ខភាព - La Reine Media

ក្រុមហ៊ុនអាម៉េរិកជិតសាកល្បង «បំពាក់ឈីបកុំព្យូទ័រក្នុងខួរក្បាលមនុស្ស»

ក្រុមហ៊ុនបច្ចេកវិទ្យាប្រព័ន្ធប្រសាទ Neuralink ដែលត្រូវបានបង្កើតឡើងដោយមហាសេដ្ឋីអាម៉េរិក Elon Musk កំពុងអភិវឌ្ឍកូនឈីប «អ៊ីនធើហ្វេសខួរក្បាល-កុំព្យូទ័រ» សម្រាប់ដាំក្នុងខួរក្បាលមនុស្ស។

កាលពីខែឧសភា 2023 រដ្ឋបាលចំណីអាហារ និងឱសថអាម៉េរិក (FDA) បានយល់ព្រមផ្ដល់សិទ្ធិឱ្យ Neuralink ធ្វើការសាកល្បងវះកាត់ដាំកូនឈីប «អ៊ីនធើហ្វេសខួរក្បាល-កុំព្យូទ័រ» (brain-computer interface) ក្នុងខួរក្បាលមនុស្សដំបូងគេបង្អស់។

កាលពីថ្ងៃទី 19 កញ្ញា 2023 ក្រុមហ៊ុន Neuralink ប្រកាសថា បានទទួលការអនុញ្ញាតពីក្រុមប្រឹក្សាវាយតម្លៃឯករាជមួយដើម្បីចាប់ផ្ដើមធ្វើតេស្តឈីបខួរក្បាលដំបូងសម្រាប់ក្រុមអ្នកជំងឺដែលស្លាប់អវយវៈ។ ក្រុមហ៊ុននេះក៏ឱ្យដឹងថា បានចាប់ផ្ដើមស្វែងរកអ្នកស្ម័គ្រចិត្តសម្រាប់ការពិសោធនេះហើយ។

អ្នកជំងឺស្ម័គ្រចិត្តដែលចូលរួមការពិសោធនេះនឹងត្រូវបានរ៉ូបូតវះកាត់ដាំកូនឈីបកុំព្យូទ័រទៅក្នុងតំបន់ខួរក្បាលដែលមានតួនាទីបញ្ជាលើការកម្រើករបស់អវយវៈ។ អ្នកជំនាញសង្ឃឹមថា ឧបករណ៍បច្ចេកវិទ្យាដែលមានឈ្មោះថា «The Link» នេះ នឹងអនុញ្ញាតឱ្យអ្នកជំងឺដែលពិការអវយវៈ អាចបញ្ជាគ្រាប់ចុច ឬទស្សន៍ទ្រនិច (Cursor) របស់កុំព្យូទ័របាន ដោយការប្រើកម្លាំងនៃការគិត។

គោលដៅនៃការធ្វើតេស្តខាងលើគឺដើម្បីត្រួតពិនិត្យបញ្ហាសុវត្ថិភាព និងប្រសិទ្ធភាពរបស់ «អ៊ីនធើហ្វេសខួរក្បាល-កុំព្យូទ័រ» របស់ Neuralink។ «The Link» គឺជាឧបករណ៍សម្រាប់បំពាក់ភ្ជាប់ទៅនឹងប្រព័ន្ធសរសៃប្រសាទ ដែលផលិតឡើងដើម្បីបកស្រាយរលកសញ្ញាខួរក្បាល និងជំរុញសកម្មភាពរបស់ខួរក្បាល។

បើសិនទទួលបានជោគជ័យ បច្ចេកវិទ្យារបស់ Neuralink នឹងអាចជាបដិវត្តន៍សម្រាប់វិស័យជាច្រើន មានជាអាទិ៍ វិស័យថែទាំសុខភាព ទូរគមនាគមន៍ និងអន្តរកម្មរវាងមនុស្សជាមួយនឹងកុំព្យូទ័រ ក៏ដូចជាបច្ចេកវិទ្យាទំនើបដទៃទៀត៕

September 22, 2023

ឡាវរកឃើញករណីឆ្លងជំងឺអុតស្វា (Monkeypox) ដំបូងបង្អស់

ក្រសួងសុខាភិបាលឡាវស្នើឱ្យមន្ទីរពេទ្យនៅតាមបណ្ដាខេត្ត ស្រុក និងមណ្ឌលសុខភាពទាំងអស់ បូករួមទាំងបន្ទប់ពិគ្រោះជំងឺឯកជន បង្កើនការយកចិត្តទុកដាក់ទៅលើអ្នកជំងឺដែលមានអាការក្ដៅខ្លួន និងចេញកន្ទួលរមាស់។

