ត្រី - La Reine Media

រោងចក្រដំឡើងរថយន្តតូយ៉ូតានៅកម្ពុជា សម្ពោធបើកដំណើរការជាផ្លូវការ

នាថ្ងៃទី2 ឧសភា 2024 នេះ រោងចក្រដំឡើងរថយន្តរបស់ក្រុមហ៊ុនតូយ៉ូតា នឹងត្រូវបានសម្ពោធបើកដំណើរការជាផ្លូវការ ក្រោមអធិបតីភាពរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា។

រោងចក្រដំឡើងរថយន្តតូយ៉ូតានៅកម្ពុជា គឺជាក្រុមហ៊ុនបុត្រសម្ព័ន្ធរបស់ Toyota Tsusho Corporation របស់ជនជាតិជប៉ុន និងក្រុមហ៊ុនខ្មែរ គង់ នួន គ្រុប ដែលក្នុងនោះ ក្រុមហ៊ុនជប៉ុនមានភាគហ៊ុន 90% និងក្រុមហ៊ុនខ្មែរកាន់កាប់ 10%។

ក្រុមហ៊ុន តូយ៉ូតា ស៊ុយស៊ូ មេនូហ្វេកឈឺរីង បានទទួលវិញ្ញាបនបត្រចុះបញ្ជីគម្រោងវិនិយោគពី ក្រុមប្រឹក្សាអភិវឌ្ឍន៍កម្ពុជា សម្រាប់ការបង្កើតរោងចក្រផ្តុំ និងដំឡើងរថយន្តតូយ៉ូតា ដែលមានទីតាំងក្នុងតំបន់សេដ្ឋកិច្ច ពិសេស រ៉ូយ៉ាល់ គ្រុប ភ្នំពេញ។

រោងចក្រនេះមានសមត្ថភាពដំឡើងរថយន្តចំនួនពីរប្រភេទ រួមមាន ទីមួយជាប្រភេទ SUV ម៉ាក FORTUNER និងទីពីជាប្រភេទ Pick-UP ម៉ាក HILUX។

រោងចក្រដែលមានទុនវិនិយោគជាង 36លានដុល្លារអាមេរិក និងមានបុគ្គលិកសរុបចំនួន 150នាក់នេះ មានសមត្ថភាពដំឡើងរថយន្តចំនួន 1,320គ្រឿងសម្រាប់ឆ្នាំ 2024។ រថយន្តដែលរោងចក្រនេះត្រូវផ្គុំដំឡើងគឺ រថយន្ត FORTUNER ចំនួន 290គ្រឿង និងរថយន្ត HILUX ចំនួន 1,030គ្រឿង។

បច្ចុប្បន្ន កម្ពុជាមានរោងចក្រផ្គុំ និងដំឡើងរថយន្ត សរុបចំនួន 6 បូករួមទាំងរោងចក្រតូយ៉ូតា។ ក្នុងនោះ រួមមានជាអាទិ៍ រោងចក្រផលិតរថយន្ត Ford, Hyundai, KIA, និង GTV ជាដើម។

May 2, 2024

ប្រទេសថៃយកពន្ធអាករ VAT 7% ចំពោះទំនិញនាំចូល

មន្ត្រីក្រសួងពាណិជ្ជកម្មថៃ នាថ្ងៃទី 29 មេសានេះ ឱ្យដឹងថា ប្រទេសនេះនឹងយកពន្ធអាករលើតម្លៃបន្ថែម 7% ចំពោះរាល់ទំនិញនាំចូល ដោយមិនបែងចែកតម្លៃ ចាប់ពីខែឧសភាតទៅ។

លោក Lavaron Sangsnit លេខាអចិន្ត្រៃយ៍នៃក្រសួងពាណិជ្ជកម្មថៃ ថ្លែងថា បច្ចុប្បន្ន ប្រទេសថៃអនុវត្តគោលនយោបាយលើកលែងពន្ធនាំចូល និងអាករលើតម្លៃបន្ថែម (VAT) ចំពោះទំនិញនាំចូលនីមួយៗដែលមានតម្លៃក្រោម 1,500 បាត ដែលប្រហែលនឹង 40.5 ដុល្លារអាម៉េរិក។

