កម្មវិធី - La Reine Media

វិស័យអវកាសឥណ្ឌា៖ តាំងពីដឹករ៉ុក្កែតតាមកង់ រហូតដល់បានឡើងដល់ឋានព្រះចន្ទ

អង្គការស្រាវជ្រាវអវកាសឥណ្ឌាបានទទួលជោគជ័យក្រោយពីការប្រឹងប្រែងមិនឈប់ឈររយៈពេលយូរ រាប់ចាប់តាំងពីការដឹកជញ្ជូនគ្រឿងផ្គុំរបស់រ៉ុក្កែតដោយប្រើប្រាស់កង់ និងរទេះគោ រហូតដល់បច្ចេកវិទ្យាទំនើបនាំទៅរកបេសកកម្មចន្ទ្រាយាន-3 (Chandrayaan-3)។

ថ្ងៃទី 23 សីហា 2023 គឺជាថ្ងៃដ៏អស្ចារ្យសម្រាប់ឥណ្ឌា និងការស្រាវជ្រាវអវកាស។ យានអវកាសចន្ទ្រាយាន-3 របស់អង្គការស្រាវជ្រាវអវកាសឥណ្ឌា (ISRO) បានចុះចតដោយជោគជ័យនៅលើឋានព្រះចន្ទ នាំឱ្យឥណ្ឌាក្លាយជាប្រទេសទីបួនបន្ទាប់ពីសូវៀត អាម៉េរិក និងចិន ដែលធ្លាប់បានបញ្ជូនយានស្វ័យប្រវត្តទៅចុះចតនៅទីនេះ។ នេះបើតាមទំព័រ Space News។

ជោគជ័យខាងលើក៏បានធ្វើឱ្យចន្ទ្រាយាន-3 ក្លាយជាយានអវកាសដំបូងគេដែលបានចុះចតនៅប៉ូលខាងត្បូងរបស់ព្រះចន្ទ ជាទីដែលមានទឹកកក និងរ៉ែមានតម្លៃជាច្រើន។ ជោគជ័យរបស់យានអវកាសឥណ្ឌានឹងដើរតួនាទីសំខាន់ក្នុងការប្រមូលទិន្នន័យនានាសម្រាប់ជួយដល់បេសកកម្មឋានព្រះចន្ទក្នុងអនាគត។ ឥណ្ឌាទទួលបានជោគជ័យនេះបន្ទាប់ពីបេសកកម្ម Luna-25 របស់រុស្ស៊ីបានបរាជ័យក្នុងការចុះចតលើឋានព្រះចន្ទ។

ចន្ទ្រាយាន-1 ដែលជាយានអវកាសដែលធ្លាប់ហោះជុំវិញព្រះចន្ទក្នុងឆ្នាំ 2008 គឺជាការប្រឹងប្រែងដំបូងរបស់ឥណ្ឌា ដើម្បីបាញ់បង្ហោះយានចេញពីផែនដី។ នោះក៏ជាបេសកកម្មដំបូងដែលបានរកឃើញទឹកលើផ្ទៃព្រះចន្ទ ដែលនេះបានជះឥទ្ធិពលធំធេងដល់គម្រោងអវកាសរបស់អាម៉េរិក និងចិន។ ប៉ូលខាងត្បូងរបស់ព្រះចន្ទក៏ជាទីតាំងចុះចតនៃបេសកកម្ម Artemis-3 របស់អាម៉េរិកផងដែរ។

ចាប់ពីការដឹកជញ្ជូនគ្រឿងផ្គុំរបស់រ៉ុក្កែតដោយការប្រើប្រាស់កង់ និងរទេះគោ រហូតដល់បេសកកម្មចន្ទ្រាយាន-3 រឿងរ៉ាវស្ដីពីវឌ្ឍនភាពរបស់ ISRO គឺដូចទៅនឹងខ្សែភាពយន្ត។ «ជោគជ័យដ៏មហាធំធេងនេះគឺជាភ័ស្ដុតាងបង្ហាញអំពីការប្រឹងប្រែងមិនឈប់ឈរនៃក្រុមអ្នកវិទ្យាសាស្ត្ររបស់យើង» នាយករដ្ឋមន្ត្រីឥណ្ឌា លោក Narendra Modi ធ្លាប់បានសរសេរដូច្នេះនៅលើបណ្ដាញសង្គម។

ប្រវត្តិរបស់ ISRO មានចំណុចពិសេសមួយ នោះគឺភាពធន់ ច្នៃប្រឌិត និងសហការ។ ISRO ត្រូវបានបង្កើតឡើងកាលពីឆ្នាំ 1969 និងរក្សាកម្មវិធីស្រាវជ្រាវអវកាសតាំងពីឆ្នាំ 1988 ហើយបានផ្ដល់ទិន្នន័យដ៏មានតម្លៃទាក់ទងនឹងទិដ្ឋភាពផែនដី។ កាមេរ៉ា PAN របស់ពួកគេធ្លាប់ជាកាមេរ៉ាស៊ីវិលដែលមានកម្រិតភាពច្បាស់ខ្ពស់បំផុត មុនពេលផ្កាយរណប Ikonos របស់ក្រុមហ៊ុន DigitalGlobe នៅសហរដ្ឋអាម៉េរិក បាញ់បង្ហោះកាលពីឆ្នាំ 1999។

ISRO បានបាញ់បង្ហោះយានអវកាសចំនួន 124 លើក ក្នុងនោះក៏មានយាន 3 គ្រឿងទៅកាន់ឋានព្រះចន្ទ និង 1 គ្រឿងទៅកាន់ភពអង្គារ ព្រមទាំងបានជួយដល់ការបាញ់បង្ហោះផ្កាយរណប 424 គ្រឿងពីប្រទេសនានាផងដែរ។ រ៉ុក្កែត PSLV របស់ឥណ្ឌាគឺជាជម្រើសដំបូងសម្រាប់បេសកកម្មហោះហើរទៅកាន់ទីអវកាស ដោយធ្លាប់ដាក់ពង្រាយផ្កាយរណប 104 គ្រឿងក្នុងមួយជើងកាលពីឆ្នាំ 2017 ដែលជាកំណត់ត្រាពិភពលោក រហូតដល់បេសកកម្ម Transporter-1 របស់ SpaceX យកឈ្នះកាលពីឆ្នាំ 2021។

ឆ្នាំ 2018 ISRO បានដំឡើងប្រព័ន្ធកំណត់ទិសផ្ទាល់ខ្លួនដែលមានឈ្មោះថា NavlC ដើម្បីជំនួស GPS របស់អាម៉េរិក និងប្រព័ន្ធកំណត់ទិសរបស់រុស្ស៊ី ចិន សហភាពអឺរ៉ុប និងជប៉ុន។