យោងតាមបណ្ដាញសារព័ត៌មានក្នុងស្រុក នាថ្ងៃទី 19 កញ្ញានេះ ក្រសួងសុខាភិបាលឡាវបានចេញសេចក្ដីប្រកាសមួយ ស្នើឱ្យប្រជាជនគ្រប់រូបតាមដាន និងទប់ស្កាត់ ប្រឆាំងជំងឺអុតស្វា (Mpox-Monkeypox)។ សេចក្ដីប្រកាសនេះត្រូវបានធ្វើឡើងក្រោយពីបានរកឃើញអ្នកកើតជំងឺអុតស្វាម្នាក់ដែលជាករណី «នាំចូល»។

ដើម្បីទប់ស្កាត់ការឆ្លងរាលដាលជំងឺអុតស្វានេះ ក្រសួងសុខាភិបាលឡាវបានស្នើឱ្យមន្ទីរសុខាភិបាលតាមតំបន់នៅទូទាំងប្រទេស បង្កើនការតាមដាន ទប់ស្កាត់ និងគ្រប់គ្រងជំងឺឆ្លងមួយនេះ ដោយផ្ដោតទៅលើពលរដ្ឋដែលចូលមកប្រទេសឡាវ ជាពិសេស ចំពោះតំបន់ដែលមានព្រំដែនជាប់នឹងប្រទេសជិតខាងដែលកំពុងមានជំងឺនេះ។

ក្រសួងសុខាភិបាលឡាវស្នើឱ្យមន្ទីរពេទ្យនៅតាមបណ្ដាខេត្ត ស្រុក និងមណ្ឌលសុខាភិបាលទាំងអស់ បូករួមទាំងបន្ទប់ពិគ្រោះជំងឺឯកជនផង បង្កើនការយកចិត្តទុកដាក់ទៅលើអ្នកជំងឺដែលមានអាការក្ដៅខ្លួន និងចេញកន្ទួលរមាស់។ បើសិនរកឃើញករណីសង្ស័យថាឆ្លងជំងឺនេះ គឺត្រូវរាយការណ៍ដល់ស្ថាប័នពាក់ព័ន្ធដើម្បីយកសំណាកទៅពិនិត្យជាបន្ទាន់។

អុតស្វាគឺជាជំងឺឆ្លងដែលបង្ហាញវត្តមានជាយូរមកហើយនៅតំបន់អាហ្វ្រិក ប៉ុន្តែក្នុងឆ្នាំ 2022 ករណីឆ្លងជំងឺនេះនៅតំបន់អឺរ៉ុបបានកើនឡើងខ្ពស់ខ្លាំង នាំឱ្យអង្គការសុខភាពពិភពលោកប្រកាសអាសន្នកាលពីខែកក្កដា 2022។ ជំងឺនេះអាចឆ្លងតាមរយៈការប៉ះពាល់អ្នកជំងឺ។

អាការរបស់ជំងឺអុតស្វា រួមមាន ក្ដៅខ្លួនខ្លាំង ឈឺសាច់ដុំ ឡើងកូនកណ្ដុរ និងចេញពងកន្ទួលជាដើម។ តាមធម្មតា ជំងឺនេះអាចអូសបន្លាយពេលពី 2 ទៅ 4 សប្ដាហ៍ ខណៈដែលអាការជំងឺតែងបង្ហាញខ្លួននៅពេលរាងកាយឆ្លងវីរុសបានពី 5 ដល់ 21 ថ្ងៃ៕

September 19, 2023

បច្ចេកវិទ្យា «មើលធ្លុះ» ជញ្ជាំងដោយប្រើប្រាស់ WiFi

(សហរដ្ឋអាម៉េរិក) – អ្នកស្រាវជ្រាវមួយក្រុមនៅសាកលវិទ្យាល័យ California Santa Barbara អភិវឌ្ឍវិធីសាស្ត្រថ្មីដែលអាចបង្ហាញត្រាប់តាមរូបភាពនឹង ដែលនៅពីក្រោយជញ្ជាំង ដោយការប្រើប្រាស់ប្រព័ន្ធ WiFi។