ក៏ប៉ុន្តែ ការលើកលែងពន្ធនាំចូលខាងលើនាពេលកន្លង បានធ្វើឱ្យកើតមានបញ្ហាមិនស្មើភាពគ្នា ពិសេសគឺនៅពេលទំនិញតម្លៃទាបរបស់ចិន ត្រូវបាននាំចូលលក់ពាសពេញទីផ្សារប្រទេសថៃ។ បញ្ហានេះបានជំរុញឱ្យអាជ្ញាធរថៃ ចាត់វិធានការជាបន្ទាន់ ហើយការយកពន្ធលើកតម្លៃបន្ថែម 7% ចំពោះទំនិញនាំចូលគ្រប់មុខនឹងត្រូវបានអនុវត្តចាប់ពីថ្ងៃទី1 ខែឧសភាតទៅ។

April 29, 2024

ឡានហោះដំបូងលើពិភពលោក ដឹកភ្ញៀវដោយជោគជ័យ

ក្រុមហ៊ុន Klein Vision នៅប្រទេសស្លូវ៉ាគី បានបញ្ចប់ជើងហោះហើរដំបូងលើពិភពលោកដោយឡានដែលអាចផ្លាស់ទីទាំងនៅលើដី និងនៅលើអាកាស។

Klein Vision សម្រេចបានជំហានសំខាន់នេះជាមួយនឹងឡានហោះគំរូ AirCar។ ឡានហោះនេះដឹកភ្ញៀវម្នាក់ដែលជាតន្ត្រីករជនជាតិបារាំង Jean-Michel Jarre។ ការធ្វើតេស្តសាកល្បងត្រូវបានធ្វើឡើងនៅក្នុងព្រលានយន្តហោះនៅស្លូវ៉ាគី។ នៅក្នុងវីដេអូដែលបានចែករំលែកដោយក្រុមហ៊ុន ឡានកីឡាដែលមានស្លាបនេះបានបរដោយកង់បួន ហើយហោះឡើងបន្តិចម្ដងៗ។ តែប៉ុន្មាននាទីប៉ុណ្ណោះ AirCar ក៏បានហោះឡើងដោយសុវត្ថិភាព។

ឆ្នាំ 2021 AirCar បានបញ្ចប់ជើងហោះហើរពីទីក្រុងមួយទៅទីក្រុងមួយជាលើកដំបូង ក្នុងនោះវាបានហោះហើររយៈពេល 15នាទីរវាងព្រលានយន្តហោះអន្តរជាតិ Nitra និង Bratislava នៅប្រទេស្លូវ៉ាគី។ ឡានហោះនេះត្រូវបានរចនាឡើងដើម្បីអាចបរនៅលើដងផ្លូវ និងហោះនៅលើអាកាស។

AirCar ត្រូវបានធានាសុវត្ថិភាពដោយឆត្រយោង ហើយក្នុងអនាគត ក្រុមហ៊ុននឹងអភិវឌ្ឍកាប៊ីន ដែលមានកៅអីបី និងបួន។

ក្នុងដំណាក់កាលដំបូង AirCar ប្រើប្រាស់ម៉ាស៊ីន BMW 160 កម្លាំងសេះ។ កំណែពីរកៅអីមានទម្ងន់ប្រហែល 1,100 គីឡូក្រាម អាចដឹកទម្ងន់បាន 200 គីឡូក្រាម។ ក្នុងការហោះហើរសាកល្បង AirCar បានហោះដល់កម្ពស់ 2,500 ម៉ែត្រ និងល្បឿន 190 គីឡូម៉ែត្រ/ម៉ោង។

ក្នុងអនាគត Klein Vision នឹងសាកល្បងម៉ាស៊ីនសម្រាប់អាកាសចរណ៍ ADEPT ទំនើប ដែលមាំ ស្រាល និងសន្សំសំចៃថាមពល។ ទន្ទឹមនឹងនេះ ក្រុមហ៊ុន Klein Vision ក៏បានបញ្ចប់ការរចនាជាមូលដ្ឋាន និងការវាយតម្លៃ ចំពោះកំណែមួយកៅអីដែលអាចហោះបានជាង 300 គីឡូម៉ែត្រក្នុងមួយម៉ោង និងអាចហោះបាន 1,000 គីឡូម៉ែត្រ។

