កូវីដ ១៩ - La Reine Media

MGI ជួយប្រយុទ្ធប្រឆាំងនឹងការរាតត្បាតនៃ ជំងឺកូវីដ-១៩ ក្នុងតំបន់អាស៊ីអាគ្នេយ៍ តាមរយៈការបង្កើតមន្ទីរពិសោធន៍ចល័តប្រកបដោយភាពច្នៃប្រឌិត ក្រោមការគាំទ្ររបស់ LSEA

សេចក្តីប្រកាសព័ត៌មាន

(រាជធានីភ្នំពេញ ថ្ងៃទី ១៧ ខែមីនា ឆ្នាំ២០២២)

ក្រុមហ៊ុន MGI Tech Co., Ltd. (MGI) ដែលជាក្រុមហ៊ុនឈានមុខក្នុងពិភពលោក ខាងផ្នែកវេជ្ជសាស្ត្រ និងច្នៃប្រឌិត បាន និងកំពុងចូលរួមចំណែកក្នុងការគ្រប់គ្រង និងបង្ការ ជំងឺកូវីដ-១៩ នៅក្នុង តំបន់អាស៊ីអាគ្នេយ៍ ខណៈដែលជំងឺរាតត្បាតសកលនេះ នៅតែជាបញ្ហាប្រឈម នឹងគំរាមកំហែងដល់ប្រព័ន្ធសុខាភិបាលសាធារណៈនៅក្នុងតំបន់។ MGI បានផ្តួចផ្តើមបង្កើតមន្ទីរពិសោធន៍កុងតឺន័រ Champa LSEA ដែលជាមជ្ឈមណ្ឌលដៃគូសហការធ្វើតេស្តដំបូងគេក្នុង ប្រទេសឡាវ ក្រោមការគាំទ្រពី សម្ព័ន្ធ Road Life Science Economy Alliance (LSEA) និង Sithandone Joint Development Co., Ltd. (STD) ដើម្បីជួយ ប្រទេសឡាវ បង្កើនសមត្ថភាពក្នុងការធ្វើតេស្តរក វីរុសកូវីដ-១៩ និងរៀបចំសម្រាប់ការបើកជាបណ្តើរៗ នូវព្រំដែនរបស់ខ្លួនឡើងវិញនៅក្នុងឆ្នាំ ២០២។ មន្ទីរពិសោធន៍ចល័តធ្វើឡើងពីកុងតឺន័រប្រកបដោយភាពច្នៃប្រឌិតនេះ ត្រូវបានបញ្ជូនទៅ ខេត្តចំប៉ាសក្ដិ កាលពីថ្ងៃទី ១៧ ខែមីនា និងបានដាក់ឱ្យប្រតិបត្តិការនៅក្នុងមន្ទីរពេទ្យ ខេត្តចំប៉ាសក្ដិ ដែលជាដៃគូសហការរបស់ STD ក្នុងគម្រោង ១១ លានដុល្លារសហរដ្ឋអាម៉េរិក។

ក្រោមផែនការទេសចរណ៍តំបន់បៃតង រដ្ឋាភិបាលឡាវ បានអនុញ្ញាតឱ្យបើកឡើងវិញមួយផ្នែកខ្លះនៃព្រំដែន ដើម្បីស្វាគមន៍ភ្ញៀវ និងដើម្បីជំរុញវិស័យទេសចរណ៍ ឲ្យមានភាពរស់រវើកឡើងវិញចាប់តាំងពីថ្ងៃទី ១ ខែមករា មកម្ល៉េះ ប៉ុន្តែដោយសារប្រទេសនេះកំពុងតែប្រឈមនឹងការរីករាលដាលនៃ ជំងឺកូវីដ-១៩ នៅក្នុងសហគមន៍ តម្រូវការកែលម្អលើប្រព័ន្ធបង្ការ និងគ្រប់គ្រងការឆ្លង នៅតែជាកត្តាចាំបាច់ជាងពេលណាៗទាំងអស់។

សាងសង់ក្នុងទូកុងតឺន័រប្រវែង ១២ ម៉ែត្រ ហើយអាចចល័តបាន មន្ទីរពិសោធន៍ Champa LSEA ត្រូវបានរចនាឡើងដើម្បីបំពេញតម្រូវការធ្វើតេស្តទ្រង់ទ្រាយធំ នឹងបានបំពាក់ដោយប្រព័ន្ធស្វ័យប្រវត្តិកម្មរបស់ MGI ដែលអនុញ្ញាតឱ្យមន្ត្រីបច្ចេកទេសខាងពិសោធន៍ អាចធ្វើតេស្តបានរហូតដល់ ៣,០០០ សំណាកក្នុងមួយថ្ងៃ និងរហូតដល់ ៣០,០០០ សំណាក ក្នុងមួយថ្ងៃ ប្រសិនបើ ១0 សំណាក ត្រូវបានលាយបញ្ចូលគ្នាក្នុងបំពង់តែមួយសម្រាប់ការធ្វើតេស្តជាបាច់ ជាលទ្ធផល គឺវាបានជួយបង្កើនប្រសិទ្ធិភាព និងសមត្ថភាពនៃការធ្វើតេស្ត អាស៊ីតនុយក្លេអ៊ីក របស់ ប្រទេសឡាវ។

មន្ទីរពិសោធន៍ដ៏ទំនើបនេះ អនុញ្ញាតឱ្យការពិសោធមានលក្ខណៈសាមញ្ញជាងមុន សម្រាប់នីតិវិធីដែលពឹងផ្អែកខ្លាំងលើកម្លាំងពលកម្ម និងចំណាយពេលច្រើន ដែលជាធម្មតាវាផ្តល់លទ្ធផលនៃការធ្វើតេស្តរោគវិនិច្ឆ័យតែម្តង ដោយសារតែវាត្រូវបានភ្ជាប់មកជាមួយនូវប្រព័ន្ធស្វ័យប្រវត្តិកម្មកម្រិតខ្ពស់ពីរគឺ MGISP-960 និង MGISTP-7000 សម្រាប់ការរៀបចំគំរូ និងការផ្ទេរគំរូរៀងៗខ្លួន កាត់បន្ថយតម្រូវការកម្លាំងពលកម្មមនុស្ស និងកាត់បន្ថយពេលវេលារង់ចាំលទ្ធផល និងជួយសម្រួលខ្សែចង្វាក់ការងារទាំងមូល។

ជាមួយនឹងសារធាតុចម្រាញ់ សម្ភារៈប្រើប្រាស់ និងសម្ភារៈការពារ មន្ទីរពិសោធន៍ Biosafety Level 2 ត្រូវបានពង្រឹងបន្ថែមជាមួយនឹងប្រព័ន្ធខ្យល់ចេញចូលដ៏ទំនើប សម្រាប់ការផ្លាស់ប្តូរខ្យល់ ការគ្រប់គ្រងសម្ពាធ និងការសម្លាប់មេរោគ ព្រមទាំងមានបន្ទប់ដែលមានមុខងារសំខាន់ៗចំនួនបីបន្ថែមទៀតគឺ៖ បន្ទប់រៀបចំសារធាតុប្រតិកម្ម បន្ទប់រៀបចំសំណាក និងបន្ទប់មីក្រូទស្សន៍ (Amplification Room) ។