ការធ្វើតេស្ត «ឆ្លុះមើល» វត្ថុកំពុងផ្លាស់ទីខាងក្រោយជញ្ជាំងដោយការប្រើប្រាស់រលកសញ្ញា WiFi ទទួលបានលទ្ធផលប្រកបដោយសក្ដានុពល ប៉ុន្តែវាជួបឧបសគ្គនៅពេលប្រើប្រាស់ចំពោះវត្ថុដែលនៅនឹងមួយកន្លែង។ ដើម្បីដោះស្រាយបញ្ហានេះ ក្រុមស្រាវជ្រាវប្រើប្រាស់តួអក្សរអង់គ្លេសធ្វើជាវត្ថុនឹង។ វិធីសាស្ត្រដែលមានឈ្មោះថា Wiffract របស់ពួកគេ ប្រើប្រាស់រលកសញ្ញារបស់ម៉ាស៊ីនផ្សាយ និងទទួល WiFi ដើម្បីធ្វើការពិសោធ។

Wiffract ត្រូវបានអភិវឌ្ឍដោយយោងទៅតាមទ្រឹស្ដី GTD (Geometrical Theory of Diffraction) របស់ Joseph Keller។ វិធីសាស្ត្ររបស់ក្រុមស្រាវជ្រាវខាងលើអនុញ្ញាតឱ្យបង្ហាញរូបភាព WiFi របស់តួអក្សរអង់គ្លេសដែលដាក់នៅខាងក្រោយជញ្ជាំង។

ក្នុងការធ្វើតេស្ត ពួកគេដាក់តួអក្សរ «BELIEVE» នៅខាងក្រោយជញ្ជាំងដើម្បីអានដោយ WiFi។ លទ្ធផលចុងក្រោយបានបង្ហាញអក្សរនេះយ៉ាងច្បាស់។ «…Wiffract ជួយឱ្យអានធ្លុះជញ្ជាំងដោយប្រើប្រាស់ WiFi ដំបូងគេបង្អស់» ក្រុមស្រាវជ្រាវសន្មតដូច្នេះ។

ក្រោយពីទទួលបានរូបថត ក្រុមអ្នកស្រាវជ្រាវអាចធ្វើបច្ចុប្បន្នភាពរូបថតនេះដោយប្រើប្រាស់ឧបករណ៍ចុងក្រោយ។ Wiffract អាចនឹងត្រូវបានអភិវឌ្ឍបន្ថែម និងប្រើប្រាស់ក្នុងការវិភាគក្រុមមនុស្ស កំណត់អត្តសញ្ញាណរបស់មនុស្ស សុខភាព និងបរិយាកាសវៃឆ្លាត៕

September 18, 2023

អ្នកវិទ្យាសាស្ត្រចិនចិញ្ចឹមតម្រងនោមមនុស្សក្នុងអំប៊្រីយ៉ុងជ្រូកបានជោគជ័យ

ជាលើកដំបូងហើយដែលអ្នកវិទ្យាសាស្ត្រមួយក្រុមនៅប្រទេសចិន ចិញ្ចឹមតម្រងនោមមានកោសិកាមនុស្សក្នុងអំប៊្រីយ៉ុងសត្វជ្រូក ដែលនេះត្រូវបានគេរំពឹងថា នឹងក្លាយជាវិធីសាស្ត្រជំនួសនៅក្នុងការវះកាត់ប្ដូរសរីរាង្គរបស់មនុស្ស។

លទ្ធផលនៃការសិក្សាស្រាវជ្រាវរបស់វិទ្យាស្ថានវេជ្ជសាស្ត្រ និងសុខភាពក្វាងចូវ នៃបណ្ឌិត្យសភាវិទ្យាសាស្ត្រចិន ប្រកាសនៅលើទស្សនាវដ្ដី Cell Stem Cell កាលពីថ្ងៃទី 07 កញ្ញា 2023 បានបង្ហាញអំពីសក្ដានុពលនៃការចិញ្ចឹមសរីរាង្គដើម្បីផ្លាស់ប្ដូរ និងសិក្សាស្រាវជ្រាវនៅលើសត្វជ្រូក។ យោងតាម China Science Net នេះគឺជាលើកដំបូងដែលសរីរាង្គរបស់មនុស្សរីកចម្រើននៅខាងក្នុងរាងកាយសត្វដទៃ។

ក្នុងចំណោមអំប៊្រីយ៉ុងជា 1,800 នៅក្នុងការសិក្សាស្រាវជ្រាវខាងលើ មានអំប៊្រីយ៉ុងចំនួន 5 បានរីកចម្រើនប្រកបដោយជោគជ័យ។ អំប៊្រីយ៉ុងទាំងនេះចិញ្ចឹមតម្រងនោមដែលមានផ្ទុកកោសិកាមនុស្សពី 50 ទៅ 60%។ ក្រុមអ្នកវិទ្យាសាស្ត្រប្រើប្រាស់ឧបករណ៍កែសម្រួលហ្សែន CRISPR ដើម្បីចាត់ចែងហ្សែនចំនួនពីរដែលមានតួនាទីគ្រប់គ្រងការវិវត្តរបស់តម្រងនោម និងកាត់បន្ថយការរីកចម្រើនរបស់កោសិកាជ្រូក។

