ឈ្មោះ - La Reine Media

ស្បែកជើង Crocs រូបរាងអាក្រក់ ប៉ុន្តែរកបានរាប់ពាន់លានដុល្លារអាម៉េរិក/ឆ្នាំ

បើទោះជាមានមនុស្សមិនតិចដែលរិះគន់ថាអាក្រក់ និងត្រូវបានទំព័រ Time ដាក់ចូលទៅក្នុង «របកគំហើញដែលអន់» ព្រោះតែគ្មានប្រយោជន៍ ប៉ុន្តែ Crocs នៅតែអាចរកប្រាក់បានរាប់ពាន់លានដុល្លារជារៀងរាល់ឆ្នាំ។

ក្នុងរយៈពេលជាង 20 ឆ្នាំ ស្បែកជើងដែលមានរូបរាងដូចទៅនឹងឈីសនេះ បានធ្វើឱ្យមានអ្នកចូលចិត្តខ្លាំង និងអ្នកស្អប់ខ្លាំងមិនតិចឡើយ។ ប៉ុន្តែ Crocs នៅតែជាបាតុភូមិមួយរបស់វិស័យម៉ូដែលទំនើប និងរកប្រាក់ចំណូលបាន 3.6 ពាន់លានដុល្លារអាម៉េរិក កាលពីឆ្នាំកន្លង។

ស្បែកជើងនេះធ្វើពី croslite ដែលជាជ័រប្រភេទទន់ ស្រាល និងមិនរក្សាក្លិន។ ដំបូងឡើយ វាត្រូវបានវាយតម្លៃថាអាក្រក់ ប៉ុន្តែនៅតែត្រូវបានលក់ ព្រោះតែងាយស្រួលពាក់ ទាំងនៅលើដីគោក ទាំងនៅក្នុងទឹក។

កាលពីឆ្នាំ 2010 ទស្សនាវដ្ដី Time បានដាក់បញ្ចូល Crocs ទៅក្នុងបញ្ជីឈ្មោះស្ដីអំពីរបកគំហើញដែលអន់បំផុតទាំង 50 របស់ពិភពលោក។ ក៏ប៉ុន្តែ បច្ចុប្បន្ន បុគ្គលល្បីឈ្មោះជាច្រើនរូបកំពុងប្រើប្រាស់ស្បែកជើងយីហោនេះ។

យោងតាម Lucy Thornley ដែលជាអនុប្រធានផ្នែកនិន្នាការ អតិថិជន រចនា និងផលិតផលរបស់ Crocs ឱ្យដឹងថា មានមូលហេតុពីរយ៉ាងដែលនាំឱ្យ Crocs ទទួលបានជោគជ័យ រួមមាន អ្នកប្រើប្រាស់វ័យក្មេងចូលចិត្តប្រើប្រាស់ស្បែកជើងនេះ និងរចនារូបរាងរបស់វាត្រូវបានបន្ទាន់សម័យ៕

October 25, 2023

រថភ្លើងដឹកជញ្ជូន Hyperloop ល្បឿនជាង 1,200 គីឡូម៉ែត្រ/ម៉ោង

(សហរដ្ឋអាម៉េរិក) – ប្រព័ន្ធ Hyperloop Express Freight អាចដឹកទំនិញដោយស្វ័យប្រវត្តក្នុងល្បឿន 1,223 គីឡូម៉ែត្រក្នុងមួយម៉ោង និងលើកដាក់ទំនិញក្នុងពេលតែមួយ។