បណ្ដាបេសកកម្ម ចន្ទ្រាយាន ឬចន្ត្រាយាន (Chandrayaan) បានបង្ហាញថា ឥណ្ឌាកំពុងក្លាយជាម្ចាស់មួយរបស់វិស័យបច្ចេកវិទ្យាដឹកជញ្ជូនធុនធ្ងន់។ ជោគជ័យកន្លងមកបានបញ្ជាក់ថា ឥណ្ឌាមានលទ្ធភាពគ្រប់គ្រាន់ដើម្បីអនុវត្តគម្រោងនានានៅឋានព្រះចន្ទក្នុងពេលអនាគត៕

August 25, 2023

រូបភាពភ្នំភ្លើងលើឋានព្រះចន្ទដែលថតដោយយានអវកាសរុស្ស៊ី Luna-25

រូបភាពដំបូងដែលថតដោយយានស្រាវជ្រាវព្រះចន្ទរបស់ប្រទេសរុស្ស៊ី ត្រូវបានប្រកាសកាលពីថ្ងៃទី 17 សីហា ឆ្នាំ 2023 (ពេលវេលាក្នុងស្រុក)។

យោងតាមទីភ្នាក់ងារអវកាសរុស្ស៊ី Roscosmos យានអវកាស Luna-25 បានបញ្ជូនបណ្ដារូបភាពស្ដីពីមាត់ភ្នំភ្លើងនៅតំបន់ប៉ូលឆ្ងាយរបស់ព្រះចន្ទ មកកាន់ផែនដី។ តាមគម្រោង យានស្រាវជ្រាវព្រះចន្ទដំបូងរបស់រុស្ស៊ីក្រោយរយៈពេល 47 ឆ្នាំ គ្រោងនឹងធ្វើការពិសោធ ស្រាវជ្រាវផ្ទៃរបស់ឋានព្រះចន្ទចាប់ពីសប្ដាហ៍ក្រោយ។

បណ្ដារូបភាពស្ដីពីមាត់ភ្នំភ្លើង Zeeman បង្ហាញថា ភ្នំភ្លើងនេះមានកម្ពស់ជិត 8 គីឡូម៉ែត្រ ធៀបនឹងផ្ទៃរាបរបស់ព្រះចន្ទ។ ភ្នំភ្លើងនេះ កន្លងមកមិនត្រូវបានអ្នកវិទ្យាសាស្ត្រសង្កេតមើលនោះទេ ដោយសារតែវាស្ថិតនៅមួយចំហៀងដែលតែងតែបែរខ្នងដាក់ផែនដី។

Roscosmos បញ្ជាក់ថា យាន Luna-25 ក៏បានវាស់វែងកាំរស្មីហ្គាម៉ា និងនឺត្រុងពីផ្ទៃរបស់ព្រះចន្ទ ក៏ដូចជាតួលេខប្លាស្មាក្នុងទីអវកាសជុំវិញព្រះចន្ទ រួមនឹងឧស្ម័ន និងធូលីលើគន្លងតារាវិថីរបស់ឋាននេះផងដែរ។

Luna-25 គឺជាយានស្រាវជ្រាវព្រះចន្ទដំបូងដែលអភិវឌ្ឍ ផលិត និងដំណើរការទាំងស្រុងដោយប្រទេសរុស្ស៊ីបច្ចុប្បន្ន។ គម្រោងដែលត្រូវបានបង្ហាញកាលពីថ្ងៃទី 11 សីហានេះ មានគោលដៅក្លាយជាយានអវកាសដំបូងដែលចុះចតដោយថ្នមៗនៅតំបន់ប៉ូលខាងត្បូងរបស់ព្រះចន្ទ ដែលគ្រោងនឹងធ្វើឡើងនៅថ្ងៃទី 21 សីហាខាងមុខ។

រូបភាពភ្នំភ្លើង Zeeman នៅប៉ូលខាងត្បូងរបស់ព្រះចន្ទ ដែលថតដោយ Luna-25

គោលដៅចម្បងរបស់គម្រោងនេះគឺការពិសោធដីព្រះចន្ទដើម្បីស្វែងរកទឹកកក ប៉ុន្តែ Roscosmos ក៏បានឱ្យដឹងថា ពួកគេក៏ចង់សាកល្បងបច្ចេកវិទ្យាចុះចតដោយថ្នមៗ រួមនឹងស្រាវជ្រាវស្រទាបដីខាងលើរបស់ឋានមួយនេះផងដែរ។

ការបាញ់បង្ហោះ Luna-25 គឺជាសញ្ញាបង្ហាញថា រុស្ស៊ីបានវិលត្រលប់ទៅកាន់ឋានព្រះចន្ទវិញ ក្រោយការខកខានអស់ 47 ឆ្នាំ។ កម្មវិធី Luna ដំបូងត្រូវបានចាប់ផ្ដើមក្នុងសម័យសូវៀត ដែលសម្រេចបេសកកម្មព្រះចន្ទបានចំនួន 24 លើក ចាប់ពីខែកញ្ញា 1958 ដល់ខែសីហា 1976៕

August 18, 2023

ក្រុមមហាអំណាចអវកាស និង «អ្នកលេងជើងថ្មី» ក្នុងដំណើរទៅកាន់ឋានព្រះចន្ទ

ការបាញ់បង្ហោះយានអវកាសចុះចតលើឋានព្រះចន្ទរបស់រុស្ស៊ី កាលពីថ្ងៃទី 11 សីហា គឺជាការប្រឹងប្រែងថ្មីក្នុងការប្រកួតប្រជែងឡើងទៅកាន់ឋានព្រះចន្ទ ដែលនៅទីនេះមានទាំង «អ្នកលេងជើងចាស់» និង «អ្នកលេងជើងថ្មី»។

ប្រទេសចិន

ប្រទេសដែលមានសេដ្ឋកិច្ចធំជាងគេលំដាប់ទីពីរក្នុងពិភពលោក បាន និងកំពុងវិនិយោគរាប់ពាន់លានដុល្លារទៅក្នុងកម្មវិធីអវកាស ដោយមានគោលដៅតាមឱ្យទាន់សហរដ្ឋអាម៉េរិក និងរុស្ស៊ី។ ឆ្នាំ 2003 ប្រទេសចិនបានក្លាយជាប្រទេសទីបីដែលនាំមនុស្សឡើងទៅកាន់គន្លងតារាវិថី។ ឆ្នាំ 2022 ស្ថានីយអវកាសធានហ្កុង (Tiangong) ត្រូវបានដំឡើងជារៀងអក្សរ T រួចរាល់។

ចិនក៏បាននាំយកបណ្ដារ៉ូបូតស្វ័យប្រវត្តឡើងទៅកាន់ភពអង្គារ និងព្រះចន្ទដោយជោគជ័យ។ ប្រទេសនេះក៏មានគម្រោងនាំមនុស្សឡើងទៅជាន់ដីឋានព្រះចន្ទក្នុងឆ្នាំ 2030 និងសងសង់មូលដ្ឋាននៅទីនោះផងដែរ។