ជាមួយនឹងវិធីសាស្ត្រប្រកបដោយភាពច្នៃប្រឌិត និងល្អបំផុតរបស់ MGI មន្ទីរពិសោធន៍ចល័ត ត្រូវបានរចនាឡើងដើម្បីផ្ដល់ភាពងាយស្រួលក្នុងការដឹកជញ្ជូន និងអាចដាក់ពង្រាយបានយ៉ាងឆាប់រហ័សនៅក្នុងពហុកីឡាដ្ឋាន និងទីលានកីឡា មន្ទីរពេទ្យសហគមន៍ និង ស្រុក មន្ទីរសុខាភិបាល ឬកន្លែងណាក៏ដោយដែលសមស្របក្នុងស្ថានភាពអាសន្ន ដែលតម្រូវឱ្យមានការធ្វើតេស្តទ្រង់ទ្រាយធំ ដោយកាត់បន្ថយពេលវេលាសម្រាប់ការដឹកជញ្ជូនសំណាក និងពេលវេលាធ្វើដំណើររបស់អ្នកជំងឺក្នុងតំបន់ ដែលត្រូវការការធ្វើតេស្ត PCR យ៉ាងឆាប់រហ័ស។ ជាងនេះទៅទៀត មន្ទីរពិសោធន៍ក៏អាចបម្រើជាស្ថានីយត្រួតពិនិត្យសម្រាប់ការបំប្លែងខ្លួននៃវីរុស ធ្វើឱ្យវាក្លាយជាឧបករណ៍ដែលអាចប្រើប្រាស់បានក្នុងគ្រាដែលមិនធ្លាប់មានពីមុនមកសម្រាប់ការគ្រប់គ្រងជំងឺរាតត្បាត។

“ក្នុងនាមជាសាជីវកម្មសាកល មន្ទីរពិសោធន៍ចល័ត MGI មិនត្រឹមតែមាននៅក្នុង ប្រទេសឡាវ ប៉ុណ្ណោះទេ ប៉ុន្តែក៏មានវត្តមាននៅក្នុងតំបន់អាស៊ីអាគ្នេយ៍ និងជុំវិញពិភពលោកផងដែរ។ ចាប់តាំងពីមានការរីករាលដាលនៃជំងឺរាតត្បាតសកលមក MGI បាន និងកំពុងដើរតួនាទីយ៉ាងសំខាន់ក្នុងការប្រយុទ្ធប្រឆាំង ជំងឺកូវីដ-១៩ ដោយអនុញ្ញាតឱ្យសហគមន៍ និងរដ្ឋាភិបាលបង្កើនសមត្ថភាព និងប្រសិទ្ធភាពធ្វើតេស្តរបស់ពួកគេ ដើម្បីអាចធានាបាននូវបរិយាកាសការងារដែលមានសុវត្ថិភាពជាងមុនសម្រាប់មន្ត្រីសុខាភិបាលជួរមុខ” នេះបើតាមការលើកឡើងរបស់លោកវេជ្ជបណ្ឌិត Roy Tan នាយកគ្រប់គ្រងទូទៅនៃ MGI Asia Pacific។ ចាប់តាំងពីថ្ងៃដំបូងរហូតមកទល់បច្ចុប្បន្ន ដើម្បីចូលរួមប្រយុទ្ធប្រឆាំងនឹងជំងឺរាតត្បាតដែលកំពុងតែគំរាមកំហែងដល់សុខភាពសាធារណៈ ដែលពិភពលោកកំពុងប្រឈម MGI បានខិតខំស្វះស្វែងផ្តល់នូវប្រព័ន្ធស្វ័យប្រវត្តិកម្មដល់ប្រទេសជាង ៧០ រួមមានទាំង ប្រទេសសិង្ហបុរី ថៃ ម៉ាឡេស៊ី អារ៉ាប៊ីសាអូឌីត និង អេមីរ៉ាតអារ៉ាប់រួម។

លោកវេជ្ជបណ្ឌិត Khamsing Keothongku នាយកមន្ទីរពេទ្យខេត្តចំប៉ាសក្ដិ មានប្រសាសន៍ថា៖ “មន្ទីរពិសោធន៍ Champa LSEA ដែលមន្ទីរពេទ្យខេត្តចំប៉ាសក្ដិ និង STD ទើបទទួលបាន នឹងផ្តល់អត្ថប្រយោជន៍ជាច្រើនដល់ ខេត្តចំប៉ាសក្ដិ និងក្នុងតំបន់ជុំវិញ ក្នុងការបង្ការ និងគ្រប់គ្រងជំងឺរាតត្បាត កូវីដ-១។ មន្ទីរពិសោធន៍ដែលបំពាក់ដោយឧបករណ៍ទំនើបរបស់ MGI ក៏នឹងជួយកាត់បន្ថយកម្លាំងពលកម្មដែលត្រូវការផងដែរ នេះគឺជាគោលបំណងចម្បងក្នុងការធ្វើឱ្យប្រសើរឡើងនូវប្រសិទ្ធភាព និងសមត្ថភាពនៃការធ្វើតេស្ត កូវីដ-១៩ ។

ក្រៅពីទប់ស្កាត់ការរីករាលដាលនៃជំងឺកូវីដ-១៩ មន្ទីរពិសោធន៍ Champa LSEA ក៏មានសមត្ថភាពក្នុងការក្លាយជាហេដ្ឋារចនាសម្ព័ន្ធសុខាភិបាលសាធារណៈរយៈពេលវែងសម្រាប់ ប្រទេសឡាវ ហើយនឹងបន្តផ្តល់ប្រយោជន៍សម្រាប់សហគមន៍មូលដ្ឋានផងដែរ។ ដោយមានបច្ចេកវិទ្យា «ញែកហ្សែន» លំដាប់ខ្ពស់របស់ MGI មន្ទីរពិសោធន៍ចល័តអាចដើរតួនាទីក្នុងការបង្ការ និងគ្រប់គ្រងជំងឺឆ្លងក្នុងតំបន់ផ្សេងៗទៀត ដូចជាជំងឺគ្រុនចាញ់ គ្រុនឈាម របេងជាដើម ឬ ក្នុងការរកឃើញសញ្ញានៃការវិវត្តដំបូងនៃពិការភាពពីកំណើត ដុំសាច់ និងបញ្ហាសុខភាពផ្សេងៗទៀត ដែលកើតមានឡើងចំពោះមនុស្សគ្រប់រូប។

###

អំពី MGI

ក្រុមហ៊ុន MGI Tech Co., Ltd. (MGI) ជាបុត្រសម្ព័ន្ធរបស់ BGI Group ដែលជាក្រុមហ៊ុនឈានមុខគេក្នុងពិភពលោក លើវិស័យវិទ្យាសាស្ត្រហ្សែន បានប្តេជ្ញាចិត្តក្នុងការផលិតឧបករណ៍ស្នូល និងបច្ចេកវិទ្យាដើម្បីដឹកនាំជីវិតតាមរយៈការច្នៃប្រឌិតដ៏ឆ្លាតវៃ។ ដោយផ្អែកលើបច្ចេកវិទ្យាដ៏ទំនើបរបស់ខ្លួន MGI បានផ្តោតលើការស្រាវជ្រាវ និងការអភិវឌ្ឍ ការផលិត និងការលក់ឧបករណ៍ញែកហ្សែន សារធាតុប្រតិកម្មសម្រាប់ធ្វើតេស្ត និងផលិតផលដែលពាក់ព័ន្ធ ដើម្បីគាំទ្រដល់ការស្រាវជ្រាវផ្នែកវេជ្ជសាស្ត្រ កសិកម្ម គុណភាពឱសថ និងការថែទាំសុខភាព។ បេសកកម្មរបស់ MGI គឺដើម្បីបង្កើត និងអភិវឌ្ឍឧបករណ៍វិទ្យាសាស្ត្រ សម្រាប់ការថែទាំសុខភាពនាពេលអនាគត។ គិតត្រឹមខែធ្នូ ឆ្នាំ ២០២០ MGI មានវត្តមាននៅក្នុងទីផ្សារច្រើនជាង ៧0 ប្រទេស និងតំបន់ បំពេញតម្រូវការដល់អ្នកប្រើប្រាស់អន្តរជាតិជាង ១,០០០ នាក់ និងផ្តល់ការងារដល់អ្នកជំនាញជាង ១,៧០០ នៅទូទាំងពិភពលោក ដែលក្នុងនោះ មាន ៣៣% គឺជាបុគ្គលិក R&D។ សម្រាប់ព័ត៌មានបន្ថែម សូមចូលទៅកាន់គេហទំព័រ MGI ឬបណ្តាញ Twitter, LinkedIn ឬ YouTube ។