ក្រុមហ៊ុន Hyperloop Transportation Technologies (HyperloopTT) កំពុងឆ្ពោះទៅរកការអភិវឌ្ឍប្រព័ន្ធទូរថភ្លើងល្បឿនលឿនដែលស្ទើរតែមិនមានកម្លាំងកកិត អាចជាបដិវត្តន៍ក្នុងវិស័យដឹកជញ្ជូន។ ប្រព័ន្ធថ្មីបំផុតដែលមានឈ្មោះថា Express Freight ប្រើប្រាស់បំពង់ផ្លូវទទេ ទូរថភ្លើងអណ្ដែត និងទ្វារអគ្គិសនីជាដើមដោយស្វ័យប្រវត្តទាំងស្រុង ដើម្បីលើកដាក់ទំនិញដំណាលគ្នានៅពេលចេញដំណើរ។ HyperloopTT ឱ្យដឹងថា ប្រព័ន្ធនេះនឹងអាចដឹកជញ្ជូនបានលឿន សន្សំសំចៃប្រាក់ និងមានស្ថិរភាពជាងបើធៀបនឹងការដឹកទំនិញតាមយន្តហោះ ឬរថយន្តដឹកទំនិញ។

ប្រព័ន្ធនេះត្រូវបាន HyperloopTT សហការអភិវឌ្ឍជាមួយនឹងក្រុមហ៊ុន Tangerine របស់ប្រទេសអង់គ្លេស។

ផែនការរបស់ HyperloopTT គឺការបំពាក់ប្រព័ន្ធ Express Freight ខាងក្នុងហេដ្ឋារចនាសម្ព័ន្ធដឹកអ្នកដំណើរ។ ប្រព័ន្ធដឹកអ្នកដំណើរគឺជាទូដែលមានរូបរាងដូចដងខ្លួនយន្តហោះ ធ្វើដំណើរក្នុងល្បឿន 1,223 គីឡូម៉ែត្រ/ម៉ោង តាមរយៈប្រព័ន្ធម៉ាញេទិចដំណើរការនៅក្នុងប្រព័ន្ធបំពង់សម្ពាធទាប។

October 25, 2023

ពិភពលោករកចំណូលបន្ថែមបាន 250 ពាន់លានដុល្លារ បើសិនក្រុមមហាសេដ្ឋីត្រូវបានយកពន្ធអប្បបរមា

គម្រោងស្រាវជ្រាវ EU Tax Observatory បានរកឃើញថា ប្រទេសនានានឹងមានប្រាក់ចំណូលបន្ថែមរាប់រយពាន់លានដុល្លារជារៀងរាល់ឆ្នាំ បើសិនយកពន្ធអប្បបរមា 2% នៅទូទាំងសកលលោកចំពោះក្រុមមហាសេដ្ឋី។

នៅក្នុងលទ្ធផលនៃការសិក្សាស្រាវជ្រាវដែលបានចុះផ្សាយនាថ្ងៃទី 23 តុលា 2023 EU Tax Observatory យល់ថា ដោយគ្រាន់តែយកពន្ធ 2% ចំពោះទ្រព្យសម្បត្តិជិត 13 ទ្រីលាន (13,000,000,000,000) ដុល្លារអាម៉េរិក របស់មហាសេដ្ឋី 2,700 នាក់នៅទូទាំងផែនដី ពិភពលោកនឹងមានប្រាក់ចំណូលបន្ថែម 250 ពាន់លានដុល្លារជារៀងរាល់ឆ្នាំ។ បច្ចុប្បន្ន ជាក់ស្ដែង អត្រាពន្ធលើប្រាក់ចំណូលបុគ្គលរបស់ក្រុមមហាសេដ្ឋី គឺទាបជាងឆ្ងាយ បើធៀបនឹងក្រុមដទៃ ដោយសារតែពួកគេអាចទុកដាក់ទ្រព្យទៅក្នុងបណ្ដាក្រុមហ៊ុនដែលមានតែឈ្មោះ ដើម្បីគេចពន្ធ។

ស្ថាប័នខាងលើបានរកឃើញថា ប្រាក់ចំណូលពីការបង់ពន្ធធៀបនឹងប្រាក់ចំណូលរបស់មហាសេដ្ឋីអាម៉េរិក គឺប្រហែលតែ 0.5% ប៉ុណ្ណោះ។ នៅបណ្ដាប្រទេសដូចបារាំងជាដើម អត្រានេះគឺប្រហែល 0%។

