ប្រធាន - La Reine Media

ចិននាំអវកាសចរស៊ីវិលដំបូងឡើងទៅកាន់ស្ថានីយអវកាស Tiangong

Gui Haichao ដែលជាសាស្ត្រាចារ្យនៃសាកលវិទ្យាល័យអវកាសប៉េកាំង នឹងក្លាយជាអ្នកអវកាសស៊ីវិលដំបូងគេរបស់ប្រទេសចិន ដែលហោះឡើងទៅកាន់ទីអវកាស។

តាមផែនការ Gui Haichao នឹងរួមដំណើរជាមួយអ្នកអវកាស Jing Haipeng និង Zhu Yangzhu របស់យានអវកាស Shenzhou 16 ហោះឡើងទៅកាន់ស្ថានីយអវកាស Tiangong ពីមជ្ឈមណ្ឌលបាញ់បង្ហោះផ្កាយរណប Jiuquan នៅភាគពាយព្យប្រទេសចិន នៅវេលាម៉ោង 09:31 ថ្ងៃទី 30 ឧសភា ម៉ោងនៅប៉េកាំង (ម៉ោងប្រហែល 8 កន្លះនៅភ្នំពេញ)។ មុននោះ អ្នកអវកាសចិនដែលបានហោះឡើងទៅកាន់ទីអវកាសគឺសុទ្ធតែជាមនុស្សរបស់កងទ័ពចិន (PLA)។

អ្នកនាំពាក្យរបស់ស្ថាប័នអវកាសមានមនុស្សបើកបររបស់ចិន (CMSA) បានឱ្យដឹងថា សាស្ត្រាចារ្យ Gui Haichao ទទួលបន្ទុកក្នុងការពិសោធផ្នែកវិទ្យាសាស្ត្រនៅលើស្ថានីយអវកាសចិន Tiangong។ អ្នកវិភាគ Chen Lan អះអាងថា ការចូលរួមរបស់ Gui គឺជារឿងសំខាន់ ព្រោះថា កន្លងមកមានតែអ្នកអវកាសជំនាញខាងបច្ចេកទេសប៉ុណ្ណើ ពុំទាន់មានអ្នកវិទ្យាសាស្ត្រដែលមានឯកទេសក្នុងការសិក្សាស្រាវជ្រាវពិតប្រាកដ។

ប្រធានក្រុមហោះហើររបស់យាន Shenzhou 16 គឺ Jing Haipeng នឹងបំពេញបេសកកម្មអវកាសលើកទីបួន។ សមាជិកចុងក្រោយរបស់ជើងហោះហើរលើកនេះគឺវិស្វករ Zhu Yangzhou។ តាមគម្រោង អ្នកអវកាស Jing, Gui និង Zhu នឹងធ្វើការនៅលើស្ថានីយអវកាស Tiangong ក្នុងរយៈពេលប្រហែល 5 ខែ។

តាមផែនការ ស្ថានីយអវកាស Tiangong នឹងធ្វើសកម្មភាពក្នុងគន្លងតារាវិថីផែនដីនៅលើកម្ពស់ពី 400 ទៅ 450 គីឡូម៉ែត្រ យ៉ាងតិច 10 ឆ្នាំ។ ហេដ្ឋារចនាសម្ព័ន្ធស្ថានីយអវកាសដែលមានរាងជាអក្សរ T នេះ ត្រូវបានដំឡើងរួចរាល់កាលពីឆ្នាំ 2022។ មុននោះ ក្នុងឆ្នាំ 2011 ចិនត្រូវបានបណ្ដេញចេញពីស្ថានីយអវកាសអន្តរជាតិ នៅពេលសហរដ្ឋអាម៉េរិកមិនអនុញ្ញាតឱ្យណាសាសហការជាមួយប្រទេសនេះ។

ចិនមិនមានគម្រោងប្រើប្រាស់ស្ថានីយ Tiangong សម្រាប់កិច្ចសហប្រតិបត្តិការទូទាំងសកលលោកក្នុងទ្រង់ទ្រាយធំដូច ISS ប៉ុន្តែ នៅតែត្រៀមខ្លួនសហការជាមួយបរទេស។

May 30, 2023

បច្ចេកវិទ្យា «បាញ់បញ្ជូនអគ្គិសនីពីអវកាសមកកាន់ផែនដី» កំពុងមានការប្រកួតប្រជែងខ្លាំង

ក្រុមអ្នកវិទ្យាសាស្ត្រនៅសាកលវិទ្យាល័យ Kyoto នឹងធ្វើតេស្តក្នុងការប្រើប្រាស់ផ្កាយរណបបាញ់បញ្ជូនអគ្គិសនីបានពីព្រះអាទិត្យ មកកាន់ផែនដី ក្នុងទម្រង់រលកម៉ៃក្រូវេវ នៅឆ្នាំ 2025។

ការប្រណាំងប្រជែងគ្នាអភិវឌ្ឍបច្ចេកវិទ្យាបាញ់បញ្ជូនអគ្គិសនីព្រះអាទិត្យដែលប្រមូលបានពីទីអវកាស មកកាន់ផែនដី កំពុងឡើងកម្ដៅខ្លាំង។ នៅប្រទេសជប៉ុន ក្រុមហ៊ុនរបស់ Hiroshi Matsumoto អតីតនាយកសាកលវិទ្យាល័យ Kyoto កំពុងនាំមុខគេនៅក្នុងការស្រាវជ្រាវអំពីបច្ចេកវិទ្យានេះ។ បន្ទាប់មកគឺសាស្ត្រាចារ្យ Naoki Shinohara នៅសាកលវិទ្យាល័យ Kyoto ក៏បន្តការស្រាវជ្រាវ។ នេះបើតាម Nikkei ចុះផ្សាយកាលពីថ្ងៃទី 27 ឧសភា។

