ធនាគារ - La Reine Media

តម្លៃប្រេងឆៅ និងមាសរងឥទ្ធិពលធ្ងន់ធ្ងរពីសង្គ្រាមហាម៉ាស – អ៊ីស្រាអែល

សង្គ្រាមរវាងអ៊ីស្រាអែល និងចលនាហាម៉ាស ជាកងកម្លាំងប្រដាប់អាវុធកំពុងកាន់កាប់តំបន់ហ្គាហ្សា ដែលបានផ្ទុះឡើង កំពុងតែជាកត្តាសំខាន់គាំទ្រដល់តម្លៃប្រេងឆៅ និងមាស ព្រោះថា នេះជាទ្រព្យសុវត្ថិភាពសម្រាប់អ្នកវិនិយោគ នៅពេលតម្លៃភាគហ៊ុន មូលបត្របំណុលតែងតែប្រែប្រួលជាអវិជ្ជមានដោយសារឥទ្ធិពលនៃភូមិសាស្ត្រនយោបាយ។

នៅទ្វីបអាស៊ី ក្នុងការជួញដូរនាព្រឹកថ្ងៃទី 09 តុលា 2023 តម្លៃប្រេងឆៅ Brent បានកើន 4.7% ឡើងដល់ 86.65 ដុល្លារអាម៉េរិក/ធុងបារ៉ែល គ្រាដែលតម្លៃប្រេងឆៅ WTI ក៏កើន 4.5% ឡើងដល់ 88.39 ដុល្លារ/ធុង។

ក្រុមអ្នកវិភាគរបស់ធនាគារ ANZ Bank អះអាងថា ហានិភ័យផ្នែកភូមិសាស្ត្រនយោបាយកើនឡើងនៅមជ្ឈិមបូព៌ានឹងគាំទ្រដល់តម្លៃប្រេងឆៅ ដោយវានឹងប្រែប្រួលខ្លាំងជាងនេះក្នុងពេលដ៏ខ្លីខាងមុខ។ ចំណែកធនាគារ CBA របស់អូស្ត្រាលីវិញ យល់ថា កត្តានានាដែលបាន និងកំពុងកើតឡើងនឹងអាចរុញតម្លៃប្រេងឆៅ Brent អនាគត ឡើងលើសពី 100 ដុល្លារ/ធុង ក្នុងរយៈពេលខ្លី។

រីឯមាសវិញ តម្រូវការរបស់ពិភពលោកបានចាប់ផ្ដើមកើនឡើង ធ្វើឱ្យតម្លៃរបស់លោហធាតុនេះកើន 0.8% ឡើងដល់ 1,848 ដុល្លារ/អោន ដែលមួយអោន (ounce) ស្មើនឹង 8.29426 ជី។

ក្រុមអ្នកជំនាញអះអាងថា ហេតុដែលនាំឱ្យតម្លៃមាសកើនឡើងបើទោះមូលបត្របំណុល និងរូបិយប័ណ្ណដុល្លារអាម៉េរិកឡើងថ្លៃ ក៏ព្រោះតែសង្គ្រាមអ៊ីស្រាអែល – ហាម៉ាស (ប៉ាលេស្ទីន) ដែលបានផ្ទុះឡើងកាលពីថ្ងៃទី 07 តុលាកន្លងទៅ។ ការកើនឡើងនៃភាពតានតឹងផ្នែកភូមិសាស្ត្រនយោបាយនឹងជះឥទ្ធិពលដល់សកម្មភាពសេដ្ឋកិច្ចពិភពលោក ដោយសារថា ប្រភពផ្គត់ផ្គង់ទំនិញជាច្រើនត្រូវអាក់ខាន៕

October 9, 2023

ប្រាំបួនខែដំបូងក្នុងឆ្នាំនេះ ទុន FDI ជាងម្ភៃពាន់លានដុល្លារបានហូរចូលវៀតណាម

(វៀតណាម) – យោងតាមទិន្នន័យពីនាយកដ្ឋានវិនិយោគបរទេសនៃក្រសួងផែនការ និងវិនិយោគ គិតត្រឹមថ្ងៃទី 20 កញ្ញា 2023 ទុនវិនិយោគផ្ទាល់ពីបរទេស (FDI) សរុបដែលវៀតណាមទទួលបានគឺជិត 20.21 ពាន់លានដុល្លារអាម៉េរិក កើន 7.7% បើធៀបនឹង 9 ខែដំបូងនៃឆ្នាំ 2022។

ក្នុងចំណោមរំហូរទុន FDI នៅវៀតណាមក្នុង 9 ខែដំបូងនៃឆ្នាំ 2023 មានខ្ទង់វិនិយោគថ្មីចំនួន 2,254 គម្រោងដែលទទួលបានវិញ្ញាបនបត្រចុះបញ្ជីវិនិយោគ ដោយមានទុកសរុបជាង 10.23 ពាន់លានដុល្លារអាម៉េរិក កើន 43.6% បើធៀបនឹងដំណាក់កាលដូចគ្នាក្នុងឆ្នាំកន្លង។

