បរិស្ថាន - La Reine Media

ផ្កាយរណបរ៉ាដារបស់វៀតណាម នឹងហោះឡើងទៅកាន់គន្លងគោចរនៅដើមឆ្នាំ 2025

LOTUSat-1 ដែលជាផ្កាយរណបបច្ចេកវិទ្យារ៉ាដាដំបូងរបស់វៀតណាម គ្រោងនឹងអភិវឌ្ឍរួចរាល់នៅក្នុងខែមីនា និងត្រូវបាញ់បង្ហោះឡើងទៅកាន់គន្លងគោចរនៅដើមឆ្នាំ 2024។ នេះបើតាមអគ្គនាយករងនៃមជ្ឈមណ្ឌលអវកាសវៀតណាម។

ផ្កាយរណប LOTUSat-1 មានទម្ងន់ 600 គីឡូក្រាម ប្រើប្រាស់បច្ចេកវិទ្យារ៉ាដាថ្មីបំផុត អាចមើលឃើញវត្ថុទំហំចាប់ពីមួយម៉ែត្រនៅលើដី ព្រមទាំងមានសមត្ថភាពសង្កេតមើលទាំងថ្ងៃទាំងយប់។ LOTUSat-1 នឹងផ្ដិតយករូបភាព និងផ្ដល់ទិន្នន័យច្បាស់ការណ៍ដើម្បីកាត់បន្ថយផលប៉ះពាល់នៃគ្រោះធម្មជាតិ ការប្រែប្រួលអាកាសធាតុ ការគ្រប់គ្រងធនធានធម្មជាតិ និងបរិស្ថាន។

ក្រុមហ៊ុន NEC គឺជាអ្នកអភិវឌ្ឍ ផលិតផ្កាយរណប LOTUSat-1 និងបណ្ដុះបណ្ដាលធនធានមនុស្សដល់វៀតណាម នៅប្រទេសជប៉ុន។ ការបណ្ដុះបណ្ដាលធនធានមនុស្សនេះគឺក្នុងបំណងផ្ទេរបច្ចេកវិទ្យានៃការអភិវឌ្ឍ ការដឹកជញ្ជូន និងការប្រើប្រាស់រូបភាពពីផ្កាយរណប។

យោងតាមមជ្ឈមណ្ឌលអវកាសវៀតណាម ផ្កាយរណប LOTUSat-1 ស្ថិតក្នុងគម្រោង «បង្ការ ទប់ទល់គ្រោះធម្មជាតិ និងការប្រែប្រួលអាកាសធាតុ ដោយប្រើប្រាស់ផ្កាយរណបសង្កេតផែនដី»។ គម្រោងនេះត្រូវបានបើកដំណើរការនៅហាណូយ ចាប់ពីខែកញ្ញា 2012 ដោយប្រើប្រាស់ទុន ODA របស់ជប៉ុន និងទុនបដិភាគរបស់វៀតណាម។

ការអភិវឌ្ឍផ្កាយរណប LOTUSat-1 គ្រោងនឹងរួចរាល់ជាស្ថាពរនៅក្នុងខែមីនា ឆ្នាំ 2024 ហើយអាចបាញ់បង្ហោះឡើងទៅកាន់គន្លងតារាវិថីក្នុងរង្វង់ពីខែធ្នូឆ្នាំ 2024 ដល់ខែកុម្ភៈ 2025។

សូមបញ្ជាក់ថា ផ្កាយរណបរ៉ាដាអាចថតរូបភាពនៅក្នុងស្ថានភាពអាកាសធាតុគ្រប់ប្រភេទ សូម្បីតែពេលមានពពក សន្សើម អ័ព្វ និងពន្លឺមិនគ្រប់គ្រាន់ជាដើម។

វៀតណាម និងជប៉ុន បានចាប់ផ្ដើមសហការគ្នាក្នុងវិស័យបច្ចេកវិទ្យាអវកាសចាប់ពីឆ្នាំ 2006។ កន្លងមក ក្រោមការជួយជ្រោមជ្រែងរបស់អង្គការអវកាសជប៉ុន (JAXA) បណ្ឌិត្យសភាវិទ្យាសាស្ត្រ និងបច្ចេកវិទ្យាវៀតណាម (VAST) បានស្រាវជ្រាវ អភិវឌ្ឍ និងផលិតផ្កាយរណបខ្នាតតូចចំនួនបីគ្រឿង រួមមាន PicoDragon, Nano Dragon និង MicroDragon ហើយត្រូវបានបាញ់បង្ហោះឡើងទៅកាន់គន្លងគោចរដោយជោគជ័យ ក្រោមជំនួយពី JAXA របស់ប្រទេសជប៉ុន៕