EU Tax Observatory ឱ្យដឹងថា ការប្រឹងប្រែងដើម្បីយកពន្ធលើទ្រព្យរបស់ក្រុមអ្នកមានជាងគេនៅទូទាំងសកលលោកនឹងត្រូវចំណាយពេលច្រើនឆ្នាំទៀត។ ក៏ប៉ុន្តែ ពួកគេនៅតែមានក្ដីសង្ឃឹម បើទោះមានការលំបាកក្នុងការកំណត់តម្លៃមូលធនរបស់ក្រុមហ៊ុនឯកជន៕

October 23, 2023

ចាប់បានរលកវិទ្យុជះពី 8 ពាន់លានឆ្នាំមុន និងមានចង្វាក់ដូចសំឡេងបេះដូង

រលកវិទ្យុ «ផ្ទុះ» ភ្លឹបភ្លែតដែលទើបតែត្រូវបានរកឃើញ មានប្រភពពីទីដ៏គួរឱ្យព្រឺព្រួច ជាពេលដែលចក្រវាលទើបតែកកើតដំបូងៗ។

រលកសញ្ញាដ៏អាថ៌កំបាំង មានឈ្មោះថា FRB 20220610A ដែលកើតឡើងតាំងពី 8 ពាន់លានឆ្នាំមុន គឺជា «រលកវិទ្យុមួយចង្វាក់»។ រលកវិទ្យុមួយចង្វាក់គឺជារលកសញ្ញាវិទ្យុល្បឿនលឿនមួយប្រភេទដែលខ្លាំងក្លា អាចធ្វើដំណើរឆ្លងកាត់លំហអន្តរកាឡាក់ស៊ី។ អ្នកខ្លះថា វាកើតឡើងដោយសារការប៉ះគ្នារវាងប្រហោងខ្មៅ (Black Hole) ផ្កាយនឺរត្រុង ឬពីមនុស្សភពក្រៅប្រព័ន្ធព្រះអាទិត្យ។

យោងតាម Live Science រលកវិទ្យុនេះមានវ័យចំណាស់ និងឆ្ងាយជាង 1.5 ដង បើធៀបនឹងរលកវិទ្យុដែលកាន់កាប់កំណត់ត្រាមុននោះ។

នៅក្នុងជ្រុងមួយនៃតេឡេស្កុបវិទ្យុ ពន្លឺជះចេញពីព្រឹត្តិការណ៍ផ្ទុះ មានល្បឿនលឿន ភ្លឹបភ្លែតទៅតាមវដ្ដមួយដូចចង្វាក់បេះដូង។

លើកនេះ ក្រុមអ្នកវិទ្យាសាស្ត្រជឿថា ពួកគេបានដឹងអំពីប្រភពរបស់វា នោះគឺ ហេតុការណ៍ប៉ះទង្គិចគ្នារវាងកាឡាក់ស៊ីបុរាណចំនួនបី។

October 20, 2023

Neta បង្ហាញរថយន្តអគ្គិសនី X តម្លៃចាប់ពី 17,340 ដុល្លារអាម៉េរិក

យីហោរថយន្តអគ្គិសនី Neta Auto របស់ក្រុមហ៊ុនចិន Hozon Auto បានបង្ហាញរថយន្តម៉ូដែលថ្មី ឈ្មោះ Neta X ដែលមានតម្លៃទាប និងប្រើប្រាស់ឈីបសម្រាប់កាប៊ីនបើកបរលំដាប់ខ្ពស់។

Neta បានបង្ហាញ Neta X ដែលជាកំណែថ្មីរបស់ Neta U-II ដែលបានបង្ហាញខ្លួនមុននោះ នៅក្នុងព្រឹត្តិការណ៍មួយនាថ្ងៃនេះ។ នេះគឺដូចទៅនឹងការបង្ហាញខ្លួនរបស់ Neta Aya ដែលជាកំណែបន្ទាប់របស់ Neta V កាលពីខែសីហា។

