Tag: គួរ

ESA បង្ហាញ «សារអាថ៌កំបាំង» ពីទីតាំងឆ្ងាយពីផែនដីជិត 1,500 ឆ្នាំពន្លឺ
សញ្ញាសួរពណ៌ក្រហមដ៏ចម្លែក ត្រូវបានអវកាស «ផ្ដល់ជាសញ្ញា» មកកាន់មនុស្សនៅលើផែនដី តាមរយៈរូបភាពដ៏អាថ៌កំបាំងដែលតេឡេស្កុបអវកាស James Webb ទើបតែផ្ដិតយកបាន។
នោះគឺជាវត្ថុអវកាសដ៏ធំមួយដែលមានរូបរាងដូចទៅនឹងសញ្ញាសួរ ស្ថិតនៅខាងក្រោមផ្កាយក្មេងពីរដួងនៅក្នុងកញ្ចុំផ្កាយ Vela (Vela Supercluster)។ នេះបើតាមសេចក្ដីប្រកាសថ្មីរបស់ក្រុមអ្នកធ្វើការជាមួយតេឡេស្កុបអាម៉េរិក James Webb មកពីទីភ្នាក់ងារអវកាសអឺរ៉ុប (ESA)។
ដំបូងឡើយ ក្រុមរបស់ ESA នៅ James Webb សង្កេតមើលចំណុចលម្អិតរបស់ផ្កាយក្មេងមួយគូដែលមានឈ្មោះថា Herbig-Haro 46/47 ដែលកំពុងត្រូវឡោមព័ទ្ធដោយថាសវត្ថុធាតុដែលចិញ្ចឹមពួកវាឱ្យធំធាត់ក្នុងរយៈពេលរាប់លានឆ្នាំ។
នៅខាងក្រោមផ្កាយពីរដួងខាងលើ ពួកគេបានប្រទះឃើញអ្វីមួយដ៏អាថ៌កំបាំង និងគួរឱ្យភ្ញាក់ផ្អើល៖ សញ្ញាសួរមួយបង្ហាញខ្លួនដូចទៅនឹងមនុស្សលើភពដទៃកំពុងបញ្ជូនសញ្ញាដល់មនុស្សនៅលើផែនដី។
បច្ចុប្បន្ន អ្នកវិទ្យាសាស្ត្រមិនទាន់ដឹងច្បាស់ថា សញ្ញាសួរដ៏ធំមហិមានេះគឺជាអ្វីនៅឡើយ ប៉ុន្តែពណ៌ និងរូបរាងរបស់វា បាននាំឱ្យតារាវិទូនានាមានយោបល់មួយចំនួន។
នៅលើទំព័រ Space តំណាងរបស់តេឡេស្កុប James Webb យល់ថា វាអាចជាកាឡាក់ស៊ីដែលនៅសែនឆ្ងាយ ឬបណ្ដាកាឡាក់ស៊ីកំពុងប៉ះទង្គិចគ្នា នាំឱ្យមានរូបរាងខុសធម្មតា។ ចំណែកពណ៌ក្រហមរបស់សញ្ញាសួរនេះ កើតឡើងដោយសារវានៅឆ្ងាយ និងបន្តផ្លាស់ទីទៅឆ្ងាយ ព្រោះចក្រវាលកំពុងរីកមាឌ។
បើទោះសញ្ញាសួរនេះបង្ហាញខ្លួននៅក្បែរវត្ថុអវកាសដែលមានចម្ងាយ 1,470 ឆ្នាំពន្លឺពីផែនដី ប៉ុន្តែគម្លាតពិតរបស់សញ្ញាសួរនេះ អាចឡើងដល់រាប់ពាន់លានឆ្នាំ។
ចំណែកអ្នកវិទ្យាសាស្ត្រមកពីសាកលវិទ្យាល័យរដ្ឋ Illinois វិញ យល់ថា សញ្ញាសួរនេះគឺជាកាឡាក់ស៊ីពីរកំពុងច្របាច់បញ្ចូលគ្នា ក្នុងនោះចំណុចដូចផ្លែសន្ទូចនៅខាងលើគឺកើតឡើងដោយសារកាឡាក់ស៊ីធំមួយត្រូវបានកាច់ឱ្យកោង៕
August 2, 2023
ដាំឈូករ័ត្នជាងមួយលានដើមជូនភរិយាសម្រាប់ខួប 50 ឆ្នាំនៃថ្ងៃរៀបការ
លោក Lee Wilson ដាំផ្កាយឈូតរ័ត្នជាង 32 ហិកតា ដែលប្រហាក់ប្រហែលនឹង 1.2 លានដើម ដើម្បីជូនភរិយាសម្រាប់ខួប 50 ឆ្នាំនៃថ្ងៃអាពាហ៍ពិពាហ៍។
«ប្ដីប្រពន្ធខ្ញុំនឹងរម្លឹកខួរ 50 ឆ្នាំនៃថ្ងៃរៀបការនៅថ្ងៃទី 10 សីហា ហើយអ្នកដឹងថា ពេលរស់នៅជាមួយគូជីវិតរហូតដល់ 50 វាមានន័យយ៉ាងណាហើយមែនទេ? ខ្ញុំបានពិចារណាជាច្រើនអំពីរឿងនោះ។ ភរិយារបស់ខ្ញុំតែងចូលចិត្តផ្កាយឈូករ័ត្ន ហើយខ្ញុំគិតថា នេះគឺជាឆ្នាំដែលគួរដាំផ្កានេះ។ ខ្ញុំបានដាំផ្កាជាង 32 ហិកតាសម្រាប់គាត់» លោក Lee Wilson ប្រាប់ ABC News កាលពីថ្ងៃទី 01 សីហាដូច្នេះ។
«រឿងនោះធ្វើឱ្យខ្ញុំមានអារម្មណ៍ពិសេសខ្លាំងណាស់។ មិនអាចមានអំណាយអនុស្សាវរីយ៍ណាដែលល្អជាងចំការឈូករ័ត្នមួយនេះឡើយ» អ្នកស្រី Renee ភរិយារបស់លោក Wilson ថ្លែងដូច្នេះ។
លោក Wilson និងកូនប្រុស បានលួចដាំដើមឈូករ័ត្នតាំងពីខែឧសភា និងលាក់មិនឱ្យអ្នកស្រី Renee ដឹង។ ពេលនេះ ចំការឈូករ័ត្នបានក្លាយជាទន្លេផ្កាដ៏ធំធេង ស្ថិតនៅក្បែរផ្លូវល្បឿនលឿនលេខ 54 និងមានចម្ងាយពីផ្ទះរបស់ពួកគេនៅក្នុងទីក្រុង Pratt រដ្ឋ Kansas ប្រហែល 6.4 គីឡូម៉ែត្រ។