April 28, 2024

ក្រុមហ៊ុនមេរបស់ Google មានតម្លៃពីរលានលានដុល្លារ ព្រោះប្រាក់ចំណូលកើនឡើងខ្ពស់

កាលពីថ្ងៃទី 25 មេសា Alphabet ដែលជាក្រុមហ៊ុនមេរបស់ Google បានប្រកាសឯកសារ បង្ហាញថា ប្រាក់ចំណូលក្នុងត្រីមាសដំបូងនៃឆ្នាំ 2024 កើន 15%។ Alphabet ក៏បានប្រកាសអំពីការចែកភាគលាភដំបូងផងដែរ។

ជាក់ស្ដែង ប្រាក់ចំណូលរបស់ Alphabet បានកើនដល់ 80.5ពាន់លានដុល្លារ ពី 69.8ពាន់លានដុល្លារកាលពីឆ្នាំមុន។

មូលបត្រ Alphabet កើនរហូតដល់ 13% នៅក្នុងការជួញដូរក្រៅម៉ោងធ្វើការ ជួយឱ្យក្រុមហ៊ុនរកចំណូលបន្ថែមបានជាង 250ពាន់លានដុល្លារ នាំឱ្យតម្លៃមូលធនទីផ្សារកើនដល់ជាងពីរលានលាន (2,000,000,000,000) ដុល្លារ។ លទ្ធផលនេះក៏ជួយឱ្យ Alphabet មានឈ្មោះក្នុងបញ្ជីកំពូលក្រុមហ៊ុនដែលរួមមាន Microsoft, Apple និង Nvidia ផងដែរ។

April 26, 2024

ក្រុមហ៊ុន Beijing Municipal Construction ស្វែងរកឱកាសវិនិយោគនៅកម្ពុជា

នារសៀលថ្ងៃពុធ ទី24 ខែមេសា ឆ្នាំ2024 ដោយមានការអនុញ្ញាតដ៏ខ្ពង់ខ្ពស់ពីឯកឧត្តមរដ្ឋមន្រ្តី លោកជំទាវ កុយ សុដានី រដ្ឋលេខាធិការប្រចាំការ នៃក្រសួងសាធារណការ និងដឹកជញ្ជូន បានទទួលជួបពិភាក្សាការងារជាមួយគណៈប្រតិភូក្រុមហ៊ុន Beijing Municipal Construction Group Co.,Ltd (BMCG) ដែលដឹកនាំដោយលោក Zhai Yongshan នាយកគ្រប់គ្រងទូទៅនៃក្រុមហ៊ុន BMCG ដោយមានការអញ្ជើញចូលរួមពីថ្នាក់ដឹកនាំក្រសួង និងមន្ត្រីជំនាញពាក់ព័ន្ធ។

ជំនួបពិភាក្សានេះធ្វើឡើងក្នុងគោលបំណងដើម្បីពិនិត្យកិច្ចសហការ សិក្សាឱកាសវិនិយោគ និងសក្កានុពលលើវិស័យហេដ្ឋារចនាសម្ព័ន្ធផ្លូវ ថ្នល់ ស្ពាន ផ្លូវដែក និងកំពង់ផែ នៅកម្ពុជា។

គណៈប្រតិភូក្រុមហ៊ុន BMCG បានស្នើសុំការគាំទ្រពីក្រសួងសាធារណការ និងដឹកជញ្ជូន ក្នុងគម្រោងវិនិយោគលើវិស័យហេដ្ឋារចនាសម្ព័ន្ធ។

April 24, 2024

យានលើឋានព្រះចន្ទរបស់ជប៉ុន «នៅមានជីវិត» ក្រោយដេកកករយៈពេលបីយប់

យានស្រាវជ្រាវ SLIM របស់ប្រទេសជប៉ុន បង្កើតបានកំណត់ត្រាដ៏អស្ចារ្យ នៅពេលរស់ឡើងវិញបីដង ក្រោយពីបានឆ្លងកាត់រាត្រីដ៏សែនត្រជាក់នៅលើឋានព្រះចន្ទដែលមានសីតុណ្ហភាព -183 អង្សាសេ, -130 អង្សាសេ និង -170 អង្សាសេ។