*លុះត្រាតែមានចែងផ្សេងក្រៅពីនេះ សារធាតុសម្រាប់ធ្វើតេស្ត និងសារធាតុផ្សំផ្សេងៗទៀត មិនមាននៅក្នុង ប្រទេសអាល្លឺម៉ង់ សហរដ្ឋអាមេរិក អេស្ប៉ាញ ចក្រភពអង់គ្លេស ហុងកុង ស៊ុយអែត បែលហ្ស៊ិក និងអ៊ីតាលី នោះទេ។

អំពី LSEA

Life Sciences Economy Alliance (LSEA) គឺជាសម្ព័ន្ធភាពពហុវិស័យតែមួយគត់ដែលបានប្តេជ្ញាចិត្តក្នុងការអភិវឌ្ឍផ្នែកវេជ្ជសាស្ត្រ និងច្នៃប្រឌិតបច្ចេកវិទ្យា ការលើកកម្ពស់កិច្ចសហប្រតិបត្តិការអន្តរជាតិ និងការអភិវឌ្ឍឧស្សាហកម្មវិទ្យាសាស្ត្រជីវិត។ បេសកកម្មរបស់សម្ព័ន្ធគឺដើម្បីជំរុញសហគមន៍នៃអ្នកពាក់ព័ន្ធផ្នែកបច្ចេកវិទ្យាវេជ្ជសាស្ត្រ និងបង្កើតពិភពលោកឱ្យកាន់តែប្រសើរឡើងតាមរយៈវេទិកា និងកម្មវិធីផ្សេង។ មន្ទីរពិសោធន៍ Champa LSEA នៅ ប្រទេសឡាវ ដែលស្ថាបនាដោយសមាជិក LSEA នឹងក្លាយជាឧទាហរណ៍មួយ ហើយនឹងធ្វើឱ្យកាន់តែប្រសើរឡើងនូវសមត្ថភាព Precision Medicine (ព្យាបាលត្រូវតាមលក្ខណរបស់បុគ្គល) របស់ ប្រទេសឡាវ។ ទន្ទឹមនឹងនេះ LSEA ក៏ផ្តល់នូវប្រព័ន្ធមន្ទីរពិសោធន៍ស្តង់ដារ ហើយក៏ជាប្រតិបត្តិករដែលត្រូវបានបណ្តុះបណ្តាលយ៉ាងល្អ ដើម្បីធានាបាននូវប្រសិទ្ធភាព និងគុណភាពនៃការធ្វើតេស្តអាស៊ីតនុយក្លេអ៊ីក។ LSEA នឹងបន្តកសាងសហគមន៍ជោគវាសនារួមគ្នាជាមួយសមាជិករបស់យើងនៅតាមតំបន់ ” Belt and Road” តាមរយៈនៃការផ្លាស់ប្តូរ និងកិច្ចសហប្រតិបត្តិការ។

អំពី STD

កោះបួនពាន់ ដែលជាតំបន់ថ្មីនៅក្នុង ខេត្តចំប៉ាសក្ដិ ជាគម្រោងវិនិយោគបរទេសដ៏ធំបំផុតមួយនៅក្នុង ប្រទេសឡាវ គោលដៅគឺបង្កើតជាទីក្រុងបៃតង និងទំនើប ដែលមិនប៉ះពាល់ដល់បរិស្ថាន។ ក្រុមហ៊ុនអភិវឌ្ឍន៍ Sithandone Joint Development Co., Ltd. (STD) មានបំណងកសាងឲ្យទៅជាទីប្រជុំជន រមណីយដ្ឋាន និងកន្លែងកម្សាន្ត ដើម្បីទាក់ទាញទេសចរមកពីជុំវិញពិភពលោក។ ការអភិវឌ្ឍនេះ រួមមានមជ្ឈមណ្ឌលពិព័រណ៍ និងសន្និបាតពាណិជ្ជកម្មអាស៊ី មជ្ឈមណ្ឌលស្រាវជ្រាវកសិកម្ម ក៏ដូចជារោងចក្រកែច្នៃ អគារផ្សេងៗ នឹងសេវាកម្មទេសចរណ៍ជាដើម។ STD គ្រោងនឹងវិនិយោគជាង ៩ ពាន់លានដុល្លារសហរដ្ឋអាម៉េរិក ក្នុងគោលបំណងទាក់ទាញភ្ញៀវទេសចរណ៍ចំនួន ២,៣ លាននាក់ ក្នុងមួយឆ្នាំនៅឆ្នាំ ២០៣០ និង ១៥ លាននាក់ ក្នុងមួយឆ្នាំ នៅឆ្នាំ ២០៥០។ ទីតាំងគម្រោងនេះ ស្ថិតនៅក្នុង ស្រុកខុង និងកោះនានា ក្នុងទន្លេមេគង្គភាគខាងត្បូងនៃ ប្រទេសឡាវ ដែលគ្របដណ្តប់លើផ្ទៃដីជាង ៩,៨៤៦ ហិកតា៕

March 17, 2022

ជំងឺផ្ដាសាយដ៏អាថ៌កំបាំងនៅ រុស្ស៊ី កាលពី ១៣០ ឆ្នាំមុន អាចបណ្ដាលមកពី វីរុសកូរ៉ូណា

ក្រុមអ្នកវិទ្យាសាស្ត្រកំពុងស្វែងរកប្រភពនៃជំងឺផ្ដាសាយដែលធ្លាប់រាតត្បាតនៅចុងសតវត្សរ៍ទី ១៩ ហើយលទ្ធផលដែលទទួលបាន អាចជួយឱ្យគេព្យាករបាននូវទីបញ្ចប់របស់ កូវីដ-១៩។

ឆ្នាំ ១៨៨៩ ជំងឺផ្លូវដង្ហើមដ៏អាថ៌កំបាំងមួយបានបង្ហាញវត្តមាននៅ ប្រទេសរុស្ស៊ី និងឆ្លងរាលដាលពាសពេញពិភពលោក ដោយមានរលកនៃការឆ្លងធំៗចំនួន ៣ ក្នុងរយៈពេលច្រើនឆ្នាំ។ បច្ចុប្បន្ន អ្នកវិទ្យាសាស្ត្រមួយចំនួនសង្ស័យថា ជំងឺរាតត្បាតដែលមានរហ័សនាមថា «ផ្ដាសាយរុស្ស៊ី» នោះ អាចបង្កឡើងដោយ វីរុសកូរ៉ូណា មួយប្រភេទ ដែលដូចទៅនឹង វីរុស nCoV (កូវីដ-១៩)។

មានចំណុចដូចគ្នាមួយរវាងជំងឺរាតត្បាតសកលទាំងពីរនេះ។ នៅក្នុងជំងឺរាតត្បាត «ផ្ដាសាយរុស្ស៊ី» បណ្ដាសាលារៀន និងកន្លែងធ្វើការ ត្រូវបានបិទទ្វារ ដោយសារតែមានករណីឆ្លងច្រើនពេក។ អ្នកមានជំងឺ «ផ្ដាសាយរុស្ស៊ី» តែងតែបាត់បង់ជីវ្ហាវិញ្ញាញ (រសជាតិ) និង ឃានវិញ្ញាញ (ក្លិន) និងមនុស្សមួយចំនួនត្រូវឆ្លងកាត់ផលប៉ះពាល់ដែលបន្សល់ទុកច្រើនខែ។ «ផ្ដាសាយរុស្ស៊ី» បានសម្លាប់មនុស្សវ័យចំណាស់ច្រើនជាងកុមារ ខុសពី វីរុសផ្ដាសាយធម្មតា ដែលបង្កគ្រោះថ្នាក់ដល់មនុស្សគ្រប់វ័យ។ នេះបើតាមការកត់ត្រាក្នុងប្រវត្តិសាស្ត្រ ដែលរួមមានទាំងទិន្នន័យរបស់រដ្ឋាភិបាល ទស្សនាវដ្ដីវិទ្យាសាស្ត្រ និងសារព័ត៌មាន។