ស្វាមីភរិយាលោក Wilson បាននៅក្បែរគ្នាតាំងពីរៀននៅមធ្យមសិក្សា ហើយការណាត់ជួបគ្នាដំបូងរបស់ពួកគេគឺនៅពេលជិះស្គីជាមួយគ្នា។ លោក Wilson ឱ្យដឹងថា តាំងពីពេលនោះមក លោកជឿថា Renee នឹងក្លាយជាចំណែកមួយនៅក្នុងជីវិតរបស់គាត់៕
August 1, 2023
ព្យុះកំណាចនៅប្រទេសចិន បង្កទឹកជំនន់គួរឱ្យភ័យខ្លាច
ភាគខាងជើងប្រទេសចិនបានប្រកាសអាសន្នកម្រិតខ្ពស់បំផុត នៅពេលភ្លៀងធំបង្អោរចុះ ធ្វើឱ្យលិចលង់ទីក្រុងប៉េកាំង និងតំបន់ក្បែរខាង បណ្ដាលឱ្យរថយន្តរាប់សិបគ្រឿងត្រូវហូរទៅតាមខ្សែទឹក។
ជើងរថយន្តក្រុងរាប់រយនៅរដ្ឋធានីប៉េកាំង ប្រទេសចិន ថ្ងៃនេះត្រូវបានផ្អាកដំណើរការ បន្ទាប់ពីអាជ្ញាធរបានប្រកាសអាសន្នកម្រិតខ្ពស់បំផុត គ្រាដែលមានភ្លៀងធ្លាក់ខ្លាំង ដោយសារតែព្យុះ Doksuri បន្តវាយប្រហារលើប្រទេសនេះ។
អ្នកលេងបណ្ដាញសង្គមនៅប្រទេសចិន បានចែករំលែកបន្តគ្នានូវវីដេអូបង្ហាញពីគ្រោះធម្មជាតិមួយនេះ។ ក្នុងវីដេអូ គេឃើញដងផ្លូវក្នុងទីក្រុងក្លាយជាជ្រោះ គួរឱ្យភ័យខ្លាច។
ទឹកជំនន់ក៏បានហូរចូលចំណតរថភ្លើងអគ្គិសនីក្រោមដីនៅទីក្រុងប៉េកាំង។ ក្រុមហ៊ុនផ្លូវដែកបានឱ្យបុគ្គលិកយកអាហារទៅជូនអ្នកដំណើរដែលកំពុងជាប់នៅក្នុងចំណត។
មនុស្សជាង 31,000 នាក់ត្រូវបានឈ្លៀងទៅកាន់ទីសុវត្ថិភាព ការដ្ឋានសំណង់ប្រហែល 4,000 កន្លែងត្រូវបានផ្អាក អគារជិត 20,000 រងការខូចខាត ខណៈទីតាំងសម្រាប់ទេសចរណ៍សំខាន់ៗក្នុងទីក្រុងត្រូវបានបានបិតជាបណ្ដោះអាសន្ន។ នៅទីក្រុងប៉េកាំង មានមនុស្សពីរនាក់បានស្លាប់ដោយសារជំនន់ទឹកភ្លៀង។
អាកាសយានដ្ឋានពីរកន្លែងនៅរដ្ឋធានីប្រទេសចិនក៏បានលុបចោលជើងហោះហើរជាង 180 ជើង និងពន្យារពេលរាប់រយជើង កាលពីព្រឹកថ្ងៃទី 31 កក្កដានេះ។ គិតមកដល់ថ្ងៃនេះ ដងផ្លូវចំនួន 358 នៅប៉េកាំងបានទទួលរងឥទ្ធិពលពីព្យុះ Doksuri។
ព្យុះ Doksuri ធ្វើដំណើរឆ្លងកាត់ភាគខាងជើងប្រទេសចិនតាំងពីថ្ងៃទី 28 កក្កដា នាំឱ្យអាជ្ញាធរប្រកាសឱ្យប្រជាជនរាប់លាននាក់ស្ថិតនៅក្នុងផ្ទះ។ ព្យុះនេះបានក្លាយជាសម្ពាធទាបទៅហើយ ប៉ុន្តែអាជ្ញាធរប៉េកាំង និងខេត្តក្បែរខាង ថ្ងៃនេះនៅតែបន្តប្រកាសអាសន្នកម្រិតក្រហម។
យោងតាមអ្នកជំនាញ នេះអាចជាទឹកជំនន់អាក្រក់ជាងខែកក្កដាឆ្នាំ 2012 ទៅទៀត នៅពេលមានមនុស្ស 79 នាក់បានស្លាប់ និងរាប់ម៉ឺននាក់នៅទូទាំងប្រទេស ត្រូវឈ្លៀសទៅរកទីសុវត្ថិភាព៕
July 31, 2023
ឧបករណ៍ថត និងចាក់បង្ហាញសុបិនក្នុងទម្រង់វីដេអូ
សូមស្រមៃមើលថា តើវាអស្ចារ្យកម្រិតណា នៅពេលអ្នកអាចទស្សនាទិដ្ឋភាពក្នុងសុបិនរបស់អ្នកដូចទៅនឹងការទស្សនាខ្សែភាពយន្តនៅខាងក្រៅ។
ឧបករណ៍ថតសុបិនដែលអភិវឌ្ឍដោយអ្នកជំនាញជប៉ុន បើកផ្លូវឱ្យមានការស្វែងយល់លំអិតអំពីអាថ៌កំបាំងនៃសុបិន។ យោងទៅតាមការរីកចម្រើននៃវិស័យរូបភាពសរសៃប្រសាទ និងបញ្ញាសិប្បនិម្មិត ឧបករណ៍នេះផ្ដិតយកសកម្មភាពរបស់សរសៃប្រសាទ អមនឹងស្ថានភាពរវើរវាយនៅមុនពេលដេកលក់ ហើយបំប្លែងវាទៅជារូបភាព។
តាមរយៈការបំពាក់បច្ចេកទេសផ្ដិតយករូបភាពនៃប្រព័ន្ធប្រសាទក្នុងខួរក្បាល ជាមួយនឹងបណ្ដាបច្ចេកទេសនៃបច្ចេកវិទ្យាដ៏ទំនើប ក្រុមអ្នកវិទ្យាសាស្ត្រសម្រេចបានជំហានថ្មីដ៏គួរឱ្យចាប់អារម្មណ៍នៅក្នុងការបកស្រាយខ្លឹមសារនៃរូបភាពក្នុងសុបិន នាំឱ្យមានការបង្កើតបានឧបករណ៍ដែលអាចប្រែក្លាយសុបិនឱ្យទៅជារូបភាពវីដេអូ។