គិតពីដើមឆ្នាំមកដល់បច្ចុប្បន្ន ទុន FDI ត្រូវបានវិនិយោគទៅលើវិស័យចំនួន 18 ក្នុងចំណោម 21 របស់វៀតណាម។ ក្នុងនោះ វិស័យឧស្សាហកម្មកែច្នៃ ផលិត ទទួលបានទុនបរទេសច្រើនជាងគេ ពោលគឺជាង 14 ពាន់លានដុល្លារអាម៉េរិក ស្មើនឹង 69.3% ធៀបនឹងទុនសរុបដែលត្រូវបានចុះបញ្ជី និងកើន 15.5% ខណៈវិស័យអចលនទ្រព្យ ឈរលំដាប់លេខពីរ ដោយទទួលបានទុកជិត 1.94 ពាន់លានដុល្លារ ស្មើនឹងជាង 9.6% ក្នុងចំណោមទុនដែលត្រូវបានចុះបញ្ជី ពោលគឺថយចុះ 45% បើធៀបនឹងដំណាក់កាលដូចគ្នាក្នុងឆ្នាំ 2022។

យោងតាមធនាគារអភិវឌ្ឍអាស៊ី (ADB) សេដ្ឋកិច្ចវៀតណាមមានភាពរឹងមាំ ហើយអាចងើបឡើងឆាប់រហ័សក្នុងពេលឆាប់ៗខាងមុខ។ ក្នុងរបាយការណ៍របស់ខ្លួន ADB ឱ្យដឹងថា កំណើនសេដ្ឋកិច្ចវៀតណាមនឹងកើន 5.8% ក្នុងឆ្នាំ 2023 និង 6% ក្នុងឆ្នាំ 2024 ថយចុះបន្តិចបើធៀបនឹង 6.5% និង 6.8% ដែលស្ថាប័ននេះបានព្យាករកាលខែមេសា 2023៕

September 29, 2023

ពេលយកពន្ធលើទ្រព្យអ្នកមាន តំបន់នេះនឹងប្រមូលបានជិត 230 ពាន់លានដុល្លារអាម៉េរិក/ឆ្នាំ

បើសិនយកពន្ធលើទ្រព្យរបស់ពលរដ្ឋ 0.5% ដែលជាអ្នកមានជាងគេនៅតាមបណ្ដាប្រទេសជាសមាជិក សហភាពអឺរ៉ុបនឹងអាចប្រមូលថវិកាបានជាង 227 ពាន់លានដុល្លារអាម៉េរិក។

គំនិតខាងលើនេះត្រូវបានលើកឡើងក្នុងការសិក្សាស្រាវជ្រាវមួយនៃក្រុមសម្ព័ន្ធសេរីភាពរបស់សភាអឺរ៉ុបដែលទើបតែត្រូវបានប្រកាសបន្ទាប់ពីអ្នកសេដ្ឋកិច្ច និងនយោបាយ នៅក្នុងកិច្ចប្រជុំកំពូល G20 នៅញូវដែលីប្រទេសឥណ្ឌាកាលពីពីរសប្ដាហ៍មុននោះ បានអំពាវនាវឱ្យមានការយកពន្ធលើក្រុមអ្នកមានកំពូលៗ។

យោងតាមការសិក្សាស្រាវជ្រាវខាងលើ បើសិនរដ្ឋយកពន្ធលើទ្រព្យរបស់ពលរដ្ឋ 0.5% ដែលជាអ្នកមានបំផុតនៅក្នុងបណ្ដាប្រទេសនៅអឺរ៉ុប សហភាពនេះនឹងប្រមូលប្រាក់បានជាង 213 ពាន់លានអឺរ៉ូ (ជាង 227 ពាន់លានដុល្លារអាម៉េរិក) ជារៀងរាល់ឆ្នាំ។ ក្រុមមនុស្ស 0.5% នេះ កំពុងកាន់កាប់ទ្រព្យសម្បត្តិជិត 20% របស់អឺរ៉ុប ច្រើនជាងឆ្ងាយបើធៀបនឹងទ្រព្យ 3.5% របស់ក្រុមពលរដ្ឋប្រហែលពាក់កណ្ដាលដែលក្រីក្របំផុត។ ជាងនេះ ទ្រព្យរបស់ក្រុមអ្នកមាន 0.5% ក៏បានកើន 35% ក្នុងដប់ឆ្នាំកន្លង។ ការសិក្សាស្រាវជ្រាវនេះទទួលបានសិទ្ធិចាត់ចែងដោយអង្គការមិនមែនរដ្ឋាភិបាល បណ្ដាញយុត្តិធម៌ពន្ធដារ។

ប្រទេសអាល្លឺម៉ង់ និងបារាំងនឹងប្រមូលប្រាក់បានច្រើនជាងគេបើសិនយកពន្ធលើទ្រព្យអ្នកមាន ក្នុងនោះ អាល្លឺម៉ង់នឹងទទួលបានជាង 65 ពាន់លានអឺរ៉ូ (69.3 ពាន់លានដុល្លារអាម៉េរិក) ចំណែកបារាំងនឹងទទួលបានជាង 46 ពាន់លានអឺរ៉ូ (49 ពាន់លានដុល្លារអាម៉េរិក)។ នៅអឺរ៉ុបខាងត្បូង ប្រទេសអ៊ីតាលីនឹងប្រមូលប្រាក់ពន្ធនេះបាន 27.2 ពាន់លានអឺរ៉ូ (28.9 ពាន់លានដុល្លារអាម៉េរិក) ស្របពេលដែលព័រទុយហ្កាល់នឹងប្រមូលបាន 3.7 ពាន់លានអឺរ៉ូ និងក្រិកប្រមូលបាន 1.4 ពាន់លានអឺរ៉ូ (1.49 ពាន់លានដុល្លារអាម៉េរិក)។