រថយន្តអគ្គិសនី Neta X មានបួនកំណែ ដែលមានតម្លៃចាប់ពី 17,340 ដុល្លារអាម៉េរិក។ អតិថិជនដែលកក់ 273 ដុល្លារដើម្បីទិញ Neta X មុនថ្ងៃទី 30 វិច្ឆិកា 2023 នឹងទទួលបានការបញ្ចុះតម្លៃ 2,460 ដុល្លារអាម៉េរិក។

Neta X មានបណ្ដោយ 4,619 មិល្លីម៉ែត្រ, ទទឹង 1,860 មិល្លីម៉ែត្រ និងកម្ពស់ 1,628 មិល្លីម៉ែត្រ ខណៈបណ្ដោយមូលដ្ឋានមានប្រវែង 2,770 មិល្លីម៉ែត្រ។

រថយន្តនេះបំពាក់ម៉ូទ័រសមកាលកម្មមេដែកអចិន្រ្តៃយ៍ (Permanent Magnet Synchronous Motor – PMSM) ដែលមានកម្លាំង 120 សេះ និងល្បឿន 150 គីឡូម៉ែត្រ/ម៉ោង។ រយៈចម្ងាយផ្លូវដែល Neta X អាចធ្វើដំណើរដល់គឺ 401 និង 501 គីឡូម៉ែត្រ។

Neta X ប្រើប្រាស់ឈីបសម្រាប់កាប៊ីនបើកបរ Qualcomm Snapdragon 8155 ក៏ដូចជាឈីបសម្រាប់ការបើកបរឆ្លាតវៃ Journey 3 របស់ក្រុមហ៊ុនចិន Horizon Robotics។

ក្រុមហ៊ុន Neta បានប្រគល់រថយន្តដល់ដៃអតិថិជនចំនួន 13,211 គ្រឿងក្នុងខែកញ្ញា 2023 កើន 9.15% ធៀបនឹងខែសីហា ប៉ុន្តែថយចុះ 26.63% ធៀបនឹងដំណាក់កាលដូចគ្នាក្នុងឆ្នាំ 2022៕

October 19, 2023

យានជំនិះកង់ពីរទន្ទឹមគ្នាឆ្លាតវៃ ប្រើប្រាស់អគ្គិសនី និងរក្សាលំនឹងដោយស្វ័យប្រវត្ត

SHANE អាចដឹកមនុស្សបានប្រាំនាក់ និងអាចរក្សាលំនឹងដោយស្វ័យប្រវត្តនៅពេលរត់លើផ្លូវក្នុងក្រុង ឬលើផ្លូវល្បឿនលឿន។

រចនារូបរាងរបស់យានជំនិះកង់ពីរទន្ទឹមគ្នាដំបូងគេលើពិភពលោកមួយនេះ ត្រូវបានបង្ហាញដោយ Shane Chen ដែលជាអ្នកបង្កើតស្គី hoverboard រក្សាលំនឹងដោយស្វ័យប្រវត្តដ៏ល្បីឈ្មោះ។ Chen បានដាក់ឈ្មោះឱ្យយានជំនិះថ្មីនេះថា SHANE និងអះអាងថា នេះគឺជា «រូបរាងទោចក្រយានយន្តពិតៗ និងមានប្រសិទ្ធភាពដើម្បីប្រើប្រាស់ប្រចាំថ្ងៃនៅក្នុងទីក្រុង និងតាមផ្លូវល្បឿនលឿន»។ នេះបើតាម Interesting Engineering ចុះផ្សាយកាលពីថ្ងៃទី 18 តុលា 2023។

យានជំនិះនេះមានរូបរាងមិនដូចយានជំនិះដទៃ និងអាចដាក់មនុស្សបានប្រាំនាក់បានយ៉ាងស្រួល ព្រមទាំងមានទ្វារចេញចូលដ៏ធំទូលាយនៅខាងមុខ និងខាងក្រោយ។

