បញ្ចប់ - La Reine Media

AI នឹង «លុបបំបាត់» ការងាររបស់អ្នកសរសេរកម្មវិធីនៅប្រាំឆ្នាំខាងមុខ?

Emad Mostaque ដែលជា CEO របស់ក្រុមហ៊ុនបច្ចេកវិទ្យា Stability AI យល់ថា នៅប្រាំឆ្នាំខាងមុខ AI (បញ្ញាសិប្បនិម្មិត) នឹងដណ្ដើមការងារទាំងអស់របស់អ្នកសរសេរកូដកម្មវិធី ហើយបង្កើតបានជាបដិវត្តន៍ផ្នែកទំនាក់ទំនង។

នៅក្នុងកិច្ចសម្ភាសលើទំព័រ Mindsets Podcast លោក Emad Mostaque សហស្ថាបនិក និងជានាយកប្រតិបត្តិរបស់ក្រុមហ៊ុន Stability AI បានវាយតម្លៃប្រកបដោយភាពអវិជ្ជមានទាក់ទិននឹងអនាគតរបស់អ្នកសរសេរកម្មវិធី ដោយសារតែឥទ្ធិពលរបស់ AI។

ដើម្បីបន្ថែមពីលើការអះអាងដែលថា «ប្រាំឆ្នាំទៀតនឹងមិនមានអ្នកសរសេរកូដណាម្នាក់ជាមនុស្ស» លោក Mostaque បានលើកយករបាយការណ៍របស់ GitHub ដែលបញ្ជាក់ថា ក្នុងចំណោមកូដដែលត្រូវបានក្រុមអ្នកសរសេរកម្មវិធីដាក់ចូលក្នុងថ្នាលបច្ចេកវិទ្យាមួយនេះ គឺមាន 41% ជាកូដដែលត្រូវបានសរសេរដោយបញ្ញាសិប្បនិម្មិត។

«ក្នុងបីខែកន្លង Stability AI បានយកឈ្នះលើ Bitcoin និង Ethereum នៅលើ GitHub ដោយក្លាយជា Open Source ដែលពេញនិយមជាងគេលើពិភពលោក។ ប្រការនេះបានបង្ហាញអំពីភាពទាក់ទាញដ៏ខ្លាំងក្លារបស់ AI…» លោក Mostaque ថ្លែងដូច្នេះ។

នៅលើបណ្ដាញសង្គមអន្តរជាតិ មានមនុស្សជាច្រើនបានដាក់ជាសំណួរថា «តើ AI អាចដណ្ដើមការងារពីអ្នកសរសេរកូដកម្មវិធី ឬអត់?»។ ចំណែកមនុស្សជាច្រើនផ្សេងទៀតក៏និយាយថា «ដំណាក់កាលដ៏អស្ចារ្យរបស់អ្នកសរសេរកូដកម្មវិធីត្រូវបានបញ្ចប់ហើយ»។

Emad Mostaque ជា CEO របស់ក្រុមហ៊ុនបច្ចេកវិទ្យា Stability AI

អ្នកសរសេរកូដកម្មវិធីមួយរូបរបស់ក្រុមហ៊ុន Microsoft សរសេរថា «ការងារជាវិស្វករផ្នែកទន់កំពុងតែស្លាប់បន្តិចម្ដងៗ។ ChatGPT ឆ្លាតខ្លាំងណាស់ ហើយគ្រប់គ្នាកំពុងតែស្ថិតក្នុងស្ថានភាពលំបាក»។

មនុស្សម្នាក់ក៏បានបង្កើតបញ្ជីស្រង់មតិនៅលើ Blind ដោយដាក់ជាសំណួរថា «តើវិស្វករផ្នែកទន់វ័យក្មេងជិតបាត់បង់ការងារមែន ឬទេ?» ហើយក៏ទទួលបានការជ្រើសរើសចំនួន 12,000 លើក។ ក្នុងនោះមាន 41.3% យល់ស្រប ខណៈ 37% យល់ថា «ការងារនៅតែមិនផ្លាស់ប្ដូរ» និង 21.7% អះអាងថា «បច្ចុប្បន្នមានការងារដែលមានសក្ដានុពលច្រើនជាងមុន»៕

July 5, 2023

ក្លឹបបាល់ទាត់របស់អេស្ប៉ាញ នៅជំពាក់ប្រាក់ខែ Lionel Messi

(សេស្ប៉ាញ) – Joan Laporta ដែលជាប្រធានក្លឹប Barca បាននិយាយថា ក្លឹបនេះនៅជំពាក់ប្រាក់បៀវត្សរ៍របស់កីឡាករខ្សែប្រយុទ្ធ Lionel Messi និងត្រូវបន្តសងរហូតដល់ឆ្នាំ 2025។