យោងតាមទំព័រ Hoaxorface ឧបករណ៍ផ្ដិតយករូបភាពសុបិន ប្រើប្រាស់រូបភាពពីការស្កែនដំណើរការនៃលំហូរឈាមក្នុងសរសៃឈាមខួរក្បាល (fMRI) ដើម្បីវាស់ស្ទង់សកម្មភាពរបស់ខួរក្បាល និងការកំណត់យកគំរូនានាដែលទាក់ទងនឹងខ្លឹមសារនៃសុបិនជាក់លាក់។
ក្រោយមក បច្ចេកទេសកុំព្យូទ័រនឹងបំប្លែងបណ្ដាគំរូខាងលើឱ្យទៅជារូបភាពដែលអាចមើលយល់ អនុញ្ញាតឱ្យបង្កើតបានជាវីដេអូដែលបង្ហាញឡើងវិញនូវអ្វីដែលកំពុងកើតឡើងក្នុងសុបិន។
បើទោះជាឧបករណ៍ថតសុបិនបានបង្ហាញអំពីការរីកចម្រើនដ៏ឆាប់រហ័សនៅក្នុងការបកស្រាយសុបិន ប៉ុន្តែបច្ចេកវិទ្យានេះកំពុងស្ថិតក្នុងដំណាក់កាលនៃការអភិវឌ្ឍដំបូងនៅឡើយ ហើយកំពុងត្រូវបានអភិវឌ្ឍបន្ត។
នៅពេលបច្ចេកវិទ្យានេះត្រូវបានអភិវឌ្ឍពេញលេញ វានឹងអាចក្លាយជាបដិវត្តន៍ដែលទាក់ទងនឹងការយល់ដឹងរបស់មនុស្សចំពោះអត្ថន័យពិតរបស់សុបិន និងដឹងច្បាស់អំពីភាពស្មុគស្មាញរបស់អារម្មណ៍នៃមនុស្សម្នាក់ៗ។ ក៏ប៉ុន្តែ បញ្ហាដែលទាក់ទងនឹងបច្ចេកវិទ្យានេះក៏អាចកើតឡើងដំណាលគ្នាផងដែរ ក្នុងនោះ មានដូចជា បញ្ហាសីលធម៌ជាដើម៕
July 31, 2023
ផ្កាយដុះកន្ទុយមានរាងដូច UFO កំពុងហោះសំដៅមកកាន់ផែនដី
ផ្កាយដុះកន្ទុយធំប៉ុនទីក្រុង និងមានឈ្មោះថា 12P/Pons – Brooks កំពុងតែហោះសំដៅមកកាន់តំបន់ក្បែរផែនដីបំផុត នៅលើគន្លងគោចរ 71 ឆ្នាំនៅក្នុងប្រព័ន្ធព្រះអាទិត្យ។
ផ្កាយដុះកន្ទុយមានភ្នំភ្លើងមួយដួង ដែលកំពុងហោះមកកាន់ផែនដី មានរូបរាងស្រដៀងនឹងថាសហោះ (UFO) បន្ទាប់ពីមានហេតុការណ៍ផ្ទុះ ធ្វើឱ្យវាភ្លឺដូចទៅនឹងកូនផ្កាយមួយដួង និងស្រោចកំអែភ្នំភ្លើងត្រជាក់ទៅក្នុងទីអវកាស។ នេះគឺជាលើកដំបូងហើយដែលអ្នកវិទ្យាសាស្ត្របានមើលឃើញផ្កាយដុះកន្ទុយនេះផ្ទុះកំអែភ្នំភ្លើង នៅក្នុងអំឡុងពេលជិត 70 ឆ្នាំមកនេះ។
12P/Pons – Brooks (12P) គឺជាផ្កាយដុះកន្ទុយមានភ្នំភ្លើងត្រជាក់។ ដូចទៅនឹងផ្កាយដុះកន្ទុយដទៃ 12P មានស្នូលរឹងដែលផ្ទុកសមាសធាតុទឹកកក ធូលី និងឧស្ម័ន ហើយជុំវិញវាគឺជាពពកឧស្ម័នដែលហៅថាក្បាលផ្កាយដុះកន្ទុយ។ ប៉ុន្តែ ខុសពីផ្កាយដុះកន្ទុយដទៃ ឧស្ម័ន និងទឹកកកនៅខាងក្នុងស្នូលរបស់ 12P មានបរិមាណច្រើនរហូតដល់អាចផ្ទុះយ៉ាងខ្លាំងក្លា បាញ់ចេញវត្ថុធាតុត្រជាក់ដែលហៅថា កំអែទឹកកក ពីស្នាមប្រេះនៅលើសម្បករបស់ស្នូល។
កាលពីថ្ងៃទី 20 កក្កដា តារាវិទូជាច្រើនរូបបានសង្កេតឃើញថា មានហេតុការណ៍ផ្ទុះធំមួយនៅលើផ្កាយដុះកន្ទុយ 12P ដែលធ្វើឱ្យវាភ្លឺជាងធម្មតារហូតដល់ប្រហែល 100 ដង។ ការភ្លឺឡើងនេះកើតឡើងនៅពេលសម្បករបស់ 12P ស្រាប់តែប៉ោងឡើងដោយសារតែឧស្ម័ន និងសមាសធាតុទឹកកកដែលកញ្ជ្រោលចេញពីខាងក្នុង នាំឱ្យចំណាំងប្លាតពន្លឺពីព្រះអាទិត្យនៅលើ 12P ជះមកកាន់ផែនដីច្រើនជាងមុន។
នៅថ្ងៃទី 26 កក្កដា សម្បករបស់ 12P រីកប៉ោងឡើងរហូតដល់មានអង្កត់ផ្ចិត 230,000 គីឡូម៉ែត្រ ធំជាង 7,000 ដង ធៀបនឹងស្នូលដែលមានអង្កត់ផ្ចិតតែ 30 គីឡូម៉ែត្រ។ ក៏ប៉ុន្តែ ប្រការដែលគួរចាប់អារម្មណ៍គឺថា សម្បកដែលប៉ោងឡើង ធ្វើឱ្យវាមានរូបរាងស្រដៀងនឹងស្នែង ឬថាសហោះ (UFO) ដែលមានកន្ទុយដូចនៅក្នុងខ្សែភាពយន្តបែបវិទ្យាសាស្ត្រ និងសង្គ្រាមអវកាស។
អ្នកវិទ្យាសាស្ត្រនិយាយថា 12P នឹងហោះមកដល់តំបន់ក្បែរព្រះអាទិត្យបំផុតនៅថ្ងៃទី 14 មេសាឆ្នាំ 2024 និងមកក្បែរផែនដីនៅថ្ងៃទី 02 មិថុនា 2024 ហើយអាចឱ្យមនុស្សមើលឃើញដោយភ្នែកទទេនៅពេលរាត្រី៕

July 29, 2023
យុគសម័យនៃស្មាតហ្វូនត្រកូល Reno Series នឹងមកដល់ឆាប់ៗនេះ….