SHANE ប្រើប្រាស់កង់ធំៗចំនួនពីរ និងអាចរក្សាលំនឹងរបស់ផ្នែកខាងមុខ និងខាងក្រោយ តាមរយៈប្រព័ន្ធអង្គញាណ (សែនស៊ើរ) ឆ្លាតវៃ និងម៉ូទ័រនៅត្រង់គ្រោងយាន។ វាពុំមានចង្កូត ប៉ុន្តែអាចប្ដូរទិសដៅដោយការបង្កើន ឬបន្ថយកម្លាំង និងល្បឿនទៅកាន់កង់មួយគ្រាប់ ឬកង់ទាំងពីរគ្រាប់។

ទោចក្រយានយន្តនេះត្រូវបានអភិវឌ្ឍឡើងដើម្បីអាចរត់ទាំងនៅក្នុងក្រុង ទាំងនៅលើផ្លូវល្បឿនលឿន និងអាចធ្វើដំណើរក្នុងរង្វង់ 160 គីឡូម៉ែត្រ និងល្បឿន 112 គីឡូម៉ែត្រ/ម៉ោង។

បច្ចុប្បន្ន លោក Shane Chen កំពុងធ្វើការជាមួយដៃគូនានាដើម្បីប្រែក្លាយរចនារូបរាងរបស់យាននេះឱ្យទៅជាការពិត៕

October 19, 2023

អាម៉េរិក រុស្ស៊ី ចិន ខ្វែងគំនិតគ្នារឿងសង្គ្រាមអ៊ីស្រាអែល – ហាម៉ាស

សហរដ្ឋអាម៉េរិក រុស្ស៊ី និងចិន យល់ឃើញផ្ទុយគ្នានៅពេលក្រុមប្រឹក្សាសន្តិសុខកោះប្រជុំបន្ទាន់ ពិភាក្សាអំពីសង្គ្រាមរវាងអ៊ីស្រាអែល និងកងទ័ពហាម៉ាសរបស់ប៉ាលេស្ទីន។

សមាជិកចំនួន 15 របស់ក្រុមប្រឹក្សាសន្តិសុខនៃអង្គការសហប្រជាជាតិ កាលពីថ្ងៃទី 08 តុលា បានបើកកិច្ចប្រជុំបន្ទាន់រយៈពេលប្រហែល 90 នាទី នៅទីស្នាក់ការកណ្ដាលនៃអង្គការសហប្រជាជាតិនៅបុរីនីវយ៉ាក ដើម្បីស្ដាប់បេសកជនសន្តិភាពមជ្ឈិមបូព៌ា រាយការណ៍អំពីស្ថានការណ៍សង្គ្រាមហាម៉ាស – អ៊ីស្រាអែល។

ក្នុងកិច្ចប្រជុំបិទទ្វារ អាម៉េរិកបានអំពាវនាវឱ្យមានការថ្កោលទោសខ្លាំងក្លាទៅលើយុទ្ធនាការវាយប្រហាររបស់ក្រុមហាម៉ាសសំដៅលើអ៊ីស្រាអែលកាលពីថ្ងៃទី 07 តុលា។ «ប្រទេសមួយចំនួនបានថ្កោលទោសហាម៉ាស ប៉ុន្តែមិនមែនទាំងអស់» ឯកអគ្គរដ្ឋទូតរងអាម៉េរិកនៅអង្គការសហប្រជាជាតិ លោក Robert Wood បានប្រាប់ក្រុមអ្នកសារព័ត៌មានបន្ទាប់ពីកិច្ចប្រជុំនោះដូច្នេះ។

«គ្រប់គ្នាអាចស្មានបានថា អ្នកណាខ្លះដែលមិនថ្កោលទោសហាម៉ាស ដោយមិនចាំបាច់បញ្ចេញឈ្មោះ» លោក Wood បន្ថែមដូច្នេះ ដែលហាក់ចង់សំដៅទៅលើរុស្ស៊ី។