កាលពីខែវិច្ឆិកា 2017 Messi បានចុះកិច្ចព្រមព្រៀងតម្លៃ 675 លានដុល្លារអាម៉េរិកជាមួយក្លឹប Barca ដែលមានសុពលភាពដល់ខែមិថុនា 2021។ កិច្ចព្រមព្រៀងនេះរួមមាន ប្រាក់បៀវត្សរ៍ ប្រាក់ឧបត្ថម្ភក្រៅផ្លូវការ (Kickback) និងប្រាក់សម្រាប់ភាពស្មោះត្រង់ នេះមិនទាន់គិតដល់ប្រាក់រង្វាន់។ ក្នុងនោះ ប្រាក់បៀវត្សរ៍ប្រចាំឆ្នាំរបស់ Messi គឺ 167 លានដុល្លារអាម៉េរិក ខ្ពស់ជាងឆ្ងាយធៀបនឹង 86 លានដុល្លារដែល Football Leaks ធ្លាប់បានបង្ហើបឱ្យដឹង។ តារាបាល់ទាត់អាហ្សង់ទីន ក្រោយមកក៏បានយល់ព្រមកាត់បន្ថយប្រាក់ខែដើម្បីជួយដល់ក្លឹប ព្រោះតែផលវិបាកដែលកើតឡើងដោយសារកូវីដ។

មកដល់រដូវក្ដៅឆ្នាំ 2021 Messi បានចាកចោលកីឡដ្ឋាន Camp Nou ទៅតាមទម្រង់សេរី ព្រោះតែបញ្ហាហិរញ្ញវត្ថុរបស់ក្លឹប Barca ចេះតែអាក្រក់ទៅៗ។ M10 បានលេងឱ្យក្លឹប PSG ពីរឆ្នាំ មុនពេលទៅទាត់ឱ្យក្លឹបអាម៉េរិក Inter Miami។

បើទោះជាមិនលេងឱ្យក្លឹប Barca ក្នុងរយៈពេលជាងពីរឆ្នាំកន្លង ប៉ុន្តែ Messi នៅតែទទួលបានប្រាក់ខែពីក្លឹបនេះ។ «យើងនៅសល់ខ្ទង់ប្រាក់ដែលមិនទាន់ទូទាត់ជូន Messi ដែលត្រូវសងរហូតដល់ឆ្នាំ 2025» លោក Laporta ប្រាប់ទំព័រ La Vanguardia ដូច្នេះ។ លោកបន្តថា «អ្វីដែលនៅជំពាក់ គឺការពន្យារពេលទូទាត់ប្រាក់បៀវត្សរ៍ដែលបានព្រមព្រៀងគ្នាជាមួយនឹងក្រុមប្រឹក្សាភិបាលមុននោះ ហើយប្រការនេះបានបង្កើតឱ្យមានខ្ទង់បំណុលមិនទាន់ទូទាត់ដែលនឹងបញ្ចប់នៅឆ្នាំ 2025»៕

July 4, 2023

Ford ឈប់ផលិតរថយន្តម៉ូដែល Fiesta ដើម្បីទុកកន្លែងឱ្យ SUV Explorer អគ្គិសនី

Ford ឈប់ផលិតរថយន្តម៉ូដែលដែលលក់ដាច់បំផុត Fiesta ដើម្បីត្រៀមសម្រាប់អនាគតដែលដំណើរការដោយអគ្គិសនីទាំងស្រុង នោះគឺរថយន្ត SUV Explorer អគ្គិសនីដែលផលិតនៅអាល្លឺម៉ង់។

យោងតាម Autocar ម៉ូដែល Fiesta ចុងក្រោយនឹងចាកចេញពីរោងចក្រដំឡើងនៅថ្ងៃទី 07 កក្កដាខាងមុខ។ ក្រោយរយៈពេល 47 ឆ្នាំ និង 8 ជំនាន់ យុគសម័យ Fiesta កំពុងតែត្រូវបានបញ្ចប់ដើម្បីទុកកន្លែងឱ្យរថយន្តអគ្គិសនី។

ឥរិយាបថនេះត្រូវបានធ្វើឡើងបន្ទាប់ពីក្រុមហ៊ុនអាម៉េរិកនេះប្រកាសថា Ford នឹងក្លាយជាយីហោផលិតរថយន្តអគ្គិសនីដែលដំណើរការដោយថាមពលអគ្គិសនីទាំងស្រុងនៅអឺរ៉ុបគិតត្រឹមឆ្នាំ 2030 តទៅ។ Ford នឹងបញ្ចេញរថយន្តអគ្គិសនីចំនួន 9 ម៉ូដែលសម្រាប់ឆ្នាំ 2024។

Ford ក៏បាន និងកំពុងសហការជាមួយ Volkswagen ដើម្បីផលិតរថយន្តអគ្គិសនីឱ្យបាន 1.2 លានគ្រឿងក្នុង 6 ខែខាងមុខ។

July 3, 2023

ដំណេកពេលថ្ងៃត្រង់ជួយឱ្យខួរក្បាលមានសុខភាពល្អ និងក្មេងជាងវ័យ

យោងតាមការសិក្សាស្រាវជ្រាវថ្មីបំផុតរបស់ក្រុមអ្នកវិទ្យាសាស្ត្រ ការដេកនៅពេលថ្ងៃត្រង់នឹងជួយឱ្យខួរក្បាលរីកចម្រើន សុខភាពល្អ ហើយមនុស្សមានកម្លាំងដូចនៅក្មេងជាងវ័យពី 3 ទៅ 7 ឆ្នាំ។