ថ្មីៗនេះនៅតាមបណ្តាប្រទេសមួយចំនួនដូចជា ចិន ម៉ាឡេស៊ី ថៃ បានប្រកាសចេញលក់ជាផ្លូវការហើយនូវស្មាតហ្វូន OPPO ជំនាន់ចុងក្រោយ Reno10 Series 5G យ៉ាងជោគជ័យជាមួយសន្ទុះគាំទ្រខ្លាំងក្លាពីអ្នកប្រើប្រាស់ជុំវិញពិភពលោក។ អ្វីដែលចាប់អារម្មណ៍គឺស្មាតហ្វូននេះ នៅតែបន្តឈរឈ្មោះជា «អ្នកជំនាញ Portrait» ដើម្បីផ្តល់នូវបទពិសោធថតរូប និងវីដេអូល្អបំផុតប្រកបដោយបច្ចេកវិទ្យាច្នៃប្រឌិត ទំនើប និងឈានមុខគេក្នុងវិស័យស្មាតហ្វូន។
ចម្ងល់ជាច្រើនទៅលើ OPPO Reno10 Series តើពេលណានឹងបង្ហាញខ្លួននៅប្រទេសកម្ពុជា? គួររម្លឹកថាសម្រាប់ត្រកូល Reno Series បានបង្ហាញខ្លួននៅកម្ពុជា ជាមួយការច្នៃប្រឌិតអស់រយៈពេល 4 ឆ្នាំនិងចេញលក់នូវម៉ូដែលចំនួន 9 ជំនាន់មកហើយតាំងពី OPPO Reno រហូតដល់ OPPO Reno8 T Series ដែលបានចេញលក់កាលពីអំឡុងដើមឆ្នាំ 2023។ ដូចនេះតើនៅត្រីមាសទី 3 ក្នុងឆ្នាំ 2023 នេះ OPPO នឹងបង្ហាញតួឯកថ្មីក្នុងត្រកូល Reno នេះ?
ទន្ទឹមគ្នានេះបើយោងតាមផុសមួយនៅលើ Facebook ផេគរបស់ OPPO ប្រចាំប្រទេសកម្ពុជាថ្មីៗនេះ ត្រៀមបញ្ចេញនូវស្មាតហ្វូនបច្ចេកវិទ្យាឈានមុខ OPPO Reno10 Series ជំនាន់ថ្មីនេះហើយ ប៉ុន្តែសម្រាប់ព័ត៌មានជាក់លាក់នោះគឺនៅមិនទាន់ច្បាស់នៅឡើយទេ។
អ្វីដែលកាន់តែពិសេសនៅលើ Facebook ផេគ OPPO ក៏បើកឲ្យអតិថិជននិងហ្វេនៗចូលលេងហ្គេមងាយៗដោយគ្រាន់តែឆ្លើយនូវសំណួរ តើមួយណាជារូប Portrait? ដោយគ្រាន់តែជ្រើសរើសរូបមួយក្នុងចំណោមរូបទាំងបី រួចអនុវត្តតាមលក្ខខណ្ឌងាយៗដើម្បីមានឱកាសឈ្នះរង្វាន់កាសឥតខ្សែ Enco Buds2 ចំនួនមួយរង្វាន់ ។
ដូច្នេះ តើអ្នកត្រៀមខ្លួនរួចហើយឬនៅ? ដើម្បីស្វាគមន៍ OPPO Reno10 Series ដែលនឹងមកឆាប់ៗនេះ ដែលមានការ upgrade មុខងារពិសេសៗជាច្រើន និងមុខងារថតរូបស្អាតៗប្លែកៗយល់ចិត្តអ្នកចូលចិត្តថតរូបជាពិសេស។ សម្រាប់ព័ត៌មានលម្អិតអំពីស្មាតហ្វូននេះ សូមរង់ចាំតាមដាននៅលើផេគ Facebook ផ្លូវរបស់ក្រុមហ៊ុន OPPO ៕
July 27, 2023
ក្រុមបាល់ទាត់មួយរបស់អាស៊ីអាគ្នេយ៍ បង្កើតប្រវត្តិសាស្ត្រនៅ World Cup
ការដណ្ដើមបានជ័យជម្នះលើនូវែលសេឡង់ មិនត្រឹមតែជួយឱ្យក្រុមបាល់ទាត់នារីជម្រើសជាតិហ្វ៊ីលីពីនមានពិន្ទុជាលើកដំបូងនៅ World Cup នោះទេ តែក៏ជួយឱ្យក្រុមនេះគិតដល់ដំណាក់កាលឡើងដល់វគ្គជម្រុះផ្ទាល់ផងដែរ។
នៅក្នុងការប្រកួតជើងទីពីរនៃពូល A ដែលមានបួនក្រុមគឺ ហ្វ៊ីលីពីន ស្វ៊ីស នូវែលសេឡង់ និងន័រវែស នៅ World Cup នារី 2023 ដែលបានធ្វើឡើងកាលពីថ្ងៃទី 25 កក្កដា 2023 ហ្វ៊ីលីពីនទទួលបាន 3 ពិន្ទុ ឈរលំដាប់ទីបី បន្ទាប់ពីបានផ្ដួលនូវែលសេឡង់ 1-0។
ចំណែកន័រវែសឈរនៅបាតតារាង និងមានហានិភ័យត្រូវបានជម្រុះឆាប់ៗនេះ ព្រោះតែទទួលបាន 1 ពិន្ទុ ក្រោយពីបានទាត់ពីរប្រកួត។ រីឯស្វ៊ីសវិញ កំពុងតែត្រៀមដណ្ដើមសំបុត្រឡើងទៅវគ្គបន្ទាប់ នៅពេលមាន 4 ពិន្ទុក្នុងដៃ។
ការប្រកួតនៅពូល A នឹងធ្វើឡើងប្រកបដោយភាពតានតឹងនៅជើងចុងក្រោយ ពេលដែលក្រុមទាំង 4 សុទ្ធតែនៅមានឱកាស។ សម្រាប់ក្រុមហ្វ៊ីលីពីន ក្រោយជ័យជម្នះដំបូងនៅ World Cup ក្រុមនេះថែមទាំងអាចបង្កើតបានប្រវត្តិសាស្ត្រដ៏គួរឱ្យរំភើប ដោយការក្លាយជាក្រុមដំបូងគេរបស់អាស៊ីអាគ្នេយ៍ដែលឆ្លងផុតវគ្គចែកពូល។
បើសិនធ្វើបានដូច្នេះ ក្រុមកីឡាការិនីបាល់ទាត់ហ្វ៊ីលីពីន នឹងបានទទួលប្រាក់រង្វាន់យ៉ាងច្រើន។ ការកំណត់របស់ FIFA បានចែងថា បណ្ដាក្រុមបាល់ទាត់ដែលចូលរួមប្រកួតនឹងបានទទួលប្រាក់រង្វាន់ 1.56 លានដុល្លារអាម៉េរិក ខណៈដែលកីឡាការិនីម្នាក់ៗនឹងបានទទួលប្រាក់រង្វាន់ 30,000 ដុល្លារអាម៉េរិកបន្ថែមទៀត។