សហរដ្ឋអាម៉េរិក

តាមផែនការក្នុងកម្មវិធី Artemis ណាសាគ្រោងនឹងបំពេញបេសកកម្មជាច្រើនសម្រាប់ការឡើងទៅកាន់ឋានព្រះចន្ទជាថ្មីនៅឆ្នាំ 2025 ហើយរស់នៅយូរអង្វែងនៅទីនោះ ដើម្បីអភិវឌ្ឍបច្ចេកវិទ្យាសម្រាប់ដំណើរឆ្ពោះទៅកាន់ភពអង្គារ។

ដើមសប្ដាហ៍នេះ ណាសាឱ្យដឹងថា Artemis 3 អាចនឹងមិននាំមនុស្សចុះចតលើឋានព្រះចន្ទ ប៉ុន្តែប្រការនេះគឺអាស្រ័យលើកត្តាសំខាន់មួយចំនួន មានដូចជា ប្រព័ន្ធចុះចតរបស់ SpaceX ជាដើម។

ប្រទេសរុស្ស៊ី

ការបាញ់បង្ហោះ Luna-25 របស់រុស្ស៊ីកាលពីថ្ងៃទី 11 សីហា 2023 គឺជាលើកដំបូងដែលប្រទេសនេះដាក់គោលដៅលើឋានព្រះចន្ទ រាប់ចាប់ពីឆ្នាំ 1976 នៅពេលបេសកកម្ម Luna-24 បាននាំយកសំណាកដីព្រះចន្ទមកកាន់ផែនដីដោយជោគជ័យ។ Luna-25 គឺជាបេសកកម្មដំបូងនៃផែនការព្រះចន្ទថ្មីរបស់ទីក្រុងមូស្គូ។

ក្រុម «អ្នកលេងជើងថ្មី»

ការរីកចម្រើនរបស់បច្ចេកវិទ្យាបាន និងកំពុងជួយកាត់បន្ថយការចំណាយសម្រាប់បណ្ដាបេសកកម្មអវកាស ដែលបើកផ្លូវឱ្យក្រុមប្រទេសថ្មីចូលរួមប្រកួតប្រជែង។ យានអវកាសរបស់ឥណ្ឌា Chandrayaan-3 បានចូលដល់គន្លងតារាវិធីព្រះចន្ទកាលពីដើមខែសីហានេះ ដើម្បីត្រៀមសម្រាប់ការចុះចតនៅចុងខែ។

ក៏ប៉ុន្តែ ការឡើងទៅជាន់ដីឋានព្រះចន្ទ មិនមែនជារឿងងាយស្រួលឡើយ។ អង្គការមិនស្វែងរកកម្រៃ SpaceIL របស់ប្រទេសអ៊ីស្រាអែល បានបាញ់បង្ហោះយានចុះចតលើឋានព្រះចន្ទ Beresheet កាលពីឆ្នាំ 2009 ប៉ុន្តែបានបរាជ័យ។ កាលពីខែមេសាឆ្នាំ 2023 ក្រុមហ៊ុនជប៉ុន ISpace ក៏បានបន្តទទួលបរាជ័យក្នុងការប្រកួតប្រជែងនាំស្ថានីយអវកាសទៅចុះចតលើឋានព្រះចន្ទ។

ក្រុមហ៊ុនពីររបស់អាម៉េរិក គឺ Astrobotic និង Intuitive Machines ក៏នឹងធ្វើការបាញ់បង្ហោះយានទៅចុះចតលើឋានព្រះចន្ទនៅចុងឆ្នាំនេះ៕

August 12, 2023

គ្រាន់តែស្ដាប់សំឡេងក្ដារចុច ក៏ AI ដឹងខ្លឹមសារ ពិសេសគឺលេខសម្ងាត់!

AI (បញ្ញាសិប្បនិម្មិត) អាចដឹងបាននូវខ្លឹមសារដែលម្ចាស់កុំព្យូទ័រចុចលើក្ដារចុច តាមរយៈការស្ដាប់សំឡេងពីលេបថបក្នុងហាងកាហ្វេ ហើយមានសុក្រឹតភាពជិត 100%។

ក្រុមស្រាវជ្រាវមួយក្រុមរួមមាន Joshua Harrison មកពីក្រុមហ៊ុន Amazon, សាស្ត្រាចារ្យ Ehsan Toreini មកពីសាកលវិទ្យាល័យ Surrey និងសាស្ត្រាចារ្យ Maryam Mehrenzhad មកពីសាកលវិទ្យាល័យ Royal Holloway របស់អង់គ្លេស ឱ្យដឹងថា កុំព្យូទ័រយួរដៃកំពុងក្លាយជាគោលដៅដ៏ល្អសម្រាប់ការវាយប្រហារដោយការប្រើប្រាស់ AI ព្រោះតែលក្ខណៈចល័តរបស់ពួកវា។

«មនុស្សជាច្រើនចូលចិត្តយកលេបថបទៅធ្វើការក្នុងបណ្ណាល័យ ហាងកាហ្វេ ជាទីដែលសំឡេងចុចកុំព្យូទ័រងាយស្រួលត្រូវគេថតដោយមិនដឹងខ្លួន» របាយការណ៍របស់ក្រុមស្រាវជ្រាវខាងលើសរសេរដូច្នេះ និងបន្តថា «សំឡេងពីគ្រាប់ចុចកុំព្យូទ័រកំពុងក្លាយជាមធ្យោបាយសម្រាប់ការវាយប្រហារប្រកបដោយប្រសិទ្ធភាព ព្រោះវាមានស្រាប់ ចំណែកជនរងគ្រោះក៏មិនមានការសង្ស័យ ហើយបើទោះជាដឹងក៏មិនអាចលាក់បាំង (សំឡេង) បាន»។

ក្រុមខាងលើបានប្រើប្រាស់ឧបករណ៍ច្រើនប្រភេទដើម្បីថតសំឡេងចុចកុំព្យូទ័រ ក្នុងនោះមានទូរស័ព្ទជាដើម។ សំឡេងនោះ ក្រោយមកក៏ត្រូវបានបញ្ជូនទៅកាន់កុំព្យូទ័រដែលមានកម្មវិធីសិក្សាជ្រៅ (deep learning) ពីចម្ងាយ និងមានភារកិច្ចស្វែងយល់នូវខ្លឹមសារដែលត្រូវបានគោលដៅបញ្ចូលទៅក្នុងកុំព្យូទ័រតាមរយៈក្ដារចុច ទៅតាមពេលវេលាដំណាលគ្នា។

នៅក្នុងការពិសោធស្វែងយល់ខ្លឹមសារដែលបញ្ចេញសំឡេងពីក្ដារចុចកុំព្យូទ័រ MacBook Pro និងត្រូវបានថតដោយស្មាតហ្វូន លទ្ធផលដែលទទួលបានគឺត្រូវរហូតដល់ 95%។ ចំណែកការថតតាមរយៈការហៅទូរស័ព្ទវីដេអូដូច Zoom ជាដើម ភាពសុក្រឹតគឺ 93%។