បើទោះជាចំណុចពិសេសនៃ «ផ្ដាសាយរុស្ស៊ី» ដូចខ្លាំងទៅនឹង កូវីដ-១៩ ប៉ុន្តែ សម្មតិកម្មដែលថា «ផ្ដាសាយរុស្ស៊ី» កើតឡើងដោយសារ វីរុសកូរ៉ូណា មួយប្រភេទ ក៏នៅតែមានលក្ខណៈជាការសន្និដ្ឋាន។ នេះបើតាម Peter Palese សាស្ត្រាចារ្យផ្នែកវេជ្ជសាស្ត្រ នៅសាកលវិទ្យា Mount Sinai នាទីក្រុង New York សហរដ្ឋអាម៉េរិក។

វេជ្ជបណ្ឌិត Jeffery Taubenbeerger ប្រធានផ្នែកវីរុសសាស្ត្រ ប្រចាំវិទ្យាស្ថានជាតិប្រតិកម្ម និងជំងឺឆ្លងរបស់ អាម៉េរិក រួមនឹង John Oxford ដែលជាសាស្ត្រាចារ្យផ្នែក វីរុសសាស្ត្រ នៅសាកលវិទ្យាល័យ Queen Mary នៃ ប្រទេសអង់គ្លេស កំពុងស្វែងរកភ័ស្ដុតាងស្ដីពីទំនាក់ទំនងរវាងជំងឺរាតត្បាតទាំងពីរ គឺ កូវីដ-១៩ និង ផ្ដាសាយរុស្ស៊ី ដោយប្រើប្រាស់ទិន្នន័យដែលបានបន្សល់ទុកតាំងពីឆ្នាំ ១៩១៨។

បណ្ឌិត Scott Podolsky សាស្ត្រាចារ្យនៃសាកលវិទ្យាល័យ Harvard និង Dominic W. Hall ដែលជាអ្នកគ្រប់គ្រងសារមន្ទីរផ្នែកវះកាត់ Warren នៅសាកលវិទ្យាល័យ Harvard ក៏ស្វែងរកសំណាកម៉ូលិគុលសួត ដែលត្រូវបានរក្សាទុកនៅក្នុងអំឡុងពេលដូចគ្នានេះ។

បើសិនជា ហ្សែន របស់ វីរុស ដែលបង្កជំងឺផ្ដាសាយរុស្ស៊ី បង្ហាញខ្លួននៅក្នុង ម៉ូលិគុល របស់សួត នោះវានឹងអាចបង្ហើបឱ្យដឹងអំពីទីបញ្ចប់ដែលកើតឡើងដោយរបៀបណា។ បើសិនជំងឺផ្ដាសាយកាលពីចុងសតវត្សរ៍ទី ១៩ កើតឡើងដោយសារ វីរុសកូរ៉ូណា មួយប្រភេទ ក្រុមអ្នកវិទ្យាសាស្ត្រយល់ថា វាអាចនៅតែមានវត្តមានក្រោមទម្រង់ជា វីរុស មួយ ក្នុងចំណោម វីរុសកូរ៉ូណា ចំនួន ៤ ប្រភេទ ដែលបង្កជំងឺផ្ដាសាយធម្មតា ជាជាងជំងឺឆ្លងធ្ងន់ធ្ងរ៕

February 18, 2022

ភាពយន្តស្ដីពីការប្រយុទ្ធនឹង COVID-19 នៅ Wuhan រកបានចំណូលបាន 154 លានដុល្លារអាមេរិក

(ប្រទេសចិន)៖ «Chinese Doctors» ដែលជាខ្សែភាពយន្តចិន និយាយអំពីការប្រយុទ្ធប្រឆាំងនឹងរោគរាតត្បាត COVID-19 នៅទីក្រុង Wuhan រកបានប្រាក់ចំណូល 1 ពាន់លានយុន (ជាង 154 លានដុល្លារអាមេរិក)។

យោងតាមសារព័ត៌មាន Sina ខ្សែភាពយន្តដែលបានធ្វើឱ្យកក្រើកបន្ទប់លក់សំបុត្រក្នុងរដូវក្ដៅឆ្នាំនេះ កំពុងតែនាំមុខគេលើប្រាក់ចំណូល បើធៀបនឹងខ្សែភាពយន្តដែលចេញដំណាលគ្នា មានដូចជា រឿង 1921 ឬ Realm of Terracotta ជាដើម។ ក្រុមអ្នកជំនាញ បានព្យាករថា Chinese Doctors នឹងរកបានចំណូលប្រហែល 1.6 ពាន់លានយុន ដែលស្មើនឹង 247 លានដុល្លារអាមេរិក។

Chinese Doctors ដែលបានថតកាលពីចុងឆ្នាំ 2020 គឺជាភាពយន្តមួយ យោងទៅតាមទិដ្ឋភាពនៅឯមន្ទីរពេទ្យនានាក្នុងទីក្រុង Wuhan ចាប់តាំងពី COVID-19 បានបង្ហាញខ្លួន រហូតដល់ត្រូវបានគ្រប់គ្រង។ ស្នាដៃនិពន្ធនេះ បង្ហាញឡើងវិញនូវទិដ្ឋភាពនៃប្រការប្រយុទ្ធប្រឆាំងនឹង COVID-19 រួមនឹងការតស៊ូដើម្បីរស់របស់ក្រុមវេជ្ជបណ្ឌិត និងបុគ្គលិកសុខាភិបាល។ Chinese Doctors មានការចូលរួមសំដែងពីតារាល្បីៗមួយចំនួន ដូចជា Zhang Hanyu (ដើរតួជា Zhang Jingyu), Yuan Quan (Wen Ting), Zhu Yawen (Tao Jun), Li Chen (Wu Chenguang), Jackson Yee (Yang Xiaoyang), Oho Ou (Jin Zai) និង Zhou Ye (Xiao Wen)។ល។

ទោះជាជោគជ័យក៏ដោយ ប៉ុន្តែ Chinese Doctors ក៏ទទួលបានការរិះគន់មួយចំនួន ដូចជាថា ភាពយន្តនេះ មានកន្លែងខ្លះខ្វះភាពត្រឹមត្រូវ មិនដូចជាក់ស្ដែង។ អ្នកខ្លះថា «រោគរាតត្បាតមិនទាន់បានបញ្ចប់ផង ប៉ុន្តែ សាច់រឿងនេះ មើលទៅដូចបានកើតឡើងតាំងពីសតវត្សរ៍មុន»។

Chinese Doctors គឺជាខ្សែភាពយន្តដ៏កម្រ ដែលរកបានចំណូលច្រើនគួរសមនៅក្នុងរដូវក្ដៅឆ្នាំនេះ។ យោងតាម Mtime គិតមកដល់ថ្ងៃទី 21 កក្កដា ចំណូលសរុបនៅក្នុងរដូវក្ដៅឆ្នាំនេះ មានចំនូនជាង 4.2 ពាន់លានយុន ស្មើនឹង 648.6 លានដុល្លារអាមេរិក ថយចុះពាក់កណ្ដាល បើធៀបនឹងអំឡុងពេលដូចគ្នា ក្នុងឆ្នាំ 2018 និង 2019៕