តម្រងនោមគឺជាមួយក្នុងចំណោមសរីរាង្គដែលត្រូវបានប្ដូរច្រើនជាងគេនៅលើមនុស្ស ប៉ុន្តែកង្វះតម្រងនោមល្អដែលបានពីការបរិច្ចាគកំពុងក្លាយជារឿងលំបាក។ ការចិញ្ចឹមសរីរាង្គមនុស្សក្នុងអំប៊្រីយ៉ុងសត្វមានដោះធំនឹងជាដំណោះស្រាយល្អសម្រាប់បញ្ហានេះ។

September 11, 2023

នាឡិកាឆ្លាតវៃគ្រោះថ្នាក់ដល់សុខភាពជាងស្មាតហ្វូនទៅទៀត

នាឡិកាឆ្លាតវៃគឺជាឧបករណ៍មានប្រយោជន៍សម្រាប់សកម្មភាពប្រចាំថ្ងៃ ប៉ុន្តែគ្រប់គ្នាដែលពាក់វាជាប់នឹងដៃរាល់ថ្ងៃប្រហែលមិនបានដឹងទេថា ឧបករណ៍នេះមានផ្ទុកការពិតមួយដ៏គួរឱ្យខ្លាច។

នៅពេលទូរស័ព្ទឆ្លាតវៃបានក្លាយជារបស់ពេញនិយមក្នុងទសវត្សរ៍កន្លង ការសិក្សាស្រាវជ្រាវជាច្រើនបានបញ្ជាក់ថា របស់ដែលយើងចូលចិត្តកាន់រាល់ថ្ងៃនេះគឺមិនស្អាតសោះឡើយ។ ការសិក្សាស្រាវជ្រាវរបស់សាកលវិទ្យាល័យ Arizona បង្ហាញថា ស្មាតហ្វូនអាចកខ្វក់ជាងដបដងបើធៀបនឹងបង្គន់។

ក៏ប៉ុន្តែច្រើនឆ្នាំក្រោយមក មានឧបករណ៍ឆ្លាតវៃមួយទៀតដែលអ្នកស្រាវជ្រាវបានរកឃើញថា កខ្វក់ជាងទូរស័ព្ទឆ្លាតវៃទៅទៀត នោះគឺនាឡិកាឆ្លាតវៃ និងខ្សែដៃឆ្លាតវៃសម្រាប់ការហាត់ប្រាណ។

ក្រុមអ្នកសិក្សាស្រាវជ្រាវមកពីមហាវិទ្យាល័យវិទ្យាសាស្ត្រ Charles E. Schmidt នៃសាកលវិទ្យាល័យ Florida Atlantic បានសិក្សាស្វែងយល់ទៅលើខ្សែពាក់ដៃច្រើនប្រភេទ ហើយបានរកឃើញថា ជិត 95% ក្នុងចំណោមឧបករណ៍ទាំងនេះមានមេរោគច្រើនប្រភេទ។

ក្នុងចំណោមនោះ វត្ថុពាក់ជាប់នឹងដៃដែលផលិតពីជ័រកៅស៊ូត្រូវបានរកឃើញថា មានបរិមាណបាក់តេរីខ្ពស់ជាងគេបំផុត ស្របពេលដែលខ្សែពាក់ដៃដែលធ្វើពីលោហធាតុដូចជាមាស និងប្រាក់ជាដើម មានមេរោគតិចជាងគេបំផុត។

លទ្ធផលនៃការស្រាវជ្រាវដែលត្រូវបានចុះផ្សាយលើទស្សនាវដ្ដី Advances in Infectious Diseases ក៏បានបញ្ជាក់ថា បរិមាណតិច ឬច្រើននៃមេរោគដែលជាប់លើឧបករណ៍ទាំងឡាយខាងលើ គឺអាស្រ័យលើភេទ និងមុខរបររបស់អ្នកប្រើប្រាស់។ ក៏ប៉ុន្តែ ប្រការសំខាន់ជាងនេះគឺប្រភេទខ្សែរបស់ឧបករណ៍ដែលត្រូវបានប្រើប្រាស់ មានដូចជាខ្សែធ្វើពីជ័រកៅស៊ូ ស្បែក មាស និងប្រាក់ជាដើម។