ឆ្នាំ 2009 ក្រុមរបស់ Shinohara បានប្រើប្រាស់បាឡុងហោះដើម្បីបាញ់បញ្ជូនអគ្គិសនីពីកម្ពស់ 30 ម៉ែត្រ មកកាន់ទូរស័ព្ទចល័តនៅលើដី។ នៅក្នុងឆ្នាំដដែល Shinohara ក៏ត្រូវបានជ្រើសតាំងជាប្រធានក្រុមប្រឹក្សាបច្ចេកវិទ្យារបស់គម្រោងពីក្រសួងសេដ្ឋកិច្ច ពាណិជ្ជកម្ម និងឧស្សាហកម្មរបស់ប្រទេសជប៉ុន ដើម្បីអភិវឌ្ឍមធ្យោបាយផ្គត់ផ្គង់អគ្គិសនីដោយមិនប្រើខ្សែ។ ក្រុមអ្នកវិទ្យាសាស្ត្រក្នុងគម្រោងនេះបានទទួលជោគជ័យក្នុងការធ្វើតេស្តបាញ់បញ្ជូនអគ្គិសនីក្នុងទម្រង់ម៉ៃក្រូវេវរលកទទឹង (transverse waves) កាលពីឆ្នាំ 2015 និងក្នុងទម្រម៉ៃក្រូវេវរលកបណ្ដោយ (longitudinal waves) កាលពីឆ្នាំ 2018 ក្នុងរយៈចម្ងាយពីប្រហែល 40 ម៉ែត្រ។ នាពេលខាងមុខ ពួកគេនឹងធ្វើតេស្តបាញ់បញ្ជូនអគ្គិសនីក្នុងទម្រម៉ៃក្រូវេវរលកបណ្ដោយពីចម្ងាយចាប់ពី 1 ដល់ 5 គីឡូម៉ែត្រ។

បច្ចុប្បន្ន ក្រុមអ្នកវិទ្យាសាស្ត្រខាងលើកំពុងដាក់គោលដៅធ្វើតេស្តការបាញ់បញ្ជូនអគ្គិសនីពីអវកាសមកកាន់ផែនដីនៅឆ្នាំ 2025។ ពួកគេនឹងប្រើប្រាស់ផ្កាយរណបខ្នាតតូចដើម្បីបាញ់បញ្ជូនអគ្គិសនីមកកាន់ទីតាំងទទួលនៅលើដីដែលមានគម្លាតពីគ្នារាប់រយគីឡូម៉ែត្រ។

រូបភាពបង្ហាញពីការបាញ់បញ្ជូនរលកម៉ៃក្រូវេវអវកាសមកកាន់ស្ថានីយទទួលនៅលើដី

គំនិតស្ដីពីការប្រមូលថាមពលព្រះអាទិត្យក្នុងទីអវកាស ត្រូវបានអ្នកវិទ្យាសាស្ត្រអាម៉េរិកលើកឡើងកាលពីឆ្នាំ 1968។ មធ្យោបាយរបស់ពួកគេគឺការបាញ់បង្ហោះផ្ទាំងសូឡាឡើងទៅកាន់ទីអវកាសដើម្បីផលិតអគ្គិសនីពីកម្ដៅព្រះអាទិត្យនៅលើកម្ពស់ 36,000 គីឡូម៉ែត្រ។ ថាមពលព្រះអាទិត្យត្រូវបានបំប្លែងទៅជារលកម៉ៃក្រូវេវ និងបាញ់បញ្ជូនមកកាន់ស្ថានីយទទួលនៅលើដី រួចបំប្លែងវាមកជាអគ្គិសនីវិញ។ រលកម៉ៃក្រូវេវអាចត្រូវបានបាញ់បញ្ជូនឆ្លងកាត់ពពក និងបង្កើតបានជាប្រភពផ្គត់ផ្គង់អគ្គិសនីដែលមានស្ថិរភាព មិនថាថ្ងៃ ឬយប់ ក្ដៅ ឬភ្លៀង៕

May 29, 2023

ទិដ្ឋភាពខាងក្នុងយន្តហោះដឹកអ្នកដំណើរដំបូងដែលផលិតដោយប្រទេសចិន

យន្តហោះដឹកអ្នកដំណើរដំបូងដែលផលិតដោយប្រទេសចិន និងមានឈ្មោះថា C919 ត្រូវបានអ្នកដំណើរវាយតម្លៃថា «ធំទូលាយល្មម» ខណៈដែលពីឡុតវាយតម្លៃថាជាយន្តហោះ «ល្អបំផុត»។

នៅឯព្រលានយន្តហោះអន្តរជាតិ Hongqiao កាលពីថ្ងៃទី 28 ឧសភា 2023 ជើងហោះហើរលេខ MU9191 របស់ China Eastern Airlines បានដឹកអ្នកដំណើរ 130 នាក់ ហោះឆ្ពោះទៅកាន់រដ្ឋធានីប៉េកាំង។

«ខ្ញុំធ្វើដំណើរតាមយន្តហោះជាញឹកញាប់។ ខ្ញុំយល់ថា កៅអីធំទូលាយល្មម ធ្វើឱ្យមានអារម្មណ៍ស្រួលខ្លួន» អ្នកស្រី Yu ដែលជាអ្នកដំណើរមួយរូប យល់ឃើញដូច្នេះ។

យន្តហោះ C919 ក៏បានចុះចតលើព្រលានយន្តហោះប៉េកាំង និងត្រូវបានទទួលស្វាគមន៍ដោយការបាញ់ទឹក ក្រោយពីធ្វើដំណើររយៈពេលពីរម៉ោងពីព្រលានយន្តហោះ Hongqiao នៅសៀងហៃ។

Zhao Hongbing ដែលជាប្រធានក្រុមហោះហើរ និយាយថា «យើងបានធ្វើការហោះហើរសាកល្បងជាង 100 ជើង ដោយហោះឡើង និងចុះចតរាប់សិបលើក។ និយាយរួម ខ្ញុំគិតថា យន្តហោះនេះល្អណាស់»។