January 22, 2024

ប្រទេសមួយនៅទ្វីបអាម៉េរិក សាកល្បងធ្វើការបួនថ្ងៃក្នុងមួយសប្ដាហ៍

សាធារណរដ្ឋដូមីនីក (Dominica) សាកល្បងធ្វើការបួនថ្ងៃក្នុងមួយសប្ដាហ៍ ប៉ុន្តែ កម្មករ និយោជិតនៅតែទទួលបានប្រាក់ខែដូចមុន។

រដ្ឋាភិបាលនៃសាធារណរដ្ឋដូមីនីក ប្រកាសថា គំនិតផ្ដួចផ្ដើមស្ដីពីការធ្វើការបួនថ្ងៃក្នុងមួយសប្ដាហ៍ នឹងចាប់ផ្ដើមអនុវត្តពីខែកុម្ភៈ 2024។ ក្នុងនោះ បណ្ដាក្រុមហ៊ុនអាចស្ម័គ្រចិត្តសាកល្បងប្រើប្រាស់កាលវិភាគធ្វើការនេះក្នុងរង្វង់ 6 ខែ។

កម្មករ និយោជិតនៅសាធារណរដ្ឋដូមីនីក នឹងបានធ្វើការតែ 36 ម៉ោងក្នុងមួយសប្ដាហ៍ ជំនួសឱ្យ 44 ម៉ោង ចាប់ពីថ្ងៃចន្ទដល់ថ្ងៃព្រហស្បតិ៍ និងនៅតែទទួលបានប្រាក់បៀវត្សរ៍ដូចដើម។

«គំនិតផ្ដួចផ្ដើមនេះផ្ដល់អាទិភាពដល់មនុស្សជាតិ កែលម្អសុខភាព និងសុខុមាលភាព ព្រមទាំងជំរុញផលិតភាពការងារឱ្យមាននិរន្តរភាព និងសមស្របនឹងបរិស្ថាន» រដ្ឋមន្ត្រីក្រសួងការងាររបស់សាធារណរដ្ឋដូមីនីក លោក Luis Miguel de Camps បញ្ជាក់ដូច្នេះ។

សារព័ត៌មាននានាបានឱ្យដឹងថា បណ្ដាក្រុមហ៊ុនដែលគ្រោងនឹងចាប់ផ្ដើមសាកល្បងធ្វើការបួនថ្ងៃក្នុងមួយសប្ដាហ៍ រួមមាន ក្រុមហ៊ុនទូរគមនាគមន៍ អគ្គិសនី ក្រុមហ៊ុនធានារ៉ាប់រងជាតិផ្នែកសុខាភិបាល និងក្រុមហ៊ុនទាំងឡាយដែលប្រើប្រាស់គ្រឿងចក្រធុនធ្ងន់។

សាកលវិទ្យាល័យមួយរបស់ប្រទេសនេះ ត្រូវបានប្រគល់ភារកិច្ចវាយតម្លៃលទ្ធផលនៃការសាកល្បងនេះ។ ក្នុងនោះ ពួកគេនឹងផ្ដោតសំខាន់ទៅលើការតាមដានសុខភាព ក៏ដូចជាទំនាក់ទំនងរវាងការងារ និងជីវភាពរស់នៅរបស់កម្មករ និយោជិត៕

January 17, 2024

បច្ចេកវិទ្យាថ្មីមួយនេះត្រូវបានរំពឹងថា នឹងរួមចំណែកកាត់បន្ថយការឡើងកម្ដៅផែនដី

អ្នកវិទ្យាសាស្ត្រចិន បានអភិវឌ្ឍបច្ចេកវិទ្យាថ្មីមួយដែលជួយផលិតជីវឥន្ធនៈដែលមានបរិមាណជីវម៉ាស (បាយអូម៉ាស – Biomass) ក្នុងកម្រិតខ្ពស់ជាងមុន អាចលើសពី 40% ដែលខ្ពស់ជាងឆ្ងាយបើធៀបនឹងបរិមាណមធ្យមនៅទូទាំងសកលលោកនាបច្ចុប្បន្ន ដែលមានមិនដល់ 10%។