ខ្ទង់ប្រាក់រង្វាន់ខាងលើនឹងកើនឡើង នៅពេលឡើងដល់ដំណាក់កាលខ្ពស់ជាងនេះ។ សម្រាប់ហ្វ៊ីលីពីន បើសិនបានឡើងដល់វគ្គ 1/8 ក្រុមនេះនឹងបានទទួលប្រាក់រង្វាន់ 1.87 លានដុល្លារអាម៉េរិក គ្រាដែលកីឡាការិនីម្នាក់ៗនឹងបានទទួល 60,000 ដុល្លារ ខ្ពស់ជាងពីរដងធៀបនឹងវគ្គចែកពូល។ ប្រាក់រង្វាន់នេះកើនឡើងថែមទៀត បើសិនពួកគេបានឡើងដល់វគ្គខ្ពស់ជាងនេះ។
FIFA បានបង្កើនប្រាក់រង្វាន់របស់ World Cup នារីឆ្នាំ 2023 ឡើងដល់ 110 លានដុល្លារអាម៉េរិក ខ្ពស់ជាង 3 ដង បើធៀបនឹងឆ្នាំ 2019 ហើយស្មើនឹង 1/3 នៃ World Cup 2022 នៅកាតា។
បើសិនជាបានឈ្នះន័រវែស ហ្វ៊ីលីពីននឹងបានឡើងទៅវគ្គបន្ទាប់។ ក្នុងករណីស្មើ តំណាងរបស់អាស៊ីអាគ្នេយ៍មួយនេះនឹងមាន 4 ពិន្ទុ និងគ្រាប់បាល់ចំណេញស្មើនឹង -1។ ពេលនោះ ហ្វ៊ីលីពីននឹងត្រូវរង់ចាំលទ្ធផលនៃការប្រកួតរវាងក្រុមស្វ៊ីស និងនូវែលសេឡង់។
កាលពីអតីតកាល ក្រុមនារីថៃគឺជាក្រុមដំបូងគេរបស់អាស៊ីអាគ្នេយ៍ដែលបានឡើងទៅប្រកួតនៅ World Cup ហើយក៏បានឈ្នះមួយប្រកួត។ ក្រុមនេះបានឈ្នះកូតឌឺវ័រក្នុងលទ្ធផល 3-2 នៅ World Cup 2015។ ក៏ប៉ុន្តែ ក្រុមនារីថៃពេលនោះត្រូវឈរលំដាប់ទីបីនៅក្នុងពូលរបស់ខ្លួន និងមិនអាចឡើងទៅវគ្គជម្រុះផ្ទាល់៕

July 26, 2023
អាហ្វ្រិកខាងត្បូងថា «ចាប់លោក ពូទីន គឺស្មើនឹងប្រកាសសង្គ្រាមនឹងរុស្ស៊ី»
ប្រធានាធិបតី Ramaphosa និយាយថា អាហ្វ្រិកខាងត្បូងចាប់ខ្លួនលោក ពូទីន នឹងមានន័យថា ប្រកាសសង្គ្រាមជាមួយនឹងប្រទេសរុស្ស៊ី បន្ទាប់ពីបក្សប្រឆាំងចង់ឱ្យ រដ្ឋធានីព្រីតូរីយ៉ា អនុវត្តបទបញ្ជាតាមចាប់ខ្លួនរបស់តុលាការ ICC។
«រុស្ស៊ីបានប្រកាសហើយថា ការចាប់ខ្លួនប្រធានាធិបតី វ្ល៉ាឌីមៀ ពូទីន គឺស្មើនឹងការប្រកាសសង្គ្រាម» ប្រធានាធិបតីអាហ្វ្រិកខាងត្បូង Cyril Ramaphosa សរសេរលិខិតផ្ញើទៅកាន់តុលាការកំពូល Gauteng ដែលមានយុត្តាធិការលើ ព្រីតូរីយ៉ា ដូច្នេះ។
ការលើកឡើងរបស់ប្រធានាធិបតីអាហ្វ្រិកខាងត្បូងខាងលើ ត្រូវបានធ្វើឡើងបន្ទាប់ពីសម្ព័ន្ធភាពប្រជាធិបតេយ្យ (DA) របស់ក្រុមប្រឆាំង ចង់ឱ្យរដ្ឋធានីព្រីតូរីយ៉ា គោរពតាមបទបញ្ជាតាមចាប់ខ្លួនប្រធានាធិបតី ពូទីន ពីតុលាការព្រហ្មទណ្ឌអន្តរជាតិ (ICC)។ លោក Ramaphosa ពន្យល់ថា ការបង្កសង្គ្រាមជាមួយនឹងរុស្ស៊ី គឺមិនសមស្របនឹងរដ្ឋធម្មនុញ្ញរបស់អាហ្វ្រិកខាងត្បូង ហើយផ្ទុយពីការទទួលខុសត្រូវក្នុងការការពារជាតិរបស់រដ្ឋាភិបាល។
ឆ្លើយតបនឹងប្រធានាធិបតិ Ramaphosa មេដឹកនាំរបស់ DA លោក John Steenhuisen យល់ថា ការបកស្រាយរបស់លោក Ramaphosa គឺគួរឱ្យអស់សំណើច និងរាក់កំភែល ហើយថា «…ប្រការសំខាន់គឺត្រូវរក្សាកាតព្វកិច្ចអន្តរជាតិប្រកបដោយតម្លាភាព»។
អាហ្វ្រិកខាងត្បូង កំពុងតែមានការរារែក ចាប់តាំងពី ICC ចេញបទបញ្ជាតាមចាប់ខ្លួនប្រធានាធិបតី ពូទីន កាលពីខែមីនា ក្រោមបទចោទថា «បានផ្លាស់ទីកុមារអ៊ុយក្រែនដោយខុសច្បាប់»។ យោងតាមគោលការណ៍របស់តុលាការ ICC សមាជិកចំនួន 123 ប្រទេសរបស់តុលាការនេះ ក្នុងនោះមានអាហ្វ្រិកខាងត្បូង មានកាតព្វកិច្ចចាប់ខ្លួនមេដឹកនាំរុស្ស៊ី និងបញ្ជូនទៅកាន់ហូឡង់ ដើម្បីកាត់ទោស បើសិនជាលោក ពូទីន ឈានជើងចូលដល់ទឹកដីរបស់ពួកគេ។
ចំណែកភាគីខាងរុស្ស៊ីវិញ និយាយថា បទបញ្ជាតាមចាប់ខ្លួនរបស់ ICC គឺជារឿងគ្មានន័យ។ រុស្ស៊ីធ្លាប់បានចូលរួមជាសមាជិករបស់ ICC ប៉ុន្តែបានដកខ្លួន និងលែងទទួលស្គាល់ស្ថាប័ននេះ។
អាហ្វ្រិកខាងត្បូងកំពុងតែធ្វើជាប្រធាន BRICS ដែលជាក្រុមប្រទេសមានសេដ្ឋកិច្ចទើបតែលេចធ្លោ ដោយមានសមាជិកចំនួនប្រាំប្រទេស រួមមានទាំង ចិន រុស្ស៊ី ឥណ្ឌា និងប្រេស៊ីល។ អាហ្វ្រិកខាងត្បូងគ្រោងនឹងប្រារព្ធកិច្ចប្រជុំកំពូល BRICS លើកទី 15 ចាប់ពីថ្ងៃទី 22 ដល់ 24 សីហាខាងមុខ។