C919 ត្រូវបានអ្នកដំណើរវាយតម្លៃថា «ធំទូលាយល្មម» ខណៈដែលពីឡុតវាយតម្លៃថាជាយន្តហោះ «ល្អបំផុត»

ពិធីប្រគល់វិញ្ញាបនបត្រទទួលស្គាល់ថា យន្តហោះ C919 សម្រេចបានស្ដង់ដានៅទីក្រុងប៉េកាំង ត្រូវបានធ្វើឡើងកាលពីថ្ងៃទី 29 កញ្ញា ឆ្នាំ 2019។ វិញ្ញាបនបត្រនេះត្រូវបានប្រគល់ដោយអាជ្ញាធរគ្រប់គ្រងអាកាសចរណ៍ស៊ីវិលចិន។

យន្តហោះដឹកអ្នកដំណើរដំបូងដែលផលិតដោយប្រទេសចិន មានឈ្មោះថា C919

«យើងមានម្ចាស់ការទាំងស្រុងលើដំណើរការនៃការរចនា ផលិត ធ្វើតេស្ត ត្រួតពិនិត្យ និងទទួលស្គាល់ ដែលនេះគឺជាសញ្ញាមួយបង្ហាញថា ប្រទេសចិនឈានចូលក្នុងក្រុមប្រទេសផលិតលំដាប់ខ្ពស់» លោក Zhang Yanzhong ទីប្រឹក្សាកម្មវិធី C919 នៃបណ្ឌិត្យសភាវិទ្យាសាស្ត្រ និងបច្ចេកវិទ្យាចិន អះអាងដូច្នេះ៕

May 29, 2023

បន្ទាប់ពីរួមនឹង PSG លើកពាន Ligue 1 កំពូលតារាបាល់ទាត់អាហ្សង់ទីនក៏បាន «បាត់ខ្លួន»

ក្រោយពីបានចូលរួមបញ្ចេញថ្វីជើងជាមួយនឹងក្លឹប PSG ដណ្ដើមបានពាន Ligue 1 កំពូលកីឡាករ Messi បែរជា «បាត់ខ្លួន» ប៉ុន្តែ ក្រោយមកទើបអ្នកគាំទ្រដឹងអំពីទីតាំងដែល M10 បានទៅ។

កាលពីចុងសប្ដាហ៍កន្លង Messi បានដើរតួជាវីរបុរស ដោយរកបានមួយគ្រាប់ក្នុងការប្រកួតដែលទទួលបានលទ្ធផលស្មើ 1-1 រវាងក្លឹប PSG និង Strasbourg ជួយឱ្យក្រុមនៅប៉ារីសមានពិន្ទុគ្រប់គ្រាន់ដើម្បីលើកពាន Ligue 1 បានលឿនជាងមួយជុំ។

រដូវកាលនេះ Messi គឺជាកីឡាករសំខាន់លំដាប់កំពូលរបស់ PSG ទន្ទឹមនឹង Mbappe។ ក្រោយពីចូលទាត់បាន 40 ប្រកួត M10 រកបាន 21 គ្រាប់ និងបង្កឱកាសបាន 20 គ្រាប់។

លទ្ធផលខាងលើជួយឱ្យ Messi មានវត្តមានក្នុងក្រុមលេចធ្លោរបស់ Ligue 1 រដូវកាល 2022/2023 សម្រាប់ខ្សែប្រយុទ្ធស្លាបស្ដាំ។ ប៉ុន្តែ ជំនួសឱ្យការរួមជាមួយ Mbappe តំណាងឱ្យ PSG នៅក្នុងពិធីប្រគល់រង្វាន់របស់សមាគមកីឡាករអាជីពបារាំង (UNFP) នាពេលកន្លែង Messi បែរជា «បាត់ខ្លួន» ជាថ្មី។

យ៉ាងណាក៏ដោយ ក្រោយមកអ្នកគាំទ្រក៏បានដឹងអំពីទីតាំងដែល M10 បានទៅ។ ជាក់ស្ដែង Messi ត្រូវគេឃើញថា បានទៅកាន់ Barcelona ដើម្បីទស្សនាការសម្ដែងរបស់ក្រុមតន្ត្រីអង់គ្លេស Coldplay ជំនួសឱ្យការចូលរួមពិធីប្រគល់រង្វាន់នៅប្រទេសបារាំង ក្នុងនាមជាកីឡាករ PSG។

Messi មិនចូលរួមពិធីប្រគល់រង្វាន់ជាមួយ PSG ដើម្បីទៅកាន់ Barcelona មើលការប្រគំតន្ត្រីជាមួយមិត្តចាស់ Fabregas

វត្តមានរបស់ Messi ធ្វើឱ្យអ្នកគាំទ្រជាច្រើនសប្បាយចិត្ត ពិសេសក្រុមអ្នកគាំទ្ររបស់ក្លឹប Barca នៅអេស្ប៉ាញ។ យោងតាមសារព័ត៌មានអេស្ប៉ាញ El Pulga អាចនឹងត្រលប់ទៅកាន់កីឡដ្ឋាន Camp Nou ក្នុងទម្រង់សេរីនៅរដូវក្ដៅនេះ។

ទំព័រ AS បានឱ្យដឹងថា ការចាកចេញរបស់ Sergio Busquets និង Jordi Alba បន្ទាប់ពីរដូវកាលនេះ អាចនឹងនាំឱ្យ Lionel Messi ក្លាយជាប្រធានក្រុមរបស់ Barca បើសិនជាគាត់ព្រមវិលវិញ។ ក្លឹបនៅកាតាឡូញ៉ា ក៏គ្រោងនឹងអនុញ្ញាតឱ្យ Messi ទទួលបានប្រាក់បៀវត្សរ៍ខ្ពស់ជាងគេនៅក្នុងក្រុម ពោលគឺខ្ពស់ជាងបន្តិចធៀបនឹង Lewandowski (20 លានអឺរ៉ូ/រដូវ មុនបង់ពន្ធ)៕