ក្រុមអ្នកការទូតឱ្យដឹងថា ក្រុមប្រឹក្សាសន្តិសុខ ទំនងជានឹងមិនចេញសេចក្ដីថ្លែងការណ៍រួមនៅក្រោយកិច្ចប្រជុំបន្ទាន់នេះ។ សេចក្ដីថ្លែងការណ៍រួមត្រូវការមតិយល់ស្របពីសមាជិកទាំង 15 របស់ក្រុមប្រឹក្សាសន្តិសុខ ខណៈដែលឯកអគ្គរដ្ឋទូតរងអាម៉េរិក លោក Wood ឱ្យដឹងថា នេះមិនមែនជាអាទិភាពរបស់អាម៉េរិកនាពេលបច្ចុប្បន្ន។

សហរដ្ឋអាម៉េរិកប្រកាសគាំទ្រអ៊ីស្រាអែល ថ្កោលទោសហាម៉ាស និងអំពាវនាវឱ្យក្រុមប្រឹក្សាសន្តិសុខថ្កោលទោសផងដែរ គ្រាដែលចិន និងរុស្ស៊ី មិនយល់ស្របនឹងការយល់ឃើញរបស់អាម៉េរិក។

កងកម្លាំងប្រដាប់អាវុធហាម៉ាសរបស់ប៉ាលេស្ទីនដែលគ្រប់គ្រងតំបន់ហ្គាហ្សា (Gaza) កាលពីថ្ងៃទី 07 តុលា បានបាញ់ស្រោចរ៉ុក្កែតរាប់ពាន់គ្រាប់ និងវាយសម្រុកព្រមគ្នាតាមផ្លូវគោក ផ្លូវអាកាស ផ្លូវទឹកទៅលើទឹកដីអ៊ីស្រាអែល។

រដ្ឋាភិបាលអ៊ីស្រាអែល ក្នុងថ្ងៃដដែលនោះក៏បានប្រកាសសង្គ្រាម ចេញបញ្ជាឱ្យទ័ពអាកាសបើកការវាយប្រហារដោយយន្តហោះចម្បាំងរាប់សិបគ្រឿងទៅលើគោលដៅនានានៅតំបន់ហ្គាហ្សា។

ភាគីអ៊ីស្រាអែល កាលពីថ្ងៃទី 09 តុលាបានឱ្យដឹងថា ប្រជាជនប្រទេសនេះជាង 700 នាក់បានស្លាប់ រាប់ចាប់តាំងពីហាម៉ាសបើកការវាយប្រហារ។ ចំណែកភាគីគ្រប់គ្រងតំបន់ហ្គាហ្សាវិញ រាយការណ៍ថា មនុស្សយ៉ាងតិច 413 នាក់បានស្លាប់នៅក្នុងតំបន់នេះ៕

October 9, 2023

អូស្ត្រាលីសាងសង់អគារឈើខ្ពស់បំផុតលើពិភពលោក

អាជ្ញាធរទីក្រុង Perth បានអនុម័តគម្រោងសាងសង់អគារកម្ពស់ 191.2 ម៉ែត្រ ដែលប្រើប្រាស់ឈើបន្ទះកុងផ្លាកេផ្សំជាមួយនឹងបេតុងស្នូលដែកថែប។

កាលពីថ្ងៃទី 05 តុលា អាជ្ញាធរទីក្រុង Perth បានអនុម័តសំណើសាងសង់អគារកប់ពពកដែលមានឈ្មោះថា C6 របស់ Grange Development។ យោងតាម CNN អគារនេះនឹងខ្ពស់ជាងជិតពីរដងបើធៀបនឹងអគារឈើ-បេតុងខ្ពស់បំផុតក្នុងលោកនាបច្ចុប្បន្ន។ ម្ចាស់សំណង់នេះឱ្យដឹងថា 42% នៃអគារនេះនឹងសាងសង់ពីឈើ ខណៈសសរធ្វើពីបេតុង និងដែក។