រូបមន្តនៃការយកពន្ធលើអ្នកមានដែលត្រូវបានស្នើដោយក្រុមសម្ព័ន្ធសេរីខាងលើ មិនដូចទៅនឹងរូបមន្តយកពន្ធលើអ្នកមាននៅអេស្ប៉ាញ ឬពន្ធអចលនទ្រព្យរបស់បារាំងនោះឡើយ។ សំណើពន្ធនេះនឹងអនុវត្តចំពោះទ្រព្យសម្បត្តិគ្រប់ប្រភេទ តាំងពីអចលនទ្រព្យ ប្រាក់ផ្ញើនៅធនាគារ ភាគហ៊ុននៅក្នុងក្រុមហ៊ុន រហូតដល់ស្នាដៃសិល្បៈ។

បើសិនជាត្រូវបានអនុវត្ត ខ្ទង់ប្រាក់ដែលបានពីពន្ធទ្រព្យអ្នកមាននេះនឹងរួមចំណែក 1.35% នៃ GDP របស់សហភាពអឺរ៉ុប។ នេះមិនទាន់និយាយដល់ឥទ្ធិពលបន្ថែមដែលកើតឡើងក្នុងពេលដោះស្រាយបញ្ហាគេចពន្ធរបស់បុគ្គលអ្នកមាននៅក្នុងបណ្ដាប្រទេសដែលមិនយកពន្ធ ឬយកពន្ធតិចតួចលើទ្រព្យសម្បត្តិ៕

September 22, 2023

ប្រាក់ដុល្លារអាម៉េរិកបន្តបង្ហាញភាពខ្លាំងនៅក្នុងទីផ្សាររូបិយប័ណ្ណអន្តរជាតិ

កាលពីថ្ងៃចន្ទ (18 កញ្ញា) រូបិយប័ណ្ណដុល្លារអាម៉េរិកបានប្រែប្រួលជិតដល់កម្រិតខ្ពស់បំផុតក្នុងអំឡុង 6 ខែ គ្រាដែលអ្នកជំនួញកំពុងរង់ចាំការសម្រេចនានាដែលទាក់ទិននឹងការប្រាក់ពីធនាគារកណ្ដាលអាម៉េរិក, ធនាគារអង់គ្លេស និងធនាគារជប៉ុន ដែលនឹងធ្វើឡើងនៅក្នុងសប្ដាហ៍នេះ។

ប្រាក់អឺរ៉ូរបស់សហភាពអឺរ៉ុប ហាក់មិនមានការប្រែប្រួលបើធៀបនឹងប្រាក់ដុល្លារអាម៉េរិក ដោយ 1 អឺរ៉ូ ប្ដូរបាន 1.0658 ដុល្លារអាម៉េរិក។ ចំណែករូបិយប័ណ្ណយ៉េនរបស់ជប៉ុន ក៏មានការប្រែប្រួលតិចតួច ដោយ 1 ដុល្លារអាម៉េរិក ប្ដូរបាន 147.69 យ៉េន ព្រោះតែអ្នកជំនួញនៅប្រទេសនេះឈប់សម្រាក។

ប្រការខាងលើនេះបាននាំឱ្យសន្ទស្សន៍ប្រាក់ដុល្លារអាម៉េរិក (U.S. Dollar Index) ដែលតាមដានការប្រែប្រួលរបស់រូបិយប័ណ្ណនេះធៀបនឹងរូបិយប័ណ្ណចំនួន 6 ផ្សេងទៀត រួមមានប្រាក់អឺរ៉ូ និងប្រាក់យ៉េនជាដើម មានការកើនឡើងតិចតួច (105.32)។

សន្ទស្សន៍ U.S. Dollar Index បានកើនឡើងជាបន្តបន្ទាប់ក្នុង 9 សប្ដាហ៍កន្លង នៅពេលសេដ្ឋកិច្ចអាម៉េរិកបន្តបង្ហាញភាពខ្លាំងក្លា។ វាបានឡើងដល់ចំណុចកំពូល 104.53 កាលពីថ្ងៃទី 14 កញ្ញា ជាកម្រិតខ្ពស់បំផុតរាប់ចាប់ពីពាក់កណ្ដាលខែមីនា 2023។

Alvin Tan ប្រធានផ្នែកយុទ្ធសាស្ត្រប្ដូរប្រាក់បរទេសអាស៊ីនៅ RBC Capital Markets ឱ្យដឹងថា «ជារួម យើងជឿជាក់លើរូបិយប័ណ្ណដុល្លារអាម៉េរិក។ សេដ្ឋកិច្ចសហរដ្ឋអាម៉េរិកកំពុងដំណើរការល្អជាងអឺរ៉ុប និងអាស៊ី ពិសេសគឺប្រទេសចិន»។

អ្នកជំនួញ កាលពីថ្ងៃទី 18 កញ្ញា កំពុងតែរង់ចាំការសម្រេចមួយចំនួនរបស់ធនាគារកណ្ដាលនានានៅចុងសប្ដាហ៍ ដែលអាចធ្វើឱ្យកក្រើកទីផ្សាររូបិយប័ណ្ណ។ អ្នកវិនិយោគរំពឹងថា ធនាគារកណ្ដាលអាម៉េរិកនឹងរក្សាការប្រាក់ត្រឹម 5.25% ដល់ 5.5% ដែលនឹងធ្វើឡើងនៅថ្ងៃទី 20 កញ្ញា 2023។

