នារី - La Reine Media

រឿង TikToker បន្ថែមទង់ជាតិថៃទៅក្នុងវីដេអូថតនៅអង្គរវត្ត ខាង «វៀតណាមកំពុងមានចំណាត់ការ»

តំណាងមន្ទីរវប្បធម៌ និងកីឡានៃទីក្រុងហូជីមិញ ឱ្យដឹងថា បានក្ដាប់បានព័ត៌មាន និងកំពុងសហការជាមួយនឹងភាគីពាក់ព័ន្ធ ដើម្បីមានចំណាត់ការលើ TikToker វៀតណាម ហឿ ក្វុកអាញ់ (Hua Quoc Anh) ដែលបានបង្ហោះវីដេអូបង្ហាញពីទិដ្ឋភាពអង្គរបស់កម្ពុជា ប៉ុន្តែបន្ថែមរូបភាពស្ដេចថៃ និងទង់ជាតិថៃ។

ការបញ្ជាក់ខាងលើនេះត្រូវបានធ្វើឡើងកាលពីថ្ងៃទី 16 វិច្ឆិកា 2023 ដោយលោក ឡាំ ង៉ូហ្វាំងអាញ់ ប្រធានមន្ទីរវប្បធម៌ និងកីឡា នៃទីក្រុងហូជីមិញ ជាទីដែល TikToker ហឿ ក្វុកអាញ់ រស់នៅ។

ប្រធានមន្ទីររូបនេះឱ្យដឹងថា ក្រោយពីមានរបាយការណ៍ផ្លូវការ មន្ទីរវប្បធម៌ និងកីឡារបស់ទីក្រុងហូជីមិញ នឹងសហការ ក៏ដូចជាមានមិតសមស្របចំពោះបញ្ហាដែលពាក់ព័ន្ធ។

ចំណែកលោក ហ្វាំ ង៉ុក អនុប្រធានមន្ទីរខាងលើក៏បានឱ្យដឹងថា ដោយសារតែការរំលោភបំពានច្បាប់របស់ TikToker វៀតណាម ហឿ ក្វុកអាញ់ កើតឡើងនៅខាងក្រៅប្រទេសវៀតណាម ទើបអាជ្ញាធរវៀតណាមត្រូវការការបញ្ជាក់ឱ្យបានច្បាស់លាស់ មុននឹងមានចំណាត់ការ។

លោក ង៉ូ ឡាំហ្វាងអាញ់ ប្រធានការិយាល័យនៃមន្ទីរវប្បធម៌ និងកីឡាទីក្រុងហូជីមិញ បានឆ្លើយតបអ្នកសារព័ត៌មានអំពីហេតុការណ៍ដែលពាក់ព័ន្ធនឹង TikToker ហឿ ក្វុកអាញ់ (Hua Quoc Anh)

មុននោះ នៅលើទំព័រ TikTok របស់ខ្លួន ហឿ ក្វុកអាញ់ បានបង្ហោះវីដេអូមួយបង្ហាញពីនារីម្នាក់ស្លៀកឈុតពណ៌ផ្កាឈូក កាន់ដំបង ដើរក្នុងបរិវេណប្រាសាទអង្គរវត្តរបស់កម្ពុជា។ វីដេអូនេះបានធ្វើឱ្យមានការរិះគន់យ៉ាងខ្លាំងក្លាពីអ្នកលេងបណ្ដាញសង្គម ពិសេសគឺប្រជាជនកម្ពុជា ព្រោះថា ក្នុងវីដេអូដែលថតទិដ្ឋភាពអង្គរវត្ត បែរជាត្រូវបានបញ្ចូលរូបភាពទង់ជាតិថៃ ក៏ដូចជាស្ដេចថៃ និងសំឡេងនិយាយ «Hello Thailand» ជាបន្តបន្ទាប់។

ក្រោយមក នៅថ្ងៃទី 12 វិច្ឆិកា អាជ្ញាធរជាតិអប្សរា ក៏ប្រកាសថា វីដេអូដែលបាននិយាយខាងលើនេះគឺប៉ះពាល់ដល់វប្បធម៌ និងបេតិកភណ្ឌរបស់កម្ពុជា។

ក្រោយពីត្រូវបានមហាជនរិះគន់ខ្លាំងក្លានៅលើបណ្ដាញសង្គម ជនជាតិវៀតណាម ហឿ ក្វុកអាញ់ ក៏បានបង្ហោះវីដេអូសូមអភ័យទោសកាលពីព្រឹកថ្ងៃទី 14 វិច្ឆិកា។

ជនបង្កភាពហេតុ ហឿ ក្វុកអាញ់ (Hứa Quốc Anh)

បន្ទាប់មក TikToker រូបនេះក៏បានលុបវីដេអូនេះលើ Facebook, TikTok។ ទំព័រ TikTok របស់ជននេះដែលមានអ្នកតាមដានជាង 700,000 នាក់ក៏ត្រូវបានបិទ ក្រោយពីមានបញ្ហានេះ។ ក៏ប៉ុន្តែ ទោះជាយ៉ាងណាក៏ដោយ កំហឹងរបស់មហាជន ពិសេសគឺជនជាតិខ្មែរ នៅតែមិនអាចរសាយ។

នេះមិនមែនជាលើកដំបូងឡើយដែល TikToker ម្នាក់នេះ បង្កឱ្យមានការរិះគន់លើបណ្ដាញសង្គម។ កន្លងមក ជននេះក៏ធ្លាប់បានបញ្ចេញមតិខុសឆ្គងទាក់ទងនឹងរឿងសាសនា វប្បធម៌របស់ជនជាតិមួយចំនួនផងដែរ៕

November 17, 2023

ផ្ទាំងគំនូរបុរាណមានរូបភាពឧបករណ៍ទំនើប សង្ស័យថាជាករណី «ដំណើរឆ្លងពេលវេលា»

ផ្ទាំងគំនូរបុរាណតាំងពីឆ្នាំ 1882 ថ្មីៗនេះបានបង្កឱ្យមានការភ្ញាក់ផ្អើលខ្លាំង និងធ្វើឱ្យមានការលើកឡើងអំពីរឿង «ធ្វើដំណើរឆ្លងពេលវេលា» បន្ទាប់ពីទិដ្ឋភាពលំអិតរបស់វាត្រូវបានគេរកឃើញ។

ទំព័រ Daily Star កន្លងទៅថ្មីៗនេះបានលើកឡើងអំពីទ្រឹស្ដីមួយដ៏ពិបាកឱ្យគេជឿ ទាក់ទងនឹងផ្ទាំងគំនូរមួយដែលបានគូរកាលពីឆ្នាំ 1882 ដោយវិចិត្រករ R. Josey និង James Archer។ ផ្ទាំងគំនូរនេះមានឈ្មោះថា «The Betrothal» ។