សាស្ត្រាចារ្យ Shen Jian មកពីមហាវិទ្យាល័យគីមីវិទ្យា និងវិទ្យាសាស្ត្រវត្ថុធាតុ នៃសាកលវិទ្យាល័យគរុកោសល្យណានជីង រួមនឹងសហការី បានអភិវឌ្ឍវិធីសាស្ត្រផលិត ដោយប្រើប្រាស់ជាតិខ្លាញ់ជីវសាស្ត្រ (triglycerides) និងសមាសធាតុនានារបស់ប្រេងឆៅដែលបានចម្រាញ់ ដើម្បីផលិតជីវឥន្ធនៈសម្រាប់រថយន្ត ដោយមិនត្រូវការដំណើរការបំប្លែង Este។

យោងតាមក្រុមអ្នកស្រាវជ្រាវខាងលើ ប្រេងម៉ាស៊ូតជីវសាស្ត្រដែលមានបរិមាណជីវម៉ាសកាន់តែខ្ពស់ គឺកាន់តែមានប្រសិទ្ធភាពនៅក្នុងការសន្សំសំច័យថាមពល និងកាត់បន្ថយការបំភាយឧស្ម័នកាបូន។

សាស្ត្រាចារ្យ Shen ឱ្យដឹងថា តាមរយៈការប្រើប្រាស់ខ្លាញ់ជីវសាស្ត្រជំនួសប្រេងមួយផ្នែក បច្ចេកវិទ្យានេះជួយបង្កើតឥន្ធនៈជាប្រេងម៉ាស៊ូតជីវសាស្ត្រដែលល្អជាងមុនសម្រាប់បរិស្ថាន និងបន្ទាន់សម័យបណ្ដាស្ដង់ដាស្ដីពីការបំភាយឧស្ម័ន ឆ្ពោះទៅជិតគោលដៅបង្កើតតុល្យភាពកាបូនទូទាំងសកលលោក។

លទ្ធផលស្រាវជ្រាវនៃក្រុមរបស់សាស្ត្រាចារ្យ Shen ដែលត្រូវបានត្រួតពិនិត្យដោយអាជ្ញាធរចិន បានបង្ហាញថា ឥន្ធនៈនេះឆ្លើយតបនឹងបទដ្ឋានជាតិស្ដីពីប្រេងម៉ាស៊ូតជីវសាស្ត្រសម្រាប់រថយន្ត និងលំនឹងផ្នែកអុកស៊ីសែន ទប់ទល់នឹងការសឹករេចរឹល និងការពារបរិស្ថានបានយ៉ាងប្រសើរ៕

January 4, 2024

វិស័យស្រូវអង្ករថៃ នឹងផ្ដោតលើគុណភាព ជំនួសឱ្យបរិមាណ

វិស័យស្រូវអង្កររបស់ប្រទេសថៃ នាពេលខាងមុខ នឹងផ្ដោតសំខាន់ទៅលើគុណភាពជាជាងបរិមាណ នៅពេលប្រទេសនេះដាក់គោលដៅទាញយកចំណែកទីផ្សារធំជាងបច្ចុប្បន្ន នៅលើទីផ្សារអង្ករគុណភាពខ្ពស់នៅទូទាំងពិភពលោក។

នេះគឺជាសារដែលត្រូវបានលោក Arnont Nonsi អនុប្រធាននាយកដ្ឋានស្រូវអង្ករ នៃក្រសួងកសិកម្មនិងសហករណ៍ថៃ លើកឡើងនៅក្នុងពិធីបុណ្យស្រូវអង្ករថៃឆ្នាំ 2023 ដែលធ្វើឡើងនៅរាជធានីបាងកក ចាប់ពីថ្ងៃទី 14 ដល់ 17 ខែធ្នូ។

លោក Arnont ឱ្យដឹងថា ថៃអស់លទ្ធភាពក្នុងការប្រកួតប្រជែងយកតំណែង «ប្រទេសនាំចេញអង្ករច្រើនជាងគេ» ជាមួយនឹងបណ្ដាប្រទេសនាំចេញអង្ករនានា ពិសេសគឺ ប្រទេសឥណ្ឌា ដែលមានដីស្រែធំសម្បើម។ ជំនួសមកវិញ លោក Arnont ថ្លែងថា ប្រទេសថៃ ចង់ «លើកកម្ពស់គុណភាព» ទីផ្សារអង្កររបស់ខ្លួន ក្នុងនោះ ពាក្យថា «លើកកម្ពស់គុណភាព» នេះ រួមមាន គុណភាពនៃសារជាតិបំប៉ន ដំណើរការដាំស្រូវដែលល្អសម្រាប់បរិស្ថាន តម្លៃកើនឡើងពីការផ្លាស់ប្ដូរ និងបច្ចេកវិទ្យា ក៏ដូចជាស្ថិរភាពរបស់កសិកម្ម។