អង្គការស្រាវជ្រាវអភិវឌ្ឍវិស័យអវកាសចរណ៍ជប៉ុន (JAXA) នាថ្ងៃទី 24 មេសានេះ បានឱ្យដឹងថា យានចុះចតឆ្លាតវៃលើឋានព្រះចន្ទ (SLIM) របស់ប្រទេសនេះ បន្តបង្កើតបានកំណត់ត្រាថ្មី នោះគឺ «នៅមានជីវិតក្រោយរាត្រីព្រះចន្ទទីបីដែលមានបរិស្ថានមហាសែនត្រជាក់។

យាន SLIM បានចុះចតលើផ្ទៃព្រះចន្ទកាលពីខែមករាកន្លងទៅ ដែលនេះបានជួយឱ្យជប៉ុនមានឈ្មោះជាប្រទេសទី 5 លើពិភពលោក ដែលមានយានចុះចតដោយជោគជ័យលើឋានព្រះចន្ទ បន្ទាប់ពីអតីតសូវៀត សហរដ្ឋអាម៉េរិក ចិន និងឥណ្ឌា។

April 24, 2024

ចិនអនុញ្ញាតឱ្យនាំចូលផ្លែដូងស្រស់ពីកម្ពុជា គ្រាដែលទំនិញនាំចូលពីកម្ពុជា នៅមានទំហំតូចខ្លាំង

ចម្ការដូងចំនួន 13 និងទីតាំងវេចខ្ចប់ចំនួន 5 ដែលបានចុះបញ្ជីសម្រាប់នាំចេញផ្លែដូងស្រស់ពីកម្ពុជាទៅកាន់ប្រទេសចិន ទទួលបានការអនុម័តទទួលស្គាល់ជាផ្លូវការពីអគ្គរដ្ឋបាលគយចិន។ នេះបើតាមលោកជំទាវ អ៊ឹម រចនា អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានឱ្យដឹងកាលពីថ្ងៃទី 22 ខែមេសា ឆ្នាំ 2024។

ការទទួលបានការអនុម័តទទួលស្គាល់ខាងលើ ត្រូវបានធ្វើឡើងបន្ទាប់ ក្រសួងកសិកម្ម រុក្ខាប្រមាញ់ និងនេសាទកម្ពុជា ជាមួយអគ្គរដ្ឋបាលគយយចិន បានចុះហត្ថលេខាលើពិធីសារស្ដីពីលក្ខខណ្ឌតម្រូវភូតគាមអនាម័យ សម្រាប់ការនាំចេញផ្លែដូងស្រស់ពីកម្ពុជាទៅកាន់ប្រទេសចិន កាលពីថ្ងៃទី 15 ខែកញ្ញា ឆ្នាំ 2023។

កន្លងមក ក្រសួងកសិកម្ម រុក្ខាប្រមាញ់ និងនេសាទ បានជូនដំណឹងដល់ភាគីពាក់ព័ន្ធនឹងដូង ដែលមានបំណងផលិត និងកែច្នៃវេចខ្ចប់ផ្លែដូងស្រស់ទៅកាន់ទីផ្សារប្រទេសចិន ឱ្យដាក់ពាក្យស្នើសុំចុះបញ្ជី។

បន្ទាប់ពីទទួលបានពាក្យស្នើសុំ ក្រសួងកសិកម្ម បានចាត់មន្ដ្រីជំនាញចុះវាយតម្លៃស្របតាមនីតិវិធីបច្ចេកទេសដូចមានចែងនៅក្នុងពិធីសារ ហើយបញ្ជូនបញ្ជីឈ្មោះចម្ការ និងរោងចក្រកែច្នៃវេចខ្ចប់ទាំងនោះ ទៅកាន់ភាគីចិន ដើម្បីពិនិត្យ និងវាយតម្លៃបន្ត។