ក្រុមស្រាវជ្រាវនិយាយថា លទ្ធផលនៃការពិសោធនេះបង្ហាញថា វិធីខាងលើនេះមានប្រសិទ្ធភាពចំពោះតែការចុចកុំព្យូទ័ររយៈពេលខ្លីប៉ុណ្ណោះ។ ដូច្នេះ ការវាយប្រហារពីចោរអ៊ីនធើណិត ទំនងជាប្រើប្រាស់វិធីនេះដើម្បីលួចតែទិន្នន័យសំខាន់ៗ និងមានតម្លៃខ្ពស់ មានជាអាទិ៍ ឈ្មោះគណនី លេខសម្ងាត់ និងព័ត៌មានកាត ATM ជាដើម។

វិធីដែលអាចកាត់បន្ថយហានិភ័យត្រូវគេលួចថតសំឡេងចុចកុំព្យូទ័រ គឺការប្រើប្រាស់លេខសម្ងាត់ស្មុគស្មាញ រួមមានអក្សរពិសេសៗ បូកនឹងអក្សរធំ អក្សរតូច និងលេខជាដើម ហើយដាក់លេខកូដបញ្ជាក់ច្រើនជាន់ ឬប្រើវិធីស្កេនផ្ទៃមុខ ក្រយៅដៃដើម្បីការពារសុវត្ថិភាពទិន្នន័យ៕

August 10, 2023

ដំណើរក្លាយជាតារា Idol នៅ Kpop មិនមែនជារឿងធម្មតាឡើយ

ក្មេងជាច្រើននៅកូរ៉េខាងត្បូង ក្លាយជាអ្នកហាត់ការពេលមានវ័យទើបតែ 10 ឆ្នាំ និងចំណាយប្រហែល 10 ឆ្នាំក្នុងការហាត់ច្រៀង រាំ នៅមុនពេលបង្ហាញខ្លួនក្នុងក្រុមចម្រៀង។

«ដើម្បីក្លាយជា idol Kpop ដែលជោគជ័យ អ្នកត្រូវតែជាមនុស្សក្លាហាន មានចំណូលចិត្តខ្ពស់ មានវិន័យ និងសំណាង» Patti Sunio ឱ្យដឹងនៅលើ SCMP ដែលនិយាយអំពីដំណើរក្លាយជា idol ម្នាក់។

ជាដំបូង កុមារដែលមានទេពកោសល្យត្រូវតែចុះកិច្ចសន្យាធ្វើជាអ្នកហាត់ការរបស់ក្រុមហ៊ុនមួយ។ យោងតាម Koreaboo ក្មេងជាច្រើននៅកូរ៉េខាងត្បូងបានជាប់ក្នុងការជ្រើសរើសតាំងពីអាយុ 10 ឆ្នាំ ដោយពួកគេចូលរួមការសម្ដែងសាកល្បងជាមធ្យម 30 លើក មុនពេលចុះកិច្ចសន្យាហាត់ការ។ តាមនិន្នាការសកលរបស់វិស័យឧស្សាហកម្ម Kpop បណ្ដាក្រុមអ្នកវិនិយោគបានពង្រីកដំណើរការជ្រើសរើសអ្នកហាក់ការនៅក្នុងក្របខណ្ឌទូទាំងសកលលោក ផ្ដល់ឱកាសដល់ក្មេងនៅប្រទេសដទៃក្រៅពីកូរ៉េខាងត្បូង។

ក្មេងជាច្រើននៅកូរ៉េខាងត្បូងបានជាប់ក្នុងការជ្រើសរើសតាំងពីអាយុ 10 ឆ្នាំ

Lisa របស់ក្រុម Blackpink គឺជាឧទាហរណ៍មួយសម្រាប់ប្រការខាងលើ។ នាងគឺជាមនុស្សតែម្នាក់គត់ដែលឆ្លងផុតការជ្រើសរើសរបស់ក្រុមហ៊ុនកម្សាន្ត YG នៅប្រទេសថៃ ហើយជាអ្នកហាត់ការជនជាតិបរទេសដំបូងដែលបង្ហាញវត្តមាននៅ YG។ ក្រៅពីសម្ពាធនៃការហ្វឹកហាត់ ក្មេងបរទេសក៏ត្រូវតែឆ្លងកាត់រនាំងភាសា វប្បធម៌ ដើម្បីសម្របខ្លួន។ បណ្ដាក្រុមហ៊ុនគ្រប់គ្រងនឹងទទួលខុសត្រូវលើការចំណាយទាំងអស់របស់អ្នកហាត់ការ។ ខ្ទង់ប្រាក់ចំណាយជាមធ្យមសម្រាប់អ្នកហាត់ការម្នាក់នៅ Kpop គឺប្រហែល 50,000 ដុល្លារ/ឆ្នាំ។

ការធ្វើជាអ្នកហាត់ការគ្រាន់តែជាជំហានដំបូងនៅក្នុងការបើកផ្លូវសម្រាប់ដំណើរដ៏វែងឆ្ងាយ និងប្រកបដោយឧបសគ្គ មុននឹងអាចក្លាយជា idol ម្នាក់។ ក្នុងអំឡុងហាត់ការដែលមានរយៈពេលជាមធ្យម 7 ឆ្នាំ ក្រុមហ៊ុនគ្រប់គ្រងនឹងវាយតម្លៃលើជំនាញ សមត្ថភាពសម្របខ្លួននៅក្នុងក្រុម និងការស៊ូទ្រាំនឹងសម្ពាធរបស់អ្នកហាក់ការម្នាក់ៗ។ ក្រៅពីសំឡេងច្រៀង ក្បាច់រាំ ពួកគេក៏ត្រូវរៀនភាសាបរទេស វិធីសាស្ត្រគ្រប់គ្រងរូបភាព ការឆ្លើយក្នុងកិច្ចសម្ភាស ទំនាក់ទំនងជាមួយមិត្តរួមអាជីព និងការរក្សាទម្ងន់រាងកាយជាដើម។ ជាងនេះ ក្រុមហ៊ុនជាច្រើនក៏ស្នើឱ្យអ្នកហាត់ការសន្យាថាមិនប្រើប្រាស់គ្រឿងញៀន ផឹកគ្រឿងស្រវឹងនៅពេលបើកបរ និងចៀសវាងរឿងអាស្រូវស្នេហាផងដែរ។ Euny Hong អ្នកយកព័ត៌មានអាម៉េរិកដើមកំណើតកូរ៉េខាងត្បូង បានសរសេរលើ The Paris Review ថា «ការបណ្ដុះបណ្ដាលតារា Kpop គឺជាការអប់រំមនុស្សដ៏ពេញលេញ»។

កាលជ្រើសរើសបេក្ខភាពសម្រាប់តំណែងអ្នកហាត់ការរបស់ SM Entertainment នៅជប៉ុន កាលពីឆ្នាំ 2019