ក្រៅពីនេះ លោក Arnont ក៏បង្ហើបឱ្យដឹងដែរថា នាយកដ្ឋានស្រូវអង្ករថៃ គ្រោងនឹងសហការជាមួយស្ថាប័នពាក់ព័ន្ធ ដើម្បីបន្ថែមតម្លៃ និងកែលម្អអង្ករថៃ ដើម្បីអាចប្រើប្រាស់បាននៅក្នុងផលិតផលមួយចំនួន មានជាអាទិ៍ គ្រឿងសម្អាង ភេសជ្ជៈ និងទឹកអប់ជាដើម។

December 16, 2023

កម្ពុជា ប្រកាសបញ្ឈប់ការសាងសង់រោងចក្រផលិតអគ្គិសនីប្រើធ្យូងថ្ម

រាជរដ្ឋាភិបាលកម្ពុជា នឹងបញ្ឈប់ការសាងសង់រោងចក្រផលិតអគ្គិសនីដែលប្រើប្រាស់ថាមពលពីធ្យូងថ្ម និងពិនិត្យលទ្ធភាពបិទទ្វារបណ្ដារោងចក្រប្រភេទនេះនៅមុនកាលកំណត់។

ប្រកាសខាងលើត្រូវបានសម្ដេច ហ៊ុន ម៉ាណែត នាយករដ្ឋមន្ត្រី លើកឡើងនៅក្នុងពិធីបិទទ្វារទំនប់សាងសង់វារីអគ្គិសនីស្ទឹងតាតៃលើ ក្នុងខេត្តកោះកុង កាលពីថ្ងៃទី 30 វិច្ឆិកា 2023។

យោងតាមប្រមុខរាជរដ្ឋាភិបាលកម្ពុជា ការសម្រេចចិត្តនេះ ធ្វើឡើងដើម្បីធានាចំពោះគោលដៅបន្សាបកាបូន និងគោលដៅផ្គត់ផ្គង់ថាមពលស្ថិរភាព ប្រសិទ្ធភាព និងតម្លៃសមរម្យ។

មុននោះ កាលពីថ្ងៃទី 02 វិច្ឆិកា 2023 រាជរដ្ឋាភិបាលកម្ពុជា បានសម្រេចចិត្តផ្អាកគម្រោងអភិវឌ្ឍរោងចក្រផលិតអគ្គិសនីប្រើប្រាស់ធ្យូងថ្មកម្លាំង 700 មេហ្គាវ៉ាត់ (MW) នៅក្នុងខេត្តកោះកុង និងប្ដូរទៅជាកម្រោងអភិវឌ្ឍថាមពលឧស្ម័នធម្មជាតិរាវ (LNG)។

បច្ចុប្បន្ន ក្រសួងរ៉ែនិងថាមពល ក៏កំពុងធ្វើបច្ចុប្បន្នភាពផែនការមេ ស្ដីពីការប្រើប្រាស់ថាមពលកកើតឡើងវិញ និងជំរុញការប្រើប្រាស់យានយន្តអគ្គិសនី ដើម្បីកាត់បន្ថយការចំណាយលើឥន្ធនៈ និងដើម្បីការពារបរិស្ថាន៕

December 1, 2023

ជប៉ុនជិតបាញ់បង្ហោះផ្កាយរណបធ្វើពីឈើ ឡើងទៅកាន់ទីអវកាស

ទីភ្នាក់ងារអវកាសអាម៉េរិក (ណាសា) និងទីភ្នាក់ងារអវកាសជប៉ុន (ចាសា) កំពុងរៀបផែនការបាញ់បង្ហោះផ្កាយរណបធ្វើពីឈើដំបូងគេលើពិភពលោក ឡើងទៅកាន់ទីអវកាស។