September 19, 2023

តម្លៃមាសកើនឡើងបន្តិចក្នុងថ្ងៃទី 14 កញ្ញា ដោយសារទិន្នន័យសេដ្ឋកិច្ចអាម៉េរិកមិនល្អ

ទិន្នន័យសេដ្ឋកិច្ចអាម៉េរិកមានភាពអវិជ្ជមាន ក្នុងនោះ នៅលើផ្សារ COMEX សម្រាប់ទីផ្សារ New York តម្លៃមាសប្រគល់ក្នុងខែធ្នូ 2023 បានកើនឡើង 0.30 ដុល្លារ (0.02%) និងបិទទ្វារក្នុងតម្លៃ 1,932.80 ដុល្លារនៅក្នុងមួយអោន។

តម្លៃមាសប្រគល់មានកាលកំណត់នៅលើផ្សារ COMEX សម្រាប់ទីផ្សារ New York (សហរដ្ឋអាម៉េរិក) បានកើនឡើងបន្តិចនៅក្នុងការជួញដូរនាថ្ងៃទី 14 កញ្ញា 2023 ព្រោះតែទិន្នន័យស្ដីពីសេដ្ឋកិច្ចអាម៉េរិកមានភាពអវិជ្ជមានច្រើន។

ជាក់ស្ដែង មាសប្រគល់ក្នុងខែធ្នូ 2023 បានឡើងថ្លៃ 0.30 ដុល្លារ (0.02%) និងបិទទ្វារក្នុងតម្លៃ 1,932.80 ដុល្លារក្នុងមួយអោន (ounce)។ មួយអោន = 8.29426 ជី ដូច្នេះ ក្នុងករណីនេះ មួយជីមានតម្លៃប្រហែល 233.0286 ដុល្លារអាម៉េរិក។

ក្រសួងការងារអាម៉េរិកទើបតែបានប្រកាសឱ្យដឹងថា សន្ទស្សន៍តម្លៃអ្នកផលិត (Producer’s price index – PPI) របស់សហរដ្ឋអាម៉េរិក បានកើនឡើង 0.7% ដោយត្រូវបានកែសម្រួលទៅតាមរដូវក្នុងខែសីហា 2023 ខ្ពស់ជាងការរំពឹងទុក 0.4% និងជាសន្ទស្សន៍ប្រចាំខែខ្ពស់បំផុតរាប់ចាប់ពីខែមិថុនា 2022។

ក្រសួងខាងលើក៏បានរាយការណ៍ថា តួលេខនៃពាក្យស្នើសូមជំនួយពេលបាត់បង់ការងារនៅសហរដ្ឋអាម៉េរិក បានកើន 3,000 ពាក្យ នាំឱ្យតួលេខសរុបឡើងដល់ 220,000 ពាក្យ នៅក្នុងសប្ដាហ៍ដែលបញ្ចប់នៅថ្ងៃទី 09 កញ្ញា។

ធនាគារកណ្ដាលអឺរ៉ុប (ECB) បានដំឡើងការប្រាក់ 25 ពិន្ទុ ធ្វើឱ្យការប្រាក់នៃប្រាក់បញ្ញើកើនឡើងដល់ 4% កាលពីថ្ងៃទី 14 កញ្ញា។ ការដំឡើងការប្រាក់បាននាំឱ្យប្រាក់អឺរ៉ូធ្លាក់ថ្លៃ និងធ្វើឱ្យប្រាក់ដុល្លារអាម៉េរិកហក់ឡើង បណ្ដាលឱ្យមាសមិនអាចឡើងថ្លៃខ្ពស់ខ្លាំង។

សន្ទស្សន៍នៃរូបិយប័ណ្ណដុល្លារអាម៉េរិកកើន 0.6% ឡើងដល់កម្រិតខ្ពស់បំផុតក្នុងរយៈពេលជាង 6 ខែមកនេះ ធ្វើឱ្យកម្លាំងទាក់ទាញរបស់មាសចំពោះអ្នកវិនិយោគបរទេស ហើយអត្រាការប្រាក់នៃមូលបត្របំណុលរយៈពេលដប់ឆ្នាំនៅសហរដ្ឋអាម៉េរិក ក៏កើនឡើងផងដែរ។

ក៏ប៉ុន្តែ ក្រុមអ្នកវិភាគយល់ថា តម្លៃ 1,900 ដុល្លារ/អោនរបស់មាស ត្រូវបានគាំទ្រពីកត្តានានា ហើយថា នឹងទាក់ទាញអ្នកវិនិយោគបានច្រើនទៀត៕

September 15, 2023

ផ្សារហ៊ុនអឺរ៉ុប – អាម៉េរិក «ក្រឡាប់ចាក់» បន្ទាប់ពីមានរបាយការណ៍អតិផរណានៃខែសីហារបស់អាម៉េរិក

ផ្សារមូលបត្រអាម៉េរិកក្រឡាប់ចាក់នៅក្នុងការជួញដូរនាពេលព្រឹក នៅពេលអ្នកវិនិយោគពិនិត្យទិន្នន័យ និងអត្ថន័យរបស់វាចំពោះកិច្ចប្រជុំនៅសប្ដាហ៍ក្រោយរបស់ធនាគារកណ្ដាលអាម៉េរិក (Fed)។

ផ្សារមូលបត្រអឺរ៉ុប – អាម៉េរិក មានការប្រែប្រួលច្រើនក្នុងការជួញដូរកាលពីថ្ងៃទី 13 កញ្ញា 2023 បន្ទាប់ពីមានរបាយការណ៍អតិផរណាក្នុងខែសីហារបស់សហរដ្ឋអាម៉េរិក និងនៅមុនពេលធនាគារកណ្ដាលអឺរ៉ុប (ECB) កំណត់ការប្រាក់ថ្មី។