May 29, 2023

ដើម្បីត្រៀមសម្រាប់ការប្រកួតជាមួយជើងឯក World Cup ឥណ្ឌូណេស៊ីផ្ដល់សញ្ជាតិដល់កីឡាករបរទេសច្រើននាក់

ឥណ្ឌូណេស៊ីបន្តអនុវត្តគោលនយោបាយដែលមានតាំងពីឆ្នាំ 2021 ដោយការផ្ដល់សញ្ជាតិដល់កីឡាករបាល់ទាត់វ័យក្មេងពីររូបដែលកំពុងទាត់នៅប្រទេសហូឡង់ ហើយពួកគេនឹងបង្ហាញខ្លួនក្នុងការប្រកួតមិត្តភាពក្របខណ្ឌ FIFA Days នៅខែមិថុនា 2023។

កីឡាករពីររូបដែលទើបតែទទួលបានសញ្ជាតិឥណ្ឌូណេស៊ី រួមមាន Ivar Jenner អាយុ 19 ឆ្នាំ កំពុងលេងជាខ្សែបម្រើរបស់ក្លឹប FC Utrecht និង Rafael Struick អាយុ 20 ឆ្នាំ កំពុងលេងជាខ្សែប្រយុទ្ធឱ្យក្លឹប ADO Den Haag។ អ្នកទាំងពីរសុទ្ធតែមានជីដូនជីតាជាជនជាតិឥណ្ឌូណេស៊ី និងបានស្បថចូលក្រុមជម្រើសជាតិក្នុងនាមជាពលរដ្ឋឥណ្ឌូណេស៊ី ចាប់ពីថ្ងៃទី 22 ឧសភា។

សហព័ន្ធបាល់ទាត់ឥណ្ឌូណេស៊ី (PSSI) បានត្រៀមផ្ដល់សញ្ជាតិដល់ Jenner និង Struick កាលពីខែមុនដើម្បីឱ្យពួកគេចូលរួមក្នុងក្រុម U20 ទៅទាត់នៅ U20 World Cup លើទីលានដែលឥណ្ឌូណេស៊ីធ្វើជាម្ចាស់ផ្ទះ។ ប៉ុន្តែ ឥណ្ឌូណេស៊ីត្រូវបាន FIFA ដកហូតសិទ្ធរៀបចំការប្រកួត ធ្វើឱ្យក្រុម U20 របស់ពួកគេខកខានមិនបានទាត់នៅពានរង្វាន់នេះ និងបានពន្យារពេលលើការផ្ដល់សញ្ជាតិដល់កីឡាករពីររូបខាងលើ។

ក្រុមបាល់ទាត់ជម្រើសជាតិឥណ្ឌូណេស៊ី គ្រោងនឹងប្រកួតជាមួយប៉ាឡេស្ទីន និងអាហ្សង់ទីន នៅថ្ងៃទី 14 និង 19 មិថុនាខាងមុខ នៅហ្សាការតា។ គ្រូបង្វឹក Shin Tae-yong មិនទាន់បង្ហាញបញ្ជីឈ្មោះកីឡាករចុងក្រោយ ប៉ុន្តែនឹងប្រមូលកម្លាំងចាប់ពីថ្ងៃទី 05 មិថុនា។

ក្រៅពី Jenner និង Struick PSSI ក៏មានគម្រោងផ្ដល់សញ្ជាតិដល់ Justin Hubner អាយុ 19 ឆ្នាំ សញ្ជាតិហូឡង់ ជាខ្សែការពាររបស់ Wolves លេងនៅពានរង្វាន់លីគកំពូលអង់គ្លេសផងដែរ។

ប្រធាន PSSI លោក Erick Thohir (ឆ្វេង), Rafael Struick (កណ្ដាល) និង Ivar Jenner នៅហ្សាការតា កាលពីថ្ងៃទី 24 ឧសភា 2023

PSSI បានជំរុញគោលនយោបាយផ្ដល់សញ្ជាតិដល់កីឡាករមានឈាមជ័រជាជនជាតិឥណ្ឌូណេស៊ី តាំងពីឆ្នាំ 2021។ កីឡាករជាច្រើនរូបដែលត្រូវបានផ្ដល់សញ្ជាតិទៅតាមគោលនយោបាយនេះ មានជាអាទិ៍ Jordi Amat (ធ្លាប់លេងនៅពានរង្វាន់ La Liga), Elkan Baggott លេងឱ្យ Ipswich Town នៅពានរង្វាន់ League One (អង់គ្លេស) ឬ Marc Klok និង Sandy Walsh ។ល។ PSSI ក៏ផ្ដល់សញ្ជាតិដល់កីឡាករដែលមិនមានឈាមជ័រជាជនជាតិឥណ្ឌូណេស៊ីផងដែរ ក្នុងនោះមានដូចជា ខ្សែប្រយុទ្ធ Ilija Spasojevic ជាដើម។

ថ្មីៗនេះ បាល់ទាត់ឥណ្ឌូណេស៊ីទទួលបានជោគជ័យមួយចំនួន រួមមាន មេដាយមាសស៊ីហ្គេមលើកទី 32 និងដណ្ដើមបានជើងឯក U16 អាស៊ីអាគ្នេយ៍ 2022។ បាល់ទាត់ឥណ្ឌូណេស៊ីក៏កំពុងឆ្ពោះទៅរកជោគជ័យធំជាងនេះនៅវគ្គជម្រុះ World Cup 2026, Asian Cup 2023 និង AFF Cup ផងដែរ។