យោងតាមព័ត៌មានពីណាសា (NASA) របស់អាម៉េរិក និងចាសា (JAXA) របស់ជប៉ុន ផ្កាយរណបប៉ុនពែងកាហ្វេដែលធ្វើពីឈើ Magnolia គ្រោងនឹងត្រូវបានបាញ់បង្ហោះឡើងទៅកាន់គន្លងតារាវិថីផែនដីនៅក្នុងរដូវក្ដៅឆ្នាំ 2024។

ឈើគឺជាវត្ថុធាតុដែលនឹងមិនឆេះ ឬរលួយនៅក្នុងបរិស្ថានសុញ្ញកាសរបស់អវកាស ប៉ុន្តែនឹងត្រូវបានដុតឆេះម៉ត់ជាធូលី នៅពេលវិលត្រលប់ចូលក្នុងបរិយាកាសផែនដី។ ចំណុចពិសេសនេះធ្វើឱ្យឈើក្លាយជាវត្ថុធាតុមានប្រយោជន៍សម្រាប់ផ្កាយរណបនាពេលអនាគត។

ក្រោយពីបានធ្វើការពិសោធដោយជោគជ័យនៅលើស្ថានីយអវកាសអន្តរជាតិ (ISS) កាលពីដើមឆ្នាំ ក្រុមអ្នកវិទ្យាសាស្ត្រជឿថា ផ្កាយរណបធ្វើពីឈើ ពិតជាសមស្របសម្រាប់ការបាញ់បង្ហោះសាកល្បង។ ប្រភេទឈើដែលត្រូវបានអ្នកវិទ្យាសាស្ត្រជ្រើសរើសយកមកផលិតផ្កាយរណប គឺឈើ Magnolia។

បច្ចុប្បន្ន នៅជុំវិញគន្លងតារាវិថីផែនដី មានវត្ថុអវកាសជាង 8,440 តោន រួមទាំងសំរាមអវកាស ដែលមានដូចជា ផ្កាយរណបដែលខូច និងបំណែករ៉ុក្កែតដែលលែងប្រើប្រាស់ជាដើម។ ទាំងនេះបានធ្វើឱ្យពន្លឺពេលរាត្រីកើនខ្ពស់ជាងមុន 10% បង្កការរំខានដល់ការសង្កេតមើលទៅកាន់ទីអវកាស។

ក្រុមអ្នកជំនាញនិយាយថា ផ្កាយរណបដែលធ្វើពីឈើ មានដូចជា LignoSat ជាដើម នឹងបង្កផលប៉ះពាល់តិចជាង បើធៀបនឹងសំរាមអវកាសនាបច្ចុប្បន្ន ព្រមទាំងកាត់បន្ថយការចំណាយបានច្រើនផងដែរ៕

November 25, 2023

ក្រុមហ៊ុនហូឡង់រកវិធីបង្កកំណើតទារកដំបូងគេក្នុងទីអវកាស

ក្រុមហ៊ុន Spaceborn United របស់អ្នកជំនួញជនជាតិហូឡង់ Egbert Edelbroek កំពុងសិក្សាស្រាវជ្រាវដើម្បីបង្កកំណើត និងបង្កើតទារកតាមធម្មជាតិ នៅក្នុងបរិស្ថានដែលមានកម្លាំងទំនាញខ្សោយដូចនៅលើភពអង្គារ។

បើទោះជាមានឧបសគ្គច្រើនក្នុងដំណើរឆ្ពោះទៅការសម្រេចគោលដៅខាងលើ ប៉ុន្តែ លោក Edelbroek ជឿថា លោកអាចមើលឃើញទារកដំបូងដែលបង្កកំណើតក្នុងទីអវកាស។ នេះបើតាម AFP ចុះផ្សាយកាលពីថ្ងៃទី 14 វិច្ឆិកា 2023។

«មនុស្សជាតិត្រូវតែជាសត្វលោកដែលរស់នៅក្នុងអន្តរភព។ បើសិនជាចង់រស់នៅដោយឯករាជ្យនៅខាងក្រៅផែនដី យើងត្រូវការដោះស្រាយបញ្ហានៃការបន្តពូជ» លោក Edelbroek សង្កត់ធ្ងន់ដូច្នេះ។

ការបង្កកំណើតក្នុងទីអវកាស មានឧបសគ្គច្រើន។ ឧបសគ្គចម្បងគេគឺកង្វះកម្លាំងទំនាញ ធ្វើឱ្យគូស្នេហ៍ងាយនឹងអណ្តែតឆ្ងាយពីគ្នា ដូច្នេះ Spaceborn United គឺជាក្រុមហ៊ុនដំបូងគេដែលស្វែងរកវិធីបង្កកំណើតនៅទីអវកាស។

