេលថ្មីៗនេះ បាននិមន្តមកពីប្រទេសភូមា ដើម្បីទតការដ្ឋានសាងសង់សំណង់ ព្រះពុទ្ធប្បដិមា ដែលខ្ពស់ជាងគេបង្អស់នៅកម្ពុជា។

យោងតាមសមាគមឧកញ៉ាកម្ពុជា អ្នកឧកញ៉ា សុខ គង់ ទីប្រឹក្សាជាន់ខ្ពស់នៃសមាគមឧកញ៉ាកម្ពុជា រួមនឹងឧកញ៉ា និងបុគ្គលល្បីឈ្មោះមួយចំនួនទៀត បានអញ្ជើញទទួលបដិសណ្ឋារកិច្ចចំពោះការនិមន្តមកដល់របស់សម្តេចសង្ឃព្រះនាម Ven. Sayadaw Pandawontha (Aungzabu) Mahasadhamajotikadaja ព្រះប្រធានកិត្តិយសសម្ព័ន្ធពុទ្ធសាសនិកពិភពលោក World Alliance of Buddhists – WAB និមន្តមកពីប្រទេសភូមា (មីយ៉ាន់ម៉ា) ដើម្បីទតការដ្ឋានសាងសង់សំណង់ ព្រះពុទ្ធប្បដិមាកម្ពស់ 108 ម៉ែត្រ នៅលើភ្នំបូកគោ។

គម្រោងសាងសង់ព្រះពុទ្ធប្បដិមាកម្ពស់ 108 ម៉ែត្រ នៅលើខ្នងភ្នំបូកគោ ស្ថិតនៅក្នុងឧទ្យានជាតិព្រះមុនីវង្ស «បូកគោ» នេះ ជាគំនិតផ្តួចផ្តើមរបស់អ្នកឧកញ៉ា សុខ គង់។ ព្រះពុទ្ធប្បដិមានេះ នឹងខ្ពស់ជាងគេនៅកម្ពុជាហើយក៏នឹងស្ថិតក្នុងចំណោមព្រះពុទ្ធប្បដិមាខ្ពស់ៗនៅលើពិភពលោក។ នេះបើតាមទំព័រ Preahputhpadima108monbokor។

ទំព័រ Preahputhpadima108monbokor ឱ្យដឹងថា ព្រះពុទ្ធប្បដិមានេះមានទម្រង់ជា ព្រះពុទ្ធមារវិជ័យ ឬ ផ្ចាញ់មារនៃរចនាប័ទ្មបាយ័ន ដែលជារចនាប័ទ្មកំពូលនៃព្រះពុទ្ធសាសនាក្នុងរជ្ជកាលព្រះបាទជ័យវ័រ្មនទី 7 នាសតវត្សរ៍ទី 13។

ព្រះពុទ្ធប្បដិមានេះ នឹងសាងសង់អំពីបេតុងអាម៉េ មានពណ៌មាស បែរព្រះភក្រ្តទៅទិសខាងកើត មានកម្ពស់108 ម៉ែត្រ ពីនីវ៉ូសូន្យនៃខឿនផ្ទាល់ដីដល់កំពូលព្រះមោលី ដែលតំណាងមង្គលទាំង 108 របស់ព្រះអង្គ ទ្រង់គង់ភ្នែននៅលើបល្ល័ងផ្កាឈូករាងរង្វង់(វដ្តសង្ខារ) ដែលទម្រង់ក្បាច់រចនាបល្ល័ងនេះ យកលំនាំតាមផ្នែកមួយរបស់សសរពេជ្រប្រាសាទដំរីក្រាបនៃរចនាប័ទ្មគូលែន ក្នុងរជ្ជកាលព្រះបាទជ័យវ័រ្មនទី 2 នាសតវត្សរ៍ទី 9។

ចំពោះខឿនជាន់ទី 1 មានក្តារបែន ឬ រានហាលនៅចំពីមុខ សម្រាប់ប្រារព្ធពិធីសាសនា ហើយមានព្រះពុទ្ធរូប 7 អង្គ ព្រះអសីតិសាវ័ក 5 អង្គ និងព្រះ 2 អង្គទៀត សរុបចំនួន 12 អង្គ (តំណាងឱ្យខែឆ្នាំទាំង 12) គង់ក្នុងបុស្បុក តម្កល់ជុំវិញព្រះពុទ្ធប្បដិមាអង្គធំ និងមានជណ្តើរចំនួន 8 (តំណាងឱ្យទិសទាំង 8 និងអរិយមគ្គទាំង 8) សម្រាប់ឡើងឆ្ពោះទៅកាន់ទីសក្ការៈនៃព្រះពុទ្ធប្បដិមា។

ជារួម គម្រោងសាងសង់ព្រះពុទ្ធប្បដិមាដែលនឹងត្រូវចំណាយពេលវេលាសាងសង់ប្រមាណ 4 ឆ្នាំនេះ គឺជាការរក្សានូវអត្តសញ្ញាណជាតិនៃវប្បធម៌សាសនា ដោយឈរលើមូលដ្ឋានរក្សាចាស់ បង្កើតថ្មី៕

January 30, 2024

រូបភាពដំបូងៗរបស់យានអវកាសជប៉ុននៅលើឋានព្រះចន្ទ

យានចុះចត SLIM បានទទួលជោគជ័យក្នុងការចុះចតយ៉ាងត្រឹមត្រូវនៅលើផ្ទៃនៃឋានព្រះចន្ទ និងបានបញ្ជូនទិន្នន័យមកកាន់ផែនដី បើទោះជួបបញ្ហាផ្ទាំងសូឡាមិនផលិតអគ្គិសនី និងត្រូវផ្អាកដំណើរការបណ្ដោះអាសន្ន។