គំនូរនេះត្រូវបានគេដឹងថា ជាទិដ្ឋភាពនៃសកម្មភាពសន្យានឹងគ្នាអំពីគម្រោងរៀបការរបស់អ្នកនិពន្ធស្កុតឡែន Robert Burns និងនារីម្នាក់ឈ្មោះ Mary Campbell នៅក្បែរទន្លេ Ayr នៅភាគខាងជើងប្រទេសស្កុតឡែនកាលពីឆ្នាំ 1786។

ក៏ប៉ុន្តែ នៅពេលត្រូវបានពង្រីកឱ្យធំជាងមុន 10 ដង ផ្ទាំងគំនូរនេះបានធ្វើឱ្យមនុស្សម្នាមានការភ្ញាក់ផ្អើលខ្លាំងនៅចំពោះមុខអំណោយអនុស្សាវរីយ៍រាងចតុកោណដែលមានកែងមូល។ បើទោះជាពិបាកឱ្យគេជឿ ប៉ុន្តែអ្នកខ្លះយល់ថា វត្ថុនេះមានរូបរាងដូចទៅនឹងទូរស័ព្ទឆ្លាតវៃ។

ក្រោយពីទ្រីស្ដីស្ដីពី «ដំណើរឆ្លងពេលវេលា» ត្រូវបានលើកឡើងក្នុងករណីនេះ ចំណាប់អារម្មណ៍ក៏ត្រូវបានផ្ដោតទៅលើ The Betrothal ។ ក៏ប៉ុន្តែ ដើម្បីប្រឆាំងនឹងទ្រីស្ដី «ដំណើរឆ្លងកាត់ពេលវេលា» មនុស្សជាច្រើនក៏បានបកស្រាយថា នេះគ្រាន់តែជាគម្ពីរសាសនាប៉ុណ្ណោះ។

យោងតាមទំនៀមទម្លាប់បុរាណរបស់ជនជាតិស្កុតឡែន នៅពេលស្បថស្បែ គូស្នេហ៍នឹងបង្ហាញភក្ដីភាព និងការជឿជាក់របស់ខ្លួនដោយការជូនគម្ពីរសាសនាដល់គ្នានៅក្បែរទន្លេដែលមានទឹកកំពុងហូរ។ ដូច្នេះ រូបភាពដែលមានរាងចតុកោណនៅក្នុងផ្ទាំងគំនូរបុរាណនេះ ទំនងគ្រាន់តែជាសៀវភៅដែលសរសេរអំពីពាក្យសន្យាក្នុងសាសនាប៉ុណ្ណោះ មិនមែនជា «ឧបករណ៍អនាគត» អ្វីនោះឡើយ៕

August 29, 2023

ចម្លែក! នារីក្នុងកុលសម្ព័ន្ធស្បែកសស្រស់ស្អាតនៅប្រទេសចិន មិនរៀបការជាមួយជនជាតិដទៃ តើហេតុអ្វី?

នៅពេលនិយាយដល់ជនជាតិស្បែកស យើងតែនឹកឃើញដល់ជនជាតិអាម៉េរិក ឬអឺរ៉ុប។ល។ ប៉ុន្តែ រឿងដែលចម្លែកគឺថា នៅប្រទេសចិន ជាដែនដីមួយក្នុងទ្វីបអាស៊ីបែរជាមានកុលសម្ព័ន្ធស្បែកសមួយដែលបង្ហាញវត្តមានរាប់ពាន់ឆ្នាំមកហើយ។ នារីៗនៅក្នុងកុលសម្ព័ន្ធនេះ មានសម្រស់ស្រស់ស្អាតជាងជនជាតិដទៃមួយចំនួន។

ជនជាតិស្បែកសខាងលើនេះមានឈ្មោះថា Tajik រស់នៅលើជួរភ្នំ Pamirs ជាទីដែលត្រូវបានចាត់ទុកថាជាដំបូលផ្ទះពិភពលោក។ យោងតាមស្ថិតិពីរដ្ឋាភិបាលចិន ជនជាតិ Tajik នេះ មានប្រហែលជាង 50,000 នាក់ប៉ុណ្ណោះ។

ក្រៅពីលើភ្នំ Pamirs ជនជាតិ Tajik ក៏រស់នៅប្រមូលផ្ដុំគ្នានៅស្រុកស្វយ័តជនជាតិ Tajik Tashkurgan, Kashgar (ឬ Kashi), តំបន់ស្វយ័ត Xinjiang។

ជនជាតិ Tajik បរិភោគគ្រាប់ធញ្ញជាតិច្រើនប្រភេទ រួមនឹងសាច់អាំង នំផេនខេក និងផលិតផលធ្វើពីទឹកដោះគោ បន្លែ។ល។ ហើយពួកគេក៏ចូលចិត្តផឹកតែផងដែរ។

សម្រស់របស់ជនជាតិស្បែកស Tajik នៅប្រទេសចិន មានចំណុចពិសេសរបស់ជនជាតិអឺរ៉ុប ដោយមានថ្កាសខ្ពស់ ស្បែកពណ៌អូលីវ (លឿងច្រើនជាងក្រហម) ភ្នែកធំ ក្រហូងភ្នែកជ្រៅ និងក្ដោងច្រមុះដ៏ទាក់ទាញ។

អំពីទំនៀមទម្លាប់ក្នុងគ្រួសារជនជាតិ Tajik

ឪពុកម្ដាយចាស់ៗមានទំនោរលើកស្ទួយកូនប្រុសជាងកូនស្រី។ ដូច្នេះ ដើម្បីអាចបន្តវត្តមាន និងរីកចម្រើន នារីជនជាតិ Tajik ត្រូវឆ្លងកាត់ឧបសគ្គ និងសម្ពាធយ៉ាងច្រើន។

នារីជនជាតិស្បែកស Tajik មានសម្រស់ប្រហាក់ប្រហែលនឹងជនជាតិអឺរ៉ុប ដូច្នេះពួកគេតែងទទួលបានចំណាប់អារម្មណ៍ច្រើនពីសាធារណជន។ ក៏ប៉ុន្តែ ជនជាតិនេះមានច្បាប់បុរាណដែលមិនបានចារលើក្រដាសមួយដ៏សំខាន់ សម្រាប់ការអនុវត្តចំពោះនារីភេទ នោះគឺកូនក្រមុំជនជាតិនេះមិនត្រូវបានអនុញ្ញាតឱ្យរៀបការនឹងជនជាតិដទៃ។