យោងតាមលោក Edelbroek ឧបសគ្គមួយទៀត នោះគឺធាតុរាវរបស់រាងកាយនឹងត្រូវបានរុញច្រានឡើងទៅលើ នៅក្នុងបរិស្ថានកម្លាំងទំនាញទាប ដែលផ្ទុយពីនៅលើផែនដី។ ដូច្នេះ ជាដំបូង មនុស្សត្រូវការបង្កើតបរិស្ថានមួយដែលល្អឥតខ្ចោះ។

ក្រុមអ្នកវិទ្យាសាស្ត្រកំពុងស្វែងយល់អំពីវិធីបង្កកំណើតក្នុងបន្ទប់ពិសោធន៍ដែលមានកម្លាំងទំនាញផែនដីទាប ប៉ុន្តែ លោក Edelbroek និយាយថា គម្រោងបាញ់បង្ហោះកោសិកាកណ្ដុរទៅពិសោធក្នុងទីអវកាសនឹងធ្វើឡើងនៅចុងឆ្នាំនេះ។ បន្ទាប់មក ក្នុងរយៈពេលពី 5 ដល់ 6 ឆ្នាំទៀត ក្រុមហ៊ុននេះនឹងពិសោធលើកោសិកាមនុស្ស។

បញ្ហាសីលធម៌គឺជាមូលហេតុដែលធ្វើឱ្យការបង្កកំណើតក្នុងទីអវកាស ទាក់ទាញចំណាប់អារម្មណ៍របស់បណ្ដាក្រុមហ៊ុនឯកជនដូច Spaceborn ជំនួសឱ្យណាសា ដែលរារែកក្នុងការផ្ដល់ថវិកាសម្រាប់ប្រធានបទ «រសើប»។ ក៏ប៉ុន្តែ លោក Edelbroek ជឿថា នឹងមានពេលវេលាគ្រប់គ្រាន់ដើម្បីបង្កើតទារកដំបូងដែលបង្កកំណើតក្នុងអវកាស មុនពេលលោកទទួលមរណភាព៕

November 16, 2023

អតិផរណារបស់ជប៉ុនថយចុះ ដោយសារជំនួយផ្នែកអគ្គិសនី និងឧស្ម័ន

យោងតាមស្ថិតិថ្មីបំផុត សន្ទស្សន៍អតិផរណារបស់ប្រទេសជប៉ុន បានថយចុះក្រោមកម្រិត 3% ជាលើកដំបូង រាប់ចាប់ពីខែសីហា ឆ្នាំ 2022។

វិធានការជំនួយផ្នែកអគ្គិសនី និងឧស្ម័នត្រូវបានគេជឿថាជាមូលហេតុចម្បងដែលជួយឱ្យអតិផរណានៅប្រទេសជប៉ុនថយចុះ។ ក៏ប៉ុន្តែ អ្នកប្រើប្រាស់នៅតែរងសម្ពាធធ្ងន់ គ្រាដែលសន្ទស្សន៍អតិផរណាត្រូវបានព្យាករថា អាចនឹងកើនឡើងជាថ្មីក្នុងប៉ុន្មានខែខាងមុខ។

ស្ថិតិរបស់ក្រសួងមហាផ្ទៃ និងទូរគមនាគមន៍ជប៉ុន បានបង្ហាញថា ក្នុងខែកញ្ញាកន្លងទៅ សន្ទស្សន៍ថ្លៃទំនិញប្រើប្រាស់ (Customer Price Index – CPI) មិនរាប់បញ្ចូលទាំងអាហារស្រស់របស់ប្រទេសនេះ បានកើន 2.8% ធៀបនឹងដំណាក់កាលដូចគ្នាក្នុងឆ្នាំ 2022។ នេះគឺជាលើកដំបូងក្នុងរង្វង់ 13 ខែ ដែលសន្ទស្សន៍ CPI បានថយចុះមកក្រោម 3%។