ក្រុមអ្នកស្រាវជ្រាវនៃសាកលវិទ្យាល័យ College London (ចក្រភពអង់គ្លេស) និង សាកលវិទ្យាល័យសាធារណរដ្ឋ នៃប្រទេសអ៊ុយរូហ្គាយ ថ្មីៗនេះបានបញ្ចប់ការវិភាគទិន្នន័យដែលបានពីមនុស្ស 35,080 នាក់ដែលបានចូលរួមនៅឯធនាគារជីវសាស្ត្ររបស់អង់គ្លេស។

លទ្ធផលនៃការវិភាគទិន្នន័យខាងលើ បាននាំទៅរកការសន្និដ្ឋានថា ដំណេកនៅពេលថ្ងៃត្រង់គឺជាគន្លឹះដើម្បីរក្សាទម្ងន់របស់ខួរក្បាល នៅពេលចាស់។ វានឹងជួយឱ្យខួរក្បាលរីកចម្រើន សុខភាពល្អ ហើយមនុស្សមានកម្លាំងដូចនៅក្មេងជាងវ័យពី 3 ទៅ 7 ឆ្នាំ។

ទោះជាយ៉ាងណាក៏ដោយ សាស្ត្រាចារ្យ Simon Smith អ្នកជំនាញខាងដំណេក និងសុខភាពរបស់សាកលវិទ្យាល័យ Queensland (អូស្ត្រាលី) បានឱ្យដឹងថា លទ្ធផលនៃការសិក្សាស្រាវជ្រាវនេះមិនមែនមានន័យថា ដំណេករយៈពេលខ្លីនៅថ្ងៃត្រង់ សុទ្ធតែមានប្រយោជន៍ពេញលេញដូចបានរៀបរាប់ខាងលើនោះឡើយ។

សាស្ត្រាចារ្យ Simon Smith បញ្ជាក់ថា បញ្ហា «ស្វិតខួរក្បាលនៅតែអាចកើតឡើងទៅតាមស្ថានភាពសុខភាពជាក់ស្ដែង មានដូចជា មនុស្សញៀននឹងស្រា ជំងឺដាច់សរសៃឈាមខួរក្បាល និងជំងឺភ្លេចភ្លាំង (Alzheimer) ក៏ដូចជាការចាស់ទៅតាមអាយុជាដើម៕

June 30, 2023

សហរដ្ឋអាម៉េរិកអនុម័តលក់ប្រព័ន្ធមីស៊ីល Patriot តម្លៃ 15 ពាន់លានដុល្លារឱ្យប៉ូឡូញ

សហរដ្ឋអាម៉េរិក បានប្រកាសថា ប្រទេសប៉ូឡូញនឹងទិញប្រព័ន្ធមីស៊ីល Patriot រួមនឹងឧបករណ៍ដែលទាក់ទង ទៅតាមកិច្ចសន្យាមួយដែលមានតម្លៃប្រហែល 15 ពាន់លានដុល្លារអាម៉េរិក។

ការទិញដូរអាវុធនេះនឹងជួយឱ្យប៉ូឡូញបង្កើនសមត្ថភាពការពារមីស៊ីល រួមចំណែកជំរុញឱ្យប្រទេសនេះសម្រេចបានគោលដៅលើកកម្ពស់សមត្ថភាពកងទ័ព។ នេះបើតាមស្ថាប័នសហប្រតិបត្តិការណ៍សន្តិសុខជាតិ (DSCA) នៃក្រសួងការពារជាតិអាម៉េរិក ដែលបានឱ្យដឹងកាលពីថ្ងៃទី 28 មិថុនា 2023។

ការលក់អាវុធតម្លៃ 15 ពាន់លានដុល្លារដែលត្រូវបានក្រសួងការបរទេសអាម៉េរិកយល់ព្រមរួចហើយនេះ នឹងរួមមាន ប្រព័ន្ធមីស៊ីល Patriot PAC-3 ចំនួន 48 គ្រឿង, មីស៊ីលវាយស្កាត់ Patriot PAC-3 MSE ចំនួន 644 គ្រឿង អមនឹងរ៉ាដា និងឧបករណ៍គ្រប់គ្រងក្នុងប្រព័ន្ធ។ ក្រុមហ៊ុនដែលទទួលខុសត្រូវក្នុងការលក់អាវុធនេះគឺ Raytheon និង Lockheed Martin។

ប្រកាសខាងលើរបស់ក្រុមមន្ត្រីអាម៉េរិក មិនបានលើកឡើងថា ពួកគេបានចុះកិច្ចព្រមព្រៀងរួចហើយ ឬការចរចាបានបញ្ចប់ហើយ ឬនៅ។