ក្រោយពីបានសាងសង់រួចរាល់ អគរ C6 នឹងបំបែកកំណត់ត្រាអគារឈើ-បេតុងខ្ពស់ជាងគេលើពិភពលោក Ascent នៅទីក្រុង Milwaukee រដ្ឋ Wisconsin សហរដ្ឋអាម៉េរិក ដែលមាន 25 ជាន់ កម្ពស់ 86 ម៉ែត្រ។ C6 នឹងស្ថិតនៅក្នុងក្រុង Charles ភាគខាងត្បូងទីក្រុង Perth និងខ្ពស់ជាងអគារកូនកាត់ឈើ-បេតុង Atlassian Headquarters នៅទីក្រុង Sydney នាពេលខាងមុខ។ Atlassian Headquarters ក៏ត្រូវបានសាងសង់ដើម្បីបំបែកកំណត់ត្រារបស់ Ascent ប៉ុន្តែមិនទាន់រួចរាល់។

ដូចទៅនឹង Atlassian អគារ C6 នឹងមានធ្នឹមធ្វើពីឈើកុងផ្លាកេច្រើនស្រទាប់ដែលមានស៊ុមដែកការពារ។ យោងតាម Grange Development អគារកម្ពស់ 50 ជាន់ និងមានខុនដូជាង 200 នេះ គឺជាអគារស្នាក់នៅដែលមិនបំភាយឧស្ម័នកាបូនដំបូងគេនៅ Western Australia។ C6 នឹងប្រើប្រាស់ឈើ 7,400 ម៉ែត្រគុបដែលបានពីដើមឈើ 600 ដើម។

ក្រៅពីឈើ គម្រោងរបស់ក្រុមហ៊ុនខាងលើក៏រួមមានទាំងតំបន់បៃតងជាច្រើន មានដូចជា សួនរុក្ខជាតិលើដំបូលអគារ កសិដ្ឋានបែបទីក្រុង និងមានការផ្ដល់រថយន្តអគ្គិសនី Tesla Model 3s ចំនួន 80 គ្រឿងដល់អតិថិជនផងដែរ៕

October 6, 2023

ក្រុមហ៊ុនមេរបស់ Facebook ប្រកាសអំពីការចាប់ផ្ដើមដំណើរការឧបករណ៍ AI

ក្រុមហ៊ុន Meta បំពាក់បច្ចេកវិទ្យាបញ្ហាសិប្បនិម្មិត (AI) ទៅក្នុងបណ្ដាផលិតផលរបស់ខ្លួនដើម្បីប្រើប្រាស់ឃ្លាំងទិន្នន័យដែលប្រមូលបាននាពេលកន្លង ក្នុងបំណងបង្កើតខ្លឹមសារច្នៃប្រឌិតថ្មី មានដូចជាអត្ថបទ សិល្បៈ និងកូដកម្មវិធីកុំព្យូទ័រជាដើម។

កាលពីថ្ងៃទី 04 តុលា 2023 ក្រុមហ៊ុនមេរបស់ Facebook ប្រកាសថា បានចាប់ផ្ដើមដាក់ដំណើរការបណ្ដាឧបករណ៍បញ្ញាសិប្បនិម្មិតច្នៃប្រឌិតដែលអាចបង្កើតខ្លឹមសារ មានជាអាទិ៍ រូបភាព និងបណ្ដាទម្រង់អត្ថបទ សម្រាប់ក្រុមអ្នកផ្សាយពាណិជ្ជកម្ម។

Meta បានចាប់ផ្ដើមដំណើរការសាកល្បងឧបករណ៍ទាំងនេះតាំងពីខែឧសភា 2023 និងផ្ដល់សិទ្ធិចូលប្រើប្រាស់ដល់ក្រុមអ្នកផ្សាយពាណិជ្ជកម្មមួយចំនួននៅក្នុងដំណាក់កាលសាកល្បងនេះ។

ឧបករណ៍ AI ទាំងនេះនឹងមានវត្តមានលើទំព័រគ្រប់គ្រងការផ្សាយពាណិជ្ជកម្មរបស់ Meta ហើយការបំពាក់ឧបករណ៍នេះនឹងធ្វើឡើងរួចរាល់នៅឆ្នាំ 2024។