សន្ទស្សន៍សម្រាប់វាស់ស្ទង់អតិផរណារបស់ប្រទេសជប៉ុនដែលបានថយចុះនេះ ភាគច្រើនគឺដោយសារការចំណាយសម្រាប់ថ្លៃអគ្គិសនី និងឧស្ម័នរបស់អ្នកប្រើប្រាស់ថយចុះ នៅពេលមានជំនួយពីរដ្ឋាភិបាល។ បើពុំមានជំនួយនេះទេ សន្ទស្សន៍នេះនៅក្នុងខែកញ្ញារបស់ជប៉ុន នឹងឡើងដល់ 3.8%។

ថ្វីបើសន្ទស្សន៍ថ្លៃទំនិញប្រើប្រាស់របស់ជប៉ុននៅខ្ពស់ជាងឆ្ងាយ បើធៀបនឹងគោលដៅដែលបានកំណត់ ប៉ុន្តែ យោងតាមការវាយតម្លៃរបស់ក្រុមអ្នកជំនាញ ដោយមានការប្រឹងប្រែងស្ដារបរិស្ថានពាណិជ្ជកម្ម និងជំរុញការដំឡើងប្រាក់បៀវត្សរ៍របស់រដ្ឋាភិបាល សេដ្ឋកិច្ចរបស់ជប៉ុននឹងបន្តងើបឡើង ទាំងក្នុងវិស័យផលិត និងវិស័យមិនមែនផលិត៕

October 21, 2023

រកឃើញភពមួយចម្ងាយ 120 ឆ្នាំពន្លឺ ក្នុងតំបន់អាចរស់នៅបាន «អាចមានមហាសមុទ្រ»

ភព K2-18 b មានទំហំធំជាងពីរដងធៀបនឹងផែនដី និងគោចរក្នុងតំបន់ដែលអាចរស់នៅបាននៅជុំវិញផ្កាយមេដែលមានចម្ងាយ 120 ឆ្នាំពន្លឺពីព្រះអាទិត្យ (មួយឆ្នាំពន្លឺមានចម្ងាយ 9.46 ទ្រីលានគីឡូម៉ែត្រ)។

តេឡេស្កុបអវកាស James Webb (JWST) របស់អាម៉េរិក បានរកឃើញភស្តុតាងស្ដីពីម៉ូលីគុលដែលមានផ្ទុកកាបូននៅក្នុងបរិយាកាសរបស់ភព K2-18 b ដែលត្រូវបានសង្ស័យថាមានមហាសមុទ្រ។ ភព K2-18 b នេះគឺជាគោលដៅដ៏ទាក់ទាញសម្រាប់អ្នកតារាសាស្ត្រ ព្រោះពួកគេកំពុងស្វែងរកភាវៈរស់នៅខាងក្រៅប្រព័ន្ធព្រះអាទិត្យ។ យោងតាម Space ដែលបានចុះផ្សាយកាលពីថ្ងៃទី 11 កញ្ញា 2023 ការសិក្សាស្វែងយល់ និងសង្កេតដោយតេឡេស្កុបអវកាស Hubble មុននោះបង្ហើបឱ្យដឹងថា ភពខាងលើនេះអាចជាភពដែលមានមហាសមុទ្រទឹករាវ។

K2-18 b មានម៉ាសធំជាងផែនដីប្រហែល 8.6 ដង និងស្ថិតក្នុងតំបន់ដែលអាចរស់នៅបានរបស់ប្រព័ន្ធផ្កាយក្រហម K2-18។

ភពនេះមានកាំធំជាងផែនដីពី 2 ទៅ 3 ដង និងមានចម្ងាយពីព្រះអាទិត្យរបស់មនុស្ស 120 ឆ្នាំពន្លឺ។ លទ្ធផលនៃការសិក្សាស្រាវជ្រាវថ្មីបង្ហាញថា ដានរបស់កាបូនឌីអុកស៊ីត និងមេតានក្នុងបរិយាកាសរបស់ភព K2-18 b និងមិនមានអាម៉ូញាក់ បញ្ជាក់ថា មានមហាសមុទ្រមួយនៅខាងក្រោមបរិយាកាសដែលសម្បូរអ៊ីដ្រូសែន។