ប្រភព៖ Xinhuanet
ប្រែសម្រួល៖ បុត្រា

July 22, 2021

WHO ព្រមានអំពី COVID-19 វ៉ារ្យ៉ង់ ថ្មី ដ៏គ្រោះថ្នាក់ អាចឆ្លងរាលដាលទូទាំងសកលលោក

អង្គការសុខភាពពិភពលោក (WHO) បានព្រមានអំពីលទ្ធភាពដែលក្រុមវីរុស COVID-19 បំប្លែងខ្លួនថ្មី ប្រកបដោយគ្រោះថ្នាក់ជាង និងងាយឆ្លងជាង នឹងអាចបង្ហាញខ្លួន នៅពាសពេញពិភពលោក បណ្ដាលឱ្យការទប់ស្កាត់ កាន់តែជួបការលំបាក។

«មហារោគរាតត្បាត មិនទាន់អាចបញ្ចប់» គណៈកម្មការគ្រាអាសន្នរបស់អង្គការសុខភាពពិភពលោក កាលពីថ្ងៃទី 15 កក្កដា បានព្រមានដូច្នេះ បន្ទាប់ពីកិច្ចប្រជុំមួយនៅមុននោះមួយថ្ងៃ។

Didier Houssin ប្រធានគណៈកម្មការខាងលើបានទទួលស្គាល់ថា «របត់ថ្មី ក្នុងមួយរយៈពេលចុងក្រោយនេះ ពិតជាគួរឱ្យព្រួយបារម្ភ»។ លោក Didier Houssin និយាយថា មួយឆ្នាំកន្លះ បន្ទាប់ពី WHO បានប្រកាសគ្រាអាសន្នដំបូងអំពីសុខភាពសាធារណៈ និងកម្រិតនៃភាពអាសន្ន «យើងនៅតែរត់តាមវីរុសនេះ ហើយវីរុសនេះក៏កំពុងតែរត់តាមយើង»។

បច្ចុប្បន្ន វ៉ារ្យ៉ង់ (វីរុសបំប្លែងខ្លួនថ្មី) ចំនួន 4 របស់ COVID-19 កំពុងតែគ្រប់គ្រងវិបត្តិសុខភាពនៅទូទាំងសកលលោក រួមមាន Alpha, Beta, Gamma និងពិសេសគឺវ៉ារ្យ៉ង់ Delta ដែលកំពុងឆ្លងរាលដាលយ៉ាងឆាប់រហ័ស។ ក៏ប៉ុន្តែ គណៈកម្មការខាងលើ បានព្រមានថា បញ្ហាអាក្រក់ជាងបច្ចុប្បន្ន អាចនៅខាងមុខនៅឡើយ ដោយលើកឡើងអំពី «លទ្ធភាពខ្ពស់ដែល វីរុសបំប្លែងខ្លួនថ្មី អាចបង្ហាញខ្លួន និងឆ្លងរាលដាលពេញពិភពលោក» ហើយបង្កើតបានជាឧបសគ្គធំធេងសម្រាប់ការប្រយុទ្ធប្រឆាំងរបស់មនុស្ស។

WHO ប្រកាសថា បណ្ដាវីរុសបំប្លែងខ្លួន ដែល «គួរឱ្យបារម្ភ» គឺនៅពេលពួកវាត្រូវបានគេចាត់ទុកថា ងាយឆ្លងជាងវីរុសធម្មតា និងបង្កការស្លាប់ច្រើនជាងមុន ឬមានលទ្ធភាពទប់ទល់នឹងវ៉ាក់សាំង។

WHO និយាយថា «ការពាក់ម៉ាស់ ការរក្សាគម្លាត រក្សាអនាម័យ និងកែលម្អប្រព័ន្ធបន្សុទ្ធខ្យល់ក្នុងផ្ទះ នៅតែជាគន្លឹះសំខាន់ក្នុងការកាត់បន្ថយការឆ្លងរាលដាល»។ អង្គការនេះក៏បានសង្កត់ធ្ងន់ថា ត្រូវការចាក់វ៉ាក់សាំងឱ្យបានយ៉ាងតិច 10% នៃចំនួនប្រជាជនសរុបរបស់ប្រទេសនីមួយៗ នៅត្រឹមខែកញ្ញាខាងមុខ រួមនឹងការចែករំលែកវ៉ាក់សាំង រវាងប្រទេសអ្នកមាន និងប្រទេសអ្នកក្រ។

គិតមកដល់ព្រឹកថ្ងៃទី 16 ខែកក្កដា ឆ្នាំ 2021 ពិភពលោកទាំងមូល បានរកឃើញអ្នកឆ្លងវីរុស COVID-19 សរុបចំនួន 189,702,247 នាក់ ក្នុងនោះមាន 4,082,637 នាក់បានស្លាប់, 173,130,284 នាក់ បានជាសះស្បើយ និង 12,489,326 នាក់ កំពុងព្យាបាល ហើយក្នុងចំណោមនេះដែរ ក៏មានអ្នកជំងឺជាង 79,220 នាក់ កំពុងប្រឈមនឹងការបាត់បង់ជីវិត ដោយសារតែអាការធ្ងន់ធ្ងរ៕

ប្រភព៖ CNN, AFP, Worldometers,
ប្រែសម្រួល៖ បុត្រា

July 16, 2021

COVID-19 នៅ វៀតណាម ៖ វិជ្ជមានជាង 1,400 នាក់ ក្នុងមួយថ្ងៃ

នាព្រឹកថ្ងៃទី 16 កក្កដានេះ ក្រសួងសុខាភិបាល វៀតណាម បានឱ្យដឹងថា ទើបរកឃើញអ្នកវិជ្ជមាននឹង COVID-19 ថ្មី ចំនួន 1,438 នាក់ បន្ថែមទៀត ក្នុងរយៈពេល 24 ម៉ោងនៃថ្ងៃទី 15 ខែកក្កដា។

ក្នុងចំណោមអ្នកវិជ្ជមានថ្មីទាំង 1,438 នាក់ខាងលើ គឺមាន 1,071 នាក់ នៅទី ក្រុងហូជីមិញ ខណៈនៅរដ្ឋធានី ហាណូយ មានត្រឹមតែ 3 ករណីប៉ុណ្ណោះ។ ទីក្រុង ហូជីមិញ មានអ្នកឆ្លង COVID-19 សរុបចំនួន 22,564 នាក់ ចំណែក រដ្ឋធានី ហាណូយ មានចំនួន 567 នាក់។

មកដល់បច្ចុប្បន្ន វៀតណាម បានរកឃើញអ្នកវិជ្ជមានសរុប ទូទាំងប្រទេស ចំនួន 38,675 នាក់ ក្នុងនោះមានជាង 20,000 នាក់កំពុងព្យាបាល, ជាង 200 នាក់ បានស្លាប់ និងជាង 8,000 នាក់ បានជាសះស្បើយ។

គិតមកដល់ព្រឹកនេះ វៀតណាម ចាក់វ៉ាក់សាំងជូនពលរដ្ឋបានចំនួន 4,185,623 ដូស ក្នុងនោះ ពលរដ្ឋដែលបានទទួលការចាក់វ៉ាក់សាំង 1 ដូស មានចំនួន 3,890,947 នាក់ និងអ្នកដែលបានចាក់រួចរាល់ មានចំនួន 294,6767 នាក់៕

ប្រភព៖ VNexpress
ប្រែសម្រួល៖ បុត្រា

July 16, 2021

ពលរដ្ឋ 19,000 នាក់ ធ្វើបាតុកម្មក្នុងថ្ងៃបុណ្យឯករាជ្យរបស់ បារាំង

បារាំង៖ មនុស្សប្រហែល 19,000 នាក់ បានចូលរួមធ្វើបាតុកម្មនៅក្នុងថ្ងៃបុណ្យឯករាជ្យរបស់ បារាំង នៅពាសពេញផ្ទៃប្រទេស ដើម្បីប្រឆាំងនឹងការរឹតបន្តឹងថ្មីក្នុងបំណងគ្រប់គ្រងស្ថានការណ៍ COVID-19 របស់រដ្ឋាភិបាល។