មូលហេតុដែលនាំឱ្យមានច្បាប់បុរាណខាងលើ នោះគឺថា ជនជាតិ Tajik ចង់រក្សាឈាមជ័រ ពូជសាសន៍របស់ខ្លួនឱ្យនៅ «បរិសុទ្ធ» ដោយមិនត្រូវបានលាយឡំនឹងពូជសាសន៍ដទៃ៕

August 18, 2023

ទង្វើប្រកបដោយហិង្សាធ្វើឱ្យកីឡាការិនីអង់គ្លេសត្រូវបានប្រដូចទៅនឹង Beckham និង Rooney

សកម្មភាពបាត់បង់ការគ្រប់គ្រងរបស់កីឡាការិនី Lauren James ក្នុងវគ្គ 1/8 នៅ World Cup នារី 2023 ធ្វើឱ្យគេនឹកឃើញដល់ករណីដូចគ្នានេះដែលបានកើតឡើងជាមួយនឹងកីឡាករ Wayne Rooney និង David Beckham របស់អង់គ្លេស។

នៅនាទីទី 85 ក្នុងការប្រកួតរវាងក្រុមបាល់ទាត់នារីនីហ្សេរីយ៉ា និងអង់គ្លេសកាលពីដើមសប្ដាហ៍នេះ Lauren James មិនអាចគ្រប់គ្រងអារម្មណ៍បាន នៅពេលដើរជាន់ពីលើដងខ្លួនរបស់ Michelle Alozie។ ដំបូងឡើយ អាជ្ញាកណ្ដាលមិនបានឃើញ ប៉ុន្តែសកម្មភាពនេះត្រូវបាន VAR រកឃើញ នាំឱ្យខ្សែប្រយុទ្ធវ័យ 21 ឆ្នាំ ត្រូវទទួលកាតក្រហម។

សកម្មភាពនេះធ្វើឱ្យសារព័ត៌មាន និងអ្នកលេងបណ្ដាញសង្គមនៅអង់គ្លេស នាំគ្នាប្រៀបប្រដួចទៅនឹងករណីបង្កកំហុសឆ្គងរបស់ Wayne Rooney និង David Beckham កាលពីអតីតកាល។

David Beckham (អាវស) និង Diego Simeone នៅ World Cup 1998 ក្នុងការប្រកួតរវាងអង់គ្លេស និងអាហ្សង់ទីន

នៅក្នុងវគ្គ ¼ នៃ World Cup 1998 ដែលពេលនោះ Beckham មានអាយុ 23 ឆ្នាំ ត្រូវទទួលកាតក្រហម បន្ទាប់ពីបញ្ចេញកាយវិការសងសឹកនឹង Diego Simeone នៅក្នុងការប្រកួតរវាងអង់គ្លេស និងអាហ្សង់ទីន។ មកដល់វគ្គ ¼ នៃ World Cup 2006 Wayne Rooney អាយុ 21 ឆ្នាំ ក៏ត្រូវបានបញ្ឈប់ការប្រកួត បន្ទាប់ពីយកជើងជាន់ពីលើ Ricardo Carvalho របស់ព័រទុយហ្កាល់។

Wayne Rooney (អាវស) និង Ricardo Carvalho

កំហុសឆ្គងទាំងបីខាងលើនេះ មានចំណុចដូចគ្នាជាច្រើន ក្នុងនោះមានដូចជា ពួកគេគឺជាកីឡាករឆ្នើមកំពុងមានឈ្មោះល្បីជាងគេនៅអង់គ្លេស ដែលឆ្លងកាត់ករណីមិនអាចគ្រប់គ្រងអារម្មណ៍ ពេលក្រុមជម្រើសជាតិកំពុងប្រកួតក្នុងវគ្គជម្រុះផ្ទាល់នៅ World Cup។ ទន្ទឹមនឹងនេះ ក្រុមអង់គ្លេសក៏សុទ្ធតែត្រូវប្រកួតទាត់ប៉េណាំងទីម្ដងម្នាក់នៅក្នុងបីប្រកួតខាងលើ។ ប៉ុន្តែ កីឡាការិនី Lauren James មានសំណាងល្អជាង នៅពេលក្រុមនារីជម្រើសជាតិអង់គ្លេសបានយកឈ្នះលើនីហ្សេរីយ៉ា ចំណែក Beckham និង Rooney បានក្លាយជាកីឡាករមានកំហុសរបស់អង់គ្លេស បន្ទាប់ពីការប្រកួតបានបញ្ចប់។

នៅ World Cup នារី 2023 Lauren James រកបាន 3 គ្រាប់ និងបង្កឱកាសបាន 3 គ្រាប់ ក្នុងចំណោម 8 គ្រាប់របស់ក្រុមនារីអង់គ្លេស។ គ្រូបង្វឹកក្រុមនារីអង់គ្លេស Sarina Wiegman ឱ្យដឹងថា Lauren James បានធ្វើការសូមអភ័យទោសចំពោះករណីដែលនាងបានបង្កឡើង៕

August 9, 2023

ត្រូវហូឡង់ផ្ដួលក្នុងលទ្ធផល 0-7 វៀតណាមទទួលស្គាល់ថា «កម្លាំងចិត្តមិនឈ្នះសមត្ថភាព»

(នូវែលសេឡង់) – បន្ទាប់ពីត្រូវក្រុមបាល់ទាត់នារីជម្រើសជាតិហូឡង់ផ្ដួលដោយលទ្ធផល 0-7 នៅជើងចុងក្រោយនៃពូល E នៅរសៀងថ្ងៃទី 01 សីហានេះ គ្រូបង្វឹករបស់វៀតណាមបានទទួលស្គាល់ថា ស្មារតីតែមួយមុខគឺមិនគ្រប់គ្រាន់សម្រាប់ក្រុមវៀតណាមបង្ហាញថ្វីជើងនៅ World Cup នារីឆ្នាំ 2023។

ក្រុមបាល់ទាត់នារីជម្រើសជាតិហូឡង់ គ្រប់គ្រងបាល់បាន 73% និងទាត់ផ្ដាច់បានច្រើនជាងក្រុមវៀតណាមដល់ទៅ 9 ដង ពេលប្រកួតលើទីលាន Forsyth Barr នាថ្ងៃនេះ។ សំណាញ់ទីរបស់វៀតណាមអាចត្រូវរងគ្រាប់បាល់ច្រើនជាងលទ្ធផលដែលបានធ្វើឡើង បើសិនក្រុមកីឡាការិនីហូឡង់ប្រើប្រាស់ឱកាសបានល្អជាងនេះ។