JWST ហាក់បានរកឃើញ dimethyl sulfide (DMS) ក្នុងបរិយាកាសរបស់ភព K2-18 b ទៀតផង។ សមាសធាតុនេះកើតឡើងតែពីប្លង់តុង (plankton គឺជាមីក្រូសារពាង្គកាយដែលរស់នៅក្នុងស្រទាប់លើនៃប្រព័ន្ធទឹក) លើផែនដី។ ក្រុមអ្នកវិទ្យាសាស្ត្រនៅសាកលវិទ្យាល័យ Cambridge ឱ្យដឹងថា នឹងបន្តសង្កេត K2-18 b ដើម្បីស្វែងយល់បន្ថែមអំពីលក្ខខណ្ឌនៃបរិស្ថានរបស់វា។ លទ្ធផលនៃការស្រាវជ្រាវរបស់ពួកគេនឹងត្រូវបានផ្សាយលើទស្សនាវដ្ដី Astrophysical Journal Letters៕

September 13, 2023

អវកាសចរដែលស្ថិតនៅទីអវកាសយូរជាងគេលើពិភពលោក

Frank Rubio បានស្ថិតនៅលើគន្លងតារាវិថីកម្រិតទាបរបស់ផែនដីជាង 355 ថ្ងៃ បំណែកកំណត់ត្រាស្ដីពីការបំពេញបេសកកម្មអវកាសយូរបំផុតលើពិភពលោក។

យោងតាមណាសា លោក Rubio រស់នៅ និងធ្វើការលើស្ថានីយអវកាសអន្តរជាតិ (ISS) ចាប់ពីខែកញ្ញា 2022 យូរជាងកំណត់ត្រាមុននោះរបស់អ្នកអវកាស Mark Vande Hei កាលពីវេលាម៉ោង 00 និង 40 នាទី ថ្ងៃទី 12 កញ្ញា 2023 (ពេលវេលានៅកម្ពុជា)។

តាមគម្រោង យានអវកាស Soyuz របស់រុស្ស៊ី នឹងដឹក Rubio ត្រលប់មកកាន់ផែនដីនៅថ្ងៃទី 27 កញ្ញាខាងមុខ។ ប្រការនេះមានន័យថា លោក Rubio នឹងឆ្លងកាត់ពេលវេលាយ៉ាងតិច 371 ថ្ងៃនៅលើគន្លងតារាវិថី មុននឹងបញ្ចប់បេសកកម្ម។ ពេលនោះ លោក Rubio នឹងក្លាយជាជនជាតិអាម៉េរិកដំបូងគេដែលរស់នៅ និងធ្វើការជាងមួយឆ្នាំក្នុងបរិស្ថានមីក្រូទំនាញ (ទំនាញផែនដីកម្រិតទាប)។

ការបំបែកកំណត់ត្រាខាងលើរបស់ Rubio គឺជារឿងចៃដន្យ ព្រោះថា ដំបូងក្រុមរបស់លោកគ្រោងនឹងបំពេញបេសកកម្មតែ 6 ខែប៉ុណ្ណោះ។ ក៏ប៉ុន្តែ ដោយសារយានអវកាសដែលដឹក Rubio និងមិត្តរួមការងារជនជាតិរុស្ស៊ីពីរនាក់ទៀត បានជួបបញ្ហាធ្លាយសារធាតុត្រជាក់កាលពីខែធ្នូ 2022។

ក្រុមអ្នកទទួលខុសត្រូវនៅទីភ្នាក់ងារអវកាសរុស្ស៊ី Roscosmos ក្រោយមកក៏បានបញ្ជាក់ថា យាននេះមិនមានសុវត្ថិភាពនៅក្នុងការនាំអវកាសចរត្រលប់មកកាន់ផែនដី។ យាន Soyuz MS-22 បានត្រលប់មកកាន់ផែនដីកាលពីថ្ងៃទី 28 មីនា 2023 ដោយមិនបានដឹកអ្នកអវកាស។

Roscosmos ក៏បានបញ្ជូនយាន Soyuz MS-23 ទៅកាន់ ISS កាលពីថ្ងៃទី 25 កុម្ភៈ 2023 ដើម្បីជំនួសយាន Soyuz MS-22។ ថ្ងៃត្រលប់មកកាន់ផែនដីរបស់ Rubio ត្រូវបានពន្យាររហូតដល់ខែកញ្ញា 2023 ពេលរុស្ស៊ីត្រៀមសម្រាប់ការហោះហើររបស់យាន Soyuz បន្ទាប់ ដែលគ្រោងនឹងដឹកអ្នកអវកាសអាម៉េរិកម្នាក់ និងអ្នកអវកាសរុស្ស៊ីពីរនាក់ ទៅកាន់ ISS នៅថ្ងៃទី 15 កញ្ញាខាងមុខ៕

September 12, 2023

Tag: បរិស្ថាន