គិតត្រឹមពេលនេះ អគ្គរដ្ឋបាលគយយចិនបានអនុម័តទទួលស្គាល់ជាផ្លូវការ ចម្ការដូងចំនួន 13 និងទីតាំងវេចខ្ចប់ចំនួន 5 របស់កម្ពុជា ដែលបានចុះបញ្ជីសម្រាប់នាំចេញផ្លែដូងស្រស់ទៅកាន់ប្រទេសចិន។

យោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា នៅត្រីមាសទីមួយនៃឆ្នាំ 2024 ស្ថានភាពនៃការនាំចេញទំនិញកម្ពុជាទៅកាន់ទីផ្សារអន្តរជាតិ មានភាពប្រសើរឡើង។ ប្រទេសចិនក្លាយជាដៃគូដោះដូរពាណិជ្ជកម្មធំជាងគេរបស់កម្ពុជា ដោយសម្រេចបានជាង 3ពាន់2រយលានដុល្លារអាម៉េរិក។ ក្នុងនោះ កម្ពុជាបាននាំចេញទៅកាន់ទីផ្សារចិនក្នុងទំហំទឹកប្រាក់តែជាង 3រយលានដុល្លារប៉ុណ្ណោះ ខណៈដែលការនាំចេញរបស់ចិនមកកម្ពុជា សម្រេចបានរហូតជាង 2ពាន់8រយលានដុល្លារ។

ដោយឡែក សហរដ្ឋអាម៉េរិកដែលជាទីផ្សារនាំចេញធំជាងគេរបស់កម្ពុជា បាននាំចូលទំនិញពីកម្ពុជាក្នុងទំហំទឹកប្រាក់ជិត 2ពាន់លានដុល្លារ គ្រាដែលកម្ពុជាបាននាំចូលទំនិញពីសហរដ្ឋអាម៉េរិកក្នុងទំហំទឹកប្រាក់តែជាង 57 លានដុល្លារប៉ុណ្ណោះ នៅត្រីមាសទីមួយនៃឆ្នាំ 2024។

April 23, 2024

ថៃគ្រោងនឹងនាំចេញទុរេនមួយលានតោនក្នុងឆ្នាំនេះ

អាជ្ញាធរថៃ គ្រោងនឹងនាំចេញផ្លែទុរេនប្រហែលមួយលានតោន ដែលមានតម្លៃប្រមាណ 130 ពាន់លានបាត (3.53 ពាន់លានដុល្លារអាម៉េរិក) ទៅកាន់ទីផ្សារបរទេសនៅក្នុងឆ្នាំ 2024 នេះ ក្នុងនោះ ប្រទេសចិនគឺជាទីផ្សារធំជាងគេ។

រដ្ឋមន្ត្រីក្រសួងកសិកម្មថៃ កាលពីថ្ងៃទី 20 មេសា 2024 បានឱ្យដឹងថា លោកបានណែនាំឱ្យគណៈកម្មការផ្លែឈើ ជួបជាមួយកសិករដាំដើមទុរេន ក្រុមអ្នកបែងចែកប្រភេទ និងកាត់ផ្លែទុរេន ឈ្មួញ ក្រុមអ្នកគ្រប់គ្រងរោងចក្រដែលទាក់ទងនឹងទុរេន អ្នកនាំចេញ រួមនឹងស្ថាប័នដែលទាក់ទង ដើម្បីពិភាក្សាគ្នា រកដំណោះស្រាយសម្រាប់ការធានាគុណភាពផ្លែទុរេន និងឆ្លើយតបទៅនឹងស្ដង់ដាគុណភាព ក៏ដូចជាការតម្រូវ GAP របស់ប្រទេសចិន។

រដ្ឋមន្ត្រីកសិកម្មថៃ ក៏បានស្នើឱ្យរកវិធីកាត់បន្ថយការចំណាយរបស់ប្រជាកសិករ ទៅលើជី និងថ្នាំសម្រាប់ទុរេន។ ចំណែកនាយកដ្ឋានធារាសាស្ត្រថៃ ក៏ត្រូវបានណែនាំឱ្យគ្រប់គ្រងប្រព័ន្ធស្រោចស្រព ដើម្បីធានាឱ្យមានទឹកគ្រប់គ្រាន់សម្រាប់ចម្ការទុរេននៅក្នុងខេត្តនានារបស់ប្រទេសនេះ។