បាតុកម្មដាច់ដោយឡែកជាច្រើនក្រុម ត្រូវបានធ្វើឡើងកាលពីថ្ងៃទី 14 ខែកក្កដា នៅពាសពេញផ្ទៃប្រទេស ក្នុងនោះក៏មាន ទីក្រុង Paris, Toulouse, Bordeaux, Montpelier, Nantes រួមនឹងតំបន់ផ្សេងៗមួយចំនួនទៀត។ ក្រុមមន្ត្រីរដ្ឋាភិបាល បារាំង ឱ្យដឹងថា មនុស្សប្រមាណ 19,000 នាក់ បានចូលរួមធ្វើបាតុកម្ម។ ក្រសួងមហាផ្ទៃ បារាំង បានប្រកាសថា បាតុកម្មតូច-ធំ ចំនួន 53 ត្រូវបានធ្វើឡើងនៅតំបន់សំខាន់ៗនៃប្រទេសនេះ។

បាតុកម្មមួយចំនួននៅ Paris បានចាប់ផ្ដើមនៅព្រឹកថ្ងៃទី 14 ខែកក្កដា ក្នុងគ្រាដែលក្បួនព្យុហយាត្រាប្រចាំឆ្នាំ អបអរថ្ងៃបុណ្យឯករាជ្យបារាំង ត្រូវបានធ្វើឡើងតាមបណ្ដោយមហាវិថី Champs-Elysees ក្រោមអធិបតីភាពរបស់ប្រធានាធិបតី Emmanuel Macron។

មូលហេតុនៃបាតុកម្មនេះ កើតឡើងដោយសារក្រុមបាតុករមិនពេញចិត្តនឹងសេចក្ដីសម្រេចមួយដែលបានប្រកាសកាលពីថ្ងៃទី 12 កក្កដា ស្ដីពីការបង្ខំឱ្យបុគ្គលិកសុខាភិបាល ទទួលការចាក់វ៉ាក់សាំង ក៏ដូចជាការតម្រូវឱ្យពលរដ្ឋត្រូវបង្ហាញប័ណ្ណចាក់វ៉ាក់សាំង ទើបអាចចេញ-ចូលទីសាធារណៈ ឬតម្រូវឱ្យពលរដ្ឋដែលមិនទាន់បានចាក់វ៉ាក់សាំង ត្រូវបង្ហាញលទ្ធផលអវិជ្ជមាន ទើបអាចចូលភោជនីយដ្ឋានបាន។

យោងតាមការស្រាវជ្រាវមួយរបស់ Elabe ដែលបានប្រកាសកាលពីថ្ងៃទី 13 កក្កដា វិធានការថ្មីខាងលើនេះ ទទួលបានការគាំទ្រច្រើនពីសំណាក់ពលរដ្ឋបារាំង។ ពលរដ្ឋប្រមាណ 35.5 លាននាក់ (ជាងពាក់កណ្ដាលនៃចំនួនប្រជាជនសរុបរបស់បារាំង) បានចាក់វ៉ាក់សាំង COVID-19 យ៉ាងតិច 1 ដូសរួចហើយ។

គិតមកដល់បច្ចុប្បន្ន បារាំង បានរកឃើញអ្នកឆ្លង COVID-19 សរុបចំនួន 5,829,724 នាក់ ក្នុងនោះក៏មានករណីស្លាប់ 111,413 នាក់, ជាសះស្បើយ 5,162,757 នាក់ និងកំពុងព្យាបាលចំនួន 555,554 នាក់៕

ប្រភព៖ AFP
ប្រែសម្រួល៖ បុត្រា

July 15, 2021

ឆេះមន្ទីរពេទ្យព្យាបាលជំងឺ COVID-19 បណ្ដាលឱ្យមានអ្នកស្លាប់យ៉ាងតិច 42 នាក់

អ៊ីរ៉ាក់៖ មន្ទីរពេទ្យមួយដែលមានជំនាញក្នុងការព្យាបាលជំងឺ COVID-19 នៅទីក្រុង Nassiriya បានជួបគ្រោះអគ្គិភ័យ បណ្ដាលឱ្យមនុស្សយ៉ាងហោចណាស់ 100 នាក់ ត្រូវរងរបួស និងបាត់បង់ជីវិត។

អគ្គិភ័យដែលបានកើតឡើងកាលពីថ្ងៃទី 12 ខែកក្កដា នៅមន្ទីរពេទ្យ al-Hussain នាទីក្រុង Nassiriya ស្ថិតនៅភាគខាងត្បូងប្រទេសអ៊ីរ៉ាក់នេះ បានបណ្ដាលឱ្យមនុស្សយ៉ាងតិច 42 នាក់ បានស្លាប់ និងជាង 60 នាក់ រងរបួស។ មូលហេតុនៃអគ្គិភ័យនេះ ត្រូវបានគេជឿថា កើតឡើងដោយសារការផ្ទុះបំពង់អុកស៊ីហ្សែន។ ចំនួនអ្នកស្លាប់ អាចកើនឡើងបន្តទៀត ដោយសារមានមនុស្សជាច្រើនកំពុងបាត់ខ្លួននៅឡើយ។

ក្រុមមន្ត្រីមូលដ្ឋាន បានឱ្យដឹងថា សកម្មភាពជួយសង្គ្រោះ ត្រូវបានធ្វើឡើងមិនឈប់ឈរ ក្រោយពីអគ្គិភ័យត្រូវបានគ្រប់គ្រង ប៉ុន្តែ ដោយសារផ្សែងក្រាស់ខ្លាំង ដំណើរការជួយសង្គ្រោះ ក៏ត្រូវជួបការលំបាក។

របាយការណ៍បឋមរបស់ប៉ូលិស បានឱ្យដឹងថា បំពង់អុកស៊ីហ្សែនសម្រាប់ព្យាបាលអ្នកជំងឺ COVID-19 បានផ្ទុះ និងបណ្ដាលឱ្យកើតមានអគ្គិភ័យនេះ។

នេះគឺជាករណីឆេះមន្ទីរពេទ្យទីពីរនៅប្រទេសនេះ ក្នុងរយៈពេល 3 ខែកន្លង។ កាលពីខែមេសា មន្ទីរពេទ្យ Ibn Khatib នៅរដ្ឋធានី បាកដាដ ក៏ជួបគ្រោះអគ្គិភ័យ ដោយសារតែផ្ទុះបំពង់អុកស៊ីហ្សែន បណ្ដាលឱ្យមនុស្សចំនួន 82 នាក់ បានស្លាប់ និង 110 នាក់រងរបួស៕

ប្រភព៖ Reuters
ប្រែសម្រួល៖ បុត្រា

July 13, 2021

Covid-19 នៅ វៀតណាម ៖ អ្នកវិជ្ជមានជាង 1,700 នាក់ ត្រូវបានរកឃើញ ចាប់ពីព្រឹក ដល់ថ្ងៃត្រង់ នៃថ្ងៃទី 12 ខែកក្កដា

វៀតណាម នាល្ងាចថ្ងៃទី 12 ខែកក្កដា ឆ្នាំ 2021 នេះ បានឱ្យដឹងថា បានរកឃើញករណីឆ្លង Covid-19 ចំនួន 1,112 នាក់បន្ថែមទៀត ក្នុងនោះមាន 1,105 នាក់ ជាករណីឆ្លងក្នុងស្រុក និង 7 នាក់ ជាករណីនាំចូលពីបរទេស។