ក្រុមប្រទេសជាសមាជិកណាតូ នៅអឺរ៉ុបខាងកើត កំពុងតែប្រញាប់បង្កើនសមត្ថភាពការពារជាតិ បន្ទាប់ពីរុស្ស៊ីបានចូលឈ្លានពានអ៊ុយក្រែនតាំងពីខែកុម្ភៈ 2022។

កាលពីខែមករា ឆ្នាំ 2023 ប៉ូឡូញបានចុះកិច្ចព្រមព្រៀងទិញរថក្រោះ M1A1 Abrams ចំនួនជាង 110 គ្រឿងពីសហរដ្ឋអាម៉េរិក រួមនឹងឧបករណ៍យោធាជាច្រើនទៀតដែលមានតម្លៃសរុប 1.4 ពាន់លានដុល្លារ។ កាលពីឆ្នាំ 2022 ទីក្រុងវ៉ាសូវីបានបញ្ជាទិញរថក្រោះ M1A2 Abrams ចំនួន 250 គ្រឿង ដែលគ្រោងនឹងទទួលបានចាប់ពីឆ្នាំ 2025 ដល់ 2026៕

June 29, 2023

បំណែកសាកសពនាវាមុជទឹក Titan ត្រូវបានស្រង់ឡើងគោក

បំណែករបស់នាវាមុជទឹក Titan ដែលបានជួបគ្រោះថ្នាក់កាលពីថ្ងៃទី 18 មិថុនា 2023 ត្រូវបានស្រង់ឡើងគោក និងនាំទៅកាន់កំពង់ផែនៅប្រទេសកាណាដា ក្នុងនោះក៏អាចមានផ្ទុកបំណែកសាកសពរបស់ជនរងគ្រោះ។

ក្រុមហ៊ុនអាម៉េរិក Pelagic Research ដែលមានរ៉ូបូតបញ្ជាពីចម្ងាយ Odysseus ដែលត្រូវបានប្រើប្រាស់ក្នុងការស្វែងរកនាវា Titan បានឱ្យដឹងថា បំណែកនានាពីសាកសពនាវាមុជទឹក Titan ក្នុងនោះអាចមានផ្នែកខាងមុខ និងឧបករណ៍បញ្ជា ត្រូវបាននាំទៅកាន់កំពង់ផែ St. John នៅប្រទេសកាណាដា កាលពីថ្ងៃទី 28 មិថុនា។

«ក្រុមអ្នកស្វែងរកបានធ្វើការទាំងយប់ទាំងថ្ងៃចំនួន 10 ថ្ងៃ នៅក្នុងការស្វែងរកសាកសពនាវា Titan» អ្នកនាំពាក្យរបស់ក្រុមហ៊ុនខាងលើឱ្យដឹងដូច្នេះ និងបន្តថា បេសកកម្មស្រង់ឡើងគោករបស់ពួកគេត្រូវបានបិទបញ្ចប់។

បំណែកពីនាវា Titan នឹងត្រូវបានដឹកទៅកាន់សហរដ្ឋអាម៉េរិក ដើម្បីវិភាគបន្ថែម។ កម្លាំងឆ្មាំសមុទ្រអាម៉េរិក ថ្មីៗនេះក៏បានបញ្ជាក់ថា ប្រហែលជាបានរកឃើញបំណែកសាកសពរបស់ជនរងគ្រោះនៅក្បែរបំណែកនាវា ក្នុងពេលស្រង់ឡើងគោក។

Jason Meubauer ប្រធានក្រុមស្រាវជ្រាវអំពីហេតុកាណ៍គ្រោះថ្នាក់នាវា Titan របស់សហរដ្ឋអាម៉េរិក និយាយថា «នៅមានកិច្ចការត្រូវធ្វើជាច្រើនទៀតដើម្បីស្វែងរកមូលហេតុដែលនាំឱ្យកើតមានហេតុកាណ៍ដ៏សោកសៅរបស់ Titan»។

នាវាមុជទឹក Titan បានដាច់ទំនាក់ទំនងតាំងពីថ្ងៃទី 18 មិថុនា 2023 ប្រហែលជិតពីរម៉ោងបន្ទាប់ពីបានចាកចេញពីកប៉ាល់មេ Polar Prince ដើម្បីចុះទៅមើលសាកសពកប៉ាល់ Titanic។ កាលពីថ្ងៃទី 22 មិថុនា ក្រុមល្បាតសមុទ្រអាម៉េរិកអះអាងថា នាវា Titan បានបែកបាក់ខ្ទេចខ្ទីនៅបាតសមុទ្រ បណ្ដាលឱ្យមនុស្ស 5 នាក់បាត់បង់ជីវិត។ បំណែករបស់ Titan ត្រូវបានរកឃើញនៅតំបន់ដែលមានចម្ងាយពីក្បាលសាកសពកប៉ាល់ Titanic ប្រហែល 488 ម៉ែត្រ។