យោងតាមក្រុមមន្ត្រីកសិកម្មថៃ ចម្ការទុរេនជាង 64 ពាន់ហិកតានៅក្នុងបណ្ដាខេត្តភាគខាងកើតប្រទេសថៃ បានចុះឈ្មោះជាមួយនឹងស្ថាប័នគយរបស់ប្រទេសចិន និងបានទទួលវិញ្ញាបនបត្រ GAP ពីស្ថាប័ននេះ។ ប្រការនេះនឹងបង្កលក្ខណៈងាយស្រួលសម្រាប់ការនាំចេញផ្លែទុរេនរបស់ពួកគេទៅកាន់ទីផ្សារចិន។

April 22, 2024

គម្រោងទីក្រុងប្រវែង 170 គីឡូម៉ែត្រ ត្រូវកាត់បន្ថយមកខ្លីបំផុត

អារ៉ាប៊ីសាអូឌីត នឹងកាត់បន្ថយប្រវែងរបស់គម្រោងទីក្រុង 170 គីឡូម៉ែត្រ មកនៅត្រឹម 2.4 គីឡូម៉ែត្រ ដែលអាចឱ្យមនុស្សរស់នៅបាន 300,000 នាក់។

ក្រុមមន្ត្រីនៅប្រទេសអារ៉ាប៊ីសាអូឌីត កំពុងតែកែសម្រួលមហាគម្រោង NEOM។ គម្រោងអភិវឌ្ឍសមុទ្រខ្សាច់នេះ ដើរតួនាទីសំខាន់ក្នុងផែនការដែលជួយឱ្យប្រទេសនេះ កាត់បន្ថយការពឹងផ្អែកទៅលើអណ្ដូងប្រេង។ ក៏ប៉ុន្ត យោងតាម Interesting Engineering ចុះផ្សាយកាលពីថ្ងៃទី 11 មេសា ថវិកាឆ្នាំ 2024 របស់គម្រោងនេះ មិនទាន់ត្រូវបានអនុម័តនៅឡើយ។

មហាគម្រោង NEOM នឹងរួមមាន 10 តំបន់ ក្នុងនោះក៏មានទាំងទីក្រុងអណ្ដែត Oxagon និងតំបន់លំហែ Trojena។ ប៉ុន្តែ អ្វីដែលត្រូវបានរំលឹកច្រើនជាងគេបំផុត នោះគឺ The Line ដែលជាគម្រោងទីក្រុងប្រវែង 170 គីឡូម៉ែត្រ។

The Line រួមមាន អគារកប់ពពកចំនួនពីរដែលស្ថិតនៅទន្ទឹមគ្នា និងមានកម្ពស់ខ្ពស់ជាងអគារ Empire State Building ទៅទៀត។ ទីក្រុងទាំងមូលដែលមានប្រវែងជិត 200 គីឡូម៉ែត្រនេះ នឹងស្ថិតនៅកណ្ដាលអគារទាំងពីរនេះ។

តាមគម្រោង ទីក្រុង The Line នឹងអាចដាក់មនុស្សបាន 1.5 លាននាក់។ ក៏ប៉ុន្តែ ប្រភពព័ត៌មានរបស់ Bloomberg ឱ្យដឹងថា គម្រោងទីក្រុងនេះកំពុងត្រូវបានកាត់បន្ថយពី 170 គីឡូម៉ែត្រ ចុះមកនៅត្រឹម 2.4 គីឡូម៉ែត្រ នៅពេលស្ថាបនាក្នុងឆ្នាំ 2030។ ដូច្នេះ សមត្ថភាពផ្ទុករបស់ទីក្រុងនេះក៏ថយមកនៅត្រឹម 300,000 នាក់។

ការចំណាយទៅលើមហាគម្រោង NEOM គឺប្រមាណ 1.5 លានលាន (1.5 ទ្រីលាន) ដុល្លារអាម៉េរិក។ ថវិកាសម្រាប់ NEOM ភាគច្រើនបានមកពីមូលនិធិវិនិយោគសាធារណៈ (PIF) ដែលគ្រប់គ្រងដោយរាជទាយាទរបស់អារ៉ាប៊ីសាអូឌីត។