កំពូលតារា Kpop ជាច្រើន បានចំណាយស្ទើរពេញមួយយុវវ័យដើម្បីធ្វើជាអ្នកហាត់ការ និងរកឱកាសដើម្បីបង្ហាញខ្លួន។ G-Dragon របស់ Bigbang បានឆ្លងកាត់ការបណ្ដុះបណ្ដាល 11 ឆ្នាំ ក្នុងនោះ 5 ឆ្នាំនៅ SM Entertainment និង 6 ឆ្នាំនៅ YG។ Idol Kpop ជាច្រើនរូបផ្សេងទៀតក៏ធ្លាប់បានឆ្លងកាត់ប្រហាក់ប្រហែលនេះ ក្នុងនោះមានដូចជា Jihyo (TWICE, 10 ឆ្នាំ), Heo Chan Mi (10 ឆ្នាំ), Jennie (Blackpink, 6 ឆ្នាំ), Suho (EXO, 6 ឆ្នាំ)។

ពេលធ្វើជាគណៈកម្មការនៃកម្មវិធី Idol Producer តារាចម្រៀង Lay (EXO) បានបង្ហើបអំពីដំណើរការប្រកួតប្រជែងមុនពេលបានបង្ហាញខ្លួនជាមួយក្រុមថា ក្នុង 120 នាក់ ពួកគេរើសយកតែ 100 នាក់ ហើយបន្តជម្រុះរាប់សិបនាក់ទៀត ដើម្បីយក 24 នាក់។ ចាប់ពី 24 នាក់ ពួកគេក៏ជ្រើសរើស 12 នាក់ចុងក្រោយ។ រៀងរាល់សប្ដាហ៍សុទ្ធតែមានអ្នកហាត់ការម្នាក់ត្រូវចាកចេញ»។

បើទោះជាបង្ហាញខ្លួនក្នុងរូបភាពដ៏អស្ចារ្យ ប៉ុន្តែ idol ជាច្រើននៅ Kpop រកប្រាក់ចំណូលមិនបានច្រើនដូចទស្សនិកជនគិតនោះឡើយ។ ទំព័រ Seoulspace បានផ្សាយថា ក្រុមហ៊ុនកន្សាន្តជាច្រើនយកប្រាក់ចំណូលរហូតដល់ 90% ហើយទុកតែ 10% ប៉ុណ្ណោះសម្រាប់តារាម្នាក់ៗ។ សម្រាប់ក្រុមដែលមានសមាជិក 20 នាក់ដូច NCT ជាដើម នឹងទទួលបានប្រាក់ចំណូលកាន់តែទាប។ នេះមិនទាន់និយាយដល់រឿងបង់ពន្ធជូនរដ្ឋនៅឡើយ៕

Jennie (Blackpink) កាលនៅជាអ្នកហាត់ការ

August 7, 2023

OPPO Reno10 5G តម្លៃ $399 | Reno10 Pro 5G តម្លៃ $569 បានដាក់សម្ពោធជាផ្លូវការយ៉ាងកក្រើកនៅប្រទេសកម្ពុជា

នាល្ងាចថ្ងៃទី 6 ខែសីហា ឆ្នាំ 2023 ក្រុមហ៊ុនស្មាតហ្វូន OPPO ដ៏ធំប្រចាំប្រទេសកម្ពុជាបានបង្ហាញខ្លួនយ៉ាងអធឹកអធមក្នុង «កម្មវិធីសម្ពោធជាផ្លូវការ OPPO Reno10 Series 5G» ដោយមានវត្តមានភ្ញៀវកិត្តិយសជាច្រើនរូប ពិសេសគឺ ព្រះនាងតូច ជេនណា នរោត្តម ជាមួយនឹងវត្តមានទូតសុច្ឆន្ទៈប្រចាំក្រុមហ៊ុន OPPO ទាំង 3 រូបគឺ ពេជ្រ វត្តីសារ៉ាវឌ្ឍី, ថេណា និងកញ្ញា រ៉េត ស៊ូហ្សាណាព្រមទាំងតារាប្រុសស្រីល្បីៗជាច្រើនរូបទៀតដែលបានអញ្ជើញចូលរួមយ៉ាងច្រើននៅក្នុងកម្មវិធីនេះផងដែរ។

នេះជាមហាកិត្តិយសដ៏ធំក្រៃលែងដែលព្រះនាងតូច ជេនណា នរោត្តម បានផ្តល់វត្តមានជាភ្ញៀវកិត្តិយស ចូលរួមបកស្រាយចម្រៀងយ៉ាងពិរោះរណ្តំ ព្រមទាំងផ្តល់កិត្តិយសក្នុងការប្រកាសតម្លៃរបស់ស្មាតហ្វូនស៊េរីថ្មីជូនដល់ក្រុមហ៊ុន OPPO ផងដែរ ។ ចំណែកតារាចម្រៀង Original Song លោក ថេណា និង កញ្ញា រ៉េត ស៊ូហ្សាណា ក៏បានច្រៀងចម្រៀងថ្មីៗព្រមទាំងចែករំលែកបទពិសោធពីការប្រើប្រាស់នូវស្មាតហ្វូន OPPO Reno10 Series 5G ផងដែរ។ រីឯបវរកញ្ញា ពេជ្រ វត្តីសារ៉ាវឌ្ឍី បានដើរបង្ហាញម៉ូដជាមួយនឹងទូរស័ព្ទស៊េរីថ្មី OPPO Reno10 Series 5G យ៉ាងទាក់ទាញជាមួយនឹងសម្លេងហ៊ោគាំទ្រពេញសាលកម្មវិធីផងដែរ។ មិនតែប៉ុណ្ណោះ ក្នុងនោះក៏ឃើញមានវត្តមានបវរកញ្ញាដែលជា Top3 ក្នុងកម្មវិធី Miss Pre-Teen ដើរម៉ូដយ៉ាងស្រស់ស្អាតផងដែរ។

ក្រុមហ៊ុន OPPO បានដាក់សម្ពោធនូវស្មាតហ្វូន 2 ម៉ូដែលគឺ OPPO Reno10 5G និង Reno10 Pro 5G ដែល កញ្ញា ងួន ភួងទេពសុនិច ជាតួនាទីជា Product Manager បានឡើងធ្វើបទបង្ហាញអំពីមុខងារ អត្ថប្រយោជន៍ សមត្ថភាព និងភាពឈ្លាសវៃរបស់ស្មាតហ្វូនទាំង 2 ម៉ូដែលនេះផងដែរ។