«សមត្ថភាពរបស់វៀតណាមមិនអាចយកទៅប្រៀបស្មើនឹងគេបាន ហើយយើងត្រូវនិយាយថា កម្លាំងមិនដូចចិត្ត។ ក្រុមកីឡាការិនីបានប្រកួតដោយស្មារតីខ្ពស់ ប៉ុន្តែមិនអាចប៉ះប៉ូវសមត្ថភាព ហើយការចាញ់គឺជារឿងស័ក្ដិសម» គ្រូបង្វឹករបស់វៀតណាម លោក Mai Duc Chung ទទួលស្គាល់បន្ទាប់ពីវៀតណាមចាញ់ហូឡង់ 0-7 នៅជើងចុងក្រោយរបស់ពូល E នៅ World Cup នារីឆ្នាំ 2023 នាថ្ងៃទី 01 សីហានេះ។

មុននោះ នៅក្នុងការប្រកួតជើងដំបូងនៅ World Cup នារីរដូវកាលនេះ ក្រុមវៀតណាមក៏បានចាញ់ក្រុមអាម៉េរិក 0-3 រួចហើយក៏បន្តចាញ់ព័រទុយហ្គាល់ 0-2 ទៀត។ ក្រោយបីប្រកួតនេះ វៀតណាមស្ថិតនៅបាតតារាងចំណាត់ថ្នាក់របស់ពូល E ដោយចាញ់ 12 គ្រាប់ និងមិនបានឈ្នះសូម្បីតែមួយគ្រាប់៕

August 1, 2023

ក្រុមបាល់ទាត់មួយរបស់អាស៊ីអាគ្នេយ៍ បង្កើតប្រវត្តិសាស្ត្រនៅ World Cup

ការដណ្ដើមបានជ័យជម្នះលើនូវែលសេឡង់ មិនត្រឹមតែជួយឱ្យក្រុមបាល់ទាត់នារីជម្រើសជាតិហ្វ៊ីលីពីនមានពិន្ទុជាលើកដំបូងនៅ World Cup នោះទេ តែក៏ជួយឱ្យក្រុមនេះគិតដល់ដំណាក់កាលឡើងដល់វគ្គជម្រុះផ្ទាល់ផងដែរ។

នៅក្នុងការប្រកួតជើងទីពីរនៃពូល A ដែលមានបួនក្រុមគឺ ហ្វ៊ីលីពីន ស្វ៊ីស នូវែលសេឡង់ និងន័រវែស នៅ World Cup នារី 2023 ដែលបានធ្វើឡើងកាលពីថ្ងៃទី 25 កក្កដា 2023 ហ្វ៊ីលីពីនទទួលបាន 3 ពិន្ទុ ឈរលំដាប់ទីបី បន្ទាប់ពីបានផ្ដួលនូវែលសេឡង់ 1-0។

ចំណែកន័រវែសឈរនៅបាតតារាង និងមានហានិភ័យត្រូវបានជម្រុះឆាប់ៗនេះ ព្រោះតែទទួលបាន 1 ពិន្ទុ ក្រោយពីបានទាត់ពីរប្រកួត។ រីឯស្វ៊ីសវិញ កំពុងតែត្រៀមដណ្ដើមសំបុត្រឡើងទៅវគ្គបន្ទាប់ នៅពេលមាន 4 ពិន្ទុក្នុងដៃ។

ការប្រកួតនៅពូល A នឹងធ្វើឡើងប្រកបដោយភាពតានតឹងនៅជើងចុងក្រោយ ពេលដែលក្រុមទាំង 4 សុទ្ធតែនៅមានឱកាស។ សម្រាប់ក្រុមហ្វ៊ីលីពីន ក្រោយជ័យជម្នះដំបូងនៅ World Cup ក្រុមនេះថែមទាំងអាចបង្កើតបានប្រវត្តិសាស្ត្រដ៏គួរឱ្យរំភើប ដោយការក្លាយជាក្រុមដំបូងគេរបស់អាស៊ីអាគ្នេយ៍ដែលឆ្លងផុតវគ្គចែកពូល។

បើសិនធ្វើបានដូច្នេះ ក្រុមកីឡាការិនីបាល់ទាត់ហ្វ៊ីលីពីន នឹងបានទទួលប្រាក់រង្វាន់យ៉ាងច្រើន។ ការកំណត់របស់ FIFA បានចែងថា បណ្ដាក្រុមបាល់ទាត់ដែលចូលរួមប្រកួតនឹងបានទទួលប្រាក់រង្វាន់ 1.56 លានដុល្លារអាម៉េរិក ខណៈដែលកីឡាការិនីម្នាក់ៗនឹងបានទទួលប្រាក់រង្វាន់ 30,000 ដុល្លារអាម៉េរិកបន្ថែមទៀត។

ខ្ទង់ប្រាក់រង្វាន់ខាងលើនឹងកើនឡើង នៅពេលឡើងដល់ដំណាក់កាលខ្ពស់ជាងនេះ។ សម្រាប់ហ្វ៊ីលីពីន បើសិនបានឡើងដល់វគ្គ 1/8 ក្រុមនេះនឹងបានទទួលប្រាក់រង្វាន់ 1.87 លានដុល្លារអាម៉េរិក គ្រាដែលកីឡាការិនីម្នាក់ៗនឹងបានទទួល 60,000 ដុល្លារ ខ្ពស់ជាងពីរដងធៀបនឹងវគ្គចែកពូល។ ប្រាក់រង្វាន់នេះកើនឡើងថែមទៀត បើសិនពួកគេបានឡើងដល់វគ្គខ្ពស់ជាងនេះ។

FIFA បានបង្កើនប្រាក់រង្វាន់របស់ World Cup នារីឆ្នាំ 2023 ឡើងដល់ 110 លានដុល្លារអាម៉េរិក ខ្ពស់ជាង 3 ដង បើធៀបនឹងឆ្នាំ 2019 ហើយស្មើនឹង 1/3 នៃ World Cup 2022 នៅកាតា។

បើសិនជាបានឈ្នះន័រវែស ហ្វ៊ីលីពីននឹងបានឡើងទៅវគ្គបន្ទាប់។ ក្នុងករណីស្មើ តំណាងរបស់អាស៊ីអាគ្នេយ៍មួយនេះនឹងមាន 4 ពិន្ទុ និងគ្រាប់បាល់ចំណេញស្មើនឹង -1។ ពេលនោះ ហ្វ៊ីលីពីននឹងត្រូវរង់ចាំលទ្ធផលនៃការប្រកួតរវាងក្រុមស្វ៊ីស និងនូវែលសេឡង់។