ក្រុមស្រាវជ្រាវរកឃើញថា Staphylococci, Pseudomonas និង Enterobacteriaceae គឺជាមេរោគដែលមានច្រើនបំផុតលើខ្សែពាក់លើដៃ។ Staphylococci បង្កឱ្យមានជំងឺលើស្បែក រលាកសួត រលាកបេះដូង រលាកខួរឆ្អឹង នៅពេលវាចូលដល់ក្នុងឈាម។ Pseudomonas ក៏អាចធ្វើឱ្យរលាកសួត ឬអវយវៈដទៃបន្ទាប់ពីការវះកាត់។ ចំណែកបាក់តេរី Enterobacteriaceae វិញ អាចបង្កឱ្យមានជំងឺរាករូស៕

August 30, 2023

អ្នកវិទ្យាសាស្ត្ររកឃើញហ្សែនដែលអាចជួយឱ្យមនុស្សមានអាយុវែងជាងបច្ចុប្បន្ន

(សហរដ្ឋអាម៉េរិក) – ក្រុមអ្នកជំនាញនៅសាកលវិទ្យាល័យ Rochester បានដាក់បញ្ចូលហ្សែនពិសេសមួយរបស់កណ្ដុរគ្មានរោម ទៅក្នុងកណ្ដុរប្រភេទធម្មតា និងបានរកឃើញថា ហ្សែននេះបានជួយឱ្យពួកវាមានសុខភាពល្អ និងរស់បានយូរជាង 4.4%។

ក្នុងការសិក្សាស្រាវជ្រាវថ្មីដ៏អស្ចារ្យមួយ ក្រុមអ្នកជំនាញរបស់សាកលវិទ្យាល័យ Rochester នៅនីវយ៉ក បានបង្ហាញវិធីសាស្ត្រដាក់បញ្ចូលហ្សែនរស់បានយូររបស់សត្វកណ្ដុរគ្មានរោម (Naked mole-rat) ដែលមានឈ្មោះក្នុងវិទ្យាសាស្ត្រថា Heterocephalus glaber ទៅក្នុងកណ្ដុរប្រភេទធម្មតាដើម្បីអូសបន្លាយអាយុកាល និងកែលំអសុខភាព។ លទ្ធផលនៃការសិក្សាស្រាវជ្រាវត្រូវបានប្រកាសលើទស្សនាវដ្ដី Nature កាលពីថ្ងៃទី 23 សីហា 2023។

កណ្ដុរខាងលើមានឈ្មោះល្បីខ្លាំងដោយសារតែសមត្ថភាពទប់ទល់នឹងជំងឺទាំងឡាយដែលទាក់ទងនឹងវ័យចំណាស់ និងមានអាយុវែងខុសធម្មតា ពោលគឺវែងជាងជិត 10 ដង បើធៀបនឹងប្រភេទសត្វកកេរដែលមានទំហំប្រហាក់ប្រហែល។ អ្នកវិទ្យាសាស្ត្រខាងលើ កាលពីឆ្នាំ 2020 បានរកឃើញហ្សែនមួយដែលរួមចំណែកក្នុងការជួយឱ្យវារស់បានយូរ។ ហ្សែននេះទទួលបន្ទុកផលិតអាស៊ីត HMW-HA ដែលជាម៉ូលេគុលជួយបង្កើនកម្លាំងរបស់កោសិកាក្នុងការទប់ទល់នឹងភាពតានតឹង និងរលាក ឆ្លងរោគ។

កណ្ដុរគ្មានរោម (Naked mole-rat) ដែលមានឈ្មោះក្នុងវិទ្យាសាស្ត្រថា Heterocephalus glaber

កណ្ដុរគ្មានរោមនេះមាន HMW-HA ច្រើនជាងប្រហែល 10 ដង បើធៀបនឹងមនុស្ស ឬប្រភេទកណ្ដុរដទៃ។ មូលហេតុគឺថា ហ្សែន (ហ្សែន hyaluronan synthase 2) ដែលបង្កើតម៉ូលេគុលនេះ នៅលើកណ្ដុរខាងលើ បានបង្ហាញភាពខ្លាំងក្លាជាងបណ្ដាសត្វដទៃ។

ក្នុងការស្រាវជ្រាវថ្មីនេះ ក្រុមអ្នកវិទ្យាសាស្ត្ររកឃើញថា បណ្ដាកណ្ដុរដែលមានហ្សែនរបស់កណ្ដុរគ្មានរោម Heterocephalus glaber មានសមត្ថភាពខ្ពស់ក្នុងការទប់ទល់នឹងជំងឺមហារីកស្បែក សុខភាពទូទៅត្រូវបានកែលំអ និងរស់បានយូរជាង 4.4% បើធៀបនឹងបណ្ដាប្រភេទកណ្ដុរធម្មតាដែលកើតដំណាលគ្នា។