មន្ត្រីអាម៉េរិកយល់ថា Titan ត្រូវបានកម្ទេចដោយសម្ពាធទឹកក្នុងជម្រៅជិត 4,000 ម៉ែត្រ ធ្វើឱ្យជនរងគ្រោះហាក់ត្រូវស្លាប់ភ្លាមៗ ប៉ុន្តែមិនទាន់ដឹងច្បាស់ថា គ្រោះថ្នាក់នេះកើតឡើងដោយសារបញ្ហាបច្ចេកទេសក្នុងនាវា ឬដោយសារមនុស្សធ្វើឱ្យមានកំហុស៕

June 29, 2023

ជនភៀសខ្លួនមីយ៉ាន់ម៉ារាប់ពាន់នាក់ឆ្លងដែនចូលទឹកដីថៃ

ក្រុមមន្ត្រីថៃឱ្យដឹងថា ជនជាតិមីយ៉ាន់ម៉ារាប់ពាន់នាក់កំពុងជ្រកកោននៅក្នុងបណ្ដាស្រុកជាប់ព្រំដែននៃខេត្ត Mae Hong Son ភាគខាងជើងប្រទេសថៃ ដើម្បីគេចពីសង្គ្រាមស៊ីវិលនៅមីយ៉ាន់ម៉ា។

ការប្រយុទ្ធគ្នាដ៏ខ្លាំងក្លារវាងបណ្ដាក្រុមប្រដាប់អាវុធ និងរដ្ឋាភិបាលយោធាមីយ៉ាន់ម៉ា កើតឡើងនៅតាមបណ្ដោយព្រំដែនថៃ-មីយ៉ាន់ម៉ា ដែលនៅជាប់នឹងស្រុក Mae Sariang និងស្រុក Khun Yuam នៃខេត្ត Mae Hong Son របស់ប្រទេសថៃ។ ចំនួនជនភៀសខ្លួនមីយ៉ាន់ម៉ាដែលមកជ្រកកោននៅតំបន់ខាងលើបានឡើងដល់ជិត 5,000 នាក់។

រដ្ឋអំណាចក្នុងខេត្ត Mae Hong Son កំពុងសហការជាមួយកាកបាទក្រហមថៃ និងប្រជាជនក្នុងតំបន់ ធ្វើការរៃអង្គាសអាហារ ទឹក និងរបស់ប្រើប្រាស់ចាំបាច់ ដើម្បីផ្ដល់ឱ្យជនភៀសខ្លួនមីយ៉ាន់ម៉ាជារៀងរាល់សប្ដាហ៍ រហូតដល់ការប្រយុទ្ធគ្នាបានបញ្ចប់។

ចំណែកមជ្ឈមណ្ឌលគ្រប់គ្រងព្រំដែនថៃ-មីយ៉ាន់ម៉ាវិញ ក៏បានរៀបចំបណ្ដាញលូ និងការងារពាក់ព័ន្ធនឹងអនាម័យ ក៏ដូចជាសន្តិសុខនៅតាមជំរំជនភៀសខ្លួន និងនៅតាមបន្ទាត់ព្រំដែនសំខាន់ៗរបស់ប្រទេសទាំងពីរ។

ច្រកព្រំដែនថៃ-មីយ៉ាន់ម៉ាជាប់នឹងខេត្ត Mae Hong Son របស់ប្រទេសថៃ

ក្រុមទាហានជនជាតិការ៉ែននៅប្រទេសមីយ៉ាន់ម៉ា

June 27, 2023

កងទ័ពស៊ីឈ្នួល Wagner ប្រកាសថា បានបាញ់ទម្លាក់ឧទ្ធម្ភាគរបស់កងទ័ពរុស្ស៊ី

Prigozhin ប្រកាសថា ក្រុមខ្មាន់កាំភ្លើង Wagner បាញ់ទម្លាក់ឧទ្ធម្ភាគយោធារុស្ស៊ី ពេលវាបាញ់ប្រហារមកលើក្បួនរថយន្តរបស់កងកម្លាំងនេះដែលកំពុងឆ្ពោះទៅកាន់ខេត្ត Rostov។

Yevgeny Prigozhin មេដឹកនាំក្រុមហ៊ុនទាហានស៊ីឈ្នួលឯកជន Wagner ដែលធ្វើការឱ្យកងទ័ពរុស្ស៊ី កាលពីវេលាទៀបភ្លឺថ្ងៃទី 24 មិថុនានេះ បានប្រកាសថា កំពុងនាំក្បួនរថយន្តដឹកខ្មាន់កាំភ្លើងរបស់ខ្លួនរាប់ពាន់នាក់ពីសមរភូមិនៅអ៊ុយក្រែន ឆ្លងកាត់ព្រំដែនរុស្ស៊ី ឆ្ពោះចូលខេត្ត Rostov នៅភាគខាងត្បូង ដើម្បី «ទាមទារយុត្តិធម៌»។

មុននោះ Prigozhin បានចោទថា អគ្គមេបញ្ជាការកងទ័ព Valery Gerasimov និងរដ្ឋមន្ត្រីក្រសួងការពារជាតិ Sergei Shoigu របស់រុស្ស៊ី បានចេញបញ្ជាឱ្យបាញ់មីស៊ីលកម្ទេចបន្ទាយកងទ័ពរបស់ Wagner។