កាលពីអតីតកាល ក្រុមនារីថៃគឺជាក្រុមដំបូងគេរបស់អាស៊ីអាគ្នេយ៍ដែលបានឡើងទៅប្រកួតនៅ World Cup ហើយក៏បានឈ្នះមួយប្រកួត។ ក្រុមនេះបានឈ្នះកូតឌឺវ័រក្នុងលទ្ធផល 3-2 នៅ World Cup 2015។ ក៏ប៉ុន្តែ ក្រុមនារីថៃពេលនោះត្រូវឈរលំដាប់ទីបីនៅក្នុងពូលរបស់ខ្លួន និងមិនអាចឡើងទៅវគ្គជម្រុះផ្ទាល់៕

July 26, 2023

World Cup នារី 2023 ត្រូវបានសម្ពោធបើកការប្រកួតជាផ្លូវការ

(នូវែលសេឡង់) – ពិធីសម្ពោធបើកព្រឹត្តិការណ៍ប្រកួតបាល់ទាត់ World Cup នារី 2023 ត្រូវបានធ្វើឡើងប្រហែលតែ 15 នាទីប៉ុណ្ណោះ មុនពេលចាប់ផ្ដើមការប្រកួតរវាង នូវែលសេឡង់ និងន័រវេស។

ក្រោយពីក្រុមកីឡាកររបស់ក្រុមទាំងពីរចាប់ផ្ដើមកម្ដៅសាច់ដុំរួច គណៈកម្មការក៏បិទភ្លើងនៅកីឡដ្ឋាន Eden Park។ ក្រុមសិល្បករក្នុងសម្លៀកបំពាក់ជនជាតិដើមអូស្ត្រាលី និងនូវែលសេឡង់ ឈានជើងចេញមកទីលាន។ ពួកគេច្រៀង និងរាំរបាំបុរាណរួមនឹងបុគ្គលិកស្ម័គ្រចិត្ត 200 នាក់ នៅក្នុងឈុតសម្លៀកបំពាក់របស់ក្រុមបាល់ទាត់ទាំង 32 ដែលចូលរួម World Cup នារី 2023។

បន្ទាប់ពីការសម្ដែងរបស់ក្រុមសិល្បករ សិល្បការិនី តំណាងរបស់បណ្ដាក្រុមបាល់ទាត់ ក៏បានចូលរួមដាក់គ្រាប់បាល់ Oceaunz ដែលជាគ្រាប់បាល់ផ្លូវការរបស់ពានរង្វាន់ World Cup នារី 2023 នៅកណ្ដាលទីលាន។ គណៈកម្មក៏ប្រកាសបង្ហាញក្រុមដែលចូលរួម World Cup នេះ ទៅតាមតួអក្ខរក្រម នៅលើអេក្រង់ទូរទស្សន៍។

គ្រាប់បាល់ Oceaunz បានចាប់ផ្ដើមរមៀលនៅលើទីលានរបស់កីឡដ្ឋាន Eden Park ហើយការប្រកួតបាល់ទាត់ World Cup នារី 2023 ក៏បានចាប់ផ្ដើមជាផ្លូវការ៕

ក្រោយមកទៀត តារាចម្រៀង Mallrat របស់អូស្ត្រាលី និង BENEE របស់នូវែលសេឡង់ ក៏ឡើងសម្ដែង និងច្រៀងបទចម្រៀងផ្លូវការរបស់ World Cup នារី 2023 ដែលមានឈ្មោះថា Do It Again។

បន្ទាប់ពីការសម្ដែងបានបញ្ចប់ ក្រុមស្ម័គ្រចិត្តក៏ប្រញាប់ប្រមូលសម្ភារសម្ដែង ដើម្បីទុកកន្លែងឱ្យក្រុមបាល់ទាត់នារីរបស់នូវែលសេឡង់ និងន័រវេស ចូលប្រកួត។ នៅពេលពានមាសដែលជាតំណាងរបស់ World Cup នារីត្រូវបាននាំមកកាន់ទីលាន ក្រុមទាំងពីរក៏ឈានជើងចេញពីផ្លូវក្រោមដី អមនឹងស្នូរទះដៃរបស់ទស្សនិកជន។

July 20, 2023

ក្រុមបាល់ទាត់នារីវៀតណាម ចាញ់ក្រុមអេស្ប៉ាញ 0-9

នៅក្នុងការប្រកួតមិត្តភាពចុងក្រោយនៅមុន World Cup នារី 2023 ដែលធ្វើឡើងនាព្រឹកថ្ងៃទី 14 កក្កដា ក្រុមបាល់ទាត់ជម្រើសជាតិផ្នែកនារីរបស់វៀតណាម បានចាញ់ក្រុមនារីអេស្ប៉ាញរហូតដល់ 0-9។

ក្រុមអេស្ប៉ាញនាំមុខ 2-0 នៅក្នុងតង់ទីមួយនៃការប្រកួតមិត្តភាពចុងក្រោយនៅមុន World Cup នារី 2023។ ចូលដល់តង់ទីពីរ ក្រុមតំណាងរបស់អឺរ៉ុបមួយនេះក៏រកបាន 7 គ្រាប់បន្ថែមទៀត ធ្វើឱ្យវៀតណាមត្រូវចាញ់ 0-9។

ការប្រកួតខាងលើត្រូវបានធ្វើឡើងលើទីលាន Mc Lennan Park ក្នុងទីក្រុង Auckland នៅវេលាម៉ោង 12 និង 30 នាទី ថ្ងៃទី 14 កក្កដា ម៉ោងនៅនូវែលសេឡង់ ត្រូវនឹងម៉ោង 07 និង 30 នាទីនៅកម្ពុជា។ មុនពេលប៉ះនឹងអេស្ប៉ាញ ក្រុមវៀតណាមបានចាញ់អាល្លឺម៉ង់ 1-2 និងចាញ់នូវែលសេឡង់ 0-2។

ក្រោយពីការប្រកួតខាងលើ ក្រុមវៀតណាមនៅសល់ពេលជាងមួយសប្ដាហ៍ដើម្បីត្រៀមខ្លួនសម្រាប់ការប្រកួតបើកឆាកជាមួយក្រុមសហរដ្ឋអាម៉េរិក ដែលជាម្ចាស់ជើងឯក World Cup នៅថ្ងៃទី 23 កក្កដា 2023 លើទីលាន Eden Park៕