ការរកឃើញថ្មីនេះត្រូវបានរំពឹងថា នឹងបើកផ្លូវសម្រាប់ការស្វែងរកវិធីដែលអាចជួយឱ្យមនុស្សមានសុខភាពល្អ ពន្យារភាពក្មេង និងរស់បានយូរជាងបច្ចុប្បន្ន នាពេលអនាគត៕

August 26, 2023

ក្រុមហ៊ុនជិត 40% នៅប្រទេសជប៉ុន ជួលបុគ្គលិកអាយុលើសពី 70

ចំនួនក្រុមហ៊ុនដែលជ្រើសរើសបុគ្គលិកអាយុលើសពី 70 នៅប្រទេសជប៉ុន បានកើនទ្វេដងធៀបនឹងទសវត្សរ៍កន្លង ដោយឡើងដល់ 39%។

ដើមឡើយ ប្រទេសជប៉ុន កំណត់អាយុចូលនិវត្តន៍ត្រឹម 60 ប៉ុន្តែប្រទេសនេះបានធ្វើវិសោធនកម្មច្បាប់កាលពីឆ្នាំ 2013 ដោយស្នើឱ្យក្រុមហ៊ុននានាបន្តអនុញ្ញាតឱ្យបុគ្គលិកធ្វើការរហូតដល់អាយុ 65 ឆ្នាំ បើសិនជាបុគ្គលិកនោះចង់។ ដំបូងឡើយ បណ្ដាក្រុមហ៊ុនបានជំទាស់ទៅនឹងការប្ដូរផ្លាស់នេះ ព្រោះតែខ្លាចការចំណាយកើនឡើង។ ក៏ប៉ុន្តែ បញ្ហាខ្វះកម្លាំងពលកម្មនាបច្ចុប្បន្ន កំពុងតែធ្វើឱ្យក្រុមហ៊ុនកាន់តែច្រើនសម្រេចជ្រើសរើសបុគ្គលិកវ័យចំណាស់។

ក្រុមហ៊ុន Nojima កាលពីឆ្នាំ 2020 បានអនុញ្ញាតឱ្យបុគ្គលិកបន្តធ្វើការរហូតដល់ពួកគេមានអាយុ 80។ ឆ្នាំ 2021 ក្រុមហ៊ុន YKK ដែលជាអ្នកផលិតខ្សែរ៉ូតធំជាងគេលើពិភពលោក ក៏បានលុបចោលការកំណត់អាយុចូលនិវត្តន៍។ មិនយូរប៉ុន្មាន ក្រុមហ៊ុន Nojima ក៏បានធ្វើតាម YKK។

ក្រសួងសុខាភិបាល ការងារ និងសុខុមាលភាព ក៏ដូចជាក្រសួងមហាផ្ទៃ ទូរគមនាគមន៍ជប៉ុន កាលពីដើមខែសីហានេះបានប្រកាសទិន្នន័យដែលបង្ហាញថា អត្រានៃការជ្រើសរើសបុគ្គលិកវ័យលើសពី 70 ក្នុងឆ្នាំ 2022 គឺ 39% ដែលនេះខ្ពស់ជាងទ្វេដង បើធៀបនឹងឆ្នាំ 2012។

ក្រុមប្រជាជនវ័យពី 15 ដល់ 64 មាន 59% ធៀបនឹងប្រជាជនសរុបនៅជប៉ុនក្នុងឆ្នាំ 2022 ដោយថយចុះ 9% ធៀបនឹងឆ្នាំ 2000។ ក្នុងចំណោមមនុស្សដែលមានការងារធ្វើនៅជប៉ុន ក្រុមដែលមានអាយុលើសពី 65 មាន 6.39 លាននាក់ ស្មើនឹង 10.6% ខ្ពស់ជាងតួលេខ 7% នៅអាម៉េរិក និង 4% នៅអាល្លឺម៉ង់។

វិស័យដែលប្រើប្រាស់បុគ្គលិកវ័យចំណាស់ខ្ពស់ជាងគេនៅប្រទេសជប៉ុន រួមមាន វិស័យសាងសង់ វិស័យថែទាំសុខភាព វិស័យដឹកជញ្ជូន៕

August 17, 2023

មហាសេដ្ឋី Zuckerberg ថា Elon Musk មិនម៉ឺងម៉ាត់ក្នុងការប្រកួតលើសង្វៀន

Mark Zuckerberg យល់ថា គូប្រកួត Elon Musk មិនមានភាពដាច់ខាតក្នុងការនាំគ្នាឡើងលើសង្វៀនប្រដាល់ដូចដែលគាត់បានបបួលគ្រាដំបូង។