ដើម្បីដោះស្រាយបញ្ហាទាក់ទិននឹងតុលាការ ICC អាហ្វ្រិកខាងត្បូងបានស្នើឱ្យរុស្ស៊ី អនុញ្ញាតឱ្យរដ្ឋមន្ត្រីការបរទេស Sergei Lavrov មកចូលរួមកិច្ចប្រជុំជំនួសលោក ពូទីន ប៉ុន្តែ ទីក្រុងមូស្គូ បានបដិសេធសំណើនេះ៕
July 19, 2023
អបអរសាទរខួប១ឆ្នាំ នៃការបើកដំណើរការជាផ្លូវការរោងចក្រដំឡើងរថយន្ត Ford និងពិធីប្រគល់-ទទួលអំណោយរថយន្តគិលានសង្គ្រោះ Ambulance ជូនដល់កាកបាទក្រហមកម្ពុជា សាខាខេត្តពោធិ៍សាត់
[ភ្នំពេញ – ថ្ងៃទី ១៣ ខែកក្កដា ឆ្នាំ២០២៣] ក្រុមហ៊ុន RMA (Cambodia) PLC ដែលជាក្រុមហ៊ុននាំចូល និងចែកចាយផ្តាច់មុខរថយន្ត Ford ក្នុងទីផ្សារប្រទេសកម្ពុជាបានប្រារព្ធពិធីប្រគល់-ទទួលអំណោយរថយន្តគិលានសង្គ្រោះចំនួន ២ គ្រឿង ជូនទៅដល់កាកបាទក្រហមកម្ពុជា សាខាខេត្តពោធិ៍សាត់ ដែលកម្មវិធីនេះត្រូវបានប្រារព្ធឡើង ក្រោមអធិបតីភាពរបស់ ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងអគ្គនាយកអគ្គីសនីកម្ពុជា និងលោកអភិបាលនៃគណៈអភិបាលខេត្តពោធិ៍សាត់ ព្រមទាំងថ្នាក់ដឹកនាំក្រុមហ៊ុន Ford Motor Company ថ្នាក់ដឹកនាំក្រុមហ៊ុន RMA Group និងក្រុមហ៊ុន RMA (Cambodia) PLC រួមទាំងភ្ញៀវកិត្តិយសជាតិ និងអន្តរជាតិប្រមាណជាង ២០០ នាក់។ កម្មវិធីនេះបានប្រារព្ធឡើងនៅក្នុងបរិវេនរោងចក្រដំឡើងរថយន្ត Ford ក្នុងភូមិសារវ័ន ឃុំស្នាអន្សារ ស្រុកក្រគរ ខេត្តពោធិ៍សាត់ នៅថ្ងៃទី ១១ ខែកក្កដា ឆ្នាំ ២០២៣ ។
ក្នុងឱកាសនៃពីធីអបអរសាទរខួប១ឆ្នាំ នៃការបើកដំណើរការជាផ្លូវការរោងចក្រដំឡើងរថយន្ត Ford និងពិធីប្រគល់-ទទួលអំណោយរថយន្តគិលានសង្គ្រោះ Ambulance ចំនួន ២ គ្រឿង ជូនដល់កាកបាទក្រហមកម្ពុជា សាខាខេត្តពោធិ៍សាត់ លោក ងន សាំង អគ្គនាយកក្រុមហ៊ុន RMA (Cambodia) PLC បានមានប្រសាសន៍ថា៖ “ យើងខ្ញុំមានមោទភាពជាពន់ពេកដែលទទួលបានសេចក្ដីទុកចិត្តពីក្រុមហ៊ុន FORD MOTOR COMPANY ក្នុងការដំឡើងរថយន្ត FORD RANGER និង FORD EVEREST ជំនាន់ថ្មីនៅ លើទឹកដីនៃព្រះរាជាណាចក្រកម្ពុជា ស្របតាមស្តង់ដាររបស់ក្រុមហ៊ុន FORD ។ យើងខ្ញុំជឿជាក់ថា ការបោះជំហានវិនិយោគក្នុងវិស័យយានយន្តរបស់ក្រុមហ៊ុនយើងខ្ញុំ ចូលរួមចំណែកយ៉ាងសំខាន់ ក្នុងការអភិវឌ្ឍវិស័យឧសហ្សាកម្មយានយន្តនៅកម្ពុជា និងជាសក្ខីភាពនៃទំនុកចិត្តលើកិច្ចខិតខំប្រឹង ប្រែងរបស់រដ្ឋាភិបាលក្នុងការធ្វើឱ្យប្រសើរឡើង នូវបរិយាកាសធុរកិច្ច និងវិនិយោគ។ វត្តមានរបស់ រោងចក្រយើងខ្ញុំក៏បានចូលរួមចំណែកការកាត់បន្ថយការធ្វើចំណាកស្រុកទៅធ្វើការនៅក្រៅប្រទេស របស់ប្រជាពលរដ្ឋ និងលើកកម្ពស់សេដ្ឋកិច្ចក្នុងតំបន់តាមរយៈការជំរុញសន្ទុះអាជីវកម្មសហគ្រាស ធុនតូច និងមធ្យម ការបង្កើតឱកាសការងារដោយផ្ទាល់និងដោយប្រយោល ក៏ដូចជាការអភិវឌ្ឍន៍ ធនធានមនុស្សនៅក្នុងទឹកដី ខេត្តពោធិ៍សាត់នេះផ្ទាល់ផងដែរ។ ”
មិនតែប៉ុណ្ណោះ លោកក៏បានបន្ថែមទៀតថា៖ “ ក្រុមហ៊ុនយើងខ្ញុំនឹងបន្តប្តេជ្ញាគាំទ្រ និង ជំរុញវិស័យឧស្សាហកម្មយានយន្តនៅកម្ពុជា ដើម្បីឱ្យកម្ពុជា ផ្លាស់ប្ដូរមុខមាត់ថ្មី ពីប្រទេសដែលដំឡើងរថយន្ត ទៅជាប្រទេសដែលផលិតរថយន្ត ក្នុងពេលអនាគត។ ក្រុមហ៊ុននឹងពង្រីកការវិនិយោគគម្រោងដំឡើងរថយន្ត Ford ដោយបង្កើនការនាំចូលនៃចំនួន គ្រឿងបង្គុំច្រើនជាងមុន បង្កើនចំនួនការងារក្នុងស្រុក ជំរុញការប្រើប្រាស់ធាតុផ្សំក្នុងស្រុក និងបង្កើន ដើមទុនវិនិយោគបន្ថែមទៀត។ យើងខ្ញុំជឿជាក់ថា ការវិនិយោគនេះនឹងបន្តផ្តល់អត្ថប្រយោជន៍ជាច្រើនបន្ថែមទៀតជូនប្រទេសកម្ពុជា ជាពិសេសការអភិវឌ្ឍន៍ខ្សែសង្វាក់ផ្គត់ផ្គង់ និងធ្វើឱ្យប្រសើរ ឡើងនូវខ្សែចង្វាក់ដែលគាំទ្រគោលនយោបាយអភិវឌ្ឍវិស័យឧស្សាហកម្មរបស់រាជរដ្ឋាភិបាលកម្ពុជា។ ការវិនិយោគនេះ នឹងនាំមកនូវផលិតផលថ្មី បច្ចេកវិទ្យាថ្មី ដើម្បីផ្គត់ ផ្គង់តម្រូវការប្រើប្រាស់រថយន្តថ្មីក្នុងស្រុក ជាមួយនឹងមោទភាពផលិតកម្មក្នុងស្រុក រោងចក្រ ដំឡើងរថយន្ត Ford នឹងបន្តទាក់ទាញវិនិយោគិនផ្សេងៗជាច្រើនទៀតមកវិនិយោគនៅកម្ពុជា ជា ពិសេស អ្នកវិនិយោគដែល ពាក់ព័ន្ធនឹងការផលិត និងដំឡើងរថយន្ត ដូចជា៖ សំបកកង់ កង់ឡាន ខ្សែភ្លើងឡាន អាគុយឡាន និងអាជីវកម្មផ្សេងៗទៀត។”