របាយការណ៍ថ្មីបំផុតពីក្រសួងការងារអាម៉េរិកបង្ហាញថា អតិផរណារបស់ប្រទេសនេះបានកើនពី 3.2% កាលពីខែកក្កដា ឡើងដល់ 3.7% ក្នុងខែសីហា ដោយភាគច្រើនបណ្ដាលមកពីតម្លៃប្រេងសាំងកើនឡើងខ្ពស់ខ្លាំង។

ផ្សារមូលបត្រអាម៉េរិកក្រឡាប់ចាក់ក្នុងការជួញដូរនៅពេលព្រឹក នៅពេលអ្នកវិនិយោគពិនិត្យទិន្នន័យ និងអត្ថន័យរបស់វាចំពោះកិច្ចប្រជុំនៅសប្ដាហ៍ក្រោយរបស់ធនាគារកណ្ដាលអាម៉េរិក (Fed)។ ក៏ប៉ុន្តែ ការជួញដូរចុងក្រោយក្នុងថ្ងៃដដែល (13 កញ្ញា) ទាំង S&P 500 ទាំង Nasdaq សុទ្ធតែបានងើបឡើងបន្តិច គ្រាដែល Dow Jones ធ្លាក់ចុះបន្តិច។ ដោយឡែក ផ្សារហ៊ុនអឺរ៉ុបវិញ ភាគច្រើនសុទ្ធតែថយចុះ ខណៈដែលមូលចំនួនតូចមិនមានការប្រែប្រួល។

មុននោះ ធនាគារកណ្ដាលអាម៉េរិក បានសង្កត់ធ្ងន់ថា ដំណើរការនៃការចេញសេចក្ដីសម្រេចស្ដីពីគោលនយោបាយហិរញ្ញវត្ថុ នឹងយោងទៅលើតួលេខសេដ្ឋកិច្ច។ ទិន្នន័យស្ដីពីទីផ្សារការងារ និងវិស័យសេវាកម្ម បានធ្វើឱ្យមានដំណឹងចចាមអារ៉ាមថា Fed អាចនឹងដំឡើងការប្រាក់ជាច្រើនលើកទៀត។ តម្លៃប្រេងឆៅដែលកើនខ្ពស់បំផុតក្នុង 10 ខែ ក៏កាន់តែធ្វើឱ្យក្ដីបារម្ភនេះកើនឡើងមួយកម្រិតទៀត៕

September 14, 2023

អាជ្ញាធរថៃស្នើឱ្យ ថាក់ស៊ីន ចូលស្រុកក្នុងថ្ងៃធ្វើការ ដើម្បីស្រួលចាប់ខ្លួន

ឧបនាយករដ្ឋមន្ត្រីថៃ Wissanu បានស្នើឱ្យលោក ថាក់ស៊ីន កុំត្រលប់ចូលប្រទេសនៅថ្ងៃចុងសប្ដាហ៍ និងថ្ងៃឈប់សម្រាកបុណ្យ ព្រោះនឹងបង្កការលំបាកនៅពេលអនុវត្តបទបញ្ជាចាប់ខ្លួន។

ឧបនាយករដ្ឋមន្ត្រីថៃ លោក Wissanu Krea-ngam កាលពីថ្ងៃទី 08 សីហា ឱ្យដឹងថា អាជ្ញាធរប្រទេសនេះបានត្រៀមផែនការរួចរាល់ហើយសម្រាប់ថ្ងៃដែលលោក ថាក់ស៊ីន ត្រលប់ចូលប្រទេស។ យោងតាមលោក Wissanu តុលាការ និងអគ្គនាយកដ្ឋានពន្ធនាគារ សុទ្ធតែបានត្រៀមខ្លួនរួចរាល់ ប៉ុន្តែថា លោក ថាក់ស៊ីន មិនគួរត្រលប់ចូលប្រទេសក្នុងថ្ងៃចុងសប្ដាហ៍ ឬថ្ងៃឈប់សម្រាក។

«ក្នុងថ្ងៃនោះ តុលាការ ដែលជាស្ថាប័នត្រូវធ្វើការកំណត់យកពន្ធនាគារសម្រាប់ការឃុំខ្លួនលោក ថាក់ស៊ីន មិនធ្វើការ។ ប្រការនេះនឹងបង្កការលំបាក ព្រោះយើងត្រូវរកទីតាំងដើម្បីឃុំខ្លួនលោក ថាក់ស៊ីន ជាបណ្ដោះអាសន្ន ក្នុងពេលរង់ចាំការសម្រេចពីតុលាការ» ឧបនាយករដ្ឋមន្ត្រីថៃ លោក Wissanu និយាយដូច្នេះ។

លោក ថាក់ស៊ីន ស៊ីណាវ៉ាត្រា ថ្មីៗនេះបានប្រកាសថា នឹងវិលចូលប្រទេសថៃវិញនៅថ្ងៃទី 10 សីហា ក្រោយការរស់នៅដោយនិរទេសខ្លួនអស់មួយរយៈពេលយូរ។ ក៏ប៉ុន្តែ ក្រោយមក អតីតនាយករដ្ឋមន្ត្រីថៃរូបនេះ បានប្រកាសពន្យារពេលនៃការវិលចូលស្រុក ព្រោះបញ្ហាសុខភាព។