ការអញ្ជើញក្រុមជម្រើសជាតិអាហ្សង់ទីនមកប្រកួតមិត្តភាពនៅថ្ងៃទី 19 មិថុនា គឺជាសកម្មភាពលើកកម្ពស់មុខមាត់របស់វិស័យបាល់ទាត់ឥណ្ឌូណេស៊ី។ PSSI ក៏បានឱ្យដឹងថា រៀងរាល់ឆ្នាំ ប្រទេសនេះនឹងអញ្ជើញក្រុមជម្រើសជាតិល្បីៗមកប្រកួតមិត្តភាព ក្នុងនោះមាន ព័រទុយហ្កាល់ ប្រស៊ីល ឬម៉ារ៉ុក។ល។

May 29, 2023

ក្រុមហ៊ុនអាម៉េរិកអភិវឌ្ឍយន្តហោះមានល្បឿនជាង 11 ពាន់គីឡូម៉ែត្រ/ម៉ោង

ក្រុមហ៊ុន Venus Aerospace នៅរដ្ឋ Texas កំពុងអភិវឌ្ឍយានដែលមានល្បឿនលឿងជាង 9 ដងធៀបនឹងល្បឿនរបស់សំឡេង តាមរយៈយន្តហោះគំរូដែលមានឈ្មោះថា Stargazer។

យន្តហោះដឹកអ្នកដំណើរ Stargazer កំពុងត្រូវបានអភិវឌ្ឍដើម្បីអាចហោះហើរក្នុងល្បឿន 11,104 គីឡូម៉ែត្រ/ម៉ោង អនុញ្ញាតឱ្យវាហោះពី New York របស់សហរដ្ឋអាម៉េរិក ទៅកាន់ Sydney របស់អូស្ត្រាលី ដោយប្រើពេលតែ 90 នាទី។ ល្បឿននេះលឿនជាងឆ្ងាយបើធៀបនឹងល្បឿន Mach 2 (2,414 គីឡូម៉ែត្រ/ម៉ោង) របស់យន្តហោះ Concorde។ នេះបើតាម Tech Times ចុះផ្សាយកាលពីថ្ងៃទី 27 ឧសភា។

យោងតាមណាសា មកដល់បច្ចុប្បន្ន ពុំទាន់មានយន្តហោះណាមួយដែលហោះបានក្នុងល្បឿន Mach 6.7 (8,273 គីឡូម៉ែត្រ/ម៉ោង) រាប់ចាប់តាំងពីយន្តហោះសម្រាប់ធ្វើតេស្ត X15 របស់សហរដ្ឋអាម៉េរិក ដែលធ្វើបានបែបនេះកាលពីឆ្នាំ 1967។ ក៏ប៉ុន្តែ សមិទ្ធផលនេះសុទ្ធតែមិនបានលេចធ្លោ ដោយសារតែល្បឿននៃការរីកចម្រើនក៏លឿនរបស់រ៉ុក្កែតហោះឡើងទៅកាន់គន្លងតារាវិថីកម្រិតទាបរបស់ផែនដី ក្នុងកម្រិតជាង Mach 9 ប្រហែល 23,358 គីឡូម៉ែត្រ/ម៉ោង។

គម្រោង Stargazer ដែលប្រកបដោយមហិច្ឆតារបស់ Venus Aerospace ដំណើរការដោយរ៉ុក្កែត អាចធ្វើបដិវត្តវិស័យទេសចរណ៍អវកាស។ បើទោះជាប្រើប្រាស់កម្លាំងរុញច្រានពីរ៉ុក្កែត ប៉ុន្តែ យន្តហោះ Stargazer ក៏ហោះឡើង និងចុះចតដោយប្រើម៉ាស៊ីនយន្តហោះធម្មតា។

Andrew Duggleby សហស្ថាបនិក និងជាប្រធានផ្នែកបច្ចេកវិទ្យារបស់ Venus Aerospace សង្កត់ធ្ងន់ថា ដើម្បីចៀសវាងសំឡេងរំខានខ្លាំងនៅឯអាកាសយានដ្ឋាន យន្តហោះ Stargazer នឹងប្រើប្រាស់ម៉ាស៊ីនយន្តហោះដើម្បីហោះឡើង ហើយនៅពេលហោះផុតពីទីប្រជុំជន វានឹងបញ្ឆេះម៉ាស៊ីនរ៉ុក្កែតដើម្បីបន្តធ្វើដំណើរទៅមុខ៕

May 29, 2023

ម្ចាស់ជើងឯកបាល់ទាត់ SEA Games លើកទី 32 មានមហិច្ចតាប្រកួតជាមួយបណ្ដាក្រុមជើងខ្លាំងលំដាប់ពិភពលោក

ប្រធានសហព័ន្ធកីឡាបាល់ទាត់ឥណ្ឌូណេស៊ី (PSSI) លោក Erick Thohir មានបំណងអញ្ជើញបណ្ដាក្រុមបាល់ទាត់លំដាប់កំពូលៗរបស់ពិភពលោក មកប្រកួតជាមួយក្រុមជម្រើសជាតិនៃប្រទេសដែលមានផ្ទៃដីធំជាងគេនៅអាស៊ីអាគ្នេយ៍។

«យើងអញ្ជើញអាហ្សង់ទីនមកទាត់មិត្តភាពដើម្បីកែលំអស្មារតី និងសមជាមួយនឹងការប៉ះគូប្រកួតធំៗ។ ដើមឡើយ នៅពេលជួបវៀតណាម និងថៃ កីឡាកររបស់យើងក៏ភ័យញ័រខ្លួន។ ប៉ុន្តែ នៅស៊ីហ្គេមលើកទី 32 យើងដណ្ដើមបានជ័យជម្នះ ហើយនេះគឺជាពេលដែលមានការត្រៀមខ្លួនបានល្អសម្រាប់ក្រុមជម្រើសជាតិឥណ្ឌូណេស៊ី» ប្រធាន PSSI លោក Erick Thohir ថ្លែងដូច្នេះ។