អង្គការស្រាវជ្រាវអវកាសជប៉ុន (JAXA) នាថ្ងៃនេះបានប្រកាសថា យាន SLIM បានចុះចតនៅចម្ងាយប្រហែល 55 ម៉ែត្រប៉ុណ្ណោះ ពីទីតាំងដែលបានកំណត់ ព្រមទាំងបានប្រកាសបង្ហាញរូបភាពដំបូងៗមួយចំនួនពីបេសកកម្មនេះ។

ក្នុងចំណោមរូបថតដំបូងៗដែល JAXA បានប្រកាស រូបដែលត្រូវបានថតដោយកាមេរ៉ា SORA-Q បង្ហាញពីស្ថានភាពរបស់ SLIM។ យានចុះចតនេះនៅរក្សាបានទ្រង់ទ្រាយដើម ស្ថិតនៅលើផ្ទៃដីពណ៌ប្រផេះ និងមានដុំថ្មច្រើន ខណៈឯនាយគឺជាជម្រាលភ្នំលើឋានព្រះចន្ទ។

«យោងតាមការគណនាបច្ចុប្បន្ន យើងកំពុងត្រៀមសម្រាប់ការតភ្ជាប់សកម្មភាពរបស់យានចុះចតនេះប្រហែលនៅថ្ងៃទី 01 កុម្ភៈ» JAXA ឱ្យដឹងដូច្នេះ។

យានអវកាស SLIM ឬហៅថា Moon Sniper បានចុះចតលើឋានព្រះចន្ទដោយជោគជ័យកាលពីវេលាម៉ោង 22 និង 20 នាទី ថ្ងៃទី 19 មករា 2024 ជួយឱ្យជប៉ុនក្លាយជាប្រទេសទីប្រាំដែលមានយានធ្វើសកម្មភាពនៅលើទីឋានរណបធម្មជាតិរបស់ផែនដី បើទោះជួបបញ្ហាផ្ទាំងសូឡាមិនផលិតអគ្គិសនី និងត្រូវផ្អាកដំណើរការ បន្ទាប់ពីចុះចតបានតែប៉ុន្មានម៉ោងប៉ុណ្ណោះ៕

January 25, 2024

ផលិតផលរូបនាគកំពុងទាក់ទាញអតិថិជននៅប្រទេសចិន

ជិតដល់រដូវបុណ្យចូលឆ្នាំប្រពៃណីជាតិចិន គេឃើញថា គ្រឿងអលង្ការមាស ឬផ្ទាំងរូបភាពបិទទូរស័ព្ទដែលមានរូបនាគនៅប្រទេសចិន កំពុងតែលក់ដាច់ខ្លាំង។

តួលេខរបស់ផ្សារអនឡាញ Taobao (ចិន) បង្ហាញថា ចំនួនលើកនៃការស្វែងរកបណ្ដាផលិតផលដែលទាក់ទងនឹងរូបនាគនៅលើថ្នាលនេះ បានកើនឡើងច្រើនជាងមុន 640 ដង រាប់ចាប់ពីថ្ងៃទី 27 ធ្នូ 2023 ដល់ 02 មករា 2024។ ក្នុងនោះ ចំនួនលើកនៃការស្វែងរកគ្រឿងអលង្ការមានរូបនាគ បានកើនឡើងច្រើនជាងមុនរហូតដល់ 500 ដង។

«នាគត្រូវបានចាត់ទុកថាជានិមិត្តរូបនៃអំណាច និងឋានៈក្នុងវប្បធម៌ចិន។ ចំណែកមាសគឺជាគ្រឿងអលង្ការផង និងជាឧបករណ៍សម្រាប់ទុនដាក់ទ្រព្យសម្បត្តិផង តែងតែត្រូវបានទិញជារៀងរាល់រដូវបុណ្យចូលឆ្នាំប្រពៃណីជាតិចិន។ ដូច្នេះហើយ ទើបមានមនុស្សជាច្រើនទិញគ្រឿងអលង្ការធ្វើពីមាសមានរូបនាគ ដើម្បីបួងសួងសូមភាភជ័យក្នុងឆ្នាំថ្មី» Xie Zhihui អនុប្រធានទទួលបន្ទុកផ្នែកលក់នៅហាងមាស Chow Tai Seng បានប្រាប់ China Daily ដូច្នេះ។

មិនមែនតែនៅប្រទេសចិននោះទេ បណ្ដាយីហោល្បីៗលើពិភពលោកក៏កំពុងចាប់យកនិន្នាការខាងលើផងដែរ។ ក្រុមហ៊ុនគ្រឿងសម្អាង Shu Uemura (ជប៉ុន) ក៏បានដាក់លក់ប្រភេទក្រែមលាបបបូរមាត់មាន ពិសេសមួយដែលមានកំណត់បរិមាណ ក្នុងនោះ សម្បករបស់ផលិតផលនេះមានរូបនាគពណ៌លឿង។ ចំណែក Fila ក៏ដាក់លក់អាវប៉ាក់រូបនាគ ខណៈ Shanghai Disney Resort ចេញលក់របស់លេងកម្សាន្តធ្វើពីក្រណាត់មានរូបនាគផងដែរ៕

January 22, 2024

Tag: ពណ៌