ប្រភពព័ត៌មានខ្លះថា លោក ថាក់ស៊ីន នឹងចូលស្រុកវិញ នៅពេលបក្ស Pheu Thai របស់កូនស្រីលោក ឡើងកាន់អំណាច។ បក្ស Pheu Thai កាលពីថ្ងៃទី 07 សីហា បានប្រកាសបង្ហាញសម្ព័ន្ធភាពថ្មីដើម្បីឡើងកាន់អំណាច។ ប្រធានសភាថៃ កាលពីសប្ដាហ៍កន្លងឱ្យដឹងថា ការបោះឆ្នោតជ្រើសតាំងនាយករដ្ឋមន្ត្រីថ្មីនឹងធ្វើឡើងនៅក្រោយថ្ងៃទី 16 សីហា 2023។

អតីតនាយករដ្ឋមន្ត្រីថៃ លោក ថាក់ស៊ីន ត្រូវបានបណ្ដេញចេញពីអំណាចដោយរដ្ឋប្រហារយោធាកាលពីឆ្នាំ 2006។ ក្នុងអំឡុងពេលអវត្តមាន លោក ថាក់ស៊ីន ក៏ត្រូវតុលាការថៃផ្ដន្ទាទោសឱ្យជាប់ពន្ធនាគារ 12 ឆ្នាំ។

ឧបនាយករដ្ឋមន្ត្រីថៃ លោក Wissanu បានប្រកាសថា អតីតនាយករដ្ឋមន្ត្រីថៃ លោក ថាក់ស៊ីន នឹងត្រូវជាប់ពន្ធនាគារភ្លាមៗនៅពេលលោកត្រលាប់ចូលប្រទេស ហើយអាចដាក់លិខិតសូមការលើកលែងទោសពីព្រះមហាក្សត្រ។ អគ្គនាយកដ្ឋានពន្ធនាគារថៃ ឱ្យដឹងថា បើសិនលោក ថាក់ស៊ីន វិលត្រលប់មកទទួលទោស ពួកគេគ្រោងនឹងឃុំខ្លួនលោកតែម្នាក់ឯង ដើម្បីការពារសុវត្ថិភាព៕

August 9, 2023

ភ្ញាក់ផ្អើលខ្លាំងពេលអាវធ្លាប់ពាក់លេងពីក្មេង បែរជាមានតម្លៃខ្ពស់បែបនេះ

កាលពីថ្ងៃអាទិត្យ (30 កក្កដា) ភ្ញៀវដែលចូលរួមកម្មវិធី Antiques Roadshow (កម្មវិធីវាយតម្លៃវត្ថុបុរាណរបស់ BBC 1 នៅប្រទេសអង់គ្លេស) បានមានឱកាសទស្សនាវត្ថុនានាដែលភ្ញៀវទាំងឡាយបាននាំយកមកទីនេះ។

យោងតាម Daily Mail ព្រឹត្តិការណ៍វាយតម្លៃវត្ថុបុរាណត្រូវបានធ្វើឡើងនៅឯវិមាន Ham House ក្នុងតំបន់ Richmond ក្បែរទន្លេ Thames នៃទីក្រុងឡុងដ៍ ដែលសាងសង់តាំងពីសតវត្សរ៍ទី 17 ដោយមានការចូលរួមរបស់អ្នកជំនាញខាងវត្ថុបុរាណ Lee Young។

គូស្វាមីភរិយាវ័យចំណាស់មួយគូ បាននាំយកអាវសម្រាប់រាជវង្សានុវង្សនៅប្រទេសចិនតាំងពីបុរាណ មកឱ្យអ្នកជំនាញ Lee Young ធ្វើការពិនិត្យ និងវាយតម្លៃ។

យោងតាមបុរសជាស្វាមី ភូសា (អាវ) នេះគឺជាវត្ថុដែលត្រូវបានជីតារបស់ភរិយាគាត់ (ជាអ្នកដែលធ្លាប់កាន់តំណែងនាយកប្រតិបត្តិរបស់ធនាគារ Standard នៅប្រទេសឥណ្ឌា) នាំយកមកកាន់ប្រទេសអង់គ្លេស កាលពីដើមទសវត្សរ៍ឆ្នាំ 1930 នៃសហស្សវត្សរ៍មុន។

អ្នកស្រី Sara ភរិយារបស់បុរសខាងលើ ឱ្យដឹងថា អ្នកស្រីបានរក្សាទុកអាវក្រៅនេះនៅក្នុងប្រអប់ដាក់សម្លៀកបំពាក់ ហើយកាលពីនៅក្មេង គាត់តែងតែយកវាមកពាក់លេង។

«អាវនេះត្រូវបានផលិតឡើងក្នុងអំឡុងទសវត្សរ៍ឆ្នាំ 1750 ដែលពិតជាភូសាសម្រាប់រាជវង្សានុវង្ស។ វាជាអាវក្រៅសម្រាប់ស្ត្រី ហើយអាវធំដែលត្រូវបានផលិតឡើងកាលពីអំឡុងទសវត្សរ៍ឆ្នាំ 1750 គឺជាវត្ថុដ៏កម្រ។ អាវបែបនេះមាននៅសល់តែប៉ុន្មានឈុតប៉ុណ្ណោះ។ បើតាមខ្ញុំដឹង ដើម្បីបានមើលភូសាប៉ុន្មានឈុតនោះ អ្នកត្រូវធ្វើដំណើរទៅកាន់រដ្ឋធានីប៉េកាំង និងសារមន្ទីរវាំងចាស់។ វាពិតជាវត្ថុដែលមានតែនៅក្នុងសារមន្ទីរ» អ្នកជំនាញ Lee បន្ថែមដូច្នេះ។