July 14, 2023

អបអរសាទរខួប១ឆ្នាំ នៃការបើកដំណើរការជាផ្លូវការរោងចក្រដំឡើងរថយន្ត Ford និងពិធីប្រគល់-ទទួលអំណោយរថយន្តគិលានសង្គ្រោះ Ambulance ជូនដល់កាកបាទក្រហមកម្ពុជា សាខាខេត្តពោធិ៍សាត់

[ភ្នំពេញ – ថ្ងៃទី ១៣ ខែកក្កដា ឆ្នាំ២០២៣] ក្រុមហ៊ុន RMA (Cambodia) PLC ដែលជាក្រុមហ៊ុននាំចូល និងចែកចាយផ្តាច់មុខរថយន្ត Ford ក្នុងទីផ្សារប្រទេសកម្ពុជាបានប្រារព្ធពិធីប្រគល់-ទទួលអំណោយរថយន្តគិលានសង្គ្រោះចំនួន ២ គ្រឿង ជូនទៅដល់កាកបាទក្រហមកម្ពុជា សាខាខេត្តពោធិ៍សាត់ ដែលកម្មវិធីនេះត្រូវបានប្រារព្ធឡើង ក្រោមអធិបតីភាពរបស់ ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងអគ្គនាយកអគ្គីសនីកម្ពុជា និងលោកអភិបាលនៃគណៈអភិបាលខេត្តពោធិ៍សាត់ ព្រមទាំងថ្នាក់ដឹកនាំក្រុមហ៊ុន Ford Motor Company ថ្នាក់ដឹកនាំក្រុមហ៊ុន RMA Group និងក្រុមហ៊ុន RMA (Cambodia) PLC រួមទាំងភ្ញៀវកិត្តិយសជាតិ និងអន្តរជាតិប្រមាណជាង ២០០ នាក់។ កម្មវិធីនេះបានប្រារព្ធឡើងនៅក្នុងបរិវេនរោងចក្រដំឡើងរថយន្ត Ford ក្នុងភូមិសារវ័ន ឃុំស្នាអន្សារ ស្រុកក្រគរ ខេត្តពោធិ៍សាត់ នៅថ្ងៃទី ១១ ខែកក្កដា ឆ្នាំ ២០២៣ ។

ក្នុងឱកាសនៃពីធីអបអរសាទរខួប១ឆ្នាំ នៃការបើកដំណើរការជាផ្លូវការរោងចក្រដំឡើងរថយន្ត Ford និងពិធីប្រគល់-ទទួលអំណោយរថយន្តគិលានសង្គ្រោះ Ambulance ចំនួន ២ គ្រឿង ជូនដល់កាកបាទក្រហមកម្ពុជា សាខាខេត្តពោធិ៍សាត់ លោក ងន សាំង អគ្គនាយកក្រុមហ៊ុន RMA (Cambodia) PLC បានមានប្រសាសន៍ថា៖ “ យើងខ្ញុំមានមោទភាពជាពន់ពេកដែលទទួលបានសេចក្ដីទុកចិត្តពីក្រុមហ៊ុន FORD MOTOR COMPANY ក្នុងការដំឡើងរថយន្ត FORD RANGER និង FORD EVEREST ជំនាន់ថ្មីនៅ លើទឹកដីនៃព្រះរាជាណាចក្រកម្ពុជា ស្របតាមស្តង់ដាររបស់ក្រុមហ៊ុន FORD ។ យើងខ្ញុំជឿជាក់ថា ការបោះជំហានវិនិយោគក្នុងវិស័យយានយន្តរបស់ក្រុមហ៊ុនយើងខ្ញុំ ចូលរួមចំណែកយ៉ាងសំខាន់ ក្នុងការអភិវឌ្ឍវិស័យឧសហ្សាកម្មយានយន្តនៅកម្ពុជា និងជាសក្ខីភាពនៃទំនុកចិត្តលើកិច្ចខិតខំប្រឹង ប្រែងរបស់រដ្ឋាភិបាលក្នុងការធ្វើឱ្យប្រសើរឡើង នូវបរិយាកាសធុរកិច្ច និងវិនិយោគ។ វត្តមានរបស់ រោងចក្រយើងខ្ញុំក៏បានចូលរួមចំណែកការកាត់បន្ថយការធ្វើចំណាកស្រុកទៅធ្វើការនៅក្រៅប្រទេស របស់ប្រជាពលរដ្ឋ និងលើកកម្ពស់សេដ្ឋកិច្ចក្នុងតំបន់តាមរយៈការជំរុញសន្ទុះអាជីវកម្មសហគ្រាស ធុនតូច និងមធ្យម ការបង្កើតឱកាសការងារដោយផ្ទាល់និងដោយប្រយោល ក៏ដូចជាការអភិវឌ្ឍន៍ ធនធានមនុស្សនៅក្នុងទឹកដី ខេត្តពោធិ៍សាត់នេះផ្ទាល់ផងដែរ។ ”

មិនតែប៉ុណ្ណោះ លោកក៏បានបន្ថែមទៀតថា៖ “ ក្រុមហ៊ុនយើងខ្ញុំនឹងបន្តប្តេជ្ញាគាំទ្រ និង ជំរុញវិស័យឧស្សាហកម្មយានយន្តនៅកម្ពុជា ដើម្បីឱ្យកម្ពុជា ផ្លាស់ប្ដូរមុខមាត់ថ្មី ពីប្រទេសដែលដំឡើងរថយន្ត ទៅជាប្រទេសដែលផលិតរថយន្ត ក្នុងពេលអនាគត។ ក្រុមហ៊ុននឹងពង្រីកការវិនិយោគគម្រោងដំឡើងរថយន្ត Ford ដោយបង្កើនការនាំចូលនៃចំនួន គ្រឿងបង្គុំច្រើនជាងមុន បង្កើនចំនួនការងារក្នុងស្រុក ជំរុញការប្រើប្រាស់ធាតុផ្សំក្នុងស្រុក និងបង្កើន ដើមទុនវិនិយោគបន្ថែមទៀត។ យើងខ្ញុំជឿជាក់ថា ការវិនិយោគនេះនឹងបន្តផ្តល់អត្ថប្រយោជន៍ជាច្រើនបន្ថែមទៀតជូនប្រទេសកម្ពុជា ជាពិសេសការអភិវឌ្ឍន៍ខ្សែសង្វាក់ផ្គត់ផ្គង់ និងធ្វើឱ្យប្រសើរ ឡើងនូវខ្សែចង្វាក់ដែលគាំទ្រគោលនយោបាយអភិវឌ្ឍវិស័យឧស្សាហកម្មរបស់រាជរដ្ឋាភិបាលកម្ពុជា។ ការវិនិយោគនេះ នឹងនាំមកនូវផលិតផលថ្មី បច្ចេកវិទ្យាថ្មី ដើម្បីផ្គត់ ផ្គង់តម្រូវការប្រើប្រាស់រថយន្តថ្មីក្នុងស្រុក ជាមួយនឹងមោទភាពផលិតកម្មក្នុងស្រុក រោងចក្រ ដំឡើងរថយន្ត Ford នឹងបន្តទាក់ទាញវិនិយោគិនផ្សេងៗជាច្រើនទៀតមកវិនិយោគនៅកម្ពុជា ជា ពិសេស អ្នកវិនិយោគដែល ពាក់ព័ន្ធនឹងការផលិត និងដំឡើងរថយន្ត ដូចជា៖ សំបកកង់ កង់ឡាន ខ្សែភ្លើងឡាន អាគុយឡាន និងអាជីវកម្មផ្សេងៗទៀត។”