«បើសិន Elon ពិតជាម៉ឺងម៉ាត់ជាមួយនឹងការប្រកួតផ្លូវការ គាត់នឹងមានវិធីទាក់ទងមកខ្ញុំ។ បើមិនដូច្នេះទេ គឺដល់ពេលត្រូវដែលបញ្ឈប់រឿងរ៉ាវនេះ» ម្ចាស់ Facebook សរសេរលើបណ្ដាញសង្គម Threads កាលពីថ្ងៃទី 13 សីហាដូច្នេះ។ លោក Zuckerberg បន្ថែមថា «ខ្ញុំនឹងផ្ដោតទៅលើតែការប្រកួតជាមួយនឹងមនុស្សដែលផ្ដល់តម្លៃឱ្យកីឡាមួយនេះតែប៉ុណ្ណោះ»។

Elon Musk បានបបួលប្រកួតប្រដាល់ក្នុងទ្រុងជាមួយនឹង Mark Zuckerberg កាលពីចុងខែមិថុនា។ ប៉ុន្តែ មហាសេដ្ឋីរូបនេះទំនងជាកំពុងគេចពីការប្រកួតប្រដាល់ដោយផ្ទាល់ ព្រោះលោកធ្លាប់បានលើកហេតុផលមួយចំនួនដែលអាចពន្យារពេលការប្រកួត ក្នុងនោះក៏មានហេតុផលសុខភាពផងដែរ។

យោងតាមទំព័រ Oddspedia បើសិនការប្រកួតខាងលើត្រូវបានធ្វើឡើង អត្រាឈ្នះរបស់មហាសេដ្ឋី Zuckerberg គឺ 79% គ្រាដែលឱកាសឈ្នះរបស់មហាសេដ្ឋី Elon Musk មានត្រឹមតែ 21% ប៉ុណ្ណោះ គិតត្រឹមព្រឹកថ្ងៃទី 14 សីហា 2023៕

August 14, 2023

បេក្ខភាពប្រធានាធិបតីអេក្វាទ័រ ត្រូវគេលួចធ្វើឃាត

បេក្ខភាពសម្រាប់តំណែងប្រធានាធិបតីរបស់ប្រទេសអេក្វាទ័រ លោក Fernando Villavicencio អាយុ 59 ឆ្នាំ ត្រូវបានគេលួចបាញ់សម្លាប់ បន្ទាប់ពីព្រឹត្តិការណ៍ឃោសនារកសំឡេងឆ្នោតនៅរដ្ឋធានីគីតូ។

លោក Villavicencio ដែលជាអតីតតំណាងរាស្ត្រ និងជាអ្នកសារព័ត៌មានមួយរូប ត្រូវបានខ្មាន់កាំភ្លើងលួចធ្វើឃាតដោយការបាញ់ប្រហារបីគ្រាប់ នៅពេលលោកកំពុងត្រូវបានក្រុមអង្គរក្សអមការពារចេញមកកាន់រថយន្ត ក្រោយពីការឃោសនារកសំឡេងឆ្នោតនៅគីតូ កាលពីថ្ងៃទី 09 សីហា 2023។ គ្រាប់បែកដៃមួយគ្រាប់ក៏ត្រូវបានរកឃើញនៅកន្លែងកើតហេតុ ប៉ុន្តែមិនទាន់បានដកគន្លឹះ។

ទិដ្ឋភាពក្នុងវីដេអូដែលបង្ហោះលើបណ្ដាញសង្គមបង្ហាញថា គ្រប់គ្នាស្រែក និងរត់រកកន្លែងពួន នៅពេលមានសំឡេងគ្រាប់កាំភ្លើង។ វីដេអូដទៃបង្ហាញថា ជនសង្ស័យពាក់អាវពណ៌ស ត្រូវបានមនុស្សម្នាគ្រប់គ្រងនៅកន្លែងកើតហេតុ។

August 10, 2023

អាជ្ញាធរថៃស្នើឱ្យ ថាក់ស៊ីន ចូលស្រុកក្នុងថ្ងៃធ្វើការ ដើម្បីស្រួលចាប់ខ្លួន

ឧបនាយករដ្ឋមន្ត្រីថៃ Wissanu បានស្នើឱ្យលោក ថាក់ស៊ីន កុំត្រលប់ចូលប្រទេសនៅថ្ងៃចុងសប្ដាហ៍ និងថ្ងៃឈប់សម្រាកបុណ្យ ព្រោះនឹងបង្កការលំបាកនៅពេលអនុវត្តបទបញ្ជាចាប់ខ្លួន។