ក្នុងចំណោមអ្នកជំងឺថ្មីខាងលើ មាន 879 នាក់ ត្រូវបានរកឃើញនៅទីក្រុងហូជីមិញ ខណៈរដ្ឋធានីហាណូយ មានតែ 82 នាក់ប៉ុណ្ណោះ។ រាប់ចាប់ពីព្រឹក រហូតដល់ម៉ោង 2 ល្ងាចថ្ងៃនេះ វៀតណាម បានរកឃើញអ្នកវិជ្ជមានសរុបចំនួន 1,764 នាក់ នៅទូទាំងប្រទេស។

គិតមកដល់បច្ចុប្បន្ន វៀតណាម បានរកឃើញអ្នកវិជ្ជមាននឹង Covid-19 សរុបចំនួន 27.259 នាក់ ក្នុងនោះមាន 19.125 នាក់ កំពុងព្យាបាល, 8.025 នាក់បានជា និង 105 នាក់ បានបាត់បង់ជីវិត៕

ប្រភព៖ ក្រសួងសុខាភិបាលវៀតណាម
ប្រែសម្រួល៖ បុត្រា

July 12, 2021

វ៉ាក់សាំង Sinovac របស់ ចិន មានប្រសិទ្ធភាពពិត ដល់កម្រិតណា?

វ៉ាក់សាំងរបស់ក្រុមហ៊ុន ចិន ស៊ីណូវ៉ាក់ (Sinovac) ជួយទប់ស្កាត់ការឆ្លង Covid-19 ការត្រូវចូលពន្យាបាលនៅមន្ទីរពេទ្យ និងអត្រានៃការស្លាប់ ប៉ុន្តែ កម្រិតនៃប្រសិទ្ធភាពរបស់វា ថយចុះទៅតាមពេលវេលា និងខ្សោយ នៅចំពោះមុខ វ៉ារ្យ៉ង់ (វីរុសបំប្លែងខ្លួន) ឈ្មោះ Delta។

វ៉ាក់សាំងរបស់ក្រុមហ៊ុន ចិន Sinovac Biotech គឺជាវ៉ាក់សាំងប្រឆាំង Covid-19 ដែលត្រូវបានប្រើប្រាស់ច្រើនបំផុតក្នុងពិភពលោក ដោយមានជាង 943 លានដូស ត្រូវបានផ្គត់ផ្គង់។ នេះបើតាមសារព័ត៌មាន South China Morning Post។

ទិន្នន័យនៃការចាក់វ៉ាក់សាំងខាងលើ នៅប្រទេស ឈីលី ដែលត្រូវបានចុះផ្សាយលើគេហទំព័រវេជ្ជសាស្ត្រ New England Journal of Medicine កាលពីសប្ដាហ៍មុន បានបង្ហាញថា វ៉ាក់សាំង Sinovac មានប្រសិទ្ធភាព 65.9% ក្នុងការទប់ស្កាត់ការឆ្លងនៃវីរុស Covid-19, 87.5% ក្នុងការទប់ស្កាត់ការចូលពេទ្យ និង 86.3% ក្នុងការទប់ស្កាត់មិនឱ្យអ្នកជំងឺបាត់បង់ជីវិត។

បច្ចុប្បន្ន នៅមានកង្វះខាតច្រើន ទាក់ទិននឹងការសិក្សាស្រាវជ្រាវអំពីប្រសិទ្ធភាពរបស់វ៉ាក់សាំង នៅចំពោះមុខឥទ្ធិពលរបស់ វ៉ារ្យ៉ង់ Delta នៃវីរុស Covid-19។ Feng Zijian អនុប្រធាននៃមជ្ឈមណ្ឌលគ្រប់គ្រង និងបង្ការជំងឺឆ្លងរបស់ ចិន កាលពីខែមិថុនា បានននិយាយថា អង្គបដិប្រាណដែលបង្កើតឡើងដោយសារវ៉ាក់សាំង Covid-19 ចំនួន 2 ប្រភេទរបស់ ចិន មានប្រសិទ្ធភាពតិច នៅចំពោះមុខ វ៉ារ្យ៉ង់ Delta បើធៀបនឹង វ៉ារ្យ៉ង់ ដទៃ ប៉ុន្តែ វ៉ាក់សាំងនេះនៅតែជួយការពារបាន។ លោក Feng Zijian មិនបានបង្ហើបឱ្យដឹងអំពីឈ្មោះរបស់វ៉ាក់សាំងទាំង 2 ខាងលើនេះទេ។

ក្រុមមន្ត្រីសុខាភិបាល កំពុងស្នើឱ្យមានការសិក្សាបន្ថែមអំពីប្រសិទ្ធភាពរបស់វ៉ាក់សាំងខាងលើ នៅចំពោះមុខវីរុសបំប្លែងខ្លួន Delta និងថា តើចាំបាច់ត្រូវចាក់ម្ជុលទីបីដែរ ឬទេ ដើម្បីបង្កើនកម្លាំងការពាររាងកាយ។

ឥណ្ឌូនេស៊ី គឺជាប្រទេសមួយ ក្នុងចំណោមប្រទេសដែលប្រើប្រាស់វ៉ាក់សាំង Sinovac ច្រើនជាងគេ។ ទិន្នន័យរបស់ក្រុមស្រាវជ្រាវឯករាជ្យ LaporCovid-19 បង្ហាញថា បុគ្គលិកសុខាភិបាលរបស់ ឥណ្ឌូនេស៊ី ជាង 130 នាក់ បានស្លាប់ដោយសារ Covid-19 រាប់ចាប់ពីខែមិថុនា ក្នុងនោះមាន 58 នាក់ បានស្លាប់ក្នុងខែកក្កដា។ ក្រុមស្រាវជ្រាវ មិនបានឱ្យដឹងថា មានជនរងគ្រោះប៉ុន្មាននាក់បានទទួលការចាក់វ៉ាក់សាំងរួចរាល់នោះទេ ប៉ុន្តែ មានបុគ្គលិកសុខាភិបាល ឥណ្ឌូនេស៊ី ចំនួនប្រហែល 95% បានទទួលការចាក់វ៉ាក់សាំង។

អ្នកជំនាញផ្នែករោគឆ្លង ជនជាតិ ឥណ្ឌូនេស៊ី Dicky Budiman មកពីសាកលវិទ្យាល័យអូស្ត្រាលី Griffith និយាយថា បុគ្គលិកសុខាភិបាលជាច្រើននាក់ បើទោះបានឆ្លងវីរូស ប៉ុន្តែ នៅតែគេចផុតពីការស្លាប់ និងមានរោគសញ្ញាស្រាល។ «ប្រការនេះនាំឱ្យយើងជឿថា វ៉ាក់សាំង Sinovac មានប្រសិទ្ធភាពក្នុងកម្រិតណាមួយ ក្នុងការប្រឆាំងនឹងវ៉ារ្យ៉ង់ថ្មី។ នេះជាមូលហេតុដែលយើងលើកទឹកចិត្តឱ្យពលរដ្ឋ ទទួលយកការចាក់វ៉ាក់សាំងនេះ» លោក Budiman បញ្ជាក់បន្ថែម។

ករណីដែលបុគ្គលិកសុខាភិបាលបាត់បង់ជីវិតដោយសារ Covid-19 ត្រូវបានលោក Budiman អះអាងថា អាចបណ្ដាលមកពីការចុះថយនៃប្រសិទ្ធភាពរបស់វ៉ាក់សាំង ទៅតាមពេលវេលា និងថមថយឥទ្ធិពល នៅចំពោះមុខវ៉ារ្យ៉ង់ Delta។