ឆ្លៀតក្នុងឱកាសនេះដែរ លោកស្រី Kay Hart ប្រធានគ្រប់គ្រងទីផ្សារអន្តរជាតិនៃក្រុមហ៊ុន Ford Motor Company បានមានប្រសាសន៍ថា៖ “ រថយន្តគិលានសង្គ្រោះ (The Next-Generation Ford Ranger-Converted Ambulances) នេះ បានបំពាក់មកជាមួយនូវបច្ចេកវិទ្យា និងប្រព័ន្ធសុវត្ថិភាពទំនើបជំនាន់ចុងក្រោយដែលធ្វើឱ្យរថយន្តនេះក្លាយជារថយន្តមួយដែលមានលក្ខណៈ ធន់ រឹងមាំ និងមានសមត្ថភាពក្នុងការចល័ត និងដឹកជញ្ជូនអ្នកជំងឺដោយសុវត្ថិភាព។ ”

លោកស្រីក៏បានបន្តទៀតថា៖ “ រថយន្តគិលានសង្គ្រោះ (The Next-Generation Ford Ranger-Converted Ambulances) នឹងចូលរួមចំណែកយ៉ាងសំខាន់សម្រាប់កាកបាទក្រហមកម្ពុជាក្នុងខេត្តពោធិ៍សាត់ ក្នុងការគាំពារ សង្គ្រោះបន្ទាន់ និងជាជំនួយការដ៏សំខាន់ក្នុងការជួយដល់សកម្មភាពសប្បុរសធម៌ផ្សេងៗដល់ប្រជាពលរដ្ឋ និងអ្នកជំងឺដើម្បីទទួលបាននូវសេវាកម្មសង្គ្រោះបន្ទាន់មួយដែលមាន គុណភាព សុវត្ថិភាព និងប្រសិទ្ធភាព។ ”

ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងអគ្គនាយកអគ្គីសនីកម្ពុជា បានមានប្រសាសន៍ថា៖ “ ការសាងសង់រោងចក្រដំឡើងរថយន្ត Ford ក្នុងខេត្តពោធិ៍សាត់ គឺជាសក្ខីភាពមួយដែលបានបង្ហាញពីទំនុកចិត្តរបស់ក្រុមហ៊ុន RMA Cambodia មកលើរាជរដ្ឋាភិបាលកម្ពុជា ហើយការផ្តល់ជូននូវរថយន្តគិលានសង្គ្រោះ ២ គ្រឿងក្នុងថ្ងៃនេះនឹងជាការចូលរួមចំណែកដ៏សំខាន់មួយក្នុងការពង្រឹងសមត្ថភាពមូលដ្ឋានសុខាភិបាលបន្ថែមទៀត ក្នុងការឆ្លើយតបទៅនឹងតម្រូវការសេវាថែទាំសុខភាពអោយកាន់តែមានគុណភាព ប្រសិទ្ធភាព និងសុវត្ថិភាព។ ភាពជាដៃគូរវាង RMA Cambodia និងវិទ្យាស្ថានបច្ចេកទេសក្នុងស្រុករបស់យើង បានដើរតួរនាទីយ៉ាងសំខាន់ក្នុងការលើកកម្ពស់ធនធានមនុស្ស តាមរយៈការបង្កើតកម្មវិធីបណ្តុះបណ្តាលដោយផ្ទាល់ពីអ្នកជំនាញដែលគ្រឹះមួយដ៏សំខាន់សម្រាប់យុវជន ក៏ដូចជាយុវនារីក្នុងការត្រៀមខ្លួនរួចជាស្រេចសម្រាប់ភាពជោគជ័យនាពេលខាងមុខ។ ”

គួរបញ្ជាក់ផងដែរថា ក្រុមហ៊ុន RMA (CAMBODIA) PLC ជាក្រុមហ៊ុនដំបូងគេបំផុត ដែលទទួលបានការទទួលស្គាល់ពី វិទ្យាស្ថានស្ដង់ដារកម្ពុជា នៃ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្នុងនាមជាអ្នក អនុវត្តស្តង់ដារសុវត្ថិភាពយានយន្ត និងស្តង់ដារសុវត្ថិភាពគ្រឿងបង្គុំយានយន្តបានខ្ពស់បំផុត។ ក្នុងឆ្នាំ ២០២០ ក្រុមហ៊ុន RMA (CAMBODIA) PLC បានចុះបញ្ជីលក់មូលបត្រ បំណុលចំនួន ៨០ ពាន់លានរៀល ដែលស្មើនឹង ២០ លានដុល្លារអាមេរិក ក្នុងផ្សារមូលបត្រកម្ពុជា ហើយក្លាយជាក្រុមហ៊ុនមិនមែនស្ថាប័នហិរញ្ញវត្ថុដែលបានបោះផ្សាយមូលបត្របំណុលដំបូងគេបង្អស់នៅប្រទេសកម្ពុជា។ ការបោះផ្សាយមូលបត្របំណុលនេះ បង្ហាញពីកិច្ចខិតខំប្រឹងប្រែងរបស់ក្រុមហ៊ុនយើងខ្ញុំក្នុងការលើកកម្ពស់ទីផ្សារមូលបត្រកម្ពុជា និងចូលរួមចំណែកអភិវឌ្ឍទីផ្សារហិរញ្ញវត្ថុនៅប្រទេសកម្ពុជា។