ការកាត់បន្ថយទំហំរបស់ The Line គឺបណ្ដាលមកពីទុនបម្រុងជាសាច់ប្រាក់បានថយចុះមកនៅត្រឹម 15 ពាន់លានដុល្លារ គិតត្រឹមខែកញ្ញា ឆ្នាំ 2023។

ទោះជាយ៉ាងណាក៏ដោយ ក្រុមអ្នកគ្រប់គ្រងឱ្យដឹងថា ផ្នែកផ្សេងៗរបស់គម្រោង NEOM នៅតែបន្តទៅតាមផែនការ។

April 19, 2024

ព្រែកជីកហ្វូណនតេជោ «ល្អមើលផង ល្អហូបផង»

(ភ្នំពេញ) – សម្ដេចធិបតី ហ៊ុន ម៉ាណែត បានមានប្រសាសន៍ថា ប្រទេសយើងជាមហាអំណាច ពេលដែលមានសេដ្ឋកិច្ចខ្លាំង ដូច្នេះព្រែកជីក (ហ្វូណនតេជោ) នេះ គឺបម្រើដល់ការបង្កើនសេដ្ឋកិច្ច និងជីវភាពរបស់ប្រជាពលរដ្ឋ។

ប្រសាសន៍របស់សម្ដេចប្រមុខរាជរដ្ឋាភិបាលកម្ពុជា ខាងលើនេះ ត្រូវបានធ្វើឡើងនាព្រឹកថ្ងៃទី 11 ខែមេសា ឆ្នាំ 2024 នៅក្នុងពិធីសម្ពោធកសិដ្ឋានចិញ្ចឹមគោយកទឹកដោះគិរីសួគ៌ ស្ថិតនៅភូមិឱភាសាំង ឃុំកណ្តឹង ស្រុកបាទី ខេត្តតាកែវ។

សម្ដេចធិបតី បានបញ្ជាក់ថា ព្រែកជីកហ្វូណនតេជោ «ល្អមើលផង និងល្អហូបផង» បន្ទាប់ពីមានមតិរិះគន់ខ្លះចំពោះគម្រោងព្រែកជីកនេះ។ គម្រោងនេះនឹងមិនបង្កផលប៉ះពាល់ដល់បរិស្ថាន ក៏ដូចជាមិនបង្កការគំរាមកំហែងដល់ប្រទេសជិតខាង។

សូមរំលឹកថា គម្រោងព្រែកជីកហ្វូណនតេជោ មានប្រវែង 180 គីឡូម៉ែត្រ ចាប់ពីព្រែកតាកែវនៃទន្លេមេគង្គ ឆ្លងកាត់តាមព្រែកតាឯកនៃទន្លៃបាសាក់ រួចចូលតាមព្រែកតាហ៊ីងនៃទន្លេបាសាក់ ស្រុកកោះធំ និងបន្តរហូតដល់សមុទ្រខេត្តកែប ដោយឆ្លងកាត់ខេត្តចំនួន 4 រួមមាន ខេត្តកណ្តាល ខេត្តតាកែវ ខេត្តកំពត និងខេត្តកែប ដែលមានប្រជាជនសរុបប្រមាណ 1.6 លាននាក់ រស់នៅអមសងខាងផ្លូវទឹក។

យោងតាមក្រសួងសាធារណៈការនិងដឹកជញ្ជូន ការដ្ឋានសាងសង់ព្រែកជីកដែលនឹងធ្វើឡើងក្នុងអំឡុងត្រីមាសទី 4 នៃឆ្នាំ 2024 ខាងមុខនេះ មានតម្លៃប្រមាណ 1,700 លានដុល្លារអាម៉េរិក ហើយនឹងត្រូវចំណាយពេល 4 ឆ្នាំ ក្នុងការស្ថាបនា។ គម្រោងនេះគឺជាផ្នែកមួយនៃគម្រោងក្រវាត់ផ្លូវពាណិជ្ជកម្ម (Belt and Road Initiative ឬBRI) របស់រដ្ឋាភិបាលចិន៕

April 11, 2024

Tag: ត្រី