ក្រោយពីដណ្ដើមបានមេដាយមាសវិញ្ញាសាបាល់ទាត់បុរសនៅស៊ីហ្គេមលើកទី 32 ចលនាវិជ្ជមានក្នុងវិស័យបាល់ទាត់កំពុងតែផ្ទុះឡើងនៅឥណ្ឌូណេស៊ី។ ក្នុងការប៉ះគ្នាលក្ខណៈអន្តរជាតិនានាក្នុងខែមិថុនា ក្រុមឥណ្ឌូណេស៊ី នឹងប្រកួតមិត្តភាពនៅថ្ងៃទី 14 ជាមួយនឹងក្រុមរបស់ប៉ាឡេស្ទីន។ ប្រាំថ្ងៃបន្ទាប់មក ឥណ្ឌូណេស៊ីនឹងត្រូវប្រកួតជាមួយអាហ្សង់ទីន។

តាមផែនការ PSSI ថែមទាំងមានបំណងអញ្ជើញក្រុមជើងខ្លាំងដូចជា ម៉ារ៉ុក ប្រេស៊ីល ព័រទុយហ្កាល់ និងរុស្ស៊ី មកទាត់មិត្តភាពនៅឥណ្ឌូណេស៊ីទៀតផង។ គម្រោងទាំងនេះកំពុងត្រូវបានអនុវត្ត និងស្ថិតក្នុងដំណាក់កាលដំបូងនៃការចរចា។ ប៉ុន្តែ នឹងមានតែមួយ ឬពីរប្រកួតបែបនេះប៉ុណ្ណោះនៅក្នុងមួយឆ្នាំ។ PSSI ក៏មានមហិច្ឆតារៀបចំការប្រកួតផ្លូវការច្រើនទៀតនៅក្នុងឱកាស FIFA Days ដើម្បីលើកកម្ពស់ចំណាត់របស់ក្រុមបាល់ទាត់ជម្រើសជាតិឥណ្ឌូណេស៊ី នៅក្នុងបញ្ជីចំណាត់ថ្នាក់ FIFA៕

May 26, 2023

យន្តហោះអវកាស Virgin Galactic បន្តដឹកមនុស្សឡើងទៅក្បែរគន្លងតារាវិថីផែនដី

(សហរដ្ឋអាម៉េរិក) – Virgin Galactic បានទទួលជោគជ័យក្នុងការដឹកមនុស្សឡើងទៅកាន់ទីអវកាសក្បែរគន្លងតារាវិថីផែនដីលើកទីប្រាំ មុនពេលចាប់ផ្ដើមធ្វើសកម្មភាពជំនួញនៅខែក្រោយ។

បេសកកម្មកាលពីថ្ងៃទី 25 ឧសភា ដែលមានឈ្មោះថា Unity 25 គឺជាជើងហោះហើរដំបូងរបស់ក្រុមហ៊ុន Virgin Galactic ទៅកាន់ទីអវកាសក្បែរគន្លងគោចរផែនដី គិតចាប់ពីខែកក្កដា 2021 ក្រោយពីក្រុមហ៊ុននេះបានដឹកមហាសេដ្ឋី Richard Branson សហស្ថាបនិករបស់ Virgin Group ដែលជាក្រុមហ៊ុនមេរបស់ Virgin Galactic និងអតិថិជនជាច្រើនរូបផ្សេងទៀត ឡើងទៅទីអវកាស។

Virgin Galactic ប្រើប្រាស់ប្រព័ន្ធបាញ់បង្ហោះក្នុងអាកាសដើម្បីដឹកមនុស្ស និងឧបករណ៍ស្រាវជ្រាវឡើងទៅកាន់ទីអវកាសក្បែរកន្លងតារាវិថិផែនដី។ បច្ចុប្បន្ន ប្រព័ន្ធនេះរួមមានយានចំនួនពីរគ្រឿងគឺយានអវកាសដែលអាចដឹកមនុស្សបាន 8 នាក់ ឈ្មោះ VSS Unity និងយន្តហោះដឹកជញ្ជូន VMS Eve។ Unity ត្រូវបាន Eve នាំឡើងពីព្រលានយន្តហោះ។ ពេល Eve ហោះដល់កម្ពស់ 15,000 ម៉ែត្រ វានឹងទម្លាក់ Unity ដើម្បីឱ្យយាននេះបញ្ឆេះម៉ាស៊ីនរ៉ុក្កែត ហើយបន្តហោះឡើងទៅលំហក្បែរគន្លងគោចរផែនដី។

អតិថិជនដែលហោះក្នុងយាន Unity នឹងបានបណ្ដែតខ្លួនក្នុងស្ថានភាពគ្មានទម្ងន់ច្រើននាទី និងគយគន់ផែនដីពីអវកាស មុនពេលហោះចុះចតលើព្រលានយន្តហោះ។ Unity បានធ្វើការហោះហើរបែបនេះចំនួនប្រាំលើកមកហើយ។ បេសកកម្មថ្មីបំផុតត្រូវបានចាប់ផ្ដើមនៅម៉ោង 23 និង 15 នាទី ថ្ងៃទី 24 ឧសភា (ពេលវេលានៅកម្ពុជា) ពេល Eve ហោះឡើងពីអវកាសយានដ្ឋាន Spaceport America នៅ New Mexico។ Unity ត្រូវបានភ្ជាប់ទៅនឹងគ្រោងឆ្អឹងនៅចន្លោះដងខ្លួនទាំងពីររបស់យន្តហោះដឹកជញ្ជូន Eve។

មនុស្សទាំង 8 នាក់ដែលចូលរួមក្នុងជើងហោះហើរថ្មីបំផុតនេះគឺសុទ្ធតែជាបុគ្គលិករបស់ Virgin Galactic ក្នុងនោះក៏មានប្រធានផ្នែកបណ្ដុះបណ្ដាលអ្នកអវកាស លោកស្រី Beth Moses ផងដែរ។