លោក Yevgeny Prigozhin ឱ្យដឹងថា ឧត្ដមសេនីយ៍ Gerasimov បាន «ចេញបញ្ជាឱ្យឧទ្ធម្ភាគចក្រយោធា វាយប្រហារលើក្បួនរថយន្ត» របស់ក្រុមហ៊ុនយោធាឯកជនដែលកំពុងឆ្ពោះទៅកាន់ Rostov។ «គាត់មិនខ្វល់ថា ខ្លួនកំពុងសម្លាប់អ្នកណា» លោក Prigozhin និយាយដូច្នេះ និងអះអាងថា ពីឡុតមួយចំនួនមិនគោរពតាមបញ្ជារបស់ Gerasimov និងបានសម្ដែងការដឹងគុណចំពោះពួកគេ។

លោក Prigozhin ក្រោយមកក៏បានប្រកាសថា កងកម្លាំង Wagner បានបាញ់ទម្លាក់ឧទ្ធម្ភាគចក្ររបស់កងទ័ពរុស្ស៊ី បន្ទាប់ពីពីឡុតបើកការវាយប្រហារមកលើក្បួនរថយន្ត។ ក៏ប៉ុន្តែ មេដឹកនាំរបស់ Wagner មិនទាន់ប្រកាសព័ត៌មានលម្អិតអំពីស្ថានការណ៍ ទីតាំង និងរូបភាពដែលទាក់ទងក្នុងករណីនេះនៅឡើយ។

មុននោះ លោក Prigozhin ប្រកាសថា Wagner ទទួលបាន «ការស្វាគមន៍ពីកងកម្លាំងការពារព្រំដែន ពេលឆ្ពោះពីតំបន់សមរភូមិនៅអ៊ុយក្រែន ចូលមកខេត្ត Rostov។ «អង្គភាពដែលត្រូវបានក្រសួងការពារជាតិបញ្ជូនមកដើម្បីរារាំងផ្លូវរបស់យើងក៏បានចៀសទៅម្ខាង» មេ Wagner បន្ថែមដូច្នេះ។

លោក Prigozhin អះអាងថា «…យើងនឹងកម្ទេចអ្នកទាំងឡាយណាដែលរារាំងដំណើរ។ យើងកំពុងឆ្ពោះទៅមុខ ហើយនឹងដើរដល់ទីបញ្ចប់»។

អង្គភាពសន្តិសុខរុស្ស៊ី (FSB) កាលពីថ្ងៃទី 23 មិថុនា បានប្រកាសបើកការស៊ើបអង្កេតលើលោក Prigozhin ព្រោះតែទង្វើ «បំបះបំបោរ» នៅពេលអំពាវនាវដល់កងកម្លាំង Wagner ទាំងអស់ ងាកមកប្រឆាំងនឹងក្រសួងការពារជាតិរុស្ស៊ី។

FSB ប្រកាសអំពីការសម្រេចចិត្តបើកការស៊ើបអង្កេត បន្ទាប់ពីលោក Prigozhin ចោទប្រកាន់រដ្ឋមន្ត្រីក្រសួងការពារជាតិរុស្ស៊ី Shoigu ថា មកកាន់ Rostov ដើម្បីដឹកនាំកម្លាំងវាយប្រហារដោយមីស៊ីលសំដៅលើបន្ទាយទាហានរបស់ Wagner បង្កឱ្យមានការស្លាប់ និងរបួសច្រើន។

មេ Wagner ប្រកាសថា ដឹកនាំទាហានស៊ីឈ្នួល 25,000 នាក់ ទៅកាន់ Rostov ដើម្បីសួរនាំរដ្ឋមន្ត្រី Shoigu អំពីករណីវាយប្រហារខាងលើ និងបានអះអាងថា នេះគឺជា «ដំណើរទាមទារយុត្តិធម៌ មិនមែនជារដ្ឋប្រហារ» ហើយសកម្មភាពនេះក៏ «មិនមែនជាការរារាំងទាហានរុស្ស៊ី»។

ចំណែក FSB វិញ ក៏បានអំពាវនាវសូមឱ្យសមាជិកនានារបស់ Wagner កុំធ្វើតាមបញ្ជារបស់ Prigozhin និងថា គួរតែចាប់ខ្លួនមេដឹកនាំក្រុមហ៊ុនយោធាស៊ីឈ្នួលឯកជននេះ។

ក្នុងគ្រានោះដែរ ឧត្ដមសេនីយ៍រុស្ស៊ីមួយចំនួនបានណែនាំឱ្យទាហាន Wagner គោរពតាមបទបញ្ជារបស់ប្រធានាធិបតីរុស្ស៊ី ដែលស្នើឱ្យរំសាយក្រុម និងត្រលប់ទៅកាន់មូលដ្ឋាន មុននឹងហួសពេល។