ផលិតផល AI របស់ Meta រួមមាន រូបមន្តភាសា «Llama 2» និង chatbot AI ដែលមានឈ្មោះថា Meta AI ដែលអាចបង្កើតសំណេរជាឃ្លា ល្បះសម្រាប់ឆ្លើយតប និងរូបភាពប្រកបដោយភាពរស់រវើក៕

October 5, 2023

រកឃើញ «ភ្នែកអវកាស» ដ៏មហិមា កំពុងសម្លឹងមកផែនដី

តេឡេស្កុបវិទ្យុ ASKAP នៅអូស្ត្រាលីភាគខាងលិច ថតបានរូបភាពដ៏ស្រស់ស្អាតស្ដីពីរចនាសម្ព័ន្ធអវកាសមួយដែលមានរូបរាងដូចភ្នែកដ៏ធំ លាតសន្ធឹងរហូតដល់ 60,000 ឆ្នាំពន្លឺ។ យោងតាមទំព័រ SpacePlace របស់ណាសា មួយឆ្នាំពន្លឺមានចម្ងាយប្រមាណ 9 ទ្រីលាន (9,000,000,000,000) គីឡូម៉ែត្រ។

យោងតាមការប្រកាសនៅលើទំព័រ Monthly Notices of the Royal Astronomical Society រចនាសម្ព័ន្ធអវកាសចម្លែកនេះគឺជា កាឡាក់ស៊ីប្រភេទ Polar-ring (បកប្រែក្រៅផ្លូវការថា «កាឡាក់ស៊ីរង្វង់ចិញ្ចៀន») និងត្រូវបានដាក់ឈ្មោះឱ្យថា NCG 4632។

ខុសពីកាឡាក់ស៊ីដែលមានផែនដី Milky Way កាឡាក់ស៊ី NCG 4632 មានថាសពន្លឺមួយ និងពពកដ៏មហិមាព័ទ្ធជុំវិញស្នូលរបស់វា។ រង្វង់ពពកនេះភាគច្រើនគឺជាឧស្ម័នអ៊ីដ្រូសែន និងផ្អៀងប្រហែល 90 ឌឺក្រេ បើធៀបនឹងផ្ទៃរបស់កាឡាក់ស៊ី។

រចនាសម្ព័ន្ធដែលមានរូបរាងដូចភ្នែកនេះអាចមានផ្ទុកធូលី និងផ្កាយ។ រង្វង់របស់ NCG 4632 លាតសន្ធឹងរហូតដល់ 60,000 ឆ្នាំពន្លឺ។ រង្វង់ឧស្ម័ននៅខាងក្រៅ បូករួមនឹងថាសខាងក្នុងដែលនៅជុំវិញស្នូល NCG 4632 ហាក់ដូចជាកែវភ្នែកដ៏ធំមួយគ្រាប់កំពុងសម្លឹងមកកាន់ផែនដី។

ការស្វែងយល់អំពីកាឡាក់ស៊ីរង្វង់មូលដូច NCG 4632 នឹងរួមចំណែកជួយឱ្យអ្នកវិទ្យាសាស្ត្រយល់ដឹងអំពីអាថ៌កំបាំងដែលមនុស្សមិនទាន់ដឹង ទាក់ទងនឹងរបៀបកកើតរបស់បណ្ដាកាឡាក់ស៊ី និងការវិវត្តរបស់ពួកវានៅក្នុងចក្រវាល។ យោងតាម Science News មកដល់បច្ចុប្បន្ន អ្នកវិទ្យាសាស្ត្រនៅតែមិនទាន់អាចឆ្លើយនឹងសំណួរដែលថា «ហេតុអ្វីកាឡាក់ស៊ីមួយចំនួនមានរង្វង់មូល ខណៈកាឡាក់ស៊ីស្ទើរតែទាំងអស់បែរជាមិនរង្វង់បែបនេះទៅវិញ?»។

October 3, 2023

Tag: ឈ្មោះ