ឆ្លៀតក្នុងឱកាសនេះដែរ លោកស្រី Kay Hart ប្រធានគ្រប់គ្រងទីផ្សារអន្តរជាតិនៃក្រុមហ៊ុន Ford Motor Company បានមានប្រសាសន៍ថា៖ “ រថយន្តគិលានសង្គ្រោះ (The Next-Generation Ford Ranger-Converted Ambulances) នេះ បានបំពាក់មកជាមួយនូវបច្ចេកវិទ្យា និងប្រព័ន្ធសុវត្ថិភាពទំនើបជំនាន់ចុងក្រោយដែលធ្វើឱ្យរថយន្តនេះក្លាយជារថយន្តមួយដែលមានលក្ខណៈ ធន់ រឹងមាំ និងមានសមត្ថភាពក្នុងការចល័ត និងដឹកជញ្ជូនអ្នកជំងឺដោយសុវត្ថិភាព។ ”
លោកស្រីក៏បានបន្តទៀតថា៖ “ រថយន្តគិលានសង្គ្រោះ (The Next-Generation Ford Ranger-Converted Ambulances) នឹងចូលរួមចំណែកយ៉ាងសំខាន់សម្រាប់កាកបាទក្រហមកម្ពុជាក្នុងខេត្តពោធិ៍សាត់ ក្នុងការគាំពារ សង្គ្រោះបន្ទាន់ និងជាជំនួយការដ៏សំខាន់ក្នុងការជួយដល់សកម្មភាពសប្បុរសធម៌ផ្សេងៗដល់ប្រជាពលរដ្ឋ និងអ្នកជំងឺដើម្បីទទួលបាននូវសេវាកម្មសង្គ្រោះបន្ទាន់មួយដែលមាន គុណភាព សុវត្ថិភាព និងប្រសិទ្ធភាព។ ”
ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី និងអគ្គនាយកអគ្គីសនីកម្ពុជា បានមានប្រសាសន៍ថា៖ “ ការសាងសង់រោងចក្រដំឡើងរថយន្ត Ford ក្នុងខេត្តពោធិ៍សាត់ គឺជាសក្ខីភាពមួយដែលបានបង្ហាញពីទំនុកចិត្តរបស់ក្រុមហ៊ុន RMA Cambodia មកលើរាជរដ្ឋាភិបាលកម្ពុជា ហើយការផ្តល់ជូននូវរថយន្តគិលានសង្គ្រោះ ២ គ្រឿងក្នុងថ្ងៃនេះនឹងជាការចូលរួមចំណែកដ៏សំខាន់មួយក្នុងការពង្រឹងសមត្ថភាពមូលដ្ឋានសុខាភិបាលបន្ថែមទៀត ក្នុងការឆ្លើយតបទៅនឹងតម្រូវការសេវាថែទាំសុខភាពអោយកាន់តែមានគុណភាព ប្រសិទ្ធភាព និងសុវត្ថិភាព។ ភាពជាដៃគូរវាង RMA Cambodia និងវិទ្យាស្ថានបច្ចេកទេសក្នុងស្រុករបស់យើង បានដើរតួរនាទីយ៉ាងសំខាន់ក្នុងការលើកកម្ពស់ធនធានមនុស្ស តាមរយៈការបង្កើតកម្មវិធីបណ្តុះបណ្តាលដោយផ្ទាល់ពីអ្នកជំនាញដែលគ្រឹះមួយដ៏សំខាន់សម្រាប់យុវជន ក៏ដូចជាយុវនារីក្នុងការត្រៀមខ្លួនរួចជាស្រេចសម្រាប់ភាពជោគជ័យនាពេលខាងមុខ។ ”
គួរបញ្ជាក់ផងដែរថា ក្រុមហ៊ុន RMA (CAMBODIA) PLC ជាក្រុមហ៊ុនដំបូងគេបំផុត ដែលទទួលបានការទទួលស្គាល់ពី វិទ្យាស្ថានស្ដង់ដារកម្ពុជា នៃ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្នុងនាមជាអ្នក អនុវត្តស្តង់ដារសុវត្ថិភាពយានយន្ត និងស្តង់ដារសុវត្ថិភាពគ្រឿងបង្គុំយានយន្តបានខ្ពស់បំផុត។ ក្នុងឆ្នាំ ២០២០ ក្រុមហ៊ុន RMA (CAMBODIA) PLC បានចុះបញ្ជីលក់មូលបត្រ បំណុលចំនួន ៨០ ពាន់លានរៀល ដែលស្មើនឹង ២០ លានដុល្លារអាមេរិក ក្នុងផ្សារមូលបត្រកម្ពុជា ហើយក្លាយជាក្រុមហ៊ុនមិនមែនស្ថាប័នហិរញ្ញវត្ថុដែលបានបោះផ្សាយមូលបត្របំណុលដំបូងគេបង្អស់នៅប្រទេសកម្ពុជា។ ការបោះផ្សាយមូលបត្របំណុលនេះ បង្ហាញពីកិច្ចខិតខំប្រឹងប្រែងរបស់ក្រុមហ៊ុនយើងខ្ញុំក្នុងការលើកកម្ពស់ទីផ្សារមូលបត្រកម្ពុជា និងចូលរួមចំណែកអភិវឌ្ឍទីផ្សារហិរញ្ញវត្ថុនៅប្រទេសកម្ពុជា។
តាមរយៈកំណើនសេដ្ឋកិច្ច និងកំរិត GDP របស់ប្រជាជនកម្ពុជាកើនឡើងខ្ពស់ជាបន្តបន្ទាប់ បានធ្វើឱ្យប្រជាជនកម្ពុជាងាកមកប្រើប្រាស់រថយន្តថ្មីមានការកើនឡើងជាលំដាប់។ ក្នុងនោះការប្រើប្រាស់ រថយន្តថ្មីម៉ាក FORD មានកំណើនកាន់តែច្រើនឡើង និងបានក្លាយជាជម្រើសឈានមុខរបស់អតិថិជននៅកម្ពុជា។ ដូច្នេះ ក្រុមហ៊ុនបានសម្រេចចិត្តបង្កើតរោងចក្រដំឡើងរថយន្ត FORD ដែលទទួលបានសិទ្ធិពេញលេញក្នុងការផ្គុំ និងដំឡើងរថយន្តពីក្រុមហ៊ុនម្ចាស់ដើម FORD MOTOR COMPANY។ រោងចក្រនេះ ត្រូវបានសាងសង់ឡើងនៅលើផ្ទៃដីសរុបប្រមាណជាង ៥ ហិកតា ស្ថិតក្នុងភូមិសារវ័ន ឃុំស្នាអន្សា ស្រុកក្រគរ ខេត្តពោធិ៍សាត់ ជាមួយនឹងទុនវិនិយោគចំនួន ២១ លានដុល្លារសហរដ្ឋអាមេរិក ដែលអាចបង្កើតការងារជំនាញបានជាង ៥០០ កន្លែង និងមានសមត្ថភាពអាចដំឡើងរថយន្តបានចំនួនប្រមាណ ៩,០០០ គ្រឿងក្នុងមួយឆ្នាំ។