Adam Hodge អ្នកនាំពាក្យរបស់ក្រុមប្រឹក្សាសន្តិសុខជាតិអាម៉េរិក និយាយថា សេតវិមានកំពុងតាមដានស្ថានការណ៍ដែលទាក់ទិននឹង Wagner ហើយថា នឹង «ពិភាក្សាជាមួយសម្ព័ន្ធមិត្ត និងដៃគូអំពីបញ្ហានេះ»៕

June 24, 2023

ក្រុមហ៊ុនគ្រប់គ្រងនាវាមុជទឹក Titan ប្រឈមនឹងបញ្ហាផ្លូវច្បាប់ក្រោយករណីស្លាប់មនុស្សប្រាំនាក់

OceanGate ដែលក្រុមហ៊ុនគ្រប់គ្រងនាវាមុជទឹក Titan អាចត្រូវប្រឈមមុខនឹងរឿងក្ដីប្ដឹងផ្ដល់ពីគ្រួសារជនរងគ្រោះ បើទោះជាក្រុមអ្នកទេសចណ៍នេះបានចុះហត្ថលេខាលើកលែងក៏ដោយ។

កាលពីថ្ងៃទី 22 មិថុនា សមត្ថកិច្ចសហរដ្ឋអាម៉េរិក និងក្រុមហ៊ុន OceanGate បានបញ្ជាក់ថា មនុស្សប្រាំនាក់ដែលស្ថិតក្នុងនាវាមុជទឹក Titan បានទទួលមរណភាពទាំងអស់ ក្រោយពីក្រុមសង្គ្រោះបានរកឃើញបំណែកនានារបស់ Titan។

អ្នកដែលបានស្លាប់ក្នុងហេតុការណ៍ខាងលើ រួមមាន Stockton Rush អាយុ 61 ឆ្នាំ ជាស្ថាបនិក និងជានាយកប្រតិបត្តិរបស់ OceanGate, មហាសេដ្ឋីអង់គ្លេស Hamish Harding អាយុ 58 ឆ្នាំ, Shahzada Dawood អាយុ 48 ឆ្នាំ ជាអ្នកជំនួញដើមកំណើតប៉ាគីស្ថាន និងកូនប្រុស Suleman អាយុ 19 ឆ្នាំ ដែលសុទ្ធតែជាពលរដ្ឋអង់គ្លេស រួមនឹងពលរដ្ឋបារាំងមួយរូបទៀត គឺអ្នកវិទ្យាសាស្ត្រខាងសមុទ្រ Paul-Henri Nargeolet អាយុ 77 ឆ្នាំ។

បច្ចុប្បន្ន មិនទាន់ដឹងច្បាស់ថា សាកសពជនរងគ្រោះខាងលើនឹងអាចត្រូវបានស្រង់មកលើគោកបានដែរ ឬយ៉ាងណានៅឡើយ។ ប៉ុន្តែ ក្រុមសមត្ថកិច្ចនៅតែបន្តស្វែងរកវត្ថុតាងនានាដើម្បីបញ្ជាក់បន្ថែមឱ្យកាន់តែច្បាស់។

មុនពេលឡើងកប៉ាល់ និងចូលនាវា Titan ដើម្បីចុះទៅទស្សនាសាកសពកប៉ាល់ Titanic ដែលនៅបាតសមុទ្រជម្រៅជិត 4,000 ម៉ែត្រ អតិថិជនទាំងអស់សុទ្ធតែត្រូវតម្រូវឱ្យចុះហត្ថលេខាលើកលែងការទទួលខុសត្រូវលើអាយុជីវិតសម្រាប់ OceanGate។ ក៏ប៉ុន្តែ ចំពោះគ្រួសារជនរងគ្រោះ គ្រប់យ៉ាងនឹងមិនបញ្ចប់ត្រឹមនេះឡើយ។ ក្រុមអ្នកវិភាគនិយាយថា សាច់ញាតិរបស់ជនរងគ្រោះនៅតែអាចប្ដឹងក្រុមហ៊ុននេះ សូម្បីតែនៅពេលជនរងគ្រោះបានចុះហត្ថលេខារួចរាល់ក៏ដោយ។

ទោះជាយ៉ាងណាក៏ដោយ មុនពេលរកឃើញមូលហេតុពិតប្រាកដនៃហេតុការណ៍គ្រោះថ្នាក់នេះ គេនៅតែមិនទាន់កំណត់បានថា ករណីនេះត្រូវផាត់ចោលកិច្ចសន្យា ឬអត់។ នេះបើតាម Joseph Low មេធាវីមួយរូបនៅរដ្ឋ California សហរដ្ឋអាម៉េរិក។

មកដល់បច្ចុប្បន្ន មិនទាន់មានប្រភពណាមួយនិយាយច្បាស់អំពីរឿងថា តើគ្រួសារជនរងគ្រោះមានបំណងប្ដឹងក្រុមហ៊ុន OceanGate ឬអត់នៅឡើយ៕