សម្រាប់ OPPO Reno10 5G បានបំពាក់នូវប្រព័ន្ធកាមេរ៉ា Portrait ដ៏ពេញលេញជាមួយលែន Telephoto Portrait ទំហំ 32MP បំពាក់នូវសេនស័រ Flagship របស់ SONY IMX709 ដែលអាចថតរូប Portrait បានហើយអាច Zoom បានទៀតជាមួយបច្ចេកវិទ្យា 2X Optical Zoom និង Digital Zoom ដល់ទៅ 20X ។ OPPO Reno10 5G ក៏បានបំពាក់នូវបច្ចេកវិទ្យាសាកថ្មល្បឿនលឿន 67W SUPERVOOC សាកពេញ 100% ប្រើពេលត្រឹមតែ 47នាទីតែប៉ុណ្ណោះ បន្ថែមពីសាកថ្មលឿនហើយទំហំថ្មក៏ធំដែររហូតដល់ 5000mAh។ មិនតែប៉ុណ្ណោះ បើនិយាយពី Spec អេក្រង់វិញគឺកាន់តែអេម ដោយបំពាក់មកនូវអេក្រង់កោង 3D កម្រិតកំពូលជាមួយ Refresh Rate 120Hz អូសដោយមិនទាក់ និងទើសចិត្តឡើយជាមួយអេក្រង់ធំដល់ទៅ 6.7Inch AMOLED។ បើក្រឡេកទៅមើលការឌីហ្សាញវិញប្រកបដោយភាពប្រណីត និងទាន់សម័យដោយផ្តល់នូវជម្រើស 2 ពណ៌គឺ Ice Blue និង Silvery Grey។

ចំណែក OPPO Reno10 Pro 5G នាំមកជូនជាមួយជម្រើស 2 ពណ៌គឺ Glossy Purple រចនាឡើងដោយកញ្ចក់ថ្លារលោង ជាមួយពណ៌ស្វាយបែប Premium និងមួយពណ៌ទៀតគឺ Silvery Grey ដែលរចនាបែប OPPO Glow ជាមួយនឹងអេក្រង់កោងបែប 3D ដូចទៅនឹង OPPO Reno10 5G ដែរ។ អ្វីដែលគួរឲ្យចាប់អារម្មណ៍នោះគឺ OPPO Reno10 Pro 5G បានប្រើប្រាស់សេនស័រ SONY ទាំងអស់ដែលផ្តល់ឲ្យការថតរូបទាំងនៅលើកាមេរ៉ាមុខនិងក្រោយច្បាស់គ្រប់ពេលវេលាប្រៀបដូចប្រើកាមេរ៉ាអាជីព។ រីឯថាមពលថ្មទំហំ 4600mAh និងកម្លាំងសាកថ្មលឿនរហូតដល់ 80W SUPERVOOC សាកពេញ 100% ក្នុងពេលត្រឹមតែ 28នាទីប៉ុណ្ណោះ។ បន្ថែមពីនេះ វាមានសមត្ថភាពប្រតិបត្តិការកាន់តែប្រសើរ ជាមួយនឹងឈីបគ្រប់គ្រងថាមពល SUPERVOOC S ផ្តាច់មុខនិងដំបូងនៅលើ OPPO ផងដែរ។ បើនិយាយពីកម្លាំងប្រតិបត្តិការវិញបំពាក់ជាមួយឈីប Qualcomm ® Snapdragon 778 5G ដ៏ល្បីល្បាញទទួលស្គាល់លើកម្លាំងប្រតិបត្តិការលើពិភពលោក។

ជាមួយនឹងតម្លៃកាន់តែពិសេស! កក់ទុកមុននូវសមាជិកថ្មីរបស់ OPPO Reno10 Series 5G ទាំងពីរម៉ូដែល Reno10 5G តម្លៃ $399 | Reno10 Pro 5G តម្លៃ $569 ចាប់ពីថ្ងៃទី 7 រហូតដល់ថ្ងៃទី 12 ខែសីហា ឆ្នាំ2023 មានការថែមជូនកាដូតម្លៃ $182 រួមមាន៖ បណ្ណធានាអេក្រង់រយៈពេល1ឆ្នាំ តម្លៃ$89, កាតាបដ៏ស្រស់ស្អាត តម្លៃ$39 និងស៊ីមស្មាតលេខពិសេស Bronze តម្លៃ $54 ភ្ជាប់គម្រោង SurfLikeCrazy រយៈពេល 6ខែ។ តោះចាំអីទៀត!

តម្លៃកាន់តែពិសេស! ស្មាតហ្វូន OPPO Reno10 Series 5G ទទួលកក់ចាប់ពីថ្ងៃទី 7 រហូតដល់ថ្ងៃទី 12 សីហា ដើម្បីទទួលបានកាដូពិសេសៗជាច្រើន

August 7, 2023

យានអវកាស Voyager 2 ភ្ជាប់ទំនាក់ទំនងឡើងវិញជាមួយផែនដី

យានអវកាសរបស់អាម៉េរិកដែលបានហោះដល់តំបន់អន្តរតារា និងបានដាច់ទំនាក់ទំនងជាមួយណាសាមុននេះ បានចាប់ផ្ដើមបញ្ជូនទិន្នន័យមកកាន់ផែនដីវិញហើយ កាលពីថ្ងៃទី 04 សីហា។

យានអវកាស Voyager 2 ភ្ជាប់ទំនាក់ទំនងឡើងវិញជាមួយផែនដី និងកំពុងដំណើរការធម្មតា។ បេសកកម្មយូរឆ្នាំ Voyager 2 របស់ទីភ្នាក់ងារអវកាសអាម៉េរិក (ណាសា-NASA) ត្រូវបានបាញ់បង្ហោះកាលពីឆ្នាំ 1977 ហើយបច្ចុប្បន្នស្ថិតនៅចម្ងាយ 19.9 ពាន់លានគឺឡូម៉ែត្រពីផែនដី។ យាននេះបានដាច់ទំនាក់ទំនងនឹងណាសា បន្ទាប់ពីកូដបញ្ជាមួយចំនួនបានធ្វើឱ្យអង់តែនរបស់ Voyager 2 ងាកចេញពីផែនដីកាលពីថ្ងៃទី 28 សីហា។ នេះបើតាមការផ្សាយរបស់ Live Science។

កាលពីថ្ងៃទី 01 សីហា ក្រុមអ្នកជំនាញរបស់ទីភ្នាក់ងារអវកាសអាម៉េរិក (NASA) បានទទួលរលកសញ្ញាដែលអាចឱ្យពួកគេភ្ជាប់ទំនាក់ទំនងឡើងវិញ។ Voyager 2 ត្រូវបានដំឡើងកម្មវិធីដែលអាចបង្វែរទិសរបស់អង់តែនដោយឯកឯងច្រើនដងក្នុងមួយឆ្នាំ ក្នុងករណីមានបញ្ហា។ ការបង្វែរអង់តែនដោយស្វ័យប្រវត្តតម្រង់មកកាន់ផែនដីលើកបន្ទាប់នឹងធ្វើឡើងនៅក្នុងខែតុលាឆ្នាំនេះ។

យានអវកាស Voyager 1 និង Voyager 2 បច្ចុប្បន្នស្ថិតនៅចម្ងាយ 19.9 ពាន់លានគឺឡូម៉ែត្រពីផែនដី