រហូតមកដល់ពេលនេះ ក្រុមហ៊ុនបានដំឡើងរថយន្ត Ford Ranger Wildtrak និងរថយន្ត Ford Everest បានចំនួន ៣,០០០ គ្រឿងដើម្បីបម្រើតម្រូវការទីផ្សារក្នុងស្រុក។ ក្រុមហ៊ុនបន្តសហការ ជាមួយនឹងវិទ្យាស្ថានពហុបច្ចេកទេសខេត្តពោធិ៍សាត់ក្នុងការបណ្តុះបណ្តាលអភិវឌ្ឍជំនាញបច្ចេកទេសដល់បុគ្គលិកក្រុមហ៊ុនដើម្បីធានាឱ្យបាននូវធនធានមនុស្សប្រកបដោយគុណភាព។ ថ្មីៗនេះ ក្រុមហ៊ុនបានបញ្ជូនបុគ្គលិកទៅប្រទេស Australia ដើម្បីសិក្សាអំពីបច្ចេកវិទ្យាដំឡើងរថយន្ត ក្នុងគោលបំណងបង្កើនកម្រិតបច្ចេកទេសបុគ្គលិកក៏ដូចជាពាំនាំចំណេះដឹងថ្មី និង បច្ចេកវិទ្យាថ្មីមកប្រទេសកម្ពុជា។ ដើម្បីបន្តចូលរួមលើកកម្ពស់វិស័យយានយន្ត ក្រុមហ៊ុននឹងបង្កើតមជ្ឈមណ្ឌលអប់រំបណ្ដុះបណ្ដាលបច្ចេកទេស និងវិជ្ជាជីវៈដើម្បីផ្ដល់ឱកាសឱ្យប្រជាពលរដ្ឋកម្ពុជាទទួលបានការបណ្តុះបណ្តាលជំនាញបច្ចេកទេសប្រកបដោយគុណភាពដើម្បីចូលរួមចំណែកអភិវឌ្ឍធនធាន មនុស្សនៅកម្ពុជាស្របតាមគោលនយោបាយអភិវឌ្ឍវិស័យឧស្សាហកម្មរបស់រាជរដ្ឋាភិបាលកម្ពុជា។

July 14, 2023
បេក្ខភាពនាយករដ្ឋមន្ត្រីថៃ រងការចោទប្រកាន់ថា «មានផែនការផ្ដួលរំលំរបបរាជានិយម»
តុលាការធម្មនុញ្ញថៃបានយល់ព្រមចាត់ការរឿងក្ដីដែលចោទប្រកាន់បេក្ខភាពនាយករដ្ឋមន្ត្រីមកពីបក្ស Move Forward លោក Pita ថា មានផែនការផ្ដួលរំលំរបបរាជាធិបតេយ្យនៅប្រទេសនេះ។
មេធាវី Theerayuth Suwankaesorn បានដាក់ពាក្យបណ្ដឹងប្រឆាំងនឹងបេក្ខភាពនាយករដ្ឋមន្ត្រី Pita Limjaroenrat ដោយចោទថា លោក និងបក្ស Move Forward ដែលបានសន្យាថានឹងកែប្រែច្បាប់ប្រមាថព្រះមហាក្សត្រ គឺមានន័យស្មើនឹង «ការព្យាយាមផ្ដួលរំលំរបបរាជាធិបតេយ្យ»។ មេធាវីរូបនេះចង់ឱ្យតុលាការរំសាយបក្ស Move Forward។
តុលាការធម្មនុញ្ញថៃ កាលពីថ្ងៃទី 12 កក្កដា ប្រកាសថា បានទទួលចាត់ការរឿងក្ដីនេះ។ តុលាការនេះទុកពេល 15 ថ្ងៃ ដើម្បីឱ្យបក្ស Move Forward និងលោក Pita ឆ្លើយតប និងការពារខ្លួននៅចំពោះមុខពាក្យបណ្ដឹងរបស់ Suwankaesorn។
នៅក្នុងពេលឃោសនារកសំឡេងឆ្នោត បក្ស Move Forward បានសន្យាថា នឹងធ្វើវិសោធនកម្មមាត្រា 112 នៃ ក្រមព្រហ្មទណ្ឌរបស់ប្រទេសថៃ។ ច្បាប់នេះបានចែងថា អ្នកទាំងឡាយណាដែលបំពានច្បាប់ប្រមាថព្រះមហាក្សត្រ ឬរាជវង្សានុវង្ស នឹងត្រូវបានកាត់ទោសឱ្យជាប់ពន្ធនាគារពី 3 ទៅ 15 ឆ្នាំ។
បក្ស Move Forward បានបកស្រាយថា ពួកគេមិនស្នើឱ្យលុបចោលច្បាប់នេះទាំងស្រុង ប៉ុន្តែចង់កំណត់ឱ្យបានច្បាស់លាស់ថា មាត្រាច្បាប់នេះគួរតែត្រូវបានអនុវត្តនៅពេលរាជវង្សថៃធ្វើការតវ៉ា ដើម្បីចៀសវាងការប្រើអំណាចតាមអំពើចិត្ត។
បេក្ខភាពនាយករដ្ឋមន្ត្រីថៃ លោក Pita Limjaroenrat
ប្រកាសរបស់តុលាការធម្មនុញ្ញថៃ ត្រូវបានលើកឡើងក្នុងថ្ងៃដែលគណៈកម្មការរៀបចំការបោះឆ្នោតថៃ (EC) ស្នើឱ្យមានការព្យួរអភ័យឯកសិទ្ធិសមាជិកសភារបស់លោក Pita ក្នុងគ្រាដែលតុលាការពិនិត្យពាក្យបណ្ដឹងដែលថា លោក Pita កាន់កាប់ភាគហ៊ុននៅក្នុងក្រុមហ៊ុនបណ្ដាញផ្សព្វផ្សាយ iTV ដែលផ្ទុយពីច្បាប់។
ក្នុងករណីមេដឹកនាំបក្ស Move Forward បានឆ្លងកាត់ច្រើនដំណាក់កាលនៅតែមិនបានក្លាយជានាយករដ្ឋមន្ត្រី បក្ស Pheu Thai ដែលជាបក្សធំលំដាប់ទីពីរក្នុងសម្ព័ន្ធភាព 8 បក្ស ត្រូវបានគេជឿថា នឹងលើកតំណាងមួយរូបរបស់ខ្លួនឱ្យធ្វើជាបេក្ខភាព៕
July 13, 2023