តាមរយៈកំណើនសេដ្ឋកិច្ច និងកំរិត GDP របស់ប្រជាជនកម្ពុជាកើនឡើងខ្ពស់ជាបន្តបន្ទាប់ បានធ្វើឱ្យប្រជាជនកម្ពុជាងាកមកប្រើប្រាស់រថយន្តថ្មីមានការកើនឡើងជាលំដាប់។ ក្នុងនោះការប្រើប្រាស់ រថយន្តថ្មីម៉ាក FORD មានកំណើនកាន់តែច្រើនឡើង និងបានក្លាយជាជម្រើសឈានមុខរបស់អតិថិជននៅកម្ពុជា។ ដូច្នេះ ក្រុមហ៊ុនបានសម្រេចចិត្តបង្កើតរោងចក្រដំឡើងរថយន្ត FORD ដែលទទួលបានសិទ្ធិពេញលេញក្នុងការផ្គុំ និងដំឡើងរថយន្តពីក្រុមហ៊ុនម្ចាស់ដើម FORD MOTOR COMPANY។ រោងចក្រនេះ ត្រូវបានសាងសង់ឡើងនៅលើផ្ទៃដីសរុបប្រមាណជាង ៥ ហិកតា ស្ថិតក្នុងភូមិសារវ័ន ឃុំស្នាអន្សា ស្រុកក្រគរ ខេត្តពោធិ៍សាត់ ជាមួយនឹងទុនវិនិយោគចំនួន ២១ លានដុល្លារសហរដ្ឋអាមេរិក ដែលអាចបង្កើតការងារជំនាញបានជាង ៥០០ កន្លែង និងមានសមត្ថភាពអាចដំឡើងរថយន្តបានចំនួនប្រមាណ ៩,០០០ គ្រឿងក្នុងមួយឆ្នាំ។

រហូតមកដល់ពេលនេះ ក្រុមហ៊ុនបានដំឡើងរថយន្ត Ford Ranger Wildtrak និងរថយន្ត Ford Everest បានចំនួន ៣,០០០ គ្រឿងដើម្បីបម្រើតម្រូវការទីផ្សារក្នុងស្រុក។ ក្រុមហ៊ុនបន្តសហការ ជាមួយនឹងវិទ្យាស្ថានពហុបច្ចេកទេសខេត្តពោធិ៍សាត់ក្នុងការបណ្តុះបណ្តាលអភិវឌ្ឍជំនាញបច្ចេកទេសដល់បុគ្គលិកក្រុមហ៊ុនដើម្បីធានាឱ្យបាននូវធនធានមនុស្សប្រកបដោយគុណភាព។ ថ្មីៗនេះ ក្រុមហ៊ុនបានបញ្ជូនបុគ្គលិកទៅប្រទេស Australia ដើម្បីសិក្សាអំពីបច្ចេកវិទ្យាដំឡើងរថយន្ត ក្នុងគោលបំណងបង្កើនកម្រិតបច្ចេកទេសបុគ្គលិកក៏ដូចជាពាំនាំចំណេះដឹងថ្មី និង បច្ចេកវិទ្យាថ្មីមកប្រទេសកម្ពុជា។ ដើម្បីបន្តចូលរួមលើកកម្ពស់វិស័យយានយន្ត ក្រុមហ៊ុននឹងបង្កើតមជ្ឈមណ្ឌលអប់រំបណ្ដុះបណ្ដាលបច្ចេកទេស និងវិជ្ជាជីវៈដើម្បីផ្ដល់ឱកាសឱ្យប្រជាពលរដ្ឋកម្ពុជាទទួលបានការបណ្តុះបណ្តាលជំនាញបច្ចេកទេសប្រកបដោយគុណភាពដើម្បីចូលរួមចំណែកអភិវឌ្ឍធនធាន មនុស្សនៅកម្ពុជាស្របតាមគោលនយោបាយអភិវឌ្ឍវិស័យឧស្សាហកម្មរបស់រាជរដ្ឋាភិបាលកម្ពុជា។

July 14, 2023

ក្រុមបាល់ទាត់នារីវៀតណាមថា ការចាញ់នូវែលសេឡង់នៅមុន World Cup គឺមកពីអាកាសធាតុ

(នូវែលសេឡង់) – ក្រោយពីចាញ់នៅក្នុងការប្រកួតមិត្តភាពជាមួយក្រុមនូវែលសេឡង់ក្នុងលទ្ធផល 0-2 ប្រធានក្រុមបាល់ទាត់នារីជម្រើសជាតិវៀតណាមយល់ថា ព្រោះតែរងផលវិបាកដោយសារអាកាសធាតុ។

លើទីលាន McLean Park នៅទីក្រុង Napier ក្រុមកីឡាការិនីនូវែលសេឡង់បានដាក់សម្ពាធលើក្រុមវៀតណាមតាំងពីដើមទី ធ្វើឱ្យវៀតណាមត្រូវចាញ់ក្នុងលទ្ធផល 0-2។

«សីតុណ្ហភាពនៅទីនេះខុសគ្នាឆ្ងាយធៀបនឹងនៅវៀតណាម ធ្វើឱ្យប៉ះពាល់ដល់ពួកយើង» ប្រធានក្រុមកីឡាការិនីវៀតណាម Huynh Nhu និយាយដូច្នេះ និងបន្តថា «ការប្រកួតនេះគឺជាឱកាសដើម្បីឱ្យពួកយើងអាចសម្របខ្លួនជាមួយនឹងអាកាសធាតុនៅនូវែលសេឡង់»។

នៅវៀតណាម ក្រុមកីឡាការិនីត្រូវហ្វឹកហាត់ក្រោមកម្ដៅថ្ងៃពី 27 ទៅ 36 អង្សាសេ។ ចំណែកនៅនូវែលសេឡង់ អាកាសធាតុត្រជាក់ជាង ពោលគឺមានសីតុណ្ហភាពពី 7 ទៅ 14 អង្សាសេ។

នៅក្នុងការប្រកួត ក្រុមនារីនូវែលសេឡង់គ្រប់គ្រងបាល់បាន 60% និងស៊ុតផ្ដាច់ចំនួន 27 លើក។ នៅនាទីទី 17 ក្រុមនូវែលសេឡង់រកបានមួយគ្រាប់ បន្ទាប់ពីការទាត់ផ្ដាច់របស់ CJ Bott។ នាទីទី 44 Jaqquie Hand រកបានមួយគ្រាប់ជូននូវែលសេឡង់ ដោយងាយស្រួល ហើយក៏ឈ្នះ 2-0។

អ្នកចាំទីរបស់វៀតណាមឱ្យដឹងថា ក្រុមរបស់ខ្លួនអាចលេងបានល្អជាងនេះ។ ពួកគេចង់រក្សាកម្លាំងនៅពេល World Cup 2023 កាន់តែខិតមកដល់។

July 10, 2023

Tag: នារី