យោងតាមតំណាងរបស់ Virgin Galactic បន្ទាប់ពីផ្ដាច់ខ្លួន យាន Unity ហោះក្នុងល្បឿនអតិបរមា 3,630 គីឡូម៉ែត្រ/ម៉ោង និងឡើងដល់កម្ពស់ 87.2 គីឡូម៉ែត្រ។ ណាសាឱ្យដឹងថា កម្ពស់នេះអាចចាត់ទុកដូចបានហោះដល់ទីអវកាស។ ក៏ប៉ុន្តែលំហអវកាសចាប់ផ្ដើមពីកម្ពស់ 100 គីឡូម៉ែត្រ។

យាន Unity ត្រលប់មកកាន់ផែនដីនៅម៉ោង 00 និង 37 នាទី ថ្ងៃទី 26 ឧសភា 2023 នៅ Spaceport America។ ចំណែកយន្តហោះ Eve ក៏បានចុះចតដល់ដីប៉ុន្មាននាទីមុននោះ ហើយបេសកកម្ម Unity 25 ក៏បានបញ្ចប់៕

May 26, 2023

ជនសង្ស័យសម្លាប់មនុស្សជាង 2,000 នាក់ត្រូវបានចាប់ខ្លួនក្រោយរត់គេចច្រើនឆ្នាំ

ជនសង្ស័យ Fulgence Kayishema ដែលត្រូវប៉ូលិសស្វែងរកព្រោះតែបានសម្លាប់មនុស្សជាង 2,000 នាក់នៅក្នុងយុទ្ធនាការប្រល័យពូជសាសន៍នៅ រវ៉ាន់ដា ឆ្នាំ 1994 ត្រូវបានចាប់ខ្លួន។

Fulgence kayishema អតីតមន្ត្រីប៉ូលិសអាយុជាង 60 កាលពីថ្ងៃទី 24 ឧសភា 2023 ត្រូវបានចាប់ខ្លួននៅក្នុងចំការទំពាំងបាយជូរនៅទីរួមស្រុកមួយក្នុងតំបន់ផលិតស្រាទំពាំងបាយជូរដែលមានចម្ងាយពីរដ្ឋធានី Cape Town របស់អាហ្វ្រិកខាងត្បូង ជិត 50 គីឡូម៉ែត្រទៅទិសខាងកើត។

ជនសង្ស័យនេះត្រូវបានចាប់ខ្លួនក្នុងយុទ្ធនាការមួយដែលមានកិច្ចសហការរវាងអាជ្ញាធរអាហ្វ្រិកខាងត្បូង និងអង្គការសហប្រជាជាតិ។ យោងតាមប៉ូលិសអាហ្វ្រិកខាងត្បូង Kayishema បានសារភាពថាខ្លួនឈ្មោះ Donatien Nibashumba និងមិនព្រមទទួលស្គាល់ឈ្មោះពិត។ ក៏ប៉ុន្តែ រហូតដល់ព្រលប់ថ្ងៃដដែល ជននេះនិយាយថា «ខ្ញុំបានរង់ចាំការចាប់ខ្លួននេះជាយូរមកហើយ»។

Kayishema ត្រូវបានសមត្ថកិច្ចប្រកាសចាប់ខ្លួនកាលពីឆ្នាំ 2001។ សមត្ថកិច្ចបានឱ្យដឹងថា ជននេះបានប្រើប្រាស់ឈ្មោះ និងលិខិតស្នាមក្លែងក្លាយជាច្រើនដើម្បីចៀសវាងការចាប់ខ្លួនក្នុងអំឡុងពេលរត់គេច និងលាក់ខ្លួន។ សហរដ្ឋអាម៉េរិកបានប្រកាសផ្ដល់រង្វាន់ 5 លានដុល្លារសម្រាប់អ្នកទាំងឡាយណាដែលបានផ្ដល់ព័ត៌មានឈានទៅដល់ការចាប់បាន Kayishema។

កាលពីឆ្នាំ 1994 ជនជាតិ Tutsi និង Hutu ជាង 800,000 នាក់បានស្លាប់នៅក្នុងអំពើប្រល័យពូជសាស្ត្រនៅប្រទេសរវ៉ាន់ដា ដែលធ្វើឡើងក្នុងរយៈពេលបីខែ។ តុលាការបានចោទប្រកាន់ Kayishema ថា បានចូលរួមដោយផ្ទាល់ក្នុងការរៀប និងអនុវត្តគម្រោងសម្លាប់មនុស្សជាង 2,000 នាក់នៅវិហារកាតូលិក Nyange កាលពីថ្ងៃទី 15 មេសា 1994 នៅពេលអំពើសម្លាប់រង្គាលទើបតែចាប់ផ្ដើម។

ដីកាតុលាការបានឱ្យដឹងថា Kayishema ដែលពេលនោះគឺជាមន្ត្រីស៊ើងអង្កេត បានទិញសាំងដើម្បីដុតវិហារដែលមានជនភៀសខ្លួនជាច្រើននៅខាងក្នុង។ ជននេះ និងបក្ខពួកក៏ត្រូវបានចោទប្រកាន់ថា បានប្រើប្រាស់គ្រឿងចក្រដើម្បីកម្ទេចវិហារបន្ទាប់ពីមានករណីអគ្គិភ័យ។

នៅពេលយុទ្ធនាការប្រល័យពូជសាសន៍ដែលបានបញ្ចប់កាលពីខែកក្កដា ឆ្នាំ 1994 Kayishema ក៏រត់ចូលសាធារណរដ្ឋកុងហ្កោ ជាមួយនឹងប្រពន្ធកូន និងបងថ្លៃ។ បន្ទាប់ពីបានរត់ទៅកាន់ប្រទេសជាច្រើននៅទ្វីបអាហ្វ្រិក ជននេះក៏បានទៅកាន់ប្រទេសអាហ្វ្រិកខាងត្បូងនៅឆ្នាំ 1999 និងប្រើប្រាស់ឈ្មោះក្លែងក្លាយដើម្បីសុំសិទ្ធិជ្រកកោននៅ Cape Town។