យានអវកាស Voyager 1 និង Voyager 2 ត្រូវបានបាញ់បង្ហោះកាលពីខីសីហា និងកញ្ញា ឆ្នាំ 1977 ក្នុងនោះ Voyager 2 ត្រូវបានបាញ់បង្ហោះមុន។ យានទាំងពីរនេះសុទ្ធតែបានហោះកាត់ពីមុខបណ្ដាភពដែលនៅជាយប្រព័ន្ធព្រះអាទិត្យ មុនពេលឆ្លងកាត់ព្រំដែនឆ្ងាយបំផុតរបស់តំបន់ហេលីអូស្ពែរ (Heliosphere) ជាស្រទាប់ក្រៅបង្អស់នៃបរិយាកាសព្រះអាទិត្យដែលបែងចែកប្រព័ន្ធព្រះអាទិត្យពីតំបន់អន្តរតារា។

យាន Voyager 1 បានទៅដល់តំបន់អន្តរតារាមុន ដោយបានឆ្លងកាត់ហេលីអូស្ពែរកាលពីខែសីហា 2012។ បច្ចុប្បន្ន យាននេះកំពុងស្ថិតឆ្ងាយពីផែនដី 23.8 ពាន់លានគីឡូម៉ែត្រ។ Voyager 1 និង Voyager 2 នៅសល់ថាមពលដែលអាចឱ្យប្រើប្រាស់បានរហូតដល់យ៉ាងតិចត្រឹមឆ្នាំ 2025។

Voyager 1 និង Voyager 2 នឹងនៅតែអាចបន្តបំពេញបេសកកម្មផ្ញើសារទៅកាន់ភាវៈរស់នៅក្នុងប្រព័ន្ធផ្កាយនានា បន្ទាប់ពីពួកវាអស់ថាមពល ដោយសារតែមានបំពាក់ថាសដែលផ្ទុកសារពីមនុស្សលោក ក្នុងនោះមានទាំងសំឡេងនានា និងផែនទីផ្កាយរបស់ផែនដីជាដើម៕

August 5, 2023

Taylor Swift ចំណាយជាង 50 លានដុល្លារសម្រាប់ជាអំណោយជូនក្រុមការងារ

កំពូលតារាចម្រៀងប៉ប់ Taylor Swift បានចំណាយប្រាក់ចំនួន 55 លានដុល្លារ សម្រាប់ជារង្វាន់ជូនក្រុមការងារបើកឡាន អ្នករៀបចំអាហារហូបចុច អ្នកដំឡើងឆាក និងក្រុមអ្នករាំជាដើម ដែលធ្វើការនៅក្នុងដំណើរសំដែង Eras Tour របស់នាងនៅសហរដ្ឋអាម៉េរិក។

យោងតាមប្រភពព័ត៌មាននានាដែលបានប្រាប់ទំព័រ People កំពូលតារាចម្រៀងស្រី Taylor Swift ថ្មីៗនេះបានប្រគល់ប្រាក់រង្វាន់ជូនដល់បុគ្គលិកទាំងអស់ដែលបម្រើការនៅក្នុងដំណើរសំដែងជុំវិញសហរដ្ឋអាម៉េរិករបស់នាងនៅក្នុងរយៈពេល 5 ខែកន្លង។

ទំព័រ TMZ ក៏បានផ្សាយថា កំពូលតារាចម្រៀងវ័យ 33 ឆ្នាំរូបនេះ បានផ្ដល់រង្វាន់ជូនដល់អ្នកបើកបររថយន្តម្នាក់ៗ 100,000 ដុល្លារ។ អ្នកបើកបររថយន្តដឹកសម្ភារៈសម្រាប់ការសម្ដែងរបស់ Taylor Swift មានប្រហែល 50 នាក់ ដែលនេះមានន័យថា គ្រាន់តែអ្នកបើកបររថយន្តមួយមុខ Taylor ត្រូវចំណាយប្រាក់អស់ 5 លានដុល្លារបាត់ទៅហើយ។

ទិន្នន័យរបស់ Pollstar បង្ហាញថា Eras Tour រកប្រាក់ពីការលក់សំបុត្របាន 300.8 លានដុល្លារអាម៉េរិក រាប់ចាប់តាំងពីខែមីនារហូតដល់បច្ចុប្បន្ន។ តម្លៃជាមធ្យមរបស់សំបុត្រចូលទស្សនាខន់ស៊ើតរបស់ Taylor Swift គឺ 253 ដុល្លារ។ បន្ទាប់ពីការសម្ដែងនៅក្នុង 22 ទីតាំងបានបញ្ចប់ Eras Tour លក់សំបុត្របានជាងមួយលានសន្លឹក។

តាមគម្រោង Taylor Swift នឹងបញ្ចប់រដូវកាលសម្ដែងរបស់ខ្លួននៅសហរដ្ឋអាម៉េរិកត្រឹមពាក់កណ្ដាលខែសីហានេះ។ ចាប់ពីចុងខែនេះ Taylor Swift នឹងចាប់ផ្ដើមដំណើរសម្ដែងរបស់ខ្លួននៅអាម៉េរិកឡាទីន បន្ទាប់មកគឺនៅអាស៊ី អឺរ៉ុប និងអូស្ត្រាលីនាឆ្នាំក្រោយ។

កម្មវិធីដំណើរសម្ដែង Eras Tour របស់ Taylor Swift ត្រូវបានគេព្យាករថា នឹងជាព្រឹត្តិការណ៍សម្ដែងដែលរកបានប្រាក់ចំណូលច្រើនជាងគេបង្អស់នៅគ្រប់សម័យកាល។

យោងតាមស្ថិតិរបស់ទស្សនាវដ្ដី Forbes ដែលបានចុះផ្សាយកាលពីខែមិថុនា 2023 Taylor Swift គឺជាអ្នកចម្រៀងរកស៊ីមានបានដោយខ្លួនឯងមានទ្រព្យច្រើនជាងគេលំដាប់ទីពីរក្នុងវិស័យចម្រៀង បន្ទាប់ពី Rihanna។ នាងក៏ជាប់ចំណាត់ថ្នាក់ទី 34 នៅក្នុងតារាងចំណាត់ថ្នាក់ស្ដីពី «ស្ត្រីរកស៊ីមានបានដោយខ្លួនឯងដែលមានទ្រព្យច្រើនបំផុតនៅសហរដ្ឋអាម៉េរិក»។ ទ្រព្យសរុបរបស់ Taylor Swift ត្រូវបានគណនាឃើញថា មានរហូតដល់ 740 លានដុល្លារអាម៉េរិក៕

August 4, 2023

រុស្ស៊ីនឹងបាញ់បង្ហោះយានស្រាវជ្រាវព្រះចន្ទដំបូង ក្រោយជិត 50 ឆ្នាំ

កាលពីថ្ងៃទី 03 សីហា ទំព័រ RIA Novosti របស់រុស្ស៊ីបានរាយការណ៍ថា ប្រទេសនេះនឹងបាញ់បង្ហោះយានស្រាវជ្រាវព្រះចន្ទ Luna-25 នៅក្នុងខែសីហាខាងមុខ ដែលនេះគឺជាជំហានដំបូងនៅក្នុងការវិលត្រលប់មករកកម្មវិធីស្រាវជ្រាវឋានព្រះចន្ទរបស់រុស្ស៊ី ក្រោយការផ្អាកអស់រយៈពេលជិត 50 ឆ្នាំ។