June 23, 2023

រោងចក្រដំបូងគេបង្អស់នៅក្នុងទីអវកាស ចាប់ផ្ដើមដំណើរការ

(សហរដ្ឋអាម៉េរិក) – ក្រុមហ៊ុន Varda Space Industries នឹងផលិតឱសថ រួមនឹងវត្ថុធាតុផ្សេងៗទៀតនៅលើគន្លងតារាវិថីផែនដី តាមរយៈកាប៊ីនដែលហោះអមនឹងផ្កាយរណប។

ក្រុមហ៊ុន Varda Space Industries នៅរដ្ឋ California ប្រកាសថា បានទទួលជោគជ័យក្នុងការបាញ់បង្ហោះ W-Seres 1 ដែលជាផ្កាយរណបដំបូងរបស់ខ្លួន ឡើងទៅកាន់គន្លងគោចរផែនដី។ ក្រុមហ៊ុននេះកំពុងឆ្ពោះទៅរកការផលិតវត្ថុធាតុជាច្រើននៅក្នុងទីអវកាស។ វត្ថុធាតុទាំងនេះមិនអាចបង្កើតឡើងនៅលើផែនដី ឬអភិវឌ្ឍឆាប់រហ័សជាមួយនឹងគុណភាពខ្ពស់ជាង ធៀបនឹងនៅក្នុងស្ថានភាពគ្មានទំនាញផែនដី។

ផ្ទាំងសូឡារបស់រោងចក្រដំបូងក្នុងអវកាសនេះ បានបែរទៅរកព្រះអាទិត្យ និងចាប់ផ្ដើមពន្លាតខ្លួន។ នេះបើតាមការឱ្យដឹងរបស់ Varda បន្ទាប់ពីផ្កាយរណបបានហោះចូលដល់គន្លងគោចរ នៅក្នុងបេសកកម្ម Transporter-8 របស់ SpaceX កាលពីថ្ងៃទី 13 មិថុនា 2023។

ផ្កាយរណប W-Series 1 ត្រូវបានបំពាក់កាប៊ីនទម្ងន់ 90 គីឡូក្រាម ដែលត្រូវបានរចនាឡើងដើម្បីស្រាវជ្រាវឱសថ។ កាប៊ីននេះនឹងផ្ដាច់ខ្លួន មុនពេលចាប់ផ្ដើមហោះហើរក្នុងអវកាស ប៉ុន្តែនៅតែភ្ជាប់ជាមួយនឹងបណ្ដាញថាមពល កម្លាំងរុញច្រាន និងទំនាក់ទំនងចាំបាច់ដើម្បីកំណត់ទិស។ ក្នុងភារកិច្ចដំបូង បណ្ដាញខាងលើត្រូវបានផ្គត់ផ្គង់ដោយក្រុមហ៊ុន Rocket Lab។ បន្ទាប់មក ការពិសោធនឹងត្រូវបានធ្វើឡើងដោយរ៉ូបូតក្នុងកាប៊ីន។

សកម្មភាពរបស់ Varda គឺយោងទៅតាមការសិក្សាស្រាវជ្រាវផ្នែកវិទ្យាសាស្ត្រដែលបញ្ជាក់ថា ប្រូតេអ៊ីនក្នុងអវកាសអាចកកើតរចនាសម្ព័ន្ធល្អជាងធៀបនឹងនៅលើផែនដី ដោយសារតែបរិស្ថានមាន និងគ្មានទំនាញផែនដី។

បេសកកម្មដំបូងរបស់ Varda នឹងផ្ដោតទៅលើការអភិវឌ្ឍ ritonavir ក្នុងអវកាស។ Ritonavir គឺជាថ្នាំដែលតែងត្រូវបានប្រើប្រាស់សម្រាប់ប្រឆាំងនឹង HIV ដែលជាវីរុសបង្កឱ្យមានជំងឺអេដស៍ ប៉ុន្តែប៉ុន្មានឆ្នាំចុងក្រោយនេះ វាក៏ត្រូវបានប្រើប្រាស់ដើម្បីព្យាបាលជំងឺកូវីដ-19។

ក្រោយពីការពិសោធរបស់ Varda បានបញ្ចប់ កាប៊ីននេះនឹងត្រូវបានផ្កាយរណបរុញទម្លាក់មកកាន់ផែនដី និងចុះចតដោយប្រើប្រាស់ឆត្រយោង មុនពេលអ្នកវិទ្យាសាស្ត្រប្រមូលយកវត្ថុធាតុឱសថ។

ក្រុមហ៊ុន Varda ត្រូវបានបង្កើតឡើងដោយអតីតវិស្វករអេឡិចត្រូនិចអាកាសចរណ៍របស់ SpaceX លោក Will Bruye និង Delian Asparouhov។ គោលដៅរបស់ពួកគេគឺបង្កើតផលិតផលនានានៅក្នុងអវកាស ដែលរោងចក្រនៅលើផែនដីមិនអាច ឬពិបាកធ្វើបានល្អ៕

June 15, 2023

Tag: បញ្ចប់