ឧបនាយករដ្ឋមន្ត្រីថៃ លោក Wissanu Krea-ngam កាលពីថ្ងៃទី 08 សីហា ឱ្យដឹងថា អាជ្ញាធរប្រទេសនេះបានត្រៀមផែនការរួចរាល់ហើយសម្រាប់ថ្ងៃដែលលោក ថាក់ស៊ីន ត្រលប់ចូលប្រទេស។ យោងតាមលោក Wissanu តុលាការ និងអគ្គនាយកដ្ឋានពន្ធនាគារ សុទ្ធតែបានត្រៀមខ្លួនរួចរាល់ ប៉ុន្តែថា លោក ថាក់ស៊ីន មិនគួរត្រលប់ចូលប្រទេសក្នុងថ្ងៃចុងសប្ដាហ៍ ឬថ្ងៃឈប់សម្រាក។

«ក្នុងថ្ងៃនោះ តុលាការ ដែលជាស្ថាប័នត្រូវធ្វើការកំណត់យកពន្ធនាគារសម្រាប់ការឃុំខ្លួនលោក ថាក់ស៊ីន មិនធ្វើការ។ ប្រការនេះនឹងបង្កការលំបាក ព្រោះយើងត្រូវរកទីតាំងដើម្បីឃុំខ្លួនលោក ថាក់ស៊ីន ជាបណ្ដោះអាសន្ន ក្នុងពេលរង់ចាំការសម្រេចពីតុលាការ» ឧបនាយករដ្ឋមន្ត្រីថៃ លោក Wissanu និយាយដូច្នេះ។

លោក ថាក់ស៊ីន ស៊ីណាវ៉ាត្រា ថ្មីៗនេះបានប្រកាសថា នឹងវិលចូលប្រទេសថៃវិញនៅថ្ងៃទី 10 សីហា ក្រោយការរស់នៅដោយនិរទេសខ្លួនអស់មួយរយៈពេលយូរ។ ក៏ប៉ុន្តែ ក្រោយមក អតីតនាយករដ្ឋមន្ត្រីថៃរូបនេះ បានប្រកាសពន្យារពេលនៃការវិលចូលស្រុក ព្រោះបញ្ហាសុខភាព។

ប្រភពព័ត៌មានខ្លះថា លោក ថាក់ស៊ីន នឹងចូលស្រុកវិញ នៅពេលបក្ស Pheu Thai របស់កូនស្រីលោក ឡើងកាន់អំណាច។ បក្ស Pheu Thai កាលពីថ្ងៃទី 07 សីហា បានប្រកាសបង្ហាញសម្ព័ន្ធភាពថ្មីដើម្បីឡើងកាន់អំណាច។ ប្រធានសភាថៃ កាលពីសប្ដាហ៍កន្លងឱ្យដឹងថា ការបោះឆ្នោតជ្រើសតាំងនាយករដ្ឋមន្ត្រីថ្មីនឹងធ្វើឡើងនៅក្រោយថ្ងៃទី 16 សីហា 2023។

អតីតនាយករដ្ឋមន្ត្រីថៃ លោក ថាក់ស៊ីន ត្រូវបានបណ្ដេញចេញពីអំណាចដោយរដ្ឋប្រហារយោធាកាលពីឆ្នាំ 2006។ ក្នុងអំឡុងពេលអវត្តមាន លោក ថាក់ស៊ីន ក៏ត្រូវតុលាការថៃផ្ដន្ទាទោសឱ្យជាប់ពន្ធនាគារ 12 ឆ្នាំ។

ឧបនាយករដ្ឋមន្ត្រីថៃ លោក Wissanu បានប្រកាសថា អតីតនាយករដ្ឋមន្ត្រីថៃ លោក ថាក់ស៊ីន នឹងត្រូវជាប់ពន្ធនាគារភ្លាមៗនៅពេលលោកត្រលាប់ចូលប្រទេស ហើយអាចដាក់លិខិតសូមការលើកលែងទោសពីព្រះមហាក្សត្រ។ អគ្គនាយកដ្ឋានពន្ធនាគារថៃ ឱ្យដឹងថា បើសិនលោក ថាក់ស៊ីន វិលត្រលប់មកទទួលទោស ពួកគេគ្រោងនឹងឃុំខ្លួនលោកតែម្នាក់ឯង ដើម្បីការពារសុវត្ថិភាព៕

August 9, 2023

Tag: ខភាព