យោងតាមលោក Lee ពណ៌លឿងរបស់ភូសានេះគឺជាពណ៌សម្រាប់តែមហេសីស្ដេច ឬស្នំដែលមានឋានៈខ្ពស់។ រូបភាពនាគមានក្រញ៉ាំជើងប្រាំនៅលើភូសា ក៏ជានិមិត្តរូបបង្ហាញថា វាជាវត្ថុសម្រាប់រាជវង្សានុវង្ស។

ប្រការដែលអ្នកជំនាញ Lee Young ត្រៀមនឹងប្រកាស ធ្វើឱ្យម្ចាស់អាវនេះមិនភ្ញាក់ផ្អើលមិនបាន។ «បើសិនយកទៅលក់ដេញថ្លៃក្នុងទីផ្សារនាបច្ចុប្បន្ន ភូសានេះនឹងអាចលក់បានក្នុងតម្លៃ 200,000 ផោន (ប្រហែល 256.000 ដុល្លារអាម៉េរិក)» លោក Lee បញ្ជាក់ដូច្នេះ។

ស្ដាប់ដល់ត្រឹមនេះ អ្នកស្រី Sara មានការភ្ញាក់ផ្អើលខ្លាំង និងនិយាយថា «ពិតជាភ្ញាក់ផ្អើលណាស់។ ព្រះអឺយ! សូមអរគុណលោកច្រើនណាស់។ ពួកយើងប្រាកដជាលែងដាក់វាទៅក្នុងប្រអប់សម្លៀកបំពាក់ទៀតហើយ»៕

August 1, 2023

ប្រតិកម្មដំបូងរបស់ប្រធានាធិបតីនីហ្សេ បន្ទាប់ពីត្រូវកងទ័ពធ្វើរដ្ឋប្រហារ

ប្រធានាធិបតីនីហ្សេ លោក Mohamed Bazoum សរសេរលើបណ្ដាញសង្គមអំពាវនាវសូមឱ្យប្រជាជនជួយការពារសមិទ្ធផលរបស់ប្រទេសជាតិ ក្រោយពីកងទ័ពប្រទេសនេះប្រកាសធ្វើរដ្ឋប្រហារផ្ដួលរំលំរដ្ឋាភិបាល។

«បណ្ដាសមិទ្ធផលដែលយើងបានចំណាយអស់កម្លាំងជាច្រើនទើបដណ្ដើមបាននេះ នឹងត្រូវបានការពារ។ ជនជាតិនីហ្សេដែលស្រលាញ់ប្រជាធិបតេយ្យ និងសេរីភាព ប្រាកដជានឹងធ្វើដូច្នេះ» លោក Bazoum បង្ហោះសារលើបណ្ដាញសង្គម X (ឈ្មោះថ្មីរបស់ Twitter) នៅថ្ងៃនេះដូច្នេះ។

រដ្ឋមន្ត្រីការបរទេស Hassoumi Massoudou ក៏បានបង្ហោះសារអំពាវនាវសូមឱ្យប្រជាជនគ្រប់រូបដែលគាំទ្រប្រជាធិបតេយ្យ នាំគ្នាចេញធ្វើសកម្មភាពដើម្បីធ្វើឱ្យអំពើរដ្ឋប្រហារត្រូវបរាជ័យ។ លោកបានបញ្ជាក់ថា រដ្ឋាភិបាលដែលកើតចេញពីការបោះឆ្នោតដែលជ្រើសរើសដោយប្រជាពលរដ្ឋគឺជារដ្ឋាភិបាលស្របច្បាប់។

លោករដ្ឋមន្ត្រីការបរទេសរបស់ប្រទេសនីហ្សេក៏បញ្ជាក់ថា ប្រធានាធិបតី និងគ្រួសារបច្ចុប្បន្ន «មានសុខភាពល្អ» និងកំពុងត្រូវបានកងទ័ពឃុំខ្លួននៅឡើយ។

មុននោះ វរសេនីយ៍ឯក Amadou Abdramane អ្នកនាំពាក្យរបស់កងទ័ពប្រទេសនីហ្សេ ប្រកាសនៅលើកញ្ចក់ទូរទស្សន៍ជាតិកាលពីថ្ងៃទី 26 កក្កដា ឆ្នាំ 2023 ថា «យើងជាកងកម្លាំងការពារជាតិ និងសន្តិសុខ បានសម្រេចចិត្តបញ្ចប់របបរបស់ប្រធានាធិបតី Mohamed Bazoum»។

លោក Amadou Abdramane បានចោទថា អាជ្ញាធរស៊ីវិលគ្រប់គ្រងបែបធូររលុង និងបានធ្វើឱ្យស្ថានការណ៍សន្តិសុខកាន់តែអាក្រក់ឡើងៗ។ កងកទ័ពនេហ្សេប្រកាសថា នឹងបិទច្រកព្រំដែន និងដាក់បម្រាមគោចរនៅទូទាំងប្រទេស រហូតដល់ពេលមានប្រកាសថ្មី។ កងកម្លាំងនេះក៏បានព្រមានថា នឹងធ្វើការប្រឆាំង បើសិនមានការអន្តរាគមន៍ពីបរទេស។