យោងតាម RIA Novosti កាលបរិច្ឆេទសម្រាប់ការបាញ់បង្ហោះយាន Luna-25 ត្រូវបានកំណត់យកវេលាទៀបភ្លឺ ថ្ងៃទី 11 សីហា 2023។ រ៉ុក្កែត Soyuz-2.1b នឹងត្រូវបានបាញ់បង្ហោះចេញពីមជ្ឈមណ្ឌលអវកាស Vostochny ក្នុងខេត្ត Amur នៅវេលាម៉ោង 02 និង 10 នាទី (ម៉ោងនៅមូស្គូ) នាំយកកំណាត់ខាងលើ Fregat និងស្ថានីយស្វ័យប្រវត្តឡើងទៅកាន់ទីអវកាស។ បន្ទាប់ពីត្រូវបានបាញ់បង្ហោះ និងផ្ដាច់ខ្លួនពីរ៉ុក្កែត កំណាត់ខាងលើ Fregat នឹងនាំស្ថានីយស្វ័យប្រវត្តឆ្ពោះទៅកាន់គន្លងតារាវិថីផែនដី និងហោះសំដៅឋានព្រះចន្ទ។ ក្រោយរយៈពេលបួនថ្ងៃកន្លះ ស្ថានីយនេះនឹងហោះចូលដល់គន្លងតារាវិថីជុំវិញឋានព្រះចន្ទ រួចកែប្រែគន្លងគោចរជាច្រើនលើក មុននឹងចុះចតនៅតំបន់ប៉ូលខាងត្បូង។

បេសកកម្មរបស់ Luna-25 គឺជាការសាកល្បងបច្ចេកវិទ្យានានាដែលទាក់ទងនឹងការចុះចតលើតំបន់ប៉ូលរបស់ព្រះចន្ទ និងការស្រាវជ្រាវ ពិសោធទៅលើប្រភពធនធាននានានៅលើឋានមួយនេះ ក្នុងនោះមានទឹកជាដើម។ ភារកិច្ចផ្នែកវិទ្យាសាស្ត្ររបស់ Luna-25 គ្រោងនឹងអូសបន្លាយពេលមួយឆ្នាំ។

យានចុះចត Luna-24 របស់អតីតសូវៀត (រុស្ស៊ី)

យានស្រាវជ្រាវព្រះចន្ទមុននោះរបស់ប្រទេសរុស្ស៊ី គឺ Luna-24 ដែលត្រូវបានបាញ់ប្រហោះឡើងទៅកាន់ទីអវកាសកាលពីឆ្នាំ 1976។ ព្រឹត្តិការណ៍នោះបានក្លាយជាប្រវត្តិសាស្ត្រនៃការស្រាវជ្រាវទីអវកាសរបស់ពិភពលោក នៅពេលវាយកបានសំណាកដីពីឋានព្រះចន្ទ ដែលក្រោយមកត្រូវបានបញ្ជាក់ថា ទឹកមានវត្តមាននៅលើឋានរណបមួយនេះ។

តាមផែនការ ក្រោយពីព្រឹត្តិការណ៍បាញ់បង្ហោះ Luna-25 រុស្ស៊ីក៏មានគម្រោងបាញ់បង្ហោះយាន Luna-26 និង Luna-27 នៅក្នុងឆ្នាំ 2024 និង 2025 ផងដែរ៕

August 4, 2023

ស្ថានីយអវកាសពាណិជ្ជកម្ម ជិតបានឡើងទៅជំនួស ISS

Airbus និងក្រុមហ៊ុនអាម៉េរិក Voyager Space កាលពីថ្ងៃទី 02 សីហា បានប្រកាសបង្កើតក្រុមហ៊ុនបណ្ដាក់ទុនរួមដើម្បីអភិវឌ្ឍ Starlab ដែលជាកំណែស្ថានីយអវកាសពាណិជ្ជកម្ម ដែលអាចជំនួសស្ថានីយអវកាសអន្តរជាតិ (ISS)។

ក្រុមហ៊ុនបណ្ដាក់ទុនរួមដែលមានទីស្នាក់ការកណ្ដាលនៅប្រទេសអាល្លឺម៉ង់នេះ គ្រោងនឹងអាចឆ្លើយតបនឹងតម្រូវការពីបណ្ដាទីភ្នាក់ងារអវកាសនៅលើពិភពលោក ទន្ទឹមនឹងការបើកផ្លូវឱ្យមានឱកាសថ្មីសម្រាប់វិស័យពាណិជ្ជកម្ម។ នេះបើតាម Matthew Kuta ប្រធានក្រុមហ៊ុន Voyager Space។

ដើម្បីជំនួស ISS ណាសាមានគម្រោងទិញសេវាកម្មពីដៃគូសហការជំនួសឱ្យការចាត់ចែងកម្មវិធីដោយផ្ទាល់ ដូចទៅនឹងអ្វីដែលបានអនុវត្តនៅក្នុងការនាំអវកាសចរឡើងទៅកាន់ទីអវកាស។ Voyager Space ទទួលបានកិច្ចព្រមព្រៀងតម្លៃ 160 លានដុល្លារពីណាសាកាលពីចុងឆ្នាំ 2021 ដើម្បីអភិវឌ្ឍ Starlab។

ទន្ទឹមនឹង Voyager Space ណាសាក៏បានប្រគល់ប្រាក់ 130 លានដុល្លារឱ្យ Blue Origin និង 126 លានដុល្លារឱ្យ Northrop Grumman ដើម្បីអភិវឌ្ឍបណ្ដាគម្រោងអវកាសដោយឡែក។ ក្រុមហ៊ុនអាម៉េរិក Axiom Space ក៏កំពុងអភិវឌ្ឍស្ថានីយអវកាសមួយក្រោមការជួយគាំទ្រពីណាសា និងក្រុមហ៊ុន Thales Alenia Space ផងដែរ។

AFP ឱ្យដឹងថា តាមផែនការ Starlab នឹងត្រូវបានបាញ់បង្ហោះឡើងទៅកាន់គន្លងតារាវិថីនៅឆ្នាំ 2028។ ស្ថានីយអវកាសថ្មីនេះនឹងមានអង្កត់ផ្ចិតប្រវែង 8 ម៉ែត្រ វែងជាងជិតពីរដងធៀបនឹង ISS ប៉ុន្តែផ្ទៃក្រឡាខាងក្នុងស្មើនឹងពាក់កណ្ដាល ព្រោះថា ISS មានម៉ូឌុលច្រើនជាង។

August 3, 2023

Tag: កម្មវិធី