នៅឯប្រទេស ទួរគី វិញ ការស្រាវជ្រាវលើបុគ្គលិកសុខាភិបាលចំនួន 1,053 នាក់ បានបង្ហាញថា ក្រោយការចាក់វ៉ាក់សាំង Sinovac រួចរាល់បាន 3 ខែ 23% ក្នុងចំណោមនេះ មានអង្គបដិប្រាណតិចជាងមុន និងក្រោមកម្រិតនៃប្រសិទ្ធភាព។ ក៏ប៉ុន្តែ ក្នុងចំណោមបុគ្គលិកសុខាភិបាលដែលបានចាក់វ៉ាក់សាំង គឺមាន ត្រឹមតែ 2.8% ប៉ុណ្ណោះ ដែលបានឆ្លងវីរុស និងពុំមានអ្នកណាម្នាក់ត្រូវចូលពេទ្យនោះឡើយ ក្រោយការចាក់វ៉ាក់សាំង ចន្លោះពី 1 ដល់ 3 ខែ។

សាស្ត្រាចារ្យមួយរូប មកពីមហាវិទ្យាល័យជីវវេជ្ជសាស្ត្រ នៃសាកលវិទ្យាល័យហុងកុង យល់ថា ប្រសិទ្ធភាពរបស់ Sinovac ប្រាកដជានឹងថយចុះនៅចំពោះមុខវីរុសបំប្លែងខ្លួន Delta ប៉ុន្តែ ថយចុះប៉ុន្មានភាគរយ គេមិនទាន់ដឹងច្បាស់នៅឡើយ។ លោកយល់ថា ត្រូវការកែសម្អប្រសិទ្ធភាព និងសាកល្បងចាក់ម្ជុលទីបី សម្រាប់ក្រុមមនុស្សដែលមានហានិភ័យខ្ពស់ ឬចាក់លាយជាមួយវ៉ាក់សាំងដទៃ។

ចំណែក Yin Weidong ដែលជាប្រធានប្រតិបត្តិរបស់ក្រុមហ៊ុន Sinovac បាននិយាយថា លទ្ធផលនៃការពិសោធលើមនុស្ស បង្ហាញថា អ្នកដែលបានចាក់វ៉ាក់សាំងដូសទីបី បន្ទាប់ពីបានចាក់ដូសទីពីរបានពី 3 ដល់ 6 ខែ មានអង្គបដិប្រាណកើនឡើងច្រើនជាងមុន 10 ដង ដោយប្រើពេលត្រឹមតែ 10 ថ្ងៃ ក្រោយពីបានចាក់៕

ប្រភព៖ SCMP
ប្រែសម្រួល៖ បុត្រា

July 12, 2021

ឥណ្ឌា៖ អ្នកជំងឺCovid-19 ជាច្រើននាក់ ធ្វើចត្តាឡីស័កលើដើមឈើ ដូចក្នុងរឿង Tarzan

ដោយសារតែផ្ទះចង្អៀតពេក ទើបពលរដ្ឋជាច្រើននៅប្រទេស ឥណ្ឌា ត្រូវនឹករកវិធីសាស្ត្រធ្វើចត្តាឡីស័កចម្លែកជាងគេ ដើម្បីបង្ការការឆ្លងរាលដាលនៃ Covid-19។

ថ្មីៗនេះ សារព័ត៌មាន ឥណ្ឌា បានរាយការណ៍ថា កំលោះវ័យ 18ឆ្នាំម្នាក់ មានឈ្មោះថា Shiva រស់នៅក្នុងភូមិ Telangana បានឆ្លងកាត់ការរស់នៅរយៈពេល 11ថ្ងៃ នៅលើដើមឈើ ដើម្បីចៀសវាងការចម្លងវីរុសCovid-19 ដល់គ្រួសារ បន្ទាប់ពីខ្លួនវិជ្ជមាននឹងវីរុសនេះ។

នៅពេលប្រទេសឥណ្ឌា ដាក់បម្រាមគោចរទូទាំងប្រទេសកាលពីឆ្នាំទៅ ពលករចំណាកស្រុកជាច្រើន បានត្រលប់ទៅស្រុកកំណើត ព្រោះតែកន្លែងធ្វើការត្រូវគេបិទទ្វារ។ ពេលនោះ មានមនុស្សជាច្រើនត្រូវបង្ខំចិត្តធ្វើចត្តាឡីស័កតាមវិធីផ្សេងៗ ដែលអាចធ្វើទៅបាន។

Shiva គឹជានិស្សិតម្នាក់ កំពុងសិក្សានៅទីក្រុង Hyderabad នៃរដ្ឋ Telangana។ នៅពេល Covid-19 ឆ្លងរាលដាលខ្លាំងនៅទីក្រុង កំលោះ Shiva ក៏ត្រលប់មកស្រុកវិញ។ Shiva ត្រូវបានគេធ្វើតេស្តឃើញថា វិជ្ជមាននឹង Covid-19 កាលពីថ្ងៃទី04 ខែឧសភា ឆ្នាំ2021 ហើយក៏ត្រូវក្រុមគ្រូពេទ្យស្នើឱ្យនៅដាច់ដោយឡែកពីគ្រួសារ។

ក៏ប៉ុន្តែ ដោយសារផ្ទះចង្អៀតពេក Shiva ក៏នឹកឃើញវិធីចម្លែកមួយ៖ Shiva យកដើមឫស្សី ចងភ្ជាប់នឹងមែកឈើ ដើម្បីបង្កើតជាកន្លែងស្នាក់នៅប្រចាំថ្ងៃរបស់ខ្លួន។ កំលោះនេះក៏បង្កើតប្រព័ន្ធខ្សែរូត និងឧបករណ៍ចាំបាច់សម្រាប់ប្រើប្រាស់ ក៏ដូចជាសម្រាប់ទទួលអាហារពីគ្រួសារ។

Shiva និយាយថា៖ «ពុំមានអ្នកណាម្នាក់នៅក្នុងភូមិ ហ៊ានមកជួបខ្ញុំទេ ព្រោះខ្លាច Covid-19។ ប៉ុន្តែ ខ្ញុំគិតថា មិនចាំបាច់ភ័យខ្លាចពេកទេ អ្នកអាចយកឈ្នះលើវា ដោយការគិតប្រកបដោយវិជ្ជមាន»។ Shiva ឱ្យដឹងថា ក្នុងពេលសម្រាកលើដើមឈើ គាត់អានសៀវភៅ ស្ដាប់ចម្រៀង និងនិយាយគ្នាលេងជាមួយមិត្តភ័ក្ដិ។

រហូតដល់ពេលអ្នកយកព័ត៌មានបានដឹងអំពីហេតុការណ៍នេះ Shiva ពេលនោះក៏ធ្វើចត្តាឡីស័កបាន 11ថ្ងៃរួចហើយ។ ភូមិដែល Shiva រស់នៅ មានគ្រួសារប្រមាណ 350គ្រួ ប៉ុន្តែ មណ្ឌលសុខភាពនៅឆ្ងាយពីនោះ 5គម ខណៈមន្ទីរពេទ្យដែលនៅក្បែរបំផុត ក៏មានចម្ងាយរហូតដល់ 30គម។

បើទោះជាមណ្ឌលធ្វើចត្តាឡីស័កថ្មី ត្រូវបានបង្កើតឡើងនៅក្នុងទីរួមស្រុក កាលពីថ្ងៃទី13 ខែឧសភា ប៉ុន្តែ មនុស្សតិចតួចណាស់ដែលបានដឹង ដូច្នេះ ពួកគេត្រូវរកវិធីធ្វើចត្តាឡីស័កផ្ទាល់ខ្លួន។ ក្រៅពី Shiva ពលរដ្ឋជាច្រើនក្នុងភូមិ ក៏ត្រូវធ្វើចត្តាឡីស័កដោយឡែកនៅក្នុងបន្ទប់ទឹក ខ្ទម ឬតង់។ល។

ប្រភព៖ Indiatoday
ប្រែសម្រួល៖ បុត្រា

June 11, 2021

Tag: កូវីដ ១៩