Fulgence kayishema ពេលត្រូវបានចាប់ខ្លួន ។ រូបភាពពី Gistmania

ចាប់តាំងពីបានទៅដល់អាហ្វ្រិកខាងត្បូង ជនសង្ស័យបានពឹងអាស្រ័យលើបណ្ដាញជំនួយមួយដែលរួមមានទាំងក្រុមអតីតសមាជិកកងទ័ពរវ៉ាន់ដា ជាក្រុមមនុស្សដែលបានស្វែងរកវិធីលាក់បាំងសកម្មភាព និងកន្លែងស្នាក់នៅរបស់ Kayishema។

Kayishema គ្រោងនឹងត្រូវបានកាត់ទោសនៅក្នុងតុលាការមួយនៅ Cape Town នៅថ្ងៃទី 26 ឧសភានេះ មុនពេលអាចត្រូវបាននាំខ្លួនទៅកាន់ប្រទេសរវ៉ាន់ដា។

«Kayishema បានរត់គេចខ្លួនជាង 20 ឆ្នាំ។ ការចាប់ខ្លួននេះបានធានាថា ចុងក្រោយជននេះក៏ត្រូវទទួលទោសសមស្របសម្រាប់អំពើឧក្រិដ្ឋរបស់ខ្លួន» Serge Brammertz ប្រធានរដ្ឋអាជ្ញានៃយន្តការដោះស្រាយរឿងក្ដីនៅសេសសល់របស់តុលាការអន្តរជាតិ (IRMCT) នៃអង្គការសហប្រជាជាតិ ថ្លែងដូច្នេះ និងបន្ថែមថា «អំពើប្រល័យពូជសាសន៍គឺជាទោសធ្ងន់ធ្ងរបំផុតចំពោះមនុស្សជាតិ»៕

May 26, 2023

ម្ចាស់ជើងឯកបាល់ទាត់ SEA Games ប្រកួតជាមួយម្ចាស់ជើងឯក World Cup នៅខែក្រោយ

សហព័ន្ធកីឡាបាល់ទាត់ឥណ្ឌូណេស៊ី (PSSI) ប្រកាសថា នឹងប្រកួតមិត្តភាពជាមួយម្ចាស់ជើងឯក World Cup នៅថ្ងៃទី 19 ខែមិថុនា 2023 និងបានអំពាវនាវឱ្យរក្សាសណ្ដាប់ធ្នាប់ ចៀសវាងការប្រកួតត្រូវលុបចោល។

ឥណ្ឌូណេស៊ីបានបញ្ជាក់អំពីការប្រកួតមិត្តភាពជាមួយអាហ្សង់ទីន នៅក្នុងសន្និសីទសារព័ត៌មាននៅឯទីលានបាល់ទាត់ Gelora Bung Karno នារសៀលថ្ងៃទី 24 ឧសភា។

ប្រធាន PSSI លោក Erick Thohir ឱ្យដឹងថា ការប្រកួតមិត្តភាពជាមួយគូប្រជែងលំដាប់ខ្ពស់បំផុតដូចអាហ្សង់ទីន គឺជាឱកាសដ៏មានតម្លៃដើម្បីសាកល្បងផ្លូវចិត្ត សមត្ថភាព និងដកបទពិសោធន៍សម្រាប់ក្រុមម្ចាស់ផ្ទះឥណ្ឌូណេស៊ី។

មេដឹកនាំ PSSI ក៏បានបង្ហើបឱ្យដឹងថា នឹងដាក់ពង្រាយកម្លាំងសន្តិសុខទ្រង់ទ្រាយធំបំផុតដើម្បីធានាសុវត្ថិភាពដល់ Lionel Messi, Lautaro Martinez និងមិត្តរួមក្រុម ចៀសវាងហានិភ័យការប្រកួតត្រូវលុបចោល។

Thohir រម្លឹកឡើងវិញនូវមេរៀនឆ្នាំ 2019 នៅពេល Man Utd លុបចោលដំណើរមកប្រកួតនៅឥណ្ឌូណេស៊ី ព្រោះតែករណីបំផ្ទុះគ្រាប់បែកភេរវកម្ម ក្នុងនោះក៏មាននៅសណ្ឋាគារដែលកូនសិស្ស និងគ្រូបង្វឹក Sir Alex Ferguson បានជ្រើសរើសជាកន្លែងស្នាក់នៅ។

PSSI ចំណាយប្រហែល 5 លានដុល្លារអាម៉េរិក ដើម្បីអញ្ជើញក្រុមជម្រើសជាតិអាហ្សង់ទីនមកប្រកួតមិត្តភាពនៅឥណ្ឌូណេស៊ី។ ដូចទៅនឹងបណ្ដាក្លឹបនៅអឺរ៉ុប កិច្ចព្រមព្រៀងរវាង PSSI និងអាហ្សង់ទីន មានលក្ខខណ្ឌបញ្ជាក់ថា ក្រុមភ្ញៀវមានសិទ្ធិលុបចោលការប្រកួត បើសិនសុវត្ថិភាពនៅទីតាំងប្រកួតមិនត្រូវបានធានា ព្រោះតែហេតុការណ៍ចលាចល គ្រោះធម្មជាតិ ឬភេរវកម្ម។ល។ នេះបើតាម New York Times ។

មុនពេលមកកាន់ឥណ្ឌូណេស៊ី ក្រុមបាល់ទាត់ជម្រើសជាតិអាហ្សង់ទីន នឹងទៅកាន់ទីក្រុងប៉េកាំង ប្រទេសចិន ដើម្បីប្រកួតមិត្តភាពជាមួយអូស្ត្រាលីនៅថ្ងៃទី 15 មិថុនា 2023៕

May 25, 2023

Tag: ប្រធាន