អង្គការសហប្រជាជាតិក៏បានថ្កោលទោសចំពោះការផ្លាស់ប្ដូររដ្ឋាភិបាលដោយអំពើខុសច្បាប់នៅប្រទេសនីហ្សេ។ «អគ្គលេខាធិការបានអំពាវនាវឱ្យបញ្ឈប់ជាបន្ទាន់នូវរាល់សកម្មភាពបំផ្លាញគោលការណ៍ប្រជាធិបតេយ្យនៅនីហ្សេ» អ្នកនាំពាក្យរបស់អគ្គលេខាធិការនៃអង្គការសហប្រជាជាតិ ឱ្យដឹងដូច្នេះ។

ទន្ទឹមនឹងនេះ សហរដ្ឋអាម៉េរិក អង់គ្លេស បារាំង អាល្លឺម៉ង់ និងធនាគារពិភពលោក (WB) ជាដើម ក៏បានប្រកាសថ្កោលទោសចំពោះអំពើរដ្ឋប្រហារខាងលើផងដែរ។

July 27, 2023

កងទ័ពរបស់ប្រទេសនីហ្សេធ្វើរដ្ឋប្រហារ

កងទ័ពនៃប្រទេសនីហ្សេបានប្រកាសថា ធ្វើរដ្ឋប្រហារផ្ដួលរំលំរដ្ឋាភិបាលរបស់ប្រធានាធិបតី Bazoum និងដាក់បម្រាមគោចរនៅទូទាំងប្រទេស រហូតដល់ពេលមានសេចក្ដីប្រកាសថ្មី។

«យើងជាកងកម្លាំងការពារជាតិ និងសន្តិសុខ បានសម្រេចចិត្តបញ្ចប់របបរបស់ប្រធានាធិបតី Mohamed Bazoum» វរសេនីយ៍ឯក Amadou Abdramane អ្នកនាំពាក្យរបស់កងទ័ពប្រទេសនីហ្សេ ប្រកាសនៅលើកញ្ចក់ទូរទស្សន៍ជាតិកាលពីថ្ងៃទី 26 កក្កដា ឆ្នាំ 2023 ដូច្នេះ។ លោក Amadou Abdramane បានចោទថា អាជ្ញាធរស៊ីវិលគ្រប់គ្រងបែបធូររលុង និងបានធ្វើឱ្យស្ថានការណ៍សន្តិសុខកាន់តែអាក្រក់ឡើងៗ។

កងកទ័ពនេហ្សេប្រកាសថា នឹងបិទច្រកព្រំដែន និងដាក់បម្រាមគោចរនៅទូទាំងប្រទេស រហូតដល់ពេលមានប្រកាសថ្មី។ កងកម្លាំងនេះក៏បានព្រមានថា នឹងធ្វើការប្រឆាំង បើសិនមានការអន្តរាគមន៍ពីបរទេស។

មុននោះ ប្រភពព័ត៌មានដែលជិតស្និទ្ធបានបង្ហើបឱ្យដឹងថា ប្រធានាធិបតីនីហ្សេ លោក Bazoum ត្រូវបានកងកម្លាំងអង្គរក្សឃុំខ្លួននៅក្នុងភូមិគ្រឹះ។ ការិយាល័យប្រធានាធិបតីនីហ្សេ ប្រកាសថា កងទ័ពបានត្រៀមខ្លួនរួចរាល់ក្នុងការវាយប្រហារលើកងកម្លាំងអង្គរក្ស បើសិនពួកគេមិនដោះលែងលោក Bazoum។

ទីប្រឹក្សាសន្តិសុខជាតិនៅសេតវិមាន លោក Jake Sullivan បានថ្កោលទោសចំពោះរាល់កិច្ចប្រឹងប្រែងក្នុងការចាប់ខ្លួនប្រធានាធិបតីនីហ្សេ ឬបំផ្លាញរដ្ឋាភិបាលស៊ីវិល។ សហរដ្ឋអាម៉េរិកក៏បានអំពាវនាវឱ្យកងទ័ពនីហ្សេ ប្រញាប់ដោះលែងប្រធានាធិបតី Bazoum។

មន្ត្រីអង់គ្លេសដែលទទួលបន្ទុកអភិវឌ្ឍអន្តរជាតិ និងអាហ្វ្រិក រួមនឹងធនាគារពិភពលោក (WB) ក៏បានថ្កោលទោសចំពោះរដ្ឋប្រហារខាងលើផងដែរ។

រដ្ឋប្រហារដែលកើតឡើងនៅមុនរដ្ឋប្រហារចុងក្រោយនេះ ត្រូវបានធ្វើឡើងកាលពីខែកុម្ភៈឆ្នាំ 2010 និងបានបណ្ដាលឱ្យរដ្ឋាភិបាលរបស់ប្រធានាធិបតី Mamadou Tandja ត្រូវដួលរលំ។ ប្រធានាធិបតី Bazoum អាយុ 64 ឆ្នាំ ដែលត្រូវបានបោះឆ្នោតជ្រើសរើសកាលពីឆ្នាំ 2021 គឺជាសម្ព័ន្ធមិត្តជិតស្និទ្ធរបស់ប្រទេសបារាំង។

បច្ចុប្បន្ននេះ ប្រទេសនីហ្សេកំពុងតែប្រយុទ្ធប្រឆាំងនឹងយុទ្ធនាការចំនួនពីររបស់ក្រុមឧទ្ទាមអ៊ីស្លាមនៅភាគនិរតី និងអាគ្នេយ៍ ដែលជាប់ទាក់ទងនឹងបណ្ដាក្រុមជ្រុលនិយមនៅម៉ាលី និងនីហ្សេរីយ៉ា ដែលជាប្រទេសជិតខាង៕

July 27, 2023

Tag: ធនាគារ